လူနေရပ်ကွက်နှင့် လမ်းမများတွင် အသံချဲ့စက်ဖွင့်လိုပါက ၃ ရက်ကြိုတင် ခွင့်ပြုချက်ယူရမည်
ရန်ကုန်တိုင်းဒေသကြီးအတွင်း လူနေရပ်ကွက်များနှင့် အများပြည်သူဆိုင်ရာ လမ်းမများပေါ်တွင် အသံချဲ့စက် (လော်စပီကာ) အသုံးပြုလိုပါက အနည်းဆုံး ၃ ရက်ကြိုတင်၍ သက်ဆိုင်ရာသို့ ခွင့်ပြုချက် လျှောက်ထားရမည်ဖြစ်ကြောင်း တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဝင်းတင့်က ပြောကြားသည်။
ဩဂုတ် ၂၆ ရက်က ကျင်းပသည့် တတိယအကြိမ် ရန်ကုန်တိုင်းဒေသကြီးလွှတ်တော် တတိယပုံမှန်အစည်းအဝေး နဝမနေ့တွင် ဆိပ်ကြီးခနောင်တိုမြို့နယ် မဲဆန္ဒနယ်အမှတ် (၂) တိုင်းဒေသကြီးလွှတ်တော်ကိုယ်စားလှယ် ဦးဝင်းကျော်ဦး၏ မေးမြန်းချက်ကို ပြန်လည်ဖြေကြားရာ၌ ဝန်ကြီးက ယင်းသို့ ပြောကြားခဲ့ခြင်းဖြစ်သည်။
ရန်ကုန်တိုင်းဒေသကြီးအတွင်း အသံချဲ့စက်များကို စည်းကမ်းမဲ့ ဆူညံစွာ ဖွင့်လှစ်ခြင်းမရှိစေရေးအတွက် ၂၀၁၂ ခုနှစ် ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေနှင့်အညီ ထိန်းသိမ်းကြပ်မတ် ဆောင်ရွက်လျက်ရှိကြောင်း သိရသည်။
အသံချဲ့စက်အသုံးပြုလိုသည့် ကာယကံရှင် သို့မဟုတ် အဖွဲ့အစည်းအနေဖြင့် အသုံးပြုမည့်အကြောင်းအရာ၊ ရက်စွဲနှင့် အချိန်တို့ကို ဖော်ပြကာ အနည်းဆုံး ၃ ရက်ကြိုတင် လျှောက်ထားရမည်ဖြစ်ပြီး နံနက် ၆ နာရီမှ ည ၉ နာရီအထိသာ အသုံးပြုခွင့်ပြုကြောင်း ဝန်ကြီးက ရှင်းလင်းပြောကြားသည်။
ထို့ပြင် အများပြည်သူ စိတ်ငြိုငြင်အောင် ဆူညံညစ်ညမ်းစွာ ပြုလုပ်ပါက ရာဇသတ်ကြီးပုဒ်မ ၂၉၄ အရ ထောင်ဒ-ဏ် ၃ လအထိဖြစ်စေ၊ ငွေဒ-ဏ်ဖြစ်စေ၊ ဒ-ဏ်နှစ်ရပ်လုံးဖြစ်စေ ချမှတ်နိုင်ပြီး သတ်မှတ်ဥပဒေများနှင့်အညီ လိုက်နာရေးအတွက် အုပ်ချုပ်ရေးအဖွဲ့အစည်းအဆင့်ဆင့်က ကြပ်မတ်ဆောင်ရွက်လျက်ရှိကြောင်း သိရသည်။
