နည်းပြ ဂျီးဇက်စ်ဟာ ကတိစကားကို ဖောက်ဖျက်ခဲ့တယ်လို့ စီရော်နယ်လ်ဒို တုံ့ပြန်

ပေါ်တူဂီအသင်းခေါင်းဆောင် စီရော်နယ်လ်ဒိုက လက်ရွေးစင်အသင်းနည်းပြ ဟော်ဟေဂျီးဇက်စ်ဟာ ကတိစကားကို ဖောက်ဖျက်ခဲ့တယ်လို့ တုံ့ပြန်ခဲ့ပါတယ်။
စီရော်နယ်လ်ဒိုဟာ ပေါ်တူဂီအသင်းမှာ ဆက်လက်ကစားမယ့်အကြောင်း စာလုံးရေ ၂၀၀၀ နီးပါးပါဝင်တဲ့ ကြေညာချက်ကို ထုတ်ပြန်ရာမှာ ထည့်သွင်းရေးသားခဲ့တာဖြစ်တယ်။
၎င်းက ပေါ်တူဂီအသင်းရဲ့ အရေးယူမှုကို အလိုရှိကြောင်းလည်း ပြောကြားခဲ့ပါတယ်။
နည်းပြဖြစ်သူကို တောင်းပန်ခြင်းမရှိခဲ့ဘဲ ပေါ်တူဂီအသင်းဖော်တွေကို တောင်းပန်စကားဆိုခဲ့ပါတယ်။
စီရော်နယ်လ်ဒိုကို နော်ဝေ(ပထမအကျော့)၊ ဒိန်းမတ်ပွဲတွေမှာ အနားပေးမယ်လို့ ဂျီးဇက်စ်က ပြောကြားခဲ့ပါတယ်။
ဒါပေမဲ့ နော်ဝေနဲ့ကစားမယ့် ပွဲနေ့မှာ မိနစ် ၃၀ ကစားခွင့်ရမယ်လို့ နည်းပြဖြစ်သူက စီရော်နယ်လ်ဒိုကို အသိပေးခဲ့ပါတယ်။
ယင်းကိစ္စနဲ့ပတ်သက်ပြီး စီရော်နယ်လ်ဒိုက ''ကျွန်တော့်ကို အနားပေးခဲ့တယ်ဆိုတာ လူတိုင်းသိပါတယ်။ ပထမပိုင်းပြီးချိန်မှာတောင် ကျွန်တော် သွေးပူလေ့ကျင့်ခန်း လုပ်နေခဲ့တယ်။ ပွဲကို စောင့်ကြည့်နေခဲ့တယ်။ ပြီးတော့ ကျွန်တော့်ကို
မခေါ်ခဲ့ပါဘူး။ မန်နေဂျာက ကျွန်တော့်ကို သူပြောခဲ့တဲ့စကားတွေကို ဖောက်ဖျက်ခဲ့ပါတယ်''လို့ ပြောခဲ့ပါတယ်။
ဒါ့အပြင် ဒိန်းမတ်နဲ့ ပွဲကြိုသတင်းစာရှင်းလင်းပွဲမှာ ဂျီးဇက်စ် ပြောခဲ့တာတွေက သီးသန့်ဆွေးနွေးမှု အကြောင်းအရာတွေဖြစ်လို့ စီရော်နယ်လ်ဒိုက ဝေဖန်ပြစ်တင်ခဲ့ပါတယ်။

မြန်မာ ယူ-၁၇ အသင်း ယနေ့ ဒုတိယမြောက်ခြေစမ်းပွဲအဖြစ် အိန္ဒိယယူ-၁၇ အသင်းနဲ့ ယှဉ်ပြိုင်ကစားမယ်

၂၀၂၇ အာရှဖလား ယူ-၁၇ ပြိုင်ပွဲ ခြေစစ်ပွဲဝင်မယ့် မြန်မာ ယူ-၁၇ အသင်းဟာ ယနေ့တွင် ဒုတိယမြောက်ခြေစမ်းပွဲအဖြစ် အိန္ဒိယယူ-၁၇ အသင်းနဲ့ ယှဉ်ပြိုင်ကစားမှာဖြစ်ကြောင်း သိရပါတယ်။
မြန်မာယူ-၁၇ အသင်းနဲ့ အိန္ဒိယယူ- ၁၇ အသင်းတို့ဟာ ယနေ့ (အောက်တိုဘာ ၇) မြန်မာစံတော်ချိန် နေ့လယ် ၃ နာရီခွဲတွင် ရန်ကုန်မြို့ရှိ သန်လျင်စတားစီးတီးကွင်းမှာ ဒုတိယမြောက်ခြေစမ်းပွဲအဖြစ် ယှဉ်ပြိုင်ကစားကြမှာဖြစ်ပါတယ်။
မြန်မာယူ-၁၇ အသင်းနဲ့ အိန္ဒိယယူ-၁၇ အသင်းတို့ဟာ ပြီးခဲ့တဲ့​အောက်တိုဘာ ၄ ရက်က ပထမခြေစမ်းပွဲအဖြစ် ရန်ကုန်မြို့ရှိ သန်လျင်စတားစီးတီးကွင်းမှာ ယှဉ်ပြိုင်ကစားခဲ့ရာတွင် (၁-၁) ဂိုးနဲ့ သရေကျခဲ့ပါတယ်။
ယင်းပွဲတွင် မြန်မာ ယူ -၁၇ အသင်းက ဦးဆောင်ဂိုးသွင်ယူနိုင်ခဲ့သော်လည်း ပယ်နယ်တီဂိုးပြန်ပေးခဲ့ရပြီး သရေကျခဲ့ခြင်းဖြစ်ကြောင်း သိရပါတယ်။
မြန်မာ ယူ- ၁၇ အသင်းနဲ့ အိန္ဒိယ ယူ- ၁၇ အသင်းတို့ဟာ ပြီးခဲ့တဲ့မတ်လအတွင်းကလည်း ရန်ကုန်မြို့မှာ ခြေစမ်းပွဲနှစ်ပွဲ ယှဉ်ပြိုင်ကစားခဲ့ပြီး ထိုစဉ်က ပထမခြေစမ်းပွဲတွင် အိန္ဒိယ ယူ- ၁၇ အသင်း က (၂-၁) ဂိုးဖြင့် အနိုင်ရခဲ့ပြီး ဒုတိယခြေစမ်းပွဲတွင်မူ ဂိုးမရှိသရေကျခဲ့ကြောင်း သိရပါတယ်။
မြန်မာ ယူ- ၁၇ အသင်းဟာ ပြီးခဲ့တဲ့စက်တင်ဘာ ၁၇ ရက်မှ ၂၁ ရက်အထိ ဂျပန်နိုင်ငံမှာ ကျင်းပခဲ့တဲ့ လေးသင်းပတ်လည် ဖိတ်ခေါ်ပြိုင်ပွဲကို ဝင်ရောက်ယှဉ်ပြိုင်ခဲ့ပြီး တစ်ပွဲနိုင်၊ နှစ်ပွဲရှုံးရလဒ် ရရှိခဲ့ပါတယ်။
မြန်မာ ယူ-၁၇ အသင်းကို ဂျပန်နိုင်ငံသား အမာနိုက နည်းပြချုပ်အဖြစ် တာဝန်ယူကိုင်တွယ်နေကြောင်း သိရပါတယ်။
မြန်မာ ယူ- ၁၇ အသင်းဟာ ၂၀၂၇ အာရှဖလား ယူ- ၁၇ ပြိုင်ပွဲ ခြေစစ်ပွဲတွင် အုပ်စု (A) ၌ အင်ဒိုနီးရှား၊ ဖိလစ်ပိုင်၊ အာဖဂန်နစ္စတန်၊ ကမ္ဘောဒီးယားအသင်းတို့နဲ့ ကျရောက်နေလျက်ရှိပါတယ်။
အာရှဘောလုံးအဖွဲ့ချုပ် (AFC) ဟာ ၂၀၂၇ အာရှဖလား ယူ- ၁၇ ပြိုင်ပွဲ ခြေစစ်ပွဲကို လာမယ့်နိုဝင်ဘာ ၈ ရက်မှ ၂၀ ရက်အထိ ကျင်းပပြုလုပ်သွားမှာဖြစ်ပါတယ်။
AFC ဟာ ၂၀၂၇ အာရှဖလား ယူ- ၁၇ ပြိုင်ပွဲ ခြေစစ်ပွဲဝင် အသင်း ၃၅ သင်းကို ၅ သင်း ခုနှစ်အုပ်စုခွဲဝေ၍ အုပ်စုတစ်ခုလျှင် အိမ်ရှင်တစ်နိုင်ငံ ရွေးချယ်၍ ကျင်းပပြုလုပ်သွားမှာဖြစ်ကြောင်း သိရပါတယ်။
အုပ်စုတစ်ခုစီမှ ထိပ်ဆုံးရပ်တည်မှုရ အသင်းတစ်သင်းစီ၊ စုစုပေါင်း ခုနှစ်သင်းသာ ခြေစစ်ပွဲအောင်မြင်မှာဖြစ်ကြောင်း သိရပါတယ်။
၂၀၂၇ အာရှဖလား ယူ- ၁၇ ပြိုင်ပွဲကို အိမ်ရှင်အဖြစ် ကျင်းပခွင့်ရ ဥဇဘက်ကစ္စတန်၊ ကာတာ၊ ဂျပန်၊ တရုတ်၊ သြစတြေးလျ၊ တောင်ကိုရီးယား၊ ဆော်ဒီအာရေဗျ၊ တာဂျစ်ကစ္စတန်၊ ဗီယက်နမ်အသင်းကိုးသင်းမှာမူ ခြေစစ်ပွဲဝင်စရာမလိုဘဲ တိုက်ရိုက်ကစားခွင့် ရရှိထားပါတယ်။
၂၀၂၇ အာရှဖလား ယူ- ၁၇ ပြိုင်ပွဲကို တိုက်ရိုက်ကစားခွင့်ရ အသင်းကိုးသင်းနဲ့ ခြေစစ်ပွဲအောင် အသင်းခုနှစ်သင်း၊ စုစုပေါင်း အသင်း ၁၆ သင်းဖြင့် လာမယ့် ၂၀၂၇ ခုနှစ်၊ မေလအတွင်း ဥဇဘက်ကစ္စတန်နိုင်ငံမှာ ကျင်းပသွားမှာဖြစ်ကြောင်း သိရပါတယ်။

လာအိုအစိုးရ ခေါင်းဆောင်ပိုင်းအပြောင်းအလဲပြုလုပ်၊ ဝန်ကြီးချုပ်အသစ် ခန့်အပ်

လာအိုနိုင်ငံတွင် ထိပ်တန်းခေါင်းဆောင်ပိုင်း အပြောင်းအလဲပြုလုပ်ခဲ့ပြီး ဒုတိယဝန်ကြီးချုပ်ဟောင်း ဆာလမ်ဆေး ကွမ်မာဆစ်ကို ဝန်ကြီးချုပ်အသစ်အဖြစ် ခန့်အပ်ကာ ဝန်ကြီးချုပ် ဆိုနက်ဆေး ဆီဖန်ဒွန်းကို အမျိုးသားလွှတ်တော်ဥက္ကဋ္ဌအဖြစ် ပြောင်းလဲတာဝန်ပေးခဲ့ကြောင်း သိရသည်။
အဆိုပါခေါင်းဆောင်ပိုင်း အပြောင်းအလဲကို တနင်္လာနေ့က ကျင်းပသည့် (၁၀) ကြိမ်မြောက် လာအိုအမျိုးသားလွှတ်တော်၏ ဒုတိယအကြိမ် ပုံမှန်အစည်းအဝေးတွင် အတည်ပြုခဲ့ခြင်းဖြစ်သည်။
အစည်းအဝေးသို့ တက်ရောက်ခဲ့သည့် လွှတ်တော်ကိုယ်စားလှယ် ၁၅၈ ဦးစလုံးက ဆာလမ်ဆေး ကွမ်မာဆစ်ကို ဝန်ကြီးချုပ်အဖြစ် ခန့်အပ်ရန် ထောက်ခံမဲပေးခဲ့ကြပြီး ဆိုနက်ဆေး ဆီဖန်ဒွန်းကို အမျိုးသားလွှတ်တော်ဥက္ကဋ္ဌအဖြစ် ရွေးချယ်တင်မြှောက်ခဲ့ကြသည်။
ယခုအပြောင်းအလဲသည် အမျိုးသားလွှတ်တော်ဥက္ကဋ္ဌ ဆေဆမ်ဖုန်း ဖွမ်ဗီဟန်း ဩဂုတ် ၈ ရက်က အသက် ၆၉ နှစ်အရွယ်တွင် ကွယ်လွန်ခဲ့ပြီးနောက် ပေါ်ပေါက်လာခြင်းဖြစ်သည်။ ၎င်းသည် (၁၀) ကြိမ်မြောက် လွှတ်တော်သက်တမ်း စတင်ခဲ့သည့် မတ်လအတွင်း အမျိုးသားလွှတ်တော်ဥက္ကဋ္ဌအဖြစ် ပြန်လည်ရွေးချယ်ခံထားရသူဖြစ်သည်။
ဝန်ကြီးချုပ်အသစ် ဆာလမ်ဆေး ကွမ်မာဆစ်ကို ၁၉၆၈ ခုနှစ်တွင် လာအိုနိုင်ငံ Houaphan ပြည်နယ်၌ မွေးဖွားခဲ့ပြီး ၁၉၈၆ ခုနှစ်မှ ၁၉၉၂ ခုနှစ်အထိ မော်စကို နိုင်ငံတကာဆက်ဆံရေးအင်စတီကျုတွင် ပညာသင်ကြားကာ နိုင်ငံတကာဆက်ဆံရေးဘာသာရပ်ဖြင့် မဟာဘွဲ့ရရှိခဲ့သည်။ ထို့နောက် ဩစတြေးလျနိုင်ငံ Monash တက္ကသိုလ်တွင် နိုင်ငံတကာလေ့လာရေးနှင့် ဖွံ့ဖြိုးတိုးတက်ရေးဘာသာရပ်ဖြင့် မဟာဘွဲ့ ထပ်မံရရှိခဲ့သည်။
၎င်းသည် နိုင်ငံခြားရေးနှင့် သံတမန်ရေးရာနယ်ပယ်တွင် နှစ်ပေါင်းများစွာ တာဝန်ထမ်းဆောင်ခဲ့သူဖြစ်ပြီး ကုလသမဂ္ဂဆိုင်ရာ လာအိုအမြဲတမ်းကိုယ်စားလှယ်အဖြစ်လည်း တာဝန်ယူခဲ့ဖူးသည်။ ၂၀၁၆ ခုနှစ်တွင် နိုင်ငံခြားရေးဝန်ကြီးအဖြစ် ခန့်အပ်ခံခဲ့ရပြီး ၂၀၂၂ ခုနှစ်တွင် ဒုတိယဝန်ကြီးချုပ်အဖြစ် တာဝန်ပေးအပ်ခံခဲ့ရသည်။
ဆာလမ်ဆေးသည် လာအိုဘာသာစကားအပြင် ရုရှား၊ ပြင်သစ်နှင့် အင်္ဂလိပ်ဘာသာစကားများကိုလည်း ပြောဆိုနိုင်ကြောင်း သိရသည်။

သဘာဝဘေးတုံ့ပြန်ရေး ရှာဖွေကယ်ဆယ်ရေးတပ်ဖွဲ့ဝင် ၁၃,၆၂၇ ဦး ဖွဲ့စည်းလေ့ကျင့်ထား

နိုင်ငံတကာအဆင့် USAR Medium Team ဖွဲ့စည်း၍ INSARAG Classified ရရှိရေး ဆောင်ရွက်နေ
နေပြည်တော်၊ အောက်တိုဘာ ၆
သဘာဝဘေးအန္တရာယ်များ ဖြစ်ပွားလာပါက ထိရောက်လျင်မြန်စွာ တုံ့ပြန်နိုင်ရန် တပ်ခွဲ ၁၇ ခွဲနှင့် တပ်စု ၃၃၃ စုတွင် ရှာဖွေကယ်ဆယ်ရေးတပ်ဖွဲ့ဝင် စုစုပေါင်း ၁၃,၆၂၇ ဦးကို အသင့်စုဖွဲ့ လေ့ကျင့်ထားရှိကြောင်း ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ပြောကြားသည်။
တတိယအကြိမ် အမျိုးသားလွှတ်တော် တတိယပုံမှန်အစည်းအဝေး သတ္တမနေ့တွင် ပဲခူးတိုင်းဒေသကြီး အမျိုးသားလွှတ်တော်ကိုယ်စားလှယ်အမှတ် (၆) ဦးကျော်ဝင်းဦး၏ မေးမြန်းချက်ကို ပြန်လည်ဖြေကြားရာ၌ ဒုတိယဝန်ကြီးက ယင်းသို့ ပြောကြားခဲ့ခြင်းဖြစ်သည်။
မြန်မာနိုင်ငံ မီးသတ်တပ်ဖွဲ့ဌာနချုပ် (ရန်ကုန်)၊ နေပြည်တော်နှင့် တိုင်းဒေသကြီး၊ ပြည်နယ်များတွင် သန္ဓေနှင့် အရန်မီးသတ်တပ်ဖွဲ့ဝင် ၁၁၆ ဦးစီ ပါဝင်သည့် တပ်ခွဲ ၁၇ ခွဲ ဖွဲ့စည်းထားပြီး မြို့နယ်နှင့် မြို့တစ်ခုလျှင် တပ်ဖွဲ့ဝင် ၃၅ ဦးစီပါဝင်သည့် တပ်စု ၃၃၃ စုကိုလည်း ဖွဲ့စည်းထားကြောင်း သိရသည်။
ယင်းရှာဖွေကယ်ဆယ်ရေးအဖွဲ့များအနက် သတ်မှတ်ချက်နှင့် ကိုက်ညီသည့် မီးသတ်တပ်ဖွဲ့ဝင် ၃၀ ဦးကို ရွေးချယ်၍ ပြင်သစ်နှင့် စင်ကာပူနိုင်ငံတို့မှ မြို့ပြရှာဖွေကယ်ဆယ်ရေးနည်းပြများဖြင့် ၂၀၁၉ ခုနှစ် အောက်တိုဘာလတွင် လေ့ကျင့်သင်ကြားပေးခဲ့သည်။
ထို့ပြင် ဌာနတွင်းဖွင့်လှစ်သည့် အဆင့်မြင့်ရှာဖွေကယ်ဆယ်ရေးသင်တန်းများမှ မီးသတ်တပ်ဖွဲ့ဝင်များကို စိစစ်ရွေးချယ်၍ မြို့ပြရှာဖွေကယ်ဆယ်ရေး အထူးအဖွဲ့အဖြစ် ဖွဲ့စည်းနိုင်ရေး ဆက်လက်ဆောင်ရွက်နေကြောင်း ဒုတိယဝန်ကြီးက ပြောသည်။
လက်ရှိတွင် ရှာဖွေကယ်ဆယ်ရေးလုပ်ငန်းများကို ဒေသတွင်းအဆင့်မှ နိုင်ငံတကာအဆင့်အထိ ပါဝင်ဆောင်ရွက်နိုင်ရန် International Search and Rescue Advisory Group (INSARAG) ၏ သတ်မှတ်ချက်များနှင့်အညီ Urban Search and Rescue (USAR) Medium Team ဖွဲ့စည်း၍ နိုင်ငံတကာအသိအမှတ်ပြုအဆင့် ရရှိရေး ဆောင်ရွက်လျက်ရှိသည်။
လိုအပ်သည့် သင်တန်းများတက်ရောက်ခြင်းနှင့် ကြိုတင်ပြင်ဆင်မှုများ ပြီးစီးပါက INSARAG မှ စစ်ဆေးအကဲဖြတ်သူများကို ဖိတ်ကြား၍ ၃၆ နာရီကြာ သဏ္ဌာန်တူဖြစ်စဉ်ဖြင့် လေ့ကျင့်သရုပ်ပြကာ INSARAG Classified ရရှိရေး စစ်ဆေးခံသွားမည်ဖြစ်ကြောင်း သိရသည်။
အမျိုးသားလွှတ်တော်ကိုယ်စားလှယ် ဦးကျော်ဝင်းဦးက ၂၀၂၅ ခုနှစ် မန္တလေးငလျင်ကြီးအပါအဝင် ကမ္ဘာ့နိုင်ငံများတွင် ဖြစ်ပွားခဲ့သည့် ငလျင်ဖြစ်စဉ်များကို သင်ခန်းစာယူ၍ မြန်မာနိုင်ငံတွင် အလားတူငလျင်ကြီးများ ဖြစ်ပွားလာပါက အရေးပေါ်ရှာဖွေကယ်ဆယ်ရေး ဆောင်ရွက်နိုင်ရန် အဖွဲ့များဖွဲ့စည်းထားရှိမှုနှင့် နိုင်ငံတကာအဆင့်မီ ရှာဖွေကယ်ဆယ်ရေးအဖွဲ့ ဖွဲ့စည်းရန် အစီအစဉ်ရှိ၊ မရှိ မေးမြန်းခဲ့ခြင်းဖြစ်သည်။

အာဆီယံ U-19 အမျိုးသမီးဖူဆယ်ပြိုင်ပွဲအတွက် မြန်မာအသင်း စခန်းဝင်လေ့ကျင့်ပြင်ဆင်

လာမည့် ဒီဇင်ဘာလတွင် ထိုင်းနိုင်ငံ၌ ကျင်းပမည့် အာဆီယံ U-19 အမျိုးသမီးဖူဆယ်ချန်ပီယံရှစ်ပြိုင်ပွဲ ဝင်ရောက်ယှဉ်ပြိုင်ရန် ပဏာမမြန်မာ့လက်ရွေးစင် U-19 အမျိုးသမီးဖူဆယ်အသင်းသည် အောက်တိုဘာ ၄ ရက် ညနေပိုင်းမှစတင်၍ သုဝဏ္ဏကွင်းအတွင်းရှိ လက်ရွေးစင်ကစားသမားအဆောင်၌ စခန်းဝင်လေ့ကျင့်မှုများ စတင်ပြုလုပ်နေကြောင်း သိရသည်။
ပဏာမအသင်းကို ကစားသမား ၃၁ ဦးဖြင့် ဖွဲ့စည်းထားပြီး နည်းပြချုပ်အဖြစ် ဦးအောင်အောင်က တာဝန်ယူကာ အုပ်ချုပ်၊ နည်းပြအဖွဲ့ဝင် ၁၀ ဦးဖြင့် လေ့ကျင့်ပြင်ဆင်လျက်ရှိသည်။
အသင်းအနေဖြင့် တစ်ပတ်လျှင် လေ့ကျင့်ချိန် ၉ ကြိမ်အထိ ပြုလုပ်သွားမည်ဖြစ်ပြီး အမျိုးသမီးဖူဆယ်လိဂ်မှ ကစားသမားများအပြင် တိုင်းဒေသကြီးနှင့် ပြည်နယ်အသီးသီးမှ ခြေစွမ်းကောင်းမွန်သည့် ကစားသမားများကို ရွေးချယ်ဖွဲ့စည်းထားခြင်းဖြစ်သည်။
စခန်းဝင်လေ့ကျင့်မှု စတင်သည့်နေ့တွင် မြန်မာနိုင်ငံဘောလုံးအဖွဲ့ချုပ် ဖူဆယ်နှင့် သဲသောင်ပြင်ကော်မတီဥက္ကဋ္ဌ ဦးဝင်းသော်နှင့် ကော်မတီဝင်များက ကစားသမားများနှင့် အုပ်ချုပ်၊ နည်းပြအဖွဲ့ဝင်များအား တွေ့ဆုံ၍ အားပေးစကားပြောကြားခဲ့ကြောင်း သိရသည်။

ကြက်သွန်ဈေး တစ်ပိဿာ ကျပ် ၁၀,၀၀၀ အထိ မြင့်တက်၊ မိုးကြက်သွန်ပေါ်ချိန်တွင် ပြန်ကျနိုင်

ပြည်တွင်းဈေးကွက်အတွင်း ကြက်သွန်နီဈေးနှုန်းများ စံချိန်တင်မြင့်တက်နေပြီး လက်ရှိတွင် တစ်ပိဿာလျှင် ကျပ် ၁၀,၀၀၀ အထိ ရောက်ရှိလာသော်လည်း မိုးကြက်သွန်အသစ်များ ဈေးကွက်အတွင်း ဝင်ရောက်လာချိန်တွင် ဈေးနှုန်းပြန်လည်ကျဆင်းနိုင်ကြောင်း ကြက်သွန်ကုန်သည်များထံမှ သိရသည်။
လက်ရှိ ကြက်သွန်နီဈေးနှုန်းသည် လက်ကားဈေး တစ်ပိဿာလျှင် ကျပ် ၈,၀၀၀ ဝန်းကျင်နှင့် လက်လီဈေး ကျပ် ၁၀,၀၀၀ အထိ မြင့်တက်နေပြီး ကုန်စည်ဒိုင်များနှင့် ပွဲရုံများတွင် ကြက်သွန်လက်ကျန်နည်းပါးနေသည့်အတွက် မိုးကြက်သွန်အသစ် မပေါ်မီကာလအတွင်း ဈေးပြန်ကျနိုင်ဖွယ်မရှိကြောင်း မြင်းခြံကုန်စည်ဒိုင်မှ တာဝန်ရှိသူတစ်ဦးက ပြောသည်။
“ဒီနှစ်ကြက်သွန်ဈေးက ပြီးခဲ့တဲ့ မေလတည်းက တရိပ်ရိပ်တက်တာပါ။ ဇူလိုင်၊ ဩဂုတ်မှာ တရုတ်ဝယ်လက်တွေက တောက်လျှောက်ဝယ်တယ်၊ ဈေးလည်းကောင်းတယ်။ အခုကတော့ စံချိန်တင်လို့ ပြောရမယ်" ဟုကြက်သွန်နီကုန်သည်တစ်ဦးကပြောသည်။
ကြက်သွန်ဈေးနှုန်းမှာ ဇူလိုင်လအတွင်း တစ်ပိဿာလျှင် ကျပ် ၄,၈၀၀ ဝန်းကျင်ရှိခဲ့ရာမှ ဩဂုတ်လတွင် ကျပ် ၅,၀၀၀ မှ ၆,၀၀၀၊ စက်တင်ဘာလတွင် ကျပ် ၇,၀၀၀ မှ ၈,၀၀၀ အထိ မြင့်တက်ခဲ့ပြီး စက်တင်ဘာလကုန်မှ အောက်တိုဘာလဆန်းအထိ တစ်ပိဿာလျှင် ကျပ် ၁၀,၀၀၀ အထိ ဆက်လက်မြင့်တက်လာခြင်းဖြစ်သည်။
မိုးကြက်သွန်အသစ်များမှာ အောက်တိုဘာလကုန်ပိုင်းမှ နိုဝင်ဘာလဆန်းပိုင်းအတွင်း ဈေးကွက်အတွင်း စတင်ဝင်ရောက်လာမည်ဖြစ်ပြီး ဒီဇင်ဘာလတွင် ပိုမိုလှိုင်လှိုင်ထွက်ရှိလာနိုင်ကြောင်း သိရသည်။
သို့သော် ကြက်သွန်ဈေးကောင်းရရှိနေသော်လည်း စက်သုံးဆီ၊ မြေဆီ၊ ပိုးသတ်ဆေးနှင့် အခြားသွင်းအားစုဈေးနှုန်းများ မြင့်တက်နေခြင်းကြောင့် စိုက်ပျိုးသူများ လျော့နည်းလာကြောင်း သိရသည်။
ကြက်သွန်နီကို မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့တွင် အဓိကစိုက်ပျိုးကြပြီး နိုင်ငံတစ်ဝန်းတွင် ကြက်သွန်စိုက်ဧက ၁၇၀,၀၀၀ ကျော်ရှိကာ တန်ချိန်တစ်သန်းကျော် ထွက်ရှိကြောင်း စီးပွားရေးနှင့် ကူးသန်းရောင်းဝယ်ရေးဆိုင်ရာ စာရင်းများအရ သိရသည်။
လက်ရှိ ကြက်သွန်ဈေးနှုန်းမြင့်တက်မှုသည် လက်ကျန်နည်းပါးခြင်းနှင့် ဝယ်လိုအားအခြေအနေများကြောင့် ဆက်လက်မြင့်မားနေနိုင်သော်လည်း မိုးကြက်သွန်အသစ်များ ဈေးကွက်အတွင်း စတင်ဝင်ရောက်လာသည့် နိုဝင်ဘာလဆန်းပိုင်းမှစ၍ ဈေးနှုန်းအနည်းငယ် ပြန်လည်ကျဆင်းလာနိုင်ကြောင်း ကုန်သည်များက ခန့်မှန်းထားသည်။

မြန်မာ-မလေးရှားနိုင်ငံတော်အဆင့် ခရီး (၁၁) နှစ်အကြာတွင် ပြန်လည်စတင်

သမ္မတ ဦးမင်းအောင်လှိုင်၏နဝမအကြိမ်မြောက်ခရီးစဉ်အဖြစ် မလေးရှားနိုင်ငံသို့ သွားရောက်
နိုင်ငံတော်သမ္မတ ဦးမင်းအောင်လှိုင်သည် မလေးရှားနိုင်ငံသို့ နိုင်ငံတော်အဆင့် တရားဝင်ခရီးစဉ် (Official Visit) အဖြစ် ယနေ့ အောက်တိုဘာ ၇ ရက် နံနက်ပိုင်းတွင် စတင်ထွက်ခွာခဲ့ပြီး ယခုခရီးစဉ်သည် ၂၀၁၅ ခုနှစ်နောက်ပိုင်း ၁၁ နှစ်အတွင်း မြန်မာနိုင်ငံတော်သမ္မတတစ်ဦး မလေးရှားနိုင်ငံသို့ ပြန်လည်သွားရောက်သည့် အဆင့်မြင့်တရားဝင်ခရီးစဉ် ဖြစ်လာသည်။
နိုင်ငံတော်သမ္မတ ဦးမင်းအောင်လှိုင်သည် မလေးရှားနိုင်ငံဝန်ကြီးချုပ် ဒါတိုဆရီ အန်နဝါ ဘင် အီဘရာဟင် (Dato’ Seri Anwar Bin Ibrahim) ၏ ဖိတ်ကြားချက်အရ မလေးရှားနိုင်ငံသို့ တရားဝင်ခရီးစဉ် (Official Visit) သွားရောက်ရန် ယနေ့ အောက်တိုဘာ ၇ ရက် နံနက် ၈ နာရီတွင် နေပြည်တော်ရှိ တပ်မတော်လေဆိပ်မှ အထူးလေယာဉ်ဖြင့် စတင်ထွက်ခွာခဲ့ကြောင်း သိရသည်။
နိုင်ငံတော်သမ္မတအား တပ်မတော်လေဆိပ်၌ ပြည်ထောင်စုအစိုးရအဖွဲ့ တာဝန်ရှိသူများ၊ တပ်မတော်အဆင့်မြင့်အရာရှိကြီးများနှင့် မြန်မာနိုင်ငံဆိုင်ရာ မလေးရှားနိုင်ငံသံရုံးမှ တာဝန်ရှိသူများက ပို့ဆောင်နှုတ်ဆက်ခဲ့ကြကြောင်း သိရသည်။
ယခုခရီးစဉ်သည် မြန်မာ-မလေးရှား နှစ်နိုင်ငံအကြား နိုင်ငံတော်အဆင့် အပြန်အလှန်ဆက်ဆံရေးနှင့် အဆင့်မြင့်ခေါင်းဆောင်များအကြား တိုက်ရိုက်ထိတွေ့ဆက်ဆံမှုကို ပိုမိုတိုးမြှင့်မည့် ခရီးစဉ်တစ်ရပ် ဖြစ်သည်။
ခရီးစဉ်အတွင်း နိုင်ငံတော်သမ္မတသည် မလေးရှားနိုင်ငံဝန်ကြီးချုပ်နှင့် တွေ့ဆုံ၍ မြန်မာ-မလေးရှား နှစ်နိုင်ငံအကြား ရှိရင်းစွဲချစ်ကြည်ရင်းနှီးသည့် ဆက်ဆံရေး ပိုမိုခိုင်မာလာစေရေး၊ နှစ်နိုင်ငံအစိုးရနှင့် ပြည်သူများအကြား အပြန်အလှန်အကျိုးရှိစေမည့် ပူးပေါင်းဆောင်ရွက်မှုများ တိုးမြှင့်ရေးနှင့် စီးပွားရေး၊ ယဉ်ကျေးမှုအပါအဝင် ကဏ္ဍပေါင်းစုံ၌ ပူးပေါင်းဆောင်ရွက်မှု မြှင့်တင်ရေးတို့ကို ဆွေးနွေးသွားမည်ဖြစ်သည်။
ထို့ပြင် နိုင်ငံတော်သမ္မတသည် မြန်မာ-မလေးရှား စီးပွားရေးလုပ်ငန်းရှင်များ ဆွေးနွေးပွဲ (Myanmar-Malaysia Business Dialogue) သို့ တက်ရောက်၍ အဖွင့်အမှာစကား ပြောကြားမည်ဖြစ်သည်။
နိုင်ငံတော်သမ္မတနှင့်အတူ ပြည်ထောင်စုဝန်ကြီးများဖြစ်ကြသည့် ဦးခင်မောင်ရီ၊ ဦးတင်မောင်ဆွေ၊ ဦးမင်းနောင်၊ ဦးမြင့်ကြိုင်၊ ဦးမောင်မြင့်၊ ဦးထွန်းအုံ၊ ရခိုင်ပြည်နယ် ဝန်ကြီးချုပ် ဦးနိုင်ဦး၊ ဧရာဝတီတိုင်းဒေသကြီး ဝန်ကြီးချုပ် ဦးအေးကျော်၊ ကာကွယ်ရေး ဦးစီးချုပ်ရုံးမှ အဆင့်မြင့်တပ်မတော်အရာရှိကြီးများ၊ ဒုတိယဝန်ကြီးများနှင့် တာဝန်ရှိသူများ ခရီးစဉ်တွင် လိုက်ပါသွားကြသည်။
မှတ်တမ်းများအရ မြန်မာနိုင်ငံ၏ ယခင်နိုင်ငံတော်သမ္မတ ဦးသိန်းစိန်သည် ၂၀၁၅ ခုနှစ် မတ်လတွင် မလေးရှားနိုင်ငံသို့ နိုင်ငံတော်အဆင့်ခရီးစဉ် (State Visit) သွားရောက်ခဲ့သည်။ ယင်းနောက်ပိုင်း NLD အစိုးရလက်ထက်နှင့် ၂၀၂၁ ခုနှစ်နောက်ပိုင်းကာလများတွင် မြန်မာနိုင်ငံတော်သမ္မတတစ်ဦး၏ မလေးရှားနိုင်ငံသို့ နိုင်ငံတော်အဆင့် တရားဝင်ခရီးစဉ် မရှိခဲ့သဖြင့် ယခုခရီးစဉ်သည် ၁၁ နှစ်အကြာတွင် ပြန်လည်ပေါ်ပေါက်လာသည့် မြန်မာနိုင်ငံတော်သမ္မတ၏ မလေးရှားခရီးစဉ် ဖြစ်လာသည်။
နိုင်ငံတော်သမ္မတ ဦးမင်းအောင်လှိုင်သည် သမ္မတတာဝန် စတင်ထမ်းဆောင်ပြီးနောက် အိန္ဒိယ၊ တရုတ်၊ လာအို၊ ထိုင်း၊ ရုရှား၊ ဘီလာရုစ်၊ ဗီယက်နမ်နှင့် ကမ္ဘောဒီးယားနိုင်ငံတို့သို့ သွားရောက်ခဲ့ပြီး ယခု မလေးရှားနိုင်ငံခရီးစဉ်သည် ၉ နိုင်ငံမြောက် ပြည်ပခရီးစဉ် ဖြစ်ကာ အာဆီယံဒေသတွင်းနိုင်ငံများအနက် ၅ နိုင်ငံမြောက် သွားရောက်သည့် ခရီးစဉ် ဖြစ်လာသည်။

တနင်္သာရီတိုင်း ရေဘေးသင့်ပြည်သူများကို လိုအပ်သည့်အကူအညီများ ထောက်ပံ့နိုင်ရန် ကနဦးဆန်းစစ်လေ့လာမှု ဆောင်ရွက်

တနင်္သာရီတိုင်းဒေသကြီး၊ ထားဝယ်ခရိုင်၊ လောင်းလုံမြို့နယ်ရှိ ရေဘေးသင့်ကျေးရွာများမှ ပြည်သူများအတွက် လိုအပ်သည့် အကူအညီများ ထောက်ပံ့ပေးနိုင်ရန် ကနဦးလိုအပ်ချက် ဆန်းစစ်လေ့လာမှု (Rapid Need Assessment) ပြုလုပ်လျက်ရှိကြောင်း မြန်မာနိုင်ငံကြက်ခြေနီအသင်းက အသိပေးထားသည်။
အဆိုပါ ဆန်းစစ်လေ့လာမှုကို လောင်းလုံမြို့နယ်ရှိ သဗျာကျေးရွာ၊ ကညုံကျွန်းကျေးရွာ၊ ကထောင်းနီကျေးရွာ၊ ကဒက်ငယ်ဆိပ်နှင့် ဝေဒီကျေးရွာတို့တွင် ဆောင်ရွက်နေခြင်းဖြစ်ပြီး ရေဘေးသင့်ပြည်သူများ၏ လတ်တလောလိုအပ်ချက်များကို သိရှိနိုင်ရန်နှင့် လိုအပ်သည့် အကူအညီများ ထောက်ပံ့ပေးနိုင်ရန် ရည်ရွယ်ခြင်းဖြစ်သည်။
ထို့ပြင် ရေဘေးသင့်ပြည်သူများ နေအိမ်များသို့ ပြန်လည်ရောက်ရှိချိန်တွင် လိုအပ်မည့် ပြန်လည်ထူထောင်ရေးလုပ်ငန်းများ ဆောင်ရွက်ပေးနိုင်ရန်အတွက်လည်း လိုအပ်ချက်များကို ဆန်းစစ်လျက်ရှိကြောင်း သိရသည်။
သောက်သုံးရေလိုအပ်နေသည့် ကျေးရွာများတွင် ရေလုံလောက်မှုနှင့် ရေအရည်အသွေး စစ်ဆေးခြင်း၊ ရေသန့်ဆေးပြားများ ဖြန့်ဝေပေးခြင်းတို့ကိုလည်း ဆောင်ရွက်လျက်ရှိသည်။
ယင်းအပြင် ဘေးအန္တရာယ်ဖြစ်နိုင်ခြေများကို သိရှိသတိပြု၍ ဘေးကင်းစွာနေထိုင်နိုင်ရေး အသိပညာပေးခြင်း၊ လက်ကမ်းစာစောင်များ ဖြန့်ဝေခြင်း၊ မိသားစုပြန်လည်ဆက်သွယ်ရေးဆိုင်ရာ အသိပညာပေးခြင်းနှင့် စိတ်ပိုင်းဆိုင်ရာ အားပေးကူညီမှုများကိုလည်း ဆောင်ရွက်ပေးလျက်ရှိကြောင်း မြန်မာနိုင်ငံကြက်ခြေနီအသင်းထံမှ သိရသည်။

မူးယစ်သံသရာအတွင်း ပြန်လည်မရောက်ရှိစေရေး သက်မွေးသင်တန်း ၄၆ ကြိမ် ဖွင့်လှစ်ပေးခဲ့
သင်တန်းဆင်း လူငယ် ၄၀၀ အလုပ်အကိုင်ရရှိရေး စီစဉ်ပေးနေ

လမ်းမှားရောက်နေသည့် လေလွင့်လူငယ်များနှင့် မူးယစ်ဆေးစွဲလူငယ်များ မူးယစ်သံသရာအတွင်း ပြန်လည်မရောက်ရှိစေရေးနှင့် လူမှုအသိုင်းအဝိုင်းအတွင်း ပြန်လည်ဝင်ဆံ့နိုင်ရေးအတွက် သက်မွေးပညာသင်တန်း ၄၆ ကြိမ် ဖွင့်လှစ်ပေးနိုင်ခဲ့ကြောင်း လူငယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာမောင်သင်းက ပြောကြားသည်။
တိုင်းဒေသကြီးနှင့် ပြည်နယ်များရှိ မူးယစ်ဆေးစွဲလူငယ်များအတွက် ပြန်လည်ထူထောင်ရေးစခန်းများ ဖွင့်လှစ်ကာ ဆေးဖြတ်ကုသပေးခြင်း၊ စိတ်ပိုင်းဆိုင်ရာ ပြန်လည်ထူထောင်ပေးခြင်းတို့ ဆောင်ရွက်လျက်ရှိပြီး လူမှုအသိုင်းအဝိုင်းအတွင်း ပြန်လည်ဝင်ဆံ့နိုင်ရေးအတွက် သက်ဆိုင်ရာဝန်ကြီးဌာနနှင့် အဖွဲ့အစည်းများက သက်မွေးပညာသင်တန်းများ ဖွင့်လှစ်ပေးခဲ့ခြင်းဖြစ်သည်။
အဆိုပါ သက်မွေးပညာသင်တန်းများမှ သင်တန်းဆင်းလူငယ် ၄၀၀ အား သင့်လျော်သည့် အလုပ်အကိုင်များရရှိနိုင်ရေးအတွက်လည်း စီစဉ်ဆောင်ရွက်ပေးလျက်ရှိကြောင်း သိရသည်။
ပြည်ထောင်စုဝန်ကြီး ဒေါက်တာမောင်သင်းက တတိယအကြိမ် ပြည်သူ့လွှတ်တော် တတိယပုံမှန်အစည်းအဝေး ၁၂ ရက်မြောက်နေ့တွင် သရက်ချောင်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးရဲထွန်းဝင်း၏ လူငယ်များအကြား မျိုးချစ်စိတ်ဓာတ် မြှင့်တင်ရေးနှင့် Auto Repair သင်တန်းကျောင်းများ ဖွင့်လှစ်ပေးရန် အစီအစဉ် ရှိ၊ မရှိ မေးမြန်းမှုကို ပြန်လည်ဖြေကြားရာ၌ ယင်းသို့ ထည့်သွင်းပြောကြားခဲ့ခြင်းဖြစ်သည်။
ထို့ပြင် လူငယ်များအကြား ဘာသာရေးနှင့် ယဉ်ကျေးမှုအခြေပြု မျိုးချစ်စိတ်ဓာတ် ရှင်သန်ထက်မြက်ရေးအတွက် ၂၀၂၅ ခုနှစ် စက်တင်ဘာလမှ ၂၀၂၆ ခုနှစ် ဩဂုတ်လအထိ အသိပညာပေးဟောပြောပွဲနှင့် လူငယ်စကားဝိုင်း ၂၀၄ ကြိမ်၊ လူငယ်ဖိုရမ်တစ်ကြိမ် ကျင်းပခဲ့ပြီး လူငယ်စုစုပေါင်း ၄၇,၁၁၉ ဦး တက်ရောက်ခဲ့ကြောင်း သိရသည်။
လူငယ်များ အလုပ်အကိုင်နှင့် လုပ်ငန်းခွင်အတွေ့အကြုံများ ရရှိစေရေးအတွက် မြန်မာနိုင်ငံလူငယ်များဖွံ့ဖြိုးတိုးတက်ရေးအသင်း၊ လူငယ်စွန့်ဦးတီထွင်လုပ်ငန်းရှင်များအသင်းတို့နှင့် ပူးပေါင်း၍ Job Ready Skills Workshop နှင့် Career and Opportunity Fair များ ကျင်းပခြင်း၊ လုပ်ငန်းခွင်အတွေ့အကြုံရရှိစေရန် Internship အခွင့်အလမ်းများ ဖန်တီးပေးခြင်းတို့ကိုလည်း ဆောင်ရွက်လျက်ရှိသည်။
ဆက်လက်၍ လူငယ်များ အသက်မွေးဝမ်းကျောင်းပညာရပ်များကို လက်လှမ်းမီသင်ယူနိုင်ရေး၊ အလုပ်အကိုင်အခွင့်အလမ်းများ ဖန်တီးပေးရေး၊ သာတူညီမျှအခွင့်အရေးနှင့် လုပ်ငန်းခွင်အတွင်း စိတ်ချလုံခြုံမှုရှိစေရေးတို့အတွက် မြန်မာနိုင်ငံလူငယ်ရေးရာဗဟိုကော်မတီဝင် ဆက်စပ်ဝန်ကြီးဌာနများ၊ အသင်းအဖွဲ့များနှင့် ပူးပေါင်းဆောင်ရွက်လျက်ရှိကြောင်း သိရသည်။

ပြည်သူ့ဆေးရုံများတွင် Hospital Information System ဆောင်ရွက်နေပြီ

ပြည်သူ့ဆေးရုံများတွင် ဒီဂျစ်တယ်ဖွံ့ဖြိုးတိုးတက်ရေးဦးစီးဌာနနှင့် ပူးပေါင်း၍ Hospital Information System (HIS) ကို ဆောင်ရွက်နေပြီဖြစ်ကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက ပြောကြားသည်။
ဆေးတက္ကသိုလ်များနှင့် ဆေးပညာနှီးနွှယ်တက္ကသိုလ်များတွင် Digital နှင့် e-Government လုပ်ငန်းစဉ်များ အကောင်အထည်ဖော်နိုင်ရေး ညှိနှိုင်းအစည်းအဝေး၌ ပြည်ထောင်စုဝန်ကြီးက ယင်းသို့ ပြောကြားခဲ့ခြင်းဖြစ်သည်။
ကျန်းမာရေးကဏ္ဍ၏ ဒစ်ဂျစ်တယ်စနစ် ဖွံ့ဖြိုးတိုးတက်ရေးအတွက် ပြည်သူ့ဆေးရုံများတွင် Hospital Information System ကို ဆောင်ရွက်နေသည့်အပြင် ဆေးရုံကြီးများတွင် Telemedicine System ကိုလည်း အကောင်အထည်ဖော်ဆောင်ရွက်လျက်ရှိကြောင်း သိရသည်။
ထို့ပြင် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) တွင် e-Submission နှင့် Digital Payment System များကိုလည်း ဆောင်ရွက်လျက်ရှိသည်။
ဆေးတက္ကသိုလ်များနှင့် ဆေးပညာနှီးနွှယ်တက္ကသိုလ်များအနေဖြင့် Digital Student Information Management System ကို တက္ကသိုလ်အားလုံး အသုံးပြုနိုင်သည့် Common Digital Platform တစ်ခုဖြစ်လာစေရေး ဆောင်ရွက်ရန်နှင့် Data Security ပိုင်းကိုလည်း အဆင့်မြှင့်တင်ရန် လိုအပ်ကြောင်း ပြည်ထောင်စုဝန်ကြီးက ပြောကြားသည်။
အဆိုပါအစည်းအဝေးသို့ ကျန်းမာရေးဝန်ကြီးဌာန ဒုတိယဝန်ကြီး၊ အမြဲတမ်းအတွင်းဝန်၊ ကျန်းမာရေးလူ့စွမ်းအားအရင်းအမြစ်ဦးစီးဌာနမှ တာဝန်ရှိသူများနှင့် ဆေးတက္ကသိုလ်များ၊ ဆေးပညာနှီးနွှယ်တက္ကသိုလ်များမှ ပညာရပ်ဆိုင်ရာတာဝန်ရှိသူများ တက်ရောက်ခဲ့ကြောင်း သိရသည်။