နိုင်ငံတကာပါလီမန်ဆက်ဆံရေး မြှင့်တင်ရေး AIPA နှင့် IPU ကော်မတီနှစ်ရပ် ဖွဲ့စည်းရေး ပြည်ထောင်စုလွှတ်တော်သို့ တင်ပြ

နိုင်ငံတကာပါလီမန်ဆက်ဆံရေးနှင့် ပူးပေါင်းဆောင်ရွက်မှုများ မြှင့်တင်နိုင်ရေးအတွက် အာဆီယံပါလီမန်များညီလာခံဆိုင်ရာ ပူးပေါင်းကော်မတီ (AIPA) နှင့် နိုင်ငံတကာပါလီမန်များအဖွဲ့ဆိုင်ရာ ပူးပေါင်းကော်မတီ (IPU) တို့ကို ဖွဲ့စည်းရန် ပြည်ထောင်စုလွှတ်တော်သို့ တင်ပြခဲ့ကြောင်း သိရသည်။
အဆိုပါကိစ္စကို ဇွန် ၁၆ ရက် နံနက် ၁၀ နာရီက ကျင်းပသည့် တတိယအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး တတိယနေ့တွင် တင်ပြခဲ့ခြင်းဖြစ်သည်။
AIPA ဆိုင်ရာ ပူးပေါင်းကော်မတီကို ဥက္ကဋ္ဌအဖြစ် ဧရာဝတီတိုင်းဒေသကြီး အမျိုးသားလွှတ်တော်ကိုယ်စားလှယ် အမှတ် (၁၀) ဦးချစ်ဆွေ၊ အတွင်းရေးမှူးအဖြစ် မြစ်သားမဲဆန္ဒနယ်မှ ဦးစန်းမြင့်တို့အပါအဝင် အဖွဲ့ဝင် ၁၆ ဦးဖြင့် ဖွဲ့စည်းသွားမည်ဖြစ်ကြောင်း သိရသည်။
ထို့ပြင် IPU ဆိုင်ရာ ပူးပေါင်းကော်မတီကို ဥက္ကဋ္ဌအဖြစ် ရပ်စောက်မဲဆန္ဒနယ်မှ ဒေါက်တာပွင့်ဆန်း၊ အတွင်းရေးမှူးအဖြစ် ရန်ကုန်တိုင်းဒေသကြီး အမျိုးသားလွှတ်တော်ကိုယ်စားလှယ် အမှတ် (၅) ဦးအောင်သီဟတို့အပါအဝင် အဖွဲ့ဝင် ၁၄ ဦးဖြင့် ဖွဲ့စည်းသွားမည်ဖြစ်ကြောင်း သိရသည်။
အဆိုပါ ကော်မတီနှစ်ရပ် ဖွဲ့စည်းရခြင်း၏ ရည်ရွယ်ချက်၊ တာဝန်နှင့် လုပ်ပိုင်ခွင့်များ၊ သက်တမ်းသတ်မှတ်ချက်များကို သက်ဆိုင်ရာ လွှတ်တော်ကိုယ်စားလှယ်များက ရှင်းလင်းတင်ပြခဲ့ကြပြီး လွှတ်တော်၏ သဘောတူညီချက် ရယူခြင်းကို အစည်းအဝေး စတုတ္ထနေ့တွင် ဆက်လက်ဆောင်ရွက်သွားမည်ဖြစ်ကြောင်း သိရသည်။

မြန်မာနိုင်ငံလွှတ်တော်အဖွဲ့ (MPU) ဖွဲ့စည်းမည်၊ ပြည်ထောင်စုလွှတ်တော်နာယက ဦးအောင်လင်းဒွေး ဥက္ကဋ္ဌတာဝန်ယူမည်

တတိယအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး တတိယနေ့ကို ဇွန် ၁၆ ရက် နံနက် ၁၀ နာရီက ကျင်းပခဲ့ရာ ပြည်ထောင်စုလွှတ်တော်နာယက ဦးအောင်လင်းဒွေး ဥက္ကဋ္ဌအဖြစ် တာဝန်ယူမည့် မြန်မာနိုင်ငံလွှတ်တော်အဖွဲ့ (Myanmar Parliamentary Union - MPU) ကို ဖွဲ့စည်းသွားမည်ဖြစ်ကြောင်း သိရသည်။
အဆိုပါ MPU ကို ဥက္ကဋ္ဌအဖြစ် ပြည်ထောင်စုလွှတ်တော်နာယက ဦးအောင်လင်းဒွေး၊ ဒုတိယဥက္ကဋ္ဌအဖြစ် ပြည်သူ့လွှတ်တော်ဥက္ကဋ္ဌ ဦးခင်ရီ၊ အတွင်းရေးမှူးအဖြစ် ပြည်ထောင်စုလွှတ်တော် ဒုတိယနာယက Jang Phang နော်တောင် (ခ) ဦးနော်တောင်တို့က တာဝန်ယူမည်ဖြစ်သည်။
ထို့ပြင် ပြည်သူ့လွှတ်တော် ဒုတိယဥက္ကဋ္ဌ ဦးမောင်မောင်အုန်းနှင့် တိုင်းဒေသကြီးနှင့် ပြည်နယ်လွှတ်တော် ဥက္ကဋ္ဌများ စုစုပေါင်း ၁၈ ဦးတို့ကို အဖွဲ့ဝင်များအဖြစ် ထည့်သွင်းဖွဲ့စည်းသွားမည်ဖြစ်ကြောင်း သိရသည်။
မြန်မာနိုင်ငံလွှတ်တော်အဖွဲ့ (MPU) ဖွဲ့စည်းခြင်းနှင့်စပ်လျဉ်း၍ လွှတ်တော်၏ သဘောတူညီချက်ရယူခြင်းကို အစည်းအဝေး စတုတ္ထနေ့တွင် ဆက်လက်ဆောင်ရွက်သွားမည်ဖြစ်ကြောင်း သိရသည်။
တတိယအကြိမ် လွှတ်တော်သက်တမ်းကာလအတွင်း MPU ၏ ရည်ရွယ်ချက်များကို အကောင်အထည်ဖော်ဆောင်ရွက်နိုင်ရေးနှင့် လွှတ်တော်ရေးရာလုပ်ငန်းများကို ပိုမိုထိရောက်စွာ ဆောင်ရွက်နိုင်ရေးအတွက် ပြည်ထောင်စုလွှတ်တော်ဆိုင်ရာ ဥပဒေပုဒ်မ ၈၄-ခ အရ မြန်မာနိုင်ငံလွှတ်တော်အဖွဲ့ (MPU) ကို ဖွဲ့စည်းရန် ပြည်ထောင်စုလွှတ်တော်၏ သဘောတူညီချက် ရယူရမည်ဖြစ်ကြောင်း သိရသည်။

ဒဂုံအရှေ့ပိုင်း လူဦးရေ ၄ သိန်းကျော်အတွက် ကျန်းမာရေးဝန်ဆောင်မှု မြှင့်တင်ပေးမည့် (၂)ထပ် ဆေးကုသဆောင်သစ် ဖွင့်လှစ်

ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)မြို့နယ်ရှိ လူဦးရေ ၄ သိန်းကျော်ကို ပိုမိုကောင်းမွန်သည့် ကျန်းမာရေးစောင့်ရှောက်မှု ဝန်ဆောင်မှုများ ပေးနိုင်ရန် ရည်ရွယ်၍ (၂)ထပ် ဆေးကုသဆောင်သစ်ကို ဒဂုံမြို့သစ်(အရှေ့ပိုင်း) ပြည်သူ့ဆေးရုံဝင်းအတွင်း ဇွန် ၁၆ ရက်က ဖွင့်လှစ်ခဲ့ကြောင်း သိရသည်။
ဖွင့်ပွဲအခမ်းအနားသို့ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်း၊ ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်ဦး၊ လူမှုရေးရာဝန်ကြီးနှင့် ကုသရေးဦးစီးဌာန ညွှန်ကြားရေးမှူးချုပ်တို့ တက်ရောက်ခဲ့ကြပြီး ဆေးကုသဆောင်သစ်အား ဖဲကြိုးဖြတ်ဖွင့်လှစ်ပေးခဲ့ကြသည်။
ထို့နောက် တာဝန်ရှိသူများသည် အဆောက်အဦသစ်အတွင်းရှိ လူနာဆောင်များ၊ ခွဲစိတ်ခန်းများနှင့် သွားနှင့်ခံတွင်းကုသရေးဌာနတို့ကို လှည့်လည်ကြည့်ရှုခဲ့ကြပြီး ဆေးရုံတက်ရောက်ကုသနေသည့် လူနာများအား စားသောက်ဖွယ်ရာများ ပေးအပ်ခဲ့ကြောင်း သိရသည်။
အဆိုပါ ဆေးကုသဆောင်သစ်သည် အကျယ်အဝန်း ၁၆,၈၀၀ စတုရန်းပေရှိပြီး ခွဲစိတ်ခန်းပါဝင်သည့် RC နှစ်ထပ်အဆောက်အဦဖြစ်ကာ ၂၀၂၄-၂၀၂၅ ဘဏ္ဍာရေးနှစ်မှစတင်၍ နိုင်ငံတော်ခွင့်ပြုရန်ပုံငွေ ကျပ် ၁,၇၈၉ ဒသမ ၄၄၅ သန်းဖြင့် ဆောက်လုပ်ရေးဝန်ကြီးဌာန၊ အဆောက်အဦအထူးအဖွဲ့(၁)က တည်ဆောက်ခဲ့ခြင်းဖြစ်ကြောင်း သိရသည်။
ဆေးကုသဆောင်သစ် ဖွင့်လှစ်နိုင်ခြင်းကြောင့် ဒဂုံမြို့သစ်(အရှေ့ပိုင်း)မြို့နယ်နှင့် အနီးဝန်းကျင်ဒေသများမှ ပြည်သူများအတွက် ကျန်းမာရေးဝန်ဆောင်မှုများ ပိုမိုလွယ်ကူထိရောက်စွာ ရရှိလာမည်ဖြစ်ကြောင်း သိရသည်။

ကိတ်ဗာဒီနှင့် ဂိုးမရှိသရေကျပြီးနောက် ချစ်သူရဲ့ နှစ်သိမ့်ခြင်းခံခဲ့ရတဲ့ လာမိန်းယာမဲလ်
======================

လာမိန်းယာမဲလ်ဟာ အသင်းငယ်လေးကိတ်ဗာဒီနှင့်ပွဲတွင် ဂိုးသွင်းနိုင်ခဲ့ခြင်း မရှိဘဲ အံ့ဩသင့်ဖွယ် ဂိုးမရှိသရေကျပြီးနောက် ချစ်သူရဲ့အားပေးနှစ်သိမ့်ခြင်းခံခဲ့ရပါတယ်။
အသက် ၁၈ နှစ် အရွယ်ရှိ ဘာစီလိုနာပါရမီရှင်ကစားသမားဟာ ယင်းပွဲတွင် လူစားဝင်ရောက်ကစားလာပြီးနောက် အသင်းငယ်ကိတ်ဗာဒီရဲ့ ခံစစ်ကြောင်းကို ဖြိုခွဲရေး ကြိုးပမ်းခဲ့ပေမဲ့ မအောင်မြင်ခဲ့ပါဘူး။
ပွဲအပြီးမှာတော့ လာမိန်းယာမဲလ်ကို ပွဲကြည့်စင်တွင် ချစ်သူ၊ သူငယ်ချင်းများ၊ မိသားစုဝင်များနှင့်အတူ တွေ့ခဲ့ရပါတယ်။
စပိန်အင်ဖလူရင်ဇာနှင့် မော်ဒယ်အိုင်နက်စ်ဂါစီယာဟာ ပွဲကြည့်စင်တွင် လာမိန်းယာမဲလ်အား နှစ်သိမ့်မှုများ ပြုလုပ်ပေးခဲ့ပါတယ်။
အသက် ၂၁ နှစ်ရှိ ဂါစီယာဟာ ပြီးခဲ့တဲ့လတုန်းက လာမိန်းယာမဲလ်နှင့် ချစ်ကြိုက်နေကြောင်း လူသိရှင်ကြား ကြေညာခဲ့တာ ဖြစ်ပြီး အမေရိကန်သို့ လိုက်ပါက ချစ်သူကို အားပေးနေတာလည်း ဖြစ်ပါတယ်။
သူမဟာ လာမိန်းယာမဲလ်အမည်ပါ စပိန်အသင်းအင်္ကျီဝတ်ဆင်ပြီး စပိန်ကို ကြည့်ရှုအားပေးခဲ့ပါတယ်။
လာမိန်းယာမဲလ်ဟာ မိနစ် ၂၀ ပွဲကစားခဲ့ပေမဲ့ ကိတ်ဗာဒီခံစစ်ကြောင်းကို မကျော်ဖြတ်နိုင်ခဲ့ပါဘူး။
ယင်းပွဲတွင် စပိန်ဟာ ဘောလုံးပိုင်ဆိုင်မှု ၆၂ ရာခိုင်နှုန်းအထိ ရရှိပြီး ဂိုးပေါက်ကန်ချက် ၂၃ ကြိမ်အထိ ပြုလုပ်ခဲ့ပေမဲ့ ဂိုးပေါက်မတွေ့ခဲ့ပါဘူး။
ကိတ်ဗာဒီဟာ အသက် ၄၀ နှစ်အရွယ် ဂိုးသမားဗိုဇင်ဟာရဲ့ လက်စွမ်းပြမှုကြောင့် ဂိုးမပေးခဲ့ရတာလည်း ဖြစ်ပါတယ်။
ဗိုဇင်ဟာဟာ ယင်းပွဲတွင် ၇ ကြိမ်ကာကွယ်မှု ပြုလုပ်ခဲ့တာ ဖြစ်ပြီး ပွဲကစားနေချိန်တွင် အင်စတာဂရမ်တွင် ဖော်လိုဝါ ၁.၅ သန်းကျော်အထိ ရရှိသွားခဲ့ပါတယ်။ S

လိင်အကြမ်းဖက်မှုကြောင့် စပိန်တိုက်စစ်မှူးရာဖာမာ ထောင်ဒဏ် ၈ နှစ်ခွဲ ချမှတ်ခြင်းခံလာရ
=====================

ဝုဗ်နှင့် နော်တင်ဟမ်ဖောရက်စ်တိုက်စစ်မှူးဟောင်းရာဖာမာဟာ လိင်အကြမ်းဖက်မှု ပြုလုပ်ခဲ့ကြောင်း စစ်ဆေးတွေ့ရှိပြီးနောက် စပိန်ရှိ တရားရုံးတစ်ခုရဲ့ ထောင်ဒဏ် ၈ နှစ်ခွဲ ချမှတ်ခြင်းခံလာရပါတယ်။
ဒါ့အပြင် ဆီဗီလာတိုက်စစ်မှူးဟာ နစ်နာသူအား နစ်နာကြေး ယူရို ၆၄၀၀၀ ပေးရန်လည်း ဆုံးဖြတ်ခြင်းခံလာရပါတယ်။
တရားရုံးက ရာဖာမာနှင့်အတူ ပါဝင်ခဲ့တဲ့ သူငယ်ချင်းဖြစ်သူ ဂျာရာကိုလည်း လိင်အကြမ်းဖက်မှုဖြင့် ထောင်ဒဏ် ၂ နှစ်အပြင် စိတ်ပိုင်းဆိုင်ရာနစ်နာစေမှုအတွက် ထောင်ဒဏ် ၆ လချမှတ်ခြင်းခံလာရပါတယ်။ ဂျာရာဟာ ဒဏ်ငွေ ယူရို ၆၂၈၀ လည်း ချမှတ်ခံခဲ့ရပါတယ်။
တရားရုံးရဲ့ ဆုံးဖြတ်ချက်က အတည်မဟုတ်သေးပါဘူး။ ရာဖာမာက အယူခံဝင်သွားမယ်လို့ ကြေညာထားပါတယ်။
ရာဖာမာဟာ ပြီးခဲ့တဲ့ရာသီတုန်းက ဆီဗီလာမှ အယ်ချီသို့ အငှားဖြင့် သွားရောက် ကစားခဲ့စဉ်အတွင်း ၂၇ ပွဲတွင် ၈ ဂိုးသွင်းယူခဲ့သူလည်း ဖြစ်ပါတယ်။
မေလတုန်းက တရားရုံးတွင် တစ်ရက်တာ စစ်ဆေးမှုခံယူစဉ်တုန်းက ရာဖာမာက အမျိုးသမီး ၂ ဦးတို့က ၎င်းတို့နှင့် လိင်ဆက်ဆံရန် သဘောတူညီခဲ့တယ်လို့ ထွက်ဆိုထားပါတယ်။
ရာဖာမာဟာ ဗလင်စီယာတွင် အငှားဖြင့် သွားကစားနေစဉ် အထက်ပါအမှုအား ကျူးလွန်ခဲ့တာ ဖြစ်ပြီး ဂျာရာမှာလည်း ဒုတိယတန်းကလပ် အယ်ဘာစီတီမှာ ကစားနေတဲ့သူ ဖြစ်ပါတယ်။
စပိန်ယူ-၂၁ နှင့် ယူ-၂၃ အသင်းတို့တွင် ကစားခွင့်ရခဲ့တဲ့ ရာဖာမာဟာ လက်စ်ပါးမက်စ်၊ ဟူစကာတို့တွင်လည်း ကစားခဲ့ဖူးသူ ဖြစ်ပါတယ်။

ခံစစ်အား ယခင်ထက်ပိုပြီး အကူအညီပေးသွားမယ်လို့ ပြင်သစ်အသင်းခေါင်းဆောင်ဘက်ပေး ကြုံးဝါးပြောကြားလာ
====================

ပြင်သစ်အသင်းခေါင်းဆောင်ကိုင်လီယန်ဘက်ပေးက ကမ္ဘာ့ဖလားပြိုင်ပွဲအတွင်းတွင် ပြင်သစ်အသင်းအတွက် ခံစစ်ပိုင်းတွင်လည်း ပိုမို အကူအညီပေးသွားမယ်လို့ ကတိပြု ပြောကြားလာပါတယ်။
အသက် ၂၇ နှစ်ရှိ ဘက်ပေးဟာ ကလပ်နှင့် နိုင်ငံအသင်းတို့တွင် ခေါင်းဆောင်မှု၊ စွမ်းဆောင်ရည်ပိုင်းတို့အတွက် ဝေဖန်မှုများနှင့် ကြုံနေရသူ ဖြစ်ပြီး ကစားဖော်ဒမ်ဘီလီကိုယ်တိုင် ရှေ့ထွက်ကာ အကာအကွယ်ပေးမှု ပြုလုပ်လာရပါတယ်။
La Parisie သတင်းစာနှင့် အင်တာဗျူးမှာတော့ ဘက်ပေးက "နောက်ထပ် ခြေလှမ်းထပ်လှမ်းဖို့ လိုတယ်(ခံစစ်ပိုင်းလုပ်မှု)။ ဒီကလည်း အသင်းအတွက် အရေးပါတဲ့ အရာပါ။ ဒါကို ကျွန်တော် လုပ်ရမယ်။ ကျွန်တော်တို့ နိုင်ပြီးရင်း နိုင်ချင်နေတာကြောင့် အခုက စလုပ်ရမယ်။ အနိုင်အတွက် ဘာမဆို လုပ်ဖို့ အသင့် ဖြစ်နေတာကြောင့် လုပ်ဖို့လည်း အသင့်ပါ"လို့ ပြောကြားသွားပါတယ်။
၂၀၂၄ ခုနှစ်တွင် ပီအက်စ်ဂျီမှ ရီးရဲလ်မက်ဒရစ်သို့ ပြောင်းလာခဲ့တဲ့ ဘက်ပေးဟာ နှစ်ရာသီဆက် အဓိကဆုဖလားလက်မဲ့ ကြုံပြီးနောက် အဝတ်အစားလဲခန်းအတွင်း ကစားဖော်များနှင့် အဆင်မပြေမှုများ ဖြစ်နေတယ်လို့လည်း သတင်းထွက်နေသူပါ။
သူဟာ လာလီဂါဂိုးသွင်းဘုရင်ဖြစ်ခဲ့ပေမဲ့ Opta ရဲ့မှတ်တမ်းအချက်အလက်များအရ ခံစစ်ပိုင်း လုပ်ဆောင်မှု အလွန်နည်းပါးတာ တွေ့ရပါတယ်။
သူဟာ ဥရောပထိပ်သီးလိဂ်ကြီး ၅ ခုမှ ကစားသမား ၁၄၉၀ ဦးတို့တွင် ခံစစ်ပိုင်း စွမ်းဆောင်ရည်အဆင့် ၁၃၅၀ တွင်သာ ရပ်တည်ထားနိုင်တာ တွေ့ရပါတယ်။
သူဟာ တစ်ပွဲပျမ်းမျှ ဘောလုံးဖျက်ထုတ်မှု ၀.၁၄ ကြိမ်သာ ပြုလုပ်ထားပါတယ်။

စပိန်တို့ ကိတ်ဗာဒီကို အနိုင်မရလို့ မိုက်ရူးရဲဆန်စွာ လောင်းကြေးထပ်ခဲ့တဲ့ လောင်းကစားသမားတစ်ဦး ပေါင် ၃.၂ သန်း ရရှိသွားခဲ့
====================

လောင်းကစားသမားတစ်ဦးဟာ ကမ္ဘာ့ဖလားပြိုင်ပွဲတွင် ကိတ်ဗာဒီကို စပိန်တို့ အနိုင်မရလို့ မိုက်ရူးရဲဆန်စွာ လောင်းကြေးထပ်ပြီးနောက် ပေါင် ၃.၂ သန်းအထိ အနိုင်ရရှိသွားခဲ့ပါတယ်။
ယူရိုချန်ပီယံ စပိန်ဟာ အသင်းငယ်ကိတ်ဗာဒီကို သက်တောင့်သက်သာဖြင့် ဂိုးပြတ်အနိုင်ရရှိမယ်လို့ တကမ္ဘာလုံးရဲ့ ခန့်မှန်းခြင်းခံထားရတာပါ။
ဒါပေမဲ့ အတ္တလန္တာတွင် ကစားတဲ့ ယင်းပွဲတွင် စပိန်တို့ ဂိုးပေါက် ရှာမတွေ့ဘဲ ဂိုးမရှိသရေဖြင့်သာ ကျေနပ်ခဲ့ရပါတယ်။
Polymarket Sports မှ လောင်းကစားသမားတစ်ဦးဟာ ယင်းပွဲတွင် စပိန်တို့ အနိုင်မရဆိုပြီး ၁၀/၁ ဖြင့် ကြေးဖွင့်ထားမှုအား ဒေါ်လာ ၄၂၇၉၆၂ (ပေါင် ၃၂၀၀၀) မိုက်ရူးရဲဆန်စွာ လောင်းကြေးထပ်ခဲ့ပါတယ်။
ဒါပေမဲ့ သူခန့်မှန်းတဲ့အတိုင်း စပိန်တို့ အနိုင်မရခဲ့မှုနှင့်အတူ ဒေါ်လာ ၄၇၀၂၇၆၉.၂၃ (ပေါင် ၃.၅ သန်း) ရရှိသွားခဲ့ပါတယ်။
ကိတ်ဗာဒီဟာ ဂိုးသမားဗိုဇင်ဟာရဲ့ လက်စွမ်းပြမှုကြောင့် ပထမဆုံးကမ္ဘာ့ဖလားပွဲတွင် အဖိုးတန်ရမှတ်တစ်မှတ် ရရှိခဲ့တာလည်း ဖြစ်ပါတယ်။
အသက် ၄၀ နှစ်ရှိ ဂိုးသမားဟာ စပိန်နှင့်ပွဲတွင် ၇ ကြိမ်အထိ ကာကွယ်မှု ပြုလုပ်ပေးခဲ့ပါတယ်။
သူဟာ စပိန်အသင်းနှင့် ကစားနေစဉ်အတွင်းတွင်ပင် အင်စတာဂရမ်အကောင့်တွင် ဖော်လိုပါ ၁.၅ သန်းကျော်အထိ ပိုင်ဆိုင်သွားခဲ့ပါတယ်။

အီရန်ရဲ့ ကမ္ဘာ့ဖလားအဖွင့်ပွဲမတိုင်မီ ထောင်ပေါင်းများစွာသော အမေရိကန်ရောက် အီရန်များ ဆန္ဒပြ
=====================

ထောင်ပေါင်းများစွာသော အီရန်နွယ်ဖွား အမေရိကန်နိုင်ငံသားများဟာ အီရန်ရဲ့ ကမ္ဘာ့ဖလားအဖွင့်ပွဲမတိုင်မီ SoFi Stadium ကွင်းရှေ့တွင် အီရန်အာဏာပိုင်များအား ဆန္ဒပြမှု ပြုလုပ်ခဲ့ကြပါတယ်။
ယနေ့ အစောပိုင်းတုန်းက အယ်လ်အေတွင် ကစားတဲ့ ယင်းပွဲစဉ်တွင် လုံခြုံရေး အထူးတင်းကြပ်စွာ ချမှတ်ထားခဲ့ပါတယ်။
ထောင်ပေါင်းများစွာသော အီရန်နွယ်ဖွား အမေရိကန်နိုင်ငံသားများဟာ “Islamic Republic, No! No! No!” ၊ “Death to the Islamic Regime! Long Live the Shah!” လို့ သံပြိုင်အော်ဟစ် ဆန္ဒပြခဲ့ကြပါတယ်။
ဒါ့အပြင် ဆန္ဒပြသူများဟာ လက်ရှိ အီရန်ခေါင်းဆောင်ရဲ့ ပြိုင်ဘက် Lion and Sun အလံများကိုလည်း ကိုင်ဆောင်ထားကြပါသေးတယ်။
ဖီဖာဟာ ယနေ့ အီရန်နှင့် နယူးဇီလန်တို့ရဲ ပွဲစဉ်အတွင်းတွင် အီရန်ရဲ့ တော်လှန်ရေးမတိုင်မီအလံကို ပိတ်ပင်မှု ပြုလုပ်ထားတာပါ။
အမေရိကန်ရောက် အီရန်များဟာ ကမ္ဘာ့ဖလားပြိုင်ပွဲဝင်နေတဲ့ အီရန်အသင်းကိုလည်း ကမ္ဘာ့ဖလားပြိုင်ပွဲမှ ထုတ်ပယ်ရန် တောင်းဆိုခဲ့ကြပါသေးတယ်။
ဆန္ဒပြသူများက အီရန်အာဏာပိုင်များဟာ ဘောလုံးကို အသုံးချကာ နိုင်ငံတကာတွင် အပြုသဘောဆောင်တဲ့ အမြင်မျိုး ရရှိရေး ကြိုးပမ်းနေတယ်လို့ စွပ်စွဲထားကြပါတယ်။
အီရန်အသင်းဟာ ကမ္ဘာ့ဖလားပူးတွဲအိမ်ရှင် အမေရိကန်နှင့် စစ်ဖြစ်နေမှုနှင့်အတူ ကမ္ဘာ့ဖလားမတိုင်မီတုန်းက ပြိုင်ပွဲဝင်ရေးနှင့်ပတ်သက်ပြီး မရေမရာ အခြေအနေ ကြုံခဲ့ရတာပါ။
အီရန်ဟာ ယနေ့အစောပိုင်းတုန်းက နယူးဇီလန်နှင့် ကမ္ဘာ့ဖလားအုပ်စုအဖွင့်ပွဲတွင် ၂ ဂိုးစီသရေကျကာ အဖိုးတန် ရမှတ် တစ်မှတ် ရယူနိုင်ခဲ့ပါတယ်။

ကမ္ဘာ့ဖလားအုပ်စုပွဲတွင် အပိုင်အခွင့်အရေး ရလာချိန်တွင် အငြင်းပွားဖွယ် ပွဲသိမ်းခရာမှုတ်မှု ဖြစ်ပွား
====================

ဆော်ဒီဟာ ယနေ့အစောပိုင်းက ဥရုဂွေးနှင့် ပွဲစဉ်တွင် ပွဲပြီးခါနီးတွင် အနိုင်ဂိုး ရရှိနိုင်မယ့် အပိုင်အခွင့်အရေး ကြုံခဲ့ရပေမဲ့လည်း ဒိုင်လူကြီးရဲ့ အငြင်းပွားဖွယ် ပွဲသိမ်းခရာမှုတ်မှုကြောင့် နစ်နာခဲ့ရပါတယ်။
ဆော်ဒီဟာ ယနေ့အစောပိုင်းတုန်းက ဥရုဂွေးနှင့်ပွဲတွင် အက်ဘူလီလာအယ်အမ်မရီရဲ့ ပထမပိုင်းဂိုးဖြင့် ပွဲကို ဦးဆောင်ထားနိုင်ခဲ့ပါတယ်။ ဥရုဂွေးဟာ ပွဲပြီးရန် ၁၀ မိနစ်အလိုမှာ အရူဂျိုရဲ့ ချေပဂိုးကြောင့် အဖိုးတန် ရမှတ်တစ်မှတ် ရရှိခဲ့ပါတယ်။
ဒါပေမဲ့ ဆော်ဒီဟာ ပွဲနှောင်းပိုင်း အပိုင်အခွင့်အရေး ရလာချိန်တွင် ဒိုင်လူကြီးက အငြင်းပွားဖွယ် ပွဲသိမ်းခရာမှုတ်လိုက်မှုကြောင့် အရေးပါတဲ့ ကမ္ဘာ့ဖလားနိုင်ပွဲ မရယူနိုင်ခဲ့တာလည်း ဖြစ်ပါတယ်။
ပရိသတ်တစ်ဦးက "ဆော်ဒီက ဂိုးသွင်းတော့မှာလေ။ ဘယ်လို ဖြစ်ပြီး ပွဲသိမ်းခရာမှုတ်လိုက်တာလဲ"လို့ ဆိုသွားပါတယ်။
အခြားတစ်ဦးကလည်း "ဒိုင်လူကြီးသာ ပွဲသိမ်းခရာမမှုတ်ရင် ဆော်ဒီတို့ ဂိုးရပြီပဲ"လို့ ဆိုသွားပါတယ်။
Miami Dolphins ကွင်းတွင် ကစားတဲ့ အဆိုပါပွဲစဉ်တွင် ပရိသတ်ခုံနေရာလွတ်အမြောက်အမြား ရှိနေကြောင်း တွေ့ရပါတယ်။ ဖီဖာကတော့ ပွဲမတိုင်မီ ယင်းပွဲအတွက် ရောင်းရန် လက်မှတ် ၇ စောင်တည်းသာ ကျန်တော့ကြောင်း ဆိုထားပါတယ်

ဆွီဒင်ကို ၅-၁ ဖြင့် ရှုံးနိမ့်ပြီးနောက် နည်းပြကို ထုတ်ပယ်ကာ ကမ္ဘာ့ဖလားပြိုင်ပွဲအတွင်းတွင် နည်းပြအပြောင်းအလဲ လုပ်လာတဲ့ တူနီးရှား
====================

တူနီးရှားဟာ ကမ္ဘာ့ဖလားအုပ်စုအဖွင့်ပွဲတွင် ဆွီဒင်ကို ဂိုးပြတ် ရှုံးနိမ့်ပြီးနောက် နည်းပြဆာဘရီလာမူချီကို ထုတ်ပယ်ကာ ကမ္ဘာ့ဖလားပြိုင်ပွဲအတွင်းတွင်ပင် နည်းပြအပြောင်းအလဲ ပြုလုပ်လာတော့မှာ ဖြစ်ပါတယ်။
တူနီးရှားဟာ ကမ္ဘာ့ဖလားအဖွင့်ပွဲတွင် ဆွီဒင်ကို ၅-၁ ဖြင့် ကြီးမားတဲ့ ရှုံးပွဲ ကြုံတွေ့ပြီးနောက် လာမိုချီကို ထုတ်ပယ်ခဲ့တာ ဖြစ်ပါတယ်။
တူနီးရှားဟာ လာမိုချီနေရာတွင် ဆော်ဒီနည်းပြဟောင်းဟာဗီးရီနတ်အား ခန့်အပ်ရန် သဘောတူညီမှု ရရှိထားပြီး ဖြစ်ပါတယ်။
အတွေ့အကြုံရင့်နည်းပြရီနတ်ဟာ ကမ္ယာ့ဖလားပြိုင်ပွဲကျင်းပရန် ၂ လအလိုတွင် ဆော်ဒီနည်းပြရာထူးမှ ထုတ်ပယ်ခြင်းခံခဲ့ရသူ ဖြစ်ပြီး အစောပိုင်းတုန်းက ဂါနာနည်းပြရာထူးအတွက် ရေပန်းစားခဲ့သူလည်း ဖြစ်ပါတယ်။
ရီနတ်ဟာ တူနီးရှားကို ကိုင်တွယ်ရန် သဘောတူညီမှု ရရှိပြီးနောက် အသင်းအခြေစိုက်ရာ မက္ကဆီကိုနိုင်ငံ၊ နူဗိုလီယွန်၊ ဆန်တီယာဂိုသို့ လာနေပြီ ဖြစ်ပါတယ်။
တူနီးရှားဟာ မကြာမီကာလအတွင်းမှာ ရီနတ်အား နည်းပြသစ်အဖြစ် ခန့်အပ်ကြောင်း ကြေညာလာဖို့ ရှိနေပါတယ်။
လာမိုချီဟာ တူနီးရှားက နည်းပြရာထူးမှ ထုတ်ပယ်လိုက်ကြောင်း ကြေညာခြင်းခံခဲ့ရပေမဲ့လည်း ယင်းနေ့တွင် အသင်းအား လေ့ကျင့်ပေးမှု ပြုလုပ်ပေးခဲ့ပါသေးတယ်။
တူနီးရှားနည်းပြသစ်ဖြစ်လာမဲ့ အသက် ၅၇ နှစ်ရှိ ရီနတ်ဟာ ဇမ်ဘီယာ၊ အိုင်ဗရီကို့စ်၊ မော်ရိုကို၊ ဆော်ဒီ၊ ပြင်သစ်အမျိုးသမီးလက်ရွေးစင်အသင်းတို့အား ကိုင်တွယ်ဖူးပါတယ်။
တူနီးရှားဟာ လာမဲ့ စနေနေ့တွင် အုပ်စုဒုတိယပွဲစဉ်အဖြစ် မက္ကဆီကိုတွင် ဂျပန်နှင့် ရင်ဆိုင်ကစားရပါမယ်။ ပြီးလျှင် ၎င်းတို့ဟာ ကြာသပတေးနေ့တွင် အုပ်စုနောက်ဆုံးပွဲအဖြစ် နယ်သာလန်နှင့် ကစားရပါမယ်။