ဆဲလ်တစ်အား ရှုံးနိမ့်ပြီးနောက် အဝတ်အစားပင် မလဲနိုင်ဘဲ လုံခြုံရေးအပြည့်ဖြင့် အေဒင်ဘတ်သို့ ပြန်ထွက်ခွာခဲ့ရတဲ့ ဟတ်စ်အသင်း
====================

ဟတ်စ်ဟာ ဆဲလ်တစ်အား ရှုံးနိမ့်တဲ့ ရာသီသိမ်းပွဲအပြီးတွင် ပရိသတ်များ ကွင်းအတွင်း ဆင်းလာမှုနှင့်အတူ ဝတ်စုံပြည့်ဖြင့် ရဲတပ်ဖွဲ့ လုံခြုံရေး အပြည့်အဝ ယူကာ Parkhead မှ ချက်ချင်း ထွက်ခွာခဲ့ရပါတယ်။
ဆဲလ်တစ်ဟာ ရာသီသိမ်းပွဲတွင် ဟတ်စ်ကို ၃-၁ ဖြင့် အနိုင်ယူပြီး နောက်ထပ် စကော့တလန်ပရီးမီးယားလိဂ်ဖလားအား ဆွတ်ခူးနိုင်ခဲ့ပါတယ်။
ပွဲပြီးခါနီး ၉၇ မိနစ်တွင် ဆဲလ်တစ်တို့ တတိယဂိုး ရရှိသွားချိန်မှာတော့ ရာပေါင်းများစွာသော ဆဲလ်တစ်ပရိသတ်များဟာ ပွဲသိမ်းခရာမမှုတ်မီမှာပင် ကွင်းအတွင်း ဆင်းလာကာ ပွဲပြီးဆုံးသွားခဲ့ပါတယ်။
ယင်းရှုပ်ထွေးတဲ့ အခြေအနေအတွင်းတွင် ဟတ်စ်ကစားသမားအချို့တို့ဟာ ဆဲလ်တစ်ပရိသတ်များရဲ့ တိုက်ခိုက်မှုနှင့်လည်း ကြုံခဲ့ရပါတယ်။
ယင်းနောက်တော့ ဟတ်စ်ကစားသမားများဟာ အခြေအနေ ပိုမို ရှုပ်ထွေးလာနိုင်တဲ့ အခြေအနေကြောင့် အဝတ်အစားပင် မလဲလှယ်နိုင်ဘဲ ဘောလုံးဝတ်စုံအပြည့်ဖြင့် ရဲတပ်ဖွဲ့ လုံခြုံရေး ရယူကာ ဂလက်စကိုမှ ထွက်ခွာခဲ့ရပါတယ်။
တဖက်တွင် ဟတ်စ်ပရိသတ်များဟာ ဆဲလ်တစ်ကို ရှုံးနိမ့်ခဲ့ပေမဲ့ အိမ်ပြန်လာခဲ့တဲ့ ကစားသမားများအား ဂုဏ်ပြုကြိုဆိုမှု ပြုလုပ်ခဲ့ကြတာလည်း တွေ့ရပါတယ်။

အာဆင်နယ်ကဲ့သို့ အဖြစ်အပျက်မျိုး ကြုံရပေမဲ့ ဂိုးပေးခဲ့ရကာ ဘွန်ဒက်စ်လီဂါမှ တန်းဆင်းသွားခဲ့ရတဲ့ စိန့်ပေါ်လီ
======================

ဝက်စ်ဟမ်းရဲ့ အာဆင်နယ်နှင့်ပွဲစဉ်မှ ဂိုးအား ခွင့်မပြုခဲ့မှုက ပရီးမီးယားလိဂ်ရဲ့ တန်းဆင်းဇုန်တိုက်ပွဲကိုသာမက ချန်ပီယံဆုအတွက် တိုက်ပွဲကိုပါ အကျိုးသက်ရောက်ခဲ့ပါတယ်။
တဖက်မှာ ဘွန်ဒက်စ်လီဂါမှာလည်း ယင်းသို့ အဖြစ်အပျက်မျိုး ကြုံလာရပါတယ်။ ဒါပေမဲ့ ဘွန်ဒက်စ်လီဂါမှ အဖြစ်အပျက်ကြောင့် အသင်းတစ်သင်းကတော့ တန်းဆင်းသွားခဲ့ရပါတယ်။
ဘွန်ဒက်စ်လီဂါရာသီသိမ်းပွဲတွင် အသင်း ၃ သင်းက တန်းမဆင်းရရေး တိုက်ပွဲဝင်ခဲ့ကြပါတယ်။
ယင်းမှ ၂ သင်းဖြစ်တဲ့ စိန့်ပေါ်လီနှင့် ဝုဖ်ဘတ်တို့ ရင်ဆိုင်ကစားခဲ့ကြပါတယ်။
မိနစ် ၆၀ ကျော်အထိ ၁ ဂိုးစီသရေကျနေခဲ့ပါတယ်။ ယင်းရလဒ်ကြောင့် စိန့်ပေါ်လီက တန်းဆင်းဇုန်မှ ရုန်းထွက်ကာ ဝုဖ်ဘတ်က တန်းမဆင်းရရေး ပလေးအော့ဖ်ကစားရမဲ့နေရာသို့ ရောက်သွားခဲ့ပါတယ်။
ဒါပေမဲ့ ၆၃ မိနစ်မှာ ဝုဖ်ဘတ်တို့ ထောင့်ကန်ဘော ရရှိလာချိန်မှာတော့ ကလပ်များရဲ့ ကံကြမ္မာအပြောင်းအလဲ ဖြစ်လာပါတယ်။
ဝုဖ်ဘတ်က ထောင့်ကန်ဘော ကန်တင်လိုက်ချိန်မှာ ခံစစ်သမားနဲ့ တိုက်စစ်သမားများအကြား လုံးထွေးနေခဲ့ကြပြီး စိန့်ပေါ်လီဂိုးသမားနီကိုလာဗာဆယ်ကလည်း ဘောလုံးကို ပုတ်ထုတ်နိုင်ရေး လူအုပ်ကြားမှ ကြိုးပမ်းခဲ့ပါတယ်။
ဒါပေမဲ့ အသက် ၃၀ နှစ်ရှိ ဂိုးသမားဟာ ဝုဖ်ဘတ်ကစားသမားများကြောင့် ကောင်းမွန်စွာ ပုတ်ထုတ်နိုင်ခဲ့ခြင်း မရှိဘဲ မတော်တဆ ကိုယ့်ဂိုးကိုယ်သွင်းမိသလို ဖြစ်သွားခဲ့ပါတယ်။
သူဟာ ဒိုင်လူကြီးကို ပြစ်ဒဏ်ကျူးလွန်ခံရကြောင်း စောဒကတက်ခဲ့ပါတယ်။ ယင်းနောက်မှာတော့ VAR စစ်ဆေးမှု ဖြစ်လာပါတယ်။
ယင်းဂိုးကို ကွင်းလယ်ဒိုင်လူကြီးက ဂိုးပေးထားတာပါ။ VAR က ယင်းအဖြစ်အပျက်အား ကွင်းဘေးရှိ မော်နီတာတွင် ပြန်စစ်ရန် အကြံပေးခဲ့ပါတယ်။ ဒိုင်လူကြီးဟာ ပြန်လည် စစ်ဆေးပြီးချိန်မှာတော့ နဂိုဆုံးဖြတ်ချက်အတိုင်း ဂိုးပေးခဲ့ပါတယ်။
အနှေးပြကွက်အရ ဝုဖ်ဘတ်နောက်ခံလူဂျန်နူရယ်ဘီလိုခီယန်ဟာ ဂိုးသမားက လက်သီးဖြင့် ထိုးပြီ ပုတ်ထုတ်ရန် ကြိုးပမ်းစဉ် လက်ဖြင့် တားဆီးခဲ့တာ တွေ့ရပါတယ်။
ဝုဖ်ဘတ်ဟာ ၇၉ မိနစ်မှာ ပီခီနိုဗစ်ရဲ့ ဂိုးဖြင့် တတိယဂိုး ထပ်မံ ရရှိခဲ့ပြီး ၃-၁ ဖြင့် အနိုင်ရရှိခဲ့ပါတယ်။
ဒီပွဲရလဒ်ကြောင့် စိန့်ပေါ်လီက ဘွန်ဒက်စ်လီဂါမှ တန်းဆင်းခဲ့ရပြီး ဝုဖ်ဘတ်ကတော့ တန်းမဆင်းရရေး ပလေးအော့ဖ်ထပ်မံ ကစားလာရတော့မှာ ဖြစ်ပါတယ်။

ဟတ်စ်ကို အနိုင်ယူပြီး စကော့တလန်ပရီးမီးယားလိဂ်ဘွဲ့အား ကာကွယ်နိုင်တဲ့ပွဲတွင် ပွဲသိမ်းခရာမမှုတ်မီ ကွင်းအတွင်း ဆင်းလာကာ အောင်ပွဲခံခဲ့တဲ့ ဆဲလ်တစ်ပရိသတ်များ
=====================

ရာပေါင်းများစွာသော ဆဲလ်တစ်ပရိသတ်များဟာ ရာသီသိမ်းပွဲတွင် ဟတ်စ်အား အနိုင်ယူကာ ချန်ပီယံဘွဲ့အား ကာကွယ်နိုင်ခဲ့တဲ့ပွဲတွင် ပွဲသိမ်းခရာမမှုတ်မီမှာပင် ကွင်းအတွင်း ဆင်းလာကာ အကြီးအကျယ် အောင်ပွဲခံခဲ့ပါတယ်။
ဆဲလ်တစ်ဟာ ဟတ်စ်နှင့်ပွဲတွင် အနိုင်ရရှိမှသာလျှင် ချန်ပီယံဖြစ်လာမှာ ဖြစ်ပါတယ်။ တဖက်တွင် ဟတ်စ်ကမူ ဆဲလ်တစ်အား သရေကျရုံဖြင့် ချန်ပီယံဖြစ်လာပါမယ်။
ဟတ်စ်ဟာ ရှန့်လန်းရဲ့ ဂိုးဖြင့် ဦးဆောင်နိုင်ခဲ့ပေမဲ့လည်း ဆဲလ်တစ်ဟာ ပထမပိုင်းမပြီးခင် အချိန်ပိုမှာပင် အန်းအန်ဂျယ်ရဲ့ ပင်နယ်တီဂိုးဖြင့် ပြန်လည်ချေပနိုင်ခဲ့ပါတယ်။
ယင်းနောက် ဆဲလ်တစ်ဟာ ၈၆ မိနစ်နှင့် အချိန်ပို ၉၇ မိနစ်တို့တွင် မီဒါနှင့် အော့စ်မန်တို့ရဲ့ ဂိုးဖြင့် အနိုင်ဂိုးတွေ ရရှိခဲ့ပါတယ်။
ဟတ်စ်ဟာ အချိန်ပို ၈ မိနစ်မှာတော့ ဂိုးသမားအပါအဝင် တစ်သင်းလုံး တိုက်စစ်ဖွင့်ပြီး ချေပဂိုး ရရှိရေး ကြိုးပမ်းလာကြပါတယ်။ ဟတ်စ်ရဲ့ တိုက်စစ်ကို ဆဲလ်တစ်က တားဆီးလိုက်ပြီးနောက် အော့စ်မန်က ဆဲလ်တစ်အတွက် အနိုင်သေချာစေမဲ့ တတိယဂိုးအား သွင်းယူခဲ့ပါတယ်။
အော့စ်မန်က တတိယဂိုးသွင်းယူလိုက်ချိန်မှာတော့ ဆဲလ်တစ်ပရိသတ်များဟာ ကွင်းအတွင်း ဆင်းလာပြီး အကြီးအကျယ်အောင်ပွဲခံခဲ့ကြတာပါ။
ယင်းအချိန်မှာ ဒိုင်လူကြီးက ပွဲသိမ်းခရာမှုတ်လိုက်သလားဆိုတာ မသေချာပါဘူး။
ကွင်းလုံခြုံရေးများနှင့် ရဲတပ်ဖွဲ့ဝင်များဟာ ကစားသမားများနှင့် နည်းပြအဖွဲ့ဝင်များအား အကာအကွယ် ချက်ချင်းပေးခဲ့ရပါတယ်။
ယင်းနောက်မှာတော့ ဆဲလ်တစ်ကစားသမားများလည်း အကြီးအကျယ်အောင်ပွဲခံခဲ့ကြပါတယ်။
ဆဲလ်တစ်ဟာ ယခုရာသီတွင် ၈ လတိုင်တိုင် ဆိုးဆိုးရွားရွား ကြုံခဲ့ရပေမဲ့ နည်းပြဟောင်းမာတင်အိုနေးလ် လက်အောက်တွင် ပြန်လည်ရုန်းထလာပြီးနောက် အံ့ဩသင့်ဖွယ် ချန်ပီယံဖြစ်လာခဲ့တာလည်း ဖြစ်ပါတယ်။

ဘင်ဖီကာနှင့်အတူ တစ်ရာသီလုံး ရှုံးပွဲမရှိမှတ်တမ်းဖြင့် ရာသီသိမ်းလာနိုင်ခဲ့တဲ့ မော်ရင်ဟို
=====================

ဟိုဆေးမော်ရင်ဟိုဟာ ဘင်ဖီကာနှင့်အတူ ပေါ်တူဂီအဆင့်မြင့်တန်းလိဂ်အား ရှုံးပွဲမရှိမှတ်တမ်းဖြင့် ရာသီသိမ်းလာနိုင်ခဲ့ပါတယ်။ မော်ရင်ဟိုရဲ့ ဘင်ဖီကာဟာ တစ်ရာသီလုံး ရှုံးပွဲမရှိမှတ်တမ်းပိုင်ဆိုင်ခဲ့ပေမဲ့လည်း အဆင့် ၃ နေရာဖြင့်သာ ရပ်တည်နိုင်ခဲ့ပါတယ်။
ဘင်ဖီကာဟာ ရာသီသိမ်းပွဲတွင် အက်စ်တိုရဲလ်အား ၃-၁ ဖြင့် အနိုင်ယူကာ ရာသီသိမ်းခဲ့တာ ဖြစ်ပြီး တစ်ရာသီလုံးတွင် ၂၃ ပွဲနိုင်၊ ၁၁ ပွဲသရေကျကာ ရှုံးပွဲမရှိခဲ့ပါဘူး။
ဒါပေမဲ့ ဘင်ဖီကာဟာ ချန်ပီယံ ပေါ်တိုနှင့် ၈ မှတ်အကွာ၊ ဒုတိယနေရာမှ စပို့တင်းလစ္စဘွန်းနှင့် ၂ မှတ်အကွာတွင် ရပ်တည်နိုင်ခဲ့ပါတယ်။
အက်စ်တိုရဲလ်နှင့်ပွဲစဉ်မှာ မော်ရင်ဟိုရဲ့ ဘင်ဖီကာအား ကိုင်တွယ်တဲ့ နောက်ဆုံးပွဲလည်း ဖြစ်လာနိုင်ပါတယ်။
မော်ရင်ဟိုဟာ လွန်ခဲ့တဲ့ ၁၃ နှစ်တုန်းက ကိုင်တွယ်ခဲ့တဲ့ အသင်းဟောင်း ရီးရဲလ်မက်ုရစ်အား ကိုင်တွယ်ရေး နောက်ဆုံးအဆင့် ဆွေးနွေးမှုသို့ ရောက်နေသူလည်း ဖြစ်ပါတယ်။
အသက် ၆၃ နှစ်ရှိ မော်ရင်ဟိုဟာ စက်တင်ဘာလတုန်းက ဘင်ဖီကာသို့ ၂ နှစ်စာချုပ်ဖြင့် ရောက်လာခဲ့ပေမဲ့ ရီးရဲလ်မက်ဒရစ်ဥက္ကဌဖလော်ရင်တီနိုပီရက်ဇ်ရဲ့အလိုရှိခြင်း ခံနေရပါတယ်။
ဘင်ဖီကာဟာ တစ်ရာသီလုံး ရှုံးပွဲမရှိမှတ်တမ်း ပိုင်ဆိုင်ပေမဲ့ ဆုဖလားလက်မဲ့ ဖြစ်ခဲ့တဲ့ ပထမဆုံးအကြိမ် မဟုတ်ပါဘူး။
၁၉၇၇-၇၈ ရာသီတုန်းကလည်း ပေါ်တိုဟာ ၂ ပွဲသရေလျှော့နည်းကာ ဂိုးကွာခြားချက်ဖြင့် ရှုံးပွဲမရှိတဲ့ ဘင်ဖီကာအား ကျော်ဖြတ်ကာ ချန်ပီယံဖြစ်ခဲ့ဖူးပါတယ်။
ဒါ့အပြင် အက်ဖ်စီရှရစ်ဖ်(မော်ဒိုဗာ/၂၀၂၄-၂၅)နှင့် ရက်စတားဘဲလ်ဂရိတ် (ဆားဘီးယား/၂၀၀၇-၀၈)တို့ဟာလည်း တစ်ရာသီလုံး ရှုံးပွဲမရှိမှတ်တမ်းရရှိခဲ့ပေမဲ့ ချန်ပီယံဖြစ်ခဲ့ဖူးပါတယ်။

အလွန်ဆိုအား နည်းပြသစ်အဖြစ် ခန့်အပ်ရန် သဘောတူညီမှု ရရှိလာတဲ့ ချဲလ်ဆီး
======================

စပိန်လူမျိုးနည်းပြဇာဘီးအလွန်ဆိုဟာ ချဲလ်ဆီးအား ၄ နှစ်စာချုပ်ဖြင့် ကိုင်တွယ်ရန် သဘောတူညီမှု ရရှိလာပါတယ်။
အသက် ၄၄ နှစ်ရှိ လေဗာကူဆင်နှင့် ရီးရဲလ်မက်ဒရစ်နည်းပြဟောင်းနှင့် ချဲလ်ဆီးတို့အကြားမှာ အကြမ်းဖျင်း သဘောတူညီမှု ရရှိလာတာ ဖြစ်ပြီး လာမဲ့ ရက်များအတွင်းတွင် အပြီးသတ် စာချုပ်ချုပ်ဆိုရေး ဆက်လက် ဆွေးနွေးလာပါမယ်။
ချဲလ်ဆီးဟာ ပြီးခဲ့တဲ့လတုန်းက ထုတ်ပယ်ခဲ့တဲ့ လီယမ်ရိုဆင်နီယာနေရာမှာ နည်းပြသစ် ခန့်အပ်ရေး ရှာဖွေလာခဲ့တာလည်း ဖြစ်ပါတယ်။
ချဲလ်ဆီးဟာ ယခုအပတ်အစောပိုင်းမှ စတင်ကာ နည်းပြရာထူးအတွက် လျာထားတဲ့ အလွန်ဆို၊ ဘုန်းမောက်နည်းပြအိုင်ရာအိုလာ၊ ဖူလ်ဟမ်နည်းပြမာကိုဆေးလ်ဗား၊ ပဲလေ့စ်နည်းပြအိုလီဗာဂလပ်စ်နာတို့ရဲ့ အေးဂျင့်များနှင့် ဆက်သွယ် ဆွေးနွေးမှုများ ပြုလုပ်လာခဲ့ပါတယ်။
ယခုအခါမှာတော့ ချဲလ်ဆီးဟာ ဆွေးနွေးမှုများ ပြုလုပ်ပြီးနောက် အလွန်ဆိုအား ခန့်အပ်ရေး ဆုံးဖြတ်လာခဲ့ပါတယ်။
အက်ဖ်အေဖလားဗိုလ်လုပွဲတွင် မန်စီးတီးကို ရှုံးနိမ့်ကာ ဒုတိယဖြင့်သာ ကျေနပ်ခဲ့ရတဲ့ ချဲလ်ဆီးဟာ ရာသီသိမ်းချိန်တွင်မှ အလွန်ဆိုကို နည်းပြသစ်အဖြစ် ခန့်အပ်ကြောင်း ကြေညာလာဖို့ ရှိပါတယ်။
အလွန်ဆိုဟာ ကစားသမားဘဝတုန်းက ၅ ရာသီတိုင်တိုင် ကစားခဲ့တဲ့ အသင်းဟောင်းလီဗာပူးရဲ့ ပစ်မှတ်ထားခြင်းလည်း ခံခဲ့ရသူပါ။
ဒါပေမဲ့ လီဗာပူးဟာ စိတ်ပျက်စရာ ရာသီတစ်ခု ကြုံခဲ့ပေမဲ့လည်း အန်းဆလော့နှင့် ဆက်လက် လက်တွဲရန် ဆုံးဖြတ်လာမှုနှင့်အတူ အလွန်ဆိုအား ဆက်သွယ်မှု ပြုလုပ်လာခြင်း မရှိခဲ့ပါဘူး။
ဒါကြောင့်လည်း အလွန်ဆိုဟာ ချဲလ်ဆီးအသင်းဘက်က ကမ်းလှမ်းလာချိန်မှာ လက်ခံခဲ့တာလည်း ဖြစ်ပါတယ်။
အလွန်ဆိုဟာ ရီးရဲလ်မက်ဒရစ်ကို ကိုင်တွယ်တဲ့ ၈ လအတွင်း အောင်မြင်မှု မရခဲ့ပေမဲ့လည်း လေဗာကူဆင်အား ရာသီပြည့်ကိုင်တွယ်စဉ်တုန်းက ပြည်တွင်းဖလား ၂ လုံးအား ရှုံးပွဲမရှိဘဲ ရယူပေးနိုင်ခဲ့ဖူးပါတယ်

မော်ရင်ဟိုသာ ရီးရဲလ်မက်ဒရစ်သို့ ရောက်လာပါက အာဘီလိုအာ ဝမ်းသာကျေနပ်လာမည်
======================

ရီးရဲလ်မက်ဒရစ်နည်းပြအယ်ဗာရိုအာဘီလိုအာက လာမဲ့ရာသီတွင် သူ့နေရာတွင် ဆရာဟောင်းဟိုဆေးမော်ရင်ဟိုကိုသာ အစားထိုးခန့်အပ်လာမည်ဆိုပါက ဝမ်းသာကျေနပ်ရလိမ့်မည်ဖြစ်ကြောင်း ပြောကြားလာပါတယ်။
မော်ရင်ဟိုဟာ လွန်ခဲ့တဲ့ ၁၃ နှစ်တုန်းက ရီးရဲလ်မက်ဒရစ်ကို ပထမအကြိမ် ကိုင်တွယ်ပြီးနောက် ဒုတိယအကြိမ် ကိုင်တွယ်ရေး ဆွေးနွေးမှုများ ပြုလုပ်နေပြီး ဆွေးနွေးမှု နောက်ဆုံးအဆင့်သို့ ရောက်နေပြီ ဖြစ်ပါတယ်။
အသက် ၆၂ နှစ်ရှိ ပေါ်တူဂီလူမျိုးနည်းပြဟာ ပြီးခဲ့တဲ့ စက်တင်ဘာလတုန်းက ဘင်ဖီကာသို့ ၂ နှစ်စာချုပ်ဖြင့် ရောက်လာခဲ့ပေမဲ့ ရီးရဲလ်မက်ဒရစ်ဥက္ကဌပီရက်ဇ်ရဲ့ အလိုရှိခြင်းခံနေရပါတယ်။
အာဘီလိုအာက "ကျွန်တော့်အတွက်တော့ ကစားသမားဟောင်းတစ်ယောက်အနေနဲ့ ရော မက်ဒရစ်ပရိသတ်တစ်ယောက်အနေနဲ့ရော မော်ရင်ဟိုက နံပါတ်တစ်ပါ။ သူက ကျွန်တော်တို့ထဲက တစ်ယောက်ပါ။ လာမဲ့နှစ်မှာ သူပြန်လာရင် သူ အိမ်ပြန်လာလို့ ကျွန်တော် ပျော်ရပါလိမ့်မယ်"လို့ ပြောကြားသွားပါတယ်။
အာဘီလိုအာဟာ ဇန်နဝါရီလတုန်းက အလွန်ဆို ထွက်ခွာသွားပြီးနောက် ရီးရဲလ်မက်ဒရစ်အား ကိုင်တွယ်လာပေမဲ့ ဆုဖလားဆွတ်ခူးနိုင်အောင် ဦးဆောင်ထားနိုင်ခြင်း မရှိပါဘူး။

ရာသီအကုန်တွင် ဘာစီလိုနာမှ ထွက်ခွာမည်ဟု လီဝန်ဒေါ့စကီး ကြေညာလာ
====================

ရောဘတ်လီဝန်ဒေါ့စကီးက စာချုပ်သက်တမ်းကုန်ဆုံးလာမဲ့ နွေရာသီတွင် ဘာစီလိုနာမှ ထွက်ခွာလာတော့မှာ ဖြစ်ကြောင်း အတည်ပြု ပြောကြားလာပါတယ်။
အသက် ၃၇ နှစ်ရှိ ပိုလန်အသင်းခေါင်းဆောင်ဟာ ၂၀၂၂ ခုနှစ်တွင် ဘိုင်ယန်မြူးနစ်မှ ပြောင်းလာပြီးနောက် ဘာစီလိုနာအတွက် ၁၉၁ ပွဲကစားကာ ၁၁၉ ဂိုးသွင်းယူပေးခဲ့သူ ဖြစ်ပြီး လာလီဂါဖလား ၃ လုံးနှင့် ကိုပါဒယ်ရေးတို့ ရရှိအောင် ကူညီပေးခဲ့ပါတယ်။
လီဝန်ဒေါ့စကီးက "စိန်ခေါ်မှုတွေ အလုပ်ကြိုးစားမှုတွေ ပြည့်နှက်နေတဲ့ လေးနှစ်ကုန်ဆုံးပြီးတဲ့နာက် နောက်ထပ် ပြောင်းရမဲ့ ကာလသို့ ရောက်လာခဲ့ပါပြီ။ စစ်ဆေးရေးပြီးဆုံးသွားပြီဆိုတဲ့ ခံစားချက်နဲ့ ထွက်ခွာလာပါမယ်။ လေးရာသီ သုံးကြိမ် ချန်ပီယံရှစ်ရခဲ့တယ်"လို့ အင်စတာဂရမ်မှ ရေးသားသွားပါတယ်။
လီဝန်ဒေါ့စကီးဟာ နောက်ပိုင်းနှစ်များတွင် ဒဏ်ရာပြဿနာများနှင့် ရုန်းကန်လာရသူ ဖြစ်ပြီး ယခုရာသီတွင် လာလီဂါပွဲ ၁၅ ပွဲတည်းသာ ပွဲထွက်ကစားထားနိုင်ပါတယ်။
ပြီးခဲ့တဲ့ဒီဇင်ဘာလတုန်းက ချီကာဂိုဖိုင်းယားက ရောဘတ်လီဝန်ဒေါ့စကီးအား မေဂျာလိဂ်သို့ ခေါ်ဆောင်ရေး ဆွေးနွေးနေကြောင်း ကြေညာသွားခဲ့ဖူးပါတယ်။
သူဟာ နူးကမ့် နောက်ဆုံးပွဲအဖြစ် တနင်္ဂနွေနေ့တွင် ဘက်တစ်နှင့် လာလီဂါပွဲစဉ်အား ကစားလာပါမယ်။
ဘိုင်ယန်မြူးနစ်တွင်လည်း ရောဘတ်လီဝန်ဒေါ့စကီးနှင့် လက်တွဲခဲ့ဖူးတဲ့ ဘာစီလိုနာနည်းပြဟန်ဆီဖလစ်က ဒေါ့မွန်တိုက်စစ်မှူးဟောင်းမှာ ဘက်တစ်နှင့်ပွဲတွင် ပွဲထွက်လာမယ်လို့ အတည်ပြုထားပါတယ်။

ကိုယ်ရေးကိုယ်တာအချက်အလက်များ ပေါက်ကြားလာပြီးနောက် ရဲတပ်ဖွဲ့ဝင်များ အစောင့်အရှောက်ဖြင့် နေထိုင်နေရတဲ့ ဒိုင်လူကြီး
=================

စကော့တလန်ဘောလုံးအဖွဲ့ချုပ်က ဒိုင်လူကြီးဂျွန်ဘီတန်နှင့်မိသားစုဝင်များမှာ ကိုယ်ရေးကိုယ်တာ အချက်အလက်များ အွန်လိုင်းတွင်‌ ပေါက်ကြားလာပြီးနောက် ရဲတပ်ဖွဲ့ဝင်များရဲ့ အစောင့်အရှောက်ဖြင့် နေထိုင်ခဲ့ရကြောင်း အတည်ပြုလာပါတယ်။
တဖက်တွင် ရဲတပ်ဖွဲ့ဟာ ဂျွန်ဘီတန်ရဲ့ အချက်အလက်များ ပေါက်ကြားမှုအတွက် အသက် ၁၉ နှစ်အရွယ်ရှိ လူငယ်တစ်ဦးကို စွဲချက်တင်ထားပြီး မကြာမီ ရုံးတင် စစ်ဆေးမှု ပြုလုပ်လာပါမယ်။
ဂျွန်ဘီတန်ဟာ ဗုဒ္ဓဟူးနေ့တုန်းက ဆဲလ်တစ်တို့ မားသားဝဲလ်အား ၃-၂ ဖြင့် အနိုင်ရတဲ့ပွဲရဲ့ အချိန်ပိုတွင် နောက်ကျ ပင်နယ်တီပေးကြောင့် ဝေဖန်မှုများနှင့် ရင်ဆိုင်လာခဲ့ရသူလည်း ဖြစ်ပါတယ်။
ဆဲလ်တစ်ဟာ ဂျွန်ဘီတန်ရဲ့ အငြင်းပွားဖွယ် ဆုံးဖြတ်ချက်ကြောင့် ပင်နယ်တီ အနိုင်ဂိုး ရရှိကာ စကော့တလန်ပရီးမီးယားလိဂ်ချန်ပီယံဘွဲ့ကာကွယ်ရေး မျှော်လင့်ချက် ရှိလာခဲ့ပါတယ်။
ဆဲလ်တစ်ဟာ ယနေ့ညတွင် အမှတ်ပေးဇယားထိပ်ဆုံးမှ ဟတ်စ်အား အနိုင်ရရှိလာပါက ချန်ပီယံဖြစ်ပါမယ်။ ဟတ်စ်မှာမူ ဆဲလ်တစ်အား အနိမ့်ဆုံးသရေကစားနိုင်ပါက ၆၆ နှစ်အတွင်း ပထမဆုံးအမှတ်ပေးဖလား ဆွတ်ခူးလာပါမယ်။

ရာသီသစ်တွင် အသုံးစရိတ်စည်းမျဉ်းသစ် အသုံပြုလာမဲ့ ချန်ပီယံရှစ်
====================

ချန်ပီယံရှစ်ကလပ်များဟာ လာမယ့်ရာသီတွင် ဘဏ္ဍာရေးစည်းမျဉ်းသစ် Squad Cost Rules (SCR) ကို အသုံးပြုလာပါမယ်။
ချန်ပီယံရှစ်ဟာ ပရီးမီးယားလိဂ်နှင့် မတူညီတဲ့ Squad Cost Rules (SCR) စနစ်ကို အသုံးပြုရေး နိုဝင်ဘာလကတည်းက ခွင့်ပြုချက် ရရှိခဲ့တာ ဖြစ်ပြီး ယခုအခါ ကလပ်များက ယင်းစနစ်ကို အသုံးပြုရေး ထောက်ခံမဲပေးကာ ဆုံးဖြတ်လာကြပါတယ်။
Squad Cost Rules (SCR) မှာ လက်ရှိ အသုံးပြုနေတဲ့ အမြတ်နှင့် ရေရှည်တည်တန့်ရေး စနစ်နေရာတွင် အစားထိုး အသုံးပြုလာပါမယ်။
လက်ရှိအသုံးပြုနေတဲ့ အမြတ်နှင့် ရေရှည်တည်တန့်ရေး စည်းမျဉ်းအရ ကလပ်များဟာ သုံးနှစ်အတွင်း ပေါင် ၃၉ သန်း အရှုံးပေါ်ခွင့် ရှိပါတယ်။
ဒါပေမဲ့ ယခု စနစ်သစ်အရ ကလပ်များဟာ အမြတ်နှင့် အရှုံးပေါ်တွင် မမူတည်တော့ဘဲ ဘောလုံးမှ ရရှိတဲ့ ဝင်ငွေပေါ် မူတည်ပြီး အသုံးပြုလာနိုင်ပါမယ်။
ချန်ပီယံရှစ်ကလပ် ၂၄ ခုတို့မှ ကလပ် ၁၆ ခုတို့က ယခုစနစ်သစ် Squad Cost Rules (SCR) ကို သုံးရန် မဲပေးခဲ့ကြတာပါ။
၂၀၂၄-၂၅ ရာသီအတွင်းတွင် ချန်ပီယံရှစ်ကလပ် ၃ ခုတည်းသာ အမြတ်ထွက်ခဲ့ပါတယ်။ ယင်းမှ စတုတ်စီးတီးမှာ ချေးငွေ ပေါင်သန်း ၉၀ အား ပိုင်ရှင်သစ်ဂျွန်ကို့တ်စ်က ပေးချေလာမှုကြောင့် အမြတ်ထွက်ခဲ့တာပါ။ တကယ်လို့များ ယင်းချေးငွေကိုပါ ထည့်တွက်လာမည်ဆိုပါက စတုတ်စီးတီးမှာ ပေါင် ၂၉ သန်း အရှုံးပေါ်လာပါမယ်။
ကျန် ချန်ပီယံရှစ်ကလပ် ၂၁ ခုတို့ဟာ စုစုပေါင်း ပေါင် ၃၁၇ သန်းအထိ အရှုံးပေါ်ခဲ့ပါတယ်။
ဘဏ္ဍာရေး စနစ်သစ်အရ ပိုင်ရှင်များအနေဖြင့် သုံးနှစ်တာကာလအတွင်းတွင် ကလပ်အား ပေါင် ၃၃ သန်း ထောက်ပံ့လာနိုင်ပြီး တစ်ရာသီလျှင် ပေါင် ၁၅ သန်းထက်ပိုပြီး မထောက်ပံ့နိုင်ပါဘူး။
စည်းမျဉ်းထဲတွင် ပိုင်ရှင်ဆက်စပ်နေတဲ့ စပွန်ဆာစာချုပ်နှင့်ပတ်သက်ပြီးတော့ ထည့်သွင်းထားပါသေးတယ်။
ယခုအသုံးပြုလာမဲ့ စနစ်သစ်ကြောင့် ကွင်းအကြီးကြီး၊ စပွန်ဆာကြေးများများ ရရှိတဲ့ ကလပ်များက ပိုမို အကျိုးရှိလာမှာ ဖြစ်ပြီး ကစားသမားအသုံးစရိတ် ပိုမို သုံးလာနိုင်တော့မှာလည်း ဖြစ်ပါတယ်။
ဒါ့အပြင် လိဂ် ၁ တွင်လည်း Salary Cost Management Protocol (SCMP) စည်းမျဉ်းကို အသုံးပြုလာကာ လုပ်ခအသုံးစရိတ်အား ၆၀ ရာခိုင်နှုန်းမှ ၅၀ ရာခိုင်နှုန်းသို့ လျှော့ချလာပါတယ်။
ချန်ပီယံရှစ်မှ တန်းဆင်းလာတဲ့ လိဂ် ၁ ကလပ်အနေဖြင့် ပထမရာသီတွင် ၆၅ ရာခိုင်နှုန်းအထိ အသုံးပြုခွင့် ရှိပြီး ယခုအသုံးပြုနေတဲ့ ၇၅ ရာခိုင်နှုန်းစနစ်နေရာမှာ အစားထိုးသုံးလာပါမယ်

ရာသီအကုန်တွင် ဘုန်းမောက်မှ ထွက်ခွာလာမဲ့ ဆီနီစီ
==================

အာဂျင်တီးနားနောက်ခံလူမားကို့စ်ဆီနီစီဟာ စာချုပ်သက်တမ်းကုန်ဆုံးလာမဲ့ နွေရာသီတွင် ဘုန်းမောက်မှ ထွက်ခွာလာတော့မှာ ဖြစ်ပါတယ်။
အသက် ၂၉ နှစ်ရှိ ဗဟိုနောက်ခံလူဟာ ပရီးမီးယားလိဂ်အမှတ်ပေးဇယားအဆင့် ၄ နေရာတွင် ရပ်တည်နေတဲ့ ဘုန်းမောက်တွင် ၄ နှစ်ကြာ ကစားပြီးနောက် ထွက်ခွာလာမှာလည်း ဖြစ်ပါတယ်။
ဆီနီစီဟာ ဇန်နဝါရီလကတည်းက အခြားဥရောပလိဂ်ကလပ်များနှင့် လွတ်လပ်စွာ ဆွေးနွေးလာခွင့် ရှိနေခဲ့သူ ဖြစ်ပါတယ်။
သူဟာ ဘုန်းမောက်ရဲ့ စာချုပ်သစ် ကမ်းလှမ်းမှု ရရှိခဲ့ပေမဲ့လည်း ပယ်ချကာ နည်းပြအန်ဒိုနီအိုင်ရာအိုလာနှင့်အတူ ထွက်ခွာလာတော့မှာလည်း ဖြစ်ပါတယ်။
ဘုန်းမောက်ဟာ ပရီးမီးယားလိဂ်အမှတ်ပေးဇယားအဆင့် ၆ နေရာတွင် ရပ်တည်နေပြီး ယူရိုပါလိဂ် (သို့မဟုတ်) ကွန်ဖရင့်လိဂ် ဝင်ခွင့် ရရှိလာဖို့ ရှိနေပါတယ်။ တဖက်တွင် ဘုန်းမောက်ဟာ အက်စတွန်ဗီလာသာ ယူရိုပါလိဂ်ချန်ပီယံဖြစ်လာပါက ချန်ပီယံလိဂ်ဝင်ခွင့်ပါ ရလာနိုင်ပါတယ်။