FIFA အနေနဲ့ အခြေခံကျတဲ့ ပြုပြင်ပြောင်းလဲမှုလုပ်ဆောင်ဖို့ ဥရောပထိပ်တန်းလိဂ်များ တောင်းဆို

ပရီးမီးယားလိဂ်အပါအဝင် ဥရောပထိပ်တန်းလိဂ်များက ကမ္ဘာ့ဘောလုံးအဖွဲ့ချုပ်(FIFA)အနေနဲ့ အခြေခံကျတဲ့ ပြုပြင်ပြောင်းလဲမှုလုပ်ဆောင်ဖို့ တောင်းဆိုခဲ့ပါတယ်။

FIFA ဥက္ကဋ္ဌ အင်ဖန်တီနိုဟာ ခေါင်းပုံဖြတ်လိုတဲ့ စိတ်ကူးတွေကို တက်ကြွစွာအရှိန်မြှင့်လုပ်ဆောင်နေတယ်လို့ ပြစ်တင်ဝေဖန်ခဲ့ပါတယ်။

အခုကြေညာချက်ကို ပရီးမီးယားလိဂ်၊ လာလီဂါ၊ စီးရီးအေနဲ့ ဘွန်ဒစ်လီဂါတို့က ပူးတွဲထုတ်ပြန်ခဲ့တာဖြစ်တယ်။

FIFA အနေနဲ့ အတောမသတ်သော ချဲ့ထွင်မှုလုပ်ငန်းစဉ်တွေက လူတိုင်းအပေါ် ဘယ်လိုသက်ရောက်မှုရှိသလဲဆိုတာကို မိမိတို့ နားလည်လို့ အခု ထုတ်ဖော်ပြောဆိုရတာဖြစ်တယ်လို့ ရေးသားခဲ့ပါတယ်။

ဒါ့အပြင် FIFA ဟာ ပွင့်လင်းမြင်သာရှိမှု၊ ဓမ္မဓိဌာန်ကျမှု၊ သင့်တင်မျှတမှုနဲ့ အားလုံးပါဝင်ခွင့်ရမယ့် အဖွဲ့အစည်းတစ်ခုအဖြစ် အပြောင်းအလဲ ကြီးကြီးမားမားပြုလုပ်ဖို့ လိုအပ်နေပြီလို့ တိုက်တွန်းခဲ့ပါတယ်။

လွန်ခဲ့တဲ့နှစ်နှစ်ကလည်း ဥရောပထိပ်တန်းလိဂ်တွေဟာ ကစားသမားသမဂ္ဂ FIFPro နဲ့ ပူးပေါင်းပြီး နိုင်ငံတကာဘောလုံးပြက္ခဒိန် ချဲ့ထွင်မှုအတွက် ဥရောပကော်မရှင်ထံ တရားဝင်တိုင်ကြားချက် တင်သွင်းခဲ့ပါတယ်။

FIFA ကတော့ တချို့လိဂ်တွေဟာ သူတော်ကောင်းယောင်ဆောင်ပြီး ကမ္ဘာပေါ်ရှိ တခြားအရာများကို ထည့်သွင်းမစဉ်းစားဘဲ ပြုမူဆောင်ရွက်နေတယ်လို့ စွပ်စွဲခဲ့ပါတယ်။

လှောင်ပြောင်မှုတွေကို လက်ခံကြောင်း အီတလီအသင်းနည်းပြ မန်ချီနီ ပြောကြား

အီတလီလက်ရွေးစင်အသင်းနည်းပြ မန်ချီနီက ဘယ်လ်ဂျီယံအသင်းကို အိမ်ကွင်းမှာ ဝ-၂ ဂိုးနဲ့ အရေးနိမ့်ခဲ့တဲ့ ပွဲအပြီး လှောင်ပြောင်မှုတွေကို လက်ခံကြောင်း ပြောကြားခဲ့ပါတယ်။

မန်ချီနီဟာ အီတလီအသင်းနည်းပြရာထူးထိုင်ခုံကို သုံးနှစ်ကြာမှာ ပြန်ရောက်လာပြီး အခုပွဲက သူ့ရဲ့ပွဲဦးထွက်လည်းဖြစ်တယ်။

အိမ်ကွင်းပရိသတ်တွေဟာ မိနစ် ၂၀ မှာ ပထမဂိုး စပေးလိုက်ရချိန်ကတည်းက လှောင်ပြောင်ခဲ့ပြီး ပွဲအပြီးမှာတော့ လှောင်ပြောင်မှုက ပိုမိုကျယ်လောင်ခဲ့ပါတယ်။

''ကျွန်တော်တို့ အရေးနိမ့်တဲ့အချိန်မှာ ဘယ်သူမှ မပျော်ပါဘူး။ ကျွန်တော်တို့ ရှုံးနိမ့်ရင်တော့ လှောင်ပြောင်မှုတွေ ခံရနိုင်ပါတယ်''လို့ မန်ချီနီက ပြောခဲ့ပါတယ်။

အခုပွဲကို ရောမမြို့က ပရိသတ် ၇၀၀၀၀ ဆံ့ အိုလံပီကိုကွင်းမှာ ကစားခဲ့ပြီး ၄၇၁၅၅ ဦးသာ လာရောက်ကြည့်ရှုခဲ့ပါတယ်။

ကမ္ဘာ့ဖလားလေးကြိမ်ချန်ပီယံ အီတလီအသင်းဟာ နောက်ဆုံး ကမ္ဘာ့ဖလားသုံးကြိမ်ဆက် ခြေစစ်ပွဲမအောင်မြင်ဘဲ ဖြစ်ခဲ့ပါတယ်။

ကိုးလ်ပါလ်မာအနေနဲ့ အင်္ဂလန်အသင်းအတွက် ကစားဖို့ အခွင့်အလမ်းများစွာကို လွဲချော်ခဲ့တယ်လို့ တူဟယ်လ် သုံးသပ်

အင်္ဂလန်လက်ရွေးစင်အသင်းနည်းပြ သောမတ်စ်တူဟယ်လ်က တိုက်စစ်ကစားသမား ကိုးလ်ပါလ်မာအနေနဲ့ အင်္ဂလန်အသင်းအတွက် ကစားဖို့ အခွင့်အလမ်းများစွာကို လွဲချော်ခဲ့တယ်လို့ သုံးသပ်ခဲ့ပါတယ်။

ပါလ်မာအနေနဲ့ အခုနိုင်ငံတကာရက်သတ္တပတ်မှာလည်း တခြားကစားသမားလေးဦးနဲ့အတူ အင်္ဂလန်အသင်းလူစာရင်းက နုတ်ထွက်ခဲ့ပါတယ်။

၎င်းဟာ အခုရာသီ ချယ်လ်ဆီးရဲ့ပရီးမီးယားလိဂ် ငါးပွဲစလုံး ပွဲထွက်ကစားခဲ့တာဖြစ်လို့ အခုဖြစ်ရပ်က အံ့အားသင့်စရာ ဖြစ်နေခဲ့တယ်။

တူဟယ်လ်ကတော့ ပါလ်မာဟာ သက်သောင့်သက်သာမရှိဘဲ နာကျင်မှုနဲ့ ကစားနေတယ်လို့ ဖြေရှင်းချက် ပေးခဲ့ပါတယ်။

ပါလ်မာဟာ ပြီးခဲ့တဲ့ ကမ္ဘာ့ဖလားပြိုင်ပွဲဝင် အင်္ဂလန်အသင်းလူစာရင်းမှာ အံ့အားသင့်ဖွယ် ချန်လှပ်ခံခဲ့ရပါတယ်။

အင်္ဂလန်အသင်းကို ၂၀၂၅ ခုနှစ် ဇန်နဝါရီမှာ တူဟယ်လ် စတင်တာဝန်ယူကတည်းက ပါလ်မာဟာ သုံးပွဲသာ ကစားခဲ့ရပါတယ်။

ချယ်လ်ဆီးအသင်းဟာ အသင်းကစားသမားတွေကို နားရက်ပေးထားပြီး ဆန္ဒရှိရင် ခရီးသွားခွင့်လည်း ပြုထားပါတယ်။

ပါလ်မာကတော့ သူ့ရဲ့နိုင်ငံခြားခရီးစဉ်မှာ ချယ်လ်ဆီးပြန်လည်ထူထောင်ရေးနည်းပြတစ်ဦး ခေါ်ဆောင်သွားမယ်လို့ သိရပါတယ်။

ဒဏ်ရာရရှိခဲ့တဲ့ ပြင်သစ်တိုက်စစ်မှူး အမ်ဘာပေ အသင်းလူစာရင်းက နုတ်ထွက်

ပြင်သစ်လက်ရွေးစင်အသင်းခေါင်းဆောင် အမ်ဘာပေဟာ တူရကီကို ၁-၀ ဂိုးနဲ့ အနိုင်ရတဲ့ပွဲမှာ ဒဏ်ရာရရှိခဲ့လို့ အသင်းလူစာရင်းကနေ နုတ်ထွက်ခဲ့ပါတယ်။

၅၄ မိနစ်မှာ အမ်ဘာပေဟာ အနိုင်ဂိုးကို တစ်ဦးတည်း လွတ်လွတ်ကျွတ်ကျွတ် ကန်သွင်းရင်း ဒဏ်ရာရခဲ့တာပါ။

အမ်ဘာပေအနေနဲ့ ဂိုးသွင်းပြီးနောက် နာကျင်မှုဝေဒနာ ခံစားရလို့ မြက်ခင်းပေါ် ထိုင်ချခဲ့ပြီး သူ့ရဲ့ဘက်ဘက်ဒူးကို ပွတ်သပ်ရင်း မျက်နှာရှုံ့မဲ့နေခဲ့ပါတယ်။

ကနဦးကုသမှု ခံယူပြီးနောက် ကွင်းထဲပြန်ဝင်လာပေမဲ့ ချက်ချင်းလဲကျကာ လူစားလဲခံရပါတယ်။

ပြင်သစ်ဘောလုံးအဖွဲ့ချုပ်က အမ်ဘာပေအနေနဲ့ အရွတ်ဒဏ်ရာ ရခဲ့ပြီး အသင်းလေ့ကျင့်ရေးစခန်းကနေ ထွက်ခွာသွားမယ်လို့ အတည်ပြုခဲ့ပါတယ်။

ပြင်သစ်အသင်းနဲ့ ပွဲဦးထွက်ခဲ့တဲ့ နည်းပြသစ် ဇီဒန်းကတော့ အမ်ဘာပေရဲ့ဒဏ်ရာအခြေအနေဟာ အားရစရာ သိပ်မရှိဘူးလို့ ပြောခဲ့ပါတယ်။

အမ်ဘာပေဟာ အခုသွင်းဂိုးနဲ့အတူ ပြင်သစ်အသင်းအတွက် ၆၇ ဂိုးအထိ ရှိလာခဲ့ပါတယ်။

မနက်ဖြန် ယှဉ်ပြိုင်မည့် ကမ္ဘောဒီးယားနှင့် အုပ်စုအဆုံးအဖြတ်ပွဲအတွက် မြန်မာ့လက်ရွေးစင်အသင်း လေ့ကျင့်ပြင်ဆင်

မြန်မာ့လက်ရွေးစင်အသင်းသည် FIFA ASEAN Cup 2026 Division 2 ပြိုင်ပွဲ အုပ်စုအဆုံးအဖြတ်ပွဲစဉ်အဖြစ် ကမ္ဘောဒီးယားအသင်းနှင့် ယှဉ်ပြိုင်ရန် လေ့ကျင့်ပြင်ဆင်မှုများ ပြုလုပ်လျက်ရှိကြောင်း သိရသည်။

မြန်မာအသင်းသည် အဖွင့်ပွဲစဉ်တွင် တီမောလက်စ်တေနိုင်ငံအသင်းကို ၂ ဂိုး-ဂိုးမရှိဖြင့် အနိုင်ရရှိထားပြီး ဝင်းနိုင်ထွန်းက ပွဲချိန် ၁၉ မိနစ်နှင့် အသင်းခေါင်းဆောင် သန်းပိုင်က ပွဲချိန် ၇၅ မိနစ်တွင် ဂိုးများ သွင်းယူပေးခဲ့သည်။

ထို့ကြောင့် မြန်မာအသင်းသည် အုပ်စုတွင်း ၃ မှတ် ရရှိထားပြီး ကမ္ဘောဒီးယားအသင်းနှင့် ပွဲစဉ်သည် အုပ်စုအဆင့် အဆုံးအဖြတ်ပွဲစဉ် ဖြစ်လာမည်ဖြစ်သည်။

မြန်မာနှင့် ကမ္ဘောဒီးယားအသင်းတို့၏ ပွဲစဉ်ကို စက်တင်ဘာ ၂၇ ရက် မြန်မာစံတော်ချိန် ညနေ ၄ နာရီ ၃၀ မိနစ်တွင် ဟောင်ကောင်၌ ယှဉ်ပြိုင်ကစားမည်ဖြစ်သည်။