အွန်လိုင်းစလော့ဂိမ်းလောင်းကစားများ ပျံ့နှံ့နေမှုကို မည်သို့နှိမ်နင်းမည်နည်းဟု လွှတ်တော်၌ မေးမြန်း

အွန်လိုင်းလောင်းကစား App ၁၀၂ ခုနှင့် လူမှုကွန်ရက်အကောင့် ၁,၃၇၆ ခု ပိတ်သိမ်းထားဟု ဒု-ဝန်ကြီးဖြေကြား
မြန်မာနိုင်ငံအနှံ့ တရားမဝင် အွန်လိုင်းစလော့ဂိမ်းလောင်းကစားများ ကျယ်ကျယ်ပြန့်ပြန့် ပျံ့နှံ့နေမှုကို အစိုးရအနေဖြင့် မည်သို့တားဆီးနှိမ်နင်းဆောင်ရွက်နေသည်ကို သိရှိလိုကြောင်း နောင်ချိုမြို့နယ် ပြည်သူ့လွှတ်တော်ကိုယ်စားလှယ် ဦးကျော်မြင့်နိုင်က ယနေ့ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (ဒသမနေ့) တွင် မေးမြန်းခဲ့သည်။
ဦးကျော်မြင့်နိုင်က Facebook၊ YouTube၊ TikTok၊ Telegram နှင့် Viber ကဲ့သို့သော လူမှုကွန်ရက်ပလက်ဖောင်းများတွင် အွန်လိုင်းလောင်းကစားကြော်ငြာများ နေ့စဉ်တွေ့မြင်နေရပြီး ဝင်ရောက်ဆော့ကစားသူများလည်း များပြားလာကြောင်း ထောက်ပြပြောကြားခဲ့သည်။
“ဥပဒေအားနည်းချက်များကြောင့် လောင်းကစားလုပ်ငန်းများ ပိုမိုပျံ့နှံ့လာပြီး လူကြီး၊ လူငယ်မရွေး၊ နိုင်ငံဝန်ထမ်းများ၊ စီးပွားရေးလုပ်ငန်းရှင်များနှင့် အခြေခံလူတန်းစားများပါ ပါဝင်လာကြသည်။ ယင်းကြောင့် ဒုစရိုက်မှုများ တိုးပွားလာခြင်း၊ မိသားစုပြဿနာများ ဖြစ်ပေါ်လာခြင်းတို့ရှိနေသဖြင့် အစိုးရအနေဖြင့် မည်သို့တားဆီးနှိမ်နင်းမည်ကို သိရှိလိုပါသည်” ဟု ၎င်းက မေးမြန်းခဲ့သည်။
ယင်းမေးခွန်းနှင့်ပတ်သက်၍ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ပြန်လည်ဖြေကြားရာတွင် နိုင်ငံတော်သမ္မတရုံး၏ အမိန့်ဖြင့် “အွန်လိုင်းလိမ်လည်မှုနှင့် အွန်လိုင်းလောင်းကစားမှုများ တိုက်ဖျက်ရေး ကြီးကြပ်မှုဗဟိုကော်မတီ” ကို ဖွဲ့စည်းထားကြောင်း ပြောကြားခဲ့သည်။
အွန်လိုင်းလောင်းကစားမှုများနှင့် ပတ်သက်၍ ၂၀၂၄ ခုနှစ်တွင် အမှု ၂၆ မှု၊ တရားခံ ၁၂၂ ဦး၊ ၂၀၂၅ ခုနှစ်တွင် အမှု ၄၄ မှု၊ တရားခံ ၃၇၀ ဦးနှင့် ၂၀၂၆ ခုနှစ်တွင် အမှု ၁၀၂ မှု၊ တရားခံ ၁၅၂ ဦးတို့ကို အရေးယူဆောင်ရွက်ထားကြောင်း ၎င်းက ပြောကြားခဲ့သည်။
ထို့ပြင် ဒစ်ဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာန၊ သတင်းအချက်အလက်နည်းပညာဦးစီးဌာနတို့နှင့် ပူးပေါင်း၍ ၂၀၂၅ ခုနှစ်မှ ၂၀၂၆ ခုနှစ် ဧပြီလအထိ တရားမဝင် အွန်လိုင်းလောင်းကစား Website နှင့် Application ၁၀၂ ခုကို ပိတ်ပင်ခဲ့ပြီး လူမှုကွန်ရက်ပလက်ဖောင်းများပေါ်ရှိ လောင်းကစားနှင့် ဆက်စပ်သည့် Channel ၈၇၈ ခုနှင့် Account ၄၉၈ ခုကိုလည်း ပိတ်သိမ်းဆောင်ရွက်ခဲ့ကြောင်း သိရသည်။
အလားတူ လောင်းကစားလုပ်ငန်းများနှင့် ဆက်စပ်အသုံးပြုနေသည့် SIM Card ၁၄၀,၄၀၉ ခုကိုလည်း ပိတ်သိမ်းခဲ့ကြောင်း ဒုတိယဝန်ကြီးက ပြောကြားခဲ့သည်။
လက်ရှိတွင် အွန်လိုင်းလိမ်လည်မှုနှင့် အွန်လိုင်းလောင်းကစားမှုများကို ဥပဒေအရ ပိုမိုထိရောက်စွာ အရေးယူနိုင်ရန် “အွန်လိုင်းလိမ်လည်မှုတိုက်ဖျက်ရေးဆိုင်ရာ ဥပဒေမူကြမ်း” ကို လွှတ်တော်သို့ တင်သွင်းထားပြီးဖြစ်ကြောင်းနှင့် နည်းလမ်းမျိုးစုံဖြင့် ဆက်လက်ဖမ်းဆီးအရေးယူသွားမည်ဖြစ်ကြောင်း သိရသည်။

စစ်ကိုင်းမြို့ပေါ် ရပ်ကွက်/ကျေးရွာအုပ်ချုပ်ရေးမှူးအသစ်များရွေးချယ်ရန် ကြီးကြပ်ရေးအဖွဲ့များရွေးချယ်

စစ်ကိုင်းတိုင်း၊ စစ်ကိုင်းမြို့နယ်ရှိ ရပ်ကွက်/ကျေးရွာအုပ်ချုပ်ရေးမှူးအသစ်များရွေးချယ်နိုင်ရေးအတွက် ကြီးကြပ်ရေးအဖွဲ့များရွေးချယ်ခြင်းကို ဇွန် ၁၇ ရက်က သက်ဆိုင်ရာ ရပ်ကွက်/ကျေးရွာလိုက်ပြုလုပ်ခဲ့ကြောင်း သိရသည်။
ဥပဒေ၊ နည်းဥပဒေများနှင့်အညီ ရပ်ကွက်/ကျေးရွာအုပ်ချုပ်ရေးမှူးအသစ်များကို ပြန်လည်ရွေးချယ်သွားမည်ဖြစ်၍ ကြီးကြပ်ရေးအဖွဲ့(၅)ဦးကို ရပ်ကွက်နေသူများ၏ ဆန္ဒမဲဖြင့်ရွေးချယ်ခဲ့ကြကြောင်း သိရသည်။
စစ်ကိုင်းမြို့နယ်တွင် ရပ်ကွက်/ကျေးရွာအုပ်ချုပ်ရေးမှူးအသစ်များအား ဇွန် ၂၅ ရက်အပြီး ရွေးချယ်သွားမည်ဖြစ်ကာ ရွေးချယ်ခံရသည့် အုပ်ချုပ်ရေးမှူးများအား ဇူ လိုင် ၁ ရက်မှစ၍ ဥပဒေ၊ နည်းဥပဒေများ၊ လုပ်ထုံးလုပ်နည်းများ၊ လိုက်နာရမည့်ကျင့်ဝတ်များအား စာတွေ့၊ လက်တွေ့ (၁)လကြာသင်ကြားပို့ချသွားမည်ဖြစ်ကြောင်း သိရသည်။

နိုင်ငံတော်သမ္မတ ဦးမင်းအောင်လှိုင် တရုတ်နိုင်ငံ Phoenix သတင်းဌာန၏တွေ့ဆုံမေးမြန်းမှုလက်ခံဖြေ ကြား

တရုတ်နိုင်ငံသမ္မတ မစ္စတာ ရှီကျင့်ဖျင်၏ဖိတ်ကြားချက်အရ တရုတ်နိုင်ငံသို့ နိုင်ငံတော်အဆင့်ချစ်ကြည် ရေးခရီးစဥ်ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၁၉ ရက်နံနက်ပိုင်းက ဟန်ကျိုးမြို့ရှိ Huajia Shanzhuang Hotel တွင် တရုတ်နိုင် ငံ Phoenix သတင်းဌာန၏တွေ့ဆုံမေးမြန်းမှုလက်ခံဖြေကြားခဲ့သည်။
နိုင်ငံတော်သမ္မတက မြန်မာ-တရုတ် နှစ်နိုင်ငံကြား ချစ်ကြည်ရင်းနှီးမှုနှင့် မဟာဗျူဟာမြောက်ပူးပေါင်းဆောင်ရွက်ရေးဆိုင်ရာများ၊ စီးပွားရေးနှင့် ကုန်သွယ် ရေးကဏ္ဍပူးပေါင်းဆောင်ရွက်မှုများ၊ ရင်းနှီးမြှုပ်နှံမှုဆိုင်ရာအခွင့်အလမ်းများ၊ဒေသတွင်းနှင့် နိုင်ငံတကာအရေးကိစ္စများအပေါ် မြန်မာနိုင်ငံ၏သဘောထားများအပါအဝင် Phoenix သတင်းဌာနမှသိရှိလိုသည့် အကြောင်းအရာများကိုလည်း ပြည့်စုံစွာဖြေကြားခဲ့သည်။
နိုင်ငံတော်သမ္မတသည် ဇွန် ၁၇ ရက်ကလည်း ကျောက်ယွီထိုင် နိုင်ငံတော်ဧည့်ဂေဟာ၊ ဧည့်ခန်းမဆောင်၌ တ ရုတ်နိုင်ငံ၊ CCTV သတင်းဌာနမှ တွေ့ဆုံမေးမြန်းမှုများကိုလည်း ပြည့်စုံစွာလက်ခံဖြေကြားခဲ့သည်။
နိုင်ငံတော်သမ္မတသည် တရုတ်နိုင်ငံသို့ရောက်ရှိစဉ်အ တွင်း နှစ်နိုင်ငံခေါင်းဆောင်များနှင့် တွေ့ဆုံဆွေးနွေးခြင်း၊ စီးပွားရေးနှင့် ရင်းနှီးမြှုပ်နှံမှုဆိုင်ရာ အခမ်းအ နားများတက်ရောက်ခြင်း၊ ဒေသအသီးသီးရှိ ဖွံ့ဖြိုးတိုး တက်မှုအခြေအနေများကို လေ့လာခြင်းတို့ကိုဆောင် ရွက်လျက်ရှိသည်။

ကားတင်မက အိမ်ပါမီးလင်းစေမည့် LEAPMOTOR ၏ အိမ်သုံးစမတ်စွမ်းအင်စနစ်များ မကြာမီခေတ်စားလာဖွယ်ရှိ

တရုတ်နိုင်ငံသို့ နိုင်ငံတော်အဆင့်ချစ်ကြည်ရေးခရီးစဥ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်သည် ဟန်ကျိုးမြို့ရှိ LEAPMOTOR ကုမ္ပဏီကို ယနေ့ ဇွန် ၁၉ ရက်နံနက်ပိုင်းတွင် ကြည့်ရှုလေ့လာခဲ့သည်။
လက်ရှိကမ္ဘာ့စီးပွားရေးဈေးကွက်တွင် လျှပ်စစ်ကား (EV) ထုတ်လုပ်သည့် ကုမ္ပဏီများသည် ကားထုတ်လုပ်ရုံတင်မကဘဲ ၎င်းတို့၏ အဆင့်မြင့်ဘက်ထရီနည်းပညာများကို အခြေခံကာ အိမ်သုံးစွမ်းအင်သိုလှောင်မှုစနစ် (Home Energy Storage) ကဏ္ဍထဲအထိ စီးပွားရေးနယ်ပယ် ချဲ့ထွင်လာကြသည်ကို တွေ့ရသည်။
အထူးသဖြင့် တရုတ်လျှပ်စစ်ကားကုမ္ပဏီတစ်ခုဖြစ်သည့် LEAPMOTOR က ပြသထားသည့် အိမ်သုံးအဆင့်မြင့် စမတ်စွမ်းအင်နှင့် ဘက်ထရီသိုလှောင်မှုစနစ်သည် နည်းပညာလောကတွင် စိတ်ဝင်စားစရာ ဖြစ်လာခဲ့သည်။
အဆိုပါစနစ်သည် နေရောင်ခြည်စွမ်းအင် (Solar)၊ အိမ်သုံးဘက်ထရီ၊ အစိုးရမီးလိုင်း (Grid) နှင့် အိမ်သုံးလျှပ်စစ်ပစ္စည်းများကို စမတ်ကျကျ အလိုအလျောက် ချိတ်ဆက်ထိန်းချုပ်ပေးသည့် စနစ်မျိုးဖြစ်သည်။
ယင်းစနစ်တွင် အဓိကအားဖြင့် အလယ်တွင်ရှိသော အဖြူရောင်သေတ္တာကြီးဖြစ်သည့် LEAPMOTOR ဘက်ထရီ ပါဝင်ပြီး ၎င်းသည် Solar မှရရှိသောမီး သို့မဟုတ် လိုင်းမီးလာချိန်တွင် အရန်မီးအဖြစ် သိုလှောင်ထားပေးမည့် အိမ်သုံးဧရာမ Powerbank ကြီးပင် ဖြစ်သည်။
၎င်း၏ဘေးတွင် တစ်အိမ်လုံး၏ မီးအားကို အလိုအလျောက် စီမံခန့်ခွဲပေးပြီး လျှပ်စစ်စီးကြောင်း ပြောင်းလဲပေးသည့် နှလုံးသားသဖွယ်ဖြစ်သော Inverter စက်အသေးလေး တပ်ဆင်ထားသည်။ ထို့အပြင် အစိုးရမီးလိုင်း (Grid)၊ မီးသုံးစွဲမှုတိုင်းတာသည့် မီတာ (Meter) နှင့် အိမ်တွင်းမီးလိုင်းများကို ဖြန့်ဝေပေးသည့် မိန်းဘုတ် (Distribution Box) တို့နှင့် စနစ်တကျ ချိတ်ဆက်ထားခြင်းဖြစ်သည်။

တရုတ် EV နည်းပညာဖွံ့ဖြိုးတိုးတက်မှုများကို နိုင်ငံတော်သမ္မတ လေ့လာ၊ Leapmotor နှင့် ပူးပေါင်းဆောင်ရွက်ရေး အလားအလာများ ဆွေးနွေး

တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၁၉ ရက် နံနက်ပိုင်းတွင် ဟန်ကျိုးမြို့ရှိ တရုတ်နိုင်ငံ၏ ထိပ်တန်းလျှပ်စစ်မော်တော်ယာဉ် (EV) ထုတ်လုပ်ရေးကုမ္ပဏီတစ်ခုဖြစ်သော Leapmotor ကုမ္ပဏီသို့ သွားရောက်၍ လုပ်ငန်းဆောင်ရွက်နေမှုများကို ကြည့်ရှုလေ့လာခဲ့ကြောင်း သိရသည်။
ကုမ္ပဏီတာဝန်ရှိသူများက EV မော်တော်ယာဉ် ထုတ်လုပ်ရေးလုပ်ငန်းစဉ်များ၊ သုတေသနနှင့် ဖွံ့ဖြိုးတိုးတက်ရေးလုပ်ငန်းများ၊ နောက်ဆုံးပေါ် မောင်းနှင်မှုနည်းပညာများနှင့်ပတ်သက်၍ ရှင်းလင်းတင်ပြခဲ့ရာ နိုင်ငံတော်သမ္မတက သိရှိလိုသည်များကို မေးမြန်းဆွေးနွေးခဲ့ပြီး ထုတ်လုပ်ရေးလုပ်ငန်းစဉ်များကို လှည့်လည်ကြည့်ရှုခဲ့သည်။
Leapmotor ကုမ္ပဏီသည် တရုတ်နိုင်ငံ၏ EV စက်မှုလုပ်ငန်းတွင် လျင်မြန်စွာ ကြီးထွားလာသည့် နည်းပညာအခြေပြုကုမ္ပဏီတစ်ခုဖြစ်ပြီး အရည်အသွေးမြင့် လျှပ်စစ်မော်တော်ယာဉ်များနှင့် စမတ်မောင်းနှင်မှုနည်းပညာများကို ဖွံ့ဖြိုးထုတ်လုပ်လျက်ရှိကြောင်း သိရသည်။
ကုမ္ပဏီ၏ e-Drive စနစ်နှင့် Torque Vectoring Control (TVC) နည်းပညာပါဝင်သည့် EDS စနစ်များသည် ယာဉ်၏ မောင်းနှင်နိုင်စွမ်း၊ တည်ငြိမ်မှုနှင့် လုံခြုံရေးစွမ်းဆောင်ရည်များကို မြှင့်တင်ပေးနိုင်ကြောင်း ရှင်းလင်းတင်ပြခဲ့သည်။
ထို့ပြင် Leapmotor ကုမ္ပဏီသည် EV ထုတ်လုပ်ရေးလုပ်ငန်းများအပြင် ဘက်ထရီနည်းပညာကို အခြေခံသည့် Smart Energy Storage System များကိုပါ ဖွံ့ဖြိုးထုတ်လုပ်လျက်ရှိကြောင်း သိရသည်။
အဆိုပါစနစ်များသည် နေရောင်ခြည်စွမ်းအင် (Solar Energy) နှင့် ချိတ်ဆက်အသုံးပြုနိုင်ပြီး လျှပ်စစ်ဓာတ်အားကို ကြိုတင်သိုလှောင်ထားကာ လိုအပ်သည့်အချိန်တွင် အရန်ဓာတ်အားအဖြစ် အသုံးပြုနိုင်သည့် စမတ်စွမ်းအင်စနစ်များဖြစ်ကြောင်း ရှင်းလင်းတင်ပြခဲ့သည်။
ယင်းစနစ်များတွင် ဘက်ထရီသိုလှောင်မှုယူနစ်များ၊ Inverter စနစ်များနှင့် Cloud Platform အခြေပြု စီမံခန့်ခွဲမှုနည်းပညာများ ပါဝင်ပြီး ဓာတ်အားထုတ်လုပ်မှု၊ သိုလှောင်မှုနှင့် သုံးစွဲမှုအခြေအနေများကို အချိန်နှင့်တစ်ပြေးညီ စောင့်ကြည့်ထိန်းချုပ်နိုင်ကြောင်း သိရသည်။
နိုင်ငံတော်သမ္မတသည် အဆိုပါ EV နည်းပညာများနှင့် Smart Energy Storage စနစ်များကို စိတ်ဝင်စားစွာ ကြည့်ရှုလေ့လာခဲ့ပြီး မြန်မာနိုင်ငံ၏ စွမ်းအင်နှင့် သယ်ယူပို့ဆောင်ရေးကဏ္ဍ ဖွံ့ဖြိုးတိုးတက်ရေးအတွက် အသုံးချနိုင်မည့် အတွေ့အကြုံများရရှိစေရေး ရည်ရွယ်၍ လေ့လာခဲ့ခြင်းဖြစ်ကြောင်း သိရသည်။

သဘာဝပတ်ဝန်းကျင်ထိခိုက်မှုနည်းသည့် အဆင့်မြင့်ကုန်ကြမ်းနည်းပညာများကို နိုင်ငံတော်သမ္မတ ဦးမင်းအောင်လှိုင် လေ့လာ

တရုတ်ပြည်သူ့သမ္မတနိုင်ငံသမ္မတ မစ္စတာရှီကျင့်ဖျင်၏ ဖိတ်ကြားချက်အရ တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် (State Visit) ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၁၉ ရက် နံနက်ပိုင်းတွင် ဟန်ကျိုးမြို့ရှိ Zhejiang Qingshi New Material Technology Co., Ltd. သို့ သွားရောက်၍ နည်းပညာမြင့်ကုန်ကြမ်းပစ္စည်းများ သုတေသနပြုထုတ်လုပ်နေမှုများကို ကြည့်ရှုလေ့လာခဲ့ကြောင်း သိရသည်။
နိုင်ငံတော်သမ္မတအား ကုမ္ပဏီတာဝန်ရှိသူများက နည်းပညာမြင့်ကုန်ကြမ်းပစ္စည်းများ သုတေသနပြုထုတ်လုပ်နေမှု၊ စက်မှုလုပ်ငန်းများတွင် အသုံးပြုသည့် ပစ္စည်းအသစ်များ ဖွံ့ဖြိုးတိုးတက်ရေးဆောင်ရွက်နေမှုနှင့် သဘာဝပတ်ဝန်းကျင်ထိခိုက်မှု လျှော့ချနိုင်ရေးအတွက် ဆောင်ရွက်နေသည့် Green Industry နည်းပညာများကို ရှင်းလင်းတင်ပြခဲ့ရာ နိုင်ငံတော်သမ္မတက သိရှိလိုသည်များကို မေးမြန်းဆွေးနွေးခဲ့ပြီး ထုတ်လုပ်မှုလုပ်ငန်းစဉ်များကို လှည့်လည်ကြည့်ရှုလေ့လာခဲ့သည်။
Zhejiang Qingshi New Material Technology Co., Ltd. သည် နည်းပညာမြင့်ပစ္စည်းအသစ်များကို သုတေသနပြုထုတ်လုပ်နေသည့် ကုမ္ပဏီတစ်ခုဖြစ်ပြီး ခေတ်မီစက်မှုလုပ်ငန်းများတွင် အသုံးပြုသည့် အင်ဂျင်နီယာသုံး ပလတ်စတစ်ကုန်ကြမ်းများ၊ အဆင့်မြင့်အစိုဓာတ်ကာကွယ်ပစ္စည်းများ၊ အီလက်ထရွန်နစ်လုပ်ငန်းနှင့် မော်တော်ယာဉ်လုပ်ငန်းများတွင် အသုံးပြုသည့် နည်းပညာမြင့်ကုန်ကြမ်းများကို အဓိကထုတ်လုပ်လျက်ရှိသည်။
ကုမ္ပဏီ၏ ထူးခြားသော သုတေသနလုပ်ငန်းများအနက် သဘာဝဝါးကုန်ကြမ်းများမှ အဆင့်မြင့်အမျှင်ကုန်ကြမ်းများ ထုတ်လုပ်နိုင်ရေး နည်းပညာလည်း ပါဝင်ကြောင်း သိရသည်။ အဆိုပါနည်းပညာဖြင့် ဝါးကုန်ကြမ်း တန်ချိန် ၂၀၀ မှ ဝါးမျှင်ကုန်ကြမ်း တန်ချိန် ၂၀ ခန့် ထုတ်ယူနိုင်ပြီး အဆိုပါဝါးမျှင်များကို အဆင့်မြင့်အထည်အလိပ်များ၊ ကျန်းမာရေးသုံးပစ္စည်းများနှင့် သဘာဝပတ်ဝန်းကျင်ထိခိုက်မှု နည်းသည့် ထုတ်ကုန်များတွင် အသုံးပြုလျက်ရှိကြောင်း သိရသည်။
ဝါးမျှင်အခြေပြု ထုတ်ကုန်များသည် ပြန်လည်ဖြစ်ထွန်းနိုင်သော သဘာဝအရင်းအမြစ်များကို အခြေခံထုတ်လုပ်ထားခြင်းဖြစ်ပြီး ကာဗွန်ထုတ်လွှတ်မှု လျှော့ချရေးနှင့် ရေရှည်တည်တံ့သော စက်မှုဖွံ့ဖြိုးတိုးတက်ရေးကို အထောက်အကူပြုသည့် Green Industry နည်းပညာတစ်ရပ်အဖြစ် အသိအမှတ်ပြုခံထားရကြောင်း သိရသည်။
ထို့အပြင် သဘာဝဝါးမျှင်နှင့် ဂွမ်းစစ်စစ်တို့ကို ပေါင်းစပ်အသုံးပြုထားသော အဆင့်မြင့်အထည်အလိပ်များ၊ အိပ်ရာဝင်ဝတ်စုံများနှင့် ကျန်းမာရေးအထောက်အကူပြု အဝတ်အထည်များကိုလည်း ထုတ်လုပ်လျက်ရှိပြီး ယင်းထုတ်ကုန်များသည် လေဝင်လေထွက်ကောင်းမွန်ခြင်း၊ စိုထိုင်းဆစုပ်ယူနိုင်ခြင်းနှင့် သက်တောင့်သက်သာ ဝတ်ဆင်နိုင်ခြင်းတို့ကြောင့် နိုင်ငံတကာဈေးကွက်များတွင် လူကြိုက်များလာလျက်ရှိကြောင်း သိရသည်။
နိုင်ငံတော်သမ္မတသည် လေ့လာရေးခရီးစဉ်အတွင်း နည်းပညာမြင့်ကုန်ကြမ်းပစ္စည်းများ ထုတ်လုပ်မှု၊ သုတေသနနှင့် ဖွံ့ဖြိုးရေးလုပ်ငန်းများ၊ စက်မှုကုန်ထုတ်လုပ်မှုကဏ္ဍတွင် နည်းပညာအသုံးချဆောင်ရွက်နေမှုများကို စိတ်ဝင်တစား ကြည့်ရှုလေ့လာခဲ့ပြီး မြန်မာနိုင်ငံ၏ စက်မှုဖွံ့ဖြိုးတိုးတက်ရေးလုပ်ငန်းများတွင် အသုံးချနိုင်မည့် အတွေ့အကြုံများကို ရယူခဲ့ကြောင်း သိရသည်။

ပြင်းအား ၃.၄ အဆင့်ငလျင် သြစတြေးလျ ရွှေတွင်းကြီးတွင် လှုပ်

သောကြာနေ့အစောပိုင်းက ပြင်းအား ၃.၄ အဆင့်ရှိ ငလျင်လှုပ်ခတ်ပြီးနောက် သြစတြေးလျနိုင်ငံ ဆစ်(ဒ)နီမြို့အနောက်ဘက်ရှိ အဓိကရွှေတွင်းတစ်ခုတွင် လုပ်ငန်းများ ခေတ္တရပ်နားထားသည်။
နူးဆော့သ်ဝေးလ်ပြည်နယ် ဆစ်(ဒ)နီမြို့အနောက်ဘက် ၂၁၀ ကီလိုမီတာအကွာ ကာဒီရာ ရွှေတူးဖော်မှုဇုံ အတွင်းရှိ အနက် ၁ ကီလိုမီတာတွင် ငလျင်လှုပ်ခတ်ခဲ့ကြောင်း ဂျီအိုဆိုင်းယင့်စ် ဩစတြေးလျက ပြောကြားခဲ့ပါသည်။
သတ္တုတွင်း ပိုင်ရှင်နှင့် အော်ပရေတာဖြစ်သော နူးမောင့်တ်ကော်ပိုရေးရှင်းက မြေအောက်ဝန်ထမ်းများအားလုံးကို မြေပြင်ပေါ်သို့ ဘေးကင်းစွာ ပြန်လည်ရောက်ရှိခဲ့ပြီး ထိခိုက်ဒဏ်ရာရရှိမှုမရှိကြောင်း ထုတ်ပြန်ချက်တွင် ဖော်ပြထားသည်။
“စစ်ဆေးမှုတွေ လုပ်ဆောင်နေချိန်မှာ မြေအောက်လုပ်ငန်းတွေကို ခေတ္တရပ်ထားပါတယ်” ဟု ၎င်းကဆိုသည်။
ကာဒီရာ သည် သြစတြေးလျနိုင်ငံ၏ အကြီးဆုံးရွှေတူးဖော်ရေး လုပ်ငန်းတစ်ခုဖြစ်ပြီး ၂၀၂၄ တွင် ၄၆၄,၀၀၀ အောင်စနှင့် ၂၀၂၅ တွင် ၃၈၅,၀၀၀ အောင်စရှိသည်။
ဧပြီလ ၁၄ ရက် နေ့က လှုပ်ခတ်ခဲ့သော ပြင်းအား ၄ ဒသမ ၅ အဆင့်ရှိ ငလျင်ကြောင့် ပျက်စီးမှုများကြောင့် ဧပြီလနှင့် မေလတို့တွင် မိုင်းတွင်းလုပ်ငန်းများကို ရက်သတ္တပတ်များစွာ ဆိုင်းငံ့ထားခဲ့သည်။
ဆစ်(ဒ)နီမြို့၏အနောက်ဘက် ၇၅၀ ကီလိုမီတာအကွာရှိ ဝေးလံခေါင်သီသော ဝီလ်ကာန်နီရာ အနီး၌ ပြင်းအား ၃.၂ အဆင့်ရှိ ငလျင်လှုပ်ခတ်ပြီးနောက် သောကြာနေ့တွင် NSW တွင် မှတ်တမ်းတင်ထားသော ကာဒီရာ မြေငလျင်သည် ဒုတိယမြောက် လှုပ်ခတ်မှုဖြစ်သည်။

သထုံမြို့နယ်၌ မိုးသည်းထန်လေပြင်းတို-က် အမြင့်ပေ (၅၀) ခန့်ရှိညောင်ပင်ပြိုလဲ ဓာတ်အားလိုင်းတိုင်(၂၀)၊ ဓာတ်အားလိုင်းကြိုးနှင့် ဆက်စပ်ပစ္စည်းများပျ-က်စီး

မွန်ပြည်နယ်၊ သထုံမြို့နယ်၌ ဇွန် ၁၈ ရက်က မိုးသည်းထန်စွာရွာသွန်းပြီး လေပြင်းတို-က်ခတ်မှုဖြစ်ပေါ်ရာမှ နေ့လည် ၃ နာရီခွဲခန့်တွင် အမြင့်ပေ(၅၀)ခန့်ရှိ ညောင်ပင်ပြိုလဲကျခဲ့ကြောင်း သိရသည်။
အဆိုပါ ညောင်ပင်သည် သထုံမြို့နယ်၊ မြေနီကုန်းကျေးရွာ၏ မော်လမြိုင်-ရန်ကုန်သွားကားလမ်းမိုင်တိုင်အမှတ် ၈၆/၀ နှင့် ၈၆/၁ ကြားတွင်ရှိကာ လုံးပတ်(၁၀) ပေခန့်၊ အမြင့်ပေ(၅၀)ပေခန့်ရှိသော သက်တမ်းရင့်ညောင်ပင်ကြီးဖြစ်ကာ အမြစ်မှပြိုလဲကျခဲ့ခြင်းဖြစ်ကြောင်း သိရသည်။
ညောင်ပင်ပြိုလဲမှုကြောင့် ၁၁ ကေဗွီ ဇရစ်ချောင်ဖီဒါလိုင်းတွင် လက်ရှိဓာတ်အားဖြန့်ဖြူးထားသော ဓာတ် အားလိုင်းတိုင်(၁၀)တိုင်၊ Tension (၂)တိုင်နှင့် Suspension (၈)တိုင်၊ ဓာတ်အားလိုင်းကြိုးများနှင့် ဆက်စပ်ပစ္စည်းများပျ-က်စီးခဲ့ကြောင်း သိရသည်။
ထို့ကြောင့် လျှပ်စစ်ကျွမ်းကျင်ဝန်ထမ်းများကပျ-က်စီးသွားသော ဓာတ်အားလိုင်းတိုင်များ၊ ဓာတ်အားလိုင်းကြိုးများကိုပြန်လည်ပြင်ဆင်လျက်ရှိကြောင်း သိရသည်။

ရုရှား၊ ဘယ်လာရုစ်နှင့် ကာဇက်စတန်တို့နှင့် လွှတ်တော်ဆက်ဆံရေးမြှင့်တင်ရေး ချစ်ကြည်ရင်းနှီးမှုအသင်းများ အမျိုးသားလွှတ်တော်၌ ဖွဲ့စည်း

မြန်မာနိုင်ငံနှင့် ရုရှား၊ ဘယ်လာရုစ်၊ ကာဇက်စတန်နိုင်ငံတို့အကြား လွှတ်တော်ချင်း ပူးပေါင်းဆောင်ရွက်မှုများ တိုးမြှင့်ဆောင်ရွက်နိုင်ရေးအတွက် မြန်မာ-ရုရှား၊ မြန်မာ-ဘယ်လာရုစ်နှင့် မြန်မာ-ကာဇက်စတန် လွှတ်တော်ချင်း ချစ်ကြည်ရင်းနှီးရေးအသင်းများကို ဇွန် ၁၈ ရက် နံနက်ပိုင်းက ကျင်းပသည့် တတိယအကြိမ် အမျိုးသားလွှတ်တော် ဒုတိယပုံမှန်အစည်းအဝေး (သတ္တမနေ့) တွင် ဖွဲ့စည်းခဲ့ကြောင်း သိရသည်။
မြန်မာ-ရုရှား လွှတ်တော်ချင်းချစ်ကြည်ရင်းနှီးရေးအသင်းကို ဧရာဝတီတိုင်းဒေသကြီး အမျိုးသားလွှတ်တော်ကိုယ်စားလှယ်အမှတ် (၁၀) ဦးချစ်ဆွေက ဥက္ကဋ္ဌအဖြစ်လည်းကောင်း၊ တပ်မတော်သားကိုယ်စားလှယ် ဗိုလ်မှူးဇဝနက အတွင်းရေးမှူးအဖြစ်လည်းကောင်း တာဝန်ယူကာ အဖွဲ့ဝင် (၅) ဦးဖြင့် ဖွဲ့စည်းခဲ့သည်။
အလားတူ မြန်မာ-ဘယ်လာရုစ် လွှတ်တော်ချင်းချစ်ကြည်ရင်းနှီးရေးအသင်းကို တပ်မတော်သားကိုယ်စားလှယ် ဗိုလ်မှူးချုပ်သန်းထွန်းအောင်က ဥက္ကဋ္ဌအဖြစ် ဆောင်ရွက်မည်ဖြစ်ပြီး တပ်မတော်သားကိုယ်စားလှယ် ဗိုလ်ကြီးဒေါ်စုမြတ်ဝေက အတွင်းရေးမှူးအဖြစ် တာဝန်ယူကာ အဖွဲ့ဝင် (၅) ဦးဖြင့် ဖွဲ့စည်းခဲ့ကြောင်း သိရသည်။
ထို့ပြင် မြန်မာ-ကာဇက်စတန် လွှတ်တော်ချင်းချစ်ကြည်ရင်းနှီးရေးအသင်းကို ကချင်ပြည်နယ် အမျိုးသားလွှတ်တော်ကိုယ်စားလှယ်အမှတ် (၁) ဦးရခွီဖုန်က ဥက္ကဋ္ဌအဖြစ် ဆောင်ရွက်မည်ဖြစ်ပြီး တပ်မတော်သားကိုယ်စားလှယ် ဗိုလ်မှူးတင့်လွင်အေးက အတွင်းရေးမှူးအဖြစ် တာဝန်ယူကာ အဖွဲ့ဝင် (၅) ဦးဖြင့် ဖွဲ့စည်းခဲ့ကြောင်း သိရသည်။
ယင်းအသင်းများ ဖွဲ့စည်းခြင်းသည် သက်ဆိုင်ရာနိုင်ငံများနှင့် လွှတ်တော်အဆင့် ဆက်ဆံရေး၊ အတွေ့အကြုံဖလှယ်ရေးနှင့် ကဏ္ဍစုံပူးပေါင်းဆောင်ရွက်မှုများ ပိုမိုတိုးမြှင့်နိုင်ရေးအတွက် ရည်ရွယ်ခြင်းဖြစ်ကြောင်း သိရသည်။
ထို့အပြင် အစည်းအဝေးအတွင်း တောင်သူလယ်သမားရေးရာကော်မတီ၊ လူငယ်၊ အမျိုးသမီး၊ ကလေးသူငယ်နှင့် သက်ကြီးရွယ်အိုအခွင့်အရေးဆိုင်ရာကော်မတီနှင့် ပညာရေးမြှင့်တင်မှုကော်မတီတို့ကိုလည်း ဖွဲ့စည်းခဲ့ကြောင်း သိရသည်။

ပြည်တွင်းစက်သုံးဆီဈေး (၉)ပတ်ဆက်တိုက် ကျဆင်း

ဒီဇယ်တစ်လီတာ ကျပ် ၃၉၀၀ ဝန်းကျင်အထိ ကျဆင်းလာ
စက်သုံးဆီဈေးနှုန်းသည် သင်္ကြန်ကျော်ကာလမှစတင်ကာ (၉)ပတ်ဆက်တိုက် ကျဆင်းလာခဲ့ပြီး ယခုတစ်ပတ်အတွင်း ဓာတ်ဆီတစ်လီတာ ကျပ် ၃၇၈၅ ကျပ်နှင့် ဒီဇယ်တစ်လီတာ ကျပ် ၃၉၀၀ ဝန်းကျင်အထိ ကျဆင်းလာကြောင်း ဈေးကွက်အတွင်းမှ သိရသည်။
နှစ်လကျော်အတွင်း ဒီဇယ်တစ်လီတာလျှင် ကျပ် ၃၀၀၀ ကျော် ကျဆင်းခဲ့သည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ယနေ့ (ဇွန် ၁၉ ရက်) တွင် ထုတ်ပြန်လိုက်သည့် ရည်ညွှန်းဈေးနှုန်းများအရ ရန်ကုန်မြို့တွင် စက်သုံးဆီဈေးနှုန်းများမှာ တစ်လီတာလျှင် –
ဓာတ်ဆီ 92 Ron: ၃,၇၈၅ ကျပ်၊
ဓာတ်ဆီ 95 Ron: ၃,၈၃၀ ကျပ်၊
ဒီဇယ် (HSD 500 ppm): ၃,၉၁၀ ကျပ်၊
ပရီမီယံဒီဇယ် (HSD 50 ppm/10 ppm): ၄,၇၂၀ကျပ် အသီးသီး ဖြစ်သည်။ ဇွန် ၂၅ ရက်အထိ ယင်းဈေးနှုန်းအတိုင်းသာ ရှိနေမည်ဖြစ်သည်။
ယနေ့တွင် ကမ္ဘာ့ရေနံဈေးနှုန်းအနေဖြင့် ရေနံစိမ်းတစ်စည်လျှင် ၇၅ ဒေါ်လာဝန်းကျင်ရှိနေကာ ယခင်တစ်ပတ်ထက် ရေနံစိမ်းတစ်စည်လျှင် ၁၀ ဒေါ်လာဝန်းကျင် ကျဆင်းခဲ့ခြင်းဖြစ်သည်။
ပြည်တွင်းစက်သုံးဆီဈေးမှာ ဓာတ်ဆီရော ဒီဇယ်ပါ ဈေးကျဆင်းလာခြင်း ဖြစ်သည်။
ယခုတစ်ပတ်စက်သုံးဆီဈေးနှုန်းကို ယခင်တစ်ပတ်ဈေးနှုန်းနှင့် နှိုင်းယှဉ်ပါက
ဓာတ်ဆီ 92 Ron: တစ်လီတာလျှင် ၉၅ ကျပ်၊
ဓာတ်ဆီ 95 Ron: တစ်လီတာလျှင် ၈၅ ကျပ်၊
ဒီဇယ် တစ်လီတာလျှင် ၈၅ ကျပ် ၊
ပရီမီယံဒီဇယ်တစ်လီတာလျှင် ကျပ် ၈၀ အထိ ထပ်မံစျေးကျလာခြင်းဖြစ်သည်။
ဧပြီ ၂၄ ရက် ရည်ညွှန်းဈေးနှုန်းများနှင့် နှိုင်းယှဉ်ပါက သီတင်းပတ်(၉)ပတ်အတွင်း –
ဓာတ်ဆီ 92 Ron တစ်လီတာလျှင် ၉၅၀ ကျပ်၊
ဓာတ်ဆီ 95 Ron တစ်လီတာလျှင် ၁၁၁၅ ကျပ်၊
ဒီဇယ် တစ်လီတာလျှင် ၂၅၇၅ ကျပ်၊
ပရီမီယံဒီဇယ် တစ်လီတာလျှင် ၃၀၃၅ ကျပ် စျေးကျလာခဲ့သည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေဖြင့် စက်သုံးဆီဈေးနှုန်းများကို MOPS ဈေးနှုန်းပေါ်တွင် အခြေခံ၍ နေ့စဉ်တွက်ချက်ထုတ်ပြန်ပေးလျက်ရှိပြီး၊ သတ်မှတ်ရည်ညွှန်းဈေးထက် ပိုမိုရောင်းချခြင်း သို့မဟုတ် ဈေးနှုန်းမမှန်ကန်ခြင်းများရှိပါက ကော်မတီ၏ ဖုန်းနံပါတ်များဖြစ်သော ၀၁-၄၀၀၃၉၇၃ နှင့် ၀၉-၂၅၄၅၂၅၄၇၇ တို့သို့ ဆက်သွယ်တိုင်ကြားနိုင်ကြောင်း အသိပေးထားသည်။