ပြည်ပနိုင်ငံတွေကို အမြဲသွားချင်သူ၊ သံအမတ်ကြီးထိလည်း ဖြစ်ချင်သူ၊ နိုင်ငံခြားဘာသာစကားလည်း ကျွမ်းကျင်သူများ လျှောက်ကိုလျှောက်သင့်တဲ့ ရာထူးပါ

#govmm

ထိုင်းဆေးရုံတွင် ကုသမှုခံယူနေသည့် မြန်မာအမျိုးသမီးတစ်ဦးကို နေရပ်ပြန်နိုင်ရေး ကူညီပို့ဆောင်

ထိုင်းနိုင်ငံ၊ ဗန်ကောက်မြို့ရှိ ရတ်ချဖိဖတ်ဆေးရုံတွင် ဆေးကုသမှုခံယူနေသည့် မြန်မာအမျိုးသမီး ဒေါ်ချိုချိုအောင်ကို မိသားစုဝင်များရှိရာ မြန်မာနိုင်ငံသို့ ပြန်လည်ပို့ဆောင်နိုင်ရေးအတွက် မြန်မာသံရုံးနှင့် အလုပ်သမားသံအရာရှိရုံးတို့က ကူညီဆောင်ရွက်ပေးခဲ့ကြောင်း သိရသည်။

ဒေါ်ချိုချိုအောင်အား နေရပ်ပြန်လည်ပို့ဆောင်နိုင်ရေးအတွက် အောက်တိုဘာ ၂၈ ရက် ည ၇ နာရီတွင် မြန်မာသံရုံးမှ သံမှူးကြီး ဦးစိုးသူဟိန်းနှင့် အလုပ်သမားသံမှူး ဦးကျော်ကျော်ထွန်းတို့က ဆေးရုံသို့ သွားရောက်၍ လိုအပ်သည့်အကူအညီများ ပေးအပ်ခဲ့သည်။

ထို့နောက် ဒေါ်ချိုချိုအောင်အား သူနာပြုဝန်ထမ်းနှင့်အတူ လူနာတင်ယာဉ်ဖြင့် ဗန်ကောက်မြို့မှ မဲဆောက်မြို့သို့ ပို့ဆောင်ပေးခဲ့ပြီး အောက်တိုဘာ ၂၉ ရက် နံနက် ၈ နာရီ ၃၅ မိနစ်တွင် မြဝတီ-မဲဆောက် အမှတ် (၁) ချစ်ကြည်ရေးတံတား၌ မြဝတီမြို့နယ် အလုပ်သမားညွှန်ကြားရေးဦးစီးဌာနမှ တာဝန်ခံ ဒေါ်ခိုင်ခိုင်စိုးထံ လွှဲပြောင်းပေးအပ်ခဲ့ကြောင်း သိရသည်။

အဆိုပါ ကူညီပို့ဆောင်မှုနှင့်ပတ်သက်၍ ထိုင်းနိုင်ငံဆိုင်ရာ မြန်မာအလုပ်သမားသံအရာရှိရုံးက အောက်တိုဘာ ၂၉ ရက်တွင် သတင်းထုတ်ပြန်ထားသည်။

ရှမ်းပြည်နယ်လွှတ်တော် အရေးပေါ်အစည်းအဝေးကို နိုဝင်ဘာ ၂ ရက်တွင် ကျင်းပမည်

ရှမ်းပြည်နယ်လွှတ်တော်၏ တတိယအကြိမ် အရေးပေါ်အစည်းအဝေး (၁/၂၀၂၆) ကို လာမည့် နိုဝင်ဘာ ၂ ရက် နံနက် ၁၀ နာရီတွင် စတင်ကျင်းပမည်ဖြစ်ကြောင်း ရှမ်းပြည်နယ်လွှတ် တော်က အောက်တိုဘာ ၂၈ ရက်‌နေ့ရက်စွဲဖြင့် ကြေညာချက်ထုတ်ပြန်ထားသည်။

ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ၊ တိုင်းဒေသကြီးနှင့် ပြည်နယ်လွှတ်တော်ဆိုင်ရာ ဥပဒေ၊ ရှမ်းပြည်နယ်လွှတ်တော်ဆိုင်ရာ နည်းဥ ပဒေများနှင့်အညီ တတိယအကြိမ် ရှမ်းပြ ည်နယ်လွှတ်တော် အရေးပေါ်အစည်း အဝေး (၁/၂၀၂၆) ကို ကျင်းပရန် သတ် မှတ်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

အဆိုပါအစည်းအဝေးကို ၁၃၈၈ ခုနှစ်၊ တန်ဆောင်မုန်းလပြည့်ကျော် ၇ ရက်၊ ၂၀၂၆ ခုနှစ် နိုဝင်ဘာ ၂ ရက် နံနက် ၁၀ နာရီတွင် စတင်ကျင်းပမည်ဖြစ်ကြောင်း သိရသည်။

မော်လမြိုင်ပြည်သူ့ဆေးရုံကြီးတွင် နှစ်ထပ်ဆေးသို လှောင်ရုံအဆောက်အအုံတည်ဆောက်နေ

မွန်ပြည်နယ်၊ မော်လမြိုင်မြို့ရှိ မော်လမြိုင်ပြည်သူ့ဆေးရုံကြီး၌ ဆေးနှင့် ဆေးပစ္စည်းများကို စနစ်တကျ သိုလှောင်ထိန်းသိမ်းနိုင်ရေးအတွက် နှစ်ထပ်ဆေးသို လှောင်ရုံအဆောက်အအုံကိုတည်ဆောက်လျက်ရှိကြောင်း သိရသည်။

အဆိုပါ နှစ်ထပ်ဆေးသိုလှောင်ရုံကို ၂၀၂၆-၂၀၂၇ ဘဏ္ဍာရေးနှစ် ပြည်ထောင်စုဘဏ္ဍာရန်ပုံငွေဖြင့် တည်ဆောက်လျက်ရှိခြင်းဖြစ်ကာ မွန်ပြည်နယ်ဝန်ကြီးချုပ်ဦးအောင်ဝင်းသန်း က ယနေ့ အောက်တိုဘာ ၃၀ ရက်တွင်ကြည့်ရှုစစ်ဆေးခဲ့ကြောင်း သိရသည်။

ပြည်နယ်ဝန်ကြီးချုပ်က ဆေးနှင့် ဆေးပစ္စည်းများကို အရည်အသွေးမပျက် အချိန်မီ၊ စနစ်တကျသိုလှောင်ထိန်းသိမ်းနိုင်ရေးအတွက် ဆေးသိုလှောင်ရုံကိုအမြန်ဆုံးပြီးစီးအောင်တည်ဆောက်ရန်မှာကြားခဲ့ကြောင်း သိရသည်။

ထို့ပြင် ပြည်နယ်ဝန်ကြီးချုပ်သည် မော်လမြိုင်မြို့၏ အမျိုးသမီးနှင့် ကလေးဆေးရုံကြီးတွင်တာဝန်ထမ်းဆောင်နေသော ကျန်းမာရေးဝန်ထမ်းများအတွက် အဆောက်အအုံဦးစီးဌာန၊ အဆောက်အအုံအထူးအဖွဲ့ (၁၃)ကတည်ဆောက်နေသည့် အမှုထမ်းအိမ်ရာ လေးခန်းတွဲ လေးထပ်အဆောက်အအုံတည်ဆောက်နေမှုကိုလည်းကြည့်ရှုစစ်ဆေးခဲ့ကြောင်း သိရသည်။

ထို့အတူ မော်လမြိုင်မြို့ ဇေယျာသီရိရဲစခန်း၌ ၂၀၂၆- ၂၀၂၇ ဘဏ္ဍာရေးနှစ် ပြည်ထောင်စုဘဏ္ဍာရန်ပုံငွေဖြင့် တည်ဆောက်ပြီးစီးခဲ့သည့် တပ်ဖွဲ့ဝင်လူပျိုဆောင်သစ်နှင့် စခန်းဝင်းခြံစည်းရိုးကာရံခြင်းလုပ်ငန်းများ ဆောင်ရွက်ပြီးစီးမှုကိုလည်းကြည့်ရှုစစ်ဆေးခဲ့ကြောင်း သိရသည်။

လုံခြုံစိတ်ချရသည့် ဒီဂျစ်တယ်အခြေခံအဆောက်အအုံများနှင့် အစိုးရ၏ e-Government စနစ် အပြည့်အဝဖော်ဆောင်ရန် ဒုတိယသမ္မတဦးညိုစော တိုက်တွန်း

ခေတ်မီပြီး လုံခြုံစိတ်ချရသည့် ဒီဂျစ်တယ်အခြေခံအဆောက်အအုံများကို အခြေခံခိုင်မာအောင်တည် ဆောက်၍ အစိုးရ၏ e-Government စနစ်များကို အ ပြည့်အဝ ဒီဂျစ်တယ်အသွင်ပြောင်းလဲဆောင်ရွက်ရန် လိုအပ်သည်ဟု ဆိုက်ဘာလုံခြုံရေးဆိုင်ရာဗဟိုကော်မတီဥက္ကဋ္ဌ ဒုတိယသမ္မတ ဦးညိုစောက ပြောသည်။

ယနေ့ အောက်တိုဘာ ၃၀ ရက်နံနက် ၁၀ နာရီတွင် နေပြည်တော်ရှိ ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာန၌ကျင်းပသည့် ဆိုက်ဘာလုံခြုံ ရေးဆိုင်ရာ ဗဟိုကော်မတီညှိနှိုင်းအစည်းအဝေး (၁/၂၀၂၆)တွင် ပြောကြားခဲ့ခြင်းဖြစ်သည်၊

ဒုတိယသမ္မတက ဒီဂျစ်တယ်အသွင်ကူးပြောင်းရေးလုပ်ငန်းစဉ်များ ထိထိရောက်ရောက်အကောင်အထည် ဖော်နိုင်ရန် ကဏ္ဍအလိုက်၊ အပိုင်းလိုက်နှင့် အဆင့်လိုက် လမ်းပြမြေပုံများချမှတ်ကာ မဟာဗျူဟာမြောက်ဆောင်ရွက်လျက်ရှိသည်ဟု ထည့်သွင်းပြောကြားခဲ့သည်။

ထို့ပြင် ဝန်ကြီးဌာနအလိုက် အကောင်အထည်ဖော်ဆောင်ရွက်နေသည့် ဒီဂျစ်တယ်စနစ်များကို အမျိုး သားဒေတာစင်တာစနစ်တစ်ခုတည်းဖြင့် စနစ်တကျ ထိန်းသိမ်းဆောင်ရွက်ရန်လိုအပ်ကြောင်းလည်းဆွေး နွေးပြောကြားခဲ့သည်။

ထို့အတူ နိုင်ငံတကာနှင့် အာဆီယံဒေသတွင်းနိုင်ငံများတွင် အမျိုးသားဆိုက်ဘာလုံခြုံရေးဥပဒေ၊ ကိုယ်ရေးအချက်အလက်ကာကွယ်ရေးဥပဒေနှင့် နယ်စပ်ဖြတ်ကျော် ဒီဂျစ်တယ်ဒေတာစီးဆင်းမှုလုံခြုံရေးမူဝါဒများကဲ့သို့ ဥပဒေ၊ မူဘောင်များထုတ်ပြန်ဆောင်ရွက်နေခြင်းကိုပုံစံယူ၍ ဆိုက်ဘာတိုက်ခိုက်မှုများကို ဆိုက်ဘာလုံခြုံရေးစောင့်ကြည့်ကွပ်ကဲရေးဗဟိုဌာနဖြင့် နိုင်ငံတ ကာနှင့် ရင်ဘောင်တန်းနိုင်မည့် ဆိုက်ဘာဝန်းကျင်တစ်ခု အတူတကွတည်ဆောက်ရန်လည်း ဒုတိယသမ္မတဦးညိုစောက ပြောကြားခဲ့သည်။

မွန်ပြည်နယ် နယ်လုံဝန်ကြီးအဖြစ် တပ်မတော်သားလွှတ်တော်ကိုယ်စားလှယ် ဗိုလ်မှူးကြီးရဲထွဋ်အား ခန့်အပ်တာဝန်ပေး

မွန်ပြည်နယ်အစိုးရအဖွဲ့၏ လုံခြုံရေးနှင့်နယ်စပ်ရေးရာဝန်ကြီးအဖြစ် တပ်မတော်သားလွှတ်တော်ကိုယ်စားလှယ် ဗိုလ်မှူးကြီးရဲထွဋ်အား ခန့်အပ်တာဝန်ပေးခဲ့ကြောင်း သိရသည်။

ယနေ့ အောက်တိုဘာ ၃၀ ရက်နံနက်ပိုင်းတွင်ကျင်းပသည့် တတိယအကြိမ် မွန်ပြည်နယ်လွှတ်တော် အရေးပေါ်အစည်းအဝေး(၁/၂ဝ၂၆) (ပထမနေ့)တွင် ပြည်နယ်လွှတ်တော်၏သဘောတူညီမှုဖြင့် ၂ဝ၁၉ ခုနှစ်၊ မွန်ပြည်နယ်လွှတ်တော်ဆိုင်ရာနည်းဥပဒေ ၅၂ အရ ခန့် အပ်တာဝန်ပေးခဲ့ခြင်းဖြစ်ကြောင်း သိရသည်။

နယ်လုံဝန်ကြီးအဖြစ် တပ်မတော်သားလွှတ်တော်ကိုယ်စားလှယ် ဗိုလ်မှူးကြီးရဲထွဋ်အား ခန့်အပ်တာဝန်ပေးရန် မွန်ပြည်နယ်ဝန်ကြီးချုပ်မှ အမည်စာရင်းပေးပို့ခဲ့ခြင်းဖြစ်ကြောင်း သိရသည်။

လိုင်စင်ရဘဏ်များနှင့် RBL လိုင်စင်ရငွေလွှဲလုပ်ငန်းများအနေဖြင့် ပြည်ပငွေလွှဲလုပ်ငန်းများအပေါ် အမျိုးသားအကျိုးစီးပွားအဖြစ် အလေးထားပြီး ဝိုင်းဝန်းဆောင်ရွက်ပေးကြရန် ပြည်ထောင်စုဝန်ကြီး ပြော၊

မြန်မာအလုပ်သမားများမှ လွှဲပို့ငွေများကို တရားဝင်လမ်းကြောင်းမှ မှန်ကန်စွာဝင်ရောက်နိုင်မည့် စနစ်တစ်ခုတည်ဆောက်နိုင်ရေး ဆောင်ရွက်လျက်ရှိ

သက်ဆိုင်ရာ A.D လိုင်စင်ရဘဏ်များနှင့် RBL လိုင်စင်ရငွေလွှဲလုပ်ငန်းများအနေဖြင့် မိမိတို့နှင့် ချိတ်ဆက်ဆောင်ရွက်လျက်ရှိသည့် ပြည်ပငွေလွှဲလုပ်ငန်းများအပေါ် အမျိုးသားအကျိုးစီးပွားအဖြစ် အလေးထား၍ ဝိုင်းဝန်းဆောင်ရွက်ပေးကြရန် အလုပ်သမားဝန်ကြီးဌာန ပြည်ထောင်စုဝန်ကြီး ဦးမောင်မြင့် က ပြောသည်။

ယမန်နေ့ ကျင်းပသည့် ပြည်ပနိုင်ငံများရှိ မြန်မာရွှေ့ပြောင်းအလုပ်သမားများ၏ မိသားစုလွှဲပို့ငွေများ မြန်မာနိုင်ငံတော် ဗဟိုဘဏ်မှတစ်ဆင့်မှန်ကန်စွာဝင်ရောက်နိုင်ရေးညှိနှိုင်းအစည်းအဝေးတွင် ပြည်ထောင်စုဝန်ကြီးက အထက်ပါအတိုင်း ပြောကြားခဲ့ခြင်း ဖြစ်သည်။

ပြည်ပရောက်မြန်မာအလုပ်သမားများမှ ၎င်းတို့၏ မိသားစုထံသို့ လွှဲပို့ငွေများကို တရားဝင်လမ်းကြောင်းမှ မှန်ကန်စွာဝင်ရောက်နိုင်မည့်စနစ်တစ်ခုတည်ဆောက်နိုင်ရေး အလေးထားဆောင်ရွက်လျက်ရှိကြောင်းသိရသည်။

လက်ရှိတွင် ထိုင်းနိုင်ငံ၌ မည်သူမည်ဝါဖြစ်ကြောင်း သက်သေခံလက်မှတ် (Certificate of Identity-CI)ထုတ်ပေးရေးစခန်းငါးခုကို အောက်တိုဘာ ၁၄ ရက်မှ စတင်ဖွင့်လှစ်ဆောင်ရွက်ပေးလျက်ရှိပြီး CI စာအုပ်လာရောက် လျှောက်ထားသည့်အလုပ်သမားများ၏ အနည်းဆုံး ဝင်ငွေခွန်တစ်နှစ်စာနှင့် မိသားစုလွှဲပို့ငွေသုံးလစာလွှဲပို့ထားသည့် အထောက်အထားများကို စိစစ်ဆောင်ရွက်လျက်ရှိကြောင်း သိရသည်။

CI လာရောက်ပြုလုပ်သည့် မြန်မာရွှေ့ပြောင်းအလုပ်သမားများ၏ မိသားစုလွှဲပို့ ငွေများကို True Money၊ 2C2P Wave၊ K+Bank၊ Karsikorn Bank၊ Dee Money အစရှိသည့် ငွေလွှဲလုပ်ငန်းများမှ လွှဲပို့ထားသည်ကိုတွေ့ရှိရကြောင်း ပြည်ထောင်စုဝန်ကြီး ဦးမောင်မြင့်ကပြောသည်။

အဆိုပါ ငွေလွှဲအထောက်အထားများကို မြန်မာနိုင်ငံတော်ဗဟိုဘဏ်သို့ပေးပို့၍ သက်ဆိုင်ရာဌာနမှ ဆက်လက်စိစစ်ဆောင်ရွက်သွားမည်ဖြစ်ပါသဖြင့် သက်ဆိုင်ရာ A.D လိုင်စင်ရဘဏ်များနှင့် RBL လိုင်စင်ရငွေလွှဲလုပ်ငန်းများအနေဖြင့် မိမိတို့နှင့် ချိတ်ဆက်ဆောင်ရွက်လျက်ရှိသည့် ပြည်ပငွေလွှဲလုပ်ငန်းများအပေါ် အမျိုးသားအကျိုးစီးပွားအဖြစ် အလေးထား၍ ဝိုင်းဝန်းဆောင်ရွက်ပေးကြရန် ပြောကြားခဲ့ခြင်းလည်း ဖြစ်သည်။

အဆိုပါ အစည်းအဝေးသို့ အလုပ်သမားဝန်ကြီးဌာန ပြည်ထောင်စုဝန်ကြီး ဦးမောင်မြင့်၊ ဒုတိယဝန်ကြီး ဦးမျိုးအောင်၊ ပြည်ထဲရေးဝန်ကြီးဌာန၊ ဘဏ္ဍာရေးနှင့်အခွန်ဝန်ကြီးဌာန၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ အလုပ်သမားဝန်ကြီးဌာနတို့မှ ညွှန်ကြားရေးမှူးချုပ်များနှင့် ဒုတိယညွှန်ကြားရေးမှူးချုပ်များ၊ မြန်မာနိုင်ငံတော်ဗဟိုဘဏ်၊ Authorized Dealer-AD လိုင်စင်ရပုဂ္ဂလိကဘဏ်များ၊ Remittance Business License-RBL လိုင်စင်ရငွေလွှဲလုပ်ငန်းများနှင့် သက်ဆိုင်ရာဝန်ကြီးဌာနများမှ တာဝန်ရှိသူများ တက်ရောက်ကြသည်။

အိန္ဒိယအထောက်အပံ့ဖြင့် ဆောင်ရွက်သည့် မူးယစ်ဆေးဖြတ်ပြီးသူများ ပြန်လည်ထူထောင်ရေးစီမံကိန်း ပြီးမြောက်

အိန္ဒိယနိုင်ငံ၏ အထောက်အပံ့ဖြင့် ဆောင်ရွက်ခဲ့သည့် မူးယစ်ဆေးဖြတ်ပြီးသူများ ပြန်လည်ထူထောင်ရေးနှင့် အသက်မွေးဝမ်းကျောင်းသင်တန်းများအတွက် သင်ထောက်ကူပစ္စည်းများ ပံ့ပိုးပေးရေးစီမံကိန်း ပြီးမြောက်ခြင်းအခမ်းအနားကို အောက်တိုဘာ ၃၀ ရက်က ပြန်လည်ထူထောင်ရေးဦးစီးဌာန အစည်းအဝေးခန်းမ၌ ကျင်းပခဲ့ကြောင်း သိရသည်။

အဆိုပါစီမံကိန်းကို အိန္ဒိယနိုင်ငံ၏ အသေးစားဖွံ့ဖြိုးတိုးတက်မှုစီမံကိန်း (Small Development Projects – SDP) အစီအစဉ်အောက်မှ အထောက်အပံ့ပေးခဲ့ခြင်းဖြစ်ပြီး မူးယစ်ဆေးဖြတ်ပြီးသူများ ပြန်လည်ထူထောင်ရေးစခန်းများ၌ ဖွင့်လှစ်သည့် အသက်မွေးဝမ်းကျောင်းသင်တန်းများအတွက် လိုအပ်သော သင်ထောက်ကူပစ္စည်းများ ပံ့ပိုးပေးခဲ့ခြင်းဖြစ်သည်။

အခမ်းအနားတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာကိုကိုလွင်က SDP အစီအစဉ်သည် ဒေသတွင်းလိုအပ်ချက်များကို ဖြည့်ဆည်းပေးနိုင်သည့်အပြင် ရေရှည်တည်တံ့သော ဖွံ့ဖြိုးတိုးတက်မှုကိုလည်း အထောက်အကူပြုကြောင်း ပြောကြားခဲ့သည်။

ထို့ပြင် မြန်မာနိုင်ငံနှင့် အိန္ဒိယနိုင်ငံတို့အကြား ကာလရှည်ကြာတည်ရှိခဲ့သည့် ချစ်ကြည်ရင်းနှီးမှုအပေါ် အခြေခံ၍ နှစ်နိုင်ငံအကျိုးဖြစ်ထွန်းစေမည့် ကဏ္ဍများတွင် ပူးပေါင်းဆောင်ရွက်မှုများ ဆက်လက်တိုးမြှင့်လျက်ရှိကြောင်း ပြောကြားခဲ့သည်။

မြန်မာနိုင်ငံဆိုင်ရာ အိန္ဒိယသံအမတ်ကြီးကလည်း မူးယစ်ဆေးဖြတ်ပြီးသူများ ပြန်လည်ထူထောင်ရေးသည် ရပ်ရွာလူမှုအသိုင်းအဝိုင်းအတွင်း ပြန်လည်ဝင်ဆံ့ပေါင်းစည်းနိုင်သည်အထိ ဆောင်ရွက်ရသည့် ရေရှည်လုပ်ငန်းစဉ်တစ်ခုဖြစ်ကြောင်း ပြောကြားခဲ့သည်။

ယခုစီမံကိန်းသည် အိန္ဒိယနိုင်ငံ၌ ဆောင်ရွက်နေသည့် မူးယစ်ဆေးဝါးကင်းစင်ရေးလှုပ်ရှားမှုနှင့်လည်း ဆက်စပ်နေပြီး နှစ်နိုင်ငံအကြား ပူးပေါင်းဆောင်ရွက်မှုများကို ပိုမိုတိုးမြှင့်သွားမည်ဖြစ်ကြောင်း သိရသည်။