ကိုရီးယား သံရုံးနှင့် Taekwondo Promotion Foundation တို့ ပူးပေါင်းပြီး အခမဲ့ တိုက်ကွမ်ဒို သင်တန်းဖွင့်မည်

မြန်မာနိုင်ငံဆိုင်ရာ ကိုရီးယားသမ္မတနိုင်ငံသံရုံး နှင့် Taekwondo Promotion Foundation တို့ ပူးပေါင်းပြီး မြန်မာလူငယ်များအတွက် အခမဲ့ တိုက်ကွမ်ဒိုသင်တန်း ဖွင့်လှစ်ပေးမည်ဖြစ်ကြောင်း ယနေ့ မေလ ၂၆ ရက်နေ့တွင် အသိ‌ပေးထားသည်။
အဆိုပါ သင်တန်းကို Taekwondo Promotion Foundation နှင့် မြန်မာနိုင်ငံဆိုင်ရာ ကိုရီးယားသံရုံး ပြည်သူ့သံတမန်ရေးရာအဖွဲ့တို့ ပူးပေါင်းစီစဉ်ထားပြီး သင်တန်းကနေတစ်ဆင့် ကိုယ်ခန္ဓာကြံ့ခိုင်မှုကို မြှင့်တင်နိုင်မည်ဖြစ်ကြောင်း သိရသည်။
သင်တန်းကို ဇွန်လ ၁၃ ရက် နေ့တွင် စတင်မည်ဖြစ်ပြီး အပတ်စဉ် စနေ့နေ့တိုင်း လှစ်မည်ဖြစ်ကြောင်း သိရသည်။
တိုက်ကွမ်ဒိုပညာရပ်ကို စိတ်ပါဝင်စားသည့် မြန်မာလူငယ် မည်သူမဆို လျှောက်ထားနိုင်ပြီး သင်တန်းကြေးအခမဲ့ဖြစ်သလို လျှောက်ထားသူဦးရေး ကန့်သတ်ထားခြင်းကြောင့် အမြန်ဆုံးလျှောက်ထားနိုင်ကြောင်း မြန်မာနိုင်ငံဆိုင်ရာ ကိုးရီယား သံရုံး၏ facebook လူမှုကွန်ယက်စာမျက်နှာတွင် အသိပေးထုတ်ပြန်ထားသည်။

လာမည့် (၄၈)နာရီအတွင်း အနောက်တောင်မုတ်သုံလေ မြန်မာနိုင်ငံအလယ်ပိုင်းဒေသများသို့ဝင်ရောက်နိုင်

အနောက်တောင်မုတ်သုံလေသည် လာမည့် (၄၈)နာရီအတွင်း မြန်မာနိုင်ငံအလယ်ပိုင်းဒေသများသို့ဝင်ရောက်နိုင်သည်ဟု မိုးဇလက ယနေ့ မေ ၂၆ ရက်ညနေ ၄ နာရီတွင် အသိပေးခဲ့သည်။
ထို့ပြင် ကပ္ပလီပင်လယ်ပြင်၊ ဘင်္ဂလားပင်လယ်အော် (တောင်ပိုင်း)နှင့်(အရှေ့အလယ်ပိုင်း)တို့တွင် မုတ်သုံ လေအားကောင်းနေ၍ မနက်ဖြန် မေ ၂၇ ရက်နံနက်ပိုင်းအထိ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်၍မိုးကြီးနိုင်သည်ဟုအသိပေးခဲ့သည်။
ထို့အတူ ရန်ကုန်တိုင်း၊ နေပြည်တော်၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင်မိုးတိမ်တောင်များဖြစ်ထွန်းလျက်ရှိပြီး မိုးတိမ်တောင်များရွေ့လျားရာနေရာတစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းများဖြစ်ပေါ်နိုင်၍ ကြိုတင်သတိပြုကြရန်လည်း အသိပေးခဲ့သည်။
ထို့ပြင် မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင်လည်း တစ်ခါတစ်ရံမိုးသက်လေပြင်းများကျရောက်ပြီး လှိုင်းအသင့်အတင့်မှ လှိုင်းကြီးနိုင်သည်ဟု မိုးဇလကအသိပေးခဲ့သည်။

ကချင်ပြည်နယ် ခရီးသွားကဏ္ဍ အရှိန်မြင့်တက်၊ ၅ နှစ်အတွင်း ဟိုတယ်နှင့် ခရီးသွားလုပ်ငန်းလိုင်စင်သစ် ၉၁ ခု ချထားပေး

ကချင်ပြည်နယ်အတွင်း ပြီးခဲ့သည့် ငါးနှစ်တာကာလအတွင်း ဟိုတယ်အသစ် ၂၂ လုံး၊ တည်းခိုရိပ်သာအသစ် ၂၃ လုံးနှင့် ခရီးသွားလှည့်လည်ရေးကုမ္ပဏီအသစ် ၄၆ ခုတို့အား လိုင်စင်အသစ်များ ထုတ်ပေးခဲ့ကြောင်း သိရသည်။
ယင်းသို့ တိုးချဲ့ဆောင်ရွက်မှုများကြောင့် လက်ရှိတွင် ကချင်ပြည်နယ်၌ ဟိုတယ် ၆၆ လုံး၊ တည်းခိုရိပ်သာ ၃၁ လုံး၊ အခန်းစုစုပေါင်း ၂,၉၅၀ ခန်းနှင့် ခရီးသွားလှည့်လည်ရေးကုမ္ပဏီ ၈၁ ခုအထိ ဖွင့်လှစ်လည်ပတ်လျက်ရှိကြောင်း သိရသည်။
ထို့ပြင် ဟိုတယ်နှင့် ခရီးသွားညွှန်ကြားမှုဦးစီးဌာနမှ ဒုတိယညွှန်ကြားရေးမှူး ဦးဆောင်၍ အာဆီယံအသိအမှတ်ပြု နိုင်ငံအဆင့်ဆရာဖြစ် သင်တန်းလက်မှတ်ရရှိထားသည့် ဆရာ၊ ဆရာမများက ဟိုတယ်ဆိုင်ရာ ဧည့်ကြိုဝန်ဆောင်မှု၊ အိပ်ခန်းဆောင်ထိန်းသိမ်းရေးနှင့် အဖျော်ယမကာဝန်ဆောင်မှု သင်တန်းသုံးမျိုးကို ဖွင့်လှစ်သင်ကြားပေးသွားမည်ဖြစ်ကြောင်း သိရသည်။
အဆိုပါသင်တန်းများကို သင်တန်းတစ်တန်းလျှင် သင်တန်းသား ၃၀ ဦးဖြင့် လေးပတ်ကြာ ဖွင့်လှစ်သွားမည်ဖြစ်ပြီး သင်တန်းဖွင့်ပွဲအခမ်းအနားကို ယနေ့ကျင်းပခဲ့ရာ ကချင်ပြည်နယ်ဝန်ကြီးချုပ် ဦးခက်ထိန်နန် တက်ရောက်ခဲ့ကြောင်း သိရသည်။
ဝန်ကြီးချုပ် ဦးခက်ထိန်နန်က ဟိုတယ်လုပ်ငန်းများ ဖွံ့ဖြိုးတိုးတက်ရေးနှင့် ဝန်ဆောင်မှုအရည်အသွေး မြင့်မားလာစေရေးအတွက် ယခုကဲ့သို့ ဝန်ဆောင်မှုအဆင့်မြှင့်တင်ရေး သင်တန်းများ ဖွင့်လှစ်ပေးခြင်းဖြင့် ခရီးသွားဧည့်သည်များအား အဆင့်မီဝန်ဆောင်မှုများ ပေးစွမ်းနိုင်မည်ဖြစ်ကြောင်း ပြောကြားခဲ့သည်။
ထို့အပြင် ဟိုတယ်ဝန်ဆောင်မှု ကျွမ်းကျင်သည့် လူသားအရင်းအမြစ်များ ပိုမိုဖွံ့ဖြိုးလာမည်ဖြစ်သကဲ့သို့ ခရီးသွားဧည့်သည်များအနေဖြင့် လုံခြုံစိတ်ချစွာ တည်းခိုနိုင်မည်ဖြစ်ကြောင်း၊ ပြည်နယ်၏ ဂုဏ်သိက္ခာနှင့် အကျိုးစီးပွားကို မြှင့်တင်ပေးနိုင်သည့် ဟိုတယ်များဖြစ်လာစေရေးအတွက် သက်ဆိုင်သူအားလုံး ပူးပေါင်းကြိုးပမ်းဆောင်ရွက်ကြရန် လိုအပ်ကြောင်း တိုက်တွန်းပြောကြားခဲ့သည်။

မုံရွာမြို့နယ်၌ အခြေခံပညာစာသင်ကျောင်း(၁၀၁) ကျောင်းအပြင် ကိုယ်ပိုင်ကျောင်းနှင့် ဘုန်းတော်ကြီးသင်ကျောင်းများဖွင့်လှစ်မည်

လာမည့် ဇွန် ၁ ရက်မှစတင်မည့် ၂၀၂၆ -၂၀၂၇ ပညာ သင်နှစ်တွင် စစ်ကိုင်းတိုင်း၊ မုံရွာမြို့နယ်၌ အခြေခံပ ညာစာသင်ကျောင်း(၁၀၁)ကျောင်းအပြင် ကိုယ်ပိုင် ကျောင်းများနှင့် ဘုန်းတော်ကြီးသင်ကျောင်းများဖွင့်လှစ်ပို့ချသွားမည်ဖြစ်ကြောင်း သိရသည်။
အထက်တန်းကျောင်း(၁၃)ကျောင်း၊ အထက်တန်း ကျောင်း(ခွဲ)(၉)ကျောင်း၊ အလယ်တန်းကျောင်း(၂) ကျောင်း၊ အလယ်တန်းကျောင်း(ခွဲ)(၁၀)ကျောင်း၊ မူလတန်း(လွန်)ကျောင်း(၁၇)ကျောင်း၊ မူလတန်းကျောင်း (၅၀)ကျောင်းတို့အပြင် ကိုယ်ပိုင်ကျောင်း(၁၉)ကျောင်း ၊ ဘုန်းတော်ကြီးသင်ကျောင်း(၁၁)ကျောင်းဖွင့်လှစ်သွားမည်ဖြစ်ကြောင်း သိရသည်။
ထို့ကြောင့် ကျောင်းသား/သူများအား ကျောင်းအပ်လက်ခံခြင်းကို မေ ၂၅ ရက်မှစတင်ပြုလုပ်လျက်ရှိပြီး နိုင်ငံတော်အစိုးရကအခမဲ့ထောက်ပံ့သည့် ကျောင်းသုံးပစ္စည်းများကို ကျောင်းသား/သူများအားပေးအပ်လျက်ရှိကြောင်း သိရသည်။

ပဲခူးတိုင်း၌ ၂၀၂၆-၂၀၂၇ ပညာသင်နှစ်တွင် အခြေခံ ပညာစာသင်ကျောင်း(၄,၆၇၁)ကျောင်းဖွင့်လှစ်မည်

၂၀၂၆-၂၀၂၇ ပညာသင်နှစ်၌ ပဲခူးတိုင်းအတွင်းရှိ အခြေခံပညာစာသင်ကျောင်း(၄,၆၇၁)ကျောင်းကိုဖွင့်လှစ်သင်ကြားသွားမည်ဖြစ်ကြောင်း သိရသည်။
အစိုးရကျောင်းအနေဖြင့် အခြေခံပညာအထက်တန်း ကျောင်း(၅၀၀)ကျောင်း၊ အလယ်တန်းကျောင်း (၂,၁၅၉)ကျောင်း၊ မူလတန်းကျောင်း(၁,၈၂၃)ကျောင်း၊ ဘုန်းတော်ကြီးသင်ပညာရေးကျောင်းအနေဖြင့် အခြေ ခံပညာအလယ်တန်းကျောင်း(၆၇)ကျောင်း၊ မူလတန်းကျောင်း(၅)ကျောင်း၊ ပုဂ္ဂလိကကျောင်းအနေဖြင့် အ ခြေခံပညာအထက်တန်းကျောင်း(၈၇)ကျောင်း၊ အ လယ်တန်း(၁၆)ကျောင်းနှင့် မူလတန်း(၁၄)ကျောင်းတို့ ဖွင့်လှစ်သင်ကြားသွားမည်ဖြစ်ကြောင်း သိရသည်။
အဆိုပါ အခြေခံပညာကျောင်းများ၏ ၂၀၂၆-၂၀၂၇ ပညာသင်နှစ် ကျောင်းအပ်နှံရေးနေ့အခမ်းအနားကို ယနေ့ မေ ၂၆ ရက်နံနက်ပိုင်းကကျင်းပရာ ပဲခူးတိုင်းဝန် ကြီးချုပ်ဦးမျိုးဆွေဝင်းနှင့် ဇနီးတို့တက်ရောက်ခဲ့ကြကြောင်း သိရသည်။
တိုင်းဝန်ကြီးချုပ်က ကျောင်းအပ်နှံပေးခြင်းသည် သား သမီးများ၏ ဘဝတစ်သက်တာအတွက် အကောင်းဆုံးလက်ဆောင်တစ်ခုပေးခြင်းဖြစ်ပြီး အနာဂတ်နိုင်ငံတော်ဖွံ့ဖြိုးသာယာအေးချမ်းရန် ရင်းနှီးမြှုပ်နှံမှုတစ်ခုပြုလုပ်ခြင်းဖြစ်၍ နိုင်ငံတော်အစိုးရအဖွဲ့မှဖွင့်လှစ်ပေးနေသော အခြေခံပညာကျောင်းများကို ကျောင်းနေအရွယ်က လေးအားလုံးအပ်နှံရန်နှင့် ပညာရေးကဏ္ဍဖွံ့ဖြိုးတိုး တက်စေရေးအတွက်ဘက်ပေါင်းစုံမှဖြည့်ဆည်းပေးသွားမည်ဟု ပြောကြားခဲ့သည်။
ထို့နောက် တိုင်းဝန်ကြီးချုပ်က နိုင်ငံတော်မှအခမဲ့ဖြန့်ဝေပေးသည့် ကျောင်းသုံးစာအုပ်များ၊ မူလတန်းကျောင်းဝတ်စုံများ၊ စာသင်ခန်းသုံးသင်ထောက်ကူပစ္စည်းများနှင့် ခဲတံ၊ ဘောပင်တို့အား သက်ဆိုင်ရာခရိုင်ပညာရေးမှူးများထံပေးအပ်ခဲ့ကြောင်း သိရသည်။
ထို့ပြင် အမှတ်(၁)အခြေခံပညာအထက်တန်းကျောင်း၌ KG မှ Grade 12 အထိ စာသင်ခန်းများအလိုက် ကျောင်းသား/သူများကျောင်းအပ်နှံနေမှုကိုကြည့်ရှုအားပေးခဲ့ကြောင်း သိရသည်။

လာမည့်(၅)နှစ်တာအတွင်း ထာဝရငြိမ်းချမ်းရေးရရှိရန် မျှော်မှန်းဆောင်ရွက်သွားမည်ဟု နိုင်ငံတော် သမ္မတပြော

လာမည့်(၅)နှစ်တာအတွင်း ထာဝရငြိမ်းချမ်းရေးရရှိရန် မျှော်မှန်းဆောင်ရွက်သွားမည်ဟု နိုင်ငံတော် သမ္မတ ဦးမင်းအောင်လှိုင်က ယနေ့ မေ ၂၆ ရက်တွင်ကျင်းပသည့် ပြည်ထောင်စုအစိုးရအဖွဲ့အစည်းအဝေး၌ ပြောကြားခဲ့ခြင်းဖြစ်သည်။
နိုင်ငံတော်အစိုးရအနေဖြင့် ထာဝရငြိမ်းချမ်းရေးရရှိရန် မည်သို့ပင်ဖိတ်ခေါ်ကမ်းလှမ်းနေသည်ဖြစ်စေ လက် နက်ကိုင်အဖွဲ့များအနေဖြင့် ယုံကြည်ချက်၊ ခံယူချက်ရှိစွာဖြင့် အမှန်တကယ်ငြိမ်းချမ်းရေးရယူလိုစိတ်၊ နိုင်ငံတော်ဖွံ့ဖြိုးတိုးတက်ရေးအတွက် အတူတကွဝိုင်းဝန်းပူးပေါင်းဆောင်ရွက်လိုစိတ်ရှိရန်လိုအပ်မည်ဟု ပြော သည်။
"နိုင်ငံရေးအရ၊ လုံခြုံရေးအရ၊ စီးပွားရေးအရ အား နည်းချက်တွေဖြစ်ပေါ်နေတာကို အလေးထားပြီးပြုပြင်ပြောင်းလဲမှုတွေဆောင်ရွက်ရပါမယ်။ မိမိတို့အစိုးရအနေနဲ့ ကောင်းမွန်တဲ့ ဦးဆောင်မှုတွေနဲ့ နိုင်ငံရေးအား၊ စီးပွားရေးအား၊ ကာကွယ်ရေးအားတွေတိုးတက်လာစေဖို့၊ နိုင်ငံတကာမျက်နှာစာမှာ နိုင်ငံဂုဏ်သိက္ခာကိုမြှင့်တင်သွားနိုင်ဖို့ကြိုးပမ်းဆောင်ရွက်ရပါမယ်"ဟု နိုင်ငံတော်သမ္မတက ပြောသည်။
ထို့ကြောင့် ပြည်ထောင်စုအဆင့်ပုဂ္ဂိုလ်များ၊ ပြည် ထောင်စုဝန်ကြီးများ၊ တိုင်းနှင့် ပြည်နယ်ဝန်ကြီးချုပ်များအနေဖြင့် နိုင်ငံရေး၊ စီးပွားရေး၊ လုံခြုံရေးနှင့်ပတ်သက်လာပါက အမြင်ကျယ်စွာဖြင့်ကျယ်ကျယ်ပြန့်ပြန့်တွေးခေါ်ဆောင်ရွက်ရမည်ဟု မှာကြားသည်။
ထို့ပြင် မိမိတို့သည် ပါတီစုံဒီမိုကရေစီစနစ်ကိုကျင့်သုံးလျက်ရှိပြီး ဖွဲ့စည်းပုံအခြေခံဥပဒေ(၂၀၀၈ ခုနှစ်)တွင်လည်း ဗဟိုအစိုးရ၏လုပ်ပိုင်ခွင့်များ၊ တိုင်းနှင့် ပြည် နယ်များအလိုက်လုပ်ပိုင်ခွင့်များကို ပြဋ္ဌာန်းထားပြီးဖြစ်၍ ဥပဒေပြဋ္ဌာန်းခြင်းဆိုင်ရာများအရ တိုင်းနှင့် ပြည်နယ်များအလိုက်၊ ကိုယ်ပိုင်အုပ်ချုပ်ခွင့်ရဒေသများအလိုက် ဆောင်ရွက်ရန်ကျန်ရှိသည်များကို ယခု (၆)လအတွင်း တိုးတက်အောင်ဆောင်ရွက်ရမည်ဟု နိုင်ငံတော်သမ္မတက မှာကြားခဲ့သည်။

“KG+9 မသင်မနေရပညာရေး အကောင်အထည်ဖော်မည်”

ကျောင်းနေအရွယ်ကလေးများအားလုံး ပညာသင်ကြားနိုင်ရေး နိုင်ငံတော်စီစဉ်ဆောင်ရွက်မည်ဟု သမ္မတပြော
နိုင်ငံတော်သမ္မတ ဦးမင်းအောင်လှိုင်က ကျောင်းနေအရွယ်ကလေးငယ်များအားလုံး ပညာသင်ကြားနိုင်ရေးအတွက် နိုင်ငံတော်အနေဖြင့် တတ်နိုင်သမျှ စီစဉ်ဆောင်ရွက်ပေးသွားမည်ဖြစ်ကြောင်း မေ ၂၆ ရက် နံနက်ပိုင်းတွင် ကျင်းပသည့် ပြည်ထောင်စုအစိုးရအဖွဲ့အစည်းအဝေး၌ ပြောကြားခဲ့သည်။
ကျောင်းအပ်ရာသီရောက်ရှိလာပြီဖြစ်သဖြင့် KG+9 အထိ မသင်မနေရပညာရေးစနစ် အကောင်အထည်ဖော်နိုင်ရေးနှင့် ကျောင်းနေအရွယ်ကလေးများအားလုံး ကျောင်းတက်ရောက်ပညာသင်ကြားနိုင်ရေးတို့ကို ဆောင်ရွက်ပေးရမည်ဖြစ်ကြောင်း ၎င်းကဆိုသည်။
“ပညာရေးကို အားပေးမှသာ ကျေးလက်ဒေသများတွင် အလုပ်အကိုင်အခွင့်အလမ်းများ ပိုမိုရရှိလာမည်ဖြစ်သည်။ ကျောင်းပညာရေးကို အားမပေးပါက နောင်အနာဂတ်တွင် ကလေးငယ်များ၏ ဘဝလမ်းခရီး ခက်ခဲလာနိုင်သည်ကို သတိပြုရမည်ဖြစ်ကြောင်း” နိုင်ငံတော်သမ္မတက ပြောကြားခဲ့သည်။
ထို့ပြင် တစ်နိုင်ငံလုံး၏ ပညာရည်မြင့်မားလာခြင်းသည် နိုင်ငံဖွံ့ဖြိုးတိုးတက်ရေးကို ပိုမိုလျင်မြန်စေမည်ဖြစ်ကြောင်းလည်း ထည့်သွင်းပြောကြားခဲ့သည်။
နိုင်ငံတော်သမ္မတက ကျောင်းများကို စနစ်တကျ စီမံခန့်ခွဲနိုင်ရေး၊ သတ်မှတ်စံနှုန်းများနှင့် ကိုက်ညီစေရေး၊ ကျောင်းပတ်ဝန်းကျင် သန့်ရှင်းသာယာလှပစေရေးနှင့် အခြေခံအဆောက်အအုံများ ကောင်းမွန်စေရေးအတွက် လိုအပ်ချက်များ ဖြည့်ဆည်းဆောင်ရွက်ပေးရန်လည်း မှာကြားခဲ့သည်။
ထို့အပြင် ချင်းပြည်နယ်အတွင်း လက်နက်ကိုင်ပဋိပက္ခများကြောင့် ထိခိုက်ပျက်စီးခဲ့သည့် ဆေးရုံများ၊ စာသင်ကျောင်းများ၊ အစိုးရရုံးဌာနများနှင့် ဘာသာရေးအဆောက်အအုံများအား အမြန်ဆုံးပြန်လည်ပြုပြင်နိုင်ရေးအတွက် လိုအပ်သည့် ဆောက်လုပ်ရေးပစ္စည်းများ ပို့ဆောင်ပေးလျက်ရှိကြောင်း သိရသည်။
ယင်းအနက် ဆေးရုံများနှင့် စာသင်ကျောင်းများကို ဦးစားပေးပြုပြင်ပေးသွားမည်ဖြစ်ပြီး အများပြည်သူအသုံးပြုသည့် ဈေးများနှင့် အခြားအစိုးရအဆောက်အအုံများကိုလည်း ပြန်လည်ပြင်ဆင်ပေးသွားမည်ဖြစ်ကြောင်း နိုင်ငံတော်သမ္မတက ပြောကြားခဲ့သည်။
ထို့နောက် ချင်းပြည်နယ်ပြန်လည်ထူထောင်ရေးလုပ်ငန်းများတွင် နိုင်ငံတော်မှ ဆောင်ရွက်ပေးနေသကဲ့သို့ တိုင်းနှင့်ပြည်နယ်များအနေဖြင့်လည်း တတ်နိုင်သည့်ဘက်မှ ဝိုင်းဝန်းကူညီဆောင်ရွက်ပေးကြရန် တိုက်တွန်းပြောကြားခဲ့သည်။

“ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကို တည်ဆောက်မည်” ဟု နိုင်ငံတော်သမ္မတ ပြောကြား“
လူမျိုးအခြေပြုဖက်ဒရယ်မဟုတ်ဘဲ နယ်မြေဒေသအခြေပြု ဖက်ဒရယ်ဖြစ်ရမည်” ဟုဆို“

ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကို ရအောင်တည်ဆောက်မည်” ဟု နိုင်ငံတော်သမ္မတ ဦးမင်းအောင်လှိုင်က မေ ၂၆ ရက် နံနက်ပိုင်းတွင် ကျင်းပသည့် ပြည်ထောင်စုအစိုးရအဖွဲ့ အစည်းအဝေး၌ ပြောကြားခဲ့သည်။“
နိုင်ငံရေးအရ ပါတီစုံဒီမိုကရေစီစနစ် ခိုင်ခိုင်မာမာဖြစ်စေရန် ဆောင်ရွက်ရမည်ဖြစ်ပြီး ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကို ရအောင်တည်ဆောက်မည်။ ဖက်ဒရယ်ဆိုရာတွင် နယ်မြေဒေသကိုပေးသည့် ဖက်ဒရယ်ဖြစ်ပြီး လူမျိုးကိုပေးသည့် ဖက်ဒရယ်မဟုတ်ကြောင်း” နိုင်ငံတော်သမ္မတက ပြောကြားခဲ့သည်။
ထို့ပြင် တိုင်းပြည်သာယာဝပြောရေးအတွက် အလုပ်အကိုင်အခွင့်အလမ်းများ ဖန်တီးပေးရန်၊ ပြည်သူများ အမှန်တကယ် အလုပ်လုပ်ကိုင်နိုင်စေရန်နှင့် လုပ်တတ်ကိုင်တတ်စေရန် ဗဟိုအစိုးရသာမက ပြည်နယ်နှင့် တိုင်းဒေသကြီးအဆင့်များကလည်း ပူးပေါင်းဖော်ဆောင်ပေးရမည်ဖြစ်ကြောင်း ပြောကြားခဲ့သည်။
ယင်းသို့ ဆောင်ရွက်ပေးနိုင်မှသာ ပြည်သူများ၏ ဝင်ငွေတိုးတက်လာမည်ဖြစ်ပြီး လူမှုစီးပွားဘဝများ ဖွံ့ဖြိုးတိုးတက်လာကာ နိုင်ငံတော်အစိုးရအပေါ် ယုံကြည်မှုများလည်း ပိုမိုရှိလာမည်ဟု ဆိုသည်။
ထို့ကြောင့် အတိတ်က ဖြစ်ပေါ်ခဲ့သည့် ဖြစ်စဉ်များမှ သင်ခန်းစာယူကာ နောင်အနာဂတ်တွင် အလားတူဖြစ်ရပ်များ ထပ်မံမဖြစ်ပေါ်စေရေး ဆောင်ရွက်ရမည်ဖြစ်ကြောင်း၊ နိုင်ငံရေးတည်ငြိမ်အေးချမ်းရေး၊ စီးပွားရေးအားကောင်းရေးနှင့် လက်နက်ကိုင်ပဋိပက္ခများ ချုပ်ငြိမ်းရေးတို့ကို အလေးထားဆောင်ရွက်ရမည်ဖြစ်ကြောင်း နိုင်ငံတော်သမ္မတက ပြောကြားခဲ့သည်။
ထို့အပြင် နိုင်ငံတကာဆက်ဆံရေးကောင်းမွန်စေရေးအတွက် ပြည်ထောင်စုအဆင့်ပုဂ္ဂိုလ်များ၊ ပြည်ထောင်စုဝန်ကြီးများနှင့် တိုင်းဒေသကြီး/ပြည်နယ် ဝန်ကြီးချုပ်များအနေဖြင့် နိုင်ငံတကာနှင့် ဆက်ဆံဆောင်ရွက်ရာတွင် နိုင်ငံအကျိုးကို ရှေးရှုသည့် ပြောဆိုဆက်ဆံမှုများ ဖြစ်စေရန် လိုအပ်ကြောင်းလည်း မှာကြားခဲ့သည်။

ထရမ့်ရဲ့ ကြီးရင့်လာတဲ့ အသက်အရွယ်နဲ့ သူ့အသက်အန္တရာယ်အပေါ် ခြိမ်းခြောက်မှုတွေက သေခြင်းတရားအသိကို သတိပေးသလို ဖြစ်လာ

အင်္ဂါနေ့တုန်းက သမ္မတ ဒေါ်နယ်ထရမ့်ဟာ ဆေးစစ်ချက်ခံယူပြီး ဆေးရုံကနေ ထွက်ခွာလာချိန်၊ အိမ်ဖြူတော်ကိုအပြန်လမ်းမှာ အရာအားလုံးဟာ "အဆင်ပြေပြေ ကောင်းမွန်လွန်းတယ်" လို့ ပြောကြားခဲ့ပါတယ်။
ဒါပေမဲ့ ဒီပြောကြားချက်က ထရမ့်ရဲ့ ကျန်းမာရေးနဲ့ပတ်သက်ပြီး မေးခွန်းထုတ်နေကြတာတွေကို ငြိမ်သက်သွားစေဖို့ မလုံလောက်ပါဘူး။ ပြီးတော့ သမ္မတကိုယ်တိုင်ကလည်း ကမ္ဘာမြေပေါ်မှာ သူ့အတွက် အချိန်သိပ်မကျန်တော့ဘူးဆိုတာကို ရံဖန်ရံခါ ပြန်တွေးမိပြီး ကောင်းကင်ဘုံကို ရောက်ပါ့မလားလို့ ထုတ်ဖော်တွေးတောရင်း လုံခြုံရေးပိုင်းနဲ့ ဆက်စပ်ပြီးတော့ ဖြစ်လေ့ရှိပေမယ့်၊ သူလည်း သေခြင်းတရားနဲ့ နီးနေပြီဆိုတာကို မသိမသာ ဝန်ခံလာတာတွေ ရှိနေပါတယ်။
“ကျွန်တော် ဘယ်လောက်အထိ အသက်ရှင်နေဦးမလဲတော့ မသိဘူး၊ ကျွန်တော့်ကို ပစ်မှတ်ထား နှိပ်ကွပ်ချင်နေတဲ့သူတွေ အများကြီးရှိတယ်” လို့ ဒီနှစ်အစောပိုင်းက East Room မှာ ပြုလုပ်တဲ့ အခမ်းအနားတစ်ခုမှာ သူက တွေးတွေးဆဆနဲ့ ပြောခဲ့ပါတယ်။
ထရမ့်အနေနဲ့ Walter Reed အမျိုးသားစစ်ဆေးရုံကို ကျန်းမာရေးစစ်ဆေးဖို့ သွားရောက်တာဟာ မနှစ်က အမေရိကန်သမိုင်းတစ်လျှောက် အသက်အကြီးဆုံး သမ္မတအဖြစ် ကျမ်းသစ္စာကျိန်ဆိုပြီးကတည်းကဆိုရင် သုံးကြိမ်မြောက် ရှိပြီဖြစ်ပါတယ်။ သူဟာ ဒီနှစ်ထဲမှာ ဖလော်ရီဒါက သွားဆရာဝန်ဆီ နှစ်ကြိမ်တောင် သွားပြထားပြီးဖြစ်ပေမယ့် အိမ်ဖြူတော်ကတော့ ဒီတစ်ခေါက် ကျန်းမာရေးစစ်ဆေးမှုမှာ "ပုံမှန်နှစ်ပတ်လည် သွားနဲ့ ခန္ဓာကိုယ် ကျန်းမာရေးဆန်းစစ်ချက်တွေ" ပါဝင်မယ်လို့ ပြောပါတယ်။
ထရမ့်နဲ့ သူ့ရဲ့အဖွဲ့ကတော့ သူ့ကို အကန့်အသတ်မရှိတဲ့ စွမ်းအင်တွေ၊ အနှိုင်းမဲ့ ထက်မြက်မှုတွေရှိတဲ့ ခေါင်းဆောင်တစ်ဦးအဖြစ် စိတ်အားထက်သန်စွာ ဖော်ပြလေ့ရှိပြီး အသက်ကြီးလာလို့ သိသိသာသာ ပြောင်းလဲလာတာတွေနဲ့ အစည်းအဝေးတွေမှာ ငိုက်မြည်းနေတတ်တဲ့ အခြေအနေတွေကိုတော့ ဂရုမစိုက်သလို နေကြပါတယ်။ ဒါပေမဲ့ မကြာခဏဆိုသလို စစ်ဆေးမှုတွေလုပ်ပြီးနောက် သူ့ရဲ့ဆရာဝန်က ကောင်းမွန်ကြောင်း အမွှမ်းတင် ထုတ်ပြန်ချက်တွေ ပေးခဲ့ပေမယ့်လည်း ထရမ့်ရဲ့ ကျန်းမာရေးအပေါ် သံသယတွေကိုတော့ မဖျောက်ဖျက်နိုင်ခဲ့ပါဘူး။
ဥပဒေအရ သမ္မတတွေဟာ သူတို့ရဲ့ ကျန်းမာရေးအခြေအနေကို ထုတ်ပြန်ဖို့ မလိုတာကြောင့် သူတို့ ထုတ်ပြန်သမျှဟာ ကိုယ်ပိုင်ဆန္ဒအရပဲ ဖြစ်ပါတယ်။ ထရမ့်မတိုင်ခင်က သမ္မတတော်တော်များများဟာလည်း တာဝန်ထမ်းဆောင်စဉ်အတွင်းမှာ သူတို့ရဲ့ ကျန်းမာရေးပြဿနာတွေကို ဖုံးကွယ်ထားခဲ့ကြတယ်ဆိုတာ နောက်ပိုင်းမှ သိခဲ့ရတာပါ။
သူ့ရဲ့ နိုင်ငံရေးပုံရိပ်ကို အားအင်ပြည့်ဝပြီး ကြံ့ခိုင်မှုရှိတယ်ဆိုတဲ့ အသွင်အပြင်ပေါ်မှာ တည်ဆောက်ထားတဲ့ ထရမ့်ဟာ ခန္ဓာကိုယ်ပိုင်းဆိုင်ရာ အားနည်းချက်တစ်ခုခုကို ဝန်ခံဖို့ဆိုရင် အတော်လေး ဝန်လေးတတ်တာနဲ့ နာမည်ကြီးပါတယ်။

ဖလမ်းမြို့ပြန်လည်ထူထောင်ရေးလုပ်ငန်းသုံးပစ္စည်းများနှင့် လူသုံးကုန်ပစ္စည်းများရောက်ရှိ

ချင်းပြည်နယ်၊ ဖလမ်းမြို့ပြန်လည်ထူထောင်ရေးလုပ် ငန်းသုံးပစ္စည်းများနှင့် ဒေသခံများအတွက် လူသုံးကုန် ပစ္စည်းများ မေ ၂၆ ရက်ညနေပိုင်းက ရောက်ရှိခဲ့ကြောင်း သိရသည်။
တပ်မတော်က ဖလမ်းမြို့အားအပြည်အဝပြန်လည်ထိန်းချုပ်သိမ်းပိုက်ခဲ့ပြီးနောက် မြို့အားပြန်လည်ထူ ထောင်ရေးလုပ်ငန်းများဆောင်ရွက်လျက်ရှိရာ ဘိလပ် မြေ၊ သွပ်၊ သွပ်ရိုက်သံတို့အပါအဝင် ဆောက်လုပ်ရေးလုပ်ငန်းသုံးပစ္စည်းများ၊ ပြန်လည်ဝင်ရောက်နေထိုင်သည့် ဒေသခံများအတွက် လူသုံးကုန်ပစ္စည်းများ၊ မီးဖို ချောင်သုံးပစ္စည်းများ၊ ကျန်းမာရေးသုံးပစ္စည်းများကို မေ ၂၅ ရက်တွင်ပို့ဆောင်ပေးခဲ့ကြောင်း သိရသည်။
အဆိုပါ ပြန်လည်ထူထောင်ရေးလုပ်ငန်းသုံးပစ္စည်းများနှင့် လူသုံးကုန်ပစ္စည်းများကို တပ်မတော်လေယာဥ်များဖြင့် ကလေးမြို့သို့ပို့ဆောင်ပေးပြီးနောက် က လေးမြို့မှတစ်ဆင့် ဖလမ်းမြို့သို့ မော်တော်ယာဥ်များဖြင့်ဆက်လက်ပို့ဆောင်ပေးခဲ့ကြောင်း သိရသည်။
ဖလမ်းမြို့သို့ရောက်ရှိလာသည့် ကုန်ပစ္စည်းများအား သက်ဆိုင်ရာတာဝန်ရှိသူများကလက်ခံရယူခဲ့ကြပြီး ဒေသခံများလက်ဝယ်အရောက်ဆက်လက်ဖြန့်ဝေပေးသွားမည်ဖြစ်ကာ ပို့ဆောင်ရန်ကျန်ရှိသည့် မြို့များသို့လည်းဆက်လက်ပို့ဆောင်ပေးသွားမည်ဖြစ်ကြောင်း သိရသည်။