ဒီဇင်ဘာလကုန်တာနဲ့ VPN တွေ အပြီးပိတ်နိုင်တယ်လို့ သတင်းတွေ ထွက်ပေါ်နေ
အခု ၂၀၂၅ ခုနှစ်၊ ဒီဇင်ဘာလကုန်တာနဲ့ VPN တွေ အပြီး တားမြစ်ပိတ်ပင်နိုင်တယ် ဆိုတဲ့ သတင်းတွေ လူမှုကွန်ရက် သုံးစွဲသူတွေကြား ကျယ်ကျယ်ပြန့်ပြန့် ထွက်ပေါ်နေပါတယ်။
လက်ရှိမှာ သက်ဆိုင်ရာ တာဝန်ရှိသူတွေအနေနဲ့ VPN တွေ အပြီး ပိတ်ပင်နိုင်ဖို့အတွက် VPN Blockchain တပ်ဆင်ထားပြီးဖြစ်ကာ စမ်းသပ်မှုတွေလည်း လုပ်ဆောင် ပြီးစီးနေပြီ ဖြစ်တဲ့အတွက် လာမယ့် ၂၀၂၆ ခုနှစ်၊ ဇန်နဝါရီလ ပထမပတ်အတွင်းမှာ အဲဒီ အစီအစဉ်ကို စပြီး အကောင်အထည် ဖော်နိုင်ခြေ ရှိနေတယ်လို့ သိရပါတယ်။
“ဒီသတင်းကတော့ အွန်လိုင်းပေါ်မှာ ခုရက်ပိုင်း တော်တော်ပျံ့နှံ့နေတာပေါ့။ ဖြစ်နိုင်ခြေရှိလား ဆိုတော့ အရင်ကရော မဖြစ်ခဲ့ဖူးလို့လားလို့ ပြန်မေးစရာရှိတယ်။ ဒါမျိုး ကျွန်တော်တို့ အရင်ကလည်း ဖြစ်ဖူးပြီးသား။ 1111, Psiphon တွေလို အသုံးများတဲ့ VPN တွေ လုံးဝ သုံးလို့မရတာမျိုး ကြုံဖူးကြမယ်။ အဲဒီတော့ ဖြစ်နိုင်တယ်၊ မဖြစ်နိုင်ဘူးက ပုံသေ တွက်ထားလို့ မရဘူး။ အဲဒီလို Ban (တားမြစ်) ရင် သုံးလို့ မရတော့ဘူးလား ဆိုတော့ သုံးလို့တော့ ရမယ်။ ဒါပေမယ့် သုံးရတာတော့ ခက်သွားလိမ့်မယ်။ အခုသတင်းတွေအရ ဆိုရင်တော့၊ တကယ်တမ်း ဖြစ်လာမယ်ဆိုရင်တော့ အရင်ကလိုပဲ လူသုံးများတဲ့ VPN တွေ အ Ban ခံရမယ့်သဘော ရှိနေတယ်” လို့ IT နည်းပညာ ကျွမ်းကျင်သူ တယောက်က ပြောပါတယ်။
တကယ်တမ်း VPN ဆိုတာမျိုးဟာ လုံးဝ ပိတ်ချလို့ မရနိုင်ဘဲ တခုပိတ်ရင် server အသစ် ထပ်ဖွင့်ပြီး server ပေါင်းစုံနဲ့ ဆက်ပြီး လည်ပတ်လို့ရတာမျိုး ဖြစ်တယ်လို့ ဆိုပါတယ်။
ဒါပေမယ့်လည်း AI နည်းပညာကို အသုံးပြုပြီး စနစ်တကျနဲ့ traffic များတဲ့ လမ်းကြောင်းတွေ (အသုံးများတဲ့ VPN တွေ) ကို တခုပြီးတခု လိုက်လံ တားမြစ်လိုက်မယ် ဆိုရင်တော့ ရာနှုန်းပြည့် မဟုတ်တောင် ၉၀ ရာခိုင်နှုန်းလောက်တော့ VPN အသုံးပြုလို့ မရတာမျိုး ဖြစ်နိုင်ခြေရှိတယ်လို့ သူက ပြောပါတယ်။
“တကယ်တမ်း သူတို့ဘက်က စနစ်တကျ ထိုင် Ban နေမယ်ဆိုရင်တော့ VPN သုံးရဖို့က တဖြည်းဖြည်း ဘောင်ကျဉ်းလာနိုင်တယ်။ ကိုယ်က VPN အသစ် မသုံးမချင်း သူတို့ Block လုပ်လို့ မရပေမယ့် သုံးပြီ၊ လူသုံးများပြီ ဆိုတာနဲ့ Block ပစ်လို့ရတယ်” လို့ သူက ပြောပါတယ်။
ဒါအပြင် IT နည်းပညာ ကျွမ်းကျင်သူ နောက်ထပ် တယောက်ကလည်း အကယ်၍ VPN တွေ အမှန်တကယ် ပိတ်ပင်လာမယ် ဆိုပါက ဒီတားမြစ်ချက်မှာ အခကြေးငွေပေးပြီး အသုံးပြုရတဲ့ VPN တွေလည်း ပါဝင်လာနိုင်တယ်လို့ ဆိုပါတယ်။
“တချို့ကလည်း ကိုယ်ပိုင် server နဲ့ သီးသန့် အသုံးပြုရတဲ့ အခပေး VPN တွေဆို ဘာမှ လုပ်လို့မရနိုင်ဘူး ပြောကြတယ်။ ဒါ မဟုတ်ပါဘူး။ သူကလည်း တခြား VPN တွေလိုပဲ၊ မသုံးရင် ဘာမှမဖြစ်ဘူး။ VPN ချိတ်လိုက်ပြီ၊ သုံးလိုက်ပြီ ဆိုတာနဲ့ Block ခံရဖို့များတယ်။ လုံးဝ Block လို့ မရနိုင်ဘူးဆိုရင်တောင် Data traffic ကို limit လုပ်ချလိုက်လို့ရတယ်။ Data speed MB ကို လျှော့ချပစ်လိုက်တာမျိုးပေါ့။ အဲဒီတော့ လိုင်းဆွဲအား မကောင်းတာ၊ လိုင်းအတက် နှေးသွားတာတွေ ဖြစ်နိုင်တယ်” လို့ သူက ပြောပါတယ်။
မြန်မာနိုင်ငံမှာ အင်တာနက်လိုင်း ဖွင့်လိုက်တာနဲ့ Facebook လို ဆိုရှယ်မီဒီယာတွေ အလွယ်တကူ ချိတ်ဆက် အသုံးပြုနိုင်တာကို ၂၀၂၁ ခုနှစ်၊ ဖေဖော်ဝါရီလကတည်းက တားမြစ် ပိတ်ပင်ထားတာဖြစ်ပြီး VPN (Virtual Private Network) အက်ပလီကေးရှင်းတွေ ကြားခံ ချိတ်ဆက်မှသာ အင်တာနက် အသုံးပြုလို့ရနေကြတာ ဖြစ်ပါတယ်။
VPN က အင်တာနက် အသုံးပြုသူရဲ့ ကွန်ရက်လမ်းကြောင်းကို တခြားသူက ကြားဖြတ် ဝင်ရောက်လို့မရအောင် ကာကွယ်ပေးတယ်လို့လည်း နားလည်နိုင်ပါတယ်။
VPN ကို တဦးတယောက်တည်း Private (ကိုယ်ပိုင်) သုံးနေချိန်မှာ IP address ကိုသိရှိရဖို့ ခက်တာကြောင့် အာဏာပိုင် ဒါမှမဟုတ် တဦးတယောက်က ပိတ်ပင်လိုက်ဖို့၊ တားဆီးလိုက်ဖို့ဆိုတာ ခက်ခဲတယ်လို့ သိရပါတယ်။
ဒါပေမယ့် Private ဖြစ်နေတဲ့ Network တခုကို အများကဝိုင်းပြီး အသုံးပြုလာတဲ့အခါ Public (အများသုံး) ဖြစ်လာရင်တော့ သီးသန့်ဖြစ်တာမျိုး မဟုတ်တော့တဲ့အတွက် အဲဒီလို အခြေအနေမှာ VPN ကို မလိုလားတဲ့ တာဝန်ရှိသူတွေက VPN ရဲ့ လမ်းကြောင်းကိုသိပြီး တားဆီးပိတ်ပင်လို့ ရနိုင်တယ်လို့ နည်းပညာ ကျွမ်းကျင်သူတွေက ပြောပါတယ်။
မြန်မာနိုင်ငံမှာ လူသုံးများတဲ့ Facebook ကို ၂၀၂၁ ခုနှစ်ကစပြီး VPN နဲ့ ကြားခံ အသုံးပြုခဲ့ကြပေမယ့် ၂၀၂၄ ခုနှစ်၊ မေလ ၃၀ ရက်ကစလို့ VPN နဲ့ချိတ်ဆက်ရတာ ခက်ခဲလာတာ၊ သုံးစွဲမရတာမျိုးတွေ ဖြစ်လာတာဟာ လက်ရှိအချိန်အထိ ဖြစ်ပါတယ်။
ဒါကြောင့် မြန်မာနိုင်ငံမှာ အင်တာနက်လိုင်း အသုံးပြုရတာ အဆင်မပြေတဲ့ ပြဿနာတွေ မကြာခဏဆိုသလို ဖြစ်ပေါ်လျက်ရှိနေပြီး ပဋိပက္ခ ဖြစ်ပွားရာ ဒေသတချို့မှာလည်း အင်တာနက်လိုင်း ဖြတ်တောက်ထားတာမျိုးတွေ ရှိနေတာဖြစ်ပါတယ်။
သုတေသနပြုအဖွဲ့ဖြစ်တဲ့ အသံအဖွဲ့ရဲ့ လေ့လာ တွေ့ရှိချက်တွေအရ အခု ၂၀၂၅ ခုနှစ်၊ စက်တင်ဘာလ ၃၀ ရက်နေ့အထိ မြန်မာတနိုင်ငံလုံးမှာ အင်တာနက်လိုင်း၊ ဖုန်းလိုင်း စတဲ့ ဆက်သွယ်ရေးလိုင်းတွေ ဖြတ်တောက်ခံထားရတဲ့ မြို့နယ်ပေါင်း ၁၃၂ မြို့နယ် ရှိတယ်လို့ သိရပါတယ်။
