"ဒရုန်းထုတ်လုပ်မှု ပြိုင်ပွဲတွင် အမေရိကန် အခက်အခဲများနှင့် ရင်ဆိုင်နေရ"
အမေရိကန်သည် ဈေးနှုန်းသက်သာသည့် စစ်ဘက်သုံး ဒရုန်းများကို အမြောက်အမြား ထုတ်လုပ်မှုစတင်ရာတွင် "အခြေခံအားဖြင့် သုညအဆင့်" မှ စတင်နေရကြောင်း ပင်တာဂွန်စစ်ဌာနချုပ်မှ အရာရှိကြီးတစ်ဦး၏ ပြောကြားချက်ကို ကိုးကား၍ Bloomberg သတင်းက ဖော်ပြခဲ့ပြီး၊ ၎င်းသည် ရုရှားနှင့် တရုတ်တိုအား အမီလိုက်ရန် မည်မျှအထိ ရုန်းကန်နေရသည်ကို မီးမောင်းထိုးပြနေသည်။
ပြိုင်ဘက်နိုင်ငံများက တစ်ခါသုံး အသေခံမောင်းသူမဲ့ဒရုန်း ပေါင်း သန်းချီ၍ ထုတ်လုပ်နိုင်သော်လည်း၊ အမေရိကန်မှာမူ ယင်းဒရုန်းများကို အမြောက်အမြား ထုတ်လုပ်နိုင်ရန် လိုအပ်သည့် စက်ရုံများ၊ ထောက်ပံ့ပိုဆောင်ရေး ကွင်းဆက်များနှင့် ဝယ်ယူရေး စနစ်များကိုပင် တည်ဆောက်ရန် ကြိုးပမ်းနေရဆဲ ဖြစ်သည်။ ပင်တာဂွန်သည် ၎င်းတို၏ ဒရုန်းလွှမ်းမိုးရေး အစီအစဉ်အတွက် ဒေါ်လာ ၁.၁ ဘီလီယံခန့် အသုံးပြုထားသည်။ ယင်းအစီအစဉ်သည် ထုတ်လုပ်သူများ အနေဖြင့် ဒရုန်းများကို အမြောက်အမြား ထုတ်လုပ်နိုင်စွမ်း ရှိမရှိ သက်သေပြနိုင်ရန် စိန်ခေါ်မှုများသော စမ်းသပ်မှုများနှင့် အော်ဒါအမှာစာ ပမာဏကြီးမားသည့် အဆင့် ၄ ဆင့်ပါ ပြိုင်ပွဲတစ်ခု ဖြစ်သည်။
အမေရိကန် ဒရုန်းထုတ်လုပ်သူများသည် အဓိက အတားအဆီး ၃ ခုနှင့် ရင်ဆိုင်နေရသည် -
တရုတ်၏ လွှမ်းမိုးမှု - ဘက်ထရီ၊ မီးသွေးတုံးမလိုသော မော်တာများ၊ ဒရုန်းပန်ကာများနှင့် ကင်မရာများ အပါအဝင် အဓိက အစိတ်အပိုင်းများ ထုတ်လုပ်မှုကို တရုတ်က စိုးမိုးထားသည်။ အမေရိကန် ထုတ်လုပ်သူများသည် တရုတ်ထုတ် အစိတ်အပိုင်းများအပေါ် ကန့်သတ်ချက်များကို လိုက်နာရန်အတွက် အခြားအစားထိုး ရောင်းချသူများကို ရှာဖွေရသဖြင့် ပစ္စည်းကိရိယာများအတွက် ကုန်ကျစရိတ် သိသိသာသာ ပိုမိုကုန်ကျနေသည်။
လျင်မြန်စွာ ပြောင်းလဲနေသော နည်းပညာ - ဒရုန်းနည်းပညာနှင့် တုံပြန်ခုခံသည့် နည်းပညာများသည် ရက်သတ္တပတ် အနည်းငယ်အတွင်း ပြောင်းလဲနေသဖြင့် ထုတ်လုပ်သူများအနေဖြင့် ထုတ်လုပ်မှု ပမာဏကို တိုးမြှင့်နေစဉ်မှာပင် ဆော့ဖ်ဝဲလ်နှင့် ဟာ့ဒ်ဝဲလ် (Hardware) များကို စဉ်ဆက်မပြတ် မြှင့်တင်ပြင်ဆင်နေရသည်။
ခေတ်နောက်ကျနေသော ဝယ်ယူရေးစနစ် - အမေရိကန် စစ်တပ်၏ ဝယ်ယူရေးစနစ်သည် နှစ်ပေါင်းများစွာ ကြာအောင် တည်ဆောက်ရသည့် စျေးကြီးပြီး ရှုပ်ထွေးသော လက်နက်များအတွက်သာ ပုံစံထုတ်ထားခြင်း ဖြစ်ပြီး၊ ဈေးသက်သက်သာသာနှင့် အရေအတွက် အမြောက်အမြား ထုတ်လုပ်ပြီး အလွယ်တကူ အစားထိုး အသုံးပြုရမည့် တစ်ခါသုံး ဒရုန်းများအတွက် မဟုတ်ပေ။
ယခင် ဘိုင်ဒင်အစိုးရ လက်ထက်၏ Replicator အစီအစဉ်သည် တိုက်ခိုက်ရေးဒရုန်း အစုအဝေးများကို ထုတ်လုပ်ပေးမည်ဟု ကတိပြုခဲ့သော်လည်း ရည်မှန်းချက်ဖြစ်သော ဒရုန်းထောင်ပေါင်းများစွာအစား အရေအတွက် ရာဂဏန်းမျှသာ ပေးပိုနိုင်ခဲ့သဖြင့် လျာထားချက်ထက် များစွာ လျော့နည်းခဲ့သည်။ ထိုအချိန်တွင် Bloomberg သတင်းဌာန၏ အဆိုအရ တရုတ်သည် တစ်လလျှင် ဒရုန်းပေါင်း ၅၀၀,၀၀၀ အထိ အလျင်အမြန် တိုးမြှင့်ထုတ်လုပ်နိုင်စွမ်း ရှိသည်ဟု ဆိုသည်။
ပင်တာဂွန်၏ အဆိုပြု ဘတ်ဂျက်တွင် အလိုအလျောက် စစ်ဆင်ရေးစနစ်များအတွက် ဒေါ်လာ ၅၅ ဘီလီယံ လျာထားပြီး၊ ၎င်းအနက် ဒေါ်လာ ၁၇ ဘီလီယံကို ဒရုန်းများနှင့် အခြား မောင်းသူမဲ့စနစ်များအတွက် လျာထားသည်။ သိုသော်လည်း ကြားဖြတ်ရွေးကောက်ပွဲအပြီးတွင် ဒီမိုကရက်များ ကွန်ဂရက်လွှတ်တော်ကို ထိန်းချုပ်နိုင်ခဲ့ပါက အဆိုပါ ဘတ်ဂျက် တိုးမြှင့်မှုသည် နိုင်ငံရေးအရ စိန်ခေါ်မှုများနှင့် ရင်ဆိုင်ရဖွယ် ရှိသည်။
