နိုင်ငံတော်သမ္မတ၏ ကမ္ဘာ့စားနပ်ရိက္ခာဖြည့်ဆည်းတင်ပို့နိုင်ငံ မူဝါဒကို အပြည့်အဝအကောင်အထည်ဖော်နိုင်ပါက ဆင်းရဲနွမ်းပါးမှု အမြစ်ပြတ်တိုက်ထုတ်နိုင်မည်ဟု ဒေါက်တာခိုင်ခိုင်စိုး ပြောကြား

နိုင်ငံတော်သမ္မတကြီးက မြန်မာနိုင်ငံကို ကမ္ဘာ့စားနပ်ရိက္ခာ အဓိကဖြည့်ဆည်းတင်ပို့နိုင်သည့် နိုင်ငံတစ်နိုင်ငံအဖြစ် တည်ဆောက်ရေးကို မူဝါဒအဖြစ် ချမှတ်ပေးထားပြီး ယင်းမူဝါဒကို အပြည့်အဝအကောင်အထည်ဖော်နိုင်ပါက နိုင်ငံ၏ ဆင်းရဲနွမ်းပါးမှုကို အမြစ်ပြတ်တိုက်ထုတ်နိုင်သည့် အခြေအနေသို့ ရောက်ရှိလာမည်ဖြစ်ကြောင်း နိုင်ငံတော်သမ္မတရုံး၏ ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။
ဇွန် ၃၀ ရက်က နေပြည်တော်၌ ကျင်းပပြုလုပ်သည့် နိုင်ငံတော်သမ္မတရုံး၏ သတင်းစာရှင်းလင်းပွဲတွင် မီဒီယာများ၏ မေးမြန်းချက်များကို ပြန်လည်ဖြေကြားစဉ် ဒေါက်တာခိုင်ခိုင်စိုးက အထက်ပါအတိုင်း ပြောကြားခဲ့ခြင်းဖြစ်သည်။
ဒေါက်တာခိုင်ခိုင်စိုးက မြန်မာနိုင်ငံသည် ဖွံ့ဖြိုးဆဲနိုင်ငံဖြစ်ပြီး ဆင်းရဲနွမ်းပါးမှုနှုန်း မြင့်မားနေဆဲဖြစ်သည့်အတွက် ဆင်းရဲနွမ်းပါးမှုလျှော့ချရေးကို အစိုးရအဆက်ဆက် အလေးထားဆောင်ရွက်ခဲ့ကြောင်း၊ လက်ရှိအစိုးရလက်ထက်တွင်မူ အမျိုးသားရေးရည်မှန်းချက် (၂) ရပ်ဖြစ်သည့် စားရေရိက္ခာဖူလုံရေးနှင့် တိုင်းပြည်သာယာဝပြောရေးကို ဦးစားပေးအကောင်အထည်ဖော်လျက်ရှိကြောင်း ပြောကြားသည်။
ထို့ပြင် နိုင်ငံတော်သမ္မတကြီး၏ လမ်းညွှန်ချက်နှင့်အညီ ကျေးလက်ဒေသဖွံ့ဖြိုးတိုးတက်ရေးကို အခြေခံထားပြီး စိုက်ပျိုးရေးနှင့် မွေးမြူရေးကဏ္ဍ ဖွံ့ဖြိုးတိုးတက်စေရေး၊ လက်ရှိစိုက်ပျိုးလျက်ရှိသည့် ဧကများတွင် သီးနှံအထွက်နှုန်းတိုးမြှင့်နိုင်ရေးအတွက် သက်ဆိုင်ရာဝန်ကြီးဌာနများကို တွန်းအားပေး ဆောင်ရွက်လျက်ရှိကြောင်းလည်း ပြောသည်။
ဒေါက်တာခိုင်ခိုင်စိုးက နိုင်ငံတော်သမ္မတကြီး၏ တရုတ်နိုင်ငံနှင့် အိန္ဒိယနိုင်ငံ ခရီးစဉ်များတွင်လည်း စိုက်ပျိုးရေးနှင့် မွေးမြူရေးကဏ္ဍ ဖွံ့ဖြိုးတိုးတက်ရေး၊ ခေတ်မီနည်းပညာများနှင့် AI နည်းပညာများကို အသုံးချ၍ ဒေသဖွံ့ဖြိုးရေးမြှင့်တင်နိုင်ရေး၊ တောင်သူလယ်သမားများ၏ လူမှုစီးပွားဘဝ မြှင့်တင်ရေးနှင့် သီးနှံအထွက်နှုန်းတိုးတက်စေရေးတို့ကို အဓိကရည်ရွယ်ဆောင်ရွက်ခဲ့ကြောင်းလည်း ရှင်းလင်းပြောကြားခဲ့သည်။
စီးပွားရေးဖွံ့ဖြိုးတိုးတက်ရေးနှင့်ပတ်သက်၍လည်း ထွက်ရှိလာသည့် ကုန်ပစ္စည်းများ ဈေးကောင်းရရှိရေး၊ အရည်အသွေးမြင့်မားရေးနှင့် တန်ဖိုးမြင့်ထုတ်ကုန်များ ထုတ်လုပ်နိုင်ရေးကို အဆင့်လိုက်ဆောင်ရွက်လျက်ရှိကြောင်း၊ ဖွံ့ဖြိုးဆဲနိုင်ငံများအတွက် MSME လုပ်ငန်းများသည် စီးပွားရေးဖွံ့ဖြိုးတိုးတက်မှု၏ အရေးပါသည့် အခြေခံမဏ္ဍိုင်ဖြစ်သည့်အတွက် နိုင်ငံဖွံ့ဖြိုးတိုးတက်ရေးတွင် မဖြစ်မနေအားပေးဆောင်ရွက်ရမည့် ကဏ္ဍဖြစ်ကြောင်း ပြောကြားသည်။
ထို့အပြင် MSME လုပ်ငန်းများသည် ကျေးလက်ဒေသများမှ ထွက်ရှိသည့် စိုက်ပျိုးရေးနှင့် မွေးမြူရေးအခြေခံကုန်ကြမ်းများကို အသုံးပြု၍ တန်ဖိုးမြင့်ထုတ်ကုန်များ ထုတ်လုပ်သည့် လုပ်ငန်းများဖြစ်သည့်အတွက် ကျေးလက်နေပြည်သူများနှင့် ဆင်းရဲနွမ်းပါးသူများ၏ လူမှုစီးပွားဘဝမြှင့်တင်ရေးတွင် အရေးပါသည့် အခန်းကဏ္ဍမှ ပါဝင်နေပြီး အစိုးရအနေဖြင့် MSME ကဏ္ဍဖွံ့ဖြိုးတိုးတက်ရေးကို ဆက်လက်တိုးမြှင့်ဆောင်ရွက်သွားမည်ဖြစ်ကြောင်း ဒေါက်တာခိုင်ခိုင်စိုးက ပြောကြားခဲ့သည်။

ငြိမ်းချမ်းရေးသည် နံပါတ် (၁) ဦးစားပေးဖြစ်ပြီး ငြိမ်းချမ်းရေးလိုလားသူ မည်သူ့ကိုမဆို အချိန်မရွေး တံခါးဖွင့်ကြိုဆိုမည်ဟု သမ္မတရုံးပြောရေးဆိုခွင့်ရှိသူ ပြောကြား

နိုင်ငံတော်သမ္မတကြီး၏ အစိုးရသစ်အတွက် ဦးစားပေးမူဝါဒမှာ ငြိမ်းချမ်းရေးဖြစ်ပြီး ငြိမ်းချမ်းရေးသည် “နံပါတ် (၁)” ဖြစ်ကြောင်း နိုင်ငံတော်သမ္မတကြီးက အတိအလင်း ပြောကြားထားသလို၊ ရက်(၁၀၀) စီမံချက်အတွင်း အောင်မြင်မှုရရှိစေရန် ကြိုးပမ်းဆောင်ရွက်မည်ဖြစ်ကာ ရက်(၁၀၀) ကျော်လွန်သွားသည့်တိုင် ငြိမ်းချမ်းရေးလိုလားသူ မည်သူ့ကိုမဆို တံခါးဖွင့်လှစ်၍ ဆက်လက်ကြိုဆိုသွားမည်ဖြစ်ကြောင်း နိုင်ငံတော်သမ္မတရုံး၏ ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။
ယင်းကို ဇွန်လ ၃၀ ရက်က နေပြည်တော်တွင် ကျင်းပပြုလုပ်သည့် နိုင်ငံတော်သမ္မတရုံး၏ သတင်းစာရှင်းလင်းပွဲတွင် မီဒီယာများ၏ မေးမြန်းမှုများအား ပြန်လည်ဖြေကြားစဉ် ထည့်သွင်းပြောကြားခဲ့ခြင်းဖြစ်သည်။
“ယခုအစိုးရလက်ထက်မှာ ပထမဦးဆုံးစလုပ်တာက ငြိမ်းချမ်းရေးဖြစ်ပါတယ်။ ရက်(၁၀၀)အတွင်း အောင်မြင်အောင် ကြိုးပမ်းသွားမယ်။ ရက်(၁၀၀) ကျော်သွားရင်လည်း ငြိမ်းချမ်းရေးလိုချင်သူ မည်သူမဆို လာခဲ့ပါ၊ တံခါးဖွင့်ကမ်းလှမ်းကြိုဆိုပါတယ်ဆိုပြီး နိုင်ငံတော်သမ္မတကြီးက ပြောကြားထားပါတယ်” ဟု ဒေါက်တာခိုင်ခိုင်စိုးက ပြောကြားသည်။
ထို့ပြင် ပြည်တွင်းငြိမ်းချမ်းရေးဖော်ဆောင်မှုများကို ဗိုလ်ချုပ်ကြီးရာပြည့် ဦးဆောင်သည့် ငြိမ်းချမ်းရေးဆွေးနွေးရေးအဖွဲ့က အဆက်မပြတ် ဆောင်ရွက်လျက်ရှိပြီး NCA လက်မှတ်ရေးထိုးထားသည့် အဖွဲ့များ၊ NCA မရေးထိုးရသေးသည့် အဖွဲ့များနှင့် ဆွေးနွေးမှုများ ဆက်လက်ပြုလုပ်လျက်ရှိကြောင်း ပြောကြားသည်။
မကြာသေးမီကလည်း မိုင်းလားဒေသနှင့် “ဝ” ဒေသသို့ သွားရောက်၍ NDAA နှင့် “ဝ” အဖွဲ့တို့နှင့် တွေ့ဆုံဆွေးနွေးခဲ့ကြောင်း၊ ဆွေးနွေးမှုများတွင် ငြိမ်းချမ်းရေးအပြင် ပညာရေး၊ ကျန်းမာရေးကဏ္ဍများ၊ ကလေးများ ကျောင်းပြန်တက်နိုင်ရေး၊ ဆရာ၊ ဆရာမများ ခန့်ထားရေးစသည့် ပြည်သူလူထုအကျိုးပြုကိစ္စရပ်များကိုပါ ထည့်သွင်းဆွေးနွေးခဲ့ကြောင်း ၎င်းက ပြောသည်။
ထို့အပြင် “ဝ” အဖွဲ့ဘက်ကလည်း နိုင်ငံရေးအခင်းအကျင်းကို ယခုထက် ပိုမိုကောင်းမွန်လာစေရေးအတွက် ပူးပေါင်းပါဝင်ဆောင်ရွက်သွားမည်ဆိုသည့် ရည်မှန်းချက်ဖြင့် ဆွေးနွေးခဲ့ကြောင်း၊ “ဝ” ဒေသနှင့် မိုင်းလားဒေသသို့ သွားရောက်ခဲ့သည့် ခရီးစဉ်မှ ရလဒ်ကောင်းများ ရရှိခဲ့ပြီး ရှေ့ဆက်၍လည်း ငြိမ်းချမ်းရေးဆွေးနွေးမှုများကို ဆက်လက်လုပ်ဆောင်သွားမည်ဖြစ်ကြောင်း ပြောကြားသည်။
ဒေါက်တာခိုင်ခိုင်စိုးက လက်ရှိ တိုက်ပွဲများဖြစ်ပွားနေသည့် လက်နက်ကိုင်အဖွဲ့အစည်းများကိုလည်း နိုင်ငံတော်သမ္မတကြီးက ငြိမ်းချမ်းရေးအတွက် ဖိတ်ခေါ်ထားပြီးဖြစ်ကြောင်း၊ ငြိမ်းချမ်းရေးလုပ်ငန်းစဉ်အပေါ် အချိန်ကန့်သတ်ချက် သို့မဟုတ် ကြိုတင်သတ်မှတ်ထားသည့် အခြေအနေများ မရှိကြောင်း၊ ငြိမ်းချမ်းရေးလိုလားသူ မည်သူမဆို လာရောက်ဆွေးနွေးနိုင်ပြီး အပြည့်အဝ ဆွေးနွေးသွားမည်ဖြစ်ကြောင်း ထပ်လောင်းပြောကြားခဲ့သည်။

နိုင်ငံတော်သမ္မတ ဦးမင်းအောင်လှိုင်နှင့် ဘီလာရုစ်သမ္မတ အလက်ဇန္ဒား လူကာရှန်ကို တွေ့ဆုံ

နှစ်နိုင်ငံ စီးပွားရေး၊ ရင်းနှီးမြှုပ်နှံမှုနှင့် ကဏ္ဍပေါင်းစုံပူးပေါင်းဆောင်ရွက်မှုများ တိုးမြှင့်ရေး ဆွေးနွေး
နိုင်ငံတော်သမ္မတ ဦးမင်းအောင်လှိုင်၏ ဖိတ်ကြားချက်အရ မြန်မာနိုင်ငံသို့ အလုပ်သဘောချစ်ကြည်ရေးခရီးစဉ် ရောက်ရှိလာသည့် ဘီလာရုစ်နိုင်ငံသမ္မတ မစ္စတာ အလက်ဇန္ဒား လူကာရှန်ကိုနှင့် နိုင်ငံတော်သမ္မတ ဦးမင်းအောင်လှိုင်တို့သည် ဇူလိုင်လ (၂) ရက်နေ့ ညပိုင်းတွင် နိုင်ငံတော်သမ္မတအိမ်တော်၌ တွေ့ဆုံဆွေးနွေးခဲ့ကြပြီး နှစ်နိုင်ငံအကြား စီးပွားရေး၊ ရင်းနှီးမြှုပ်နှံမှု၊ စက်မှု၊ စိုက်ပျိုးရေး၊ ဆေးဝါးထုတ်လုပ်ရေးနှင့် လူသားချင်းစာနာထောက်ထားမှုအပါအဝင် ကဏ္ဍပေါင်းစုံ ပူးပေါင်းဆောင်ရွက်မှုများ ဆက်လက်တိုးမြှင့်ရေးကို အလေးထားဆွေးနွေးခဲ့ကြသည်။
ဘီလာရုစ်နိုင်ငံသမ္မတ မစ္စတာ အလက်ဇန္ဒား လူကာရှန်ကို ဦးဆောင်သည့် ကိုယ်စားလှယ်အဖွဲ့သည် ဇူလိုင် ၂ ရက် ညပိုင်းတွင် အထူးလေယာဉ်ဖြင့် နေပြည်တော်သို့ ရောက်ရှိလာခဲ့ပြီး၊ ရောက်ရှိပြီးနောက် နိုင်ငံတော်သမ္မတအိမ်တော် ဧည့်ခန်းမ၌ နှစ်နိုင်ငံခေါင်းဆောင်များ တွေ့ဆုံခဲ့ခြင်းဖြစ်သည်။
တွေ့ဆုံဆွေးနွေးမှုအတွင်း နိုင်ငံတော်သမ္မတ ဦးမင်းအောင်လှိုင်က ဘီလာရုစ်သမ္မတအနေဖြင့် ရုရှားနိုင်ငံ၊ တရုတ်နိုင်ငံနှင့် အင်ဒိုနီးရှားနိုင်ငံတို့မှတစ်ဆင့် မြန်မာနိုင်ငံသို့ တကူးတက အလုပ်သဘောချစ်ကြည်ရေးခရီးစဉ် လာရောက်ခြင်းသည် မြန်မာနိုင်ငံအပေါ်ထားရှိသည့် အထူးချစ်ကြည်ရင်းနှီးမှုနှင့် လေးစားတန်ဖိုးထားမှုကို ဖော်ပြသည့် ခရီးစဉ်ဖြစ်သဖြင့် လှိုက်လှိုက်လှဲလှဲ ကြိုဆိုဝမ်းမြောက်ကြောင်း ပြောကြားခဲ့သည်။
ထို့ပြင် နှစ်နိုင်ငံခေါင်းဆောင်များအကြားရှိ ချစ်ကြည်ရင်းနှီးမှုကို အခြေခံ၍ နိုင်ငံရေး၊ စီးပွားရေးနှင့် အခြားကဏ္ဍများတွင် ပူးပေါင်းဆောင်ရွက်မှုများကို ယခုထက်ပိုမိုတိုးမြှင့် ဆောင်ရွက်သွားလိုကြောင်း၊ ယခုခရီးစဉ်သည် မြန်မာ-ဘီလာရုစ် နှစ်နိုင်ငံဆက်ဆံရေး ပိုမိုတိုးတက်ခိုင်မာစေရန် အားကောင်းသည့် တွန်းအားတစ်ရပ် ဖြစ်လာမည်ဟု ယုံကြည်ကြောင်း နိုင်ငံတော်သမ္မတက ပြောကြားခဲ့သည်။
ဘီလာရုစ်သမ္မတ မစ္စတာ အလက်ဇန္ဒား လူကာရှန်ကိုကလည်း နှစ်နိုင်ငံအကြားသာမက ခေါင်းဆောင်နှစ်ဦးအကြားတွင်လည်း အပြန်အလှန် ယုံကြည်ချစ်ကြည်ရင်းနှီးသည့် ဆက်ဆံရေးရှိကြောင်း၊ လက်ရှိအခြေအနေသည် မြန်မာ-ဘီလာရုစ် နှစ်နိုင်ငံဆက်ဆံရေးကို ပိုမိုမြင့်မားသည့် အဆင့်သို့ တက်လှမ်းရမည့် အချိန်ကာလဖြစ်ကြောင်း၊ ဒေသတွင်း အခြားနိုင်ငံများအတွက် စံနမူနာဖြစ်စေမည့် နှစ်နိုင်ငံဆက်ဆံရေးကို အတူတကွ တည်ဆောက်သွားရန် လိုအပ်ကြောင်း ပြောကြားခဲ့သည်။
ထို့နောက် နှစ်နိုင်ငံခေါင်းဆောင်များသည် ၂၀၂၆-၂၀၂၈ ခုနှစ်ကာလအတွက် ပူးတွဲဆောင်ရွက်မည့် လုပ်ငန်းစီမံချက်များကို လက်တွေ့အကောင်အထည်ဖော်နိုင်ရေး၊ နှစ်နိုင်ငံအကြား စီးပွားရေးပူးပေါင်းဆောင်ရွက်မှုနှင့် ရင်းနှီးမြှုပ်နှံမှုများ တိုးမြှင့်ရေး၊ စက်မှု၊ စိုက်ပျိုးရေး၊ ဆေးဝါးထုတ်လုပ်ရေး၊ လူသားချင်းစာနာထောက်ထားမှုကဏ္ဍများနှင့် အခြားနယ်ပယ်အသီးသီးတွင် ပူးပေါင်းဆောင်ရွက်မှုများ ချဲ့ထွင်ရေးအပြင် နှစ်နိုင်ငံချစ်ကြည်ရင်းနှီးမှုနှင့် ထိတွေ့ဆက်ဆံမှုများကို ကဏ္ဍပေါင်းစုံတွင် ဆက်လက်မြှင့်တင်ရေးဆိုင်ရာ ကိစ္စရပ်များကို ရင်းရင်းနှီးနှီး ဆွေးနွေးခဲ့ကြသည်။ S

မြန်မာနိုင်ငံတော်သမ္မတ ဦးမင်းအောင်လှိုင်နှင့် ဇနီး လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် စတင်ထွက်ခွာ

နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့ ဦးဆောင်သော မြန်မာချစ်ကြည်ရေးကိုယ်စားလှယ်အဖွဲ့သည် လာအိုနိုင်ငံသမ္မတ မစ္စတာ ထောင်လွန်း ဆီဆုလစ်၏ ဖိတ်ကြားချက်အရ လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ်အဖြစ် ယနေ့ ဇူလိုင် ၃ ရက် နံနက်ပိုင်းတွင် နေပြည်တော်အပြည်ပြည်ဆိုင်ရာလေဆိပ်မှ အထူးလေယာဉ်ဖြင့် ထွက်ခွာသွားခဲ့သည်။
နိုင်ငံတော်သမ္မတနှင့် ဇနီးတို့အား ဦးဆောင်သည့် ကိုယ်စားလှယ်အဖွဲ့ကို အစိုးရအဖွဲ့ တာဝန်ရှိသူများနှင့်ရန်ကုန်မြို့အခြေစိုက် လာအိုသံရုံးမှ တာဝန်ရှိသူများက နေပြည်တော်အပြည်ပြည်ဆိုင်ရာလေဆိပ်၌ ပို့ဆောင်နှုတ်ဆက်ခဲ့ကြသည်။
လာအိုနိုင်ငံခရီးစဉ်အတွင်း နိုင်ငံတော်သမ္မတသည် လာအိုနိုင်ငံသမ္မတနှင့် နှစ်နိုင်ငံခေါင်းဆောင်များတွေ့ဆုံဆွေးနွေးပွဲ ကျင်းပမည်ဖြစ်ပြီး လာအိုနိုင်ငံဝန်ကြီးချုပ်၊ အမျိုးသားလွှတ်တော်ဥက္ကဋ္ဌတို့နှင့်လည်း သီးခြားတွေ့ဆုံဆွေးနွေးသွားမည်ဖြစ်သည်။
ခရီးစဉ်အတွင်း မြန်မာ-လာအို နှစ်နိုင်ငံအကြား ရှိရင်းစွဲချစ်ကြည်ရင်းနှီးမှုကို ပိုမိုခိုင်မာအားကောင်းစေရေး၊ နှစ်နိုင်ငံအစိုးရများနှင့် ပြည်သူများအကြား စီးပွားရေး၊ ကုန်သွယ်ရေး၊ ယဉ်ကျေးမှုနှင့် အခြားကဏ္ဍပေါင်းစုံတွင် ပူးပေါင်းဆောင်ရွက်မှုများ တိုးမြှင့်နိုင်ရေးဆိုင်ရာ ကိစ္စရပ်များကို ဆွေးနွေးသွားမည်ဖြစ်သည်။
အဆိုပါ နိုင်ငံတော်အဆင့် ချစ်ကြည်ရေးခရီးစဉ်တွင် နိုင်ငံတော်သမ္မတနှင့် ဇနီးတို့နှင့်အတူ ပြည်ထောင်စုဝန်ကြီးများနှင့် သက်ဆိုင်ရာ တာဝန်ရှိပုဂ္ဂိုလ်များ လိုက်ပါသွားခဲ့ကြသည်။

ပြည်တွင်းစက်သုံးဆီဈေး (၁၁) ပတ်ဆက်တိုက် ကျဆင်း၊ ဒီဇယ်တစ်လီတာ ကျပ် ၃,၀၀၀ ဝန်းကျင်သို့ ရောက်ရှိ

ပြည်တွင်းစက်သုံးဆီဈေးနှုန်းများသည် သင်္ကြန်ကျော်ကာလမှစတင်၍ (၁၁) ပတ်ဆက်တိုက် ကျဆင်းလာခဲ့ပြီး ယခုတစ်ပတ်တွင် ဓာတ်ဆီ 92 Ron တစ်လီတာလျှင် ၃,၃၆၀ ကျပ်နှင့် ဒီဇယ်တစ်လီတာလျှင် ၃,၀၉၀ ကျပ်အထိ ကျဆင်းလာကြောင်း စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ ထုတ်ပြန်ချက်အရ သိရသည်။
ကော်မတီက ဇူလိုင် ၃ ရက်တွင် ထုတ်ပြန်သည့် ရည်ညွှန်းဈေးနှုန်းများအရ ရန်ကုန်မြို့ရှိ စက်သုံးဆီဈေးနှုန်းများမှာ ဓာတ်ဆီ 92 Ron တစ်လီတာ ၃,၃၆၀ ကျပ်၊ ဓာတ်ဆီ 95 Ron တစ်လီတာ ၃,၄၁၀ ကျပ်၊ ဒီဇယ် (HSD 500 ppm) တစ်လီတာ ၃,၀၉၀ ကျပ်နှင့် ပရီမီယံဒီဇယ် (HSD 50 ppm/10 ppm) တစ်လီတာ ၃,၈၀၀ ကျပ်ဖြစ်ပြီး အဆိုပါရည်ညွှန်းဈေးနှုန်းများကို ဇူလိုင် ၉ ရက်အထိ သတ်မှတ်ထားကြောင်း သိရသည်။
ယခုတစ်ပတ်ဈေးနှုန်းများကို ယခင်တစ်ပတ်နှင့် နှိုင်းယှဉ်ပါက ဓာတ်ဆီ 92 Ron တစ်လီတာလျှင် ၂၅၅ ကျပ်၊ ဓာတ်ဆီ 95 Ron တစ်လီတာလျှင် ၂၈၅ ကျပ်၊ ဒီဇယ်တစ်လီတာလျှင် ၄၄၅ ကျပ်နှင့် ပရီမီယံဒီဇယ်တစ်လီတာလျှင် ၃၉၀ ကျပ်စီ ထပ်မံကျဆင်းလာခဲ့သည်။
ထို့ပြင် ဧပြီ ၂၄ ရက်က ထုတ်ပြန်ခဲ့သည့် ရည်ညွှန်းဈေးနှုန်းများနှင့် နှိုင်းယှဉ်ပါက (၁၁) ပတ်အတွင်း ဓာတ်ဆီ 92 Ron တစ်လီတာလျှင် ၁,၃၇၅ ကျပ်၊ ဓာတ်ဆီ 95 Ron တစ်လီတာလျှင် ၁,၅၃၅ ကျပ်၊ ဒီဇယ်တစ်လီတာလျှင် ၃,၃၉၅ ကျပ်နှင့် ပရီမီယံဒီဇယ်တစ်လီတာလျှင် ၃,၉၅၅ ကျပ်အထိ အသီးသီးကျဆင်းလာခဲ့ကြောင်း သိရသည်။
လက်ရှိ ကမ္ဘာ့ရေနံစိမ်းဈေးနှုန်းမှာ တစ်စည်လျှင် အမေရိကန်ဒေါ်လာ ၆၈ ဝန်းကျင်ရှိနေပြီး ပြည်တွင်းစက်သုံးဆီဈေးနှုန်းများလည်း ဓာတ်ဆီနှင့် ဒီဇယ်အမျိုးအစားများတွင် ဆက်လက်ကျဆင်းလျက်ရှိကြောင်း ဈေးကွက်အတွင်းမှ သိရသည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီသည် စက်သုံးဆီရည်ညွှန်းဈေးနှုန်းများကို MOPS ဈေးနှုန်းအပေါ် အခြေခံ၍ နေ့စဉ်တွက်ချက်ထုတ်ပြန်လျက်ရှိပြီး သတ်မှတ်ရည်ညွှန်းဈေးထက် ပိုမိုရောင်းချခြင်း သို့မဟုတ် ဈေးနှုန်းမမှန်ကန်ခြင်းများ တွေ့ရှိပါက ကော်မတီ၏ တိုင်ကြားရေးဖုန်းနံပါတ်များဖြစ်သည့် ၀၁-၄၀၀၃၉၇၃ နှင့် ၀၉-၂၅၄၅၂၅၄၇၇ သို့ ဆက်သွယ်တိုင်ကြားနိုင်ကြောင်း အသိပေးထားသည်။

မန္တလေး-တံတားဦး လမ်းပိုင်းတွင် RBE ရထားခရီးစဉ်သစ် စတင်ပြေးဆွဲ၊ နေ့စဉ် အစုန်အဆန် (၂) ကြိမ် ပြေးဆွဲမည်

မြန်မာ့မီးရထားသည် မန္တလေး-တံတားဦး လမ်းပိုင်း၌ RBE ရထားခရီးစဉ်သစ်ကို ဇူလိုင် ၁ ရက်မှစတင်၍ နေ့စဉ် အစုန်အဆန် (၂) ကြိမ် ပြေးဆွဲပေးလျက်ရှိကြောင်း သိရသည်။
အဆိုပါ RBE ရထားသည် မန္တလေးဘူတာကြီးမှ နံနက် ၅ နာရီတွင် ပထမအကြိမ် စတင်ထွက်ခွာမည်ဖြစ်ပြီး တံတားဦးဘူတာသို့ နံနက် ၆ နာရီခွဲတွင် ရောက်ရှိမည်ဖြစ်သည်။ ထို့နောက် နံနက် ၇ နာရီ ၁၅ မိနစ်တွင် တံတားဦးဘူတာမှ ပြန်လည်ထွက်ခွာကာ မန္တလေးဘူတာကြီးသို့ နံနက် ၈ နာရီ ၄၅ မိနစ်တွင် ဆိုက်ရောက်မည်ဖြစ်သည်။
ဒုတိယအကြိမ်ခရီးစဉ်ကို ညနေ ၅ နာရီခွဲတွင် မန္တလေးဘူတာကြီးမှ ထွက်ခွာမည်ဖြစ်ပြီး တံတားဦးဘူတာသို့ ည ၇ နာရီတွင် ရောက်ရှိမည်ဖြစ်သည်။ ယင်းမှတစ်ဆင့် ည ၇ နာရီ ၁၅ မိနစ်တွင် ပြန်လည်ထွက်ခွာကာ မန္တလေးဘူတာကြီးသို့ ည ၈ နာရီ ၄၅ မိနစ်တွင် ဆိုက်ရောက်မည်ဖြစ်ကြောင်း သိရသည်။
ခရီးစဉ်အတွင်း မန္တလေးနှင့် တံတားဦးကြားရှိ ဘူတာ (၄) ခုတွင် ရပ်နားပေးမည်ဖြစ်ပြီး ဘူတာတစ်ခုလျှင် ၂ မိနစ်သာ ရပ်နားမည်ဖြစ်သည်။ ခရီးစဉ်အစအဆုံး ကြာမြင့်ချိန်မှာ တစ်နာရီခွဲခန့်ရှိပြီး လက်မှတ်ခကို တစ်ဦးလျှင် ကျပ် ၁,၅၀၀ သတ်မှတ်ထားကြောင်း သိရသည်။
မန္တလေးမြို့ခံတစ်ဦးက “ဒုဌဝတီတံတား ပြန်လည်တည်ဆောက်နေတဲ့ကာလအတွင်း ရထားပြေးဆွဲပေးတာကြောင့် မန္တလေးကို သွားလာရတဲ့ အလုပ်သမားတွေအတွက် သယ်ယူပို့ဆောင်ရေးစရိတ် သက်သာစေပါတယ်” ဟု ပြောကြားသည်။

မြန်မာနိုင်ငံတော်သမ္မတ ဦးမင်းအောင်လှိုင်နှင့် ဇနီးတို့အား လာအိုနိုင်ငံ၌ ဂုဏ်ပြုတပ်ဖွဲ့ဖြင့် ကြိုဆို

လာအိုနိုင်ငံသမ္မတ မစ္စတာ သောင်လွန် ဆီဆိုလစ်၏ ဖိတ်ကြားချက်အရ လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိလာသည့် နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့အား ဝပ်တိုင်းအပြည်ပြည်ဆိုင်ရာလေဆိပ်၌ လာအိုနိုင်ငံ တာဝန်ရှိသူများက ဂုဏ်ပြုတပ်ဖွဲ့ဖြင့် ကြိုဆိုဂုဏ်ပြုခဲ့ကြသည်။
နိုင်ငံတော်သမ္မတနှင့် ဇနီးတို့ ဦးဆောင်သော အဆင့်မြင့်ကိုယ်စားလှယ်အဖွဲ့ စီးနင်းလိုက်ပါလာသည့် အထူးလေယာဉ်သည် ဗီယင်ကျန်းမြို့ရှိ ဝပ်တိုင်းအပြည်ပြည်ဆိုင်ရာလေဆိပ်သို့ နံနက်ပိုင်းတွင် ရောက်ရှိလာရာ လာအိုနိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး၊ အဆင့်မြင့်အရာရှိကြီးများ၊ လာအိုနိုင်ငံဆိုင်ရာ မြန်မာသံအမတ်ကြီးနှင့် သံရုံးတာဝန်ရှိသူများက ကော်ဇောနီခင်း၍ ကြိုဆိုနှုတ်ဆက်ခဲ့ကြသည်။
ထို့ပြင် နိုင်ငံတော်အဆင့် ချစ်ကြည်ရေးခရီးစဉ်ဖြင့် လာရောက်သည့် နိုင်ငံ့ခေါင်းဆောင်များအား ကြိုဆိုသည့် အစဉ်အလာနှင့်အညီ လာအိုနိုင်ငံ၏ ဂုဏ်ပြုတပ်ဖွဲ့က အလေးပြုဂုဏ်ပြုကြိုဆိုခဲ့သည်။
ဝပ်တိုင်းအပြည်ပြည်ဆိုင်ရာလေဆိပ်တွင် နိုင်ငံတော်သမ္မတနှင့် ဇနီးတို့အား ကြိုဆိုသည့် ဆိုင်းဘုတ်များ စိုက်ထူထားပြီး မြန်မာ-လာအို နှစ်နိုင်ငံအလံများကို လွှင့်ထူထားကာ လမ်းတစ်လျှောက်တွင်လည်း လာအိုလူငယ်များက လှိုက်လှဲစွာ နှုတ်ဆက်ကြိုဆိုခဲ့ကြကြောင်း သိရသည်။

ပြည်ပရောက် မြန်မာလုပ်သား ၆ သန်းကျော် ဥပဒေအရ အကာအကွယ်ရရှိရေး ဝန်ကြီးဌာနများ ပူးပေါင်းညှိနှိုင်းရန်လိုအပ်ဟု ပြည်သူ့လွှတ်တော်ဥက္ကဋ္ဌ ပြော

ပြည်ပနိုင်ငံများတွင် သွားရောက်အလုပ်လုပ်ကိုင်နေသည့် မြန်မာလုပ်သား ၆ သန်းကျော်အတွက် ဥပဒေကြောင်းအရ ထိရောက်သည့် အကာအကွယ်များ ရရှိစေရေးအတွက် သက်ဆိုင်ရာဝန်ကြီးဌာနများ အကြား ပူးပေါင်းတွေ့ဆုံညှိနှိုင်းကာ မူဝါဒများ ချမှတ်ဆောင်ရွက်ရန် လိုအပ်ကြောင်း ပြည်သူ့လွှတ်တော်ဥက္ကဋ္ဌ ဦးခင်ရီက ပြောကြားသည်။
ပြည်တွင်း/ပြည်ပ အလုပ်သမားဆိုင်ရာကော်မတီနှင့် ယမန်နေ့က တွေ့ဆုံစဉ် ၎င်းက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
ဦးခင်ရီက ၂၀၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းအရ မြန်မာနိုင်ငံ၏ လူဦးရေ ၅၁ သန်းကျော်အနက် ခန့်မှန်းခြေ ၆ သန်းကျော်မှာ ပြည်ပနိုင်ငံများသို့ သွားရောက်အလုပ်လုပ်ကိုင်လျက်ရှိကြောင်း ပြောကြားပြီး အဆိုပါလုပ်သားများ၏ အခွင့်အရေးနှင့် ဥပဒေအရ အကာအကွယ်များကို ပိုမိုထိရောက်စွာ ရရှိစေရန် အလုပ်သမားဝန်ကြီးဌာန၊ နိုင်ငံခြားရေးဝန်ကြီးဌာနနှင့် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတို့ အပါအဝင် သက်ဆိုင်ရာဝန်ကြီးဌာနများ အခါအားလျော်စွာ တွေ့ဆုံဆွေးနွေး၍ ပူးပေါင်းမူဝါဒများ ချမှတ်ဆောင်ရွက်သင့်ကြောင်း ပြောကြားသည်။
ထို့ပြင် ဇွန် ၃၀ ရက်က ကျင်းပခဲ့သည့် နိုင်ငံတော်သမ္မတရုံး သတင်းစာရှင်းလင်းပွဲတွင် နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုးက ထိုင်းနိုင်ငံ၊ မလေးရှားနိုင်ငံ အပါအဝင် ပြည်ပနိုင်ငံများတွင် သွားရောက်လုပ်ကိုင်နေသည့် အထောက်အထားမဲ့ မြန်မာလုပ်သားများကို တရားဝင်အထောက်အထားများ ရရှိစေရန် နိုင်ငံတော်အစိုးရအနေဖြင့် ပြည်ပနိုင်ငံများသို့ သွားရောက်ကာ CI (Certificate of Identity) များ ထုတ်ပေးလျက်ရှိကြောင်း ပြောကြားထားသည်။
ထို့အပြင် ပြည်ပအလုပ်သမားများ တရားဝင်အလုပ်လုပ်ကိုင်နိုင်ရေးအတွက် သက်ဆိုင်ရာနိုင်ငံများနှင့် နှစ်နိုင်ငံသဘောတူညီချက် (MoU) များအရ ပူးပေါင်းဆောင်ရွက်မှုများကိုလည်း ဆက်လက်အကောင်အထည်ဖော်လျက်ရှိကြောင်း သိရသည်။

မြန်မာနိုင်ငံတော်သမ္မတ ဦးမင်းအောင်လှိုင်နှင့် ဇနီးတို့ လာအိုနိုင်ငံရှိ အညတရသူရဲကောင်းစစ်သည်များ၏ အထိမ်းအမှတ်ဗိမာန်တွင် ဂုဏ်ပြုပန်းခွေချ အလေးပြု

လာအိုနိုင်ငံသမ္မတ မစ္စတာ သောင်လွန် ဆီဆိုလစ်၏ ဖိတ်ကြားချက်အရ လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့သည် ယနေ့ ဇူလိုင် ၃ ရက် နံနက်ပိုင်းတွင် ဗီယင်ကျန်းမြို့ရှိ အညတရသူရဲကောင်းစစ်သည်များ၏ အထိမ်းအမှတ်ဗိမာန် (Unknown Soldiers Monument) သို့ သွားရောက်၍ ဂုဏ်ပြုပန်းခွေချ အလေးပြုခဲ့ကြသည်။
အဆိုပါ အထိမ်းအမှတ်ဗိမာန်သည် လာအိုနိုင်ငံ၏ လွတ်လပ်ရေး၊ အမျိုးသားလွတ်မြောက်ရေးနှင့် နိုင်ငံတည်ဆောက်ရေး လုပ်ငန်းစဉ်များတွင် အသက်ပေးစွန့်လွှတ်ခဲ့ကြသည့် အညတရသူရဲကောင်းစစ်သည်များအား ဂုဏ်ပြုအမှတ်တရ တည်ဆောက်ထားသည့် အမျိုးသားအထိမ်းအမှတ်နေရာဖြစ်ပြီး နိုင်ငံတော်အဆင့် ဧည့်သည်တော်များ လာရောက်သည့်အခါ ဂုဏ်ပြုပန်းခွေချ အလေးပြုလေ့ရှိသည့် သမိုင်းဝင်နေရာတစ်ခုလည်း ဖြစ်သည်။
နိုင်ငံတော်သမ္မတနှင့် ဇနီးတို့သည် အထိမ်းအမှတ်ဗိမာန်၌ ဂုဏ်ပြုပန်းခွေချကာ နိုင်ငံအတွက် အသက်ပေးစွန့်လွှတ်ခဲ့ကြသည့် အညတရသူရဲကောင်းစစ်သည်များအား ဂုဏ်ပြုအလေးပြုခဲ့ကြကြောင်း သိရသည်။

လာအိုနိုင်ငံသမ္မတအိမ်တော်၌ မြန်မာနိုင်ငံတော်သမ္မတ ဦးမင်းအောင်လှိုင်အား နိုင်ငံတော်အဆင့် ဂုဏ်ပြုအခမ်းအနားဖြင့် ကြိုဆို

လာအိုနိုင်ငံသမ္မတ မစ္စတာ သောင်လွန် ဆီဆိုလစ်၏ ဖိတ်ကြားချက်အရ နိုင်ငံတော်အဆင့် ချစ်ကြည်ရေးခရီးစဉ်ဖြင့် လာအိုနိုင်ငံသို့ ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့အား ယနေ့ ဇူလိုင် ၃ ရက် နံနက်ပိုင်းတွင် လာအိုနိုင်ငံသမ္မတ မစ္စတာ သောင်လွန် ဆီဆိုလစ်နှင့် ဇနီးတို့က လာအိုနိုင်ငံသမ္မတအိမ်တော် (Presidential Palace) ၌ နိုင်ငံတော်အဆင့် ဂုဏ်ပြုအခမ်းအနားဖြင့် ကြိုဆိုခဲ့ကြသည်။
လာအိုနိုင်ငံသမ္မတအိမ်တော်သည် ဗီယင်ကျန်းမြို့လယ်တွင် တည်ရှိသည့် လာအိုနိုင်ငံ၏ အရေးပါဆုံး နိုင်ငံတော်အဆင့် ဧည့်ခံအဆောက်အအုံများအနက် တစ်ခုဖြစ်ပြီး နိုင်ငံတော်အကြီးအကဲများ၊ တော်ဝင်ဧည့်သည်တော်များနှင့် နိုင်ငံခြားခေါင်းဆောင်များအား တရားဝင်ကြိုဆိုဧည့်ခံရာ နေရာအဖြစ် အသုံးပြုလျက်ရှိသည်။ အဆောက်အအုံသည် ပြင်သစ်ကိုလိုနီခေတ် ဗိသုကာလက်ရာနှင့် လာအိုရိုးရာအနုပညာလက်ရာများ ပေါင်းစပ်တည်ဆောက်ထားသည့် အထင်ကရ နိုင်ငံတော်အမွေအနှစ် အဆောက်အအုံတစ်ခုလည်း ဖြစ်သည်။
အခမ်းအနားတွင် နိုင်ငံတော်သမ္မတ ဦးမင်းအောင်လှိုင်နှင့် ဇနီးတို့အား လာအိုနိုင်ငံသမ္မတနှင့် ဇနီးတို့က ခရီးဦးကြိုဆိုခဲ့ပြီး လာအိုကလေးငယ် (၂) ဦးက ပန်းစည်းများပေးအပ်၍ လှိုက်လှဲစွာ ကြိုဆိုခဲ့ကြသည်။
ထို့နောက် နှစ်နိုင်ငံသမ္မတများသည် အလေးပြုခံစင်မြင့်၌ နေရာယူခဲ့ကြပြီး လာအိုနိုင်ငံ ဂုဏ်ပြုတပ်ဖွဲ့က မြန်မာနှင့် လာအိုနိုင်ငံတော်သီချင်းများကို တီးခတ်ဂုဏ်ပြုခဲ့သည်။ ယင်းနောက် နှစ်နိုင်ငံသမ္မတများသည် ဂုဏ်ပြုတပ်ဖွဲ့၏ အလေးပြုခြင်းကို ခံယူကာ တပ်ဖွဲ့အား စစ်ဆေးခဲ့ပြီး နှစ်ဖက်ကိုယ်စားလှယ်အဖွဲ့ဝင်များကို အပြန်အလှန် မိတ်ဆက်ပေးခဲ့ကြကြောင်း သိရသည်။