Pack & Go Easy Travel ကုမ္ပဏီက Visa လုပ်ပေးမယ်ဆိုပြီး ငွေရယူထားပေမယ့် လုပ်မ​ပေးလို့ နစ်နာသူတွေက တိုင်ကြားမယ်

Pack & Go Easy Travel ကုမ္ပဏီဟာ ပြည်ပခရီးစဥ် ငွေကြေး ပြဿနာအပြင် ပြည်ပနိုင်ငံမှာ အလုပ်လုပ်ကိုင်ခွင့်ရရှိဖို့အတွက် Visa လုပ်ပေးမယ်ဆိုပြီး ငွေကြေးတွေရယူခဲ့ပေမယ့် အမှန်တကယ် ပြုလုပ်ပေးတာမရှိသလို ငွေပြန်ပေးတာမျိုးလည်း မရှိတဲ့ပြဿနာတွေ ထပ်ရှိနေသေး တယ်လို့ ငွေကြေးဆုံးရှုံး နစ်နာခဲ့ရသူတွေရဲ့ ပြောပြချက်အရ သိရှိရပါတယ်။
ပြည်ပနိုင်ငံမှာ အလုပ်အကိုင်ကောင်းကောင်းရရှိပြီး လုပ်ကိုင်ရမှာ ဖြစ်လို့ အလုပ်လုပ်လိုပါက ငွေအကြေသွင်းပြီး Visa လျှောက်နိုင်ကြောင်း ​ပြောဆိုခဲ့တဲ့အတွက် ငွေအကြေပေးသွင်းခဲ့ကြတာ ဖြစ်ကြောင်း ၊ ငွေပေးသွင်းပြီးချိန်ကတည်းက ခုထိဆိုရင် တနှစ်နီးပါးလောက်အထိကြာမြင့်လာပေမယ့် Visa လည်း မရသလို ပေးသွင်းငွေတွေလည်း ပြန်မရဘူးလို့ သိရပါတယ်။
" သူတို့ရုံးက ဘယ်လောက်မှ မကြာဘူး ပြောတာ။ ၄ လ ၅လ ဘဲကြာမှာတဲ့ ပြောတာ ။ အခွင့်အရေးတွေလည်း အရမ်းကောင်းတယ် ဆိုပြီးပြောတယ်။အဲတာနဲ့ ညီမတို့လည်း အဟုတ်မှတ်ပြီး EUO 2000 အရင်သွင်းရတယ် ။ တချို့ကျတော့ 3000သွင်းထားကြတယ် ။ အဲတာနဲ့စောင့်နေလိုက်တာ အခု တနှစ်ပြည့်တော့မယ် ။ ဘာဆိုဘာမှကို မကြားတော့ဘူး ။ ခုဆို စာပို့လည်းမကြည့် ၊ဖုန်းခေါ်လည်းဖုန်းမကိုင်ဘူး ။ လောလောဆယ်ဆယ် ညီမသိရသလောက်တင် ၁၅ ယောက်ရှိတယ်။ မသိသေး တဲ့လူတွေ ဘယ်လောက်တောင်ရှိဦးမလည်းမသိဘူး။
ညီမဆို သူများဆီကချေးပြီးသွင်းထားတာ။ တချို့ဆို အတိုးယူပြီးသွင်းထားကြတဲ့လူတွေ ၊ ရှိသမျှပစ္စည်းပေါင်နှံပြီးသွင်းထားလူတွေရှိတယ်။တစ်ချိူ့လည်း ပြန်တောင်းနေတာ 11လပိုင်းတုန်းကတည်းကပဲ။ ဟိုရွှေ့ဒီရွှေ့နဲ့ ပြန်မပေးဘူး။Work Visa သမားတွေချည်းပဲ။အေဂျင်စီက တာဝန်ယူမူမရှိဘဲ ရှောင်နေတာ သူတို့နဲ့ ဘာအဆက်သွယ်မှမရဘူး။ "လို့ EU visa ရဖို့ ငွေသွင်းထားပေမယ့် ဘာမှပြန်မရဘဲ နစ်နာဆုံးရှုံးနေရသူ တယောက်က ပြောပါတယ် ။
Pack & Go Easy Travel ကုမ္ပဏီက ဝန်ဆောင်မှုပေးတဲ့ Visa လျှောက်ထားတဲ့ အစီအစဥ်ကို ယုံကြည်ပြီး Work Visa လျှောက်ဖို့ ငွေတဝက်သွင်းထားသူ ၊ ငွေအပြည့်အကြေသွင်းထားသူအများစုမှာ ငွေပြန်မရဘဲ နစ်နာနေကြရတာ ဖြစ်တယ်လို့သိရပါတယ် ။
ဒါကြောင့် လက်ရှိမှာ Visa ပြုလုပ်ဖို့အတွက် ငွေကြေးပေးသွင်းထားရပေမယ့် Visa လည်းမရသလို ငွေလည်းပြန်မရတဲ့အတွက် နစ်နာဆုံးရှုံးသူတွေက ရဲစခန်းမှာ တိုင်ကြားတာတွေ ပြုလုပ်နေတယ်လို့ သိရပါတယ်။
"သူတို့ချိန်းတဲ့အချိန်သွားတော့လည်း မအားဘူးဆိုပြီး ထွက်မတွေ့ဘူး ။အခု တချိူ့လူတွေကတော့ ရန်ကုန်မှာ အမူ့ဖွင့်ထားတယ်။ ညီမတို့တော့ တချက်စောင့်ကြည့်နေတာ ညီမတို့လည်း ဘာမှမထူးရင် အမူ့ဖွင့်တော့မှာပါ။ စာချုပ်ချုပ်တုန်းက ငွေသွင်းထားတဲ့ စာရွက်တွေအကုန်ရှိတယ်။ " လို့ သူက ထပ်မံ ပြောပါတယ် ။
Pack & Go Easy Travel ကုမ္ပဏီဘက်ကတော့ travel package ဝယ်ယူထားသူတွေကိုသာ ငွေပြန်အမ်းမယ်အကြောင်း စာထုတ်ပြန်ထားတာ တွေ့ရပြီး Visa ကိစ္စတွေနဲ့ပတ်သက်တဲ့ကိစ္စကိုတော့ ထည့်သွင်းပြောဆိုထားတာမျိုးမတွေ့ရပါဘူး။
Pack & Go Easy Travel ကုမ္ပဏီဟာ Visa ဝန်ဆောင်မှုပေးရာမှာ မိမိသွားမယ့်နိုင်ငံအလိုက် နိုင်ငံသား ဖြစ်ခွင့်ရနိုင်တယ်ဆိုတဲ့အထိ ပြောဆိုပြီး ငွေအကြေသွင်းခိုင်းတာမျိုးရှိတယ်လို့ သိရပါတယ် ။
" သူတို့က အလုပ်ခေါ်တယ်။တယောက်ထဲသွားတာထက် မိသားစုလိုက်သွားတာက citizenship ရမယ်ဆိုပြီး မက်လုံးပေးတယ်။ အဲဒါနဲ့ ပတ်စ်ပို့စာအုပ်တွေဘာတွေ ယူတယ်။ ဗီဇာလျှောက်တဲ့အချိန်ကျ ပိုက်ဆံအပြည့်သွင်းရမယ်ပြောတယ် ။ ပိုက်ဆံအပြည့် မသွင်းရင် ဗီဇာ မလုပ်ပေးဘူးဆိုတော့ ဟိုက အိမ်ရောင်းပြီး ပိုက်ဆံ သွင်းလိုက်တယ် ။သိန်း ၈၀၀ လောက်လို့ပြောတယ်။ သူတို့ အတော်လေးဒုက္ခရောက်နေတယ်။မပြေလည်ဘူး ။မကျေနပ်ဘူး။ သူတို့က ပိုက်ဆံပြန်ပေးမယ်သာပြောတာ တယောက်မှ ရတဲ့သူမရှိသေးဘူး ။ " လို့ နစ်နာဆုံးရှုံးမှုဖြစ်ခဲ့သူတယောက်က ပြောပါတယ်။
Pack & Go Easy Travel ကုမ္ပဏီဟာ Visa ကိစ္စအပြင် ပြည်ပခရီးစဥ်တွေအတွက် Travel Package ဝယ်ယူထားသူတွေဆီက ငွေရယူထားပြီး ခရီးစဥ်ကို ပို့ပေးတာမျိူးမရှိခြင်း ၊ ခရီးစဥ်ကို အသွားတကြောင်းလက်မှတ်ဖြတ်ပြီးသာ ပို့ပြီး ကျန်တဲ့ အပြန်လက်မှတ် ၊ ဟိုတယ် စတဲ့ ကိစ္စတွေအတွက် တာဝန်မယူတဲ့ ပြဿနာတွေ ဖြစ်နေတယ်လို့ သိရပါတယ်။
အဲဒီအတွက်လည်း နစ်နာဆုံးရှုံးသူ တွေက သက်ဆိုင်ရာ ရဲစခန်းမှာ တိုင်ကြားမှုရှိနေသလို ဟိုတယ်နှင့်ခရီးသွားဌာနကိုလည်း ဖုန်းနဲ့အသိပေး တိုင်ကြားမှုရှိထားတယ်လို့ သိရပါတယ်။
အခုဖြစ်ပွားနေတဲ့ အခြေအနေတွေနဲ့ပတ်သက်ပြီး အခြေအနေကို သိရှိနိုင်ဖို့ Pack & Go Easy Travel ကုမ္ပဏီ ကို ဖုန်းနဲ့ဆက်သွယ်ခဲ့ပေမယ့် ဖုန်းလက်ခံ ဖြေကြားခဲ့ခြင်း မရှိပါဘူး ။

မိုးတိမ်တောင်ကြောင့် လေပြင်းတိုက်ခတ်မှုကို ဇွန်လဆန်းပိုင်းလောက်အထိ သတိပြုဖို့လို

မိုးတိမ်တောင် ဖြစ်စဉ်တွေကြောင့် လေပြင်းတိုက်ခတ်မှု အန္တရာယ်ကို လာမယ့် မုတ်သုန်ဝင်ချိန်ဖြစ်တဲ့ မေလကုန်၊ ဇွန်လဆန်းပိုင်းလောက်အထိ သတိပြုဖို့ လိုအပ်တယ်လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ညွှန်ကြားရေးမှူးချုပ် ဒေါက်တာကျော်မိုးဦးက ပြောပါတယ်။
မိုးတိမ်တောင်ဖြစ်စဉ်တွေ ဖြစ်ပေါ်တတ်တဲ့ ပထမတချက်‌ကတော့ အပူချိန် မြင့်တက်ခြင်းဖြစ်ပြီး နောက်တချက်ကတော့ ရာသီ အပြောင်းအလဲကြောင့်ဖြစ်ကာ လက်ရှိ နွေရာသီကာလကနေ မုတ်သုန်လေ ကူးပြောင်းတဲ့ကာလမှာ များသောအားဖြင့် လေထု မငြိမ်သက်မှုတွေ ဖြစ်ပေါ်တတ်တယ်လို့ ဒေါက်တာကျော်မိုးဦးက ပြောပါတယ်။
“အပူချိန် မြင့်လာတဲ့အတွက်ကြောင့်မို့လို့ ဒေသတွင်းမှာရှိတဲ့ ရေခိုးရေငွေ့တွေက အငွေ့ပျံပြီး အပေါ်ကိုတက်တယ်၊ မိုး‌တိမ်တောင်တွေ ဖြစ်တယ်။ ဒီဖြစ်စဉ်ကြောင့် မိုးတိမ်တောင်တွေဖြစ်တဲ့ လမ်းကြောင်းတလျှောက်မှာ မိုးရွာပြီး လေပြင်းတိုက်တာ၊ မိုးသီးကြွေတာ၊ လျှပ်စီးလက်၊ မိုးကြိုးပစ်တာတို့ပေါ့၊ ဒီကာလတွေမှာ ဖြစ်တတ်တယ်။ ဒါတွေက မုန်သုန်ဝင်တဲ့အချိန်ကျမှ တဖြည်းဖြည်း လျော့သွားမယ်။ မုတ်သုန် စဝင်တာကတော့ မေလလယ်လောက်မှ မြန်မာနိုင်ငံ တောင်ပိုင်းကနေ စဝင်မယ်။ တနိုင်ငံလုံးဆိုရင် ဇွန်လဆန်းလောက်မှ ဝင်မယ်” လို့ သူက ပြောပါတယ်။
မိုး/ဇလဌာနရဲ့ ဒီကနေ့ ဧပြီ ၂၆ ရက်၊ ညနေ ၄ နာရီအချိန် ထုတ်ပြန်ချက်အရ နေပြည်တော်၊ ရန်ကုန်တိုင်း၊ မန္တလေးတိုင်း၊ မကွေးတိုင်း၊ ဧရာဝတီတိုင်း၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်နဲ့ ရှမ်းပြည်နယ် (တောင်ပိုင်း) တို့မှာ မိုးတိမ်တောင်တွေ ဖြစ်ထွန်းလျက်ရှိတယ်လို့ သိရပါတယ်။
“အဓိက ကတော့ ဒီဖြစ်စဉ်က ဒေသခွဲခြားဖို့တော့ ခက်တယ်။ မိုးတိမ်တောင် ဖြစ်စဉ်တွေက အကြာကြီး မဖြစ်ဘူးလေ။ အချိန်တိုလေးအတွင်းမှာ ဖြစ်တာဆိုတော့ နေရာတိုင်းမှာတော့ ဖြစ်နိုင်တယ်။ ဟိုးအရင်တုန်းကတော့ မြန်မာနိုင်ငံ အထက်ပိုင်း၊ အလယ်ပိုင်းတွေမှာ ဖြစ်တယ်။ အခုနောက်ပိုင်းကျတော့ အဲဒီနေရာတွေတင် မဟုတ်တော့ဘဲ မြစ်ဝကျွန်းပေါ်ဘက်တွေမှာလည်း ဖြစ်တယ်။ ဒါကြောင့် ဒေသအနေနဲ့တော့ ခွဲခြားလို့ မရတော့ဘူး။ ကျွန်တော်တို့ရဲ့ မိုးလေဝသ ခန့်မှန်းချက်တွေကိုပဲ စောင့်ကြည့်ပြီး လိုက်နာဖို့လိုတယ်” လို့ ဒေါက်တာကျော်မိုးဦးက ပြောပါတယ်။
လက်ရှိမှာ နေရာဒေသမရွေး မိုးတိမ်တောင်ဖြစ်ပေါ်မှု များပြားနေတာဟာ ရာသီဥတု အပြောင်းအလဲကြောင့်ဖြစ်ပြီး အပူအချိန် မြင့်တက်မှုနှုန်း များပြားလာကာ ရေငွေ့ပျံနှုန်း များလာတာကြောင့် ဖြစ်တယ်လို့ သူက ပြောပါတယ်။
“မိုးတိမ်တောင် ဖြစ်တိုင်းလည်း လေပြင်းတိုက်တာ မဖြစ်နိုင်ပါဘူး။ မိုးတိမ်တောင် တအား အားကောင်းသွားတဲ့ အချိန်ကျမှသာ လေပြင်းတိုက်တာတို့၊ တခြား သဘာဝဘေးတွေ ဖြစ်တာ။ အရင်တုန်းကတော့ ဒီကာလတွေမှာ မိုးတိမ်တောင်ဖြစ်တာ နည်းတယ်။ အခုနောက်ပိုင်းကျတော့ အပူချိန် မြင့်တက်လာပြီး ရေငွေ့ပျံနှုန်းက များလာတယ်။ အဓိက ကတော့ climate change နဲ့ သွားပြီး ဆက်စပ်တာပေါ့” လို့ သူက ပြောပါတယ်။
ဒါအပြင် လက်ရှိအချိန်ဟာ နွေရာသီကနေ မိုးရာသီကို ကူးပြောင်းကာလ ဖြစ်တဲ့အတွက် လေထု မငြိမ်မသက်မှုတွေဖြစ်ကာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်မှာ လေဖိအားနည်းရပ်ဝန်းနဲ့ မုန်တိုင်းတွေ ဖြစ်ပေါ်တတ်တယ်လို့ သိရပြီး လက်ရှိမှာတော့ အဲဒီဖြစ်စဉ်တွေ ဖြစ်ပေါ်နိုင်ခြင်း မရှိသေးပေမယ့် စောင့်ကြည့်ဖို့ လိုအပ်တယ်လို့ သူက ပြောပါတယ်။

ဂျိုတာညီနောင် သေဆုံးခဲ့တဲ့ ယာဉ်တိုက်မှုတွင် ရာဇဝတ်မှုနှင့် ဆက်စပ်နေခြင်း မရှိကြောင်း စုံစမ်းစစ်ဆေးသူများ ဆုံးဖြတ်လာ
=================

လီဗာပူးတိုက်စစ်မှူးဟောင်းဒီယေဂိုဂျိုတာနှင့် ညီဖြစ်သူ အင်ဒရေးဆေးလ်ဗားတို့ အသက်သေဆုံးစေခဲ့တဲ့ ယာဉ်တိုက်မှုတွင် ရာဇဝတ်မှုနှင့် ဆက်စပ်နေခြင်း မရှိကြောင်း စပိန်စုံစမ်းစစ်ဆေးသူများက ဆုံးဖြတ်လာပါတယ်။
ဂျိုတာနှင့် ဆေးလ်ဗားတို့ဟာ ၂၀၂၅ ခုနှစ် ဇူလိုင်လ ၃ ရက်နေ့တုန်းက စပိန်မြောက်ပိုင်းကာနာဒယ်လာအနီး A-52 အဝေးပြေးလမ်းမပေါ်တွင် Lamborghini ဘီးပွင့်ထွက်သွားပြီးနောက် ယာဉ်တိုက်မှုဖြစ်ကာ သေဆုံးသွားခဲ့ကြပါတယ်။
အထက်ပါ ယာဉ်မတော်တဆမှုအား စုံစမ်းစစ်ဆေးပြီးနောက် စပိန်တရားရုံးက ယင်းယာဉ်တိုက်မှုမှာ ကားတာယာပွင့်သွားမှုကြောင့် ဖြစ်ပြီး လမ်းလယ်ခေါင်ကျွန်းကို တိုက်မိပြီးနောက် မီးလောင်သွားခြင်းဖြစ်ကြောင်း ဆုံးဖြတ်လာပါတယ်။
ဇာမိုရာပြည်နယ် တရားမျှတရေး တရားရုံးချုပ်က သက်သေအထောက်အား အားလုံးကို စစ်ဆေးမှုများ ပြုလုပ်ပြီးနောက် ဂျိုတာနှင့် ဆေးလ်ဗားတို့ သေဆုံးမှုတွင် ရာဇဝတ်မှုနှင့် တစုံတရာ ဆက်စပ်နေခြင်း မရှိကြောင်း ဆုံးဖြတ်လာတာပါ။
ဂျိုတာဟာ လီဗာပူးနှင့်အတူ ရာသီကြိုလေ့ကျင့်ခန်းဆင်းရန်အတွက် ညီဖြစ်သူနှင့်အတူ စပိန်ဆိပ်ကမ်းမြို့တော် ဆန်တားဒါးသို့ သင်္ဘောစီးရန် သွားစဉ် လမ်းခရီးမှာ ယာဉ်တိုက်မှု ဖြစ်ခဲ့တာပါ။
ဂျိုတာဟာ ဆေးဘက်ဆိုင်ရာပရော်ဖက်ရှင်နယ်များက နွေရာသီအစောပိုင်းတုန်းက အဆုတ်ခွဲစိတ်ကုသထားရမှုနှင့်အတူ လေယာဉ်ဖြင့် ခရီးမသွားရန် အကြံပေးထားမှုကြောင့် သင်္ဘောဖြင့် သွားရန် ဆိပ်ကမ်းသို့ ကိုယ်တိုင်မောင်းနှင်ခဲ့တာလည်း ဖြစ်ပါတယ်။
ဂျိုတာဟာ ယာဉ်တိုက်မှုကြောင့် မသေဆုံးမီ ၁၁ ရက်အလိုကမှ ပေါ်တူဂီနိုင်ငံ၊ ပေါ်တိုရှိ ဘုရားကျောင်းတစ်ခုတွင် ငယ်ချစ် ရူတီကာဒိုဆိုနှင့် လက်ထပ်ခဲ့သူ ဖြစ်ပါတယ်။
ဂျိုတာနှင့် ဆေးလ်ဗားညီနောင်တို့ရဲ့ အသုဘအခမ်းအနားကို ၂ ရက်အကြာတွင် ပေါ်တိုရှိ ဂွန်ဒိုမာတွင် ပြုလုပ်ခဲ့ပါတယ်။
ယင်းအသုဘအခမ်းအနားသို့ လီဗာပူးကစားဖော်ဟောင်းများ၊ ပေါ်တူဂီကစားဖော်ဟောင်းများ တက်ရောက်ခဲ့ကြပါတယ်။
လီဗာပူးဟာလည်း ဂျိုတာဝတ်ဆင်ခဲ့တဲ့ ကျောနံပါတ် ၂၀ ကို ရာသက်ပန် အနားပေးခဲ့သလို စာချုပ်လက်ကျန် တန်ဖိုးအတွက်လည်း ကျန်ရစ်သူ မိသားစုအား နစ်နာကြေးပေးခဲ့ပါတယ်။
ဂျိုတာဟာ ပြီးခဲ့တဲ့ ရာသီတုန်းက အန်းဆလော့ရဲ့ ပထမဆုံးရာသီတွင် ပရီးမီးယားလိဂ်ဖလား ရရှိအောင် ၁၀ ဂိုးသွင်းကာ အဓိကနေရာမှ ကူညီခဲ့သူလည်း ဖြစ်ပါတယ်။

မာတီနက်ဇ်ရဲ့ ၃ ပွဲပယ်ပြစ်ဒဏ်အယူခံအား ငြင်းပယ်ရတဲ့အကြောင်းရင်းကို အက်ဖ်အေအတည်ပြုလာ
====================

အက်ဖ်အေရဲ့ စည်းကမ်းထိန်းသိမ်းရေးကော်မတီက ဆံပင်ဆွဲမှုအပေါ် သည်းခံခွင့်လွှတ်နိုင်စရာမရှိကြောင်း ပြောကြားကာ ယူနိုက်တက်နောက်ခံလူလီဆန်ဒရိုမာတီနက်ဇ်ရဲ့ ၃ ပွဲပယ်ပြစ်ဒဏ်အယူခံအား ပယ်ချခဲ့ရတဲ့ အကြောင်းရင်းအား အတည်ပြုလာပါတယ်။
လွတ်လပ်တဲ့ စည်းကမ်းထိန်းသိမ်းရေးကော်မတီဟာ ပွဲအတွင်း လိဒ်တိုက်စစ်မှူးဒိုမီနစ်ကယ်ဗတ်လီဝင်းကို ဆံပင်ဆွဲမှုအတွက် ၃ ပွဲပယ်ခံရတဲ့ မာတီနက်ဇ်အတွက် ယူနိုက်တက်ဘက်က အယူခံဝင်မှုကို ပယ်ချခဲ့ပါတယ်။
အသက် ၂၈ နှစ်ရှိ မာတီနက်ဇ်ဟာ အိုးထရက်ဖို့ဒ်တွင် လိဒ်အား ၂-၁ ဖြင့် ရှုံးနိမ့်တဲ့ပွဲစဉ်တွင် ကယ်ဗတ်လီဝင်းကို ဆံပင်ဆွဲခဲ့တာ ဖြစ်ပြီး ဒိုင်လူကြီးပေါလ်တီယာနေးက ကွင်းဘေးအနီး မော်နီတာတွင် စစ်ဆေးမှု ပြုလုပ်ပြီးနောက် တိုက်ရိုက်အနီကတ်ပြသခြင်းခံခဲ့ရပါတယ်။
အက်ဖ်အေစည်းကမ်းထိန်းသိမ်းရေးကော်မတီက ဘောလုံးပွဲတွင် ဆံပင်ဆွဲမှုအပေါ် သည်းခံခွင့်လွှတ်နိုင်စရာ မရှိကြောင်း၊ ယင်းလုပ်ရပ်အတွက် ပြင်းထန်စွာ အရေးယူရမည်ဖြစ်ကြောင်း ဆိုထားပါတယ်။
အာဂျင်တီးနားလက်ရွေးစင်ကစားသမားဟာ ပြီးခဲ့တဲ့အပတ်တုန်းက ချဲလ်ဆီးအား အနိုင်ရတဲ့ပွဲကို လွဲချော်ထားပြီးဖြစ်ကာ ဧပြီလ ၂၇ ရက်နေ့ ဘရန့်ဖို့ဒ်နှင့်လည်းကောင်း၊ မေလ ၃ ရက်နေ့ လီဗာပူးနှင့် အိမ်ကွင်းပွဲစဉ်တို့ကိုလည်းကောင်း လွဲချော်လာဦးမှာ ဖြစ်ပါတယ်။

ဗီနီရှပ်စ်ဂျူနီယာနှင့် အဖြစ်အပျက်တွင် ပရက်စတီယန်နီ ၆ ပွဲပယ်ခံလာရ
==================

ဘင်ဖီကာတောင်ပံကစားသမားဂျီယန်လူကာပရီစတီယန်နီဟာ ဖေဖော်ဝါရီလတုန်းက ရီးရဲလ်မက်ဒရစ်နှင့် ချန်ပီယံလိဂ်ရှုံးထွက်ပလေးအော့ဖ်ပွဲစဉ်မှ အဖြစ်အပျက်အတွက် ယူအီးအက်ဖ်အေရဲ့ ၆ ပွဲပယ်ပြစ်ဒဏ်ချမှတ်ခြင်းခံလာရပါတယ်။
လစ္စဘွန်းရှိ Estadio da Luz တွင် ကစားတဲ့ပွဲစဉ်တွင် ရီးရဲလ်မက်ဒရစ်ရဲ့ ဗီနီရှပ်စ်က ၎င်းကို ပရက်စတီယာနီက လူမျိုးရေးခွဲခြားမှု ပြုလုပ်တယ်လို့ စွပ်စွဲမှု ပြုလုပ်ပြီးနောက် ပွဲကို ၁၀ မိနစ်ခန့် ရပ်ဆိုင်းခဲ့ရပါတယ်။
အသက် ၂၀ နှစ်ရှိ ပရက်စတီယာနီက လူမျိုးရေးခွဲခြားမှု ပြုလုပ်ခဲ့ခြင်း မရှိကြောင်း ငြင်းဆိုသွားခဲ့ပြီး ဗီနီရှပ်စ်က နားကြားလွဲမှားခြင်းသာ ဖြစ်ကြောင်း ဆိုသွားပါတယ်။
ဒါပေမယ့် ရီးရဲလ်မက်ဒရစ်ကွင်းလယ်ကစားသမားချူအာမီနီက ပရက်စတီယန်နီက ဗီနီရှပ်စ်ကို လိင်တူချစ်သူများကို မုန်တီးတဲ့ မုတ်ချက်ပြုမှုသာ ပြုလုပ်ခဲ့ကြောင်း ၎င်းကို ဖွင့်ဟခဲ့ကြောင်း ဆိုသွားပါတယ်။
အာဂျင်တီးနားစတားဟာ ၁ ပွဲပြစ်ဒဏ်ကျခံထားပြီးဖြစ်ကာ နောက်ထပ် ၂ ပွဲပယ်ပြစ်ဒဏ်ကျခံရဦးမှာ ဖြစ်ပြီး ကျန် ၃ ပွဲကို ၂ နှစ်အတွင်း ဆိုင်းငံ့ပြစ်ဒဏ်အဖြစ် ကျခံရပါမယ်။
ယူအီးအက်ဖ်အေဟာ ပရက်စတီယာနီရဲ့ ပွဲပယ်ပြစ်ဒဏ်ကို တစ်ကမ္ဘာလုံးတွင် အကျုံးဝင်အောင် ဖီဖာထံ တောင်းဆိုမှု ပြုလုပ်ထားပြီး ဖြစ်ပါတယ်။
ဘင်ဖီကာနှင့်ပွဲစဉ်တွင် ဗီနီရှပ်စ်က ရီးရဲလ်မက်ဒရစ်အတွက် တစ်လုံးတည်းသော အနိုင်ဂိုးကို သွင်းယူပြီးနောက် အကြီးအကျယ်အောင်ပွဲခံခဲ့ရာမှ အဝါကတ်ပြသခြင်းခံခဲ့ရပါတယ်။
ယင်းအချိန်တွင် ပရက်စတီယာနီ ကြားဝင်လာပြီးနောက် ဘရာဇီးစူပါစတားဟာ ဒိုင်လူကြီးဖရန်ကို့စ်လီတီဇီယာထံ ပြေးလွှားသွားခဲ့ပြီး လူမျိုးရေးခွဲခြားဆက်ဆံခြင်းခံခဲ့ရကြောင်း အသိပေးခဲ့ပါတယ်။
ဒိုင်လူကြီးကလည်း ချက်ချင်းပင် လက်နှစ်ဘက်က ကြက်ခြေခတ်ပြုလုပ်ကာ လူမျိုးရေးခွဲခြားမှု ရှိနေကြောင်း အချက်ပြခဲ့ပါတယ်။
ဗီနီရှပ်စ်ဟာ ယင်းအဖြစ်အပျက်ကြောင့် ကွင်းအပြင်သို့ ထွက်ခွာသွားပြီး ရီးရဲလ်မက်ဒရစ်ကစားသမားများကလည်း နောက်က လိုက်သွားပါတယ်။
ပရက်စတီယန်ဟာ လူမျိုးရေးခွဲခြားမှု ပြုလုပ်ကြောင်း စစ်ဆေးတွေ့ရှိပါက ၁၀ ပွဲအထိ အမြင့်မားဆုံးပြစ်ဒဏ်ကျခံရနိုင်ခဲ့ပါတယ်။
ဒါပေမယ့် သူဟာ လိင်တူချစ်သူဆန့်ကျင်ရေးမှတ်ချက်သာ ပြောဆိုကြောင်း စစ်ဆေးတွေရှိပြီးနောက် ၆ ပွဲပယ်ပြစ်ဒဏ်သို့ လျှော့ချချမှတ်ခြင်းခံခဲ့ရပါတယ်။
တဖက်တွင် ယူအီးအက်ဖ်အေဟာ လိင်တူချစ်သူဆန့်ကျင်ရေးမှတ်ချက်ပြု ပြောဆိုမှုအား လူမျိုးရေးခွဲခြားမှုလောက် အလေးထားအရေးယူမှု မပြုလုပ်မှုအတွက် ဝေဖန်ခြင်းခံနေရပါတယ်။
ပရက်စတီယန်ဟာ ဗီနီရှပ်စ်အား စကားပြောစဉ် အင်္ကျီဖြင့် ပါးစပ်ကို ဖုံးလွှမ်းပြီး ပြောဆိုခဲ့တာ ဖြစ်ပါတယ်။
အထက်ပါအဖြစ်အပျက်ကြောင့် ဘောလုံးစည်းမျဉ်းရေးဆွဲထားသူများဟာ ပါးစပ်အုပ်ပြီး စကားပြောဆိုတဲ့ ကစားသမားအဖြစ်အပျက်မျိုး ရှိလာပါက ပွဲကို ရပ်ဆိုင်းရန် သဘောတူညီမှု ရထားပြီး ဖြစ်ပါတယ်။

ပရီးမီးယားလိဂ်သမိုင်းတွင် အဆိုးရွားအင်္ကျီဒီဇိုင်းလို့ ဝေဖန်ခံနေရတဲ့ ချဲလ်ဆီးရဲ့ အိမ်ကွင်းအင်္ကျီသစ်ဒီဇိုင်း ထွက်ပေါ်လာ
======================

ချဲလ်ဆီးရဲ့ ၂၀၂၆-၂၇ ရာသီတွင် အသုံးပြုလာမယ့် အိမ်ကွင်းဝတ်စုံဒီဇိုင်း အွန်လိုင်းတွင် ပေါက်ကြားလာပါတယ်။
ပရီးမီးယားလိဂ်ထိပ်သီးကလပ်ဟာ ပြီးခဲ့တဲ့နှစ်များအတွင်းတွင် ဆိုးရွားတဲ့ ဖက်ရှင်ဒီဇိုင်းဝတ်စုံများကို အသုံးပြုမှုအတွက် လူသိများတဲ့ ကလပ်လည်း ဖြစ်ပါတယ်။
ယခုရာသီ အဆိုးရွားဆုံး အင်္ကျီဒီဇိုင်းအဖြစ် မန်စီးတီးရဲ့ မိုးရေစက်ပါ တတိယဝတ်စုံက သတ်မှတ်ခံထားရပါတယ်။
တဖက်တွင် ပရီးမီးယားလိဂ်သမိုင်းတွင် အဆိုးရွားဆုံး အင်္ကျီဒီဇိုင်းအဖြစ် လီဗာပူးရဲ့ ၂၀၂၁-၂၂ ရာသီ ဝတ်စုံဒီဇိုင်းနှင့် ယူနိုက်တက်ရဲ့ ၁၉၉၅-၉၆ အဝေးကွင်းဝတ်စုံတို့က ရပ်တည်နေပါတယ်။
ပရီးမီးယားလိဂ်ကလပ်များဟာ ၂၀၂၆-၂၇ ရာသီအတွက် ဝတ်စုံကို မကြေညာသေးပါဘူး။
ဒါပေမယ့် ယနေ့မှာတော့ ချဲလ်ဆီးရဲ့ ရာသီသစ်တွင် ဝတ်ဆင်လာမယ့် အိမ်ကွင်းအင်္ကျီဒီဇိုင်း ပေါက်ကြားလာခဲ့ပြီ ဖြစ်ပါတယ်။
FootyHeadlines က ချဲလ်ဆီးရဲ့ ရာသီသစ် အိမ်ကွင်းအင်္ကျီဒီဇိုင်းကို ဖွင့်ချလာတာပါ။ ချဲလ်ဆီးရဲ့ အိမ်ကွင်းအင်္ကျီသစ်တွင် အပြာရောင်ကိုပင် ဆက်လက် အသုံးပြုထားပြီး Nike လိုဂို၊ ကလပ်လိုဂိုနှင့် ပုခုံးနှစ်ဖက် အစင်းတစ်ခုစီ ပါဝင်ကာ ယင်းတို့ကို ရွှေရောင် အသုံးပြုထားပါတယ်။
ဒါ့အပြင် ချဲလ်ဆီးအိမ်ကွင်းအင်္ကျီတွင် ကလပ်လိုဂိုတွင် ပါဝင်တဲ့ ခြင်္သေ့ပုံကိုလည်း ရှေ့ဘက်ခြမ်းတွင် ထည့်သွင်းထားပါသေးတယ်။
ချဲလ်ဆီးရဲ့ အဝေးကွင်းဝတ်စုံက အနက်ရောင်ဖြစ်ပြီး ရွှေရောင်တို့အား ရောနှောအသုံးပြုထားကာ ပရိသတ်များရဲ့ သဘောကျခြင်းခံနေရပါတယ်။
ချဲလ်ဆီးရဲ့ တတိယဝတ်စုံက အဖြူရောင်ဖြစ်ပြီး အနီရောင်နှင့် အပြာရောင်တို့ကိုလည်း ရောနှောအသုံးပြုထားကာ ပရိသတ်များ လက်ခံတာ တွေ့ရပါတယ်။
တစ်ခု သတိထားရမှာကတော့ ယခုထွက်ပေါ်လာတဲ့ ဝတ်စုံတွေက ချဲလ်ဆီးရဲ့ လာမယ့် ရာသီ ဝတ်စုံအစစ် ဟုတ်/မဟုတ်ကိုတော့ အတည်မပြုနိုင်တာ ဖြစ်ပါတယ်။

လာမယ့်အပတ်တွင် နယူးကာဆယ်ပိုင်ရှင်များနှင့် တွေ့ဆုံဆွေးနွေးရန် အက်ဒီဟောင်း စီစဉ်ထား
====================

နယူးကာဆယ်နည်းပြအက်ဒီဟောင်းဟာ လာမယ့်အပတ်တွင် အသင်းပိုင်ရှင်များနှင့် တွေ့ဆုံဆွေးနွေးမှုများ ပြုလုပ်ရန် စီစဉ်ထားကြောင်း သိရပါတယ်။
နယူးကာဆယ်ဥက္ကဌယာဆာအယ်ရူမေယန်နှင့် Public Investment Fund (PIF) မှ တာဝန်ရှိသူများဟာ လာမယ့်အပတ်တွင် အင်္ဂလန်အရှေ့မြောက်ပိုင်းသို့ လာရောက်လည်ပတ်ရန် စီစဉ်ထားကြပါတယ်။
အက်ဒီဟောင်းနှင့် အသင်းပိုင်ရှင်များဟာ နော်သမ်ဘာလန်းရှိ Matfen Hall တွင် တွေ့ဆုံရန် စီစဉ်ထားကြပါတယ်။
နယူးကာဆယ်အသင်းတာဝန်ရှိသူများဟာ ပြီးခဲ့တဲ့နှစ်တုန်းကလည်း ယခုကဲ့သို့ကာလမျိုးတွင်ပင် အသင်းရဲ့ ရေရှည်စီမံကိန်းအပါအဝင် အနာဂတ်အစီအစဉ်များနှင့်ပတ်သက်ပြီး တွေ့ဆုံဆွေးနွေးမှုများ ပြုလုပ်ခဲ့ကြဖူးပါတယ်။
အက်ဒီဟောင်းက "ဒါက ပုံမှန်လုပ်ရိုး လုပ်စဉ်ပါ။ ကျွန်တော်တို့အတွက် ထူးထူးထွေထွေ မဟုတ်ပါဘူး။ ပိုင်ရှင်တွေနဲ့ တိုက်ရိုက်စကားပြောခွင့်ရတာ အမြဲသဘောကျတယ်။ ကိုယ့်ဆန္ဒရှိတဲ့အရာရာကို ပြောခွင့်ရတယ်။ ဒါကလည်း ကျွန်တော်တို့ အမြဲတမ်းလုပ်လာတဲ့အရာပါ။ လာမယ့်အပတ်အတွက် စိတ်လှုပ်ရှားနေပါတယ်"လို့ ပြောကြားသွားပါတယ်။
အက်ဒီဟောင်းဟာ ရလဒ်ဆိုးရွားကာ ပရီးမီးယားလိဂ်အမှတ်ပေးဇယားအဆင့် ၁၄ သို့အထိ ကျဆင်းလာမှုနှင့်အတူ အနာဂတ် မရေမရာ ဖြစ်နေပါတယ်။
နယူးကာဆယ်ဟာ နွေရာသီတွင် အသင်းရဲ့အရေးပါတဲ့ ကစားသမားများဖြစ်ကြတဲ့ အန်တိုနီဂေါ်ဒွန်၊ ဆန်ဒရိုတိုနာလီ၊ တိုနီလီဗရာမန်တို၊ ဘရူနိုဂူမာရေးစ်စတဲ့ အရေးပါတဲ့ ကစားသမားများကို ဆုံးရှုံးရနိုင်ခြေ ရှိနေပြီး အလုပ်ရှုပ်တဲ့ အပြောင်းအရွှေ့ ကြုံလာဖို့ ရှိနေပါတယ်။

ကမ္ဘာ့ဖလားပြိုင်ပွဲသို့ လာရောက်သူများ အထူးသတိထားကြရန် လူ့အခွင့အရေးအဖွဲ့အစည်းများ သတိပေးတိုက်တွန်းလာ
====================

လူ့အခွင့်အရေးအဖွဲ့အစည်းများက အမေရိကန်သို့ ကမ္ဘာ့ဖလားပြိုင်ပွဲအတွက် လာရောက်ကြမယ့် ပရိသတ်များ၊ ကစားသမားများ၊ ဂျာနယ်လစ်များနှင့် အခြားဧည့်သည်များအနေဖြင့် အထူးသတိထားကြရန် သတိပေးတိုက်တွန်းမှု ပြုလုပ်လာပါတယ်။
အဖွဲ့အစည်းပေါင်း ၂၀၀ ကျော်တို့ဟာ ဒေါ်နယ်ထရမ့်အစိုးရရဲ့ လူဝင်မှုကြီးကြပ်ရေးနှိမ်နင်းမှုအား အပြင်းအထန် လုပ်ဆောင်နေမှုနှင့်အတူ ခရီးသွားဆိုင်ရာအကြံပေးမှု ပြုလုပ်လာတာလည်း ဖြစ်ပါတယ်။
ယင်းအဖွဲ့အစည်းများက "ထရမ့်အစိုးရရဲ့ အာဏာရှင်စနစ် မြင့်တက်လာမှု၊ အကြမ်းဖက်မှု တိုးမြင့်လာမှုနှင့်အတူ အားလုံးအတွက် ပြင်းထန်တဲ့ အန္တရာယ်ဖြစ်ပေါ်နေစေတယ်" သတိပေးထားပါတယ်။
တဖက်တွင် အဖွဲ့အစည်းအချို့တို့ကလည်း ဒေါ်နယ်ထရမ့်နှင့် နီးနီးကပ်ကပ်ရှိနေခဲ့တဲ့ ဖီဖာဥက္ကဌဂျီယန်နီအင်ဖန်တီနိုကိုလည်း အပြင်းအထန်ဝေဖန်မှု ပြုလုပ်ထားပါတယ်။
American Civil Liberties Union အဖွဲ့က ဖီဖာအနေဖြင့် ကမ္ဘာ့ဖလားပြိုင်ပွဲ လာရောက်ကြည့်ရှုတဲ့ မည်သည့်လူသားကိုမဆို လူ့အခွင့်အရေး အပြည့်အဝ ရရှိရေး အမေရိကန်အာဏာပိုင်များအပေါ် ဖိအားပေးသင့်ကြောင်းလည်း ဆိုထားပါတယ်။
တဖက်တွင် ဒေါ်နယ်ထရမ့်အစိုးရကတော့ လူ့အခွင့်အရေးအဖွဲ့အစည်းများကို နှိုးဆော်တိုက်တွန်းမှုများနှင့်ပတ်သက်ပြီး တစုံတရာ မှတ်ချက်ပြု ပြောကြားထားခြင်း မရှိပါဘူး။
ဖီဖာကတော့ ကမ္ဘာ့ဖလားပြိုင်ပွဲနှင့် ဆက်စပ်နေတဲ့ အဖွဲ့အစည်းအားလုံးက လူ့အခွင့်အရေး အပြည့်အဝ ရရှိမယ်လို့ ကတိကဝတ် ရရှိထားကြောင်း တုံ့ပြန်ထားပါတယ်။
လူ့အခွင့်အရေးအဖွဲအစည်းများဟာ အမေရိကန်က ပြည်ဝင်ခွင့် ပိတ်ထားတဲ့ ကမ္ဘာ့ဖလားခြေစစ်ပွဲအောင်နိုင်ငံများဖြစ်ကြတဲ့ ဟေတီ၊ ဆီနီဂေါ၊ အီရန်၊ အိုင်ဗရီကို့စ်မှ ပရိသတ်များအနေဖြင့် ကမ္ဘာ့ဖလားပြိုင်ပွဲ ကြည့်ရန် အမေရိကန်သို့ ရောက်လာပြီးမှ ပြည်ဝင်ခွင့် ပိတ်ပင်ခြင်းခံရနိုင်တာမျိုး ဖြစ်နိုင်ကြောင်း သတိပေးထားပါတယ်။
အမေရိကန်ဟာ ကနေဒါ၊ မက္ကဆီကိုတို့နှင့်အတူ ၂၀၂၆ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ကျင်းပလာမှာ ဖြစ်ပြီး ကမ္ဘာ့ဖလားပွဲ ၁၀၄ မှ ၇၈ ပွဲကို လက်ခံကျင်းပလာမှာလည်း ဖြစ်ပါတယ်။

ဂက်စ်ပါရီနီနှင့် ပြဿနာတက်ပြီးနောက် ရိုးမားအကြံပေးရာထူးမှ ထွက်ခွာလာတော့မယ့် ပရီးမီးယားလိဂ်ဖလားဆွတ်ခူးခဲ့တဲ့ နည်းပြ
=======================

ကလော်ဒီယိုရေနီယာရီဟာ နည်းပြဂျီယန်ပီရိုဂက်စ်ပါရီနီနှင့် ပြဿနာတက်ပြီးနောက် ရိုးမားရဲ့စီနီယာအကြံပေးရာထူးမှ ထွက်ခွာလာတော့မှာ ဖြစ်ပါတယ်။
အသက် ၇၄ နှစ်ရှိ ရေနီယာရီဟာ ၂၀၂၄ ခုနှစ်တုန်းက သူချစ်တဲ့ ရိုးမားကို နည်းပြအဖြစ် တတိယအကြိမ်မြောက် ကိုင်တွယ်ကာ ချန်ပီယံလိဂ်ဝင်ခွင့်နှင့် ၁ မှတ်အကွာ အဆင့် ၅ နေရာတွင် ရပ့်တည်နိုင်အောင် ကူညီခဲ့သူ ဖြစ်ပါတယ်။
အီတလီလူမျိုးနည်းပြဟာ ရာသီအကုန်မှာ ရာထူးမှ ထွက်ခွာပြီးနောက် အီတလီနည်းပြရာထူးအတွက် ကမ်းလှမ်းမှုပါ ငြင်းပယ်ကာ ပိုင်ရှင်ဒါနီရယ်ဖရက်ကင်ရဲ့ အကြံပေးအဖြစ် တာဝန်ထမ်းဆောင်လာခဲ့ပါတယ်။
လက်စတာနည်းပြဟောင်းဟာ နွေရာသီတွင် အသက် ၆၈ နှစ်ရှိ ဂက်စ်ပါရီနီအား ရိုးမားနည်းပြအသစ် အဖြစ် ခန့်အပ်ရာတွင် အရေးပါတဲ့ အခန်းကဏ္ဍမှ ပါဝင်ခဲ့သူလည်း ဖြစ်ပါတယ်။
ဒါပေမယ့် ဝါရင့်အီတလီနည်းပြကြီးနှစ်ဦးတို့ဟာ သဘောထားကွဲလွဲမှုများ ဖြစ်ပြီးနောက် လေ့ကျင့်ရေးကွင်းတွင်မှ မျက်နှာချင်းမဆိုင်တော့တဲ့အထိ ဖြစ်လာခဲ့ပါတယ်။
ယခုလအစောပိုင်းတုန်းက အင်တာဗျူးတစ်ခုတွင် ရေနီယာရီက အတ္တလန္တာနည်းပြဟောင်းမှာ ကလပ်ရဲ့ နည်းပြရာထူးအတွက် စတုတ္ထဦးစားပေးနည်းပြသာ ဖြစ်ကြောင်း ပြောကြားခဲ့ရာမှ ၎င်းတို့အကြား တင်းမာမှု ဖြစ်ခဲ့တာလည်း ဖြစ်ပါတယ်။
ယခုထွက်ပေါ်လာတဲ့သတင်းအရ ရေနီယာရီဟာ မကြာမီ ရိုးမားမှ ထွက်ခွာလာတော့မှာ ဖြစ်ကြောင်း သိရပါတယ်။
ရေနီယာရီဟာ လွန်ခဲ့တဲ့ ဆယ်နှစ်တုန်းက လောင်းကြေး ၅၀၀၀/၁ သာ ဖွင့်ခြင်းခံထားရတဲ့ လက်စတာကို ပရီးမီးယားလိဂ်ဖလားဆွတ်ခူးနိုင်အောင် ဦးဆောင်ခဲ့သူလည်း ဖြစ်ပါတယ်။
တဖက်တွင် လက်စတာဟာ ယခုရာသီတွင် ချန်ပီယံရှစ်မှ လိဂ် ၁ သို့ တန်းဆင်းခဲ့ရပြီး နှစ်ရာသီဆက် တန်းဆင်းရမှုနှင့် ကြုံနေရပါတယ်။

လိမ်လည်မှုမှ လွတ်မြောက်ပြီး တရားရုံးမှ အထွက်တွင် ချော်လဲကာ လက်ကျိုးသွားခဲ့တဲ့ ဘင်ဖီကာဥက္ကဌဟောင်း
====================

ဘင်ဖီကာဥက္ကဌဟောင်းလူးဝစ်ဖီးလစ်ပီဗီအဲရာဟာ လိမ်လည်မှုမှ လွတ်မြောက်လာပြီး တရားရုံးမှ အထွက်တွင် ချော်လဲကျကာ လက်ကျိုးသွားခဲ့ပါတယ်။
အသက် ၇၆ နှစ်ရှိ ဗီအဲရာဟာ ၂၀၁၅ ခုနှစ်မှ ၂၀၁၈ ခုနှစ်အတွင်း ဖြစ်ပျက်ခဲ့တဲ့ အဖြစ်အပျက်များအတွက် ကာလရှည်ကြာ စုံစမ်းစစ်ဆေးခြင်းခံရပြီးနောက် Operation Blue Bag အမှုတွင် ကွင်းလုံးကျွတ်လွတ်မြောက်လာခဲ့ပါတယ်။
ပေါ်တူဂီလူမျိုးစီးပွားရေးလုပ်ငန်းရှင်ဟာ အပြစ်မရှိကြောင်း ဆုံးဖြတ်လိုက်ပြီး မိနစ်အနည်းငယ်အကြာ တရားရုံးအပြင်ဘက်တွင် မီဒီယာများရဲ့ချဉ်းကပ်ခြင်းခံခဲ့ရပါတယ်။
ဘင်ဖီကာဥက္ကဌဟောင်းဟာ လှေကားမှ အဆင်းတွင် ချော်လဲကျပြီးနောက် သတ္တုတိုင်နှင့် ထိမိသွားခဲ့ပါတယ်။
သတင်းထောက်များက သူ့ထံ အမြန်ရောက်သွားကြပြီး ကူညီဖေးမခဲ့ကြပါတယ်။
အစောပိုင်းတုန်းက ဘင်ဖီကာဥက္ကဌရဲ့အခြေအနေက ကောင်းမွန်တယ်လို့ ယူဆခဲ့ရပေမယ့် တဖြည်းဖြည်း နာကျင်လာကာ အသက်ရှူရခက်ခဲလာမှုနှင့်အတူ ဆေးစစ်မှု ခံယူရာမှာတော့ ညာဖက်လက်မောင်းအရိုးအက်သွားကြောင်း သိရပါတယ်။
တဖက်တွင် တရားရုံးသူကြီးဟာ ဘင်ဖီကာဥက္ကဌဟောင်းရဲ့ အမှုမှာ လွန်ခဲ့တဲ့နှစ်အတန်ကြာက ဖြစ်ပျက်ခဲ့တဲ့ အဖြစ်အပျက် ဖြစ်နေမှုနှင့်အတူ စစ်ဆေးရန် မဖြစ်နိုင်ဟု ဆိုကာ အမှုမှ ကင်းလွတ်ခွင့်ပေးခဲ့တာလည်း ဖြစ်ပါတယ်။
ဗီအဲရာဟာ ကလပ်ရှယ်ယာ ၅၀ ရာခိုင်နှုန်းကို အာဏာပိုင်များကို အသိမပေးဘဲ ရောင်းချမှု၊ ကစားသမားများ ရောင်းချမှုမှ ယူရို ၂.၅ သန်းအထိ ကိုယ်ကျိုးအတွက် ရယူခဲ့မှုတို့အတွက် လိမ်လည်မှု၊ အခွန်ရှောင်တိမ်းမှု၊ အတုပြုလုပ်မှု၊ ငွေကြေးခဝါချမှုတို့အတွက် စုံစမ်းစစ်ဆေးခြင်းခံခဲ့ရတာလည်း ဖြစ်ပါတယ်။