ကော့သောင်းလေဆိပ် လေယာဉ်ပြေးလမ်းတိုးချဲ့ခြင်းနှင့် အဆောက်အဦတည်ဆောက်ခြင်းလုပ်ငန်းများ ဝန်ကြီးချုပ် ကြည့်ရှုစစ်ဆေး

ကော့သောင်း၊ နိုဝင်ဘာ ၅

တနင်္သာရီတိုင်းဒေသကြီး ဝန်ကြီးချုပ် ဦးဇော်နိုင်ဦးသည် တိုင်းဒေသကြီးအစိုးရအဖွဲဝင် ဝန်ကြီးများ၊ ဌာနဆိုင်ရာတာဝန်ရှိသူများနှင့်အတူ ယနေ့မွန်းလွဲပိုင်းက လေကြောင်းပိုဆောင်ရေးညွှန်ကြားမှုဦးစီးဌာန၏ ၂၀၂၆-၂၀၂၇ ဘဏ္ဍာရေးနှစ်အတွင်း ကော့သောင်းလေဆိပ်၌ ဆောင်ရွက်လျက်ရှိသည့် တည်ဆောက်ရေးလုပ်ငန်းများ၏ အခြေအနေကို သွားရောက်ကြည့်ရှုခဲ့သည်။

ဦးစွာ လေဆိပ်ခန်းမဆောင်တွင် ကော့သောင်းလေဆိပ် လေယာဉ်ရပ်နားရာနေရာ (၉၀၀ x ၂၅၀) ပေအား နိုင်လွန်ကတ္တရာရေပိတ်လွှာခင်းခြင်းလုပ်ငန်း၊ ကုန်စည်အဆောက်အဦ (Cargo) (၁၂၀ x ၆၀) ပေ တည်ဆောက်ခြင်းနှင့် ဆက်စပ်လုပ်ငန်းများ၊ လေယာဉ်ပြေးလမ်း (၆၀၀၀ x ၁၅၀) ပေအား နိုင်လွန်ကတ္တရာထပ်ပိုးလွှာတင်ခြင်းလုပ်ငန်းတိုကို ရှင်းလင်းတင်ပြခဲ့သည်။

ထိုပြင် လေယာဉ်ပြေးလမ်းမြောက်ဘက်သို (၂၀၀၀ x ၁၅၀) ပေ တိုးချဲ့ခြင်း၊ မြေကြီးလုပ်ငန်း ပေ ၂၀၀ ဆောင်ရွက်ခြင်း၊ အောက်ခံကျောက်လွှာ (၆၀၀ x ၁၅၀) ပေ ခင်းခြင်း၊ ၄ လက်မထု နိုင်လွန်ကတ္တရာ (၆၀၀ x ၁၅၀) ပေ ထပ်ပိုးလွှာခင်းခြင်း၊ Box Culvert ပေ ၂၀၀ တစ်ခုနှင့် မြေထိန်းနံရံ ပေ ၁၂၀၀ ဆောင်ရွက်ခြင်းလုပ်ငန်းများကိုလည်း ရှင်းလင်းတင်ပြခဲ့သည်။

M ပုံသဏ္ဍာန်ဖြင့် ခရစ္စတီယာနိုရော်နယ်ဒို အောင်ပွဲခံမှုရဲ့ နောက်ကွယ်မှု လျို့ဝှက်ချက်

နိုဝင်ဘာ ၅

ခရစ္စတီယာနိုရော်နယ်ဒိုဟာ နောက်ပိုင်း ရက်သတ္တပတ်တွင် ဂိုးသွင်းအောင်ပွဲခံမှုအသစ်အဖြစ် လက်ချောင်းများဖြင့် M ပုံသဏ္ဍာန်ဖန်တီးကာ အောင်ပွဲခံလာပါတယ်။

ခရစ္စတီယာနိုရော်နယ်ဒိုဟာ Al-Nassr က Al-Khoood အား ၅-၃ ဖြင့် အနိုင်ရတဲ့ပွဲမှာ ဟက်ထရစ်သွင်းယူပြီးနောက် ကစားသမားဘဝ သွင်းဂိုး ၉၈၅ ဂိုး ရှိလာပြီ ဖြစ်ပြီး ဂိုးတစ်ထောင်ပြည့်ရန် ၁၅ ဂိုးတည်းသာလိုတော့ပြီ ဖြစ်ပါတယ်။

ယခင်တုန်းက ဂိုးတစ်ထောင်ကျော်သွင်းနိုင်တဲ့ ကစားသမားအဖြစ် ဘရာဇီးဂန္ထဝင်ပီလီက ၁၉၅၆ ခုနှစ်မှ ၁၉၇၇ ခုနှစ်အတွင်း ဂိုး ၁၂၇၉ ဂိုးသွင်းယူခဲ့ပါတယ်။

ဒါပေမယ့် ပီလီရဲ့ သွင်းဂိုးများတွင် ပရော်ဖက်ရှင်နယ်ပြိုင်ပွဲ သွင်းဂိုးအပြင် အပျော်တမ်းခြေစမ်းပွဲစဉ်များမှ သွင်းဂိုးကိုလည်း ထည့်သွင်းထားတာပါ။

ဂိုးတစ်ထောင်ပြည့်သွင်းရေး ကြိုးပမ်းနေတဲ့ ခရစ္စတီယာနိုရော်နယ်ဒိုဟာ ပုံမှန်အားဖြင့် SIUUU ဖြင့် အောင်ပွဲခံလာခဲ့သူပါ။

ဒါပေမယ့် သူဟာ နောက်ပိုင်းပွဲစဉ်များတွင် လက်ချောင်းများဖြင့် M ပုံသဏ္ၒာဖန်တီးကာ အောင်ပွဲခံမှုအသစ်ဖြင့် အောင်ပွဲခံလာပါတယ်။

ပရိသတ်များဟာ ခရစ္စတီယာနိုရော်နယ်ဒိုရဲ့ အောင်ပွဲခံမှုအသစ်နှင့်ပတ်သက်ပြီး မသိနားမလည်နိုင်အောင်လည်း ဖြစ်နေကြပါတယ်။

ယခုအခါမှာတော့ ယင်းလျို့ဝှက်ချက်ကို ဖော်ထုတ်လိုက်နိုင်ပြီ ဖြစ်ပါတယ်။

M က ရောမအက္ခရာတွင် ၁၀၀၀ တွင် ဂဏန်းဖြစ်ပါတယ်။

ဒါကြောင့်လည်း ခရစ္စတီယာနိုရော်နယ်ဒိုဟာ ဂိုးတစ်ထောင်ပြည့်သွင်းလာနိုင်တော့မယ့်အပေါ် ရင်ခုန်စွာဖြင့် M ပုံသဏ္ဍာန်ပြုလုပ်ပြီး အောင်ပွဲခံလာတာလည်း ဖြစ်ပါတယ်။

ဖော်မြူလာဝမ်းအသင်းကို ပေါင် ၂ ဘီလီယံဖြင့် ဝယ်ယူရန် လီဗာပူးပိုင်ရှင်ဆွေးနွေးနေ

နိုဝင်ဘာ ၅

လီဗာပူးပိုင်ရှင် Fenway Sports Group ဟာ Cadillac Formula One ရဲ့ အဓိကရှယ်ယာများကို ဝယ်ယူထိန်းချုပ်ရန် ဆွေးနွေးနေပါတယ်။

Cadillac Formula One ရဲ့ ပူးတွဲပိုင်ရှင်မတ်ဝေါလ်တားဟာ အာမခံငွေလိမ်လည်မှုနှင့်ပတ်သက်ပြီး စုံစမ်းစစ်ဆေးမှုများ ခံရပြီးနောက် ၎င်းပိုင် အားကစားအသင်းများကို ရောင်းချနေတာ ဖြစ်ပြီး Fenway Sports Group က သူပိုင်ရှယ်ယာများကို ပေါင် ၂ ဘီလီယံကျော်ဖြင့် ဝယ်ယူရန် ဆွေးနွေးနေတာပါ။

လက်ရှိအချိန်တွင် အသက် ၆၆ နှစ်ရှိ ဝေါလ်တားက သူပိုင် အာမခံကုမ္ပဏီများထံ ငွေကြေးစီးဆင်းစေမှုနှင့်ပတ်သက်ပြီး စုံစမ်းစစ်ဆေးခြင်းခံနေရပေမယ့်လည်း ငြင်းဆိုထားပါတယ်။

ဝေါလ်တားဟာ အာဆင်နယ်ပိုင်ရှင်စတန်ခရွန်ယက်ကီကဲ့သို့ အားကစားအသင်းများစွာ ပိုင်ဆိုင်သူ ဖြစ်ပါတယ်။

သူဟာ မေဂျာလိဂ်ဘော့စဘောအသင်း Los Angeles Dodgers ကိုလည်း ထိန်းချုပ်ထားသူ ဖြစ်ပြီး ဖိအားများအောက် ကျရောက်နေပေမယ့်လည်း ရောင်းချမှာ မဟုတ်ဘူးလို့ ဆိုထားပါတယ်။

ယနေ့တွင် The Guardian ရဲ့ ဖော်ပြလာမှုအရ FSG ဟာ နွေရာသီတုန်းက လီဗာပူးရဲ့ ရှယ်ယာ ၃၈ ရာခိုင်နှုန်းအား Amazon တည်ထောင်သူဂျော့ဖ်ဘီဇော့စ်ပါဝင်တဲ့ ရင်းနှီးမြှပ်နှံရေးအဖွဲ့ထံ ရောင်းချလိုက်ပြီးနောက် အခြားအားကစားများတွင် ရင်းနှီးမြှပ်နှံရန် လုပ်ဆောင်လာပါတယ်။

Cadillac ဟာ ၂၀၁၀ ခုနှစ်တုန်းက တန်ဖိုး ပေါင်သန်း ၃၀၀ ကျော်သာ ရှိပေမယ့်လည်း လက်ရှိအချိန်တွင် တန်ဖိုး ပေါင် ၅.၅ ဘီလီယံရှိတဲအသင်းပါ။

FSG ဟာ ပြီးခဲ့တဲ့ဆယ်စုနှစ်တစ်ခုအတွင်း တိုးတက်မှုများစွာ ရှိလာတဲ့ ဖော်မြူလာဝမ်းလောကတွင် ရင်းနှီးမြှပ်နှံရန် စိတ်အားထက်သန်နေပါတယ်။

တဖက်တွင် FSG ဟာ အားကစားရုပ်သံလွှင့်ခမှ ဝင်ငွေအပါအဝင် ပြီးခဲ့တဲ့ ကိုးနှစ်အတွင်းတွင် ဝင်ငွေနှစ်ဆတိုးပြီး ပေါင် ၃ ဘီလီယံအထိ တိုးမြင့်လာပြီးနောက် ဝင်ငွေတိုးပွားနိုင်မယ့်လမ်းကြောင်း ရှာနေပါတယ်။

ဥရောပရဲ့ လုပ်ခအများဆုံးရ ကစားသမားဖြစ်လာတဲ့ ဟယ်ရီကိန်း

နိုဝင်ဘာ ၅

ဟယ်ရီကိန်းဟာ Ballon d'Or ဆွတ်ခူးပြီး တစ်ပတ်ကျော်မျှ အကြာမှာ ဥရောပရဲ့ လုပ်ခအများဆုံးရ ကစားသမားဖြစ်လာပါတယ်။

အသက် ၃၃ နှစ်ရှိ အင်္ဂလန်အသင်းခေါင်းဆောင်နှင့် ဘိုင်ယန်မြူးနစ်တိုက်စစ်မှူးဟာ ပြီးခဲ့တဲ့အပတ် တနင်္လာနေ့တုန်းက ကိုင်လီယန်ဘက်ပေးနှင့် လာမိန်းယာမဲလ်တို့အား ကျော်ဖြတ်ကာ ကမ္ဘာ့အကောင်းဆုံးကစားသမားဆုကို ဆွတ်ခူးခဲ့တာလည်း ဖြစ်ပါတယ်။

သူဟာ ကလပ်နှင့် နိုင်ငံအတွက် ၇၃ ဂိုးသွင်းယူနိုင်ပြီးနောက် ဘောလုံးလောကရဲ့ အကြီးကျယ်ဆုံးတကိုယ်တော်ဆုကို ရရှိလာတာပါ။

သူဟာ ကလပ်အတွက် ၆၁ ဂိုးသွင်းပြီး ပြည်တွင်းဖလား ၃ လုံး ဆွတ်ခူးနိုင်အောင် ကူညီပြီးနောက် ယခုအခါ လုပ်ခများစွာ တိုးမြှင့်ပြီး ၂၀၂၉ ခုနှစ်အထိ စာချုပ်သစ်ချုပ်ဆိုခြင်းခံလာရပြီ ဖြစ်ပါတယ်။

ဟယ်ရီကိန်းဟာ စာချုပ်သစ်ကြောင့် တစ်ပတ်လုပ်ခ ပေါင် ၄၀၁၁၁၅ အထိ ရရှိလာမှာ ဖြစ်ပြီး တစ်နှစ်လုပ်ခ ပေါင် ၂၀.၈၅၈ သန်း ရရှိလာပါမယ်။

သူဟာ အပိုဆုကြေးမပါဝင်ဘဲ ယင်းပမာဏအထိ ရရှိလာမှုနှင့်အတူ မန်စီးတီးတိုက်စစ်မှူးအာလင်းဟာလန်းကို ကျော်ဖြတ်ပြီး ဥရောပရဲ့ လုပ်ခအများဆုံးရ ကစားသမားဖြစ်လာပါတယ်။

နော်ဝေတိုက်စစ်မှူးက အပိုဆုကြေးအပါအဝင် တစ်ပတ်လုပ်ခ ပေါင် ၅၂၅၀၀၀ ရရှိနေတာပါ။ ရီးရဲလ်မက်ဒရစ်စူပါစတားကိုင်လီယန်ဘက်ပေးကလည်း တစ်ပတ်လုပ်ခ ပေါင် ၅၁၈၀၀၀ ရရှိနေပေမယ့် ယင်းအထဲမှာ အပိုဆုကြေးလည်း ပါဝင်ပါတယ်။

ဟယ်ရီကိန်းဟာ ဥရောပရဲ့ လုပ်ခအများဆုံးရ ကစားသမားဖြစ်လာပြီးနောက် ပထမဆုံးပွဲ ဖြစ်တဲ့ စနေနေ့ မက်ဇ်နှင့်အဝေးကွင်းပွဲစဉ်တွင် ဂိုးပေါက်တွေ့ရေး ကြိုးပမ်းလာရပါမယ်။

သတ်မှတ်ပမာဏထက် အစားအသောက်ထပ်ဖြည့်ပစ္စည်းများ ကျော်လွန်ပါဝင်သည့် Quick အချိုရည်နှင့် Ace သီးစုံချဉ်ပေါင်းတို့ကို ဈေးကွက်မှ ပြန်လည်ရုပ်သိမ်းရန် FDA ညွှန်ကြား

နိုဝင်ဘာ ၄

Quick အမှတ်တံဆိပ် သခွားမွှေးသီးအရသာနှင့် လိုင်ချီးသီးအရသာ အချိုရည်ဗူးများ၊ Ace အမှတ်တံဆိပ် သီးစုံချဉ်ပေါင်းတို့တွင် အစားအသောက်ထပ်ဖြည့်ပစ္စည်းများ သတ်မှတ်ပမာဏထက် ကျော်လွန်ပါဝင်နေကြောင်း စစ်ဆေးတွေ့ရှိရသဖြင့် ဈေးကွက်အတွင်းမှ ပြန်လည်ရုပ်သိမ်းရန် ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) က ထုတ်ပြန်ညွှန်ကြားထားသည်။

FDA ၏ စစ်ဆေးတွေ့ရှိချက်အရ ရန်ကုန်တိုင်းဒေသကြီး၊ သာကေတမြို့နယ်ရှိ Essential (Foodstuff) Co., Ltd က ထုတ်လုပ်သည့် Quick အမှတ်တံဆိပ် သခွားမွှေးသီးအရသာနှင့် လိုင်ချီးသီးအရသာ အချိုရည်ဗူးများတွင် အစားအသောက်ထပ်ဖြည့်ပစ္စည်း Sodium Cyclamate နှင့် Benzoic acid တို့ သတ်မှတ်ပမာဏထက် ကျော်လွန်ပါဝင်နေကြောင်း သိရသည်။

စစ်ဆေးချက်တွင် အချိုရည်၌ Sodium Cyclamate ပါဝင်မှုမှာ ၁,၄၈၈.၂၄ မီလီဂရမ်/ကီလိုဂရမ်နှင့် ၁,၄၈၇.၄၉ မီလီဂရမ်/ကီလိုဂရမ် အသီးသီးရှိပြီး သတ်မှတ်ပမာဏ ၃၅၀ မီလီဂရမ်/ကီလိုဂရမ်ထက် ကျော်လွန်နေကြောင်း ဖော်ပြထားသည်။ ထို့ပြင် Benzoic acid ပါဝင်မှုမှာ ၃၅၂.၅၁ မီလီဂရမ်/ကီလိုဂရမ်ရှိပြီး သတ်မှတ်ပမာဏ ၂၅၀ မီလီဂရမ်/ကီလိုဂရမ်ထက် ကျော်လွန်နေကြောင်း သိရသည်။

အလားတူ ရှမ်းပြည်နယ်တောင်ပိုင်း၊ ကလောမြို့မှ Ace အမှတ်တံဆိပ် သီးစုံချဉ်ပေါင်းတွင်လည်း Benzoic acid ပါဝင်မှု ၁,၄၅၈.၂၀ မီလီဂရမ်/ကီလိုဂရမ်နှင့် Sodium Cyclamate ပါဝင်မှု ၄,၆၀၇.၅၄ မီလီဂရမ်/ကီလိုဂရမ်ရှိကြောင်း စစ်ဆေးတွေ့ရှိခဲ့သည်။

ယင်းပမာဏများသည် သတ်မှတ်ထားသည့် Benzoic acid ၁,၀၀၀ မီလီဂရမ်/ကီလိုဂရမ်နှင့် Sodium Cyclamate ၁,၀၀၀ မီလီဂရမ်/ကီလိုဂရမ်တို့ထက် ကျော်လွန်နေသဖြင့် အဆိုပါထုတ်ကုန်များကို ဈေးကွက်အတွင်းမှ ပြန်လည်ရုပ်သိမ်းရန် FDA က ညွှန်ကြားထားခြင်းဖြစ်သည်။

ချင်းမိုင်ရှိ စားသောက်ဆိုင်တစ်ဆိုင်တွင် အလုပ်လုပ်နေသည့် မြန်မာလုပ်သား ၂ ဦးကို ထိုင်းအာဏာပိုင်များ အရေးယူ


နိုဝင်ဘာ ၅

ထိုင်းနိုင်ငံ၊ ချင်းမိုင်မြို့ရှိ စားသောက်ဆိုင်တစ်ဆိုင်တွင် အလုပ်လုပ်ကိုင်နေသည့် မြန်မာနိုင်ငံသား ၂ ဦးကို အလုပ်လုပ်ကိုင်ခွင့်ဆိုင်ရာ စည်းမျဉ်းများ ချိုးဖောက်မှုဖြင့် ထိုင်းအာဏာပိုင်များက နိုဝင်ဘာ ၄ ရက်တွင် အရေးယူခဲ့ကြောင်း ချင်းမိုင်ခရိုင် လူဝင်မှုကြီးကြပ်ရေးဌာန၏ ထုတ်ပြန်ချက်အရ သိရသည်။

အဆိုပါနေ့တွင် ချင်းမိုင်ခရိုင် လူဝင်မှုကြီးကြပ်ရေးဌာနမှ စုံစမ်းစစ်ဆေးရေးအရာရှိများနှင့် အလုပ်အကိုင်ရှာဖွေရေးရုံး တာဝန်ရှိသူများသည် စုထေ့မြို့နယ်အတွင်းရှိ လုပ်ငန်းခွင်များကို ဝင်ရောက်စစ်ဆေးခဲ့ရာ စားသောက်ဆိုင်တစ်ဆိုင်တွင် အလုပ်လုပ်ကိုင်နေသည့် မြန်မာနိုင်ငံသား ၂ ဦးကို တွေ့ရှိခဲ့ခြင်းဖြစ်သည်။

စစ်ဆေးတွေ့ရှိချက်အရ မြန်မာလုပ်သားတစ်ဦးမှာ ခွင့်ပြုထားသည့် အလုပ်အကိုင်အမျိုးအစားထက် ကျော်လွန်လုပ်ကိုင်နေခြင်းဖြစ်ပြီး ကျန်တစ်ဦးမှာ အလုပ်လုပ်ကိုင်ခွင့်ကတ်ရှိသော်လည်း အလုပ်စတင်လုပ်ကိုင်သည့်နေ့မှ ၁၅ ရက်အတွင်း သက်ဆိုင်ရာ မှတ်ပုံတင်အရာရှိထံ အကြောင်းကြားရန် ပျက်ကွက်ခဲ့ခြင်းဖြစ်ကြောင်း သိရသည်။

အဆိုပါမြန်မာလုပ်သား ၂ ဦးသည် ယင်းစားသောက်ဆိုင်တွင် တစ်လမှ ခုနစ်လဝန်းကျင်အထိ လုပ်ကိုင်ခဲ့ကြောင်း ဝန်ခံထားပြီး ၎င်းတို့အား ဥပဒေအရ ဆက်လက်အရေးယူနိုင်ရန် ရဲစခန်းသို့ လွှဲပြောင်းပေးခဲ့ကြောင်း သိရသည်။

ချင်းမိုင်မြို့တွင် မြန်မာအလုပ်သမားများကို အလုပ်လုပ်ကိုင်ခွင့်ဆိုင်ရာ စည်းမျဉ်းချိုးဖောက်မှုများဖြင့် အရေးယူမှုများ ဆက်တိုက်ရှိနေပြီး နိုဝင်ဘာ ၂ ရက်ကလည်း ညဈေးရှိ အထည်ဆိုင်တစ်ဆိုင်တွင် အလုပ်လုပ်ကိုင်နေသည့် မြန်မာအမျိုးသမီးတစ်ဦးကို အရေးယူခဲ့သည်။

ထို့ပြင် အောက်တိုဘာ ၂၂ ရက်တွင် ချန်ခလန်ရပ်ကွက်ရှိ ထိုင်းရိုးရာအနှိပ်ခန်းမှ မြန်မာအလုပ်သမား ၃ ဦး၊ အောက်တိုဘာ ၂၇ ရက်တွင် လက်သည်းညှပ်နှင့် ပြုပြင်ရေးလုပ်ငန်း လုပ်ကိုင်နေသည့် မြန်မာအမျိုးသမီး ၃ ဦး၊ အောက်တိုဘာ ၂၉ ရက်တွင် ဝက်သားကင်ဆိုင်တစ်ဆိုင်၌ အလုပ်လုပ်ကိုင်နေသည့် မြန်မာအလုပ်သမား ၂ ဦးတို့ကိုလည်း ချင်းမိုင်လူဝင်မှုကြီးကြပ်ရေးဌာနက အရေးယူခဲ့ကြောင်း သိရသည်။

လျှပ်စစ်သုံးယာဉ်ကဏ္ဍ ဖွံ့ဖြိုးတိုးတက်ရေးအတွက် သုတေသနရလဒ်များကို လက်တွေ့အသုံးချနိုင်သည့် နည်းပညာများအဖြစ် ပြောင်းလဲနိုင်ရန် Prototype ဖန်တီးခြင်း၊ စမ်းသပ်စစ်ဆေးခြင်းနှင့် လက်တွေ့အသုံးချခြင်းတို့ကို ချိတ်ဆက်ဆောင်ရွက်ရန် လိုအပ်ကြောင်း သိပ္ပံနှင့်နည်းပညာဝန်ကြီးဌာန ဒုတိယဝန်ကြီးက ပြောကြားသည်။

အောက်တိုဘာ ၂ ရက်က သိပ္ပံနှင့်နည်းပညာဝန်ကြီးဌာန အစည်းအဝေးခန်းမ၌ Hybrid စနစ်ဖြင့်ကျင်းပသည့် လျှပ်စစ် သုံးယာဉ်နှင့် ဆက်စပ်ပစ္စည်းများ သုတေသနဖွံ့ဖြိုးရေးနှင့် နည်းပညာ ပြန့်ပွားရေးလုပ်ငန်းကော်မတီအစည်းအဝေးတွင် လုပ်ငန်းကော်မတီဥက္ကဋ္ဌ၊ သိပ္ပံနှင့်နည်းပညာဝန်ကြီးဌာန ဒုတိယဝန်ကြီးက ထိုသို့ပြောကြားခဲ့ခြင်းဖြစ်သည်။

လျှပ်စစ်သုံးယာဉ်ကဏ္ဍ ဖွံ့ဖြိုးတိုးတက်ရေးအတွက် သုတေသနရလဒ်များကို လက်တွေ့အသုံးချနိုင်သည့် နည်းပညာများအဖြစ် ပြောင်းလဲနိုင်ရန် Prototype ဖန်တီးခြင်း၊ စမ်းသပ်စစ်ဆေးခြင်းနှင့် လက်တွေ့အသုံးချခြင်းတို့ကို ချိတ်ဆက်ဆောင်ရွက်ရန် လိုအပ်ကြောင်း၊ လျှပ်စစ်သုံးယာဉ်နှင့် ဆက်စပ်ပစ္စည်းများအနက် ပြည်တွင်း၌ သုတေသနပြုဖွံ့ဖြိုးနိုင်မည့် နည်းပညာနယ်ပယ်များကို ဦးစားပေးသတ်မှတ်ရန်၊ EV Engineering ၊ Battery Techn-ology ၊ Power Electronics၊ Embedded Systems ၊ Charging Technology စသည့် နည်းပညာဆိုင်ရာ သုတေသနနှင့် ဖွံ့ဖြိုးရေးလုပ်ငန်းများကို တက္ကသိုလ်များ၊ သုတေသနအဖွဲ့အစည်းများနှင့် ပုဂ္ဂလိကကဏ္ဍတို့ ပူးပေါင်းဆောင်ရွက်ရန်လိုအပ်ကြောင်း ဒုတိယဝန်ကြီး ဒေါက်တာနေခြည်လဲ့လဲ့သိန်းက ပြောကြားသည်။

ဆက်လက်၍ ဒုတိယဝန်ကြီးက နည်းပညာ ကျွမ်းကျင်သည့် လူ့စွမ်းအားအရင်းအမြစ်များ မွေးထုတ်နိုင်ရေးအတွက် တက္ကသိုလ်များ၊ နည်းပညာတက္ကသိုလ်များ၊ သုတေသနအဖွဲ့အစည်းများနှင့် သက်ဆိုင်ရာလုပ်ငန်းများ ပူးပေါင်းဆောင်ရွက် ရန်လိုအပ်ကြောင်း၊ သုတေသနနှင့် နည်းပညာဆိုင်ရာ အချက်အလက်များကို စုစည်းအသုံးချနိုင် ရေးအတွက် EV Technology and Research Database တည်ဆောက် နိုင်ရေးကိုလည်းဆောင်ရွက်ရန် လိုအပ်ကြောင်း၊ လုပ်ငန်းကော်မတီအနေဖြင့် သုတေသနရလဒ်များကို လက်တွေ့အသုံးချနိုင်သည့်နည်းပညာများ အဖြစ်ပြောင်းလဲနိုင်ရေး ဆောင်ရွက်ရန်နှင့် လုပ်ငန်းတစ်ခုချင်းစီအတွက် Action Plan ရေးဆွဲအကောင် အထည်ဖော်ရန် ပြောကြားခဲ့သည်။

မြန်မာ့သနပ်ခါးယဉ်ကျေးမှု UNESCO စာရင်းဝင်ရေး ဒီဇင်ဘာလတွင် ဆုံးဖြတ်မည်


နိုဝင်ဘာ ၅

မြန်မာ့ရိုးရာသနပ်ခါးလိမ်းခြယ်မှု ယဉ်ကျေးမှုဓလေ့ကို UNESCO ၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ် ကိုယ်စားပြုစာရင်း (Representative List of the Intangible Cultural Heritage of Humanity) တွင် ထည့်သွင်းသတ်မှတ်နိုင်ရေးအတွက် ၂၀၂၅ ခုနှစ်တွင် ပြန်လည်တင်သွင်းထားသည့် အမည်စာရင်းကို ယခုနှစ် ဒီဇင်ဘာလတွင် ဆုံးဖြတ်သွားမည်ဖြစ်ကြောင်း သိရသည်။

UNESCO ၏ ဒြပ်မဲ့ယဉ်ကျေးမှုအမွေအနှစ်ဆိုင်ရာ တရားဝင်ဝက်ဘ်ဆိုက်တွင် ဖော်ပြထားချက်အရ “Practice of Thanakha culture in Myanmar” အမည်ဖြင့် တင်သွင်းထားသည့် မြန်မာ့သနပ်ခါးယဉ်ကျေးမှုသည် ၂၀၂၆ ခုနှစ်အတွင်း စိစစ်ဆုံးဖြတ်မည့် အမည်စာရင်းများတွင် ပါဝင်နေပြီး ဖိုင်အမှတ် ၂၃၇၇ ဖြင့် မှတ်တမ်းတင်ထားသည်။

မြန်မာ့သနပ်ခါးယဉ်ကျေးမှုကို UNESCO ၏ ဒြပ်မဲ့ယဉ်ကျေးမှုအမွေအနှစ်စာရင်းဝင်အဖြစ် သတ်မှတ်နိုင်ရေး ကြိုးပမ်းမှုကို ၂၀၂၀ ပြည့်နှစ်တွင် စတင်ခဲ့ခြင်းဖြစ်သော်လည်း ပထမအကြိမ် တင်သွင်းခဲ့သည့် အမည်စာရင်းတွင် လိုအပ်ချက်အချို့ရှိနေသဖြင့် UNESCO က ပြန်လည်ပြင်ဆင်တင်သွင်းရန် ဆုံးဖြတ်ခဲ့ရာ ၂၀၂၅ ခုနှစ် မတ်လ ၁၁ ရက်တွင် ပြင်ဆင်ဖြည့်စွက်ထားသည့် အမည်စာရင်းကို ပြန်လည်ပေးပို့ခဲ့ခြင်းဖြစ်ကြောင်း နိုင်ငံတော်အစိုးရ၏ ထုတ်ပြန်ချက်တွင် ဖော်ပြထားသည်။

အဆိုပါ အမည်စာရင်းကို UNESCO ၏ ၂၀၂၆ ခုနှစ်အတွက် စိစစ်မည့် အစီအစဉ်တွင် ထည့်သွင်းထားပြီး နိုဝင်ဘာ ၃၀ ရက်မှ ဒီဇင်ဘာ ၅ ရက်အထိ တရုတ်နိုင်ငံ ရှမန်မြို့တွင် ကျင်းပမည့် ဒြပ်မဲ့ယဉ်ကျေးမှုအမွေအနှစ် ကာကွယ်စောင့်ရှောက်ရေးဆိုင်ရာ အစိုးရအချင်းချင်းကော်မတီ၏ (၂၁) ကြိမ်မြောက် အစည်းအဝေးတွင် စာရင်းဝင်ရေးနှင့်ပတ်သက်၍ ဆုံးဖြတ်သွားမည်ဖြစ်သည်။

မြန်မာ့သနပ်ခါးသည် သနပ်ခါးပင်၏ အခေါက်ကို ကျောက်ပြင်ပေါ်တွင် ရေဖြင့်သွေး၍ ရရှိလာသည့် အနှစ်ကို မျက်နှာနှင့် ခန္ဓာကိုယ်တွင် လိမ်းခြယ်အသုံးပြုသည့် ရိုးရာဓလေ့ဖြစ်သည်။ အလှအပအတွက်သာမက အသားအရေထိန်းသိမ်းခြင်းနှင့် အေးမြမှုရရှိစေခြင်းတို့အတွက် အသုံးပြုကြပြီး အမျိုးသား၊ အမျိုးသမီးနှင့် ကလေးသူငယ်များပါ အသက်အရွယ်မရွေး အသုံးပြုသည့် မြန်မာ့လူမှုဘဝနှင့် နက်ရှိုင်းစွာ ဆက်နွှယ်နေသည့် ယဉ်ကျေးမှုတစ်ရပ်ဖြစ်သည်။

သနပ်ခါးလိမ်းခြယ်သည့် ဓလေ့ကို မိသားစုအတွင်း မျိုးဆက်တစ်ဆက်မှ တစ်ဆက်သို့ လက်ဆင့်ကမ်းထိန်းသိမ်းလာခဲ့ကြပြီး သက်ကြီးရွယ်အိုများက ကလေးငယ်များအား သနပ်ခါးလိမ်းပေးရင်း ယဉ်ကျေးမှုဓလေ့များ၊ အမူအကျင့်နှင့် ကိုယ်ကျင့်တရားဆိုင်ရာ တန်ဖိုးများကို သင်ကြားပေးသည့် အစဉ်အလာလည်း ပါဝင်သည်။

ထို့ပြင် မြန်မာ့သနပ်ခါးအသုံးပြုမှုသည် နေ့စဉ်လူမှုဘဝအပြင် ဘာသာရေးပွဲတော်များနှင့် ရိုးရာဓလေ့ထုံးတမ်းများတွင်လည်း ပါဝင်နေပြီး ရှေးဟောင်းသုတေသနဆိုင်ရာ အထောက်အထားများအရ သနပ်ခါးပြုလုပ်အသုံးပြုမှုသည် ၁၂ ရာစုခန့်ကတည်းက ရှိခဲ့ကြောင်း UNESCO ၏ မှတ်တမ်းတွင် ဖော်ပြထားသည်။

မြန်မာနိုင်ငံသည် UNESCO ၏ ၂၀၀၃ ခုနှစ် ဒြပ်မဲ့ယဉ်ကျေးမှုအမွေအနှစ် ကာကွယ်စောင့်ရှောက်ရေးဆိုင်ရာ သဘောတူစာချုပ်ကို ၂၀၁၄ ခုနှစ် မေလ ၇ ရက်တွင် အတည်ပြုလက်မှတ်ရေးထိုးခဲ့ပြီး မြန်မာ့ရိုးရာနှစ်သစ်ကူး အတာသင်္ကြန်ပွဲတော်ကို ၂၀၂၄ ခုနှစ်တွင် UNESCO ၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ် ကိုယ်စားပြုစာရင်း၌ ပထမဆုံးအကြိမ် ထည့်သွင်းသတ်မှတ်ခံခဲ့ရသည်။

ယခုအခါ မြန်မာ့သနပ်ခါးယဉ်ကျေးမှုလည်း အဆိုပါစာရင်းဝင်ရေးအတွက် နောက်ဆုံးအဆင့် စိစစ်ဆုံးဖြတ်မှုကို စောင့်ဆိုင်းနေခြင်းဖြစ်ပြီး UNESCO ၏ ဒီဇင်ဘာလ အစည်းအဝေးမှ ထွက်ပေါ်လာမည့် ဆုံးဖြတ်ချက်အပေါ် မူတည်၍ တရားဝင်စာရင်းဝင်မှု အခြေအနေကို သိရှိရမည်ဖြစ်သည်။

Unilever ရှယ်ယာများ ရောင်းချပြီး (၂၀၂၇) ခုနှစ်တွင် မြန်မာပြည်မှ ထွက်ခွာရန် ပြင်ဆင်

နိုဝင်ဘာ ၅

ကမ္ဘာ့လူသုံးကုန်ပစ္စည်း ကုမ္ပဏီကြီး Unilever သည် မြန်မာနိုင်ငံရှိ ၎င်း၏ ရှယ်ယာများကို ရောင်းချကာ လုပ်ငန်းများ ထွက်ခွာတော့မည်ဖြစ်ကြောင်း ယနေ့ (နိုဝင်ဘာ ၅) ပြောကြားခဲ့သည်ဟု ရိုက်တာသတင်း၏ ဖော်ပြချက်အရ သိရသည်။

“Unilever EAC Myanmar Company Limited (UEMCL) မှာ ပါဝင်တဲ့ Unilever ရဲ့ ရှယ်ယာတွေကို ဒေသတွင်း အကျိုးတူလုပ်ငန်း မိတ်ဖက်ဖြစ်တဲ့ Europe and Asia Commercial Company Limited (EAC) ရဲ့ လက်အောက်ခံ ကုမ္ပဏီတစ်ခုဖြစ်တဲ့ Centig Holding Company Limited ထံ ရောင်းချဖို့ သဘောတူညီမှု ရရှိခဲ့ပါတယ်” ဟု Unilever ပြောရေးဆိုခွင့်ရှိသူတစ်ဦးက ရိုက်တာသတင်းဌာန၏ မေးမြန်းချက်များကို ပြန်လည်ဖြေကြားခဲ့သည်။

(၂၀၁၀) ပြည့်နှစ်တွင် မြန်မာ့ဈေးကွက်သို့ စတင်ဝင်ရောက်ခဲ့သည့် Unilever သည် (၂၀၁၇) ခုနှစ်တွင် EAC ကုမ္ပဏီနှင့် ဖက်စပ်လုပ်ငန်း သဘောတူညီချက် လက်မှတ်ရေးထိုးခဲ့ခြင်း ဖြစ်သည်။

Unilever ကုမ္ပဏီသည် Lifebuoy၊ Sunsilk၊ Dove၊ Pond's၊ Clear၊ Lux၊ Close-Up နှင့် Signal စသည့် တစ်ကိုယ်ရေသုံး သန့်စင်ရေးနှင့် အလှအပဆိုင်ရာ ပစ္စည်းများ၊ Rin နှင့် Win စသည့် အိမ်သုံး သန့်ရှင်းရေးသုံး ပစ္စည်းများ အပြင် Knorr အပါအဝင် စားသောက်ကုန်များ ကိုလည်း ထုတ်လုပ်ဖြန့်ဖြူးလျက်ရှိသည်။

Unilever ၏ ရှယ်ယာအရောင်းအဝယ် လုပ်ငန်းစဉ်များကို (၂၀၂၇) ခုနှစ်တွင် အပြီးသတ်ရန် မျှော်မှန်းထားပြီး ဥပဒေနှင့် စည်းမျဉ်းဆိုင်ရာ အတည်ပြုချက်များ ရယူရန် လိုအပ်နေသေးကြောင်း ပြောရေးဆိုခွင့်ရှိသူက ပြောကြားခဲ့သော်လည်း ငွေကြေးပမာဏဆိုင်ရာ အသေးစိတ်အချက်အလက်များကိုမူ ထုတ်ဖော်ပြောကြားခြင်း မရှိခဲ့ပေ။

ကမ္ဘာ့ဘဏ်သည် အီရန်စစ်ပွဲကြောင့် ကမ္ဘာ့စွမ်းအင် အကျပ်အတည်း မဖြစ်ပေါ်မီက (၂၀၂၆-၂၇) ဘဏ္ဍာနှစ်အတွက် မြန်မာ့စီးပွားရေး တိုးတက်မှုကို (၃ ဒသမ ၀) ရာခိုင်နှုန်း ခန့်မှန်းခဲ့သော်လည်း အမှန်တကယ် GDP တိုးတက်မှုနှုန်း ခန့်မှန်းချက်ကို ဇွန်လတွင် (၂ ဒသမ ၀) ရာခိုင်နှုန်းသို့ လျှော့ချသတ်မှတ်ခဲ့သည်။

Credit - NP News