ဆော်ဒီကလပ်တွေရဲ့ စိတ်ဝင်စားခြင်းခံနေရတဲ့ ရာဖင်ညာ နွေရာသီမှာ ဘာစီလိုနာက ထွက်ခွာဖွယ်ရှိ

ဆော်ဒီကလပ်တွေရဲ့ စိတ်ဝင်စားခြင်းခံနေရတဲ့ ဘရာဇီးလ်တောင်ပံကစားသမား ရာဖင်ညာဟာ လာမယ့်နွေရာသီမှာ ဘာစီလိုနာအသင်းက ထွက်ခွာဖွယ်ရှိနေကြောင်း သိရပါတယ်။
ရာဖင်ညာဟာ ဘာစီလိုနာအသင်းမှာ ခြေစွမ်းပြနိုင်နေပေမဲ့ အပြောင်းအရွှေ့သတင်းတွေ မကြာခဏထွက်ပေါ်လေ့ရှိသူဖြစ်ပြီး လာမယ့်နွေရာသီမှာတော့ ကစားသမားကိုယ်တိုင်က လမ်းခွဲဖို့ စဉ်းစားနေပြီဖြစ်ကြောင်း သိရပါတယ်။
ဘာစီလိုနာအသင်းက ရာဖင်ညာကို ၂၀၂၂ နွေရာသီမှာ လိဒ်စ်အသင်းကနေ ပေါင်(၅၅)သန်းနဲ့ ခေါ်ယူခဲ့တာဖြစ်ပြီး လက်ရှိစာချုပ်က ၂၀၂၈ မှ ကုန်ဆုံးမှာပါ။
ရာဖင်ညာဟာ ဘာစီလိုနာအသင်းအတွက် ပြိုင်ပွဲစုံ(၁၇၅)ပွဲကစားကာ (၇၃)ဂိုး သွင်းယူပေးထားပြီး ဒီရာသီမှာ ဒဏ်ရာပြဿနာကြောင့် (၃၁)ပွဲသာ ကစားနိုင်ပေမဲ့ (၁၉)ဂိုးသွင်းပြီး ဂိုးဖန်တီးမှု (၁၇)ကြိမ်ပြုလုပ်ထားပါတယ်။
နည်းပြ ဟန်ဆီဖလစ်ခ် သဘောကျတဲ့ ကစားသမားဖြစ်ပေမဲ့ ဆော်ဒီကလပ်တွေကသာ မြင့်မားတဲ့ ပြောင်းရွှေ့ကြေးနဲ့ ကမ်းလှမ်းလာခဲ့မယ်ဆိုရင် ဘာစီလိုနာအသင်းက ရောင်းထုတ်ဖို့ ဆန္ဒရှိနေကြောင်း သိရပါတယ်။
သတင်းတွေအရ ဆော်ဒီကလပ်တွေက ရာဖင်ညာ(၂၉ နှစ်)အတွက် ပြောင်းရွှေ့ကြေး ယူရိုသန်း(၁၀၀)ဝန်းကျင် အသုံးပြုဖို့ အသင့်ရှိနေသလို၊ လစာကိုလည်း တစ်နှစ်ယူရို(၃၅)သန်းဝန်းကျင် ပေးချေသွားမှာဖြစ်ကြောင်း သိရပါတယ်။

ယခုရာသီဟာ လက်ခံနိုင်စရာမရှိကြောင်း လီဗာပူးလ်အသင်းခေါင်းဆောင် ဗန်ဒိုက် ပြောကြား

လီဗာပူးလ်အသင်းခေါင်းဆောင် ဗန်ဒိုက်ဟာ အသင်းရဲ့ယခုရာသီရလဒ်ပိုင်းဟာ လက်ခံနိုင်စရာမရှိကြောင်း ပြောကြားခဲ့ပါတယ်။
လီဗာပူးလ်အသင်းဟာ မန်ယူနိုက်တက်ကို အရေးနိမ့်ပြီးနောက် အခုရာသီ ပြိုင်ပွဲစုံ ၁၈ ပွဲမြောက် ရှုံးပွဲ ကြုံတွေ့ခဲ့ရတာပါ။
ဒတ်ချ်နောက်ခံလူ ဗန်ဒိုက်က သူတို့ရဲ့ ပရီးမီးယားလိဂ်ချန်ပီယံကာကွယ်ရေးမှာ စိတ်ပျက်စရာအဖြစ်မျိုး ထပ်မဖြစ်ဖို့ နောက်ကွယ်မှာ
အလုပ်များစွာလုပ်ဖို့ လိုအပ်တယ်လို့လည်း ဝန်ခံခဲ့ပါတယ်။
''ကျွန်တော့်အနေနဲ့ ဆင်ခြေပေးဖို့ ဒီမှာရှိနေတာ မဟုတ်ပါဘူး။ အလွန်စိတ်ပျက်စရာကောင်းပြီး လက်ခံနိုင်စရာမရှိတဲ့ ရာသီတစ်ခုပေါ့။
ကျွန်တော်တို့ဟာ ကိုယ့်ကိုယ်ကိုယ် နောင်တမရသင့်ပါဘူး။ ဒီအခြေအနေကို ပြောင်းလဲဖို့ ကျွန်တော်တို့ အလုပ်လုပ်ရပါမယ်။ ပြီးတော့
နောက်ရာသီမှာ ဒါတွေ ထပ်မဖြစ်ဖို့ သေချာအောင် လုပ်ရပါမယ်။ ဒါက လီဗာပူးလ် မဟုတ်ပါဘူး''လို့ ဗန်ဒိုက်က ပြောခဲ့ပါတယ်။
လီဗာပူးလ်အသင်းဟာ ချန်ပီယံလိဂ်ဝင်ခွင့်ရရေးအတွက် လက်ကျန်သုံးပွဲမှာ လေးမှတ် လိုအပ်နေပါသေးတယ်။
မန်ယူနိုက်တက်ကို အရေးနိမ့်ခဲ့တာဟာ အခုရာသီ ပရီးမီးယားလိဂ်ရာသီမှာ ၁၁ ပွဲမြောက် အရေးနိမ့်ခဲ့တာဖြစ်တယ်။

ရော်ဘင်ဟိုရဲ့သားဖြစ်သူနဲ့ နေမာ အချင်းများခဲ့

ဆန်းတို့စ်တိုက်စစ်ကစားသမားဖြစ်သူ နေမာဟာ လေ့ကျင့်ရေးကွင်းမှာ အသင်းဖော်ဖြစ်သူ ရော်ဘင်ဟိုဂျူနီယာနဲ့ အချင်းများခဲ့တယ်လို့
သိရပါတယ်။
ရော်ဘင်ဟိုဂျူနီယာဟာ ရီးယဲလ်မက်ဒရစ်နဲ့ မန်စီးတီးကစားသမားဟောင်း ရော်ဘင်ဟိုရဲ့သားဖြစ်ပါတယ်။
တနင်္ဂနွေနေ့ကပြုလုပ်တဲ့ ဆန်းတို့စ်အသင်းလေ့ကျင့်ရေးမှာ ဆယ်ကျော်သက်ကစားသမား ရော်ဘင်ဟိုဂျူနီယာက သူ့ကို ဖြတ်ကျော်ခဲ့ရာမှာ
လေးစားမှုမရှိလို့ ခံစားခဲ့ရကြောင်း သတင်းရင်းမြစ်တွေက ဆိုပါတယ်။
နေမာ(၃၄ နှစ်)နဲ့ ရော်ဘင်ဟိုဂျူနီယာ(၁၈ နှစ်)တို့ဟာ ထိပ်တိုက်တွေ့ခဲ့ကြပြီး အသင်းဖော်တွေက ကြားဝင်ဖျန်ဖြေပေးခဲ့ရပါတယ်။
နောက်ပိုင်းမှာ နေမာက ရော်ဘင်ဟိုဂျူနီယာကို ဖုန်းခေါ်ဆိုပြီး ပြေရာပြေကြောင်း ပြောဆိုခဲ့တယ်လို့ သိရပါတယ်။
ဒါ့အပြင် ရော်ဘင်ဟိုဂျူနီယာရဲ့မိသားစုထံကို မက်ဆေ့ချပေးပို့ပြီး တောင်းပန်စကား ပြောခဲ့ပါတယ်။
၎င်းတို့နှစ်ဦးဟာ စနေနေ့က ကစားခဲ့တဲ့ ပါးလ်မီးရပ်စ်နဲ့ တစ်ဂိုးစီသရေကျတဲ့လိဂ်ပွဲမှာ မပါဝင်ခဲ့ကြပါဘူး။

ဘက်စတိုနီကို စိတ်ဝင်စားနေတဲ့ ဘာစီလိုနာကို အင်တာမီလန် သတိပေး

အင်တာမီလန်အသင်းဟာ နောက်ခံလူ ဘက်စတိုနီကို စိတ်ဝင်စားနေတဲ့ ဘာစီလိုနာအသင်းကို သတိပေးမှုတွေ ပြုလုပ်ခဲ့ပါတယ်။
ဘာစီလိုနာအသင်းဟာ လာမယ့်ရာသီအတွက် နောက်ခံအတွင်းလူတစ်ဦး ရှာဖွေနေပြီး အစောပိုင်းကတည်းက ဘက်စတိုနီကို
ပစ်မှတ်ထားနေတာပါ။
အင်တာအသင်း ဥက္ကဋ္ဌ မာရော့တာနဲ့ အားကစားဒါရိုက်တာ အော်ဆီလီယိုတို့က ဘက်စတိုနီအပေါ် စိတ်ဝင်စားမှုတွေ ရှိတာကိုတော့
အတည်ပြုခဲ့ပါတယ်။
ဒါပေမဲ့ အခုချိန်မှာတော့ ဘက်စတိုနီကို တရားဝင်ကမ်းလှမ်းမှု မရှိသေးဘူးလို့ ထွက်ဆိုခဲ့ပါတယ်။
အင်တာအနေနဲ့ ဘက်စတိုနီကို ဆက်လက်ထိန်းသိမ်းသွားမှာဖြစ်တယ်လို့လည်း ထပ်လောင်းပြောဆိုခဲ့ပါတယ်။
ဘက်စတိုနီ(၂၇ နှစ်)ဟာ ၂၀၁၇ အတ္တလန်တာအသင်းကနေ အင်တာမီလန်အသင်းထံ ရောက်ရှိခဲ့ပြီး ပြိုင်ပွဲစုံ ၂၉၆ ပွဲ ကစားထားပါတယ်။

ချယ်လ်ဆီးအသင်းရဲ့စွမ်းဆောင်ရည်ကို စိတ်ပျက်မိတယ်လို့ ယာယီနည်းပြ ဝန်ခံ

ချယ်လ်ဆီးအသင်းယာယီနည်းပြ ကာလမ်မက်ဖာလိန်းက နော်တင်ဟမ်ကို ၁-၃ ဂိုးနဲ့ အရေးနိမ့်တဲ့ပွဲက အသင်းစွမ်းဆောင်ရည်ကို စိတ်ပျက်မိတယ်လို့ ဝန်ခံခဲ့ပါတယ်။
၎င်းက ချယ်လ်ဆီးအသင်းရဲ့ပွဲအစကစားပုံဟာ လက်ခံနိုင်စရာမရှိဘူးလို့လည်း မှတ်ချက်ပြုခဲ့ပါတယ်။
ချယ်လ်ဆီးအသင်းဟာ ပွဲအစ နှစ်မိနစ်မှာပဲ နော်တင်ဟမ်ဘက်ကို ဦးဆောင်ဂိုး ပေးလိုက်ရတာဖြစ်ပြီး ပွဲချိန် ၁၅ မိနစ်နောက်ပိုင်းမှာ ပွဲကို လွှမ်းမိုးလာနိုင်ခဲ့ပါတယ်။
''စွမ်းဆောင်ရည်အရရော ရလဒ်ပိုင်းအရပါ အမှန်တကယ် စိတ်ပျက်မိပါတယ်။ ယနေ့မှာ ကျွန်တော်တို့ လုပ်နိုင်စွမ်းရှိတဲ့ အနေအထားမျိုး ရောက်ခဲ့တယ်လို့ မထင်ပါဘူး။ ပထမဆုံး ၁၅ မိနစ်မှာ ကျွန်တော်တို့ရှိသင့်တဲ့ အခြေအနေနဲ့ မနီးစပ်ခဲ့ဘူးလို တွေးခဲ့ပါတယ်။ အစောပိုင်းဂိုးက ပေါ့ပေါ့တန်တန် နိုင်လွန်းလှပါတယ်။ ဒီလိုအခိုက်အတန့်မျိုးမှာ ကျွန်တော်တို့ ပြန်ကောင်းလာဖို့ မမြင်မိပါဘူး။ အစမကောင်းခဲ့ရင် ပွဲအတွင်း ပြန်လာနိုင်ရေး တိုက်ပွဲဝင်နိုင်မယ့် အခွင့်အရေးတွေရှိဖို လိုပါတယ်။ ဒါပေမဲ့ ပထမဆုံး ၁၅ မိနစ်ကတော့ ဘယ်လိုမှ လက်ခံနိုင်စရာ မရှိပါဘူး''လို့ မက်ဖာလိန်းက ပြောခဲ့ပါတယ်။
ချယ်လ်ဆီးအသင်းဟာ ၁၉၉၃ ခုနှစ်ကတည်းက ပထမဆုံးအဖြစ် ပရီးမီးယားလိဂ် ခြောက်ပွဲဆက် အရေးနိမ့်ခဲ့တာဖြစ်တယ်။
လက်ရှိ အမှတ်ပေးဇယားမှာလည်း အဆင့် ၉ နေရာ ရောက်နေပြီး ချန်ပီယံလိဂ်ဝင်ခွင့်နဲ့ လွဲချော်ခဲ့ရပါတယ်။

တောင်ကိုရီးယားကို မြောက်ကိုရီးယားကလပ်အသင်းတစ်သင်း လာရောက်ကစားမယ်

မြောက်ကိုရီးယားကလပ်အသင်းတစ်သင်းဟာ အခုလနှောင်းပိုင်းမှာ တောင်ကိုရီးယားကို ကြုံတောင့်ကြုံခဲ လာရောက်ကစားမယ်လို သိရ
ပါတယ်။
မြောက်ကိုရီးယားအမျိုးသမီးကလပ် နာဂိုယန်းအသင်းဟာ အာရှအမျိုးသမီးချန်ပီယံလိဂ် ဆီမီးဖိုင်နယ်အဖြစ် တောင်ကိုရီးယားကလပ်
ဆူဝမ်အသင်းနဲ့ မေလ ၂၀ ရက်မှာ ကစားရမှာဖြစ်ပါတယ်။
မြောက်ကိုရီးယားကလပ်မှာ ကစားသမား ၂၇ ဦးနဲ့ ဝန်ထမ်း ၁၂ ဦး ပါဝင်လာမယ်လို သိရပါတယ်။
ကိုရီးယားပြန်လည်ပေါင်းစည်းရေးဝန်ကြီးဌာနက မြောက်ကိုရီးယားကလပ်ရဲ့ခရီးစဉ်ကို အတည်ပြုပေးခဲ့ပါတယ်။
ဒါဟာ ၂၀၁၈ ခုနှစ်ကတည်းက မြောက်ပိုင်းက ကစားသမားများ နယ်စပ်မျဉ်းကို ဖြတ်ပြီး ပထမဆုံးအကြိမ် လာရောက်ကစားမှာဖြစ်တယ်။
မြောက်ကိုရီးယားဟာ ၂၀၁၈ ခုနှစ် ဖယွန်ချန်ဆောင်းရာသီအိုလံပစ်ပြိုင်ပွဲမှာ တောင်ကိုရီးယားကို အားကစားသမားများ နောက်ဆုံးစေလွှတ်
ခဲ့ပြီး တောင်ကိုရီးယားနဲ့ပူးပေါင်းကာ ရေခဲပြင်ဟော်ကီပြိုင်ပွဲလည်း ဝင်ရောက်ယှဉ်ပြိုင်ခဲ့ပါတယ်။

နည်းပြဘဝတစ်လျှောက် အခမ်းနားဆုံးညတွေထဲက တစ်ညဖြစ်ခဲ့တယ်လို့ အာတေတာ ပြောကြား

အာဆင်နယ်နည်းပြ အာတေတာက ချန်ပီယံလိဂ်ဆီမီးဖိုင်နယ်ဒုတိယအကျော့မှာ အက်သလက်တီကိုကို အနိုင်ယူပြီး ဗိုလ်လုပွဲတက်ရောက်နိုင်ခဲ့ခြင်းက မိမိရဲ့နည်းပြဘဝတစ်လျှောက် အခမ်းနားဆုံးညတွေထဲက တစ်ည ဖြစ်ခဲ့တယ်လို့ ပြောကြားခဲ့ပါတယ်။
အာဆင်နယ်အသင်းဟာ အက်သလက်တီကိုအသင်းကို အိမ်ကွင်းမှာ (၁-၀)ဂိုးနဲ့ အနိုင်ရခဲ့တာကြောင့် နှစ်ကျော့ပေါင်း (၂-၁)ဂိုးနဲ့ ဗိုလ်လုပွဲတက်ရောက်နိုင်ခဲ့တာဖြစ်ပြီး ၂၀၀၅-၀၆ ရာသီမှာ ဗိုလ်လုပွဲရောက်ခဲ့ပြီးနောက် နှစ်ပေါင်း(၂၀)ကြာမှ ချန်ပီယံလိဂ်ဗိုလ်လုပွဲကို ပြန်လည်တက်ရောက်နိုင်ခဲ့ခြင်းလည်း ဖြစ်ပါတယ်။
''ဒါက ကျွန်တော့်ရဲ့နည်းပြဘဝတစ်လျှောက် အကောင်းဆုံးညတွေထဲက တစ်ညပါ။ ဒီနေ့ ပရိသတ်တွေရဲ့ အဆင့်အတန်းက ပိုမြင့်တက်လာတယ်လို့ ထင်ပါတယ်။ သူတို့က ဒီပွဲမှာ ကျွန်တော်တို့ကစားရမယ့် လမ်းကြောင်းကို ပြောခဲ့ပါတယ်။ ကွင်းအပြင်မှာ အသင်းရောက်ရှိလာတာကို သူတို့ ကြိုဆိုခဲ့ပုံက အံ့မခန်းပါပဲ။ အရင်က ဒီလိုမျိုး ကျွန်တော် မမြင်တွေ့ခဲ့ဖူးပါဘူး။ ဒီစွမ်းအင်က ကွင်းထဲမှာ ကျွန်တော်တို့ကို ကွဲပြားခြားနားမှုတွေ ဖြစ်လာအောင် ဖန်တီးပေးခဲ့ပါတယ်။ မယုံနိုင်စရာကောင်းတဲ့ ညတစ်ညဖြစ်ခဲ့ပါတယ်။ ကျွန်တော်တို့ အတူတကွ သမိုင်းကို နောက်တစ်ကြိမ် ဖန်တီးနိုင်ခဲ့ပါတယ်။ ပျော်ရွှင်နေတဲ့ မျက်နှာများစွာကို မြင်တွေ့ခဲ့ရတာကြောင့် ကျွန်တော်တို့ လုပ်ဆောင်ခဲ့တဲ့အရာအတွက် ဂုဏ်ယူမိပါတယ်'' လို့ အာတေတာက ပြောကြားခဲ့ပါတယ်။
အာဆင်နယ်အသင်းကို ၂၀၁၉ ဒီဇင်ဘာမှာ စတင်ကိုင်တွယ်ခဲ့တဲ့ အာတေတာဟာ FA ဖလားတစ်လုံးသာ ရယူပေးနိုင်သေးပေမဲ့ ဒီရာသီမှာတော့ ပရီးမီးယားလိဂ်ဖလားနဲ့ ချန်ပီယံလိဂ်ဖလား နှစ်မျိုးစလုံးကို မျှော်လင့်လို့ ရနေပါပြီ။
အာတေတာက ချန်ပီယံလိဂ်ပြိုင်ပွဲမှာ အာဆင်နယ်အသင်းကို ၂၀၂၃-၂၄ ရာသီမှာ ကွာတားဖိုင်နယ်၊ ၂၀၂၄-၂၅ ရာသီမှာ ဆီမီးဖိုင်နယ်၊ ဒီရာသီမှာ ဗိုလ်လုပွဲရောက်ရှိအောင် စွမ်းဆောင်ပေးထားပြီး မေ(၃၀)မှာ ကျင်းပမယ့် ချန်ပီယံလိဂ်ဗိုလ်လုပွဲမှာတော့ PSG - ဘိုင်ယန်မြူးနစ်ပွဲက အနိုင်ရတဲ့အသင်းနဲ့ ယှဉ်ပြိုင်ရမှာပါ။

ဒီည ယှဉ်ပြိုင်မယ့် ချန်ပီယံလိဂ်ပွဲမှာ အိမ်ကွင်းဝတ်စုံအသစ်ကို ဘိုင်ယန်မြူးနစ် ဝတ်ဆင်ကစားမယ်

ဘိုင်ယန်မြူးနစ်အသင်းက ဒီည ယှဉ်ပြိုင်မယ့် ချန်ပီယံလိဂ်ပွဲမှာ လာမယ့်ရာသီအတွက် ထုတ်လုပ်ထားတဲ့ အိမ်ကွင်းဝတ်စုံအသစ်ကို ဝတ်ဆင်ကစားမယ်လို့ သိရပါတယ်။
ဘိုင်ယန်မြူးနစ်အသင်းဟာ ဒီညမှာ ချန်ပီယံလိဂ်ဆီမီးဖိုင်နယ် ဒုတိယအကျော့အဖြစ် အိမ်ကွင်းမှာ PSG အသင်းနဲ့ ယှဉ်ပြိုင်ကစားရမှာပါ။
၂၀၂၆-၂၇ ရာသီမှာ အသုံးပြုမယ့် ဘိုင်ယန်မြူးနစ်အသင်းရဲ့ ဝတ်စုံအသစ်တွေကို ပြီးခဲ့တဲ့ရက်သတ္တပတ်ကမှ မိတ်ဆက်ပြသခဲ့တာဖြစ်ပြီး အသင်းရဲ့ အစဉ်အလာအတိုင်း ဒီရာသီ ဘွန်ဒစ်လီဂါအိမ်ကွင်းနောက်ဆုံးပွဲမှာ ဝတ်ဆင်ကစားမှာဖြစ်သလို၊ ဂျာမန်ဖလားဗိုလ်လုပွဲမှာလည်း ဝတ်ဆင်ဖွယ်ရှိကြောင်း သိရပါတယ်။
ဒါ့အပြင် ချန်ပီယံလိဂ်ဗိုလ်လုပွဲကို တက်ရောက်နိုင်ခဲ့ရင်လည်း ထပ်မံဝတ်ဆင်ကစားဖွယ်ရှိကြောင်း သိရပါတယ်။
ဘိုင်ယန်မြူးနစ်အသင်းဟာ ချန်ပီယံလိဂ်ဆီမီးဖိုင်နယ်ပထမအကျော့မှာ PSG ကို (၄-၅)ဂိုးနဲ့ ရှုံးနိမ့်ထားတာကြောင့် ဒုတိယအကျော့မှာ နိုင်ပွဲပြန်လည်ရယူနိုင်ဖို့ ကြိုးစားရမှာပါ။
ဘိုင်ယန်မြူးနစ်အသင်းဟာ ဘွန်ဒစ်လီဂါချန်ပီယံဆု ရရှိထားတာကြောင့် ဒီရာသီမှာ ဖလားသုံးလုံးအောင်ပွဲကို မျှော်လင့်နိုင်စွမ်းရှိနေပါတယ်။

ဖိုဒန်ကို ၂၀၃၀ အထိ သက်တမ်းတိုးစာချုပ်ချုပ်ဆိုဖို့ မန်စီးတီးအသင်း သဘောတူညီမှုရရှိ

မန်စီးတီးအသင်းဟာ အင်္ဂလန်တိုက်စစ်ကစားသမား ဖိုဒန်ကို ၂၀၃၀ အထိ သက်တမ်းတိုးစာချုပ်ချုပ်ဆိုဖို့ သဘောတူညီမှုရရှိခဲ့ပြီဖြစ်ကြောင်း သိရပါတယ်။
ဖိုဒန်(၂၅ နှစ်)ဟာ မန်စီးတီးအသင်းရဲ့ အကယ်ဒမီထွက်ကစားသမားဖြစ်ပြီး ၂၀၁၇ မှာ မန်စီးတီးအသင်းအတွက် စတင်ကစားခွင့်ရခဲ့တာပါ။
မန်စီးတီးအသင်းအတွက် ပြိုင်ပွဲစုံ(၃၆၅)ပွဲကစားပြီး (၁၁၀)ဂိုး သွင်းယူထားတဲ့ ဖိုဒန်ရဲ့ လက်ရှိစာချုပ်က ၂၀၂၇ မှာ ကုန်ဆုံးမှာဖြစ်ပါတယ်။
ဖိုဒန်က မန်စီးတီးအသင်းနဲ့ သက်တမ်းတိုးဖို့ ဆွေးနွေးနေတာကြာပြီဖြစ်ပေမဲ့ ဟာလန်းရဲ့ အေးဂျင့်ဖြစ်တဲ့ ပီမန်တာ ဝင်ရောက်ကူညီပေးတော့မှ သဘောတူညီမှုရရှိခဲ့ခြင်းဖြစ်ကြောင်း သိရပါတယ်။
အသေးစိတ်အချက်အလက်တွေ ညှိနှိုင်းဖို့ ကျန်နေသေးပေမဲ့ ဖိုဒန်က မန်စီးတီးအသင်းနဲ့ ၂၀၃၀ အထိ စာချုပ်သစ် ချုပ်ဆိုမှာဖြစ်ပြီး တစ်နှစ် ထပ်မံသက်တမ်းတိုးနိုင်မယ့် သဘောတူညီမှုလည်း ပါဝင်ကြောင်း သိရပါတယ်။
ဖိုဒန်က မတ်လကစပြီး ပရီးမီးယားလိဂ်မှာ မန်စီးတီးအသင်းအတွက် ပွဲထွက်ကစားခွင့်မရရှိတာကြောင့် လာမယ့် ၂၀၂၆ ကမ္ဘာ့ဖလားပြိုင်ပွဲမှာ နေရာပျောက်နိုင်တဲ့ အန္တရာယ်ရှိနေပေမဲ့ မန်စီးတီးအသင်းက ထွက်ခွာဖို့ ဘယ်တုန်းကမှ စဉ်းစားဖူးခြင်းမရှိကြောင်းလည်း နီးစပ်သူတွေက ပြောကြားခဲ့ပါတယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
***********************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ