လာမည့် ၄၈ နာရီအတွင်း စစ်တောင်းမြစ်ရေ တောင်ငူမြို့၏စိုးရိမ်ရေမှတ်ရောက်ရှိနိုင်

ပဲခူးတိုင်းရှိ စစ်တောင်းမြစ်ရေသည် ယနေ့ ဇူလိုင် ၂၃ ရက်ညနေပိုင်းကတိုင်းထွာချက်အရ တောင်ငူမြို့၏စိုး ရိမ်ရေမှတ်အောက် (၃)ပေခွဲကျော်အလိုတွင်ရောက်ရှိနေကြောင်း သိရသည်။
ထိုသို့ ရောက်ရှိနေရာမှ လာမည့် ၄၈ နာရီအတွင်း၌ တောင်ငူမြို့၏စိုးရိမ်ရေမှတ်သို့ရောက်ရှိလာနိုင်သဖြင့် တောင်ငူမြို့နယ်ရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများ ကြိုတင်သတိပြုကြရန်နှင့် မြစ်ရေမြင့်တက်လာပါက အချိန်မီရှောင်ရှားကြရန် မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးနှိုးဆော်ခဲ့ကြောင်း သိရသည်။

အာဆီယံအဖွဲ့ဝင်နိုင်ငံများအနေဖြင့် အာဆီယံပဋိညာဉ်စာတမ်း၌ပြဋ္ဌာန်းထားချက်များကိုလေးစားလိုက်နာသင့်ဟု MOFA သတိပေး

အာဆီယံထုတ်ပြန်ချက်(၅)ရပ်သည် အာဆီယံအဖွဲ့ဝင်နိုင်ငံအားလုံး၏ တူညီဆန္ဒ(ASEAN Consensus) ဖြင့်ထုတ်ပြန်ခဲ့ခြင်းမဟုတ်
၂၀၂၁ ခုနှစ်၊ ဧပြီ ၂၄ ရက်က အင်ဒိုနီးရှားနိုင်ငံ၊ ဂျကာတာမြို့ရှိ အာဆီယံအတွင်းရေးမှူးချုပ်ရုံး၌ကျင်းပခဲ့သော အာဆီယံနိုင်ငံ့ခေါင်းဆောင်များအစည်းအဝေးအပြီးတွင် အာဆီယံအလှည့်ကျဥက္ကဋ္ဌ ထုတ်ပြန်ခဲ့သောအာဆီယံထုတ်ပြန်ချက်(၅)ရပ်နှင့်ပတ်သက်၍ အာဆီယံအဖွဲ့ဝင်နိုင်ငံများအနေဖြင့် အာဆီယံပဋိညာဉ်စာတမ်း၌ပြဋ္ဌာန်းထားချက်များကိုလေးစားလိုက်နာသင့်သည်ဟု နိုင်ငံခြားရေးဝန်ကြီးဌာနက သတိပေးခဲ့သည်။
မြန်မာနိုင်ငံအနေဖြင့် ဖွဲ့စည်းပုံအခြေခံဥပဒေ(၂၀၀၈ ခုနှစ်)ပါ နိုင်ငံခြားရေးမူဝါဒနှင့် ငြိမ်းချမ်းစွာအတူယှဉ်တွဲနေထိုင်ရေးမူကြီး(၅)ချက်တို့နှင့်အညီ အိမ်နီးချင်းနိုင်ငံများ၊ ချစ်ကြည်ရင်းနှီးသည့် နိုင်ငံများ၊ အာဆီယံအဖွဲ့ဝင်နိုင်ငံများအပါအဝင် နိုင်ငံတကာအသိုက်အဝန်းနှင့် ပူးပေါင်းဆောင်ရွက်မှုများတိုးမြှင့်သွားမည်ဟု ထုတ်ပြန်ချက်၌ဖော်ပြခဲ့သည်။
ထို့ပြင် အမျိုးသားအကျိုးစီးပွားနှင့် အချုပ်အခြာ အာဏာကို အစဉ်အမြဲအလေးထားကာ အာဆီယံနှင့် အပြု သဘောဆောင်၍ အကျိုးရှိသောပူးပေါင်းဆောင်ရွက်မှုများကို ဆက်လက်ထိန်းသိမ်းသွားမည်ဟုလည်း ထုတ်ပြန်ချက်၌ဖော်ပြခဲ့သည်။
ထို့ကြောင့် အာဆီယံထုတ်ပြန်ချက်(၅)ရပ်အပေါ် ဆွေးနွေးမှုများနှင့် အကောင်အထည်ဖော်မှုများတွင် အာဆီယံအဖွဲ့ဝင်နိုင်ငံများအနေဖြင့် အာဆီယံပဋိညာဉ်စာ တမ်း၌ ပြဋ္ဌာန်းထားသည့် အာဆီယံ၏အခြေခံမူများဖြစ်သော အဖွဲ့ဝင်နိုင်ငံများ၏ အချုပ်အခြာအာဏာကို လေးစားရေး၊ ပြည်တွင်းရေးဝင်ရောက်စွက်ဖက်ခြင်းမပြုရေးတို့ကိုလေးစားလိုက်နာသင့်သည်ဟုလည်း ထုတ်ပြန်ချက်၌ဖော်ပြခဲ့သည်။
ယင်း ထုတ်ပြန်ချက်(၅)ရပ်သည် အာဆီယံလုပ်ထုံးလုပ် နည်းများနှင့်သွေဖည်၍ အဖွဲ့ဝင်နိုင်ငံများ၊ အထူးသဖြင့် အဓိကသက်ဆိုင်သည့် မြန်မာနိုင်ငံအားမူကြမ်းချပြ အသိပေးညှိနှိုင်းမှုမရှိဘဲ ဥက္ကဋ္ဌထုတ်ပြန်ချက်၏ နောက်ဆက်တွဲအဖြစ်ထည့်သွင်းထုတ်ပြန်ခဲ့ခြင်းဖြစ်ရာ အဖွဲ့ဝင်နိုင်ငံအားလုံး၏ တူညီဆန္ဒ(ASEAN Consensus) ဖြင့်ထုတ်ပြန်ခဲ့ခြင်းမဟုတ်ဟုလည်း ထုတ်ပြန်ချက်၌ ဖော်ပြခဲ့သည်။
မြန်မာနိုင်ငံအနေဖြင့် နိုင်ငံ၏ပကတိအခြေအနေများအပေါ်မူတည်၍ အာဆီယံနှင့်အဖြစ်နိုင်ဆုံးဆက်လက်ပူးပေါင်းဆောင်ရွက်သွားဟုလည်း ထုတ်ပြန်ချက်၌ ဖော်ပြခဲ့သည်။
အဆိုပါ အာဆီယံထုတ်ပြန်ချက်(၅)ရပ်နှင့်ပတ်သက်၍ ဇူလိုင် ၉ ရက်ကကျင်းပသည့် ပြည်ထောင်စုလွှတ်တော်၌ "အာဆီယံထုတ်ပြန်ချက်(၅)ရပ်သည် အာဆီယံ၏ အခြေခံမူများနှင့်ကွဲလွဲနေသည့်အပြင် မြန်မာနိုင်ငံ၏ လက်ရှိပကတိနိုင်ငံရေးအခြေအနေနှင့် ကိုက်ညီမှုမရှိသဖြင့် လိုအပ်သကဲ့သို့သုံးသပ်ဆောင်ရွက်ပေးနိုင်ပါရန် ပြည်ထောင်စုအစိုးရအားတိုက်တွန်းကြောင်း"အ ရေးကြီးအဆိုတစ်ရပ်ကိုအတည်ပြုဆုံးဖြတ်ခဲ့သည်။

တရုတ်နိုင်ငံ ရွှေလီမြို့၌ မြန်မာ့ကျောက်မျက်ရတနာပြပွဲ ပထမဆုံးကျင်းပ၊ ယွမ်ငွေဖြင့် အိတ်ဖွင့်တင်ဒါခေါ်ယူရောင်းချ

တရုတ်နိုင်ငံ၊ ယူနန်ပြည်နယ် ရွှေလီမြို့၊ ကျယ်ဂေါင်နယ်စပ်ကုန်သွယ်ရေးဇုန်၌ မြန်မာ့ကျောက်မျက်ရတနာပြပွဲကို ဇူလိုင် ၂၂ ရက်က စတင်ကျင်းပခဲ့ရာ ယင်းသည် မြန်မာနိုင်ငံပြင်ပတွင် ပထမဆုံးအကြိမ် ကျင်းပသည့် မြန်မာ့ကျောက်မျက်ရတနာပြပွဲဖြစ်ကြောင်း သိရသည်။
အဆိုပါပြပွဲကို ယူနန်ပြည်နယ်ပြည်သူ့အစိုးရနှင့် မြန်မာနိုင်ငံ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနတို့ ပူးပေါင်းစီစဉ်ကျင်းပခြင်းဖြစ်ပြီး ပြပွဲအတွင်း ကျောက်စိမ်းနှင့် ကျောက်မျက်ရတနာများကို အိတ်ဖွင့်တင်ဒါစနစ်ဖြင့် ရောင်းချကာ တရုတ်ယွမ်ငွေဖြင့် ငွေပေးချေနိုင်သည့်စနစ် ကို ပထမဆုံးအသုံးပြုထားကြောင်း သိရသည်။
ယင်းစနစ်ကြောင့် ကျောက်မျက်ရတနာကုန်သည်များအနေဖြင့် တရုတ်နိုင်ငံအတွင်း၌ပင် ယွမ်ငွေဖြင့် ကျောက်စိမ်းအတွဲများ ဝယ်ယူနိုင်သဖြင့် အရင်းအနှီးကုန်ကျစရိတ် လျော့နည်းလာပြီး အရောင်းအဝယ်လုပ်ငန်းများ ပိုမိုမြန်ဆန်ထိရောက်လာကြောင်း သိရသည်။
ထို့ပြင် ယခုကဲ့သို့ ပြပွဲကျင်းပခြင်းသည် တရုတ်-မြန်မာ နှစ်နိုင်ငံ စီးပွားရေးနှင့် ကုန်သွယ်ရေးပူးပေါင်းဆောင်ရွက်မှုကို ပိုမိုနက်ရှိုင်းစေသည့်အပြင် နယ်စပ်ဖြတ်ကျော် ကျောက်မျက်ရတနာလုပ်ငန်းများ၏ အရည်အသွေးမြင့် ဖွံ့ဖြိုးတိုးတက်ရေးကိုလည်း အထောက်အကူပြုမည်ဖြစ်ကြောင်း သိရသည်။
တယ်ဟုန်ပြည်နယ်ခွဲသည် တရုတ်နိုင်ငံ၏ အကြီးဆုံး ကျောက်စိမ်းရိုင်း ဖြန့်ဖြူးရေးဗဟိုနှင့် ကျောက်မျက်အချောထည် အရောင်းအဝယ်စင်တာတစ်ခုဖြစ်ပြီး ကျောက်မျက်ရတနာလုပ်ငန်းရှင် ၄၅,၀၀၀ ကျော်နှင့် လုပ်သား ၁၀၀,၀၀၀ ကျော် လုပ်ကိုင်လျက်ရှိကြောင်း သိရသည်။
ထို့အပြင် ၂၀၂၅ ခုနှစ်အတွင်း တယ်ဟုန်ပြည်နယ်ခွဲ၏ ကျောက်မျက်ရတနာ Live Streaming ရောင်းချမှုတန်ဖိုးမှာ ယွမ် ၁၁ ဒသမ ၅၉ ဘီလီယံ ရှိခဲ့ပြီး ကျောက်မျက်ရတနာလုပ်ငန်းဂေဟစနစ်ကို အပြည့်အဝ ဖွံ့ဖြိုးတည်ဆောက်ထားပြီးဖြစ်ကြောင်း သိရသည်။

ပင်လယ်နီတွင် ဆော်ဒီရေနံတင်သင်္ဘောနှစ်စင်းကို တိုက်ခိုက်ခဲ့ကြောင်း ဟူသီအဖွဲ့ ထုတ်ပြန်
အရှေ့အလယ်ပိုင်း ပဋိပက္ခကြောင့် ကမ္ဘာ့ရေနံထောက်ပံ့မှုအပေါ် စိုးရိမ်မှုမြင့်တက်

အီရန်နှင့် မဟာမိတ်ဖွဲ့ထားသည့် ယီမင်အခြေစိုက် ဟူသီအဖွဲ့က ဆော်ဒီအာရေဗျနိုင်ငံအပေါ် ကြေညာထားသည့် ရေတပ်ပိတ်ဆို့မှု၏ တစ်စိတ်တစ်ပိုင်းအဖြစ် ပင်လယ်နီတွင် ဆော်ဒီရေနံတင်သင်္ဘောနှစ်စင်းကို ဒုံးကျည်နှင့် ဒရုန်းများဖြင့် တိုက်ခိုက်ခဲ့ကြောင်း ထုတ်ပြန်ပြောကြားခဲ့သည်။
ဟူသီအဖွဲ့က တိုက်ခိုက်ခံရသည့် သင်္ဘောများမှာ Encelia နှင့် Layla ဖြစ်ကြောင်း ထုတ်ဖော်ပြောကြားခဲ့ပြီး၊ ဆော်ဒီနိုင်ငံပိုင် SPA သတင်းဌာနကမူ အစိုးရသတင်းရင်းမြစ်ကို ကိုးကား၍ Encelia သင်္ဘောတွင် လက်နက်ထိမှန်ကာ သင်္ဘောဦးပိုင်း၌ မီးလောင်မှုဖြစ်ပွားခဲ့ကြောင်း ဖော်ပြထားသည်။ Layla သင်္ဘော တိုက်ခိုက်ခံရမှုကိုမူ သီးခြားအတည်ပြုနိုင်ခြင်းမရှိသေးကြောင်း သိရသည်။
ဟူသီအဖွဲ့သည် ယခင်က ဆော်ဒီအာရေဗျနိုင်ငံအပေါ် ရေတပ်ပိတ်ဆို့မှု ကြေညာခဲ့ပြီး ယင်းလုပ်ရပ်သည် အီရန်၏ ဒေသတွင်းမဟာဗျူဟာဆိုင်ရာ သြဇာလွှမ်းမိုးမှုနှင့် ဆက်စပ်နေကြောင်း လေ့လာသုံးသပ်သူအချို့က ရှုမြင်ထားသည်။
တစ်ချိန်တည်းတွင် အမေရိကန်စစ်တပ်ကလည်း သမ္မတ ဒေါ်နယ်ထရမ့်၏ ညွှန်ကြားချက်ဖြင့် အီရန်ပစ်မှတ်များကို ထပ်မံတိုက်ခိုက်ခဲ့ကြောင်း ပြောကြားခဲ့ပြီး အမေရိကန်၏ အီရန်အပေါ် စစ်ရေးတိုက်ခိုက်မှုများသည် ၁၂ ညဆက်တိုက် ရှိလာပြီဖြစ်ကြောင်း သိရသည်။
အီရန်က ဟော်မုဇ်ရေလက်ကြားကို ထိန်းချုပ်ပိတ်ဆို့ထားသည့်အပြင် ပင်လယ်နီဒေသတွင်လည်း တင်းမာမှုများ မြင့်တက်လာခြင်းကြောင့် ကမ္ဘာ့ရေနံထောက်ပံ့မှု၊ ရေနံဈေးနှုန်းနှင့် ကမ္ဘာ့ကုန်သွယ်ရေးအပေါ် သက်ရောက်မှုများ ပိုမိုကြီးမားလာနိုင်ကြောင်း စိုးရိမ်မှုများ မြင့်တက်လျက်ရှိသည်။
ယင်းအခြေအနေကြောင့် ပင်လယ်နီ၌ သွားလာနေသည့် ရေနံတင်သင်္ဘောအချို့သည် လမ်းကြောင်းပြောင်းလဲခဲ့ကြပြီး တရုတ်နှင့် အိန္ဒိယနိုင်ငံများသို့ ဦးတည်မည့် ဆော်ဒီရေနံတင်သင်္ဘော သုံးစင်းသည်လည်း နောက်ကြောင်းပြန်လှည့်ခဲ့ကြောင်း သိရသည်။

မိုးတိမ်တောင်များရွှေ့လျားနေသည့် ရန်ကုန်တိုင်း၌ မိုးရာသွန်းခြင်းနှင့်အတူ လေပြင်းတိုက်ခတ်မှုများဖြစ်ပေါ်နိုင်

ရန်ကုန်တိုင်း၌ မိုးတိမ်တောင်များဖြစ်ထွန်းလျက်ရှိရာ ယင်း မိုးတိမ်တောင်များရွှေ့လျားမှုကြောင့် မိုးရွာသွန်းခြင်းနှင့်အတူ လေပြင်းတိုက်ခတ်ခြင်းတို့အပါအဝင် မိုးလေဝသဖြစ်စဥ်များဖြစ်ပေါ်နိုင်သည်ဟု မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့ ဇူလိုင် ၂၃ ရက်ည ၇ နာရီက အသိပေးခဲ့သည်။
ရန်ကုန်တိုင်းနည်းတူ ပဲခူးတိုင်း၊ မကွေးတိုင်း၊ စစ်ကိုင်း တိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင် ပြည်နယ်နှင့် ရှမ်းပြည်နယ်(တောင်ပိုင်းနှင့် အရှေ့ပိုင်း) တို့တွင်လညါး မိုးတိမ်တောင်များဖြစ်ထွန်းလျက်ရှိကြောင်း သိရသည်။
အဆိုပါ မိုးတိမ်တောင်များရွေ့လျားရာနေရာတစ် လျှောက်တွင် မိုးရွာသွန်းခြင်းနှင့်အတူ လေပြင်းတိုက် ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီး လက်ခြင်းနှင့် မိုးသီးကြွေခြင်း မိုးလေဝသဖြစ်စဉ်များ ဖြစ်ပေါ် နိုင်၍ကြိုတင်သတိပြုကြရန်လည်း မိုးဇလကအသိပေးခဲ့ကြောင်း သိရသည်။
ထို့ပြင် ရန်ကုန်မြို့နှင့်အနီးတစ်ဝိုက်တွင် မနက်ဖြန် ဇူ လိုင် ၂၄ ရက်မွန်းတည့်ချိန်အထိ မိုးတစ်ကြိမ်၊ နှစ်ကြိမ်ထစ်ချုန်းရွာသွန်းနိုင်ကြောင်း သိရသည်။

အင်ဒိုနီးရှားနိုင်ငံတွင်ကျင်းပမည့် (၄၁)ကြိမ်မြောက် Indonesia Trade ExpTEI) 2026 တွင်ပါဝင်ပြသရန် မြန်မာစီးပွားရေးလုပ်ငန်းရှင်များကိုဖိတ်ခေါ်

အင်ဒိုနီးရှားနိုင်ငံ၊ တန်ဂီရန်မြို့ရှိ Indonesia Convention Exhibition (ICE) BSD တွင် လာမည့် အောက်တိုဘာ ၁၄ ရက်မှ အောက်တိုဘာ ၁၈ ရက်အထိကျင်းပမည့် အင်ဒိုနီးရှားနိုင်ငံ၏ အကြီးဆုံးနိုင်ငံတကာကုန်သွယ်မှုပြပွဲဖြစ်သည့် (၄၁)ကြိမ်မြောက် Indonesia Trade Expo (TEI) 2026 တွင်ပါဝင်ပြသရန် မြန်မာစီး ပွားရေးလုပ်ငန်းရှင်များကိုဖိတ်ခေါ်ခဲ့သည်။
အဆိုပါ ပြပွဲနှင့်ပတ်သက်၍ အသိပညာဖြန့်ဝေခြင်းကို ယနေ့ ဇူလိုင် ၂၃ ရက်က မြန်မာနိုင်ငံဆိုင်ရာ အင်ဒိုနီးရှားသံရုံး၌ပြုလုပ်ရာ အင်ဒိုနီးရှားနိုင်ငံ၊ ကုန်သွယ်ရေးဝန်ကြီးဌာနမှ ကိုယ်စားလှယ်များက "The Ultimate Hub for Global Sourcing"ဆောင်ပုဒ်ဖြင့်ကျင်းပမည့် Indonesia Trade Expo (TEI) 2026 ၏အကြောင်းအ ရာများကို အသေးစိတ်ရှင်းလင်းပြောကြားခဲ့သည်။
ထို့ပြင် ပြပွဲ၌ပါဝင်ပြသမည့် အဓိကကုန်သွယ်ရေးက ဏ္ဍများ၊ ဝယ်ယူသူများမှတ်ပုံတင်ခြင်းလုပ်ငန်းစဉ်များ၊ Business Matching အစီအစဉ်များ၊ စီးပွားရေးဖိုရမ်များ၊ အကြံပေးဆွေးနွေးမှုများနှင့် ကုန်သွယ်ရေးပူး ပေါင်းဆောင်ရွက်မှုဆိုင်ရာသဘောတူညီချက်များ လက်မှတ်ရေးထိုးနိုင်မည့်အခွင့်အလမ်းများကိုလည်း မိတ်ဆက်ပြောကြားခဲ့ကြသည်။
ထို့အတူ အင်ဒိုနီးရှားသံရုံးမှလည်း အင်ဒိုနီးရှား-မြန်မာ နှစ်နိုင်ငံကြား ကုန်သွယ်ရေးဆက်ဆံမှုများပိုမိုတိုးတက်ခိုင်မာစေရန် ဆက်လက်ပံ့ပိုးဆောင်ရွက်သွားမည်ဟုအတည်ပြုပြောကြားခဲ့ကာ နှစ်နိုင်ငံစီးပွားရေးလုပ်ငန်းရှင်များကြား မိတ်ဖက်ဆက်ဆံရေးတိုးမြှင့်ဖော်ဆောင်ခြင်းနှင့် မြန်မာဝယ်ယူသူများ၏ TEI 2026 တွင်ပါဝင်မှုကိုအားပေးမြှင့်တင်သွားမည်ဟု ပြောကြားခဲ့သည်။
ကုန်သွယ်ရေး၊ ထုတ်လုပ်မှု၊ ကျန်းမာရေးဝန်ဆောင်မှု၊ အစားအသောက်နှင့် အဖျော်ယမကာ၊ စိုက်ပျိုးရေး၊ ပရိဘောဂနှင့် သွင်းကုန်လုပ်ငန်းများအပါအဝင် စီးပွား ရေးကဏ္ဍအသီးသီးမှ မြန်မာစီးပွားရေးလုပ်ငန်းရှင်များကလည်း အင်ဒိုနီးရှားနိုင်ငံနှင့် စီးပွားရေးပူးပေါင်းဆောင်ရွက်နိုင်မည့် အလားအလာများ၊ ပို့ကုန်ထုတ်ကုန်များ၊ TEI 2026 တွင် Buyer အဖြစ်ပါဝင်နိုင်ရေးအ တွက်လိုအပ်သည့် လုပ်ထုံးလုပ်နည်းများကို မေးမြန်းဆွေးနွေးခဲ့ကြသည်။

ကမ္ဘာ့ရေနံဈေးမြင့်တက်မှုကြောင့် ပြည်တွင်းစက်သုံးဆီဈေး ပြန်တက်

ဓာတ်ဆီ92တစ်လီတာ ကျပ် ၃၃၅၀ နှင့် ဒီဇယ်တစ်လီတာ ကျပ် ၃၅၆၀ ဖြစ်လာ
ကမ္ဘာ့ရေနံစိမ်းဈေးနှုန်း မြင့်တက်လာမှု၏ သက်ရောက်မှုကြောင့် ပြည်တွင်းစက်သုံးဆီဈေး ယခင်တစ်ပတ်ထက် အနည်းငယ် ပြန်လည်မြင့်တက်လာကြောင်း စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ ဇူလိုင် ၂၄ ရက် ထုတ်ပြန်ချက်အရ သိရသည်။
ကမ္ဘာ့ရေနံဈေးအနေဖြင့် ယခင်တစ်ပတ်က ရေနံစိမ်းတစ်စည်လျှင် ဒေါ်လာ ၈၀ ဝန်းကျင်သာရှိခဲ့သော်လည်း ယနေ့တွင် ရေနံစိမ်းတစ်စည်လျှင် ဒေါ်လာ ၉၂ ဝန်းကျင်အထိ မြင့်တက်လာခဲ့ခြင်းကြောင့် ပြည်တွင်း၌လည်း စက်သုံးဆီဈေး ပြန်လည်မြင့်တက်လာခြင်းဖြစ်သည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ယနေ့ (ဇူလိုင် ၂၄ ရက်) တွင် ထုတ်ပြန်လိုက်သည့် ရည်ညွှန်းဈေးနှုန်းများအရ ရန်ကုန်မြို့တွင် စက်သုံးဆီဈေးနှုန်းများမှာ တစ်လီတာလျှင် –
ဓာတ်ဆီ 92 Ron ၃,၃၅၀ ကျပ်၊
ဓာတ်ဆီ 95 Ron ၃,၄၆၀ ကျပ်၊
ဒီဇယ် (HSD 500 ppm) ၃,၅၆၀ ကျပ်၊
ပရီမီယံဒီဇယ် (HSD 50 ppm/10 ppm) ၄,၃၁၅ကျပ်အထိ ဖြစ်သည်။ ဇူလိုင် ၃၀ ရက်အထိ ယင်းဈေးနှုန်းအတိုင်းသာ ရှိနေမည်ဖြစ်သည်။
ယခုတစ်ပတ်စက်သုံးဆီဈေးနှုန်းကို ယခင်တစ်ပတ်ဈေးနှုန်းနှင့် နှိုင်းယှဉ်ပါက
ဓာတ်ဆီ 92 Ron တစ်လီတာလျှင် ၁၄၀ ကျပ်၊ ဓာတ်ဆီ 95 Ron တစ်လီတာလျှင် ၁၇၅ ကျပ်၊ ဒီဇယ်တစ်လီတာလျှင် ၃၈၅ကျပ်နှင့် ပရီမီယံဒီဇယ်တစ်လီတာလျှင် ကျပ် ၄၂၀ ထပ်မံဈေးတက်လာသည်။
သို့သော် ယခုအပတ်တွင် စက်သုံးဆီဈေး ပြန်လည်မြင့်တက်လာသော်လည်း ဧပြီလ သင်္ကြန်ကာလအပြီး အမြင့်ဆုံးရောက်ရှိခဲ့သည့်ဧပြီ ၂၄ ရက် ရည်ညွှန်းဈေးနှုန်းနှင့် နှိုင်းယှဉ်ပါက စက်သုံးဆီဈေးနှုန်းသည် (၁၄)ပတ်ဆက်တိုက် ကျဆင်းလာခဲ့သည်။

ဒုသမ္မတ ဂျေဒီ ဗန့်စ်​ရဲ့ သတင်းပေါက်ကြားမှု စွပ်စွဲချက်နဲ့ လုံခြုံရေးအဖွဲ့ဝင် Secret Service အေးဂျင့်တစ်ဦး စုံစမ်းစစ်ဆေးခံနေရ

​အမေရိကန် ဒုသမ္မတ ဂျေဒီ ဗန့်စ် ရဲ့ အထိခိုက်မခံတဲ့ သတင်းအချက်အလက်တွေကို ပေါက်ကြားစေခဲ့တယ်ဆိုတဲ့ စွပ်စွဲချက်နဲ့ လုံခြုံရေးအဖွဲ့ဝင်တစ်ဦးဟာ တာဝန်ကနေ ခေတ္တဆိုင်းငံ့ခံထားရပြီး စုံစမ်းစစ်ဆေးခံနေရတယ်လို့ အမေရိကန် Secret Service (USSS) က ပြောပါတယ်။
​ဘာအချက်အလက်တွေ ပေါက်ကြားသွားတယ်ဆိုတာကို အသေးစိတ် မထုတ်ပြန်သေးပေမဲ့ အဆိုပါ အေးဂျင့်ဟာ "လုပ်ငန်းဆောင်ရွက်မှုနဲ့ သတင်းအချက်အလက် လုံခြုံရေးကို ထိခိုက်စေခဲ့တယ်" ဆိုတဲ့ စွပ်စွဲချက်တွေ အပါအဝင် "ရာဇဝတ်မှုဆိုင်ရာ စုံစမ်းစစ်ဆေးမှု" နဲ့ ရင်ဆိုင်ရနိုင်တယ်လို့ Secret Service က ပြောပါတယ်။
​"စောင့်ရှောက်ရမယ့်သူရဲ့ လုံခြုံရေးကို ထိခိုက်စေနိုင်တဲ့ ဘယ်လိုပြုမူဆောင်ရွက်မှုကိုမဆို လုံးဝ ခွင့်လွှတ်သည်းခံမှာ မဟုတ်ပါဘူး" လို့ Secret Service ရဲ့ ပြောရေးဆိုခွင့်ရှိသူ Anthony Guglielmi က ပြောခဲ့ပါတယ်။
​အိမ်ဖြူတော်ကတော့ ဒီစုံစမ်းစစ်ဆေးမှုနဲ့ ပတ်သက်ပြီး မှတ်ချက်ပေးဖို့ ငြင်းဆိုထားပါတယ်။
​Guglielmi ဟာ ဘာအချက်အလက်တွေ ပေါက်ကြားခဲ့လဲဆိုတာကိုတော့ ထုတ်ပြောခဲ့ခြင်း မရှိပါဘူး။
​ဒါပေမဲ့ ပြီးခဲ့တဲ့အပတ်က အမေရိကန် ရုပ်သံကွန်ရက် MS NOW က ဗန့်စ်ရဲ့ မိသားစု ခရီးစဉ်တွေနဲ့ ပတ်သက်လို့ လုံခြုံရေးအဖွဲ့ထဲက အချို့က မကျမနပ်ဖြစ်နေကြတယ်ဆိုတဲ့ သတင်းကို အမည်မဖော်လိုတဲ့ သတင်းအရင်းအမြစ်တွေကို ကိုးကားပြီး ဖော်ပြခဲ့ပါတယ်။ CNN ရဲ့ အဆိုအရ အေးဂျင့် ရာထူးကနေ ဆိုင်းငံ့ခံရတာဟာ အဲဒီသတင်းဖော်ပြချက်နဲ့ တိုက်ရိုက်ဆက်စပ်နေတာ ဖြစ်ပါတယ်။
​MS NOW ရဲ့ ဖော်ပြချက်အရ ဗန့်စ်ရဲ့ သားငယ်လေး ဂေါက်ရိုက်သင်တန်းသွားတက်ဖို့ စစ်တပ်ဟယ်လီကော်ပတာ စီးနင်းဖို့ စီစဉ်မှုနဲ့ ဗန့်စ်တို့မိသားစု ဝါရှင်တန်ဒီစီ ဧရိယာမှာ အိမ်လိုက်ကြည့်တဲ့ ခရီးစဉ် အပါအဝင် အချို့သော ခရီးစဉ်တွေနဲ့ ပတ်သက်ပြီး အေးဂျင့်တွေက အတွင်းပိုင်းမှာ စိုးရိမ်မကင်းဖြစ်ကြောင်း မကျမနပ် ပြောဆိုခဲ့ကြတာဖြစ်ပါတယ်။
ဗန့်စ်နဲ့ သူ့မိသားစုဟာ ၂၄ နာရီပတ်လုံး Secret Service ရဲ့ လုံခြုံရေး စောင့်ရှောက်မှုကို ယူရတာ ဖြစ်ပါတယ်။
​ဒီသတင်းဖော်ပြချက်ကို သီးခြားအတည်ပြုနိုင်ခြင်း မရှိသေးပါဘူး။
​ဒီဖြစ်စဉ်ဟာ သမ္မတ ဒေါ်နယ်ထရမ့် အပါအဝင် အေဂျင်စီက စောင့်ရှောက်ပေးရသူတွေအပေါ် ခြိမ်းခြောက်မှုတွေ အဆမတန် မြင့်တက်လာနေကြောင်း အရာရှိတွေက သတိပေးနေချိန်မှာ ပေါ်ပေါက်လာတာ ဖြစ်ပါတယ်။
​ဗုဒ္ဓဟူးနေ့မှာ Secret Service ညွှန်ကြားရေးမှူး Sean Curran က အေဂျင်စီအနေနဲ့ သူ တာဝန်ထမ်းဆောင်ခဲ့တဲ့ ၂၄ နှစ်တာ ကာလအတွင်း အန္တရာယ်အရှိဆုံး ခြိမ်းခြောက်မှု ပတ်ဝန်းကျင်မှာ လှုပ်ရှားနေရတာ ဖြစ်တယ်လို့ ပြောခဲ့ပါတယ်။
​ဧပြီလမှာ မူလပြုလုပ်ဖို့ စီစဉ်ထားတဲ့ အိမ်ဖြူတော် သတင်းထောက်များ ညစာစားပွဲဟာ လုပ်ကြံသတ်ဖြတ်ဖို့ ကြိုးပမ်းမှု စွပ်စွဲချက်ကြောင့် ရောထွေးရှုပ်ထွေးသွားခဲ့ရပြီး အခုလာမယ့် သောကြာနေ့ကို ပြန်လည်ရွှေ့ဆိုင်းခဲ့ရတာ ဖြစ်ပါတယ်။ အဆိုပါပွဲ မတိုင်မီ သတင်းထောက်တွေကို ပြောကြားရာမှာ Curran က Secret Service ရင်ဆိုင်နေရတဲ့ ခြိမ်းခြောက်မှု ပမာဏဟာ "မတရား မြင့်မားနေတယ်" လို့ ပြောဆိုခဲ့ပါတယ်။
​"အခြေအနေတွေက အရမ်းကို မငြိမ်မသက်ဖြစ်နေပြီး ဒါဟာ နယ်ပယ် အသီးသီးမှာ ဖြစ်ပေါ်နေတာပါ" လို့ Curran က ပြောပါတယ်။ "ခြိမ်းခြောက်မှု အခြေအနေနဲ့ ပတ်ဝန်းကျင်ဟာ ကျွန်တော် မြင်ဖူးသမျှထဲမှာ အကြီးမားဆုံးပါပဲ။"
​အေးဂျင့်တွေဟာ ဇန်နဝါရီလကတည်းကစပြီး ခြိမ်းခြောက်မှုပေါင်း ၁၀,၀၀၀ နီးပါးကို စုံစမ်းစစ်ဆေးမှုတွေ စတင်ပြုလုပ်ခဲ့ရပါတယ်။
​ဒီလို မြင့်တက်လာတာဟာ အွန်လိုင်း ခြိမ်းခြောက်မှု‌တွေ၊ တစ်ဦးတည်း လုပ်ဆောင်သူတွေ၊ သဘောတရားရေးရာ အစွန်းရောက်မှုတွေ၊ ပြည်ပ ရန်သူတွေနဲ့ စိတ်ကျန်းမာရေး ပြဿနာ ရင်ဆိုင်နေရသူတွေ အစရှိတဲ့ အကြောင်းအရင်းများ ပေါင်းစပ်မှုကြောင့် ဖြစ်တယ်လို့ အရာရှိတွေက ပြောပါတယ်။
​မူလ ပင်မ အရင်းအမြစ်ဖြစ်ခဲ့တဲ့ လက်ရေးစာမူတွေနဲ့ အခြား သာမန်ဆက်သွယ်ရေး ပုံစံတွေနေရာမှာ အစားထိုးပြီး အခုအခါ ခြိမ်းခြောက်မှု အများစုဟာ အွန်လိုင်းကနေ ထွက်ပေါ်လာတာ ဖြစ်တယ်လို့လည်း သူတို့က ဆက်လက် ပြောကြားခဲ့ပါတယ်။

အမျိုးသမီးရေးရာဝန်ကြီးဌာနနှင့် UNFPA အဖွဲ့တို့အကြား လက်မှတ်ရေးထိုးမည့် Work Plan ပါလုပ်ငန်းများ အကောင်အထည်ဖော်ဆောင်ရွက်နိုင်ရေး ဆွေးနွေး

အမျိုးသမီးရေးရာဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ဇင်သည် ကုလသမဂ္ဂလူဦးရေရန်ပုံငွေအဖွဲ့(UNFPA)၏ ဌာနေကိုယ်စားလှယ်ဖြစ်သူ Mr. Jaime Nadal Roig နှင့်အဖွဲ့အား ဇူလိုင် ၂၃ ရက်က အမျိုးသမီးရေးရာဝန်ကြီးဌာနဧည့်ခန်းမ၌ လက်ခံတွေ့ဆုံခဲ့ကြောင်း သိရသည်။
အမျိုးသမီးရေးရာဝန်ကြီးဌာနနှင့် UNFPA အဖွဲ့တို့အကြား လက်မှတ်ရေးထိုးမည့် Work Plan ပါလုပ်ငန်းများ အကောင်အထည်ဖော်ဆောင်ရွက်နိုင်ရေး၊ ဝန်ကြီးဌာနတွင် Help Line ထားရှိနိုင်ရေး၊ ကိစ္စရပ်များဆွေးနွေးခဲ့ကြောင်း သိရသည်။
အကြမ်းဖက်ခံရသူအမျိုးသမီးများအား တစ်နေရာတည်းတွင် ဝန်ဆောင်မှုပေးသည့်စင်တာ (One Stop Women Support Center-OSWSC)တွင် ဝန်ဆောင်မှုများ ပံ့ပိုးပေးရေးဆိုင်ရာများကို လည်း ဆွေးနွေးခဲ့ကြောင်း သိရသည်။
အဆိုပါ တွေ့ဆုံပွဲသို့ ညွှန်ကြားရေးမှူးချုပ်၊ ဘာသာရပ်ဆိုင်ရာတာဝန်ရှိသူများနှင့် UNFPA မှ ကိုယ်စားလှယ်များ တက်ရောက်ခဲ့ကြောင်း သိရသည်။

ဖလမ်းမြို့တွင် နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်း ပြန်လည်ဖွင့်လှစ်နိုင်ရေး ဆောက်လုပ်ရေးဝန်ကြီးဌာန ဒု-ဝန်ကြီး ဦးမျိုးမြင့် စစ်ဆေး

ချင်းပြည်နယ်၊ ဖလမ်းမြို့ရှိ နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်း ပြန်လည်ဖွင့်လှစ်နိုင်ရေးအတွက် ပြင်ဆင်ဆောင်ရွက်နေမှုများနှင့် ထိခိုက်ပျက်စီးခဲ့သည့် အဆောက်အဦများ ပြန်လည်တည်ဆောက်ရေး လုပ်ငန်းစဉ်များကို ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်နှင့် တာဝန်ရှိသူများက ဇူလိုင် ၂၃ ရက်တွင် သွားရောက်ကြည့်ရှု စစ်ဆေးခဲ့ကြောင်း သိရသည်။
ဒုတိယဝန်ကြီး ဦးမျိုးမြင့်နှင့်အဖွဲ့သည် ဖလမ်းမြို့ရှိ နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်းသို့ သွားရောက်ကြည့်ရှုကြရာ အကြမ်းဖက်ဖြစ်စဉ်များကြောင့် ထိခိုက်ပျက်စီးခဲ့သည့် အဆောက်အဦများ ပြန်လည်ပြုပြင်ထားရှိမှု၊ သင်ကြားရေးနှင့် သင်ထောက်ကူပစ္စည်းများ၊ ကျောင်းပတ်ဝန်းကျင် သန့်ရှင်းသာယာရေးနှင့် ကျောင်းပြန်လည်ဖွင့်လှစ်နိုင်ရေး စီမံထားရှိမှုများကို တာဝန်ရှိသူများက ရှင်းလင်းတင်ပြခဲ့ကြသည်။
တင်ပြချက်များနှင့် ပတ်သက်၍ နိုင်ငံတော်အတွက် ပညာရည်မြင့်မား၍ စွမ်းရည်ပြည့်ဝသော မျိုးဆက်သစ်လူငယ်များ ဖြစ်ထွန်းလာစေရန်၊ ပညာရပ်များ တတ်မြောက်၍ ကျောင်းဆင်းပြီးပါက မိမိတို့၏ ဒေသဖွံ့ဖြိုးတိုးတက်ရေး လုပ်ငန်းများတွင် ပြန်လည်တာဝန်ထမ်းဆောင်စေရန်နှင့် နယ်စပ်ဒေသရှိ တိုင်းရင်းသားပြည်သူများ၏ လူနေမှုအဆင့်အတန်း မြှင့်တင်ပေးလိုသည့် စိတ်ဓာတ်များ ထက်သန်လာစေရေး လေ့ကျင့်ပေးရန်တို့ကို ဒုတိယဝန်ကြီးဦးမျိုးမြင့်က မှာကြားခဲ့သည်။
ထို့နောက် ဒုတိယဝန်ကြီးနှင့် အဖွဲ့သည် ဖလမ်းခရိုင် အထွေထွေအုပ်ချုပ်ရေးဦးစီးဌာနရုံး၌ ကျင်းပသည့် အဆောက်အဦများ ပြန်လည်ပြုပြင်/တည်ဆောက်ရာတွင် ဆောင်ရွက်ရမည့် လုပ်ငန်းအဆင့်ဆင့်အကြောင်း သိကောင်းစရာ ရှင်းလင်းဆွေးနွေးပွဲသို့ တက်ရောက်ဆွေးနွေးခဲ့ကြောင်း သိရသည်။