အိမ်တွင်းအလုပ်များအတွက် အေအိုင်သုံးပစ္စည်းများကိုအားထားလာ
တရုတ် လူသုံးကုန် လျှပ်စစ်ပစ္စည်း ထုတ်လုပ်ရေးလုပ်ငန်း ဒရီးမ် နည်းပညာကုမ္ပဏီသည် ယခုနှစ် လတ်စ်ဗီးဂတ်စ် မြို့တွင် ကျင်းပသည့် စီအီးအက်စ် ကုန်စည်ပြပွဲ၌ အေအိုင်ထည့်သွင်းထားသော ထုတ်ကုန်သစ် ၂၀ ကျော်ကို မိတ်ဆက်ပြသကာ အနာဂတ်တွင် စမတ်ပစ္စည်းများက အိမ်တွင်းအလုပ်အားလုံးနီးပါးကို လုပ်ဆောင်ပေးမည့် အယူအဆကို ဖော်ညွှန်းခဲ့ကြောင်း သိရသည်။ ကမ္ဘာ့ထိပ်တန်း စက်ရုပ်ဖုန်စုပ်စက် ရောင်းချသူ ငါးဦးအနက် တစ်ဦးဖြစ်သော ဒရီးမ်က ယခုသောကြာနေ့တွင် ပြီးဆုံးမည့် လေးရက်ကြာ ကုန်စည်ပြပွဲ၌ ထုတ်ကုန်ပေါင်း ၁၅၀ ကျော်ကို ခင်းကျင်းပြသခဲ့သည်။
ဒရီးမ် ၏ အသစ်ဖြစ်သော “အေအိုင် နည်းပညာသုံး တစ်အိမ်လုံးအတွက် စမတ်ဂေဟစနစ်” တွင် ဆိုဒါထုတ်ပေးသည့် စနစ်ပါဝင်သော ရေခဲသေတ္တာ၊ ညကြည့်နိုက်ဗစ်ရှင်း လုံခြုံရေးကင်မရာများ၊ လူတစ်ဦး၏ ဦးရေပြားကျန်းမာရေးကို စစ်ဆေးပေးသည့် ဆံပင်လေမှုတ်စက်၊ လှေကားတက်နိုင်သော စက်ရုပ်ဖုန်စုပ်စက်၊ စမတ်လက်စွပ်များနှင့် အက်ရှင်ကင်မရာများ ပါဝင်ပါသည်။ ကုမ္ပဏီသည် ဘူဂါတီနှင့် ဆင်တူသော လျှပ်စစ်စူပါကားတစ်စီးကိုလည်း ပြသခဲ့ပါသည်။
“ကျွန်တော်တို့က ထိပ်တန်းနည်းပညာတွေကတစ်ဆင့် အသုံးပြုသူတွေရဲ့ နေ့စဉ်ဘဝကို မြှင့်တင်ပေးချင်တာပါ” ဟု ဒရီးမ်၏ ကမ္ဘာလုံးဆိုင်ရာ အမှုဆောင်အရာရှိချုပ် ချန်ရှင်ဝေက စီအီးအက်စ် ပွဲပြင်ပတွင် ပို့စ်သတင်းဌာနသို့ ပြောကြားခဲ့သည်။ ကျယ်ပြန့်သော ဘာသာစကားမော်ဒယ်များနှင့် ရုပ်ပိုင်းဆိုင်ရာ အေအိုင် (ဒရီးမ်တွင် သီးသန့်အဖွဲ့တစ်ခုရှိသည့် နယ်ပယ်) တို့၏ လတ်တလော တိုးတက်မှုများသည် ကုမ္ပဏီ၏ ဆန်းသစ်တီထွင်မှုကို အရှိန်မြှင့်ရန် ကူညီပေးခဲ့သည်ဟု သူက ထောက်ပြခဲ့ပါသည်။
သုတေသနလုပ်ငန်း အိုင်ဒီစီ မှ အချက်အလက်များအရ စက်ရုပ်ဖုန်စုပ်စက် ထုတ်လုပ်သူများဖြစ်သော ရိုဘိုရော့ခ်၊ အီကိုဗက်စ်၊ ဒရီးမ်၊ ရှောင်မီနှင့် နာဝယ်လ် ကုမ္ပဏီများသည် ၂၀၂၅ ခုနှစ် ပထမသုံးပုံတစ်ပုံတွင် တစ်ကမ္ဘာလုံးတင်ပို့မှု၏ ၇၀ ရာခိုင်နှုန်းနီးပါးကို သိမ်းပိုက်ထားကြောင်း သိရသည်။
ဒရီးမ်သည် ခြောက်နှစ်ဆက်တိုက် နှစ်စဉ်တိုးတက်မှုနှုန်း ၁၀၀ ရာခိုင်နှုန်းကျော် ရရှိခဲ့ပြီး ပြည်ပစျေးကွက်များသည် ဝင်ငွေ၏ ၈၀ ရာခိုင်နှုန်းခန့် ရှိကြောင်း ကုမ္ပဏီ၏ ပြောကြားချက်အရ သိရသည်။
ဒရီးမ် ကုမ္ပဏီကို ချင်းဟွာတက္ကသိုလ်၊ အာကာသအင်ဂျင်နီယာကျောင်းမှ ဘွဲ့ရရှိသူ အမှုဆောင်အရာရှိချုပ် ယူဟောင်က ၂၀၁၇ ခုနှစ်တွင် တည်ထောင်ခဲ့ပြီး ကိုယ်ပိုင်အမှတ်တံဆိပ်ကို မထူထောင်မီ ရှောင်မီကုမ္ပဏီထံသို့ အိမ်သုံးလျှပ်စစ်ပစ္စည်းများ ပံ့ပိုးပေးသည့် မူလစက်ကိရိယာ ထုတ်လုပ်သူအဖြစ် စတင်လည်ပတ်ခဲ့သည်။
ဒရီးမ်သည် မလေးရှား၊ ဗီယက်နမ်နှင့် တူရကီတို့တွင် စက်ရုံများတည်ထောင်ထားပြီးဖြစ်ကြောင်း ချန်က ပြောကြားခဲ့ပါသည်။ ကုမ္ပဏီသည် စင်ကာပူ၊ ဂျာမနီနှင့် အမေရိကတို့တွင် စက်ရုံသစ်များ တည်ဆောက်ရန် စီစဉ်လျက်ရှိကြောင်း သိရှိရပါသည်။
စမတ်ကျသော သန့်ရှင်းရေးပစ္စည်းများကြောင့် လူသိအများဆုံးဖြစ်သော ဒရီးမ်သည် မကြာသေးမီနှစ်များအတွင်း စမတ်ဖုန်းများ၊ အက်ရှင်ကင်မရာများနှင့် ဒရုန်းများ အပါအဝင် ထုတ်ကုန်အသစ်များဆီသို့ လျင်မြန်စွာ တိုးချဲ့လာခဲ့ပေသည်။ ချန်က ထိုသို့တိုးချဲ့မှုကို ကုမ္ပဏီတွင်း ပျိုးထောင်မှုပုံစံဖြင့် ဆောင်ရွက်လျက်ရှိသည်ဟု ဆိုထားပါသည်။
ဒရီးမ်၏ စီးပွားရေးခွဲခြမ်းစိတ်ဖြာချက်အရ ၎င်းသည် သန့်ရှင်းရေး၊ ဧည့်ခန်း၊ တစ်ကိုယ်ရေစောင့်ရှောက်မှုနှင့် အိမ်အပြင်ဘက် စသည့်နေရာအမျိုးမျိုးတွင် ပုံစံအမျိုးမျိုးဖြင့် ဖြည့်ဆည်းပေးလျက်ရှိသည်။ ကုမ္ပဏီသည် အဆိုပါနယ်ပယ်များကို ထုတ်ကုန်လိုင်းတစ်လိုင်းစီ ထပ်မံခွဲခြားထားရာ လက်ရှိတွင် ၆၄ ခု ရှိနေပြီဖြစ်ပေသည်။
“နောက်ဆုံးမှာတော့ အရာအားလုံးဟာ ဂေဟစနစ်တစ်ခု တည်ဆောက်တဲ့ဆီကို ဦးတည်နေပါတယ်” ဟု ချန်က ပြောကြားပြီး၊ ထိုရည်ရွယ်ချက်ကြောင့်ပင် ဒရီးမ်က ၎င်း၏ မဟာဗျူဟာကို “အဆုံးသတ်မရှိ” ဟု ဖော်ပြရခြင်းဖြစ်ကြောင်း ထပ်လောင်းပြောကြားခဲ့သည်။
ထုတ်ကုန်သစ် ဖော်ဆောင်မှုနှင့် ပတ်သက်၍ ချန်က ဒရီးမ်သည် ကနဦးလိုအပ်ချက်ပြမှုများမှ သုတေသနနှင့် ဖွံ့ဖြိုးတိုးတက်မှုအထိ အသုံးပြုသူ၏ အမှန်တကယ် လိုအပ်ချက်ကိုဖော်ထုတ်ရန်အတွက် အဆင့်ဆင့်စစ်ထုတ်ကြောင်း ပြောကြားခဲ့သည်။ သို့သော်လည်း ဒရီးမ်သည် ကုမ္ပဏီအနေဖြင့် စျေးကွက်တွင် သိသာထင်ရှားသော အားသာချက်ကို ပေးစွမ်းနိုင်သည်ဟု ယုံကြည်ရသည့် ထုတ်ကုန်အမျိုးအစားများကို ဦးစားပေးထုတ်လုပ်ဆဲဖြစ်ပေသည်။
ဒရီးမ်၏ ရည်မှန်းချက်မှာ “ကမ္ဘာ့အဆင့်မီ နည်းပညာကုမ္ပဏီ” တစ်ခု ဖြစ်လာရန်ဖြစ်ကြောင်း ချန်က ပြောကြားခဲ့ပါသည်။ ထိုသို့ဆောင်ရွက်နိုင်ရန် ကုမ္ပဏီအနေဖြင့် ပိုမိုပြတ်သားရန်နှင့် စွန့်စားမှုများပြုလုပ်ရန် လိုအပ်ကြောင်း ပြောကြားခဲ့ပါသည်။
