ဆိပ်ကြီးခနောင်တို(တွံတေးတူးမြောင်း) တံတားတည်ဆောက်နေမှု (၄၀)ရာခိုင်နှုန်းခန့်ပြီးစီးပြီဖြစ်

ရန်ကုန်တိုင်း၊ တွံတေးမြို့နယ်၌ အရှည်(၂,၄၂၈)ပေရှိ ဆိပ်ကြီးခနောင်တို(တွံတေးတူးမြောင်း)တံတားကိုတည်ဆောက်လျက်ရှိရာ လက်ရှိအချိန်တွင် တံတားတစ်စင်းလုံး၏ (၄၀)ရာခိုင်နှုန်းခန့်ပြီးစီးပြီဖြစ်ကြောင်း သိရသည်။
အဆိုပါ လုပ်ငန်းဆောင်ရွက်နေမှုများကို ဆောက်လုပ်ရေးဝန်ကြီးဌာန ပြည်ထောင်စုဝန်ကြီးဦးမျိုးသန့် နှင့် ရန်ကုန်တိုင်းဝန်ကြီးချုပ်ဦးအောင်နိုင်သူတို့က ယနေ့ စက်တင်ဘာ ၁၃ ရက်တွင်ကြည့်ရှုစစ်ဆေးခဲ့ကြကြောင်း သိရသည်။
သက်ဆိုင်ရာတာဝန်ရှိသူများက ၂၀၂၅-၂၀၂၆ ဘဏ္ဍာရေးနှစ်အထိဆောင်ရွက်ပြီးစီးခဲ့သည့်လုပ်ငန်းများ၊ ၂၀၂၆-၂၀၂၇ ဘဏ္ဍာရေးနှစ်တွင်ဆက်လက်ဆောင်ရွက်မည့်လျာထားလုပ်ငန်းများနှင့် လက်ရှိ ၂၀၂၆- ၂၀၂၇ ဘဏ္ဍာရေးနှစ်အတွင်းပြီးစီးခဲ့သည့် လုပ်ငန်းစဉ်များကိုရှင်းလင်းတင်ပြခဲ့ကြကြောင်း သိရသည်။

မဟာမုနိဘုရားကြီးတွင် နတ်ကနားပွဲကျင်းပခြင်းမရှိ ထွက်ပေါ်နေသည့် ရုပ်သံဖိုင်မှာ AI နည်းပညာဖြင့်ပြုလုပ်ထားခြင်းဖြစ်

လူမှုကွန်ယက်စာမျက်နှာများတွင် ပျံ့နှံ့လျက်ရှိသော မဟာမုနိဘုရားကြီးရှေ့တွင် သာသနာတော်နှင့်မအပ်စပ်သည့် ကပြဖျော်ဖြေနေသော ရုပ်သံများနှင့်ပတ်သက်၍ မဟာမုနိဂေါပကအဖွဲ့က ယနေ့ စက်တင်ဘာ ၁၃ ရက်က အထကိပါအတိုင်းအသိပေးခဲ့ခြင်းဖြစ်သည်။
မကြာသေးမီက TikTok အကောင့်တစ်ခုတွင် မဟာမုနိဘုရားကြီးအားနောက် ခံပြု၍ AI နည်းပညာဖြင့်ပြုလုပ်ကာ သာသနာတော်နှင့်မအပ်စပ်သည်များဖော်ပြထားသည်ဟု မဟာမုနိဂေါပကအဖွဲ့က အသိပေးခဲ့သည်။
မဟာမုနိဘုရားကြီးဂေါပကအဖွဲ့က ထိန်းသိမ်းစောင့် ရှောက်လျက်ရှိသော ဘုရားပရိဝုဏ်နှင့် စေတီပုထိုး၊ ကျောင်းဇရပ်များအတွင်း သာသနာတော်နှင့်မအပ်စပ်သည့် နတ်ကနားပွဲများမကျင်းပရန်ကြေညာထားကာ မည်သည့်အဖွဲ့အစည်း၊ မည်သည့်ပုဂ္ဂိုလ်ကိုမှခွင့်ပြုခဲ့ခြင်းလည်းမရှိဟု အသိပေးခဲ့သည်။
မဟာမုနိဘုရားကြီးအား နေ့စဉ် ဖူးမြော်ကြည်ညိုနိုင်စေရန် http://www.youtube.com, Mahamuni Pagoda Youtube Channel မှ ၂၄ နာရီထုတ်လွှင့်လျက်ရှိသည်ဟုလည်းအသိပေးကြေညာထား​သည်။

နတ်စင်တရာဆရာတော်ကြီး၏ ရုပ်ကလာပ်တော်အား စက်တင်ဘာ ၂၇ ရက်တွင် စံကျောင်းတော်ချမည်

အစာအိမ်သွေးကြောပေါက်ရောဂါဖြင့် ယနေ့ စက်တင်ဘာ ၁၃ ရက်နံနက် ၁ နာရီ ၅၆ မိနစ်က ဘဝနတ်ထံပျံလွန်တော်မူသွားခဲ့သည့် ရန်ကုန်တိုင်း၊ သန်လျင်မြို့နယ်၊ ကွမ်းခြံကုန်းကျေးရွာ‌၊ ဒေဝဒဟသဗ္ဗသိဒ္ဓိ နတ်စင်တရာကျောင်းတိုက်၏ ပဓာနနာယက အဂ္ဂမဟာသဒ္ဓမ္မဇောတိကဓဇ ဒေါက်တာဘဒ္ဒန္တပညာတေဇ၏ ရုပ်ကလာပ်တော်အား လာမည့် စက်တင်ဘာ ၂၇ ရက်နေ့ လယ် ၁ နာရီ၌ စံကျောင်းတော်ချပူဇော်သွားမည်ဖြစ် ကြောင်း စျာပနကျင်းပရေးကော်မတီထံမှ သိရသည်။
ထို့ပြင် အန္တိမအဂ္ဂိဈာပနအခမ်းအနားကိုလည်း လာမည့် ၂၀၂၇ ခုနှစ်၊ ဇန်နဝါရီလအတွင်း၌ ပူဇော်ကျင်းပသွားမည်ဖြစ်ကာ ကျင်းပမည့်ရက်အား ကြိုတင်အသိပေးကြေညာသွားမည်ဖြစ်ကြောင်း သိရသည်။
နတ်စင်တရာဆရာတော်ကြီးသည် အစာအိမ်သွေး ကြောပေါက်ရောဂါအား ကုသမှုခံယူနေစဥ် ပျံလွန်တော်မူခဲ့ခြင်းဖြစ်ပြီး ဆရာတော်ကြီးသည် ပျံလွန်တော်မူချိနထ်၌ သက်တော်(၇၆)နှစ်၊ ဝါတော်(၅၆)ဝါရှိပြီဖြစ်ကာလက်ရှိအချိန်တွင် ဆရာတော်ကြီး၏ ရုပ်ကလာပ်တော်အား ကျောင်းတိုက်သို့ပြန်လည်ပင့်ဆောင်ထားကြောင်း သိရသည်။

ရုရှားရဲ့ ဒီဇယ်စက်ရုံတွေကို ပစ်မှတ်ထားတိုက်တာတွေ ရပ်ဖို့ ယူကရိန်းကို ထရမ့်က ပြောကြား

ရုရှားရဲ့ ဒီဇယ်လောင်စာဆီတွေကို လေကြောင်းကနေ ပစ်မှတ်ထားတိုက်ခိုက်နေတာတွေ ရပ်တန့်ဖို့ အမေရိကန်သမ္မတ ဒေါ်နယ်ထရမ့်က ယူကရိန်းသမ္မတ ဇီလင်စကီးကို တိုက်တွန်းလိုက်ပါတယ်။ အဲဒီလိုတိုက်ခိုက်နေတာတွေက "ကမ္ဘာကြီးကို ထိခိုက်နစ်နာစေတယ်" လို့ သူက ဆိုပါတယ်။
​တနင်္ဂနွေနေ့က အိုင်ယာလန်နိုင်ငံကို တရားဝင်သွားရောက်တဲ့ ခရီးစဉ်အတွင်းမှာ ထရမ့်က "မစ္စတာဇီလင်စကီး လုပ်ရမယ့်အလုပ် တစ်ခုရှိတယ်။ အဲဒါက ရုရှားက ဒီဇယ်လောင်စာဆီတွေကို ပစ်မှတ်ထားနေတာကို ရပ်ဖို့ပါပဲ။ သူ့အနေနဲ့ တခြားပစ်မှတ်တွေကို တိုက်ချင်တိုက်ပါ၊ ဒီဇယ်ဆီတွေကိုတော့ မလုပ်ပါနဲ့။ ဘာလို့လဲဆိုတော့ သူက ဒီဇယ်ရှားပါးမှုကို ဖြစ်စေလို့ပါပဲ" လို့ ပြောခဲ့ပါတယ်။
​သူက ဆက်ပြီး "ဒါက အရှေ့အလယ်ပိုင်းကြောင့် ဖြစ်တာမဟုတ်ဘူး၊ ရုရှားနဲ့ ယူကရိန်းကြားမှာ ဖြစ်နေတဲ့ ကိစ္စတွေကြောင့် ဖြစ်ရတာပါ" လို့လည်း သူကဆိုပါတယ်။
​အမေရိကန်၊ အီရန်နဲ့ အစ္စရေးတို့ အဓိကပါဝင်နေတဲ့ အီရန်စစ်ပွဲကြောင့် ကမ္ဘာ့စွမ်းအင်ဈေးနှုန်းတွေ ထိုးတက်နေချိန်မှာပဲ ထရမ့်ရဲ့ အခုလို မှတ်ချက်စကား ထွက်ပေါ်လာတာပါ။ ဒီအကျပ်အတည်းက ဟော်မုဇ်ရေလက်ကြားကနေ ဖြတ်သန်းသွားလာမှုတွေကို အထူးသဖြင့် ထိခိုက်စေခဲ့ပါတယ်။
​အရှေ့အလယ်ပိုင်းက တိုက်ပွဲတွေကြောင့် ရေရှည် ထောက်ပံ့မှုတွေ ပြတ်တောက်သွားနိုင်တယ်ဆိုတဲ့ စိုးရိမ်မှုတွေ မြင့်တက်လာတဲ့အတွက် ဒီတစ်ပတ်မှာ ကမ္ဘာ့ရေနံဈေးက တစ်စည်ကို ၁၀၈ ဒေါ်လာအထိ တက်သွားပါတယ်။ အမေရိကန်မှာလည်း ဒီဇယ်ဈေးတွေက စံချိန်တင်မြင့်တက်သွားပြီး ပြီးခဲ့တဲ့သောကြာနေ့က သမိုင်းတစ်လျှောက် ပထမဆုံးအကြိမ်အဖြစ် တစ်ဂါလံကို ၆ ဒေါ်လာကျော်အထိ ရောက်သွားခဲ့ပါတယ်။
​ရေကြောင်းထောက်လှမ်းရေးကုမ္ပဏီ Kpler ရဲ့ အဆိုအရ ရုရှားဟာ အမေရိကန်ပြီးရင် ကမ္ဘာပေါ်မှာ ဒီဇယ် ဒုတိယအများဆုံး ကမ္ဘာကိုတင်ပို့တဲ့ နိုင်ငံဖြစ်တယ်လို့ သိရပါတယ်။
​တစ်ဖက်မှာလည်း ရုရှားရော ယူကရိန်းပါ လေကြောင်းတိုက်ခိုက်မှုတွေကို ဆက်ပြီး အရှိန်မြှင့်နေကြပါတယ်။ တနင်္ဂနွေနေ့ မနက်ပိုင်းက ယူကရိန်းအနောက်မြောက်ပိုင်းက ပိုလန်နယ်စပ်အနီး ယဟိုဒင် (Yahodyn) မြို့မှာရှိတဲ့ ဓာတ်ဆီဆိုင်တစ်ဆိုင်ကို ရုရှားဒရုန်းတစ်စင်းက ဝင်တိုက်ခဲ့တယ်လို့ ယူကရိန်းအာဏာပိုင်တွေက ပြောပါတယ်။
​ဓာတ်ဆီဆိုင်တွေကို တိုက်ခိုက်ခံရတာတွေက အရမ်းကိုများလာတဲ့အတွက် ယူကရိန်းက လုပ်ငန်းစုတစ်ခုဆိုရင် မြို့တော် ကိယက်ဗ်မှာရှိတဲ့ သူတို့ရဲ့ ဓာတ်ဆီဆိုင်တွေမှာ တိုက်ခိုက်ခံရရင် ထိခိုက်မှုသက်သာအောင် သံဇကာတွေတောင် တပ်ဆင်လာကြပါပြီ။
အဲ​ဒီနောက်ဆုံးတိုက်ခိုက်မှုနဲ့ပတ်သက်ပြီး ယူကရိန်းဘက်က ချက်ချင်းဆိုသလို တုံ့ပြန်ခဲ့ပါတယ်။
​တိုက်ခိုက်ခံရပြီးနောက်မှာ နယ်စပ်ဂိတ်ကို ခဏပိတ်ထားခဲ့ရပေမယ့် တနင်္ဂနွေနေ့ ဒေသစံတော်ချိန် မနက် ၁၀ နာရီမှာတော့ ပုံမှန်အတိုင်း ပြန်ဖွင့်ပေးခဲ့ပါတယ်။

စမ်းချောင်းမြို့နယ်ရှိ Bar 4 U ဘီယာဆိုင်၌ Level 1 အဆင့်မီးလောင်မှုတွင် အမျိုးသား(၂)ဦးသေဆုံးခဲ့

ရန်ကုန်တိုင်း၊ စမ်းချောင်းမြို့နယ်ရှိ Bar 4 U ဘီယာဆိုင်၌ စက်တင်ဘာ ၁၃ ရက်ည ၈ နာရီ ၁၉ မိနစ်ခန့်က မီးလောင်မှုဖြစ်ပွားခဲ့ရာ Level 1 အဆင့်ဖြင့်ငြှိမ်းသတ်ခဲ့ရပြီး အမျိုးသား(၂)ဦးသေဆုံးခဲ့ကြောင်း သိရသည်။
စမ်းချောင်းမြို့နယ်၊ စမ်းချောင်းလမ်း၊ စမ်ချောင်းမြောက်ရပ်ကွက်ရှိ Bar 4 U ဘီယာဆိုင်တွင် ဝါယာရှော့ဖြစ်ရာမှ မီးလောင်မှုဖြစ်ပွားခဲ့ခြင်းဖြစ်ကာ မီးသတ်တပ်ဖွဲ့ဝင်များကငြှိမ်းသတ်ခဲ့ကြသော်လည်း ဆက် လက်လောင်ကျွမ်းနေသဖြင့် ည ၈ နာရီ ၂၄ မိနစ်၌ Level 1 အဆင့်ဖြင့်ငြှိမ်းသတ်ခဲ့ကြကြောင်း သိရသည်။
ည ၈ နာရီ ၄၅ မိနစ်တွင် မီးငြိမ်းသွားခဲ့ပြီး ရှင်းလင်းမှုများပြုလုပ်စဥ် ဆိုင်အပေါ်ထပ်(ထပ်ခိုး)ပေါ်နှင့် မီးဖိုခန်းအတွင်းတို့မှ ဆိုင်ဝန်ထမ်းအမျိုးသား(၂)ဦး ၏ ရုပ်အလောင်းများကိုတွေ့ရှိခဲ့ရကြောင်း သိရသည်။
ထိုသို့ တွေ့ရှိခဲ့ရသဖြင့် ရုပ်အလောင်းများအား လူမှုကူညီရေးအ သင်းဝင်များက ရန်ကုန်ပြည်သူ့ဆေးရုံကြီးသို့ပို့ဆောင်ပေးခဲ့ကြကြောင်း သိရသည်၊

သာကေတမြို့နယ်၌ AMI စနစ် အကောင်အထည်ဖော်ရန် Digital Smart Meter များပြောင်းလဲတပ်ဆင်ပေး

ရန်ကုန်တိုင်း၊ သာကေတမြို့နယ်၌ ယူနစ်ပျောက်ဆုံးမှုလျော့နည်းကျဆင်း​ရန်နှင့် AMI စနစ်အကောင်အထည်ဖော်ရန်တို့အတွက် ခရိုင်အစုအဖွဲ့ဖြင့် Digital Smart Meter များကိုပြောင်းလဲတပ်ဆင်ပေးလျက်ရှိကြောင်း သိရသည်။
ထိုသို့ ပြောင်းလဲတပ်ဆင်ပေးနေမှုများ၊ ၆၆/၃၃/၁၁ ကေဗွီ၊ ၃၀ အမ်ဗွီအေ MOGE GIS ဓာတ်အားခွဲရုံမှ ဓာတ်အားပို့လွှတ်ဖြန့်ဖြူးပေးနေမှုတို့ကို လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီးဦးအေးကျော်က စက်တင်ဘာ ၁၃ ရက်တွင်ကြည့်ရှုစစ်ဆေးခဲ့ကြောင်း သိရသည်။
သာကေတမြို့နယ်လျှပ်စစ်မန်နေဂျာရုံးမှတာဝန်ရှိသူများက အရှေ့ပိုင်းခရိုင်အတွင်းလုပ်ငန်းဆောင်ရွက်နေမှုများ၊ AMI စနစ်သုံး Digital Smart Meter များ လဲလှယ်ဆောင်ရွက်နေမှုများနှင့် ဆက်လက်ဆောင်ရွက်သွားမည့်အစီအစဉ်များအား ရှင်းလင်းတင်ပြခဲ့ကြကြောင်း သိရသည်။

တောင်ပံကစားသမား ပတ်ဒရိုနက်တိုကို ၂၀၃၂ ခုနှစ်အထိ သက်တမ်းတိုး

ချယ်လ်ဆီးအသင်းက ပေါ်တူဂီတောင်ပံကစားသမား ပတ်ဒရိုနက်တိုကို ၂၀၃၂ ခုနှစ်အထိ စာချုပ်သက်တမ်း တိုးခဲ့ပါတယ်။
နက်တို(၂၆ နှစ်)ဟာ ၂၀၂၄ ခုနှစ်မှာ ဝုလ်ဗ်အသင်းကနေ ချယ်လ်ဆီးအသင်းထံ ပြောင်းရွှေ့လာခဲ့တာဖြစ်တယ်။
၎င်းဟာ ချယ်လ်ဆီးအသင်းအတွက် ပြိုင်ပွဲစုံ ၁၀၈ ပွဲ ကစားထားပြီး အသင်းအတွက် သွင်းဂိုးနဲ့ ဂိုးဖန်တီးမှု နှစ်ရပ်ပေါင်း ဂိုး ၄၀ အထိ ရှိထားခဲ့ပါတယ်။
နက်တိုရဲ့မူလစာချုပ်ဟာ ၂၀၃၁ ခုနှစ်အထိဖြစ်ပြီး ချယ်လ်ဆီးအသင်းက နှစ်နှစ်သက်တမ်းတိုးခဲ့တာပါ။
၎င်းအနေနဲ့ ၂၀၂၅ ကွန်းဖရန့်လိဂ်နဲ့ ကလပ်ကမ္ဘာ့ဖလားချန်ပီယံအသင်းမှာ အဓိကအစိတ်အပိုင်းတစ်ခုအဖြစ် ပါဝင်ခဲ့ပါတယ်။
နည်းပြသစ် ရှာဘီအလွန်ဆိုလက်ထက်မှာ ပုံမှန်နေရာရနေပြီး အသင်းမှာ Wing Back နေရာ ကစားနေတာဖြစ်ပါတယ်။

ဝက်စ်ဟမ်းတိုက်စစ်မှူးဟောင်း အန်တိုနီယို ဝက်ဖို့ဒ်အသင်းထံ ပြောင်းရွှေ့

ဝက်စ်ဟမ်းတိုက်စစ်မှူးဟောင်း အန်တိုနီယိုဟာ လိဂ်ချန်ပီယံရှစ်ကလပ် ဝက်ဖို့ဒ်အသင်းထံ ပြောင်းရွှေ့ကြေးအလွတ်နဲ့ ရောက်ရှိခဲ့ပါတယ်။
အန်တိုနီယို(၃၆ နှစ်)ဟာ ၂၀၂၄ ခုနှစ် ဒီဇင်ဘာလ ၃ ရက်မှာ ဝက်စ်ဟမ်းအသင်းအတွက် နောက်ဆုံးကစားခဲ့တာဖြစ်တယ်။
အဲဒီနောက် လေးရက်အကြာမှာ ယာဉ်မတော်တဆဖြစ်ပြီး ခြေထောက်ကျိုးခဲ့ပါတယ်။
ကာတာကလပ် Al-Sailiya အသင်းအတွက် ဧပြီလမှာ နောက်ဆုံးကစားခဲ့ပြီး စုစုပေါင်း လေးပွဲသာ ရှိခဲ့ပါတယ်။
၎င်းဟာ ပြီးခဲ့တဲ့လကတည်းက ဝက်ဖို့ဒ်အသင်းမှာ လေ့ကျင့်ခန်းဆင်းနေပြီး အခုတစ်နှစ်စာချုပ်နဲ့ ခေါ်ယူခံခဲ့ရတာဖြစ်တယ်။
အန်တိုနီယိုဟာ ဝက်ဖို့ဒ်အသင်းမှာ ကျောနံပါတ် ၁၈ ဝတ်ဆင်မှာဖြစ်ပြီး အသင်းရဲ့ အခုနွေရာသီ ၁၂ ဦးမြောက် ခေါ်ယူမှု ဖြစ်ခဲ့ပါတယ်။
ဝက်ဖို့ဒ်အသင်းဟာ အခုရာသီ လိဂ်ချန်ပီယံရှစ်မှာ အဆင့် ၁၂ နေရာ ရောက်နေပြီး နှစ်ပွဲနိုင်၊ နှစ်ပွဲသရေ၊ နှစ်ပွဲရှုံးထားပါတယ်။

ဂျော်အိုပတ်ဒရိုဟာ ဘန်ဇီမာနဲ့ ကစားပုံဆင်ပြီး ဟာလန်းလောက် ကောင်းတယ်လို့ အလွန်ဆို သုံးသပ်

ချယ်လ်ဆီးအသင်းနည်းပြ ရှာဘီအလွန်ဆိုက အသင်းတိုက်စစ်မှူး ဂျော်အိုပတ်ဒရိုဟာ ဘန်ဇီမာနဲ့ ကစားပုံဆင်ပြီး ဟာလန်းလောက် ကောင်းတယ်လို့ သုံးသပ်ခဲ့ပါတယ်။
ဂျော်အိုပတ်ဒရို(၂၄ နှစ်)ဟာ အခုရာသီ ပရီးမီးယားလိဂ် ပထမဆုံးသုံးပွဲမှာ နှစ်ဂိုးသွင်းပြီး နှစ်ဂိုးဖန်တီး ပေးခဲ့တာပါ။
ဒါ့အပြင် ယမန်နေ့က ပရီးမီးယားလိဂ် တစ်လတာအကောင်းဆုံးကစားသမားဆုကို ပထမဆုံးအကြိမ် ဆွတ်ခူးခဲ့ပါတယ်။
ဟာလန်းနဲ့ နှိုင်းယှဉ်နိုင်သလားလို့ မေးခွန်းထုတ်မှုကို အလွန်ဆိုက ''ဟုတ်ပါတယ်လို့ပဲ ကျွန်တော် ပြောပါရစေ။ ပရီးမီးယားလိဂ်မှာရှိတဲ့ ထိပ်တန်းတိုက်စစ်မှူးတွေကို ရေတွက်မယ်ဆိုရင် ဂျော်အိုက အဲဒီစာရင်းထဲပါမှာ သေချာပါတယ်။ ဟာလန်းလည်း သေချာပေါက်ပါပဲ။ ဒါကြောင့် သူ့ကို ဒီလိုနည်းလမ်းနဲ့ စံနှုန်းသတ်မှတ်တာဖြစ်ပါတယ်''လို့
ပြောခဲ့ပါတယ်။
ဂျော်အိုပတ်ဒရိုဟာ ပြီးခဲ့တဲ့နှစ်က ချယ်လ်ဆီးအသင်းနဲ့ ၂၀၃၄ ခုနှစ်အထိ စာချုပ်သက်တမ်းတိုးထားသူလည်း ဖြစ်တယ်။
၎င်းဟာ အခုရာသီအစမှာပဲ ကျောနံပါတ် ၉ ဝတ်ဆင်ပြီး ကစားနေတာဖြစ်ပါတယ်။

ပရီးမီးယားလိဂ် (၄)ပွဲဆက် စပါးအသင်းဂိုးပေါက်ပျောက်ခဲ့ပြီး ပရီးမီးယားလိဂ်သမိုင်းတစ်လျှောက် ဒုတိယမြောက်ရလဒ်အဆိုးအရွားဆုံးအသင်းအဖြစ်မှတ်တမ်းဝင်

နည်းပြ ဒီဇာဘီရဲ့ စပါးအသင်းဟာ ပရီးမီးယားလိဂ်အဖွင့် (၄)ပွဲဆက် ဂိုးပေါက်ပျောက်ဆုံးခဲ့ပြီး ပရီးမီးယားလိဂ်သမိုင်းတစ်လျှောက် ဒုတိယမြောက်ရလဒ်အဆိုးအရွားဆုံးအသင်းအဖြစ်မှတ်တမ်းဝင်ခဲ့ကြောင်း သိရပါတယ်။
စပါးအသင်းအနေနဲ့ အဖွင့်ပွဲမှာ ဘရန့်ဖို့ဒ်ကို (ဝ-၃)ဂိုးနဲ့ ရှုံးနိမ့်ခဲ့သလို၊ နယူးကာဆယ်အသင်းကိုလည်း (ဝ-၂)ဂိုးနဲ့ ရှုံးနိမ့်ပြီးနောက် နော်တင်ဟမ်၊ အဲဗာတန်တို့နဲ့ပွဲစဉ်တွေမှာ (ဝ-၀)ရလဒ်တွေ ထွက်ပေါ်ခဲ့ပါတယ်။
ပရီးမီးယားလိဂ်သမိုင်းတစ်လျှောက် ဂိုးပေါက်ပျောက်ဆုံးမှုရလဒ်အဆိုးအရွားဆုံးအသင်းကတော့ ခရစ္စတယ်ပဲလေ့စ်ဖြစ်ပြီး ၂၀၁၇-၁၈ ရာသီမှာ (၇)ပွဲဆက် ဂိုးပေါက်ပျောက်ဆုံးခဲ့တာပါ။
စပါးအသင်းအနေနဲ့ နောက်ဆုံးကစားခဲ့တဲ့ အဲဗာတန်နဲ့ပွဲမှာ ဂိုးပေါက်တည့်ကန်ချက် (၂)ကြိမ်သာရှိခဲ့ပြီး နည်းပြ ဒီဇာဘီအနေနဲ့လည်း အသင်းရဲ့တိုက်စစ်ကစားပုံနဲ့ပတ်သက်ပြီး ဝေဖန်မှုများစွာနဲ့ရင်ဆိုင်နေရပါတယ်။
လက်ရှိအချိန်မှာ စပါးအသင်းဟာ ရမှတ်(၂)မှတ်သာရရှိသေးပြီး အမှတ်ပေးဇယားအဆင့် (၁၇)နေရာမှာ ရပ်တည်နေပါတယ်။