ပဲခူးတိုင်းဒေသကြီး တတိယအကြိမ် လွှတ်တော်အစည်းအဝေးကို မတ်လ ၂၀ ရက်တွင် စတင်ကျင်းပမည်

ပဲခူးတိုင်းဒေသကြီး လွှတ်တော် တတိယအကြိမ် ပထမပုံမှန် အစည်းအ​ဝေးကို မတ်လ ၂၀ ရက်တွင် အစီအစဉ် (၁၈)ရပ်ဖြင့် စတင်ကျင်းပသွားမည်ဖြစ်ကြောင်း သိရသည်။

တတိယအကြိမ် ပဲခူးတိုင်းဒေသကြီး လွှတ်တော် မိတ်ဆက်အခမ်းနားကိုလည်း ယမန်နေ့က တိုင်းဒေသကြီး လွှတ်တော်ရုံး အစည်းအဝေးခန်းမတွင် ကျင်းပခဲ့ကြောင်းလည်း သိရသည်။

လွှတ်တော် ၏ တာဝန်များဖြစ်သည့် ဥပဒေပြုခြင်း၊ ပြည်သူလူထုကို ကိုယ်စားပြုခြင်း၊ စောင့်ကြည့်ထိန်းသိမ်းခြင်း စသည်တို့ကို ပြည်သူများ ထိထိရောက်ရောက်အကျိုးခံစားနိုင်စေရေး ကြိုးပမ်းဆောင်ရွက်သွားရမည်ဖြစ်ကြောင်း တိုင်းဒေသကြီးဝန်ကြီးချုပ် ဦးမျိုးဆွေဝင်း ကပြောကြားခဲ့သည်။

ပြည်သူတို့ တို့၏ မျှော်လင့်ချက်ကို လွှတ်တော်က ဖော်ဆောင်သည့်အတိုင်း လွှတ်တော်ကိုယ်စားလှယ်များ အားလုံးက ပူးပေါင်းဆောင်ရွက်ရမည်ဖြစ်ပြီး လွှတ်တော်၏ အဓိကလုပ်ငန်းစဉ် ၃ ရပ်ကိုလည်း ပြည်သူများ စိတ်ဝင်တစားပူးပေါင်းလာသည့်နှင့် အမျှ အားကောင်းပြီး ထိရောက်သည့် လွှတ်တော်တစ်ရပ်အဖြစ် ဖော်ဆောင်နိုင်မည်ဖြစ်ကြောင်းလည်း တိုင်းဒေသကြီး ဝန်ကြီးချုပ် ဦးမျိုးဆွေဝင်းက ပြောသည်။

ထို့နောက် တိုင်းဒေသကြီးလွှတ်တော်ကိုယ်စားလှယ်များက မိတ်ဆက်ခဲ့ပြီး လွှတ်တော် ပထမပုံမှန်အစည်းအဝေးကျင်းပမှုပုံစံနှင့် ရွေးချယ်တင်မြှောက်ခြင်းဆိုင်ရာ လုပ်ငန်းစဉ်များကိုလည်း ရှင်းလင်းခဲ့ကြောင်း သိရသည်။

မန္တလေးတိုင်းနှင့် တနင်္သာရီတိုင်းဒေသကြီး တို့တွင် ရင်းနှီးမြှုပ်နှံမှုကော်မတီ အစည်းအဝေးကျင်းပ

ပြည်သူများနှင့် သဘာဝပတ်ဝန်းကျင်အပေါ် အကျိုးသက်ရောက်မှုကောင်းများရှိစေသည့် ရင်းနှီးမြှုပ်နှံမှုများ ဖိတ်ခေါ်

မန္တလေးတိုင်းဒေသကြီးရင်းနှီးမြှုပ်နှံမှုကော်မတီ အစည်းအဝေးကို ယမန်နေ့က ကျင်းပခဲ့ကြောင်း သိရသည်။

ရင်းနှီးမြှုပ်နှံမှုများအား ပြည်သူများ နှင့် သဘာဝပတ်ဝန်းကျင်အပေါ် အကျိုးသက်ရောက်မှုကောင်းများရှိစေသည့် ရင်းနှီးမြှုပ်နှံမှုများကို အားပေးမြှင့်တင့်ကာ ကာလတို ကာလလတ် အစီအမံများချမှတ်ဖိတ်ခေါ်ဆောင်ရွက်နေကြောင်းလည်း သိရသည်။

ဥပဒေလုပ်ထုံးလုပ်နည်းနှင့်အညီ စိစစ်ခွင့်ပြုနေပြီး တင်ပြလျှောက်ထားလာမှုနှင့် မြေပြင်တွင် အမှန်တကယ် လုပ်ငန်းလုပ်ကိုင်ဆောင်ရွက်မှုများနှင့် ကိုက်ညီရန် လိုအပ်ကြောင်း မန္တလေးတိုင်းဒေသကြီး ဝန်ကြီးချုပ် ဦးမျိုးအောင်က ပြောသည်။

ဈေးကွက်စီးပွားရေးစနစ်ဖြစ်သည့်အတွက် ဈေးကွက်ဖွံဖြိုးရေး အသစ်ရရှိရေးနှင့် ဈေးကွက်ချဲ့ထွင်နိုင်ရေးအတွက် အားလုံးကြိုးပမ်းဆောင်ရွက်ရမည်ဖြစ်ကြောင်းလည်း မန္တလေးတိုင်းဝန်ကြီးချုပ် ဦးမျိုးအောင် ကပြောကြားခဲ့ကြောင်း သိရသည်။

ထို့အတူ တနင်္သာရီတိုင်းဒေသကြီး ရင်းနှီးမြှုပ်နှံမှုကော်မတီအစည်းဝေးကိုလည်း ယမန်နေ့ ကကျင်းပခဲ့ပြီး တိုင်းဒေသကြီးဖွံ့ဖြိုးတိုးတက်ရေးအတွက် ရင်းနှီးမြှုပ်နှံမှုများ အရှိန်အဟုန်မြှင့်လုပ်ကိုင်ဆောင်ရွက်မည်ဖြစ်ကြောင်း တိုင်းဒေသကြီးဝန်ကြီးချုပ် ဦးမြတ်ကိုကပြောကြားခဲ့ကြောင်း သိရသည်။

တရားမဝင်ငွေကြေးများကို တရားဝင်ဘဏ် လုပ်ငန်းစနစ်အသုံးချပြီး လွှဲပြောင်း နေရာချထားမှု ဆောင်ရွက်ခြင်းကြောင့် နိုင်ငံစီးပွားရေတည်ငြိမ်မှုတို့ကို ထိခို-က်စေနိုင်

တရားမဝင်ငွေကြေးများကို တရားဝင်ဘဏ်လုပ်ငန်းစနစ် အသုံးချပြီး ငွေလွှဲပြောင်းခြင်း နေရာချထားခြင်း ဆောင်ရွက်ခြင်းတို့ကြောင့် နိုင်ငံ၏ စီးပွားရေး တည်ငြိမ်မှု၊ငွေရေးကြေးရေး ကဏ္ဍခိုင်မာမှုနှင့် ရင်းနှီးမြုပ်နှံမှုတို့ကို ထိခိုက်စေနိုင်ကြောင်း ဘဏ္ဍာရေးနှင့်အခွန်ဝန်ကြီးဌာန ပြည်ထောင်စုဝန်ကြီး ဒေါက်တာ ကံဇော်ကပြောသည်။

ထိုကြောင့် ကြီးကြပ်မှုအာဏာပိုင်များနှင့် တရားဥပဒေစိုးမိုးရေးအဖွဲ့အစည်းများ အနေဖြင့် ကဏ္ဍ အလိုက် အလေးထားကြီးကြပ်ဆောင်ရွက်ပြီး ထိရောက်စွာ ပူးပေါင်းဆောင်ရွက်ရန် လိုအပ်ကြောင်းလည်း ပြည်ထောင်စုဝန်ကြီး ကပြောကြားခဲ့ကြောင်း သိရသည်။

ယမန်နေ့က ကျင်းပသည့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံမှု တို-က်ဖျ-က်ရေးဆိုင်ရာ လုပ်ငန်းစွမ်းဆောင်ရည်မြှင့်တင်ရေးသင်တန်း ဖွင့်ပွဲတွင် ပြည်ထောင်စုဝန်ကြီး ကပြောကြားခဲ့ခြင်းလည်း ဖြစ်သည်။

ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတို-က်ဖျ-က်ရေးဆိုင်ရာ လုပ်ငန်းစဉ်များတွင် ဝန်ကြီးဌာန အောက်ရှိ ဌာနအလိုက်ပိုမိုထိရောက်စွာ ပူးပေါင်းအကောင်ထည်ဖော်ဆောင်ရွက်ရန် သင်တန်းဖွင့်လှစ်ခြင်းဖြစ်ကြောင်းလည်း သိရသည်။

သံသယဖြစ်ဖွယ် ငွေကြေးလွှဲပြောင်းမှု၊သတ်မှတ်ပမာဏထက်ကျော်လွန်၍ ငွေကြေးလွှဲပြောင်းမှုများကို စိစစ်ပြီး သတင်းပို့ချက် အစီရင်ခံစာများပေးပို့ခြင်း လုပ်ငန်းစဉ်များကို အချိန်မီဆောင်ရွက်ကြရန် လိုအပ်ကြောင်းလည်း ပြည်ထောင်စုဝန်ကြီး ကပြောကြားခဲ့ကြောင်း သိရသည်။

ထိုင်းလွှတ်တော်က မတ်၁၉ တွင် ဝန်ကြီးချုပ်အသစ်ကို မဲပေး ရွေးချယ်မည်

မတ်လ ၁၉ ရက်နေ့၏ လွှတ်တော်အစီအစဉ်တွင် ထိုင်းနိုင်ငံ၏ ဝန်ကြီးချုပ်သစ်ကို ရွေးကောက်တင်မြှောက်ရန် မဲပေးမည့် အစီအစဉ်ထည့်သွင်းသွားမည်ဟု မကြာခင်က လွှတ်တော်ဥက္ကဌအဖြစ် ခန့်အပ်ခံထားရသော ဆိုဖွန်ဆာရမ်က ပြောကြားခဲ့သည်။ တနင်္လာနေ့တွင် ၎င်းနှင့် ဒုတိယဥက္ကဌနှစ်ဦးကို တရားဝင်ခန့်အပ်သည့် ဘုရင့်အမိန့်ထွက်လာပြီးနောက် ၎င်းက ထိုသို့ပြောကြားခဲ့ခြင်းဖြစ်သည်။

နိုင်ငံသည် အကြပ်အတည်းများစွာနှင့် ရင်ဆိုင်နေရသောကြောင့် ဆောင်ခရန်ပွဲတော်မတိုင်မီ အပြည့်အဝအာဏာရှိသော အစိုးရတစ်ရပ်ကို သူ မြင်တွေ့လိုကြောင်း ဆိုဖွန်ဆာရမ်က ပြောကြားခဲ့သည်။

တော်ဝင်အမိန့်တော်အရ ဆိုဖွန်ကို အောက်လွှတ်တော်ဥက္ကဌ၊ မာလီကာ ဂျီရာပန်ဗန်နစ်ကို ဒုတိယဥက္ကဌ(၁)၊ လာ့တ်ဆက် ပတ်တနာချိုင်ကူလ်ကို ဒုတိယဥက္ကဌ(၂) အဖြစ် တရားဝင်ခန့်အပ်ခဲ့သည်။ မတ်လ ၁၅ ရက်နေ့ လွှတ်တော်မဲပေးမှုများအပြီးတွင် ခန့်အပ်မှုများလုပ်ခဲ့ပြီး တနင်္လာနေ့မွန်းလွဲပိုင်းတွင် တော်ဝင်အမိန့်တော်ကို လက်ခံရရှိသည့် အခမ်းအနားကို လွှတ်တော်၌ ကျင်းပခဲ့သည်။

ယခင်လွှတ်တော်က မပြီးပြတ်ခဲ့သော ဖွဲ့စည်းပုံအခြေခံဥပဒေပြင်ဆင်ရေး ကြိုးပမ်းမှုများနှင့် ပတ်သက်၍ မေးမြန်းရာတွင် လမ်းညွှန်ချက်ကို လာမည့်အစိုးရက ဦးစွာအတည်ပြုရမည်ဖြစ်ပြီး အစိုးရအဖွဲ့သစ်ကို တာဝန်ထမ်းဆောင်ရန် စောင့်ဆိုင်းရမည်ဟု ဆိုဖွန်က ပြောကြားခဲ့သည်။

Ref: သည်နေရှင်း

လားရှိုး၊ ကွတ်ခိုင်လမ်း ကုန်စည်စီးဆင်းမှု ပြန်ပွင့်

TNLA သိမ်းပိုက်ထားတဲ့ ကွတ်ခိုင်မြို့ကို ကိုးကန့်တိုင်းရင်းသားလက်ကိုင် တပ်ဖွဲ့က မနေ့ညပိုင်းမှာ သိမ်းပိုက်ခဲ့ပြီးနောက်ပိုင် လားရှိုးမြို့နဲ့ ကွတ်ခိုင် မြို့ကြားမှာ ဒီမနက်ပိုင်း ကုန်စည် စီးဆင်းမှုတွေ ပြန်ပွင့်လာပြီလို့ ဒေသခံ တွေထံကနေ သိရပါတယ်။

ပြီးခဲ့တဲ့ ဖေဖော်ဝါရီလကတည်းက ကွတ်ခိုင်တက်မယ့် ကုန်ကားတွေကို သိန္နီတိုး ဂိတ်ကနေ ကိုးကန့်တပ်ဖွဲ့က ပိတ်ဆို့ထားခဲ့တာဖြစ်ပါတယ်။
“ ဒီမနက်တော့ လမ်းတွေ ပြန်ပွင့်ဖွင့်ပေးလိုက်ပြီ။ ကွတ်ခိုင်၊ လားရှိုးတော့ ပုံမှန်သွားလာလို့ရပြီ။ ကုန်တွေလည်း ပြန်ပေးသွားတယ်လို့” ကွတ်ခိုင်မြို့ခံ တယောက်က ပြောပါတယ်။

တိုက်ပွဲကြောင့် ပိတ်နေတဲ့ ခရီးသည်ကားတွေကိုလည်း ပြန်ဖွင့်ပေးလိုက်ပြီလို့ သိရပါတယ်။
ကွတ်ခိုင်မြို့ထဲမှာတော့ အခြေအနေတွေ တည်ငြိမ်နေပြီး ဈေးဆိုင်တွေလည်း ပြန်ဖွင့် နေပြီလို့ သိရပါတယ်။

“ အခု ကွတ်ခိုင်မှာက ကိုးကန့်တဖွဲ့ပဲကျန်တယ်။ အခုတော့ အားလုံး ငြိမ်သွားပြီ။ လူတွေလည်း သွားလာနေကြပြီ။ ဘာတွေ ဆက်ဖြစ်အုံးမယ် တော့ မသိဘူးပေါ့။ စိုးရိမ်နေရတုန်းပဲ” လို့ ကွတ်ခိုင်မြို့ခံ နောက်တယောက်က ပြော ပါတယ်။

ပြီခဲ့တဲ့ ဖေဖော်ဝါရီလက ကွတ်ခိုင်မြို့မှာ CCTV တွေတပ်တာနဲ့ ပတ်သက်ပြီး ကိုးကန့်တပ်ဖွဲ့နဲ့ TNLA တို့ ပြဿနာ ဖြစ်ခဲ့ကြပါတယ်။

ဒီပြဿနာကို အခြေခံပြီး ကိုးကန့်တပ်ဖွဲ့က ကွတ်ခိုင်မြို့အတွင်း စားနပ်ရိက္ခာ သယ်ဆောင်ခွင့်တွေ ပိတ်ခဲ့ပြီး မြို့ပတ်လည်မှာ စစ်အင်အားတွေဖြည့်ခဲ့ပါတယ်။

အခုလ ၁၄ ရက်နေ့မှာတော့ ကိုးကန့်တပ်ဖွဲ့က ကွတ်ခိုင်မြို့ကို ဝင်ရောက် တိုက်ခိုက်ခဲ့ပြီး နောက် တရက်မှာပဲ ကွတ်ခိုင်မြို့ကို သိမ်းပိုက်ခဲ့တာ ဖြစ်ပါတယ်။

ဒီနေ့ညနေပိုင်းအထိ နမ့်ဖတ်ကာနဲ့ နမ့်ခမ်းကြားက ကျေးရွာတွေမှာ တိုက်ပွဲတွေ ဆက်ဖြစ်နေတယ်လို့ ဒေသခံတွေ ထံကနေသိရပါတယ်။

ယာဥ်စီးခ ပိုတောင်းတဲ့ CNG တက္ကစီတွေကို အရေးယူမယ်

စက်သုံးဆီအခက်အခဲ ဖြစ်ပေါ်နေချိန် အခွင့်ကောင်းယူပြီး ယာဥ်စီးခ ပိုတောင်းတဲ့ CNG တက္ကစီတွေကို အရေးယူသွားမှာ ဖြစ်တယ်လို့ စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်က မနေ့ မတ် ၁၅ ရက်က နေပြည်တော် စွမ်းအင်ဝန်ကြီးဌာနရုံးမှာ ပြုလုပ်တဲ့ လုပ်ငန်းညှိနှိုင်း အစည်းအဝေးမှာ သတိပေး ပြောဆိုခဲ့ပါတယ်။

“CNG တက္ကစီတွေနဲ့ ပတ်သက်လို့ ငှားရမ်းခ တိုးမြှင့် တောင်းခံတာတွေအတွက် တိုင်ကြားတာတွေ ရှိလာရင် CNG သုံးစွဲခွင့်စာရင်းကနေ ပယ်ဖျက်ပြီး သုံးစွဲခွင့် တောင်းခံထားတဲ့ တခြား မော်တော်ယာဉ်တွေကို ခွင့်ပြုပေးသွားမှာ ဖြစ်ပါတယ်။ ဒါကြောင့် CNG သုံး တက္ကစီယာဉ်တွေအနေနဲ့ နိုင်ငံတော်က စိုက်ထုတ်ပေးထားတဲ့ အခွင့်အရေးကို ပြည်သူတွေ ခံစားခွင့်ရရှိစေဖို့ ပူးပေါင်း ဆောင်ရွက်ကြစေလိုပါတယ်” လို့ ဦးကိုကိုလွင်က ပြောပါတယ်။

စွမ်းအင် ဝန်ကြီးဌာနအနေနဲ့ အများပြည်သူ သယ်ယူပို့ဆောင်ရေး ကဏ္ဍအတွက် အရေးပါတဲ့ YBS ယာဉ်တွေနဲ့ တက္ကစီယာဉ်တွေ (ဒါမှမဟုတ်) သဘာဝဓာတ်ငွေ့ (CNG) တွေကို မပြောင်းလဲတဲ့ ဈေးနှုန်းဖြစ်တဲ့ ၁ ကီလိုဂရမ်ကို ၂၇၃ ကျပ် ၂၅ ပြားနှုန်းနဲ့ ၂၀၀၇ ခုနှစ်ကနေ စတင်ပြီး ရောင်းချပေးနေတာ ဖြစ်တယ်လို့ ဆိုပါတယ်။

ဒါကြောင့် ဒီဈေးနှုန်းတွေဟာ နိုင်ငံတကာဈေးနှုန်းနဲ့ နှိုင်းယှဉ်ပါက ထက်ဝက်ခန့် သက်သာနေတာ ဖြစ်သလို စက်စွမ်းအားတူညီတဲ့ ဓာတ်ဆီ၊ ဒီဇယ်သုံး မော်တော်ယာဉ်တွေရဲ့ တူညီခရီး အကွာအဝေးနဲ့ လောင်စာဆီ ကုန်ကျစရိတ်ကို နှိုင်းယှဉ်ပါကလည်း CNG ဟာ သုံးပုံ တပုံခန့်သာ ကုန်ကျမှာဖြစ်တယ်လို့ ပြည်ထောင်စုဝန်ကြီးက ပြောပါတယ်။

ဝန်ကြီးဌာနအနေနဲ့ CNG အသုံးပြုနေတဲ့ မော်တော်ယာဉ်တွေကို ထိရောက်စွာ ထိန်းချုပ်နိုင်ရေးအတွက် မကြာမီအချိန်အတွင်း Metering စနစ်တပ်ဆင်ခြင်း၊ နည်းပညာအသုံးပြုကာ ထိန်းချုပ် ဖြန့်ဖြူးခြင်းတို့ကို ဆောင်ရွက်သွားမှာဖြစ်တယ်လို့ ဆိုပါတယ်။

ဒါနဲ့ပတ်သက်လို့ တက္ကစီ ယာဥ်မောင်းတယောက်က “ပြောစရာရှိတာက CNG ကိုလည်း ရောက်ထည့်၊ ပရက်ရှာ အပြည့်ပေး၊ တန်းစီချိန် မရှိစေရအောင်လည်း စွမ်းအင်ဝန်ကြီးဌာနက ကြပ်မတ်ပေးသင့်တယ်။ တက္ကစီ ယာဥ်မောင်းတွေဘက်က အဆမတန် အမြဲတမ်းတက်၊ တိုးတိုးပြီး ပိုတောင်းနေတဲ့ အုံနာကြေးကိုရော ဘယ်လိုကိုင်တွယ် ဖြေရှင်းပေးမလဲ။ အရေးကြီးတာ အဲဒီ အုံနာကြေးနဲ့ ကားပြင်စရိတ်၊ အင်ဂျင်ဝိုင်၊ ဂီယာဝိုင်နဲ့ တာယာတွေ စျေးတွေ မတက်ဖို့ကိုလည်း လုပ်ပေးစေချင်တယ်” လို့ ပြောပါတယ်။

သမာအာဇီဝ လုပ်ကိုင်ရှာဖွေနေတဲ့ တက္ကစီ ယာဥ်မောင်းတွေအတွက်လည်း ထည့်သွင်း စဥ်းစားပေးမှသာ တရားမျှတမှာဖြစ်ပြီး ယာဉ်မောင်းတွေလည်း ပြည်သူတွေပဲ ဖြစ်တာကြောင့် ဘယ်အရာကိုမှ တဖက်သတ် မကြည့်စေချင်ဘူးလို့ သူက ပြောပါတယ်။

ဒါအပြင် နောက်ထပ် ယာဉ်မောင်းတယောက်ကလည်း “အုံနာကြေးကရော မောင်းသူဘက်က ဘယ်လိုစီစဥ်ကြမလဲ။ ရန်ကုန်မှာ CNG ကားက တရက်အုံနာကြေး ငါးသောင်းခွဲ၊ ခြောက်သောင်း၊ တချို့ဆို ခြောက်သောင်းကျော်တယ်။ CNG ယာဉ်စီးခစျေး ဆိုတာက ယာဥ်မောင်းနဲ့ မဆိုင်ဘူး၊ CNG အုံနာနဲ့ပဲ ဆိုင်တာ” လို့ ပြောပါတယ်။

ဒါအပြင် လက်ရှိမှာ ကားအပိုပစ္စည်း ဈေးတွေလည်း အဆမတန် မြင့်တက်နေတာကြောင့် သက်ဆိုင်ရာ အဖွဲ့အစည်းတွေအနေနဲ့ ကားအပိုပစ္စည်း ရောင်းချတဲ့ ဆိုင်တွေကိုလည်း ကြပ်မတ်သင့်ပြီး အင်ဂျင်ဝိုင်စျေးတွေ၊ ကားတာယာစျေးတွေ ဈေးမြင့်တက်နေတာတွေကိုပါ အရေးယူပေးစေချင်တယ်လို့ သူက ပြောပါတယ်။

အငှားယာဉ် စီးနင်းသူတွေကတော့ စုံ/မ သတ်မှတ်ချက် ထွက်ပေါ်လာပြီးနောက်ပိုင်း ဆီကားတွေသာမက CNG, EV ကားတွေပါ ကားငှားရမ်းခ ဈေးနှုန်းတွေ မြင့်တက်လာတာ ဖြစ်တယ်လို့ ပြောပါတယ်။

“အခုက ဟိုနားဒီနားကို CNG ကားသမားတွေက အနည်းဆုံး ခုနစ်ထောင် တောင်းနေကြတာ။ စွမ်းအင် ဝန်ကြီးဌာနအနေနဲ့ စည်းကမ်း သတ်မှတ်မယ်ဆို ငှားရမ်းခက နှုန်းထားတွေကိုလည်း တပါတည်း သတ်မှတ်ပေးစေချင်တယ်။ အခုက တောင်းချင်တိုင်းတောင်း၊ ပါးစပ်ဈေး ဖြစ်နေတာ။ ဈေးက ဆီကားကိုပေးရတဲ့ဈေးနဲ့ အတူတူလောက် ဖြစ်နေတာ။ Grab တွေလည်း အဲဒီလိုပဲ။ အရင်ကထက် နှစ်ဆ ပိုတောင်းလာတာ။ ဒါတွေအကုန်လုံးကို စောင့်ကြည့် အရေးယူပေးစေချင်တယ်” လို့ အငှားယာဉ် စီးနင်းသူတယောက်က ပြောပါတယ်။

စွမ်းအင်ဝန်ကြီးဌာနကတော့ ခရီးသည်တွေအနေနဲ့ CNG တက္ကစီတွေ ယာဥ်စီးခ ပိုမိုတောင်းခံပါက ရန်ကုန်မှာရှိတဲ့ မြန်မာ့ရေနံနှင့် သဘာဝဓာတ်ငွေ့လုပ်ငန်း ညွှန်ကြားရေးမှူးရုံးကို တိုင်ကြားနိုင်သလို နီးစပ်ရာ ယာဥ်ထိန်းရဲတပ်ဖွဲ့ ရုံးတွေမှာ တိုင်ကြားနိုင်တယ်လို့ သတင်း ထုတ်ပြန်ထားပါတယ်။

မြဝတီမှာ မိသားစုလိုက် အစာအဆိပ်သင့်ပြီး ကလေးနှစ်ယောက်သေ၊ ခြောက်ယောက်ဆေးကုသမှုခံယူနေရ

ကရင်ပြည်နယ် ၊ မြဝတီမြို့မှာ မိသားစုလိုက် အစာအဆိပ်သင့်ပြီး ကလေးနှစ်ယောက်သေဆုံးကာ နောက်ထပ်ခြောက်ယောက် ဆေးကုသမှုခံယူနေရတယ်လို့ သိရပါတယ်။

မနေ့က မတ်လ ၁၅ ရက်နေ့မှာ ကြက်သားဟင်းချက်စားရာမှာ ဆားကိုထည့်ရမယ့်အစား ဆိုဒီယမ်နိုက်ထရိုက်အမှုန့်ကို ထည့်ပြီးချက်စားခဲ့တဲ့အတွက် အစာအဆိပ်သင့်ပြီး အသက် ၁၂ နှစ်အရွယ်နဲ့ အသက် ၈ နှစ်အရွယ် ကလေးငယ်နှစ်ယောက်သေဆုံးခဲ့ရတာ ဖြစ်တယ်လို့ သိရပါတယ်။

"ဖြစ်တာက သာမန်လက်လုပ်လက်စား မိသားစုပါ ။ကြက်သားထဲကို ဆိုဒီယမ်နိုက်ထရိုက် အထုတ်ထည့်စားတာကနေ ဖြစ်တာလို့သိရတယ်။ အဲဒီအထုတ်ကလည်း ကျားဖြန့်ဆိုက်တွေက ကောက်လာတာလား ဘာလားတော့ မသိဘူး ။ ကလေးနှစ်ယောက်က ဆေးရုံရောက်လာကတည်းက အသက်မပါတော့ဘူးသိရတယ်။ " လို့ ဒေသခံက ပြောပါတယ်။

အဆိုပါ အစာအဆိပ်သင့်ခဲ့တဲ့ မိသားစုဟာ မြဝတီမြို့ အမှတ် ၄ ရပ်ကွက်က ဖြစ်ပြီး
လက်ရှိမှာ အစာအဆိပ်သင့်မှုကြောင့် မိဘတွေအပါအဝင် မိသားစုဝင်ခြောက်​ယောက်ဟာ မြဝတီဆေးရုံကြီးမှာ ကူသမှုခံယူနေရဆဲဖြစ်ပြီး ကျန်းမာရေးအခြေအနေ ကောင်းမွန်တယ်လို့ သိရပါတယ်။

ဇန်နဝါရီလ ၂၀ ရက်နေ့ကလည်း ဧရာဝတီတိုင်း ၊ငွေဆောင်မြို့ ၊ ငွေဆောင်ကမ်းခြေမှာ ငါးပူတင်းကို ချက်စားခဲ့တဲ့ သားအဖနှစ်ယောက်လည်း အစာအဆိပ်သင့်ပြီး သေဆုံးမှု ဖြစ်ပွားခဲ့တယ်လို့ သိရပါတယ်။

MNDAA နဲ့ TNLA တို့အကြား ဖြစ်ပွားတဲ့ တိုက်ပွဲ နမ့်ခမ်းဘက်နဲ့ အ​တော်နီးကပ်လာ

မတ် ၁၆၊ ၂၀၂၆

ရှမ်းပြည်နယ်မြောက်ပိုင်းမှာ MNDAA နဲ့ TNLA တို့အကြား ဖြစ်ပွားတဲ့ တိုက်ပွဲ နမ့်ခမ်းဘက်နဲ့ နီးကပ်လာကြောင်း ဒေသခံတွေဆီက သိရပါတယ်။

“ဒီမနက်ပိုင်းက TNLA ဘက်က ဂိတ်ဖွင့်ထားတဲ့ နမ့်ခမ်းနဲ့ နမ့်ဖတ်ကာ နယ်နိမိတ် ဖြစ်တဲ့ ၁၂ မိုင် ဖာလင် အထက်မှာ ဒရုန်းနဲ့ လာချနေကြတာ။” လို့ နမ့်ခမ်းဒေသခံ အမျိုးသား တယောက်က ပြောပါတယ်။

ဒီနေ့ မတ်လ ၁၆ ရက်နေ့ မနက် အစောပိုင်းကတော့ နမ့်ခမ်းမြို့ကနေ ပစ်ခတ်သံတွေ ကြားနေရပြီး နေ့လယ်ပိုင်းကနေ လက်ရှိအထိတော့ ငြိမ်နေပေမယ့် ဒီညတော့ ဘယ်လို ပြန်ဖြစ်လာမလဲဆိုတာ အခြေအနေမသိနိုင်ဘူးလို့ သူက ပြောပါတယ်။

“အခု လက်ရှိ နမ့်ခမ်းဆေးရုံက ဆရာဝန်ကြီးတွေတောင်မှ သော့ခတ်ပြီး ရှောင်သွားကြပြီလို့ သတင်းထွက်နေပေမယ့် အတိအကျ မသိရသေးဘူး။” လို့ နောက်ထပ် ဒေသခံ တယောက်က ပြောပါတယ်။

နမ့်ဖတ်ကာ နဲ့ နမ့်ခမ်းကြားက ဆာလူ၊ မာန်အောင်၊ ဖာလင် ရွာတွေဘက်မှာရှိတဲ့ TNLA တပ်ဖွဲ့ဝင်တွေက ရှောင်ဆင်းလာတာတွေ့ရပြီး ၁၃ မိုင် မိုင်ခရိုဝေ့ဗ် ဘက်မှာ ရှိနေတဲ့ TNLA တပ်ဖွဲ့ဝင်တွေကိုလည်း MNDAA တပ်ဖွဲ့ဘက်က မောင်းထုတ်နေတဲ့ ပုံစံဟုတ်တယ်လို့ သူက ပြောပါတယ်။

ဒီနေ့ မနက်ပိုင်းမှာ နမ့်ခမ်းမြို့ သာယာကုန်းဘက်ကိုပါ MNDAA တပ်ဖွဲ့ဘက်က ဒရုန်းနဲ့ လာပစ်တယ်လို့ သတင်းထွက်နေပေမယ့် အဲဒီသတင်းက မသေချာဘူးလို့ ဆိုပါတယ်။

MNDAA တပ်ဖွဲ့က အင်အား အပြည့်ပါတဲ့ ကား ၈ စီး တသုတ်၊ ကား ၁၅ စီးခန့် တသုတ် ဒီကနေ့ မတ်လ ၁၆ ရက်နေ့ နေ့လယ်ပိုင်းနဲ့ ညနေပိုင်း နမ့်ခမ်းလမ်းဘက် ဦးတည်ပြီး နမ့်ဖတ်ကာ ကနေဖြတ်သွားတာတွေ့ရကြောင်း ဒေသခံတွေဆီက သိရပါတယ်။

ဒါ့အပြင် MNDAA ဘက်က ကွတ်ခိုင်မြို့အနီးမှာရှိတဲ့ ဂါလိုင်ရွာဘက် ဦးတည်ပြီး ထိုးစစ်ဆင် တိုက်ပွဲဖော်ဆောင်နေကြောင်း ကွတ်ခိုင်ဒေသခံ တွေက ပြောပါတယ်။

လက်ရှိမှာတော့ ကွတ်ခိုင်မြို့ပေါ်မှာ MNDAA တပ်ဖွဲ့ဝင်တွေ နေရာ ပြန်ယူထားပြီး မြို့ရဲ့ အနောက်ဘက်ခြမ်းမှာတော့ TNLA တပ်ဖွဲ့တွေ နေရာယူထားဆဲ ဖြစ်တယ်လို့ ဆိုပါတယ်။

MNDAA တပ်ဖွဲ့တွေကတော့ ဒီကနေ့ မတ်လ ၁၆ ရက်နေ့က လားရှိုး ဆင်နှစ်ကောင် ဟိုတယ်မှာ အစိုးရစစ်တပ်နဲ့ တွေ့ဆုံ ဆွေးနွေးတာရှိတယ်လို့ ဒေသခံတွေဆီသိရပါတယ်။

မန်ချက်စတာတွင် ပါဝင်ကစားရန် ဘက်ပေး ဆန္ဒပြင်းပြနေ
====================
ကိုင်လီယန်ဘက်ပေးဟာ အင်္ဂါနေ့ည အီတီဟတ်ကွင်းတွင် မန်စီးတီးနှင့် ရင်ဆိုင်ကစားရမယ့် ရီးရဲလ်မက်ဒရစ်ရဲ့ ချန်ပီယံလိဂ် ၁၆ သင်း ရှုံးထွက်အဆင့် ဒုတိယအကျော့ပွဲစဉ်တွင် ပါဝင်ကစားရန် ဆန္ဒပြင်းပြနေကြောင်း သိရပါတယ်။

ဘက်ပေးဟာ ဘယ်ဖက်ဒူးဒဏ်ရာပြဿနာကြောင့် အနားယူနေရသူ ဖြစ်ပြီး ပြီးခဲ့တဲ့အပတ်မှ စတင်ကာ လေ့ကျင့်ခန်းဆင်းလာနိုင်သူလည်း ဖြစ်ပါတယ်။

ဒါပေမယ့် ရီးရဲလ်မက်ဒရစ်ဆေးအဖွဲ့ဟာ ဘက်ပေးအား အရဲစွန့် အသုံးပြုခဲ့ခြင်း မပြုဘဲ မန်စီးတီး၊ အယ်ချီပွဲစဉ်တို့တွင်လည်း ဆက်လက် အနားပေးလာခဲ့ပါတယ်။

ရီးရဲလ်မက်ဒရစ်ဟာ ကိုင်လီယန်ဘက်ပေးဘက်က ကြံ့ခိုင်မှုပြည့်ဝခြင်း မရှိသေးမှုနှင့်အတူ အရဲစွန့် အသုံးပြုလာတာလည်း ဖြစ်ပါတယ်။

ဒါပေမယ့် ဘက်ပေးဟာ ဒဏ်ရာအခြေအနေမှာ ပုံမှန်အတိုင်း တိုးတက်မှု ရှိနေမှုနှင့်အတူ မန်ချက်စတာတွင် ကစားရမယ့် ပွဲစဉ်မှာ ပါဝင်ကစားရေး ဆန္ဒပြင်းပြနေပါတယ်။

သူဟာ စပိန်စူပါဖလားပြိုင်ပွဲတုန်းကလည်း ကြံ့ခိုင်မှု ပြည့်ဝခြင်း မရှိပေမယ့် ဘာစီလိုနာနှင့် ဗိုလ်လုပွဲတွင် အရဲစွန့် ပါဝင်ကစားခဲ့ဖူးသူလည်း ဖြစ်ပါတယ်။

ရီးရဲလ်မက်ဒရစ်နည်းပြအာဘီလိုအာကတော့ ဘက်ပေးရဲ့ အခြေအနေကို စောင့်ကြည့်ပြီးမှ မန်စီးတီးနှင့်ပွဲတွင် သုံး/မသုံး ဆုံးဖြတ်သွားပါမယ်။

ရီးရဲလ်မက်ဒရစ်ဟာ မန်စီးတီးနှင့်ပွဲအပြီး ယခုအပတ်အကုန်တွင် မက်ဒရစ်ဒါဘီပွဲစဉ်အဖြစ် အက်သလက်တီကိုနှင့် ရင်ဆိုင်ကစားရန်လည်း ရှိနေပါတယ်။

ရီးရဲလ်မက်ဒရစ်ဟာ ဘာနေဗျူးတွင် ကစားခဲ့တဲ့ ပထမအကျော့တုန်းက မန်စီးတီးအား ၃-၀ ဂိုးဖြင့် အနိုင်ရရှိထားခဲ့ပါတယ်။

ခရစ္စတီယာနိုရော်နယ်ဒိုနှင့် ဆာဒေယိုမာနေးတို့ ပြန်ကစားနိုင်မယ့်ကာလကို Al Nassr အတည်ပြုလာ
====================
Al Nassr နည်းပြဂျော့ဂျီးဆပ်စ်ဟာ Al Khaleej အား ၅-၀ ဂိုးဖြင့် အနိုင်ရရှိပြီးနောက် အသင်းရဲ့ စူပါစတား ကစားသမား ၂ ဦး ဘယ်တော့ ပြန်ကစားနိုင်မယ်ဆိုတာ အတည်ပြုလာပါတယ်။

Al Nassr ဟာ အသင်းရဲ့ စူပါစတား ၂ ဦးဖြစ်တဲ့ ခရစ္စတီယာနိုရော်နယ်ဒိုနှင့် ဆာဒေယိုမာနေးတို့ မပါဝင်ပေမယ့်လည်း Al Khaleej အား ဘောလုံးပိုင်ဆိုင်မှုအသာစီးဖြင့် ကစားကာ ဂိုးပြတ်အနိုင်ရရှိခဲ့ပါတယ်။

ပွဲအပြီးတွင် ပေါ်တူဂီလူမျိုးနည်းပြက ခရစ္စတီယာနိုရော်နယ်ဒိုနှင့် ဆာဒေယိုမာနေးတို့မှာ လာမယ့် မတ်လနှောင်းပိုင်း နိုင်ငံတကာပွဲစဉ်များအပြီးတွင် Al Nassr အတွက် ကစားလာနိုင်တော့မှာ ဖြစ်ကြောင်း အတည်ပြုလာပါတယ်။

ဂျီးဆပ်စ်က "ရော်နယ်ဒိုနဲ့ မာနေးတို့ နိုင်ငံတကာပွဲအပြီးမှာ ကစားလာနိုင်ဖို့ ရှိတယ်။ လူတိုင်းသိထားပြီးဖြစ်တဲ့အတိုင်း သူတို့က ထိပ်တန်းကစားသမားတွေ ဖြစ်ကြတယ်။ သူတို့ ခေတ္တ နားနေရတာပါ။ မာနေးက လွန်ခဲ့တဲ့ရက်အနည်းငယ်ခန့်တုန်းက နာကျင်မှုခံစားရတယ်။ ဒါကြောင့် သူ့ကို အနားပေးဖို့ ကျွန်တော်တို့ ဆုံးဖြတ်ခဲ့တယ်။ သူလည်း နိုင်ငံတကာပွဲအပြီးမှာ ပြန်ကစားလာနိုင်မှာပါ"လို့ ပြောကြားသွားပါတယ်။

‌Al Nassr ဟာ အသင်းရဲ့ အရေးပါတဲ့ ကစားသမား ၂ ဦး ဒဏ်ရာကြောင့် အနားယူနေရပေမယ့်လည်း ဒုတိယနေရာမှ Al Hilal ကို ရမှတ် ၃ မှတ်ဖြတ်ကာ အမှတ်ပေးဇယားကို ဦးဆောင်ထားနိုင်ပါတယ်။

ဆော်ဒီပရိုလိဂ်မှာ ယခုအခါ နိုင်ငံ့တကာပွဲစဉ်များအပြီးအထိ နားလိုက်ပြီ ဖြစ်ပြီး ဧပြီလအစောပိုင်းတွင်မှ ပြန်လည်စတင်လာပါမယ်။

Al Nassr ဟာ ဧပြီလ ၄ ရက်နေ့တွင် Al Najma အား ဧည့်ခံကစားရပါမယ်။