မြန်မာနိုင်ငံ၏ စိုက်ပျိုးရေးနည်းပညာ အသွင်ပြောင်းလဲမှု- ရိုးရာနှင့် ခေတ်မီမှုအကြား ပဋိပက္ခ

ရိုးရာစိုက်ပျိုးရေးနိုင်ငံတစ်ခုအနေဖြင့် မြန်မာနိုင်ငံလူဦးရေ၏ ၆၀% ကျော်သည် ၎င်းတို့၏ အသက်မွေးဝမ်းကျောင်းအတွက် စိုက်ပျိုးရေးကို မှီခိုအားထားနေရပြီး ဆန်နှင့် ပဲများသည် အဓိကပို့ကုန်သီးနှံများဖြစ်သည်။ ကာလရှည်ကြာစွာ ဒေသခံလယ်ယာစိုက်ပျိုးရေးသည် မျိုးကွဲဟောင်းများနှင့် လက်လုပ်အားကို အဓိကအားကိုးနေရပြီး အထွက်နှုန်းနည်းပါးခဲ့သည်။

မကြာသေးမီနှစ်များအတွင်း တရုတ်-မြန်မာ စိုက်ပျိုးရေးနည်းပညာပူးပေါင်းဆောင်ရွက်မှုသည် ရေချွေတာသည့် ရေသွင်းစနစ်၊ မျိုးစပ်စပါးစမ်းသပ်မှုများနှင့် အသေးစားလယ်ယာစက်ယန္တရားများကို တဖြည်းဖြည်း မြှင့်တင်ခြင်းဖြင့် ဆက်လက်တိုးတက်နေပါသည်။ အချို့သော ထုတ်လုပ်မှုဒေသများတွင် ဆန်အထွက်နှုန်းမှာ ၃၀% ကျော် မြင့်တက်လာခဲ့သည်။ သို့သော် ထိုဒေသသည် စိုက်ပျိုးရေးပညာရှင်များ ရှားပါးမှုနှင့် အခြေခံအဆောက်အအုံ အားနည်းခြင်းကဲ့သို့သော စိန်ခေါ်မှုများနှင့် ရင်ဆိုင်နေရဆဲဖြစ်သည်။ ဒေသတွင်းလယ်ယာစိုက်ပျိုးရေးအတွေ့အကြုံကို ထိန်းသိမ်းရင်း ခေတ်မီနည်းပညာကို မည်သို့မိတ်ဆက်ပေးရမည်ဆိုသည်မှာ မြန်မာနိုင်ငံ၏ ရေရှည်တည်တံ့သော စိုက်ပျိုးရေးဖွံ့ဖြိုးတိုးတက်မှုအတွက် အဓိကပြဿနာတစ်ရပ်အဖြစ် ရှိနေဆဲဖြစ်သည်။
#ပြည်ထောင်စုမြန #မြန်

စပါးစ်သို့ ပြောင်းရေး ဆုံးဖြတ်ရန် ၁၀ မိနစ်သာ အချိန်ယူခဲ့ရတဲ့ တိုနာလီ
====================

စပါးစ်ရဲ့ကလပ်စံချိန်တင် ပေါင်သန်း ၁၀၀ တန်ကစားသမားဆန်ဒရိုတိုနာလီက နေအိမ်တွင် ရောဘတ်တိုဒီဇာဘီနှင့် တွေ့ဆုံစကားပြောပြီးနောက် နယူးကာဆယ်မှ စပါးစ်သို့ ပြောင်းရွှေ့ရေး ၁၀ မိနစ်တည်းသာ အချိန်ယူဆုံးဖြတ်ခဲ့ကြောင်း ဖွင့်ဟ ပြောကြားလာပါတယ်။
ဆန်ဒရိုတိုနာလီနှင့် ဒီဇာဘီတို့ဟာ ဘရက်စီယာတွင် ကစားခဲ့ဖူးတာ ဖြစ်ပြီး ယင်းကလပ်အား ချစ်မြတ်နိုးမှုက ယခုအပြောင်းအရွှေ့ ဖြစ်လာရာတွင် အရေးပါတဲ့ အခန်းကဏ္ဍမှ ပါဝင်ပါတယ်။
ရောဘတ်တိုဒီဇာဘီမှာ ဘရက်စီယာပရိသတ်တစ်ဦးဖြစ်သလို ယင်းကလပ်တွင်လည်း ကစားခဲ့ဖူးပါတယ်။ ဆန်ဒရိုတိုနာလီမှာလည်း ဘရက်စီယာတွင် ကစားသမားဘဝ စတင်ခဲ့သူ ဖြစ်ပါတယ်။
ယင်းသို့ ၎င်းတို့အကြား ဘရက်စီယာနှင့်ပတ်သက်ပြီး ဆက်နွယ်နေမှုက တိုနာလီရဲ့ စပါးစ်သို့ ကလပ်စံချိန်တင်ပြောင်းရွှေ့ကြေးဖြင့် ပြောင်းရေး တွန်းအားတစ်ခု ဖြစ်လာစေနေပါတယ်။
တိုနာလီက "ဘရက်စီယာနဲ့ပတ်သက်ပြီး ပြောဖြစ်ကြတယ်။ ကျွန်တော်တို့ကလပ် ကြုံတွေ့နေတဲ့ အခက်အခဲနဲ့ပတ်သက်ပြီးတော့ပေါ့"လို့ ပြောကြားသွားပါတယ်။
ဘရက်စီယာဟာ ဒေဝါလီခံရပြီးနောက် စီးရီးစီသို့ တန်းဆင်းထားရပါတယ်။
ဒီဇာဘီဟာ ပြီးခဲ့တဲ့ရာသီတုန်းက စပါးစ်ကို ကိုင်တွယ်စဉ်အတွင်း ခင်မင်ရင်းနှီးထားတဲ့ တိုနာလီအား စပါးစ်သို့ ပြောင်းရန် စိတ်ဝင်စားသလားလို့ မေးမြန်းလာချိန်တွင် သူကလည်း "တံခါးဖွင့်ပေးထားတယ်"လို့ တုံ့ပြန်ခဲ့ပါတယ်။
ဒီဇာဘီဟာ ရာသီသိမ်းပွဲတွင် အဲဗာတန်ကို အနိုင်ယူပြီး ပရီးမီးယားလိဂ်တွင် ဆက်လက်ရှင်သန်နိုင်ခဲ့ပြီးနောက် တိုနာလီအား ချက်ချင်းပင် ဆက်သွယ်ခဲ့ပါတယ်။
ရောဘတ်တိုဒီဇာဘီဟာ ၁၀ မိနစ်အတွင်းတွင်ပင် အီတလီကွင်းလယ်ကစားသမားထံမှ ဖုန်းခေါ်ဆိုမှု ရရှိခဲ့ပါတယ်။
ယင်းနောက် တိုနာလီရဲ့အိမ်တွင် တွေ့ဆုံခဲ့ကြရာတွင် ဆွေးနွေးမှု တိုးတက်မှုများ ရှိလာခဲ့ပါတယ်။
တိုနာလီက "ဘရက်စီယာက သေးငယ်တယ်။ အဲဒီမှာ နှစ်ပတ်လောက် သွားနေခဲ့သေးတယ်။ ပြီးရင် သူနဲ့ နှစ်ကြိမ် သုံးကြိမ် တွေ့တယ်"လို့‌ ပြောကြားသွားပါတယ်။
ဒီဇာဘီဟာ လွန်ခဲ့တဲ့ ကိုးနှစ်တုန်းက ဆက်စ်ဆူလိုအား ကိုင်တွယ်စဉ်တုန်းကလည်း တိုနာလီကို ခေါ်ယူရန် ကြိုးပမ်းခဲ့ဖူးသူ ဖြစ်ပါတယ်။
ဆက်လက်ပြီး တိုနာလီက "အခြားတစ်သင်းနဲ့လည်း စကားပြောခဲ့တယ်ဆိုတာ အရိုးသားဆုံး ဝန်ခံပါတယ်။ အသင်းနဲ့ စကားပြောတဲ့အခါ ပထမဆုံးအထင်ကြီးမှုက အရေးပါပါတယ်။ ကျွန်တော့်အထင်ကြီးမှုကလည်း အရမ်းအပြုသဘောဆောင်ခဲ့တယ်။ ၁၀ မိနစ်လောက် စကားပြောပြီး ဝမ်းသာကျေနပ်လာချိန်မှာ အရာအားလုံးက ပြီးပြည့်စုံသွားတယ်။ ပထမဆုံးလုပ်တာက ဇနီးသည်စကားပြောတာ။ ကျွန်တော့်တို့ဘဝ ပြောင်းလိုတယ်။ မြို့ပဲ ပြောင်းရုံ မဟုတ်ဘူး။ အရာအားလုံးကို ပြောင်းချင်တယ်။ ကလပ်နှစ်ခုနဲ့ စကားပြောခဲ့တယ်"လို့ ပြောကြားသွားပါတယ်။
တိုနာလီဟာ အီတလီသို့ ပြောင်းလိုခဲ့ပေမဲ့လည်း ပြောင်းရွှေ့ကြေးအပြင် သူ့လုပ်ခကလည်း အီတလီကလပ်များအတွက် ပြဿနာရှိနေမှုနှင့်အတူ အင်္ဂလန်တွင်ပင် ဆက်လက် ကစားရန် ဆုံးဖြတ်လာတာပါ။

ဖီဖာရဲ့အစီအစဉ်ကိုသာ ခွင့်ပြုလာပါက ကမ္ဘာ့ဖလားပြိုင်ပွဲအား ယူအီးအက်ဖ်အေ သပိတ်မှောက်လာမည်
====================

ဥရောပဘောလုံးအဖွဲ့ချုပ်အဖွဲ့ဝင် နိုင်ငံ ၅၅ နိုင်ငံတို့ဟာ ဖီဖာရဲ့ အရေးပါတဲ့ ပြိုင်ပွဲများရဲ့ ရှယ်ယာများအား ပုဂ္ဂလိကရင်းနှီးမြှပ်နှံရေးကုမ္ပဏီများထံ ရောင်းချမယ့် အစီအစဉ်ကိုသာ ခွင့်ပြုလာမည်ဆိုပါက ကမ္ဘာ့ဖလားပြိုင်ပွဲ ဝင်ရောက် မယှဉ်ပြိုင်ဘဲ သပိတ်မှောက်ရန် မဲပေးဆုံးဖြတ်လာကြပါတယ်။
ယခုအပတ်အစောပိုင်းတုန်းက ဖီဖာက ကမ္ဘာ့ဖလားပြိုင်ပွဲအပါအဝင် အရေးပါတဲ့ ပြိုင်ပွဲအား စီးပွားရေးကုမ္ပဏီတစ်ခုအနေဖြင့် လုပ်ဆောင်ကာ ရှယ်ယာအချို့အား ပုဂ္ဂလိကရင်းနှီးမြှပ်နှံရေးကုမ္ပဏီထံသို့ ရောင်းချရန် စီစဉ်လာခဲ့ပါတယ်။
ဒါကြောင့်လည်း ဥရောပဘောလုံးအဖွဲ့ချုပ်ဟာ ကြာသပတေးနေ့တုန်းက အရေးပေါ် အစည်းအဝေး ခေါ်ဆိုခဲ့ပြီး တကယ်လို့များ ယင်းအစီအစဉ်သာ ဖြစ်မြောက်လာပါက ဖီဖာက ကျင်းပတဲ့ ပြိုင်ပွဲအားလုံးကို သပိတ်မှောက်ရန် အဖွဲ့ဝင်နိုင်ငံများက မဲပေး ထောက်ခံလာကြပါတယ်။
ဥရောပဘောလုံးအဖွဲ့ဝင် နိုင်ငံ ၅၅ နိုင်ငံတို့ဟာ အမျိုးသားကမ္ဘာ့ဖလားပြိုင်ပွဲအပါအဝင် ဖီဖာက ကြီးမှူးကျင်းပတဲ့ အမျိုးသမီးကမ္ဘာ့ဖလားပြိုင်ပွဲ၊ ကလပ်ကမ္ဘာ့ဖလားပြိုင်ပွဲတို့ကိုလည်း ဝင်ရောက်မယှဉ်ပြိုင်ဘဲ သပိတ်မှောက်လာပါမယ်။
ဖီဖာဥက္ကဌဂျီယန်နီအင်ဖန်တီနိုဟာ ကမ္ဘာဖ့လားပြိုင်ပွဲအပါအဝင် ပြိုင်ပွဲများရဲ့ ရှယ်ယာများကိုအား ပုဂ္ဂလိက ရင်းနှီးမြှပ်နှံသူများထံ ရောင်းချရေး အစီအစဉ်အား အဖွဲ့ဝင် နိုင်ငံများရဲ့ မဲအဆုံးအဖြတ်ဖြင့် ဆုံးဖြတ်လာမှာလည်း ဖြစ်ပါတယ်။
ဥရောပဘောလုံးအဖွဲ့ချုပ်ဝင် နိုင်ငံများက မထောက်ခံပေမဲ့လည်း အင်ဖန်တီနိုမှာ ဖီဖာအဖွဲ့ဝင် နိုင်ငံ ၂၁၁ မှ အများစုရှိရာ အာရှနှင့် အာဖရိကဘောလုံးအဖွဲ့ချုပ်အများစုရဲ့ ထောက်ခံမှု ရရှိနေမှုနှင့်အတူ ထောက်ခံမှုအသာဖြင့် အနိုင်ရလာဖို့ ရှိနေပါတယ်။
အင်ဖန်တီနိုဟာ သူ့ရဲ့အစီအစဉ်များကို သတ်မှတ်ကာလရက် နောက်ဆုံးထားပြီး ထောက်ခံမဲပေးတဲ့ ဘောလုံးအဖွဲ့ဝင်နိုင်ငံများအား ဒေါ်လာသန်း ၄၀ ရရှိလာစေမယ်လို့ မဲဆွယ်ထားပါတယ်။

အာဆင်နယ်သို့ နယူးကာဆယ်အသင်းခေါင်းဆောင်ဘရူနိုဂွီမာရေးစ် ပြောင်းရန် သေချာသလောက် ရှိလာ
====================

နယူးကာဆယ်အသင်းခေါင်းဆောင်ဘရူနိုဂွီမာရေးစ်မှာ ယခုနွေရာသီတွင် အာဆင်နယ်သို့ ပြောင်းရွှေ့လာမယ်လို့ တဖြည်းဖြည်း ပိုမို ယုံကြည်လာရပါတယ်။
ဘရာဇီးကွင်းလယ်ကစားသမားဟာ ပရီးမီးယားလိဂ်ချန်ပီယံသို့ ပြောင်းရွှေ့လိုကြောင်း နယူးကာဆယ်တာဝန်ရှိသူများကို အသိပေးထားပြီး ဖြစ်ပါတယ်။ အာဆင်နယ်မှာလည်း အသက် ၂၉ နှစ်ရှိ ကစားသမားကို ခေါ်ယူနိုင်မယ်လို့ ယုံကြည်မှုမြင့်မားလာနေပါတယ်။
ဂွီမာရေးစ်ဟာ ၂၀၂၂ ခုနှစ်တွင် လိုင်ယွန်မှ ပြောင်းလာပြီးနောက် နယူးကာဆယ်အတွက် ၁၉၅ ပွဲကစားထားရာတွင် ၃၁ ဂိုးသွင်းထားသူဖြစ်ပြီး အာဆင်နယ်ရဲ့ နံပါတ်တစ်ပစ်မှတ်အဖြစ် သတ်မှတ်ခံထားရသူပါ။
အာဆင်နယ်အနေဖြင့် ဂွီမာရေးစ်အား ခေါ်ယူလိုပါက ယခင်ပယ်ချခံခဲ့ရတဲ့ ကမ်းလှမ်းမှုပေါင်သန်း ၇၀ ထက်ပိုမိုမြှင့်တင် ကမ်းလှမ်းပေးရန် လိုအပ်နေပါတယ်။
ဂွီမာရေးစ်ဟာ ဘရာဇီးနှင့်အတူ ကမ္ဘာဖ့လားကစားပြီးနောက် အားလပ်ရက်အပန်းဖြေနေဆဲ ဖြစ်ပြီး လာမယ့်ရက်တွေမှာ နယူးကာဆယ်နှင့် ပူးပေါင်းလာပါမယ်။
အာဆင်နယ်ဟာ ဂွီမာရေးစ်အား ခေါ်ယူရေး ဒုတိယအကြိမ်မြောက် ကမ်းလှမ်းမှု မပြုလုပ်ရသေးပါဘူး။
ဒါပေမဲ့ အာဆင်နယ်ဟာ ဂွီမာရေးစ်အား ခေါ်ယူရေးအတွက် ပေါင်သန်း ၈၀ အထိ အသုံးပြုလာရနိုင်ခြေ ရှိနေပါတယ်။
ယခု ဂွီမာရေးစ်ရဲ့ အပြောင်းအရှေ့မှာ နယူးကာဆယ်နည်းပြရာထူးမှ အက်ဒီဟောင်း နုတ်ထွက်လာတဲ့ ဆုံးဖြတ်ချက်နှင့် ဆက်စပ်နေခြင်း မရှိပါဘူး။
အာဆင်နယ်ဟာ အစောပိုင်းတုန်းက ဗီလာရဲ့ မော်ဂန်ရော်ဂျာကို ခေါ်ယူရေး ကြိုးပမ်းခဲ့ပေမဲ့လည်း ပေါင်သန်း ၈၀ ထက် ပိုမပေးလိုမှုနှင့်အတူ ချဲလ်ဆီးသို့ ပေါင် ၁၁၇ သန်းဖြင့် လက်လွှတ်ခဲ့ဖူးပြီး ဖြစ်ပါတယ်။
နယူးကာဆယ်ဟာ ဆန်ဒရိုတိုနာလီကို စပါးစ်သို့လည်းကောင်း၊ အန်တိုနီဂေါ်ဒွန်ကို ဘာစီလိုနာသို့လည်းကောင်း ရောင်းချလိုက်ပြီးနောက် နောက်ထပ် အရေးပါတဲ့ ကစားသမားတစ်ဦးကိုလည်း လက်လွှတ်လာရဦးမှာ ဖြစ်ပါတယ်။
အက်ဒီဟောင်းမှာ ကြာသပတေးနေ့တုန်းက နယူးကာဆယ်နည်းပြရာထူးမှ နုတ်ထွက်သွားခဲ့ပြီး နည်းပြသစ်အဖြစ် ဆော်ဒီကလပ် Al-Ahli နည်းပြမားသီးယပ်စ်ဂျိုဆယ်ကို ခန့်အပ်လာဖို့ ရှိနေပါတယ်။

အင်တာမီလန်သို့ အလွတ်ပြောင်းရွှေ့ကြေးဖြင့် အင်္ဂလန်နောက်ခံလူဂျွန်စတုန်း ပြောင်းရွှေ့လာ
=====================

အင်္ဂလန်နောက်ခံလူဂျွန်စတုန်းဟာ စီးရီးအေချန်ပီယံ အင်တာမီလန်သို့ အလွတ်ပြောင်းရွှေ့ကြေးဖြင့် ၂ နှစ်စာချုပ်ဖြင့် ပြောင်းရွှေ့လာပါတယ်။
အသက် ၃၂ နှစ်ရှိ နောက်ခံလူဟာ မန်စီးတီးတွင် ၁၀ နှစ်ကြာ ကစားပြီးနောက် ဇွန်လတုန်းက စာချုပ်သက်တမ်းကုန်ဆုံးချိန်တွင် ထွက်ခွာလာခဲ့သူလည်း ဖြစ်ပါတယ်။
ဂျွန်စတုန်းဟာ မန်စီးတီးနှင့်အတူ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ် ၁ ကြိမ်၊ အက်ဖ်အေဖလား ၂ ကြိမ်၊ လိဂ်ဖလား ၅ ကြိမ်၊ ကွန်မြူနတီဒိုင်း ၃ ကြိမ်၊ ကလပ်ကမ္ဘာ့ဖလား ၁ ကြိမ်၊ ဥရောပစူပါဖလား ၁ ကြိမ်တို့ ရယူနိုင်ခဲ့ပါတယ်။
သူဟာ မန်စီးတီးမှ ထွက်ခွာလာပြီးနောက် ချဲလ်ဆီး၊ ဂျူဗင်တပ်အပါအဝင် ဥရောပတလွှားကလပ်များရဲ့ စိတ်ဝင်စားခြင်းခံခဲ့ရပေမဲ့လည်း အင်တာမီလန်ကို ရွေးချယ်ခဲ့ပါတယ်။
သူဟာ စီးရီးအေဖလား ၂၁ ကြိမ် ချန်ပီယံ အင်တာမီလန်အတွက် ပထမဆုံးစီးရီးအေပွဲအဖြစ် ဩဂုတ်လ ၂၂ ရက်နေ့ စနေနေ့တွင် တန်းတက်မွန်ဇာနှင့်ပွဲအား ကစားရပါမယ်။
ဘန်စလေနောက်ခံလူဟောင်းဟာ ၂၀၁၆ ခုနှစ်တွင် အဲဗာတန်မှ ပေါင် ၄၇.၆ သန်းဖြင့် ပြောင်းလာပြီးနောက် မန်စီးတီးအတွက် ၂၉၅ ပွဲကစားပေးခဲ့ရာမှာ ၁၉ ဂိုးသွင်းယူပေးခဲ့ပါတယ်။
သူဟာ အင်္ဂလန်အတွက် ၉၃ ပွဲကစားပေးထားကာ အင်္ဂလန်နှင့်အတူ ကမ္ဘာ့ဖလားပြိုင်ပွဲတွင် တတိယ ရယူနိုင်ခဲ့ပါတယ်။

ပဲလေ့စ်နောက်ခံလူလာခရွိုက်စ်ကို ပေါင် ၅၂ သန်းဖြင့် ချဲလ်ဆီး ခေါ်ယူလာ
==================

ချဲလ်ဆီးဟာ ခရစ္စတယ်ပဲလေ့စ်မှ ပြင်သစ်နောက်ခံလူမာဆင့်လာခရွိုက်စ်ကို ပြောင်းရွှေ့ကြေး ပေါင် ၅၂ သန်းဖြင့် ခေါ်ယူလာပါတယ်။
ပြင်သစ်အသင်းအတွက် ၇ ပွဲကစားထားတဲ့ အသက် ၂၆ နှစ်ရှိ ဗဟိုနောက်ခံလူဟာ ချဲလ်ဆီးသို့ ၂၀၃၂ ခုနှစ်အထိ စာချုပ်ဖြင့် ပြောင်းရွှေ့လာတာလည်း ဖြစ်ပါတယ်။
ပြင်သစ်နောက်ခံလူဟာ ၂၀၂၄ ခုနှစ်တွင် ဝုဖ်ဘတ်မှ ပဲလေ့စ်သို့ ပေါင် ၁၅.၅သန်းဖြင့် ပြောင်းလာသူ ဖြစ်ပြီး ပြီးခဲ့တဲ့ရာသီတုန်းက အိုလီဗာဂလပ်စ်နာလက်အောက်တွင် ပုံမှန်ပွဲထွက်ကစားခွင့်ရခဲ့သူလည်း ဖြစ်ပါတယ်။
လာခရွိုက်စ်ဟာ ပဲလေ့စ်အတွက် ပြိုင်ပွဲအရပ်ရပ်တွင် ၅၅ ပွဲကစား ကလပ်သမိုင်းတွင် ပထမဆုံးဥရောပဖလားအဖြစ် ကွန်ဖရင့်လိဂ်ဖလားရရှိအောင် ကူညီခဲ့သူလည်း ဖြစ်ပါတယ်။
သူဟာ ၂၀၂၆ ကမ္ဘာ့ဖလားပြိုင်ပွဲတွင် ပြင်သစ်အတွက် ၃ ပွဲပါဝင်ကစားခဲ့ပါတယ်။
ချဲလ်ဆီးဟာ ယခုနွေရာသီတွင် မော်ဂန်ရော်ဂျာနှင့် မာကိုပါလက်စထရာတို့အား ခေါ်ယူပြီးနောက် တတိယမြောက်ခေါ်ယူမှုအဖြစ် လာခရွိုက်စ်အား ခေါ်ယူလာတာလည်း ဖြစ်ပါတယ်။
ချဲလ်ဆီးဟာ ယခုနွေရာသီတွင် ခေါ်ယူထားတဲ့ တောင်ပံကစားသမားကွင်ဒါနှင့် တိုက်စစ်မှူးအီမီဂါတို့အား ၂၀၂၅ ခုနှစ်ကတည်းက ခေါ်ယူရန် သဘောတူညီမှု ရယူထားခဲ့တာလည်း ဖြစ်ပါတယ်။
ချဲလ်ဆီးဟာ ဘရိုက်တန်တိုက်စစ်မှူးဒန်နီဝဲလ်ဘက်နှင့် ဘရန့်ဖို့ဒ်ကွင်းလယ်ကစားသမားဂျော်ဒန်ဟင်ဒါဆင်တို့အား ခေါ်ယူရေးအတွက်လည်း ဆက်လက်လုပ်ဆောင်နေပါတယ်။

စပါယ်ရှယ်သမိုင်းကြောင်း ပါဝင်နေတဲ့ ဆန်းဒါးလန်းအိမ်ကွင်းဝတ်စုံသစ်ကို ဝယ်ယူရေး နံနက် ၆ နာရီကတည်းက ပရိသတ်များ တန်းစီ ဝယ်ယူခဲ့ကြ
====================

ဆန်းဒါးလန်းဟာ ပရီးမီးယားလိဂ်ရာသီသစ် မစတင်မီမှာပဲ ရာသီသစ်ရဲ့အကောင်းဆုံးအိမ်ကွင်းဝတ်စုံဆုကို စောစောစီးစီး ရယူလာနိုင်ခဲ့ပြီ ဖြစ်ပါတယ်။
ဆန်းဒါးလန်းဟာ ဗုဒ္ဓဟူးနေ့တုန်းက ၁၉၃၇ ခုနှစ် အက်ဖ်အေဖလားချန်ပီယံ ဆန်းဒါးလန်းအသင်းကို ဂုဏ်ပြုထားမှု ထည့်သွင်းထားတဲ့ စပွန်ဆာမပါဝင်တဲ့ အင်္ကျီသစ်အား ကြေညာခဲ့ပါတယ်။
ဆန်းဒါးလန်းရဲ့ အထူးစပါယ်ရှယ်အိမ်ကွင်းဝတ်စုံအား ဝယ်ယူရေး ပရိသတ်များဟာ နံနက် ၆ နာရီကတည်းက အလင်းရောင်ကွင်းအပြင်ဘက်တွင် တန်းစီ စောင့်ဆိုင်းနေကြမှုနှင့်အတူ ရေပန်းစားနေပါတယ်။
ဝတ်စုံသစ်တွင် ကလပ်ရဲ့နာမည်ကျော် အနီရောင်နှင့် အဖြူရောင်အစင်းလိုင်း သုံးထားပြီး ရှေးခေတ်စတိုင် ကော်လံထည့်သွင်းထားပါတယ်။
ယင်းဝတ်စုံသစ်ရဲ့ လည်ပင်းနောက်ဘက်တွင် ၁၉၃၇ ခုနှစ်တုန်းက ဝင်ဘာလေကွင်းတွင် အက်ဖ်အေဖလားဆွတ်ခူးခဲ့တဲ့ ဆန်းဒါးလန်းအသင်းပွဲထွက်လူစာရင်းကို ထည့်သွင်းထားပါတယ်။
ဆန်းဒါးလန်းဟာ ဝင်ဘာလေကွင်းတွင် ပရိသတ် ၉၃၀၀၀ ရှေ့မှောက်မှာ ဘော်ဘီဂါနေး၊ ရစ်ချ်ကာတာ၊ အက်ဒီဘာဘင့်ခ်တို့ရဲ့ သွင်းဂိုးတွေနဲ့ ပရက်စတန်ကို အနိုင်ယူကာ အက်ဖ်အေဖလားချန်ပီယံဖြစ်ခဲ့တာပါ။
အမေရိကန်တွင် ရာသီကြိုလေ့ကျင့်ခန်းဆင်းနေတဲ့ ဆန်းဒါးလန်းဟာ ဩဂုတ်လ ၂၂ ရက်နေ့ စနေနေ့တွင် ပရီးမီးယားလိဂ်အဖွင့်ပွဲအဖြစ် အစ္စဝှစ်ချ်နှင့် ရင်ဆိုင်ကစားရပါမယ်။

အနာဂတ်မရေမရာ ဖြစ်နေတဲ့ ဒီဂျက်စပန့်စ်အား အသင်းတွင် ဆက်ထိန်းထားလိုနေတဲ့ စပါးစ်နည်းပြရောဘတ်တိုဒီဇာဘီ
======================

စပါးစ်နည်းပြရောဘတ်တိုဒီဇာဘီက အနာဂတ်မရေမရာ ဖြစ်နေတဲ့ အင်္ဂလန်နောက်တန်းအစွန်လူဒီဂျက်စပန့်စ်ကို အသင်းတွင် ဆက်ထိန်းထားလိုကြောင်း ပြောကြားလာပါတယ်။
အသက် ၂၅ နှစ်ရှိ အင်္ဂလန်လက်ရွေးစင်ဟာ ပြီးခဲ့တဲ့နှစ်တုန်းကမှ ကလပ်နှင့် နှစ်ရှည်စာချုပ်သစ်ချုပ်ဆိုခဲ့ပေမဲ့လည်း အင်တာမီလန်၊ အဲဗာတန်တို့ရဲ့ စိတ်ဝင်စားခြင်းခံနေရပါတယ်။
အီတလီလူမျိုးနည်းပြက ယခုနွေရာသီတွင် ကစားသမား ခေါ်ယူအားဖြည့်မှုများစွာ ပြုလုပ်ထားမှုကြောင့် ဒီဂျက်စပန့်စ်အနေဖြင့် နေရာရရှိရေး ပြိုင်ဆိုင်မှု ပြင်းထန်လာမှာ ဖြစ်ပေမဲ့လည်း သူ့အစီအစဉ်တွင် အရေးပါတဲ့ အခန်းကဏ္ဍမှ ပါဝင်နေဆဲ ဖြစ်ကြောင်း ဆိုထားပါတယ်။
စပါးစ်ဟာ ပြီးခဲ့တဲ့ရာသီတုန်းက ပရီးမီးယားလိဂ်တွင် ရှင်သန်နိုင်ရေး ရာသီသိမ်းပွဲအထိ တိုက်ပွဲဝင်ခဲ့ရပြီးနောက် ယခုနွေရာသီတွင် ပေါင် ၂၃၇ သန်းအထိ အသုံးပြုကာ ကစားသမားသစ်များ ခေါ်ယူအားဖြည့်ထားပါတယ်။
ယခုအပတ်အစောပိုင်းတုန်းက သတင်းစာရှင်းလင်းပွဲတွင် အသင်းတွင် မနေချင်တဲ့သူများအနေဖြင့် ထွက်ခွာနိုင်ကြောင်း ပြောကြားခဲ့တဲ့ ဒီဇာဘီက "ကျွန်တော်ကတော့ ဆက်ရှိစေချင်တာပါပဲ။ ဒီဂျက်နဲ့ လူးကပ်စ်(ဘတ်ဗေးလ်)တို့ကို ပြောခဲ့တာပါ။ ဒါပေမဲ့ ပြောခဲ့သလိုပဲ သူတို့သာ ဆက်ရှိနေရင် ကျွန်တော်ကလည်း ဆက်ရှိစေချင်ပါတယ်။ မဆက်နေချင်တော့ဘူးဆိုရင် ထွက်ခွာချင်တယ်ဆိုရင်တော့ ထွက်သွားပါ"လို့ ပြောကြားသွားပါတယ်။
စပိန့်စ်ဟာ ပြီးခဲ့တဲ့ရာသီတုန်းက ပရီးမီးယားလိဂ် ပွဲ ၃၀ ကစားခဲ့ရာတွင် ၂၃ ပွဲအား ပွဲထွက်ကစားခွင့်ရခဲ့သူ ဖြစ်ပါတယ်။
ဒီဇာဘီဟာ စပိန်နှင့်အတူ ကမ္ဘာ့ဖလားဆွတ်ခူးခဲ့တဲ့ ညာနောက်ခံလူပီဒရိုပေါ်ရိုအား ဦးစားပေးညာနောက်ခံလူအဖြစ် အသုံးပြုပါတယ်။
တဖက်တွင် စပါးစ်အသင်းခေါင်းဆောင်ခရစ္စတီယန်ရိုမီရိုမှာလည်း အင်တာမီလန်သို့ ပြောင်းရေး ဆွေးနွေးနေသလို အီတလီဂိုးသမားဗီကာရီယိုမှာလည်း ထွက်ခွာလာဖို့ ရှိနေပါတယ်။

နယူးကာဆယ်နည်းပြရာထူးမှ ထွက်ခွာလာတော့မယ့် အက်ဒီဟောင်း
===================

နယူးကာဆယ်နည်းပြအက်ဒီဟောင်းဟာ နည်းပြရာထူးမှ ထွက်ခွာလာတော့မှာ ဖြစ်ပါတယ်။
အက်ဒီဟောင်းဟာ ပြီးခဲ့တဲ့ရာသီတုန်းက ပရီးမီးယားလိဂ်ပွဲ ၃၈ ပွဲတွင် ၁၇ ပွဲ ရှုံးနိမ့်ကာ အဆင့် ၁၂ နေရာမှာသာ ရပ်တည်နိုင်ခဲ့ပြီးနောက် ဖိအားများနှင့် ကြုံလာရသူ ဖြစ်ပါတယ်။
အသက် ၄၈ နှစ်ရှိ အက်ဒီဟောင်းရဲ့ နယူးကာဆယ်အား ကိုင်တွယ်တဲ့ နောက်ဆုံးပွဲမှာ ဗုဒ္ဓဟူးနေ့တုန်းက ဘရစ္စတိုးစီးတီးအား ၄-၂ ဖြင့် အနိုင်ရတဲ့ပွဲစဉ် ဖြစ်လာပါမယ်။
အက်ဒီဟောင်းဟာ ယခုနွေရာသီအပြောင်းအရွှေ့ဈေးကွက်တွင် ကလပ်ဘက်က ကစားသမားများစွာ ရောင်းချရန် လိုအပ်နေမှုနှင့်ပတ်သက်ပြီး ယခုကဲ့သို့ နုတ်ထွက်ရန် ဆုံးဖြတ်လာတာ ဖြစ်ကြောင်း သိရပါတတယ်။
အက်ဒီဟောင်းဟာ ယခုနှစ် အစောပိုင်းတုန်းကလည်း အရေးပါတဲ့ကစားသမားများအား ရောင်းချမှုကြောင့် ရာထူးမှ နုတ်ထွက်နိုင်တဲ့ အခြေအနေမျိုး ကြုံခဲ့ရပေမဲ့လည်း အသင်းတွင် ဆက်နေရန် ဆုံးဖြတ်ခဲ့သူ ဖြစ်ပါတယ်။
နယူးကာဆယ်ဟာ ပြီးခဲ့တဲ့ ၁၂ လတာကာလအတွင်းတွင် ကစားသမားသစ်အားဖြည့်ရာတွင် ပေါင် ၂၄၀ အထိ အသုံးပြုခဲ့ပေမဲ့လည်း အရေးပါတဲ့ တိုက်စစ်မှူးအလက်ဇန္ဒားအီဆက်ခ်ကို လီဗာပူးထံ ရောင်းချခဲ့ရပါတယ်။
အက်ဒီဟောင်းဟာ ၂၀၂၁ ခုနှစ် နိုဝင်ဘာလတွင် စတိဗ်ဘရုစ်နေရာတွင် အစားထိုးခန့်အပ်ခြင်းခံရပြီးနောက် ကလပ်သမိုင်းတွင် နှစ်ပေါင်း ၇၀ အတွင်း ပထမဆုံးပြည်တွင်းဆုဖလားအဖြစ် ၂၀၂၅ ခုနှစ် ခါရာဘောင်ဖလား ရယူပေးထားနိုင်ပါတယ်။
နယူးကာဆယ်ဟာ အက်ဒီဟောင်းလက်ထက်တွင် ပရီးမီးယားလိဂ်ပွဲ ၁၇၉ ပွဲတွင် ၈၄ ပွဲနိုင်ပွဲ ရရှိပြီး ၅၇ ပွဲရှုံးပွဲ ကြုံတွေ့ကာ ၂၀၂၃ ခုနှစ်နှင့် ၂၀၂၅ ခုနှစ်တို့တွင် ချန်ပီယံလိဂ်ဝင်ခွင့်ရခဲ့ပါတယ်။
နယူးကာဆယ်ဟာ အက်ဒီဟောင်းနေရာတွင် ဆော်ဒီကလပ် Al Ahli နည်းပြမားသီးယပ်စ်ဂျိုင်ဆယ်ကို ခန့်အပ်ရန် သဘောတူညီမှု ရရှိထားပြီးလည်း ဖြစ်ပါတယ်။