မြဝတီနယ်စပ်ကုန်သွယ်ရေး ပြန်လည်စတင်တော့မှာဖြစ်လို့ နယ်စပ်ပို့ကုန်လိုင်စင်တွေ ချထားပေးနေ

ထိုင်း - မြန်မာနယ်စပ်မြို့ဖြစ်တဲ့ မြဝတီကနေ နယ်စပ်ကုန်သွယ်ရေး ပြန်လည်စတင်တော့မှာဖြစ်တာကြောင့် ပို့ကုန်ပစ္စည်း ခြောက်မျိုးကို နယ်စပ်ပို့ကုန်လိုင်စင် လျှောက်ခွင့်ပြုလိုက်ပြီ ဖြစ်တယ်လို့ ကုန်သည်တွေဆီကသိရပါတယ် ။
ပြောင်းဆံ ၊ ငရုတ်အစို/အခြောက် ၊ ကွမ်းသီးအစို/အခြောက် ၊ ကြက်သွန်နီ ၊ ပဲမျိုးစုံ နဲ့ သီဟိုဆံ တို့ကို ပို့ကုန်လိုင်စင်ချထားပေးလိုက်တာ ဖြစ်ပြီး လိုင်စင်ကို Myanmar Trade Net 2.0 စနစ်မှာ လျှောက်ထားရမှာဖြစ်တယ်လို့ သိရပါတယ်။
" အမှတ် ၂ တံတားပြန်ဖွင့်တော့မှာမို့လို့ ခုလို ပို့ကုန်လိုင်စင် တွေပြန်ချပေးတဲ့သဘောပါ ။ တံတားပြန်ဖွင့်မှ လိုင်စင်လျှောက် ထလုပ်လို့ ကုန်သွယ်ရေး ထလုပ်လို့မှမရတာ ။ ပို့ကုန်လိုင်စင်တွေ ချထားပေးပြီးမှ တံတားဖွင့်တာနဲ့ ကုန်စည်တွေ ချက်ခြင်းပို့နိုင်မှာ အဲဒီသဘောပါ ။ အခုတချို့လည်း လိုင်စင်လျှောက်နေကြပြီ ။ လိုင်စင်တွေချပေးနေတယ်။ ဝက်ဆိုက်ဘ်ကနေပဲ လျှောက်ရတာဆိုတော့ အချက်အလက်ပြည့်စုံမှန်ကန်ရင် လိုင်စင်ချပေးနေတယ် ။ မြဝတီနယ်စပ်ကုန်သွယ်ရေးပြန်ပွင့်တာနဲ့ ကုန်ပစ္စည်းတွေလည်း အထိုက်အလျောက် စျေးတက်လာမှာပါ ။ " လို့ နယ်စပ် ငရုတ်ကုန်သည် တယောက်က ပြောပါတယ်။
မြဝတီ နယ်စပ်ပို့ကုန်လိုင်စင် အတွက် လက်ရှိမှာ လိုင်စင် လျှောက်ထားသူတွေရှိသလို လမ်းကြောင်းအခြေအနေ အဆင်ပြေမှုရှိမရှိအပေါ် စောင့်ကြည့်ပြီး မဲဆောက်မှာ ကုန်ပစ္စည်းထားဖို့ ဂိုဒေါင်ငှားရမ်းဖို့ ကြိုတင်စီစဥ်တဲ့သူတွေလည်း ရှိနေတယ်လို့ သိရပါတယ်။
" လိုင်စင်လျှောက်ခွင့်တော့ ပေးပြီ။ လျှောက်ကြည့်မှာပေါ့။ကျွန်တော်တို့လည်း စမ်းသွားကြည့်မှာပေါ့။ ဒါပေမယ့် မြဝတီလမ်းကြောင်းကမသွားတာ ကြာတော့လေ။ တယောက်နှစ်ယောက်ကတော့ စမ်းထွက်ကြည့်မှ ရမှာပေါ့။အားလုံးက စိတ်မချသေးဘူးဖြစ်နေတော့လေ။ လမ်းမှာပစ်ခတ်ခံရမှာကြောက်တာကို။ အဲဒါကြောင့်ခဏစောင့်ကြည့်နေကြတာ။ တချို့ကုန်သည်တွေလည်း မဲဆောက်မှာ ဂိုဒေါင်တွေ ငှားဖို့စီစဥ်နေကြတယ်။အရင်က ဧပြီ ၂၈ လောက် ထွက်ရမယ်ကြားတယ်။အခုထပ်ကြားရတာကတော့ မေ ၁၁ လောက်မှထွက်ရမယ်လို့ ကြားရပြန် တယ်။တံတားဖွင့်မယ့်ရက်တော့ မသိသေးဘူး။ " လို့ ပြောင်းကုန်သည်တယောက်က ပြောပါတယ်။
မြဝတီနယ်စပ်ကုန်သွယ်ရေးကို ထိုင်း - မြန်မာနယ်စပ် နှစ်နိုင်ငံကုန်သွယ်ရေးလမ်းကြောင်းဖြစ်တဲ့ အမှတ် ၂ ချစ်ကြည်ရေးတံတား ကနေ အဓိက ကုန်သွယ်ရတာ ဖြစ်ပါတယ်။
လက်ရှိမှာ အမှတ်၂ချစ်ကြည်ရေးတံတား ပိတ်ထားဆဲ ဖြစ်ပေမယ့် မကြာခင်မှာ ပြန်လည်ဖွင့်လှစ်တော့မှာဖြစ်တာကြောင့် နယ်စပ်ပို့ကုန်လိုင်စင်တွေကို ပြန်လည် လျှောက်ထားခွင့် ပြုလိုက်တာ ဖြစ်တယ်လို့ သိရပါတယ်။
နယ်စပ်ပို့ကုန်လိုင်စင်တွေကို လျှောက်ထားခွင့်ပြုလိုက်ပေမယ့် သွင်းကုန်လိုင်စင် အသစ်လျှောက်ထားခြင်းကို ခွင့်မပြုသေးဘဲ အမှတ် ၂ တံတားပိတ်သွားလို့ လုပ်ငန်းစဉ်တွေ ရပ်တန့် ကျန်ခဲ့ရတဲ့ ကုန်စည်တွေကိုတော့ စနစ်တကျ ပြန်လည် စိစစ်ဆောင်ရွက်ပေးနိုင်ဖို့အတွက် မြဝတီနယ်စပ်ကုန်သွယ်ရေး ကုန်သည်များအသင်းက စာရင်းကောက်ခံနေတယ်လို့ သိရပါတယ်။
ဒါကြောင့် သွင်းကုန်လုပ်ငန်းရှင်တွေအနေနဲ့ သွင်းကုန်လိုင်စင်လျှောက်ထားစဉ်အတွင်း ထိုင်း Free Zone မှာ ရှိတဲ့ ကုန်ပစ္စည်းစာရင်း၊ သွင်းကုန်လိုင်စင်ရရှိပြီး တင်သွင်းရန်ကျန်ရှိတဲ့ ကုန်ပစ္စည်းစာရင်း၊ သွင်းကုန်လိုင်စင်နဲ့ တင်သွင်းထားပြီး အကောက်ခွန်ဂျူတီမဆောင်ရသေးတဲ့ ကုန်ပစ္စည်း များစာရင်း ၊ သွင်းကုန်လိုင်စင်ရရှိပြီး အကောက်ခွန်ဂျူတီဆောင်ထားတဲ့ ကုန်ပစ္စည်းများစာရင်း ကို တင်ပြနိုင်တယ်လို့ သိရပါတယ် ။
သွင်းကုန်လုပ်ငန်းရှင်တွေအနေနဲ့ အဆိုပါ စာရင်းတွေကို ဧပြီ ၂၀ ရက်နေ့နောက်ဆုံးထားပြီး မြဝတီနယ်စပ်ကုန်သွယ်ရေး ကုန်သည်များအသင်းဆီ တင်ပြရမှာ ဖြစ်တယ်လို့သိရပါတယ် ။
မြဝတီ-မဲဆောက် အမှတ် (၂) ချစ်ကြည်ရေးတံတားကိုတော့ ၂၀၂၅ ခုနှစ် ဩဂုတ်လ ၁၈ ရက်နေ့ကတည်းက ပိတ်ထားခဲ့တာ ဒီကနေ့အထိဆိုရင် ၈ လကျော်ကြာရှိပြီဖြစ်ပါတယ်။
မြဝတီ - ကော့ကရိတ် အာရှလမ်းမကြီးကတော့ ၂၀၂၃ ခုနှစ်မှာ PDF တွေထိန်းချုပ်ပြီးကတည်းက ပိတ်ထားခဲ့ပြီး ဒီလ ဧပြီ ၂ ရက်မှာမှ ပြန်လည်ဖွင့်လှစ် နိုင်ခဲ့တာဖြစ်ပါတယ်။
မြဝတီ - ကော့ကရိတ် အာရှလမ်းဖွင့်ပြီးနောက်မှာ ဒေသတွင်း ကုန်စည်စီးဆင်းမှု နဲ့ သွားလာ​ရေးအဆင်ပြေခဲ့ပြီး မကြာခင် အမှတ် ၂ တံတားပြန်ဖွင့်ပါက နယ်စပ်ကုန်သွယ်ရေး ပြန်လည်အသက်ဝင်လာမှာ ဖြစ်တယ်လို့ သိရပါတယ်။
ထိုင်း - မြန်မာ နယ်စပ်ကုန်သွယ်ရေးကဏ္ဍမှာ မြဝတီ နယ်စပ်ကုန်သွယ်ရေးကနေ အဓိက ကုန်သွယ်မှု အများဆုံး ပြုလုပ်နိုင်တာ ဖြစ်တယ်လို့ သိရပါတယ်။

ရန်ကုန် - မော်လမြိုင်လမ်းမှာ express ကားနဲ့ light truck တိုက်မိပြီး ဘုန်းကြီး ၇ ပါး အပါအဝင် ၁၁ ယောက်သေဆုံး ၊ ရှစ်ယောက်ဒဏ်ရာပြင်းထန်

သထုံမြို့နယ်၊ ရန်ကုန် - မော်လမြိုင်လမ်း ၊ မိုင်တိုင်အမှတ် (၁၀၄/၅) အနီးမှာ ဒီကနေ့ ဧပြီ ၁၈ ရက်နေ့ ညနေ ၄ နာရီကျော်လောက်က ခရီးသည်တင် မန္တလာ Express ကားနဲ့ ဘုန်းကြီးတွေလိုက်ပါလာတဲ့ light truck တို့ မျက်နှာချင်းဆိုင်တိုက်မိပြီး ဘုန်းကြီး ၊ ကိုရင် ၊ လူ အပါအဝင် ၁၁ ယောက်သေဆုံးခဲ့တယ်လို့ သိရပါတယ် ။
သေဆုံးတဲ့အထဲမှာ ဘုန်းကြီး ခုနှစ်ပါး ၊ ကိုရင် တပါး နဲ့ အမျိုးသားသုံးယောက်တို့ ဖြစ်ကြောင်း ကနဦး သိရပြီး ထိခိုက်ဒဏ်ရာရသူတွေကတော့ အမျိုးသားသုံးယောက်နဲ့ ဘုန်းကြီး ငါးပါးစုစုပေါင်း ရှစ်ယောက် ဖြစ်တယ်လို့ သိရပါတယ်။
လက်ရှိမှာ ထိခိုက်ဒဏ်ရာရရှိသူထဲက သံဃာတပါးကို ရန်ကုန်ဆေးရုံကြီးကိုပို့ဆောင်နေပြီး ကျန်ဒဏ်ရာရရှိသူတွေကိုတော့ သထုံဆေးရုံကြီးမှာ ကုသမှုပေးနေတယ်လို့ သိရပါတယ်။
" လောလောဆယ် သေဆုံးသူက သံဃာ ၇ ပါး ၊ ကိုရင် တပါး ၊ အမျိုးသားသုံးယောက်ပါ ။ သံဃာ နှစ်ပါးက သထုံဆေးရုံကြီးရောက်မှ ထပ်ဆုံးလို့ ၁၁ ယောက်ဖြစ်သွားတာပါ။ ထိခိုက်ဒဏ်ရာ ရတဲ့အထဲမှာ လက်ကျိုး ခြေထောက်ကျိုး ခေါင်းကွဲတာ တွေပါတယ် ။ သထုံဆေးရုံကြီးမှာ ကုသမှုခံယူနေရတယ်။ ယာဥ်တိုက်မှုက ဘုန်းကြီးတွေလိုက်ပါလာတဲ့ကားက တက္ကစီကို ကျော်တက်လိုက်တာမှာ express ကားနဲ့တိုက်မိတာ ပါ။ " လို့ မြေပြင်ကူညီကယ်ဆယ်ရေး သွားခဲ့တဲ့ အဖြူရောင်နှလုံးသား လူမှုကယ်ဆယ်ရေးအဖွဲ့ ရဲ့ တာဝန်ရှိသူကပြောပါတယ်။
ယာဥ်တိုက်မှုအတွင်း သေဆုံးခဲ့သူတွေနဲ့ ထိခိုက်ဒဏ်ရာရ ရှိသူတွေဟာ ဘုန်းကြီးကားပေါ်လိုက်ပါလာသူတွေဖြစ်ကြောင်းသိရှိရပြီး ပျံလွန်တော်မူတဲ့ ဘုန်းကြီးတွေကတော့ သထုံမြို့နယ်၊ ပေါ်တော်မူ ရွှေဟင်္သာညီနောင်ကျောင်းက ဖြစ်တယ်လို့ ကနဦး သိရပါတယ် ။
အဆိုပါ ယာဥ်တိုက်မှုကိုတော့ သထုံမြို့နယ်အခြေစိုက် လူမှုကူညီရေးအသင်းတွေနဲ့အတူ နယ်မြေခံမီးသတ်တပ်ဖွဲ့ဝင်တွေ ပူးပေါင်းပြီး ကယ်ဆယ်ရေးလုပ်ခဲ့တာ ဖြစ်တယ်လို့သိရပါတယ်။

မြဝတီမြို့နယ် တောင်ဘက်ခြမ်းမှာ တိုက်ပွဲအပြင်းအထန် ဖြစ်ပွားနေ

ကရင်ပြည်နယ်၊ မြဝတီမြို့နယ် တောင်ဘက်ခြမ်းမှာ အစိုးရတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်တွေကြား တိုက်ပွဲ အပြင်းအထန် ဖြစ်ပွားနေတယ်လို့ ဒေသခံတွေက ပြောပါတယ်။
မြဝတီမြို့တောင်ပိုင်းရှိ မြဝတီ - ဝေါလေလမ်းပိုင်း၊ ဖလူးကျေးရွာနဲ့ မင်းလက်ပံကျေးရွာတွေ အနီးမှာ ပြီးခဲ့တဲ့ ဧပြီ ၁၃ ရက်၊ သင်္ကြန်ကာလမှစတင်ကာ တိုက်ပွဲတွေ အပြင်းအထန် ဖြစ်ပွားနေတာဖြစ်ပြီး အစိုးရတပ်က ဝေါလေဗျူဟာကုန်းနဲ့ ဖလူးစခန်းတွေကို ပြန်လည် ရယူနိုင်ဖို့အတွက် အင်အား အများအပြားနဲ့ ထိုးစစ်ဆင် တိုက်ခိုက်နေတာ ဖြစ်တယ်လို့ သိရပါတယ်။
“တိုက်ပွဲက မနေ့က မင်းလက်ပံမှာလည်း အပြင်းအထန်ဖြစ်တယ်။ ဖလူးဘက်မှာလည်း မနက်ပိုင်း အပြင်းအထန် ဖြစ်တယ်။ လေကြောင်း တိုက်ခိုက်တာက သင်္ကြန်ကာလအတွင်းမှာတောင် မနားတမ်း ဖြစ်ခဲ့တာ” လို့ ဒေသတွင်း သတင်းရင်းမြစ် တယောက်က ပြောပါတယ်။
လက်ရှိမှာ အစိုးတပ်ဟာ မင်းလက်ပံနဲ့ ဖလူးရွာကို သိမ်းပိုက်နိုင်ဖို့အတွက် ထိုးစစ်ဆင် တိုက်ခိုက်နေတာဖြစ်ပြီး တိုက်ပွဲအတွင်း လေကြောင်းကနေ‌ လေယာဉ်၊ ဒရုန်းတွေနဲ့ တိုက်ခိုက်မှုအပြင် လက်နက်ကြီး ပစ်ခတ်မှုတွေ နေ့စဉ်နဲ့အမျှ ပြုလုပ်နေတာ ဖြစ်တယ်လို့ သိရပါတယ်။
မနေ့ ဧပြီ ၁၈ ရက်ကလည်း ထိုင်း - မြန်မာ နယ်စပ်အနီးရှိ မင်းလက်ပံကျေးရွာမှာ ဒရုန်း ကျရောက်မှုကြောင့် နေအိမ် အလုံး ၃၀ ကျော် မီးလောင်ပျက်စီးခဲ့တယ်လို့ ‌ဒေသခံတွေက ပြောပါတယ်။
“အစိုးရစစ်ကြောင်းက ကျေးရွာထဲ ဝင်မရလို့ မနေ့၊ နေ့လယ် ၁ နာရီလောက်မှာ မင်းလက်ပံ၊ အုန်းတောရွာထိပ်ပိုင်းကို တိုက်ခိုက်ခဲ့တာလို့ သိရတယ်။ အုန်းတောမှာဖြစ်တာက ဒရုန်းကျတာ။ အိမ်တွေ တအိမ်ပြီးတအိမ် မီးကူးပြီး လောင်ကုန်တာ၊ မီးပြင်းတာ အနားတောင်မကပ်နိုင်ဘူး” လို့ ဒေသခံတယောက်က ပြောပါတယ်။
မင်းလက်ပံရွာထိပ်မှာ ကရင်အမျိုးသားအစည်းအရုံး (KNU) တပ်မဟာ (၆) လက်အောက်ခံ ကရင်အမျိုးသား လွတ်မြောက်ရေးတပ်မတော် (KNLA) တပ်ဖွဲ့တွေ အထိုင်ချဘတပ်စွဲထားတာ ဖြစ်တယ်လို့ သူက ပြောပါတယ်။
အစိုးရတပ်ဟာ ဒရုန်းနဲ့ တိုက်ခိုက်မှု မပြုလုပ်ခင် မနေ့ မနက် ၁၀ နာရီလောက်မှာလည်း အုန်းတောရွာရဲ့ နှစ်ရွာကျော်ကို လေကြောင်းတိုက်ခိုက်မှု ပြုလုပ်ခဲ့သေးတယ်လို့ သိရပါတယ်။
ဒါအပြင် ပြီးခဲ့တဲ့ ဧပြီ ၁၃ ရက်ကနေ ၁၆ ရက်အတွင်း မင်းလက်ပံကျေးရွာအနီးမှာ အစိုးရတပ်နဲ့ KNU ပူးပေါင်းတပ်တွေ တိုက်ပွဲဖြစ်ပွားခဲ့ပြီး အစိုးရတပ်ဘက်က လက်နက်ကြီး၊ ဒရုန်း တိုက်ခိုက်မှုကြောင့် နေအိမ် အလုံး ၃၀ နီးပါး မီးလောင်ပျက်စီးခဲ့တယ်လို့ သိရပါတယ်။
တိုက်ပွဲတွေကြောင့် မင်းလက်ပံ၊ ဖလူး အပါအဝင် အနီးအနား ကျေးရွာတွေနဲ့ ဝေါလေဘက်မှ ဒေသခံတွေဟာ သောင်ရင်းမြစ် ကမ်းအစပ်တွေနဲ့ ထိုင်းနိုင်ငံဘက်ခြမ်းကို စစ်ဘေး တိမ်းရှောင်နေကြရတယ်လို့ သိရပါတယ်။
မြဝတီမြို့နယ်မှာ မင်းလက်ပံ၊ ဖလူးကျေးရွာအပြင် ရသေ့ဂူနဲ့ ဝေါလေဗျူဟာကုန်းတို့မှာလည်း ပြီးခဲ့တဲ့ မတ်လအတွင်းကစပြီး အစိုးရတပ်နဲ့ ဒေသတွင်း လက်နက်ကိုင်တပ်တွေကြား တိုက်ပွဲတွေ ပြင်းထန်နေခဲ့တာ ဖြစ်တယ်လို့ သိရပါတယ်။

ကော့ကရိတ်မြို့တွင် ဧပြီ ၁၈ ရက်မှစ၍ လျှပ်စစ်မီးပြန်လည်ရရှိ

ကရင်ပြည်နယ်၊ ကော့ကရိတ်မြို့တွင် နိုင်ငံရေးအခြေ အနေများကြောင့် လျှပ်စစ်ဓာတ်အားပြတ်တောက်မှုများဖြစ်ပေါ်ခဲ့ရာမှ ပြန်လည်တည်ငြိမ်လာချိန်၌ ကော့ကရိတ်မြို့အားပြန်လည်ထူထောင်ရေးလုပ်ငန်းများဆောင်ရွက်ချိန်တွင် လျှပ်စစ်မီးပြန်လည်ရရှိရေးအတွက်လည်းဆောင်ရွက်ခဲ့ကြကြောင်း သိရသည်။
ထို့ကြောင့် မတ် ၂၆ ရက်မှစကာ ကော့ကရိတ်မြို့၌ လျှပ်စစ်မီးသွယ်တန်းရရှိခဲ့ပြီး ယမန်နေ့ ဧပြီ ၁၈ ရက်က တပ်ရင်း၊ တပ်ဖွဲ့၊ ဌာန၊ အဖွဲ့(၃၉)ဖွဲ့နှင့် နေအိမ်(၂၁၀) အိမ် လျှပ်စစ်ဓာတ်အားရရှိခဲ့ကြောင်း သိရသည်။
ထို့ပြင် ကျန်ရှိသည့်နေရာများ၌ လျှပ်စစ်ဓာတ်အားပြန်လည်ရရှိရေးအတွက် ယနေ့ ဧပြီ ၁၉ ရက်တွင်လည်း လျှပ်စစ်မီးရရှိရေးလုပ်ငန်းများကို ဆက်လက်ဆောင်ရွက်လျက်ရှိကြောင်း သိရသည်။

တရုတ်နိုင်ငံတွင် စွန့်ပစ်အမှိုက်မျိုးစုံမှ နှစ်စဉ်လျှပ်စစ် ဓာတ်အားယူနစ်သန်းပေါင်း(၁,၂၀၀)ကျော်ခန့် ထုတ်လုပ်သည့်စက်ရုံအား လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်လေ့လာ

တရုတ်နိုင်ငံမှ နည်းပညာဆိုင်ရာအဖွဲ့များ မြန်မာနိုင်ငံသို့စေလွှတ်၍ ကွင်းဆင်းလေ့လာခြင်းများဆောင်ရွက်ပေးရန်ဆွေးနွေး
လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီးဦးကိုကိုလွင်သည် ဧပြီ ၁၈ ရက်က တရုတ်နိုင်ငံ၊ ကွမ်ကျိုးမြို့ရှိ စွန့်ပစ်အမှိုက်မျိုးစုံမှ လျှပ်စစ်ဓာတ်အား ထုတ်လုပ်သည့် GRANDTOP Fushan Circular Economic Industrial Park အား ကြည့်ရှုလေ့လာခဲ့သည်။
ကုမ္ပဏီတာဝန်ရှိသူများက Industrial Park အတွင်း စွန့်ပစ်အမှိုက်မျိုးစုံမှ လျှပ်စစ်ဓာတ်အားထုတ်လုပ်နိုင်ရန် အမှိုက်များအမျိုးအစားခွဲခြား၍ သိမ်းဆည်းခြင်း၊ သယ်ယူပို့ဆောင်ခြင်းဆောင်ရွက်သည့်လုပ်ငန်းစဉ်များ၊ အမှိုက်မှလျှပ်စစ်ဓာတ်အားထုတ်လုပ်ခြင်းအ တွက်ဆောင်ရွက်လျက်ရှိသည့် လုပ်ငန်းစဉ်အဆင့်ဆင့်၊ စက်ရုံမှထွက်ရှိလာသည့် လျှပ်စစ်ဓာတ်အားများကို ဓာတ်အားဖြန့်ဖြူးရေးလိုင်းများမှတစ်ဆင့် National Grid သို့ ဖြန့်ဖြူးခြင်းလုပ်ငန်းစဉ်များကို ရှင်းလင်းတင်ပြခဲ့သည်။
ထို့ပြင် စက်ရုံ၏ Control Room မှ စံသတ်မှတ်ချက်များနှင့် ကိုက်ညီမှု ရှိ/မရှိ စောင့်ကြည့်ထိန်းကျောင်းခြင်းဆောင်ရွက်နေမှုတို့ကိုလည်း ရှင်းလင်းတင်ပြခဲ့ကြသည်။
ထို့နောက် ပြည်ထောင်စုဝန်ကြီးက သိရှိလိုသည်များကို ပြန်လည်မေးမြန်းဆွေးနွေးပြီး စက်ရုံသို့စေလွှတ်၍ လေ့လာသင်ကြားပေးနိုင်ရန်နှင့် တရုတ်နိုင်ငံမှ နည်းပညာဆိုင်ရာအဖွဲ့များ မြန်မာနိုင်ငံသို့စေလွှတ်၍ ကွင်းဆင်းလေ့လာခြင်းများဆောင်ရွက်ပေးနိုင်ရန် ဆွေးနွေးပြောကြားခဲ့သည်။
အဆိုပါ GRANDTOP Fushan Circular Economic Industrial Park ရှိ Guangzhou Waste to Energy Power Plant သည် တရုတ်နိုင်ငံတွင် အမှိုက်မှ လျှပ်စစ်ဓာတ်အားထုတ်လုပ်သည့် အကြီးဆုံးစက်ရုံဖြစ်ပြီး စက်စွမ်းအားမှာ နေ့စဉ် အမှိုက်တန်(၉,၃၀၀)၊ နှစ်စဉ်အမှိုက်တန်(၃ ဒသမ ၁)သန်းတို့မှ နှစ်စဉ်လျှပ်စစ်ဓာတ်အား ယူနစ်သန်းပေါင်း(၁,၂၀၀)ကျော်ခန့်ထုတ်လုပ်၍ National Grid သို့ ဖြန့်ဖြူးရောင်းချပေးလျက်ရှိသည်။

မြစ်ကြီးနားမြို့ရှိ လျှပ်စစ်ဌာနနှင့် ရပ်ကွက်အုပ်ချုပ်ရေးမှူးရုံးများတွင် လျှပ်စစ်မီးအားသွင်းခြင်းဝန်ဆောင် မှုလုပ်ငန်းများဆောင်ရွက်ပေးနေ

ကချင်ပြည်နယ်၊ မြစ်ကြီးနားမြို့ရှိ လျှပ်စစ်ဌာနနှင့် ရပ် ကွက်အုပ်ချုပ်ရေးမှူးရုံးများတွင် လျှပ်စစ်မီးအားသွင်းခြင်းဝန်ဆောင်မှုလုပ်ငန်းများကို နေ့စဥ် ဆောင်ရွက်ပေးလျက်ရှိကြောင်း သိရသည်။
မြစ်ကြီးနားမြို့၊ ရန်ကြီးအောင်ရပ်ကွက်ရှိ မီးစက်ဝင်း၊ မြို့သစ်ရပ်ကွက်ရှိ ဘူးဂါးလျှပ်စစ်ဓာတ်အားဖြန့်ဖြူးရေးလုပ်ငန်းပိုင် အရေးပေါ်မီးပျက်တိုင်ကြားရန်ဌာန၊ ပြည်နယ်လျှပ်စစ်အင်ဂျင်နီယာရုံးဝင်းအတွင်းတို့၌ လျှပ်စစ်မီးအားသွင်းခြင်းဝန်ဆောင်မှုလုပ်ငန်းများကိုဆောင်ရွက်ပေးလျက်ရှိခြင်းဖြစ်ကြောင်း သိရသည်။
ထိုသို့ ဝန်ဆောင်မှုပေးနေသည့်နေရာများအား ကချင် ပြည်နယ်ဝန်ကြီးချုပ်ဦးခက်ထိန်နန်မှ ဧပြီ ၁၈ ရက်ည နေပိုင်းကသွားရောက်၍ နေ့စဉ် လျှပ်စစ်မီးဖြင့် အသုံး ပြုသည့် EV ဆိုင်ကယ်၊ ဖုန်း၊ Power Bank များ၊ အားသွင်းမီးသီး/မီးလုံးများအားဖြည့်သွင်းနိုင်ရန် ပလပ်ခုံများပြုလုပ်ထားမှု၊ လျှပ်စစ်မီးအားသွင်းသုံးစွဲနိုင်ရေး မီးစက်ဖြင့် အားသွင်းပလပ်ခုံများပြုလုပ်၍ ဝန်ဆောင် မှုပေးနေမှု၊ လျှပ်စစ်ဓာတ်အားဖြည့်သွင်းနေမှုတို့ကိုကြည့်ရှုစစ်ဆေးခဲ့ကြောင်း သိရသည်။
ထို့ပြင် မြေမြင့်ရပ်ကွက်၊ ရမ်ပူရပ်ကွက်၊ အောင်နန်းရပ် ကွက်တို့ရှိ ရပ်ကွက်အုပ်ချုပ်ရေးမှူးရုံးများတွင်လည်း မီးစက်များအသုံးပြု၍ လျှပ်စစ်အားသွင်းနိုင်ရေးစီစဉ်ပေးထားမှုကို ပြည်နယ်ဝန်ကြီးချုပ်ကကြည့်ရှုစစ်ဆေးပြီး ရပ်ကွက်အုပ်ချုပ်ရေးမှူးရုံးများအတွက် (၈ ပေ×၄ ပေ)ဆိုလာပြားနှင့် 1800W ရှိ Power Station တစ်စုံစီ(စုစုပေါင်း ၁၈ စုံ)ကိုထောက်ပံ့ပေးအပ်ခဲ့ကြောင်း သိရသည်။
ကချင်ပြည်နယ်အစိုးရအဖွဲ့မှ ပြည်နယ်အတွင်း အဓိကလျှပ်စစ်မီးဖြန့်ဝေပေးနေသည့် ချီဖွေငယ်ရေအားလျှပ် စစ်စက်ရုံပြုပြင်ထိန်းသိမ်းခြင်းလုပ်ငန်းများဆောင် ရွက်နေသည့် ရက်သတ္တပတ်နှစ်ပတ်တာကာလအတွင်း ပြည်သူများ လျှပ်စစ်မီးနှင့် ရေအခက်အခဲဖြစ်ပေါ်မှု လျော့နည်းစေရေးအတွက် လုပ်ငန်းစီမံချက်ဖြင့်ဆောင် ရွက်ပေးလျက်ရှိကြောင်း သိရသည်။

ရေလက်ကြားတွင်သင်္ဘောနှစ်စင်းတို-က်ခိုက်ခံရ၍အထူးစိုးရိမ်ကြောင်း အိန္ဒိယပြောကြား

စနေနေ့(ဧပြီလ ၁၈ရက်နေ့) က ဟော်မုဇ်ရေလက်ကြားကို ဖြတ်သန်းရန်ကြိုးစားနေသော အိန္ဒိယအလံတင် သင်္ဘောနှစ်စင်း တို-က်ခိုက်ခံရသဖြင့် အလွန်စိုးရိမ် မကင်းဖြစ်ကြောင်းကို အိန္ဒိယအစိုးရက နူးဒေလီရှိ အီရန်သံအမတ်ကြီးကို ဆင့်ခေါ်၍ ပြောကြားခဲ့သည်။
တို-က်ခိုက်ခံခဲ့ရသော သင်္ဘောများအနက် တစ်စင်းသည် Sanmar Herald သင်္ဘောဖြစ်ကြောင်း အိန္ဒိယအစိုးရ သတင်းရင်းမြစ်တစ်ခုက ထုတ်ဖော်ပြောဆိုသည်။
သင်္ဘောအမှုထမ်းများနှင့် သင်္ဘောသည် ဘေးကင်းကြောင်းလည်း သတင်းရင်းမြစ်က ပြောကြားခဲ့သည်။
အိန္ဒိယနိုင်ငံခြားရေးဝန်ကြီးဌာန ထိပ်တန်းအရာရှိက ယခုကိစ္စနှင့် ပတ်သက်၍ အိန္ဒိယ၏ သဘောထားအမြင်ကို အီရန်အာဏာပိုင်များထံ ပြောပြရန်နှင့် အိန္ဒိယသို့ ဦးတည်သည့် သင်္ဘောများ ရေလက်ကြားကို လွယ်ကူချောမွေ့စွာဖြတ်သန်းနိုင်ရေးကို အမြန်ဆုံးပြန်လည်စတင်ပေးရန် အီရန်သံအမတ်ကြီးကို တောင်းဆိုခဲ့သည်ဟု နိုင်ငံခြားရေးဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။
အီရန်သံအမတ်ကြီးကလည်း ထိုအမြင်များကို အီရန်အာဏာပိုင်များထံ တင်ပြပေးမည်ဟု ပြောဆိုခဲ့ကြောင်းလည်း သတင်းထုတ်ပြန်ချက်တွင် ဖော်ပြထားသည်။
အီရန်သည် ဟော်မုဇ်ရေလက်ကြားကို ပြန်ဖွင့်ပေးမည့် ၎င်း၏ ဆုံးဖြတ်ချက်ကို စနေနေ့တွင် ပြန်ရုပ်သိမ်းခဲ့ကာ ရေလမ်းကြောင်းကို ဖြတ်သန်းရန်ကြိုးစားသော ရေနံတင်သင်္ဘောများကို ပ-စ်ခတ်ခဲ့သည်။
အီရန်ဆိပ်ကမ်းများကို အမေရိက၏ ပိတ်ဆို့ထားမှု အသက်ဝင်နေသေးသရွေ့ ရေလက်ကြားမှတဆင့် သယ်ယူပို့ဆောင်ရေးကို ဆက်လက်ပိတ်ပင်ထားမည်ဟုလည်း သတိပေးခဲ့သည်။

ထိုင်း၌မြေကြီးမှဘက်တီးရီးယားပိုးကူးစက်‌ေ-သဆုံးသူ 23 ဦးအထိရှိလာ

ထိုင်းနိုင်ငံ၌ ဇန်နဝါရီလမှ ဧပြီလလယ်အထိ တစ်နိုင်ငံလုံးအတိုင်းအတာဖြင့် မယ်လီယိုအိုင်ဒိုးဆစ် ရောဂါကူးစက်သူ လူနာ ၇၃၂ ဦးအနက် ၂၃ ဦး အထိ‌ေ-သဆုံးပြီးနောက် မြေအဖျားရောဂါဟုလည်း လူသိများသော အဆိုပါရောဂါကို သတိထားကြရန် အစိုးရက နှိုးဆော်ထားသည်။
အဆိုပါကူးစက်ရောဂါသည်ဆက်လက်ဖြစ်ပွားနေသဖြင့် ပြည်သူ့ကျန်းမာရေးဝန်ကြီးဌာနသည် အခြေအနေကို အနီးကပ်စောင့်ကြည့်နေကြောင်း အစိုးရလက်ထောက်ပြောခွင့်ရအမျိုးသမီး Lalida Periswiwatana က စနေနေ့တွင် ပြောကြားခဲ့သည်။
အဆိုပါရောဂါသည် မြေကြီးနှင့်ရေတွင်တွေ့ရလေ့ရှိသော Burkholderia pseudomallei ဘက်တီးရီးယားကြောင့်ဖြစ်ပွားရခြင်းဖြစ်သည်။ ဒ-ဏ်ရာများမှတဆင့်လည်းကောင်း၊ ညစ်ညမ်းသော ဖုန်မှုန့်များကို ရှူရှိုက်ခြင်း သို့မဟုတ် ညစ်ညမ်းသောရေကို သောက်သုံးခြင်းဖြင့်လည်းကောင်း ရောဂါပိုးသည် ခန္ဓာကိုယ်ထဲသို့ ဝင်ရောက်သည်။ အရှေ့မြောက်ပိုင်းမှာ ရောဂါသည် အဖျားအ ကြီးဆုံးဖြစ်သည်။
Khon Kaen ၊ Maha Sarakham ၊ Roi Et နှင့် Kalasin ခရိုင်များတွင် ယခုနှစ်အတွင်း ရောပါ ဖြစ်ပွားမှု ၆၈ မှုရှိပြီး ‌ေ-သဆုံးသူ ၂ ဦးရှိကြောင်း ရောဂါထိန်းချုပ်ရေးဦးစီးဌာနရုံးက သတင်းထုတ်ပြန်ထားပြီး အသက် ၅၀ နှင့်အထက် လူများတွင် ဖြစ်ပွားမှုအများဆုံးဖြစ်ကြောင်း မစ္စလာလီဒါက ပြောသည်။
ရောဂါလက္ခဏာများမှာ အဖျားကြီးခြင်း၊ အသက်ရှူရခက်ခဲခြင်း၊ ရင်ကျပ်ခြင်းနှင့် ရောင်ရမ်းခြင်း သို့မဟုတ် ပိုးဝင်သောဒ-ဏ်ရာများ စသည့် လက္ခဏာများ ဖြစ်သည်။ ဘက်တီးရီးယားပိုးများသည် သွေးကြောထဲသို့ ဝင်ရောက်သွားပါက ပြင်းထန်စွာ ‌ေ-သဆုံးနိုင်သည်။
ရောဂါလက္ခဏာများကို လျစ်လျူမရှုခြင်းနှင့် စောစီးစွာဆေးကုသမှုခံယူခြင်းသည် ပြင်းထန်သောနောက်ဆက်တွဲ ပြဿနာများကို ကာကွယ်ရန် မရှိမဖြစ်လိုအပ်ကြောင်း ပြောရေးဆိုခွင့်ရှိသူက အများပြည်သူတို့ကို သတိပေးခဲ့သည်။
တောင်သူလယ်သမားများ၊ စိုက်ပျိုးရေးလုပ်သားများနှင့် မြေဆီလွှာနှင့် ရေကို မကြာခဏ ထိတွေ့နေရသူများအပြင် ဆီးချို၊ ကျောက်ကပ်ရောဂါ၊ သာလာဆီးမီးယား သို့မဟုတ် ခုခံအားစနစ်များ အားနည်းနေသူများသူ ကူးစက်လွယ်သောအုပ်စုတွင် ပါဝင်သည်။
မြေကြီး သို့မဟုတ် ရေနှင့် ထိတွေ့နေရသူများသည် လည်ရှည် ဘွတ်ဖိနပ်နှင့် လက်အိတ်ကဲ့သို့သော အကာအကွယ်ပစ္စည်းများကို ဝတ်ဆင်သင့်သည်ဟု မစ္စလာလီဒါက ပြောကြားခဲ့သည်။

အနာဂတ်စီးပွားရေးဆက်ဆံရေးအတွက် အမေရိကနှင့် စကားပြောဖို့ အချိန်ကျပြီ--လက်ဗရော့ဗ်

ရုရှားနှင့် အနာဂတ်စီးပွားရေးဆက်ဆံရေးကို ဝါရှင်တန်ဘက်က မည်သို့အမြင်သဘောထားရှိသည်နှင့်ပတ်သက်၍ အမေရိကနှင့် ဆွေးနွေးရန် အချိန်ကျရောက်ပြီဟု တုကီ‌ယေးနိုင်ငံ အန်တာလီယာမြို့တွင် ကျင်းပသော ထိပ်သီးအစည်းအဝေးတွင် ရုရှားနိုင်ငံခြားရေးဝန်ကြီး ဆာဂေးလက်ဗရော့ဗ်က ပြောကြားခဲ့သည်။ သို့ရာတွင် နှစ်နိုင်ငံအကြားကွဲလွဲမှုများရှိနေဆဲဖြစ်ကြောင်း ၎င်းက ပြောကြားခဲ့သည်။
နေတိုးသည် အကောင်းဆုံးအခြေအနေတွင် ရှိမနေသော်လည်း ရုရှားသည် မဟာမိတ်အဖွဲ့၏ အတွင်းရေးကို ဝင်ရောက်စွက်ဖက်မည်မဟုတ်ကြောင်းကိုလည်း လက်ဗရော့ဗ်က ပြော ကြားခဲ့သည်။
ရုရှားသည် အမေရိကန်သမ္မတ ဒေါ်နယ်ထရမ့်ပ်၏ အစိုးရနှင့် သံတမန်ဆက်ဆံရေးပြေလည်စေရန် ၎င်း၏အဓိကအစိတ်အပိုင်းတစ်ခုအဖြစ် အမေရိကနှင့် စီးပွားရေးပူးပေါင်းဆောင်ရွက်မှုကို ပြန်လည်စတင်ခဲ့သည်။

ရုရှားရေနံဝယ်ယူလိုသည့် နိုင်ငံများတွင် မလေးရှားလည်း ပါဝင်လာ

အီရန်နှင့် အမေရိက-အစ္စရေး ပဋိပက္ခကြောင့် စွမ်းအင်အကျပ်အတည်းများကြုံနေရချိန်တွင် ရုရှားထံမှ ရေနံရရှိရန် ကြိုးပမ်းနေသော အရှေ့တောင်အာရှနိုင်ငံများစာရင်းတွင် မလေးရှားနိုင်ငံလည်း ပါဝင်လာခဲ့သည်။
မလေးရှားနိုင်ငံပိုင်ရေနံကုမ္ပဏီ ပက်ထရိုနာ့စ်သည် ပြည်တွင်းသုံးစွဲမှုအတွက် လုံလောက်စွာဖြည့်ဆည်းပေးနိုင်စေရန်နှင့် ရေနံဝယ်ယူရန် ရုရှားနှင့် ညှိနှိုင်းရန်အသင့်ဖြစ်နေကြောင်း ဝန်ကြီးချုပ် အန်ဝါအီဘရာဟင်က စနေနေ့တွင် ပြောကြားခဲ့သည်ဟု သယ်စတား သတင်းစာက ဖော်ပြခဲ့သည်။
ယခင်က ရုရှားကို ပိတ်ဆို့အရေးယူခဲ့သော ဥရောပနှင့် အမေရိကနိုင်ငံများစွာသည်ပင် ယခုအခါ ရုရှားရေနံကို ဝယ်ယူနိုင်ရေး ယှဉ်ပြိုင်နေကြကြောင်း အန်ဝါက ထောက်ပြခဲ့သည်။
"ကံကောင်းထောက်မစွာပဲ ရုရှားနဲ့ ကျွန်တော်တို့ရဲ့ ဆက်ဆံရေးက ကောင်းမွန်နေဆဲဖြစ်ပါတယ်။ ဒါကြောင့် ပက်ထရိုနာ့စ်အဖွဲ့က သူတို့နဲ့ ညှိနှိုင်းလို့ရပါတယ်" ဟု မလေးဘာသာသုံး နေ့စဉ်ထုတ်သတင်းစာ Sinar Harian ကို ၎င်းက ပြောခဲ့ကြောင်း ဖော်ပြခဲ့သည်။
ယခင်ကထွက်ပေါ်ထားခဲ့သော သတင်းများအရ အရှေ့တောင်အာရှနိုင်ငံများစွာသည်လည်း ရုရှားရေနံကို ဝယ်ယူရန် ဆက်သွယ်ခဲ့ကြသည် သို့မဟုတ် သဘောတူညီချက်များ ရရှိခဲ့ကြသည်ဟု သိရသည်။
သောကြာနေ့အစောပိုင်းတွင် အီရန်သည် ဟော်မုဇ်ရေလက်ကြားကို ယာယီပြန်လည်ဖွင့်လှစ်မည်ဟု ကြေညာခဲ့သည်။ သို့သော် စနေနေ့တွင် တေရန်က ယင်းသဘောထားကို ပြောင်းပြန်လှန်ခဲ့ပြီး ရေလက်ကြားကို ပြန်လည်ထိန်းချုပ်ရန် ထပ်မံပိတ်ပစ်ခဲ့သောကြောင့် စစ်ပွဲတွင် မရေရာမှုများ ထပ်မံဖြစ်ပေါ်စေခဲ့သည်။
အပ-စ်အခတ်ရပ်စဲရေးကို ချိုးဖေ-ာက်၍ အီရန်ဆိပ်ကမ်းများကို အမေရိက,က ဆက်လက်ပိတ်ဆို့ထားခြင်းကို တုန့်ပြန်နေကြောင်း အီရန်က ပြောကြားခဲ့ပြီး အီရန်ရေတပ်သည် ရန်သူများအကြီးအကျယ် ရှုံးနိမ့်စေရန် အသင့်ရှိနေကြောင်း အီရန်၏ အမြင့်ဆုံးခေါင်းဆောင် မိုဂျ်တာဘာ ခါမေနီက ပြောကြားခဲ့သည်။
အစိုးရ၏ အစောပိုင်း သံတမန်ရေးကြိုးပမ်းမှုများကြောင့် မကြာသေးခင် ရက်သတ္တပတ်များအတွင်း ဟော်မုဇ်ရေလက်ကြားရှိ အရေးကြီးသောလမ်းကြောင်းကို ပထမဆုံး ဖြတ်သန်းနိုင်ခဲ့သည့်သင်္ဘောများတွင် မလေးရှားရေနံတင်သင်္ဘောများ ပါဝင်ခဲ့ကြောင်း စနေနေ့တွင် အန်ဝါက ပြောကြားခဲ့သည်။