စကော့မက်တိုမီနေးမှာ ပရီးမီးယားလိဂ်သို့ ပြန်နိုင်ကြောင်း နာပိုလီဝန်ခံလာ
======================
နာပိုလီက ၎င်းတို့မှာ စကော့မက်တိုမီနေးအား ဆုံးရှုံးလာရနိုင်ကြောင်း ဝန်ခံ ပြောကြားလာပါတယ်။
ယူနိုက်တက်စတားဟောင်းဟာ နာပိုလီနှင့်အတူ စီးရီးအေတွင် ခြေစွမ်းပြကစားနိုင်ပြီးနောက် ပရီးမီးယားလိဂ်ကလပ်များရဲ့ စိတ်ဝင်စားခြင်းခံနေရသူလည်း ဖြစ်ပါတယ်။
မက်တိုမီနေးဟာ ၂၀၂၄ ခုနှစ်တွင် ယူနိုက်တက်မှ ထွက်ခွာကာ နာပိုလီသို့ ပြောင်းပြီးနောက် ပထမဆုံးရာသီတွင် စီးရီးအေဖလား ရရှိအောင် အဓိကနေရာမှ ခြေစွမ်းပြကာ စီးရီးအေတစ်နှစ်တာအကောင်းဆုံးကစားသမားဆုကိုပါ ဆွတ်ခူးနိုင်ခဲ့ပါတယ်။
သူဟာ ယခုရာသီတွင်လည်း နာပိုလီအတွက် ပြိုင်ပွဲအရပ်ရပ်တွင် ၁၃ ဂိုးသွင်းကာ ထိပ်တန်းခြေစွမ်းဖြင့် ကစားနေတုန်း ဖြစ်ပါတယ်။
ပြီးခဲ့တဲ့ရာသီတုန်းက ၁၉ ဂိုးသွင်းခဲ့တဲ့ မက်တိုမီနေးဟာ နာပိုလီရဲ့အဓိကကစားသမားဖြစ်သလို ပရိသတ်အချစ်တော်ကစားသမားဖြစ်ပေမယ့်လည်း ပရီးမီးယားလိဂ်သို့ ပြန်မယ်လို့ သတင်းထွက်နေပါတယ်။
ယခုအခါ နာပိုလီရဲ့ တစ်ကမ္ဘာလုံးဆိုင်ရာစီးပွားရေးဖွံ့ဖြိုးရေးအရာရှိ လီယိုနာဒိုဂီယမ်မာရီယိုလီက "ကျွန်တော်တို့ စိုးရိမ်ပါတယ်(ဆုံးရှံ့းရမှာ)။ ဒါပေမယ့် စကော့ကလည်း တိုးတက်မှုနဲ့ ထိုက်တန်တယ်။ လာမယ့်ရာသီမှာ ဆက်ရှိသည်ဖြစ်စေ မရှိသည်ဖြစ်စေ အနာဂတ်မှာ ကြုံလာမယ့်အခွင့်အလမ်းက သူနဲ့ ထိုက်တန်တယ်"လို့ ပြောကြားသွားပါတယ်။

အပြောင်းအရွှေ့နှင့်ပတ်သက်ပြီး အတွင်းပိုင်း အကွဲအပြဲ ဖြစ်ပြီးနောက် ၁၅ နှစ်ကြာ ကိုင်တွယ်လာတဲ့ ဆီမြွန်နီကို ထုတ်ပယ်ရန် အက်သလက်တီကို စဉ်းစားနေ
====================
အက်သလက်တီကိုမက်ဒရစ်ဟာ အပြောင်းအရွှေ့နှင့်ပတ်သက်ပြီး ကလပ်အတွင်းပိုင်းတွင် အကြီးအကျယ် သဘောထားကွဲလွဲမှု ဖြစ်ပြီးနောက် အသင်းကို ကာလရှည်ကြာ ကိုင်တွယ်လာတဲ့ ဒီယေဂိုဆီမြွန်နီအား ထုတ်ပယ်ရန် အလေးအနက်ထား စဉ်းစားနေပါတယ်။
အာဂျင်တီးနားလူမျိုးနည်းပြဟာ အက်သလက်တီကိုအား ၁၅ နှစ်နီးပါး ကိုင်တွယ်လာသူ ဖြစ်ပါတယ်။
ဒါပေမယ့် သူဟာ အားကစားဒါရိုက်တာသစ်မာတူးအလီမင်းနီနှင့် ဆက်ဆံရေး အဆင်မပြေဖြစ်ပြီးနောက် အနာဂတ်နှင့်ပတ်သက်ပြီး စိုးရိမ်ရတဲ့ အခြေအနေတွင် ရှိနေကြောင်း Diario Sport က ဖော်ပြလာပါတယ်။
ဆီမြွန်နီနှင့် အလီမင်းနီတို့အကြားတွင် ဆောင်းရာသီ အပြောင်းအရွှေ့ ကစားသမားခေါ်ယူမှုနှင့်ပတ်သက်ပြီး သဘောထားကွဲလွဲမှု ဖြစ်ခဲ့တာလည်း ဖြစ်ပါတယ်။
အလီမင်းနီဟာ အက်သလက်တီကိုရဲ့ ဘောလုံးဒါရိုက်တာအဖြစ် ၄ လကြာ တာဝန်ထမ်းဆောင်ပြီးချိန်တွင် ဆီမြွန်နီနှင့် ထိပ်တိုက်တွေ့လာတာလည်း ဖြစ်ပါတယ်။
၎င်းတို့အကြား သဘောထားကွဲလွဲကာ ဆက်ဆံရေး တင်းမာမှု ဖြစ်ပြီးနောက် ဆီမြွန်နီရဲ့ အနာဂတ်မှာ မေးခွန်းထုတ်စရာဖြစ်နေတဲ့အခြေအနေသို့ ရောက်လာတာပါ။
အလီမင်းနီဟာ ၂၀၂၁ မှ ၂၀၂၃ ခုနှစ်အထိ ဘာစီလိုနာတွင် ဘောလုံးဒါရိုက်တာအဖြစ် ဆောင်ရွက်ဖူးသူ ဖြစ်ပါတယ်။
တဖက်တွင် အက်သလက်တီကိုတာဝန်ရှိသူများကလည်း ကလပ်ကို ကြီးမားတဲ့ အပြောင်းအလဲ ပြုလုပ်ရန် လိုအပ်နေတယ်လို့ ယုံကြည်နေကာ ဆီမြွန်နီမှာ လာမယ့်ရာသီအထိ အသင်းတွင် ဆက်ရှိရန် မရေမရာ ဖြစ်လာပါတယ်။
ယခု အက်သလက်တီကိုအတွင်းပြဿနာမှာ ပုဂ္ဂိုလ်ရေးပြဿနာအပြင် ဘောလုံးအကြောင်းပြချက်များလည်း ရှိနေပါတယ်။
ဆီမြွန်နီဟာ မျက်မှောက်ဘောလုံးခေတ်တွင် အက်သလက်တီကိုရဲ့အအောင်မြင်ဆုံးနည်းပြဖြစ်ပေမယ့်လည်း နောက်ပိုင်းတွင် ရလဒ်ယိမ်းယိုင်လာမှုကြောင့် အနာဂတ်အား မေးခွန်းထုတ်ခြင်းခံလာရတာပါ။
သူဟာ အက်သလက်ကိုအား ယူရိုပါလိဂ်ဖလား ၂ ကြိမ်၊ လာလီဂါဖလား ၂ ကြိမ်၊ ဥရောပစူပါဖလား ၂ ကြိမ်၊ ကိုပါဒယ်ရေး ၁ ကြိမ်၊ စပိန်စူပါဖလား ၁ ကြိမ် ရယူပေးထားပါတယ်။
တဖက်တွင် အက်သလက်တီကိုအနေဖြင့် ဆီမြွန်နီအား ထုတ်ပယ်လာမည်ဆိုပါက တစ်နှစ်ကျန်စာချုပ်အတွက် နစ်နာကြေး ယူရို ၁၃ သန်းပေးလာရပါမယ်။
ဘောလုံးဒါရိုက်တာအလီမင်းနီမှာလည်း ဆီမြွန်နီအား ထုတ်ပယ်ပြီးပါက တိုးတက်တဲ့ ဘောလုံးကစားဟန်အသုံးပြုနေတဲ့ ဘုန်းမောက်နည်းပြအန်ဒိုနီအိုင်ရာအိုလာအား ခန့်အပ်ရန်လည်း လျာထားပြီး ဖြစ်ကြောင်းလည်း သိရပါတယ်။

အန်ဂူမိုဟာအတွက် ချဲလ်ဆီးကို အနည်းဆုံး ပေါင် ၂.၈ သန်းပေးရမယ့် လီဗာပူး
==================
သမာဓိခုံရုံးက လီဗာပူးအနေဖြင့် ပရီးမီးယားလိဂ်ပြိုင်ဘက် ချဲလ်ဆီးအား တောင်ပံကစားသမားရီယိုအန်ဂူမိုဟာအတွက် အနည်ဆုံး နစ်နာကြေး‌ ပေါင် ၂.၈ သန်းပေးရန် ဆုံးဖြတ်လာပါတယ်။
အသက် ၁၇ နှစ်ရှိ အန်ဂူမိုဟာဟာ ၂၀၂၄ ခုနှစ် စက်တင်ဘာလတွင် ချဲလ်ဆီးအကယ်ဒမီမှ ထွက်ခွာကာ လီဗာပူးသို့ ပြောင်းခဲ့ပြီး တစ်နှစ်အကြာတွင် ပရော်ဖက်ရှင်နယ်စာချုပ်ချုပ်ဆိုခဲ့ပါတယ်။
ယခုအခါ The Professional Football Compensation Committee (PFCC) ရဲ့ သမာဓိခုံရုံးက လီဗာပူးအနေဖြင့် ချဲလ်ဆီးအား ပြုစုပျိုးထောင်စရိတ် ပေးရန် ဆုံးဖြတ်လာပြီလည်း ဖြစ်ပါတယ်။
လီဗာပူးအနေဖြင့် အနည်းဆုံး ပေါင် ၂.၈ သန်းပေးရမှာ ဖြစ်ပါတယ်။ ဒါပေမယ့် လီဗာပူးအနေဖြင့် ဆွေးနွေးမှုအပေါ် မူတည်ပြီး နောက်ထပ်ပေးလာရပါဦးမယ်။
အစောပိုင်းတုန်းက ထွက်ပေါ်ခဲ့တဲ့ သတင်းအရ ချဲလ်ဆီးဟာ လီဗာပူးဘက်က အန်ဂူမိုဟာအား ထပ်ဆင့် ရောင်းချလာပါက ပြောင်းရွှေ့ကြေးရဲ့ ၂၀ ရာခိုင်နှုန်းအား ရရှိလာမှာ ဖြစ်ကြောင်းလည်း သိရပါတယ်။
ဆယ်ကျော်သက်ကစားသမားဟာ ယခုရာသီတွင် အန်းဆလော့ရဲ့ လီဗာပူးအတွက် ပြိုင်ပွဲအရပ်ရပ် ၁၃ ပွဲ ကစားထားပါတယ်။ သူဟာ ဩဂုတ်လတုန်းက နယူးကာဆယ်နှင့်ကစားတဲ့ ပထမဆုံးပရီးမီးယားလိဂ်ပွဲတွင် မိနစ် ၁၀၀ မှာ အနိုင်ဂိုးသွင်းခဲ့ပါတယ်။
ထိုစဉ်တုန်းက သူဟာ အသက် ၁၆ နှစ်နှင့် ၃၆၁ ရက်တည်းသာ ရှိသေးကာ လီဗာပူးသမိုင်းတွင် အသက်အငယ်ဆုံးဂိုးသွင်းသူ ဖြစ်လာခဲ့ပါတယ်။
ဒါ့အပြင် သူဟာ ၂၀၂၅ ခုနှစ် ဇန်နဝါရီလတုန်းက အက်ခရင်တန်အား ၄-၀ ဖြင့် အနိုင်ရတဲ့ အက်ဖ်အေဖလားပွဲတွင် ပွဲထွက်ကစားခွင့်ရပြီးနောက် လီဗာပူးသမိုင်းတွင် အသက်အငယ်ဆုံးပွဲထွက်ကစားခွင့်ရသူအဖြစ်လည်း မှတ်တမ်းတင်ခဲ့သူပါ။
အင်္ဂလန်ယူ-၁၉ ကစားသမားဟာ ချဲလ်ဆီးတွင် ကစားစဉ်တုန်းက ချဲလ်ဆီးအကယ်ဒမီရဲ့အကောင်းဆုံးကစားသမားအဖြစ် သတ်မှတ်ခံခဲ့ရသူ ဖြစ်ပါတယ်။ ဒါပေမယ့် သူဟာ ပထမအသင်းအတွက် ကစားခွင့်ပိုရနိုင်တဲ့ လီဗာပူးသို့ ပြောင်းရန် ရွေးချယ်ခဲ့တာပါ။

အာဆင်နယ်မှာ လေးစားမှုမရှိတဲ့အသင်းဟု ရိုဆင်နီယာ ဝေဖန်ပြောကြားလာ
=================
ချဲလ်ဆီးနည်းပြလီယမ်ရိုဆင်နီယာက အင်္ဂါနေ့ ခါရာဘောင်ဖလားဆီမီးဖိုင်နယ်ဒုတိယအကျော့ပွဲစဉ်မတိုင်မီ သွေးပူလေ့ကျင့်ခန်းပြုလုပ်နေစဉ်အတွင်း အာဆင်နယ်မှ မလေးမစားပြုလုပ်ခဲ့ကြောင်း ဝေဖန်ပြောဆိုလာပါတယ်။
ရိုဆင်နီယာဟာ သွေးပူလေ့ကျင့်ခန်းအစီအစဉ်တွင် အာဆင်နယ်အသင်းသားများ ကွင်းတစ်ဘက်ခြမ်းသို့ ကျော်ကာ ပြုလုပ်လာမှုအပေါ် ဒေါသတကြီး အော်ဟစ်ပြောဆိုမှု ပြုလုပ်ခဲ့တာ တွေ့ရပါတယ်။
အဆိုပါပွဲစဉ်တွင် အာဆင်နယ်တို့ ၁-၀ ဂိုးဖြင့် အနိုင်ရရှိကာ နှစ်ကျော့ပေါင်းရလဒ် ၄-၂ ဖြင့် ခါရာဘောင်ဖလားဗိုလ်လုပွဲသို့ တက်ရောက်သွားခဲ့ပါတယ်။
ရိုဆင်နီယာက "ကစားသမားတွေ မဟုတ်ဘူး။ သွေပူလေ့ကျင့်ခန်းလုပ်တဲ့အခါ ကိုယ့်ကွင်းဘက်ခြမ်းမှာပဲ ရှိရမယ်။ အခြားအသင်းက တစ်ဘက်ကွင်းခြမ်းမှာ ရှိရမယ်။ ကျုပ်အသင်း သို့မဟုတ် နည်းပြတွေကို ပြိုင်ဘက်အသင်းပိုင်နက်ကျူးကျော်ဖို့ တခါမှ မတောင်းဆိုဖူးဘူး။ သူတို့ လုပ်ပုံက မှန်ကန်တယ်လို့ မထင်ပါဘူး။ သူတို့ လုပ်ပုံက ကျုပ်တို့ရဲ့သွေးပူလေ့ကျင့်ခန်းလုပ်မှုအပေါ် ရိုက်ခတ်တယ်။ သူတို့ကို တောင်းဆိုခဲ့တယ်။ လူကြီးလူကောင်း ဆန်ချင်မှ ဆန်ခဲ့လိမ့်မယ်။ သူတို့ကွင်းဘက်ခြမ်းမှာပဲ နေအောင် လုပ်ခဲ့တာ။ Mine Games ကစားဖို့ ရောက်လာတာ မဟုတ်ပါဘူး။ ကျုပ်လုပ်တာ မှန်တယ်ပဲ ထင်တယ်။ လေးစားရမယ်။ လေးလေးစားစားဆက်ဆံခံရဖို့ မျှော်လင့်တယ်။ အခြားအသင်းလည်း အတူတူပဲ"လို့ ပြောကြားသွားပါတယ်။
ဆက်လက်ပြီး ၎င်းက "ဘောလုံးမှာ အားလုံး တန်းတူညီတူပဲ"လို့ ပြောကြားသွားပါတယ်။
ရိုဆင်နီယာဟာ ချဲလ်ဆီးနည်းပြအဖြစ် ခန့်အပ်ခြင်းခံရပြီးနောက် ၈ ပွဲကိုင်တွယ်ရာတွင် နိုင်ပွဲ ၆ ပွဲ ရယူထားပါတယ်။ သူဟာ အာဆင်နယ်အား ရှုံးနိမ်တဲ့ ခါရာဘောင်ဖလားရှုံးပွဲ ၂ ပွဲတည်းသာ ရှုံးနိမ့်ထားတာပါ။
ချဲလ်ဆီးဟာ စနေနေ့ညတွင် ဝုဗ်နှင့် ရင်ဆိုင်ကစားရပါမယ်။

ယူနိုက်တက်ရဲ့ စာချုပ်သစ်ကမ်းလှမ်းခြင်းခံရပြီးနောက် ဖခင်ဖြစ်သူ ဝိန်းရွန်းနီရဲ့ ခြေရာကို နင်းနိုင်တော့မယ့် ကိုင်ရွန်းနီ
=====================
ကိုင်ရွန်းနီဟာ ယူနိုက်တက်ရဲ့ စာချုပ်သစ်ကမ်းလှမ်းခြင်းခံလာရပြီးနောက် ဖခင်ဖြစ်သူ စူပါစတားဝိန်းရွန်းနီရဲ့ ခြေရာကို နင်းလာနိုင်တော့မှာ ဖြစ်ပါတယ်။
အသက် ၁၆ နှစ်ရှိ တိုက်စစ်မှူးဟာ ယခုနွေတွင် ကျောင်းပြီးလာသူ ဖြစ်ပြီး ယူနိုက်တက်အကယ်ဒမီတွင် နှစ်အတန်ကြာ ကစားလာသူလည်း ဖြစ်ပါတယ်။
အသက် ၄၀ နှစ်ရှိ ဖခင်ဖြစ်သူမှာ ယူနိုက်တက်ရဲ့ စံချိန်တင်ဂိုးသွင်းဘုရင်ဖြစ်ပါတယ်။
ကိုင်ရွန်းနီဟာ အခြားယူနိုက်တက်ပါရမီရှင် ၁၃ ဦးတို့နှင့်အတူ ယူနိုက်တက်ရဲ့ စာချုပ်သစ်ကမ်းလှမ်းခြင်းခံထားရတဲ့ လူငယ်ပါရမီရှင်အုပ်စုတွင် ပါဝင်နေပါတယ်။
စာချုပ်သစ်ကမ်းလှမ်းခံရသူများထဲတွင် လက်ရှိ ယူနိုက်တက်နည်းပြမိုက်ကယ်ကာရစ်ရဲ့သား ဂျေစီကာရစ်လည်း ပါဝင်ပါတယ်။
ကိုင်ရွန်းနီဟာ ဘယ်သန်တိုက်စစ်သမားတစ်ဦးဖြစ်ပြီး ယူနိုက်တက်ရဲ့ နာမည်ကျော် အကယ်ဒမီအသင်းတွင် နှစ်အတန်ကြာ အရေးပါတဲ့ ကစားသမားအဖြစ် ကစားလာသူ ဖြစ်ပါတယ်။
ယခုနွေတွင် ကျောင်းပြီးလာတဲ့ ရွန်းနီကို ယူနိုက်တက်ဘက်က တစ်နှစ်စကောလားရှစ်ကမ်းလမ်းလာတာလည်း ဖြစ်ပါတယ်။
ကိုင်ရွန်းနီဟာ စကောလားရှစ်ပြီးဆုံးချိန်တွင် ၃ နှစ်စာချုပ်သစ်ကမ်းလှမ်းခံရမှာ ဖြစ်ပြီး တစ်နှစ်လုပ်ခ ပေါင် ၅၀၀၀၀ အပြင် လက်မှတ်ထိုးကြေး ရရှိလာပါမယ်။
လတ်တလောအချိန်တွင် ရွန်းနီမိသားစုဘက်က ယူနိုက်တက်ရဲ့ ကမ်းလှမ်းမှုကို လက်ခံခြင်း မရှိသေးဘဲ စဉ်းစားနေတုန်း ဖြစ်ပါတယ်။
ယခု ကမ်းလှမ်းမှုခံထားရတဲ့ လူငယ်ပါရမီရှင် ၁၄ ဦးရဲ့ မိသားစုဝင်များအနေဖြင့် လာမယ့် ဇူလိုင်လအထိ စဉ်းစားဆုံးဖြတ်ပိုင်ခွင့် ရှိပါတယ်။ ၎င်းတို့အနေဖြင့် ကမ်းလှမ်းမှုကို ပယ်ချပြီး အခြားကလပ်သို့ ပြောင်းခွင့်လည်း ရှိနေပါတယ်

Al-Nassr အတွက် မကစားဘဲ သပိတ်မှောက်ခဲ့တဲ့ ခရစ္စတီယာနိုရော်နယ်ဒိုအား ဆော်ဒီပရိုလိဂ် အပြင်းအထန် သတိပေးပြောကြားလာ
====================
ဆော်ဒီပရိုလိဂ်က Al-Nassr တွင် အနာဂတ် မရေမရာ ဖြစ်နေတဲ့ ခရစ္စတီယာနိုရော်နယ်ဒိုအား မည်မျှ အရေးပါသူ ဖြစ်ပါစေ ကိုယ်ပိုင်ကလပ်ထက် ကျော်ပြီး ဆုံးဖြတ်ချက်များကို ဆုံးဖြတ်ခွင့် မရှိကြောင်း အပြင်းအထန် သတိပေးပြောကြားလာပါတယ်။
အသက် ၄၁ နှစ်ရှိ ပေါ်တူဂီစူပါစတားဟာ ကလပ်ပိုင်ရှင်ရဲ့ အသင်းအပေါ် ထောက်ပံ့မှုများအပေါ် ဒေါသထွက်ကာ တနင်္လာနေ့တုန်းက Al-Riyadh နှင့် ဆော်ဒီပရိုလိဂ်ပွဲအား ပါဝင်ကစားရန် ငြင်းကာ သပိတ်‌မှောက်ခဲ့ပါတယ်။
A Bola ရဲ့ ဖော်ပြမှုအရ ခရစ္စတီယာနိုရော်နယ်ဒိုဟာ Al-Nassr ပိုင်ရှင် Public Investment Fund (PIF) ဘက်က ဘက်လိုက် ထောက်ပံ့ပေးမှုများ ပြုလုပ်နေမှုအပေါ် အကြီးအကျယ် ဒေါသထွက်ကာ ကလပ်အတွက် မကစားဘဲ သပိတ်မှောက်ခဲ့ခြင်း ဖြစ်ကြောင်း သိရပါတယ်။
အထူးသဖြင့် ခရစ္စတီယာနိုရော်နယ်ဒိုဟာ ယခုအပတ်အစောပိုင်းတုန်းက Al‑Ittihad ဘက်က ကာရမ်ဘန်ဇီးမားကို စာချုပ်ဖျက်သိမ်းပြီး အဓိကပြိုင်ဘက် Al-Hilal သို့ အလွတ်ပြောင်းရွှေ့ကြေးဖြင့် ပြောင်းခွင့်ပြုလိုက်မှုအပေါ် ဒေါသထွက်ခဲ့ပါတယ်။
Al-Nassr ၊ Al-Hilal ၊ Al‑Ittihad နှင့် Al-Ahli တို့ကို PIF က ပိုင်ဆိုင်ထားတာ ဖြစ်ပါတယ်။
ပြင်သစ်တိုက်စစ်မှူးကာရမ်ဘန်ဇီးမားဟာ Al-Hilal အတွက် ပထမဆုံးကစားတဲ့ Al-Okhdood အား ၆-၀ ဂိုးဖြင့် အနိုင်ရတဲ့ပွဲတွင် ဟက်ထရစ်သွင်းနိုင်ခဲ့ပါတယ်။
Al-Nassr နှင့် Al-Hilal တို့က ဆော်ဒီရဲ့ အအောင်မြင်ဆုံးကလပ်နှစ်ခုလည်း ဖြစ်ပါတယ်။
တဖက်တွင် ခရစ္စတီယာနိုရော်နယ်ဒိုဟာ ဇန်နဝါရီ အပြောင်းအရွှေ့ဈေးကွက်တွင် နည်းပြဂျောဂျီးဆပ်စ်က ကစားသမားများ ဝယ်ယူအားဖြည့်ပေးရန် တောင်းဆိုခဲ့ပေမယ့်လည်း အသက် ၂၁ နှစ်ရှိ အီရတ်အလယ်တန်းကစားသမားတစ်ဦးတည်းကိုသာ အားဖြည့်ပေးတဲ့ PIF ရဲ့ လုပ်ရပ်အပေါ် ဒေါသထွက်နေပါတယ်။
ခရစ္စတီယာနိုရော်နယ်ဒိုဟာ တနင်္လာနေ့တုန်းကပွဲတွင် ပါဝင်မကစားဘဲ သပိတ်မှောက်ခဲ့ပေမယ့် Al-Nassr နှင့်အတူ လေ့ကျင့်ခန်းဆင်းနေတုန်း ဖြစ်ပြီး ယနေ့ည Al‑Ittihad နှင့်ပွဲတွင် ပါဝင်ကစားရန် မရေမရာ ဖြစ်နေဆဲ ဖြစ်ပါတယ်။
ယခုအခါ ဆော်ဒီပရိုလိဂ်မှ ပြောရေးဆိုခွင့်ရှိသူတစ်ဦးက "ဆော်ဒီပရိုလိဂ်က ကလပ်တိုင်း တူညီတဲ့ စည်းမျဉ်းအောက်မှာ အလုပ်လုပ်ရမယ့် ရိုးရှင်းတဲ့ ပင်မနှင့် တည်ဆောက်ထားတာပါ။ ကလပ်တိုင်းမှာ ကိုယ်ပိုင်ဘုတ်အဖွဲ့၊ အမှုဆောင်အဖွဲ့နဲ့ ကိုယ်ပိုင်ဘောလုံးခေါင်းဆောင်တွေ ရှိပါတယ်။ ကစားသမားအားဖြည့်မှု၊ ငွေသုံးစွဲမှု၊ ဗျူဟာတွေကိုလည်း ရေရှည်တည်တန့်ရေး၊ ပြိုင်ပွဲဟန်ချက်ညီရေးအတွက် ဘဏ္ဍာရေးမူဘောင်တွေနဲ့ လုပ်လုပ်တယ်။ ဒီမူဘောင်က လိဂ်တစ်ခုလုံးအပေါ် တူညီစွာ သက်ရောက်ပါတယ်။ ခရစ္စတီယာနိုက Al Nassr သို့ ရောက်ကတည်းက အသင်းနဲ့ အပြည့်အဝ ပူးပေါင်းဆောင်ရွက်ခဲ့တယ်။ ကလပ်ရဲ့ ကြီးထွားရေးနဲ့ ရည်မှန်းချက်အတွက် အရေးပါတဲ့ အခန်းကဏ္ဍက ပါဝင်ခဲ့တယ်"လို့ ပြောကြားသွားပါတယ်။
ဒါ့အပြင် ဆက်လက်ပြီး ၎င်းက " အခြားထိပ်တန်းပြိုင်ဆိုင်သူတွေလိုပဲ သူလည်း အောင်နိုင်ချင်တယ်။ ဒါပေမယ့် တကိုယ်တော် လုပ်လို့ မရပါဘူး။ ဘယ်လောက်ပဲ အရေးပါပါစေ ကိုယ်ပိုင်ကလပ်ရဲ့ ဆုံးဖြတ်ချက်တွေကပဲ အရေးအကြီးဆုံးပါ"လို့ ပြောကြားသွားပါတယ်။
ခရစ္စတီယာနိုရော်နယ်ဒိုဟာ ၂၀၂၂ ခုနှစ်တွင် Al Nassr သို့ ဘောလုံးသမိုင်းတွင် လုပ်ခအများဆုံးကစားသမားအဖြစ် တစ်နှစ်လုပ်ခ ပေါင် ၁၇၇ သန်းဖြင့် ပြောင်းခဲ့တာ ဖြစ်ပါတယ်။ ဒါပေမယ့် သူဟာ Al-Nassr နှင့်အတူ Arab Club Champions Cup တစ်လုံးတည်းသာ ရယူထားနိုင်ပါတယ်။
သူဟာ ၂၀၂၅ ခုနှစ် ဇွန်လတုန်းက Al-Nassr နှင့် ၂ နှစ်စာချုပ်သစ်ချုပ်ဆိုခဲ့ပါတယ်။

ယူနိုက်တက်နည်းပြရာထူးမှ ထုတ်ပယ်ခြင်းခံရမှုနှင့်ပတ်သက်ပြီး ဘယ်အချိန်တွင် အမိုရမ် လူသိရှင်ကြားတုံ့ပြန်လာမလဲ?
======================
ယူနိုက်တက်နည်းပြဟောင်းရူဘင်အမိုရမ်ဟာ ယူနိုက်တက်နည်းပြရာထူးမှ ထုတ်ပယ်ခြင်းခံခဲ့ရမှုနှင့်ပတ်သက်ပြီး ရာသီအကုန်အထိ နှုတ်ဆိတ်နေဦးမှာ ဖြစ်ကြောင်း သိရပါတယ်။
အသက် ၄၁ နှစ်ရှိ အမိုရမ်ဟာ ရာသီအကုန်တွင်မှ ယူနိုက်တက်နည်းပြရာထူးမှ ထုတ်ပယ်ခြင်းခံရမှုနှင့်ပတ်သက်ပြီး သူ့ဘက်ကအမြင်ကို လူသိရှင်ကြား ပြောကြားလာမှာလည်း ဖြစ်ပါတယ်။
အမိုရမ်ဟာ ယခုကဲ့သို့ ရာသီတစ်ဝက်ကာလတွင် လူသိရှင်ကြား ပြောဆိုမှု ပြုလုပ်လာပါက ယာယီနည်းပြမိုက်ကယ်ကာရစ်ရဲ့ ချန်ပီယံလိဂ်ဝင်ခွင့် ရရှိရေး ကြိုးပမ်းနေမှုအပေါ် ရိုက်ခတ်လာနိုင်ခြေ ရှိနေမှုနှင့်အတူ လာမယ့်နွေရာသီအထိ နှုတ်ဆိတ်နေဦးမှာ ဖြစ်ပါတယ်။
အမိုရမ်ဟာ ယူနိုက်တက်အသင်းကို ကိုင်တွယ်စဉ်တုန်းက သတင်းစာရှင်းလင်းပွဲများတွင် သူ့အမြင်ကို မကွယ်မဝှက်ဘဲ ထုတ်ဖော် ပြောဆိုလေ့ရှိသူ ဖြစ်ပါတယ်။
သူဟာ ဇန်နဝါရီလတုန်းက အိုးထရက်ဖို့ဒ်သို့ ရောက်လာတာ နည်းပြလုပ်ရန် မဟုတ်ဘဲ မန်နေဂျာလုပ်ရန် ဖြစ်ကြောင်း ပြောကြားကာ ပါဝါအလုံးစုံ အသုံးပြုခွင့်ရရှိရေး လူသိရှင်ကြား စိန်ခေါ် ပြောဆိုရာမှာ ရာထူးမှ ထုတ်ပယ်ခြင်းခံခဲ့ရတာလည်း ဖြစ်ပါတယ်။
အမိုရမ်ဟာ အလွန်တွင် ယူနိုက်တက်ဟာ မိုက်ကယ်ကာရစ်ကို ယာယီနည်းပြအဖြစ် ခန့်အပ်ထားပြီး ပရီးမီးယားလိဂ် ၃ ပွဲဆက် နိုင်ပွဲ ရရှိထားကာ ချန်ပီယံလိဂ်ဝင်ခွင့်အတွက် တိုက်ပွဲဝင်နေပါတယ်။
တဖက်တွင် လက်ရှိ အသင်းလက်မဲ့ ဖြစ်နေတဲ့ အမိုရမ်ဟာ နည်းပြလောကသို့ အလျှင်စလို ပြန်လည် ဝင်ရောက်ရန် အစီအစဉ် မရှိဘဲ လာမယ့် နွေရာသီတွင်မှ နည်းပြလောကသို့ ပြန်လည်ဝင်ရောက်ရန် စီစဉ်ထားပါတယ်။

ပရိသတ် ၅၀၀၀၀ လာရောက်ကြည့်ရှုကာ ပရိသတ်စံချိန်တင် လူငယ်ပွဲအဖြစ် သမိုင်းဝင်လာတဲ့ Uefa Youth League ပွဲ
======================
ကိုလုံးဟာ အင်တာမီလန်နှင့် ယူ-၁၉ ပွဲစဉ်အား ပရိသတ် ၅၀၀၀၀ လာရောက် ကြည့်ရှုကာ ပရိသတ်စံချိန်တင်လာရောက်ကြည့်ရှုတဲ့ လူငယ်ပွဲအဖြစ် သမိုင်းမှတ်တိုင်စိုက်ထူလာပါတယ်။
ဘွန်ဒက်စ်လီဂါကလပ်ဟာ ဂျာမန်ထိပ်တန်းလိဂ်တွင် သတ္တမအကြီးမားဆုံးကွင်းဖြစ်တဲ့ RheinEnergieStadium ပွဲတွင် လက်ခံကစားခဲ့တာလည်း ဖြစ်ပါတယ်။
ယခုပွဲစဉ်အတွက် လက်မှတ်များကို လွန်ခဲ့တဲ့ တစ်ပတ်ကျော်ကတည်းက အပြီးသတ် ရောင်းချထားခဲ့ရတာလည်း ဖြစ်ပါတယ်။
ယခင်တုန်းက Uefa Youth League ပြိုင်ပွဲသမိုင်းတွင် ပရိသတ်အများဆုံးလာရောက်ကြည့်ရှုတဲ့ပွဲအဖြစ် ဧပြီလတုန်းက ထရက်ဇွန်စပေါ်ရဲ့ အင်တာမီလန်အား Senol Gunes Sports Complex တွင် လက်ခံကစားတဲ့ ပွဲအဖြစ် စံချိန်ထိုးခဲ့တာ ဖြစ်ပြီး ယင်းပွဲကို ပရိသတ် ၄၀၃၆၈ ဦး လာရောက်ကြည့်ရှုခဲ့ပါတယ်။
ကိုလုံးပရိသတ်များဟာ အင်တာမီလန်နှင့်ပွဲအား ပရိသတ် ၅၀၀၀၀ အထိ စံချိန်တင် ကြည့်ရှုအားပေးခဲ့ကြပေမယ့်လည်း ၃-၁ ဂိုးဖြင့် ရှုံးနိမ့်သွားခဲ့ပါတယ်။

ဖော်လိုဝါ ၄ သန်းကျော်အထိ ပိုင်ဆိုင်ထားတဲ့ TikTok စတားနှင့် ချစ်ကြိုက်နေတဲ့ စပါးစ်စတား
====================
စပါးစ်လူငယ်ကစားသမားအိုလီဗာအိုင်ရိုးကို ပရိသတ်အမြောက်အမြား သိကြမှာ မဟုတ်ပါဘူး။ ဒါပေမယ့် သူဟာ အငှားဖြင့် သွားရောက် ကစားနေတဲ့ မန်ဖီးလ်အတွက် ပထမဆုံးကစားတဲ့ပွဲမှာ ၂ ဂိုးသွင်းခဲ့သလို အငြင်းပွားဖွယ်ဆိုရှယ်မီဒီယာစတားနှင့် ချစ်ကြိုက်နေသူလည်း ဖြစ်ပါတယ်။
အသက် ၁၉ နှစ်ရှိ တောင်ပံကစားသမားဟာ ရာသီအကုန်အထိ လိဂ် ၁ ကလပ်သို့ အငှားဖြင့် သွားကစားနေတာ ဖြစ်ပြီး ကွင်းအတွင်း ခြေစွမ်းပြနိုင်မှု၊ TikTok စတားနှင့် ချစ်ကြိုက်နေမှုနှင့်အတူ လူသိများလာခဲ့ပါတယ်။
သူဟာ မန်ဖီးလ်သို့ ပြောင်းလာပြီးနောက် ပထမဆုံးကစားတဲ့ ဇန်နဝါရီလ ၁၇ ရက်နေ့တုန်းက ပေါ့ဗေးလ်ကို ၃-၀ ဂိုးဖြင့် အနိုင်ရတဲ့ပွဲမှာ ၂ ဂိုးသွင်းနိုင်ခဲ့ပါတယ်။
ယင်းမှ တစ်ဂိုးက ညာထောင့်သို့ ဝေ့ဝှိုက်ကန်သွင်းခဲ့တာလည်း ဖြစ်ပါတယ်။
သူဟာ နွေရာသီကမှ စပါးစ်နှင့် ၂၀၂၈ ခုနှစ်အထိ စာချုပ်သစ်ချုပ်ဆိုခဲ့သူလည်း ဖြစ်ပါတယ်။
သူဟာ ၂၀၂၃ ခုနှစ်တုန်းက ပထမဆုံးပရော်ဖက်ရှင်နယ်စာချုပ်ချုပ်ဆိုခဲ့တာ ဖြစ်ပြီး ထိပ်တန်းကစားသမားဖြစ်လာမယ့်သူအဖြစ် မျှော်လင့်ခံထားရသူ ဖြစ်ပါတယ်။
သူဟာ ၂၀၂၄-၂၅ ရာသီတုန်းက ပြိုင်ပွဲအရပ်ရပ် ၁၀ ဂိုးသွင်းကာ စပါးစ်ယူ-၂၁ အသင်းမှာ ဂိုးသွင်းဘုရင်အဖြစ် ရပ်တည်ခဲ့သလို အင်္ဂလန်ယူ-၁၆ နှင့် ယူ-၁၇ တို့မှာလည်း ကစားခွင့်ရထားပါတယ်။
ဘောလုံးကွင်းပြင်ပမှာတော့ သူဟာ ဖော်လိုဝါ ၄ သန်းကျော်အထိ ပိုင်ဆိုင်ထားတဲ့ TitTok စတားအေမီချာလစ်ဇ်နှင့် ချစ်ကြိုက်နေသူ ဖြစ်ပါတယ်။
၎င်းတို့စုံတွဲဟာ အားလပ်ရက်အပန်းဖြေမှု၊ အစားအသောက်စားနေတဲ့ဓာတ်ပုံများကို ဆိုရှယ်မီဒီယာမှာ တင်လေ့ရှိပါတယ်။
၎င်းတို့ဟာ နှစ်သစ်ကူးတုန်းက ဘားတစ်ခုတွင် အတူတကွ ပျော်ခဲ့ကြသလို ပဲရစ်၊ မာဘယ်လာ၊ အိုင်ဘီဇာ၊ မိုင်ယာမီသို့လည်း အတူသွားခဲ့ကြပါသေးတယ်။
၎င်းတို့ဟာ ပြီးခဲ့တဲ့နှစ်မှ စတင်ကာ ချစ်ကြိုက်ခဲ့ကြတာပါ။
သူမဟာ YouTube မှ Reality Show တစ်ခုမှာ ပါဝင်ပြီးနောက် နာမည်ကျော်ကြားလာတာလည်း ဖြစ်ပါတယ်။
ပေါင် ၁ သန်းကြွယ်ဝချမ်းသာတယ်လို့ ယူဆရတဲ့ သူမဟာ အခြားအမျိုးသမီးငယ်များကို ပြုမူတဲ့အပြုအမူများအတွက် အနိုင်ကျင့်တတ်သူအဖြစ် စွပ်စွဲခံထားရသူလည်း ဖြစ်ပါတယ်။
တခါတုန်းက သူမတင်ထားတဲ့ ဗီဒီယိုပို့စ်တစ်ခုတွင် "တချို့ကလေးတွေ ဆန်ကာလိုသို့ သွားရယ်ဆိုရင် အသက်တောင် သက်ပေးဖို့ အသင့်ပဲ"လို့ ပြောဆိုဖူးပါတယ်။

ပိတ်ရက်ကာလအတွင်း အထူးရထားများ ပြေးဆွဲမည်
----------------------
ပြည်ထောင်စုနေ့နဲ့ တရုတ်နှစ်သစ်ကူးရုံးပိတ်ရက် ကာလတွေအတွင်း ခရီးသွားပြည်သူတွေနဲ့ ဌာနဆိုင်ရာဝန်ထမ်းတွေ အဆင်ပြေစွာသွားလာနိုင်ဖို့အတွက် ရန်ကုန်-နေပြည်တော်-ရန်ကုန်၊ ရန်ကုန်-မော်လမြိုင်-ရန်ကုန်၊ ရန်ကုန်-ပြည်-ရန်ကုန် အထူးရထားခရီးစဉ်တွေ ပြေးဆွဲပေးသွားမှာဖြစ်တယ်လို့ မြန်မာ့မီးရထားက ကြေညာထားပါတယ်။
ပြေးဆွဲပေးမဲ့ အထူးရထားခရီးစဉ်တွေကတော့ ဖေဖော်ဝါရီ၁၂ရက် ပြည်ထောင်စုနေ့မှာ ရန်ကုန်-နေပြည်တော် DEMUအဆန်အထူးရထား၊ နေပြည်တော်-ရန်ကုန် DEMUအစုန်အထူးရထား၊ ရန်ကုန်-မော်လမြိုင် လေအိတ်အဆန်အထူးရထား၊ ရန်ကုန်-ပြည် လေအိတ်အဆန်အထူးရထားတွေ ပြေးဆွဲပေးသွားမှာဖြစ်တယ်လို့ ဆိုပါတယ်။
ရန်ကုန်-နေပြည်တော် DEMUအဆန်အထူးရထားဟာ ရန်ကုန်ဘူတာကြီးကနေ မနက်၆နာရီခွဲ၊ နေပြည်တော်-ရန်ကုန် DEMUအစုန်အထူးရထားဟာ နေပြည်တော်ဘူတာကနေ နေ့လယ်၁၂နာရီခွဲ၊ ရန်ကုန်-မော်လမြိုင် လေအိတ်အဆန်အထူးရထားဟာ ရန်ကုန်ဘူတာကြီးကနေ မနက်၉နာရီ၁၅မိနစ်၊ ရန်ကုန်-ပြည် လေအိတ်အဆန်အထူးရထားဟာ ရန်ကုန်ဘူတာကြီးကနေ နေ့လယ်၁နာရီမှာ အသီးသီးထွက်ခွာမှာဖြစ်ပါတယ်။
ဖေဖော်ဝါရီ၁၇ရက်မှာတော့ ရန်ကုန်-နေပြည်တော် DEMUအဆန်အထူးရထား၊ နေပြည်တော်-ရန်ကုန် DEMUအစုန်အထူးရထား၊ မော်လမြိုင်-ရန်ကုန် လေအိတ်အစုန်အထူးရထား၊ ပြည်-ရန်ကုန် လေအိတ်အစုန်အထူးရထားတွေ ပြေးဆွဲပေးသွားမှာဖြစ်ပါတယ်။
ရန်ကုန်-နေပြည်တော် DEMUအဆန်အထူးရထားဟာ ရန်ကုန်ဘူတာကြီးကနေ မနက်၆နာရီခွဲ၊ နေပြည်တော်-ရန်ကုန် DEMUအစုန်အထူးရထားဟာ နေပြည်တော်ဘူတာကနေ နေ့လယ်၁၂နာရီခွဲ၊ မော်လမြိုင်-ရန်ကုန် လေအိတ်အစုန်အထူးရထားဟာ မော်လမြိုင်ဘူတာကနေ မနက်၉နာရီ၁၀မိနစ်၊ ပြည်-ရန်ကုန် လေအိတ်အစုန်အထူးရထားဟာ ပြည်ဘူတာကနေ ည၁၀နာရီခွဲမှာ အသီးသီးထွက်ခွာမှာဖြစ်တယ်လို့ သိရပါတယ်။
အထူးရထားတွေရဲ့ လက်မှတ်ခနှုန်းထားနဲ့ ရပ်တန့်ပေးမဲ့ဘူတာတွေက လက်ရှိပြေးဆွဲနေတဲ့ ရထားတွေနဲ့ အတူတူပဲဖြစ်ပြီး အထက်တန်းလက်မှတ်ကို (၃)ရက်ကြို၊ ရိုးရိုးတန်းလက်မှတ်ကို (၁)ရက်ကြို ဝယ်ယူရမှာဖြစ်တယ်လို့ ဆိုပါတယ်။ ဒါ့အပြင် ရန်ကုန်-နေပြည်တော်-ရန်ကုန် အထူးရထားအတွက် ကြိုတင်လက်မှတ်ကို ORTPစနစ်နဲ့ အွန်လိုင်းကနေ ကြိုတင်ဝယ်ယူနိုင်ပြီး ခရီးဆုံးဘူတာတွေအတွက် (၇)ရက်ကြို၊ ကြားဘူတာတွေအတွက် (၃)ရက်ကြို ဝယ်ယူနိုင်တယ်လို့လည်း သိရပါတယ်။