ပိုလန်ကိုတင်ပို့တဲ့ မြန်မာဆန်ဖြူတန်ချိန် ၂၅၀ မှာ ပိုးမွှားအသေနဲ့ ပိုးမွှားအကြွင်းအကျန်တွေ့လို့ စျေးကွက်အတွင်း ရောင်းချခွင့်ပိတ်ခံရ

မြန်မာကနေ ပိုလန်နိုင်ငံကိုတင်ပို့ခဲ့တဲ့ ဆန်ဖြူ တန်ချိန် ၂၅၀ မှာ ပိုးမွှားအသေတွေနဲ့ ပိုးမွှားအကြွင်းအကျန်တွေ တွေ့ရှိတဲ့အတွက် ဈေးကွက်အတွင်း ဖြန့်ချီရောင်းချခွင့်ကို ပိုလန်က ပိတ်ပင်လိုက်တယ်လို့ သိရပါတယ်။
ပိုလန်နိုင်ငံ၊ ဂဒန်းစ်ခ်မြို့ (Gdansk) ကို တင်သွင်းလာတဲ့ မြန်မာ့ ဆန်ဖြူတန်ချိန် ၂၅၀ ထဲမှာ တွေ့ရှိခဲ့ရတာဖြစ်ကြောင်း ၊ ဖြန့်ချီရောင်းချခွင့်ပိတ်ဖို့ ပိုလန်နိုင်ငံ စိုက်ပျိုးရေးနှင့် အစားအသောက်အရည်အသွေး စစ်ဆေးရေးအာဏာပိုင်အဖွဲ့ (IJHARS) ဆုံးဖြတ်ချက်ချပြီး စက်တင်ဘာ ၁၀ ရက်မှာ ထုတ်ပြန်ခဲ့တာ ဖြစ်ပါတယ်။
စစ်ဆေး တွေ့ရှိခဲ့တဲ့ ပိုးမွှားအမျိုးအစားနဲ့ပတ်သက်လို့ အသေးစိတ်ဖော်ပြထားတာမျိုးမရှိပေမယ့် IJHARS ရဲ့ဆုံးဖြတ်ချက်က ချက်ခြင်းအကျိုးသက်ရောက်မှုရှိလို့ အဲဒီဆန်တန်တွေဟာ ပိုလန်စျေးကွက်အတွင်း ရောင်းချနိုင်ခြင်း မရှိတော့ဘူးလို့ သိရပါတယ်။
ဒီကိစ္စနဲ့ပတ်သက်ပြီး မြန်မာနိုင်ငံ ဆန်စပါးအသင်းချုပ် MRF မှတာဝန်ရှိသူ တယောက်က "သတင်းမှာ ပါတာ တွေ့ပါတယ်၊ အသေးစိတ် ပြန်လေ့လာရပါဦးမယ်။ ပိုးမွှား အသေတွေ့တာ နဲ့ ဆေး ဓါတ်ကြွင်းတွေ့တာ ကိုပဲ ဖော်ပြထားတာ ဖတ်မိတယ်။ ထိုင်းစပါယ်ဆန် တန် ၄၀ မှာလည်း ယခုဖြစ်စဉ်လို ဖြစ်ကြောင်း အဲ့ဒီသတင်းမှာ တွေ့ရ။ ပိုလန် မှာ သူတို့ရဲ့ဘယ်ကုမ္ပဏီက ရောင်းတာ၊ ဖြန့်တာလဲ။ အဲဒီ ဆန် တွေ ဘယ်အချိန် ထဲက ရောက်နေတာလဲ။အချိန် ဘယ်လောက် ကြာနေပြီလဲ ဆိုတဲ့ အချက်တွေ မတွေ့ရဘူး ။MRF အနေနဲ့ လိုအပ်တဲ့ စုံစမ်းလေ့လာမှု လုပ်ပြီး သတင်းပြန်ထုတ်ပေးပါမယ်။ " လို့ ပြောပါတယ်။
အရင် ဇူလိုင်လကလည်း ထိုင်းနိုင်ငံမှ ပိုလန်ကို တင်သွင်းလာတဲ့ အော်ဂဲနစ်စံပယ်ဆန် တန်ချိန် ၄၀ ကို ထုတ်ကုန်အညွှန်းစာတမ်းများ မှန်ကန်မှုမရှိဘူးဆိုပြီး IJHARS က ပိုလန်ဈေးကွက်အတွင်း ရောင်းချခွင့် ပိတ်ပင်ခဲ့တယ်လို့ သိရပါတယ်။
ပိုလန်နိုင်ငံဟာ မြန်မာ့ ဆန်ကို ဝယ်ယူမှုအများဆုံးနိုင်ငံ ၁၀ နိုင်ငံထဲက နိုင်ငံတခုဖြစ်ပြီး ဒီ၂၀၂၆ - ၂၀၂၇ ခုနှစ် ဘဏ္ဍာနှစ် ငါးလအတွင်းမှာဆိုရင် ဆန်တန်ချိန် ၃၀၀၀၀ ​ကျော်ကို မြန်မာကနေ ဝယ်ယူခဲ့တာကို MRF ရဲ့အချက်အလက်အရ သိရပါတယ်။
" ဆန်ကို ဝယ်လိုအားအကောင်းဆုံးက ဖိလစ်ပိုင် ။ အဲဒီနောက်မှာ ပိုလန်က ဒုတိယအများဆုံးဖြစ်လိုက် ၊ တတိယ ဖြစ်လိုက်ရှိနေတာ။ အခု ဒီရောင်းချခွင့်ပိတ်ခံရတဲ့ တန် ၂၅၀ နဲ့ပတ်သက်လို့ MRF တောင်မသိသေးဘူး ဆိုတော့ ဘယ်လိုဖြစ်လာနိုင်မလဲ မသိနိုင်ဘူး။ ကိုယ့်ဆီကပို့လိုက်တဲ့ဆန်က ပိုးသတ်ဆေးတွေ့တယ်ဆိုတော့ ဘာပဲဖြစ်ဖြစ် နာမည်ပျက်တာပေါ့။ သေချာစနစ်တကျ စစ်ဆေးဖို့တွေလိုနေတဲ့သဘောပဲ ။ " လို့ ဆန်ကုန်သည် တယောက်က ပြောပါတယ်။
ဒီဘဏ္ဍာနှစ်မှာ မြန်မာ့ဆန် ၊ဆန်ကွဲ ပြည်ပကိုဆန်တင်ပို့မှုအနေနဲ့ ကုမ္ပဏီပေါင်း ၅၀ နီးပါးက ပိုလန် ၊ ဖိလစ်ပိုင် ၊ တရုတ် အပါအဝင် ပြည်ပနိုင်ငံတွေကို တန်ချိန် ၈၄၈၂၇၈ တင်ပို့ခဲ့ပြီး အမေရိကန်ဒေါ်လာ ၂၉၁ သန်း ရရှိခဲ့တယ်လို့ သိရပါတယ်။

အခွန်မဆောင်ရတဲ့ မြေကွက်တွေကို ရင်းနှီးမြုပ်နှံ‌သူတွေ စိတ်ဝင်စားနေ

အိမ်ခြံမြေ အရောင်းအဝယ် အခွန်သစ်စနစ် စတင်ကျင့်သုံးပြီးနောက် ဝယ်ယူသူတွေနဲ့ ရင်းနှီး မြှုပ်နှံသူတွေအနေနဲ့ ရောင်းခွန်၊ ဝယ်ခွန် မဆောင်ရတဲ့ မြေကွက်တွေကို ပိုပြီး စိတ်ဝင်စားလာကြတယ်လို့ အိမ်ခြံမြေအကျိုးဆောင်တွေက ပြောပါတယ်။
စက်တင်ဘာ ၁ ရက်မှစတင်ကာ အိမ်ခြံမြေနဲ့ တိုက်ခန်းတွေ ရောင်းဝယ်ရာမှာ ရောင်းသူရော ဝယ်သူပါ အခွန်ပေးဆောင်ထားတဲ့ အထောက်အထား ပြသနိုင်မှသာ မှတ်ပုံတင် စာချုပ်ချုပ်ဆိုခြင်းနဲ့ အမည် ပြောင်းလဲခြင်းတွေကို ဆောင်ရွက်ပေးတော့မယ်လို့ ပြည်တွင်းအခွန်များဦးစီးဌာနက ထုတ်ပြန်ထားပါတယ်။
ဒါကြောင့် ဝယ်ယူသူတွေနဲ့ ရင်းနှီး မြှုပ်နှံသူတွေအနေနဲ့ ဂရမ်အမည်ပေါက် ပြောင်းလဲလို့မရတဲ့ ပါမစ်မြေ၊ စလစ်မြေနဲ့ ရွာမြေတွေအပေါ် အရင်ကထက်ပိုပြီး စိတ်ဝင်စားလာကြတယ်လို့ သိရပါတယ်။
“ပါမစ်မြေ၊ စလစ်မြေနဲ့ ရွာမြေ ဆိုတာမှာလည်း ဝယ်သူတွေက ရွာမြေတွေကို ပိုပြီး စိတ်ဝင်စားကြတာ တွေ့ရတယ်။ အထူးသဖြင့် မြို့ပြနဲ့ အလှမ်းဝေးတဲ့ ရွာမြေတွေကို ပိုပြီး စိတ်ဝင်စားလာကြတယ်။ ဈေးကလည်း တခြား မြေကွက်တွေထက်စာရင် သက်သာတယ်လေ။ အရင်းအနှီးမများဘူး။ သိန်းဆယ်ဂဏန်း၊ ရာဂဏန်းလောက်ပဲ ရှိတတ်တယ်” လို့ အိမ်ခြံမြေ အကျိုးဆောင်တယောက်က ပြောပါတယ်။
လက်ရှိမှာ တချို့သော တိုက်ခန်းတွေဟာ ပေါင်နှံထားတာ၊ အရောင်းထပ်နေတာတွေ ရှိတတ်တာကြောင့် အရှုပ်အထွေး အလွန်များတဲ့အတွက် ဝယ်သူတွေအနေနဲ့ မြေကွက်ပိုင်းဆိုင်ရာမှာ ရင်းနှီးမြှုပ်နှံမှုတွေ ပိုပြီး အားသန်လာကြတယ်လို့ သူက ပြောပါတယ်။
အိမ်ခြံမြေ အရောင်းအဝယ် အခွန်သစ်စနစ်အရ ရောင်းချတဲ့ အခြေပစ္စည်း ဖြစ်တဲ့ အိမ်၊ ခြံ၊ မြေနဲ့ အဆောက်အအုံရဲ့ ကာလတန်ဖိုးကို ရာဖြတ်အဖွဲ့ လို့ ခေါ်တဲ့ ကာလတန်ဖိုး စိစစ်သတ်မှတ်ရေးအဖွဲ့က သတ်မှတ်ကာ အမြတ်ငွေ ၁၀ ရာခိုင်နှုန်း ကောက်ခံမှာဖြစ်ပြီး ဒါဟာ ၂၀၂၆ ခုနှစ်၊ ပြည်ထောင်စု အခွန်အကောက်ဥပဒေမှာ ပြဋ္ဌာန်းပြီးဖြစ်တယ်လို့ သိရပါတယ်။
ရန်ကုန်တိုင်းထဲက မြို့နယ်၊ ရပ်ကွက်အလိုက် မြေရဲ့ ၁ စတုရန်းပေ တန်ဖိုးကို ရာဖြတ်အဖွဲ့က သတ်မှတ်ပေးထားပြီး အဲဒီ သတ်မှတ်တဲ့ဈေးက ရောင်းသူ မူလဝယ်ထားတဲ့ဈေးထက် များနေမယ်ဆိုပါက အမြတ်ထွက်တယ်လို့ အခွန်ဦးစီးဌာနက သတ်မှတ်ထားပါတယ်။
အဲဒီ အမြတ်ငွေကို ပွဲစားခ၊ ရွှေ့ပြောင်းခ၊ ပြင်ဆင်စရိတ်နှုတ်ပြီး ကျန်တဲ့ အမြတ်ငွေရဲ့ ၁၀ ရာခိုင်နှုန်းကို အခွန်ဆောင်ရမယ်လို့ အခွန်ဦးစီးဌာနက ထုတ်ပြန်ထားပါတယ်။

မန္တလေးလေဆိပ်ရဲ့ လုပ်ငန်းဆောင်ရွက်မှုတွေ ပုံမှန်အတိုင်း ပြန်လည်စတင်

မန္တလေး အပြည်ပြည်ဆိုင်ရာလေဆိပ်ရဲ့ လုပ်ငန်း ဆောင်ရွက်မှုတွေကို မနေ့ စက်တင်ဘာ ၁၁ ရက်၊ ညနေ ၄ နာရီဝန်းကျင်ကနေစပြီး ပုံမှန်အတိုင်း လုပ်ငန်းပြန်လည် လည်ပတ်နေပြီလို့ သိရပါတယ်။
ဒါအပြင် Air Thanlwin လေကြောင်းလိုင်းကလည်း ဒီကနေ့ စက်တင်ဘာ ၁၂ ရက်နေ့မှာ အနီးစခန်းလေဆိပ် (ပြင်ဦးလွင်) ကို အစားထိုး ပျံသန်းပြေးဆွဲမယ့် ခရီးစဉ်တွေကို မန္တလေး အပြည်ပြည်ဆိုင်ရာ လေဆိပ်မှာသာ မူလ သတ်မှတ်ထားတဲ့ ပုံမှန်အချိန်၊ ပုံမှန်ခရီးစဉ်တွေအတိုင်း ပြန်လည် ဝန်ဆောင်မှုပေးမယ်လို့ အသိပေးထားပါတယ်။
“ခရီးစဉ်တွေကို ဒီနေ့ကစပြီး ပုံမှန်အတိုင်း ပြန်ပြေးဆွဲသွားမှာပါ။ ခရီးစဉ်အချိန် အပြောင်းအလဲတွေ ရှိနိုင်တဲ့အတွက် လေယာဉ်လက်မှတ် ဝယ်ယူထားတဲ့ ခရီးသည်တွေအနေနဲ့ ကိုယ်ဝယ်ယူထားတဲ့ လက်မှတ်အရောင်း Agent တွေနဲ့ ပြန်လည်စစ်ဆေးပေးကြဖို့ လိုပါတယ်” လို့ လေဆိပ်နဲ့ နီးစပ်သူက ပြောပါတယ်။
မြန်မာအမျိုးသားလေကြောင်းလိုင်း (MNA) ကလည်း ဒီကနေ့ကစပြီး မန္တလေးနဲ့ ဆက်စပ်ပျံသန်းလျက်ရှိတဲ့ ခရီးစဉ်တွေကို ပုံမှန်အတိုင်း ပြန်လည်ပြေးဆွဲသွားမှာဖြစ်ပြီး မိမိတို့ထုတ်ထားပြီး လက်မှတ်တွေကို မူလအတိုင်း ပြန်လည်ပြင်ဆင်ပြီးဖြစ်လို့ ခရီးသည်တွေအနေနဲ့ ၀င်ရောက် ကြည့်ရှုနိုင်ပြီလို့ ကြေညာထားပါတယ်။
ဒါနဲ့ပတ်သက်လို့ ပြည်သူတယောက်က “အခုလို ပြန်ဖွင့်လိုက်တာ တကယ်ဝမ်းသာတယ်။ ပြင်ဦးလွင်နဲ့ မန္တလေးကို အဆင့်ဆင့်သွားရတာ မသက်သာဘူး။ လိုင်းကားလည်း မရှိတော့ ကားကို စင်းလုံးငှားရတာ” လို့ ပြောပါတယ်။
မန္တလေးလေဆိပ် (တံတားဦး) အနီးဝန်းကျင်မှာ ပြီးခဲ့တဲ့ စက်တင်ဘာ ၁၀ ရက်၊ မွန်းလွဲ ၂ ဝန်းကျင်က အသေခံဒရုန်းတွေ ကျရောက်ခဲ့တာကြောင့် လေဆိပ်ရဲ့ ခရီးသည်တင် လေကြောင်းတချို့ ယာယီရပ်ထားခဲ့ရတာ ဖြစ်ပါတယ်။
ဒရုန်း တိုက်ခိုက်ခံရပြီးနောက် မန္တလေးလေဆိပ်ကို ဆင်းသက်မယ့် တာချီလိတ်၊ မြစ်ကြီးနား၊ ဟုမ္မလင်း စတဲ့ ပြည်တွင်းလေယာဉ်တွေဟာ ခရီးစဉ်တွေကို နောက်ကြောင်း ပြန်ခေါက်ကာ မူလပျံတက်လာရာ လေဆိပ်တွေမှာ ပြန်လည်ဆင်းသက်ခဲ့ရတယ်လို့ သိရပါတယ်။
ဒရုန်းတိုက်ခိုက်ခံရမှုနဲ့ ပတ်သက်လို့ အစိုးရက သတင်း ထုတ်ပြန်ထားတာမှာ တံတားဦး အပြည်ပြည်ဆိုင်ရာ လေဆိပ်ကို FPV Suicide Drone ခြောက်စင်းနဲ့ တိုက်ခိုက်ရန် ကြိုးပမ်းမှုကို လုံခြုံရေးတပ်ဖွဲ့တွေက ဟန့်တားနိုင်ခဲ့တယ်လို့ အသိပေးထားပါတယ်။
ပြည်သူတွေ အန္တရာယ်ကင်းရှင်းရေးအတွက် ဒရုန်းယာဉ်တွေမှာပါရှိတဲ့ ဖောက်ခွဲရေးပစ္စည်းတွေကို စနစ်တကျ သက်မဲ့ ပြုလုပ်နိုင်ခဲ့ပြီး ဒီဖြစ်စဉ်ကြောင့် ပြည်တွင်း လေကြောင်းလိုင်းတချို့ ယာယီ ရပ်ဆိုင်းခဲ့ရပေမယ့် လူ၊ ယာဉ်နဲ့ လေယာဉ်ပြေးလမ်းတွေ ထိခိုက်ပျက်စီးမှု မရှိခဲ့ဘူးလို့ ထုတ်ပြန်ချက်မှာ ဖော်ပြထားပါတယ်။

တရုတ်နယ်စပ် ဘက်မှာ ဖမ်းဆီးခံထားရတဲ့ အထောက်အထားမဲ့ မြန်မာနိုင်ငံသားတွေ ရွှေ အပါအဝင် ပစ္စည်းတွေကို ဒဏ်ကြေး အနေနဲ့ သိမ်းဆည်းခံရ

တရုတ်နယ်စပ် ဘက်မှာ ဖမ်းဆီးခံထားရတဲ့ အထောက်အထားမဲ့ မြန်မာနိုင်ငံသားတွေ ရွှေ အပါအဝင် ပစ္စည်းတွေကို ဒဏ်ကြေး အနေနဲ့ သိမ်းဆည်းခံရကြောင်း ဖမ်းဆီးခံရပြီး မြန်မာဘက် ပြန်လည် ပို့ဆောင်ခံရသူတွေဆီက သိရပါတယ်။
"အမှုပေါ် မူတည်ပြီး ဒဏ်ကြေးငွေက မတူဘူး။ မြန်မာနိုင်ငံသားတွေက ပိုက်ဆံ မပေးနိုင်လို့ ရွှေ၊ ငွေ၊ ဖုန်း တွေသိမ်းတာ။ မှတ်ပုံတင်တွေပါ ပြန်မရဘူး" လို့ မိန်းကလေး တယောက်က ပြောပါတယ်။
ခိုးပေါက်ကနေ ဝင်သူတွေ၊ အထောက် အထားမဲ့ နေထိုင်သူတွေ၊ ပြစ်မှု ကျူးလွန်သူတွေ စသဖြင့် အမှုပေါ် မူတည်ပြီး ဒဏ်ကြေးငွေ မတူဘူးလို့ ဆိုပါတယ်။
"တရုတ် အစိုးရ ဝန်ထမ်းတွေ ဆိုရင်တော့ တရုတ်ငွေ သိန်းရာချီ ဒဏ်ရိုက်တယ်။ မြန်မာနိုင်ငံသား အများစုက ပိုက်ဆံတွေ မပါကြဘူးလေ။ မိသားစုလည်းမရှိကြတော့ ရှိတဲ့ဟာသိမ်းပစ်တာ" လို့ နောက်ထပ် အမျိုးသမီး တယောက်ကလည်း ပြောပါတယ်။
အများစုက မှတ်ပုံတင်လို အရေးကြီးတဲ့အထောက်အထားတွေကို လူပွဲစားတွေက သိမ်းယူလိုက်ပြီး ပြန်မပေးတာလို့ သူက ပြောပါတယ်။
ခိုးပေါက်ကနေ ပွဲစားနဲ့ ညဝင်ရောက်သူတွေနဲ့ တရုတ်မယား အဖြစ် ရောင်းစားဖို့ လိမ်လည် ဖျားယောင်းခံရသူတွေက လက်ရှိ မူဆယ် နယ်စပ်အထိ ပြည်တော်ပြန် အဖြစ်ပြန်လည် ပို့ဆောင်ခံရပေမယ့် မှတ်ပုံတင် မရှိတော့တာကြောင့် နေရပ် ပြန်လို့မရပဲ အခက်ကြုံကာ မူဆယ်မှာ သောင်တင် ဒုက္ခ ရောက်နေကြရတယ်လို့ ဆိုပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - စက်တင်ဘာ ၁၂ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၃၄၉ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၇,၁၅၀,၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၁၂၀,၀၀၀ ကျပ်
ဝယ်ဈေး ၁၀,၀၈၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၇၂၀,၀၀၀ ကျပ်
ဝယ်ဈေး ၉,၆၈၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၀၀၀,၀၀၀ ကျပ်
ဝယ်ဈေး ၉,၉၆၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၆၀၀,၀၀၀ ကျပ်
ဝယ်ဈေး ၉,၅၆၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၃၇၅ ကျပ်
ဝယ်ဈေး - ၄၂၆၀ ကျပ်
-စင်္ကာပူဒေါ်လာ
ရောင်းဈေး - ၃၄၄၅ ကျပ်
ဝယ်ဈေး - ၃၃၅၂ ကျပ်
-ယူရို
ရောင်းဈေး - ၅၀၇၅ ကျပ်
ဝယ်ဈေး - ၄၉၄၅ ကျပ်
-ထိုင်းဘတ်
ရောင်းဈေး - ၁၃၂.၅ ကျပ်
ဝယ်ဈေး - ၁၂၈.၉ ကျပ်
-မလေးရှားရင်းဂစ်
ရောင်းဈေး - ၁၀၇၅ ကျပ်
ဝယ်ဈေး - ၁၀၄၇ ကျပ်
-တရုတ်ယွမ်
ရောင်းဈေး - ၆၅၂ ကျပ်
ဝယ်ဈေး - ၆၃၅ ကျပ်
-ဂျပန်ယန်း
ရောင်းဈေး - ၂၇.၉၄ ကျပ်
ဝယ်ဈေး - ၂၇.၂၃ ကျပ်
-အိန္ဒိယရူပီး
ရောင်းဈေး - ၄၅.၈၁ ကျပ်
ဝယ်ဈေး - ၄၄.၆၃ ကျပ်
-ကိုရီးယားဝမ်
ရောင်းဈေး - ၃.၂၁ ကျပ်
ဝယ်ဈေး - ၃.၁၃ ကျပ်
-စတာလင်ပေါင်
ရောင်းဈေး - ၅၉၀၄ ကျပ်
ဝယ်ဈေး - ၅၇၅၅ ကျပ်
-ဩစတြေးလျဒေါ်လာ
ရောင်းဈေး - ၃၁၃၀ ကျပ်
ဝယ်ဈေး - ၃၀၅၁ ကျပ်
-ကနေဒါဒေါ်လာ
ရောင်းဈေး - ၃၁၅၅ ကျပ်
ဝယ်ဈေး - ၃၀၇၅ ကျပ်
-ဟောင်ကောင်ဒေါ်လာ
ရောင်းဈေး - ၅၅၈ ကျပ်
ဝယ်ဈေး - ၅၄၄ ကျပ်
-ယူအေအီး
ရောင်းဈေး - ၁၁၉၂ ကျပ်
ဝယ်ဈေး - ၁၁၆၁ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
****************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ