" လယ်ယာမြေ မီးရှို့ခြင်း၏ ရေရှည်ဆိုးကျိုးများ"ခေါင်းစဥ်ဖြင့် အသိပညာပေးဟောပြောမှု ပြုလုပ်

ညောင်တုန်းမြို့နယ်အတွင်း " လယ်ယာမြေ မီးရှို့ခြင်း၏ ရေရှည်ဆိုးကျိုးများ"ခေါင်းစဥ်ဖြင့် အသိပညာပေးဟောပြောမှုများ မတ် ၉ ရက်က ကျင်းပပြုလုပ်ခဲ့ကြောင်း သိရသည်။

ဧရာ၀တီတိုင်းဒေသကြီး၊ မအူပင်ခရိုင်၊ ပတ်၀န်းကျင်ထိန်းသိမ်းရေးဦးစီးဌာနမှ ဒုတိယဦးစီးမှူး ဦးဇင်ကိုကိုမင်း ဦးဆောင်သောအဖွဲ့သည် ညောင်တုန်းမြို့နယ်အတွင်း လယ်ယာမြေ မီးရှို့ခြင်း၏ ရေရှည်ဆိုးကျိုးများ"ခေါင်းစဥ်ဖြင့် အသိပညာပေးဟောပြောမှု ပြုလုပ်ခဲ့ခြင်းဖြစ်သည်။

ညောင်တုန်းမြို့နယ် အပေါင်ကျေးရွာတွင် လယ်ယာမြေမီးရှို့မှုတစ်ခုဖြစ်ပွားခဲ့ရာ မအူပင်ခရိုင်၊ ပတ်၀န်းကျင်ထိန်းသိမ်းရေးဦးစီးဌာနမှ ဦးဇင်ကိုကိုမင်း (ဒုတိယဦးစီးမှူး) အထွေထွေအုပ်ချုပ်ရေးဦးစီးဌာန၊ ဆားမလောက်နယ်မြေရဲကင်းစခန်းနှင့်ပူးပေါင်းကာ အဆိုပါဖြစ်စဥ်( Fire Hotspot) ပေါ်ပေါက်ခဲ့သည့် ညောင်တုန်းမြို့နယ်၊ အပေါင်ကျေးရွာအုပ်စုသို့ ကွင်းဆင်းစစ်ဆေးခဲ့ကြောင်း သိရသည်။

ထို့နောက် အလားတူဖြစ်ရပ်မျိုး ထပ်မံဖြစ်ပွားမှုမရှိစေရန်၊ မီးခိုးမြူငွေ့ညစ်ညမ်းမှုကြောင့် လေထုညစ်ညမ်းမှုများ မဖြစ်ပေါ်စေရန် ရည်ရွယ်၍ ကျေးရွာနေပြည်သူ (၂၀) ဦးအား "လယ်ယာမြေ မီးရှို့ခြင်း၏ ရေရှည်ဆိုးကျိုးများ" ခေါင်းစဥ်ဖြင့် အသိပညာပေးဟောပြောခြင်း ဆောင်ရွက်ခဲ့ကြောင်း သိရသည်။

မန္တလေးငလျင်ကြီးလှုပ်ခတ်မှုကြောင့် ထိခို-က်ခဲ့သည့် ဆင်သေရေလှောင်တမံ အခိုင်အမာပြုပြင်နေ

မန္တလေးငလျင်ကြီးလှုပ်ခတ်မှုကြောင့် ထိခို-က်ခဲ့သည့် ပြည်ထောင်စုနယ်မြေ၊ နေပြည်တော် တပ်ကုန်းမြို့နယ် မယ်ဇလီကျင်းကျေးရွာအနီးရှိ ဆင်သေရေလှောင်တမံအခိုင်အမာပြုပြင်နေကြောင်း သိရသည်။

စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်သည် တာဝန်ရှိသူများနှင့်အတူ မတ် ၇ ရက်က မန္တလေးငလျင်ကြီးလှုပ်ခတ်မှုကြောင့် ထိခို-က်ခဲ့သည့် ပြည်ထောင်စုနယ်မြေ နေပြည်တော် တပ်ကုန်းမြို့နယ် မယ်ဇလီကျင်းကျေးရွာအနီးရှိ ဆင်သေရေလှောင် တမံအခိုင်အမာပြုပြင်နေမှုကို ကြည့်ရှုစစ်ဆေးခဲ့ ကြောင်း သိရသည်။

ရေလှောင်တမံပြန်လည်ပြုပြင်ရာတွင် ပိုမိုခိုင်ခံ့ပြီး ရေရှည်လုံခြုံစိတ်ချနိုင်ရေးအတွက် သတ်မှတ်စံချိန်စံညွှန်းများအတိုင်း အရည်အသွေးပြည့်မီရေး၊ အချိန်မီပြီးစီးရေးအထူးအလေးထားဆောင်ရွက်ကြရန်၊ ရေလှောင်တမံနှင့် ရေပိုလွှဲတို့၏ ကြံ့ခိုင်ရေးကို Dam Monitoring စောင့်ကြည့်တိုင်းတာစစ်ဆေးမှုများ အမြဲမပြတ်ဆောင်ရွက်ကြရန်စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော် ကပြောသည်။

နွေစပါးအပါအဝင် အခြားနွေသီးနှံလျာထား စိုက်ဧကများအတိုင်း လုံလောက်စွာ စိုက်ပျိုးရေပေးဝေနိုင်ရေးစီမံနေခြင်း ဖြစ်သည်။

ဆင်သေရေလှောင်တမံသည် ဒေသခံတောင်သူများ ရာသီအလိုက် နွေစပါး၊ မိုးစပါးနှင့် အခြားသီးနှံများ အချိန်မီအောင်မြင်ဖြစ်ထွန်းစွာ စိုက်ပျိုးနိုင်ရေးအတွက် နှစ်စဉ်စိုက်ပျိုးရေလုံလောက်စွာ ဖြန့်ဝေပေးလျက်ရှိသည့် ရေလှောင်တမံတစ်ခုဖြစ်သည်။

ဆင်သေရေလှောင်တမံအနေဖြင့် ယခု ၂၀၂၅-၂၀၂၆ နွေသီးနှံရာသီတွင် နွေစပါးနှင့် နွေအခြားသီးနှံလျာထားဧကပေါင်း ၁၁၅၈၀ ရှိသည့်အနက် ယနေ့အထိ နွေစပါး ၅၃၇၉ ဧကကို စိုက်ပျိုးရေပေးဝေထားရှိပြီး ကျန်ဧကများကိုလည်း စိုက်ပျိုးရေဆက်လက်ပေးဝေလျက်ရှိကြောင်း သိရသည်။

မအူပင်မြို့နယ်တွင် တက္ကသိုလ်ဝင်တန်းစာမေးပွဲကို စာစစ်ဌာန (၁၀)ခုဖြင့် ကျောင်းသား၊ ကျောင်းသူ (၂၀၀၀)ကျော် ဝင်ရောက်ဖြေဆိုမည်

ဧရာဝတီတိုင်းဒေသကြီး မအူပင်မြို့နယ်တွင် လာမည့် မတ်လ (၁၁)ရက်တွင် စတင်ကျင်းပမည့် ၂၀၂၅- ၂၀၂၆ပညာသင်နှစ် တက္ကသိုလ်ဝင်တန်း (G12) စာမေးပွဲအား စာစစ်ဌာန (၁၀)ခု ဖွင့်လှစ်ကာ ကျောင်းသားကျောင်းသူ (၂၀၀၀)ကျော်မှ ဝင်ရောက်ဖြေဆိုသွားမည်ဖြစ်ကြောင်း သိရသည်။

"စာစစ်ဌာနကတော့ တစ်မြို့နယ်လုံး (၁၀)ခုရှိတယ်၊ ဖြေဆိုမယ့်ကျောင်းသား၊ ကျောင်းသူ စုစုပေါင်း (၂၀၉၈)ဦးရှိပါတယ်"ဟု မြို့နယ်ပညာရေးဦးစီးဌာနမှ တာဝန်ရှိသူတစ်ဦးက ပြောကြားခဲ့သည်။

၂၀၂၅ - ၂၀၂၆ပညာသင်နှစ် တက္ကသိုလ်ဝင်တန်း Grade 12 စာမေးပွဲကို ဧရာဝတီတိုင်းဒေသကြီးတွင် စာစစ်ဌာန (၂၄၇) ခု ၊ ကျောင်းသားကျောင်းသူ (၃၉၃၂၇)ဦးမှ ဝင်ရောက်ဖြေဆိုမည်ဖြစ်ကာ တစ်နိုင်ငံလုံးတွင် စာစစ်ဌာနပေါင်း (၈၉၀)၌ ကျောင်းသားကျောင်းသူ (၂၆၅၀၀၀)မှ ဖြေဆိုသွားမည်ဖြစ်ကြောင်း ဧရာဝတီတိုင်းဒေသကြီး၊ ပညာရေးဦးစီးဌာန ထုတ်ပြန်ချက်များအရ သိရသည်။

ပွဲတစ်ပွဲနှင့်တစ်ပွဲကြား ရက်များစွာ ကွာဟနေမှုကြောင့် ခြေစွမ်းကျဆင်းလာခြင်းဖြစ်ကြောင်း ယူနိုက်တက်စတားများ အပြစ်ပုံချလာ
====================
ယူနိုက်တက်စတားများဟာ နောက်ပိုင်းပွဲစဉ်များတွင် ခြေစွမ်းကျဆင်းလာမှုအတွက် ပွဲတစ်ပွဲနှင့် တစ်ပွဲအကြား ရက်များစွာ ကွာဟနေမှုအပေါ် အပြစ်ပုံချလာကြပါတယ်။

ယူနိုက်တက်ဟာ ယာယီနည်းပြမိုက်ကယ်ကာရစ်လက်ထက် မန်စီးတီး၊ အာဆင်နယ်တို့နှင့် ပထမဆုံး ၂ ပွဲတွင် အနိုင်ရရှိကာ ထိပ်တန်းခြေစွမ်းမျိုး ပြသနိုင်ခဲ့ပေမယ့် နောက်ပိုင်းပွဲစဉ်များတွင် ရုန်းကန်လာရတာ တွေ့ရပါတယ်။

အထူးသဖြင့် ယူနိုက်တက်စတားများဟာ နောက်ဆုံး ၂ ပွဲဖြစ်တဲ့ ပဲလေ့စ်၊ နယူးကာဆယ်တို့နှင့်ပွဲများတွင် ခြေစွမ်းပြရန် ရုန်းကန်လာရပါတယ်။

ယူနိုက်တက်ဟာ ဆယ်ယောက်ကျန် ပဲလေ့စ်ကို နောက်ကလိုက်ကစားကာ ၂-၁ ဖြင့် အနိုင်ရခဲ့တာ ဖြစ်ပြီး နယူးကာဆယ်နှင့်ပွဲတွင်လည်း ခြေစွမ်းပိုင်း ဆိုးရွားခဲ့ကာ ၂-၁ ဖြင့် အရေးနိမ့်ခဲ့ပါတယ်။

နယူးကာဆယ်ဟာ ပထမပိုင်းကတည်းက တစ်ယောက်အလျှော့ဖြင့် ကစားခဲ့ရပေမယ့်လည်း ယူနိုက်တက်ကို အနိုင်ယူနိုင်ခဲ့ပါတယ်။

ယင်းသို့ နောက်ပိုင်းပွဲစဉ်များတွင် ခြေစွမ်းပိုင်း ကျဆင်းလာမှုမှာ ပွဲတစ်ပွဲနှင့် တစ်ပွဲအကြား ရက်များစွာ ကွာဟနေမှုအပေါ် တွင် ယူနိုက်တက်စတားများ ရယ်စရာကောင်းအောင် အပြစ်ပုံချလာကြပါတယ်။

ကလပ်အတွင်းလူတစ်ဦးက "ကစားသမားတွေက သူတို့ရဲ့ ကစားပုံကြောင့် နည်းပြကို စိတ်ပျက်စရစေတယ်လို့ ခံစားရနေကြပါတယ်။ ပွဲတစ်ပွဲနဲ့ တစ်ပွဲအကြား ရက်အရမ်းကြီး ကွာဟနေမှုက နာကျင်ရစေတယ်၊ အထိနှေးစေတယ်လို့ ယုံကြည်နေကြပါတယ်။ ဒီအပေါ် သူတို့ စိုးရိမ်နေကြတယ်။‌ အပြောင်းအလဲ ဖြစ်စေချင်နေကြတယ်"လို့ ပြောကြားသွားပါတယ်။

ယူနိုက်တက်ဟာ ယခုရာသီတွင် ဥရောပပြိုင်ပွဲ ဝင်ခွင့် မရထားသလို အက်ဖ်အေဖလားနှင့် ခါရာဘောင်ဖလားတို့မှာလည်း ပြိုင်ပွဲမှ စောစောစီးစီး ထွက်ခွာထားရပါတယ်။

၎င်းတို့ဟာ လာမယ့် မတ်လ ၁၅ ရက်နေ့ အက်စတွန်ဗီလာနှင့်ပွဲအထိ ကစားရန် မရှိပါဘူး။ ယင်းပွဲအပြီး ၅ ရက်တွင် ၎င်းတို့ဟာ ဘုန်းမောက်နှင့် ရင်ဆိုင်ရပြီးနောက် နိုင်ငံတကာပွဲကြောင့် လိဂ်ပြိုင်ပွဲ နားပါမယ်။

နိုင်ငံတကာပွဲစဉ်များအပြီးတွင် ယူနိုက်တက်ဟာ ဧပြီလ ၁၃ ရက်နေ့မှာ အိုးထရက်ဖို့ဒ်မှာ လိဒ်ကို ဧည့်ခံကစားရပါမယ်။

Old Firm ဒါဘီပွဲအပြီး ကွင်းအတွင်း ဝင်ရောက်ကာ ဆဲလ်တစ်နှင့် ရိန်းဂျားပရိသတ်များအကြား ခိုက်ရန်ဖြစ်ပွားမှုကြောင့် ရဲတပ်ဖွဲ့ ဝင်ထိန်းခဲ့ရ
===================
ဆဲလ်တစ်နှင့် ရိန်းဂျားပရိသတ်များဟာ Ibrox တွင် ကစားတဲ့ Old Firm ဒါဘီပွဲစဉ်အပြီးတွင် ကွင်းအတွင်း ကျူးကျော် ဆင်းလာကြပြီးနောက် ခိုက်ရန် ဖြစ်ပွားခဲ့ကြပါတယ်။

စကော့တလန်ရှုံးထွက်ဖလားကွာတားဖိုင်နယ်ပွဲစဉ်တွင် ရိန်းဂျားနှင့် ဂိုးမရှိသရေကျကာ ပင်နယ်တီအဆုံးအဖြတ်တွင် ၄-၂ ဖြင့် ဆဲလ်တစ်တို့ အနိုင်ရရှိပြီးနောက် ဆဲလ်တစ်ပရိသတ်များ ကွင်းအတွင်း ဆင်းကာ အကြီးအကျယ်အောင်ပွဲခံခဲ့ကြပါတယ်။

ဒါပေမယ့် ချက်ချင်းဆိုသလိုပဲ ရိန်းဂျားပရိသတ်များလည်း အရံအတားအဆီးများကို ကျော်ဖြတ်ကာ ကွင်းအတွင်း ဆင်းလာသလို မီးရှူးများဖြင့် ပစ်ပေါက်ခြင်းတို့ ပြုလုပ်ခဲ့ကြရာ ရဲတပ်ဖွဲ့ဝင်များ၊ ကွင်းလုံခြုံရေးဝန်ထမ်းများ ဝင်ရောက် ထိန်းသိမ်းခဲ့ရပါတယ်။

နှစ်ဖက်ပရိသတ်များ ပွဲကြည့်စင်သို့ ပြန်လည် သွားရောက်ကြမှုနှင့်အတူ ပြဿနာမှာ ချက်ချင်း ပြေလည်သွားခဲ့ပါတယ်။

ဆဲလ်တစ်ဟာ ၂၀၁၈ ခုနှစ်တုန်းက ပရိသတ် ၁၀၀၀ ထောင်သာ လာကြည့်ခွင့် ရပြီးနောက် Broomloan Stand တွင် ပရိသတ်အပြည့်ဖြင့် လာကြည့်ခွင့် ရခဲ့ပါတယ်။

ပုံမှန်အားဖြင့် Ibox တွင် ကစားတဲ့ Old Firm ဒါဘီပွဲစဉ်များတွင် ဆဲလ်တစ်ပရိသတ် ၇၅၀၀ ဝန်းကျင်လာကြည့်ခွင့်ရခဲ့တာပါ။

ဒါပေမယ့် နောက်ပိုင်းတွင် နှစ်ဖက်အသင်းတို့ဟာ အဝေးကွင်းပရိသတ်များအား ၇၅၀ ဝန်းကျင်သာ ကြည့်ခွင့်ပေးလာကြပါတယ်။

စကော့တလန်ဘောလုံးအဖွဲ့ချုပ်က ရိန်းဂျားနှင့် ဆဲလ်တစ်တို့ရဲ့ ပွဲစဉ်တွင် ပရိသတ်များ ကွင်းအတွင်း ဝင်ရောက်ကာ ခိုက်ရန် ဖြစ်ပွားတဲ့ အဖြစ်အပျက်နှင့်ပတ်သက်ပြီး စုံစမ်းစစ်ဆေးမှုများ ပြုလုပ်သွားမည်ဖြစ်ကြောင်း အတည်ပြု ကြေညာထားပါတယ်။

၁၀ မိနစ်တည်းသာ လေ့ကျင့်ပြီးနောက် ၃-၅-၂ ကစားကွက်ကို အာတီတာ အသုံးပြုခဲ့ခြင်းဖြစ်
===================
အာဆင်နယ်နည်းပြမီခေးလ်အာတီတာက မန်းစ်ဖီးလ်ဒ်နှင့် အက်ဖ်အေဖလားပဉ္စမအဆင့်ပွဲစဉ်မတိုင်မီ ၁၀ မိနစ်တည်းသာ လေ့ကျင့်ပြီးနောက် ၃-၅-၂ ကစားကွက်အား အသုံးပြုခဲ့ခြင်း ဖြစ်ကြောင်း ပြောကြားလာပါတယ်။

အာဆင်နယ်ဟာ လိဂ် ၁ ကလပ် မန်းစ်ဖီးလ်ဒ်ကို ထူးထူးခြားခြား ၃-၅-၂ ကစားကွက်ဖြင့် ခင်းကျင်းကစားခဲ့ပြီး ၂-၁ ဖြင့် အနိုင်ရခဲ့ပါတယ်။

အာဆင်နယ်ဟာ ဆယ်ကျော်သက် မာလီဆယ်မွန်၊ ခရစ္စတီယန်မော့စ်ကွီရာ၊ ရီကာဒိုကာလာဖီအိုရီတို့အား ခံစစ်တွင် အသုံးပြုကာ မာတင်နယ်လီနှင့် မာဒူကီတို့အား တောင်ပံတွင် အသုံးပြုမယ့်အစား တောင်ပံခံစစ်မှာ အသုံးပြုသွားခဲ့ပါတယ်။

အာဆင်နယ်ဟာ အဓိကကစားသမားများ အနားယူရန် လိုအပ်နေမှု၊ ဒဏ်ရာပြဿနာများ ကြုံတွေ့ရမှုနှင့်အတူ ၃-၅-၂ ကစားကွက်ကို ပြောင်းလဲ အသုံးပြုလာခဲ့ရတာလည်း ဖြစ်ပါတယ်။

အာတီတာဟာ လေ့ကျင့်ရေးအစီအစဉ်တွင် ကစားသမားများကို ၃-၅-၂ ကစားကွက်နှင့်ပတ်သက်ပြီး ၁၀ မိနစ်တည်းသာ လေ့ကျင့်မှု ပြုလုပ်ပေးပြီးနောက် မန်းစ်ဖီးလ်ဒ်ပွဲတွင် အသုံးပြုလာတာပါ။

အာတီတာက "ဟုတ်တယ်။ တစ်ကြိမ်တည်းပါ။ ဆယ်မိနစ်ပါ"လို့ ပြောကြားသွားပါတယ်။

နိုင်ငံတော်သီချင်း မသီဆိုဘဲ သပိတ်မှောက်ခဲ့မှုကြောင့် မိခင်နိုင်ငံသို့ ပြန်ချိန်တွင် နှိပ်စက်ညှင်းပန်းမှုခံရမယ့်အရေးနှင့် ရင်ဆိုင်နေရတဲ့ အီရန်အသင်း
==================
အီရန်အမျိုးသမီးလက်ရွေးစင်အသင်းဟာ နိုင်ငံတော်သီချင်း မသီဆိုဘဲ သပိတ်မှောက်ဆန္ဒပြခဲ့ပြီးနောက် မွေးရပ်မြေသို့ ပြန်ချိန်တွင် ညှင်းပန်းနှိပ်စက်ခြင်းခံရမယ့်အရေးနှင့် ရင်ဆိုင်နေရပါတယ်။

အီရန်အမျိုးသမီးလက်ရွေးစင်အသင်းဟာ ဩစတြေးလျနိုင်ငံတွင် ကျင်းပနေတဲ့ အာရှအမျိုးသမီးဖလားပြိုင်ပွဲ ဝင်ရောက် ယှဉ်ပြိုင်နေတာ ဖြစ်ပြီး တောင်ကိုရီးယားနှင့် အဖွင့်ပွဲစဉ်တွင် နိုင်ငံတော်သီချင်းသီဆိုမှု မပြုလုပ်ဘဲ ဆန္ဒပြသပိတ်မှောက်ခဲ့ကြပါတယ်။

အီရန်ကစားသမားများဟာ အီရန်တွင် ဖြစ်ပျက်ခဲ့တဲ့ ဆန္ဒပြမှုများအား အကြမ်းဖက် သတ်ဖြတ် နှိမ်နင်းမှု၊ အမေရိကန်/အစ္စရေးတို့နှင့် စစ်ပွဲ ဖြစ်နေမှုတို့အား ဆန့်ကျင်တဲ့အနေဖြင့် နိုင်ငံတော်သီချင်း မသီဆိုခဲ့တာလည်း ဖြစ်ပါတယ်။

ဒါပေမယ့် အီရန်အသင်းသားများဟာ အိမ်ရှင် ဩစတြေးလျနှင့် ရင်ဆိုင်တဲ့ အုပ်စုဒုတိယပွဲစဉ်မှာတော့ နိုင်ငံတော်သီချင်း ပြန်လည်သီဆိုကာ အလေးပြုမှု ပြုလုပ်ခဲ့ကြပါတယ်။

အီရန်အသင်းဟာ အမေရိကန်နှင့် အစ္စရေးတို့က အီရန်အား တိုက်ခိုက်မှု မပြုလုပ်မီ ရက်အနည်းငယ်အလိုကတည်းက ဩစတြေးလျသို့ ရောက်နေခဲ့တာပါ။

အီရန်အမျိုးသမီးအသင်းဟာ အဖွင့်ပွဲတွင် နိုင်ငံတော်သီချင်း မသီဆိုမှုကြောင့် သစ္စာဖောက်များအဖြစ် သတ်မှတ်ခြင်းခံထားရပါတယ်။

၎င်းတို့ဟာ အဖွင့်ပွဲ ၂ ပွဲလုံး ရှုံးနိမ့်ထားကာ အုပ်စုနောက်ဆုံးပွဲစဉ်အဖြစ် ဖီလစ်ပိုင်နှင့် ရင်ဆိုင်ရပါမယ်။

ယနေ့ ဖီလစ်ပိုင်နှင့်ပွဲစဉ်တွင်လည်း ရှုံးနိမ့်လာပါက အီရန်အသင်းဟာ အုပ်စုအဆင့်မှ ထွက်ခွာရပါမယ်။

အီရန်အမျိုးသမီးအသင်းဟာ အီရန်သို့ ပြန်ချိန်တွင် သစ္စာဖောက်များအဖြစ် သတ်မှတ်ခံထားရမှုနှင့်အတူ ညှင်းပန်းနှိပ်စက်ခြင်းခံရမယ့်အရေးနှင့် ရင်ဆိုင်နေရပါတယ်။

ယင်းသို့ အခြေအနေများကြောင့် ဩစတြေးလျနိုင်ငံသားများဟာ အီရန်အမျိုးသမီးအသင်းကို နိုင်ငံတွင် ခိုလှုံခွင့်ပေးရေး လက်မှတ်ထိုးထောက်ခံမှု ၄၄၀၀၀ ပါဝင်တဲ့ စာအား ပြည်ထဲရေးဝန်ကြီးတိုနီဘာကီအား တောင်းဆိုမှု ပြုလုပ်ထားပါတယ်။

လက်ရှိအချိန်တွင် ဩစတြေးလျအာဏာပိုင်အဖွဲ့က အီရန်အမျိုးသမီးအသင်းနှင့် ဆက်သွယ်မှု ပြုလုပ်ထားခြင်း ရှိ/မရှိတော့ မသိရသေးပါဘူး။

အီရန်အမျိုးသားလက်ရွေးစင်အသင်းဟာလည်း ၂၀၂၂ ကမ္ဘာ့ဖလားပြိုင်ပွဲတုန်းက အင်္ဂလန်နှင့် အုပ်စုအဖွင့်ပွဲစဉ်တွင် အစိုးရအား ဆန့်ကျင်တဲ့အနေဖြင့် နိုင်ငံတော်သီချင်း သီဆိုခဲ့ခြင်း မရှိသလို ဂိုးသွင်းနိုင်ချိန်တွင်လည်း ဂိုးသွင်းအောင်ပွဲခံမှု မပြုလုပ်ခဲ့ကြပါဘူး။

အကြွေးပေါင် ၁.၆ သန်းတင်ရှိပြီးနောက် ယူနိုက်တက်စတားဟောင်းရဲ့ ကုမ္ပဏီ ဖျက်သိမ်းခြင်းခံရ
===================
ယူနိုက်တက်စတားဟောင်းဂျက်စီလင်ဂတ်ရဲ့ ရုပ်ပုံလွှာမူပိုင်ခွင့်ကုမ္ပဏီဟာ အကြွေး ပေါင် ၁.၆ သန်းအထိ တင်ရှိနေပြီးနောက် တရားရုံးရဲ့ ကုမ္ပဏီ ဖျက်သိမ်းခြင်းခံလာရပါတယ်။

JL Commercial Limited ဟာ ကြွေးမြီများ ပေးရန် ပျက်ကွက်ပြီးနောက် ကုမ္ပဏီ ဖျက်သိမ်းခံလာရတာလည်း ဖြစ်ပါတယ်။

ယင်းအမှုကို ဩဂုတ်လမှ စတင်ကာ ကြားနာစစ်ဆေးလာတာ ဖြစ်ပါတယ်။

လင်ဂတ်ရဲ့ ကုမ္ပဏီတွင် အကြွေးရရန် ရှိနေတဲ့ ဥပဒေကုမ္ပဏီ Pinsent Masons က အသနားခံစာတင်လာပြီးနောက် အမှုကို ကြားနာစစ်ဆေးလာတာလည်း ဖြစ်ပါတယ်။

အသက် ၃၃ နှစ်ရှိ လင်ဂတ်ဟာ ၂၀၁၈ ခုနှစ်တုန်းက သူ့ကိုယ်ပိုင် အဝတ်အထည်အမှတ်တံဆိပ်နှင့် ဂိုးသွင်းအောင်ပွဲခံမှုများအပါအဝင် အမှတ်တံဆိပ်များကို ကိုင်တွယ်ရန်အတွက် ယင်းကုမ္ပဏီကို တည်ထောင်ခဲ့တာလည်း ဖြစ်ပါတယ်။

ကုမ္ပဏီရဲ့ နောက်ဆုံးဘဏ္ဍာရေးစာရင်းအရ ဘဏ်ချေးငွေ ပေါင် ၂၂၅၀၀၊ အခွန်ကြွေးမြီ ပေါင် ၃၆၆၀၂ အပါအဝင် ကြွေးမြီစုစုပေါင်း ပေါင် ၁၅၆၂၀၉၂ ရှိနေကြောင်း တွေ့ရပါတယ်။

ဇန်နဝါရီလတုန်းက ထွက်ပေါ်ခဲ့တဲ့ သတင်းအရာ လင်ဂတ်ဟာ ကြွေ့းမြီ ပေါင် ၃၀၀၀၀၀ နီးပါး တင်ရှိနေမုနှင့်အတူ Jlingz အဝတ်အစားအမှတ်တံဆိပ်ကို ဆက်လက် မထုတ်လုပ်တော့ဘဲ ဖျက်သိမ်းလိုက်ကြောင်း သိရပါတယ်။

လင်ဂတ်ဟာ မကြာသေးမီတုန်းက ဘရာဇီးကလပ် ကိုရင်သီယန်သို့ ပြောင်းခဲ့သူ ဖြစ်ပြီး ယင်းတွင် ယူနိုက်တက်ကစားဖော်ဟောင်းများဖြစ်ကြတဲ့ အင်ဒရေပီရီရာ၊ မမ်ဖစ်ဒီပေးတို့နှင့် အတူ တွဲကစားရပါမယ်။

သူဟာ ယင်းမတိုင်မီ ကိုရီးယားကလပ် အက်ဖ်စီဆိုးလ်တွင် ကစားခဲ့ပြီး ၆၇ ပွဲကစားခဲ့ရာမှာ ၁၉ ဂိုးသွင်းနိုင်ခဲ့ပါတယ်။

သူဟာ ကိုရင်သီယန်သို့ ၁၂ လစာချုပ်ဖြင့် ပြောင်းခဲ့တာ ဖြစ်ပြီး စာချုပ်အတွင်းတွင် ၁၂ လထပ်မံ သက်တမ်းတိုးနိုင်မယ့်အချက်ကိုလည်း ထည့်သွင်းချုပ်ဆိုထားပါတယ်။

မူးယစ်ဆေးဝါးရောင်းချမှုဖြင့် မာရာဒိုနာရဲ့သား ဖမ်းဆီးခြင်းခံရ
====================
အာဂျင်တီးနားဂန္ထဝင်ဒီယေဂိုမာရာဒိုနာရဲ့ လျို့ဝှက်သားလို့ နှစ်ပေါင်းများစွာ ပြောဆိုလာတဲ့ လူတစ်ဦးဟာ မူးယစ်ဆေးဝါးမှုဖြင့် ဖမ်းဆီးခြင်းခံလာရပါတယ်။

ဆန်တီယာဂိုလာရာဟာ ဘရူနိုအေရိပ်စ်ရဲ့ အရှေ့တောင်ပိုင်း မိုင် ၄၀ အကွာရှိ လာပလာတာတွင် ဖခင်ဖြစ်သူမာစယ်လိုအပါအဝင် အခြား ၂ ဦးနှင့်အတူ ဖမ်းဆီးခြင်းခံခဲ့ရတာလည်း ဖြစ်ပါတယ်။

ရဲတပ်ဖွဲ့ဝင်တို့ ဝင်ရောက်စီးနင်း ဖမ်းဆီးခဲ့ရာတွင် ကိုကင်း၊ ဆေးခြောက်အစေး၊ အက်စတက်စီ၊ ခရစ္စတယ်မက်သ်တို့အပြင် ဝိတ်ချိန်ကိရိယာ၊ မိုဘိုင်းဖုန်း ၇ လုံး၊ ငွေသားများ ဖမ်းဆီးရမိခဲ့ပါတယ်။

ဆန်တီယာဂိုဟာ ၂၀၁၆ ခုနှစ်တုန်းက အသက် ၁၅ နှစ်အရွယ်တုန်းက မာရာဒိုနာရဲ့ ၆ ဦးမြောက် သားဖြစ်ကြောင်း လူသိရှင်ကြား ပြောဆိုရာမှ နာမည်ကြီးခဲ့သူ ဖြစ်ပါတယ်။

၎င်းက ၂၀၀၆ ခုနှစ်တွင် အဆုတ်ကင်ဆာဖြင့် ကွယ်လွန်သွားတဲ့ သူ့မိခင်မှာ အသက် ၂၃ နှစ်အရွယ်တုန်းက မာရာဒိုနာနှင့် ၇ နှစ်တိုင်တိုင် လျို့ဝှက်ချစ်ကြိုက်ခဲ့ကြောင်း ဖွင့်ဟခဲ့ဖူးပါတယ်။

၎င်းက အသက် ၁၃ နှစ်အရွယ်တွင် ဖခင်ဖြစ်သူမှာ မာရာဒိုနာ ဖြစ်ကြောင်း အသိပေးခြင်းခံခဲ့ရကြောင်း ဆိုခဲ့သလို ၎င်းမှာလည်း ဖခင်ဖြစ်သူမာရာဒိုနာကဲ့သို့ ဆံပင်မျိုး ပိုင်ဆိုင်ထားပါတယ်။

မာရာဒိုနာဟာ ၂၀၂၀ ခုနှစ် နိုဝင်ဘာလ ၂၅ ရက်နေ့တုန်းက ကွယ်လွန်ခဲ့ပြီး ဆန်တီယာဂိုက DNA စစ်ဆေးမှု ပြုလုပ်ရန် တောင်းဆိုခဲ့ပါသေးတယ်။

ဒါပေမယ့် တကယ်တမ်း DNA စစ်ဆေးချိန်မှာတော့ ဆန်တီယာဂိုက မာရာဒိုနာရဲ့ သားမဟုတ်ကြောင်း စစ်ဆေးတွေ့ရှိခဲ့ပါတယ်။ ဒါ့အပြင် ဆန်တီယာဂိုရဲ့ ဖခင်အရင်းမှာလည်း လက်ရှိ ဖခင်မာစီလိုလာရာ ဖြစ်ကြောင်း တွေ့ရပါတယ်။

ဖခင်ဖြစ်သူလာရာက မူးယစ်ဆေးဝါးဂိုဏ်းခေါင်းဆောင်တစ်ဦးဖြစ်ပါတယ်။

၎င်းတို့ သားအဖနှင့်အတူ ဖမ်းဆီးခံရတဲ့ အခြားတစ်ဦးက အကျဉ်းထောင်ဝန်ထမ်းမာရီယာဟိုဆေးဘိုရန်ဖြစ်ကြောင်းလည်း သိရပါတယ်။

နယူးကာဆယ်နှင့်ပွဲမှ အဝါကတ်ကြောင့် နှစ်ပွဲပယ်ခံလာရတဲ့ ဂွါဒီယိုလာ
===================
ပက်ဂွါဒီယိုလာဟာ နယူးကာဆယ်နှင့်ပွဲစဉ်မှ အဝါကတ်ကြောင့် နှစ်ပွဲပယ်ခံရတော့မှာလည်း ဖြစ်ပါတယ်။

ဂွါဒီယိုလာဟာ ယခုရာသီ ၆ ကြိမြောက် အဝါကတ်ပြသခြင်းခံလာရတာ ဖြစ်ပြီး ၂ ပွဲပယ်ခံလာရပါကလည်း အာဆင်နယ်နှင့် ရင်ဆိုင်ကစားရမယ့် ခါရာဘောင်ဖလားဗိုလ်လုပွဲမှာတော့ ကြီးကြပ်လာနိုင်ပါမယ်။

ဂွါဒီယိုလာဟာ နယူးကာဆယ်ကို ၃-၁ ဖြင့် အနိုင်ရတဲ့ အက်ဖ်အေဖလားပဥ္စမအဆင့်ပွဲစဉ်ရဲ့ ဒုတိယပိုင်းတွင် ဂျီရီမီဒိုကူးအား ကီရန်ထရစ်ပီယာက နောက်က ဆွဲမှုအပေါ် စောဒကတက်ရာမှ အဝါကတ်ပြသခြင်းခံခဲ့ရပါတယ်။

သူဟာ စတုတ္ထဒိုင်လူကြီးလီဝစ်စမစ်ထံသို့ ဒေါသတကြီး သွားရောက်ကာ စောဒကတက်မှုနှင့်အတူ ဒိုင်လူကြီးဆမ်ဘာရက်ရော့ဒ်ရဲ့အဝါကတ်ပြခြင်းခံခဲ့ရတာလည်း ဖြစ်ပါတယ်။

ဂွါဒီယိုလာဟာ ပြီးခဲ့တဲ့ ရာသီတုန်းက တစ်ပွဲပယ်ခံခဲ့ရသလို ဇန်နဝါရီလတုန်းကလည်း ၁ ပွဲပယ်ခံရကာ အက်စတာနှင့်ပွဲအား ပွဲကြည့်စင်မှ ကြည့်ခဲ့ရဖူးပါတယ်။

ယခုအခါ သူဟာ နောက်ထပ် အဝါကတ်ပြသခြင်းခံလာရမှုနှင့်အတူ ၂ ပွဲပယ်ပြစ်ဒဏ်ချမှတ်ခြင်းခံလာရဖို့ ရှိနေပြီလည်း ဖြစ်ပါတယ်။

ပရီးမီးယားလိဂ်စည်းမျဉ်းအရ အဝါကတ် ၃ ကတ်ပြသခြင်းခံရပါက ၁ ပွဲပယ်ခံရပြီး ယင်းအဝါကတ်မှာ အက်ဖ်အေဖလားပြိုင်ပွဲတွင်လည်း အကျုံးဝင်ကာ ခါရာဘောင်ဖလားမှာတော့ အကျုံးမဝင်ပါဘူး။

ဒါပေမယ့် ယခင် အဝါကတ် ၈ ကတ်ပြသခြင်းခံရပါက ၂ ပွဲအထိ ပွဲပယ်ခံလာရမှာလည်း ဖြစ်ပါတယ်။

ဂွါဒီယိုလာဟာ နောက်ထပ် အဝါကတ် ၃ ကတ်ထပ်မံ ပြသခြင်းခံရပါက ၃ ပွဲပယ်အထိပါ ကျခံရပါမယ်။

ယခုအခါ ဂွါဒီယိုလာဟာ ၂ ပွဲပယ်ပြစ်ဒဏ်ခံလာရဖို့ ရှိနေမှုနှင့်အတူ လာမယ့် ဝက်စ်ဟမ်းနှင့်ပရီးမီးယားလိဂ်ပွဲအပြင် အက်ဖ်အေဖလားကွာတားဖိုင်နယ်ပွဲစဉ်ကိုပါ လွဲချော်လာဖို့ ရှိနေပြီလည်း ဖြစ်ပါတယ်။

ဂွါဒီယိုလာက "အခု ၂ ပွဲပယ်ခံရပြီ။ နောက်နှစ်ပွဲမှာ ခရီးသွားမယ်။ ဘုရားသခင်ရေ၊ ဘုရားသခင်ရေ။ ဒီမှာ ရှိလာတာ ဆယ်နှစ်ရှိတာတောင် နားမလည်နိုင်တဲ့ အရာတွေ ရှိနေသေးတယ်။ လှုပ်ရှားမှုကို ပြန်သုံးသပ်တာပေါ့။ ဒိုကူးနဲ့ ကျွန်တော့်အသင်းတိုင်းကို ကာကွယ်ဖို့ ကြိုးစားခဲ့တာပါ။ ဆက်ပြီးတော့လည်း လုပ်လာပါဦးမယ်"လို့ ပြောကြားသွားပါတယ်။

နယူးကာဆယ်နှင့်ပွဲ ပထမပိုင်းတွင် ဂွါဒီယိုလာရဲ့ လက်ထောက်နည်းပြကိုလိုတိုရေးမှာလည်း အဝါကတ်ပြသခြင်းခံခဲ့ရပါတယ်။