မြန်မာ့စီးပွားရေးနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေး ပူးပေါင်းဆောင်ရွက်ရန် UNDP နှင့် ဆွေးနွေး

အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးနှင့် ကုလသမဂ္ဂဖွံ့ဖြိုးမှုအစီအစဉ် (UNDP) ၏ မြန်မာနိုင်ငံဆိုင်ရာ ဌာနေကိုယ်စားလှယ်အသစ် Mr. Norimasa Shimomura တို့သည် ဇူလိုင် ၁၆ ရက်၊နံနက်ပိုင်းက နေပြည်တော်ရှိ ဝန်ကြီးဌာနရုံး၌ တွေ့ဆုံဆွေးနွေးခဲ့ကြသည်။
တွေ့ဆုံမှုအတွင်း နိုင်ငံတော်အစိုးရ၏ စီးပွားရေးဖွံ့ဖြိုးတိုးတက်ရေးနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးကဏ္ဍများတွင် ပူးပေါင်းဆောင်ရွက်သွားမည့် အစီအစဉ်များကို အဓိကထား ဆွေးနွေးခဲ့ကြကြောင်း သိရသည်။
ထို့ပြင် လက်ရှိ မြန်မာနိုင်ငံအတွင်း UNDP က အကောင်အထည်ဖော် ဆောင်ရွက်လျက်ရှိသည့် ဖွံ့ဖြိုးရေးလုပ်ငန်း စီမံကိန်းများနှင့် ပတ်သက်၍လည်း နှစ်ဖက်အမြင်ချင်းဖလှယ် ဆွေးနွေးခဲ့ကြသည်။
အဆိုပါတွေ့ဆုံပွဲသို့ ပြည်ထောင်စုဝန်ကြီးနှင့်အတူ ဌာနဆိုင်ရာတာဝန်ရှိသူများ၊ UNDP မြန်မာရုံးမှ ကိုယ်စားလှယ်များ တက်ရောက်ခဲ့ကြသည်။

ဧရာဝတီမြစ်ဆိပ်ကမ်း အသုံးချ၍ မကွေးစက်မှုဇုန်ကို ပြည်တွင်း၊ ပြည်ပ ကုန်စည်စီးဆင်းမှုဗဟိုချက်ဖြစ်ရန် ဆောင်ရွက်မည်

မကွေးမြို့တွင် အကောင်အထည်ဖော်နေသည့် ဧက (၄၆၀) ကျော်ကျယ်ဝန်းသော မကွေးစက်မှုဇုန်စီမံကိန်း ဖွံ့ဖြိုးလာပါက အနာဂတ်ကုန်စည်စီးဆင်းမှု လွယ်ကူချောမွေ့စေရန်အတွက် စက်မှုဇုန်နှင့် ၁ မိုင်ခွဲခန့်သာကွာဝေးသည့် ဧရာဝတီမြစ်ကမ်းဘေးတွင် ကုန်တင်ကုန်ချဆိပ်ကမ်းငယ်တစ်ခု တည်ဆောက်သွားရန် ဆောင်ရွက်လျက်ရှိကြောင်း သိရသည်။
မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်ကိုကိုက စီမံကိန်းလုပ်ငန်းခွင်သို့ ယမန်နေ့ (ဇူလိုင် ၁၆ ရက်) က သွားရောက်စစ်ဆေးစဉ် ၎င်းစက်မှုဇုန်ကို ပြည်တွင်း၊ ပြည်ပလုပ်ငန်းရှင်များ လာရောက်ရင်းနှီးမြှုပ်နှံနိုင်သည့် စနစ်ကျသော စက်မှုဗဟိုချက်တစ်ခုအဖြစ် ထူထောင်သွားမည်ဖြစ်ကြောင်း ပြောကြားခဲ့ခြင်း ဖြစ်သည်။
ယင်းစက်မှုဇုန်စီမံကိန်းကို မကွေးတိုင်းဒေသကြီး စက်မှုဇုန်များ ဖော်ဆောင်ရေးနှင့် ကြီးကြပ်ရေးကော်မတီနှင့် ဆုထူးပန်ဆောက်လုပ်ရေးကုမ္ပဏီတို့ အကျိုးတူပူးပေါင်း အကောင်အထည်ဖော်နေခြင်း ဖြစ်သည်။
လက်ရှိတွင် Site Cleaning ပြုလုပ်ခြင်း၊ မြေကွက်ရိုက်ခြင်းနှင့် လမ်းအူကြောင်းဖော် မြေသားတာဘောင်တင်ခြင်း လုပ်ငန်းများကို ဆောင်ရွက်လျက်ရှိပြီး လုပ်ငန်းရှင်အချို့လည်း ဝင်ရောက်လုပ်ကိုင်ရန် ပြင်ဆင်နေပြီဖြစ်သည်။
မကွေးစက်မှုဇုန်သည် မကွေး-တောင်တွင်းကြီးကားလမ်းဘေး (မိုင်တိုင် ၃၂၅) တွင် တည်ရှိပြီး၊ စက်မှုဇုန်မြေနေရာ၏ တောင်ဘက်ခြမ်း ၁ မိုင် ၄ ဖာလုံခန့်အကွာတွင် ဧရာဝတီမြစ် တည်ရှိသည်။
ထို့ကြောင့် အနာဂတ်တွင် ရေကြောင်းသယ်ယူပို့ဆောင်ရေးကို အသုံးချကာ စက်မှုဇုန်၏ ထုတ်ကုန်များနှင့် ကုန်ကြမ်းများကို သက်သာသော ကုန်ကျစရိတ်ဖြင့် သယ်ယူပို့ဆောင်နိုင်မည့် ဆိပ်ကမ်းငယ်တစ်ခု ဖော်ဆောင်ရန် အလားအလာကောင်းများ ရှိနေခြင်း ဖြစ်သည်။
နိုင်ငံတော်၏ စီးပွားရေးမူဘောင်များနှင့်အညီ စနစ်တကျ တည်ထောင်နေသည့် ဤစက်မှုဇုန်သည် ဒေသတွင်းစီးပွားရေး ဖွံ့ဖြိုးတိုးတက်လာစေရန်၊ အလုပ်အကိုင်အခွင့်အလမ်းများ တိုးတက်လာစေရန် ရည်ရွယ်ထားပြီး၊ ပတ်ဝန်းကျင်ညစ်ညမ်းမှု မရှိစေရေးအတွက်လည်း သက်ဆိုင်ရာ ဥပဒေ၊ စံချိန်စံညွှန်းများနှင့်အညီ ကြပ်မတ်ဆောင်ရွက်သွားမည်ဖြစ်ကြောင်း တိုင်းဒေသကြီးဝန်ကြီးချုပ်က ပြောကြားထားသည်။

YRTC က City Taxi ယာဥ်များစည်းကမ်းတကျရှိစေရေး Campaign တွင် စီးရေ(၂,၀၀၀)ခန့်ကိုအသိပညာပေးမှုများပြုလုပ်ခဲ့

ရန်ကုန်တိုင်းအတွင်းပြေးဆွဲလျက်ရှိသော City Taxi ယာဉ်များစည်းကမ်းတကျရှိစေရေး၊ သတ်မှတ်ယာဉ်စည်းကမ်း၊ လမ်းစည်းကမ်းများလိုက်နာစေရေးနှင့် YBS ယာဉ်ရပ်မှတ်တိုင်များ၊ မျဉ်းဝါကွက်၊ ဖြူနီကြားများတွင်ရပ်တန့်မှုရှိစေရေးအသိပညာပေးခြင်းကို ယနေ့ ဇူလိုင် ၁၇ ရက်နံနက်ပိုင်းကသင်္ဃန်းကျွန်းမြို့နယ်ရှိ စံပြစျေးကားမှတ်တိုင်တွင်ပြုလုပ်ခဲ့ကြောင်း သိရသည်။
ရန်ကုန်တိုင်းအစိုးရအဖွဲ့၏လမ်းညွှန်ချက်အရ ရန်ကုန် တိုင်းဒေသကြီးပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC)၊ စင်းလုံးငှားဌာနနှင့် သက်ဆိုင်ရာ တာဝန်ရှိသူများပူးပေါင်း၍ "City Taxi ယာဉ်များ လိုက်နာရန် စည်းကမ်းချက်များပါဝင်သည့် Pamphlet ‌ဝေငှခြင်း"City Taxi Campaign ကိုပြုလုပ်ခဲ့ကြကြောင်း သိရသည်။
Campaign အတွင်း City Taxi (၂,၀၀၀)စီးခန့်အား ယာဉ်စည်းကမ်းလမ်းစည်းကမ်း စနစ်တကျလိုက်နာစေရေး အသိပညာပေးခြင်း၊ လိုက်နာရန်စည်းကမ်းချက်များပါဝင်သော Pamphlet ‌ဝေငှခြင်း၊ သတ်မှတ်ချက်နှင့်မကိုက်ညီသည့်ကြော်ငြာများကပ်ထားသည့် City Taxi ယာဉ်များအား ချက်ချင်းခွာစေခြင်း၊ City Taxi ဆိုင်းဘုတ် မှိန်/ပျက်/မပါ နေခြင်းများ၊ ဘေးစတစ်ကာအဝါများ မှေးမှိန်/မပါနေခြင်းများကို ပြုပြင်ရန်မှာကြားခြင်းများကိုပြုလုပ်ခဲ့ကြကြောင်း သိရသည်။

နှစ်ပေါင်းများစွာသန့်ရှင်းရေးမပြုလုပ်ဖြစ်သည့် မင်းတုန်းမြို့မှ မင်္ဂလာကန်တော် အားစုပေါင်းသန့်ရှင်းရေးပြုလုပ်

မကွေးတိုင်း၊ မင်းတုန်းမြို့၊ အမှတ်(၂)ရပ်ကွက်ရှိ မင်္ဂလာကန်တော်သည် နှစ်ပေါင်းများစွာသန့်ရှင်းရေးပြုလုပ်ခဲ့ခြင်းမရှိ၍ ရေညှိတက်ခြင်းများအပါအဝင် အမှိုက်သရိုက်များစွာဖြစ်ပေါ်လျက်ရှိသဖြင့် ဇူလိုင် ၁၆ ရက်က စုပေါင်းသန့်ရှင်းရေးပြုလုပ်ခဲ့ကြကြောင်း သိရသည်။
ရေကန်တော်ရှိ ရေညှိများအားရေစုပ်စက်ဖြင့် စုပ်ထုတ်ခြင်း၊ အမှိုက်များသယ်ယူခြင်း၊ ခရုခွံများ၊ ရေကန်ပတ်လည်ရှိ ပေါင်း/မြက်များရှင်းလင်းခြင်း၊ ရေကန်အတွင်း ထုံးဖြူးခြင်းတို့ကိုပြုလုပ်ခဲ့ကြကြောင်း သိရသည်။
မြို့နယ်စီမံခန့်ခွဲရေးနှင့်အုပ်ချုပ်ရေးကော်မ​တီမှ ဦးဆောင်ကာဌာနဆိုင်ရာဝန်ထမ်းများ၊ ကြက်ခြေနီတပ်ဖွဲ့များ၊ အသင်းအဖွဲ့များ၊ မြို့နယ်အမျိုးသမီးရေးရာအဖွဲ့ဝင်များက စုပေါင်းသန့်ရှင်းရေးပြုလုပ်ခဲ့ကြကြောင်း သိရသည်။

ရန်ကုန်-ပုသိမ်ကားလမ်းတွင် ကားတစ်စီးရေမြောင်းထဲထိုးကျတိမ်းမှောက် (၁)ဦး‌ေ-သဆုံး

ဧရာဝတီတိုင်း၊ ညောင်တုန်းမြို့နယ်ရှိ ရန်ကုန်-ပုသိမ်သွားကားလမ်း၌ ယနေ့ ဇူလိုင် ၁၇ ရက်ည ၆ နာရီကျော်ခန့်က ကားတစ်စီးရေမြောင်းထဲထိုးကျတိမ်းမှောက်မှုဖြစ်ပွားခဲ့ကြောင်း သိရသည်။
ညောင်တုန်းမြို့နယ်၊ တဇင်ရေကျော်ကျေးရွာအုပ်စု၊ အသင်းစုကျေးရွာရှိ ရန်ကုန်-ပုသိမ်သွားကားလမ်းအတိုင်းမောင်းနှင်လာသော ကားတစ်စီးသည် မိုင်တိုင်အမှတ် ၃၀/၁ နှင့် ၃၀/၂ ကြားအရောက် လမ်းဘေးရေမြောင်းထဲထိုးကျကာတိမ်းမှောက်သွားခဲ့ကြောင်း သိရသည်။
ဖြစ်စဥ်ကြောင့် အမျိုးသား(၁)ဦးမှာ အခင်းဖြစ်နေရာ၌ ‌ေ-သဆုံးသွားခဲ့သဖြင့် ဆားမလောက်ကျေးရွာမှ လူငယ့်ရိပ်မွန်လူမှုကူညီရေးအသင်းက ညောင်တုန်းမြို့နယ်ပြည်သူ့ဆေးရုံသို့ပို့ဆောင်ပေးခဲ့ကြကြောင်း သိရသည်။

ပြည်လမ်းနှင့် လမ်းသစ်လမ်းတစ်လျှောက် ရှုပ်ထွေးနေသည့် ဆက်သွယ်ရေးကြိုးများ ရှင်းလင်းခြင်း​ဆောင်ရွက်​နေ

ရန်ကုန်မြို့ပြအင်္ဂါရပ်များနှင့်အညီ သပ်ရပ်လှပစေရေးနှင့် လမ်းဘေးအန္တရာယ် ကင်းရှင်းစေရေးတို့အတွက် အဓိကကျသော လမ်းမကြီးများပေါ်ရှိ ရှုပ်ထွေးနေသည့် ဆက်သွယ်ရေးကေဘယ်လ်ကြိုးများ ရှင်းလင်းခြင်းလုပ်ငန်းစဉ်ကို အရှိန်အဟုန်ဖြင့် ဆောင်ရွက်လျက်ရှိရာ ရန်ကုန်တိုင်းဒေသကြီးအစိုးရအဖွဲ့ လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီး ဒေါက်တာမျိုးသော်သည် တာဝန်ရှိသူများနှင့်အတူ ဇူလိုင် ၁၇ ရက်မွန်းလွဲပိုင်းက ပြည်လမ်းနှင့် လမ်းသစ်လမ်းတစ်လျှောက် ကွင်းဆင်းကြည့်ရှုစစ်ဆေးခဲ့ကြောင်း သိရသည်။
အဆိုပါ ကွင်းဆင်းစစ်ဆေးမှုတွင် ဝန်ကြီးနှင့်အဖွဲ့သည် လမ်းမကြီးများပေါ်ရှိ လျှပ်စစ်ဓာတ်တိုင်များနှင့် ဆက်သွယ်ရေးတိုင်များတွင် ရှုပ်ထွေးပွေလီစွာ သွယ်တန်းထားသည့် ကေဘယ်လ်ကြိုးများ၊ ရုပ်သံလိုင်းကြိုးများနှင့် ရေရှည်အသုံးမပြုတော့ဘဲ စွန့်ပစ်ထားသည့် ကြိုးဟောင်းများကို ဖြတ်တောက်ဖယ်ရှားခြင်းနှင့် စနစ်တကျ ပြန်လည်စိစစ်ရုပ်သိမ်းနေသည့် မြေပြင်လုပ်ငန်းခွင်အခြေအနေများကို လှည့်လည်ကြည့်ရှုစစ်ဆေးခဲ့သည်။
ထိုသို့ စစ်ဆေးစဉ်အတွင်း ရန်ကုန်တိုင်းဒေသကြီးအစိုးရအဖွဲ့ ဝန်ကြီး ဒေါက်တာမျိုးသော်က ဆက်သွယ်ရေးကြိုးများ စနစ်တကျ ရှင်းလင်းဖယ်ရှားရာတွင် လမ်းသွားလမ်းလာ ပြည်သူလူထု ဘေးအန္တရာယ်ကင်းရှင်းရေးကို ပထမဦးစားပေးအဆင့်အနေဖြင့် အလေးထားဆောင်ရွက်ရန်နှင့် မြို့ပြအလှအပကို မထိခိုက်စေဘဲ ကြိုးများ စနစ်တကျ သပ်သပ်ရပ်ရပ် ရှိစေရေးတို့အတွက် သက်ဆိုင်ရာ စည်ပင်သာယာရေးကော်မတီ၊ လျှပ်စစ်ဌာနများနှင့် ဆက်သွယ်ရေးအော်ပရေတာများအားလုံး ဟန်ချက်ညီညီ ပူးပေါင်းကာ ရေရှည်စီမံကိန်းအဖြစ် ဆက်လက်ဆောင်ရွက်သွားရန် တာဝန်ရှိသူများအား လမ်းညွှန်မှာကြားခဲ့ကြောင်း သတင်းရရှိသည်။

မြန်မာနိုင်ငံနှင့် တရုတ်နိုင်ငံတို့အပါအဝင် နိုင်ငံပေါင်း (၂၉) နိုင်ငံ၏ ကမ္ဘာ့ဉာဏ်ရည်တုပူးပေါင်းဆောင်ရွက်ရေးအဖွဲ့တည်ထောင်ခြင်းဆိုင်ရာသဘောတူစာချုပ်ကို ရှန်ဟိုင်းမြို့၌ လက်မှတ်ရေးထိုး

မြန်မာနိုင်ငံနှင့် တရုတ်နိုင်ငံတို့အပါအဝင် နိုင်ငံပေါင်း (၂၉)နိုင်ငံ၏ ကမ္ဘာ့ဉာဏ်ရည်တုပူးပေါင်းဆောင်ရွက်ရေးအဖွဲ့တည်ထောင်ခြင်းဆိုင်ရာသဘောတူစာချုပ်လက်မှတ်ရေးထိုးပွဲကို တရုတ်နိုင်ငံ၊ ရှန်ဟိုင်းမြို့တွင် ဇူလိုင် ၁၆ ရက်ကကျင်းပခဲ့ကြောင်း မြန်မာနိုင်ငံဆိုင်ရာ တရုတ်နိုင်ငံသံရုံးထံမှ သိရသည်။
တရုတ်ကွန်မြူနစ်ပါတီ ဗဟိုကော်မတီ နိုင်ငံရေးရာဗျူရိုအဖွဲ့ဝင်၊ နိုင်ငံခြားရေးဝန်ကြီး Mr. Wang Yi ၊ ပို့ဆောင်ရေးဝန်ကြီးဌာန၊ ဒီဂျစ်တယ်ဖွံ့ဖြိုးတိုးတက်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီးဦးမြထွန်းဦးတို့အပါအဝင် နိုင်ငံပေါင်း(၂၉)နိုင်ငံမှ ကိုယ်စားလှယ်များက သဘောတူစာချုပ်ကိုလက်မှတ်ရေးထိုးခဲ့ကြကြောင်း သိရသည်။
အဆိုပါ အဖွဲ့အစည်း၏ ဌာနချုပ်ကို တရုတ်နိုင်ငံ၊ ရှန်ဟိုင်းမြို့၌အခြေစိုက်ဖွင့်လှစ်မည်ဖြစ်ကာ အဖွဲ့သည် သီးခြားလွတ်လပ်သော အစိုးရချင်းဆက်နွှယ်သည့် နိုင်ငံတကာအဖွဲ့အစည်းတစ်ခုဖြစ်ကြောင်း သိရသည်။
ထို့ပြင် "ကုလသမဂ္ဂ ပဋိညာဉ်စာတမ်း"၏ ရည်ရွယ် ချက်များကိုလိုက်နာပြီး အတူတကွတိုင်ပင်ဆွေးနွေးခြင်း၊ အတူတကွတည်ဆောက်ခြင်း၊ အတူတကွမျှဝေခံစားခြင်းဟူသော အယူအဆကိုကိုင်စွဲကာ ပြည်သူကိုဗဟိုပြုသည့် မူဝါဒကိုလက်ကိုင်ထားကာ ဉာဏ်ရည်တု (AI)ဆိုင်ရာ နိုင်ငံတကာပူးပေါင်းဆောင်ရွက်မှုနှင့် ကမ္ဘာလုံးဆိုင်ရာစီမံခန့်ခွဲမှုများကိုမြှင့်တင်ရန်ရည်ရွယ်ကြောင်း သိရသည်။
ထို့အတူ ဉာဏ်ရည်တုမှတစ်ဆင့် အကျိုးရှိသော၊ ဘေးကင်းလုံခြုံသော၊ တန်းတူညီမျှရှိသောဦးတည်ချက်ဖြင့် စည်းကမ်းတကျကောင်းမွန်စွာဖွံ့ဖြိုးတိုးတက်စေပြီး လူသားတစ်ရပ်လုံးအတွက် အကျိုးပြုရေးတို့ကိုလည်း ရည်ရွယ်ကြောင်း သိရသည်။