အွန်လိုင်းဆယ်လီ သမီးဆိုးကို ပုဒ်မ ၅၀၅ (က) နဲ့ ထပ်မံအမှုဖွင့်၊ Form-C ဖောက်ဖျက်ထားမှုကြောင့် အမှုထပ်တိုးနိုင်
အောက်တိုဘာ ၁၅
အွန်လိုင်းဆယ်လီ သမီးဆိုး (ခ) သက်ကိုကို ကို လက်ရှိမှာ ပုဒ်မ ၅၀၅ (က) နဲ့ ထပ်မံအမှုဖွင့်ထားပြီး Form-C ဖောက်ဖျက်မှုကြောင့်လည်း လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက ထပ်မံ တရားစွဲဆိုဖို့ ရှိနေတဲ့အတွက် အမှု ထပ်တိုးနိုင်တယ်လို့ ဒီဖြစ်စဉ်ကို သိရှိသူတယောက်က ပြောပါတယ်။
သမီးဆိုး (ခ) သက်ကိုကို ကို သက်ဆိုင်ရာ လုံခြုံရေးအဖွဲ့က ရန်ကုန်အပြည်ပြည်ဆိုင်ရာ လေဆိပ်မှာ ပြီးခဲ့တဲ့ အောက်တိုဘာ ၁၂ ရက်နေ့၊ မနက်ပိုင်းက ဖမ်းဆီး ထိန်းသိမ်းခဲ့တာဖြစ်ပြီး စတင် ဖမ်းဆီးစဉ်က ဆက်သွယ်ရေး ဥပဒေပုဒ်မ ၆၆ (ဃ) နဲ့ အမှုဖွင့်ခံထားရတာ ဖြစ်ပါတယ်။
သတင်းတွေအရ သမီးဆိုး (ခ) သက်ကိုကို ကို တိုင်ကြားခဲ့သူမှာ ဒေါ်အေသင်ကို ဖြစ်တယ်လို့ သိရပြီး အောက်တိုဘာ ၅ ရက်နေ့က ပြင်ဦးလွင် မြို့မရဲစခန်းမှာ (ပ)၂၁၅/၂၀၂၅၊ ဆက်သွယ်ရေး ဥပဒေပုဒ်မ ၆၆ (ဃ) နဲ့ အမှုဖွင့် တိုင်ကြားထားတာ ဖြစ်တယ်လို့ သိရပါတယ်။
ဒါနဲ့ ပတ်သက်လို့ ဒေါ်အေသင်ကိုရဲ့ လူမှုကွန်ရက် စာမျက်နှာမှာလည်း “ပ နံပါတ် ရရှိပြီးနောက် သူမသည် ကျွန်မတရားစွဲဆိုခဲ့သော အမှုများအား ဖြေရှင်းခြင်းမပြုဘဲ သူမနိုင်ငံသို့ ပြန်လည် ထွက်ခွာမည်ကို စိုးရိမ်သောကြောင်် ကျွန်မအမှုဖွင့်ခဲ့သည့် စခန်းတွင် သူမအား ပြင်ပထွက်ခွာခွင့်အား ပိတ်ပေးပါရန် သူမအမှုအား ဖွင့်ခဲ့သော ပနံပါတ်နှင့်အတူ ထပ်မံအမှုတွဲ တင်ခဲ့ပါသည်” လို့ မနေ့ အောက်တိုဘာ ၁၄ ရက်က အသိပေး ရေးသားထားတာ တွေ့ရပါတယ်။
ဒါကြောင့် သမီးဆိုး (ခ) သက်ကိုကို ကို စတင်ဖမ်းစီးစဉ်က ရန်ကုန်မြို့ရှိ မင်္ဂလာဒုံ ရဲစခန်းမှာ ကနဦး ထိန်းသိမ်းခဲ့တာ ဖြစ်ပေမယ့် မန္တလေးတိုင်း၊ ပြင်ဦးလွင် မြို့မရဲစခန်းမှာ အမှုဖွင့်ခံထားရတာ ဖြစ်တဲ့အတွက် အောက်တိုဘာ ၁၂ ရက်နေ့၊ ညပိုင်းမှာပဲ ပြင်ဦးလွင်ရဲစခန်းကို လွှဲပြောင်းပေးခဲ့တယ်လို့ သိရပါတယ်။
“သူ့ကို ဖမ်းမိတဲ့ အောက်တိုဘာ ၁၂ ရက်နေ့၊ ည ၁၀ နာရီလောက်ကပဲ ပြင်ဦးလွင်ရဲစခန်းက သူ့ကို လာခေါ်သွားတာ။ ၁၃ ရက်နေ့ မနက်၊ ပြင်ဦးလွင်ကို ရောက်တာပေါ့။ ပထမ တမှုကတော့ ၆၆ (ဃ) စွဲတယ်။ ဒုတိယ တမှုကတော့ ၅၀၅ (က) ပေါ့။ အဲဒီနှစ်ခုတော့ လောလောဆယ် အတည်ဖြစ်သွားပြီ။ အောက်တိုဘာ ၁၃ ရက်နေ့မှာ ၅၀၅ ထပ်တိုးလိုက်တာ” လို့ ဒီဖြစ်စဉ်ကို သိရှိသူတယောက်က ပြောပါတယ်။
ပုဒ်မ ၅၀၅ (က) ထပ်တိုး အမှုဖွင့်ခံရတာဟာ Follower တသိန်းလောက်ရှိတဲ့ သူမရဲ့ လူမှုကွန်ရက်ဖြစ်တဲ့ Shwe Thet အကောင့်နဲ့ ပြည်ပနိုင်ငံမှာ အလှကုန်ပစ္စည်းတွေ Live လွှင့် ရောင်းချရင်း မြန်မာနိုင်ငံအတွင်းမှာ ဖြစ်ပေါ်နေတဲ့ အကြောင်းအရာတွေကို ဝေဖန် ပြောဆိုခဲ့တာကြောင့် ဖြစ်တယ်လို့ သိရပါတယ်။
ဒါနဲ့ ပတ်သက်လို့ အောက်တိုဘာ ၁၄ ရက်နေ့ထုတ်၊ နိုင်ငံပိုင် သတင်းစာတွေမှာလည်း နိုင်ငံတော် တည်ငြိမ်အေးချမ်းရေးကို ပျက်ပြားစေရန် ရည်ရွယ်ကာ လူမှုကွန်ရက် စာမျက်နှာပေါ် လှုံ့ဆော်ခြင်း၊ ဝါဒဖြန့်ခြင်းတွေ လုပ်ဆောင်ခဲ့တဲ့ “Shwe Thet” Facebook အကောင့်ပိုင်ရှင်ဖြစ်သူ ရန်ကုန်တိုင်း၊ ဒဂုံမြို့သစ် (မြောက်ပိုင်း) မြို့နယ်၊ အမှတ် (၄၆) ရပ်ကွက်နေ သက်ကိုကို (ခ) သမီးဆိုး (၄၅) နှစ်ကို ပြင်ဦးလွင် မြို့မရဲစခန်းမှာ တရားဥပဒေနဲ့အညီ ဖမ်းဆီးထိန်းသိမ်း အမှုဖွင့်လှစ် အရေးယူ ဆောင်ရွက်လျက်ရှိတယ်လို့ အသိပေးထားပါတယ်။
ဒါအပြင် သူမဟာ အမေရိကန်နိုင်ငံသူအဖြစ် ခံယူထားသူ ဖြစ်တာကြောင့် မြန်မာနိုင်ငံကို ရောက်ရှိနေစဉ်အတွင်း သူမတည်းခိုရာ နေရာတချို့မှာ နိုင်ငံခြားသားတွေအတွက် Form-C တိုင်ကြားမှုဆိုင်ရာ လုပ်ထုံးလုပ်နည်းတွေကိုလည်း ပျက်ကွက်ခဲ့တယ်လို့ သိရပါတယ်။
“သူက အမေရိကန်နိုင်သား ခံယူထားတာဆိုတော့ လဝက အက်ဥပဒေအရ ထပ်စွဲဖို့လည်း ရှိလာနိုင်တယ်။ Form-C ဖောက်ဖျက်တာတွေ ရှိနေလို့ပါ။ နေပြည်တော်က အမရာဟိုတယ်ရယ်၊ မန္တလေးက ထွန်းလှ ဟိုတယ်၊ အဲဒီ ဟိုတယ်တွေမှာ တည်းခဲ့တုန်းက Form-C ဖြည့်ခဲ့တာ မရှိဘူး၊ ဒီတိုင်းပဲ တည်းခဲ့တာ” လို့ သူက ပြောပါတယ်။
နိုင်ငံခြားသား ရောက်ရှိကြောင်း သတင်းပေးပို့ခြင်း (Form-C Arrival Report) ဟာ တဦး (ဒါမှမဟုတ်) အဖွဲ့လိုက် နိုင်ငံခြားသားတွေ မြန်မာနိုင်ငံကို ရောက်ရှိလာပါက ၎င်းတို့ ရောက်ရှိမှုကို ၂၄ နာရီအတွင်း တာဝန်ရှိသူက မိမိနေထိုင်ရာ မြို့နယ်ရှိ လ.ဝ.က ဦးစီးဌာနကို Form-C Arrival Report နဲ့ တိုင်ကြားပေးရမှာ ဖြစ်တယ်လို့ သိရပါတယ်။
“အဲဒီတော့ သတ်မှတ် ဥပဒေအရသူက သူရောက်တဲ့ နေရာတိုင်းမှာ Form-C ဖြည့်ရမယ်။ မဖြည့်ဘူး ဆိုရင်တော့ နိုင်ငံခြားသား တယောက်အနေနဲ့ Form-C ဖောက်ဖျက်တာပေါ့။ ပုဒ်မ ၁၃ (က) နဲ့ တရားစွဲဆိုနိုင်ပါတယ်” လို့ ဒီဖြစ်စဉ်ကို သိရှိသူက ပြောပါတယ်။
မြန်မာနိုင်ငံအတွင်းကို တရားဝင် နိုင်ငံကူးလက်မှတ်နဲ့ ဝင်ရောက် နေ
ထိုင်တဲ့ နိုင်ငံခြားသားတယောက် အနေနဲ့ တည်းခိုရာ နေရာတိုင်းမှာ ရောက်ရှိခြင်း အစီရင်ခံစာ Form-C ကို မဖြစ်မနေ ပြုလုပ်ရမှာ ဖြစ်တယ်လို့ သိရပါတယ်။
အစိုးရမှ Form-C ပြုလုပ်ထားခြင်း ရှိ၊ မရှိ လာရောက်စစ်ဆေး မေးမြန်းတဲ့အခါမှာလည်း Form-C ပြနိုင်မှသာ “တရားဝင်နေထိုင်ခြင်း” အဖြစ် သတ်မှတ်ရမှာ ဖြစ်တယ်လို့ သိရပါတယ်။
နိုင်ငံခြားသားအနေနဲ့ Form-C ပြုလုပ်ထားခြင်း မရှိပါက အစိုးရကပေးတဲ့ ဥပဒေပြစ်ဒဏ်သော်လည်းကောင်း၊ ငွေဒဏ်သော်လည်းကောင်း၊ ဒဏ်နှစ် ရပ်လုံးကို ကျခံရမှာဖြစ်တယ်လို့ သိရပါတယ်။
Photo - Shwe Thet (F
Credit - Voice of Myanmar
#သတင်းဟင်းလေးအိုးကြီး
