#မြန်မာ #ပြည်ထောင်စုမြန်မ #တရုတ်နိုင်ငံ
တရုတ်–မြန်မာ စိုက်ပျိုးရေး ပူးပေါင်းဆောင်ရွက်မှု တိုးမြှင့် – ယူနန်နှင့် လန်းမဲ့–မီးချောင်း ရန်ပုံငွေ စီမံကိန်းများ လက်တွေ့အကောင်အထည်ဖော်ဆဲ
၂၀၂၆ ခုနှစ် ဇွန်လအတွင်း တရုတ်နိုင်ငံ ယူနန်ပြည်နယ် စိုက်ပျိုးရေးသိပ္ပံအကယ်ဒမီနှင့် မြန်မာစိုက်ပျိုးရေး သုတေသီများ ပူးပေါင်းကာ ကြံသီးနှံ၊ စပါး၊ ပြောင်း၊ ပဲမျိုးစုံနှင့် အပင်ကာကွယ်ဆေး နည်းပညာများကို လက်တွေ့သုတေသန ဆက်လက်ဆောင်ရွက်နေကြောင်း သတင်းရရှိသည်။
ယူနန်စိုက်ပျိုးရေးသိပ္ပံအကယ်ဒမီ၏ အချက်အလက်အရ ၂၀၀၈ ခုနှစ်မှစ၍ မြန်မာသုတေသီ ၁၄ ဦးကို လက်ခံလေ့ကျင့်ပေးခဲ့ပြီး တရုတ်ကျွမ်းကျင်သူ နီးပါး ၄၀ ဦး မြန်မာနိုင်ငံသို့ စေလွှတ်ခဲ့သည်။ ယူနန်မှ ကြံမျိုးနှင့် စိုက်နည်းများ မြန်မာသို့ရောက်ရှိလာမှုကြောင့် မြန်မာ့ကြံထွက်နှုန်း တစ်မူလျှင် တန် ၃.၈ မှ တန် ၄.၅ သို့ တိုးတက်ခဲ့သည်။ ၂၀၂၅–၂၀၂၆ ကြံညှစ်ရာသီတွင် မြန်မာမှ ကြံတန်ချိန် နှစ်သန်းကျော် ယူနန်သို့ တင်ပို့နိုင်ခဲ့ရာ ဒေသခံတောင်သူများ အလုပ်အကိုင် ရရှိစေသည်။
ထို့ပြင် လန်းမဲ့–မီးချောင်း (Lancang–Mekong) ပူးပေါင်းဆောင်ရွက်မှု အထူးရန်ပုံငွေဖြင့် ၂၀၁၇ ခုနှစ်မှစ၍ မြန်မာနိုင်ငံ၌ စိုက်ပျိုးရေး၊ မွေးမြူရေး၊ ငါးမွေးမြူရေးနှင့် သီးနှံသိုလှောင်ရေး စီမံကိန်း ၄၂ ခု အကောင်အထည်ဖော်ခဲ့ပြီး ၂၀၂၅ ဩဂုတ်တွင် စီမံကိန်းအသစ် ၁၄ ခု ထပ်မံလက်မှတ်ရေးထိုးခဲ့သည်။ ယူနန်နှင့် ကွမ်ရှီ (Guangxi) ပြည်နယ်တို့မှ စပါးမျိုး ၂ မျိုး၊ ပြောင်းမျိုး ၂ မျိုး မြန်မာစိုက်ပျိုးခွင့် ရရှိပြီးဖြစ်ကာ နယ်စပ်ဒေသ ကြံ၊ စပါး၊ ဟင်းသီးဟင်းရွက် စိုက်ခင်းများတွင် တရုတ်စံနှုန်း (GAP) အတိုင်း စမ်းသပ်စိုက်ပျိုးမှုများ တိုးချဲ့နေသည်။
မြန်မာနိုင်ငံ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် တရုတ်ဘက်မှ သုတေသနဌာနများ ပူးပေါင်း၍ ရာသီဥတုဒဏ်ခံ စိုက်ပျိုးရေး (Climate-smart agriculture)၊ သီးနှံအရည်အသွေး စစ်ဆေးရေးနှင့် စိုက်ပျိုးရေးစံနှုန်း ချိတ်ဆက်ရေးကို နောက်ထပ်နှစ်များတွင် ဦးစားပေး ဆောင်ရွက်မည်ဟု သိရသည်။

အဆင်ပြေဘူး။။

နိုင်ငံတော်သမ္မတ ဦးမင်းအောင်လှိုင် တူဗာပြည်နယ်၊ ကီဇီးလ်မြို့ရှိ အမျိုးသားပြတိုက်သို့ သွားရောက်လေ့လာကြည့်ရှု

ရုရှားဖက်ဒရေးရှင်းနိုင်ငံသို့ တရားဝင်ခရီးစဉ် ရောက်ရှိနေသည့် ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတ ဦးမင်းအောင်လှိုင်သည် ယနေ့ ဩဂုတ် ၂၃ ရက်တွင် တူဗာပြည်နယ်၊ ကီဇီးလ်မြို့ရှိ တူဗာပြည်နယ် အမျိုးသားပြတိုက် (National Museum of the Republic of Tuva) သို့ သွားရောက်၍ ပြတိုက်အတွင်း ခင်းကျင်းပြသထားသည့် သမိုင်း၊ ရှေးဟောင်းသုတေသနနှင့် တူဗာလူမျိုးတို့၏ ရိုးရာယဉ်ကျေးမှုဆိုင်ရာ အမွေအနှစ်များကို လေ့လာကြည့်ရှုခဲ့သည်။
တူဗာပြည်နယ် အမျိုးသားပြတိုက်သည် တူဗာဒေသ၏ သမိုင်းကြောင်း၊ ရှေးဟောင်းသုတေသနနှင့် လူမျိုးစုယဉ်ကျေးမှုအမွေအနှစ်များကို စုဆောင်းထိန်းသိမ်း၍ ပြသထားသည့် အဓိကယဉ်ကျေးမှုဆိုင်ရာ အဖွဲ့အစည်းတစ်ခုဖြစ်သည်။ ပြတိုက်တွင် ရှေးခေတ်တူဗာဒေသ၏ လူမှုဘဝ၊ ရိုးရာဓလေ့၊ အနုပညာနှင့် ယဉ်ကျေးမှုဆိုင်ရာ အထောက်အထားများအပြင် ရှေးဟောင်းသုတေသန တူးဖော်တွေ့ရှိချက်များကိုလည်း ခင်းကျင်းပြသထားသည်။
ပြတိုက်၏ အထင်ကရစုဆောင်းမှုများတွင် “တူဗာဘုရင်များချိုင့်ဝှမ်း” (Valley of the Kings of Tuva) ဒေသရှိ Arzhan နှင့် Arzhan-2 ရှေးဟောင်းသင်္ချိုင်းကုန်းများမှ တူးဖော်တွေ့ရှိခဲ့သည့် Scythian ခေတ် ရှေးဟောင်းအမွေအနှစ်များ ပါဝင်သည်။ အထူးသဖြင့် Arzhan-2 တော်ဝင်သင်္ချိုင်းကုန်းမှ တွေ့ရှိခဲ့သည့် ရွှေထည်ပစ္စည်းများနှင့် လက်ဝတ်ရတနာများသည် ရှေးခေတ် Scythian လူမျိုးတို့၏ အနုပညာလက်ရာ၊ လူနေမှုဘဝနှင့် ယဉ်ကျေးမှုအဆင့်အတန်းတို့ကို လေ့လာနိုင်သည့် အရေးပါသော ရှေးဟောင်းအထောက်အထားများဖြစ်သည်။
Arzhan-2 မှ တူးဖော်တွေ့ရှိခဲ့သည့် ရွှေထည်ပစ္စည်းများသည် စုစုပေါင်း အလေးချိန် ကီလိုဂရမ် ၂၀ ကျော်ရှိပြီး အဆိုပါရှေးဟောင်းပစ္စည်းများကို “Treasures of the Valley of the Kings – Royal Kurgan Arzhan-2” ပြခန်းတွင် အဓိကထား ခင်းကျင်းပြသထားသည်။ ယင်းစုဆောင်းမှုသည် တူဗာပြည်နယ်၏ အရေးပါဆုံး ရှေးဟောင်းယဉ်ကျေးမှုအမွေအနှစ်များအနက် တစ်ခုအဖြစ် ထင်ရှားသည်။
နိုင်ငံတော်သမ္မတသည် ပြတိုက်အတွင်းရှိ ရှေးဟောင်းသုတေသနဆိုင်ရာ အထောက်အထားများ၊ Scythian ခေတ် ရွှေထည်လက်ရာများ၊ တူဗာလူမျိုးတို့၏ ရိုးရာအသုံးအဆောင်များ၊ ယဉ်ကျေးမှုနှင့် သမိုင်းကြောင်းဆိုင်ရာ ခင်းကျင်းပြသထားမှုများကို လှည့်လည်ကြည့်ရှုလေ့လာခဲ့သည်။
ယခုကဲ့သို့ တူဗာပြည်နယ်၏ သမိုင်းနှင့် ယဉ်ကျေးမှုအမွေအနှစ်များကို လေ့လာကြည့်ရှုခြင်းသည် နိုင်ငံတော်သမ္မတ၏ ရုရှားဖက်ဒရေးရှင်းနိုင်ငံ တရားဝင်ခရီးစဉ်အတွင်း ဒေသအလိုက် သမိုင်း၊ ယဉ်ကျေးမှုနှင့် လူမှုဘဝများကို ပိုမိုနားလည်သိရှိစေသည့်အပြင် မြန်မာ-ရုရှား နှစ်နိုင်ငံအကြား ယဉ်ကျေးမှုဆိုင်ရာ ချစ်ကြည်ရင်းနှီးမှုနှင့် ပြည်သူအချင်းချင်း နားလည်မှုတို့ ပိုမိုတိုးမြှင့်နိုင်ရေးအတွက်လည်း အထောက်အကူပြုမည့် ခရီးစဉ်အစီအစဉ်တစ်ရပ်ဖြစ်သည်။

မဂ္ဂနီကျူ့(၄ ဒသမ ၇)အဆင့်ရှိငလျင်တစ်ခု ဒိုက်ဦးမြို့ကိုဗဟိုပြုလှုပ်ခတ်

ပဲခူးတိုင်း၊ ဒိုက်ဦးမြို့ကိုဗဟိုပြု၍ အင်အားအနည်းငယ်ရှိသော ငလျင်တစ်ခု ယနေ့ သြဂုတ် ၂၆ ရက်နံနက်ပိုင်းကလှုပ်ခတ်ခဲ့ကြောင်း မိုးဇလထံမှ သိရသည်။
ဒိုက်ဦးမြို့၏ အနောက်ဘက်(၃၂)မိုင်ခန့်အကွာ၊ အနက် (၁၀)ကီလိုမီတာကိုဗဟိုပြု၍ မဂ္ဂနီကျူ့(၄ ဒသမ ၇)အ ဆင့်ရှိ အင်အားအနည်းငယ်ရှိသောငလျင်တစ်ခုသည် နံနက် ၁၀ နာရီ ၁၄ မိနစ် ၅၇ စက္ကန့်ကလှုပ်ခတ်ခဲ့ခြင်းဖြစ်ကြောင်း သိရသည်။
အဆိုပါ အင်အားအနည်းငယ်ရှိသောငလျင်လှုပ်ခတ်မှုကို ပဲခူးမြေငလျင်စခန်းမှတိုင်းထွာရရှိခဲ့ခြင်းဖြစ်ကြောင်း သိရသည်။

သိမ်ဇရပ်မြို့ မြသိန်းတန်စေတီတော်မြတ်ကြီးရှိ အုတ်နံရံပြိုကျ

မွန်ပြည်နယ်၊ သိမ်ဇရပ်မြို့၊ မြသိန်းတန်စေတီတော်မြတ်ကြီးရှိ အုတ်နံရံပြိုကျခဲ့မှု ယနေ့ သြဂုတ် ၂၃ ရက်နံနက် ၇ နာရီခွဲခန့်ကဖြစ်ပွားခဲ့ကြောင်း သိရသည်။
သိမ်ဇရပ်မြို့၊ အမှတ်(၄)ရပ်ကွက်၊ မြသိန်းတန်စေတီတော်မြတ်ကြီး ပရဝုဏ်အနောက်ဘက်ရှိ အုတ်နံရံမှာ (၁၀၀x၁၅)ပေခန့်ပြိုကျခဲ့သဖြင့် ထပ်မံပြိုကျမှုမဖြစ်စေရန် သိမ်ဇရပ်နယ်မြေမီးသတ်စခန်းမှတပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ သက်ဆိုင်ရာအဖွဲ့အစည်းများကဆောင်ရွက်ခဲ့ကြကြောင်း သိရသည်။

မနက်ဖြန် တာမွေအပါအဝင် ရန်ကုန်မြို့နယ် ၁၆ ခု၌ လေးနာရီခန့် ရေယာယီပြတ်တောက်နိုင်

တာမွေအပါအဝင် ရန်ကုန်မြို့နယ် ၁၆ ခုတွင် မနက်ဖြန် (ဩဂုတ် ၂၄ ရက်) နံနက် ၉ နာရီမှ နေ့လယ် ၁ နာရီအထိ လေးနာရီခန့် ရေယာယီပြတ်တောက်ခြင်းနှင့် ရေအားနည်းခြင်းများ ဖြစ်ပေါ်နိုင်ကြောင်း ရန်ကုန်မြို့တော်စည်ပင်သာယာရေးကော်မတီ (YCDC) က အသိပေးထားသည်။
လှော်ကားရေလှောင်ကန်ဝင်းအတွင်းရှိ ၃၃ ကေဗွီ လှော်ကား–ရွာမ BA-BB ဓာတ်အားလိုင်း တာဝါတိုင်များပေါ်တွင် တွယ်ကပ်ပေါက်ရောက်နေသည့် နွယ်ပင်များကို ခုတ်ထွင်ရှင်းလင်းရန် လျှပ်စစ်ဓာတ်အား ခေတ္တဖြတ်တောက်၍ လုပ်ငန်းဆောင်ရွက်မည်ဖြစ်ပြီး ယင်းကာလအတွင်း လှော်ကားရေတွန်းစက်ကြီးများကို ယာယီရပ်နားထားမည်ဖြစ်သည်။
ယင်းကြောင့် မင်္ဂလာဒုံ၊ ရွှေပြည်သာ၊ မရမ်းကုန်း၊ လှိုင်၊ လှိုင်သာယာ (စက်မှုဇုန်)၊ အင်းစိန်၊ ကမာရွတ်၊ ဗဟန်း၊ ပန်းဘဲတန်း၊ ကျောက်တံတား၊ လမ်းမတော်၊ လသာ၊ တာမွေ၊ မင်္ဂလာတောင်ညွန့်၊ ပုဇွန်တောင်နှင့် ဗိုလ်တထောင် မြို့နယ်တို့တွင် ရေပေးဝေမှု ယာယီပြတ်တောက်ခြင်း သို့မဟုတ် ရေအားကျဆင်းခြင်းများ ဖြစ်ပေါ်နိုင်ကြောင်း သိရသည်။
ထို့ကြောင့် အဆိုပါမြို့နယ်များရှိ ပြည်သူများအနေဖြင့် လိုအပ်သည့်ရေကို ကြိုတင်စုဆောင်းထားကြရန် YCDC က အသိပေးနှိုးဆော်ထားသည်။

ဧရာဝတီတိုင်း၊ ကျောင်းကုန်းမြို့နှင့် ကျုံပျော်မြို့တို့တွင် ရေကြီးရေလျှံမှုများဖြစ်ပေါ် ရေဘေးသင့်သူများကိုရွှေ့ပြောင်းပေး

ဧရာဝတီတိုင်း၊ ကျောင်းကုန်းမြို့နှင့် ကျုံပျော်မြို့တို့တွင် ယနေ့ သြဂုတ် ၂၃ ရက်က ရေကြီးရေလျှံမှုများဖြစ်ပေါ်နေ၍ ရေဘေးသင့်သူများကိုရွှေ့ပြောင်းပေးလျက်ရှိကြောင်း သိရသည်။
ကျောင်းကုန်းမြို့၌ မိုးသည်းထန်စွာရွာသွန်းပြီး ဒါးကမြစ်ရေမြင့်တက်မှုကြောင့် နံနက်ပိုင်းမှစတင်ကာ အနိမ့်ပိုင်းရပ်ကွက်များဖြစ်သော အမှတ်(၁)ရပ်ကွက်နှင့် အ မှတ်(၃)ရပ်ကွက်တို့တွင် ရေဝင်ရောက်မှုများဖြစ်ပေါ်ခဲ့သဖြင့် ရေဘေးသင့်သူများအား ရေဘေးလွတ်ကင်းရာသို့ကူညီရွှေ့ပြောင်းပေးလျက်ရှိကြောင်း သိရသည်။
ထို့ပြင် ကျုံပျော်မြို့တွင်လည်း မိုးသည်းထန်စွာရွာသွန်းမှုကြောင့် နံနက်ပိုင်းမှစတင်ကာ မြေနိမ့်ပိုင်းရှိ ပင်လုံရပ်ကွက်အတွင်း၌ ရေဝင်ရောက်မှုများဖြစ်ပေါ်နေသဖြင့် ရေဘေးသင့်သူများကို ရေဘေးလွတ်ကင်းရာသို့ကူ ညီရွှေ့ပြောင်းပေးလျက်ရှိကြောင်း သိရသည်။

ညောင်တုန်းမြို့နယ်ရှိ ကျေးရွာ(၂)ရွာတွင် လေပြင်းတိုက်ခတ်၍ နေအိမ်အချို့ပျက်စီးမှုများဖြစ်ပေါ်

ဧရာဝတီတိုင်း၊ ညောင်တုန်းမြို့နယ်တွင် ယနေ့ သြဂုတ် ၂၃ ရက်နံနက် ၅ နာရီခန့်မှစတင်ကာ လေပြင်းတိုက် ခတ်မှုများဖြစ်ပေါ်ခဲ့၍ ကျေးရွာ(၂)ရွာရှိ နေအိမ်အချို့ပျက်စီးမှုများဖြစ်ပေါ်ခဲ့ကြောင်း သိရသည်။
ညောင်တုန်းမြို့နယ်အတွင်း လေပြင်းတိုက်ခတ်မှုကြောင့် ဆားမလောက်ကျေးရွာအုပ်စု၊ ဝါးတောကျေးရွာနှင့် ကွင်းကလေးကျေးရွာတို့ရှိ နေအိမ်အချို့ ပြိုကျပျက်စီးခြင်းနှင့် အမိုးလန်ပျက်စီးခြင်းများဖြစ်ပေါ်ခဲ့ကြောင်း သိရသည်။
ထို့ကြောင့် ဆားမလောက်နယ်မြေမီးသတ်စခန်းမှတပ်ဖွဲဝင်များ၊ အရန်မီးသတ်တပ်ဖွဲဝင်များက ပျက်စီးမှုများအားဖယ်ရှားရှင်းလင်းပေးခဲ့ကြပြီးနောက် လိုအပ်သည့်ကူညီမှူများကို ဆက်လက်ပြုလုပ်ပေးလျက်ရှိကြောင်း သိရသည်။

ပြည်တွင်း/ပြည်ပခရီးသွားများ နေ့စဥ် လာရောက်လည် ပတ်နေကြသည့် ကရင်ပြည်နယ်မှ ရသေ့ပျံဂူနှင့် အလဝံအင်း

ကရင်ပြည်နယ်၊ ဘားအံမြို့နယ်၊ ရသေ့ပျံကျေးရွာအနီးရှိ ရသေ့ပျံဂူနှင့် အလဝံအင်း သည် ပြည်တွင်း/ပြည်ပခရီးသွားများ နေ့စဥ် လာရောက်လည်ပတ်လျက်ရှိသော ပြည်နယ်၏စိတ်ဝင်စားဖွယ်ကောင်းသည့် ခရီးစဥ်ဒေသတစ်ခုဖြစ်သည်။
အဆိုပါ ခရီးစဥ်ဒေသသည် မြို့ပြရှုပ်ထွေးမှုများနှင့် ကင်းဝေးသော အေးချမ်းသည့်ပတ်ဝန်းကျင်ဒေသတစ်ခုဖြစ်ကာ အလဝံအင်း အတွင်းခရီးသွားများစိတ်အေးချမ်းသာစွာသွားလာလည်ပတ်နိုင်ရေးအတွက် သဘာဝအခြေခံစက်တပ်ဝါးဖောင်ငယ်များကို စီစဥ်ပေးထားသည်။
ယင်း ခရီးစဥ်ဒေသအား ကရင်ပြည် နယ်ဝန်ကြီးချုပ်ဦးစောမြင့်ဦးက သြဂုတ် ၂၂ ရက်တွင်ကြည့်ရှုစစ်ဆေးပြီး ခရီးစဉ်ဒေသရေရှည်ဖွံ့ဖြိုးတိုးတက်ရေး၊ ခရီးသွားဧည့်သည်များစိတ်အေးချမ်းသာစွာ အင်းရေပြင်ပေါ်တွင် ဝါးဖောင်ဖြင့်အလည်အပတ်သွားရောက်ဓာတ်ပုံရို-က်ကူးနိုင်ရေး၊ ဒေသထွက်ကုန်၊ အစားအစာနှင့် အမှတ်တရပစ္စည်းရောင်းချသော ဈေးဆိုင်များစနစ်တကျဖြစ်စေရေး၊ အလဝံအင်းနှင့် ပတ်ဝန်းကျင်သန့်ရှင်းသာယာလှပစေရေး သက်ဆိုင်ရာဌာနဆိုင်ရာများ၊ ခရီးစဉ်ဒေသစီမံခန့်ခွဲရေးအဖွဲ့များနှင့် ဒေသခံများပူးပေါင်းဆောင်ရွက်ပေးကြရန်မှာကြားခဲ့သည်။
ကရင်ပြည်နယ်အတွင်း၌ ခရီးသွားကဏ္ဍဖွံ့ဖြိုးတိုးတက်ရေး၊ ပြည်တွင်း/ပြည်ပခရီးသွားများ စိတ်အေးချမ်းသာစွာလာရောက်လည်ပတ်နိုင်ရေးတို့အတွက် ခရီးစဥ်ဒေသအသစ်များကို ထပ်မံဖော်ထုတ်လျက်ရှိသည်။

ရန်ကုန်တိုင်းအစိုးရအဖွဲ့ စတုတ္ထအကြိမ်မြောက် မိုးရာသီသစ်ပင်စိုက်ပျိုးပွဲ အရိပ်ရပင်ပေါင်း(၄)သောင်းပင်ခန့်စိုက်ပျိုး

ရန်ကုန်တိုင်းအစိုးရအဖွဲ့၏ ၂၀၂၆ ခုနှစ် မိုးရာသီသစ် ပင်စိုက်ပျိုးပွဲအား ယနေ့ သြဂုတ် ၂၃ ရက်နံနက်ပိုင်းတွင် မင်္ဂလာဒုံမြို့နယ်ရှိ လှော်ကားရေဝေရေလဲဒေသ၌ စတုတ္ထအကြိမ်မြောက်အဖြစ်ပြုလုပ်ခဲ့ကြောင်း သိရသည်။
ရန်ကုန်တိုင်းဝန်ကြီးချုပ်ဦးအောင်နိုင်သူ တက်ရောက်စိုက်ပျိုးပေးခဲ့ပြီးနောက် တက်ရောက်လာကြသူများ၏ စုပေါင်းသစ်ပင်စိုက်ပျိုးနေမှုများကိုကြည့်ရှုအားပေးခဲ့ကြောင်း သိရသည်။
ရန်ကုန်တိုင်းအစိုးရအဖွဲ့၏ ၂၀၂၆ ခုနှစ်၊ မိုးရာသီသစ် ပင်စိုက်ပျိုးပွဲကို ပထမအကြိမ်အဖြစ် ဒဂုံမြို့သစ် (တောင်ပိုင်း)မြို့နယ်၊ အစိုးရနည်းပညာကောလိပ်တွင် အရိပ်ရပင်(၁,၀၀၀)ပင်၊ ဒုတိယအကြိမ်အဖြစ် မင်္ဂလာဒုံမြို့နယ် လှော်ကားရေဝေရေလဲဒေသတွင် အရိပ်ရပင် (၁၈,၉၀၀)ပင်၊ တတိယအကြိမ်အဖြစ် ရဲမွန်တပ်မြို့ ရဲမွန်ကျောင်းဝင်းတွင် အရိပ်ရပင်(၁,၂၂၃)ပင်၊ စတုတ္ထအကြိမ်အဖြစ် မင်္ဂလာဒုံမြို့နယ်၊ လှော်ကားရေဝေရေ လဲဒေသတွင် အရိပ်ရပင်(၃၇,၈၀၀)ပင်ကိုစိုက်ပျိုးခဲ့ပြီးဖြစ်ကြောင်း သိရသည်။
အဆိုပါ ကျင်းပပြီးဖြစ်သည့် မိုးရာသီသစ်ပင်စိုက်ပျိုးပွဲ (၄)ကြိမ်၌ ဧကပေါင်း(၁၁၅)ဧကတွင် အရိပ်ရပင်ပေါင်း (၅၈,၉၂၃)ပင်ကို အောင်မြင်စွာစိုက်ပျိုးခဲ့ပြီးဖြစ်ကြောင်း သိရသည်။