လွှတ်တော်ကိုယ်စားလှယ်များ တည်းခိုနေထိုင်ရန် ပြင်ဆင်ဆောင်ရွက်ထားပြီ

တတိယအကြိမ် လွှတ်တော်များ၏ ဒုတိယပုံမှန်အစည်းအဝေးသို့တက်ရောက်ကြမည့် လွှတ်တော်ကိုယ်စားလှယ်များ တည်းခိုနေထိုင်ရန်အတွက် ပြင်ဆင်ဆောက်ရွက်လျက်ရှိသည်။
ထိုသို့ဆောင်ရွက်ထားမှုများကို နေပြည်တော်ကောင်စီဥက္ကဋ္ဌမြို့တော်ဝန် ဦးကံမြင့်သန်းက လိုက်လံကြည့်ရှု စစ်ဆေးခဲ့‌ ကြောင်း သိရသည်။
ယင်းကဲ့သို့ စစ်ဆေးရာ၌ ဒက္ခိဏသီရိမြို့နယ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီရိပ်သာ၌ နေရာချထားမည့် အဆောင်(၃)ခု၏ အိပ်ဆောင်များ၊ ဧည့်တွေ့ဆောင်များ၊ နားနေဆောင်များ၊ ကျန်းမာရေးစောင့် ရှောက်မှုဆေးပေးခန်း၊ စားရိပ်သာအဆောင်များတွင် ချက်ပြုတ် စားသောက်ရန် ပြင်ဆင်ဆောင်ရွက်ထားရှိမှုနှင့် ရေ၊ လျှပ်စစ်မီးရရှိမှု အခြေအနေကို ကြည့်ရှုစစ်ဆေးခဲ့သည်ဟု သိရသည်။
မြို့တော်ဝန်ကအိပ်ဆောင်များတွင် အမှိုက်ပုံးများထားရှိပေးရန်နှင့် အမှိုက်သိမ်းစနစ်အား စနစ်တကျဆောင်ရွက်ရန်၊ အဆောင်ဘေးပတ်ဝန်းကျင် သန့်ရှင်းသာယာလှပရေးအတွက် မြက်ချုံရှင်းလင်းခြင်း လုပ်ငန်းဆောင်ရွက်ရန်နှင့် လုံခြုံရေးစနစ်ကောင်းမွန်စေရေး အလေးထားဆောင်ရွက်ရန် မှာကြားခဲ့သေးသည်။
တတိယအကြိမ် လွှတ်တော်များ၏ ဒုတိယပုံမှန် အစည်းအဝေးသည် လာမည့် ဇွန် (၂) ရက်မှ စတင်မည်ဖြစ်ကာ လွှတ်တော် ကိုယ်စားလှယ်များအနေဖြင့် မေလ (၃၀) ရက်ထက် မစော၊ (၃၁) ရက်ထက် နောက်မကျစေဘဲ နေပြည်တော်သို့ လာရောက်ရန် ခေါ်ယူထားပြီးဖြစ်ကြောင်းလည်း သိရသ ည်။

မေ ၂၈ ရက် ‘ကုရ်ဘာနီအီးဒ်’ အများပြည်သူအလုပ်ပိတ်ရက်အဖြစ် အစိုးရကြေညာ

လာမည့် မေ ၂၈ ရက်သည် အီဒုလ်အသွဟာ(ကုရ်ဘာနီအီးဒ်နေ့)ဖြစ်သဖြင့် ရုံးများပိတ်ရက်နှင့် လွှဲပြောင်းနိုင်သည့် စာချုပ်စာတမ်းများအက်ဥပဒေ ပုဒ်မ ၂၅ အရ အများပြည်သူအလုပ်ပိတ်ရက်အဖြစ် သတ်မှတ်ကြောင်း နိုင်ငံတော်အစိုးရက အမိန့်ကြော်ငြာစာအမှတ် ၈၅/၂၀၂၆ ဖြင့် ထုတ်ပြန်ကြေညာခဲ့သည်။

ဖလမ်းမြို့သို့ နိုင်ငံ့ဝန်ထမ်းများနှင့် ဒေသခံများ ပြန်လည်ဝင်ရောက်
မြို့သန့်ရှင်းရေးလုပ်ငန်းများလည်း ဆောင်ရွက်

ချင်းပြည်နယ်၊ ဖလမ်းမြို့၌ ဖြစ်ပွားခဲ့သည့် စစ်ရေးပဋိပက္ခများကြောင့် နေရပ်စွန့်ခွာ တိမ်းရှောင်နေရသည့် နိုင်ငံ့ဝန်ထမ်းများနှင့် ဒေသခံများသည် ဖလမ်းမြို့အား တပ်မတော်က အပြည့်အဝ ပြန်လည်ထိန်းချုပ်ထားပြီးဖြစ်သဖြင့် ယနေ့ မေ ၂၂ ရက်တွင် မြို့တွင်းသို့ ပြန်လည်ဝင်ရောက်လာခဲ့ကြကြောင်း သိရသည်။
ချင်းပြည်နယ်အစိုးရအဖွဲ့၏ လမ်းညွှန်မှုဖြင့် မော်တော်ယာဉ်များ၊ မော်တော်ဆိုင်ကယ်များဖြင့် ပြန်လည်ဝင်ရောက်လာခဲ့ကြရာ တာဝန်ရှိသူများက လမ်းဆုံထီးရိပ်၌ ကြိုဆိုခဲ့ကြကြောင်း သိရသည်။
လက်ရှိအချိန်တွင် လုံခြုံရေးအဖွဲ့ဝင်များပါဝင်သော ပူးပေါင်းအဖွဲ့များက ဖလမ်းမြို့ သာယာလှပရေးလုပ်ငန်းများ ဆောင်ရွက်လျက်ရှိပြီး ဗိုလ်ချုပ်လမ်းမတစ်လျှောက် ထီးရိပ်မှ တလန်လိုရပ်ကွက် အမှတ်(၃) အခြေခံပညာအထက်တန်းကျောင်းအထိ လမ်းဘေးဝဲယာရှိ အမှိုက်သရိုက်များ ရှင်းလင်းခြင်း၊ ချုံနွယ်များ ခုတ်ထွင်ရှင်းလင်းခြင်းနှင့် နေအိမ်မျက်နှာစာများ သန့်ရှင်းရေးပြုလုပ်ခြင်းတို့ကို ဆောင်ရွက်ခဲ့ကြကြောင်း သိရသည်။

စစ်ကိုင်း-မန္တလေး ကုန်စည်စီးဆင်းမှု ရေလမ်းဘက် ပြောင်းရွှေ့၊ ဂေါဝိန်ဆိပ် အဓိကကုန်စည်ဂိတ်ဖြစ်လာ

စစ်ကိုင်း-မန္တလေး ကုန်စည်စီးဆင်းမှုတွင် ကားလမ်းအစား ရေကြောင်းလမ်းကို ပိုမိုအသုံးပြုလာကြပြီး မန္တလေးမြို့ဘက်၌ ဂေါဝိန်ဆိပ်ကမ်းကို အဓိကအသုံးပြုနေကြကြောင်း ဒေသခံကုန်သည်များထံမှ သိရသည်။
စစ်ကိုင်းတိုင်းဒေသကြီးမှ ထွက်ရှိသည့် ကုန်စိမ်းနှင့် ဟင်းသီးဟင်းရွက်များကို မန္တလေးမြို့သို့ သယ်ယူရာတွင်လည်းကောင်း၊ မန္တလေးမြို့ရှိ ကုန်စည်ဒိုင်များနှင့် အခွန်လွတ်ဈေးများမှ ကုန်စိမ်း၊ သားငါးနှင့် စားသောက်ကုန်များကို စစ်ကိုင်းမြို့သို့ ပြန်လည်ပို့ဆောင်ရာတွင်လည်းကောင်း ယခင်ကဲ့သို့ ကားလမ်းမှ တို-က်ရို-က်သယ်ယူခြင်း မပြုတော့ဘဲ ဧရာဝတီမြစ်ကို ဖြတ်ကျော်သည့် ရေကြောင်းလမ်းကို ပြောင်းလဲအသုံးပြုလာကြခြင်းဖြစ်ကြောင်း သိရသည်။
ယခင်က စစ်ကိုင်း-မန္တလေး ကုန်စည်စီးဆင်းမှုအတွက် စစ်ကိုင်းတံတားသစ် (ရတနာပုံတံတား) ကို အဓိကအသုံးပြုခဲ့ကြသော်လည်း နောက်ပိုင်းတွင် တံတားဖြတ်သန်းသွားလာရာ၌ အခက်အခဲများ ဖြစ်ပေါ်လာသဖြင့် ရေကြောင်းသယ်ယူပို့ဆောင်ရေးကိုသာ အဓိကထား အသုံးပြုလာကြခြင်းဖြစ်ကြောင်း ဒေသခံများက ပြောသည်။
မန္တလေးမြို့ အနောက်ဘက်အဝင် ရေကြောင်းဂိတ်ဖြစ်သည့် ဂေါဝိန်ဆိပ်ကမ်းသည် ၄၁ လမ်း ကုန်စိမ်းတန်းညဈေးနှင့် သီရိမာလာကုန်စိမ်းလက်ကားဈေးတို့အနီးတွင် တည်ရှိနေသဖြင့် ကုန်စည်ဖြန့်ဖြူးရေးအတွက် အဆင်ပြေသည့် ဆိပ်ကမ်းတစ်ခုဖြစ်ကြောင်းလည်း ဒေသခံကုန်သည်များက သုံးသပ်ပြောဆိုနေကြသည်။

နေပြည်တော်စည်ပင်က လျှပ်စစ်အမှိုက်သိမ်းယာဥ်(၃) စီးဝယ်ယူမည်

နေပြည်တော်စည်ပင်၊ စက်ရုံနှင့် မော်တော်ယာဉ်ဌာနမှ လျှပ်စစ်အမှိုက်သိမ်းယာဉ်(EV Garbage Truck) Dongfeng Leaf Collector Vehicle (၃)စီးအား တို-က်ရို-က်တင်ဒါစနစ်ဖြင့်ဝယ်ယူရန် ဈေးနှုန်းအဆိုပြုလွှာအား ယနေ့ မေ ၂၂ ရက်ကဖွင့်ဖောက်စစ်ဆေးခဲ့သည်။
အဆိုပြုလွှာတင်သွင်းသည့် ကုမ္ပဏီမှရောင်းချမည့် Dongfeng Leaf Collector Vehicle နှင့်ပတ်သက်သည့် နည်းပညာဆိုင်ရာအချက်အလက်များနှင့် အသုံးပြုမှုတို့ကိုရှင်းလင်းတင်ပြပြီးနောက် တင်သွင်းသည့် လျှပ်စစ်အမှိုက်သိမ်းယာဉ်(EV Garbage Truck) Dongfeng Leaf Collector Vehicle (၃)စီးအတွက် ဈေးနှုန်းအဆိုပြုလွှာကို ဖွင့်ဖောက်စစ်ဆေးမှတ်တမ်းတင်ခဲ့သည်။

အနာဂတ်နိုင်ငံတော်အတွက် အားထားရမည့် လူ့စွမ်းအားအရင်းအမြစ်ကောင်းများ ဖြစ်လာစေရေး ကျောင်းသား/သူများကို ပြုစုပျိုးထောင်ရန် ဒုတိယသမ္မတ တိုက်တွန်း

ဇွန် ၁ ရက်တွင် စတင်ဖွင့်လှစ်မည့် ၂၀၂၆-၂၀၂၇ ပညာသင်နှစ်အတွက် နေပြည်တော်ရှိ အခြေခံပညာကျောင်းများ၌ ကျောင်းသား၊ ကျောင်းသူများ ကျောင်းအပ်နှံရေးနှင့် ကြိုတင်ပြင်ဆင်ထားရှိမှုများကို ဒုတိယသမ္မတ ဒေါ်နန်းနီနီအေးက မေ ၂၂ ရက်တွင် သွားရောက်ကြည့်ရှုစစ်ဆေးခဲ့ကြောင်း သိရသည်။
ဒုတိယသမ္မတသည် ဇမ္ဗူသီရိမြို့နယ်ရှိ အမှတ်(၆) အခြေခံပညာအထက်တန်းကျောင်း၊ အမှတ်(၁၁) အခြေခံပညာအထက်တန်းကျောင်းနှင့် ဇေယျာသီရိမြို့နယ်ရှိ အမှတ်(၁) အခြေခံပညာအထက်တန်းကျောင်းတို့ကို သွားရောက်စစ်ဆေးခဲ့သည်။
ထိုသို့ စစ်ဆေးရာတွင် “ကျောင်းအပ်နှံရေး သီတင်းပတ်” အတွင်း ကျောင်းသား၊ ကျောင်းသူများ အဆင်ပြေချောမွေ့စွာ ကျောင်းအပ်နှံနိုင်ရေးအတွက် စနစ်တကျစီမံထားရှိမှုများ၊ အခမဲ့ထောက်ပံ့ပေးမည့် ကျောင်းသုံးပြဋ္ဌာန်းစာအုပ်များ၊ စာရေးကိရိယာများ၊ ဗလာစာအုပ်များနှင့် ကျောင်းဝတ်စုံများ အသင့်ပြင်ဆင်ထားရှိမှုတို့ကို ကြည့်ရှုစစ်ဆေးခဲ့ကြောင်း သိရသည်။
ယင်းနောက် ဒုတိယသမ္မတက ကျောင်းသား၊ ကျောင်းသူများအား အသိပညာ၊ အတတ်ပညာများ တတ်မြောက်စေရုံသာမက ကိုယ်ကျင့်တရားကောင်းမွန်ပြီး တာဝန်သိတတ်သည့် နိုင်ငံသားကောင်းများ ဖြစ်လာစေရေး ပြုစုပျိုးထောင်ပေးရန် လိုအပ်ကြောင်း ပြောကြားခဲ့သည်။
ထို့ပြင် ဗလငါးတန်နှင့် ပြည့်စုံပြီး အနာဂတ်တွင် နိုင်ငံတော်က အားကိုးအားထားပြုရသည့် လူ့စွမ်းအားအရင်းအမြစ်ကောင်းများ ဖြစ်လာစေရန် ဆရာ၊ ဆရာမများအနေဖြင့် အလေးထား ပြုစုပျိုးထောင်ပေးကြရန်လည်း မှာကြားခဲ့ကြောင်း သိရသည်။

မြန်မာ့ဒေသရင်း အပင်နှင့် တိရစ္ဆာန်မျိုးစိတ်ပေါင်း ၉၀၀ ကျော် မှတ်တမ်းတင်ထားနိုင်၊ ထိန်းသိမ်းမှုမလုပ်ပါက ဆယ်စုနှစ်အတွင်း မျိုးစိတ်တစ်သန်းခန့် မျိုးသုဉ်းနိုင်

မြန်မာနိုင်ငံအနေဖြင့် ဇီဝမျိုးစုံမျိုးကွဲဆိုင်ရာ ကွန်ဗင်းရှင်းအဖွဲ့ဝင်နိုင်ငံအဖြစ် ၁၉၉၅ ခုနှစ်မှစ၍ ပါဝင်ခဲ့ပြီးနောက် လက်ရှိအချိန်ထိ မြန်မာ့ဒေသရင်း အပင်မျိုးစိတ် ၈၆၄ မျိုး၊ နို့တိုက်သတ္တဝါ မျိုးစိတ် (၉) မျိုး၊ ငှက်မျိုးစိတ် (၁၀) မျိုးနှင့် တွားသွားသတ္တဝါမျိုးစိတ် (၂၁) မျိုးတို့ကို တရားဝင်မှတ်တမ်းတင်ထားနိုင်ခဲ့ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးဆန်းဦးက ပြောကြားလိုက်သည်။
မေလ ၂၂ ရက်နေ့က ကျင်းပပြုလုပ်သည့် ၂၀၂base ခုနှစ်၊ အပြည်ပြည်ဆိုင်ရာ ဇီဝမျိုးစုံမျိုးကွဲထိန်းသိမ်းရေးနေ့ (International Day for Biological Diversity) အထိမ်းအမှတ် အခမ်းအနားတွင် ပြည်ထောင်စုဝန်ကြီးက အထက်ပါအတိုင်း ထည့်သွင်းပြောကြားခဲ့ခြင်း ဖြစ်သည်။
လက်တွေ့မလုပ်ဆောင်ပါက မျိုးသုဉ်းမည့်အန္တရာယ်
ပြည်ထောင်စုဝန်ကြီး ဦးဆန်းဦးက “ဇီဝမျိုးစုံမျိုးကွဲတွေကို ကာကွယ်ထိန်းသိမ်းခြင်းကို လက်တွေ့နေ့စဉ်လုပ်ဆောင်ချက်တွေကနေတစ်ဆင့် ဒေသအဆင့်၊ နိုင်ငံအဆင့် စသည်ဖြင့် ဝိုင်းဝန်းဆောင်ရွက်သွားကြဖို့ လိုအပ်ပါတယ်။ ဇီဝမျိုးစုံမျိုးကွဲတွေ ဆုံးရှုံးရခြင်းရဲ့ အကြောင်းရင်းတွေကို လျှော့ချဆောင်ရွက်ခြင်း မပြုလုပ်ဘူးဆိုရင် လာမည့်ဆယ်စုနှစ်တွေအတွင်းမှာ ကမ္ဘာပေါ်က မျိုးစိတ်ပေါင်း တစ်သန်းခန့် မျိုးသုဉ်းပျောက်ကွယ်သွားနိုင်ပါတယ်” ဟု သတိပေးပြောကြားခဲ့သည်။
မြန်မာနိုင်ငံ၏ ဇီဝမျိုးစုံမျိုးကွဲ ထိန်းသိမ်းရေးနယ်မြေများ
လက်ရှိတွင် မြန်မာနိုင်ငံအတွင်း ဇီဝမျိုးစုံမျိုးကွဲ ထိန်းသိမ်းရေးအတွက် အောက်ပါ သဘာဝအခြေခံနယ်မြေများကို စနစ်တကျ ဖွဲ့စည်းသတ်မှတ်ထားပြီးဖြစ်ကြောင်း သိရသည် ။
သဘာဝထိန်းသိမ်းရေးနယ်မြေ- ၆၂ ခု
အာဆီယံအမွေအနှစ်ဥယျာဉ် (AHP)- ၈ ခု
အရှေ့အာရှ - ဩစတြေးလျ ငှက်ပျံသန်းရာလမ်းကြောင်းကွန်ရက်- ၈ ခု
ရမ်ဆာ (Ramsar) ရေဝပ်ဒေသ- ၇ ခု
ယူနက်စကို (UNESCO) လူသားနှင့် ဇီဝအဝန်းနယ်မြေ-၂ ခု
ထို့ပြင် သစ်တောများသည် ဇီဝမျိုးစုံမျိုးကွဲထိန်းသိမ်းခြင်းအတွက် အခြေခံအကျဆုံးဖြစ်သည့်အပြင် ရာသီဥတုပြောင်းလဲမှု တိုက်ဖျက်လျှော့ချရေးအတွက်လည်း အလွန်အရေးပါသဖြင့် သစ်တောဂေဟစနစ်များ၏ အရင်းအမြစ်ဖြစ်သော သစ်တောကြိုးဝိုင်း၊ ကြိုးပြင်ကာကွယ်တောများနှင့် သဘာဝထိန်းသိမ်းရေးနယ်မြေများကို တိုးချဲ့ဖွဲ့စည်းခြင်းဖြင့် ဇီဝမျိုးစုံမျိုးကွဲ ထိန်းသိမ်းရေးလုပ်ငန်းများကို အရှိန်အဟုန်ဖြင့် ဆက်လက်ဆောင်ရွက်သွားမည်ဖြစ်ကြောင်း သိရသည်။

မြန်မာ-ရုရှား တက္ကသိုလ်ပူးပေါင်းဆောင်ရွက်ရေး ဆွေးနွေး၊ NNSTU နှင့် ပညာရေးချိတ်ဆက်မှု မြှင့်တင်မည်

ရုရှားဖက်ဒရေးရှင်းနိုင်ငံ၊ နစ်ဇ်နီ နော့ဗ်ဂိုရော့ဒ်မြို့၌ ရောက်ရှိနေသော သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာ မျိုးသိန်းကျော်သည် Nizhny Novgorod State Technical University (NNSTU) ၌ ပါမောက္ခချုပ်၊ ဒုတိယပါမောက္ခချုပ်များ၊ ပါမောက္ခများနှင့် တာဝန်ရှိသူများအား ယမန်နေ့က တွေ့ဆုံဆွေးနွေးခဲ့ကြောင်း သိရသည်။
တွေ့ဆုံစဉ် မြန်မာနိုင်ငံရှိ တက္ကသိုလ်များနှင့် NNSTU တို့အကြား ပူးပေါင်းဆောင်ရွက်နိုင်မည့် ကိစ္စရပ်များကို အပြန်အလှန်ဆွေးနွေးခဲ့ကြပြီး တက္ကသိုလ်အတွင်းရှိ စာသင်ခန်းများနှင့် လက်တွေ့ခန်းများကိုလည်း လေ့လာကြည့်ရှုခဲ့ကြောင်း သိရသည်။
ထို့ပြင် နစ်ဇ်နီ နော့ဗ်ဂိုရော့ဒ်မြို့တွင် ပညာတော်သင်ရောက်ရှိနေသည့် မြန်မာကျောင်းသား၊ ကျောင်းသူများနှင့်လည်း တွေ့ဆုံအားပေးခဲ့ကြောင်း သိရသည်။
ယင်းနောက် ANO Gorky Tech သို့ သွားရောက်ကာ ဒေသတွင်း အိုင်တီကုမ္ပဏီများနှင့် ချိတ်ဆက်ဆောင်ရွက်နေမှုများကို လေ့လာခဲ့ကြောင်း သိရသည်။
ANO Gorky Tech သည် အစိုးရမဟုတ်သော အကျိုးအမြတ်မယူသည့် အဖွဲ့အစည်းတစ်ခုဖြစ်ပြီး ဒေသတွင်း အိုင်တီကုမ္ပဏီများကို ပံ့ပိုးကူညီခြင်း၊ နည်းပညာကုမ္ပဏီအသစ်များ ဖွံ့ဖြိုးတိုးတက်လာစေရန် မြေတောင်မြှောက်ပေးခြင်းနှင့် ဒေသ၏ ဒီဂျစ်တယ်ကဏ္ဍ ဖွံ့ဖြိုးတိုးတက်ရေးကို ပေါင်းစပ်ညှိနှိုင်းဆောင်ရွက်ပေးနေသည့် အိုင်တီဖွံ့ဖြိုးရေးဗဟိုဌာနတစ်ခုဖြစ်ကြောင်း သိရသည်။

မိုးသည်းထန်စွာရွာသွန်းမှုကြောင့် မဟာအောင်မြေမြို့နယ်ရှိ ရွှေတချောင်းဘောင်ကျိုးကာ အနိမ့်ပိုင်းရပ်ကွက်များအတွင်းရေဝင်

မန္တလေးတိုင်း၊ မဟာအောင်မြေမြို့နယ်၌ မေ ၂၂ ရက်ညပိုင်းက မိုးသည်းထန်စွာရွာသွန်းမှုကြောင့် ရွှေတချောင်းဘောင်ကျိုးကာ အနိမ့်ပိုင်းရပ်ကွက်များအတွင်းသို့ ရေဝင်ရောက်မှုများဖြစ်ပေါ်ခဲ့ကြောင်း ဒေသခံလူမှုကူညီရေးအသင်းများထံမှ သိရသည်။
အဆိုပါ ရွှေတချောင်းဘောင်သည် မဟာအောင်မြေမြို့နယ်၊ ၃၆ လမ်းနှင့် ၈၆ လမ်းထောင့်တွင်ရှိကာ မိုး သည်းထန်စွာရွာသွန်းပြီး မိုးရေစီးဆင်းမှုကြောင့် ကျိုးကျခဲ့ခြင်းဖြစ်ပြီး အနိမ့်ပိုင်းရပ်ကွက်ဖြစ်သော သီရိမာလာအရှေ့ရပ်ကွက်ရှိ နေအိမ်များ၊ ရုံးများအတွင်းသို့ ရေဝင်ရောက်မှုနှင့် လမ်းများပေါ်သို့ ရေကျော်မှုများဖြစ်ပွားခဲ့ကြောင်း သိရသည်။
ထို့ကြောင့် မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ သက်ဆိုင်ရာအဖွဲ့အစည်းများ၊ လူမှုကူညီရေးအသင်းဝင်များက ကူညီပေးခဲ့ကြကြောင်း သိရသည်။