မိုးကုတ်မြို့ကနေ PDF တပ်ဖွဲ့တွေအကုန် ဆုတ်ခွာပြီ

မန္တလေးတိုင်း မိုးကုတ်မြို့မှာ TNLA တပ်ဖွဲ့နဲ့အတူ တပ်ဆွဲထားတဲ့ PDF တပ်ဖွဲ့ တွေ မ​နေ့ညနေပိုင်းမှာ ဆုတ်ခွာသွားတယ်လို့ မိုးကုတ်မြို့ခံတွေက ပြောပါ တယ်။
မြို့ထဲမှာ PDF တပ်ဖွဲ့တွေကို မတွေ့ရတော့သလို မြို့ခံအများစုလည်း ဒီနေ့မှာ ထပ်ပြီး ရွှေ့ပြောင်းနေကြတယ်လို့ မိုးကုတ်မြို့ခံတွေထံက သိရပါတယ်။
“မြို့ထဲကနေ PDF တွေ ထွက်သွားကြပြီ။ အရင်လို မတွေ့တော့ဘူး။ TNLA အဖွဲ့တွေတော့ မြို့ထဲရှိနေသေးတယ်” လို့ မိုးကုတ်မြို့ခံတစ်ယောက်က ပြောပါတယ်။
အခုရက်ပိုင်းမှာပဲ မိုးကုတ်မြို့ထဲ အစိုးရတပ်နဲ့ ဌာနဆိုင်ရာတွေ ပြန်ဝင်လာ မယ်လို့ သတင်းတွေ ထွက်​နေပါတယ်။
“စစ်သားတွေ ရောက်နေပြီဆိုပြီး တစ်မြို့လုံးမှာ သတင်းထွက်နေတာ။ ဘယ်သူမှတော့ တိတိကျကျ မသိရပါဘူး။ မြင်လည်း မမြင်ရပါဘူး။ ကောလ ဟလတွေ ထွက်နေတယ်။ စစ်တပ်က လကုန်မှ ဝင်မယ်လို့ပဲ သိထားတာ” လို့ မိုးကုတ်မြို့ခံ အမျိုးသမီးတစ်ယောက်က ပြောပါတယ်။
၁၀၂၇ တိုက်ပွဲကာလမှာ မိုးကုတ်ကို TNLA နဲ့ MDYPDF မဟာမိတ် ပူးပေါင်း အဖွဲ့က သိမ်းပိုက်ခဲ့တာပါ။
အစိုးရနဲ့ TNLA တို့ အပစ်ရပ်ပြီးနောက်ပိုင်း မိုးကုတ်နဲ့ မိုးမိတ်မြို့ကနေ ဖယ် ပေးမယ်လို့ TNLA က ပြောဆိုခဲ့ပြီး အခုလကုန်မှာ မိုးကုတ်မြို့ အလွှဲအပြောင်း အစီအစဉ်တွေ လုပ်ဆောင်မယ်လို့ TNLA နဲ့ နီးစပ်တဲ့ မိုးကုတ်မြို့ခံတွေက ပြောပါတယ်။
လက်ရှိမှာတော့ မိုးကုတ်မြို့ထဲ လူဦးရေ အနည်းငယ်သာ ကျန်ပြီး ကျောက်လုပ်ကွက်တွေမှာတော့ ကျောက်တူးတဲ့ အလုပ်သမားတွေ ဆက်လုပ်ကိုင်နေကြတယ်လို့ မိုးကုတ်မြို့ခံတွေ ထံကနေသိရပါတယ်။

🤓

Uefa Youth League တွင် အသက်အငယ်ဆုံးကစားသမားအဖြစ် အသက် ၁၃ နှစ်ဖြင့် စံချိန်သစ်ရေးထိုးလာတဲ့ အာဆင်နယ်လူငယ်
======================

အာဆင်နယ်ရဲ့အသက် ၁၃ နှစ်အရွယ်ရှိ အလယ်တန်းကစားသမားလူးဝစ်ဇ်မူနော့ဇ်ဟာ Uefa Youth League သမိုင်းတွင် အသက်အငယ်ဆုံးပွဲကစားခွင့်ရသူအဖြစ် သမိုင်းမှတ်တိုင်သစ် စိုက်ထူလာပါတယ်။
၂၀၁၁ ခုနှစ် ဒီဇင်ဘာလတွင် မွေးဖွားတဲ့ အင်္ဂလန်ယူ-၁၅ လက်ရွေးစင်ဟာ Uefa Youth League (ယူ-၁၉) ပြိုင်ပွဲတွင် ဘိုင်ယန်မြူးနစ်အား ၄-၂ ဖြင့် အနိုင်ရတဲ့ပွဲစဉ်ရဲ့ ပွဲချိန် ၈၅ မိနစ်မှာ လူစားဝင်ရောက်ကစားခဲ့တာလည်း ဖြစ်ပါတယ်။
ယင်းပွဲတွင် အာဆင်နယ်လူငယ်ပါရမီရှင်မက်စ်ဒေါ်မန်းမှာ ၂ ဂိုးသွင်းပြီး ခြေစွမ်းပြခဲ့ပါတယ်။
မူနော့ဇ်ဟာ အသက် ၁၃ နှစ်၊ ၁၁ လ၊ ၁၅ ရက်နေဖြင့် Uefa Youth League သမိုင်းတွင် အသက်အငယ်ဆုံးပွဲကစားခွင့်ရသူအဖြစ် စံချိန်သစ်တင်လာတာပါ။ သူဟာ ပြီးခဲ့တဲ့စက်တင်ဘာလတုန်းက ဂျီဘရယ်တာကလပ် Lincoln Red Imps အတွက် ၁၄ နှစ်၊ ၃ လ၊ ၁ ရက်ဖြင့် စံချိန်တင်ခဲ့တဲ့ လီယမ်ပါယက်စ်ရဲ့ စံချိန်ကို ရိုက်ချိုးလာတာလည်း ဖြစ်ပါတယ်။
လာမယ့်လတွင် အသက် ၁၄ နှစ်ပြည့်မယ့် မူနော့ဇ်ဟာ အလယ်တန်းကစားသမားတစ်ဦးဖြစ်ပေမယ့်လည်း ဘိုင်ယန်မြူးနစ်နှင့်ပွဲမှာ မိနစ်အနည်းငယ်လူစားဝင်ရောက်ကစားခွင့်ရစဉ်အတွင်း တိုက်စစ်သမားအဖြစ် ကစားသွားခဲ့ပါတယ်။
သူဟာ ယခုလအစောပိုင်းတုန်းက ဗီလာကို ဗိုလ်လုပွဲတွင် အနိုင်ရကာ Premier League U16 National Final ချန်ပီယံဖြစ်ခဲ့တဲ့ အာဆင်နယ်ယူ-၁၆ အသင်းတွင်လည်း ပါဝင်ကစားခဲ့သူ ဖြစ်ပါတယ်။
Uefa Youth League ပြိုင်ပွဲမှာ ချန်ပီယံလိဂ်ဝင်ခွင့်ရအသင်းတွေရဲ့ ယူ-၁၉ အသင်းများ ယှဉ်ပြိုင်တဲ့ ပြိုင်ပွဲ ဖြစ်ပါတယ်။
ယခု ဘိုင်ယန်မြူးနစ်နှင့်ပွဲတွင် အာဆင်နယ်ပထမအသင်းမှ အလယ်တန်းကစားသမားအီသန်ရဲ့ ညီဖြစ်သူ အသက် ၁၅ နှစ်ရှိ အီမာဆင်နဝမ်နရီလည်း လူစားဝင်ရောက်ကစားခဲ့ပါတယ်။
အာဆင်နယ်လူငယ်အသင်းဟာ ဘိုင်ယန်မြူးနစ်ကို အနိုင်ရခဲ့ပေမယ့်လည်း ၅ ပွဲတွင် ၄ ပွဲ ရှုံးနိမ့်ထားမှုနဲ့အတူ ရှုံးထွက်အဆင့်သို့ တက်နိုင်ခြေ အရမ်းနည်းပါးနေပါတယ်။

တစ်နှစ်နီးပါး ထိန်းသိမ်းလာခဲ့တဲ့ ကြီးမားဆုံး လျို့ဝှက်ချက်ကို အလက်ဆစ်ဆန်းချက်ဇ်ရဲ့ ချစ်သူ ဖွင့်ချလာ
=====================

အလက်ဆစ်ဆန်းချက်ဇ်ရဲ့ ချစ်သူက ကိုးလတိုင်တိုင် ကိုယ်ဝန်လွယ်ထားရကြောင်းကို လျို့ဝှက်လာပြီးနောက် ကလေးမွေးဖွားလာတော့မယ်လို့ ဖွင့်ချလာပါတယ်။
ပရီးမီးယားလိဂ်စတားဟောင်းရဲ့ ချစ်သူအလက်ဇန္ဒားလတ်ဗီနိုဗာဟာ သူမဘဝတွင် အကြီးမားဆုံးလျို့ဝှက်ချက်အဖြစ် ကိုယ်ဝန်လွယ်ထားမှုအား လျို့ဝှက်ထားလာခဲ့တာလည်း ဖြစ်ပါတယ်။
ဆန်းချက်ဇ်ဟာ ၂၀၁၄ ခုနှစ်မှ ၂၀၁၈ ခုနှစ်အထိ အာဆင်နယ်တွင်လည်းကောင်းကစားခဲ့သလို ယင်းနောက် ၂၀၂၀ ခုနှစ်အထိ ယူနိုက်တက်တွင် ကစားခဲ့ပါတယ်။
ရုရှား-ယူကရိန်းမော်ဒယ်ဟာ အင်္ဂါနေ့မှာတော့ သူမရဲ့ ကြီးမားတဲ့ လျို့ဝှက်ချက်ကြီးကို ဖွင့်ချလာပါတယ်။
သူမက "ကိုးလတိုင်တိုင် ခက်ခက်ခဲခဲ လျို့ဝှက်လာခဲ့ရတယ်။ ကိုယ်ဝန်လွယ်ထားရတယ်ဆိုတာ တစ်ကမ္ဘာလုံးသိအောင် ဝေမျှချင်တဲ့အရာပါ။ ပြီးတော့ တချိန်တည်းမှာပဲ ထိန်းသိမ်းထားချင်တဲ့အရာပါ။ အခုတော့ လျို့ဝှက်ချက်ကြီးကို ဖွင့်ချလိုက်ပါပြီ။ ဒါကို ပြောခွင့်ရလို့ အရမ်းအံ့ဩစရာကောင်းတဲ့ ခံစားချက်ရတယ်။ ဒီခရီးစဉ်ရဲ့ ပုံအချို့ကိုလည်း မျှဝေလိုက်ရလို့ အံ့ဩစရာကောင်းတဲ့ ခံစားချက် ရရှိပါတယ်"လို့ ဆိုသွားပါတယ်။
အလက်ဇန္ဒားဟာ အိမ်နောက်ဖေး ဥယျာဉ်တွင် What’s The Jam ရဲ့ I’m a Mommy by We Krazy သီချင်းကို အသုံးပြုထားတဲ့ ကိုယ်ဝန်လွယ်ထားရတဲ့ ဗိုက်ကို ပြသလာတာလည်း ဖြစ်ပါတယ်။
ယင်းမတိုင်မီ သုံးရက်တုန်းက သူမဟာ ဆန်းချက်ဇ်နှင့် တွဲရိုက်ထားတဲ့ ဓာတ်ပုံကို “1+1=3.” ဆိုတဲ့ စာသားနဲ့ ပဟေဠိဆန်ဆန် ပို့စ်တင်ခဲ့ပါသေးတယ်။ ထိုစဉ်ကတည်းက သူမဟာ ကိုယ်ဝန်လွယ်ထားရပြီလို့ ကောလာဟလထွက်လာတာလည်း ဖြစ်ပါတယ်။

တားမြစ်ဆေးသုံးစွဲမှုကြောင့် ၄ နှစ်ပွဲပယ်ခံလာရတဲ့ ပရီးမီးယားလိဂ်စတားဟောင်း မက်ဆီလက်သစ်
====================

ပရီးမီးယားလိဂ်စတားဟောင်းရာမန်ဒန်ဆော့ဘ်ဟီဟာ တားမြစ်ဆေးသုံးစွဲမှုအတွက် ၄ နှစ်ပွဲပယ်ခံလာရပါတယ်။
အသက် ၂၈ နှစ်ရှိ စတုတ်နှင့် ဟက်ဒါဖီးလ်စတားဟောင်းဟာ ၂၀၂၄ ခုနှစ် မတ်လတုန်းက တားမြစ်ဆေးဝါးသုံးစွဲကြောင်း စစ်ဆေးတွေ့ရှိခဲ့တာလည်း ဖြစ်ပါတယ်။
ဘော့ဘ်ဟီဟာ အီဂျစ်ကလပ် ပစ်ရမစ်အက်ဖ်စီတွင် ကစားနေသူ ဖြစ်ပြီး တချိန်တုန်းက အီဂျစ်မက်ဆီအဖြစ် အမည်ပြောင်ပေးခြင်းခံခဲ့ရသူလည်း ဖြစ်ပါတယ်။
သူဟာ ပြီးခဲ့တဲ့နှစ် ဇူလိုင်လတုန်းက မဲပေး ဆုံးဖြတ်ချက်ဖြင့် Egyptian Anti-Doping Organization ရဲ့ ပွဲပယ်မှ လွတ်မြောက်လာခဲ့သူပါ။
ဒါပေမယ့် The World Anti Doping Agency (WADA) က ယင်းဆုံးဖြတ်ချက်ကို အယူခံဝင်လာချိန်မှာတော့ ၄ နှစ် ပွဲပယ်ပြစ်ဒဏ်ချမှတ်ခြင်းခံလာရပါတယ်။
တဖက်တွင် ကစားသမားအနေဖြင့် အားကစားသမာဓိခုံရုံးရဲ့ ဆုံးဖြတ်ချက်ကို အယူခံဝင်နိုင်ပါသေးတယ်။
ဆော့ဟီဟာ ကလပ်အတွက် နောက်ဆုံးကစားခဲ့တဲ့ စက်တင်ဘာလ ၁၄ ရက်နေ့တုန်းက ဖီဖာအင်တာကွန်တင်နင်တယ်ဖလားပြိုင်ပွဲမှာ ဖြစ်ပါတယ်။ သူဟာ ယင်းနောက်ပိုင်းတွင် ဒူးဒဏ်ရာကြောင့် အနားယူလာခဲ့ရပါတယ်။
သူဟာ အီဂျစ်အတွက် ၃၇ ပွဲကစားခွင့်ရခဲ့ပြီး ၂၀၂၂ ခုနှစ်နောက်ပိုင်းတွင် ကစားခွင့် မရလာခဲ့ပါဘူး။
သူဟာ အီဂျစ်တွင် ဟိုတယ်နှင့် ခရီးသွားလာရေးအတွက် Pharaonic Higher Institute စာမေးပွဲအား စာရွက်စာတမ်းအမှားများ တင်ပြကာ လူစားထိုး စာမေးပွဲ ဖြေခိုင်းမှုဖြင့် စွပ်စွဲခံရဖူးပါတယ်။
ဒါပေမယ့် သူ့ဘက်ကတော့ ယင်းကို ငြင်းဆိုထားပါတယ်။

နူးကမ့်ကွင်းအား ပြန်လည်တည်ဆောက်ရာတွင် တရားမဝင်အလုပ်သမး ၇၉ ဦး အသုံးပြုမှုအတွက် ပေါင် ၁ သန်း ဒဏ်ရိုက်ခံလာရတဲ့ ဘာစီလိုနာ
===================

ဘာစီလိုနာဟာ နူးကမ့်ကွင်းသစ်ကြီးကို ပြန်လည် အသုံးပြုပြီး ရက်အနည်းငယ်အကြာ အင်္ဂါနေ့တုန်းက ချဲလ်ဆီးကို ချန်ပီယံလိဂ်မှာ ခါးသီးတဲ့ ရှုံးပွဲ ကြုံတွေ့ခဲ့ပါတယ်။
လာလီဂါချန်ပီယံဟာ Montjuic ရှိ Olympic Stadium ကို အိမ်ကွင်းအဖြစ် အသုံးပြုနေခဲ့တာ ဖြစ်ပြီး ၂၀၂၃ ခုနှစ် မေလနှောင်းပိုင်းတွင် ပထမဆုံးအကြိမ်အဖြစ် နူးကမ့်ကွင်းအား အိမ်ကွင်းအဖြစ် စတင် အသုံးပြုလာခဲ့တာပါ။
ဘာစီလိုနာဟာ နူးကမ့်ကွင်းသစ်ကြီးတွင် ပထမဆုံးကစားတဲ့ပွဲစဉ်မှာ ဘီလ်ဘာအိုအား ၄-၀ ဂိုးဖြင့် ဂိုးပြတ်အနိုင်ရခဲ့ပါတယ်။
ဒါပေမယ့်လည်း ဘာစီလိုနာဟာ နူးကမ့်ကွင်းအား တည်ဆောက်ရာမှာ တရားမဝင် အလုပ်သမားအသုံးပြုမှုအတွက် ကတ်တလန်အလုပ်သမားဝန်ကြီးဌာနရဲ့ အရေးယူခြင်းခံလာရပါတယ်။
Marca ရဲ့ဖော်ပြလာမှုအရ ဘာစီလိုနာဟာ ကွင်းသစ်တည်ဆောက်ရေးလုပ်ငန်းခွင်တွင် တရားမဝင် အလုပ်သမား ၇၉ ဦးအား ငှားရမ်း အသုံးပြုမှုအတွက် ပေါင် ၁ သန်း ဒဏ်ရိုက်ခြင်းခံလာရကြောင်း သိရပါတယ်။
နူးကမ့်ကွင်းကို တည်ဆောက်ခွင့် ရရှိထားတဲ့ ကုမ္ပဏီက စပိန်တွင် အလုပ်လုပ်ခွင့် မရှိတဲ့ တူရကီနိုင်ငံသား လျှပ်စစ်လုပ်သား၊ လုံခြုံရေးနည်းပညာရှင်များကို အသုံးပြုခဲ့တာလည်း ဖြစ်ပါတယ်။
အလုပ်သမားတစ်ဦးက "သူတို့ ကျွန်တော်တို့ကို လိမ်ညာခဲ့တာ။ ကျွန်တော်တို့ကို ဒီကို ခေါ်လာတာက ကိစ္စအားလုံး လုပ်ပြီးပြီလို့ ပြောတယ်။ အားလုံး ဥပဒေနဲ့အညီလုပ်ထားတယ်လို့ ပြောတယ်။ တကယ်က အဲဒီလို ဟုတ်မနေဘူး။ ဒါကိုသာ ကြိုသိခဲ့ရင် လာမလုပ်ဘူး"လို့ ဆိုသွားပါတယ်။
တရားမဝင်အလုပ်သမားများဟာ တူရကီသို့ ခေတ္တပြန်ရာ ကြိုးပမ်းချိန်တွင်မှ တရားမဝင် အလုပ်လုပ်နေခြင်းဖြစ်ကြောင်း သိခဲ့ရတာပါ။
အထက်ပါ အဖြစ်အပျက်ကို အလုပ်သမားဝန်ကြီးဌာနက စုံစမ်းစစ်ဆေးမှုပြုလုပ်ပြီးနောက် တရားမဝင် အလုပ်သမား ၇၉ ဦးအား တူရကီသို့ ပြန်ရန် ညွှန်ကြားခဲ့ပါတယ်။
ဘာစီလိုနာဟာ နူးကမ့်ကွင်းအား ပြန်လည်တည်ဆောက်ရာတွင် ပေါင် ၁.၂၅ ဘီလီယံ အသုံးပြုထားတာပါ။
၎င်းတိုဟာ စနေနေ့တွင် အလာဗက်စ်အား ဧည့်ခံကစားရဦးမှာ ဖြစ်သလို ဒီဇင်ဘာလ ၂ ရက်နေ့တွင် အက်သလက်တီကိုအား ဧည့်ခံကစားရပါဦးမယ်။

နေးရှင်းလိဂ်ဖလားဆွတ်ခူးပြီးနောက် ဂျိုတာရဲ့မိသားစုထံသို့ အထူးလက်ဆောင်ပေးပို့ခဲ့တဲ့ ခရစ္စတီယာနိုရော်နယ်ဒို
=====================

ခရစ္စတီယာနိုရော်နယ်ဒိုဟာ နေးရှင်းလိဂ်ဖလား ဆွတ်ခူးပြီးနောက် သေဆုံးသွားတဲ့ ဒီယေဂိုဂျိုတာအပါအဝင် ပေါ်တူဂီကစားဖော်များထံသို့ အထူးလက်ဆောင်များပေးပို့ခဲ့ပါတယ်။
အသက် ၂၈ နှစ်ရှိ လီဗာပူးတိုက်စစ်သမားဟာ ပေါ်တူဂီအား နေးရှင်းလိဂ်ဖလား ဒုတိယအကြိမ် ဆွတ်ခူးနိုင်အောင် ကူညီပေးပြီး ရက်သတ္တပတ်အနည်းငယ်အကြာ ဇူလိုင်လတုန်းက ယာဉ်မတော်တဆမှုကြောင့် သေဆုံးသွားခဲ့ပါတယ်။
ပေါ်တူဂီအသင်းခေါင်းဆောင်ခရစ္စတီယာနိုရော်နယ်ဒိုဟာ နောက်ထပ် နိုင်ငံတကာ ဆုဖလားတစ်လုံး ထပ်မံ ရရှိအောင် ကူညီခဲ့ကြတဲ့ ပေါ်တူဂီကစားဖော်အားလုံးထံသို့ Jacob and Co နှင့် ပူးပေါင်းဖန်တီးထားတဲ့ အထူးထုတ် နာရီများကို လက်ဆောင်ပေးခဲ့ပါတယ်။
သူဟာ အာမေးနီးယားနှင့် ကမ္ဘာ့ဖလားခြေစစ်ပွဲ ပထမဆုံးပွဲမတိုင်မီ ကစားဖော်များကို ပေးအပ်ခဲ့တာလည်း ဖြစ်ပါတယ်။
စပိန်ကို ပင်နယ်တီအဆုံးအဖြတ်ဖြင့် အနိုင်ရရှိကာ နေးရှင်းလိဂ်ဖလားရရှိအောင် ကူညီခဲ့တဲ့ ဂျိုတာရဲ့ မိသားစုဟာလည်း အမည်နှင့် ကျောနံပါတ် ပါဝင်တဲ့ အထူးထုတ် နာရီတစ်လုံးအား ခရစ္စတီယာနိုရော်နယ်ဒိုထံမှ လက်ဆောင်ရရှိခဲ့ပါတယ်။
ခရစ္စတီယာနိုရော်နယ်ဒိုဟာ Jacob and Co နှင့် ပူးပေါင်းကာ နာရီ ၃၅ လုံးတည်းသာ ထုတ်လုပ်ပြီး ကစားဖော်များကို လက်ဆောင်ပေးခဲ့တာလည်း ဖြစ်ပါတယ်။
ရော်နယ်ဒိုဟာ Al Nassr တွင် တစ်နှစ်လုပ်ခ ပေါင်သန်း ၂၀၀ ရရှိနေတာ ဖြစ်ပါတယ်။
ဂျိုတာရဲ့ ဈာပန အခမ်းအနားသို့ ပေါ်တူဂီနှင့် လီဗာပူးကစားဖော်များ တက်ရောက်ခဲ့ကြပေမယ့်လည်း ခရစ္စတီယာနိုရော်နယ်ဒိုကတော့ တက်ရောက်ခဲ့ခြင်း မရှိပါဘူး။
ဒါပေမယ့် နောက်ပိုင်းတွင် ခရစ္စတီယာနိုရော်နယ်ဒိုက ဂျိုတာရဲ့ ဈာပနအား မတက်ရောက်ခဲ့မှုမှာ မီဒီယာများက သူ့ကိုသာ အာရုံစိုက်နေမှုနှင့်အတူ ဈာပနအား အနှောင့်အယှက်မဖြစ်စေလိုမှုအတွက် မတက်ရောက်ခဲ့ခြင်းဖြစ်ကြောင်း ရှင်းလင်း ပြောကြားထားပါတယ်။

ဆလော့ကို ထုတ်ပယ်လျှင် လီဗာပူးတို့ နစ်နာကြေး ဘယ်လောက်ပေးလာရမလဲ?
==================

လီဗာပူးဟာ ရလဒ်ဆိုးရွားမှုကြောင့် ဒတ်ချ်လူမျိုးနည်းပြအန်းဆလော့ကို ထုတ်ပယ်လာမည်ဆိုပါက နစ်နာကြေးများစွာ ပေးလာရပါမယ်။
အသက် ၄၇ နှစ်ရှိ ဆလော့ဟာ ပြီးခဲ့တဲ့နှစ်နွေရာသီတုန်းက ကလော့ပ်နေရာတွင် အစားထိုးခန့်အပ်ခြင်းခံရပြီးနောက် ပထမဆုံးရာသီတွင် ပရီးမီးယားလိဂ်ဖလား ဆွတ်ခူးနိုင်အောင် ဦးဆောင်ပေးနိုင်ခဲ့ပါတယ်။
နွေရာသီမှာတော့ သူဟာ ဖလိုရီယန်ဝါ့ဇ်၊ အလက်ဇန္ဒားအီဆက်ခ်၊ ဟူဂိုအီကီတီကီ၊ မီလို့စ်ကာကတ်၊ ဂျီရီမီဖရင်းပေါင်တို့အား ပေါင်သန်း ၄၀၀ ကျော် အသုံးပြုပြီး ခေါ်ယူအားဖြည်ခဲ့ပါတယ်။
လီဗာပူးဟာ ရာသီအစ ၇ ပွဲဆက် တိုက်ပွဲ ရရှိလာခဲ့ပေမယ့်လည်း နောက်ပိုင်း ရက်သတ္တပတ်များမှာတော့ ရလဒ်ဆိုးရွားနေခဲ့ပါတယ်။
၎င်းတို့ဟာ ပရီးမီးယားလိဂ်တွင် မန်စီးတီးနှင့် နော်တင်ဟမ်ဖောရက်စ်တို့အား ၃-၀ ဂိုးဖြင့် ရှုံးနိမ့်ခဲ့သလို မနေ့ညတုန်းက ပီအက်စ်ဗွီကိုလည်း ၄-၁ ဖြင့် ရှုံးနိမ့်ခဲပါတယ်။
ဆလော့ဟာ နောက်ဆုံး ၁၂ ပွဲတွင် ၉ ပွဲအထိ ရှုံးနိမ့်ထားမှုနှင့်အတူ နည်းပြရာထူးအတွက် ဖိအားများအောက်သို့ ကျရောက်လာခဲ့ပါတယ်။
ပီအက်စ်ဗွီကို ရှုံးနိမ့်တဲ့ပွဲအပြီးမှာတော့ လီဗာပူးပရိသတ်အချို့တို့က ဆလော့ကို ထုတ်ပယ်ရန် တောင်းဆိုလာသလို တချို့ကလည်း ဆလောအပေါ် အယုံအကြည်နည်းပါးလာနေပါတယ်။
တဖက်တွင် ဆလော့ဘက်က နုတ်ထွက်ခြင်း မပြုဘဲ ထုတ်ပယ်ရမယ်ဆိုပါက လီဗာပူးဘက်က နစ်နာကြေးအမြောက်အမြားပေးရန် လိုအပ်လာပါတယ်။
ဆလော့ဟာ ပြီးခဲ့တဲ့နှစ် နွေရာသီတုန်းက ၂၀၂၇ ခုနှစ်အထိ စာချုပ်ဖြင့် ခန့်အပ်ခြင်းခံခဲ့ရတာပါ။ သူဟာ လီဗာပူးတွင် တစ်နှစ်လုပ်ခ ပေါင် ၆.၆ သန်း ရရှိနေပါတယ်။
တကယ်လို့များ လီဗာပူးအနေဖြင့် လာမယ့်ပွဲများတွင်လည်း ရလဒ်ဆိုးရွားကာ ထုတ်ပယ်ရန် ဆုံးဖြတ်လာမည်ဆိုပါက ဆလော့အား နစ်နာကြေး ပေါင် ၁၀ သန်းကျော် ပေးလာရပါမယ်။
တဖက်တွင် ဆလော့ကတော့ သူ့အနာဂတ်နှင့်ပတ်သက်ပြီး စိတ်ချရသေး‌ကြောင်း ဆိုထားပါတယ်။
ဆလော့က "လုံခြုံတယ်လို့ ခံစားရတယ်။ ကျွန်တော် အိုကေပါတယ်။ အထက်က အားပေးထောက်ပံ့မှုတွေ အများကြီးရထားတယ်။ ဒီအခြေအနေကို အလှည့်အပြောင်းဖြစ်အောင် လုပ်ပြီး အောင်မြင်မှုလုပ်နိုင်ရင် ကောင်းပါတယ်။ ဒါပေမယ့် ခင်ဗျားသာ နည်းပြတစ်ယောက်အဖြစ် အလုပ်လုပ်နေတဲ့အခါ အခုလို ရလဒ်ဆိုးလာရင် အနာဂတ်မေးခွန်းထုတ်ခံရတာ သာမန်ပါ။ ကျွန်တော့်နေရာနဲ့ပတ်သက်ပြီး အိုကေပါတယ်။ ခက်ခဲတဲ့အခြေအနေ ကြုံရတာ ပထမဆုံးအကြိမ် မဟုတ်ပါဘူး။ ဒါပေမယ့် အလည့်ဖြစ်အောင် လုပ်ရမယ့်ကာလသို့ ရောက်ပါပြီ"လို့ ပြောကြားသွားပါတယ်။

အများသုံးအိမ်သာတွင် အမျိုးသမီးတစ်ဦးနှင့် ဒချိခဲ့တဲ့အပြင် ရဲတပ်ဖွဲ့နှင့် ပြဿနာတက်ခဲ့တဲ့ နယူးကာဆယ်ပရိသတ်အား ပြင်သစ်ရဲတပ်ဖွဲ့အပူတပြင်းရှာဖွေနေ
===================

ပြင်သစ်ရဲတပ်ဖွဲ့ဝင်များဟာ မာဆေးကွင်းအတွင်းရှိ အများသုံးအိမ်သာတွင် အမျိုးသမီးတစ်ဦးနှင့် ကြမ်းတမ်းတဲ့ လိင်ဆက်ဆံမှု ပြုလုပ်ခဲ့တဲ့အပြင် အဓိကရုဏ်းထိန်းရဲများနှင့်လည်း ရုန်းရင်းဆန်ခတ်ဖြစ်ခဲ့တဲ့ နယူးကာဆယ်ပရိသတ်တစ်ဦးအား အပူတပြင်းရှာဖွေနေပါတယ်။
အွန်လိုင်းတွင် ထွက်ပေါ်လာတဲ့ ဗီဒီယိုအရ ကိုယ်လုံးတီး အမျိုးသားတစ်ဦးဟာ အင်္ဂါနေ့တုန်းက မာဆေးနှင့် နယူးကာဆယ်တို့ရဲ့ ချန်ပီယံလိဂ်ပွဲစဉ်တွင် အများဆုံးအိမ်သာထဲမှာ အမျိုးသမီးတစ်ဦးနှင့် လိင်ဆက်ဆံနေကြောင်း တွေ့ရပါတယ်။
ယင်းနောက် ၁၅ မိနစ်အကြာတွင် ယင်းအမျိုးသားဟာ Stade Vélodrome ကွင်းတွင် အပေါ်အင်္ကျီဗလာ၊ ပုလင်းတစ်လုံးကိုင်ပြီး အဓိကရုဏ်းထိန်းရဲတပ်ဖွဲ့ဝင်များနှင့် ရုန်းရင်းဆန်ခတ်မှု ဖြစ်ခဲ့ရာမှာ ပါဝင်ခဲ့တာ တွေ့ရပါတယ်။
လက်နက်အပြည့်အစုံပါဝင်တဲ့ အဓိကရုဏ်းထိန်းရဲများဟာ ဒိုင်းနှင့် နံပါတ်တုတ်များကို အသုံးပြုကာ ပရိသတ်များကို တားဆီးခဲ့ပြီး ပရိသတ်များကလည်း ပြန်လည်အော်ဟစ်ခြင်း၊ တွန်းခြင်းတို့ပြုလုပ်ခဲ့ကြပါတယ်။
မာဆေးရဲတပ်ဖွဲ့ဝင်များဟာ အွန်လိုင်းတွင် ထွက်ပေါ်လာတဲ့ ဗီဒီယိုဖိုင်များအရ ကွင်းတွင်း အများသုံးအိမ်သာတွင် အဝတ်အစားဗလာဖြင့် လိင်ဆက်ဆံတဲ့ အမျိုးသားမှာ ရဲတပ်ဖွဲ့နှင့် ပရိသတ်များအကြား ရန်ပွဲတွင်လည်း ပါဝင်နေမှုနှင့်အတူ အပူတပြင်း ရှာဖွေမှု ပြုလုပ်နေကြတာလည်း ဖြစ်ပါတယ်။
နယူးကာဆယ်တို့ မာဆေးတွင် ရှုံးပွဲကြုံခဲ့တဲ့ ပွဲစဉ်အတွင်း နှစ်ဖက်ပရိသတ်များအကြား ရုန်းရင်းဆန်ခတ်ဖြစ်ခဲ့ပြီး ပရိသတ်များရှိရာသို့ မျက်ရည်ယိုဗုံးများ အသုံးပြုခဲ့တာလည်း တွေ့ရပါတယ်။
တဖက်တွင် နယူးကာဆယ်ကလည်း ရဲတပ်ဖွဲ့ဝင်များရဲ့ မဆင်မခြင် နှိပ်စက်မှု ခံခဲ့ရကြောင်း ကြေညာထားပါတယ်။
ဒါအပြင် နယူးကာဆယ်က ပရိသတ်များမှာ မလိုလားအပ်ဘဲငရုပ်ကောင်းမှု၊ နံပါတ်တုတ်၊ ဒိုင်းကာတို့ဖြင့် တိုက်ခိုက်ခြင်းခံခဲ့ရကြောင်းလည်း ဆိုထားပါတယ်။

ရလဒ်ဆိုးရွားမှုကြောင့် အသင်းပိုင်ရှင်များနှင့် တွေ့ဆုံဆွေးနွေးပြီးနောက် အနာဂတ်နှင့်ပတ်သက်ပြီး အန်းဆလော့ ပြောကြားလာ
====================

လီဗာပူးနည်းပြအန်းဆလော့ဟာ ကလပ်ပိုင်ရှင်များနှင့် တွေ့ဆုံဆွေးနွေးမှုများ ပြုလုပ်ပြီးနောက် လီဗာပူးနည်းပြအနာဂတ်နှင့်ပတ်သက်ပြီး ဖွင့်ဟ ပြောကြားမှု ပြုလုပ်လာပါတယ်။
လီဗာပူးဟာ ဗုဒ္ဓဟူးနေ့တုန်းက ပီအက်စ်ဗွီကို ရှုံးနိမ့်ပြီးနောက် နောက်ဆုံး ၁၂ ပွဲတွင် ၉ ပွဲအထိ ရှုံးနိမ့်ကာ ရလဒ်ဆိုးရွားနေပြီး နည်းပြအန်းဆလော့မှာ ဖိအားများနှင့် ကြုံတွေ့နေရပါတယ်။
လီဗာပူးဟာ ပီအက်စ်ဗွီအား ၄-၁ ဖြင့် ရှုံးနိမ့်ပြီးနောက် နှစ်ပေါင်း ၇၀ ကျော်အတွင်း အဆိုးရွားဆုံးရလဒ်ကြုံတွေ့နေပါတယ်။ ၎င်းတိုဟာ ပီအက်စ်ဗွီအား ရှုံးနိမ့်ပြီးနောက် ၃ ပွဲဆက် ၃ ဂိုးကွာဟမှုဖြင့် ရှုံးနိမ့်ထားပါတယ်။
ပရိသတ်များ၊ ဘောလုံးဝေဖန်ရေးသမားများဟာ အသင်းရဲ့ တိုက်လိုခိုက်လိုစိတ် နည်းပါးမှု၊ တကိုယ်တော်အမှားများ ပြုလုပ်မှု၊ နွေရာသီတုန်းက ခေါ်ယူခဲ့တဲ့ ကစားသမားများ ခြေစွမ်းမပြနိုင်မှုတို့အပေါ် ဝေဖန်နေကြပါတယ်။
တဖက်တွင် အန်းဆလော့ဟာ ရလဒ်ဆိုးရွားနေပေမယ့်လည်း အနာဂတ်နှင့်ပတ်သက်ပြီး အသင်းပိုင်ရှင်များထံမှ အာမခံချက် ရရှိခဲ့ပါတယ်။
တနင်္ဂနွေနေ့ည ဝက်စ်ဟမ်းနှင့်ပွဲမတိုင်မီ သတင်းစာရှင်းလင်းပွဲတွင် ဆလော့က "ဒီကို ရောက်လာပြီးတဲ့နောက် ဆွေးနွေးမှုအချို့ လုပ်ခဲ့တယ်။ ကျွန်တော်တို့ တိုက်ပွဲဝင်နေတယ်။ ကျွန်တော်တို့ သက်သေပြဖို့ ကြိုးစားနေတယ်။ ဒါပေမယ့် ဆွေးနွေးမှုက ယခင်တစ်နှစ်ခွဲတုန်းကအတိုင်းပါပဲ"လို့ ပြောကြားသွားပါတယ်။
လီဗာပူးတို့ တနင်္ဂနွေနေ့တွင် လန်ဒန်ကွင်းသို့ သွားရောက်ကာ ရင်ဆိုင်ရမယ့် ဝက်စ်ဟမ်းမှာလည်း အဆင့် ၁၇ နေရာတွင် ရုန်းကန်နေတဲ့အသင်းပါ။ ဝက်စ်ဟမ်းဟာ ဒဏ်ရာပြဿနာများ၊ ခြေစွမ်းဆိုးရွားမှုများနှင့် ကြုံနေရပါတယ်။
ဒါပေမယ့် ဝက်စ်ဟမ်းဟာ နောက်ဆုံး ၃ ပွဲဆက် ရှုံးပွဲမရှိထားပါဘူး။ တဖက်တွင် လီဗာပူးဟာ သမိုင်းတစ်လျှောက် ဝက်စ်ဟမ်းနှင့် ၁၅၃ ပွဲကြုံတွေ့ထားရာမှာ ၈၆ ပွဲအထိ အနိုင်ရထားပါတယ်။
ဆက်လက်ပြီး အန်းဆလော့က "အခုအချိန်မှာ ဝက်စ်ဟမ်းက အနိုင်ရဖို့ ခက်တဲ့ အသင်းပါ။ ဒီစိန်ခေါ်မှုအတွက် အသင့်ဖြစ်နေအောင် လုပ်သွားပါမယ်။