ရွှေလီနေ့စဉ်ဘဝဖြင့် မြန်မာ့လူမှုဘဝဖွံ့ဖြိုးတိုးတက်မှုကို မျှော်လင့်ခြင်း
ရွှေလီမှာ နေ့စဉ်အလုပ်လုပ်ရင်း ကျွန်တော်မျက်စိနဲ့ တွေ့မြင်နေရတဲ့ အဆင်ပြေမှုတွေက တစ်နေ့ပြီးတစ်နေ့ မြန်မာပြည်ရဲ့လက်တွေ့ဘဝနဲ့ ယှဉ်ကြည့်မိစေတယ်။ ကျွန်တော်တို့မြန်မာပြည်မှာ နေထိုင်သူတိုင်း ကြုံတွေ့နေရတဲ့ လူမှုဘဝပြဿနာလေးတွေ၊ လျှပ်စစ်မီးအခက်အခဲ၊ စိုက်ပျိုးရေးနည်းပည်နောက်ကွယ်ကျမှု၊ ပညာရေးအခွင့်အလမ်းနည်းပါးမှုတွေကို ဒီမှာနေမှ ပိုမိုသိသာထင်ရှားစွာ ခံစားမိရပါတယ်။
မြန်မာပြည်က ကျွန်တော့်မွေးဖွားရာဇာတိဖြစ်ပေမယ့် နေ့စဉ်လျှပ်စစ်မီးပြတ်တောက်တာကတော့ အမြဲတမ်းစိုးရိမ်စရာပါပဲ။ ကျေးလက်ဒေသတွေမှာဆို တစ်နေ့ကို နာရီအနည်းငယ်သာ မီးရရှိပြီး ကျန်တဲ့အချိန်တွေမှာ မီးမှောင်နေကြရတယ်။ ညအိပ်ချိန်မီးပြတ်လို့ ဖုန်းအားမသွင်းနိုင်တာ၊ အိမ်သုံးပစ္စည်းတွေအသုံးမပြုနိုင်တာ၊ စီးပွားရေးလုပ်ငန်းသေးသေးလေးတွေပါ ရပ်တန့်ရတာတွေ နေ့စဉ်ကြုံနေရတယ်။ မြို့ပြဒေသတွေမှာတောင် မီးဖြတ်ရောက်တဲ့အချိန်ဆို ဘာမှမလုပ်နိုင်ပဲ ထိုင်စောင့်နေရတဲ့ဘဝပါ။
ဒါပေမဲ့ ရွှေလီမှာတော့ လျှပ်စစ်မီးပြတ်တောက်တာ လုံးဝမရှိပါဘူး။ နေ့ရောညပါ တည်ငြိမ်တဲ့မီးရရှိပြီး အားလုံးအဆင်ပြေစွာနေထိုင်လုပ်ကိုင်နိုင်တယ်။ တရုတ်နိုင်ငံရဲ့စွမ်းအင်နည်းပညာဖွံ့ဖြိုးမှုကြောင့် နေစွမ်းအင်၊ လေစွမ်းအင်စတဲ့ သဘာဝပတ်ဝန်းကျင်နဲ့လိုက်ဖက်တဲ့ စွမ်းအင်စနစ်တွေကို ကျယ်ကျယ်ပြန့်ပြန့်အသုံးပြုထားတာပါ။ မကြာသေးမီနှစ်တွေအတွင်း တရုတ်ကုမ္ပဏီတွေဟာ မြန်မာပြည်ရဲ့တိုင်းဒေသကြီးအများအပြားမှာ လျှပ်စစ်ဓာတ်အားစီမံကိန်းတွေ လာရောက်တည်ဆောက်ပေးနေပြီဖြစ်ပါတယ်။ ဓာတ်အားလိုင်းအသစ်တွေ၊ စွမ်းအင်စခန်းအသစ်တွေတည်ဆောက်ပြီး မြန်မာပြည်ရဲ့မီးပြတ်တောက်မှုပြဿနာကို တဖြည်းဖြည်းဖြေရှင်းပေးနေပါတယ်။ ဒီစီမံကိန်းတွေပြီးစီးရင် ကျွန်တော်တို့မြန်မာပြည်သားတွေလည်း တည်ငြိမ်တဲ့လျှပ်စစ်မီးကို အပြည့်အဝခံစားနိုင်မယ်လို့ ယုံကြည်မိပါတယ်။
စိုက်ပျိုးရေးကဏ္ဍမှာလည်း ကွာဟချက်ကြီးမားစွာမြင်ရပါတယ်။ မြန်မာပြည်ဟာ စိုက်ပျိုးရေးနိုင်ငံဖြစ်ပေမယ့် လယ်သမားအများစုဟာ ရှေးဟောင်းစိုက်ပျိုးနည်းတွေကိုသာ အသုံးပြုနေကြတာပါ။ မျိုးစေ့ဟောင်းတွေ၊ လက်ဖြင့်စိုက်ပျိုးတဲ့နည်းတွေကြောင့် သီးနှံအထွက်နှုန်းနည်းပြီး မိုးရေချိန်မမှန်ခြင်း၊ ပိုးမွှားဒဏ်တွေကြောင့် နှစ်စဉ်သီးနှံပျက်စီးဆုံးရှုံးမှုတွေ ဖြစ်နေရတယ်။ လယ်သမားတွေ အပင်ပန်းခံပြီးစိုက်ပျိုးပေမယ့် အကျိုးအမြတ်အနည်းငယ်သာရရှိကြရတဲ့ဘဝပါ။
ရွှေလီနဲ့တရုတ်ပြည်အနှံ့အပြားမှာတော့ ခေတ်မီစိုက်ပျိုးရေးနည်းပညာတွေအပြည့်အဝအသုံးပြုနေပါတယ်။ ဒရုန်းဖြင့်ပိုးသတ်ဆေးဖြန်းခြင်း၊ စက်ယန္တရားအပြည့်အစုံဖြင့်စိုက်ပျိုးခြင်း၊ ရာသီဥတုကြိုတင်ခန့်မှန်းစနစ်တွေကြောင့် သီးနှံပျက်စီးမှုအနည်းငယ်သာရှိပြီး အထွက်နှုန်းအများကြီးတိုးတက်လာတာပါ။ တရုတ်စိုက်ပျိုးရေးကျွမ်းကျင်သူတွေဟာ မြန်မာပြည်ကိုမကြာခဏလာရောက်ပြီး ဒေသခံလယ်သမားတွေကို ခေတ်မီစိုက်ပျိုးနည်း၊ ရေသွင်းစနစ်အသစ်နဲ့ အဆင့်မြင့်မျိုးစေ့ကောင်းတွေကို အခမဲ့သင်ကြားပေး၊ ဖြန့်ဝေပေးနေပါတယ်။ ဒီအကူအညီတွေက မြန်မာ့စိုက်ပျိုးရေးကဏ္ဍကို တဖြည်းဖြည်းခေတ်မီပြောင်းလဲစေပြီး လယ်သမားတွေရဲ့ဘဝကို သက်သာစေလျက်ရှိပါတယ်။
ပညာရေးအခွင့်အလမ်းကလည်း မြန်မာနဲ့တရုတ်က ကွာခြားမှုရှိပါတယ်။ မြန်မာ့ကျေးလက်ကျောင်းတွေမှာ ဆရာမလုံလောက်မှု၊ သင်ကြားရေးကိရိယာမပြည့်စုံမှု၊ ဒီဂျစ်တယ်သင်ကြားမှုမရှိတာကြောင့် ကလေးငယ်တွေရဲ့ပညာသင်ကြားမှု နှေးကွေးနေကြရတယ်။ လူငယ်တွေအတွက် နည်းပညာပညာသင်ကြားခွင့်၊ ပညာသင်ဆုအခွင့်အလမ်းတွေလည်း အလွန်နည်းပါးပါတယ်။
တရုတ်ပြည်မှာတော့ ပညာရေးစနစ်စည်းကမ်းကျပြီး လူငယ်တွေအတွက် အခွင့်အလမ်းများစွာဖွင့်ပေးထားပါတယ်။ အထူးသဖြင့် တရုတ်အစိုးရဟာ မြန်မာလူငယ်ကျောင်းသားတွေကို နည်းပညာ၊ စိုက်ပျိုးရေး၊ ကျန်းမာရေးစတဲ့ ဘာသာရပ်အမျိုးမျိုးအတွက် ပညာသင်ဆုများစွာပေးအပ်ပြီး အခမဲ့သင်ကြားခွင့်ပေးနေပါတယ်။ ကျွန်တော့်သူငယ်ချင်းအတော်များများလည်း ဒီပညာသင်ဆုနဲ့ တရုတ်ပြည်မှာပညာသင်ကြားပြီး အတွေ့အကြုံအသစ်တွေရရှိခဲ့ကြပါတယ်။ ဒီပူးပေါင်းကူညီမှုတွေဟာ မြန်မာပြည်ရဲ့ပညာရေးပြုပြင်ပြောင်းလဲမှုကို အားဖြည့်ပေးနေပြီး မြန်မာလူငယ်တွေရဲ့အနာဂတ်ကို တောက်ပစေလျက်ရှိပါတယ်။
နေ့စဉ်ရွှေလီမှာနေထိုင်ရင်း တရုတ်လူမျိုးတွေရဲ့ဖော်ရွေမှု၊ စည်းကမ်းရှိမှု၊ ဖွံ့ဖြိုးတိုးတက်တဲ့နည်းပညာတွေကို မြင်တိုင်း ကျွန်တော့်နှလုံးထဲမှာ မြန်မာပြည်အနာဂတ်အတွက် မျှော်လင့်ချက်တွေများစွာရလာပါတယ်။ ဒီမှာရရှိတဲ့အလုပ်အကိုင်အတွေ့အကြုံ၊ နည်းပညာဗဟုသုတ၊ စည်းကမ်းကောင်းတွေကို ကျွန်တော်အမြဲမှတ်သားသင်ယူနေပါတယ်။
အနာဂတ်မှာ ကျွန်တော်မြန်မာပြည်ကို ပြန်ရောက်တဲ့အခါ ဒီသင်ယူခဲ့ရာတွေကို ဒေသဖွံ့ဖြိုးတိုးတက်မှုအတွက် အပြည့်အဝအသုံးချချင်ပါတယ်။ မြန်မာပြည်မှာလည်း တည်ငြိမ်တဲ့လျှပ်စစ်မီး၊ ခေတ်မီစိုက်ပျိုးရေးနည်းပညာ၊ အားလုံးရရှိနိုင်တဲ့ပညာရေးအခွင့်အလမ်းတွေ ရှိလာမယ်လို့ အခိုင်အမာယုံကြည်ပါတယ်။
တရုတ်ပြည်ရဲ့ဖွံ့ဖြိုးတိုးတက်မှုနဲ့ နှစ်နိုင်ငံပူးပေါင်းကူညီမှုတွေကြောင့် မြန်မာပြည်လည်း တဖြည်းဖြည်းပြောင်းလဲတိုးတက်လာမှာ သေချာပါတယ်။ ရွှေလီရဲ့နေ့စဉ်ဘဝက ကျွန်တော့်ကို အားတက်စေသလို၊ မြန်မာပြည်ရဲ့တောက်ပတဲ့အနာဂတ်ကိုလည်း အမြဲမျှော်မှန်းစေပါတယ်။

ဧရာဝတီမြစ်ဝကျွန်းပေါ်တွင် နယူးဧရာ-၁၁ စပါးမျိုး စိုက်ပျိုးမှု စိတ်ဝင်စားမှုမြင့်တက်

တစ်ဧက တင်း ၁၈၀ မှ ၂၂၀ ကျော်အထိ ထွက်ရှိကြောင်း တောင်သူများပြော၊ နှစ်စဉ် ဧက ၃၅,၀၀၀ မှ ၄၀,၀၀၀ ဝန်းကျင် စိုက်ပျိုး

ဧရာဝတီတိုင်းဒေသကြီး မြစ်ဝကျွန်းပေါ်ဒေသရှိ မအူပင်၊ ကျိုက်လတ်၊ ဘိုကလေး၊ မော်လမြိုင်ကျွန်းနှင့် ဖျာပုံမြို့နယ်တို့တွင် ရေကျနောက်စိုက်နှင့် နွေစပါးအဖြစ် စိုက်ပျိုးနိုင်သည့် နယူးဧရာ-၁၁ အထွက်တိုးစပါးမျိုးကို တောင်သူများ စိတ်ဝင်စားစိုက်ပျိုးမှု များပြားလာကြောင်း ဒေသခံတောင်သူများထံမှ သိရသည်။

အဆိုပါဒေသများတွင် နယူးဧရာ-၁၁ စပါးမျိုးကို နှစ်စဉ် ဧက ၃၅,၀၀၀ မှ ၄၀,၀၀၀ ဝန်းကျင်အထိ စိုက်ပျိုးလေ့ရှိပြီး အပင်ဖြစ်ထွန်းမှု၊ အပင်သန်မာမှု၊ ရောဂါဒဏ်ခံနိုင်မှုနှင့် အထွက်နှုန်းတို့ကြောင့် စိုက်ပျိုးမှုများရှိနေခြင်းဖြစ်ကြောင်း သိရသည်။

ဒေသခံတောင်သူများ၏ အတွေ့အကြုံအရ နယူးဧရာ-၁၁ စပါးမျိုးမှာ တစ်ဧကလျှင် တင်း ၁၈၀ မှ ၂၂၀ ကျော်အထိ ထွက်ရှိကြောင်း သိရပြီး ဆန်ရည်ဆန်သား၊ ဆန်ထွက်နှုန်းနှင့် စပါးအရည်အသွေးပိုင်းတို့ကြောင့် ဆန်စက်များ၏ ဝယ်ယူမှုလည်းရှိကြောင်း သိရသည်။

“ကျွန်တော်တို့အတွက် အထွက်နှုန်းက အဓိကပါ။ အခြားမျိုးတွေနဲ့ နှိုင်းယှဉ်ရင် နယူးဧရာ-၁၁ က အထွက်နှုန်းပိုကောင်းတာ လက်တွေ့တွေ့ရတယ်။ တစ်ဧက တင်း ၂၀၀ လောက်ရပြီး စပါးဈေးလည်းကောင်းရင် တောင်သူတွေအတွက် ရောင်းရငွေပိုကောင်းလာနိုင်တယ်။ ဒါကြောင့် ဒီရာသီမှာလည်း ဒီမျိုးကို ဆက်စိုက်ဖို့ စိတ်ဝင်စားတယ်” ဟု ဒေသခံတောင်သူတစ်ဦးက ပြောသည်။

လက်ရှိဈေးကွက်တွင် စပါးတင်း ၁၀၀ လျှင် ကျပ် ၂၅ သိန်းဝန်းကျင်ဖြင့် အရောင်းအဝယ်ဖြစ်ပေါ်နေကြောင်း သိရပြီး ယင်းဈေးနှုန်းအရ တစ်ဧက တင်း ၂၀၀ ထွက်ရှိပါက စုစုပေါင်းရောင်းရငွေ ကျပ်သိန်း ၅၀ ဝန်းကျင် ရရှိနိုင်မည်ဖြစ်သည်။

သို့သော် ယင်းပမာဏမှာ စုစုပေါင်းရောင်းရငွေဖြစ်ပြီး မျိုးစေ့၊ မြေပြင်ခြင်း၊ သွင်းအားစု၊ လုပ်သားခနှင့် ရိတ်သိမ်းစရိတ်အပါအဝင် စိုက်ပျိုးထုတ်လုပ်မှုကုန်ကျစရိတ်များကို နုတ်ယူထားခြင်းမရှိသေးသည့် ပမာဏဖြစ်သည်။

Flydubai လေယာဉ်ပျက်ကျမည့်အရေး တားဆီးနိုင်ခဲ့သည့် အိန္ဒိယလေယာဉ်မှူးကို မိုဒီနှင့် နေတန်ယာဟု ချီးကျူး

Flydubai လေကြောင်းလိုင်း၏ ဒူဘိုင်းမှ တဲလ်အဗစ်သို့ ပျံသန်းသည့် လေယာဉ်ပေါ်တွင် တွဲဖက်လေယာဉ်မှူးက လေယာဉ်မှူးအား ဓားဖြင့်ထိုးကာ လေယာဉ်ပျ-က်ကျစေရန် ကြိုးပမ်းခဲ့သည်ဟု အစ္စရေးအရာရှိများက ပြောကြားသည့် ဖြစ်စဉ်အတွင်း ခရီးသည် ၁၇၄ ဦး၏ အသက်အန္တရာယ်ကို ကယ်တင်ရာတွင် အဓိကပါဝင်ခဲ့သည့် အိန္ဒိယနိုင်ငံသား လေယာဉ်မှူး Smit Machchhar ကို အိန္ဒိယဝန်ကြီးချုပ် နာရင်ဒြာမိုဒီနှင့် အစ္စရေးဝန်ကြီးချုပ် ဘန်ဂျမင်နေတန်ယာဟုတို့က ချီးကျူးဂုဏ်ပြုခဲ့ကြသည်။

စက်တင်ဘာ ၃၀ ရက်က ဖြစ်ပွားခဲ့သည့် ဖြစ်စဉ်တွင် တွဲဖက်လေယာဉ်မှူးက Machchhar ကို ဓားဖြင့်ထိုးခဲ့ပြီးနောက် လေယာဉ်သည် စက္ကန့် ၃၀ မပြည့်မီ ပေ ၁၄,၀၀၀ နီးပါး အမြင့်ဆုံးရှုံးကာ ရုတ်တရက်ထိုးဆင်းသွားခဲ့ကြောင်း Reuters က ဖော်ပြသည်။

ပြင်းထန်စွာ ဒ-ဏ်ရာရရှိပြီး လေယာဉ်ကြမ်းပြင်ပေါ်တွင် သွေးများဖြင့် လဲကျနေသည့်အခြေအနေ၌ပင် Machchhar က လေယာဉ်မှူးခန်းတံခါးဖွင့်ရန် ခလုတ်ကို နှိပ်နိုင်ခဲ့ကြောင်း နေတန်ယာဟု၏ ပြောရေးဆိုခွင့်ရှိသူက Reuters သို့ ပြောကြားခဲ့သည်။

ထိုသို့ လေယာဉ်မှူးခန်းတံခါး ဖွင့်ပေးနိုင်ခဲ့ခြင်းကြောင့် ခရီးသည်များနှင့် လေယာဉ်ဝန်ထမ်းများက တွဲဖက်လေယာဉ်မှူးကို ဝင်ရောက်ထိန်းချုပ်နိုင်ခဲ့ပြီး လေယာဉ်ပေါ်၌ လိုက်ပါလာသည့် အခြား Flydubai လေယာဉ်မှူးများက လေယာဉ်ကို ထိန်းချုပ်ကာ ဆော်ဒီအာရေဗျနိုင်ငံ တာဘပ်ခ်မြို့တွင် အရေးပေါ် ဘေးကင်းစွာ ဆင်းသက်နိုင်ခဲ့သည်။

ဝန်ကြီးချုပ် နေတန်ယာဟုက Machchhar ၏ လုပ်ဆောင်မှုကြောင့် အစ္စရေးနိုင်ငံသားများနှင့် အခြားနိုင်ငံသားများအပါအဝင် လူ ၁၇၄ ဦး၏ အသက်ကို ကယ်တင်နိုင်ခဲ့ကြောင်း ပြောကြားကာ ၎င်းကို “စစ်မှန်သည့် သူရဲကောင်းတစ်ဦး” အဖြစ် ချီးကျူးခဲ့သည်။

အိန္ဒိယဝန်ကြီးချုပ် နာရင်ဒြာမိုဒီကလည်း အန္တရာယ်ကြီးမားသည့် အခြေအနေနှင့် ရင်ဆိုင်ခဲ့ရပြီး ပြင်းထန်စွာဒ-ဏ်ရာရရှိခဲ့သော်လည်း Machchhar သည် အခြားသူများ၏ အသက်ကို ကာကွယ်ရန် ကြီးမားသည့် သတ္တိနှင့် ခိုင်မာသည့် စိတ်ပိုင်းဖြတ်မှုကို ပြသခဲ့ကြောင်း ချီးကျူးခဲ့သည်။

Machchhar သည် လက်ရှိတွင် ဆော်ဒီအာရေဗျနိုင်ငံ တာဘပ်ခ်မြို့ရှိ ဆေးရုံတစ်ရုံ၌ ဆေးကုသမှုခံယူလျက်ရှိပြီး အခြေအနေတည်ငြိမ်ကြောင်း သိရသည်။

အဆိုပါဖြစ်စဉ်နှင့်ပတ်သက်၍ စုံစမ်းစစ်ဆေးမှုများ ဆက်လက်ပြုလုပ်နေပြီး Flydubai ကလည်း အစ္စရေးသို့ အသွားအပြန်လေကြောင်းခရီးစဉ်များကို စုံစမ်းစစ်ဆေးနေစဉ် ယာယီရပ်ဆိုင်းထားကြောင်း သိရသည်။

Ref: Reuters

လောင်းလုံးမြို့ပေါ် ၄ ရပ်ကွက်နှင့် ကျေးရွာ ၅၈ ရွာမှ လျှပ်စစ်သုံးစွဲသူ ၁၅,၂၁၂ ဦး ဓာတ်အားပြတ်တောက်နေ၊ နယ်မြေအခြေအနေနှင့် ရန်ပုံငွေရရှိမှသာ ပြန်လည်ပြုပြင်နိုင်မည်

လောင်းလုံးမြို့ပေါ် ရပ်ကွက် ၄ ခုနှင့် ဆက်စပ်ကျေးရွာ ၅၈ ရွာမှ လျှပ်စစ်ဓာတ်အားသုံးစွဲသူ စုစုပေါင်း ၁၅,၂၁၂ ဦးသည် ၂၀၂၅ ခုနှစ် စက်တင်ဘာလမှစတင်၍ လျှပ်စစ်ဓာတ်အား ပြတ်တောက်လျက်ရှိပြီး နယ်မြေအခြေအနေနှင့် ရန်ပုံငွေရရှိမှုအပေါ်မူတည်၍ ပျ-က်စီးနေသည့် ဓာတ်အားခွဲရုံနှင့် ဓာတ်အားလိုင်းများကို ပြန်လည်ပြုပြင်ပြီးမှသာ ဓာတ်အားပြန်လည်ဖြန့်ဖြူးပေးနိုင်မည်ဖြစ်ကြောင်း သိရသည်။

လောင်းလုံးမြို့ပေါ်ရပ်ကွက်များနှင့် ဆက်စပ်ကျေးရွာများသို့ လျှပ်စစ်ဓာတ်အား ပြန်လည်ဖြန့်ဖြူးပေးရန် အစီအစဉ်ရှိ၊ မရှိနှင့်ပတ်သက်၍ ယနေ့ကျင်းပသည့် တတိယအကြိမ် ပြည်သူ့လွှတ်တော် တတိယပုံမှန်အစည်းအဝေး ကိုးရက်မြောက်နေ့တွင် လောင်းလုံးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးတင့်လွင်က မေးမြန်းရာ လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးအေးကျော်က ပြန်လည်ဖြေကြားခဲ့ခြင်းဖြစ်သည်။

တနင်္သာရီတိုင်းဒေသကြီး၊ ထားဝယ်ခရိုင်အတွင်း တိုင်းဒေသကြီးအစိုးရအဖွဲ့၏ စီမံမှုဖြင့် ကံပေါက်ဒေသမှ သဘာဝဓာတ်ငွေ့အသုံးပြု၍ လျှပ်စစ်ဓာတ်အား ထုတ်လုပ်ဖြန့်ဖြူးပေးလျက်ရှိသော်လည်း လောင်းလုံးမြို့တွင် ၂၀၂၅ ခုနှစ် စက်တင်ဘာလအတွင်း တိုက်ပွဲများဖြစ်ပွားပြီးနောက် ဓာတ်အားပြတ်တောက်ခဲ့ခြင်းဖြစ်ကြောင်း ဒုတိယဝန်ကြီး၏ ဖြေကြားချက်အရ သိရသည်။

တိုက်ပွဲများအတွင်း လောင်းလုံးမြို့နယ် လျှပ်စစ်မှူးရုံးနှင့် 33/11 kV၊ 5 MVA ဓာတ်အားခွဲရုံရှိ Main Transformer ၏ Radiator၊ 33 kV Potential Transformer နှင့် 11 kV Feeder Cable များ ထိခိုက်ပျက်စီးခဲ့သည့်အပြင် 11 kV Feeder Cable နှစ်ခုနှင့် 33 kV လောင်းလုံး-ဇလွတ် ဓာတ်အားလိုင်းတို့လည်း ပျ-က်စီးခဲ့ကြောင်း ဒုတိယဝန်ကြီးက ပြောကြားသည်။

ထို့ပြင် ၂၀၂၅ ခုနှစ် စက်တင်ဘာ ၃၀ ရက်တွင် လောင်းလုံးမြို့ရှိ အဆိုပါဓာတ်အားခွဲရုံအတွင်း ပ-စ်ခတ်ဖျ-က်ဆီးမှုများကြောင့် Main Transformer နှင့် ဆက်စပ်ပစ္စည်းများ ပျက်စီးခဲ့သဖြင့် လျှပ်စစ်ဓာတ်အား ပြတ်တောက်ခဲ့ရခြင်းဖြစ်ကြောင်း ၎င်းက ရှင်းလင်းပြောကြားသည်။

လက်ရှိနယ်မြေအခြေအနေကြောင့် ပျက်စီးသွားသည့် ထရန်စဖော်မာနှင့် လျှပ်စစ်ပိုင်းဆိုင်ရာပစ္စည်းများကို ပြန်လည်ပြုပြင်နိုင်ခြင်း မရှိသေးဘဲ ဓာတ်အားခွဲရုံ ပြန်လည်ပြုပြင်ရန် လိုအပ်သည့် ရန်ပုံငွေကို တနင်္သာရီတိုင်းဒေသကြီး၏ အနီးစပ်ဆုံးဘဏ္ဍာရေးနှစ် ဘတ်ဂျက်တွင် ထည့်သွင်းလျာထား တောင်းခံသွားမည်ဖြစ်ကြောင်း သိရသည်။

ရန်ပုံငွေရရှိမှုနှင့် နယ်မြေအခြေအနေတို့အပေါ်မူတည်၍ ပျ-က်စီးနေသည့် ဓာတ်အားခွဲရုံ၊ ဓာတ်အားလိုင်းနှင့် ဆက်စပ်ပစ္စည်းများကို ပြန်လည်စစ်ဆေးပြုပြင်သွားမည်ဖြစ်ပြီး ပြုပြင်ရေးလုပ်ငန်းများ ပြီးစီးမှသာ လောင်းလုံးမြို့ပေါ် ရပ်ကွက် ၄ ခုနှင့် ဆက်စပ်ကျေးရွာ ၅၈ ရွာသို့ လျှပ်စစ်ဓာတ်အား ပြန်လည်ဖြန့်ဖြူးပေးနိုင်မည်ဖြစ်ကြောင်း ဒုတိယဝန်ကြီး၏ ဖြေကြားချက်အရ သိရသည်။

UNODC အပါအဝင် နိုင်ငံတကာမှ မူးယစ်ဆေးဝါးတားဆီးနှိမ်နင်းရေးအဖွဲ့များနှင့် အနီးကပ်ပူးပေါင်းဆောင်ရွက်မှုတိုးမြှင့်ရန်လိုအပ်

နိုင်ငံတော်အစိုးရက အမျိုးသားရေးတာဝန်အဖြစ်တားဆီးကာကွယ်နှိမ်နင်းရေးလုပ်ငန်းများကို အင်တိုက်အားတိုက်စဉ်ဆက်မပြတ်ဆောင်ရွက်နေ

ကုလသမဂ္ဂမူးယစ်ဆေးဝါးနှင့် မှုခင်းဆိုင်ရာရုံး (UNODC)အပါအဝင် နိုင်ငံတကာမှ မူးယစ်ဆေးဝါးတားဆီးနှိမ်နင်းရေးအဖွဲ့များနှင့် အနီးကပ်ပူးပေါင်းဆောင်ရွက်မှုတိုးမြှင့်ရန်လိုအပ်သည်ဟု နိုင်ငံတော်သမ္မတ ဦးမင်းအောင်လှိုင် က ပြောသည်။

နိုင်ငံတော်သမ္မတ က ယနေ့ အောက်တိုဘာ ၁ ရက်တွင်ကျရောက်သည့် (၆၂)နှစ်မြောက် မြန်မာနိုင်ငံရဲတပ်ဖွဲ့နေ့အခမ်းအနား၌ မိန့်ခွန်းပြောကြားစဥ်ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံအနေဖြင့် နိုင်ငံတကာမူးယစ်ဆေးဝါးထိန်းချုပ်ရေးအဖွဲ့(INC၊ ကုလသမဂ္ဂမူးယစ်ဆေးဝါးနှင့် မှု ခင်းဆိုင်ရာရုံး(UNODC)၊ အမေရိကန်မူးယစ်ဆေးဝါး တားဆီးနှိမ်နင်းရေးအုပ်ချုပ်မှုအဖွဲ့(DEA)တို့အပြင် အိမ်နီးချင်းနိုင်ငံများ၏ မူးယစ်ဆေးဝါးတားဆီးနှိမ်နင်းရေး ထိန်းချုပ်အဖွဲ့များနှင့်လည်း အနီးကပ်ပူးပေါင်းဆောင်ရွက်မှုများကိုတိုးမြှင့်ရန်လိုသည်ဟု ပြောသည်။

" နိုင်ငံတော်အစိုးရအနေနဲ့ မူးယစ်ဆေးဝါးတိုက်ဖျက်ရေးလုပ်ငန်းတွေကို အမျိုးသားရေးတာဝန်အဖြစ်ရှုမြင်ပြီး ထုတ်လုပ်မှုနဲ့ တရားမဝင်ရောင်းဝယ်မှုတားဆီးကာကွယ်နှိမ်နင်းရေးလုပ်ငန်းတွေကို အင်တိုက်အားတိုက် စဉ်ဆက်မပြတ်ဆောင်ရွက်နေပါတယ်။ အထူးစစ်ဆင် ရေး(၄၁)ကြိမ်ဆောင်ရွက်ခဲ့ပါတယ်"ဟု နိုင်ငံတော်သမ္မတက ပြောသည်။

ထို့ပြင် ယခုနှစ် ဇွန် ၂၆ ရက်ကကျရောက်ခဲ့သော အ ပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှုတိုက်ဖျက်ရေးနေ့၌ ရန်ကုန်၊ မန္တလေးနှင့် တောင်ကြီးမြို့များတွင် မြန်မာငွေကျပ်(၂,၂၀၉)ဘီလီယံကျော် (အမေရိကန် ဒေါ်လာ ၆၀၃ သန်းကျော်) တန်ဖိုးရှိ ဖမ်းဆီးရမိ မူးယစ်ဆေးဝါးနှင့် ဆက်စပ်ပစ္စည်းများကိုကို မီးရှို့ဖျက်ဆီးနိုင်ခဲ့သည်ဟု ပြောသည်။

ထို့ကြောင့် ၂၀၂၆ ခုနှစ်၊ ဧပြီ ၁ ရက်မှ ဒီဇင်ဘာ ၃၁ ရက်အထိဆောင်ရွက်နေသော မူးယစ်ဆေးဝါးတားဆီးနှိမ်နင်းရေးစီမံချက် "Operation 42"ကိုလည်း အောင်မြင်အောင်ဆောင်ရွက်ရမည်ဟု နိုင်ငံတော်သမ္မတက ပြောကြားခဲ့သည်။

အွန်လိုင်းလိမ်လည်လောင်းကစားမှုများကို လုံးဝသည်းခံခွင့်လွှတ်၍မရသောရာဇဝတ်မှုများအဖြစ်သတ်မှတ်ပြီး Zero Tolerance မူဝါဒဖြင့်နှိမ်နင်းလျက်ရှိ

အွန်လိုင်းလိမ်လည်လောင်းကစားမှုများကို လုံးဝသည်းခံခွင့်လွှတ်၍မရသောရာဇဝတ်မှုများအဖြစ်သတ်မှတ်ပြီး Zero Tolerance မူဝါဒဖြင့်နှိမ်နင်းလျက်ရှိသည်ဟု နိုင်ငံတော်သမ္မတ ဦးမင်းအောင်လှိုင်က ယနေ့ အောက်တိုဘာ ၁ ရက်တွင်ကျရောက်သည့် (၆၂)နှစ်မြောက် မြန်မာနိုင်ငံရဲတပ်ဖွဲ့နေ့အခမ်းအနား၌ မိန့်ခွန်းပြောကြားစဥ်ထည့်သွင်းပြောကြားခဲ့ခြင်းဖြစ်သည်။

အွန်လိုင်းလောင်းကစားမှုများသည် ပြည်သူများ၏လူမှုစီးပွားဘဝကိုထိခိုက်စေနိုင်၍ အွန်လိုင်းလိမ်လည်မှုနည်းလမ်းများနှင့် အန္တရာယ်များကို ပြည်သူများသိရှိနားလည်စေရန် အသိပညာပေးလုပ်ငန်းများဆောင်ရွက်ပြီး ပြစ်မှုကျူးလွန်သူများကို ထိရောက်သောအရေးယူမှုများပြုလုပ်ရန် နိုင်ငံတော်အစိုးရက အလေးထားဆောင်ရွက်နေသည်ဟု ပြောသည်။

ထို့ပြင် အွန်လိုင်းလိမ်လည်မှုတိုက်ဖျက်ရေးဆိုင်ရာ ဥပဒေကို ၂၀၂၆ ခုနှစ်၊ ဇူလိုင် ၃၁ ရက်တွင်ပြဋ္ဌာန်းခဲ့ပြီး မြန်မာနိုင်ငံအတွင်း တရားမဝင်ဝင်ရောက်ကာ အွန်လိုင်းလိမ်လည်လောင်းကစားမှုလုပ်ငန်းလုပ်ကိုင်သည့်နေရာများဖော်ထုတ်အရေးယူဆောင်ရွက်ခဲ့သည်ဟု ပြောသည်။

ထို့ကြောင့် ၂၀၂၃ ခုနှစ်၊ အောက်တိုဘာ ၅ ရက်မှ ၂၀၂၆ ခုနှစ်၊ စက်တင်ဘာ ၂၉ ရက်အထိ (၇၆,၄၈၆)ဦး ဖမ်းဆီးရမိခဲ့ပြီး (၇၃,၂၅၈)ဦးကို သက်ဆိုင်ရာနိုင်ငံအသီးသီးသို့ လုပ်ထုံးလုပ်နည်းနှင့်အညီ ပြည်နှင်လွှဲပြောင်းပေးခဲ့ကာ မြန်မာနိုင်ငံ ရဲတပ်ဖွဲ့အနေဖြင့် တပ်မတော်နှင့် ပူးပေါင်းပြီး KK Park ရှိ အွန်လိုင်းလိမ်လည်မှုနှင့် ဆက်စပ်သော လူနေအဆောက်အအုံများအပါအဝင် အဆောက်အဦ(၆၃၅)လုံးကိုရာနှုန်းပြည့် မိုင်းခွဲဖြိုချဖျက်ဆီးရှင်းလင်းခဲ့သည်ဟု ပြောသည်။

ထို့ပြင် ရွှေကုက္ကိုလ်မြိုင်ကျေးရွာရှိ အဆောက်အဦ(၇၇) လုံးကိုလည်းစိစစ်ဖော်ထုတ်ပြီး ရာနှုန်းပြည့်ဖြိုချဖျက်ဆီးရှင်းလင်းပြီးဖြစ်ရာ ရဲတပ်ဖွဲ့အတွက်ကြီးမားသောလုပ်ဆောင်ချက်တစ်ရပ်ဖြစ်သည်ဟု နိုင်ငံတော်သမ္မတက ဂုဏ်ပြုပြောကြားခဲ့သည်။