အသင်းဟောင်းရဲ့ ဒါဘီပွဲကို သွားရောက်အားပေးခဲ့တဲ့ ဇိုလစ် သူရဲကောင်းတစ်ဦးလို ကြိဆိုခြင်းခံခဲ့ရ

အာဆင်နယ်အသင်းရဲ့ တောင်ပံကစားသမား ဇိုလစ်ဟာ အသင်းဟောင်း ကလပ်ဘရုဂေးရဲ့ ဒါဘီပွဲစဉ်ကို သွားရောက်အားပေးခဲ့ရာမှာ သူရဲကောင်းတစ်ဦးလို ကြိုဆိုခြင်းခံခဲ့ရကြောင်း သိရပါတယ်။
မနေ့က ယှဉ်ပြိုင်ကစားခဲ့တဲ့ ဘယ်လ်ဂျီယံပရိုလိဂ်ပြိုင်ပွဲမှာ ကလပ်ဘရုဂေးအသင်းက မြို့ခံပြိုင်ဘက် Cercle Brugge အသင်းနဲ့ ယှဉ်ပြိုင်ကစားခဲ့တာဖြစ်ပြီး ဇိုလစ်က ဘောလုံးကန်သွင်းပြီး ပွဲစတင်ပေးခဲ့ကြောင်းလည်း သိရပါတယ်။
ကလပ်ဘရုဂေးအသင်းရဲ့ ပရိသတ်တွေက ဇိုလစ် ကွင်းထဲဝင်ရောက်လာချိန်မှာ မတ်တပ်ရပ်ပြီး ဂုဏ်ပြုကြိုဆိုခဲ့ကြကြောင်း သိရပါတယ်။
ဂရိလက်ရွေးစင်ကစားသမား ဇိုလစ်က ကလပ်ဘရုဂေးအသင်းမှာ နှစ်ရာသီကစားခဲ့စဉ်အတွင်း (၁၀၈)ပွဲကစားကာ (၄၃)ဂိုးသွင်း၊ ဂိုးဖန်တီးမှု (၄၅)ကြိမ်ပြုလုပ်ပြီး ခြေစွမ်းပြခဲ့တာကြောင့် ပရိသတ်အချစ်တော် ကစားသမားတစ်ဦး ဖြစ်ခဲ့တာပါ။
ဇိုလစ်က ဒီနှစ် နွေရာသီအပြောင်းအရွှေ့မှာ အာဆင်နယ်အသင်းကို ပေါင်(၃၄)သန်းနဲ့ ပြောင်းရွှေ့ပြီး အင်္ဂလန်မြေမှာလည်း ခြေစွမ်းပြနိုင်တာကြောင့် အာဆင်နယ်ပရိသတ်တွေရဲ့ အားပေးမှုကိုလည်း မြန်မြန်ဆန်ဆန်ရရှိခဲ့ပါတယ်။
ဇိုလစ်က ဒီရာသီ ချန်ပီယံလိဂ်ပြိုင်ပွဲမှာ အသင်းဟောင်း ကလပ်ဘရုဂေးနဲ့ ပြန်လည်ဆုံတွေ့လိုကြောင်းလည်း ပြောကြားခဲ့ပါတယ်။

ယခုရာသီ MYANMAR League (M League) ပြိုင်ပွဲအတွက် Logo Launching၊ Official Partnership Signing Ceremony & Press Conference ပြုလုပ်

ယခုရာသီ MYANMAR League (M League) ပြိုင်ပွဲအတွက် Logo Launching၊ Official Partnership Signing Ceremony. & Press Conference ကို ယနေ့နေ့လယ် (၁) နာရီက ရန်ကုန်မြို့ရှိ နိုဗိုတယ်ရန်ကုန်မက်စ်ဟိုတယ်မှာ ပြုလုပ်ခဲ့ပါတယ်။
ဦးစွာ အာရှဘောလုံးအဖွဲ့ချုပ် (AFC) အကြီးတန်း ဒုဥက္ကဋ္ဌ၊ မြန်မာနိုင်ငံဘောလုံးအဖွဲ့ချုပ် (MFF) ဥက္ကဋ္ဌ ဦးဇော်ဇော်က အဖွင့်အမှာစကားနဲ့ စပွန်ဆာကုမ္မဏီများကို ကျေးဇူးတင်စကားပြောကြားခဲ့ပါတယ်။
ထို့နောက် ၂၀၀၉ ခုနှစ်က စတင်ခဲ့တဲ့ မြန်မာနေရှင်နယ်လိဂ်ပြိုင်ပွဲသမိုင်းကြောင်းကို ဗီဒီယိုဖြင့် ပြသခဲ့ပါတယ်။
ထို့နောက် ယခုရာသီ MYANMAR League (M League) ပြိုင်ပွဲဝင်အသင်း (၁၂) သင်းကို တစ်သင်းချင်းစီ မိတ်ဆက်ခဲ့ပါတယ်။
ထို့နောက် ယခုရာသီ MYANMAR League (M League) ပြိုင်ပွဲကို စပွန်ဆာပေးကြတဲ့ ကုမ္မဏီများနဲ့ လက်မှတ်ရေးထိုးခဲ့ကြပါတယ်။
ယခုရာသီ MYANMAR League (M League) ပြိုင်ပွဲကို Official Banking Partnership အဖြစ် AYA Bank၊ Official Payment Partnership အဖြစ် AYA Pay၊ Official Title partnership အဖြစ် Grand Royal Group
International၊ Official Broadcasting Partnership အဖြစ် Forever Group နဲ့ Official Partnership များအဖြစ် ကုမ္ပဏီ (၈) ခုတို့က ပံ့ပိုးကူညီခဲ့ကြကြောင်း သိရပါတယ်။

ဂရီးလစ်ရှ် လမ်းခွဲဖွယ်ရှိနေသေးကြောင်း မာရက်စကာ ပြောကြား

မန်စီးတီးနည်းပြ မာရက်စကာက ပြီးခဲ့တဲ့ပရီးမီးယားလိဂ်ပွဲစဉ်မှာ ဂရီးလစ်ရှ်ကို လူစားဝင်ကစားသမားအဖြစ် အသုံးပြုခဲ့ပေမဲ့ အသင်းမှာ အနာဂတ်မသေချာကြောင်းနဲ့ လမ်းခွဲဖွယ်ရှိနေသေးကြောင်း ပြောကြားခဲ့ပါတယ်။
မန်စီးတီးအသင်းက အင်္ဂလန်တိုက်စစ်ကစားသမား ဂရီးလစ်ရှ်ကို ၂၀၂၁ နွေရာသီမှာ အက်စတွန်ဗီလာကနေ ပေါင်သန်း(၁၀၀)နဲ့ ခေါ်ယူခဲ့ပေမဲ့ ၂၀၂၃-၂၄ ရာသီစကပြီး ပွဲထွက်ခွင့်ရဖို့ ရုန်းကန်လာရပါတယ်။
ပြီးခဲ့တဲ့ရာသီမှာတော့ အဲဗာတန်အသင်းဆီ အငှားချခံခဲ့ရပြီး အခု ရာသီကြိုကာလမှာမှ မန်စီးတီးအသင်းကို ပြန်ရောက်လာခဲ့တာပါ။
ဂရီးလစ်ရှ်အနေနဲ့ ၂၀၂၅ မေလတုန်းက ဘုန်းမောက်နဲ့ပွဲမှာ ပါဝင်ကစားခွင့်ရပြီးနောက်ပိုင်း မန်စီးတီးအသင်းအတွက် ပရီးမီးယားလိဂ်ပွဲစဉ်တွေမှာ ကစားခွင့်မရတော့တာကြောင့် မနေ့က ဘုန်းမောက်နဲ့ပွဲမှာ ကစားခွင့်ရခဲ့ခြင်းက ရက်ပေါင်း(၄၆၀)ကြာမှ မန်စီးတီးအသင်းနဲ့ ပထမဆုံးပရီးမီးယားလိဂ်ပွဲ ပြန်ကစားခွင့်ရခြင်းဖြစ်ကြောင်း သိရပါတယ်။
ဒါကြောင့် ဒီရာသီ မန်စီးတီးအသင်းမှာ ဂရီးလစ်ရှ် အခွင့်အရေးပြန်ရနိုင်တယ်လို့ ထင်ကြေးပေးမှုတွေ ရှိလာခဲ့ပြီး မာရက်စကာကို မေးမြန်းခဲ့ရာမှာ ''သူ ဒီမှာ ရှိနေတဲ့ နောက်ဆုံးနေ့အထိ သူ့ကို နည်းပြအဖြစ် ကိုင်တွယ်ဖို့နဲ့ သူ့ဆီက အကောင်းဆုံးခြေစွမ်းကို ရယူနိုင်အောင် ကြိုးစားဖို့က ကျွန်တော့်တာဝန်ပါ။ အပြောင်းအရွှေ့ဈေးကွက်ပိတ်ဖို့က တစ်ပတ်လိုပါသေးတယ်။ ဘာတွေဖြစ်လာမလဲဆိုတာ ကျွန်တော်တို့ စောင့်ကြည့်ရမှာပါ။ ဂျက်(ဂရီးလစ်ရှ်)တစ်ယောက်တည်းကို မဟုတ်ပါဘူး။ တခြားကစားသမားတွေကိုလည်း စောင့်ကြည့်ရမှာပါ'' လို့ မာရက်စကာက ပြောကြားခဲ့ပါတယ်။

မြန်မာနေရှင်နယ်လိဂ် (MNL) ပြိုင်ပွဲအမည်နဲ့ Logo ပြောင်းလဲကြောင်း MFF ထုတ်ပြန်

မြန်မာနိုင်ငံဘောလုံးအဖွဲ့ချုပ် (MFF) ဟာ ယခု ၂၀၂၆-၂၀၂၇ ရာသီကစပြီး မြန်မာနေရှင်နယ်လိဂ် (MNL) ပြိုင်ပွဲအမည်ကို MYANMAR League (M League) အမည်နဲ့ ပြိုင်ပွဲအမှတ်တံဆိပ် (Logo) ပြောင်းလဲလိုက်ကြောင်းကို ယနေ့မှာ တရားဝင်သတင်းထုတ်ပြန်ခဲ့ပါတယ်။
ယခုရာသီ MYANMAR League (M League) ပြိုင်ပွဲအတွက် Logo Launching၊ Official Partnership Signing Ceremony & Press Conference ကို ယနေ့နေ့လယ် (၁) နာရီက ရန်ကုန်မြို့ရှိ နိုဗိုတယ်ရန်ကုန်မက်စ်ဟိုတယ်မှာ ပြုလုပ်ခဲ့ပါတယ်။
အဲဒီအခမ်းအနားမှာ ယခင် မြန်မာနေရှင်နယ်လိဂ် (MNL) အမည်အစား MYANMAR League (M League) အဖြစ် အမည်ပြောင်းလဲလိုက်ကြောင်းနဲ့ ပြိုင်ပွဲအမှတ်တံဆိပ် (Logo) ကိုလည်း အသစ်ပြင်ဆင်ရေးဆွဲပြောင်းလဲလိုက်ကြောင်း တရားဝင်ထုတ်ပြန်ခဲ့တာဖြစ်ပါတယ်။
ဒါ့အပြင် ပြိုင်ပွဲရဲ့ ဆောင်ပုဒ်ကိုလည်း ယခင် "For The League...For The Nation" အစား ယခုအခါ "ONE Nation.... ONE League" ဆိုပြီး ပြင်ဆင်ပြောင်းလဲလိုက်ကြောင်း တရားဝင် ထုတ်ပြန်ခဲ့ပါတယ်။
ယခု ၂၀၂၆- ၂၀၂၇ ရာသီ ​M League ပြိုင်ပွဲကို အသင်း (၁၂) သင်းဖြစ်တဲ့ လက်ရှိချန်ပီယံ ရှမ်းယူနိုက်တက်၊ ရန်ကုန်ယူနိုက်တက်၊ ဧရာဝတီယူနိုက်တက်၊ ဟံသာဝတီယူနိုက်တက်၊ ရတနာပုံ၊ စစ်ကိုင်းယူနိုက်တက်၊ ဒဂုံစတားယူနိုက်တက်၊ မြဝတီ၊ သစ္စာအားမာန်၊ ရန်ကုန်စီးတီး၊ ISPE၊ ချင်းလန့်အသင်းတို့နဲ့ ကျင်းပသွားမှာ ဖြစ်ပါတယ်။
ယခု ၂၀၂၆- ၂၀၂၇ ရာသီ ​M League ပြိုင်ပွဲကို သြဂုတ် (၂၈) ရက်ကစပြီး နှစ်ကျော့စနစ်နဲ့ ကျင်းပသွားမှာ ဖြစ်ကြောင်း သိရပါတယ်။
ယခု ၂၀၂၆- ၂၀၂၇ ရာသီ ​M League ပြိုင်ပွဲကို ရှမ်းယူနိုက်တက်အသင်းက တောင်ကြီးမြို့ရှိ ပြည်နယ်အားကစားကွင်း၊ ရန်ကုန်ယူနိုက်တက်အသင်းက ရန်ကုန်မြို့ရှိ YUSC ကွင်း၊ ရတနာပုံအသင်းက မန္တလေးမြို့ရှိ ဗထူးကွင်း၊ ဧရာဝတီယူနိုက်တက်အသင်းက ပုသိမ်မြို့ရှိ ကျောက်တိုင်ကွင်း၊ ဟံသာဝတီယူနိုက်တက်အသင်းက ပဲခူးမြို့ရှိ Grand Royal ကွင်း၊ ISPE အသင်းက သန်လျင်သီဟဒီပကွင်း၊ ရန်ကုန်စီးတီးအသင်းက ရန်ကုန်မြို့ရှိ ပဒေသာကွင်းတို့ကို အိမ်ကွင်းများအဖြစ် လက်ခံကျင်းပပြုလုပ်သွားမှာ ဖြစ်ကြောင်း သိရပါတယ်။
အိမ်ကွင်း လက်ခံကျင်းပနိုင်ခြင်း မရှိတဲ့ အသင်းများအတွက် MFF က ရန်ကုန်မြို့ရှိ သုဝဏ္ဏကွင်းမှာ အိမ်ကွင်းပွဲများအဖြစ် လက်ခံကျင်းပပေးသွားမှာ ဖြစ်ကြောင်း သိရပါတယ်။

မာရာဒိုနာ ဘုရားပေးသောလက်နဲ့ သွင်းယူခဲ့တဲ့ဘောလုံးကို ဒေါ်လာ(၃.၃၅)သန်းနဲ့သာ လေလံတင်ရောင်းချနိုင်ခဲ့

အာဂျင်တီးနားဂန္ထဝင်ကစားသမား မာရာဒိုနာ ဘုရားပေးသောလက် Hand of God နဲ့ သွင်းယူခဲ့တဲ့ ဘောလုံးကို ဒေါ်လာ(၃.၃၅)သန်းနဲ့သာ လေလံတင်ရောင်းချနိုင်ခဲ့ကြောင်း သိရပါတယ်။
၁၉၈၆ ကမ္ဘာ့ဖလားပြိုင်ပွဲရဲ့ ကွာတားဖိုင်နယ်အဆင့်မှာ အာဂျင်တီးနားက အင်္ဂလန်ကို (၂-၁)ဂိုးနဲ့ အနိုင်ရခဲ့ပြီး အာဂျင်တီးနားအသင်းအတွက် နှစ်ဂိုးစလုံးကို မာရာဒိုနာက သွင်းယူခဲ့ပါတယ်။
ပထမဂိုးကို မာရာဒိုနာက လက်နဲ့ပုတ်ပြီး သွင်းယူခဲ့တာကြောင့် ဘုရားပေးသောလက် Hand of God အဖြစ် ကျော်ကြားခဲ့ပြီး ဒုတိယဂိုးကိုတော့ အင်္ဂလန်ကစားသမားအများအပြားကို ကျော်ဖြတ်သွင်းယူခဲ့ခြင်းဖြစ်တာကြောင့် ရာစုနှစ်ရဲ့ အကောင်းဆုံးဂိုး Goal of the Century အဖြစ် ဖီဖာက ရွေးချယ်ခဲ့ပါတယ်။
အဲဒီသမိုင်းဝင်ပွဲမှာ ဘောလုံးတစ်လုံးတည်းသာ အသုံးပြုခဲ့ပြီး ကွင်းလယ်ဒိုင်အဖြစ် တာဝန်ယူခဲ့တဲ့ တူနီးရှားဒိုင်လူကြီး အလီဘင်နက်ဆာက ပွဲအပြီးမှာ အမှတ်တရယူဆောင်သွားခဲ့ပါတယ်။
အလီဘင်နက်ဆာက ဆယ်စုနှစ်(၃)ခုကျော် သိမ်းဆည်းထားခဲ့ပြီးနောက် ၂၀၂၂ ခုနှစ်မှာ ဒေါ်လာ(၂.၃၇)သန်းနဲ့ လေလံတင်ရောင်းချခဲ့ပါတယ်။
ပိုင်ရှင်အသစ်က စနေနေ့က ပြုလုပ်ခဲ့တဲ့ Heritage Auctions လေလံပွဲမှာ ရောင်းချခဲ့ရာမှာ ဒေါ်လာ(၁၀)သန်း ရရှိဖို့ မျှော်လင့်ခဲ့ပေမဲ့ ဒေါ်လာ(၃.၃၅)သန်းသာ ရရှိခဲ့ခြင်းဖြစ်ကြောင်း သိရပါတယ်။

တိုက်စစ်သုံးယောက်တွဲရဲ့စွမ်းဆောင်ရည်ကို ချယ်လ်ဆီးနည်းပြ ချီးကျူး

ချယ်လ်ဆီးအသင်းနည်းပြ ရှာဘီအလွန်ဆိုက ဖူလ်ဟမ်ကို ၃-၂ ဂိုးနဲ့ အနိုင်ရတဲ့ပွဲအပြီး အသင်းတိုက်စစ်သုံးယောက်တွဲရဲ့စွမ်းဆောင်ရည်ကို ချီးကျူးခဲ့ပါတယ်။
ချယ်လ်ဆီးရဲ့တိုက်စစ်အတွဲအဖက်သစ်ဖြစ်တဲ့ ဂျော်အိုပတ်ဒရို၊ မော်ဂန်ရော်ဂျာစ်၊ ကိုးလ်ပါလ်မာတို့က အသင်းအတွက် သုံးဂိုးစလုံး သွင်းယူပေးခဲ့ပါတယ်။
ပါလ်မာနဲ့ ဂျော်အိုပတ်ဒရိုတို့ဟာ အသင်းရဲ့ဂိုးတွေမှာ တစ်ဂိုးစီလည်း ဖန်တီးခဲ့ကြပါတယ်။
အလွန်ဆိုက တိုက်စစ်ကစားသမား သုံးယောက်ဟာ ကျန်တဲ့အသင်းဖော်တွေကို လှုံ့ဆော်နိုင်စွမ်းရှိတယ်လို့လည်း မှတ်ချက်ပြုခဲ့ပါတယ်။
ဒါ့အပြင် ၎င်းက သူ့ရဲ့ပထမဆုံးပြိုင်ပွဲ ပွဲဦးထွက်မှာ အနိုင်နဲ့ စတင်နိုင်တာဟာ ကောင်းမွန်တဲ့ ပထမဆုံးခြေလှမ်းအစလို့ သုံးသပ်ခဲ့ပါတယ်။
''သူတို့ဟာ အသင်းရဲ့အလွန်အရေးပါတဲ့ အစိတ်အပိုင်းတစ်ခု ဖြစ်လာတယ်။ သူတို့နဲ့အတူ အသင်းကို တည်ဆောက်ဖို့ပေါ့။ သူတို့အနေနဲ့ တာဝန်ယူဖို့ လိုအပ်တယ်။ ပြီးတော့ ကျန်အသင်းသားတွေကို ဦးဆောင်ရမယ်။ လှုံ့ဆော်ရမယ်။
သူတို့ကောင်းကောင်းလုပ်နိုင်ရင် တခြားသူတွေလည်း ဒီလမ်းကို လိုက်လာကြလိမ့်မယ်။ ကျွန်တော်တို့အနေနဲ့ သူတို့ကို ဖြစ်နိုင်တဲ့ အကောင်းဆုံးအနေအထားရောက်ဖို့ လိုအပ်ပါတယ်။ သူတို့ ချိတ်ဆက်နိုင်ရမယ်။ သူတို့သုံးယောက်
အတွက် ကျွန်တော် ပျော်ပါတယ်။ သူတို့က အသင်းအတွက် ကစားပြီး ဂိုးတွေသွင်းခဲ့ကြတယ်။ ဒါက အရေးကြီးပါတယ်''လို့ အလွန်ဆိုက ပြောခဲ့ပါတယ်။
ချယ်လ်ဆီးတိုက်စစ်သုံးယောက်တွဲအနက် ပါလ်မာနဲ့ ဂျော်အိုပတ်ဒရိုတို့ဟာ ကမ္ဘာ့ဖလားပြိုင်ပွဲဝင် သက်ဆိုင်ရာ မိခင်နိုင်ငံအသင်းတွေဖြစ်တဲ့ အင်္ဂလန်နဲ့ ဘရာဇီးလ် လူစာရင်းတွေမှာ အံ့အားသင်ဖွင့် ရွေးချယ်မခံခဲ့ရတာဖြစ်တယ်။
အခုနွေရာသီမှာ ပေါင် ၁၁၇ သန်းနဲ့ ချယ်လ်ဆီးကို ရောက်လာတဲ့ ရော်ဂျာစ်တစ်ဦးသာ အင်္ဂလန်အသင်းမှာ ပါဝင်ခွင့်ရခဲ့ပါတယ်။
ချယ်လ်ဆီးအသင်းဟာ ၂၀၂၂-၂၃ ရာသီကတည်းက ပရီးမီးယားလိဂ် အဖွင့်ပွဲစဉ်မှာ နိုင်ပွဲပြန်ရခဲ့တာဖြစ်ပါတယ်

ဘရာဇီးလ်တောင်ပံကစားသမား အယ်လန်
အဲလီးယက်စ်နဲ့ မန်စီးတီးအသင်း သဘောတူညီမှုရရှိ

မန်စီးတီးအသင်းဟာ ဘရာဇီးလ်ကလပ် ပါလ်မီးရပ်စ်အသင်းက တောင်ပံကစားသမား အယ်လန်အဲလီးယက်စ်ကို ခေါ်ယူဖို့ သဘောတူညီမှု ရရှိခဲ့ပါတယ်။
မန်စီးတီးအသင်းအနေနဲ့ အယ်လန်(၂၂ နှစ်)အတွက် ပြောင်းရွှေ့ကြေး ယူရို သန်း ၄၀ ဝန်းကျင် ကုန်ကျနိုင်ပါတယ်။
အယ်လန်ရဲ့အပြောင်းအရွှေ့မှာ ကနဦး ယူရို ၃၇.၅ သန်း ပေးချေရမှာဖြစ်ပြီး Add-ons ကြေးကတော့ ယူရို ၂.၅ သန်း ရှိနိုင်ပါတယ်။
မန်စီးတီးအသင်းဟာ အသင်းက တိုက်စစ်ကစားသမားတချို့ ထွက်ခွာဖွယ်ရှိနေလို့ အယ်လန်နဲ့ ပြန်လည်အစားထိုးခဲ့တာဖြစ်တယ်။
ဆာဗင်ညို၊ မာမွတ်ရှ်တို့ နှစ်ဦးစလုံးဟာ ပရီးမီးယားလိဂ်ပြိုင်ဘက်ကလပ် စပါးအသင်းထံ ပြောင်းရွှေ့ဖို့ သေချာသလောက် ရှိနေပါတယ်။
မန်စီးတီးအသင်းဟာ အယ်လန်နဲ့ မော်ရိုကိုကွင်းလယ်လူ ဘူအက်ဒီတို့နဲ့ အပြောင်းအရွှေ့တွေကို အခုတစ်ပတ်အတွင်း အဆုံးသတ်ဖို့ ဆန္ဒရှိနေတာာပါ။
မော်ရိုကိုလက်ရွေးစင်ရဲ့ပြောင်းရွှေ့ကြေးအတွက် မန်စီးတီးအသင်းနဲ့ လိုင်လီအသင်းအကြား ပြီးခဲ့တဲ့တနင်္ဂနွေနေ့က ယူရို သန်း ၁၀၀ နဲ့ သဘောတူညီမှု ရခဲ့ပါတယ်။
ဘူအက်ဒီအနေနဲ့ မန်စီးတီးအသင်းမှာ ဆေးစစ်မှုခံယူဖို့ မန်ချက်စတာကို ရောက်ရှိနေပြီလို့ ESPN က ဖော်ပြခဲ့ပါတယ်။
မန်စီးတီးအသင်းအနေနဲ့ အပြောင်းအရွှေ့ Deadline မတိုင်ခင် ကစားသမားသစ် ထပ်မံခေါ်ယူဖွယ်ရှိတယ်လို့ သတင်းတွေက ခန့်မှန်းရေးသားနေကြပါတယ်။
မန်စီးတီးအသင်းမှာ ဆာဗင်ညိုနဲ့ မာမွတ်ရှ်အပြင် ကွင်းလယ်လူ နီကိုဂွန်ဇာလက်ဇ်လည်း နယူးကာဆယ်အသင်းကို ပြောင်းရွှေ့ဖို့ နီးစပ်နေပါတယ်။
ဘုန်းမောက်ကို ၂-၁ ဂိုးနဲ့ အနိုင်ရတဲ့ပွဲမှာ ဆာဗင်ညိုက အသင်းလူစာရင်းထဲတောင် မပါဝင်ခဲ့ဘဲ မာမွတ်ရှ်၊ နီကိုဂွန်ဇာလက်ဇ်တို့ကိုလည်း အရန်ခုံထိုင်ခိုင်းထားခဲ့ပါတယ်။
မန်စီးတီးအသင်းနည်းပြ မာရက်စကာဟာ အဲဒီပွဲမှာ နောက်ခံလူ ဂူဟီကို ကွင်းလယ်မှာ ကစားစေခဲ့တာဖြစ်ပါတယ်။

မန်ယူနိုက်တက်အသင်းနဲ့ ဘာလယ်ဘာ ဆေးစစ်မှုအောင်မြင်

ဘရိုက်တန်အသင်းက ပြောင်းရွှေ့လာတဲ့ ကင်မရွန်းလက်ရွေးစင်ကွင်းလယ်လူ ဘာလယ်ဘာဟာ မန်ယူနိုက်တက်အသင်းနဲ့ ဆေးစစ်မှုအောင်မြင်ခဲ့တယ်လို့ သိရပါတယ်။
၎င်းဟာ မန်ယူနိုက်တက်အသင်းနဲ့ ငါးနှစ်စာချုပ် ချုပ်ဆိုခဲ့ပြီး တစ်နှစ်သက်တမ်းတိုးခွင့်လည်း ပါဝင်ပါတယ်။
မန်ယူနိုက်တက်အသင်းအနေနဲ့ ဘာလယ်ဘာအတွက် ပြောင်းရွှေ့ကြေး ပေါင် ၆၅ သန်းနဲ့ Add-ons ကြေး ပေါင် ၅ သန်း ကုန်ကျပါလိမ့်မယ်။
ဘာလယ်ဘာ(၂၂ နှစ်)ဟာ ပြီးခဲ့တဲ့ရက်သတ္တပတ်ကုန်ပိုင်းကတည်းက မန်ချက်စတာကို ရောက်ရှိနေတာဖြစ်တယ်။
မန်ယူနိုက်တက်အသင်းဟာ အခုနွေရာသီမှာ ကွင်းလယ်ပိုင်းကို အဓိကအားဖြည့်ပြင်ဆင်နေတာပါ။
ဘာလယ်ဘာမတိုင်ခင် ချယ်လ်ဆီးအသင်းက အန်ဒရေဆန်းတို့စ်နဲ့ အက်စတွန်ဗီလာအသင်းက တီလေမန်းစ်တို့ကိုလည်း နှစ်ဦးပေါင် ပေါင် ၈၅ သန်းနဲ့ ခေါ်ယူထားခဲ့ပါတယ်။
ဒါပေမဲ့ ဒီကစားသမားသစ် နှစ်ဦးစလုံးကို အတူပွဲထုတ်ခဲ့တဲ့ ပရီးမီးယားလိဂ် ရာသီအဖွင့်ပွဲမှာ တန်းတက်ကလပ် ဟားလ်စီးတီးကို ဝ-၂ ဂိုးနဲ့ အရေးနိမ့်ခဲ့ရပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - ဩဂုတ် ၂၅ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၆၃၆ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၇,၁၅၀,၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၃၅၀,၀၀၀ ကျပ်
ဝယ်ဈေး ၁၀,၃၁၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၉၅၀,၀၀၀ ကျပ်
ဝယ်ဈေး ၉,၉၁၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၂၃၀,၀၀၀ ကျပ်
ဝယ်ဈေး ၁၀,၁၉၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၈၃၀,၀၀၀ ကျပ်
ဝယ်ဈေး ၉,၇၉၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၃၃၅ ကျပ်
ဝယ်ဈေး - ၄၂၂၅ ကျပ်
-စင်္ကာပူဒေါ်လာ
ရောင်းဈေး - ၃၄၁၀ ကျပ်
ဝယ်ဈေး - ၃၃၂၅ ကျပ်
-ယူရို
ရောင်းဈေး - ၅၀၅၅ ကျပ်
ဝယ်ဈေး - ၄၉၂၅ ကျပ်
-ထိုင်းဘတ်
ရောင်းဈေး - ၁၃၂.၄၅ ကျပ်
ဝယ်ဈေး - ၁၂၉.၀၃ ကျပ်
-မလေးရှားရင်းဂစ်
ရောင်းဈေး - ၁၀၇၀ ကျပ်
ဝယ်ဈေး - ၁၀၄၃ ကျပ်
-တရုတ်ယွမ်
ရောင်းဈေး - ၆၄၅ ကျပ်
ဝယ်ဈေး - ၆၂၈ ကျပ်
-ဂျပန်ယန်း
ရောင်းဈေး - ၂၇.၂၂ ကျပ်
ဝယ်ဈေး - ၂၆.၅၂ ကျပ်
-အိန္ဒိယရူပီး
ရောင်းဈေး - ၄၅.၈ ကျပ်
ဝယ်ဈေး - ၄၄.၆ ကျပ်
-ကိုရီးယားဝမ်
ရောင်းဈေး - ၃.၁၇ ကျပ်
ဝယ်ဈေး - ၃.၀၈ ကျပ်
-စတာလင်ပေါင်
ရောင်းဈေး - ၅၉၁၀ ကျပ်
ဝယ်ဈေး - ၅၇၅၅ ကျပ်
-ဩစတြေးလျဒေါ်လာ
ရောင်းဈေး - ၃၁၀၀ ကျပ်
ဝယ်ဈေး - ၃၀၂၀ ကျပ်
-ကနေဒါဒေါ်လာ
ရောင်းဈေး - ၃၁၃၀ ကျပ်
ဝယ်ဈေး - ၃၀၅၀ ကျပ်
-ဟောင်ကောင်ဒေါ်လာ
ရောင်းဈေး - ၅၅၃ ကျပ်
ဝယ်ဈေး - ၅၃၉ ကျပ်
-ယူအေအီး
ရောင်းဈေး - ၁၁၈၀ ကျပ်
ဝယ်ဈေး - ၁၁၅၀ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
************************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ