မြန်မာ ယူ- ၁၇ အသင်းရဲ့ တရုတ်နိုင်ငံ လေ့ကျင့်ရေးခြေစမ်းခရီးစဥ် ပျက်ပြယ်

မြန်မာနိုင်ငံဘောလုံးအဖွဲ့ချုပ် (MFF) ဟာ မြန်မာ ယူ-၁၇ လူငယ်အသင်းကို ၂၀၂၆ အာဆီယံ ယူ-၁၇ ချန်ပီယံရှစ်ပြိုင်ပွဲ မတိုင်မီ တရုတ်နိုင်ငံကို စေလွှတ်ပြီး လေ့ကျင့်ရေးခြေစမ်းပွဲများ ယှဉ်ပြိုင်ကစားဖို့ စီစဉ်ထားခဲ့ပေမဲ့ ပျက်ပြယ်ခဲ့ပြီဖြစ်ကြောင်း သိရပါတယ်။
မြန်မာ ယူ-၁၇ လူငယ်အသင်းဟာ ၂၀၂၆ ခုနှစ်အတွင်း အဓိက နိုင်ငံတကာပြိုင်ပွဲနှစ်ခု ဝင်ရောက်ယှဉ်ပြိုင်ရန်ရှိနေပြီး ယင်းပြိုင်ပွဲများမှာ ထိုက်သင့်တဲ့အောင်မြင်မှုများရရှိဖို့ မြန်မာနိုင်ငံဘောလုံးအဖွဲ့ချုပ် (MFF) က ရည်ရွယ်ထားကြောင်း သိရပါတယ်။
ဒါကြောင့် MFF ဟာ မြန်မာ ယူ-၁၇ လူငယ်အသင်းကို ၂၀၂၆ အာဆီယံ ယူ-၁၇ ချန်ပီယံရှစ်ပြိုင်ပွဲ မတိုင်မီ ဖေဖော်ဝါရီလဆန်းမှာ တရုတ်နိုင်ငံကို စေလွှတ်ပြီး လေ့ကျင့်ရေးခြေစမ်းပွဲများ ယှဉ်ပြိုင်ကစားဖို့ စီစဉ်ထားခဲ့ပေမဲ့ ယခုအခါအကြောင်းအမျိုးမျိုးကြောင့် ပျက်ပြယ်ခဲ့ခြင်းဖြစ်ကြောင်း သိရပါတယ်။
MFF ဟာ မြန်မာ ယူ-၁၇ လူငယ်အသင်းကို ၂၀၂၆ အာဆီယံ ယူ-၁၇ ချန်ပီယံရှစ်ပြိုင်ပွဲ မတိုင်မီ တရုတ်နဲ့ ကာတာနိုင်ငံများကို စေလွှတ်ပြီး လေ့ကျင့်ရေးခြေစမ်းပွဲများ ယှဉ်ပြိုင်ကစားစေရန် စီစဉ်ထားခြင်းဖြစ်ပြီး လာမယ့်မတ်လအတွင်း ကာတာနိုင်ငံကို စေလွှတ်ကာ လေ့ကျင့်ရေးခြေစမ်းပွဲများ ယှဉ်ပြိုင်ကစားစေမှာဖြစ်ကြောင်း သိရပါတယ်။
ဒါ့အပြင် MFF ဟာ မြန်မာ ယူ-၁၇ လူငယ်အသင်းကို ၂၀၂၆ အာဆီယံ ယူ-၁၇ ချန်ပီယံရှစ်ပြိုင်ပွဲ မတိုင်မီ မတ်လအတွင်း အိန္ဒိယ ယူ-၁၇ အသင်းနဲ့လည်း ခြေစမ်းပွဲများ ယှဉ်ပြိုင်ကစားရန်စီစဉ်နေကြောင်း သိရပါတယ်။
မြန်မာ ယူ-၁၇ လူငယ်အသင်းဟာ ၂၀၂၆ ခုနှစ်အတွင်း အဓိက နိုင်ငံတကာပြိုင်ပွဲ နှစ်ခုဖြစ်တဲ့ ၂၀၂၆ အာဆီယံ ယူ-၁၇ ချန်ပီယံရှစ်ပြိုင်ပွဲ နဲ့ ၂၀၂၆ အာရှဖလား ယူ-၁၇ ပြိုင်ပွဲတို့ကို ဝင်ရောက်ယှဉ်ပြိုင်သွားရဖို့ ရှိနေပါတယ်။

အယ်လ်ဟီလာအသင်းထံ ရုတ်တရက်ပြောင်းရွှေ့ခဲ့တဲ့ ဘန်ဇီမာ

အယ်လ်အစ်တီဟတ်အသင်းတိုက်စစ်မှူး ဘန်ဇီမာကတော့ အဓိကပြိုင်ဘက်ကလပ် အယ်လ်ဟီလာအသင်းထံ
ရုတ်တရက် ပြောင်းရွှေ့ခဲ့ပါတယ်။

ဘန်ဇီမာ(၃၈ နှစ်)အနေနဲ့ အယ်လ်အစ်တီဟတ်အသင်းမှာ တစ်နှစ် ယူရို သန်း ၁၀၀ နီးပါးရခဲ့ပေမဲ့ စာချုပ်
သစ်ကိစ္စ အဆင်မပြေလို့ အသင်းပြောင်းခဲ့တာပါ။

အယ်လ်အစ်တီဟတ်အသင်းက လစာမပေးဘဲ ပုံရိပ်မူပိုင်ခွင့်သာပေးမယ့် ကမ်းလှမ်းချက်က ဘန်ဇီမာနဲ့
လမ်းခွဲကို ရောက်ရှိစေခဲ့ပါတယ်။

ဘန်ဇီမာဟာ အယ်လ်ဟီလာအသင်းနဲ့ ၁၈ လသက်တမ်းရှိ စာချုပ်တစ်ရပ်ကို လက်မှတ်ရေးထိုးခဲ့ပါတယ်။
ရီးယဲလ်မက်ဒရစ်တိုက်စစ်မှူးဟောင်း ဘန်ဇီမာဟာ အခုရာသီ ပြိုင်ပွဲစုံ ၂၁ ပွဲကစားရာမှာ ၁၆ ဂိုး သွင်းယူ
နိုင်ခဲ့ပါတယ်။

အယ်လ်ဟီလာအသင်းက ဆော်ဒီလိဂ်မှာ ၄၇ မှတ်နဲ့ အယ်လ်နာဆာအသင်းကို တစ်မှတ်အသာ ဦးဆောင်
နေပါတယ်။

ရန်းစ်လူငယ်နောက်ခံလူ ယက်ကဲကို နွေရာသီမှာခေါ်ယူဖို့ လီဗာပူးလ်အသင်း သဘောတူညီမှုရရှိ

လီဗာပူးလ်အသင်းဟာ ရန်းစ်အသင်းက ပြင်သစ်လူငယ်နောက်ခံလူ ဂျဟေမီယက်ကဲကို
နွေရာသီမှာခေါ်ယူဖို့ သဘောတူညီမှု ရခဲ့ပါတယ်။

ပြင်သစ်ယူ-၂၁လက်ရွေးစင် ယက်ကဲ(၂၀ နှစ်)အနေနဲ့ လာမယ့်နွေရာသီကာလကျမှ လီဗာပူးလ်
အသင်းနဲ့ လာရောက်ပူးပေါင်းမှာဖြစ်တယ်။

ယက်ကဲရဲ့ကနဦးပြောင်းရွှေ့ကြေးက ပေါင် ၅၅ သန်းနဲ့ add-ons ကြေး ပေါင် ငါးသန်းရှိမယ်လို့
သိရပါတယ်။

၎င်းဟာ လီဗာပူးလ်အသင်းနဲ့ ၂၀၃၁ ခုနှစ်အထိ ငါးနှစ်စာချုပ် ချုပ်ဆိုခဲ့ပြီး တစ်နှစ်သက်တမ်းတိုးခွင့်လည်း ပါဝင်ပါတယ်။
ယက်ကဲအနေနဲ့ အခုရာသီမှာ ရန်းစ်အသင်းအတွက် ၁၈ ပွဲ ကစားပေးထားပါတယ်။

အခုအပြောင်းအရွှေ့ကာလအတွင်း ချယ်လ်ဆီးအသင်းနဲ့လည်း ဆွေးနွေးမှုတွေ ပြုလုပ်ခဲ့ပြီး လီဗာပူးလ်ရဲ့ကမ်းလှမ်းမှုကို မကျော်လွန်ခဲ့ပါဘူး။

KIA အဖွဲ့နှင့် KPDF ပူးပေါင်းအဖွဲ့များ ပစ်ခတ်သည့် လက်နက်ကြီးကျည် ဖားကန့်မြို့ရှိ အထက ကျောင်းအတွင်း ကျရောက်ပေါက်ကွဲသဖြင့် ​ကျောင်းသား​ကျောင်းသူ ကလေးငယ်နှစ်ဦး ဗုံးစထိမှန်ဒဏ်ရာရ

KIA အဖွဲ့နှင့် KPDF ပူးပေါင်းအဖွဲ့များ ပစ်ခတ်သည့် လက်နက်ကြီးကျည် ဖားကန့်မြို့ အခြေခံပညာ အထက်တန်းကျောင်းအတွင်း ကျရောက်ပေါက်ကွဲသဖြင့် အသက် ၁၀ နှစ်အရွယ် ​​ကျောင်းသား ကျောင်းသူ ကလေးငယ်နှစ်ဦး ဗုံးစထိမှန်ဒဏ်ရာရရှိခဲ့ကြောင်း သိရသည်။
ဖေဖော်ဝါရီ ၂ ရက် နံနက်ပိုင်းက KIA အဖွဲ့နှင့် KPDF အဖွဲ့များသည် ဖားကန့်မြို့အတွင်းသို့ မြို့၏အနောက် တောင်ဘက် မီတာ ၃၀၀၀ ခန့်အကွာမှ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်းဖြစ်​ကြောင်း သိရသည်။
ထိုသို့ပစ်ခတ်မှု​ကြောင့် လက်နက်ကြီးကျည်များသည် အခြေခံပညာအထက်တန်းကျောင်း(ဖားကန့်)အဆောက် အအုံနှင့် အနီးဝန်းကျင်သို့ ကျရောက်ပေါက်ကွဲခဲ့ပြီး စာသင်ဆောင်အဆောက်အအုံများ ပျက်စီးဆုံးရှုံးခဲ့ပြီး Grade-4 တွင် တက်ရောက်ပညာသင်ယူလျက်ရှိသည့် ဖားကန့်မြို့၊ ငှက်ပျောတောရပ်ကွက်နေ မောင်လင်းခန့်ကိုနှင့် ဂျန်ဂတ်ကျေးရွာနေ မရွန်ဒင့်တို့တွင် ဗုံးစထိမှန်ဒဏ်ရာများ ရရှိခဲ့ကြောင်း သိရှိရပြီး အဆိုပါ ထိခိုက်ဒဏ်ရာရရှိခဲ့သည့် ကလေးငယ်နှစ်ဦးအား လိုအပ်သည့် ဆေးဝါးကုသမှုများ ဆောင်ရွက်ပေးလျက် ရှိကြောင်း သိရသည်။

ထိုင်းတွင် မြန်မာလုပ်သား ၁ ဦးကို အကြောင်းမဲ့ အလုပ်ထုတ်သည့် အလုပ်ရှင်အား တရားစွဲဆိုမည်

ထိုင်းနိုင်ငံ အယုဒ္ဓယမြို့ရှိကားအပိုပစ္စည်းစက်ရုံတစ်ရုံမှ အလုပ်ရှင်တစ်ဦးသည် မြန်မာ အလုပ်သမား၁၈ ဦးကို အကြောင်းမဲ့ အလုပ်ထုတ်ခဲ့သည့်အတွက် ၎င်းအလုပ်ရှင်အားတရား စွဲဆိုရန် ဆောင်ရွက်နေကြောင်း ကူညီပေးနေသည့် MHACအဖွဲ့မှ သိရသည်။
မြန်မာအလုပ်သမားများသည် ၂၀၂၅ ခုနှစ် မေ ၂၀ ရက်တွင် အလုပ်ထုတ်ခံခဲ့ရခြင်းဖြစ်ပြီး အလုပ်သမားများနှင့်အတူ MHAC အဖွဲ့က ၂၀၂၅ ခုနှစ်မေ၂၆ ရက်တွင် နယ်မြေခံအလုပ်သမား ကာကွယ်စောင့်ရှောက်ရေးရုံး (ဆဝါဒီကန်)၌ ကူညီမှုစတင်ခဲ့ကြောင်း သိရသည်။
ထိုရုံး၏တာဝန်ရှိသူကအလုပ်သမားများ၏နစ်နာကြေးဆိုင်ရာများအားဆောင်ရွက်ပေးလျက်ရှိပြီး လုပ်ငန်းရှင်အား တရားရုံး၌ တရားစွဲဆိုခြင်းအတွက်ဆက်လက်ဆောင်ရွက်နေကြောင်း MHAC အဖွဲ့က ထုတ်ပြန်ထားသည်။
တရားစွဲဆိုရန်အတွက် ထိုင်းဥပဒေအရ တစ်ဆင့်ချင်းစီသွားရမည် ဖြစ်ကြောင်း၊ သက်ဆိုင်ရာ ဆဝါဒီကန်ရုံးမှ ခရိုင်မြို့တော်ဝန်ကို တင်ရမည်ဖြစ်ပြီးမြို့တော်ဝန်၏ စာကျလာမှသာ တရား ရုံးသွားရမည်ဖြစ်သည့်အတွက် လက်ရှိတွင် မြို့တော်ဝန်ထံစာတင်ထားကြောင်း သိရသည်။

နေပြည်တော်ရှိ ရွှေမြို့ဆိုလာစီမံကိန်းမှ ဓာတ်အားစတင်ထုတ်လွှတ်ရန် စီစဉ်နေ

နေပြည်တော် ကောင်စီနယ်မြေ ဇေယျာသီရိမြို့နယ်ရှိ နေရောင်ခြည်စွမ်းအင်သုံး လျှပ်စစ် ဓာတ်အားပေး ရွှေမြို့ဆိုလာစီမံကိန်းမှ ဇွန်လအတွင်း ဓာတ်အားစတင်ထုတ်လွှတ်နိုင်ရန် ဆောင်ရွက်နေကြောင်း သိရသည်။
အဆိုပါစီမံကိန်းအား ၂၀၂၅ ခုနှစ် ဧပြီလတွင် စတင်ဆောင်ရွက်ခဲ့ခြင်းဖြစ်ပြီး ယခုနှစ် ဇွန်လတွင် ဓာတ်အားစတင်ထုတ်လွှတ်နိုင်တော့မည်ဖြစ်ကာဆိုလာတပ်ဆင်မှုအား ဖေဖော်ဝါရီလအတွင်း အပြီးသတ်တပ်ဆင်သွားမည်ဖြစ်ကြောင်း သိရသည်။
နိုင်ငံတော်၏ လျှပ်စစ်ဓာတ်အားလိုင်းထဲသို့ တိုက်ရိုက်ပို့သွင်းကာဆက်လက်ပြီး လျှပ်စစ်စွမ် းအားဝန်ကြီးဌာန၏ ရွှေမြို့ခွဲရုံထဲသို့ ပို့သွင်းဆောင်ရွက်ပေးသွားမည်ဖြစ်ရာ စီမံကိန်းမှ ဓာတ်အား မဂ္ဂါဝပ် ၂၀၀ နီးပါးထုတ်လွှတ်ပေးနိုင်မည်ဖြစ်ကြောင်း သိရသည်။

စစ်ရေးအရ အမေရိကန်တိုက်ခိုက်ခဲ့ ပါက ဒေသတွင်းစစ်ပွဲတစ်ပွဲ ပေါ်ထွက်လာနိုင်ကြောင်း အီရန်ခေါင်းဆောင် သတိပေး
အမေရိကန်ပြည်ထောင်စုအနေဖြင့် အီရန်ကို စစ်ရေးအရ တိုက်ခိုက်ခဲ့ပါက ဒေသတွင်း စစ်ပွဲ တစ်ခု ပေါ်ထွက်လာလိမ့်မည်ဖြစ်ကြောင်း အီရန်ခေါင်းဆောင် အယာတိုလာအလီခါမေနီက ဖေဖော်ဝါရီ ၁ ရက်တွင် သတိပေးလိုက်သည်။
နျူကလီးယား သဘောတူညီချက်တစ်ရပ်ရယူခြင်းမရှိပါက အီရန်နိုင်ငံကို အရေးယူမည်ဖြစ် ကြောင်း အမေရိကန်သမ္မတဒေါ်နယ်ထရန့် ကအကြိမ်ကြိမ်သတိပေးထားပြီး အရှေ့အလယ်ပိုင်း ဒေသရှိ အမေရိကန်ရေတပ်အင်အားကိုလည်း မြှင့်တင်ထားသည်။
သို့ရာတွင် အီရန်နိုင်ငံအနေဖြင့် အမေရိကန်ပြည်ထောင်စု၏ စစ်အင်အားကို ကြောက်လန့်နေ လိမ့်မည်မဟုတ်ကြောင်း အီရန်ခေါင်းဆောင်အယာတိုလာခါမေနီက နိုင်ငံပိုင်မီဒီယာများသို့ ထုတ်ဖော်ပြောကြားထားသည်။
အလားတူ အီရန်ကို စစ်ရေးအရ အမေရိကန်ပြည်ထောင်စုက တိုက်ခိုက်ခဲ့ပါက ဒေသတွင်းစစ်ပွဲ တစ်ခု ပေါ်ထွက်လာနိုင်ကြောင်းလည်း အီရန်ခေါင်းဆောင်က သတိပေးထားသည်။
အီရန်ခေါင်းဆောင်များနှင့် အမေရိကန်တာဝန်ရှိသူများအကြား နှုတ်ရေးအားဖြင့် တင်းမာနေ သော်ငြား တွေ့ဆုံဆွေးနွေးပွဲများ ပြန်လည်ကျင်းပရေးအတွက် အသင့်ရှိကြောင်း နှစ်နိုင်ငံစလုံး က သဘောထားပြသထားသည်။
အီရန်နိုင်ငံ၏ ကာကွယ်ရေးစွမ်းပကားကိုချုပ်ကိုင်ကန့်သတ်ရေးအတွက် ရည်ရွယ်ချက်မရှိသည့် ဆွေးနွေးပွဲများ၌ ပါဝင်ရန် အသင့်ရှိကြောင်းအီရန်တာဝန်ရှိသူများက ထုတ်ဖော်ပြောကြားထား သည်။
အမေရိကန်သမ္မတ ဒေါ်နယ်ထရန့်သည်ယခုနှစ် ဇန်နဝါရီလအတွင်း ဖြစ်ပွားခဲ့သည့် အစိုးရ ဆန့်ကျင်ရေးဆန္ဒပြပွဲများကို အီရန်အစိုးရကအကြမ်းဖက်နှိမ်နင်းခဲ့ပြီးနောက် အရှေ့အလယ်ပိုင်း ဒေသ၌ စစ်အင်အားမြှင့်တင်ထားခဲ့သည်။
လက်ရှိအချိန်တွင် အရှေ့ အလယ်ပိုင်းဒေသ၌ အမေရိကန်ရေတပ်မှ လေယာဉ်တင်သင်္ဘော တစ်စင်း၊ ဖျက်သင်္ဘောခြောက်စင်း နှင့် အမြန်တိုက်ရေယာဉ် သုံးစင်း ရောက်ရှိနေကြောင်း သိရသည်။

ထိုင်းနိုင်ငံ ရနောင်းထိန်းသိမ်းရေးစခန်းမှ မြန်မာနိုင်ငံသား ၅၈ ဦးကို ကော့ သောင်းသို့ ပြန်ပို့

ထိုင်းနိုင်ငံ ရနောင်းထိန်းသိမ်းရေးစခန်းမှ မြန်မာနိုင်ငံသား ၅၈ ဦးကိုကော့သောင်းဘက်သို့ ဖေဖော်ဝါရီ ၂ရက်က နေရပ်ပြန်ပို့လိုက်ကြောင်းသိရသည်။
ယခု ဇန်နဝါရီလ၌ နှစ်ကြိမ်နေရပ်ပြန်ပို့ခဲ့ရာတွင် မြန်မာနိုင်ငံသား၁၆၈ ဦးကို ပြန်လည်လွှဲပြောင်း ထားပြီးဖြစ်ကာ ဖေဖော်ဝါရီ ၂ ရက်ကထိုင်းနိုင်ငံအတွင်း အကြောင်းအမျိုးမျိုးဖြင့် ပြစ်ဒဏ်ကျခံ ပြီးနောက်ရနောင်း ထိန်းသိမ်းရေးစခန်းတွင်ထိန်းသိမ်းထားသော မြန်မာနိုင်ငံသားအမျိုးသား ၄၃ ဦး၊အမျိုးသမီး၁၅ဦးစုစုပေါင်၅၈ဦးကိုကော့သောင်းမြို့သို့ထပ်မံလွှဲပြောင်းပေးခဲ့ခြင်းဖြစ်ကြောင်း သိရသည်။
ယင်းကြောင့် ယခုနေရပ်ပြန်ပို့မှုမှာ ၂၀၂၆ ခုနှစ်အတွင်း သုံးကြိမ်မြောက်ဖြစ်ပြီး မြန်မာနိုင်ငံသား ၂၂၈ဦးကို ပြန်လည်လွှဲပြောင်းခဲ့ပြီးဖြစ်ကာပြီးခဲ့သော ၂၀၂၅ ခုနှစ် ဒီဇင်ဘာလတွင် မြန်မာနိုင်ငံသား ၁၇၅ ဦး နေရပ်ပြန်ပို့ခဲ့ကြောင်း သိရသည်။
၂၀၂၅ ခုနှစ်အတွင်းရနောင်းမှ ကော့သောင်းသို့နေရပ်ပြန်ပို့ခံရမှု ၁၆ ကြိမ် ရှိခဲ့ပြီးနေရပ်ပြန်ပို့ ခံရသူ ၂၀၇၂ ဦး ရှိခဲ့ကြောင်း သိရသည်။

မြန်မာ-ရုရှားနှစ်နိုင်ငံ ကာကွယ်ရေးဝန်ကြီးဌာနများကြား စစ်ဘက်ဆိုင်ရာပူးပေါင်းဆောင်ရွက်ရေးအစီအစဥ်ကို လက်မှတ်ရေးထိုး

မြန်မာ-ရုရှားနှစ်နိုင်ငံ ကာကွယ်ရေးဝန်ကြီးဌာနများကြား စစ်ဘက်ဆိုင်ရာပူးပေါင်းဆောင်ရွက်ရေးအစီအစဥ်ကို ယနေ့ ဖေဖော်ဝါရီ ၂ ရက်က လက်မှတ်ရေးထိုးခဲ့ကြသည်။
အဆိုပါ လက်မှတ်အား နှစ်နိုင်ငံ ဒု-ကာကွယ်ရေးဝန် ကြီးများဖြစ်သည့် ဗိုလ်ချုပ်အောင်မျိုးသန့်နှင့် ရုရှားနိုင်ငံ၊ ဒု-ကာကွယ်ရေးဝန်ကြီး Mr. Vasilii Sergeevich Osmakov တို့ကရေးထိုးလဲလှယ်ခဲ့ကြသည်။
ထို့ပြင် ရုရှားနိုင်ငံ၊ ဒု-ကာကွယ်ရေးဝန်ကြီး Mr. Vasilii Sergeevich Osmakov သည် ပြည်ထောင်စုဝန်ကြီး ဗိုလ်ချုပ်ကြီးမောင်မောင်အေးနှင့်လည်းတွေ့ဆုံခဲ့ပြီးနောက် နှစ်နိုင်ငံကာကွယ်ရေးဝန်ကြီးဌာနများကြား ကာကွယ်ရေးဆိုင်ရာပူးပေါင်းဆောင်ရွက်မှုများကို ဆက်လက်တိုးမြှင့်ဆောင်ရွက်သွားနိုင်မည့်အခြေအနေများ၊ တပ်မတော်နှစ်ရပ်ကြား စစ်ဘက်နည်းပညာ၊ သင်တန်းနှင့် လေ့ကျင့်ရေးဆိုင်ရာပူးပေါင်းဆောင်ရွက်မှုများကို ဆွေးနွေးခဲ့ကြသည်။

ဖားကန့်မှာ တိုက်ပွဲပြင်းထန်နေပြီး အ.ထ.က ကျောင်းပေါ် လက်နက်ကြီးကျလို့ ကျောင်းသားနှစ်ယောက်ဒဏ်ရာရပြီး​နောက် ဖားကန့်ဆိမ့်မူလမ်းပိတ်ထား

ဖားကန့်မြို့နယ်မှာ တကျော့ပြန် တိုက်ပွဲ ပြင်းထန်ဖြစ်ပွားနေပြီး ဒီကနေ့ ဖေဖော်ဝါရီ ၂ ရက်နေ့မနက်ပိုင်းက ဖားကန့်မြို့ပေါ်ရှိ အ.ထ.က ကျောင်းပေါ်ကို လက်နက်ကြီး ကျရောက်ခဲ့လို့ ကျောင်းသားနှစ်ယောက် ထိခိုက်ဒဏ်ရာ ရရှိခဲ့ပါတယ်။
" ကံကောင်းတယ်ပြောရမယ် ။လက်နက်ကြီးကျတဲ့ KG အဆောင်က ပိတ်ထားလို့ ကလေးတွေ သက်သာတာ ။ အခုထိတဲ့ ကလေးနှစ်ယောက်က အဆောင်ဘေးဖြတ်သွားချိန် ထိသွားတာလို့ သိရတယ်။ ယောကျ်ားလေး တယောက် ၊မိန်းကလေး တယောက်ပါ ။ ကလေးတွေ ခေါင်းထိတယ် ။ခြေထောက် ထိတယ်။ ဆေးကုသမှုပေးနေတယ်။ " လို့ ဒေသခံက ပြောပါတယ်။
အဆိုပါ လက်နက်ကြီး ကျရောက်ခဲ့တဲ့ ကျောင်းအနီးမှာ အစိုးရတပ်စခန်းဖြစ်တဲ့ တပ်မကုန်းနဲ့ ရဲစခန်းရှိကြောင်း သိရပါတယ်။
" ကျောင်းထဲကျတဲ့ လက်နက်ကြီးက တောဘက်အဖွဲ့တွေပစ်တာ ။ ပစ်တာသိပေမယ့် ဘယ်သူမှ မပြောရဲဘူး ။ အနားက တပ်မကုန်းကို ပစ်တာကို ကျောင်းထဲလာကျတာ ပေါ့ ။ " လို့ ဖားကန့် ဒေသခံက ပြောပါတယ်။
ဒီကနေ့ မနက် ၅ နာရီလောက်က ဖားကန့်မြို့၊ မရှီကထောင်ရပ်ကွက်မှာလည်း လက်နက်ကြီး ထိမှန်လို့ ဒေသခံတယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။
လက်ရှိမှာ တိုက်ပွဲအခြေအနေကြောင့် ဖားကန့်-ဆိပ်မူသွားတဲ့ မိန်းလမ်းမကို ပိတ်ထားသလို ဆိပ်မူကနေ ဖားကန့်ကို သွားလို့ရတဲ့ ကွင်းလမ်းကိုလည်း အရေးပေါ်ကိစ္စသာသွားလာခွင့်ပြုပြီး လမ်းပိတ်ထားတယ်လို့ သိရပါတယ်။
ဖားကန့်မှာ ဇန်နဝါရီ ၃၁ ရက်နေ့ကတည်းက တကျော့ပြန်တိုက်ပွဲ ပြန်လည် ဖြစ်ပွားနေတာဖြစ်ပြီး နေ့စဥ် လက်နက်ကြီး လက်နက်ငယ် ပစ်ခတ်မှုတွေ ရှိပြီး လက်နက်ကြီး ကျရောက်ပေါက်ကွဲ မှုတွေလည်း ရှိကြောင်း သိရပါတယ်။
လက်ရှိမှာ တိုက်ပွဲက မရှီကထောင် ၊ ထုံးဘိုရွာ ၊ ယူမာ ၊ရှရော်ခ ၊ညောင်ပင်ကုန်း စတဲ့ ကျေးရွာတချို့ ဘက်တွေမှာ တိုက်ပွဲ ဖြစ်နေတာ ဖြစ်ကြောင်း ၊ တိုက်ပွဲ ဖြစ်ပွားရာ ဒေသက ဒေသခံတွေကတော့ နေရပ်စွန့်ခွာ စစ်ရှောင်နေကြရတယ်လို့ သိရပါတယ်။