လာမိန်းယာမဲလ်ရဲ့ထောင်ချောက်ထဲသို့ ပြင်သစ်ကျဆင်းလာမှာ မဟုတ်ကြောင်း ကိုနာတေး ပြောကြားလာ
======================

အီဘရာဟမ်ကိုနာတေးက ကမ္ဘာ့ဖလားဆီမီးနယ်ပွဲမတိုင်မီ စပိန်ကို ပြင်သစ်တို့ ကြောက်သင့်တယ်လို့ ပြောဆိုခဲ့တဲ့ လာမိန်းယာမဲလ်ရဲ့ ပြောဆိုမှုအား တုံ့ပြန် ပြောကြားလာပါတယ်။
ရီးရဲလ်မက်ဒရစ်နောက်ခံလူက ပြင်သစ်အသင်းမှာ နှိမ့်ချစွာ ရှိနေဆဲ ဖြစ်ပြီး ပြင်ပမှ ဆူညံသံများကို ဂရုမစိုက်ကြောင်း ပြောဆိုလာခဲ့တာပါ။
လာမိန်းယာမဲလ်က ကမ္ဘာ့ဖလားကွာတားဖိုင်နယ်တွင် ဘယ်ဂျီယံကို အနိုင်ယူပြီးနောက် ဆီမီးဖိုင်နယ်တွင် ရင်ဆိုင်ရမဲ့ ပြင်သစ်အနေဖြင့် နောက်ပိုင်း ထိပ်တိုက်တွေ့ဆုံမှုသမိုင်းကြောင်းကြောင့် စပိန်ကို ကြောက်လန့်နေသင့်ကြောင်း စကားလုံးတိုက်ပွဲအစပျိုးခဲ့တာလည်း ဖြစ်ပါတယ်။
ဒါပေမဲ့ ကိုနာတေးက "ပြင်သစ်က စပိန်ကို ကြောက်နေလား။ မကြောက်ပါဘူး။ အရိုးသားဆုံးပြောရရင် ဒီပွဲနဲ့ပတ်သက်ပြီး ပြောဆိုလာမှုတွေအပေါ် လုံးဝ ဂရုမစိုက်ပါဘူး။ ကျွန်တော်တို့ ဘယ်သူ့ကိုမှ မကြောက်သင့်ပါဘူး။ အရေးအကြီးဆုံးကတော့ ဒီပြိုင်ပွဲစတင်ကတည်းက ရှိလာခဲ့တဲ့ နှိမ့်ချမှုကို ဆက်ထိန်းထားနိုင်ဖို့ပါ။ ဘယ်လိုထောင်ချောက်မျိုးကိုမှ မသက်ဆင်းဖို့ လိုတယ်။ အထူးသဖြင့် ဒီလို ပြောစကားတွေအပေါ်မှာပေါ့။ သူ ကြိုက်သလို ပြောနိုင်တယ်။ ဒီပွဲအတွက် အကောင်းဆုံးပြင်ဆင်ထားတယ်။ ပွဲပြီးတဲ့အချိန်မှာ ကျွန်တော်တို့ လိုချင်တဲ့ရလဒ်ရလာဖို့ မျှော်လင့်တယ်"လို့ ပြောကြားသွားပါတယ်။
ဒါ့အပြင် ကိုနာတေးက မိမိတို့အသင်းအနေဖြင့် လာမိန်းယာမဲလ်ကိုသာ ထိန်းချုပ်ရန် အာရုံစိုက်လို့မရကြောင်းနှင့် အရည်အချင်းပြည့်ဝတဲ့ စပိန်တစ်သင်းမှာ အသင်းအတွက် အန္တရာယ်ရှိနေကြောင်း ဆိုသွားပါတယ်။
စပိန်ဟာ ပြီးခဲ့တဲ့ ယူရို ၂၀၂၄ ဆီမီးဖိုင်နယ်တွင် ပြင်သစ်အား အနိုင်ယူခဲ့ကာ ဗိုလ်လုပွဲတွင် အင်္ဂလန်ကို ဆက်လက် အနိုင်ယူပြီး ချန်ပီယံဖြစ်ခဲ့တဲ့အသင်း ဖြစ်ပါတယ်။

ခါးသီးတဲ့ ပြိုင်ဘက် အာဂျင်တီးနားနှင့် ဆီမီးဖိုင်နယ်ပွဲစဉ်မတိုင်မီ သတိပေးမှု ပြုလုပ်လာတဲ့ ဟယ်ရီကိန်း
======================

ဟယ်ရီကိန်းက ဗုဒ္ဓဟူးနေ့တွင် အတ္တလန္တာမှာ ခါးသီးတဲ့ ပြိုင်ဘက် အာဂျင်တီးနားနှင့် ရင်ဆိုင်ကစားရမဲ့ ကမ္ဘာ့ဖလားဆီမီးဖိုင်နယ်ပွဲစဉ်မတိုင်မီ အင်္ဂလန်အနေဖြင့် ပိုကောင်းအောင် လုပ်ဆောင်ရမည်ဖြစ်ကြောင်း သတိပေးလာပါတယ်။
တဖက်တွင် အာဂျင်တီးနားစူပါစတားလီယွန်နယ်မက်ဆီက သောမတ်စ်တူချယ်ရဲ့ အင်္ဂလန်အသင်းနှင့် ပထမဆုံးအကြိမ် ရင်ဆိုင်ရမဲ့ပွဲအတွက် စိတ်လှုပ်ရှားနေကြောင်း ဆိုထားပါတယ်။
အင်္ဂလန်ဟာ နော်ဝေကို ဂျူ့ဘယ်လင်ဂမ်ရဲ့ သွင်းဂိုး ၂ ဂိုးဖြင့် ၂-၁ ဖြင့် ကံကောင်းထောက်မစွာ အနိုင်ရရှိကာ ကမ္ဘာ့ဖလားဆီမီးဖိုင်နယ်သို့ တက်လာခဲ့တာပါ။
ယခုအခါ ဟယ်ရီကိန်းဟာ လက်ရှိ ချန်ပီယံအား ကျော်ဖြတ်ကာ နှစ်ပေါင်း ၆၀ အတွင်း ပထမဆုံးကမ္ဘာ့ဖလားဗိုလ်လုပွဲသို့ တက်ရောက်ရေး ပိုမိုကြိုးစားအားထုတ်ကြရန် ကစားဖော်များကို တိုက်တွန်းလာပါတယ်။
ဟယ်ရီကိန်းက "လာမဲ့ပွဲမတိုင်ခင်အထိ ဒီအကြောင်းက ပြောစရာ ဖြစ်နေမယ်ဆိုတာ သိပါတယ်။ ကျွန်တော်တို့ ပိုကောင်းလာနိုင်တာကို သိပါတယ်။ ပိုပြီးတော့ ကောင်းကောင်းကစားနိုင်တာကိုလည်း သိပါတယ်။ ဒါပေမဲ့ အရေးအကြီးဆုံးကတော့ ကျွန်တော်တို့ ကမ္ဘာ့ဖလားဆီမီးဖိုင်နယ်သို့ တက်ရောက်ထားနိုင်တာပါ။ ကျွန်တော်တို့အနေနဲ့ ဒီအတွက် ပျော်သင့်တယ်။ နော်ဝေနဲ့ပွဲမှာ ကျွန်တော်တို့ ကြီးကျယ်တာတချို့ လုပ်ပြနိုင်ခဲ့တယ်။ အောင်မြင်တဲ့အသင်းတစ်သင်းဖြစ်လာဖို့ ဆန္ဒပြင်းပြမှုနဲ့ ဆုံးဖြတ်ချက်ပိုင်နိုင်မှု လိုအပ်တယ်။ အသင်းမှာ ရှိတဲ တစ်ယောက်ချင်းစီတိုင်း နိုင်ငံအတွက် ကိုယ်စွန်းရှိသမျှ လုပ်ရမယ်။ နော်ဝေနဲ့ပွဲမှာ အပူချိန်ခံစားခဲ့ရပေမဲ့ ကျွန်တော်တို့ ကျော်ဖြတ်နိုင်ခဲ့တယ်။ ကျွန်တော်တို့ ပိုကောင်းအောင် ကစားနိုင်တာ သိတယ်"လို့ ပြောကြားသွားပါတယ်။
အင်္ဂလန်အသင်းဟာ ၂၀၁၈ ကမ္ဘာ့ဖလားတွင် ဆီမီးဖိုင်နယ်သို့ တက်ရောက်ပြီးနောက် ယူရိုပြိုင်ပွဲတွင်လည်း ၂ ကြိမ်ဆက် ဗိုလ်လုပွဲသို့ တက်ရောက်ခဲ့ပေမဲ့ ဆုဖလားနှင့် ဝေးကွာလာခဲ့တာပါ။

၆၄ သင်းကမ္ဘာ့ဖလားကျင်းပရေး တံခါးဖွင့်ပေးလာတဲ့ ဖီဖာဥက္ကဌအင်ဖန်တီနို
=====================

ဖီဖာဥက္ကဌဂျီယန်နီအင်ဖန်တီနိုက ကမ္ဘာ့ဖလားပြိုင်ပွဲမှာ တစ်ကမ္ဘာလုံးအတွက် ဖြစ်သင့်ကြောင်း ပြောကြားကာ ၂၀၂၆ ကမ္ဘာ့ဖလားအလွန်တွင် ၆၄ သင်း ကမ္ဘာ့ဖလားကျင်းပရေး ဆွေးနွေးမှုများ ပြုလုပ်လာမယ်လို့ ပြောကြားလာပါတယ်။
ဖီဖာဟာ အမေရိကန်၊ ကနေဒါ၊ မက္ကဆီကိုတို့က ပူးတွဲအိမ်ရှင်အဖြစ် ကျင်းပနေတဲ့ ၂၀၂၆ ကမ္ဘာ့ဖလားပြိုင်ပွဲတွင် ကမ္ဘာ့ဖလားသမိုင်းတွင် ပထမဆုံးအကြိမ်အဖြစ် ၄၈ သင်းဖြင့် ကျင်းပနေတာ ဖြစ်ပါတယ်။
ဒါပေမဲ့ ယခုအခါ ဖီဖာဟာ ၆၄ သင်းအထိ ထပ်မံ တိုးမြှင့်ကျင်းပရေး ဆွေးနွေးလာပါဦးမယ်။
အင်ဖန်တီနိုက "ကမ္ဘာ့ဖလားအပြီးမှာ ဆန်းစစ်လေ့လာစရာရှိတာတွေအားလုံးကို လုပ်သွားမယ်။ ကမ္ဘာ့ဖလားလို ပြိုင်ပွဲကျင်းပတဲ့အခါ တစ်ကမ္ဘာလုံးအတွက် ဖြစ်လာစေဖို့အတွက် အရမ်းအရေးကြီးတယ်။ ဥရောပနဲ့ တောင်အမေရိကအတွက်သာ မဟုတ်စေရပါဘူး။ တစ်ကမ္ဘာလုံးကို ရိုက်ခတ်ဖို့ လိုတယ်။ နိုင်ငံတိုင်း ကမ္ဘာ့ဖလားမှာ ပါဝင်ဖို့ အိပ်မက်ရှိသင့်တယ်။ အသင်းတွေရဲ့ အရည်အသွေးတွေ အရမ်းမြင့်မားလာတာ မြင်ရပါမယ်။ တစ်ကမ္ဘာလုံးက အသင်းတွေရဲ့အရည်အသွေး မြင့်သထက် မြင့်လာနေတယ်။ နိုင်ငံငယ်လေးတွေကို ကမ္ဘာ့ဖလားမှာ ပါဝင်နိုင်မဲ့ အခွင့်အရေး မပေးရင် သူတိုဟာလည်း တိုးတက်အောင် လုပ်ဖို့ စိတ်အားထက်သန်မှု ကင်းမဲ့လာလိမ့်မယ်"လို့ ပြောကြားသွားပါတယ်။
ဒါ့အပြင် အင်ဖန်တီနိုက အသင်း ၄၈ သင်းဖြင့် တိုးမြှင့်ကျင်းပတဲ့ ကမ္ဘာ့ဖလားပြိုင်ပွဲတွင် အာဖရိကအသင်း ၁၀ သင်း ဝင်ရောက်ယှဉ်ပြိုင်ခွင့် ရရှိရာတွင် ၉ သင်းက ရှုံးထွက်အဆင့်သို့ တက်ရောက်မှုက ကြီးမားတဲ့ အောင်မြင်မှု ဖြစ်ကြောင်း ဆိုသွားပါတယ်။
ဖီဖာကောင်စီဟာ ၂၀၁၇ ခုနှစ်တုန်းက ကမ္ဘာ့ဖလားပြိုင်ပွဲအား ၃၂ သင်းမှ ၄၈ သင်းသို့ တိုးမြှင့်ကျင်းပခွင့် ပြုလုပ်ခဲ့ပါတယ်။
တောင်အမေရိကဘောလုံးအဖွဲ့ချုပ်ဟာ ၂၀၂၅ ခုနှစ် ဧပြီလတုန်းက ၂၀၃၀ ကမ္ဘာ့ဖလားပြိုင်ပွဲတွင် အသင်း ၆၄ သင်းဖြင့် တိုးမြှင့်ကျင်းပရေး အဆိုပြုလွှာတင်ခဲ့ပေမဲ့ ဆုံးဖြတ်ချက် မချရသေးပါဘူး။
၂၀၃၀ ကမ္ဘာ့ဖလားပြိုင်ပွဲကို စပိန်၊ ပေါ်တူဂီနှင့် မော်ရိုကိုတို့က ပူးတွဲအိမ်ရှင်အဖြစ် ကျင်းပလာမှာ ဖြစ်ပြီး နှစ်တစ်ရာအထိမ်းအမှတ်အဖြစ် အာဂျင်တီးနား၊ ဥရုဂွေး၊ ပါရာဂွေးတို့ကလည်း အဖွင့်ပွဲများကို အသီးသီး လက်ခံကစားလာပါမယ်။
ယူအီးအက်ဖ်အေဥက္ကဌအလက်ဇန္ဒားစီဖီရန်ကမူ ၆၄ သင်းသို့ တိုးမြှင့်ကျင်းပမှုက ပြိုင်ပွဲအတွက်ရော အရည်အသွေးအတွက်ပါ ဆိုးရွားတဲ့ စိတ်ကူးဖြစ်ကြောင်း ပြောဆို ကန့်ကွက်ထားပါတယ်။
အာရှဘောလုံးအဖွဲ့ချုပ်ကမူ ကိုယ်စားပြုအသင်းအရေအတွက် တိုးမြှင့် ရရှိလာမှာ ဖြစ်လို့ ယင်းအဆိုကို ထောက်ခံထားပေမဲ့ ကွန်ကာကပ်ဖ်ကမူ ကန့်ကွက်ထားပါတယ်။

ကမ္ဘာ့ဖလားမှ ထွက်ခွာရပြီးနောက် နည်းပြသီယော်ကို ဆီနီဂေါ ထုတ်ပယ်လာ
====================

ဆီနီဂေါဟာ ကမ္ဘာ့ဖလားပြိုင်ပွဲ ၃၂ သင်း ရှုံးထွက်အဆင့်မှ ထွက်ခွာရပြီးနောက် နည်းပြပါပီသီယော်ကို ရာထူးမှ ထုတ်ပယ်လာပါတယ်။
သီယော်ဟာ ၂၀၂၄ ခုနှစ် ဒီဇင်ဘာလကတည်းက ဆီနီဂေါအသင်းကို ကိုင်တွယ်လာခဲ့တာ ဖြစ်ပြီး အဖွင့်ပွဲ ၂ ပွဲတွင် ပြင်သစ်နှင့် နော်ဝေတို့အား ရှုံးနိမ့်ခဲ့ပါတယ်။
၎င်းတို့ဟာ အုပ်စုနောက်ဆုံးပွဲတွင် အီရတ်အား ၅-၀ ဖြင့် အနိုင်ယူကာ အကောင်းဆုံးတတိယအဖြစ်ဖြင့် ရှုံးထွက်အဆင့်သို့ တက်ခဲ့တာပါ။
၎င်းတို့ဟာ ၃၂ သင်းရှုံးထွက်အဆင့်မှာ ဘယ်ဂျီယံကို ၂-၀ ဖြင့် ဦးဆောင်ထားနိုင်ခဲ့ပြီးမှ ၃-၂ ဖြင့် ရှုံးနိမ့်ကာ ထွက်ခဲ့ရပါတယ်။
ကမ္ဘာ့ဖလား ၃၂ သင်း ရှုံးထွက်အဆင့်မှ ထွက်ရပြီးနောက် အလယ်တန်းကစားသမားပါပီဂူယီက လက်ရှိ နည်းပြသီယော် အသင်းကို ဦးဆောင်နေတဲ့ ကာလအတွင်း ဆီနီဂေါအတွက် ပြန်ကစားသွားမည်မဟုတ်ကြောင်း ကြေညာခဲ့ပါတယ်။
သီယော်ဟာ အာဖရိကဖလားဗိုလ်လုပွဲတွင် မော်ရိုကိုအား အနိုင်ရခဲ့တဲ့ပွဲမှာ ဒိုင်ရဲ့ ဆုံးဖြတ်ချက်ကို ဆန့်ကျင်တဲ့အနေဖြင့် ကစားသမားများကို ကွင်းအတွင်းမှ ထွက်ခွာရန် အဓိကနေရာမှ လှုံဆော်ခဲ့သူလည်း ဖြစ်ပါတယ်။
ယင်းအဖြစ်အပျက်ကြောင့် ဆီနီဂေါဟာ ၁-၀ ဖြင့် အနိုင်ရကာ ချန်ပီယံဖြစ်ခဲ့ပေမဲ့လည်း နောက်ပိုင်းတွင် စည်းကမ်းထိန်းသိမ်းရေးကော်မတီရဲ့ ၃-၀ ဖြင့် အရှုံးပေးခြင်းခံခဲ့ရပါတယ်။

သမိုင်းတွင် ပထမဆုံးအကြိမ်အဖြစ် ဖီဖာကမ္ဘာ့အဆင့် ထိပ်ဆုံး ၄ သင်း ကမ္ဘာ့ဖလားဆီမီးဖိုင်နယ်အဆင့်သို့ တက်ရောက်လာ
======================

ဖီဖာကမ္ဘာ့အဆင့်သတ်မှတ်ချက်တွင် ထိပ်ဆုံး ၄ နေရာကို ရယူထားတဲ့ အသင်း ၄ သင်းတို့ဟာ သမိုင်းတွင် ပထမဆုံးအကြိမ်အဖြစ် ကမ္ဘာ့ဖလားဆီမီးဖိုင်နယ်အဆင့်သို့ တက်ရောက်လာပါတယ်။
စပိန်(၁)၊ အာဂျင်တီးနား(၂)၊ ပြင်သစ်(၃)နှင့် အင်္ဂလန်(၄)တို့ဟာ ကမ္ဘာ့ဖလားဆီမီးဖိုင်နယ်အဆင့်သို့ တက်ရောက်လာခဲ့ကြပါတယ်။
ဖီဖာဟာ ကမ္ဘာ့ထိပ်ဆုံးအသင်း ၄ သင်းတို့ဟာ ဆီမီးဖိုင်နယ်အဆင့်မတိုင်မီ မတွေ့နိုင်အောင် မဲခွဲထားခဲ့ကြတာ ဖြစ်သလို ယင်းအသင်း ၄ သင်းလုံးတို့ အသီးသီး အုပ်စုဗိုလ်နေရာကို ရယူနိုင်ခဲ့လို့လည်း ယခုလို ဆီမီးဖိုင်နယ်တွင်မှ တွေ့ဆုံလာတာပါ။
ဖီဖာရဲ့မဲခွဲမှုအစီအစဉ်အရ ကမ္ဘာ့အဆင့် နံပါတ် ၁ နေရာမှ စပိန်မှာ ဗိုလ်လုပွဲမတိုင်မီ နံပါတ် ၂ နေရာမှ အာဂျင်တီးနားနှင့် တွေ့ဆုံမှာ မဟုတ်ပါဘူး။
အင်္ဂလန်နှင့် ပြင်သစ်တို့မှာ ကွဲပြားတဲ့ ဘက်ခြမ်းတွင် ကျရောက်နေမှုနှင့်အတူ ဗိုလ်လုပွဲတွင်မှ တွေ့ဆုံလာနိုင်မှာ ဖြစ်ပြီး ဗိုလ်လုပွဲတွင် တွေ့ဆုံရန်အတွက် စပိန်(သို့မဟုတ်) အာဂျင်တီးနားကို ကျော်ဖြတ်ရပါမယ်။
ဖီဖာဟာ ဆီမီးဖိုင်နယ်သို့ သွားရာ လမ်းကြောင်း နှစ်ခုကို အခြေပြုပြီး ပြိုင်ပွဲ ပြိုင်ဆိုင်မှုဟန်ချက်ညီရေးအတွက် ယခုကဲ့သို့ ရေးဆွဲထားတာပါ။
ယခု ဆီမီးဖိုင်နယ်ပွဲစဉ်များအဖြစ် အင်္ဂါနေ့မှာ ပြင်သစ်နှင့် စပိန်တို့ကလည်းကောင်း၊ ဗုဒ္ဓဟူးနေ့တွင် အင်္ဂလန်နှင့် အာဂျင်တီးနားတို့ကလည်းကောင်း ရင်ဆိုင်တွေ့ကြပါမယ်။
ယင်းမဲခွဲစနစ်ကို ဝင်ဘယ်ဒန်တင်းနစ်ပြိုင်ပွဲနှင့် အသစ်ကျင်းပတဲ့ ချန်ပီယံလိဂ်ပြိုင်ပွဲတို့မှာလည်း အသုံးပြုထားပါတယ်။
ဖီဖာအဆင့်သတ်မှတ်ချက်ကို ၁၉၉၄ ခုနှစ်တွင် အသုံးပြုခဲ့ပေမဲ့ ယခုနှစ်မှာမှ ပြိုင်ပွဲတွင် စတင်ထိရောက်အောင် အသုံးပြုလာတာပါ။
ဘယ်ဂျီယံ(၂၀၂၂)၊ ဂျာမနီ(၂၀၁၈)၊ စပိန်(၂၀၁၄)၊ အီတလီ(၂၀၁၀)၊ ပြင်သစ်(၂၀၂၂)တို့ဟာ ယင်းကမ္ဘာ့ဖလားပြိုင်ပွဲတုန်းက ထိပ်ဆုံး ၄ သင်းနေရာဖြင့် ယှဉ်ပြိုင်ခဲ့ပေမဲ့ အုပ်စုအဆင့်အား ကျော်ဖြတ်နိုင်ခဲ့ကြခြင်း မရှိပါဘူး။
ဒါ့အပြင် ၁၉၉၈ ကမ္ဘာ့ဖလားနောက်ပိုင်းတွင် ထိပ်ဆုံးအဆင့်မှာ ရပ်တည်တဲ့အသင်းတို့ဟာ ဆီမီးဖိုင်နယ်ကို ကျော်ဖြတ်နိုင်ခဲ့ကြခြင်း မရှိပါဘူး။

ကမ္ဘာ့ဖလားအပြီးတွင် ပီအက်စ်ဂျီသို့‌ ပြောင်းရွှေ့ကစားလာတော့မဲ့ စပိန်နှင့် ဘာစီလိုနာစတားဖာရန်တောရက်စ်
===================

ဘာစီလိုနာစတားဖာရန်တောရက်စ်ဟာ ကမ္ဘာ့ဖလားပြိုင်ပွဲအပြီးတွင် ပီအက်စ်ဂျီသို့ ပြောင်းရွှေ့လာတော့မှာ ဖြစ်ကြောင်း သိရပါတယ်။
အသက် ၂၆ နှစ်ရှိ ဖာရန်တောရက်စ်ဟာ လက်ရှိအချိန်တွင် ကမ္ဘာ့ဖလားဆီမီးဖိုင်နယ်ရောက် စပိန်အသင်းနှင့်အတူ ပါဝင်ယှဉ်ပြိုင်နေပြီး ပြင်သစ်နှင့် ရင်ဆိုင်ကစားရပါမယ်။
ဒါပေမဲ့ သူဟာ ကမ္ဘာ့ဖလားပြိုင်ပွဲအပြီးတွင် ဘာစီလိုနာနှင့် ပြန်လည်ပူးပေါင်းလာတော့မှာ မဟုတ်ဘဲ ပီအက်စ်ဂျီသို့ ပြောင်းလာပါတော့မယ်။
ချန်ပီယံလိဂ် ၂ ကြိမ်ဆက် ဆွတ်ခူးထားတဲ့ ပီအက်စ်ဂျီဟာ ဖာရန်တောရက်စ်အား ခေါ်ယူရန် သဘောတူညီမှု ရရှိသွားပြီဖြစ်ကြောင်း သိရပါတယ်။
တောရက်စ်ဟာ ၂၀၂၇ ခုနှစ်တွင် ဘာစီလိုနာနှင့်စာချုပ်သက်တမ်းကုန်ဆုံးမှာဖြစ်ပြီး စာချုပ်သစ်ချုပ်ဆိုလာမှု မဟုတ်တော့မှုနှင့်အတူ ရောင်းချခံလာရတော့မှာလည်း ဖြစ်ပါတယ်။
ဘာစီလိုနာဟာ ဖာရန်တောရက်စ်နေရာမှာ ဒေါ့မွန်စတားကာရမ်အဒီယီမီနှင့် အစားထိုးလာပါမယ်။
ပီအက်စ်ဂျီဟာ ဂွန်ကာလိုရာမို့စ်ကို အေစီမီလန်သို့ ရောင်းချလိုက်ပြီးနောက် တိုက်စစ်ကို မဖြစ်မနေ အားဖြည့်ရန် လိုအပ်နေပါတယ်။
တောရက်စ်ဟာ မန်စီးတီးတွင် ၂ ရာသီကြာ ကစားပြီးနောက် ၂၀၂၂ ခုနှစ်တွင် ဘာစီလိုနာသို့ ရောက်လာခဲ့သူ ဖြစ်ပါတယ်။
သူဟာ ဘာစီလိုနာအတွက် ၂၀၇ ပွဲကစားခဲ့ရာမှာ ၆၅ ဂိုးသွင်းယူပြီး ၂၃ ကြိမ် ဖန်တီးပေးနိုင်ခဲ့သလို လာလီဂါဖလား ၃ ကြိမ်၊ ကိုပါဒယ်ရေး ၁ ကြိမ် ရယူနိုင်ခဲ့ပါတယ်။
သူဟာ စပိန်အသင်းတွင် ပီအက်စ်ဂျီနည်းပြလူးဝစ်အန်းနရစ်လက်အောက်မှာ ၂ နှစ်တိုင်ကစားခဲ့ဖူးပါတယ်။
ဒါ့အပြင် သူဟာ အန်းနရစ်ရဲ့သမီး ဆီရာမာတီနက်ဇ်နှင့် တစ်နှစ်နီးပါး ချစ်ကြိုက်ခဲ့ပြီးနောက် ၂၀၂၃ ခုနှစ်မှာ လမ်းခွဲခဲ့သူ ဖြစ်ပါတယ်။

ဖီအိုရင်တီးနားသို့ အငှားဖြင့် ပြောင်းရွှေ့လာတော့မဲ့ ဘုန်းမောက်ရဲ့ ဂျီမီနက်ဇ်
===================

စီးရီးအေကလပ် ဖီအိုရင်တီးနားဟာ ဘုန်းမောက်ရဲ့စပိန်နောက်ခံလူအဲလက်စ်ဂျီမီနက်ဇ်ကို တစ်ရာသီအငှားဖြင့် ခေါ်ယူရန် သဘောတူညီမှု ရရှိလာပါတယ်။
ဘုန်းမောက်ဟာ ဂျီမီနက်ဇ်ရဲ့ အငှားစာချုပ်အတွင်းတွင် ယူရိုသန်း ၂၀ ဖြင့် အပြီးသတ်ခေါ်ယူနိုင်မဲ့အချက်ကိုလည်း ထည့်သွင်းချုပ်ဆိုထားပါတယ်။
အသက် ၂၁ နှစ်ရှိ ဂျီမီနက်ဇ်ဟာ မေလတုန်းက ဆိုရှယ်မီဒီယာပို့စ်နှင့်ပတ်သက်ပြီး ကလပ်ရဲ့ စုံစမ်းစစ်ဆေးခြင်းခံခဲ့ရကာ ပထမအသင်းမှ ဖယ်ရှားခြင်းခံခဲ့ရသူလည်း ဖြစ်ပါတယ်။
ဂျီမီနက်ဇ်ဟာ အေစီမီလန်မှ အငှားဖြင့် လာရောက်ကစားပြီးနောက် ဖေဖော်ဝါရီလတုန်းက ဘုန်းမောက်သို့ အပြီးသတ်စာချုပ်ဖြင့် ပြောင်းခဲ့သူလည်း ဖြစ်ပါတယ်။
စပိန်ယူ-၂၁ လက်ရွေးစင်ဟာ ပြီးခဲ့တဲ့ရာသီတုန်းက ဘုန်းမောက်အတွက် ၃၂ ပွဲကစားခဲ့ရာမှာ ၁ ဂိုးသွင်းပေးနိုင်ခဲ့ပါတယ်။

ချဲလ်ဆီးကို ၁ ပေါင်တည်းဖြင့် ဝယ်ယူခဲ့တဲ့ ချဲလ်ဆီးပိုင်ရှင်ဟောင်း ကန်ဘိတ်စ် အသက် ၉၄ နှစ်အရွယ်တွင် ကွယ်လွန်
========================

ချဲလ်ဆီးဥက္ကဌဟောင်းကင်ဘိတ်စ်အား အသက် ၉၄ နှစ်အရွယ်မှာ ကွယ်လွန်လာပါတယ်။
လန်ဒန်ဖွားစီးပွားရေးသမားဟာ ၁၉၈၂ ခုနှစ်တုန်းက ချဲလ်ဆီးကို ၁ ပေါင်တည်းဖြင့် ဝယ်ယူခဲ့သူဖြစ်ပြီး ၂၀၀၃ ခုနှစ်အထိ ပိုင်ရှင်အဖြစ်ရော ဥက္ကဌအဖြစ်ပါ ဆောင်ရွက်ခဲ့သူ ဖြစ်ပါတယ်။
ချဲလ်ဆီးကို သူ ဝယ်ယူစဉ်တုန်းက ကလပ်မှာ ဒုတိယတန်းတွင် ရုန်းကန်နေခဲ့ရတာပါ။
ထိုစဉ်တုန်းက ချဲလ်ဆီးဟာ ကွင်းတွင်း ရလဒ်ဆိုးရွားနေရုံသာမက ဘဏ္ဍာရေးပြဿနာများနှင့်လည်း ကြုံနေရကာ ဘိတ်စ်က ၁ ပေါင်တည်းဖြင့် ဝယ်ယူခဲ့တာပါ။
သူဟာ အသင်းကို ပြန်လည်တည်ဆောက်ခဲ့သလို လေ့ကျင့်ရေးကွင်းနှင့် ကွင်းကိုလည်း မွန်းမံမှုများ ပြုလုပ်ပြီး အောင်မြင်တဲ့အသင်းဖြစ်အောင် အုတ်မြစ်ချတည်ဆောက်ပေးခဲ့ပါတယ်။
ကိတ်စ်ဟာ ဖခင်ဖြစ်သူ စွန်ခွာသွားမှု၊ မိခင်ဖြစ်သူ သေဆုံးသွားမှုတို့ကြောင့် ငယ်စဉ်ကတည်းက အဘိုးအဘွားများရဲ့ ပြုစုစောင့်ရှောက်မှုဖြင့် ကြီးပြင်းလာခဲသူပါ။
သူဟာ အစောပိုင်းတွင် သယ်ယူပို့ဆောင်ရေးလုပ်ငန်းများဖြင့် ငွေရှာခဲ့ပြီးနောက် ကျောက်မိုင်းလုပ်ငန်းများ၊ မြေယာဖွံ့ဖြိုးတိုးတက်ရေးလုပ်ငန်းများ ချဲ့ထွင်လုပ်ဆောင်ကာ ကြွယ်ဝချမ်းသာလာခဲ့ပါတယ်။
သူဟာ ချဲလ်ဆီးကို ထိပ်ဆုံး ၆ သင်းစာရင်းတွင် ၇ ရာသီဆက် ရပ်တည်နိုင်အောင် ဦးဆောင်ခဲ့ကာ နိုင်ငံရဲ့ထိပ်သီးကလပ်တစ်ခုအဖြစ် တည်ဆောက်ပေးခဲ့ပါတယ်။
သူဟာ ၂၀၀၃ ခုနှစ်တွင် ရှရှားဘီလျှံနာရိုမန်အေဘရာမိုဗစ်ထံသို့ ပေါင်သန်း ၁၄၀ ဖြင့် ရောင်းချခဲ့ပါတယ်။
ယင်းနောက် သူဟာ ၂၀၀၅ ခုနှစ်တွင် လိဒ်အသင်းရဲ့ ရှယ်ယာ ၅၀ ရာခိုင်နှုန်းကို ဝယ်ယူပြီး ဘောလုံးလောကသို့ ပြန်လည်ဝင်ရောက်ခဲ့ပေမဲ့ ယော့ခ်ရှိုင်းယားကလပ်မှာတော့ ချဲလ်ဆီးမှာတုန်းကကဲ့သို့ အောင်မြင်မှု ရရှိရေးရုန်းကန်ခဲ့ရပါတယ်။
လိဒ်ဟာ ၂၀၀၇ ခုနှစ်တွင် ဘဏ္ဍာရေးပြဿနာကြောင့် အာဏာပိုင်တို့ရဲ့ စီမံအုပ်ချုပ်မှုအောက်သို့ ဝင်ခဲ့ရပြီး ဘိတ်စ်မှာ ရှယ်ယာများကို ရောင်းချခဲ့ရပါတယ်။
သူဟာ ၂၀၁၂ ခုနှစ်မှာ သူပိုင်ရှယ်ယာများကို ပေါင် ၅၂ သန်းဖြင့် GFH Capital ထံ ရောင်းချခဲ့ပါတယ်။

ကမ္ဘာ့ဖလားပြိုင်ပွဲမှ ထွက်ခွာရပြီးနောက် အသက်အန္တရာယ်ခြိမ်းခြောက်ခံရမှုနှင့်အတူ ကိုလံဘီယာသို့ ပြန်ရန် ကစားသမားတစ်ဦး ငြင်းဆိုလာ
===================

ကိုလံဘီယာအလယ်တန်းကစားသမားဂျေမင်တွန်ကမ်ပက်ဇ်ဟာ ကမ္ဘာ့ဖလားပြိုင်ပွဲမှ ထွက်ခွာရပြီးနောက် အသက်အန္တရာယ်စိုးရိမ်နေရမှုနှင့်အတူ မွေးရပ်မြေသို့ ပြန်ရန် ငြင်းဆိုနေကြောင်း သိရပါတယ်။
တောင်အမေရိကထိပ်သီးဟာ ယခုအပတ်အစောပိုင်းတုန်းက ဆွစ်ဇာလန်အား ပင်နယ်တီအဆုံးအဖြတ်တွင် ရှုံးနိမ့်ကာ ကမ္ဘာ့ဖလား ၁၆ သင်းရှုံးထွက်အဆင့်မှ ထွက်ခဲ့ရပါတယ်။
အဆိုပါပွဲစဉ်တွင် ကမ်ပက်ဇ်ဟာ အချိန်ပိုနှောင်းပိုင်းတွင် ကိုလံဘီယာတို့ အနိုင်ရရှိစေနိုင်တဲ့ အခွင့်အရေး ရရှိခဲ့ပေမဲ့လည်း အပေါ်ထောင်ကန်ခဲ့ပါတယ်။
ဒါကြောင့်လည်း ဂိုးမရှိသရေကျကာ ပင်နယ်တီအဆုံးအဖြတ်ကန်ခဲ့ရပါတယ်။
အလယ်တန်းကစားသမားဟာ ပင်နယ်တီအဆုံးအဖြတ်တွင် ဂိုးဝင်အောင် သွင်းနိုင်ခဲ့ပေမဲ့လည်း ၄-၃ ဖြင့် အရေးနိမ့်သွားခဲ့ပါတယ်။
ပွဲအပြီးမှာတော့ ကမ်ပက်ဇ်ဟာ ဆိုရှယ်မီဒီယာတွင် ကိုလံဘီယာပရိသတ်များရဲ့ အသက်အန္တရာယ်ခြိမ်းခြောက်ခြင်း၊ ဆဲဆိုခြင်းတို့နှင့် ကြုံတွေ့ခဲ့ရပါတယ်။
အာဂျင်တီးနားသတင်းစာ Infobae ရဲ့ဖော်ပြလာမှုအရ သူဟာ အသက်အန္တရာယ်ခြိမ်းခြောက်ခံရမှုနှင့်အတူ ကိုလံဘီယာသို့ ပြန်ရန် ငြင်းဆိုနေကြောင်း သိရပါတယ်။
လက်ရှိအချိန်တွင် အသက် ၂၆ နှစ်ရှိ ကစားသမားဟာ အမေရိကန်တွင်ပင် ဆက်ရှိနေသေးသလား (သို့မဟုတ်) သူကစားနေတဲ့ အာဂျင်တီးနားကလပ် ရိုဆာရီယိုစင်ထရယ်ရှိရာ အာဂျင်တီးနားသို့ ပြန်သွားသလား အတိအကျ မသိရသေးပါဘူး။
ကမ်ပက်ဇ်ဟာ ကမ္ဘာ့လားမှ ထွက်ခွာရပြီးနောက် ပရိသတ်များအား စိတ်အေးအေးထားကြရန်နှင့် လေးစားမှု ရှိကြရန် တောင်းဆိုမှု ပြုလုပ်ထားပါတယ်။
ယခင်တုန်းက ၁၉၉၄ ကမ္ဘာ့ဖလားပြိုင်ပွဲတွင် ကိုယ့်ဂိုးကိုယ်သွင်းမိခဲ့တဲ့ ကိုလံဘီယာလက်ရွေးစင်အင်ဒရေအက်စ်ကိုဘာဟာ မွေးရပ်မြေသို့ ပြန်ရောက်လာချိန်တွင် လုပ်ကြံသတ်ဖြတ်ခြင်းခံခဲ့ရဖူးပါတယ်။
ကိုလံဘီယာဘောလုံးအဖွဲ့ချုပ်က ကမ်ပက်ဇ်အား အသက်အန္တရာယ်ခြိမ်းခြောက်မှု၊ ဆဲဆိုမှုအပေါ် ရှုံ့ချလျက်ရှိပြီး စုံစမ်းစစ်ဆေးမှုများ ပြုလုပ်ရန် တောင်းဆိုထားပါတယ်။

အင်္ဂလန်နှင့်နော်ဝေပွဲတွင် ပွဲကြည့်စင်မှ နှင်ထုတ်ခံခဲ့ရတဲ့ ကမ္ဘာ့ဆွဲဆောင်မှုအရှိဆုံး မင်းသမီး
====================

အလက်ဇန္ဒားဒက်ဒါရီယိုဟာ အင်္ဂလန်အသင်းရဲ့ နော်ဝေနှင့် ကမ္ဘာ့ဖလားကွာတားဖိုင်နယ်ပွဲစဉ်တွင် ပွဲကြည့်စင်မှ နှင်ထုတ်ခြင်းခံခဲ့ရပါတယ်။
The White Lotus နှင့် Baywatch ရုပ်ရှင်များတွင် ပါဝင်သရုပ်ဆောင်ခဲ့တဲ့ မင်းသမီးဟာ ယခုနွေရာသီ ကမ္ဘာ့ဖလားပြိုင်ပွဲတွင် ကွင်းသို့ ကိုယ်တိုင်လာရောက်ကြည့်ရှုအားပေးလာခဲ့သူလည်း ဖြစ်ပါတယ်။
အသက် ၄၀ နှစ်ှရိ ဒက်ဒါရီယိုဟာ အင်္ဂလန်ရဲ့ ဂါနာနှင့်ဂိုးမရှိသရေကျတဲ့ပွဲကိုလည်း လာကြည့်ခဲ့ကာ အင်္ဂလန်ဂန္ထဝင်ကစားသမားဒေးဗစ်ဘက်ဟမ်းကို လှောင်ပြောင်ခဲ့သူလည်း ဖြစ်ပါတယ်။
ဒါပေမဲ့ သူမဟာ မိုင်ယာမီတွင် အင်္ဂလန်က နော်ဝေကို ၂-၁ ဖြင့် အနိုင်ရတဲ့ ကမ္ဘာ့ဖလားကွာတားဖိုင်နယ်ပွဲစဉ်မှာတော့ နှင်ထုတ်ခံခဲရပါတယ်။
ယင်းပွဲကို ဟောလီးဝုဒ်မင်းသမီးဟာ အထူးတန်းလက်မှတ်ဝယ်ယူပြီး ကြည့်ရှုခဲ့တာပါ။ ဒါပေမဲ့ သူမဟာ ပွဲကို အနီးကပ်ကြည့်နိုင်ရေး ကြိုးပမ်းခဲ့ပါတယ်။
ဒါပေမဲ့ သူမကို အင်္ဂလန်ပရိသတ်များက မြင်ကွင်းကွယ်နေတယ်ဆိုပြီး စောဒကတက်ခြင်းခံခဲ့ရပါတယ်။
ကမ္ဘာ့ဆောင်ဆွဲမှုအရှိဆုံးမင်းသမီးအဖြစ် တင်စားခြင်းခံရတဲ့သူမကို ကွင်းလုံခြံရေးများ ရောက်လာကာ ပွဲကြည့်စင်မှ ဖယ်ရှားခဲ့ကြပါတယ်။
သူမဟာ ကိုယ့်နေရာမှာ မဟုတ်ဘဲ အခြားနေရာမှ ပွဲကြည့်ရန် ကြိုးပမ်းမှုနှင့်အတူ နှင်ထုတ်ခံလာရတာလည်း ဖြစ်ပါတယ်။