စစ်ကိုင်းမြို့တွင် ကာလတန်ဖိုး ကျပ် ၂ ဒသမ ၁၄ ဘီလီယံရှိ စိတ်ကြွဆေးပြား ၁၀၇ သိန်း ဖမ်းဆီးရမိ၊ သုံးဦး ဖမ်းဆီးခံရ

နိုဝင်ဘာ ၂

စစ်ကိုင်းမြို့ရှိ တရားမဝင်ကုန်သွယ်မှုတိုက်ဖျက်ရေး ပူးပေါင်းစစ်ဆေးရေးဂိတ်တွင် မူးယစ်ဆေးဝါးတားဆီးနှိမ်နင်းရေး စီမံချက် Operation-42 အရ စစ်ဆေးမှုများ ပြုလုပ်စဉ် ကာလတန်ဖိုး ကျပ် ၂ ဒသမ ၁၄ ဘီလီယံရှိ စိတ်ကြွဆေးပြား ၁၀၇ သိန်း ဖမ်းဆီးရမိခဲ့ပြီး အမျိုးသားတစ်ဦးနှင့် အမျိုးသမီးနှစ်ဦးကို ဖမ်းဆီးစစ်ဆေးလျက်ရှိကြောင်း သိရသည်။

အောက်တိုဘာ ၃၁ ရက် နံနက် ၈ နာရီခန့်က စစ်ကိုင်းမြို့၊ တကောင်းရပ်ကွက်ရှိ ရတနာပုံတံတား တရားမဝင်ကုန်သွယ်မှုတိုက်ဖျက်ရေး ပူးပေါင်းစစ်ဆေးရေးဂိတ်တွင် မန္တလေးမြို့မှ ကလေးမြို့သို့ သွားရောက်မည့် Pajero အမျိုးအစား မော်တော်ယာဉ်တစ်စီးကို စစ်ဆေးရာ ယာဉ်၏ ဒက်စဘုတ်အောက်၊ ရှေ့တံခါးနှစ်ချပ်၊ ကြမ်းခင်းအောက်နှင့် ဆီတိုင်ကီတို့တွင် အံဝှက်များပြုလုပ်၍ သိုဝှက်သယ်ဆောင်လာသည့် စိတ်ကြွဆေးပြားများကို ရှာဖွေတွေ့ရှိခဲ့ခြင်းဖြစ်သည်။

ယာဉ်မောင်း မျိုးနိုင်ဝင်း (ခ) ကိုမျိုး၊ မခင်မိမိစိုးနှင့် မထက်ထက်တို့ လိုက်ပါလာသည့် အဆိုပါယာဥ်၏ အံဝှက်များအတွင်းမှ စိတ်ကြွဆေးပြား ၁ သောင်းပြားစီပါ ၁၀၇ တောင့်၊ စုစုပေါင်း ၁၀၇ သိန်းကို သိမ်းဆည်းရမိခဲ့ပြီး ယင်းဆေးပြားများ၏ ဒေသတန်ဖိုးမှာ တစ်ပြားလျှင် ကျပ် ၂,၀၀၀ နှုန်းဖြင့် စုစုပေါင်း ကျပ် ၂ ဒသမ ၁၄ ဘီလီယံရှိကြောင်း သိရသည်။

စစ်ဆေးချက်များအရ မျိုးနိုင်ဝင်း (ခ) ကိုမျိုး၏ နေအိမ်သို့ အောက်တိုဘာ ၂၂ ရက် ည ၈ နာရီခန့်တွင် စိုင်းမျိုးနိုင် (ခ) ကိုမိုးနှင့် ၎င်း၏ ယောက်ဖဖြစ်သူ အမည်မသိအမျိုးသားတစ်ဦးတို့က ခဲရောင် AD-Van ယာဉ်ဖြင့် အဆိုပါမူးယစ်ဆေးဝါးများကို လာရောက်ပို့ဆောင်ပေးခဲ့သည်ဟုဆိုသည်။

ယင်းဆေးပြားများကို ကလေးမြို့တွင် နေထိုင်သူ အမည်မသိအမျိုးသားတစ်ဦးထံ ပို့ဆောင်ရန်ဖြစ်ပြီး ပို့ဆောင်ခအဖြစ် ကျပ်သိန်း ၁၀၀ ရရှိမည်ဖြစ်ကြောင်း မျိုးနိုင်ဝင်းက ထွက်ဆိုထားသလို သယ်ဆောင်မည့်လမ်းကြောင်းမှာ မန္တလေး-စစ်ကိုင်း-ထီးဆောင်း-အရာတော်-ကံထူးမ-ပျဉ်းကိုင်းမှတစ်ဆင့် မဟာမြိုင်လမ်းအတိုင်း ကလေးမြို့သို့ ပို့ဆောင်ရန်ဖြစ်ကြောင်း သိရသည်။

လက်ရှိတွင် မျိုးနိုင်ဝင်း (ခ) ကိုမျိုး၊ မခင်မိမိစိုးနှင့် မထက်ထက်တို့ကို အသေးစိတ်စစ်ဆေးလျက်ရှိပြီး မူးယစ်ဆေးဝါးများ သယ်ယူပို့ဆောင်ရာတွင် ပါဝင်ပတ်သက်သူများကို ဆက်လက်ဖော်ထုတ်ဖမ်းဆီးကာ ဥပဒေအရ အရေးယူနိုင်ရေး ဆောင်ရွက်လျက်ရှိကြောင်းလည်း သိရသည်။

နိုဝင်ဘာနှင့် ဒီဇင်ဘာတွင် အယ်လ်နီညို အမြင့်ဆုံးအခြေအနေ ရောက်ရှိနိုင်ပြီး လာမည့်ဆောင်းရာသီနှင့် နွေရာသီတွင် ရေရှားပါးမှုများ ဖြစ်ပေါ်နိုင်

နိုဝင်ဘာ ၂

အယ်လ်နီညိုဖြစ်စဉ်သည် ၂၀၂၆ ခုနှစ် နိုဝင်ဘာနှင့် ဒီဇင်ဘာလများတွင် အမြင့်ဆုံးအခြေအနေသို့ ရောက်ရှိနိုင်ကြောင်း ခန့်မှန်းထားသဖြင့် လာမည့်ဆောင်းရာသီနှင့် နွေရာသီကာလများတွင် အပူချိန်မြင့်မားခြင်း၊ မိုးခေါင်ရေရှားခြင်းနှင့် ရေပြတ်လပ်မှုများ ဖြစ်ပေါ်လာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးအကြံပြုထားသည်။

ကမ္ဘာ့မိုးလေဝသအဖွဲ့ချုပ်နှင့် နိုင်ငံတကာရာသီဥတုဗဟိုဌာနများ၏ ထုတ်ပြန်ချက်များအပေါ် အခြေခံသည့် ခန့်မှန်းသုံးသပ်ချက်များအရ အီကွေတာအနီးရှိ အပူပိုင်းပစိဖိတ်သမုဒ္ဒရာ၏ ပင်လယ်ရေမျက်နှာပြင်အပူချိန်သည် ပုံမှန်အပူချိန်ထက် ၂ ဒသမ ၅ ဒီဂရီဆဲလ်စီးယပ်မှ ၂ ဒသမ ၈ ဒီဂရီဆဲလ်စီးယပ်အထိ မြင့်တက်နေပြီး အယ်လ်နီညိုဖြစ်စဉ်မှာ အားအလွန်ကောင်းသည့် အခြေအနေတွင် ဆက်လက်တည်ရှိနေကြောင်း သိရသည်။

အယ်လ်နီညိုဖြစ်စဉ်သည် ပစိဖိတ်သမုဒ္ဒရာအတွင်း ဖြစ်ပေါ်သည့် ရာသီဥတုဖြစ်စဉ်တစ်ခုဖြစ်သော်လည်း ကမ္ဘာ့ဒေသအသီးသီးတွင် မိုးရွာသွန်းမှုပုံစံ မူမမှန်ခြင်း၊ မုန်တိုင်းဖြစ်ပေါ်မှု အခြေအနေများ ပြောင်းလဲခြင်း၊ အပူချိန်မြင့်တက်ခြင်းနှင့် မိုးခေါင်ရေရှားခြင်းစသည့် ရာသီဥတုဆိုင်ရာ အစွန်းရောက်ဖြစ်စဉ်များကို ဖြစ်ပေါ်စေနိုင်သည်။

အထူးသဖြင့် လာမည့်ဆောင်းရာသီနှင့် နွေရာသီကာလများတွင် မြစ်ချောင်း၊ အင်းအိုင်၊ ရေတွင်းနှင့် ရေကန်များ၌ ရေခန်းခြောက်မှုများ ဖြစ်ပေါ်နိုင်သည့်အပြင် သောက်သုံးရေနှင့် စိုက်ပျိုးရေ မလုံလောက်မှုများလည်း ကြုံတွေ့လာနိုင်ကြောင်း သိရသည်။

ထို့ပြင် အပူချိန်မြင့်တက်မှုကြောင့် အပူရှပ်ခြင်း၊ ရေဓာတ်ခန်းခြောက်ခြင်းနှင့် ရေရှားပါးမှုဆက်စပ်သည့် ဝမ်းပျက်ဝမ်းလျှောရောဂါများ ဖြစ်ပွားနိုင်သည့်အပြင် ရေလှောင်တမံများအတွင်း ရေဝင်ရောက်မှု နည်းပါးလာပါက ရေအားလျှပ်စစ်ထုတ်လုပ်နိုင်မှု လျော့နည်းပြီး လျှပ်စစ်ဓာတ်အားလိုအပ်ချက် မြင့်တက်လာနိုင်ကြောင်း သတိပေးထားသည်။

သို့ဖြစ်၍ အယ်လ်နီညိုဖြစ်စဉ်၏ အကျိုးသက်ရောက်မှုများကို ကြိုတင်ကာကွယ်လျှော့ချနိုင်ရန် သောက်သုံးရေ၊ စိုက်ပျိုးရေ၊ ကျန်းမာရေး၊ လျှပ်စစ်နှင့် စွမ်းအင်ကဏ္ဍများအပါအဝင် သက်ဆိုင်ရာကဏ္ဍများအလိုက် ကြိုတင်ပြင်ဆင်ဆောင်ရွက်ထားကြရန် မိုးလေဝသနှင့် ဇလဗေဒညွှန်ကြားမှုဦးစီးဌာနက အကြံပြုထားသည်။

တာချီလိတ်ရှိ ဟိုတယ်တစ်ခုတွင် အွန်လိုင်းလိမ်လည်လောင်းကစားလုပ်ကိုင်သည့် ထိုင်းနိုင်ငံသား ၈၃ ဦး ဖမ်းဆီးရမိ

နိုဝင်ဘာ ၂

ရှမ်းပြည်နယ် (အရှေ့ပိုင်း)၊ တာချီလိတ်မြို့ရှိ ယုဝရတ်ဟိုတယ်တွင် အွန်လိုင်းလိမ်လည်လောင်းကစားလုပ်ငန်းများ လုပ်ကိုင်နေသည့် ထိုင်းနိုင်ငံသား အမျိုးသား ၄၂ ဦးနှင့် အမျိုးသမီး ၄၁ ဦး၊ စုစုပေါင်း ၈၃ ဦးကို Laptop ၄၀ လုံးနှင့် မိုဘိုင်းဖုန်း ၇၅ လုံးတို့နှင့်အတူ ဖမ်းဆီးရမိခဲ့ကြောင်း သိရသည်။

အဆိုပါဖမ်းဆီးမှုကို အောက်တိုဘာ ၃၁ ရက် ညနေ ၅ နာရီ ၄၅ မိနစ်ခန့်တွင် တာချီလိတ်မြို့၊ ဆန်ဆိုင်း (က) ရပ်ကွက်ရှိ ယုဝရတ်ဟိုတယ်၌ လုံခြုံရေးတပ်ဖွဲ့ဝင်များပါဝင်သည့် ပူးပေါင်းအဖွဲ့က သတင်းအရ စုံစမ်းဖော်ထုတ်ဆောင်ရွက်စဉ် ပြုလုပ်ခဲ့ခြင်းဖြစ်သည်။

ဖမ်းဆီးရမိသူများသည် အဆိုပါဟိုတယ်၌ အွန်လိုင်းလိမ်လည်မှုနှင့် လောင်းကစားလုပ်ငန်းများ လုပ်ကိုင်နေကြောင်း သိရပြီး လုပ်ငန်းများတွင် အသုံးပြုသည့် Laptop မျိုးစုံ ၄၀ လုံးနှင့် ဖုန်းမျိုးစုံ ၇၅ လုံးကိုလည်း သိမ်းဆည်းရမိခဲ့သည်။

နိုင်ငံတော်အစိုးရအနေဖြင့် အွန်လိုင်းလိမ်လည်မှုနှင့် အွန်လိုင်းလောင်းကစားမှုများကို ရှာဖွေဖော်ထုတ်တားဆီးရေးလုပ်ငန်းများ ဆောင်ရွက်လျက်ရှိပြီး အိမ်နီးချင်းနိုင်ငံများနှင့်လည်း ပူးပေါင်းညှိနှိုင်းကာ အဆိုပါလုပ်ငန်းများတွင် ပါဝင်ပတ်သက်သူများကို ဖော်ထုတ်ဖမ်းဆီးအရေးယူလျက်ရှိကြောင်း သိရသည်။

လက်ရှိတွင် ဖမ်းဆီးရမိသူများအား လိုအပ်သည့် စစ်ဆေးမှုများ ဆောင်ရွက်လျက်ရှိပြီး စစ်ဆေးမှုများ ပြီးစီးပါက တည်ဆဲဥပဒေများနှင့်အညီ အရေးယူသွားမည်ဖြစ်သကဲ့သို့ သိမ်းဆည်းရမိသည့် လုပ်ငန်းသုံးပစ္စည်းများကိုလည်း လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း သိရသည်။

ထိုင်းနိုင်ငံ ကမ်ဖဲန်းဖက်တွင် ယာဉ်သုံးစီးဆင့်တိုက်မှုဖြစ်ပွားပြီး ထိုင်းနိုင်ငံသားနှင့် မြန်မာနိုင်ငံသား ၂ ဦး သေဆုံး၊ ၁၀ ဦး ဒဏ်ရာရ

နိုဝင်ဘာ ၂

ထိုင်းနိုင်ငံ ကမ်ဖဲန်းဖက်ခရိုင် အောင်သောင်မြို့နယ်ရှိ ကမ်ဖဲန်းဖက်လမ်းမပေါ် U-turn ကွေ့တစ်ခုအနီးတွင် ယနေ့ နိုဝင်ဘာ ၂ ရက် နံနက်ပိုင်းက ယာဉ်သုံးစီးဆင့်တိုက်မှုဖြစ်ပွားခဲ့ရာ ထိုင်းနိုင်ငံသားတစ်ဦးနှင့် မြန်မာနိုင်ငံသားတစ်ဦး သေဆုံးပြီး ၁၀ ဦး ဒဏ်ရာရရှိခဲ့ကြောင်း ထိုင်းနိုင်ငံအခြေစိုက် MGR သတင်းဌာနက ဖော်ပြသည်။

ကမ်ဖဲန်းဖက်ရဲစခန်းမှ စုံစမ်းစစ်ဆေးရေးအရာရှိ၏ ပြောကြားချက်အရ ခရီးသည်တင်ယာဉ်တစ်စီးသည် U-turn ကွေ့နေစဉ် ကုန်တင်ယာဉ်၏ နောက်ပိုင်းကို ဝင်တိုက်မိခဲ့ပြီးနောက် စိုက်ပျိုးရေးလုပ်ငန်းသုံးယာဉ်တစ်စီးကို ထပ်မံဝင်တိုက်ခဲ့ခြင်းဖြစ်သည်ဟုဆိုသည်။

ယာဉ်တိုက်မှုဖြစ်ပွားရာနေရာတွင် ခရီးသည်တင်ယာဉ်ကို မောင်းနှင်လာသည့် အသက် ၄၀ ဝန်းကျင် ထိုင်းနိုင်ငံသားယာဉ်မောင်းနှင့် ယာဉ်နောက်ခန်း၌ လိုက်ပါလာသည့် မြန်မာနိုင်ငံသားတစ်ဦးတို့ သေဆုံးနေသည်ကို တွေ့ရှိခဲ့ရသလို ခရီးသည် ၆ ဦးမှာ ထိခိုက်ဒဏ်ရာများ ရရှိခဲ့သဖြင့် ကမ်ဖဲန်းဖက်ဆေးရုံသို့ ပို့ဆောင်ကုသခဲ့ရပြီး အခြား ၄ ဦးမှာ မပြင်းထန်သည့် ဒဏ်ရာများ ရရှိခဲ့ကြောင်း သိရသည်။

ယာဉ်ပေါ်တွင် လိုက်ပါလာသည့် မြန်မာအမျိုးသမီးတစ်ဦး၏ ပြောကြားချက်အရ ခရီးသည်တင်ယာဉ်ပေါ်၌ စုစုပေါင်း ၁၃ ဦး လိုက်ပါလာခဲ့ပြီး U-turn ကွေ့နေစဉ် ယာဉ်တိုက်မှု ဖြစ်ပွားခဲ့ခြင်းဖြစ်ကာ လက်ရှိတွင် အဆိုပါယာဉ်တိုက်မှု ဖြစ်ပွားရသည့် အကြောင်းရင်းနှင့် ဖြစ်စဉ်အသေးစိတ်ကို ကမ်ဖဲန်းဖက်ရဲစခန်းက ဆက်လက်စစ်ဆေးမေးမြန်းလျက်ရှိကြောင်းလည်း သိရသည်။

#သတင်းဟင်းလေးအိုးကြီး

အမေရိကန်က တရုတ်နိုင်ငံသား ၂ ဦးကို သူလျှိုမှုဖြင့် ထောင်ချ

ဝါရှင်တန်၊ နိုဝင်ဘာ ၂

အမေရိကန်စစ်ဘက်ဆိုင်ရာ တပ်ဖွဲ့ဝင်များအား တရုတ်အတွက် စပိုင်လုပ်ပေးရန် စည်းရုံးသိမ်းသွင်းမှုဖြင့် ပြစ်မှု ထင်ရှားဝန်ခံခဲ့သည့် တရုတ်နိုင်ငံသား ၂ ဦးကို အမေရိကန်က ထောင်ဒဏ်များ ချမှတ်ခဲ့ကြောင်း အယ်လ်ဂျာ ဇီးယားသတင်းမှ ဖော်ပြခဲ့သည်။

အသက် ၄၀ အရွယ် လီရန် ရိုင်ယန် လိုင် (Liren Ryan Lai) နှင့် အသက် ၃၉ အရွယ် ယူအန်စီ ချန် (Yuance Chen) တို့အား တစ်ဦးလျှင် ထောင်ဒဏ် လပေါင်း ၃၀ စီနှင့် စောင့်ကြည့်ခံကာလ ၃ နှစ်စီ အသီးသီး ပြစ်ဒဏ်ချမှတ်ခဲ့ ကြောင်း အမေရိကန်တရားရေးဝန်ကြီးဌာနက အောက်တိုဘာ ၃၀ ရက်တွင် ကြေညာချက် ထုတ်ပြန်ခဲ့သည်။

အမေရိကန် အမျိုးသားလုံခြုံရေးဆိုင်ရာ အချက်အလက်များနှင့် အလဲအလှယ်ပြုလုပ်ရန် လျှို့ဝှက် ငွေပေးချေမှု များကို ၎င်းတို့ ၂ ဦးက စီစဉ် ဆောင်ရွက်ခဲ့ကြောင်းလည်း ထုတ်ပြန်ချက်တွင် ပါရှိသည်။

၎င်းတို့နှစ်ဦးသည် အမေရိကန် အမျိုးသားလုံခြုံရေးကို ထိခိုက်စေရန်နှင့် အမေရိကန် ပြည်ထောင်စုအတွင်း တရုတ်ထောက်လှမ်းရေးဆိုင်ရာ စစ်ဆင်ရေးများနှင့် သူလျှိုစုဆောင်းမှုများကို ကူညီပေးရန် ပူးပေါင်းကြံစည်မှု အစီအစဉ်တစ်ခုကို ဆောင်ရွက်ခဲ့ကြခြင်းဖြစ်ကြောင်း အမျိုးသားလုံခြုံရေးဆိုင်ရာတွဲဖက် အစိုးရရှေ့နေချုပ် ဂျွန် အေ အိုက်စင်ဘတ်ဂ် (John A Eisenberg) က ပြောကြားခဲ့သည်။

တရားရုံး မှတ်တမ်းများအရ လိုင်နှင့် ချန်တို့သည် နောက်ဆုံး ၂၀၂၁ ခုနှစ်၊ မေလထက် နောက်မကျဘဲ တရုတ်နိုင်ငံ ၏ ပြည်ပထောက်လှမ်းရေး အဖွဲ့အစည်းဖြစ်သော နိုင်ငံတော် လုံခြုံရေးဝန်ကြီးဌာနအတွက် အေးဂျင့်များအဖြစ် စတင် လှုပ်ရှားခဲ့ကြခြင်း ဖြစ်ကြောင်း ဖော်ပြထားသည်။

ကမ္ဘာလှည့် ခရီးသွားဗီဇာဖြင့် အမေရိကန်သို့ ရောက်ရှိလာခဲ့သူ လိုင်သည် အမေရိကန်တွင် အမြဲတမ်း နေထိုင်ခွင့် ရရှိထားသူ ချန်အား စည်းရုံးသိမ်းသွင်းခဲ့ပြီး၊ ချန် အနေဖြင့် ၎င်း၏ ညွှန်ကြားရေးမှူးထံမှ တိုက်ရိုက် အမိန့်များ မရရှိသေးမီ အချိန်အထိ လိုင်က ကြားခံအဖြစ် ဆောင်ရွက်ပေးခဲ့သည်။

၂၀၂၂ ခုနှစ်၊ မေလတွင် ၎င်းတို့သည် တရုတ်နိုင်ငံမှ လျှို့ဝှက် ပေးပို့လိုက်သည့် အမေရိကန်ဒေါ်လာ ၁၀,၀၀၀ အား ထုတ်ယူရန် အမေရိကန်၌ နေထိုင်သူများကို ကြားခံအဖြစ် အသုံးပြုခဲ့ပြီး လျှို့ဝှက်ငွေပေးချေမှု ပြုလုပ်ခဲ့ကြသည် ဟု ဆိုသည်။

နောက်ပိုင်းတွင် တရားခံ ၂ ဦးသည် အလားတူ စစ်ဆင်ရေး တစ်ခုကို ထပ်မံ လုပ်ဆောင်ခဲ့ကြပြီး တရုတ်မှ ပေးပို့ခဲ့ သည့် ဒေါ်လာ ၂၀,၀၀၀ ကို လျှို့ဝှက် ငွေပေးချေမှုများဖြင့် ကူညီ ဆောင်ရွက်ပေးခဲ့သည်။

ထို့အပြင် ချန်နှင့် လိုင်တို့သည် အမေရိကန်ရေတပ် စခန်းတစ်ခု၊ စစ်သင်တန်းသားများနှင့် တာဝန်ထမ်းဆောင်ဆဲ ရေတပ်သားများ၏ ဓာတ်ပုံများကို ရယူခြင်း အပါအဝင် အခြားသော သူလျှိုလုပ်ငန်း လှုပ်ရှားမှုများကိုလည်း ပြုလုပ်ခဲ့ကြကြောင်း ထုတ်ပြန်ချက်တွင် ဖော်ပြခဲ့သည်။

Source: အယ်လ်ဂျာဇီးယား

ပုံ - အမေရိကန်တရားရေးဝန်ကြီးဌာနကို တွေ့ရစဉ်

Credit - CNI

#သတင်းဟင်းလေးအိုးကြီး

တရုတ်နှင့်အမေရိကန်၏ စစ်ရေးကစားပွဲက မြန်မာဖြစ်သွားမှာ စိုးရိမ်

နိုဝင်ဘာ ၂

ကမ္ဘာပေါ်တွင် အင်အားအကြီးဆုံးနိုင်ငံကြီး နှစ်ခုဖြစ်သည့် တရုတ်နှင့် အမေရိကန်တို့ အချင်းချင်းကြား စစ်ရေး ကစားပွဲက မြန်မာနိုင်ငံဖြစ်သွားမှာကို စိုးရိမ်ကြောင်း တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

ကွန်မြူနစ်ကို တိုက်ခိုက်ခဲ့ချိန်က အမေရိကန်နှင့်မြန်မာသည် အဆင်ပြေခဲ့ကြောင်း၊ ထိုအခါက တရုတ်စစ်တပ် သည် ကွန်မြူနစ်ဘက်မှ ဝင်ရောက် ကူညီတိုက်ခိုက်ခဲ့ပေးသည့်အပြင် ရိက္ခများလည်း ကူညီပေးခဲ့ကြောင်း ၎င်းက ပြောသည်။

စိုင်းဋ္ဌေးအောင်က “အဲဒီအချိန်မှာ ဒီဘက် အစိုးရကို အမေရိကန်ရဲ့ ထောက်ပံ့မှုတွေ ရကြတာပေါ့။ အဲဒီအချိန်တုန်း က စ-စ်ပွဲတွေ အများကြီး ဖော်ဆောင်ခဲ့ဖူးတယ်။ အဲဒါကိုလည်း တရုတ်က ကောင်းကောင်းကြီး သင်ခန်းစာ ယူ ထားပြီးမှ ယနေ့ အချိန်ကတော့ လက်နက်တွေ ဘာတွေကအစ ပေးလို့ရအောင် သူဖွင့်ပါလိမ့်မယ်။ အမေရိကန်နဲ့ မြန်မာ ဆက်ဆံရေး ပြေလည်သွားပြီဆိုရင် သူ့အတွက်ကို အကျိုးရလဒ်တွေက တော်တော် နည်းသွားနိုင်တဲ့ အတွက်ကြောင့်မို့လို့ ဒါအခု အမေရိကန်ဆိုလည်း မြေရှား သူလိုချင်တယ်၊ နောက် မြန်မာပြည်မှာရှိနေတဲ့ ကျားဖြန့် ကိစ္စ သူနှိမ်နင်းချင်တယ်၊ သူဝင်လို့ မရဘူး။ အဲဒီလိုမျိုးတွေ အတွက်ကို မြန်မာပြည်အစိုးရနဲ့ သံရေးတမန်ရေး အဆင်ပြေအောင် သူကြိုးစားတဲ့အခါမှာ တရုတ်ကတော့ တရုတ်နဲ့ အမေရိကန်က ကမ္ဘာပေါ်မှာ အားပြိုင်နေတဲ့ အခါကြတော့ မြန်မာပြည် အနေနဲ့ကတော့ သတိထားဖို့တော့ လိုအပ်တာပေါ့နော် အဲဒီကိစ္စကို။ ကျနော် အစိုးရိမ် ဆုံးကတော့ တရုတ်နဲ့ အမေရိကန်ရဲ့ စစ်ရေး ကစားပွဲကြီးက မြန်မာပြည် ဖြစ်သွားမှာကို အရမ်း စိုးရိမ်တယ်။ အဲဒါ ကြောင့် အခုလက်ရှိ အုပ်ချုပ်နေသူတွေ အနေနဲ့ ဒါလိမ္မာပါးနပ်စွာနဲ့ ကစားတတ်ဖို့တော့ အရမ်းလိုတယ်လို့ ကျနော့် အနေနဲ့ ပြောချင်ပါတယ်” ဟု ပြောသည်။

တရုတ်နှင့် အမေရိကန်တို့၏ စစ်ရေး၊ စီးပွားရေးနှင့် ပထဝီနိုင်ငံရေး စသည့် ဘက်ပေါင်းစုံမှ ပြိုင်ဆိုင်မှုသည် မြန်မာ နိုင်ငံအပေါ် အမှန်တကယ် သက်ရောက်မှု ရှိနေကြောင်း၊ တိုက်ရိုက် မဟုတ်ဘဲ ကြားခံနယ်ပယ်အဖြစ် စီးပွားရေး ပိတ်ဆို့မှု၊ နိုင်ငံတကာ သံတမန်ရေး ဖိအားပေးမှုများနှင့် နယ်စပ်ဒေသ ဩဇာလွှမ်းမိုးမှု ပြိုင်ပွဲများ ဆက်လက် ဖြစ်ပွားနိုင်သည်ဟု နိုင်ငံရေးအကဲခတ်များက သုံးသပ်ကြသည်။

တရုတ်က မြန်မာ့မြေပေါ်ရှိ ၎င်း၏ ရင်းနှီးမြှုပ်နှံမှုနှင့် လုံခြုံရေးကို အကာအကွယ်ပေးရန် စစ်ရေးအရ အကူအညီ များ တိုးမြှင့်လာနိုင်သကဲ့သို့ အမေရိကန်ကလည်း ၎င်းနှင့် ဆန့်ကျင်ဘက် အင်အားစုများကို သံတမန်ရေး၊ နည်း ပညာအရ ဆက်လက် ထိန်းကျောင်းနိုင်သည်ဟု ထောက်ပြကြသည်။

မြန်မာနိုင်ငံသည် သီးခြားနေ၍ မရသည့် နိုင်ငံဖြစ်ပြီး နယ်စပ် တည်ငြိမ်အေးချမ်းရေးအတွက် နယ်နိမိတ်ချင်း ထိစပ်နေသည့် နိုင်ငံများအား မဆက်ဆံဘဲ နေ၍မရကြောင်း၊ ဒုက္ခရောက်နေသည့် ပြည်သူများအတွက် မည်ကဲ့သို့ ကောင်းမွန်အောင် ဆောင်ရွက်ပေးမည်ကို ဦးတည်စဉ်းစား စေချင်ကြောင်း ရှမ်းပြည်ပူးပေါင်းဆောင်ရွက်ရေး ကော်မတီ (SSJAC)မှ ဆက်ဆံရေးတာဝန်ခံ စိုင်းဆမ်ဖွဏ်ဆိုင်က CNI သတင်းဌာနသို့ ပြောသည်။

၎င်းက “ကျနော်တစ်ခုတော့ ထောက်ပြချင်တာ တစ်ခုတော့ရှိပါတယ်။ မြန်မာနိုင်ငံက သီးခြားနေလို့မရတဲ့ နိုင်ငံပါ။ တရုတ်နဲ့လည်း ချိတ်ဆက်ရမယ့် နယ်ချင်းထိစပ်တဲ့ နိုင်ငံရှိတယ်။ အိန္ဒိယနဲ့လည်း နယ်နိမိတ်ချင်း ထိစပ်တဲ့နေရာ ရှိတယ်။ ထိုင်းနဲ့လည်း ထိစပ်နေတာရှိတယ်။ မြန်မာပြည်နယ်မြေပေါ့ နယ်စပ်တည်ငြိမ် အေးချမ်းဖို့အတွက် ဆိုရင် တော့ ကျနော်တို့နဲ့ နယ်နိမိတ်ချင်း ထိစပ်နေတဲ့ နိုင်ငံတွေကို မဆက်ဆံလို့ မရဘူး။ အဲဒီလိုမျိုး အနေအထားမှာဆို ရင် ဘယ်လိုမျိုး ကောင်းမွန်တဲ့ ဆက်ဆံရေး ဖြစ်အောင် Mutual benefits ပေါ့နော်။ နှစ်ဖက်နှစ်နိုင်ငံလုံး အကျိုးရှိ မယ့် ကိစ္စတွေ၊ လူထု အကျိုးရှိမယ့်ကိစ္စတွေ ဘယ်လိုမျိုး ပူးပေါင်းဆောင်ရွက်မလဲ၊ ဘယ်လိုမျိုး နည်းဗျူဟာ၊ မဟာ ဗျူဟာနဲ့ အားလုံးပေါ့နော်။ အခု ဒုက္ခရောက်နေတဲ့ ပြည်သူတွေကို အဲဒါမျိုး ပုံမှန်အားစိုက်ပြီးတော့မှ ကောင်း အောင် လုပ်မလဲ ဆိုတဲ့ဟာကို ကျနော်က ဦးတည်ခိုင်းစေချင်တယ်။ စဉ်းစားခိုင်းစေချင်တယ်” ဟု ပြောသည်။

အမေရိကန်သည် မြန်မာနိုင်ငံအတွင်း တိုက်ရိုက် စစ်အင်အားသုံး စွက်ဖက်မှု ပြုလုပ်ရန် အလားအလာ လုံးဝနီးပါး နည်းပါးပြီး နိုင်ငံရေးနှင့် စီးပွားရေး ပိတ်ဆို့မှုများကိုသာ အဓိက ကျင့်သုံးတတ်ကာ တရုတ်သည် မြန်မာနိုင်ငံ အတွင်း တိုက်ရိုက် စစ်ရေးစွက်ဖက်မှုထက် နယ်စပ်ဒေသ တည်ငြိမ်ရေးနှင့် တိုင်းရင်းသား လက်နက်ကိုင် အဖွဲ့များ အပေါ် ၎င်း၏ ဩဇာကိုသုံး၍ ထိန်းကျောင်းလေ့ရှိသည်။

မြန်မာနိုင်ငံသည် မိမိ၏ ပထဝီဝင် အနေအထားကြောင့်သာ ၎င်းတို့ နှစ်နိုင်ငံ၏ ပထဝီနိုင်ငံရေး၊ စီးပွားရေးနှင့် လုံခြုံရေး အားပြိုင်ပွဲ နယ်ပယ်တစ်ခုအဖြစ် ဆက်လက် တည်ရှိနေမည်ဟု နိုင်ငံရေးအကဲခတ်များက ထောက်ပြကြ သည်။

ပုံ - အမေရိကန်နဲ့တရုတ်ရဲ့ စစ်တုရင်ခုံပေါ်က မြန်မာနိုင်ငံကို သရုပ်ဖော်ထားစဉ်

Credit - CNI

#သတင်းဟင်းလေးအိုးကြီး

အမေရိကန်တွင် ဖလာဗီယို ဆန္ဒရှိသလောက် နေနိုင်ကြောင်း ထရမ့်ပြော

ဝါရှင်တန်၊ နိုဝင်ဘာ ၂

ဘရာဇီးလ်သမ္မတ ရွေးကောက်ပွဲတွင် ရှုံးနိမ့်ခဲ့ပြီးနောက် ဘရာဇီးလ်နိုင်ငံမှ အမေရိကန်သို့ ထွက်ပြေးတိမ်းရှောင် လာသည့် ဖလာဗီယို ဘော်လ်ဆိုနာရို (Flávio Bolsonaro) အနေဖြင့် အမေရိကန်တွင် ဆန္ဒရှိသလောက် နေထိုင်နိုင်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က အောက်တိုဘာ ၃၁ ရက်တွင် ပြောကြားခဲ့သည်ဟု USA Today သတင်းမှ ဖော်ပြခဲ့သည်။

ဖလော်ရီဒါရှိ ၎င်း၏ Mar-a-Lago စံအိမ်တွင် ပြုလုပ်သော တစ္စေကြီးများပွဲတော် (Halloween) ပါတီတစ်ခုအတွင်း ထရမ့်က သတင်းထောက်များကို ထိုကဲ့သို့ ပြောကြားခဲ့ခြင်းဖြစ်သည်။

အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) ကမူ ဖလာဗီယို၏ ကိစ္စနှင့်ပတ်သက်ပြီး ဘရာဇီးလ်၏ ထိပ်တန်း သံတမန်နှင့် ဆွေးနွေး ပြောဆိုခဲ့သော်လည်း အနောက်ကမ္ဘာခြမ်း၏ အကြီးဆုံး ဒီမိုကရေစီနိုင်ငံများဖြစ်သည့် အမေရိကန်နှင့် ဘရာဇီးလ်ကြား ဆက်ဆံရေးမှာ ကာလတစ်ခုအထိ ဆက်လက် တင်းမာနေနိုင်သည်ကို ညွှန်ပြနေသည်။

“သူ ဒီမှာ နေချင်သလောက် ကြာကြာ နေနိုင်ပါတယ်၊ ကျနော့် အမြင်ပြောရရင် အဲဒီ ရွေးကောက်ပွဲဟာ ရှက်စရာ ကောင်းတဲ့ ကိစ္စတစ်ခုပါပဲ”ဟု ထရမ့်က ပြောကြားခဲ့သည်။

အောက်တိုဘာ ၂၅ ရက်က ပြုလုပ်ခဲ့သော ဘရာဇီးလ်သမ္မတ ရွေးကောက်ပွဲတွင် ဖလာဗီယိုသည် လက်ရှိသမ္မတ လူးဝစ် အင်နာစီယို လူလာ ဒါ ဆေးလ်ဗား (Luiz Inácio Lula da Silva) အား ရှုံးနိမ့်ခဲ့သည်။

ဝါရှင်တန်ဒီစီရှိ ဘရာဇီးလ်သံရုံးကမူ ထိုအကြောင်းအရာနှင့်ပတ်သက်ပြီး မှတ်ချက်ပေးရန် တောင်းဆိုမှုကို ချက်ချင်း တုံ့ပြန်ခြင်း မရှိသေးပေ။

ပြင်ပ လေ့လာဆန်းစစ်သူများက ဘရာဇီးလ်သမ္မတ ရွေးကောက်ပွဲကို လွတ်လပ်ပြီး တရားမျှတသော ရွေးကောက်ပွဲအဖြစ် ဖော်ပြခဲ့ကြသည်။

ဖလာဗီယိုသည် ရွေးကောက်ပွဲ ရှုံးနိမ့်ပြီးနောက် ဘရာဇီးလ် ဖက်ဒရယ် တရားရုံးချုပ် တရားသူကြီးတစ်ဦးက ၎င်း၏ နိုင်ငံကူးလက်မှတ်ကို ရုပ်သိမ်းရန် အမိန့်ချမှတ်ခဲ့သည်။

ဖလာဗီယိုသည် ငွေကြေး ခဝါချမှုဆိုင်ရာ စုံစမ်းစစ်ဆေးမှု ၂ ခုနှင့် ရင်ဆိုင်နေရပြီး နိုင်ငံအတွင်းမှ ထွက်ပြေးနိုင်ခြေ ရှိသူအဖြစ် ရဲတပ်ဖွဲ့က သတ်မှတ်ခဲ့ကာ ၎င်း၏ နိုင်ငံကူး လက်မှတ်ကို ပြန်အပ်ရန် တရားသူကြီးက အမိန့်ထုတ်ပြန် ခဲ့သည့်တိုင် ဖလာဗီယိုသည် ဘရာဇီးလ်မှ ထွက်ပြေးတိမ်းရှောင်နိုင်ခဲ့သည်။

Source: USA Today


ပုံ - ဖလာဗီယို ဘော်လ်ဆိုနာရိုကို တွေ့ရစဉ်

Credit - CNI

မြန်မာ့အကြီးဆုံး ဟံသာဝတီလေဆိပ်စီမံကိန်းကို ပြန်စဖို့ နေပြည်တော်ပြင်ဆင်

နိုဝင်ဘာ ၁

အမျိုးသားဒီမိုကရေစီအဖွဲ့ချုပ်ပါတီ(NLD) အစိုးရလက်ထက်မှာ ရပ်ဆိုင်းခဲ့တဲ့ ဟံသာဝတီအပြည်ပြည်ဆိုင်ရာလေဆိပ်စီမံကိန်းကို ပြန်စဖို့ နေပြည်တော်က ကော်မတီ ဖွဲ့လိုက်ပါတယ်။

လေဆိပ်စီမံကိန်း ဦးဆောင်ကော်မတီကို ဒုတိယ သမ္မတ ဦးညိုစောက ဦးဆောင်မယ်လို့ဆိုပြီး နေပြည်တော်က စက်တင်ဘာ ၂၃ ရက် ရက်စွဲနဲ့ ပြန်တမ်းထုတ်တာဖြစ်ပါတယ်။

ဒီလေဆိပ်ကို ၂၀၂၂ ခုနှစ်မှာ စတင်ဖွင့်လှစ်နိုင်ဖို့ လျာထားခဲ့ပေမဲ့ ဆောက်လုပ်ရေးအတွက် သဘောတူညီထားတဲ့ရက် ကျော်လွန်ခဲ့တာ၊ ကုန်ကျစရိတ်တွက်ချမှု မကိုက်ညီမှုတွေ၊ ကိုဗစ်ကပ်ဘေး နဲ့ ဂျပန်အစိုးရရန်ပုံငွေ ရပ်ဆိုင်းမှုတွေ ကြောင့် ဒီလေဆိပ်စီမံကိန်းကြီးက ရပ်တန့်ခဲ့တာပါ။

နေပြည်တော်က အခုအသစ်ဖွဲ့လိုက်တဲ့ ကော်မတီထဲမှာ ဗဟိုဘဏ်ဥက္ကဋ္ဌ၊ ပို့ဆောင်ရေး၊ လျှပ်စစ်နဲ့ စွမ်းအင်၊ စီမံကိန်း၊ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး၊ ဘဏ္ဍာ/အခွန်၊ ဥပဒေရေးရာ၊ စိုက်ပျိုးရေး၊ ဆောက်လုပ်ရေး၊ မွေးမြူရေးနဲ့ဆည်မြောင်း၊ သယံဇာတနဲ့သဘာဝပတ်ဝန်းကျင်ထိန်းသိမ်းရေး စတဲ့၀န်ကြီးဌာနတွေက ၀န်ကြီးတွေနဲ့ ပဲခူးတိုင်းဒေသကြီးအစိုးရအဖွဲ့တို့ပါ၀င်ပါတယ်။

နောက်ပြီး စစ်အင်ဂျင်နီယာညွှန်ကြားရေးမှူးနဲ့ ရန်ကုန်တိုင်းဝန်ကြီးချုပ်တို့ကိုလည်း ကော်မတီ၀င်အဖြစ်ထည့်ထားပါတယ်။

စီမံကိန်းကို ထပ်မကြာဘဲ ရှေ့ဆက်လုပ်နိုင်အောင် အကောင်အထည်ဖော်နိုင်ဖို့ ရည်ရွယ်ပြီး ဒီကော်မတီဖွဲ့တာလို့လည်းဆိုပါတယ်။

နောက်ပြီး ဘဏ္ဍာငွေခွဲဝေမှု၊ ခရီးသည်ခွဲဝေမှု၊ ငွေစာရင်းတွက်ချက်မှု၊ စစ်ဆေးမှုတို့အတွက် မူဝါဒချမှတ်ရမယ်ဆိုတဲ့အချက်တွေအပြင် ဒီစီမံကိန်း အကောင်အထည်ဖော်မှု ရဲ့ တိုးတက်မှုတွေကို စောင့်ကြည့်ကြပ်မတ်ရမယ်လို့ ဆိုပါတယ်။

လုပ်ငန်းကော်မတီတွေကို လည်း ဆက်ပြီးဖွဲ့စည်းသွားရမယ်လို့ ဆိုပါတယ်။

ခရီးသည် ၁၂ သန်းအထိ ၀န်ဆောင်မှုပေးဖို့ရည်မှန်းထားတဲ့ ဒီစီမံကိန်းအတွက် တင်ဒါခေါ်ယူမှုတွေကို ဦးသိန်းစိန်အစိုးရလက်ထက်မှာ စတင်ခဲ့တာပါ။

လေဆိပ်စီမံကိန်းအတွက် ၂၀၁၃ ခုနှစ်က တင်ဒါခေါ်ယူမှုမှာ Incheon Airport Consortium ကို ရွေးချယ်ခဲ့ပေမဲ့ ညှိနှိုင်းမှုတွေမှာ အဆင်မပြေခဲ့ဘဲ ၂၀၁၄ ခုနှစ် ဒုတိယအကြိမ် တင်ဒါခေါ်ယူမှုမှာ Yongnam-CAPE-JGC Consortium က ရွေးချယ်ခံခဲ့ရတာပါ။

၂၀၁၆ ခုနှစ်၊ ဇန်နဝါရီလမှာတော့ ဂျပန်နိုင်ငံ JGC Corporation၊ စင်္ကာပူ Yongnam Holdings နဲ့ နိုင်ငံတကာ ချန်ဂီလေဆိပ်အဖွဲ့ တို့ပါဝင်တဲ့ JGC- Yangnam- Changi Airport International Consortium နဲ့ သဘောတူ လက်မှတ်ရေးထိုးခဲ့ကြပါတယ်။

ဒီစီမံကိန်းကို ဂျပန်အစိုးရ နဲ့ မြန်မာအစိုးရ တို့အကြား G to G ‌ဆောင်ရွက်ဖို့ NLD အစိုးရလက်ထက်မှာ ဆွေးနွေးခဲ့ကြတာလည်း ဖြစ်ပါတယ်။

စုစုပေါင်း အမေရိကန်ဒေါ်လာ ၁ ဒသမ ၅ ဘီလျံ သုံးစွဲသွားဖို့လည်း သဘောတူခဲ့ကြပါတယ်။

ရန်ကုန်နဲ့ မိုင် ၅၀ အကွာက ပဲခူးမြို့နယ်၊ ကျောက်တိုင်ကန်ရွာအနီးက မြေဧက ၉ ထောင်ခန့်ပေါ်မှာ တည်ဆောက်ဖို့ စီစဉ်ခဲ့ကြတာပါ။

အခုတော့ စီမံကိန်းရပ်ဆိုင်းနေပြီး နှစ်ပေါင်းများစွာအကြာမှာ ဒီစီမံကိန်းကို ပြန်စဖို့ နေပြည်တော်ဘက်က ကြိုးစားလာတာလည်းဖြစ်ပါတယ်။

Credit - BBC

#centralnewsnaypyitaw

ဖလော်ရီဒါမှာ ဂျက်လေယာဉ်ပျက်ကျမှု ၉ ဦးသေဆုံး

နိုဝင်ဘာ ၂

ဖလော်ရီဒါပြည်နယ်က လူနေအိမ်ရာရပ်ကွက်တစ်ခုထဲ အရပ်ဘက်သုံး ဂျက်လေယာဉ်တစ်စီး တနင်္ဂနွေနေ့မှာ ပျက်ကျခဲ့လို့ လေယာဉ်ပေါ်ပါတဲ့ လူကိုးဦးစလုံး သေဆုံးခဲ့တယ်လို့ အမေရိကန်ပို့ဆောင်ရေးဝန်ကြီးက ပြောပါတယ်။

ဒီလေယာဉ်ဟာ ပန်းဘိချ်ကောင်တီထဲက လူချမ်းသာတွေနေထိုင်ပြီး သမ္မတဒေါ်နယ်ထရမ့်ရဲ့ မာရာလာဂိုစံအိမ်လည်း ရှိတဲ့နေရာနဲ့ ကိုးမိုင်ခန့်အကွာ ခရက်သာဗန်အရပ်အနီးမှာ အမေရိကန် အရှေ့ပိုင်းစံတော်ချိန် မွန်းလွဲ ၁၂ နာရီ ၅၀ မိနစ်ခန့်မှာ ပျက်ကျခဲ့တာပါ။

လေယာဉ်ပျက်ကျပြီးနောက် ရိုက်ကူးထားတဲ့ဓာတ်ပုံတွေမှာတော့ လူနေအိမ်ရာ လမ်းမတလျှောက် ချိုင့်ခွက်တွင်းကြီးတစ်ခု ဖြစ်နေပြီး မီးလောင်နေတဲ့နေရာတချို့၊ ကွန်ကရစ်အပိုင်းအစတွေနဲ့ Learjet 60 လေယာဉ်ရဲ့အပျက်အစီးတွေ ပြန့်ကျဲနေတာကိုလည်း တွေ့ရပါတယ်။

အမေရိကန်လေကြောင်းအာဏာပိုင်အဖွဲ့(FAA)ရဲ့ထုတ်ပြန်ချက်အရ အဲဒီလေယာဉ်ဟာ တက္ကဆက်ပြည်နယ်၊ အော်စတင်မြို့ကနေ ပျံတက်လာတာဖြစ်ပြီး ကျွန်းနိုင်ငံ ဘဟားမားစ်ကိုကို ဦးတည်ပျံသန်းနေခဲ့တာ ဖြစ်ပါတယ်။

အဲဒီဂျက်လေယာဉ်ဟာ ပျက်မကျခင် တစ်စက္ကန့်ကို ပေရာနဲ့ချီပြီး အမြန်နှုန်းပြင်းပြင်းနဲ့ ထိုးဆင်းနေခဲ့တယ်လို့ အမေရိကန်မီဒီယာတွေရဲ့ဖော်ပြချက်တွေနဲ့ လေယာဉ်ပျံသန်းမှု အချက်အလက်တွေအရ သိရပါတယ်။

လေယာဉ်ပျက်ကျမသွားခင် မိနစ်ပိုင်းအလိုမှာ မှတ်တမ်းတင်ထားတဲ့ လေကြောင်းထိန်းချုပ်ရေး ဆက်သွယ်သံထဲမှာ လေယာဉ်မှူးက လေယာဉ်ဟာ တစ်မိနစ်ကို ပေ ၁၀,၀၀၀ နှုန်းနဲ့ ထိုးဆင်းနေတယ်လို့ ပြောနေတာကို ကြားရတယ်ဆိုပြီး ဘီဘီစီရဲ့ အမေရိကန် မိတ်ဖက်သတင်းဌာန စီဘီအက်စ်က သတင်းဖော်ပြပါတယ်။

အဲဒီနောက် လေယာဉ်မှူးက အရေးပေါ် အခြေအနေကြေညာခဲ့ပြီး “ကျွန်တော်တို့ လေယာဉ်ဟာ အမြန်နှုန်းလွန်ကဲတဲ့အခြေအနေဖြစ်နေပြီး တစ်မိနစ်ကို ပေ ၂၀,၀၀၀ နှုန်းနဲ့ ထိုးဆင်းနေပါတယ်” လို့ အော်ဟစ် ပြောဆိုခဲ့ကြောင်း စီဘီအက်စ် သတင်းက ဖော်ပြပါတယ်။

မြေအောက်ရေကန်ထဲ ငြမ်းဆင်းဖြုတ်တဲ့ လူ ၄ ဦး အောက်ဆီဂျင်ပြတ်ပြီး သေဆုံး

နိုဝင်ဘာ ၂

မန္တလေးတိုင်း၊ မိတ္ထီလာမြို့ ပညာရေးကောလိပ်ဝင်းထဲက မြေအောက် အုတ်ရေကန်ထဲမှာ တပ်ဆင်ထားတဲ့ ငြမ်းဆင်းဖြုတ်ရင်း အလုပ်သမား ၄ ဦး အောက်ဆီဂျင်ပြတ် သေဆုံးမှု မနေ့က ဖြစ်ပွားခဲ့တယ်လို့ မြို့ခံပရဟိတအသင်း တာဝန်ရှိသူက ပြောပါတယ်။

“ကန်က ၁၈ ပေ ပတ်လည်၊ အမြင့် ၆ ပေခွဲလောက် ရှိတယ်။ အဲဒီမှာ အလုပ်သမား ၅ ယောက်က ငြမ်းဆင်း ဖြုတ်တာ။ ၄ ယောက်က အောက်ဂျင်ဆီပြတ်ပြီး ဆုံးသွားတယ်” လို့ သူကပြောပါတယ်။

သေဆုံးသူတွေဟာ အသက် ၃၀ ကျော်ဝန်းကျင် အမျိုးသားတွေ ဖြစ်ကြပြီး မြို့ခံတွေနဲ့ တခြားဒေသက လာရောက်လုပ်ကိုင်သူတွေ ဖြစ်တယ်လို့လည်း သူက ဆိုပါတယ်။

ရေကန်ထဲ ဆင်းခဲ့သူ ၅ ဦးထဲက ၁ ဦးကိုတော့ အသက်ရှင်လျက် ကယ်ထုတ်နိုင်ခဲ့ပြီး လိုအပ်တဲ့ဆေးကုသမှုခံယူဖို့ မိတ္ထီလာဆေးရုံကို ပို့ဆောင်ပေးခဲ့တယ်လို့ မြို့ခံပရဟိတအသင်းရဲ့တာဝန်ရှိသူက ပြောပြပါတယ်။

သေဆုံးသူတွေရဲ့ရုပ်အလောင်းတွေကိုတော့ မိတ္ထီလာပြည်သူ့ဆေးရုံကြီးက ရင်ခွဲရုံကို ပို့ဆောင်ထားပြီး ဖြစ်စဉ်အသေးစိတ်ကိုလည်း တာဝန်ရှိသူတွေက စုံစမ်းနေတယ်လို့ သိရပါတယ်။

Credit - BBC

#centralnewsnaypyitaw