ရောဘတ်တိုဒီဇာဘီအား နည်းပြသစ်အဖြစ် ခန့်အပ်လိုနေတဲ့ စပါးစ်
===================
စပါးစ်ဟာ ရောဘတ်တိုဒီဇာဘီအား နည်းပြသစ်အဖြစ် ခန့်အပ်လိုနေကြောင်း သတင်းထွက်ပေါ်နေပါတယ်။

စပါးစ်ဟာ အသင်းကို ၄၄ ရက်သာ ကိုင်တွယ်ရသေးတဲ့ နည်းပြအိုင်ဂေါ်ကျူဒေါ်နှင့် လမ်းခွဲလိုက်ပြီးနောက် နည်းပြသစ်ခန့်အပ်ရေး ရှာဖွေနေပါတယ်။

စပါးစ်ဟာ နော်တင်ဟမ်ဖောရက်စ်ကို ၃-၀ ဂိုးဖြင့် ရှုံးနိမ့်ပြီးနောက် တန်းဆင်းဇုန်နှင့် တစ်မှတ်အကွာ အဆင့် ၁၇ နေရာမှာ ရပ်တည်နေတဲ့အပြင် ဖခင် သေဆုံးမှုပါ ကြုံနေရမှုကြောင် အိုင်ဂေါ်ကျူဒေါ်နှင့် လမ်းခွဲလိုက်တာလည်း ဖြစ်ပါတယ်။

ရောဘတ်တိုဒီဇာဘီဟာ မာဆေးမှ ထွက်ခွာလာပြီးနောက် အသင်းလက်မဲ့ ဖြစ်နေသူ ဖြစ်ပြီး စပါးစ်ရဲ့ အဓိကပစ်မှတ်ဖြစ်နေပါတယ်။

စပါးစ်ဘက်က အီတလီလူမျိုးနည်းပြအား နည်းပြသစ်အဖြစ် ခန့်အပ်လိုနေပါတယ်။

တဖက်တွင် စပါးစ်ဟာ အဲဗာတန်နှင့် နော်တင်ဟမ်ဖောရက်စ်နည်းပြဟောင်းရှောင်ဒိက်ချီကိုလည်း ယာယီနည်းပြအဖြစ် ခန့်အပ်ရန် စိတ်ဝင်စားနေကြောင်း သိရပါတယ်။

ရှောင်ဒိုက်ချီဟာ ဖေဖော်ဝါရီလတုန်းက ဖောရက်စ်ရဲ့ ထုတ်ပယ်ခြင်းခံခဲ့ရဖူးသူ ဖြစ်ပြီး ပရီးမီးယားလိဂ်တန်းဆင်းဇုန်တိုက်ပွဲအတွေ့အကြံးများစွာ ရှိသူလည်း ဖြစ်ပါတယ်။

ဒါပေမယ့် ရှောင်ဒိုက်ချီဘက်ကမူ အနည်းဆုံး ၁၈ လစာချုပ်သက်တမ်းဖြင့်သာ အလုပ်လုပ်လိုနေကြောင်း သိရပါတယ်။

စပါးစ်ဟာ အသင်းကို ရာသီအကုန်အထိ ဦးဆောင်ရန်အတွက် ရိုင်ယန်မေဆင်၊ ဟယ်ရီရက်နပ်၊ တမ်ရှားဝုဒ်စတဲ့ နည်းပြဟောင်းများကိုလည်း ယာယီနည်းပြအဖြစ် ခန့်အပ်ရန် လျာထားကြောင်း သိရပါတယ်။

ဒါတင်မကသေးပါဘူး။ စပါးစ်ဟာ လက်ရှိ အသင်းတွင် ကစားနေတဲ့ ဘင်ဒါးဗီးစ်ကိုလည်း ယာယီနည်းပြအဖြစ် ခန့်အပ်ရန် လျာထားပါသေးတယ်။

ဒဏ်ရာကြောင့် လက်ရွေးစင်အသင်းမှ နုတ်ထွက်ရတဲ့ အာဆင်နယ်ကစားသမား ၁၁ ဦးအထိ ရှိလာ
=====================
စပိန်ကွင်းလယ်ကစားသမားမာတင်ဇူဘီမန်ဒီ ဒဏ်ရာပြဿနာကြောင့် စပိန်အသင်းမှ နုတ်ထွက်လာမှုနှင့်အတူ လက်ရွေးစင်အသင်းမှ ဒဏ်ရာပြဿနာကြောင့် နုတ်ထွက်ရတဲ့ အာဆင်နယ်ကစားသမား ၁၁ ဦးအထိ ရှိလာပြီ ဖြစ်ပါတယ်။

စပိန်ကစားသမားဟာ သောကြာနေ့တုန်းက ဆားဘီးယားကို ၃-၀ ဂိုးဖြင့် အနိုင်ရတဲ့ စပိန်ရဲ့ ခြေစမ်းပွဲတွင် ပွဲပြီးခါနီး ၁၃ မိနစ်မှာ မန်စီးတီးရဲ့ရိုဒရီအစား လူစားဝင်ရောက်ကစားခဲ့ပါတယ်။

ဒါပေမယ့် အာဆင်နယ်အလယ်တန်းကစားသမားဟာ ဒဏ်ရာပြဿနာကြောင့် စပိန်အသင်းမှ နုတ်ထွက်လာမှုနှင့်အတူ အင်္ဂါနေ့တွင် အီဂျစ်နှင့်ကစားရမယ့် ခြေစမ်းပွဲစဉ်အား လွဲချော်လာတော့မှာလည်း ဖြစ်ပါတယ်။

စပိန်ဘောလုံးအဖွဲ့ချုပ်ရဲ့ ကြေညာမှုအရ ဇူဘီမန်ဒီဟာ ညာဖက်ဒူး သက်တောင့်သက်သာ မဖြစ်နေမှုနှင့်အတူ ဆိုးရွားတဲ့အခြေအနေ ဖြစ်လာနိုင်ခြေရှိမှုအား ရှောင်လွဲနိုင်ရန်အတွက် နုတ်ထွက်လာစေခြင်းဖြစ်ကြောင်း ဆိုသွားပါတယ်။

ဇူဘီမန်ဒီဟာ ပရီးမီးယားလိဂ်ဖလားအတွက် တိုက်ပွဲဝင်နေတဲ့ အာဆင်နယ်အသင်းမှ ဒဏ်ရာကြောင့် လက်ရွေးစင်အသင်းမှ နုတ်ထွက်ရတဲ့ ၁၁ ဦးမြောက် ကစားသမား ဖြစ်ပါတယ်။

စနေနေ့တုန်းက နောက်ခံလူပီရိုဟင်ကာပီမှာလည်း အီကွေဒေါအသင်းမှ နုတ်ထွက်ခဲ့ပါတယ်။ သူဟာ သောကြာနေ့ မော်ရိုကိုနှင့် ခြေစမ်းပွဲတွင် ၇၂ မိနစ်ကစားခဲ့ပါတယ်။ ဟင်ကာပီဟာ ဘယ်လို ဒဏ်ရာကြောင့် အီကွေဒေါအသင်းမှ နုတ်ထွက်လာသလဲ မသိရသေးပါဘူး။

အာဆင်နယ်အသင်းခေါင်းဆောင်မာတင်အိုဒီဂတ်မှာ ဒူးဒဏ်ရာပြဿနာ ရှိနေမှုနှင့်အတူ နော်ဝေအသင်းမှ နုတ်ထွက်ပြီးနောက် လက်ရွေးစင်အသင်းမှ နုတ်ထွက်တဲ့ ပထမဆုံးအာဆင်နယ်ကစားသမား ဖြစ်ပါတယ်။

ယင်းနောက် ဝီလီယံဆာလီဘာ၊ ဂါဘရီရယ်၊ လီယန်ဒရိုထရိုဆတ်၊ ဂျူရီယန်တမ်ဘား၊ အီဘီရီချီအီးဇီး၊ ဘူကာယိုဆာကာ၊ ဒီကလန်ရိုက်စ်၊ နိုနီမာဒူကီတို့လည်း နုတ်ထွက်ခဲ့ရပြီး ဖြစ်ပါတယ်။

စပါးစ်ကို ၄၄ ရက်သာ ကိုင်တွယ်ပြီးနောက် ထွက်ခွာလာတဲ့ အိုင်ဂေါ်ကျူဒေါ်
=====================
အိုင်ဂေါ်ကျူဒေါ်ဟာ စပါးစ်အသင်းကို ၄၄ ရက်သာ ကိုင်တွယ်ပြီး ၇ ပွဲ ကြီးကြပ်ပြီးနောက် ရာထူးမှ ထွက်ခွာလာခဲ့ပါတယ်။

စပါးစ်ဟာ ခရိုအေးရှားလူမျိုးနည်းပြနှင့် နှစ်ဦးသဘောတူ စာချုပ်ဖျက်သိမ်းမှုပြုလုပ်ခဲ့တာလည်း ဖြစ်ပါတယ်။

စပါးစ်ဟာ မတ်လ ၂၂ ရက်နေ့တုန်းက နော်တင်ဟမ်ဖောရက်စ်အား အိမ်ကွင်းတွင် ၃-၀ ဂိုးဖြင့် ရှုံးနိမ့်ကာ အမှတ်ပေးဇယားအဆင့် ၁၇ နေရာမှာ ရပ်တည်ပြီး တန်းဆင်းဇုန်နှင့် တစ်မှတ်အကွာတွင် ရပ်တည်ရပြီးနောက် ခရိုအေးရှားလူမျိုးနည်းပြနှင့် လမ်းခွဲခဲ့တာပါ။

အိုင်ဂေါ်ကျူဒေါ်ဟာ နော်တင်ဟမ်ဖောရက်စ်ရှုံးပွဲအပြီးတွင် ဖခင်ဖြစ်သူ ကွယ်လွန်ကြောင်း သိရပြီးနောက် ပွဲပြီးသတင်းစာရှင်းလင်းပွဲသို့ တက်ခဲ့ခြင်း မရှိပါဘူး။

ဂျူဗင်တပ်နည်းပြဟောင်းဟာ ဖေဖော်ဝါရီလ ၁၄ ရက်နေ့တွင် သောမတ်စ်ဖရန့်နေရာတွင် ရာသီအကုန်အထိ ယာယီနည်းပြအဖြစ် ခန့်အပ်ခြင်းခံရပြီးနောက် စပါးစ်အား ပြိုင်ပွဲအရပ်ရပ်တွင် ၇ ပွဲ ကြီးကြပ်ခဲ့ရာမှာ ၅ ပွဲ ရှုံးနိမ့်ခဲ့ပါတယ်။

စပါးစ်ဟာ အိုင်ဂေါ်ကျူဒေါ်နှင့် လမ်းခွဲလိုက်ပြီးနောက် အစားထိုးနိုင်မယ့် နည်းပြရှာဖွေနေပါတယ်။

စပါးစ်ဟာ နိုင်ငံတကာပွဲကြောင့် လိဂ်နားထားစဉ်အတွင်း အသင်းကို အိုင်ဂေါ်ကျူဒေါ်ရဲ့ လက်ထောက်နည်းပြဘရူနိုဆယ်တာအား လေ့ကျင့်ရေး ပြုလုပ်ထားစေပါတယ်။

ဒါ့အပြင် စပါးစ်ဟာ ကျူဒေါ်ရဲ့ နည်းပြအဖွဲ့ဝင်များဖြစ်ကြတဲ့ ဂိုးနည်းပြတိုမီဆလပ်ဗ်ရိုဂျစ်နှင့် ကြံ့ခိုင်ရေးနည်းပြရီကာဒိုရက်ဂနာခီတို့လည်း ထွက်ခွာသွားကြောင်း အတ်ပြု ကြေညာသွားပါတယ်။

မက္ကဆီကိုနှင့် ပေါ်တူဂီတို့ရဲ့ Azteca Stadium ကွင်းဖွင့်ပွဲမတိုင်မီ ပရိသတ်တစ်ဦး ပွဲကြည့်စင်ပေါ်မှ ပြုတ်ကျသေဆုံး
====================
ဘောလုံးပရိသတ်တစ်ဦးဟာ မက္ကဆီကိုရဲ့ ပေါ်တူဂီနှင့် ခြေစမ်းပွဲမတိုင်မီ အသစ်ပြန်လည်ဖွင့်လှစ်လာတဲ့ Azteca Stadium ကွင်းပေါ်မှ ပြုတ်ကျသေဆုံးသွားခဲ့ပါတယ်။

စပွန်ဆာရှင်အမည် Estadio Banorte ပေးထားတဲ့ ယင်းကွင်းကို လာမယ့် ကမ္ဘာ့ဖလားပြိုင်ပွဲအတွက် အကြီးစားပြန်လည်တည်ဆောက်မှု ပြုလုပ်ထားတာ ဖြစ်ပြီး မက္ကဆီကိုနှင့် ပေါ်တူဂီတို့ရဲ့ ခြေစမ်းပွဲက ကွင်းဖွင့်ပွဲလည်း ဖြစ်ပါတယ်။

ဒါပေမယ့် Estadio Banorte ကွင်းဖွင့်ပွဲတွင် လူတစ်ဦးမှာ ဒုတိယတန်း VIP Box မှ ပထမတန်းသို့ ခုန်ကူးစဉ် ပြုတ်ကျ သေဆုံးခဲ့ကြောင်း ရိုက်တာသတင်းဌာနရဲ့ ဖော်ပြမှုအရ သိရပါတယ်။

ဆေးဘက်ဆိုင်ရာဝန်ထမ်းများ ယင်းလူကို ကယ်ဆယ်ရေး ကြိုးပမ်းခဲ့ကြပေမယ့်လည်း ကံဆိုးစွာပင် သေဆုံးသွားခဲ့ပါတယ်။

မက္ကဆီကိုစီးတီးလုံခြုံရေးအရာရှိက ပြုတ်ကျသေဆုံးသွားသူမှာ မူးယစ်နေကြောင်း ဆိုသွားပါတယ်။

အခင်းဖြစ်ပွားရာနေရာသို့ မူခင်းဆိုင်ရာကျွမ်းကျင်သူများ၊ အရာရှိများအပါအဝင် တာဝန်ရှိသူများ လာရောက် စစ်ဆေးမှု ပြုလုပ်ခဲ့ကြပါတယ်။

မတော်တဆမှုကြောင့် လူသေဆုံးမှု ဖြစ်ခဲ့ပေမယ့်လည်း မက္ကဆီကိုနှင့် ပေါ်တူဂီပွဲကို အစီအစဉ်အတိုင်း ကစားသွားခဲ့ပြီး ဂိုးမရှိသရေဖြင့် ပြီးဆုံးသွားခဲ့ပါတယ်။

မက္ကဆီကိုဟာ ၂၀၂၆ ကမ္ဘာ့ဖလားပြိုင်ပွဲအား ပူးတွဲအိမ်ရှင်အဖြစ် ကျင်းပရန်အတွက် Azteca အပါအဝင် ကွင်းသုံးကွင်းအား အကြီးစားပြန်လည်တည်ဆောက်မှု ပြုလုပ်ခဲ့တာပါ။

Azteca ကွင်းမှာ မက္ကဆီကိုနှင့် တောင်အာဖရိကတို့ ကစားမယ့် ၂၀၂၆ ကမ္ဘာ့ဖလားအဖွင့်ပွဲကို လက်ခံကျင်းပမယ့်ကွင်းလည်း ဖြစ်ပြီး ဒီကွင်းမှာ ကမ္ဘာ့ဖလားပွဲ ၅ ပွဲ လက်ခံကျင်းပသွားပါမယ်။

Azteca ကွင်းဟာ ၁၉၇၀ နှင့် ၁၉၈၆ ကမ္ဘာ့ဖလားအဖွင့်ပွဲများကိုလည်း လက်ခံကျင်းပဖူးရာ ကမ္ဘာ့ဖလားအဖွင့်ပွဲ ၃ ပွဲ လက်ခံကျင်းပဖူးတဲ့ ပထမဆုံးကွင်း ဖြစ်လာပါမယ်။

မော်ရိုကိုနှင့် စပိန်အကြား ပြတ်သားစွာ ရွေးချယ်လာတဲ့ ရီးရဲလ်မက်ဒရစ်လူငယ်ပါရမီရှင်ပီတာ့ချ်
===================
ရီးရဲလ်မက်ဒရစ်ပါရမီရှင်အလယ်တန်းကစားသမားတီယာဂိုပီတာ့ချ်ဟာ စပိန်နှင့် မော်ရိုကိုတို့အကြား ဘယ်နိုင်ငံအသင်းအတွက် ကစားမလဲဆိုတာ ပြတ်သားစွာ ရွေးချယ်လာပြီ ဖြစ်ပါတယ်။

ပီတာ့ချ်ဟာ မက်ဒရစ်တွင် မွေးဖွားသူ ဖြစ်ပြီး ဒေသတွင်း အကယ်ဒမီများတွင် ကျင်လည်ပြီးနောက် ရီးရဲလ်မက်ဒရစ်အကယ်ဒမီသို့ ရောက်လာသူ ဖြစ်ပါတယ်။

သူဟာ စပိန်နိုင်ငံသားပတ်စ်ပို့ရော မော်ရိုကိုနိုင်ငံသားပတ်စ်ပို့ပါ ကိုင်ဆောင်ထားရာ နှစ်နိုင်ငံစလုံးအတွက် ကစားခွင့်ရှိနေပါတယ်။

သူဟာ စပိန်လူငယ်အသင်းများတွင် ကစားလာသူ ဖြစ်ပြီး ယူ-၁၉ နှင့် ယူ-၂၀ တို့အတွက် ကစားခဲ့သလို ၂၀၂၅ ယူ-၂၀ ကမ္ဘာ့ဖလားပြိုင်ပွဲလည်း ပါဝင်ကစားခဲ့ပါတယ်။

သူဟာ စပိန်လူငယ်အသင်းများတွင် ကစားထားပေမယ့်လည်း စပိန်စီနီယာအသင်းအတွက် ကစားခွင့် မရှိသေးမှုနှင့်အတူ မော်ရိုကိုကလည်း လက်ရွေးစင်အသင်းအတွက် ကစားရေး ဆွဲဆောင်နေပါတယ်။

ပီတာ့ချ်ရဲ့ ရီးရဲလ်မက်ဒရစ်ကစားဖော်ဘရာဟမ်ဒီယာ့ဇ်မှာ စပိန်လူငယ်အသင်းများတွင် ကစားပြီးမှ မော်ရိုကိုအသင်းအတွက် ကစားရန် ရွေးချယ်ခဲ့ဖူးပါတယ်။

ဒါပေမယ့် ပီတာ့ချ်ဟာ စပိန်နိုင်ငံတွင် ကြီးပြင်း စပိန်ဘောလုံးလောကတွင် ကျင်လည်လာသူ ဖြစ်ပြီး စပိန်လက်ရွေးစင်အတွက်သာ ကစားလိုကြောင်း အသိပေးမှု ပြုလုပ်လာပြီ ဖြစ်ပါတယ်။

မကြာသေးမီတုန်းက စပိန်ယူ-၂၁ တွင် ရွေးချယ်ခံလာရပြီးနောက် ပီတာ့ချ်က "ကျွန်တော့်အိပ်မက်လား။ စီနီယာအသင်းအတွက် ပထမဆုံးပွဲကစားခွင့်ရဖို့နဲ့ ဆုဖလားတွေ ရယူဖို့ပါ။ ထိပ်တန်းအဆင့်သို့ ရောက်လိုတဲ့အတွက် ဒီနေရာမှာ ရှိနေတာပါ။ တစ်ဆင့်ပြီး တစ်ဆင့် ကြိုးစားသွားမယ်"လို့ ပြောကြားသွားပါတယ်။

အသက် ၁၈ နှစ်အရွယ်ရှိ ပီတာ့ချ်ဟာ ဘာနေဗျူးတွင် မန်စီးတီးကို ၃-၀ ဂိုးဖြင့် အနိုင်ရတဲ့ ချန်ပီယံလိဂ်ပလေးအော့ဖ်ပထမအကျော့ပွဲစဉ်တွင် ရီးရဲလ်မက်ဒရစ်အတွက် ပထမဆုံးပွဲထွက်ကစားခွင့် ရပြီးနောက် အရေးပါတဲ့ ကစားသမားအဖြစ် တောက်လျှောက်ကစားခွင့်ရလာသူ ဖြစ်ပါတယ်။

သူဟာ ရီးရဲလ်မက်ဒရစ်အလယ်တန်းကစားသမားများ ဒဏ်ရာရရှိနေချိန်တွင် ချိန်သားကိုက်ဆိုသလို အာဘီလိုအာရဲ့အသင်းတွင် အရေးပါတဲ့ အခန်းကဏ္ဍမှ ကစားခွင့်ရလာတာလည်း ဖြစ်ပါတယ်။

ဒဏ်ရာပြဿနာကြုံလာပြီးနောက် စာချုပ်ချုပ်ဆိုရေး ဆွေးနွေးမှုကို ရွှေ့ဆိုင်းလာတဲ့ နူအာနှင့် ဘိုင်ယန်မြူးနစ်
=====================
မန်နူရယ်နူအာနှင့် ဘိုင်ယန်မြူးနစ်တို့ဟာ ဒဏ်ရာပြဿနာကြုံလာပြီးနောက် စာချုပ်ကိစ္စဆွေးနွေးရေးအား ရွှေ့ဆိုင်းမှု ပြုလုပ်လာပါတယ်။

အသက် ၄၀ နှစ်ရှိ ဂိုးသမားဟာ ကြွက်သားဒဏ်ရာပြဿနာ ကြုံလာရပြီးနောက် သူ့ခန္ဓာကိုယ်မှာ နောက်ထပ်တစ်ရာသီ ပရော်ဖက်ရှင်နယ်အဆင့်တွင် ကစားနိုင်ခြင်းရှိ/မရှိ သိရှိလိုနေတာလည်း ဖြစ်ပါတယ်။

Bild ရဲ့ ဖော်ပြလာမှုအရ နူအာဟာ ကြွက်သားဒဏ်ရာကြောင့် အနားယူရပြီးနောက် စာချုပ်ကိစ္စဆွေးနွေးမှုအား ရွှေ့ဆိုင်းပေးရန် ဘိုင်ယန်မြူးနစ်စီမံခန့်ခွဲရေးအဖွဲ့အား တောင်းဆိုခဲ့ကြောင်း သိရပါတယ်။

ကလပ်ဘက်ကလည်း မကြာသေးမီတုန်းက အသက် ၄၀ နှစ်ပြည့်ခဲ့တဲ့ နူအာရဲ့ တောင်းဆိုမှုကို လက်ခံသူပါ။

ဘိုင်ယန်မြူးနစ်ဟာ ဧပြီလလယ်ပိုင်းတွင် ကစားမယ့် ရီးရဲလ်မက်ဒရစ်နှင့် ချန်ပီယံလိဂ်ကွာတားဖိုင်နယ်ဒုတိယအကျော့ပွဲစဉ်အထိ နူအာနှင့်ပတ်သက်ပြီး တစုံတရာ ဆုံးဖြတ်ချက်ချလာမှာ မဟုတ်ပါဘူး။

တဖက်တွင် နူအာကလည်း ဒဏ်ရာမှ ပြန်လည်ကောင်းမွန်ရေးကိုသာ အာရုံစိုက်နေပါတယ်။

နူအာဟာ ဒဏ်ရာမှ ပြန်လည်ကောင်းမွန်လာချိန်တွင်မှ စာချုပ်သက်တမ်းတိုးမလား၊ ကစားသမားဘဝမှ အနားယူမလားဆိုတာ ဆုံးဖြတ်လာပါမယ်။

ဒီဇင်ဘာနှင့် ဖေဖော်ဝါရီတုန်းကလည်း ဒဏ်ရာပြဿနာများနှင့် ကြုံခဲ့ရတဲ့ နူအာဟာ ယခုရာသီတွင် ဘိုင်ယန်မြူးနစ်အတွက် ပြိုင်ပွဲအရပ်ရပ်တွင် ၂၉ ပွဲကစာထားရာမှာ ၂၇ ဂိုးတည်းသာ ပေးထားရပြီး ဂိုးမပေးရတဲ့ပွဲ ၁၀ ပွဲ ပိုင်ဆိုင်ထားပါတယ်။

ဓာတ်မြေသြဇာတင် ထိုင်းကုန်သင်္ဘောငါးစင်း ရေလက်ကြားတွင် ပိတ်မိနေ

ဟော်မုဇ်ရေလက်ကြားတွင် ဓာတ်မြေသြဇာတင် ထိုင်းကုန်သင်္ဘောငါးစင်း ပိတ်မိနေခဲ့ခြင်းကြောင့် ထောက်ပံ့ဖြည့်တင်းရေးဆိုင်ရာ စိုးရိမ်မှုများကို မြင့်တက်စေပြီး အရေးပေါ် အစီအမံများ ကို ချမှတ်လာရသည်။ ဝန်ကြီးချုပ် အနူတင် ချန်ဗီရာကူလ်က ရေနံကုန်ကျစရိတ်ဖွဲ့စည်းပုံများကို အရေးတကြီးပြန်လည်သုံးသပ်ရန်နှင့် တစ်နိုင်ငံလုံးအတိုင်းအတာဖြင့် ကယ်ဆယ်ရေးအစီအမံများကို စတင်ကျင့်သုံးရန် ဗုဒ္ဓဟူးနေ့တွင် အမိန့်ပေးခဲ့သည်။

ထိုင်းနိုင်ငံကို ဦးတည်နေသော ဓာတ်မြေသြဇာနှင့် ဆက်စပ်ကုန်ကြမ်းများကို တင်ဆောင်လာသော ကုန်တင်သင်္ဘောငါးစင်းသည် အရှေ့အလယ်ပိုင်းစစ်ပွဲကြောင့် ရေလက်ကြားကို ဖြတ်သန်းနိုင်ခြင်းမရှိကြောင်း ကူးသန်းရောင်းဝယ်ရေးဝန်ကြီး ဆူပါဂျီ ဆူထမ်ဖန်က ပြေကြားခဲ့သည်။

ဤဖြစ်ရပ်ကြောင့် အာဏာပိုင်များအတွက် ပြည်တွင်းရရှိနိုင်သော သွင်းအားစုများကို ပိုမိုအားကိုးရန်နှင့် ဓာတ်မြေသြဇာဖော်မြူလာများကို ပြုပြင်ပြောင်းလဲရေး စဉ်းစားရန်ဖြစ်စေခဲ့သည်။

ဤ အနှောင့်အယှက်ကြုံရမှုသည် အဓိကထောက်ပံ့ရေးကွင်းဆက်များ၊ အထူးသဖြင့် ဟော်မုဇ်ရေလက်ကြားမှတဆင့် သင်္ဘောလမ်းကြောင်းများကို အားကိုးနေရသော ဓာတ်မြေသြဇာနှင့် ရေနံဓာတုဗေဒလုပ်ငန်းများကို ထိခိုက်စေခဲ့ကြောင်း စနေနေ့က “ကမ္ဘာလုံးဆိုင်ရာ အကျပ်အတည်းတစ်လတာ- ပြောင်းလဲနေသော ကမ္ဘာတွင် ထိုင်းနိုင်ငံ၏ တုန့်ပြန်မှု” ခေါင်းစဉ်ဖြင့် ကျင်းပသော ဖိုရမ်တွင် မစ္စဆူပါဂျီက ပြောကြားခဲ့သည်။

ဓာတ်မြေသြဇာသိုလှောင်ထားနိုင်မှုသည် ယခင်က သြဂုတ်လအထိရှိမည်ဟု မျှော်လင့်ထားသော်လည်း မမျှော်လင့်ထားသော ပိတ်ဆို့မှုကြောင့် သယ်ယူပို့ဆောင်နေဆဲ ကုန်ပစ္စည်းများနှင့် တင်ဆောင်ရန် စောင့်ဆိုင်းနေသော ကုန်ပစ္စည်းအသစ်များ နှစ်မျိုးစလုံးကို ရပ်တန့်သွားစေသောကြောင့် စိုးရိမ်မှုအသစ်များ ပေါ်ပေါက်လာခဲ့သည်။

ယင်းအခက်အခဲကြောင့် ကူးသန်းရောင်းဝယ်ရေးဝန်ကြီးဌာနသည် အခြေအနေကို စောင့်ကြည့်ရန်နှင့် ပြည်တွင်းထုတ်လုပ်မှုအတွက် မရှိမဖြစ်လိုအပ်သော ကုန်ကြမ်းများကို စီမံခန့်ခွဲရန်အတွက် နိုင်ငံခြားရေးဝန်ကြီးဌာနနှင့် နီးကပ်စွာပူးပေါင်းဆောင်ရွက်လျက်ရှိသည်။

Ref: ဘန်ကောက်ပို့စ်

ပဲခူး၊ ပြင်ဦးလွင်၊ ရန်ကုန်-မန္တလေးလမ်းဟောင်းနှင့် အမြန်လမ်းမကြီးတစ်လျှောက်တွင် Bar Code/QR Code စနစ်စတင်

ပဲခူး၊ ပြင်ဦးလွင်၊ ရန်ကုန်-မန္တလေးလမ်းဟောင်းနှင့် အမြန်လမ်းမကြီးတစ်လျှောက်ရှိ စက်သုံးဆီအရောင်းဆိုင်များတွင် စက်သုံးဆီရောင်းချရာ၌ Bar Code/QR Code စနစ်ကို ယနေ့ မတ် ၂၈ ရက်မှစတင်၍အသုံးပြုပြီဖြစ်ကြောင်း စွမ်းအင်ဝန်ကြီးဌာနကအသိပေးခဲ့သည်။

နိုင်ငံတော်တွင် စက်သုံးဆီကိုစနစ်တကျသုံးစွဲနိုင်စေရန်နှင့် လေလွင့်ဆုံးရှုံးမှုလျော့နည်းစေရန်ရည်ရွယ်၍ စက်သုံးဆီရောင်းချရာ၌ Bar Code/QR Code စနစ်သစ်ဖြင့် မတ် ၂၇ ရက်မှစတင်ကာ ရောင်းချပေးလျက်ရှိခြင်းဖြစ်သည်။

ထိုသို့ စနစ်သစ်ဖြင့်ရောင်းချရာ၌ နည်းပညာဆိုင်ရာ အ ခက်အခဲများ၊ မသမာမှုများနှင့် မမျှော်မှန်းနိုင်သည့် အ ခက်အခဲများကိုဖြေရှင်းနိုင်ရန် စွမ်းအင်ဝန်ကြီးဌာနက Online Monitoring Center မှစောင့်ကြည့်ခြင်း၊ Call Center ဖွင့်လှစ်၍ဖြေရှင်းခြင်း၊ ထိန်းကျောင်းကြပ် မတ်ခြင်းများကို ပြုလုပ်လျက်ရှိသည်။

ထို့ကြောင့် စက်သုံးဆီဝယ်ယူရာ၌ အခက်အခဲများနှင့် မသမာမှုများတွေ့ရှိရပါက Call Center သို့တိကျစွာ အသိပေးတိုင်ကြားနိုင်သည်ဟု စွမ်းအင်ဝန်ကြီးဌာနက အသိပေးမေတ္တာရပ်ခံထားသည်။

စက်သုံးဆီအရောင်းဆိုင်(၃)ဆိုင်၏လိုင်စင်များကို ယာယီပိတ်သိမ်းပြီး စက်သုံးဆီသိုလှောင်သူကိုအမှုဖွင့်

သတ်မှတ်စည်းကမ်းချက်များကိုလိုက်နာခြင်းမရှိ၍ သတင်းပေးတိုင်ကြားချက်များကြောင့် နေပြည်တော်နှင့် မန္တလေးတိုင်းတို့ရှိ စက်သုံးဆီအရောင်းဆိုင်(၃)ဆိုင်၏ လိုင်စင်များကို ယာယီပိတ်သိမ်းခဲ့ကြောင်းစွမ်းအင်ဝန်ကြီးဌာနထံမှ သိရသည်။

နေပြည်တော်၊ ပုဗ္ဗသီရိမြို့နယ်ရှိ "ရွှေပိုး"စက်သုံးဆီအရောင်းဆိုင်၊ လိုင်စင်အမှတ်(၂၅၉၇)၊ မန္တလေးတိုင်း၊ ပြည်ကြီးတံခွန်မြို့နယ်၊ ဈ-ရပ်ကွက်၊ ၆၂ လမ်းပေါ်ရှိ "ရွှေခြင်္သေ့"စက်သုံးဆီအရောင်းဆိုင်၊ လိုင်စင်အမှတ် (၀၇၃၀)နှင့် ပြည်ကြီးတံခွန်မြို့နယ်၊ ထိန်ကုန်းရပ်ကွက်၊ ရန်ကုန်-မန္တလေးလမ်းဟောင်းပေါ်ရှိ "အောင်သိဒ္ဓိ"စက်သုံးဆီအရောင်းဆိုင်၊ လိုင်စင်အမှတ်(၀၄၈၀)တို့၏ လိုင်စင်များကိုယာယီပိတ်သိမ်းခဲ့ကာ စက်သုံးဆီအရောင်းဆိုင်မန်နေဂျာများနှင့် ဝန်ထမ်းများကိုလည်း ဥပဒေအရအရေးယူထားကြောင်း သိရသည်။

ထို့ပြင် ရန်ကုန်တိုင်း၊ ဒဂုံမြို့သစ်(ဆိပ်ကမ်း)မြို့နယ်၊ ၆၀/B ရပ်ကွက်၊ မြနန္ဒာလမ်းသွယ်(ကျူးကျော်)နေ ဦးမြင့်မောင်သည်လည်း စက်သုံးဆီများကို တရားမဝင်သိုလှောင်ထားကြောင်းတိုင်ကြားမှုအရ စစ်ဆေးမှုများပြုလုပ်ရာ တရားမဝင်စက်သုံးဆီများသိုလှောင်ထားကြောင်းတွေ့ရှိရသဖြင့် အမှုဖွင့်အရေးယူထားကြောင်း သိရသည်။

စက်သုံးဆီအားစနစ်သစ်ဖြင့်ရောင်းချချိန်တွင် ကားနှင့် ဆိုင်ကယ်စီးရေသိန်းချီလျော့ကျသွား

စက်သုံးဆီဝယ်ယူရာ၌ QR စနစ်အသုံးပြုနေသည့် မြို့ကြီး(၄)မြို့တွင် စနစ်ဟောင်းဖြင့်ရောင်းရာမှ မတ် ၂၇ ရက်မှစတင်၍ Bar Code/QR Code စနစ်သစ်ဖြင့်ရောင်းချခဲ့ရာ စက်သုံးဆီဝယ်ယူသည့် ကားနှင့်ဆိုင်ကယ်စီးရေသိန်းချီလျော့ကျသွားခဲ့ကြောင်း စွမ်းအင်ဝန်ကြီးဌာနထံမှ သိရသည်။

မတ် ၂၅ ရက်တွင် ဆိုင်ကယ်/သုံးဘီး (၁၈၉,၉၀၇) စီး၊ ကား(၁၃၈,၁၅၇)စီး စက်သုံးဆီဖြည့်တင်းခဲ့ပြီး မတ် ၂၇ ရက်စနစ်သစ်စတင်ချိန်တွင် ဆိုင်ကယ်/သုံးဘီး (၁၄၉,၆၉၀)စီး၊ ကား(၁၀၅,၃၄၅စီးလျော့ကျသွားခဲ့ကြောင်း သိရသည်။

ထို့ပြင် မတ် ၂၆ ရက်တွင် ဆိုင်ကယ်/သုံးဘီး (၁၈၄,၂၈၄)စီး၊ ကား(၁၁၃,၀၂၈)စီးစက်သုံးဆီဖြည့် တင်းခဲ့ကြကာ မတ် ၂၈ ရက်တွင် ဆိုင်ကယ်/သုံးဘီး (၁၆၅,၃၇၁)စီး၊ ကား(၁၀၇,၉၆၅)စီးသို့လျော့ကျသွားခဲ့ကြောင်း သိရသည်။

ထို့အတူ လယ်ယာစိုက်ပျိုးရေးကဏ္ဍသုံးစက်ပစ္စည်းများအတွက် သက်ဆိုင်ရာတိုင်း/ပြည်နယ်အစိုးရအဖွဲ့၏ သတ်မှတ်ပေးထားသော စက်သုံးဆီအရောင်းဆိုင်များတွင်ထောက်ခံချက်ဖြင့်ရောင်းချပေးလျက်ရှိကြောင်း သိရသည်။

စက်သုံးဆီဈေးနှုန်းတိုးမြင့်လာမှုကို အခွင့်ကောင်းယူ၍ အချို့အရောင်းဆိုင်များသည် ရောင်းချခြင်းမပြုဘဲ ဆိုင်ပိတ်ထားခြင်း၊ အချို့ဆိုင်များသည် Scan မဖတ်ဘဲရောင်းချပေးနေခြင်း၊ Taxi များသည်ခွဲတမ်းပိုမိုရရှိမှုကိုအခွင့်ကောင်းယူ၍ မသမာမှုများပြုလုပ်လာခြင်းတို့ကြောင့် ဖွင့်လှစ်ရောင်းချနေသည့်အရောင်းဆိုင်များတွင် ယာဉ်များတန်းစီမှုပိုများလာသည်ကို စစ်ဆေးတွေ့ရှိရသည်ဟုလည်း စွမ်းအင်ဝန်ကြီးဌာနကအသိပေးထားကြောင်း သိရသည်။