မြစ်ကြီးနားလေဆိပ်ကို အသေခံဒရုန်းနဲ့တိုက်ခိုက်​ခံရ​မှုကို တားဆီးနိုင်​ပေမယ့် လေကြောင်းခရီးစဥ်တွေ ဖျက်သိမ်းခဲ့ရ

ကချင်ပြည်နယ် ၊ မြစ်ကြီးနားလေဆိပ် နဲ့ အနီးတဝိုက်ကို အသေခံဒရုန်းနဲ့ တိုက်ခိုက်ခံခဲ့ရပြီး လေကြောင်းခရီးစဥ်တွေ အားလုံးဖျက်သိမ်း လိုက်ရတယ်လို့ စုံစမ်းသိရှိရပါတယ် ။
ဖေဖော်ဝါရီ ၁၂ ရက်နေ့ မနက်ပိုင်းမှာ မြစ်ကြီးနား လေဆိပ်နဲ့ အနီးတဝိုက်ကို KIA နဲ့ PDF ပူးပေါင်းအဖွဲ့က FPV Suicide Drome သုံးပြီး တိုက်ခိုက်ခဲ့တာ ဖြစ်ကြောင်း ၊ အဆိုပါ တိုက်ခိုက်မှုကို အစိုးရတပ်ဘက်က ဟန့်တား နိုင်ခဲ့တယ်လို့ အစိုးရအဖွဲ့က သတင်းထုတ်ပြန်ပါတယ် ။
အလားတူ ညနေပိုင်းမှာလည်း လေဆိပ်အနီးရှိ အဆောက်အဦတခုပေါ်ကို ဒရုန်းဗုံးကျရောက် ပေါက်ကွဲမှု ရှိခဲ့တယ်လို့ ဒေသခံဆီက သိရပါတယ်။
" ခုညနေ လေဆိပ်နားက ဘိုးဘွားရိပ်သာ ခေါင်မိုးပေါ်ကို ဒရုန်းဗုံးကျသေးတယ်။ခေါင်မိုးပေါ်က ရေစင်ပေါ်ကိုကျတာ ။ သေနတ်တွေ ပစ်သံလည်းကြားရတယ်။ မနက်ကလည်း လေဆိပ်ကို ဒရုန်းနဲ့တိုက်ခံရတယ် သိရတယ်။ အဲဒါကြောင့် ဒီနေ့ ( ၁၂ ရက်နေ့) ထွက်မယ့် လေယာဥ်ခရီးစဥ်တွေ အကုန်ဖျက်သိမ်းလိုက်တယ် ။လေယာဥ်တွေမထွက်ဘူး ။ ငွေပဲ ပြန်အမ်းမလား အစားထိုးရက်ပြန်ပေးမလားတော့ မသိသေးဘူး ။ " လို့ ဒေသခံက ပြောပါတယ်။
လေဆိပ်ကို ​တိုက်ခိုက်လာတဲ့ Drone ကို ဟန့်တားနိုင်ခဲ့တဲ့အတွက် လေဆိပ်အတွင်း ကျရောက်ပေါက်ကွဲခြင်းမရှိဘဲ လေယာဉ်ပြေးလမ်း နဲ့ အနီးဝန်းကျင်ရှိ မြေပြင်ပေါ်ကိုသာ ပျက်ကျခဲ့ကြောင်း ၊ Drone မှာ ပါရှိတဲ့ ဖောက်ခွဲရေးပစ္စည်းကိုလည်း လုံခြုံရေးတပ်ဖွဲ့ဝင်တွေက စနစ်တကျ သက်မဲ့ပြုလုပ် ရှင်းလင်းခဲ့တယ်လို့ အစိုးရက သတင်းထုတ်ပြန် ထားပါတယ်။
အဆိုပါ တိုက်ခိုက်ခံရမှု ဖြစ်စဉ်အတွင်း လူထိခိုက်မှုမရှိတဲ့အပြင် လေဆိပ်အဆောက်အအုံနဲ့ လေယာဉ်ပြေးလမ်းလည်း ပျက်စီးမှုမရှိဘူးလို့ ဆိုပါတယ်။
လက်ရှိမှာ မြစ်ကြီးနား - မန္တလေး ကားလမ်းက နယ်မြေအခြေအနေအရလမ်းပန်းဆက်သွယ်ရေး ခက်ခဲပြီး သွားလာရ ကြန့်ကြာမှုတွေရှိနေတာ ကြောင့် အများစုဟာ လေကြောင်းလိုင်း နဲ့ သွားလာနေကြရတာ ဖြစ်တယ်လို့ သိရပါတယ် ။
မြစ်ကြီးနား - မန္တလေး လေယာဥ်လက်မှတ်ခနူန်းထားမှာ ရှစ်သိန်းကျပ်အထက် ရှိပြီး ရန်ကုန် - မြစ်ကြီးနား လေယာဥ်လက်မှတ်ခကတော့ ဆယ်သိန်းကျော်အထိ ရှိတယ်လို့ သိရပါတယ်။

မြစ်သားမြို့နယ် ၊ သစ်တက်ကုန်းဆည်မှာ ညီအစ်ကိုနှစ်ယောက် ရေနစ်သေဆုံး

မန္တလေးတိုင်း ၊ မြစ်သားမြို့နယ် ၊ သစ်တက်ကုန်းဆည်မှာ ဒီကနေ့ ဖေဖော်ဝါရီ ၁၂ ရက်နေ့ ၊ နေ့လယ် ၁ နာရီ ၄၅ မိနစ်လောက်က အမျိုးသားနှစ်ယောက် ရေနစ်သေဆုံးမှု ဖြစ်ပွားခဲ့တယ်လို့ သိရပါတယ်။
ရေနစ်သေဆုံးခဲ့တဲ့ အမျိုးသား နှစ်ယောက်ဟာ အသက် ၁၈ နှစ်နဲ့ အသက် ၂၁ နှစ်အရွယ်ရှိ ညီအစ်ကိုတွေဖြစ်ပြီး ကူမဲမြို့နယ်မှာ နေထိုင်သူတွေ ဖြစ်ကြောင်း သိရပါတယ်။
" ညီက ရေနစ်တာကို အစ်ကိုက လိုက်ကယ်ရင်းကနေ ညီအစ်ကိုနှစ်ယောက်လုံး ရေနစ်သေဆုံးတာလို့ သိရတယ် ။သူတို့က ကူမဲကနေ မြစ်သားကို လာပြီး ကွန်ပစ်ငါးဖမ်းကြတာလို့သိရတယ်။ သူတို့နဲ့အတူ လာသူတွေလည်းရှိတယ်။ ရေနစ်တော့ အတူပါလာသူတွေက အကြောင်းကြားလို့ ကယ်ဆယ်ရေး လုပ်ခဲ့တာပါ ။ " လို့ ရှာဖွေကူညီရေးလုပ်ခဲ့တဲ့ မြန်မာနိုင်ငံလူမှုကယ်ဆယ်ရေးအဖွဲ့ ( ကျောက်ဆည်)ရဲ့ ဥက္ကဋ္ဌ ကိုသားငယ်က ပြောပါတယ်။
ရေနစ်ပျောက်ဆုံး အမျိုးသားတွေရဲ့ ရုပ်အလောင်းတွေကိုတော့ ညနေ ၃ နာရီ မိနစ် ၂၀ လောက်မှာ ရှာဖွေတွေ့ရှိခဲ့တာဖြစ်ကြောင်း ၊ ရုပ်အလောင်းတွေကို ဇာတိ ကူမဲမြို့ရှိ ၊ မိသားစုဝင်တွေဆီကို ပို့ဆောင်ပေးခဲ့တယ်လို့ သိရပါတယ် ။
အရင်လ ‌‌ဇန်နဝါရီ ၁ရက် ညနေပိုင်းကလည်း မန္တလေးမြို့၊ အနောက်ကမ်းနားလမ်း၊ ဧရာဝတီမြစ်၊ အမြောက်ဆိပ်မှာ ရေဆင်းကူးတဲ့ ကလေးငယ်တွေထဲက တယောက်ရေနစ်သေဆုံးမှု ဖြစ်ပွားခဲ့တယ်လို့ သိရပါတယ်။
ပြီးခဲတဲ့ ၂၀၂၅ ခုနှစ် ၊ နိုဝင်ဘာ ၁၂ ရက်နေ့ကလည်း မန္တလေးတိုင်း၊ ဝမ်းတွင်းမြို့နယ်၊စမုံချောင်းအတွင်းမှာ Grade 12 ကျောင်းသား နှစ်ယောက် ရေနစ်သေဆုံးမှု ဖြစ်ပွားခဲ့ပြီး သေဆုံးမှုရှိခဲ့ပါတယ်။
အလားတူ နိုဝင်ဘာ ၈ ရက်နေ့ကလည်း မန္တလေး တိုင်း ၊ ကျောက်ဆည်မြို့နယ်၊ ဆူးလေးကုန်းကျေးရွာရှိ ထုံးကြီးချောင်းထဲမှာ နွားမျောသွားလို့ လိုက်ဆယ်ယူခဲ့တဲ့ အမျိုးသားတယောက် ရေနစ်သေဆုံးမှု ဖြစ်ပွားခဲ့တယ် လို့သိရပါတယ်။
အောက်တိုဘာ ၂၈ ရက်ကလည်း မန္တလေးတိုင်း ၊ ရမည်းသင်းမြို့နယ်၊ ကျီးနီကန်မှာ ရေဆင်းချိုးတဲ့ အမျိုးသားတယောက် ရေနစ်မြုပ် သေဆုံးမှု ဖြစ်ပွားခဲ့ပါတယ်။

စပါးစျေးကွက်မကောင်းတဲ့အတွက် ထပ်ပြီးရှုံးမှာကြောက်လို့ တောင်သူတွေ နွေစပါးကို မစိုက်လိုကြ

စပါးစျေးကွက်က အကျဘက်မှာရှိနေပြီး စျေးကွက်မကောင်းတဲ့အတွက် ထပ်မံပြီး အရှုံးနဲ့ရင်ဆိုင်ရမှာ စိုးရိမ်တာကြောင့် တောင်သူတွေအနေနဲ့ ယခုနှစ်မှာ နွေစပါးကို စိုက်ပျိုးလိုခြင်း မရှိကြောင်း တောင်သူတွေက ပြောပါတယ်။
တောင်သူတွေအနေနဲ့ အရှုံးကိုရင်ဆိုင်ရနိုင်တဲ့အတွက် နွေစပါးကို မစိုက်ပျိုးလိုပေမယ့်လည်း သက်ဆိုင်ရာတာဝန်ရှိသူတွေက နွေစပါးကို မဖြစ်မနေ စိုက်ပျိုးခိုင်းနေတာကြောင့် တောင်သူတွေမှာ အခက်တွေ့နေရတယ်လို့ သိရပါတယ်။
လက်ရှိမှာ နွေစပါးစိုက်ပျိုးဖို့အတွက် ဆည်ရေသောက်ဧရိယာအတွင်းရှိ နွေစပါးစိုက်ပျိုးနိုင်တဲ့ လယ်ဧကတွေကို ဆည်ရေတွေ စတင်လွှတ်ပေးနေပြီး စိုက်ပျိုးမှုကို တောင်သူအစီအစဥ်နဲ့ စပါးပက်ကြဲခြင်းအစား အစေ့ချစက်သုံးပြီးသာ စပါးမျိုးစေ့ချ စိုက်ပျိုးရမှာ ဖြစ်တယ်လို့ သိရပါတယ် ။
" နွေစပါးမလုပ်ချင်ဘူး ။ခုစပါးစျေးနဲ့ဆိုရင် ရှုံးမယ်ဆိုတာ သိနေတယ်။ တွက်လို့ရတယ်လေ။ အရင်နှစ်နွေစပါးကလည်း ရှုံးတယ်။ ခုမိုးစပါးလည်း ရှုံးတယ်။ အခုဒီနှစ်နွေစပါးပါ ထပ်ရှုံးရင် ကျွန်တော်တို့ ဘယ်လိုမှ အဆင်မပြေတော့ဘူး ။ လယ်ဧက များလေအရှုံးများလေပဲ ။ လယ်သမားက တနှစ်ရှုံးရင်တောင် လိုက်မမီတာ။အခုက ရှုံးတာ ဆက်တိုက်ဖြစ်နေပြီ။ ဒါပေမယ့် မစိုက်လို့မရတဲ့အပြင် ဒီတိုင်းတောင်ကြဲလို့မရဘူး ။အစေ့ချစက်နဲ့ကြဲရမယ် ပြောတယ် ။ အခုဆည် ရေတွေကလည်း ရောက်နေပြီ ။ " လို့ ပဲခူးအနောက်ပိုင်းက တောင်သူတ​ယောက်က ပြောပါတယ်။
မိုးစပါးပေါ်ချိန်တုန်းက စပါး ပေါင် ၅၀ ရှိ တင်းတရာ ကို ကိုးသိန်းကျပ်ကနေ ဆယ်သိန်းငါးသောင်းကျပ်အထိသာ စျေးပေါက်ခဲ့တာကြောင့်.ယခုနှစ်နွေစပါး ပေါ်ချိန် ရိတ်သိမ်းချိန်မှာလည်း စပါးစျေးက အဆိုပါမိုးစပါးစျေးကွက် အတိုင်းသာ ရှိနိုင်ကြောင်း တောင်သူတွေက ခန့်မှန်းထားကြပါတယ်။
အဲဒီစျေးနူန်းအတိုင်းသာပေါက်ပါက တောင်သူတွေအနေနဲ့ တဧကကို စပါးတင်းတရာ ထွက်ရှိမှသာ စိုက်ပျိုးရိတ်သိမ်းကုန်ကျမှုစရိတ်ရရှိရုံသာ ဖြစ်ကြောင်း ၊တကယ်လို့ စပါးတင်း ၆၀ မှ ၇၀ ကြားသာ ထွက်ရှိပါက အရှုံးနဲ့ ရင်ဆိုင်ရမှာဖြစ်တယ်လို့ သိရပါတယ်။
ဒါကြောင့် တောင်သူတွေအနေနဲ့ နွေစပါးကို စိုက်ပျိုးလိုခြင်းမရှိဘဲ မိုးကြိုစပါးအဖြစ်သာ စိုက်ပျိုးဖို့ ဆန္ဒရှိနေကြတယ်လို့ သိရပါတယ် ။

တိုင်းရင်းသားလက်နက်ကိုင်အဖွဲတွေနဲ့ ထာဝရငြိမ်းချမ်းရေးတည်ဆောက်နိုင်အောင် ဝိုင်းဝန်းကြိုးပမ်းကြဖို့ နိုင်ငံတော်ယာယီသမ္မတက ၇၉ နှစ်​မြောက် ပြည်​ထောင်စု​နေ့မှာ တိုက်တွန်း

နိုင်ငံတော်အတွင်း တရားဥပဒေစိုးမိုးရေး လွတ်လပ်ခြင်းနဲ့ ညီမျှခြင်းစတဲ့ လောကပါလတရားတွေ ထွန်းကားနိုင်အောင် တိုင်းရင်းသားလက်နက်ကိုင်အဖွဲ့တွေနဲ့ ထာဝရ ငြိမ်းချမ်းရေးတည်ဆောက်နိုင်အောင် အားလုံးက ဝိုင်းဝန်းကြိုးပမ်းဆောင်ရွက်ကြဖို့ ပြည်ထောင်စုသမ္မတ မြန်မာနိုင်ငံတော် ယာယီသမ္မတ ဗိုလ်ချုပ်မှူးကြီး မင်းအောင်လှိုင်က ဒီကနေ့ ​နေပြည်​တော်မှာကျင်းပတဲ့ ပြည်ထောင်စုနေ့မှာ ပေးပို့တဲ့ သဝဏ်လွှာကနေ တိုက်တွန်းပြောဆိုလိုက်ပါတယ်။
ဒီကနေ့ ၂၀၂၆ ဖေဖော်ဝါရီလ ၁၂ ရက်နေ့မှာ ကျရောက်တဲ့ ပြည်ထောင်စုသမ္မတမြန်မာနိုင်ငံတော်ရဲ့ (၇၉)နှစ်မြောက် ပြည်ထောင်စုနေ့ အခမ်းအနားကို နိုင်ငံတော်ယာယီသမ္မတ ဗိုလ်ချုပ်မှူးကြီးမင်းအောင်လှိုင်ပေးပို့ခဲ့တဲ့ သဝဏ်လွှာကို ပြည်ထောင်စုသမ္မတ မြန်မာနိုင်ငံတော် နိုင်ငံတော်ဝန်ကြီးချုပ် ဦးညိုစောက ပြန်လည်ဖတ်ကြားခဲ့တာမှာ ပါရှိခဲ့တာဖြစ်ပါတယ်။
အဲ့ဒီလို ပြည်ထောင်စု မြန်မာနိုင်ငံတော်ကြီး တည်တန့်ခိုင်မြဲဖို့အတွက် တိုင်းရင်းသားပြည်သူ တစ်ရပ်လုံးကလည်းနိုင်ငံတော်အစိုးရ၊တပ်မတော်နဲ့ တစ်သားတည်း ရပ်တည်ပြီး ပြည်ထောင်စုမပြိုကွဲရေးအတွက်နိုင်ငံတော် ကိုကာကွယ်စောင့်ရှောက်ကြရန်လိုအပ်တဲ့အ​တွက် တိုင်းရင်းသားလူမျိုးများအားလုံးကို ပါဝင်ပူးပေါင်းဖို့ကိုလည်း သဝဏ်လွှာမှာပါရှိခဲ့ပါတယ်။
အဲ့ဒီတိုက်တွန်းမှုနဲ့အတူ ၂၀၂၆ ခုနှစ်ဇန်နဝါရီလ ၁၃ ရက်နေ့ကနေ ၁၅ ရက်နေ့အထိ ကျင်းပခဲ့တဲ့ လူငယ်ငြိမ်းချမ်းရေးဖိုရမ်က ရရှိခဲ့တဲ့ ရလဒ်တွေအရမြန်မာနိုင်ငံတစ်နံတစ်လျားမှာရှိတဲ့လူငယ်တွေရဲ့ငြိမ်းချမ်းရေးလိုလားမှုအသံတွေကို ကြားသိခဲ့ရတဲ့အတွက် ရေရှည်တည်တန့်ခိုင်မြဲတဲ့ ငြိမ်းချမ်းရေးတည်ဆောက်နိုင်ဖို့အတွက် တိုင်းရင်းသားလက်နက်ကိုင်အဖွဲ့တွေကိုလည်း တစ်နိုင်ငံလုံးပြစ်ခတ်တိုက်ခိုက်မှုရပ်စဲရေး NCA စာချုပ်ရဲ့ ဘုံသဘောတူညီမှုတွေအပေါ် ပူးပေါင်းပါဝင်ကြရန်လိုအပ်တယ်လို့လည်းပါရှိခဲ့ပြီး နိုင်ငံတော်ဖက်ကလည်းလည်း ဆွေးနွေးမှုတွေကို ဖိတ်ခေါ်နေပြီး ငြိမ်းချမ်းရေးတံခါးကိုအစဥ်အမြဲဖွင့်လှစ်ကြိုဆိုနေတဲ့အတွက် "ပြည်ထောင်စုကြီးတိုးတက်ဖို့ ထာဝရငြိမ်းချမ်းရေးကိုတည်ဆောက်စို့"ဆိုတဲ့ ပြည်ထောင်စုနေ့ဆောင်ပုဒ်အတိုင်း အတူလိုက်နာကျင့်သုံးပြီးနိုင်ငံတော်ရဲ့ ငြိမ်းချမ်းရေးလုပ်ငန်းစဥ်မှာ ပါဝင်ပူးပေါင်းကြဖို့ လည်း ပါဝင်ခဲ့ပါတယ်။
ဒါ့အပြင် တပ်မတော်အနေနဲ့ လွတ်လပ်ရေးရပြီးတဲ့အချိန်ကနေတစ်ပါတည်း ဖြစ်ပေါ်ခဲ့တဲ့ ပြည်တွင်းသောင်းကျန်းမှုတွေနဲ့ပတ်သက်ပြီး ဒီကနေ့အချိန်ထိ ထိမ်းထိမ်းသိမ်းသိမ်းနဲ့ လုပ်ဆောင်နေတဲ့အကြောင်းနဲ့တပ်မတော်အနေနဲ့ ပြည်သူများထဲက ပေါက်ဖွားလာတဲ့မျိုးချစ်တပ်မတော်ဖြစ်သလို တိုင်းရင်းသားပေါင်းစုံပါဝင်ဖွဲ့စည်းထားတဲ့ ပြည်ထောင်စု တပ်မတော်ဖြစ်တဲ့အတွက် နိုင်ငံအတွက်ကို မယိမ်းမယိုင်ရပ်တည်ခဲ့တဲအခိုင်အမာဆုံး အဖွဲ့အစည်းဖြစ်တဲ့အတွက် ကမ္ဘာတည်သရွေ့တပ်မတော်တည်ရှိမယ်လို့ပါရှိပြီး တပ်မတော် တည်ရှိနေသရွေ့ ပြည်ထောင်စုမြန်မာနိုင်ငံတော်လည်းတည်တန့်ခိုင်မြဲနေမယ်လို့ ဖော်ပြပါရှိခဲ့ပါတယ်။
တိုင်းရင်းသားလက်နက်ကိုင်အဖွဲ့တွေကိုလည်း နိုင်ငံနဲ့လူမျိုးအတွက်အကျိုးမရှိတဲ့ လုပ်ဆောင်ချက်တွေကို ချန်လှပ် ရပ်တန့်ပြီးနိုင်ငံအတွက်အကျိုးဖြစ်ထွန်းနိုင်မယ့် အပြုသဘောဆောင်ရွက်ချက်တွေကိုသာ စည်းစည်းလုံးလုံးညီညီညွတ်ညွတ် နဲ့လုပ်ဆောင်သွားရမှာဖြစ်တယ် လို့လည်းဆိုခဲ့ပါတယ်။
မြန်မာနိုင်ငံမှာရှိတဲ့ တိုင်းရင်းသားပြည်သူတစ်ရပ်လုံးရဲ့ တူညီတဲ့လိုအပ်ချက်က တိုင်းပြည်အေးချမ်းတည်ငြိမ်ရေး တရားဥပဒေစိုးမိုးရေးနဲ့ ငြိမ်းချမ်းစွာနေထိုင်လုပ်ကိုင်စားသောက်နိုင်ရေးဖြစ်တဲ့အတွက် နိုင်ငံတော်ဖက်ကလည်း အကြမ်းဖက်မှုပပျောက်ရေး တရားဥပဒေစိုးမိုးရေး နိုင်ငံသားအားလုံးလူ့အခွင့်အရေးအပြည့်အဝရရှိရေး ဖြောင့်မတ်တည်ကြည်တဲ့ တရားစီရင်ရေးစနစ်ကို အကောင်အထည်ဖော်နေတဲ့အပြင် ကြာမီကျင်းပတော့မယ့် လွှတ်တော်အစည်းအဝေးက ထွက်ပေါ်လာမယ့် အစိုးရကိုနိုင်ငံတော် တာဝန်တွေကိုလွှဲပြောင်းပေးအပ်သွားမယ်လို့ လည်းပါရှိခဲ့တာပါ။
တပ်မတော်အနေနဲ့ငြိမ်းချမ်းရေးကိုလိုလားတဲ့ ပြည်သူတွေနဲ့ လက်တွဲပြီးလက်နက်ကိုင်သောင်းကျန်းသူအဖွဲ့အစည်းတွေ လက်ရှိ လုပ်ဆောင်နေတဲ့ ဥပဒေမဲ့ အကြမ်းဖက်လုပ်ရပ်တွေနဲ့ နယ်မြေချဲ့ထွင်တိုက်ပွဲ​ဖော်ဆောင်မှုတွေကိုလည်း ထိန်းသိမ်းကာကွယ်သွားမှာဖြစ်တယ်လို့ ပါရှိတဲ့အပြင် နိုင်ငံတော်ကာကွယ်ရေးနဲ့လုံခြုံရေးအတွက် ပြည်ပအမှီအခိုကင်းစွာနဲ့ပြည်တွင်းအင်အားတွေကိုအခြေပြုပြီး ပြည်သူတစ်ရပ်လုံးပါဝင်တဲ့ ခေတ်မီပြည်သူ့ကာကွယ်ရေးစနစ်ကိုကြိုးပမ်းအကောင်အထည်ဖော်သွားမယ်လို့ ဒီကနေ့ ၁၂.၂.၂၀၂၆ ရက်နေ့မှာကျရောက်တဲ့ ပြည်ထောင်စု သမ္မတ မြန်မာနိုင်ငံတော်ရဲ့ (၇၉)နှစ်မြောက်ပြည်ထောင်စုနေ့မှာနိုင်ငံတော်ယာယီသမ္မတ ဗိုလ်ချုပ်မှူးကြီးမင်းအောင်လှိုင်ဆီက ပေးပို့ခဲ့တဲ့ သဝဏ်လွှာမှာဖော်ပြခဲ့ပါတယ်။

လူနှစ်ရာ​ကျော် ​သေဆုံးခဲ့ရရတဲ့ Sky Villa ကွန်ဒိုတာဝန်ယူတဲ့ NTL ကုမ္ပဏီပိုင်ရှင် ဦနိုင်ထွန်းလင်းကို ပုဒ်မ ၃၀၄ ( က) နဲ့အမှုဖွင့် စစ်ဆေး အရေးယူ

မန္တလေး ၊ အောင်မြေသာစံမြို့နယ်မှာရှိတဲ့ Sky Villa ကွန်ဒိုကို တည်ဆောက်ခဲ့သူ NTL ကုမ္ပဏီပိုင်ရှင် ဦးနိုင်ထွန်းလင်းကို ပုဒ်မ ၃၀၄ ( က) နဲ့ အမှတ် ၁ ရဲစခန်းမှာ အမှု့ဖွင့်အရေးယူပြီး ​အောင်​မြေသာစံတရားရုံးမှာ အမှုတစားစွဲတင်လိုက်တယ်လို့ သိရပါတယ်။
" စသုံးလုံး ( စစစ) ကတိုက်ရိုက်ကိုင်တာ ။ တရားခံကိုလည်း အမှုစွဲတင်လိုက်ပြီ။ ပုဒ်မ ၃၀၄ ( က) နဲ့။ လုပ်ငန်းခွင်ပေါ့လျော့လို့ လူသေစေမှုနဲ့ စွဲတင်လိုက်တာ။ အမှတ် ၁ ရဲစခန်းမှာ အမှုဖွင့်တာ ။ " လို့ လုံခြုံရေးအဖွဲ့နဲ့ နီးစပ်သူက ပြောပါတယ်။
ပြီးခဲ့တဲ့ ၂၀၂၅ ခုနှစ် ၊ မတ်လ ၂၈ ရက်နေ့က လှုပ်ခတ်ခဲ့တဲ့ အင်အားပြင်းငလျင်မှာ ၁၁ ထပ်အမြင့်ရှိတဲ့ Sky Villa ကွန်ဒိုဟာ ပြိုကျခဲ့ပြီး လူပေါင်း ၂၀၀ ကျော်သေဆုံးခဲ့ရတဲ့အတွက် အခုလို အမှုဖွင့် အရေးယူလိုက်တာ ဖြစ်တယ်လို့ သိရပါတယ်။
ငလျင်ကြောင့် ပြိုကျခဲ့တဲ့ Sky Villa ကွန်ဒိုအဆောက်အုံထဲကနေ အသက်ရှင်ရက် ကယ်ထုတ်နိုင်သူ ၅၂ ယောက်သာ ရှိခဲ့ပြီး သေဆုံးသူ ရုပ်အလောင်းအနေနဲ့ ၂၀၆ လောင်းကို ရှာဖွေတွေ့ရှိခဲ့ပြီးဖြစ်တာကို ထုတ်ပြန်ပြီးဖြစ်ပါတယ်။
သေဆုံးသူ ၂၀၆​ယောက်ထဲက​နေမှ ဆက်သွယ်လို့ရတဲ့ ကျန်ရစ်သူ​မိသားစု​တွေကို ​သေဆုံးသူ တ​ယောက်ချင်းစီအတွက် သိန်း(၁၀၀) ကျပ်ကို Sky Villaကို တာဝန်ယူရတဲ့ ​NTL ကုမ္ပဏီက ထောက်ပံ့ပေးခဲ့ပါတယ်။
SKY Villa အ​ဆောက်အဦဟာ မန္တလေးမြို့၊ အောင်မြေသာစံမြို့နယ်၊ လမ်း ၆၀ ၊ ၂၂ လမ်း နဲ့ ၂၃ လမ်းကြား ရေစစ်ကန်အနီးမှာ တည်ရှိတာ ဖြစ်ပြီး Sky villa ကွန်ဒိုအဆောက်အဦကို ၂၀၁၇ ခုနှစ်အကုန် ၂၀၁၈ ခုနှစ်အစပိုင်းမှာ NTL Construction Companyတာဝန်ယူ ဆောက်လုပ်ပြီးစီးခဲ့တယ်လို့ သိရပြီး စတင်ဆောက်လုပ်ခဲ့တဲ့ ခုနှစ်ကိုတော့ ဖော်ပြထားတာမတွေ့ရပါဘူး။
ကွန်ဒိုစတင်ပြီးစီးတဲ့အချိန်မှာပဲ လူနေထိုင်မှုတွေရှိခဲ့ပြီး ကွန်ဒိုတခန်းရဲ့တန်ကြေးကတော့ သိန်း ၆၅၀၀ အထက်မှာရှိတယ်လို့ ကွန်ဒိုအခန်းတွေ ရောင်းချမှု ဝန်ဆောင်မှုပေးနေတဲ့ အကျိုးတော်ဆောင်တွေရဲ့ လူမှုကွန်ယက်စာမျက်နှာမှာ ဖော်ပြထားတာကိုတွေ့ရပါတယ်။
​ထောက်ပံ့​ငွေ​ပေးအပ်ပွဲမှာ​တွေ့ရတဲ့ တိုက်ခန်းပိုင်ရှင်​တွေက အခန်းပြန်​​ဆောက်​ပေးပြီး အချိုးကျထည့်ရမှာကို မလိုလားဘဲ ဝယ်ယူထားတဲ့တန်ဖိုး​တွေကို ပြန်လည်ရယူလိုတယ်လို့ VOM ကို ​ပြောခဲ့ဘူးပါတယ်။
ခုအ​ရေးယူမှုမှာ NTL Construction Companyတာဝန်ယူ ဆောက်လုပ်ပြီးစီးခဲ့ပြီး အလားတူ မတ်လ ၂၈ ရက်​နေ့က ပြိုကျတဲ့ အင်ကြင်းကွန်ဒို ကိစ္စ ပါမပါ​တော့ မသိရ​သေးပါဘူး။

မြိတ်-ထားဝယ်ကားလမ်းပိတ်နေလို့ ကားတွေရာနဲ့ချီပိတ်မိနေ

တနင်္သာရီတိုင်း ၊ မြိတ် - ထားဝယ်ကားလမ်းမှာ ဖြစ်ပွားနေတဲ့ စစ်ရေးအခြေအနေကြောင့် ကား လမ်းပိတ်နေပြီး ကားတွေ ရာနဲ့ချီပိတ်မိနေတယ်လို့ စုံစမ်းသိရှိ ရပါတယ်။
လက်ရှိမှာ မြိတ်ကနေ ထားဝယ်ကို အတက်လမ်းဖြစ်တဲ့ ပလောက်မြို့အကျော် ဆင်ထိုးရွာမှာ လမ်းပိတ်ထားသလို ထားဝယ်ကနေ မြိတ်ကိုအဆင်း သရက်ချောင်းမြို့ အကျော်ရှိ ပိတိုင်ရွာမှာလည်း လမ်းပိတ်ထားတာကြောင့် လမ်းတဖက်စီမှာ ကားတွေ ပိတ်မိနေတာ ဖြစ်တယ်လို့ သိရပါတယ်။
" အခုထိ ပိတ်နေတုန်းပဲ ။ မြေပြင်အခြေအနေမှာ တိုက်ပွဲ ဖြစ်တာမျိုးက တအားကြီး မရှိဘူးလို့တော့သိရတယ်။ စစ်ရေးအခြေအနေအရ ပိတ်ထားတာလားတော့ မပြောတတ်ဘူး ။ ပိတ်ထားတာက ဒေသတွင်းလက်နက်ကိုင်အဖွဲ့ဘက်က ပိတ်ထားတာပါ။ " လို့ ဒေသခံက ပြောပါတယ် ။
ဖေဖော်ဝါရီ ၈ ရက်နေ့ကစပြီး မြိတ် - ထားဝယ်ကားလမ်းပိုင်း ပိတ်နေတာ ဖြစ်လို့ ဒီနေ့အထိ ဆိုရင် ကားလမ်းပိတ်နေတာ လေးရက်အထိ ရှိလာနေပြီ ဖြစ်တယ်လို့ သိရပါတယ်။
မြိတ်- ထားဝယ် ကားလမ်းပိတ်နေတာကြောင့် လမ်းပိုင်းမှာ ပိတ်မိနေတဲ့ ကုန်ကားတွေထဲကမှ ကုန်စိမ်းသီးနှံတွေကတော့ ပျက်စီးမှုတွေ ရှိနေတယ်လို့ သိရပါတယ်။
မနေ့က ဖေဖော်ဝါရီ ၁၀ ရက်နေ့က မြိတ် - ထားဝယ်ကားလမ်း၊ သရက်ချောင်း မြို့နယ်ထဲက သဲချောင်းကြီးရွာဘက်မှာ အစိုးရတပ် နဲ့ ဒေသတွင်းလက်နက်ကိုင် တပ်တွေ တိုက်ပွဲဖြစ်ပွားခဲ့ပြီး လေကြောင်းတိုက်ခိုက်မှုလည်း ရှိခဲ့တယ်လို့ သိရပါတယ်။
လက်ရှိမှာ မြိတ် - ထားဝယ် ကားလမ်းပေါ်ရှိ သရက်ချောင်းမြို့နယ် နဲ့ ပလောက်မြို့အကြားက ကျေးရွာဘက်တွေမှာ ဖုန်းလိုင်းတွေ ပြတ်တောက်နေတယ်လို့ သိရပါတယ် ။

အွန်လိုင်းဆယ်လီ သမီးဆိုးကို ပုဒ်မ ၆၆ (ဃ) အရ ထောင်ဒဏ် ခြောက်လ ချမှတ်

အွန်လိုင်းဆယ်လီ သမီးဆိုး (ခ) သက်ကိုကို ကို ပြင်ဦးလွင်ခရိုင် တရားရုံးက ဒီကနေ့ ဖေဖော်ဝါရီ ၁၁ ရက်နေ့မှာ ဆက်သွယ်ရေး ဥပဒေ ပုဒ်မ ၆၆ (ဃ) အရ ထောင်ဒဏ် ခြောက်လ ချမှတ်လိုက်ပြီ ဖြစ်တယ်လို့ လုံခြုံရေးအဖွဲ့နဲ့ နီးစပ်သူ တယောက်က ပြောပါတယ်။
သမီးဆိုး (ခ) သက်ကိုကို ကို သက်ဆိုင်ရာ လုံခြုံရေးအဖွဲ့က ရန်ကုန်အပြည်ပြည်ဆိုင်ရာ လေဆိပ်မှာ ပြီးခဲ့တဲ့ ၂၀၂၅ ခုနှစ်၊ အောက်တိုဘာ ၁၂ ရက်နေ့က ဖမ်းဆီး ထိန်းသိမ်းခဲ့တာဖြစ်ပြီး စတင် ဖမ်းဆီးစဉ်က ပုဒ်မ ၆၆ (ဃ) နဲ့ အမှုဖွင့် အရေးယူခဲ့တာ ဖြစ်ပါတယ်။
ဒါပေမယ့် ၂၀၂၅ ခုနှစ်၊ အောက်တိုဘာ ၁၃ ရက်နေ့မှာတော့ နိုင်ငံတော်အကြည်ညိုပျက်စေမှု ၅၀၅ (က) ၊ အဲဒီနောက်မှာတော့ လဝက အက်ဥပဒေ ၁၃ (က) ပုဒ်မတွေနဲ့ ထပ်တိုး အမှုဖွင့်ခဲ့တာ ဖြစ်တယ်လို့ သိရပါတယ်။
“၅၀၅ နဲ့ ၁၃ (က) က နှစ်နိုင်ငံ ချစ်ကြည်ရေးအရ ဖြေလျော့ပေးလိုက်တာ။ ပုဒ်မ ၆၆ ကိုလည်း ကာယကံရှင်က ‌ကျေအေးပေးတယ်။ ဒါပေမယ့် အဲဒီလို ကျေအေးပေးရင်တောင်မှ အမှုပေါ်လွင်ရင် အမိန့်ချတာပဲ။ ပြစ်ဒဏ်ကျခံပြီး လွတ်လာရင်တော့ ပြည်နှင်ဒဏ် ပေးခံရမှာပါ” လို့ လုံခြုံရေးအဖွဲ့နဲ့ နီးစပ်သူက ပြောပါတယ်။
သတင်းတွေအရ သမီးဆိုး (ခ) သက်ကိုကို ကို စတင်အမှုဖွင့် တိုင်ကြားခဲ့သူဟာ ဒေါ်အေသင်ကို ဖြစ်တယ်လို့ သိရပြီး ၂၀၂၅ ခုနှစ်၊ အောက်တိုဘာ ၅ ရက်နေ့က ပြင်ဦးလွင် မြို့မရဲစခန်းမှာ (ပ)၂၁၅/၂၀၂၅၊ ဆက်သွယ်ရေး ဥပဒေပုဒ်မ ၆၆ (ဃ) နဲ့ အမှုဖွင့်ခဲ့တာ ဖြစ်တယ်လို့ သိရပါတယ်။
ဒါကြောင့် သမီးဆိုး (ခ) သက်ကိုကို ကို စတင်ဖမ်းစီးစဉ်က ရန်ကုန်မြို့ရှိ မင်္ဂလာဒုံ ရဲစခန်းမှာ ကနဦး ထိန်းသိမ်းခဲ့တာ ဖြစ်ပေမယ့် မန္တလေးတိုင်း၊ ပြင်ဦးလွင် မြို့မရဲစခန်းမှာ အမှုဖွင့်ခံထားရတာ ဖြစ်တဲ့အတွက် ၂၀၂၅ ခုနှစ်၊ အောက်တိုဘာ ၁၂ ရက်နေ့၊ ညပိုင်းမှာပဲ ပြင်ဦးလွင်ရဲစခန်းကို လွှဲပြောင်းပေးခဲ့တယ်လို့ သိရပါတယ်။
ဖမ်းဆီးခံရပြီးနောက်ပိုင်း ပုဒ်မ ၅၀၅ (က) ထပ်တိုး အမှုဖွင့်ခံရတာဟာ Follower တသိန်းလောက်ရှိတဲ့ သူမရဲ့ လူမှုကွန်ရက်ဖြစ်တဲ့ Shwe Thet အကောင့်နဲ့ ပြည်ပနိုင်ငံမှာ အလှကုန်ပစ္စည်းတွေ Live လွှင့် ရောင်းချရင်း မြန်မာနိုင်ငံအတွင်းမှာ ဖြစ်ပေါ်နေတဲ့ အကြောင်းအရာတွေကို ဝေဖန် ပြောဆိုခဲ့တာကြောင့် ဖြစ်တယ်လို့ သိရပါတယ်။
ဒါနဲ့ပတ်သက်လို့ ၂၀၂၅ ခုနှစ်၊ အောက်တိုဘာ ၁၄ ရက်နေ့ထုတ်၊ နိုင်ငံပိုင် သတင်းစာတွေမှာလည်း နိုင်ငံတော် တည်ငြိမ်အေးချမ်းရေးကို ပျက်ပြားစေရန် ရည်ရွယ်ကာ လူမှုကွန်ရက် စာမျက်နှာပေါ် လှုံ့ဆော်ခြင်း၊ ဝါဒဖြန့်ခြင်းတွေ လုပ်ဆောင်ခဲ့တဲ့ “Shwe Thet” Facebook အကောင့်ပိုင်ရှင်ဖြစ်သူ ရန်ကုန်တိုင်း၊ ဒဂုံမြို့သစ် (မြောက်ပိုင်း) မြို့နယ်၊ အမှတ် (၄၆) ရပ်ကွက်နေ သက်ကိုကို (ခ) သမီးဆိုး (၄၅) နှစ်ကို ပြင်ဦးလွင် မြို့မရဲစခန်းမှာ တရားဥပဒေနဲ့အညီ ဖမ်းဆီးထိန်းသိမ်း အမှုဖွင့်လှစ် အရေးယူ ဆောင်ရွက်လျက်ရှိတယ်လို့ အသိပေးခဲ့ပါတယ်။
ဒါအပြင် ‌သူမဟာ အမေရိကန်နိုင်ငံသူအဖြစ် ခံယူထားသူ ဖြစ်တာကြောင့် မြန်မာနိုင်ငံကို ရောက်ရှိနေစဉ်အတွင်း သူမတည်းခိုရာ နေရာတချို့မှာ နိုင်ငံခြားသားတွေအတွက် Form-C တိုင်ကြားမှုဆိုင်ရာ လုပ်ထုံးလုပ်နည်းတွေကိုလည်း ပျက်ကွက်ခဲ့တဲ့အတွက် လ.ဝ.က အက်ဥပဒေ ပုဒ်မ ၁၃ (က) နဲ့ ထပ်မံ တရားစွဲဆိုခံခဲ့ရတာ ဖြစ်တယ်လို့ သိရပါတယ်။

ကမ္ဘာ့ဖလားလုံခြုံရေး အဓိကအစိတ်အပိုင်းတစ်ရပ်အဖြစ် ICE ပါဝင်လာမည်
===================
US Immigration and Customs Enforcement (ICE) ဟာ အမေရိကန်က ပူးတွဲကျင်းပလာမယ့် ၂၀၂၆ ကမ္ဘာ့ဖလားပြိုင်ပွဲအတွင်းတွင် ပြိုင်ပွဲလုံခြုံရေးအစိတ်အပိုင်းတစ်ရပ်အဖြစ် အဓိကနေရာမှ ပါဝင်လှုပ်ရှားလာပါမယ်။
US Immigration and Customs Enforcement (ICE) အေးဂျင့်များဟာ မင်နီယာပူလစ်တွင် ဒေါ်နယ်ထရမ့်ရဲ့အမိန့်ဖြင့် ရွှေ့ပြောင်းနေထိုင်သူများအား ဖမ်းဆီးရေး ကြိုးပမ်းရာတွင် အမေရိကန်နိုင်ငံသား ၂ ဦးအား ပစ်သတ်မှုအတွက် အပြင်းအထန်ဝေဖန်မှုများနှင့် ကြုံနေရပါတယ်။
အဲလက်စ်ပရက်တီနှင့် ရီနီဂုဒ်တို့ သေဆုံးမှုအတွက် အမေရိကန်တလွှား ICE အကြီးအကဲနှင့် စီနီယာဝန်ထမ်းများမှာ လွတ်တော်အမတ်များရဲ့ မေးခွန်းထုတ်ခြင်းခံခဲ့ရပါတယ်။
ယင်းမေးခွန်းထုတ်မှုအစီအစဉ်တွင် ICE မှာ ၂၀၂၆ ကမ္ဘာ့ဖလားပြိုင်ပွဲတွင် လုံခြုံရေးအစိတ်အပိုင်းတစ်ရပ်အဖြစ် ပါဝင်လုပ်ဆောင်လာမယ်လို့ အတည်ပြုလာတာလည်း ဖြစ်ပါတယ်။
အမေရိကန်ဟာ ၂၀၂၆ ကမ္ဘာ့ဖလားအား မက္ကဆီကို၊ ကနေဒါတို့နှင့် ပူးတွဲ ကျင်းပလာမှာ ဖြစ်ပါတယ်။ အမေရိကန်က ကမ္ဘာ့ဖလားပွဲ ၇၈ ပွဲ လက်ခံကျင်းပလာမှာ ဖြစ်ပြီး ပူးတွဲ အိမ်ရှင် မက္ကဆီကိုနှင့် ကနေဒါတို့က ၁၃ ပွဲစီ လက်ခံကစားလာပါမယ်။
တဖက်တွင် ဖီဖာက ကမ္ဘာ့ဖလားပြိုင်ပွဲအတွင်းတွင် ပရိသတ်များ လုံခြုံရေးအတွက် ဒေသခံအာဏာပိုင်များနှင့် လိုအပ်တဲ့ လုံခြုံရေးဆိုင်ရာ လုပ်ဆောင်မှုများပြုလုပ်သွားမည်ဖြစ်ကြောင်း ဆိုထားပါတယ်။

ပရီးမီးယားလိဂ်သမိုင်းတွင် ပွဲအများဆုံးကစားထားသူ စံချိန်အား လိုက်မီလာတဲ့ ဂျိမ်းစ်မီလ်နာ
===================
ဂျိမ်းစ်မီလ်နာဟာ ဗုဒ္ဓဟူးနေ့ညတုန်းက အက်စတွန်ဗီလာအား ၁-၀ ဂိုးဖြင့် ရှုံးနိမ့်တဲ့ပွဲတွင် ပါဝင်ကစားပြီးနောက် ပရီးမီးယားလိဂ်ပွဲ ၆၅၃ ပွဲဖြင့် ပရီးမီးယားလိဂ်သမိုင်းတွင် ပွဲအများဆုံးကစားထားသူ ဖြစ်လာပါတယ်။
အသက် ၄၀ နှစ်ရှိ လီဗာပူးနှင့် မန်စီးတီးအလယ်တန်းကစားသမားဟောင်းဟာ ပရီးမီးယားလိဂ်သမိုင်းတွင် ပွဲအများဆုံးကစားထားသူအဖြစ် သမိုင်းမှတ်တိုင်စိုက်ထူထားတဲ့ ဂါရတ်ဘာရီရဲ့ စံချိန်ကို လိုက်မီလာတာလည်း ဖြစ်ပါတယ်။
ဗီလာကစားသမားဟောင်းဂျိမ်းစ်မီလ်နာဟာ လူစားဝင်ရောက်ကစားပြီးနောက် ပရီးမီးယားလိဂ်စံချိန်အား လိုက်မီလာခဲ့တာလည်း ဖြစ်ပါတယ်။
ယင်းပွဲတွင် ဘရိုက်တန်ဟာ ပွဲချိန် ၈၆ မိနစ်တွင် ဂျက်ဟန်ရှဲလ်ဝုဒ်ရဲ့ OG ဂိုးကြောင့် ဗီလာအား ၁-၀ ဖြင့် ရှုံးနိမ့်သွားခဲ့တာ ဖြစ်ပါတယ်။
ဘရိုက်တန်နည်းပြဟူဇီလာက "ကျွန်တော်တို့ အနိုင်မရခဲ့ပေမယ့် စပါယ်ရှယ်ညတစ်ည ဖြစ်နေတုန်းပါ။ မီလ်နာက လူငယ်ကစားသမားတွေအတွက် စံပြတစ်ဦးပါ။ ပရော်ဖက်ရှင်နယ်ပီသတယ်။ မယုံကြည်နိုင်စရာကောင်းတယ်။ အရမ်းစည်းကမ်းရှိတယ်။ အပတ်စဉ် အပတ်တိုင်း နေ့စဉ်နေ့တိုင်း သက်သေပြနေတာ တိုက်ဆိုင်မှု မဟုတ်ပါဘူး။ သူ့မှာ ပရီးမီးယားလိဂ်မှာ ကစားဖို့ အရည်အချင်းအားလုံးရှိပါတယ်။ သူနဲ့ အလုပ်တွဲလုပ်ရလို့ ဝမ်းသာတယ်။ သူ့ကို ကစားသမားတစ်ဦးအနေနဲ့ရော လူတစ်ဦးအနေနဲ့ပါ အသင်းမှာ ပိုင်ဆိုင်ထားတဲ့ ကျေနပ်တယ်"လို့ ပြောကြားသွားပါတယ်။
ဘရိုက်တန်ဟာ ဗီလာရှုံးပွဲကြောင့် နောက်ဆုံး ပရီးမီးယားလိဂ် ၁၃ ပွဲတွင် ၁ ပွဲတည်းသာ အနိုင်ရရှိထားကာ နိုဝင်ဘာနှောင်းပိုင်းတုန်းက အဆင့် ၅ နေရာမှာ ရပ်တည်နေခဲ့ရာမှ ယခု အဆင့် ၁၄ နေရာသို့ ဆင်းနေရပါတယ်။

ဥရောပစူပါလိဂ်ပြဿနာကို အဆုံးသတ်လာတဲ့ ရီးရဲလ်မက်ဒရစ်နှင့် ယူအီးအက်ဖ်အေ
=====================
ယူအီးအက်ဖ်အေနှင့် ရီးရဲလ်မက်ဒရစ်တို့ဟာ ဥရောပစူပါလိဂ်ကျရှုံးမှုနှင့်ပတ်သက်ပြီး တရားရင်ဆိုင်နေမှုအား အဆုံးသတ်လာပြီ ဖြစ်ပါတယ်။
ရီးရဲလ်မက်ဒရစ်ဟာ ပြီးခဲ့တဲ့အပတ်တုန်းက ဥရောပစူပါလိဂ်စီမံကိန်းမှ ဘာစီလိုနာနုတ်ထွက်သွားပြီးနောက် ယင်းစီမံကိန်းတွင် တစ်သင်းတည်းသောအသင်းအဖြစ် ကျန်ရစ်ခဲ့ပါတယ်။
ရီးရဲလ်မက်ဒရစ်ဟာ ၂၀၂၅ ခုနှစ် အောက်တိုဘာလတုန်းက အီးယူတွင် ဥရောပစူပါလိဂ်ပြိုင်ပွဲအား မဖြစ်ပေါ်လာအောင် တားဆီးခဲ့တဲ့ ယူအီးအက်ဖ်အေအား အမှုရင်ဆိုင်ခဲ့ရာ အနိုင်ရခဲ့ပါတယ်။
ရီးရဲလ်မက်ဒရစ်ဟာ ဥရောပစူပါလိဂ်ကျရှုံးစေမှုအတွက် ယူအီးအက်ဖ်အေထံမှ နစ်နာကြေးတောင်းဆိုထားတာလည်း ဖြစ်ပါတယ်။
ယခုအခါ ယူအီးအက်ဖ်အေ၊ ဥရောပဘောလုံးကလပ်များအဖွဲ့ချုပ်နှင့် ရီးရဲလ်မက်ဒရစ်တို့က ဥရောပဘောလုံးလောကကောင်းမွန်ရေးအတွက် တရားရုံးပြင်ပတွင် သဘောတူညီမှု ရရှိလာပြီ ဖြစ်ကြောင်း ကြေညာလာပါတယ်။
ချန်ပီယံလိဂ်နှင့်အပြိုင် တစ်စင်ထောင်ခဲ့တဲ့ ဥရောပစူပါလိဂ်ကို ၂၀၂၁ ခုနှစ်တွင် စတင်ခဲ့တာဖြစ်ပြီး ဥရောပထိပ်သီးကလပ် ၁၂ ခု ပါဝင်ခဲ့ပါတယ်။
ဒါပေမယ့် ပရိသတ်များ ဆန္ဒပြလာမှုကြောင့် ပရီးမီးယားလိဂ်ကလပ်များအပါအဝင် ကလပ်များ အသီးသီး နုတ်ထွက်သွားခဲ့ကြမှုနှင့် မအောင်မြင်ခဲ့ပါဘူး။
ရီးရဲလ်မက်ဒရစ်ဟာ ဥရောပစူပါလိဂ်စီမံကိန်းကျရှုံးစေမှုအတွက် ယူအီးအက်ဖ်အေနှင့် တရားရင်ဆိုင်ရမှုအား အဆုံးသတ်လာပေမယ့် ယင်းစီမံကိန်းကို ဆက်လုပ်ရန် အစီအစဉ်ရှိ/မရှိ မသိရသေးပါဘူး။