စိုက်ပျိုးရေးကဏ္ဍသည် နိုင်ငံ GDP ၏ (၂၃ ဒသမ ၇) ရာခိုင်နှုန်းအထိပါဝင်နေ

စိုက်ပျိုးရေးကဏ္ဍသည် နိုင်ငံတော်၏ ပြည်တွင်းအသားတင်ထုတ်လုပ်မှုနှင့် ဝန်ဆောင်မှုတန်ဖိုး (ဂျီဒီပီ) ၏ (၂၃ ဒသမ ၇) ရာခိုင်နှုန်းအထိပါဝင်နေသည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ နိုဝင်ဘာ ၂၃ ရက်နံနက်ပိုင်းက ဧရာဝတီတိုင်း၊ မအူပင်မြို့၌ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန စိုက်ပျိုးရေးနှင့်မွေးမြူရေးတက္ကသိုလ် (မအူပင်)ဖွင့်ပွဲတွင် ပြောကြားခဲ့ခြင်းဖြစ်သည်။

ထို့ပြင် နိုင်ငံ့လူဦးရေ၏ (၄၆) ရာခိုင်နှုန်းခန့်သည် စိုက်ပျိုးရေး၊ မွေးမြူရေးလုပ်ငန်းများနှင့်ဆက်စပ်သည့် လုပ်ငန်းများတွင် အသက်မွေးဝမ်းကျောင်းပြုနေကြသည့် ကျေးလက်နေသူများဖြစ်၍ စိုက်ပျိုးမွေးမြူရေးကဏ္ဍဖွံ့ဖြိုးတိုးတက်ပြီး ကျေးလက်နေသူများ၏ ဝင်ငွေတိုးတက်မှသာ ကျေးလက်ဒေသဖွံ့ဖြိုးတိုးတက်ရေးမှ တစ်ဆင့် နိုင်ငံတော်၏စီးပွားရေးဖွံ့ဖြိုးတိုးတက်အောင်ဆောင်ရွက်နိုင်မည်ဟု ပြောသည်။

မြန်မာနိုင်ငံ၌ စိုက်ပျိုးမြေအမြောက်အများရှိပြီး သီးနှံမျိုးစုံစိုက်ပျိုးနိုင်သည့် ရာသီဥတုနှင့် ဂေဟစနစ်မျိုးစုံရှိခြင်း၊ ရေချိုအရင်းအမြစ် ကြွယ်ဝခြင်းတို့ကြောင့် ပြည်တွင်းစားရေရိက္ခာဖူလုံသည့်အပြင် ပိုလျှံသည့် လယ်ယာသားငါးထွက်ကုန်များကို ပြည်ပသို့တင်ပို့လျက်ရှိသည်ဟု ပြောသည်။

" အထူးသဖြင့် ဧရာဝတီတိုင်းဟာ မြန်မာနိုင်ငံရဲ့ “စပါးကျီ”အဖြစ် သမိုင်းအစဉ်အလာကြီးတဲ့ ဒေသဖြစ်ပါတယ်။ အခုလို စိုက်ပျိုးရေးနှင့်မွေးမြူရေးတက္ကသိုလ် (မအူပင်) ဖွင့်လှစ်နိုင်ခြင်းဟာ ဧရာဝတီတိုင်းရဲ့ အဓိကလိုအပ်ချက်ကို ဖြည့်ဆည်းပေးနိုင်မှာဖြစ်တဲ့‌အပြင် တိုင်းဒေသကြီးရဲ့ စိုက်ပျိုးမွေးမြူရေးလုပ်ငန်းတွေ တိုး တက်ခြင်းမှသည် နိုင်ငံတော်ရဲ့ စိုက်ပျိုး၊ မွေးမြူရေးကဏ္ဍဖွံ့ဖြိုးတိုးတက်ရေးကိုရရှိစေနိုင်မယ်လို့ယုံကြည်ပါတယ်"ဟု ယာယီသမ္မတက ပြောသည်။

ဧရာဝတီတိုင်းသည် မြန်မာနိုင်ငံ၏ အဓိကဆန်စပါးစိုက်ပျိုးထုတ်လုပ်ဖြန့်ဖြူးပေးသည့် ဒေသကြီးဖြစ်သည့်အပြင် ငါးပုဇွန်မွေးမြူရေးလုပ်ငန်းများလည်း အများအပြားရှိသော်လည်း ဧရာဝတီတိုင်းအတွင်းတွင် ရေကြီးကွင်း၊ ရေနက်ကွင်းများ ဧရိယာကျယ်ပြန့်စွာရှိနေပြီး စိုက်ပျိုးရေးလုပ်ငန်းအတွက် အပြည့်အဝအ သုံးချနိုင်ခြင်းမရှိသေးသဖြင့် စိုက်ပျိုးရေးနှင့် မွေးမြူရေးတွဲဖက်ဆောင်ရွက်သည့်စနစ်များကို တိုးချဲ့ဆောင်ရွက်ကြရမည်ဟု ယာယီသမ္မတက မှာကြားခဲ့သည်။

စက်မှု၊စိုက်ပျိုး၊မွေးမြူရေး အထက်တန်းကျောင်း (၈၉) ကျောင်းနှင့် စိုက်ပျိုးရေးနှင့်မွေးမြူရေးသိပ္ပံအဖြစ်ကျောင်း (၉) ကျောင်း တိုးချဲ့ဖွင့်လှစ်ထားနိုင်

၂၀၂၁ ခုနှစ်စတင်ပြီး စိုက်ပျိုးမွေးမြူရေးဘွဲ့ရ ပညာရှင်များ အလယ်အလတ်အဆင့် စိုက်ပျိုးရေး၊မွေးမြူရေး၊ ဒီပလိုမာလက်မှတ်ရပညာရှင်များ၊ ဘာသာရပ်ဆိုင်ရာ ကျွမ်းကျင်အဆင့်ရှိ အသိမှတ်ပြုလက်မှတ်ရပညာရှင်များ ပိုမိုမွေးထုတ်ပေးနိုင်ရန်ကြိုးပမ်းဆောင်ရွက်ခဲ့ကြောင်း မြန်မာနိုင်ငံ ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ဗိုလ်ချုပ်မှူးကြီးမင်းအောင်လှိုင်ကပြောသည်။

အခြေခံပညာနှင့် စက်မှု၊ စိုက်ပျိုးမွေးမြူရေးအထက်တန်းကျောင်း (၈၉) ကျောင်း ၊ ရှိရင်းစိုက်ပျိုးရေး သိပ္ပံ (၁၅) ကျောင်းမှ မွေးမြူရေးဘာသာရပ်ပါ သင်ကြားပေးနိုင်သည့် စိုက်ပျိုးရေးနှင့်မွေးမြူရေး သိပ္ပံအဖြစ် ကျောင်း (၉) ကျောင်းကို တိုးချဲဖွင့်လှစ်နိုင်ခဲ့ကြောင်း ယာယီသမ္မတက ပြောကြားခဲ့သည်။

ယနေ့ ကျင်းပသည့် စိုက်ပျိုးရေးနှင့်မွေးမြူရေးတက္ကသိုလ် (မအူပင်) ဖွင့်ပွဲ အခမ်းနားတွင် မြန်မာနိုင်ငံ‌တော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ဗိုလ်ချုပ်မှူးကြီးမင်းအောင်လှိုင်က အထက်ပါအတိုင်းပြောကြားခဲ့ခြင်းဖြစ်သည်။

ထိုပြင် ငါးလုပ်ငန်းသိပွံ (တွံ့တေး) ကျောင်း (၁) ကျောင်းနှင့် တိရစ္ဆာန်ဆေးကုသရေးသိပ္ပံ (၁) ကျောင်းတို့ကို တိုးချဲ့ဖွင့်လှစ်ပေးခဲ့ပြီး အခြေခံလူစွမ်းအားအရင်းအမြစ်ကို ယခင်ကထက် စုစုပေါင်း (၈၃၅၂) ဦးကို သင်ကြားမွေးထုတ်ပေးနိုင်မည်ဖြစ်ကြောင်း ယာယီသမ္မတကပြောသည်။

ယခုဖွင့်လှစ်သည့် စိုက်ပျိုးရေးနှင့်မွေးမြူရေးတက္ကသိုလ် (မအူပင်) ကနေလည်း နှစ်စဉ် စိုက်ပျိုးမွေးမြူရေးပညာရှင် (၃၀၀) ဦးစီ မွေးထုတ်ပေးနိုင်မည်ဖြစ်ကြောင်းလည်း သိရသည်။

အဆိုပါ တက္ကသိုလ်ကို ရေဆင်းစိုက်ပျိုးရေး တက္ကသိုလ်နှင့် မွေးမြူရေးဆိုင်ရာ ဆေးတက္ကသိုလ်တို့ ကဲ့သို့ ထိပ်တန်းတက္ကသိုလ် ဖြစ်လာစေရန် ရည်မှန်းထားကြောင်းလည်း ယာယီသမ္မတက ပြောသည်။

ရန်ကုန်နှင့် ဧရာဝတီတိုင်းတို့၌ ယနေ့ နံနက်အစောပိုင်းက မီးလေ-ာင်မှုများဖြစ်ပွားခဲ့

ရန်ကုန်တိုင်းနှင့် ဧရာဝတီတိုင်းတို့တွင် ယနေ့ နိုဝင်ဘာ ၂၄ ရက်နံနက်အစောပိုင်းက နာရီပိုင်းသာခြား၍ မီးလေ-ာင်မှုများဖြစ်ပွားခဲ့ကြောင်း မီးသ-တ်တပ်ဖွဲ့ထံမှ သိရသည်။

ရန်ကုန်တိုင်း၊ ဒဂုံမြို့သစ် (မြောက်ပိုင်း) မြို့နယ်၊ (၄၃) ရပ်ကွက်၊ အေးရိပ်သာ (၂) လမ်းတွင် နံနက် ၂ နာရီ ၄၀ မိနစ်ခန့်က မီးလေ-ာင်မှုဖြစ်ပွား၍ ဒဂုံမြို့သစ်(မြောက်ပိုင်း) မြို့နယ် မီးသ-တ်စခန်းမှတပ်ဖွဲ့ဝင်များ၊ ရန်ကုန်နာရေးကူညီမှုအသင်းမှအဖွဲ့ဝင်များမှပူးပေါင်းငြှိမ်းသ-တ်ခဲ့ကြသဖြင့် နံနက် ၂ နာရီ ၅၀ မိနစ်တွင် မီးငြိမ်းသွားခဲ့ကြောင်း သိရသည်။

ထို့ပြင် နံနက် ၁ နာရီခွဲကလည်း ဧရာဝတီတိုင်း၊ ပန်းတနော်မြို့နယ်၊ အရှေ့ပိုင်းရပ်ကွက်၊ ဦးအောင်ဇေယျလမ်းတွင် မီးလောင်မှုဖြစ်ပွား၍ ပန်းတနော်မြို့နယ် မီးသ-တ်စခန်းမှတပ်ဖွဲ့ဝင်များ၊ အရန်မီးသ-တ်တပ်ဖွဲ့ဝင်များမှပူးပေါင်းငြှိမ်းသ-တ်ခဲ့ကြသဖြင့် နံနက် ၁ နာရီ ၅၀ မိနစ်တွင် မီးငြိမ်းသွားခဲ့ကြောင်း သိရသည်။

၆ ရက်မြောက်နေ့အထိ ရွှေကုက္ကိုလ်နယ်မြေမှထိန်း သိမ်းနိုင်ခဲ့သည့် ပြည်ပနိုင်ငံသား (၁,၇၄၆) ဦးရှိပြီဖြစ်

အွန်လိုင်းလိမ်လည်မှု၊ အွန်လိုင်းလောင်းကစားမှုများပြုလုပ်သည့် ရွှေကုက္ကိုလ်နယ်မြေအား လုံခြုံရေးအဖွဲ့ဝင်များမှဦးဆောင်၍ သက်ဆိုင်ရာအဖွဲ့များပူးပေါင်းကာ နိုဝင်ဘာ ၁၈ ရက်မှစတင်၍ ရှင်းလင်းဖော်ထုတ်မှုများပြုလုပ်ခဲ့ကြကြောင်း သိရသည်။

ထိုသို့ ရှင်းလင်းဖော်ထုတ်မှုများပြုလုပ်ရာ ယမန်နေ့ နိုဝင်ဘာ ၂၃ ရက်တွင် အွန်လိုင်းလိမ်လည်မှုနှင့် လောင်း ကစားမှုများကျူးလွန်ပြီး ထွက်ပြေးတိမ်းရှောင်ပုန်း အောင်းနေထိုင်လျက်ရှိသော တရုတ်နိုင်ငံသား (၆၅) ဦး၊ ဗီယက်နမ်နိုင်ငံသား (၈) ဦး၊ မလေးရှားနိုင်ငံသား (၁) ဦး၊ ကင်ညာနိုင်ငံသား (၁၃) ဦး၊ အီသီရိုးပီးယားနိုင်ငံသား (၄) ဦး၊ အင်ဒိုနီးရှားနိုင်ငံသား (၆) ဦး၊ ယူဂန်ဒါနိုင်ငံသား (၆) ဦး၊ နီပေါနိုင်ငံသား (၁) ဦး၊ အိန္ဒိယနိုင်ငံသား (၂၀) ဦး၊ ဇင်ဘာဘွေနိုင်ငံသား (၁) ဦး၊ ဖိလစ်ပိုင်နိုင်ငံသား (၇) ဦး၊ ရဝမ်ဒါနိုင်ငံသား (၂) ဦး၊ နိုင်ဂျီးဒီးယားနိုင်ငံသား (၃) ဦး၊ ထိုင်းနိုင်ငံသား (၅) ဦး၊ ကာဇက်စတန်နိုင်ငံသား (၁) ဦး၊ ဥဇဘတ်ကစ္စတန်နိုင်ငံသား (၁) ဦး၊ ဘီနင်နိုင်ငံသား (၁) ဦး၊ ဘူယွန်ဒီနိုင်ငံသား (၈) ဦး၊ တိုဂိုနိုင်ငံသား (၁) ဦး၊ စင်ကာပူနိုင်ငံသား (၁) ဦး (စုစုပေါင်း ၁၅၆ ဦး) ကို ထပ်မံဖော် ထုတ်ဖမ်းဆီးထိန်းသိမ်းနိုင်ခဲ့ကြောင်း သိရသည်။

ထို့ပြင် နိုဝင်ဘာ ၂၃ ရက်ကလည်း လုံခြုံရေးအဖွဲ့ဝင်များဦးဆောင်သည့် ပူးပေါင်းအဖွဲ့ဝင်များသည် ရွှေကုက္ကိုလ်နယ်မြေရှိ အဆောက်အအုံ (၃၃) လုံးအတွင်းကို ဝင်ရောက်ရှာဖွေစစ်ဆေးခဲ့ကြကြောင်း သိရသည်။

ထို့ကြောင့် နိုဝင်ဘာ ၁၈ ရက်မှ နိုဝင်ဘာ ၂၃ ရက်အထိ (၆) ရက်တာအတွင်း ရွှေကုက္ကိုလ်နယ်မြေမှ ပြည်ပနိုင်ငံ သား (၁,၇၄၆) ဦးနှင့် အွန်လိုင်း လိမ်လည်လောင်းကစားမှုကျူးလွန်ရာတွင်အသုံးပြုသည့် ကွန်ပျူတာ (၂,၈၉၃) လုံး၊ မိုဘိုင်းဖုန်း (၂၁,၇၅၀) လုံး၊ star Link ဘန်း (၁၀၁) လုံး၊ Router (၂၁) လုံးနှင့် လုပ်ငန်းသုံးပစ္စည်းအများအ ပြားကိုဖမ်းဆီးရမိခဲ့ကြောင်း သိရသည်။

ဖော်ထုတ်ထိန်းသိမ်းနိုင်ခဲ့သည့် ပြည်ပနိုင်ငံသားများအား မြဝတီမြို့နယ်၊ ပူလွဲပူကျေးရွာအုပ်စု၊ ရွှေကုက္ကိုလ်မြိုင်ကျေးရွာ၊ လုံထင်းဝန်းရှိ အဆောက်အအုံ၌ ထိန်း သိမ်းထားပြီး တရားမဝင်ပြည်ပနိုင်ငံသားစစ်ဆေးရေးအဖွဲ့မှစစ်ဆေးရာ နိုဝင်ဘာ ၂၃ ရက်တွင် ပြည်ပနိုင်ငံသား (၂၈၈) ဦးကိုစစ်ဆေးနိုင်ခဲ့ပြီး သက်ဆိုင်ရာနိုင်ငံများသို့ အမြန်ဆုံးပြန်လည်လွှဲပြောင်းပေးနိုင်ရေးအတွက် ဌာနဆိုင်ရာပူးပေါင်းအဖွဲ့များက လိုအပ်သည့် ကိုယ်ရေးအချက်အလက်များနှင့် မှတ်တမ်းများစာရင်းကောက်ယူခြင်းကိုဆောင်ရွက်လျက်ရှိကြောင်း သိရသည်။

သတ္တမနေ့တွင် ကျောက်စိမ်းအတွဲပေါင်း ၆၄၀ ရောင်းချရ

မြန်မာ့ကျောက်မျက်ရတနာပြပွဲ သတ္တမနေ့တွင် ကျောက်စိမ်းအတွဲပေါင်း ၆၄၀ ရောင်းချရကြောင်း သိရသည်။

နေပြည်တော်ရှိ မဏိရတနာ ကျောက်စိမ်းခန်းမတွင် ၂၀၂၅ ခုနှစ် အကြိမ် (၆၀) မြောက် မြန်မာ့ကျောက်မျက်ရတနာပြပွဲ သတ္တမနေ့ကို ဆက်လက်ကျင်းပခဲ့ပြီး ပြည်တွင်း၊ ပြည်ပရတနာကုန်သည်များက မဏိရတနာကျောက်စိမ်းခန်းမအပြင်ဘက် သတ်မှတ်နေရာများအလိုက် ခင်းကျင်းပြသထားသည့် ကျောက်စိမ်းအတွဲများကို စိတ်ကြိုက်လေ့လာကြည့်ရှုခဲ့ကြသည်။

ယင်းတွင် အုပ်စု (အေနှင့် ဘီ) တို့မှ ကျောက်စိမ်းအတွဲပေါင်း ၉၀၀ အနက် ကျောက်စိမ်းအတွဲပေါင်း ၆၄၀ ကို ပြည်တွင်း၊ ပြည်ပရတနာကုန်သည်များအား အိတ်ဖွင့်တင်ဒါစနစ်ဖြင့် ရောင်းချခဲ့ရကြောင်း ထုတ်ပြန်ကြေညာခဲ့သည်။

ထို့ပြင် ပြပွဲအဋ္ဌမနေ့တွင် ရောင်းချမည့် အုပ်စု (စီ) အတွဲအမှတ် (၂၉၀၁) မှ (၃၆၅၀) အထိကို ပြည်တွင်း၊ ပြည်ပရတနာကုန်သည်များက ကြည့်ရှုစစ်ဆေးကြပြီး ဈေးနှုန်းပေးသွင်းလွှာများကို သက်ဆိုင်ရာတင်ဒါပုံးများအတွင်း ထည့်သွင်းကြကြောင်း သိရသည်။

အဆိုပါဈေးနှုန်းတင်သွင်းလွှာများကို တာဝန်ရှိသူများက ယနေ့ညနေပိုင်းတွင် ဖွင့်ဖောက်စစ်ဆေးပြီး ရောင်းချရသည့် ကျောက်စိမ်းအတွဲများကိုယနေ့ နိုဝင်ဘာ ၂၄ ရက် နံနက်ပိုင်းတွင် ကြေညာသွားမည်ဖြစ်သည်။

ပြပွဲတွင် အုပ်စု (အေ၊ ဘီနှင့် စီ) တို့မှ ကျောက်စိမ်းအတွဲပေါင်း ၅၀၈၅ တွဲကို နေ့ရက်အလိုက် ပြည်တွင်း၊ ပြည်ပရတနာကုန်သည်များအား အိတ်ဖွင့်တင်ဒါစနစ်ဖြင့် ရောင်းချပေးလျက်ရှိရာမှ ပြပွဲပဉ္စမနေ့တွင် ကျောက်စိမ်းအတွဲပေါင်း ၁၀၀၀ အနက် ကျောက်စိမ်းအတွဲပေါင်း ၇၅၄ တွဲကိုလည်းကောင်း၊ ပြပွဲဆဋ္ဌမနေ့တွင် ကျောက်စိမ်းအတွဲပေါင်း ၁၀၀၀ အနက် ကျောက်စိမ်းအတွဲ ပေါင်း ၇၁၆ တွဲကိုလည်းကောင်း၊ ပြပွဲသတ္တမနေ့တွင် ကျောက်စိမ်းအတွဲပေါင်း ၉၀၀ အနက် ကျောက်စိမ်းအတွဲပေါင်း ၆၄၀ ကိုလည်းကောင်း ရောင်းချပေးနိုင်ခဲ့သည်ဟုဆိုသည်။

ထို့ပြင် ကျန်ရှိသည့် အုပ်စု (စီ) မှ ကျောက်စိမ်းအတွဲများကို နိုဝင်ဘာ ၂၆ ရက်အထိ နေပြည်တော်ရှိ မဏိရတနာကျောက်စိမ်းခန်းမ၌ ပြည်တွင်း၊ ပြည်ပရတနာကုန်သည်များအား ဆက်လက်ရောင်းချပေးသွားမည်ဖြစ်သည်၊၊

ယင်းအုပ်စု (စီ) မှ ကျောက်စိမ်းအတွဲများကို ပြည်ပရတနာကုန်သည်များအနေဖြင့် အမေရိကန်ဒေါ်လာ၊ ယူရိုငွေ၊ ယွမ်ငွေ၊ ထိုင်းဘတ်ငွေနှင့် မြန်မာနိုင်ငံတော်ဗဟိုဘဏ်က လက်ခံသည့် နိုင်ငံခြားငွေအမျိုးအစားများဖြင့် ပေးချေဝယ်ယူနိုင်မည်ဖြစ်ပြီး ပြည်တွင်းရတနာကုန်သည်များအနေဖြင့် မြန်မာကျပ်ငွေဖြင့် ပေးချေဝယ်ယူနိုင်မည်ဖြစ်ကြောင်း သိရသည်။

အပြည်ပြည်ဆိုင်ရာမသန်စွမ်းသူများနေ့အထိမ်းအမှတ် ရုပ်ရှင်ဇာတ်လမ်းတိုပြိုင်ပွဲကျင်းပမည်

လာမည့် ဒီဇင်ဘာ (၃) ရက်တွင် ကျရောက်မည့် “အပြည်ပြည်ဆိုင်ရာ မသန်စွမ်းသူများနေ့” ကို ဂုဏ်ပြုသောအားဖြင့် ရုပ်ရှင်ဇာတ်လမ်းတိုပြိုင်ပွဲလုပ်ဆောင်မည်ဖြစ်ကြောင်း လမ်းပြကြယ် (Guiding Star) အဖွဲ့မှ သိရသည်။

ဗီဒီယိုဖန်းတီးရသည်ကို ဝါသနာပါသူများအတွက် ရည်ရွယ်ခြင်းဖြစ်ပြီး မသန်စွမ်းသူများ၏ စွမ်းဆောင်ရည်နှင့် အားမာန်ကို ဖော်ကျုးမည့် မည်သူမဆို ဝင်ရောက်ယှဉ်ပြိုင်နိုင်ကြောင်း အသိပေးထားသည်။ ပြိုင်ပွဲခေါင်းစဉ်များအဖြစ် ဘဝ၏ စိန်ခေါ်မှုများကို ကြံ့ကြံ့ခံ၍ လူ့အဖွဲ့အစည်းတွင် တန်းတူညီမျှ ပါဝင်လှုပ်ရှားနေမှုများ၊ လုပ်ငန်းခွင်၊ အနုပညာ၊ အားကစားနှင့် ဝါသနာများကို ကြိုးစားလုပ်ကိုင်နေမှုများ၊ အခက်အခဲများကြားမှ မလျော့သော ဇွဲလုံ့လနှင့် စွမ်းဆောင်ရည်များနှင့် စိတ်အားတက်ကြွဖွယ်ရာနှင့် ပျော်ရွှင်ဖွယ်ရာ အပြုသဘောဆောင်သော ပုံရိပ်များ ခေါင်းစဉ်လေးခုတွင် ပါဝင်နိုင်မည်ဖြစ်ပြီး ဗီဒီယိုကြာချိန် တစ်မိနစ်မှ သုံးမိနစ်အတွင်းဖြစ်ကြောင်း သိရသည်။

ဆုများအဖြစ် ပထမဆု ကျပ်လေးသိန်း၊ ဒုတိယဆု ကျပ်သုံးသိန်း၊ တတိယဆု ကျပ်တစ်သိန်းခွဲနှင့် နှစ်သိမ့်ဆု (၂) ဆု ကျပ်ငါးသောင်းစီချီးမြှင့်မည်ဖြစ်ကာ ပါဝင်ယှဉ်ပြိုင်ပြီး ဆုမရှိသူများကိုလည်း ဖုန်းဘေလ် (၅၀၀၀) ကျပ်စီ ချီးမြှင့်ပေးမည်ဖြစ်သည်။

ပြိုင်ပွဲဝင်ဗီဒီယိုများကို ဒီဇင်ဘာ (၅) ရက် ညနေ ၅နာရီအထိ နောက်ဆုံးထားပေးပို့နိုင်ပြီ အသေးစိတ်အချက်အလက်များကို လမ်းပြကြယ် (Guiding Star) ၏ လူမှုကွန်ယက်စာမျက်နှာ facebook ကတဆင့် ဆက်သွယ်စုံစမ်းနိုင်ကြောင်း သိရသည်။

ကျန်းမာရေးလူ့စွမ်းအားအရင်းအမြစ်များကို နိုင်ငံတော်၏ လိုအပ်ချက်နှင့်အညီ စဉ်ဆက်မပြတ် မွေးထုတ်ပေးနေ

ပြည်တွင်းရှိ ကျန်းမာရေးလူ့စွမ်းအားအရင်းအမြစ်များကို နိုင်ငံတော်၏ လိုအပ်ချက်နှင့်အညီ စဉ်ဆက်မပြတ် မွေးထုတ်ပေးနေကြောင်း နိုဝင်ဘာ ၂၃ ရက်က ကျင်းပသည့် ဆေးဝါးတက္ကသိုလ် - ရန်ကုန် “ကံ့ကော်ဆောင်” အဆောက်အအုံဖွင့်ပွဲ၌ ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်းက ပြောကြားခဲ့သည်။

ထိုကဲ့သို့ မွေးထုတ်ပေးလျက်ရှိရာ ဆေးတက္ကသိုလ်များ၊ ဆေးပညာနှီးနွှယ်တက္ကသိုလ်များနှင့် သူနာပြုသားဖွားသင်တန်းကျောင်းများမှ ယနေ့အထိ ဆေးပညာရှင် ဆရာဝန် ၄၉၅၅၃ ဦး၊ သွားဘက်ဆိုင်ရာဆရာဝန် ၅၇၄၅ ဦး၊ ဆေးဝါးပညာရှင် ၄၅၀၇ ဦး၊ ဆေးဘက်ဆိုင်ရာပညာရှင် ၄၈၄၅ ဦး၊ သူနာပြုသိပ္ပံနှင့် သူနာပြုသားဖွားဒီပလိုမာဘွဲ့ရ ၉၆၄၅၄ ဦး၊ အခြေခံကျန်းမာရေးပညာရှင် ၂၅၈၃ ဦးတို့ကို မွေးထုတ်ပေးပြီးဖြစ်ကြောင်း သိရသည်။

တက္ကသိုလ်တစ်ခု၏ အုပ်ချုပ်ရေး၊ သင်ကြားရေးအဆောက်အအုံများ၊ ဆရာဆရာမ ကျောင်းသားအချိုး၊ သင်ထောက်ကူပစ္စည်းများ ရရှိမှုအခြေအနေများအပြင် အေးချမ်းလုံခြုံစွာနေထိုင်၍ ပညာသင်ကြားနိုင်ရန် ကျောင်းသား ကျောင်းသူအဆောင်များ ထောက်ပံ့ဖြည့်ဆည်း စီစဉ်ဆောင်ရွက်ပေးနိုင်ခြင်းမှာလည်း တက္ကသိုလ်၏ ကမ္ဘာ့အဆင့်သတ်မှတ်ချက် (University Ranking) အတွက် အဆင့်အတန်းမြင့်မားရေးကို အထောက်အကူပြုစေမည်ဖြစ်ကြောင်း ပြည်ထောင်စုဝန်ကြီးက ပြောကြားခဲ့သည်။

နိုင်ငံတော်အစိုးရအနေဖြင့် ကျန်းမာရေးကဏ္ဍအတွက် အထူးရန်ပုံငွေများကို နှစ်စဉ်ချထားပေးလျက်ရှိရာ ဝန်ကြီးဌာနအနေဖြင့် ဆေးကုသဆောင်များ၊ ကျောင်းသား ကျောင်းသူအဆောင်များ၊ ဝန်ထမ်းအိမ်ရာများ အဆင့်မြှင့်တင်ခြင်းနှင့် အသစ်ဆောက်လုပ်ခြင်းများကို ဘဏ္ဍာရေးနှစ်အလိုက် ဆောင်ရွက်ပေးလျက်ရှိကြောင်း၊ ဆေးဝါးတက္ကသိုလ်များမှ ဘွဲ့ရရှိပြီးသည့် ဆေးဝါးပညာရှင်များအနေဖြင့် ကျန်းမာရေးဝန်ကြီးဌာနလက်အောက်ရှိ အစားအသောက်နှင့်ဆေးဝါးကွပ်ကဲရေးဦးစီးဌာန၊ ကုသရေးဦးစီးဌာနနှင့် စက်မှုဝန်ကြီးဌာနလက်အောက်ရှိ ဆေးဝါးထုတ်လုပ်ရေးစက်ရုံများတွင် နိုင်ငံ့ဝန်ထမ်းများအဖြစ် တာဝန်ကျေပွန်စွာ ထမ်းဆောင်နေကြသည့်အတွက်လည်း ဂုဏ်ယူဝမ်းမြောက်ကြာင်း ၎င်းကဆက်လက်ပြောကြားခဲ့သည်။

အသစ်ဖွင့်လှစ်ခဲ့သည့် “ကံ့ကော်ဆောင်” သည် ၂၀၂၄-၂၀၂၅ ဘဏ္ဍာရေးနှစ်တွင် စတင်ခဲ့ပြီး တန်ဖိုးငွေကျပ်သန်း ၁၈၃၆ ဒသမ ၀၀၀ ဖြစ်ပြီး ကျောင်းသူ ၁၁၀ ဆံ့ နေထိုင်နိုင်သည့် အကျယ်စတုရန်းပေ ၂၁၆၀၀ ရှိ လေးထပ်ဆောင်ဖြစ်ကြောင်း သိရသည်။

မိန်နူးနဲ့ ဇက်ဇီးတို့ ဇန်နဝါရီမှာ အသင်းက ထွက်ခွာရဖွယ်ရှိကြောင်း အာမိုရင်မ် ပြောကြား

မန်ယူအသင်းရဲ့နည်းပြ အာမိုရင်မ်က အသင်းမှာ နေရာမရဖြစ်နေတဲ့ မိန်နူးနဲ့ ဇက်ဇီးတို့ ဇန်နဝါရီအပြောင်းအရွှေ့စျေးကွက်မှာ အသင်းက ထွက်ခွာရဖွယ်ရှိကြောင်း ပြောကြားခဲ့ပါတယ်။

ဒီကစားသမားနှစ်ဦးစလုံးဟာ ဒီရာသီ ပရီးမီးယားလိဂ်ပြိုင်ပွဲမှာ တစ်ကြိမ်မှ ပွဲထွက်ကစားခွင့်မရသေးဘဲ ဇက်ဇီးက (၈၂)မိနစ်၊ မိန်နူးက (၁၃၈)မိနစ်သာ ကစားခွင့်ရထားကြောင်း သိရပါတယ်။

ဒါကြောင့် မိန်နူးနဲ့ ဇက်ဇီးတို့က ပွဲကစားခွင့်ပိုမိုရရှိမယ့်အသင်းဆီ ပြောင်းရွှေ့ဖို့ လိုလားနေကြပြီး အာမိုရင်မ်ကလည်း အသင်းကသာ ဦးစားပေးဖြစ်ကြောင်းနဲ့ အသင်းက အလိုရှိတဲ့ကစားသမားတွေကိုသာ ဆက်ထိန်းထားမှာဖြစ်ကြောင်း ပြောကြားခဲဲ့ပါတယ်။

''ကျွန်တော်လည်း ဘောလုံးသမားတစ်ယောက် ဖြစ်ခဲ့ပါတယ်။ ဒါကြောင့် အရာရာတိုင်းကို ကျွန်တော် နားလည်ပြီး ကစားသမားတွေကို အခြေအနေတိုင်းမှာ ကျွန်တော် ကူညီပေးချင်ပါတယ်။ ကစားသမားတချို့က ကမ္ဘာ့ဖလားအတွက် မချင့်မရဲဖြစ်နေတာကိုလည်း နားလည်ပါတယ်။ ဒါပေမဲ့ အသင်းက ပထမဦးစားပေးပါ။ ကလပ်အသင်းကိုရော ကစားသမားတွေကိုပါ ကူညီပေးနိုင်ရင်တော့ ကျွန်တော် ပျော်ရွှင်ရမှာပါ။ ဒီလိုမှမဟုတ်ရင်တော့ အသင်းအတွက်ပဲ ကျွန်တော် စဉ်းစားမှာပါ'' လို့ အာမိုရင်မ်က ပြောကြားခဲ့ပါတယ်။

ထွက်ပေါ်နေတဲ့ သတင်းတွေအရ အင်္ဂလန်ကစားသမား မိန်နူးကို နာပိုလီ၊ နယ်သာလန်ကစားသမား ဇက်ဇီးကို ရိုးမားအသင်းတွေက ခေါ်ယူဖို့ စိတ်ဝင်စားနေကြောင်း သိရပါတယ်။

လီဝန်ဒေါစကီးဟာ နောက်ဆုံးဆယ်စုနှစ်ရဲ့ အကောင်းဆုံးတိုက်စစ်မှူးလို့ ဟန်ဆီဖလစ်ခ် ချီးကျူး

ဘာစီလိုနာနည်းပြ ဟန်ဆီဖလစ်ခ်က ပိုလန်တိုက်စစ်မှူး လီဝန်ဒေါစကီးဟာ နောက်ဆုံးဆယ်စုနှစ်ရဲ့ အကောင်းဆုံးတိုက်စစ်မှူး ဖြစ်တယ်လို့ ချီးကျူးပြောကြားခဲ့ပါတယ်။

ဘီလ်ဘာအိုအသင်းကို (၄-၀)ဂိုးနဲ့ အနိုင်ရခဲ့တဲ့ လာလီဂါပွဲစဉ်မှာ လီဝန်ဒေါစကီးက အဖွင့်ဂိုးသွင်းယူပေးခဲ့ပြီး ပွဲအပြီးမှာ ဟန်ဆီဖလစ်ခ်က လီဝန်ဒေါစကီးကို ချီးကျူးခဲ့ခြင်းလည်းဖြစ်ပါတယ်။

''ကျွန်တော့်အမြင်မှာတော့ လီဝန်ဒေါစကီးဟာ နောက်ဆုံးဆယ်စုနှစ်ရဲ့ အကောင်းဆုံးတိုက်စစ်မှူးပါပဲ'' လို့ ဟန်ဆီဖလစ်ခ်က ပြောကြားခဲ့တာပါ။

ဟန်ဆီဖလစ်ခ်ဟာ လီဝန်ဒေါစကီးနဲ့ ဘိုင်ယန်မြူးနစ်မှာရော ဘာစီလိုနာအသင်းမှာပါ လက်တွဲခဲ့တာဖြစ်ပြီး လက်ရှိအချိန်မှာ လီဝန်ဒေါစကီးအနေနဲ့ ဘာစီလိုနာအသင်းမှာ ဆက်ရှိဖို့ မသေချာကြောင်း သတင်းထွက်နေတဲ့အတွက် အခုလိုပြောကြားခဲ့ခြင်းလည်း ဖြစ်နိုင်ပါတယ်။

လီဝန်ဒေါစကီးဟာ အသက်(၃၇)နှစ်ရှိပြီဖြစ်ပေမဲ့ သွင်းဂိုးတွေနဲ့အတူ ခြေစွမ်းပြနေဆဲဖြစ်ပြီး ဘာစီလိုနာအသင်းအတွက် ပြိုင်ပွဲစုံပွဲ(၁၆၀)မှာ (၁၀၉)ဂိုး သွင်းယူပေးထားပါတယ်။

လီဝန်ဒေါစကီးကတော့ နူးကမ့်ကွင်းသစ်မှာ ပထမဆုံးသွင်းယူနိုင်ခဲ့တဲ့ဂိုးကို အမြဲအမှတ်ရနေမယ်လို့ ပြောကြားခဲ့ပါတယ်။

အသက်အန္တရာယ်ခြိမ်းခြောက်ခံရပြီးနောက် ပေါင် ၃၀၀၀၀ အကုန်အကျခံကာ လုံခြုံရေးခွေး ဝယ်ယူလာတဲ့ အလက်ဇန္ဒားအီဆက်ခ်
====================

လီဗာပူးစတားအလက်ဇန္ဒားအီဆက်ခ်ဟာ အသက်အန္တရာယ်ခြိမ်းခြောက်မှုများနှင့် ကြုံတွေ့လာရပြီးနောက် ပေါင် ၃၀၀၀၀ အကုန်အကျခံကာ လုံခြုံရေးခွေးတစ်ကောင် ဝယ်ယူလာပါတယ်။

ဆွီဒင်တိုက်စစ်မှူးဟာ မာဆေးဆိုက်တွင် နေထိုင်နေစဉ် ကွင်းပြင်ပမှ သူ့အား အန္တရာယ်ပြုလာနိုင်တဲ့သူများ လက်မှ ကာကွယ်ရန် အဆင့်မြင့်လေ့ကျင့်သင်ကြားပေးထားတဲ့ Doberman အား ဝယ်ယူလာတာပါ။

အသက် ၂၆ နှစ်ရှိ တိုက်စစ်မှူးဟာ နွေရာသီတုန်းက လေ့ကျင့်ခန်းမဆင်းဘဲ သပိတ်မှောက်ကာ နယူးကာဆယ်မှ လီဗာပူးသို့ ပေါင်သန်း ၁၃၀ ဖြင့် ပြောင်းရွှေ့ခွင့် ရရှိအောင် ကြိုးပမ်းခဲ့သူလည်း ဖြစ်ပါတယ်။

သူဟာ ၂၀၂၆ ကမ္ဘာ့ဖလားခြေစစ်ပွဲတွင် ဆွီဒင်အသင်းမှာ အုပ်စုတွင်း အမှတ်ပေးဇယားကြမ်းခင်းတွင် ရပ်တည်ခဲ့ရပြီးနောက် အန္တရာယ်ခြိမ်းခြောက်မှုများနှင့် ကြုံတွေ့လာရပါတယ်။

အလက်ဇန္ဒားအီဆက်ခ် ဝယ်ယူလိုက်တဲ့ ခွေးက လုံခြုံရေးခွေးများတွင် သစ္စာအရှိဆုံးခွေးမျိုးစိတ် ဖြစ်ပါတယ်။ ဒါ့အပြင် ယင်းခွေများက ချစ်စရာကောင်းသလို အလွန်အန္တရာယ်များတဲ့ ခွေးလည်း ဖြစ်ပါတယ်။

အီဆက်ခ်မတိုင်မီ အဲဗာတန်နောက်ခံလူဂျက်အိုဘရိုင်ယန်ဟာလည်း အဝေးကွင်းပွဲသွားကစားနေစဉ် မိသားစုအား အကာအကွယ်ပေးရန်အတွက် ဂျာမန်သိုးထိန်းခွေးတစ်ကောင်အား ဝယ်ယူခဲ့ပါတယ်။