ငြိမ်းချမ်းရေးတွေ့ဆုံ ဆွေးနွေးပွဲတွေမှာ သက်ဆိုင်သူတွေအားလုံး ပါဝင်နိုင်ဖို့ ဆောင်ရွက်မယ်

မြန်မာနိုင်ငံရဲ့ ပကတိအခြေအနေ၊ သာမန်အခင်းအကျင်းနဲ့ ကိုက်ညီမယ့် သက်ဆိုင်သူတွေအားလုံး တဆင့်ပြီးတဆင့် ပါဝင်လာနိုင်တဲ့ ငြိမ်းချမ်းရေး တွေ့ဆုံဆွေးနွေးပွဲတွေ ရှေ့ဆက် ဖြစ်ပေါ်လာနိုင်ဖို့ NSPNC နဲ့ သဘောထား စုစည်းချက်တွေ လုပ်ဆောင်နိုင်ခဲ့တယ်လို့ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးအဖွဲ့ - ငြိမ်းချမ်းရေးကောင်စီ (KNU/KNLA-PC) အတွင်းရေးမှူး (၁) ဗိုလ်မှူးကြီး စောကျော်ညွန့်က ပြောပါတယ်။

အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နဲ့ တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားတဲ့ တိုင်းရင်းသားလက်နက်ကိုင် ခုနစ်ဖွဲ့ (7 EAO Alliance) တို့ဟာ ငြိမ်းချမ်းရေး လုပ်ငန်းစဥ်တွေအတွက် ရန်ကုန်တိုင်း၊ ကမာရွတ်မြို့နယ်ရှိ အမျိုးသား စည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ဗဟိုဌာနရုံးခွဲမှာ တွေ့ဆုံဆွေးနွေးမှုတွေ ပြုလုပ်ခဲ့ပါတယ်။

စက်တင်ဘာ ၂၉ ရက်နဲ့ ၃၀ ရက်မှာ ပြုလုပ်ခဲ့တဲ့ အခမ်းအနားမှာ အရင်ဆွေးနွေးပွဲတွေရဲ့ ရလဒ်ကို ပြန်လည် သုံးသပ်ကြတာဖြစ်ပြီး အဓိက ခေါင်းစဉ်ကတော့ ငြိမ်းချမ်းရေး လုပ်ငန်းစဉ်တခုကို ဖော်ထုတ်ဖို့ဖြစ်ကာ ဒီအကြောင်းအရာနဲ့ ပတ်သက်လို့ နှစ်ဖက်စလုံးက ပြီးခဲ့တဲ့ ပထမအကြိမ် တွေ့ဆုံပွဲကတည်းက အပြန်အလှန် ဆွေးနွေးမှုတွေ ရှိခဲ့တယ်လို့ ဗိုလ်မှူးကြီး စောကျော်ညွန့်က ပြောပါတယ်။

ငြိမ်းချမ်းရေး လုပ်ငန်းစဉ်နဲ့ပတ်သက်လို့ အရင်က တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လမ်းကြောင်းဖြစ်ပေမယ့် ဒီအချိန်မှာ NCA ကို အကောင်အထည်ဖော်ဖို့ ဆိုတာကတော့ လုပ်ငန်းတွေ ရပ်တန့်နေတဲ့ အနေအထားဖြစ်တယ်လို့ ဗိုလ်မှူးကြီး စောကျော်ညွန့်က ပြောပါတယ်။

“ဒီအချိန်မှာ ကျွန်တော်နိုင်ငံရဲ့ ပကတိအခြေအနေကလည်း အရင်ကနဲ့ ဘာမှမဆိုင်ဘူး။ ငြိမ်းချမ်းရေးနဲ့ ဆန့်ကျင်တဲ့စစ်ပွဲတွေက ဖြစ်ပွားနေဆဲဖြစ်တယ်။ ဆက်လက်ပြီးလည်း ဖြစ်ပေါ်ဖို့ အရိပ်အယောင်ရှိတဲ့ အပေါ်မှာ ငြိမ်းချမ်းရေး တွေ့ဆုံဆွေးနွေးပွဲကလည်း မလုပ်နိုင်တာကြာပြီ။ စစ်ပွဲတွေ အကုန်လုံးပြီးမှဆိုလည်း မသေချာမရေရာတဲ့ လုပ်ငန်းတခု ဖြစ်တဲ့အတွက်ကြောင့် ဒီလိုမျိုး တိုက်ပွဲတွေရှိတဲ့ကြားကပဲ ကျွန်တော်တို့က လက်ရှိနိုင်ငံရဲ့ ပကတိအခြေအနေနဲ့ ကိုက်ညီမယ့် ငြိမ်းချမ်းရေး လုပ်ငန်းစဉ်တခုကို ဖော်ထုတ်နိုင်ဖို့ တွေ့ဆုံ ဆွေးနွေးတာ ဖြစ်ပါတယ်” လို့ သူက ပြောပါတယ်။

မလှိုင်မြို့နယ်မှာ အမွှာညီအစ်ကိုနှစ်ယောက်အပါအဝင် အမျိုးသားသုံးယောက် ရေနစ်သေဆုံး

မန္တလေးတိုင်း၊ မလှိုင်မြို့နယ်၊ ထန်းပင်ကန်ကျေးရွာအုပ်စု၊ ညောင်ပင်တဲကျေးရွာက ကျောက်စီရေကန်မှာ အမွှာညီအစ်ကိုနှစ်ယောက် အပါအဝင် အမျိုးသားသုံးယောက် သေဆုံးခဲ့တယ်လို့ သိရပါတယ်။

မနေ့က စက်တင်ဘာ ၃၀ ရက်နေ့ ညနေပိုင်း ၅ နာရီလောက်မှာ ရေကန်အတွင်း ရေဆင်းချိုးရာကနေ ရေနစ်မြုပ်သေဆုံးခဲ့တာဖြစ်ပြီး အမွှာညီအစ်ကိုနှစ်ယောက်က အသက် ၂၆ နှစ် ၊ ကျန်တဲ့အမျိုးသားက ၂၈ နှစ် ဖြစ်ပါတယ်။

" တယောက်ကအရင်ရေနစ်တာ ။အဲဒါကို လိုက်ကယ်ရင်းကနေ နောက်နှစ်ယောက်ထပ်နစ်တာ။ ရေနစ်တယ်ဆိုပြီး ရွာကိုလည်း ဖုန်းဆက်ပြောသေးတယ်။ ပြီးတော့လိုက်ကယ်တာ အကုန်ရေနစ်ဆုံးသွားတယ်။ " လို့ မလှိုင်မြို့နယ် မီးသတ်ဦးစီးမှူးက ပြောပါတယ်။

သေဆုံးအမျိုးသားသုံးယောက်လုံးဟာ ညောင်ပင်တဲရွာသားတွေဖြစ်ပြီး လက်ရှိမှာ အလောင်းကို မလှိုင်ဆေးရုံပို့ထားတယ်လို့ သိရပါတယ်။

စက်တင်ဘာ ၂၁ရက်ကလည်း ရန်ကုန်တိုင်း၊ ရန်ကင်းမြို့နယ်၊ (၁၁)ရပ်ကွက်၊ ညောင်ပင်သာလမ်းရှိ အုတ်စီကန်(သဘာဝရေကန်)မှာ အမျိုးသားနှစ်ယောက်ရေနစ်သေဆုံးခဲ့တယ်လို့ သိရပါတယ်။

စက်တင်ဘာ ၆ ရက်ကလည်း ကချင်ပြည်နယ် ၊ မြစ်ကြီးနားမြို့နယ် ၊ ရွှေစက်ရပ်ကွက်၊ ဧရာ၀တီမြစ်အတွင်းမှာ ၁၃ နှစ်အရွယ်မိန်းကလေးနှစ်ယောက် ရေနစ်သေဆုံးခဲ့ပါတယ်။

မန္တလေးတိုင်း၊ တံတားဦးမြို့နယ်၊ ပန်းယျကျေးရွာ၊ ပန်းလောင်မြစ်အတွင်းမှာလည်း မနေ့က စက်တင်ဘာ ၆ ရက်မှာ အမျိုးသားတယောက်ရေဆင်းကူးရာကနေ ရေနစ်သေဆုံးခဲ့ပါတယ်။

စက်တင်ဘာ ၅ ရက်ကလည်း မန္တလေးတိုင်း ၊ကျောက်ဆည်မြို့၊ မင်းရဲဆည် ဇော်ဂျီမြစ်အတွင်း ရေဆင်းချိုးတဲ့ အမျိုးသားတယောက် ရေနစ်သေဆုံးခဲ့ပါတယ်။

နေပြည်တော် ၊ တပ်ကုန်းမြို့နယ်ထဲမှာလည်း စက်တင်ဘာ ၄ ရက်နေ့က သပြေချောင်းကျေးရွာအုပ်စု ၊ဂွေးခါးတောင်‌အနီးရှိ သဘာဝရေကန်မှာ ရေဆင်းကူးတဲ့ G12 အောင်မြင်ထားတဲ့ အသက် ၁၉ နှစ်အရွယ် အမျိုးသမီးနှစ်ယောက် ရေနစ် သေဆုံးခဲ့ပါတယ် ။

ဓာတ်ပုံ - မီးသတ်

စွမ်းစွမ်းတမံတာဝန်ထမ်းတဲ့ ရဲတပ်ဖွဲ့ဝင် ၁၀ဦးကိုမုံရွာမှာကျင်းပတဲ့ ရဲတပ်ဖွဲ့နေ့မှာ ဂုဏ်ပြုဆုချီးမြှင့်

မုံရွာမြို့ မြို့တော်ခန်းမမှာ အောက်တိုဘာလ ၁ရက်နံနက်၉နာရီကကျင်းပတဲ့ စစ်ကိုင်းတိုင်းဒေသကြီးရဲတပ်ဖွဲ့ က ၆၂နှစ်မြောက် မြန်မာနိုင်ငံရဲတပ်ဖွဲ့နေ့ အခမ်းအနားမှာ စွမ်းစွမ်းတမံဆောင်ရွက်ခဲ့ကြတဲ့ ရဲတပ်ဖွဲ့ဝင် ၁၀ဦးကို
ဂုဏ်ပြုဆုတွေ ပေးအပ်ချီးမြှင့်ခဲ့ပါတယ်။

အခမ်းအနားမှာ နယ်မြေလုံခြုံရေးစွမ်းစွမ်းတမံဆောင်ရွက်ခဲ့တဲ့ ရဲတပ်ဖွဲ့ဝင်တွေကို ရဲအုပ်ကနေ ဒုတိယရဲမှုးအဆင့်တိုးချီးမြှင့်သလို စွမ်းရည်
သတ္တိဂုဏ်ထူးဆောင်တံဆိပ်(ရဲဗလတံဆိပ်)၊ တိုင်းရဲတပ်မှုးရဲ့အမှုထမ်းကောင်းလက်မှတ်၊ ရဲချုပ်ရဲ့ အမှုထမ်းကောင်းလက်မှတ်၊ စွမ်းဆောင်မှုဂုဏ်ထူးဆောင်တံဆိပ်(ရဲကျော်သူတံဆိပ်)တွေကို ပေးအပ်ချီးမြှင့်ခဲ့တာပါ။

စစ်ကိုင်းတိုင်းဒေသကြီးရဲတပ်ဖွဲ့ ၆၂နှစ်မြောက်မြန်မာနိုင်ငံရဲတပ်ဖွဲ့နေ့ အခမ်းအနားမှာ စစ်ကိုင်းတိုင်းဒေသကြီးဝန်ကြီးချုပ် ဦးကိုလေးက အဖွင့်အမှာစကားပြောကြားပြီး မြန်မာနိုင်ငံရဲချုပ်သဝဏ်လွှာကို စစ်ကိုင်းတိုင်းဒေသကြီးရဲတပ်ဖွဲ့မှုးရဲမှုးကြီးနိုင်လင်းက ဖတ်ကြားအပြီးမှာ ဆုတွေကိုပေးအပ်ချီးမြှင့်ခဲ့တာဖြစ်ပါတယ်။

ဆုပေးအပ်ခံရသူတွေဟာ ၂နှစ်တာအတွင်း ဖြစ်စဥ် ၇ခုကိုစွမ်းစွမ်းတမံဖမ်းဆီးအရေးယူနိုင်ခဲ့သူပါသလို PDF သာလွန်အင်အားနဲ့ ၁၀ရက်ကျော်ကြာတိုက်ခိုက်ခံရစဥ်မှာ ရွပ်ရွပ်ချွံချွံပြန်လည်တိုက်ခိုက်ခဲ့သူလည်းပါဝင်ပါတယ်။

ဒါ့အပြင် မုံရွာမြို့ပေါ်ပြန်ပေးဆွဲတဲ့ PDF ခေါင်းဆောင်ကို လက်နက်တွေနဲ့အတူ ဖမ်းနိုင်ခဲ့သူ၊ နယ်စပ်တမူးဒေသရဲစခန်းကိုပျံသန်းလာတဲ့ ဒရုန်းယာဥ်ကို ဖျက်ဆီးနိုင်သူ၊ မုံရွာမြို့မှာ ပြန်ပေးဆွဲခံရသူ အစ္စလာမ်ဘာသာရေးမော်လဝီဆရာကို ပြန်လည်ကယ်တင်နိုင်ခဲ့ပြီး PDFတွေဆီက လက်နက်တွေမိအောင်ဆောင်ရွက်နိုင်သူ၊ ကသာမြို့သိမ်းတိုက်ပွဲအဖြစ်သာလွန်အင်အားနဲ့ ဖော်ဆောင်စဥ်မှာ ရွပ်ရွပ်ချွံချွံပြန်လည်တိုက်ခိုက်သူ၊ ကလေးမြို့မှာ ကျပ်သိန်းပေါင်တသိန်းခွဲကျော်တန်ဖိုးရှိတဲ့ မူးယစ်ဆေးဝါးတွေ ဖမ်းမိအောင်ဆောင်ရွက်နိုင်သူ စတဲ့ ရဲတပ်ဖွဲ့ဝင်တွေကို ဆုတွေပေးအပ်ချီးမြှင့်ခဲ့ပါတယ်။

အမြန်လမ်းမှာ လမ်းလျှောက်သူနှစ်ယောက်ကို ကားနဲ့တိုက်ပြီး ထွက်ပြေးသွားတဲ့ ယာဉ်မောင်း အရေးယူခံရ

အမြန်လမ်းမှာ လမ်းလျှောက်သူနှစ်ယောက်ကို ကားနဲ့တိုက်ပြီး တာဝန်မဲ့ ထွက်ပြေးသွားတဲ့ ယာဉ်မောင်းကို ပုဒ်မ ၃၀၄(က)/၂၀၂ နဲ့ အမှုဖွင့်ထားတယ်လို့ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့မှ သိရပါတယ်။

ပြီးခဲ့တဲ့ စက်တင်ဘာလ ၂၉ ရက်၊ ည ၈ နာရီ ၃၅ မိနစ်ဝန်းကျင်က ဖြစ်ခဲ့တဲ့ ယာဉ်တိုက်မှုလို့ သိရပြီး ရန်ကုန် - မန္တလေး အမြန်လမ်း မိုင်တိုင်အမှတ် ၆၈/၄ နဲ့ ၆၈/၅ ကြား၊ နေပြည်တော်ကနေ ရန်ကုန်ကို ဦးတည်မောင်းနှင်တဲ့ အပြန်လမ်းပိုင်းမှာ Toyota Noah အနက်ရောင်ယာဉ်က လက်ယာဘက်ယာဉ်ကြောနဲ့ ကပ်လျက် မြေသားလမ်းပေါ်မှာ လမ်းလျှောက်နေသူ အမျိုးသားနှစ်ယောက်ကို နောက်ကနေ အရှိန်ပြင်းစွာ ဝင်ရောက်တိုက်မိခဲ့တာလို့ သိရပါတယ်။

လမ်းလျှောက်နေသူ နှစ်ယောက်လုံး နေရာမှာတင် သေဆုံးခဲ့ပြီး အခင်းဖြစ်ပြီးနောက် ယာဉ်မောင်းအနေနဲ့ ယာဉ်ကို စနစ်တကျ ရပ်တန့်ကာ နီးစပ်ရာ အမြန်လမ်းမကြီး ရဲတပ်ဖွဲ့ထံ အရေးပေါ် ဆက်သွယ်သတင်းပို့ အစစ်ဆေးခံရမှာ ဖြစ်ပေမယ့် အဲဒီလို ပြုလုပ်ခြင်းမရှိဘဲ ယာဉ်ကို အခင်းဖြစ်နေရာမှာ ထားရစ်ကာ ညတွင်းချင်း ထွက်ပြေး တိမ်းရှောင်ခဲ့တယ်လို့ သိရပါတယ်။

“အမြန်လမ်းဥပဒေနဲ့ ပတ်သက်လို့ မကြာခဏဆိုသလို အသိပေးမှုတွေ လုပ်ဆောင်နေတာလည်း တွေ့ကြမှာပါ။ ဒီလိုဖြစ်စဉ်တွေကြောင့် ယာဉ်မောင်းမှာ တာဝန် မရှိစေရလို့ ဥပဒေမှာ ပြဋ္ဌာန်းထားပြီးသားပါ။ ဒါပေမယ့် ယာဉ်မောင်းအနေနဲ့ကတော့ ယာဉ်ကို အခင်းဖြစ်နေရာမှာတင် ရပ်တန့်ပြီး သက်ဆိုင်ရာကို အကြောင်းကြားတာကတော့ လုပ်ကို လုပ်ရပါမယ်။ ဒါမှသာ ယာဉ်မောင်းကို ပြစ်ဒဏ်ကနေ ကာကွယ်ပေးနိုင်မှာပါ။ အကြောင်းမကြားဘူး ဆိုရင်တော့ အမြန်လမ်းဥပဒေနဲ့ ပတ်သက်ပြီး ဘယ်လို အကာအကွယ်ကိုမှ မရနိုင်တော့ပါဘူး” လို့ အမြန်လမ်းရဲတပ်ဖွဲ့နဲ့ နီးစပ်သူတယောက်က ပြောပါတယ်။

ဒီဖြစ်စဉ်နဲ့ ပတ်သက်ပြီး သက်ဆိုင်ရာကို အကြောင်းမကြားဘဲ ထွက်ပြေး တိမ်းရှောင်ခဲ့တဲ့ ယာဉ်မောင်းကို အမြန်လမ်း ရဲတပ်ဖွဲ့ဝင်တွေက ပိတ်ဆို့ ရှာဖွေခဲ့တာမှာ မနေ့ စက်တင်ဘာ ၃၀ ရက်၊ မနက် ၁၂ နာရီခွဲဝန်းကျင် (ယာဉ်တိုက်မှုဖြစ်ပြီး ၄ နာရီလောက်အကြာ) မှာ မိုင်တိုင်အမှတ် (၆၉/၄) အနီး လမ်းဘေးမှာ ကားတားပြီး လွတ်မြောက်ဖို့ ကြိုးပမ်းနေတဲ့ ယာဉ်မောင်းကို အချိန်မီ ဖမ်းဆီးနိုင်ခဲ့တယ်လို့ သိရပါတယ်။

လက်ရှိမှာ ယာဉ်မောင်းကို ရာဇသတ်ကြီးပုဒ်မ ၃၀၄ (က) (ပေါ့လျော့မှုကြောင့် လူသေစေမှု) နဲ့ ပုဒ်မ ၂၀၂ (ပြစ်မှုဖြစ်ပွားကြောင်း သိလျက် တာဝန်အရ သတင်းပို့ရန် ပျက်ကွက်မှု) တို့နဲ့ အမှုဖွင့် တရားစွဲဆိုထားတယ်လို့ သိရပါတယ်။

ပြီးခဲ့တဲ့ စက်တင်ဘာလ ၁၅ ရက်နေ့ကလည်း ရန်ကုန် - မန္တလေး အမြန်လမ်း မိုင်တိုင် ၁၇၇/၇ - ၁၇၈/၀ ကြားမှာ လမ်းလျှောက်နေသူ အမျိုးသား တယောက်ကို ခရီးသည်တင် ကားတစီးက တိုက်မိမှုဖြစ်ခဲ့ပြီး အမြန်လမ်းမကြီး ရဲတပ်ဖွဲ့ထံ သတင်းပေး၊ အစစ်ဆေးခံဖို့ ပျက်ကွက်ခဲ့တဲ့အတွက် အဲဒီဖြစ်စဉ်က ယာဉ်မောင်းကိုလည်း ဥပဒေပုဒ်မ ၃၀၄(က)/၂၀၂ နဲ့ တရားစွဲဆိုထားတယ်လို့ သိရပါတယ်။

အမြန်လမ်းမကြီးများ ဥပဒေ အခန်း (၇)၊ ပုဒ်မ (၁၃) အရ “တည်ဆဲဥပဒေ တရပ်ရပ်တွင် မည်သို့ပင် ပါရှိစေကာမူ အမြန်လမ်းမကြီးပေါ်တွင် မောင်းနှင်ခွင့်မပြုသည့် မော်တော်ယာဉ်၊ လှည်းနှင့် ဖြတ်သန်းသွားလာခွင့် မပြုသည့် အခြားယာဉ်များ မောင်းနှင်ခြင်း (သို့မဟုတ်) ရပ်နားခြင်း၊ လူ၊ တိရစ္ဆာန်များ ဖြတ်သန်းသွားလာခြင်းကြောင့် လူနှင့် ပစ္စည်းထိခိုက်မှု (သို့မဟုတ်) သေဆုံးမှုဖြစ်ပေါ်ပါက ဥပဒေနှင့်အညီ ယာဉ်စည်းကမ်း၊ လမ်းစည်းကမ်းလိုက်နာ၍ မောင်းနှင်သည့် မော်တော်ယာဉ်၏ ယာဉ်မောင်းတွင် တာဝန်မရှိစေရ။” လို့ သတ်မှတ်ထားပါတယ်။

လူ၊ စက်ဘီး၊ ထော်လာဂျီ၊ လှည်း အစရှိတာတွေကို တိုက်မိပါက အတိုက်ခံရသူတွေဟာ အမြန်လမ်းမကြီးများဥပဒေကို ဖောက်ဖျက်သူ မှန်/မမှန်၊ ယာဥ်မောင်းအနေနဲ့ ဥပဒေနဲ့အညီ ယာဥ်စည်းကမ်း၊ လမ်းစည်းကမ်း လိုက်နာပြီး မောင်းနှင်သူ ဟုတ်/မဟုတ်တို့ကို အမြန်လမ်းမကြီးရဲတပ်ဖွဲ့က စစ်ဆေးအတည်ပြုမယ်လို့ သိရပါတယ်။

ယာဥ်မောင်းတွေအနေနဲ့ ယာဥ်တိုက်မှုကို တိမ်းရှောင် ထွက်ပြေးပါက အမြန်လမ်းမကြီးများဥပဒေရဲ့ အကာအကွယ်ကို မရရှိတော့ဘဲ တခြားသောလမ်းတွေမှာ ဖြစ်ပွားတဲ့ ယာဥ်တိုက်မှုတွေအတိုင်း ပြစ်မှု၊ ပြစ်ဒဏ်တွေ ကျခံရမယ်လို့ သိရပါတယ်။

ပြီးခဲ့တဲ့ စက်တင်ဘာ ၁ ရက်နေ့ကလည်း အမြန်လမ်းမကြီးအတိုင်း ရန်ကုန်မှ နေပြည်တော်ဘက်ကို မောင်းနှင်လာတဲ့ ခရီးသည်တင်ယာဉ် တစီး၊ မိုင်တိုင်မှတ် ၃၂ မိုင် ၅ ဖာလုံနဲ့ ၆ ဖာလုံကြားအရောက်မှာ လမ်းဖြတ်ကူးလာတဲ့ အမျိုးသမီးတယောက်ကို တိုက်မိခဲ့ပြီး လမ်းဖြတ်ကူးသူ နေရာမှာတင် ပွဲချင်းပြီးသေဆုံးမှု ဖြစ်ခဲ့ပါသေးတယ်။

ဒါအပြင် မေလ ၂ ရက်နေ့ကလည်း ရန်ကုန်ကနေ နေပြည်တော် အသွားလမ်းအတိုင်း မောင်းနှင်လာတဲ့ ခရီးသည်တင်ယာဉ်တစီးဟာ မိုင်တိုင်အမှတ် ၁၃၆/ ၅ - ၁၃၆/၆ ကြားအရောက်မှာ လမ်းလယ်ကျွန်းကိုဖြတ်ပြီး နောက်ကနေ ရှေ့ကို မောင်းနှင်လာတဲ့ ကျွဲလှည်းကို တိုက်မိခဲ့တာကြောင့် လှည်းမောင်းသူ ဒဏ်ရာရခဲ့ပြီး ကျွဲနှစ်ကောင် သေဆုံးသွားတယ်လို့ သိရပါတယ်။

မတ်လ ၁၈ ရက်နေ့ကလည်း ရန်ကုန်မှ နေပြည်တော်ကို အသွားလမ်း၊ မိုင်တိုင်အမှတ် (၀/၃-၄) ကြားမှာ အမျိုးသား သုံးယောက် စီးနင်းလိုက်ပါလာတဲ့ နံပတ်မပါ မော်တော်ဆိုင်ကယ်တစီး၊ အရှိန်ပြင်းစွာ လမ်းပြောင်းပြန် မောင်းနှင်လာရာကနေ လမ်းရဲ့ ယာဘက်အစွန်ဆုံး ယာဉ်ကြောမှာ ရပ်တန့်ထားတဲ့ ခြောက်ဘီးယာဉ်ရဲ့ ရှေ့ဦးပိုင်းကို ဝင်ရောက် တိုက်မိခဲ့တာကြောင့် နှစ်ယောက် သေဆုံးကာ တယောက် ဒဏ်ရာရခဲ့တယ်လို့ သိရပါတယ်။

ဓာတ်ပုံ - အမြန်လမ်း ထိန်း/ပြင်/ကြီးကြပ်ရေးအဖွဲ့

ပြည်ပလုပ်သားတွေရဲ့ မိသားစုလွှဲပို့ငွေ အထောက်အထား တင်ပြဖို့ ပျက်ကွက်ခဲ့တဲ့ အေဂျင်စီတွေကို အရေးယူ

ပြည်ပရောက် မြန်မာလုပ်သားတွေရဲ့ မိသားစုထံလွှဲပို့ငွေ အထောက်အထား တင်ပြဖို့ ပျက်ကွက်ခဲ့တဲ့ အေဂျင်စီ ၁၀ ခုကို လုပ်ငန်းလိုင်စင် ခြောက်လ ပိတ်သိမ်းပြီး အရေးယူထားတယ်လို့ အလုပ်သမားဝန်ကြီးဌာန၊ အလုပ်သမားညွှန်ကြားမှု ဦးစီးဌာနမှ သိရပါတယ်။

Aung Kaung Mon Co., Ltd, Aung Pyae Co.,Ltd, Federation of Myanmar Engineering Societies, Golden Modesty International Co., Ltd, Human Power Service Co., Ltd, Max Success CI., Ltd, P. A Pan Asia Employment Co., Ltd, Shwe Yu Lwin Co., Ltd, Top Coment Co.,Ltd နဲ့ Zew Bagan Co., Ltd တို့ကို ဒီကနေ့ အောက်တိုဘာ ၁ ရက်နေ့မှ စတင်ကာ လုပ်ငန်းလိုင်စင် (ယာယီ) ပိတ်သိမ်းထားတယ်လို့ သိရပါတယ်။

ဒါအပြင် ဒဏ်ကြေးငွေ ၁၀ သိန်းစီ ပေးဆောင်ရမယ်လို့လည်း သိရပြီး လက်ရှိ ပြစ်ဒဏ်ချမှတ်ခံရတဲ့ အေဂျင်စီတွေဟာ ဂျပန်၊ ထိုင်း၊ ဂျော်ဒန်နဲ့ မလေးရှားနိုင်ငံတွေကို လုပ်သားစေလွှတ်နေတဲ့ ကုမ္ပဏီတွေလို့ သိရပါတယ်။

“မိသားစုလွှဲပို့ငွေ အထောက်အထား ဆိုတာက အလုပ်သမားကိုယ်တိုင်က ငွေလွှဲမှသာ အေဂျင်စီက တင်ပြနိုင်မှာပါ။ ဒါပေမယ့် ဗဟိုဘဏ်က သတ်မှတ်ထားတဲ့ ငွေလဲနှုန်းနဲ့ ပြင်ပပေါက်ဈေး ငွေလဲနှုန်းက နှစ်ဆနီးပါးလောက် ကွာနေတယ်။ ဒီတော့ တရားဝင် လမ်းကြောင်းကနေ ငွေလွှဲဖို့ကို ဘယ်သူမှ မလွှဲချင်ကြဘူး။ သူတို့လမ်းကြောင်းနဲ့ သူတို့ လွှဲနေတဲ့အတွက် အေဂျင်စီတွေမှာ ဒါအတွက်ပြစရာ စာရင်းရဖို့ဆိုတာ တော်တော်ကိုခက်ပါတယ်။ အကုန်လုံး အကြပ်ရိုက်နေကြရတာ” လို့ ပြည်ပအလုပ်အကိုင် အေဂျင်စီ အကျိုးဆောင်တယောက်က ပြောပါတယ်။

ပြည်ပရောက် မြန်မာလုပ်သားတွေ အနေနဲ့ မိမိရောက်ရှိနေတဲ့ နိုင်ငံအလိုက် ရရှိတဲ့ အခြေခံ လုပ်ခလစာရဲ့ ၂၅ ရာခိုင်နှုန်းကို အလုပ်သမားဝန်ကြီးဌာနက သတ်မှတ်ထားတဲ့ ဘဏ်တွေကတဆင့် မိသားစုထံ လွှဲပို့ရတာဖြစ်ပြီး လွှဲပို့ထားတဲ့ အထောက်အထား စာရွက်ကို မိမိကို ပို့ဆောင်ပေးခဲ့တဲ့ အေဂျင်စီထံ ပို့ပေးရတာဖြစ်ပါတယ်။

အလုပ်သမားတွေပို့တဲ့ မိသားစုထံလွှဲ ပို့ငွေ အထောက်အထားကို အေဂျင်စီတွေက အလုပ်သမားဝန်ကြီးဌာနကို ပြန်လည်တင်ပြရပြီး မတင်ပြနိုင်တဲ့ အေဂျင်စီတွေကို လုပ်ငန်းလိုင်စင် ပိတ်သိမ်းတာ၊ ငွေဒဏ် ချမှတ်တာအပြင် အလုပ်ခေါ်စာ တင်ပြခွင့်ကိုပါ ဆိုင်းငံ့ အရေးယူတာတွေ ပြုလုပ်တယ်လို့ သိရပါတယ်။

“အရင်တုန်းကတော့ တချို့ အေဂျင်စီတွေက အရေးယူခံရမှာစိုးလို့ ကိုယ့်ကိုယ့်ငွေကိုယ် စိုက်ထုတ်ပြီး စာရင်းပြကြတာရှိတယ်။ နောက်ပိုင်း ပြည်ပလုပ်သား စေလွှတ်ခွင့်တွေကြပ်၊ အလုပ်အကိုင်တွေက မကောင်းကြတော့ ဘယ်သူမှ အရှုံးခံပြီး ကိုယ်ငွေနဲ့ စာရင်းတင်တာမျိုး မလုပ်နိုင်ကြတော့ဘူး။ အလုပ်သမားတွေနဲ့ကလည်း ဟိုဘက်နိုင်ငံ ရောက်သွားပြီဆိုတာနဲ့ အဆက်အသွယ်ရဖို့ ခက်သွားပြီ။ တချို့က ကုမ္ပဏီပြောင်း၊ အလုပ်ပြောင်းနဲ့ဆိုတော့ သူတို့နဲ့ အမြဲတမ်း အဆက်အသွယ် ရနိုင်ဖို့ဆိုတာ မသေချာဘူး” လို့ အေဂျင်စီအကျိုးဆောင်က ပြောပါတယ်။

ပြည်ပအလုပ်အကိုင် အကျိုးဆောင် လိုင်စင်ရ အေဂျင်စီတွေကတဆင့် ပြည်ပနိုင်ငံတွေကို တာဝန်ယူ စေလွှတ်ခဲ့တဲ့ အလုပ်သမား တယောက်ချင်းစီရဲ့ လုပ်ခလစာမှ မိသားစုလွှဲပို့ငွေ ၂၅ ရာခိုင်နှုန်းကို တရားဝင် လွှဲပို့‌စေရေးအတွက် အေဂျင်စီနဲ့ အလုပ်သမားအကြား သဘောတူညီချက်စာချုပ် ချုပ်ဆိုခြင်းကို ၂၀၂၃ ခုနှစ်ကနေ စတင် ဆောင်ရွက်ခဲ့တယ်လို့ သိရပါတယ်။

ရန်ကုန်စင်ထရယ် ကွန်ဒို အပါအဝင် ကွန်ဒို သုံးခု သတ်မှတ်နှစ်ကျော်လွန်ပြီး အခန်းအပ်ခြင်း မရှိ

The central ကွန်ဒို အပါအဝင် ပရော့ဂျက်သုံးခု ဆောက်လုပ်နေတဲ့ ကွန်ဒိုတိုက်ခန်းတွေကို အကောင်ထည်ဖော်နေတဲ့ ဟောင်ကောင်အခြေစိုက်ကုမ္ပဏီက အခန်းအပ်ချိန် သတ်မှတ်နှစ်ထက် ကျော် လွန်နေသည့်အပြင် တာဝန်ယူ၊ တာဝန်ခံမှုရှိရှိ နဲ့ ဖြေရှင်းပေးခြင်းလည်းမရှိဘူးဟု နစ်နာသူကွန်ဒိုတိုက်ခန်း ဝယ်ယူသူတွေက ဆိုပါတယ်။

အဲဒီကွန်ဒို တိုက်ခန်းတွေဆောက်လုပ်နေတဲ့ ကုမ္မဏီဟာ Marga Landmark Development ကုမ္မဏီ ဖြစ်ပြီး The Central ၊ The Park ၊ Soho ပရော်ဂျက်သုံးခုမှ ကွန်ဒို တိုက်ခန်းတွေကို တန်ဖိုးရဲ့ ကိုးဆယ် ရာခိုင်နှုန်းကို နှစ်နှစ်အတွင်း ပေးချေရမယ် စနစ်နဲ့ ရောင်းချခဲ့တာဖြစ်ပါတယ်။

ကွန်ဒို တိုက်ခန်းတွေကို အမေရိကန်ဒေါ်လာနဲ့ ရောင်းချခဲ့ပြီး အခန်းတည်နေရာကို မူတည်ပြီး တခန်းကို သိန်း တသောင်းခွဲအထက် ရှိကြောင်း ၊ အချို့ဝယ်ယူသူများက တခါတည်း ပေးချေရတဲ့ စနစ်နဲ့လည်း ဝယ်ယူခဲ့တယ်လို့ ဝယ်ယူသူတွေက ဆိုပါတယ်။

အဆိုပါ ကွန်ဒိုတိုက်ခန်းတွေဟာ ရန်ကင်းမြို့နယ် အင်းလျားကန်အနီး ကမ္ဘာဘုရားလမ်းမပေါ်တွင် နှစ်ခု ၊ အလုံမြို့နယ် တရုတ်သံရုံးအနီးတွင် တခု အကောင်ထည်ဖော်နေတာဖြစ်ပါတယ်။

“ကျွန်မကတော့ The Park ပရော်ဂျက်က ကွန်ဒိုကို ဝယ်တာပါ။ နှစ်နှစ်အတွင်း အရစ်ကျစနစ်နဲ့ ဝယ်တာ ၊ ကိုးဆယ်ရာခိုင်နှုန်း သွင်းပြီးပြီ ၊ အခန်းကတော့ ၂၀၂၅ ခုနှစ်မှာ အခန်း အပ်မယ်လို့ ပြောပါတယ်။ အ ခန်းအပ်ရင်တော့ ကျန်တဲ့ ဆယ်ရာခိုင်နှုန်း ပေးရမယ်ပေါ့။ စာချူပ်ထဲမှာတော့ နှစ်နှစ်အပါအဝင် ထပ် တိုး ခြောက်လအတွင်း အခန်း အပ်ရမယ်။ မအပ်ဖြစ်ရင် သွင်းထားတဲ့ ငွေကို တစ်ရာခိုင်နှုန်း အတိုးပေး မယ်ဆိုထားပေမဲ့ အခုထိ အတိုးမရပါဘူး။ သွားပြောတဲ့အခါ အုန်နာပေးသွင်းရမဲ့ ၁၀ရာခိုင်နှုန်းက နှုတ် မယ်လို့သာ နှုတ်ဂတိနဲ့ ပြောလွှတ်ပါတယ်။ “ ဟု အမည်မဖော်လိုသူ ဝယ်ယူခဲ့သူက ဆိုပါတယ်။

ဒါအပြင် ဝယ်ယူသူတွေကို စာချုပ်ချုပ်ဆိုရာတမှာလည်း ကုမ္မဏီက ပြီးစီးမယ်ရက်ကို ရက်ချိန်း အမျိုးမျိုးနဲ့ ချုပ်ဆိုတဲ့အပြင် တကယ်တမ်း လက်တွေ့မှာ Foundation ပင်ချထားခြင်းမရှိတာကို ဝယ်ယူသူ များက စုံးစမ်းသိရှိရတာကြောင့် ငွေကြေးလိမ်လည်သွားမည်ကို စိုးရိမ်မကင်းဖြစ်နေကြတယ်လို့ ဆိုပါတယ်။

“ အန်တီက Central မှာ ဝယ်ထားတာ နှစ်ခန်းပါ။ ၂၀၁၉ ခုနှစ်က ဝယ်ထားတာ အခုထိ အခန်းမအပ်သလို အန်တီတို့ ဝယ်တဲ့နေရာမှာ ပေါက်တူးတလက်တောင် မတွေ့ရသေးလို စိတ်ဆင်းရဲနေပါတယ်။ အန်တီတို့က စုထားဆောင်းထားတာကနေ ခြစ်ခြုတ်ပြီး ဝယ်ရတာပါ။ အစိုးရလူကြီးမင်းများ ဒီအတိုင်း မကြည့်နေပါနဲ့လို့ တောင်းဆိုပါရစေ” ဟု ကွန်ဒို တိုက်ခန်း ဝယ်ယူခဲ့သူ ဒေါ်လဲ့လဲ့ဝင်းကပြောပါတယ်။

အဆိုပါ ကွန်ဒိုအခန်းများကို ၂၀၁၇ ၊ ၂၀၁၈ ခုနှစ်ကတည်းက ရောင်းချခဲ့တယ်လို့ ယူဆရပြီး အချို့သော ဝယ်ယူသူများဟာ စာချုပ်ပါ ကန့်သတ်နှစ်ထက် တနှစ် ၊ နှစ်နှစ်ကနေ ရှစ်နှစ် ၊ ဆယ်နှစ်အထိ ကျော် လွန်နေတာတွေရှိကြောင်း ဝယ်ယူသူတွေက သူတို့ရဲ့ နစ်နာမှုတွေကို လူမှုကွန်ယက်နွေမှာ ထုတ်ဖော်ပြော ဆိုထားပါတယ်။

၂၀၁၉ ခုနှစ်က ကွန်ဒိုတိုက်ခန်းဝယ်ခဲ့ပြီး ၂၀၂၁ ခုနှစ်တွင် အခန်းအပ်မယ်လို့ သဘောတူညီချက်စာချုပ် ချုပ်ဆိုခဲ့တဲ့ ဒေါ်လဲလဲဝင်းကတော့ အခန်း မအပ်ရတဲ့ အခြေအနေကို ကုမ္မဏီက သက်ဆိုင်ရာတာဝန် ရှိသူများကို ကွန်ပလိန်း တက်ရာမှာ ကုမ္မဏီက ကိုဗစ် ၊ တိုင်းပြည်အခြေအနေ နဲ့ ငလျင်လှုပ်ခတ်ခဲ့တဲ့ သဘာဝဘေးအန္တရာယ်နဲ့ပတ်သတ်ပြီး အကြောင်းပြချက်ပေးခဲ့တယ်လို့ဆိုပါတယ်။

သတ်မှတ်နှစ်ထက် ကျော်လွန်နေတာကြောင့် စက်တင်ဘာ ၃၀ ရက်နေ့မှာ ဝယ်ယူခဲ့သူ ၊ နစ်နာခဲ့သူ ကိုးဆယ် ဝန်းကျင်ထဲက အများက ကုမ္မဏီ အရောင်းပြခန်းမှာ ကွန်ပလိန်းတက်ခဲ့ရာ တာဝန်ရှိသူ များက တာဝန်ယူ ၊ တာဝန်ခံ ဖြေရှင်းပေးခဲ့ခြင်း မရှိဘူးလို့ ဆိုပါတယ်။

VOM က အဆိုပါ အဖြစ်ပျက်များနဲ့ပတ်သတ်ပြီး ကုမ္မဏီက ဆက်သွယ်ရန် ပေးထားတဲ့ ဖုန်းနံပါတ် ကို ဆက်သွယ်ခဲ့ပေမဲ့ လက်ခံဖြေကြားခြင်း မရှိခဲ့ပါဘူး။

အဆိုပါ ကွန်ဒိုတိုက်ခန်းများကို အေဂျင်စီတွေက တာဝန်ယူ ရောင်းချကြပြီး ဆက်သွယ်ရန် ပေး ထား တဲ့ ဖုန်းနံပါတ်များကို မေးမြန်းရမှာတော့ ကုမ္မဏီက အခန်းရောင်းချရန် ညွှန်းကြားခဲ့ခြင်းမရှိဘဲ အဆိုပါ အခန်းကို ဝယ်ယူသူ များကသာ ရောင်းချရန် အပ်နှံခဲ့ခြင်းဖြစ်တာကြောင့် တာဝန်ယူ ၊ တာဝန်ခံစရာ မရှိကြောင်း ငြင်းဆို ထားပါတယ်။

ထားဝယ်ဒေသ ရေကြီးမြေပြိုမှုမှာ သေဆုံး ၃၆ ယောက်ရှိလာပြီး တနင်္သာရီမှာလည်း ရေထပ်တက်လို့ အိမ်တွေရေနစ်

တနင်္သာရီတိုင်း ထားဝယ်ခရိုင်မှာ ရေကြီး ၊ မြေပြိုမှုကြောင့် သေဆုံးသူ ၃၆ ယောက်အထိရှိလာသလို တနင်္သာရီမြို့နယ်မှာလည်း ရေကြီးလို့ မြိတ် - တနင်္သာရီ - ကော့သောင်း ပြည်ထောင်စုလမ်းမကြီးရေကျော်ပြီး ကားသွားလာမရဘဲ လမ်းပိတ်နေတယ်လို့ သိရပါတယ်။

သေဆုံးမှုထဲမှာ လောင်းလုံးမြို့နယ်က သေဆုံးသူ ၂၆ ယောက်နဲ့ အများဆုံးဖြစ်ပြီး သရက်ချောင်းမြို့နယ်မှာ ရှစ်ယောက် ၊ ထားဝယ်မြို့နယ်မှာ နှစ်ယောက် သေဆုံးမှုရှိတယ်လို့ သိရပါတယ်။

လောင်းလုံးမြို့နယ်မှာ ကဒက်ငယ်ထိန်ရွာက အလောင်း ၁၃ လောင်း ၊ ကဒက်ကြီးရွာက နှစ်လောင်း ၊ တောကျဲရွာကနှစ်လောင်း ၊ ဇလွတ်ရွာက တလောင်း၊ သဗျာရွာက သုံးယောက် ၊ ညောပြင်ရွာက နှစ်လောင်း ၊ မင်းရပ်က တလောင်း ၊ ကျောက်နီမော်က နှစ်ယောက် ဖြစ်တယ်လို့ ကနဦးသိရပါတယ်။

" ကဒက်ငယ်ထိန်မှာ ဒီနေ့ အလောင်းနှစ်လောင်းထပ်ရတယ်။ မနေ့ကတလောင်းတွေ့တယ်ဆိုတော့ အခုဆိုရင် သေဆုံးသူ၁၃ ယောက်အထိအလောင်းရှာတွေ့ပြီ ။ မိုးကတော့ရပ်သွားပြီဆိုပေမယ့် လမ်းတွေက မြေကြီးတွေ ပြိုကျထားတော့ ပိတ်နေတာ ၊ ကျောက်တုံးတွေကြောင့် ဘက်ဟိုးကားနဲ့ ရှင်းပြီးမှ လမ်းသွားလို့ရတဲ့ အခြေအနေဖြစ်နေတယ်။ တချို့ရွာတွေဆို လမ်းကမပေါက် လမ်းတွေကပျက်ကုန်တော့ ရွာထဲပိတ်မိပြီး အစားအစာတွေ ပြတ်နေကြတယ်။ အကူအညီတွေလိုအပ်နေပါတယ်။ စက်ယန္တရား တွေလည်း.လိုအပ်ပါတယ်။ဒါမှ နေရာတိုင်းကို ရှင်းလင်းရေးအမြန်လုပ်နိုင်မှာပါ။
" လို့ မြေပြင်ကယ်ဆယ်ရေးလုပ်နေတဲ့ ကဒက်ငယ်ထိန်ရွာ ဒေသခံကပြောပါတယ်။

တချို့ရွာတွေမှာ ကူညီကယ်ဆယ်ရေးမရောက်ရှိတဲ့အတွက် အစားအစာပြတ်လပ်ပြီး ဒုက္ခရောက်နေကြတာကြောင့် ပိတ်နေတဲ့လမ်းကို အမြန်ဆုံး ရှင်းလင်းကာ ရွာတွေအထိ အစားအစာနဲ့အကူအညီ အထောက်အပံံ ငွေကြေးတွေ လှူနိုင်ဖို့လိုတယ်လို့ သိရပါတယ်။

သရက်ချောင်းမြို့နယ်ထဲမှာလည်း ရေပြန်ကျသွားပေမယ့် အကူအညီလုံးဝမရောက်သေးတဲ့ ရွာတွေရှိပြီး အစားအစာပြတ်လပ်ပြီး ခက်ခဲနေတာကြောင့် ကူညီပေးကြဖို့ တောင်းဆိုနေကြပါတယ်။

သရက်ချောင်းမြို့နယ် အောက်ပိုင်းရှိ
စုံစင်ဖျား၊ သဲချောင်းကြီး၊ ကျွဲခြံ၊ အလယ်စု၊ မယ်ကဲ၊ ဝင်းကဖော်၊ကျောက်အိုင်၊ရေဗျတ် ၊ဗြတ်ဝိသားရွာ စတဲ့ရွာတချို့ဘက်ကလဲ ‌အိမ်တွေအကုန်နီးပါးမြုပ်ခံခဲ့ရပြီး လက်ရှိမှာ အကူအညီမရသေးလို့ အစားအစာ၊ သောက်ရေသန့်တွေပြတ်လပ်နေတယ်လို့ သိရပါတယ်။

" သရက်ချောင်းကရွာတွေလည်း.လောင်းလုံးဘက်လိုပဲ အခြေအနေဆိုးပါတယ်။ ခုထိအကူအညီတွေ မရတာအများကြီးရှိပါတယ်။ ရွာတွေအထိ ရောက်အောင်ကူဖို့လိုပါတယ်။ လမ်းမပေါက်လို့ စုပုံထားခဲ့တာမျိုးက ဒုက္ခရောက်နေတဲ့ ရွာသားတွေအတွက် သိပ်မထိရောက်ပါဘူး။ " လို့ ကူညီရေးလုပ်နေသူ ဒေသခံက ပြောပါတယ်။

လက်ရှိ လောင်းလုံးနဲ့ သရက်ချောင်းမြို့နယ်ဘက်မှာ မိုးရွာရပ်ပြီး.မြေပြိုတာ မရှိတော့ပေမယ့် တနင်္သာမြို့နယ်မှာတော့ အန္တရာယ်ရေမှတ်အထက်ကို ကျော်လွန်နေတဲ့အတွက် ရေပေါ်ရွာနှင့် သမီးလှရွာတို့တွင် တစ်ရွာလုံးရေမြုပ်နေသလို တကူကျေးရွာအုပ်စု နဲ့ စတဲ့ ကျေးရွာတချို့မှာ ရေကြီးနေပါတယ်။

" ရေပေါ်ရွာနဲ့ သမီးလှရွာဆိုရင် အောက်ထပ်တွေအကုန်မြုပ်ကုန်ပြီ။ ရေကလည်း ထပ်တက်တော့ ပြောင်းရွှေ့နေရတယ်။ ပြည်ထောင်စုလမ်းပိုင်းကလည်း ရေကျော်နေ ဆိုင်ကယ်လောက်ပဲ လှေနဲ့ကူးပြီးသွားလို့ရတယ်။ " လို့ တနင်္သာရီ ဒေသခံက ပြောပါတယ်။

မြိတ် - တနင်္သာရီလမ်းပိုင်းမှာဆိုရင်လည်း.
အော်ကြီးရွာလမ်းမပေါ် နဲ့ ဥယျာဉ်ကွင်းရွာလမ်းမပေါ် ၊ အောက်ကင်းအ‌ရှေ့ရွာ၊ ကဒဲလိပ်ရွာ၊ ရမ်းဖိုရွာ၊ ဆင်တင်ပြင်ဝန်း လမ်းမတွေပေါ် ရေကျော်နေတယ်လို့ သိရပါတယ်။

ဒါအပြင် တနင်္သာရီ - ကော့သောင်းလမ်းပိုင်းရှိ
လယ်တောင်ယာရွာလမ်းမပေါ် မှာလည်း.ရေ ၉ ပေလောက်ကျော်နေတာကြောင့် ကားတွေ သွားလာမရဘူးလို့ သိရပါတယ်။

ဒါကြောင့် လတ်တလောမှာ မြိတ် - တနင်္သာရီ - ကော့သောင်းလမ်းပိုင်းက လက်ရှိမှာ ကားတွေ သွားလာလို့ မရပါဘူး။

တနင်္သာရီမြို့နယ်ထဲမှာလည်း ရေထပ်တက်လာလို့ အရေးပေါ်ရွှေ့ပြောင်းရတဲ့ ရေဘေးသင့်သူတွေ ထပ်တိုးလာနေတယ်လို့ သိရပါတယ်။

တောင်ငူမှာ သားအရင်းက အမေကို ဓားနဲ့ခုတ်သတ်

ပဲခူးတိုင်း ၊ တောင်ငူမြို့၊ အမှတ် ၁၀ ရပ်ကွက် ၊အုတ်ကျွတ်တန်း ၊ ၁၀ လမ်းမှာ သားအရင်းက အမေဖြစ်သူကို ဓားမနဲ့ ခုတ်သတ်မှု ဖြစ်ခဲ့ပြီး သားဖြစ်သူကို လက်ရှိ ဖမ်းဆီးထိန်းသိမ်းထားတယ်လို့ သိရ ပါတယ်။

မနေ့က စက်တင်ဘာ ၃ဝ ရက်နေ့၊ မနက်ပိုင်းမှာ ဖခင်ဖြစ်သူက အပြင်သွားနေချိန် နေအိမ်မှာကျန်ခဲ့တဲ့ အသက် ၄၉ နှစ်အရွယ် မိခင်ဖြစ်သူ ဒေါ် ငြိမ်းငြိမ်းစံကို အသက် ၂၂ နှစ်အရွယ်သားက ဓားမနဲ့ခုတ်သတ်ခဲ့တာဖြစ်ပါတယ်။

" မနေ့က မနက် ၅ နာရီလောက်မှာ ဖြစ်တာပါ။ အဖေက အပြင်သွားတယ်။ အဲဒီအချိန်သားဖြစ်သူက ဆေးကြောင်ပြီး အမေကိုခုတ်သတ်လိုက်တာလို့ သိရတယ်။ မျက်နာတွေ ၊ လက်တွေ ၊ ခေါင်းမှာ ဓားဒဏ်ရာတွေ အများကြီးပဲ။ ဆေးရုံကိုပို့လိုက်ပေမယ့် ရတဲ့ဒဏ်ရာတွေကများတော့ ဆုံးသွားတယ်။ " လို့ တောင်ငူမြို့ခံက ပြောပါတယ်။

လက်ရှိမှာ လူသတ်မှုကျူးလွန်တဲ့ သားဖြစ်သူ ဟန်ထူးအောင်ကို တောင်ငူမြို့မ ရဲစခန်းက ဖမ်းဆီးထားပြီး ရာဇသတ်ကြီး ဥပေဒ ပုဒ်မ ၃၀၂ နဲ့ အမှုဖွင့် ဆောင်ရွက်ထားတယ်လို့ သိရပါတယ်။

၂၀၂၄ ခုနှစ် အောက်တိုဘာ ၁၄ ရက်ကလည်း.နေပြည်တော်၊ ပျဥ်းမနားမြို့၊ ပေါစံခေါကျေးရွာမှာ ဖခင်ဖြစ်သူက ဇနီးနဲ့ သမီးကို ဓားနဲ့ခုတ်သတ်မှု ရှိခဲ့ပါတယ်။

၂၀၂၂ ခုနှစ် နိုဝင်ဘာလကလည်း ရှမ်းပြည်နယ်(မြောက်ပိုင်း)၊ လားရှိုးမြို့နယ်၊အီနိုင်းကျေး ရွာ ၆ အုပ်စုမှာ ဆေးကြောင်နေတဲ့ သားအရင်းက မိခင်ဖြစ်သူကို ဓားနဲ့ခုတ်သတ်မှု ဖြစ်ခဲ့ပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ

(၂၀၂၆ - အောက်တိုဘာ ၁ ၊ နံနက် ၁၀ နာရီ)

#ရွှေဈေး

-ကမ္ဘာ့ရွှေဈေး
တအောင်စ ၄၁၆၅ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၇,၁၀၀,၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၀၄၀,၀၀၀ ကျပ်
ဝယ်ဈေး ၁၀,၀၀၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၆၄၀,၀၀၀ ကျပ်
ဝယ်ဈေး ၉,၆၀၀,၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉,၉၂၀,၀၀၀ ကျပ်
ဝယ်ဈေး ၉,၈၈၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၅၂၀,၀၀၀ ကျပ်
ဝယ်ဈေး ၉,၄၈၀,၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၄၄၉၀ ကျပ်
ဝယ်ဈေး - ၄၃၈၀ ကျပ်

-စင်္ကာပူဒေါ်လာ
ရောင်းဈေး - ၃၅၀၀ ကျပ်
ဝယ်ဈေး - ၃၄၀၀ ကျပ်

-ယူရို
ရောင်းဈေး - ၅၁၂၂ ကျပ်
ဝယ်ဈေး - ၄၉၈၄ ကျပ်

-ထိုင်းဘတ်
ရောင်းဈေး - ၁၃၄.၂၉ ကျပ်
ဝယ်ဈေး - ၁၃၀.၉၂ ကျပ်

-မလေးရှားရင်းဂစ်
ရောင်းဈေး - ၁၁၀၃ ကျပ်
ဝယ်ဈေး - ၁၀၇၆ ကျပ်

-တရုတ်ယွမ်
ရောင်းဈေး - ၆၇၂ ကျပ်
ဝယ်ဈေး - ၆၅၅ ကျပ်

-ဂျပန်ယန်း
ရောင်းဈေး - ၂၈.၇၄ ကျပ်
ဝယ်ဈေး - ၂၇.၉၉ ကျပ်

-အိန္ဒိယရူပီး
ရောင်းဈေး - ၄၆.၈၅ ကျပ်
ဝယ်ဈေး - ၄၅.၆၂ ကျပ်

-ကိုရီးယားဝမ်
ရောင်းဈေး - ၃.၃၃ ကျပ်
ဝယ်ဈေး - ၃.၂၅ ကျပ်

-စတာလင်ပေါင်
ရောင်းဈေး - ၅၉၇၆ ကျပ်
ဝယ်ဈေး - ၅၈၂၆ ကျပ်

-ဩစတြေးလျဒေါ်လာ
ရောင်းဈေး - ၃၁၃၅ ကျပ်
ဝယ်ဈေး - ၃၀၅၅ ကျပ်

-ကနေဒါဒေါ်လာ
ရောင်းဈေး - ၃၁၇၀ ကျပ်
ဝယ်ဈေး - ၃၀၈၅ ကျပ်

-ဟောင်ကောင်ဒေါ်လာ
ရောင်းဈေး - ၅၇၄ ကျပ်
ဝယ်ဈေး - ၅၆၀ ကျပ်

-ယူအေအီး
ရောင်းဈေး - ၁၂၂၆ ကျပ်
ဝယ်ဈေး - ၁၁၉၈ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
***************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ