နောင်တွင် နိုင်ငံတော်၏လိုအပ်ချက်ပေါ်မူတည်၍ မွန်၊ ကရင်နှင့် တနင်္သာရီတိုင်းတို့၌ ဆေးတက္ကသိုလ်တစ်ခုဖွင့်လှစ်ရန် စီစဉ်ဆောင်ရွက်မည်

နောင်တွင် နိုင်ငံတော်၏လိုအပ်ချက်ပေါ်မူတည်၍ မွန် ပြည်နယ်၊ ကရင်ပြည်နယ်နှင့် တနင်္သာရီတိုင်းတို့၌ ဆေးတက္ကသိုလ်တစ်ခုဖွင့်လှစ်ရန် စီစဉ်ဆောင်ရွက်ပေးသွားမည်ဟု ကျန်းမာရေးဝန်ကြီးဌာန ဒုတိယဝန်ကြီးဒေါက် တာတင်ထွန်း ကပြောသည်။
အောက်တိုဘာ ၁၄ ရက်ကကျင်းပသည့် တတိယအ ကြိမ် ပြည်သူ့လွှတ်တော် တတိယပုံမှန်အစည်းအဝေး (၁၆)ရက်မြောက်နေ့တွင် ရေးမဲဆန္ဒနယ်မှဒေါ်မြင့်သန်း ၏ မွန်ပြည်နယ်၊ ကရင်ပြည်နယ်၊ တနင်္သာရီတိုင်းတို့တွင်လိုအပ်နေသော ဆေးတက္ကသိုလ်တစ်ခုဖွင့်လှစ်ပေးနိုင်ပါရန်အစီအစဉ် ရှိ/မရှိ မေးမြန်းမှုအားပြန်လည်ဖြေကြားခဲ့ခြင်းဖြစ်သည်။
တိုင်း/ပြည်နယ်အသီးသီးမှ တက္ကသိုလ်ဝင်စာမေးပွဲအောင်မြင်သူများအား ဆေးတက္ကသိုလ်ခွဲဝေနေရာချ ထားရာတွင် မွန်ပြည်နယ်၊ ကရင်ပြည်နယ်၊ တနင်္သာရီ တိုင်းတို့သည် မြန်မာနိုင်ငံအောက်ပိုင်းရှိ တိုင်း/ပြည် နယ်များရှိ စာစစ်ဌာနများမှအောင်မြင်သော ကျောင်း သား/သူများအား သွားလာရေးအဆင်ပြေလွယ်ကူစေရန်နှင့် ပညာသင်ယူမှုအဆင်ပြေစေရန်အတွက် မြန်မာ နိုင်ငံအောက်ပိုင်းရှိ ဆေးတက္ကသိုလ်(၁)ရန်ကုန်နှင့် ဆေးတက္ကသိုလ်(၂)ရန်ကုန်တို့သို့ခွဲဝေနေရာချထားတက်ရောက်စေခဲ့သည်ဟု ပြောသည်။
ဆေးတက္ကသိုလ်ဝင်ခွင့်ရရှိသူဦးရေအနေဖြင့် တစ်နှစ်လျှင် ပျမ်းမျှ ကရင်ပြည်နယ်မှ (၅)ဦး၊ မွန်ပြည်နယ်မှ (၄၉)ဦး၊ တနင်္သာရီတိုင်းမှ (၇)ဦးသာရှိ၍ ယင်း ဒေသကြီး(၃)ခုတွင် ဆေးတက္ကသိုလ်တစ်ခုဖွင့်လှစ်ပေးရန် အစီအစဉ်မရှိသေးဘဲ နောင်တွင် နိုင်ငံတော်၏ လိုအပ်ချက်ပေါ်မူတည်ပြီး စီစဉ်ဆောင်ရွက်သွားမည်ဟု ပြောကြားခဲ့သည်။

ငလျင်ဒဏ်သင့် ဒေသသုံးခုမှ အသေးစား စီးပွားရေးလုပ်ငန်းတွေကို UNDP က ငွေကြေးထောက်ပံ့မယ်

၂၀၂၅ ခုနှစ်အတွင်း လှုပ်ခတ်ခဲ့တဲ့ ငလျင်ဒဏ်ကြောင့် ထိခိုက်ဆုံးရှုံးခဲ့ရတဲ့ နေပြည်တော်၊ မန္တလေးတိုင်းနဲ့ စစ်ကိုင်းတိုင်းရှိ အသေးစား စီးပွားရေးလုပ်ငန်းတွေကို ကုလသမဂ္ဂ ဖွံ့ဖြိုးရေးအစီအစဉ် (UNDP Myanmar) က ငွေကြေး ထောက်ပံ့မယ်လို့ သိရပါတယ်။
အသေးစား စီးပွားရေးလုပ်ငန်းတွေ ပြန်လည် လည်ပတ်နိုင်ရေးနဲ့ ဖွံ့ဖြိုးတိုးတက်မှု ပြန်လည် ရရှိစေရေးအတွက် ရည်ရွယ်ခြင်းဖြစ်ပြီး လာမယ့် အောက်တိုဘာ ၁၉ ရက်၊ ညနေ ၄ နာရီအထိ နောက်ဆုံးထားပြီး လျှောက်ထားနိုင်တယ်လို့ UNDP မှ မနေ့ အောက်တိုဘာ ၁၃ ရက်က အသိပေး ထုတ်ပြန်ထားပါတယ်။
သတ်မှတ်ချက်အနေနဲ့ ငွေကြေးလျှောက်ထားမယ့် အသေးစား စီးပွားရေးလုပ်ငန်းတွေဟာ လုပ်ငန်းလည်ပတ်မှု သက်တမ်း အနည်းဆုံး နှစ်နှစ်ရှိရမှာဖြစ်ပြီး အမျိုးသမီးတွေ၊ လူငယ်တွေနဲ့ မသန်စွမ်းသူတွေ ဦးဆောင်တဲ့ လုပ်ငန်းတွေကို ဦးစားပေး ရွေးချယ်သွားမယ်လို့ သိရပါတယ်။
“အခုရမယ့် အကူအညီက လုပ်ငန်း ပြန်လည်ပတ်နိုင်ဖို့၊ အရင်းအနှီး ပြန်ဖြည့်ဖို့ အများကြီး အထောက်အကူပြုမှာပါ။ ကျွန်တော်တို့ဆီမှာက ဆိုင်တင်မကဘူး၊ ကုန်ကြမ်းတွေပါ အကုန်ပျက်စီးသွားတာ။ ဝန်ထမ်းတွေလည်း အလုပ်လက်မဲ့ဖြစ်ပြီး စားဝတ်နေရေး ခက်ခဲကုန်ကြတယ်။ အခုလို ငွေကြေးအကူအညီ ရမယ်ဆိုရင် ကုန်ကြမ်းတွေ ပြန်ဝယ်နိုင်မယ်၊ ဝန်ထမ်းတွေကိုလည်း အလုပ်ပြန်ပေးနိုင်မယ်” လို့ လက်မှုလုပ်ငန်း လုပ်ကိုင်သူတယောက်က ပြောပါတယ်။
ငလျင်ကြောင့် လုပ်ငန်းသုံးပစ္စည်းတွေ၊ အဆောက်အအုံတွေ ပျက်စီးဆုံးရှုံးမှု အတိုင်းအတာကို မြေပြင်ကွင်းဆင်း စာရင်းကောက်ယူမှုတွေ၊ အကဲဖြတ်မှုတွေနဲ့ စိစစ် ရွေးချယ်မယ်လို့ သိရပြီး မတည်ငွေကြေး တိုက်ရိုက် ထောက်ပံ့ခြင်းနဲ့အတူ နည်းပညာနဲ့ စီမံခန့်ခွဲမှုဆိုင်ရာ အကြံဉာဏ်တွေလည်း ပံ့ပိုးပေးသွားမယ်လို့ သိရပါတယ်။
“လျှောက်ထားလာတဲ့ အသေးစား လုပ်ငန်းရှင်တွေကို ရွေးချယ်ဖို့အတွက် UNDP ရဲ့ စစ်ဆေးရေးအဖွဲ့ကပဲ သေချာစစ်သွားမှာပါ။ ဘယ်လို စစ်ဆေးမယ်ဆိုတာက ခုချိန် အတိအကျ ပြောလို့မရသေးပါဘူး” လို့ UNDP နဲ့ နီးစပ်သူတယောက်က ပြောပါတယ်။
ဒီအစီအစဉ်မှာ လျှောက်ထားခြင်းကနေ ရွေးချယ်ခြင်းအထိ အစီအစဉ်တခုလုံးဟာ အခမဲ့ဖြစ်ကာ ငွေကြေးတစုံတစ်ရာ ပေးဆောင်ဖို့ မလိုဘူးလို့လည်း သိရပြီး ငွေကြေး တောင်းခံမှုတွေရှိရင် UNDP Myanmar ကို ဆက်သွယ် အကြောင်းကြားနိုင်တယ်လို့ အသိပေးထားပါတယ်။
ငွေကြေး ထောက်ပံ့ခြင်း အစီအစဉ်အတွက် လက်ခံနိုင်တဲ့ ဦးရေ အကန့်အသတ် ရှိတာကြောင့် သတ်မှတ်ချက်တွေနဲ့ ကိုက်ညီ၊ ရွေးချယ်ခံရသူတွေကိုသာ ဆက်သွယ် အကြောင်းကြားသွားမှာဖြစ်ကာ အရင် အစီအစဉ်တွေတုန်းက လုပ်ငန်းအမျိုးအစားအလိုက် ကျပ်သိန်း ၄၀ က​နေ သိန်း ၁၀၀ အထိ ထောက်ပံ့ပေးခဲ့မှုတွေ ရှိခဲ့တယ်လို့ သိရပါတယ်။

NCA ၁၁ နှစ်မြောက် နှစ်ပတ်လည်နေ့အခမ်းအနား နေပြည်တော်မှာ ကျင်းပ

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) (၁၁) နှစ်မြောက်နှစ်ပတ်လည်နေ့အခမ်းအနားကို ဒီကနေ့ အောက်တိုဘာ ၁၅ ရက်နေ့ မနက်ပိုင်းက နေပြည်တော်ကောင်စီနယ်မြေအတွင်းက Horizon Lake View Resort Hotel မှာ စတင်ကျင်းပနေပြီဖြစ်ပါတယ်။
ဒီအခမ်းအနားမှာ ငြိမ်းချမ်းရေး၊ လူမှုသဟဇာတဖြစ်ရေးမှ ဖွံ့ဖြိုးတိုးတက်ရေးဆီသို့(From Peace, Social Cohesion to Development) ဆောင်ပုဒ်နဲ့ " ငြိမ်းချမ်းသောမြန်မာ့အနာဂတ် တည်ဆောက်ခြင်း" အလုပ်ရုံဆွေးနွေးပွဲကိုလည်း စက်တင်ဘာလ ၁၅ ရက်နေ့ကနေ ၁၆ ရက်နေ့အထိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီက ဦးစီးပြီး ထည့်သွင်းကျင်းပပြီး ဆွေးနွေးပြုလုပ်သွားမှာဖြစ်တယ်လို့ သိရပါတယ်။
တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ရဲ့ (၁၁) နှစ်တာ ကာလအတွင်း အကောင်အထည်ဖော်နိုင်မှုတွေ၊ အောင်မြင်မှုတွေနဲ့ သင်ခန်းစာတွေ၊ ငြိမ်းချမ်းရေး
လုပ်ငန်းစဉ်က ရရှိခဲ့တဲ့ အတွေ့အကြုံနဲ့ အမြင်တွေကိုမျှဝေပြီးအနာဂတ် မြန်မာနိုင်ငံတော် တည်ဆောက်ခြင်း လုပ်ငန်းစဉ်မှာ နိုင်ငံရေး၊ လုံခြုံရေး၊ ဒေသတည်ငြိမ်းအေးချမ်းရေးနဲ့ ဖွံ့ဖြိုး တိုးတက်ရေးတို့ကို ပေါင်းစပ်ဆောင်ရွက်နိုင်ရေးအတွက် ညှိနှိုင်းရေးကော်မတီဝင်(NSPNC)၊ အကြံပေးအဖွဲ့ဝင်(NSPNC)၊ လွှတ်တော်ကိုယ်စားလှယ်တွေ၊ JMC ကိုယ်စားလှယ်တွေ၊ ငြိမ်းချမ်းရေးလုပ်ငန်းစဥ်တွေမှာ ပါဝင်ဆောင်ရွက်သူတွေ၊ အခြားဖိတ်ကြားသင့်သူတွေ၊ တိုင်းရင်းသားလက်နက်ကိုင်အဖွဲ့က ကိုယ်စားလှယ်တွေ၊ နိုင်ငံရေးပါတီအသီးသီးက ကိုယ်စား လှယ်တွေအပြင် ပြည်ထောင်စုဝန်ကြီးဌာန၊ အဖွဲ့အစည်းတွေက ညွှန်ကြားရေးမှူးချုပ်တွေနဲ့ မီဒီယာအဖွဲ့အသီးသီးက အယ်ဒီတာချုပ်တွေအပါအဝင် ဖိတ်ကြားထားသူ ၁၈၀ ကျော် တက်ရောက်ဆွေးနွေးကြမှာ ဖြစ်ပါတယ်။
ပြည်ထောင်စုသမ္မတမြန်မာနိုင်ငံတော်အစိုးရနဲ့ တိုင်းရင်းသားလက်နက်ကိုင်အဖွဲ့အစည်းတွေအကြား ရေရှည်တည်တံ့ခိုင်မြဲတဲ့ ငြိမ်းချမ်းရေးကိုဖော်ဆောင်မယ့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို သမိုင်းဝင်စာချုပ်အဖြစ် ၂၀၁၅ ခုနှစ်၊ အောက်တိုဘာလ ၁၅ ရက်နေ့မှာ လက်မှတ်ရေးထိုးခဲ့ကြတာဖြစ်ပါတယ်။
၂၀၁၅ ခုနှစ် အောက်တိုဘာလ ၁၅ ရက်နေ့မှာ အစိုးရနဲ့တိုင်းရင်း သားလက်နက် ကိုင် အဖွဲ့ (၈) ဖွဲ့ဖြစ်တဲ့ (ALP, ABSDF, CNF, DKBA, KNU, KNU/KNLA-PC, PNLO, RCSS) တို့က စတင်လက်မှတ်ရေးထိုးခဲ့ကြတာဖြစ်ပါတယ်။
၂၀၁၈ ခုနှစ် ဖေဖော်ဝါရီလ ၁၃ ရက်နေ့မှာ NMSP နဲ့ LDU တို့က ထပ်မံလက်မှတ်ရေးထိုးခဲ့တာကြောင့် စုစုပေါင်း (၁၀) ဖွဲ့ရှိခဲ့ပြီး ဒီကနေ့မှာတော့ CNF, PNLO,ABSDF,KNU အဖွဲ့တို့က ဒီကနေ့ကျင်းပတဲ့ NCA ၁၁ နှစ်မြောက် နှစ်ပတ်လည်နေ့အခမ်းအနားကို တက်ရောက်ခြင်းမရှိဘူးလို့ သိရပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - အောက်တိုဘာ ၁၅ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၁၄၉ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၇,၁၀၀,၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၂၀၀,၀၀၀ ကျပ်
ဝယ်ဈေး ၁၀,၁၆၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၈၀၀,၀၀၀ ကျပ်
ဝယ်ဈေး ၉,၇၆၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၀၈၀,၀၀၀ ကျပ်
ဝယ်ဈေး ၁၀,၀၄၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၆၈၀,၀၀၀ ကျပ်
ဝယ်ဈေး ၉,၆၄၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၆၃၀ ကျပ်
ဝယ်ဈေး - ၄၅၃၀ ကျပ်
-စင်္ကာပူဒေါ်လာ
ရောင်းဈေး - ၃၆၁၀ ကျပ်
ဝယ်ဈေး - ၃၅၁၀ ကျပ်
-ယူရို
ရောင်းဈေး - ၅၁၉၅ ကျပ်
ဝယ်ဈေး - ၅၀၅၅ ကျပ်
-ထိုင်းဘတ်
ရောင်းဈေး - ၁၃၇.၉၃ ကျပ်
ဝယ်ဈေး - ၁၃၄.၂၃ ကျပ်
-မလေးရှားရင်းဂစ်
ရောင်းဈေး - ၁၁၃၃ ကျပ်
ဝယ်ဈေး - ၁၁၀၃ ကျပ်
-တရုတ်ယွမ်
ရောင်းဈေး - ၆၉၁ ကျပ်
ဝယ်ဈေး - ၆၇၃ ကျပ်
-ဂျပန်ယန်း
ရောင်းဈေး - ၂၉.၃၅ ကျပ်
ဝယ်ဈေး - ၂၈.၅၆ ကျပ်
-အိန္ဒိယရူပီး
ရောင်းဈေး - ၄၈.၆၅ ကျပ်
ဝယ်ဈေး - ၄၇.၃၄ ကျပ်
-ကိုရီးယားဝမ်
ရောင်းဈေး - ၃.၄၃ ကျပ်
ဝယ်ဈေး - ၃.၃၄ ကျပ်
-စတာလင်ပေါင်
ရောင်းဈေး - ၆၁၃၀ ကျပ်
ဝယ်ဈေး - ၅၉၆၅ ကျပ်
-ဩစတြေးလျဒေါ်လာ
ရောင်းဈေး - ၃၂၁၅ ကျပ်
ဝယ်ဈေး - ၃၁၃၀ ကျပ်
-ကနေဒါဒေါ်လာ
ရောင်းဈေး - ၃၂၅၅ ကျပ်
ဝယ်ဈေး - ၃၁၇၀ ကျပ်
-ဟောင်ကောင်ဒေါ်လာ
ရောင်းဈေး - ၅၉၀ ကျပ်
ဝယ်ဈေး - ၅၇၄ ကျပ်
-ယူအေအီး
ရောင်းဈေး - ၁၂၆၀ ကျပ်
ဝယ်ဈေး - ၁၂၂၆ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
*********************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ

ချန်ပီယံလိဂ်ဂိုး(၆၀) အမြန်ဆုံးပြည့်တဲ့ ကစားသမားအဖြစ် ဟာလန်း စံချိန်တင်

မန်စီးတီးတိုက်စစ်မှူး ဟာလန်းဟာ ချန်ပီယံလိဂ်ဂိုး(၆၀) အမြန်ဆုံးပြည့်တဲ့ ကစားသမားအဖြစ် စံချိန်တင်ခဲ့ကြောင်း သိရပါတယ်။
ဟာလန်းဟာ PSG အသင်းကို (၂-၄)ဂိုးနဲ့ ရှုံးနိမ့်ခဲ့တဲ့ပွဲမှာ (၂)ဂိုးသွင်းယူခဲ့တာကြောင့် ချန်ပီယံလိဂ်ဂိုး(၆၀)ပြည့်သွားခဲ့တဲ့အပြင် (၆၁) ဂိုး ရှိသွားခဲ့ပါပြီ။
ဟာလန်းအနေနဲ့ ဂိုး(၆၀) သွင်းယူနိုင်ဖို့ ပွဲ(၆၀)သာ ကစားခဲ့ရတာကြောင့် ပွဲအနည်းဆုံးနဲ့ ဂိုး(၆၀)ပြည့်သွင်းယူနိုင်သူအဖြစ် စံချိန်တင်ခဲ့တာပါ။
အရင်က ချန်ပီယံလိဂ်ဂိုး(၆၀)ကို ပွဲအနည်းဆုံးနဲ့ ပြည့်မြောက်သူအဖြစ် စံချိန်တင်ထားတာက မက်ဆီ(ပွဲ ၈၀) ဖြစ်ပါတယ်။
ဟာလန်းက ချန်ပီယံလိဂ်ဂိုး(၆၀)ကို အသက်(၂၆)နှစ်နဲ့ (၈၅)ရက်မှာ သွင်းယူနိုင်ခဲ့တာကြောင့် အသက်အငယ်ဆုံး ဂိုး(၆၀)ပြည့်သူအဖြစ်လည်း မှတ်တမ်းဝင်ခဲ့ပါတယ်။
ဒီစံချိန်ကိုလည်း အရင်က မက်ဆီပဲ စိုက်ထူထားခဲ့တာဖြစ်ပြီး ဟာလန်းက တစ်ရက်အသာနဲ့ ကျော်ဖြတ်နိုင်ခဲ့တာပါ။
ဟာလန်းအနေနဲ့ မန်စီးတီးအသင်းအတွက် ချန်ပီယံလိဂ်(၄၁)ပွဲ ယှဉ်ပြိုင်ကစားရာမှာ (၃၈)ဂိုး သွင်းယူခဲ့ပြီး မန်စီးတီးအသင်းရဲ့ ချန်ပီယံလိဂ်သွင်းဂိုးအများဆုံးကစားသမားအဖြစ် ရပ်တည်နိုင်ခဲ့ကြောင်းလည်း သိရပါတယ်။

M League-2 ပြိုင်ပွဲ ပွဲစဥ် (၁) ဒီနေ့စမယ်

၂၀၂၆-၂၀၂၇ ရာသီ M League-2 ပြိုင်ပွဲ ပွဲစဥ် (၁) ကို ဒီနေ့ (အောက်တိုဘာ ၁၅) စတင်ကျင်းပမှာဖြစ်ပါတယ်။
ပွဲစဥ် (၁) အဖြစ် ဒီနေ့ YUSC ကွင်းမှာ Asian Lion အသင်းနဲ့ ရာမညယူနိုက်တက်အသင်း၊ တက္ကသိုလ်ကွင်းမှာ တက္ကသိုလ်အသင်းနဲ့ Elite Kings အသင်း၊ ပဒုမ္မာကွင်းမှာ မနောအသင်းနဲ့ VUE နေပြည်တော်အသင်း၊ အောက်တိုဘာ (၁၆) ရက်၊ တက္ကသိုလ်ကွင်းမှာ Enjoy Brother အသင်းနဲ့ Royal Dagon အသင်း၊ အောက်တိုဘာ (၁၇) ရက်၊ တက္ကသိုလ်ကွင်းမှာ ရခိုင်ယူနိုက်တက်အသင်းနဲ့ Junior Lions အသင်းတို့ ယှဥ်ပြိုင်ကစားကြမှာဖြစ်ကြောင်း သိရပါတယ်။
ပွဲစဥ်အားလုံးကို နေ့လယ် (၃) နာရီခွဲ အချိန်များမှာ ကျင်းပသွားမှာဖြစ်ကြောင်း သိရပါတယ်။
၂၀၂၆-၂၀၂၇ ရာသီ M League-2 ပြိုင်ပွဲကို အသင်း (၁၀) သင်းဖြင့် ရန်ကုန်မြို့ရှိ ကွင်း ၃ ကွင်းတွင် ကျင်းပပြုလုပ်သွားမှာဖြစ်ကြောင်း သိရပါတယ်။
M League ကော်မတီဟာ ယခု ၂၀၂၆- ၂၀၂၇ ရာသီ M League-2 ပြိုင်ပွဲကိုစက်တင်ဘာ (၁၉) ရက်က စတင်ကျင်းပရန် လျာထားခဲ့သော်လည်း အသင်းအရေအတွက် ပိုမိုတိုးလာရန် ဆောင်ရွက်ခဲ့သောကြောင့် ယခုကဲ့သို့ နောက်ဆုတ်ကျင်းပရခြင်းဖြစ်ကြောင်း သိရပါတယ်။
ပြီးခဲ့တဲ့ရာသီ MNL ပြိုင်ပွဲအပြီးတွင် အဆင့် (၁၁၊ ၁၂) ရ ရခိုင်ယူနိုက်တက်နဲ့ ရာမညယူနိုက်တက်အသင်းနှစ်သင်းမှာ MNL-2 သို့ တန်းဆင်းခဲ့ရပြီး MNL-2 မှ ပထမ၊ ဒုတိယရ ချင်းလန့်နဲ့ မြဝတီအသင်းတို့မှာ MNL သို့ တန်းတက်ခွင့် ရရှိခဲ့ပါတယ်။
M League ကော်မတီဟာ ယခု ၂၀၂၆-၂၀၂၇ ရာသီ M League-2 ပြိုင်ပွဲကို ရန်ကုန်မြို့ရှိ ပဒုမ္မာကွင်း၊ တက္ကသိုလ်ကွင်းနဲ့ YUSC ကွင်းတို့တွင် ကျင်းပပြုလုပ်သွားရန် စီစဉ်ထားကြောင်း သိရပါတယ်။
M League ကော်မတီဟာ ယခု ၂၀၂၆-၂၀၂၇ ရာသီ M League-2 ပြိုင်ပွဲကို ပြီးခဲ့တဲ့ရာသီ MNL ပြိုင်ပွဲမှ တန်းဆင်းလာတဲ့ ရခိုင်ယူ နိုက်တက်နဲ့ ရာမညယူနိုက်တက်အသင်း အပါအဝင် တက္ကသိုလ်အသင်း၊ မနောအသင်း၊ Royal Dagon၊ Enjoy Brother၊ VUE နေပြည်တော်၊ Elite Kings၊ Asian Lion၊ Junior Lions အသင်း ၁၀ သင်းဖြင့် ကျင်းပပြုလုပ်သွားမှာဖြစ်ကြောင်း သိရပါတယ်။
ယင်းအသင်းများထဲတွင် Enjoy Brother၊ Elite Kings၊ Asian Lion၊များမှာ ပြီးခဲ့တဲ့ ၂၀၂၆ M League-2 တန်းတက်ခွင့်ပြိုင်ပွဲ (MNL-2 Promotion Amateur Club Tournament 2026) ဝင် အသင်းများဖြစ်ကြောင်း သိရပါတယ်။
၂၀၂၆ M League-2 တန်းတက် ခွင့်ပြိုင်ပွဲ (MNL-2 Promotion Amateur Club Tournament 2026)
ဗိုလ်လုပွဲတွင် Enjoy Brother အသင်းက Happy Friendship အသင်းကို (၃-၂) ဂိုးဖြင့် အနိုင်ရ ဗိုလ်စွဲထားခဲ့ကြောင်း သိရပါတယ်။

ဟက်ထရစ်သွင်းယူခဲ့တဲ့ ဘာကိုလာအတွက် ပျော်ရွှင်ကြောင်း အီရာအိုလာ ပြောကြား
လီဗာပူးလ်နည်းပြ အီရာအိုလာက ဟက်ထရစ်သွင်းယူခဲ့တဲ့ တိုက်စစ်ကစားသမား ဘာကိုလာအတွက် ပျော်ရွှင်ကြောင်း ပြောကြားခဲ့ပါတယ်။
လီဗာပူးလ်အသင်းဟာ မနေ့ညက ယှဉ်ပြိုင်ခဲ့တဲ့ ချန်ပီယံလိဂ်ပွဲစဉ်မှာ LASK အသင်းကို (၆-၃)ဂိုးနဲ့ အနိုင်ရရှိခဲ့ပြီး ပြင်သစ်တိုက်စစ်ကစားသမား ဘာကိုလာက ဟက်ထရစ် သွင်းယူခဲ့တာပါ။
ဘာကိုလာဟာ ဒီနွေရာသီမှာမှ လီဗာပူးလ်အသင်းကို ပေါင်(၁၂၃)သန်းနဲ့ ရောက်ရှိလာသူဖြစ်ပြီး ဒီပွဲမတိုင်ခင်မှာ အသင်းအတွက် ဂိုးသွင်းနိုင်ခြင်းမရှိသေးတာကြောင့် ဝေဖန်ပြစ်တင်မှုတွေနဲ့ ရင်ဆိုင်ခဲ့ရပါတယ်။
''ကျွန်တော် ဘရက်ဒလေ(ဘာကိုလာ)အတွက် တကယ်ပျော်ရွှင်ပါတယ်။ ဘာကြောင့်လဲဆိုတော့ သူ ဂိုးမသွင်းနိုင်သေးတဲ့အကြောင်း မနေ့ကပဲ မေးခွန်းထုတ်ခံခဲ့ရတာကြောင့်ပါ။ ဖလော်ရီယန်ဗက်ဇ်အတွက်လည်း ပျော်ရွှင်ပါတယ်။ ဒီနေ့ သူတို့နှစ်ယောက် ကစားတာ တကယ်ကောင်းတယ်လို့ ထင်ပါတယ်'' လို့ အီရာအိုလာက ပြောကြားခဲ့ပါတယ်။
ဘာကိုလာရဲ့ ဟက်ထရစ်က ချန်ပီယံလိဂ်(ယခင် ဥရောပဖလားအပါအဝင်)ပြိုင်ပွဲမှာ လီဗာပူးလ်အသင်း သွင်းယူနိုင်တဲ့ (၁၃)ကြိမ်မြောက် ဟက်ထရစ်အဖြစ် မှတ်တမ်းဝင်ခဲ့ကြောင်းလည်း သိရပါတယ်။
ဘာကိုလာမတိုင်ခင် လီဗာပူးလ်အသင်းအတွက် ချန်ပီယံလိဂ်မှာ နောက်ဆုံးဟက်ထရစ်သွင်းယူခဲ့သူက လူးဝစ်ဒီယက်ဇ်(၂၀၂၄)ဖြစ်ကြောင်းလည်း သိရပါတယ်။

ဗင်နီစီယပ်စ် (၄)ပွဲပယ်ပြစ်ဒဏ် ချမှတ်ခံခဲ့ရပြီး နိုဝင်ဘာလ နိုင်ငံတကာရက်သတ္တပတ်ပြီးမှ ပြန်ကစားရမယ်

စပိန်ဘောလုံးအဖွဲ့ချုပ် စည်းကမ်းထိန်းသိမ်းရေးကော်မတီက ရီးယဲလ်အသင်းရဲ့ တိုက်စစ်ကစားသမား ဗင်နီစီယပ်စ်ကို (၄)ပွဲပယ်ပြစ်ဒဏ် ချမှတ်လိုက်ကြောင်း သိရပါတယ်။
ဗင်နီစီယပ်စ်ဟာ ဗီလာရီးယဲလ်နဲ့ပွဲမှာ ပြိုင်ဘက်ကစားသမား နသန်ဆာလီဘာရဲ့ ဆံပင်ကို ဆွဲခဲ့တာကြောင့် အနီကတ်ပြခံခဲ့ရတာဖြစ်ပြီး ဒိုင်လူကြီးကို ဒေါသတကြီးတုံ့ပြန်ခဲ့တာကြောင့် အခုလို (၄)ပွဲပယ်ပြစ်ဒဏ်အထိ ချမှတ်ခံခဲ့ရခြင်းဖြစ်ကြောင်း သိရပါတယ်။
စပိန်ဘောလုံးအဖွဲ့ချုပ် စည်းကမ်းထိန်းသိမ်းရေးကော်မတီက ဆာလီဘာရဲ့ ဆံပင်ကို ဆွဲခဲ့ခြင်းအတွက် (၂)ပွဲပယ်၊ ဒိုင်လူကြီးကို ဒေါသတကြီးတုံ့ပြန်ခဲ့ခြင်းအတွက် (၂)ပွဲပယ် စုစုပေါင်း (၄)ပွဲပယ်ပြစ်ဒဏ် ချမှတ်လိုက်ခြင်းဖြစ်ကြောင်း ဖော်ပြခဲ့ပါတယ်။
ဒီလို ပြစ်ဒဏ်ချမှတ်မှုကို ရီးယဲလ်အသင်း ချန်ပီယံလိဂ်ပြိုင်ပွဲ ယှဉ်ပြိုင်ကစားရမယ့်နေ့မှာ ကြေညာခဲ့ခြင်းဖြစ်တာကြောင့် မော်ရင်ဟိုက ဝေဖန်ပြစ်တင်မှု ပြုလုပ်ခဲ့ကြောင်းလည်း သိရပါတယ်။
ဗင်နီစီယပ်စ်ဟာ အခုပြစ်ဒဏ်ကြောင့် ဆီဗီလာ၊ ဘာစီလိုနာ၊ ရေးဆင်း၊ ဗလင်စီယာတို့နဲ့ ယှဉ်ပြိုင်ရမယ့် လာလီဂါပွဲစဉ်(၄)ပွဲကို လွဲချော်ရမှာဖြစ်ပြီး နိုဝင်ဘာ(၂၂)ရက် ဆယ်လ်တာဗီဂိုနဲ့ ယှဉ်ပြိုင်ရမယ့်ပွဲမှာမှ ပြန်လည်ကစားနိုင်မှာဖြစ်ကြောင်း သိရပါတယ်။
ဗင်နီစီယပ်စ်ကို ချမှတ်ခဲ့တဲ့ အခုပြစ်ဒဏ်အတွက် ရီးယဲလ်အသင်းက အယူခံဝင်ဖို့ စီစဉ်နေကြောင်းလည်း သိရပါတယ်။

ဇန်နဝါရီမှာ ဒီယွန်းကို ခေါ်ယူဖို့ ချယ်လ်ဆီးအသင်း ပစ်မှတ်ထားနေ

ချယ်လ်ဆီးအသင်းဟာ လာမယ့် ဇန်နဝါရီအပြောင်းအရွှေ့စျေးကွက်မှာ ဘာစီလိုနာအသင်းက နယ်သာလန်ကွင်းလယ်ကစားသမား ဖရန်ကီဒီယွန်းကို ခေါ်ယူဖို့ ပစ်မှတ်ထားနေကြောင်း သိရပါတယ်။
ချယ်လ်ဆီးအသင်းရဲ့ နည်းပြသစ် အလွန်ဆိုက ပြီးခဲ့တဲ့နွေရာသီမှာ ဂျော်ဒန်ဟန်ဒါဆန်၊ မော်ဂန်ရော်ဂျာစ်၊ ဘာကို စတဲ့ ကစားသမားသစ်တွေ ခေါ်ယူပြီး ကွင်းလယ်ကို အားဖြည့်ခဲ့ပေမဲ့ အန်ဇိုဖာနန်ဒက်ဇ်နဲ့ အန်ဒရေဆန်းတို့စ်တို့ကို ပြန်လည်ဆုံးရှုံးခဲ့ရတာကြောင့် ဇန်နဝါရီမှာ အားထပ်ဖြည့်ဖို့ ဆန္ဒရှိနေတာပါ။
အလွန်ဆိုက ဒီရာသီမှာ ဒဏ်ရာပြဿနာကြောင့် ဘာစီလိုနာအသင်းအတွက် ပွဲကစားခွင့်မရသေးတဲ့ ဒီယွန်းကို ပစ်မှတ်ထားနေခြင်းဖြစ်ပြီး ဘာစီလိုနာအသင်းကတော့ ပေါင်သန်း(၅၀)အထက်နဲ့ ကမ်းလှမ်းမှသာ လက်ခံစဉ်းစားဖွယ်ရှိကြောင်း သိရပါတယ်။
အသက်(၂၉)နှစ်ရှိပြီဖြစ်တဲ့ ဒီယွန်းက ဘာစီလိုနာအသင်းအတွက် ပြိုင်ပွဲစုံ (၂၉၇)ပွဲ ကစားထားသူဖြစ်ပြီး ၂၀၂၉ ခုနှစ်အထိ စာချုပ် ချုပ်ဆိုထားပါတယ်။
ချယ်လ်ဆီးအသင်းကလည်း ဒီယွန်းအတွက် ပေါင်သန်း(၅၀)အထက် သုံးစွဲဖို့ ရည်ရွယ်ထားတာကြောင့် ပြောင်းရွှေ့ကြေးအတွက် ပြဿနာမရှိနိုင်ပေမဲ့ ဒီယွန်းရဲ့ ကြံ့ခိုင်မှုအခြေအနေကိုတော့ စောင့်ကြည့်ရဖွယ်ရှိနေကြောင်း သိရပါတယ်။
ဒီယွန်းဟာ လက်ရှိအချိန်မှာ ဒူးဒဏ်ရာကြောင့် အနားယူနေရတာဖြစ်ပြီး လာမယ့် လာလီဂါပွဲစဉ်မှာ အသင်းရဲ့လူစာရင်းထဲ ပြန်လည်ပါဝင်နိုင်ဖွယ်ရှိကြောင်း ဘာစီလိုနာနည်းပြ ဟန်ဆီဖလစ်ခ်က ပြောကြားထားပါတယ်။