ပြည်သူ့ပါတီဥက္ကဋ္ဌဦးကိုကိုကြီး ကြိုတင်မဲဖြင့်ရှုံးနိမ့်ဟုဆို

ရန်ကုန်တိုင်း၊ လမ်းမတော်မြို့နယ်အတွက်ပြည်သူ့လွှတ်တော် ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်သည့် ပြည်သူ့ပါတီဥက္ကဋ္ဌဦးကိုကိုကြီးသည် ကြိုတင်မဲဖြင့်ရှုံးနိမ့်ခဲ့ကြောင်း ပြည်သူ့ပါတီမှတာဝန်ရှိသူတစ်ဦးကပြောသည်။
“မဲရုံတွေမှာ မဲရေတွက်တဲ့နေရာမှာ ကျွန်တော်တို့ပါတီဥက္ကဋ္ဌကအနိုင်ရတယ်။ ဒါပေမယ့်ရတဲ့အနိုင်က ငါးမဲအသာ၊ ခြောက်မဲအသာလောက်နဲ့ပဲကပ်နိုင်တယ်။ နောက်ကြိုတင်မဲရောက်လာတော့ရှုံးသွားပါတယ်" ဟု ၎င်းကစံတော်ချိန်ဒစ်ဂျစ်တယ်သို့ပြောသည်။
လမ်းမတော်မြို့နယ်တွင် မဲရုံပေါင်း ၂၂ ရုံဖွင့်လှစ်ခဲ့ပြီး ဦးကိုကိုကြီးနှင့်ပြိုင်ဘက်ပါတီဖြစ်သည့် ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီ(USDP) မှ ဦးရန်မျိုးအောင်သိန်းက အနိုင်ရရှိခဲ့ကြောင်းသိရသည်။
ရွေးကောက်ပွဲအပိုင်း (၁) ကို ၂၀၂၅ ခုနှစ်၊ ဒီဇင်ဘာ ၂၈ ရက်တွင်မြို့နယ် ၁၀၂ မြို့နယ်၊ ရွေးကောက်ပွဲ အပိုင်း (၂) ကို ၂၀၂၆ ခုနှစ်၊ ဇန်နဝါရီ ၁၁ ရက်တွင်မြို့နယ် ၁၀၀ နှင့် ရွေးကောက်ပွဲအပိုင်း (၃) ကို ယမန်နေ့(ဇန်နဝါရီ ၂၅ ရက်) တွင် မြို့နယ် ၆၁ မြို့နယ်တို့၌ပြုလုပ်ခဲ့သည်။

တရုတ်စစ်တပ်ထိပ်တန်းဗိုလ်ချုပ်ကြီး စုံစမ်းစစ်ဆေးခံရ
-----------------------

စည်းကမ်းနဲ့ဥပဒေကို ပြင်းထန်စွာချိုးဖောက်တယ်လို့ သံသယရှိမှုအတွက် တရုတ်စစ်တပ်ထိပ်တန်းဗိုလ်ချုပ်ကြီး စုံစမ်းစစ်ဆေးခံနေရတယ်လို့ ကာကွယ်ရေးဝန်ကြီးဌာနက ဇန်နဝါရီလ ၂၄ ရက်က ပြောကြားလာတာကို CNN သတင်းမှာ ဖော်ပြထားပါတယ်။ ဗိုလ်ချုပ်ကြီး ဂျန် ယူရှားအပေါ် စွဲဆိုထားတဲ့ စွဲချက်တွေနဲ့ ပတ်သက်လို့ ကာကွယ်ရေးဝန်ကြီးဌာနက အသေးစိတ် ထုတ်ဖော်ပြောဆိုတာတော့ မရှိခဲ့ပါဘူး။ သူ့ကို သမ္မတ ရှီကျင့်ဖျင်ရဲ့ အရင်းနှီးဆုံး စစ်ဘက်ဆိုင်ရာ မိတ်ဆွေအဖြစ် အများက ရှုမြင်ထားကြတာ ဖြစ်ပါတယ်။ ဒါပေမဲ့ ဒီလို မလျော် မကန် လုပ်တယ်ဆိုတဲ့ စွပ်စွဲချက်မျိုးဟာ အဂတိလိုက်စားမှု ကျူးလွန်သူတွေအပေါ် သုံးစွဲလေ့ရှိတဲ့ စွဲချက်မျိုး ဖြစ်ပါတယ်။ ပြီးခဲ့တဲ့ ၂၀၁၂ ခုနှစ် ရှီ အာဏာရလာပြီးကတည်းက အရာရှိ ၂၀၀,၀၀၀ ကျော်ကို အပြစ်ပေးခဲ့တဲ့ ပိုမိုကျယ်ပြန့်တဲ့ အဂတိလိုက်စားမှုတိုက်ဖျက်ရေးလုပ်ငန်းစဉ် တစ်စိတ်တစ်ပိုင်းမှာလည်း ပါဝင်ခဲ့သူတစ်ဦး ဖြစ်ပါတယ်။ ဒါ့အပြင် နောက်ထိပ်တန်းစစ်အရာရှိကြီးတစ်ဦးဖြစ်တဲ့ ဗိုလ်ချုပ်ကြီး လီယူ ဂျန်လီကိုလည်း စုံစမ်းစစ်ဆေးနေတယ်လို့ ကာကွယ်ရေး၀န်ကြီးဌာနက အဲဒီထုတ်ပြန်ချက်ထဲမှာ ဖော်ပြခဲ့ပါတယ်။

ကနေဒါသွင်းကုန်များကို ၁၀၀% အခွန်ကောက်မည်ဟု ထရမ့် ခြိမ်းခြောက်
------------------------------

အမေရိကန်ရဲ့ဒုတိယအကြီးဆုံး ကုန်သွယ်ဖက်နိုင်ငံဖြစ်တဲ့ တရုတ်နဲ့ကုန်သွယ်ရေးသဘောတူညီချက် ချုပ်ဆိုရင် ကနေဒါသွင်းကုန်တွေအပေါ် ၁၀၀% အခွန်ကောက်ခံသွားမှာ ဖြစ်တယ်လို့ ဇန်နဝါရီလ ၂၄ ရက်မှာ သမ္မတ ဒေါ်နယ်ထရမ့်က ခြိမ်းခြောက်ခဲ့တာကို CNN သတင်းမှာ ဖော်ပြထားပါတယ်။ ကနေဒါကုန်ပစ္စည်းတွေအပေါ် ၁၀၀% အခွန်အပါအဝင် အခွန်ကောက်ခံဖို့ အပြန်အလှန်ခြိမ်းခြောက်မှုတွေ ပြုလုပ်ပြီးနောက် ထရမ့်နဲ့ ကနေဒါ ဝန်ကြီးချုပ် မာ့ခ်ကာနေးတို့အကြား သဘောထားကွဲလွဲမှုကို ပိုမိုနက်ရှိုင်းစေမဲ့ အဓိကအချက်အဖြစ် မီးမောင်း ထိုးပြနေတာလည်း ဖြစ်ပါတယ်။ ထရမ့်က မတ်ကာနေးကို “အုပ်ချုပ်ရေးမှူး”လို့ လှောင်ပြောင်ခဲ့ပြီး ကနေဒါဟာ အမေရိကန်ရဲ့ ၅၁ ခုမြောက် ပြည်နယ်ဖြစ်လာဖို့အတွက် ကာနေးတောင်းဆိုမှုကို အသုံးချကာ ကနေဒါကို “ပြည်နယ်အုပ်ချုပ်ရေးမှူး”အဖြစ်လည်း သရော်ခဲ့တာဖြစ်ပါတယ်။ သဘောတူညီချက်ချုပ်ဆိုရင် တရုတ်ဟာ ကနေဒါကို အရှင်လတ်လတ် စားသုံးမှာဖြစ်ပြီး သူတို့စီးပွားရေးလုပ်ငန်းတွေ၊ လူမှုရေးအဆောက်အအုံနဲ့ အထွေထွေဘဝနေထိုင်မှုပုံစံတွေကို ဖျက်ဆီးသွားမှာဖြစ်တယ်လို့ ” ထရမ့်က Truth Social မှာ ရေးသားခဲ့ ပါတယ်။ တရုတ်ဘက်ကလည်း ထရမ့်ဟာ တခြားစီးပွားရေးတွေကို “ပြင်းပြင်းထန်ထန်ဝေဖန်” နေတယ်လို့ ပြောကြားထားပါတယ်။ ဒီလအစောပိုင်းမှာ ကာနေးဟာ တရုတ်သမ္မတရှီနဲ့ တွေ့ဆုံခဲ့ပြီး ကနေဒါက တရုတ် EV တွေအပေါ် အခွန်ကောက်ခံမှုတွေကို လျှော့ချပေးပြီး နှစ်စဉ် တရုတ်လျှပ်စစ်ကား ၄၉၀၀၀ အထိ ဈေးကွက်ထဲ ဝင်ရောက်ခွင့်ပြုတဲ့ “မဟာဗျူဟာမြောက် မိတ်ဖက်အဖွဲ့အစည်းသစ်”ကို ဖွဲ့စည်းခဲ့ပါတယ်။ တရုတ်နိုင်ငံဟာ ဒီနှစ်နှောင်းပိုင်းမှာ ကနေဒါတင်သွင်းလာတဲ့ canola မျိုးစေ့၊ ပုစွန်နဲ့ ပဲစေ့တွေအပေါ် အခွန် အတားအဆီးတွေကို လျှော့ချမယ်လို့လည်း မျှော်လင့်ရပါတယ်။

ရွေးကောက်ပွဲ အပိုင်း (၁) နှင့် (၂) တွင် ၅၅ ရာခိုင်နှုန်းခန့် မဲပေးမှုရှိဟု ပြော
‎------------------------‎

‎ရွေးကောက်ပွဲ အပိုင်း (၁) နဲ့ (၂) မှာ ပျှမ်းမျှအနေနဲ့ ပြည်သူလူထု ၅၅ ရာခိုင်နှုန်းလောက် ဆန္ဒမဲပေးခဲ့တာကို တွေ့ရတဲ့အတွက် အောင်မြင်တဲ့ ရွေးကောက်ပွဲတစ်ခုလို့သတ်မှတ်နိုင်ပြီး ရွေးကောက်ပွဲအပေါ် စိတ်ဝင်စားမှုကို တွေ့မြင်ရတယ်လို့ နိုင်ငံတော်လုံခြုံရေး နှင့် အေးချမ်းသာယာရေး ကော်မရှင် ဥက္ကဋ္ဌ၊ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောပါတယ်။
‎‎ဇန်နဝါရီ ၂၅ ရက်က အလယ်ပိုင်းတိုင်း စစ်ဌာနချုပ်၊ ရန်အောင်မြင်ခန်းမမှာ မန္တလေးတပ်နယ်မှ အရာရှိ၊ စစ်သည်၊ မိသားစုတွေကို တွေ့ဆုံ အမှာစကား ပြောကြားရာမှာ အခုလို ထည့်သွင်းပြောကြားခဲ့တာပါ။‎ ‎မိမိတို့ အနေနဲ့ စစ်မှန်စည်းကမ်းပြည့်ဝပြီး လွတ်လပ်ပြီး တရားမျှတတဲ့ ရွေးကောက်ပွဲတစ်ခု ပြန်လည်ကျင်းပနိုင် ရေး စီမံဆောင်ရွက်ခဲ့ပြီး မဲမသမာမှုတွေ ဖြစ်ပေါ်မှု မရှိစေရေးအတွက် MEVM စက်တွေနဲ့ ပြုလုပ်ခဲ့တာ ဖြစ်တယ် လို့ ဗိုလ်ချုပ်မှူးကြီး မင်းအောင်လှိုင်က ပြောပါတယ်။
‎‎မဲမသမာမှုမရှိတဲ့ ရွေးကောက်ပွဲ သိက္ခာရှိတဲ့ ရွေးကောက်ပွဲ ဖြစ်စေဖို့ နဲ့ ဆန္ဒမဲပေးကြတဲ့ ပြည်သူလူထုတွေရဲ့ ဆန္ဒ အမှန်နဲ့ လိုလားတဲ့ ရလဒ်တွေ ထွက်ပေါ်လာစေဖို့ ဖြစ်တယ်လို့ ဆိုပါတယ်။ ‎မိမိတို့အနေနဲ့ ရွေးကောက်ပွဲကျင်းပ အပြီး အနိုင်ရရှိတဲ့ အစိုးရအဖွဲ့ကို နိုင်ငံတော်ရဲ့ တာဝန်တွေကို လွှဲပြောင်းပေးသွားမှာ ဖြစ်တယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောပါတယ်။
‎
‎မိမိတို့ အစိုးရအနေနဲ့ ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲကို အောင်မြင်စွာ ကျင်းပပြုလုပ် နိုင်ခဲ့ပြီး နိုင်ငံတကာ ရွေးကောက်ပွဲ စောင့်ကြည့်လေ့လာရေး အဖွဲ့တွေလည်း လာရောက်လေ့လာခဲ့ကာ အပြု သဘောဆောင်တဲ့ မှတ်ချက်များစွာကိုလည်း ရရှိခဲ့တယ်လို့ ဆိုပါတယ်။‎
‎ဒါ့အပြင် နိုင်ငံတော်မှာ နိုင်ငံရေးပါတီတွေ အဖွဲ့အစည်းတွေ ဘယ်လိုပင် ပြောင်းလဲခဲ့ပေမဲ့ တပ်မတော်အနေနဲ့ နိုင်ငံတော် ကာကွယ်ရေးနဲ့ လုံခြုံရေး တာဝန်တွေကို တို့တာဝန်အရေးသုံးပါး ဦးထိပ်ထားပြီး ဒီကနေ့ထက်တိုင် မမှိတ်မသုန် ထမ်းဆောင်နေတာ ဖြစ်တယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ပါတယ်။

Elite Express ခရီးသည်တင်ယာဉ်တိမ်းမှောက်မှု အမျိုးသမီးတစ်ဦး ဒ-ဏ်ရာရရှိ

မန္တလေးတိုင်း၊ ပုသိမ်ကြီးမြို့နယ်၊ ကျောက်ချောကျေးရွာ၊ မန္တလေး-ပြင်ဦးလွင် အတက်လမ်းတွင် Elite Express ခရီး သည်တင် ယာဉ်တိမ်းမှောက်မှုဖြစ်ပွားခဲ့ရာ ခရီးသည်အမျိုးသမီးတစ်ဦး ဒ-ဏ်ရာရရှိခဲ့ကြောင်း သိရသည်။
ယနေ့ ဇန်နဝါရီ (၂၅) ရက် ၊ နံနက် (၇)နာရီအချိန်၌ ဖြစ်ပွားခဲ့ခြင်းဖြစ်ပြီး၊ ယာဉ်ပေါ်ပါ ခရီးသည် (၂၂)ဦးအနက် အဆိုပါ အမျိုးသမီး(၁)ဦး ထိခိုက်ဒ-ဏ်ရာ(မစိုးရိမ်ရ)ရရှိခဲ့ခြင်းဖြစ် သည်။
ဒ-ဏ်ရာရသူ အမျိုးသမီးအား စေတနာမွန်လူမှုကူညီရေးအသင်းယာဉ်ဖြင့် မန္တလေးပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း မြန်မာနိုင်ငံမီးသတ်တပ်ဖွဲ့ထံက သိရသည်။

ရွေးကောက်ပွဲအပိုင်း (၁) နှင့် (၂) တွင် ပြည်သူလူထု (၅၅) ရာခိုင်နှုန်းခန့်ဆန္ဒမဲများပေးကြ၍ အောင်မြင်သည့်ရွေး ကောက်ပွဲတစ်ခုအဖြစ်သတ်မှတ်နိုင်

လူငယ်လူရွယ်များ၊ လူလတ်ပိုင်းများလည်း များစွာပါဝင်
ရွေးကောက်ပွဲအပိုင်း (၁) နှင့် (၂) တွင် ပြည်သူလူထု (၅၅) ရာခိုင်နှုန်းခန့်ဆန္ဒမဲများပေးကြ၍ အောင်မြင်သည့်ရွေး ကောက်ပွဲတစ်ခုအဖြစ်သတ်မှတ်နိုင်သည်ဟု တပ်မ တော်ကာကွယ်ရေးဦးစီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇန်နဝါရီ ၂၅ ရက်နံနက်ပိုင်းက မန္တလေးတပ်နယ်မှအရာရှိ၊ စစ်သည်၊ မိသားစုများအား တွေ့ဆုံအမှာစကားပြောကြားစဥ် ထည့်သွင်းပြောကြားခဲ့ခြင်းဖြစ်သည်။
၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲအပိုင်း (၁) နှင့် (၂) အား အောင်မြင်စွာကျင်းပနိုင်ခဲ့ပြီး အပိုင်း (၃) ကို ယနေ့တွင်ကျင်းပခဲ့ရာ မန္တလေးတိုင်းအ တွင်း ရွေးကောက်ပွဲအပိုင်း (၃) ကျင်းပနေမှုများကိုကြည့်ရှုရာ မဲဆန္ဒရှင်များတက်တက်ကြွကြွဆန္ဒမဲများပေးကြကာ ထိုအထဲတွင် လူငယ်လူရွယ်များ၊ လူလတ်ပိုင်းများလည်း များစွာပါဝင်သည်ကိုတွေ့ရသည်ဟု ပြောသည်။
" ရွေးကောက်ပွဲအပိုင်း (၁) နဲ့ (၂) မှာ ပျဉ်းမျှအားဖြင့် ပြည်သူလူထု (၅၅) ရာခိုင်နှုန်းခန့် ဆန္ဒမဲပေးတာသိရပါတယ်။ ဒါ့ကြောင့် အောင်မြင်တဲ့ရွေးကောက်ပွဲတစ်ခုလို့သတ်မှတ်နိုင်ပြီး ရွေးကောက်ပွဲအပေါ် စိတ်ဝင်စားမှုကို တွေ့မြင်ရပါတယ်"ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
မိမိတို့အနေဖြင့် စစ်မှန်စည်းကမ်းပြည့်ဝပြီး လွတ်လပ် ၍တရားမျှတမှုရှိသည့် ရွေးကောက်ပွဲတစ်ခုပြန်လည် ကျင်းပနိုင်ရေးစီမံဆောင်ရွက်ခဲ့ကာ မဲမသမာမှုများဖြစ်ပေါ်မှုမရှိစေရေးအတွက် MEVM စက်များကိုပြုလုပ်ခဲ့ခြင်းမှာ မဲမသမာမှုမရှိသောရွေးကောက်ပွဲ၊ သိက္ခာရှိသည့်ရွေးကောက်ပွဲဖြစ်စေရန်နှင့် ဆန္ဒမဲပေးသူများ၏ ဆန္ဒအမှန်ဖြင့် လိုလားသည့်ရလာဒ်များထွက်ပေါ်လာ စေရန်အတွက်ဖြစ်သည်ဟု ပြောသည်။
ထို့ပြင် အသက် (၁၈) နှစ်ပြည့်ပြီးသူများအနေဖြင့် ဖွဲ့ စည်းပုံအခြေခံဥပဒေအရ ဆန္ဒမဲပေးနိုင်ပြီဖြစ်ကာ နိုင်ငံတော်အစိုးရအနေဖြင့် ဆန္ဒမဲပေးပိုင်ခွင့်ရှိသူများအားလုံး ဆန္ဒမဲများပေးနိုင်ရေးအတွက် စီမံဆောင်ရွက်ပေးထားပြီး ဆန္ဒမဲပေးခြင်း၊ မပေးခြင်းသည် မဲဆန္ဒရှင်များ ၏ရပိုင်ခွင့်ဖြစ်ပြီး မိမိတို့ကျင်းပသည့် ရွေးကောက်ပွဲတွင်လည်း ဆန္ဒမဲပေးနိုင်သူ၏ ထက်ဝက်ကျော်ဆန္ဒမဲများပေးခဲ့ကြ၍ ရွေးကောက်ပွဲအောင်မြင်သည်ဟုဆိုနိုင်သည်ဟု ပြောသည်။
၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲကို အောင်မြင်စွာကျင်းပနိုင်ခဲ့ပြီး နိုင်ငံတကာမှရွေးကောက်ပွဲစောင့်ကြည့်လေ့လာရေးအဖွဲ့များလည်းလာရောက်လေ့လာခဲ့ကြကာ အပြုသဘောဆောင်သည့်မှတ်ချက်များစွာရရှိခဲ့သဖြင့် မိမိတို့ကျင်းပသည့် ရွေး ကောက်ပွဲသည် အောင်မြင်သည့်ရွေးကောက်ပွဲတစ်ရပ်ဖြစ်သည်ဟု ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

မန္တလေးမြို့၊ မဟာဝိဇိတာရုံကျောင်းတိုက် ပဓာနနာယကဆရာတော်ကြီး၏ ကျန်းမာရေးအခြေအနေများအား နိုင်ငံတော် ယာယီသမ္မတနှင့် ဇနီးတို့မေးမြန်းလျှောက် ထား

မန္တလေးမြို့၊ မဟာဝိဇိတာရုံကျောင်းတိုက် ပဓာနနာယက၊ နိုင်ငံတော်ဩဝါဒါစရိယ အဘိဓဇမဟာရဋ္ဌဂုရု အဘိဓဇအဂ္ဂမဟာသဒ္ဓမ္မ ဇောတိက အဂ္ဂမဟာပဏ္ဍိတ ဘဒ္ဒန္တဝိစာရိန္ဒာဘိဝံသ (သက်တော် ၉၈) နှစ်၊ ဝါတော် (၇၈) ဝါရှိ သက်တော်ရှည်ဆရာတော်ကြီးအား နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးတို့မှ ယနေ့ ဇန်နဝါရီ ၂၅ ရက်မွန်းလွဲပိုင်းက ဖူးမြှော်ကြည်ညိုခဲ့ကြသည်။
ထိုသို့ ဖူးမြော်ကြည်ညိုပြီးနောက် နိုင်ငံတော် ယာယီသမ္မတနှင့်လဇနီးတို့မှ ဆရာတော်ကြီး၏ ကျန်းမာရေးဆိုင်ရာများနှင့် သာသနာတော်ထွန်းကားပြန့်ပွားရေးဆိုင်ရာများအားမေးမြန်းလျှောက်ထားပြီး လိုအပ်သည်များကိုဖြည့်ဆည်းဆောင်ရွက်ပေးခဲ့သည်။
ထို့နောက် နိုင်ငံတော်ယာယီသမ္မတနှင့်ဇနီးတို့မှ ဆရာတော်ကြီးအား လှူဖွယ်ပစ္စည်းများ၊ ဆေးပစ္စည်းများ၊ အာဟာရဖြည့်စားသောက်ဖွယ်ရာများနှင့် နဝကမ္မအလှူတော်ငွေများကိုဆက်ကပ်လှူဒါန်းပြီး ဆရာတော်ကြီး၏ ကျန်းမာရေးဆိုင်ရာလိုအပ်ချက်များအား အမြဲမပြတ်ဖြည့်ဆည်းဆောင်ရွက်ပေးရန် တာဝန်ရှိသူများကို မှာကြားခဲ့သည်။

အစိုးရသစ်တစ်ရပ်မဖွဲ့စည်းမှီအတွင်း မန္တလေးမြို့သာယာလှပရေး၊ ဖွံ့ဖြိုးတိုးတက်ရေးလုပ်ငန်းများကို အရှိန်အဟုန်မပြတ်ဆက်လက်ဆောင်ရွက်ရမည်

အစိုးရသစ်တစ်ရပ်မဖွဲ့စည်းမှီအတွင်း မန္တလေးမြို့သာယာလှပရေး၊ ဖွံ့ဖြိုးတိုးတက်ရေးလုပ်ငန်းများကို အရှိန်အဟုန်မပြတ်ဆက်လက်ဆောင်ရွက်ရမည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်း သာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က မှာကြားသည်။
နိုင်ငံတော် ယာယီသမ္မတမှ ယနေ့ ဇန်နဝါရီ ၂၅ ရက်မွန်း လွဲပိုင်းက မန္တလေးတိုင်းအစိုးရအဖွဲ့ဝင်ဝန်ကြီးများ၊ မြို့တော်စည်ပင်သာယာရေးကော်မတီမှတာဝန်ရှိသူများနှင့် တွေ့ဆုံ၍ မန္တလေးမြို့၊ မြို့အင်္ဂါရပ်နှင့်အညီ ဖွံ့ဖြိုးတိုးတက်ရေးနှင့် သန့်ရှင်းသာယာလှပရေးတို့အတွက် လိုအပ်သည်များကိုလမ်းညွှန်မှာကြားစဥ် ထည့်သွင်းမှာကြားခဲ့ခြင်းဖြစ်သည်။
မန္တလေးမြို့တွင်းရှိ လမ်းမကြီးများ၊ လမ်းသွယ်များနှင့် မြို့တွင်းသန့်ရှင်းသာယာလှပမှုကောင်းမွန်သည်ကိုတွေ့ရှိရပြီး စည်ပင်သာယာရေးဆိုင်ရာတာဝန်ရှိသူများ၏ လုပ်ငန်းတာဝန်ကျေပွန်မှု၊ မြို့သူ/မြို့သားများ၏ စည်းကမ်းစနစ်တကျရှိမှုကြောင့်ဖြစ်သည်ကို ဝမ်းမြောက်အသိအမှတ်ပြုသည်ဟု ပြောသည်။
"ရွေးကောက်ပွဲပြီးလို့ လာမယ့် မတ်လကုန်မှာ အစိုးရသစ်တစ်ရပ်တက်လာမှာဖြစ်ပါတယ်။ အစိုးရသစ်တစ်ရပ်မဖွဲ့စည်းမှီကြားကာလအတွင်းမှာ မန္တလေးမြို့ရဲ့ မြို့သာယာလှပရေး၊ ဖွံ့ဖြိုးတိုးတက်ရေးလုပ်ငန်းတွေကို အရှိန်အဟုန်မပြတ်ဆက်လက်ဆောင်ရွက်ရပါမယ်။ ငလျင်ဘေးအလွန်ပြန်လည်ထူထောင်ရေးလုပ်ငန်းတွေကိုလည်းဆက်လက်ဆောင်ရွက်ရပါမယ်"ဟု နိုင်ငံတော် ယာယီသမ္မတက မှာကြားသည်။
ထို့ပြင် ကြားကာလ(၂)လတာအတွင်းဆောင်ရွက်ပြီး စီးနိုင်မည့် မြို့သာယာလှပရေးလုပ်ငန်းများကို ဦးစား ပေးဆောင်ရွက်ရမည်ဖြစ်ကာ အဓိကလမ်းမကြီးများ၌ လမ်းလယ်မျဉ်းများဆွဲခြင်း၊ လမ်းညွှန်အမှတ်အသားများအသစ်ပြန်လည်ပြုလုပ်ခြင်းတို့အပါအဝင် အချိန်တိုအတွင်းပြီးစီးနိုင်မည့် လုပ်ငန်းများကိုဖော်ဆောင်ရမည်ဖြစ်ပြီး လမ်းလယ်ကျွန်းများ၊ ပလက်ဖောင်းများ၌ သဲ၊ မြေကြီးနှင့် အမှိုက်များဖုံးနေခြင်းများကိုရှင်းလင်းရမည်ဟု မှာကြားသည်။
ထို့အတူ ပလက်ဖောင်းများပြုပြင်မွမ်းမံထိန်းသိမ်းခြင်း၊ ရေဝင်/ထွက်ပေါက်များပိတ်ဆို့မှုမရှိစေရေးနှင့် စနစ်တကျဖြစ်စေရေးထိန်းသိမ်းဆောင်ရွက်ခြင်း၊ မန္တ လေးမြို့အတွင်း လေထုညစ်ညမ်းမှုကိုစစ်ဆေးခြင်း၊ ပြန်လည်ထိန်းသိမ်းခြင်းလုပ်ငန်းများဆောင်ရွက်ရမည်ဟု နိုင်ငံတော် ယာယီသမ္မတမှ မှာကြားခဲ့သည်။

ဒေါ်နယ်ထရမ့် ရုရှားနိုင်ငံသို့ လာရောက်လည်ပတ်ရန် ဖိတ်ကြားချက် ရရှိထားကြောင်း အဆင့်မြင့်သံတမန်တစ်ဦး ပြောကြား

အမေရိကန်သမ္မတ ဒေါ်နယ်ထရမ့်သည် ပြီးခဲ့သည့် သြဂုတ်လက အလက်စကာတွင် ရုရှားခေါင်းဆောင် ဗလာဒီမီယာ ပူတင်နှင့် တွေ့ဆုံစဉ်အတွင်း ရုရှားနိုင်ငံသို့ လာရောက်လည်ပတ်ရန် ဖိတ်ကြားချက်ကို လက်ခံရရှိခဲ့ကြောင်း ရုရှားဒုတိယနိုင်ငံခြားရေးဝန်ကြီး ဆာဂေး ရာဘော့ကော့ဗ် (Sergey Ryabkov) က TASS သတင်းဌာနနှင့် အင်တာဗျူးတွင် ပြောကြားခဲ့သည်။
"သမ္မတ ထရမ့် ရုရှားဖက်ဒရေးရှင်းနိုင်ငံကို လာရောက်လည်ပတ်ဖို့ ဖိတ်ကြားချက်ကို အန်ကာရေ့ချ် (Anchorage) မြို့မှာ ပြောကြားခဲ့တာ အမှန်ပါပဲ" ဟု ၎င်းက ဆိုသည်။ ထရမ့်နှင့် အန်ကာရေ့ချ်တွင် တွေ့ဆုံပြီးနောက် နောက်တစ်ကြိမ်တွေ့ဆုံမှုကို မော်စကိုမြို့တွင် ပြုလုပ်ရန် အကြံပြုခဲ့သည့် ရုရှားသမ္မတ ဗလာဒီမီယာ ပူတင်၏ ပြောကြားချက်အပေါ် ၎င်းက မှတ်ချက်ပေးခဲ့ခြင်းဖြစ်သည်။
သို့သော်လည်း ရာဘော့ကော့ဗ်၏ အဆိုအရ အဆိုပါအစီအစဉ်နှင့် ပတ်သက်၍ လက်တွေ့ကျသော တိုးတက်မှုများ ယခုအချိန်အထိ မရှိသေးပေ။ "ရုရှားနဲ့ အမေရိကန်သမ္မတတွေကြား ဆက်သွယ်ပြောဆိုဖို့ တခြားနည်းလမ်းတွေလိုပဲ ကျွန်တော်တို့ရဲ့ ရပ်တည်ချက်က ခိုင်မာပါတယ် - အကြောင်းအရာပိုင်းဆိုင်ရာ ပြင်ဆင်မှုတွေက ပထမဦးစားပေးဖြစ်ရမှာဖြစ်ပြီး အဲဒီနောက်မှ တွေ့ဆုံမယ့်နေရာကို သဘောတူညီမှု ရယူရမှာဖြစ်ပါတယ်" ဟု အဆိုပါ အဆင့်မြင့်ရုရှားသံတမန်က ဆက်လက်ပြောကြားခဲ့သည်။

နှင်းမုန်တိုင်းကြောင့် အမေရိကန်တွင် အနည်းဆုံးလူ ၇ ဦး သေဆုံး

အမေရိကန်နိုင်ငံတွင် ဖြစ်ပွားနေသော နှင်းမုန်တိုင်းကြောင့် လူ ၇ ဦး အနည်းဆုံး သေဆုံးခဲ့ကြကြောင်း CNN သတင်းဌာနက ဖော်ပြခဲ့သည်။
ရာသီဥတုအခြေအနေကြောင့် သေဆုံးမှုများကို တက္ကဆက်၊ မစ်ဆူရီ နှင့် ကန်းဆက် ပြည်နယ်များတွင် မှတ်တမ်းတင်ထားပြီး အာဏာပိုင်များက ဒေသခံပြည်သူများအား အိမ်တွင်း၌သာ နေထိုင်ကြရန် တိုက်တွန်းထားသည်။
PowerOutage အရင်းအမြစ်၏ အချက်အလက်များအရ လျှပ်စစ်သုံးစွဲသူ တစ်သန်းကျော်မှာ လျှပ်စစ်မီး ပြတ်တောက်နေပြီး အိမ်ထောင်စုပေါင်း ၁,၀၁၈,၄၇၇ စုတွင် မီးမလာဘဲ ဖြစ်နေသည်။ တန်နက်ဆီ ပြည်နယ်တွင် လူပေါင်း ၃ သိန်းကျော် မီးပြတ်တောက်နေသဖြင့် အဆိုးရွားဆုံး အခြေအနေနှင့် ရင်ဆိုင်နေရပြီး တက္ကဆက်၊ လူဝီစီယားနား၊ အလာဘားမား နှင့် ဂျော်ဂျီယာ ပြည်နယ်များတွင်လည်း အကြီးအကျယ် လျှပ်စစ်ပြတ်တောက်မှုများ ဖြစ်ပေါ်နေသည်။
ပြည်နယ်ပေါင်း ၂၃ ခုတွင် အရေးပေါ်အခြေအနေ ကြေညာထားပြီး လူပေါင်း ၁၈၅ သန်းခန့်မှာ ပြင်းထန်သော ရာသီဥတု သတိပေးချက်များအောက်တွင် ရှိနေသည်။ တနင်္ဂနွေနေ့က လေကြောင်းခရီးစဉ်ပေါင်း ၁၀,၀၀၀ ကျော်ကို ဖျက်သိမ်းခဲ့ရသည်။ မျှော်မှန်းထားသည့် စံချိန်တင် အအေးဒဏ်နှင့် နှင်းမုန်တိုင်းများအတွက် အရေးပေါ် ကယ်ဆယ်ရေးအဖွဲ့များ အဆင်သင့်ရှိနေကြောင်း သမ္မတ ထရမ့်က သောကြာနေ့တွင် ပြောကြားခဲ့သည်။