ဆော်ဒီ Aramco ကုမ္ပဏီပိုင် ရဟတ်ယာဉ်ပျ-က်ကျမှုကြောင့် လူ ၁၄ ဦး ‌ေ-သဆုံး

ဆော်ဒီအာရေဗျနိုင်ငံ၏ အမျိုးသားရေနံကုမ္ပဏီ Saudi Aramco ပိုင် ရဟတ်ယာဉ်တစ်စင်းသည် ဇွန် ၂၉ ရက်က ဟော်မုဇ်ရေလက်ကြား အနောက်ဘက်ရှိ ဆော်ဒီအရှေ့ပိုင်း ရက်စ်တန်နူရာ (Ras Tanura) ဒေသတွင် ပျက်ကျခဲ့ရာ လူ ၁၄ ဦး သေဆုံးခဲ့ကြောင်း နိုင်ငံပိုင်သတင်းဌာနက ဖော်ပြခဲ့သည်။
ရဟတ်ယာဉ်ပျ-က်ကျရသည့် အကြောင်းရင်းကို လက်ရှိအချိန်အထိ မသိရှိရသေးဘဲ သက်ဆိုင်ရာအာဏာပိုင်များ ပါဝင်သည့် စုံစမ်းစစ်ဆေးရေးအဖွဲ့က ဖြစ်စဉ်နှင့်ပတ်သက်၍ စစ်ဆေးမှုများ ဆောင်ရွက်လျက်ရှိကြောင်း သိရသည်။
Saudi Aramco သည် လေးလနီးပါး ရပ်နားထားခဲ့သည့် ရက်စ်တန်နူရာဆိပ်ကမ်း၌ ရေနံစိမ်းတင်ဆောင်မှုလုပ်ငန်းများကို မကြာသေးမီက ပြန်လည်စတင်ခဲ့ပြီး ယခုဖြစ်စဉ်မှာ အဆိုပါလုပ်ငန်းများ ပြန်လည်လည်ပတ်နေစဉ်အတွင်း ဖြစ်ပွားခဲ့ခြင်းဖြစ်သည်။
ဆော်ဒီအာရေဗျနိုင်ငံသည် ကမ္ဘာ့အကြီးဆုံး ရေနံတင်ပို့သည့် နိုင်ငံများအနက် တစ်နိုင်ငံဖြစ်ပြီး ဒေသတွင်းတင်းမာမှုများအကြား ရေနံနှင့် သဘာဝဓာတ်ငွေ့ ထုတ်လုပ်ရေးနှင့် တင်ပို့ရေးလုပ်ငန်းများကို ဆက်လက်အရှိန်မြှင့် ဆောင်ရွက်လျက်ရှိကြောင်း သိရသည်။

ရန်ကုန်တိုင်း၌ မြို့ပြစီမံကိန်းများ အကောင်အထည်ဖော်ရန် လမ်းညွှန်ချက်ရရှိပါက ဝန်ထမ်းနှင့် အငြိမ်းစားဝန်ထမ်းများအတွက် မြေကွက်ချထားပေးမည်ဟု စည်ပင်ဝန်ကြီးပြော

ရန်ကုန်တိုင်းဒေသကြီးအတွင်း မြို့ပြစီမံကိန်းများ အကောင်အထည်ဖော်ဆောင်ရွက်ရန် ပြည်ထောင်စုအဆင့်၏ လမ်းညွှန်ချက်ရရှိပါက နိုင်ငံ့ဝန်ထမ်းများနှင့် အငြိမ်းစားဝန်ထမ်းများအတွက် မြေကွက်ချထားပေးနိုင်ရေး စီစဉ်ဆောင်ရွက်သွားမည်ဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့ စည်ပင်သာယာရေးဝန်ကြီး ဦးမျိုးမြင့်အောင်က ပြောကြားသည်။
ယနေ့ (ဇွန် ၂၉ ရက်) ကျင်းပသည့် တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး (နဝမနေ့) တွင် ဒဂုံမြို့သစ်(အရှေ့ပိုင်း)မြို့နယ် လွှတ်တော်ကိုယ်စားလှယ် အမှတ်(၂) ဦးသော်တာ၏ "ရန်ကုန်တိုင်းဒေသကြီးရှိ လုပ်သက်နှစ်(၃၀)နှင့်အထက် နိုင်ငံ့ဝန်ထမ်းများနှင့် ၂၀၂၁ ခုနှစ်နောက်ပိုင်း အငြိမ်းစားယူခဲ့သော ဝန်ထမ်းများအား မြေကွက်ချထားပေးရန် အစီအစဉ်ရှိ/မရှိ" နှင့်စပ်လျဉ်းသည့် ကြယ်ပွင့်ပြမေးခွန်းကို ပြန်လည်ဖြေကြားရာတွင် ယင်းကဲ့သို့ ပြောကြားခဲ့ခြင်းဖြစ်သည်။
စည်ပင်သာယာရေးဝန်ကြီးက လက်ရှိအစိုးရတာဝန်ယူသည့် အစောပိုင်းကာလအတွင်း မြို့ပြစီမံကိန်းများ ရေးဆွဲနိုင်ရေးကို စီစဉ်ဆောင်ရွက်လျက်ရှိပြီး စီမံကိန်းများ ရေးဆွဲပြီးစီးပါက ပြည်ထောင်စုအဆင့်သို့ တင်ပြ၍ လမ်းညွှန်ချက်များ ရယူဆောင်ရွက်သွားမည်ဖြစ်ကြောင်း ပြောကြားသည်။
ထို့ပြင် ပြည်ထောင်စုအဆင့်မှ လမ်းညွှန်ချက်များ ရရှိပြီးနောက်မှသာ တိုင်းဒေသကြီးအဆင့်အနေဖြင့် လုပ်ငန်းများကို အကောင်အထည်ဖော်နိုင်မည်ဖြစ်ကြောင်းလည်း ရှင်းလင်းပြောကြားခဲ့သည်။
"လက်ရှိမှာ မြို့ပြစီမံကိန်းတွေကို ရေးဆွဲနိုင်ဖို့ စီစဉ်နေဆဲဖြစ်ပါတယ်။ အဲဒီအဆင့်တွေ ပြီးမြောက်ပြီးမှသာ ဝန်ထမ်းတွေနဲ့ အငြိမ်းစားဝန်ထမ်းတွေအတွက် မြေကွက်ချထားပေးရေးကို စီစဉ်ဆောင်ရွက်နိုင်မှာ ဖြစ်ပါတယ်" ဟု ဦးမျိုးမြင့်အောင်က ပြောကြားသည်။
လက်ရှိအချိန်တွင် ဝန်ထမ်းများနှင့် အငြိမ်းစားဝန်ထမ်းများအတွက် မြေကွက်ချထားပေးမည့် အစီအစဉ် မရှိသေးသော်လည်း မြို့ပြစီမံကိန်းများ ရေးဆွဲအတည်ပြုပြီး လိုအပ်သည့် လမ်းညွှန်ချက်များ ရရှိပါက သက်ဆိုင်ရာအစီအစဉ်များကို စီစဉ်ဆောင်ရွက်သွားမည်ဖြစ်ကြောင်း သိရသည်။

မွန်ညီညွတ်ရေးပါတီ မော်လမြိုင်မြို့နယ်ရုံး ဖွင့်လှစ်၍ ပြည်သူ့ဝန်ဆောင်မှုများ စတင်ဆောင်ရွက်

မွန်ညီညွတ်ရေးပါတီအား ကူညီအားဖြည့်ပေးခဲ့ကြသည့် မဲဆန္ဒရှင်များနှင့် ဒေသခံပြည်သူများအတွက် ပြည်သူ့ဝန်ဆောင်မှုလုပ်ငန်းများ ဆောင်ရွက်ပေးနိုင်ရန် ရည် ရွယ်၍ မွန်ညီညွတ်ရေးပါတီ (မော်လမြိုင်မြို့နယ်) ရုံးကို ဇွန် ၇ ရက်မှစတင်ကာ ဖွင့်လှစ်လိုက်ကြောင်း သိရသည်။
အဆိုပါရုံးသည် မော်လမြိုင်မြို့နယ်၊ မြိုင်သာယာရပ်ကွက်၊ ၁၉ လမ်းရှိ မွန်ညီညွတ်ရေးပါတီ (ဗဟို) ရုံးနှင့် တွဲဖက်ဖွင့်လှစ်ထားခြင်းဖြစ်ပြီး၊ ပြည်သူများ၏ လိုအပ်ချက်များကို တတ်စွမ်းသမျှ ဖြည့် ဆည်းကူညီဆောင်ရွက်ပေးသွားမည်ဖြစ် ကြောင်း ပါတီဘက်မှ ထုတ်ပြန်ထားသည်။
ထို့ပြင် မိဘပြည်သူများအနေဖြင့် မွန်ညီညွတ်ရေးပါတီ (မော်လမြိုင်မြို့နယ်) ရုံးနှင့် တိုက်ရိုက်ဆက်သွယ်၍ အတူ တကွ ပူးပေါင်းဆောင်ရွက်ကြရန်လည်း ဖိတ်ခေါ်ထားကြောင်း သိရသည်။

ကမ္ဘာ့ခရီးသွားလုပ်ငန်းနေ့ အထိမ်းအမှတ် “ခရီးသွားလုပ်ငန်းနှင့် ယဉ်ကျေးမှု” ခေါင်းစဥ်ဖြင့် Short Video ပြိုင်ပွဲ ကျင်းပမည်

၂၀၂၆ ခုနှစ် ကမ္ဘာ့ခရီးသွားလုပ်ငန်းနေ့ (World Tourism Day) အထိမ်းအမှတ်အဖြစ် “ခရီးသွားလုပ်ငန်းနှင့် ယဉ်ကျေးမှု” ခေါင်းစဉ်ဖြင့် Short Video ပြိုင်ပွဲကို ကျင်းပသွားမည်ဖြစ်ပြီး စိတ်ပါဝင်စားသူများအား ဝင်ရောက်ယှဉ်ပြိုင်ရန် ဖိတ်ခေါ်ထားကြောင်း သိရသည်။
အဆိုပါပြိုင်ပွဲသည် မြန်မာနိုင်ငံ၏ ခရီးသွားဆွဲဆောင်မှုများ၊ ယဉ်ကျေးမှုအမွေအနှစ်များနှင့် ဒေသအသီးသီး၏ သဘာဝအလှအပများကို Short Video များမှတစ်ဆင့် ဖော်ထုတ်တင်ဆက်နိုင်စေရန် ရည်ရွယ်ကျင်းပခြင်းဖြစ်ကြောင်း သိရသည်။
ပြိုင်ပွဲဝင်များအနေဖြင့် အသေးစိတ်စည်းမျဉ်းစည်းကမ်းများ၊ ပြိုင်ပွဲဝင်လျှောက်လွှာများနှင့် တင်သွင်းရမည့် အချက်အလက်များကို သက်ဆိုင်ရာတာဝန်ရှိဌာန၏ ထုတ်ပြန်ချက်များအတိုင်း ဆက်လက်လေ့လာနိုင်ကြောင်း သိရသည်။
ယင်းပြိုင်ပွဲမှတစ်ဆင့် မြန်မာနိုင်ငံ၏ ထူးခြားသည့် ခရီးသွားအရင်းအမြစ်များနှင့် ယဉ်ကျေးမှုအမွေအနှစ်များကို ပြည်တွင်းပြည်ပသို့ ပိုမိုကျယ်ပြန့်စွာ မိတ်ဆက်နိုင်မည်ဟု မျှော်လင့်ထားကြောင်းလည်း သိရသည်။

တွန်းဇံမြို့နယ်တွင် အခြေခံပညာကျောင်း ၄၄ ကျောင်းဖွင့်လှစ်နိုင်ပြီး ကျောင်းသားကျောင်းသူ၃၄၄၆ ဉီး ပညာသင်ကြားနေ

တွန်းဇံမြို့နယ်တွင် ကျောင်းပေါင်း ၄၄ ကျောင်းဖွင့်လှစ်နိုင်ပြီဖြစ်ပြီး အခြေခံပညာ ကျောင်းသားကျောင်းသူ၃၄၄၆ ဉီးတက်ရောက်ပညာသင်ကြားနေပြီဖြစ်ကြောင်း သိရသည်။
တွန်းဇံမြို့တွင် ဖွင့်လှစ်ထားသည့် အခြေခံပညာကျောင်းများကို ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးမျိုးမြင့်က ဇွန်လ ၂၇ ရက်က သွားရောက်ကြည့်ရှုစစ်ဆေးခဲ့ကြောင်း သိရသည်။
တွန်းဇံမြို့ရှိ အခြေခံပညာအထက်တန်းကျောင်းတွင် ကျောင်းအုပ်ကြီး (၁)ဦး၊ သင်ကြားရေး ဆရာ/မ(၃၀)ဦးနှင့် ပညာရေးဝန်ထမ်း (၅)ဦး၊ စုစုပေါင်းဝန်ထမ်း (၃၆)ဦးဖြင့် သင်ကြား ရေးတာဝန်များကို ထမ်းဆောင်နေပြီး ကျောင်းသား/သူ (၂၆၁)ဦး တက်ရောက်သင်ကြားလျက်ရှိသည်။
ထို့နောက် ဒုတိယဝန်ကြီးနှင့်အဖွဲ့သည် ပညာသင်ကြားနေမှုများအား လိုက်လံကြည့်ရှု အားပေးခဲ့ပြီး ကျောင်းပတ်ဝန်းကျင် သန့်ရှင်းလှပရေးအတွက် မြို့မိမြို့ဖများမှ လုပ်အားပေး ဆောင်ရွက်နေမှုများကို တစ်ဦးချင်း ရင်းရင်းနှီးနှီး နှုတ်ဆက် အားပေးခဲ့ပြီး ထောက်ပံ့ကြေးများ ပေးအပ်ခဲ့သည်။
တွန်းဇံမြို့နယ်တွင် ကျောင်းပေါင်း ၄၄ ကျောင်းဖွင့်လှစ်နိုင်ပြီဖြစ်ပြီး အခြေခံပညာကျောင်းသားကျောင်းသူ၃၄၄၆ ဉီးတက်ရောက်ပညာသင်ကြားနေပြီဖြစ်သည်။
ဆက်လက်၍ ဒုတိယဝန်ကြီးဉီးမျိုးမြင့်က တွန်းဇံမြို့ရှိ ဘာသာရေးခေါင်းဆောင်များ၊ မြို့မိမြို့ဖများ၊ ဌာနဆိုင်ရာ တာဝန်ရှိသူများ၊ တွန်းဇံမြို့ပြန်လည်ထူထောင်ရေးနှင့် ပြန်လည်တည်ဆောက်ရေးလုပ်ငန်းကော်မတီဝင် များနှင့် တွေ့ဆုံခဲ့ပြီး ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများအား ပူးပေါင်းဆောင်ရွက်သွားကြရန်၊ အချိန်နှင့်တပြေးညီ အကောင်အထည်ဖော် ဆောင်ရွက်ကြရန်နှင့် ဒေသဖွံ့ဖြိုးရေးနှင့် ဒေသတည်ငြိမ်ရေးမှာ အဓိက အရေးကြီးကြောင်း၊ဒေသတည်ငြိမ်ရေးနှင့် ဖွံ့ဖြိုးတိုးတက်ရေးအတွက် ဘာသာရေးခေါင်းဆောင်များ၊ မြို့မိမြို့ဖများ၊ ဌာနဆိုင်ရာတာဝန်ရှိသူများ ဝိုင်းဝန်းကြိးပမ်းဆောင်ရွက်ကြရန် မှာကြားခဲ့ကြောင်း သိရသည်။

FDA စိစစ်တွေ့ရှိသည့် Albutein ဆေးဝါးအတု ဈေးကွက်အတွင်း ပျံ့နှံ့နေ၍ ဝယ်ယူသုံးစွဲခြင်းမပြုရန် အသိပေး

မြန်မာနိုင်ငံဆေးဝါးမှတ်ပုံတင်ရရှိထားသည့် Albutein 20% Solution for IV Infusion ဆေးဝါးနှင့် အလားသဏ္ဌာန်တူ ဆေးဝါးအတုများ ဈေးကွက်အတွင်း ရောင်းချနေမှုကို စိစစ်တွေ့ရှိထားသဖြင့် အများပြည်သူများအနေဖြင့် ဝယ်ယူသုံးစွဲခြင်းမပြုကြရန် ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) က အသိပေးထုတ်ပြန်လိုက်သည်။
FDA သည် အရည်အသွေးပြည့်ဝ၍ အာနိသင်ထက်မြက်ကာ ဘေးအန္တရာယ်ကင်းရှင်းသော ဆေးဝါးများကို ပြည်သူများ ဘေးကင်းလုံခြုံစွာ သုံးစွဲနိုင်စေရေးအတွက် ဈေးကွက်အတွင်း စဉ်ဆက်မပြတ် စိစစ်ကြပ်မတ်ဆောင်ရွက်လျက်ရှိရာ ယခုကဲ့သို့ ဆေးဝါးအတု ရောင်းချနေမှုကို စစ်ဆေးတွေ့ရှိခဲ့ခြင်းဖြစ်ကြောင်း သိရသည်။
စိစစ်တွေ့ရှိရသည့် ဆေးဝါးမှာ မြန်မာနိုင်ငံဆေးဝါးမှတ်ပုံတင်ရရှိထားသော Grifols Biologicals LLC, USA ထုတ် Albutein 20% Solution for IV Infusion [Albumin (Human) USP 20g/100mL]ဆေးဝါးနှင့် ပုံပန်းသဏ္ဌာန် ဆင်တူသော်လည်း IP Specificationဟု ဖော်ပြထားသည့် Albutein 20% Solution for IV Infusionဆေးဝါးအတုဖြစ်ကြောင်း FDA က ထုတ်ပြန်ထားသည်။
ထို့ကြောင့် အများပြည်သူများအနေဖြင့် IP Specification ဖော်ပြထားသော Albutein 20% Solution for IV Infusion ဆေးဝါးအတုကို ဝယ်ယူသုံးစွဲခြင်း မပြုကြရန်နှင့် မြန်မာနိုင်ငံဆေးဝါးမှတ်ပုံတင်အမှတ် (Registration Number) ပါရှိသော ဆေးဝါးများကိုသာ ဝယ်ယူအသုံးပြုကြရန် FDA က တိုက်တွန်းထားသည်။
Albutein 20% Solution for IV Infusion သည် လူ့သွေးပလာစမာ (Blood Plasma) အတွင်းရှိ Albumin ပရိုတင်းဓာတ်ကို ပြန်လည်ဖြည့်တင်းပေးသည့် သွေးကြောသွင်းဆေးရည် (Intravenous Infusion) အမျိုးအစားဖြစ်ပြီး အရေးပေါ်နှင့် ပြင်းထန်သော ရောဂါအခြေအနေများတွင် ဆရာဝန် သို့မဟုတ် ကျန်းမာရေးဝန်ထမ်းများ၏ ကြီးကြပ်မှုဖြင့်သာ သွေးပြန်ကြောမှတစ်ဆင့် သွင်းပေးရသည့် ဆေးဝါးဖြစ်ကြောင်း သိရသည်။

အရည်အသွေးမြင့် ဖွံ့ဖြိုးတိုးတက်ရေးရည်မှန်းချက်ဖြင့် MSME နှင့် Agro-Based Industries ကဏ္ဍ မြှင့်တင်ရန် နိုင်ငံတော်သမ္မတ လမ်းညွှန်

ကုန်ထုတ်လုပ်မှု တိုးတက်ရေးကသာ နိုင်ငံ၏ စီးပွားရေးခိုင်မာမှုကို အဆုံးအဖြတ်ပေးနိုင်ဟု နိုင်ငံတော်သမ္မတက အလေးပေးပြောကြား
နိုင်ငံတော်၏ စီးပွားရေးဖွံ့ဖြိုးတိုးတက်ရေးကို အထောက်အကူပြုနိုင်ရန် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSME) ဖွံ့ဖြိုးတိုးတက်ရေး၊ စိုက်ပျိုးရေးအခြေခံစက်မှုလုပ်ငန်းများ အားကောင်းလာစေရေး၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးနှင့် ဒေသအလိုက် ကုန်ထုတ်လုပ်မှုမြှင့်တင်ရေးလုပ်ငန်းများကို အရှိန်အဟုန်ဖြင့် အကောင်အထည်ဖော်ဆောင်ရွက်ကြရန် နိုင်ငံတော်သမ္မတက လမ်းညွှန်မှာကြားခဲ့ကြောင်း သိရသည်။
အဆိုပါ လမ်းညွှန်မှာကြားချက်များကို ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတက သက်ဆိုင်ရာအစည်းအဝေး၌ ပြောကြားခဲ့ခြင်းဖြစ်ပြီး နိုင်ငံ၏ ရေရှည်စီးပွားရေးဖွံ့ဖြိုးတိုးတက်မှုအတွက် အဓိကကျသည့် မူဝါဒနှင့် အကောင်အထည်ဖော်ဆောင်ရွက်ရမည့် လုပ်ငန်းစဉ်များကို ထည့်သွင်းလမ်းညွှန်ခဲ့ကြောင်း သိရသည်။
၁။ နိုင်ငံတော်၏ စီးပွားရေးဖွံ့ဖြိုးတိုးတက်မှုသည် ပြည်တွင်းကုန်ထုတ်လုပ်မှု တိုးတက်ရေးနှင့် တိုက်ရိုက်ဆက်စပ်နေသဖြင့် ကုန်ထုတ်လုပ်မှုမြှင့်တင်ရေးကို အလေးထားဆောင်ရွက်ရန် လိုအပ်ကြောင်း။
၂။ နိုင်ငံ၏ သဘာဝသယံဇာတများ၊ လူ့စွမ်းအားအရင်းအမြစ်များနှင့် ဒေသအလိုက် အားသာချက်များကို ထိရောက်စွာ အသုံးချကာ တန်ဖိုးမြှင့်ထုတ်ကုန်များ ထုတ်လုပ်နိုင်ရေး ဆောင်ရွက်ရန်လိုအပ်ကြောင်း။
၃။ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSME) ကို နည်းပညာ၊ ငွေကြေး၊ ဈေးကွက်နှင့် စီမံခန့်ခွဲမှုကဏ္ဍများတွင် ဆက်လက်ပံ့ပိုးမြှင့်တင်ပေးရမည်ဖြစ်ကြောင်း။
၄။ စိုက်ပျိုးရေးထုတ်ကုန်များကို အခြေခံသည့် Agro-Based Industries များ ဖွံ့ဖြိုးလာစေရေးကို အလေးထားဆောင်ရွက်ရန် လိုအပ်ကြောင်း။
၅။ ကုန်ကြမ်းများကိုသာ ရောင်းချခြင်းထက် Value-added ထုတ်ကုန်များအဖြစ် ထုတ်လုပ်နိုင်ရေးကို ဦးတည်ဆောင်ရွက်ရမည်ဖြစ်ကြောင်း။
၆။ ဒေသထွက်ကုန်များကို အမှတ်တံဆိပ်တန်ဖိုးမြှင့်တင်၍ ပြည်တွင်းနှင့် ပြည်ပဈေးကွက်များသို့ ထိုးဖောက်တင်ပို့နိုင်ရေး ကြိုးပမ်းဆောင်ရွက်ရန်လိုအပ်ကြောင်း။
၇။ လူ့စွမ်းအားအရင်းအမြစ်ဖွံ့ဖြိုးရေးသည် နိုင်ငံဖွံ့ဖြိုးတိုးတက်ရေး၏ အခြေခံဖြစ်သဖြင့် ပညာရေး၊ အသက်မွေးဝမ်းကျောင်းပညာနှင့် ကျွမ်းကျင်လုပ်သားမွေးထုတ်ရေးကို အရှိန်မြှင့်ဆောင်ရွက်ရမည်ဖြစ်ကြောင်း။
၈။ Town Plan များကို စနစ်တကျရေးဆွဲ၍ မြို့ပြနှင့် ကျေးလက်ဒေသများ ဖွံ့ဖြိုးတိုးတက်ရေးကို ဟန်ချက်ညီညီ အကောင်အထည်ဖော်ဆောင်ရွက်ရန်လိုအပ်ကြောင်း။
၉။ အခြေခံအဆောက်အအုံများ တိုးတက်ကောင်းမွန်လာစေရေးနှင့် သယ်ယူပို့ဆောင်ရေး၊ လျှပ်စစ်၊ ရေ၊ ဆက်သွယ်ရေးစနစ်များ ခိုင်မာလာစေရေးကို အလေးထားဆောင်ရွက်ရမည်ဖြစ်ကြောင်း။
၁၀။ စက်မှုကဏ္ဍ၊ လယ်ယာကဏ္ဍနှင့် ဝန်ဆောင်မှုကဏ္ဍများကို အချင်းချင်း ချိတ်ဆက်ဖွံ့ဖြိုးလာစေရေးအတွက် အစိုးရနှင့် ပုဂ္ဂလိကကဏ္ဍတို့ ပူးပေါင်းဆောင်ရွက်ရန်လိုအပ်ကြောင်း။
၁၁။ ဒေသအလိုက် ရင်းနှီးမြှုပ်နှံမှုများ တိုးတက်လာစေရေး၊ အလုပ်အကိုင်အခွင့်အလမ်းများ ဖန်တီးပေးနိုင်ရေးနှင့် ဒေသစီးပွားရေးကို အားကောင်းလာစေရေးအတွက် စီမံချက်များ ချမှတ်အကောင်အထည်ဖော်ရန် လိုအပ်ကြောင်း။
၁၂။ ပြည်သူများ၏ လူနေမှုဘဝ မြင့်မားလာစေရေးနှင့် နိုင်ငံ၏ ရေရှည်စီးပွားရေးဖွံ့ဖြိုးတိုးတက်ရေးအတွက် သက်ဆိုင်ရာဝန်ကြီးဌာနများ၊ ဒေသဆိုင်ရာအဖွဲ့အစည်းများနှင့် ပုဂ္ဂလိကကဏ္ဍတို့ အချင်းချင်း ပူးပေါင်းညှိနှိုင်းဆောင်ရွက်ကြရန် နိုင်ငံတော်သမ္မတက လမ်းညွှန်မှာကြားခဲ့ကြောင်း သိရသည်။

လမ်းပန်းဆက်သွယ်ရေးလုပ်ငန်းများအတွက် လိုအပ်သည့် ဘဏ္ဍာငွေများကို နိုင်ငံတော်မှ ဆက်လက်ခွင့်ပြုပေးနေဟု နိုင်ငံတော်သမ္မတ ပြောကြား

နိုင်ငံတစ်ဝန်း လမ်းပန်းဆက်သွယ်ရေးကောင်းမွန်စေရေးနှင့် ဒေသဖွံ့ဖြိုးတိုးတက်ရေးအတွက် လမ်းတည်ဆောက်ရေးနှင့် အဆင့်မြှင့်တင်ရေးလုပ်ငန်းများ၌ လိုအပ်သည့် ဘဏ္ဍာငွေများကို နိုင်ငံတော်မှ ဆက်လက်ခွင့်ပြုပေးလျက်ရှိကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။
နိုင်ငံတော်သမ္မတသည် (ဇွန် ၂၉ ရက်)တွင် နေပြည်တော်၌ နေပြည်တော်ကောင်စီဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များအား တွေ့ဆုံအမှာစကားပြောကြားစဉ် အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
နိုင်ငံတစ်ဝန်း လမ်းပန်းဆက်သွယ်မှုများ ကောင်းမွန်စေရေးအတွက် မူဝါဒများချမှတ်၍ ဆောင်ရွက်လျက်ရှိပြီး တည်ဆောက်ပြီးသားလမ်းများ ရေရှည်တည်တံ့ခိုင်ခံ့စေရေးနှင့် သတ်မှတ်ထားသည့် လမ်းအင်္ဂါရပ်များနှင့်အညီ တည်ဆောက်ထိန်းသိမ်းနိုင်ရေးကို အလေးထားဆောင်ရွက်ရန် လိုအပ်ကြောင်း နိုင်ငံတော်သမ္မတက ပြောကြားသည်။
ထို့ပြင် လမ်းများရေရှည်ခိုင်ခံ့ကောင်းမွန်စေရေးအတွက် လမ်းဘေးဝဲယာ ရေစီးရေလာကောင်းမွန်အောင် စနစ်တကျ ဆောင်ရွက်ရမည်ဖြစ်သကဲ့သို့ သွားလာရေးခက်ခဲသည့် နယ်စပ်ဒေသများတွင်လည်း လမ်းပန်းဆက်သွယ်မှု ပိုမိုကောင်းမွန်လာစေရေးကို ဦးစားပေးအကောင်အထည်ဖော်ရမည်ဖြစ်ကြောင်း ပြောကြားခဲ့သည်။
“လမ်းပန်းဆက်သွယ်ရေးလုပ်ငန်းတွေအတွက် လိုအပ်တဲ့ ဘဏ္ဍာငွေတွေကို နိုင်ငံတော်က ခွင့်ပြုပေးနေပါတယ်”ဟု နိုင်ငံတော်သမ္မတက ပြောကြားသည်။
ထို့အပြင် လမ်းမကြီးများဥပဒေအရ လမ်းအမျိုးအစားအလိုက် သတ်မှတ်ထားသည့် စံချိန်စံညွှန်းများကို တိတိကျကျလိုက်နာရမည်ဖြစ်ပြီး လမ်းနယ်များကိုလည်း စနစ်တကျ ထိန်းသိမ်းဆောင်ရွက်ရန် လိုအပ်ကြောင်း ပြောကြားသည်။
လမ်းဘေးဝဲယာရှိ ရွာမြေနှင့် မြို့မြေမဟုတ်သည့်နေရာများတွင် စည်းကမ်းမဲ့ လူနေအိမ်များ ဆောက်လုပ်နေထိုင်ခြင်းကြောင့် အုပ်ချုပ်ရေးဆိုင်ရာ အခက်အခဲများ ဖြစ်ပေါ်လာနိုင်သဖြင့် သက်ဆိုင်ရာ အုပ်ချုပ်ရေးအဖွဲ့အစည်းများအနေဖြင့် ဥပဒေ၊ စည်းမျဉ်းစည်းကမ်းများနှင့်အညီ ကြပ်မတ်ဆောင်ရွက်ရန် လိုအပ်ကြောင်းလည်း နိုင်ငံတော်သမ္မတက မှာကြားခဲ့သည်။
ထို့ကြောင့် အများပြည်သူအကျိုးပြု စီမံကိန်းများကို အကောင်အထည်ဖော်ဆောင်ရွက်ရာတွင် ရေရှည်အကျိုးကို မျှော်မှန်း၍ စနစ်တကျ စီမံဆောင်ရွက်ကြရန် နိုင်ငံတော်သမ္မတက တိုက်တွန်းမှာကြားခဲ့ကြောင်း သိရသည်။

အီရတ်နိုင်ငံက BRICS အဖွဲ့ထဲကို ဝင်ချင်နေ

အီရတ်နိုင်ငံအနေနဲ့ တစ်နေ့ကျရင် BRICS အဖွဲ့ရဲ့ အစိတ်အပိုင်းတစ်ခု ဖြစ်လာဖို့ မျှော်လင့်တယ်လို့ ရုရှားနိုင်ငံဆိုင်ရာ အီရတ်သံအမတ်ကြီး ဒေါက်တာ အဗ္ဗဒူလ်-ကရင်မ် ဟာရှင်မ် မော့စ်တာဖာက TASS သတင်းဌာနကို ပြောပါတယ်။
သံအမတ်ကြီးက "BRICS ဆိုတာ တကယ့်ကို အရေးပါတဲ့ အဖွဲ့အစည်းတစ်ခုပါ၊ အီရတ်နိုင်ငံလည်း တစ်နေ့ကျရင် ဒီအဖွဲ့ထဲမှာ ပါဝင်ခွင့်ရလိမ့်မယ်လို့ ကျွန်တော် မျှော်လင့်ပါတယ်" လို့ ပြောပါတယ်။
သံအမတ်ကြီးရဲ့ ပြောပြချက်အရ အီရတ်နိုင်ငံ BRICS အဖွဲ့ထဲကို ဝင်ခွင့်ရနိုင်ခြေရှိတာဟာ "အချက်အလက် အများကြီးအပေါ်မှာ မူတည်နေပါတယ်။ အဖွဲ့အစည်းကို ဘယ်လို စနစ်တကျ ဖွဲ့စည်းထားလဲ၊ BRICS အဖွဲ့ဝင်ဖြစ်ဖို့ ဘာစည်းကမ်းသတ်မှတ်ချက်တွေ ရှိမလဲဆိုတာတွေအပေါ်မှာ မူတည်တာပါ။ ဒါပေမဲ့ (ဝင်ဖြစ်မယ်ဆိုရင်တော့) တကယ့်ကို ကောင်းတဲ့ အကြံဉာဏ်တစ်ခု ဖြစ်မှာ သေချာပါတယ်" လို့ ဆိုပါတယ်။
၂၀၀၆ ခုနှစ်မှာ ဒီအဖွဲ့အစည်းကို ရုရှားနိုင်ငံက စတင်ဦးဆောင် ဖွဲ့စည်းခဲ့တာပါ။ ဘရာဇီး၊ ရုရှား၊ အိန္ဒိယနဲ့ တရုတ်နိုင်ငံတို့က အခြေခံ တည်ထောင်သူ အဖွဲ့ဝင်တွေ ဖြစ်လာခဲ့ကြပါတယ်။ ၂၀၁၁ ခုနှစ်မှာ တောင်အာဖရိကနိုင်ငံ ပါဝင်လာပြီးတဲ့နောက်မှာတော့ ဒီအဖွဲ့ကို BRICS လို့ လူသိများလာခဲ့ပါတယ်။
၂၀၀၉ ခုနှစ် ဇွန်လ၊ ဂျာကာရင်ဘာ့ဂ် (Yekaterinburg) မြို့မှာ ပြုလုပ်ခဲ့တဲ့ ပထမဆုံးအကြိမ် ထိပ်သီးအစည်းအဝေးမှာတော့ ဒီအဖွဲ့ဟာ အဖွဲ့ဝင်နိုင်ငံတွေကြား အစဉ်တစိုက်ရှိပြီး တက်ကြွတဲ့၊ လက်တွေ့ကျတဲ့၊ ပွင့်လင်းမြင်သာတဲ့ ဆွေးနွေးမှုတွေနဲ့ ပူးပေါင်းဆောင်ရွက်မှုတွေကို မြှင့်တင်ဖို့ဆိုပြီး ရည်မှန်းချက်ကို ချမှတ်ခဲ့ပါတယ်။ နောက်ပိုင်းမှာတော့ ဘက်မလိုက်မူဝါဒနဲ့ တခြား ပြင်ပအဖွဲ့အစည်းတွေကို ဦးတည်တိုက်ခိုက်တာမျိုး မလုပ်ဖို့ဆိုတဲ့ အခြေခံမူတွေကို လက်ခံကျင့်သုံးခဲ့ပါတယ်။
အီဂျစ်၊ အီရန်၊ အာရပ်စော်ဘွားများပြည်ထောင်စု (UAE) နဲ့ အီသီယိုပီးယားနိုင်ငံတို့ဟာ ၂၀၂၄ ခုနှစ် ဇန်နဝါရီလမှာ အဖွဲ့ဝင်အပြည့်အဝ ဖြစ်လာခဲ့ကြပြီး၊ အဲဒီနောက် ၂၀၂၅ ခုနှစ် ဇန်နဝါရီလမှာတော့ အင်ဒိုနီးရှားနိုင်ငံက ထပ်မံပူးပေါင်း ပါဝင်လာခဲ့တာ ဖြစ်ပါတယ်။

ပြင်သစ်သမ္မတ မာခရွန် ဇနီးမောင်နှံက ထိုင်းဘုရင်နှင့် မိသားစုဝင်များအား ပဲရစ်မြို့တွင် ကြိုဆို၊ ထိုင်း-ပြင်သစ် သံတမန်ဆက်ဆံရေး (၁၇၀) ပြည့် အထိမ်းအမှတ်အဖြစ် နိုင်ငံတော်ခရီးစဉ် စတင်

ပြင်သစ်သမ္မတ အယ်မျူရယ် မာခရွန် နှင့် ဇနီး ဘရီဂျစ် မာခရွန် တို့သည် တနင်္လာနေ့က ပဲရစ်မြို့တွင် ထိုင်းဘုရင် မဟာဝိဇီရာလောင်ကွန်း၊မိဖုရား သုသီတာနှင့် မင်းသမီး သီရိဝဏ္ဏဝရီ နရီရတနာ ရာဇကံရာ တို့ကို နွေးထွေးလှိုက်လှဲစွာ ကြိုဆိုခဲ့ကြသည်။
ထိုခရီးစဉ်သည် ထိုင်းဘုရင်မင်းမြတ်ဇနီးမောင်နှံ၏ ပြင်သစ်နိုင်ငံတော်အဆင့် ခရီးစဉ်စတင်ခြင်းလည်း ဖြစ်သည်။
အဆိုပါ ခရီးစဉ်သည် သမ္မတ မာခရွန်၏ ဖိတ်ကြားချက်အရ လာရောက်ခြင်းဖြစ်ပြီး ထိုင်းနိုင်ငံနှင့် ပြင်သစ်နိုင်ငံအကြား သံတမန်ဆက်ဆံရေး ထူထောင်ခဲ့သည့် (၁၇၀) ပြည့်မြောက် နှစ်ပတ်လည် အထိမ်းအမှတ်အဖြစ် ကျင်းပခြင်း ဖြစ်သည်။