လျှပ်စစ်ဓါတ်အားထုတ်လုပ်မှု၏ ၁၈ရာခိုင်နှုန်းကျော်(ယူနစ် ၃၅၅၉ သန်း) သည် ပျှမ်းမျှအားဖြင့် နှစ်စဉ် ဆုံးရှုံးနေ
လျှပ်စစ်ဓါတ်အားစနစ်အတွင်း ဓာတ်အားဆုံးရှုံးမှုများ သိသာစွာ လျော့ကျသွားစေရေး ပူးပေါင်းဆောင်ရွက်ပေးရန် လျှပ်စစ်နှင်စွမ်းအင်ဝန်ကြီးဌာန အသိပေး
နိုင်ငံတော် လျှပ်စစ်ဓာတ်အားစနစ်၏ အစိတ်အပိုင်းဖြစ်သည့် ပို့လွှတ်မှုနှင့် ဖြန့်ဖြူးမှု အပိုင်းတို့တွင် ထုတ်လုပ်လျှပ်စစ်ဓါတ်အား၏ ၁၈ရာခိုင်နှုန်းကျော် ယူနစ် (၃၅၅၉ သန်း) သည် ပျှမ်းမျှအားဖြင့် နှစ်စဉ် ဆုံးရှုံးနေကြောင်း သိရသည်။
အဆိုပါ ဆုံးရှုံးမှုများကြောင့် ပြည်သူများ သို့ လျှပ်စစ်ဓာတ်အားပိုမိုဖြန့်ဖြုးပေးနိုင်ခြင်းမရှိသည့်အပြင် နေ့စဉ်နှင့်အမျှ ဆုံးရှုံးမှုများ ဖြစ်ပေါ်စေလျက်ရှိကြောင်း သိရသည်။
နည်းပညာပိုင်းဆိုင်ရာ ဆုံးရှုံးမှု နှင့် လူတို့၏ မသမာမှုများကြောင့် ဖြစ်ပေါ်နေသည့် ဆုံးရှုံးမှုများကို လျော့နည်းပပျောက်စေရေးအတွက် အလေးထားကြိုးပမ်းဆောင်ရွက်နေကြောင်းလည်း အသိပေးထားသည်။
နည်းပညာဆိုင်ရာဆုံးရှုံးမှုများကို နိုင်ငံတကာတွင် လက်ခံထားသည့် ပျောက်ဆုံးမှုရာခိုင်နှုန်း စံနှုန်းများအတိုင်း ရှိစေရေးအတွက် နည်းပညာပိုင်ဆိုင်ရာ မြှင့်တင်မှုများ၊ ဓာတ်အားလိုင်းနှင့်ထရန်စဖော်မာများကို ပုံမှန်ထိန်းသိမ်းခြင်း၊ smart မီတာများ တပ်ဆင်ခြင်းနင့် လျှပ်စစ်ဓာတ်အားသုံးစွဲမှုကို အချိန်နှင့်တပြေးညီစောင့်ကြည့်သည့်စနစ်များကို အရှိန်အဟုန်မြှင့်တင် ဆောင်ရွက်သွားမည်ဖြစ်ကြောင်း သိရသည်။
ထိုကြောင့် လူတို့၏ မသမာမှုများကြောင့် ဆုံးရှုံးမှုများကိုလည်း ဖော်ထုတ်၍ ဥပဒေနှင့်အညီ ထိရောက်စွာဟန့်တားဆောင်ရွက်သွားမည်ဖြစ်ပြီး ပြည်သူများ အနေဖြင့် မသမာပြုလုပ်သူများကို တွေ့ရှိပါကလည်း သတင်ပေးတိုင်ကြားနိုင်ကြောင်းလည်း လျှပ်စစ်နှင့်စွမ်းအင်ဝန်ကြီးဌာနက မေတ္တာရပ်ခံထားသည်။
