အွန်လိုင်းလိမ်လည်မှုတိုက်ဖျက်ရေးဆိုင်ရာဥပဒေ ကြမ်းအတွက် အကြံပြုချက်များပေးပို့နိုင်

အွန်လိုင်းလိမ်လည်မှုတိုက်ဖျက်ရေးဆိုင်ရာဥပဒေ ကြမ်းအားရေးဆွဲပြီးနောက် ပြည်သူများလေ့လာနိုင်ရန် နိုင်ငံပိုင်သတင်းစာများ၌ထည့်သွင်းဖော်ပြခဲ့သည်။
ယင်း ဥပဒေကြမ်းအား တတိယအကြိမ်လွှတ်တော်များ ၏ ဒုတိယပုံမှန်အစည်းအဝေးများတွင် ဆွေးနွေးသွားမည်ဖြစ်၍ အကြံပြုချက်များပေးပို့လိုပါက ဇွန် ၂ ရက်နောက်ဆုံးထားပေးပို့နိုင်သည်ဟု ဖိတ်ခေါ်ထားသည်။
အကြံပြုချက်များအား ညွှန်ကြားရေးမှူးချုပ်၊ ပြည် ထောင်စုလွှတ်တော်ရုံး၊ နေပြည်တော်။ ညွှန်ကြားရေး မှူးချုပ်၊ ပြည်သူ့လွှတ်တော်ရုံး၊ နေပြည်တော်။ ညွှန်ကြားရေးမှူးချုပ်၊ အမျိုးသားလွှတ်တော်ရုံး၊ နေပြည်တော်တို့သို့ လိပ်မူပေးပို့နိုင်သည်ဟုအသိပေးဖိတ်ခေါ်ထားသည်။

ရန်ကုန်၊ မကွေးနှင့် ပဲခူးတို့တွင် သစ်ပင်လဲကျမှုများကြောင့် လမ်းပိတ်ဆို့မှုဖြစ်ပွား၊ မီးသတ်တပ်ဖွဲ့များ အချိန်မီရှင်းလင်း

ရန်ကုန်တိုင်းဒေသကြီး၊ မကွေးတိုင်းဒေသကြီးနှင့် ပဲခူးတိုင်းဒေသကြီးတို့တွင် မေ ၂၅ ရက်က သစ်ပင်လဲကျမှုများ ဖြစ်ပွားခဲ့ပြီး လမ်းပိတ်ဆို့မှုများကြုံတွေ့ခဲ့ရသဖြင့် သက်ဆိုင်ရာ မီးသတ်တပ်ဖွဲ့ဝင်များက သွားရောက်ဖယ်ရှားရှင်းလင်းပေးခဲ့ကြောင်း သိရသည်။
ရန်ကုန်တိုင်းဒေသကြီး သင်္ဃန်းကျွန်းမြို့နယ် (င/က) ရပ်ကွက်၊ ဦးဘဟန်လမ်း၌ နေ့လယ် ၁ နာရီ ၂၀ မိနစ်ခန့်က သစ်ပင်တစ်ပင် လဲကျပြီး လမ်းပိတ်ဆို့မှုဖြစ်ပွားခဲ့ရာ သက်ဆိုင်ရာ မီးသတ်တပ်ဖွဲ့ဝင်များက အချိန်မီ ဖယ်ရှားရှင်းလင်းပေးခဲ့ကြောင်း သိရသည်။
အလားတူ မကွေးတိုင်းဒေသကြီး မင်းဘူးမြို့နယ် ရွှေရောင်တော်ကျေးရွာနှင့် ဂန့်ဂေါမြို့ အမှတ်(၁)ရပ်ကွက် မြောက်ကုန်းရပ်တို့တွင်လည်း သစ်ပင်များ လဲကျခဲ့ပြီး လမ်းပိတ်ဆို့မှုများ ဖြစ်ပေါ်ခဲ့သဖြင့် မီးသတ်တပ်ဖွဲ့ဝင်များက ရှင်းလင်းဆောင်ရွက်ပေးခဲ့ကြောင်း သိရသည်။
ထို့ပြင် ပဲခူးတိုင်းဒေသကြီး ပန်းတောင်းမြို့၌ ညနေ ၅ နာရီ ၄၅ မိနစ်ခန့်က မိုးရွာသွန်းမှုနှင့် လေပြင်းတိုက်ခတ်မှုများကြောင့် ကြခတ်ရပ်ကွက်ရှိ ပန်းတောင်း–တောင်ကုတ်လမ်းပေါ်တွင် သစ်ပင်လဲကျကာ လမ်းပိတ်ဆို့မှု ဖြစ်ပွားခဲ့ပြီး သက်ဆိုင်ရာ မီးသတ်တပ်ဖွဲ့က ဖယ်ရှားရှင်းလင်းပေးခဲ့ကြောင်း သိရသည်။
ဖြစ်စဉ်များအတွင်း လူနှင့် အဆောက်အအုံ ထိခိုက်ပျက်စီးမှု သတင်းများ မရရှိသေးဘဲ လမ်းပန်းဆက်သွယ်ရေးကို ပုံမှန်အခြေအနေသို့ ပြန်လည်ရောက်ရှိစေရန် မီးသတ်တပ်ဖွဲ့ဝင်များက အချိန်မီ ဆောင်ရွက်ပေးခဲ့ကြောင်း သိရသည်။

အိမ်ဖြူတော်အနီးပစ်ခတ်ခဲ့သည့် သေနတ်သမားသည် ယခင်ကလည်း လျှို့ဝှက်ထောက်လှမ်းရေးအဖွဲ့ (Secret Service) နှင့် ပြဿနာဖြစ်ပွားခဲ့ဖူးကြောင်း တရားရုံးမှတ်တမ်းများတွင် ဖော်ပြထား

အိမ်ဖြူတော်အပြင်ဘက်တွင် သေနတ်ဖြင့် ပစ်ခတ်ခဲ့ပြီး လမ်းသွားလမ်းလာတစ်ဦးကို ထိမှန်စေခဲ့ကာ လျှို့ဝှက်ထောက်လှမ်းရေးအဖွဲ့၏ ပြန်လည်ပစ်ခတ်မှုကြောင့် သေဆုံးသွားခဲ့သည့် သေနတ်သမားသည် ယခင်ကလည်း ထိုနေရာရှိ အာဏာပိုင်များနှင့် ပြဿနာဖြစ်ပွားခဲ့ဖူးကြောင်း တရားရုံးမှတ်တမ်းများအရ သိရသည်။
ဝါရှင်တန်ဒီစီ ရဲတပ်ဖွဲ့က ဘီဘီစီသို့ အတည်ပြုပြောကြားချက်အရ အဆိုပါအမျိုးသား၏အမည်မှာ နာဆီယား ဘက်စ်(Nasire Best)ဖြစ်ပြီး၊ သူသည် လွန်ခဲ့သည့် ၂၀၂၅ ခုနှစ် ဇွန်လအတွင်းကလည်း အိမ်ဖြူတော်အတွင်းဝင်သည့် လမ်းကြောတစ်ခုကို ပိတ်ဆို့ခဲ့ကာ မိမိကိုယ်ကိုယ် ယေရှုခရစ်တော် ဖြစ်သည်ဟု လျှို့ဝှက်ထောက်လှမ်းရေးအေးဂျင့်များကို ပြောကြားခဲ့ဖူးသည်။
ထိုဖြစ်စဉ်အပြီးတွင် သူ့ကို စိတ်ကျန်းမာရေးစစ်ဆေးမှု ခံယူရန် စေလွှတ်ခဲ့သည်။
ဘက်စ်သည် စနေနေ့ ညနေ ၆ နာရီ (EST စံတော်ချိန်) ခန့်က သမ္မတ၏အိမ်တော်အပြင်ဘက်တွင် သေနတ်ဖြင့် ပစ်ခတ်ခဲ့ပြီး၊ ထိုစဉ်က အပြင်ဘက်တွင် ဗီဒီယိုရိုက်ကူးရေးလုပ်နေသည့် သတင်းထောက်များမှာ ခေါင်းငုံ့ကာ အဆောက်အအုံအတွင်းသို့ ဘေးလွတ်ရာသို့ ထွက်ပြေးပုန်းအောင်းခဲ့ကြရသည်။ အမေရိကန်သမ္မတ ဒေါ်နယ်ထရန့်သည် ထိုအချိန်က အိမ်ဖြူတော်၌ ရှိနေသော်လည်း တစ်စုံတစ်ရာ ထိခိုက်ဒဏ်ရာရရှိခဲ့ခြင်း မရှိပေ။
တရားရုံးမှတ်တမ်းများအရ မေရီလန်းပြည်နယ်၊ ဒန်ဒေါ့ခ်(Dundalk) မြို့သားဖြစ်သူ ဘက်စ်သည် ၂၀၂၅ ခုနှစ် ဇွန်လက ဖြစ်ပွားခဲ့သော လျှို့ဝှက်ထောက်လှမ်းရေးအဖွဲ့နှင့် ထိပ်တိုက်တွေ့မှုအတွင်း မိမိကိုယ်ကိုယ် အဖမ်းခံချင်သည်ဟု အေးဂျင့်များကို ပြောကြားခဲ့ကြောင်း သိရသည်။
စိတ်ကျန်းမာရေးစစ်ဆေးမှု ခံယူခဲ့ရသော်လည်း၊ တစ်လအကြာ ဇူလိုင်လတွင် သူသည် အိမ်ဖြူတော်အတွင်းသို့ ဝင်ရောက်ရန် ထပ်မံကြိုးပမ်းခဲ့ပြန်သည်။
ထိုဒုတိယအကြိမ် ဖြစ်စဉ်အပြီးတွင် ဘက်စ်ကို လျှို့ဝှက်ထောက်လှမ်းရေးအေးဂျင့်များက ဖမ်းဆီးခဲ့ပြီး၊ ဖက်ဒရယ်အစိုးရ ထိန်းချုပ်ထားသော နယ်မြေအတွင်းသို့ တရားမဝင် ဝင်ရောက်မှုဖြင့် တရားစွဲဆိုခဲ့ကြောင်း တရားရုံးမှတ်တမ်းများအရ သိရသည်။
တရားမဝင်ဝင်ရောက်မှု စွဲချက်ဖြင့် ရုံးထုတ်စစ်ဆေးပြီးနောက် သူ့ကို ပြန်လည်လွှတ်ပေးခဲ့သော်လည်း၊ ၂၀၂၅ ခုနှစ် ဩဂုတ်လတွင် ပြုလုပ်သည့် အခြေအနေကြားနာပွဲသို့ လာရောက်ရန် ပျက်ကွက်ခဲ့ကြောင်း မှတ်တမ်းများက ဆိုသည်။ ထို့ကြောင့် တရားရုံးက အာမခံမပေးဘဲ ဖမ်းဝရမ်း ထုတ်ပြန်ခဲ့ပြီး တရားဥပဒေစိုးမိုးရေးအဖွဲ့များကို သူ့အား ဖမ်းဆီးခွင့်ပြုခဲ့သည်။
ထို့နောက် တစ်နှစ်ပင်မပြည့်သေးသည့် အချိန် ယခုစနေနေ့တွင်မူ သူသည် အိမ်ဖြူတော်အပြင်ဘက်၌ ပြန်လည်ပေါ်လာပြီး၊ အိုင်စင်ဟောင်ဝါ အမှုဆောင်ရုံးအဆောက်အအုံ(Eisenhower Executive Office Building) အနီးရှိ ၁၇ လမ်းနှင့် ပင်ဆယ်ဗေးနီးယားရိပ်သာလမ်း(17th Street and Pennsylvania Avenue NW) လမ်းဆုံရှိ လျှို့ဝှက်ထောက်လှမ်းရေးအဖွဲ့၏ စစ်ဆေးရေးဂိတ်ကို သေနတ်ဖြင့် စတင်ပစ်ခတ်ခဲ့သည်။

တရုတ်-မြန်မာစီးပွားရေးစင်္ကြံ (CMEC) လုပ်ငန်းစဉ်များကို ပူးပေါင်းဆောင်ရွက်လျက်ရှိ

“ယွမ်” ငွေဖြင့် ရင်းနှီးမြှုပ်နှံခွင့်ပြုပေးခြင်းဖြင့် ကုန်သွယ်မှုနှင့် ရင်းနှီးမြှုပ်နှံမှုလုပ်ငန်းစဉ်များ ပိုမိုမြန်ဆန်မည်
မြန်မာနိုင်ငံသည် ဒေသတွင်းဘက်စုံ စီးပွားရေးပူးပေါင်းဆောင်ရွက်မှု (RCEP) အဖွဲ့ဝင်နိုင်ငံဖြစ်သည်နှင့်အညီ တရုတ်-မြန်မာစီးပွားရေးစင်္ကြံ (CMEC) လုပ်ငန်းစဉ်များကို ပူးပေါင်းဆောင်ရွက်လျက်ရှိကြောင်း အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးက ပြောသည်။
“ရင်းနှီးမြှုပ်နှံမှုအဆင်ပြေချောမွေ့စေရေးနှင့် ယွမ်ငွေကြေးအသုံးပြု၍ ရင်းနှီးမြှုပ်နှံနိုင်သည့် အခွင့်အလမ်းဆိုင်ရာ တွေ့ဆုံဆွေးနွေးပွဲ” တွင် ပြည်ထောင်စုဝန်ကြီး က ပြောကြားခဲ့ခြင်းလည်း ဖြစ်သည်။
ထိုပြင် ၊ ရင်းနှီးမြှုပ်နှံမှုလုပ်ငန်းများတွင် “ယွမ်” ငွေကြေးဖြင့် ရင်းနှီးမြှုပ်နှံခွင့်ပြုပေးခြင်းဖြင့် ကုန်သွယ်မှုနှင့် ရင်းနှီးမြှုပ်နှံမှုလုပ်ငန်းစဉ်များ ပိုမိုချောမွေ့မြန်ဆန်လာစေရန် အထောက်အကူပြုမည်ဖြစ်ကြောင်း လည်း ဦး‌အောင်ကျော်စိုး က ပြောကြားသည်။
အဆိုပါ ဆွေးနွေးပွဲသို့ အမျိုးသားစီမံကိန်း၊ ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုး၊ ရန်ကုန်တိုင်းဒေသကြီးစီမံကိန်း၊ စီးပွားရေးနှင့်ဘဏ္ဍာရေးဝန်ကြီး၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ စီးပွားရေးသံမှူး၊ မြန်မာနိုင်ငံအခြေစိုက် တရုတ်စီးပွားရေးလုပ်ငန်းရှင်အသင်းများမှ ကိုယ်စားလှယ်များနှင့် လုပ်ငန်းရှင်များ တက်ရောက်ခဲ့ကြောင်း သိရသည်။
ထို့နောက် သက်ဆိုင်ရာတာဝန်ရှိသူများက ရင်းနှီးမြှုပ်နှံမှုအခွင့်အလမ်းများကိုလည်းကောင်း၊ ရန်ကုန်တိုင်းဒေသကြီးအတွင်းရှိ ရင်းနှီးမြှုပ်နှံမှုအခြေအနေများကိုလည်းကောင်း၊ ယွမ်ငွေကြေးဖြင့် ရင်းနှီးမြှုပ်နှံမှုဆိုင်ရာမူဝါဒနှင့် လုပ်ထုံးလုပ်နည်းများကို ဆွေးနွေးခဲ့ခြင်းဖြစ်ကြောင်း သိရသည်။

ရွှေကုက္ကိုလ်နယ်မြေမှ အွန်လိုင်းလိမ်လည်လောင်းကစားမှုကျူးလွန်ရာတွင်အသုံးပြုသည့် တရားမဝင်အဆောက်အအုံများအနက် (၃)လုံးကိုဦးစွာဖြိုချဖျက်ဆီး

လုံခြုံရေးအဖွဲ့ဝင်များပါဝင်သော ပူးပေါင်းအဖွဲ့ဝင်များက ရွှေကုက္ကိုလ်နယ်မြေအတွင်း အွန်လိုင်းလိမ်လည်လောင်းကစားမှုလုပ်ကိုင်ရာတွင်အသုံးပြုသည့် အဆောက်အအုံ(၇၇)လုံးကို စစ်ဆေးဖော်ထုတ်ခဲ့ကြသည်။
ယင်း အဆောက်အအုံ(၇၇)လုံးအားချိတ်ပိတ်၍ ဖြိုချဖျက်ဆီးရန် အဆောက်အဦအမျိုးအစားအလိုက် ပထမဆင့်ယာဉ်ယန္တရားဖြင့် ဖြိုချဖျက်ဆီးမည့် အဆောက် အအုံ(၅၇)လုံး၊ ဒုတိယအဆင့်ဖောက်ခွဲဖျက်ဆီးမည့် အဆောက်အအုံ(၂၀)လုံးကို အဆင့်(၂)ဆင့်ဖြင့်ခွဲခြားသတ်မှတ်ပြီး စနစ်တကျဖြိုချဖျက်ဆီးခဲ့သည်။
ထို့ကြောင့် မေ ၂၅ ရက်တွင် ပထမအဆင့် ယာဉ်ယန္တရားဖြင့် အွန်လိုင်းလိမ်လည်လောင်းကစားလုပ်ကိုင်ရာ၌အသုံးပြုခဲ့သည့် (၄)ထပ်အဆောက်အအုံ(၂)လုံးကိုဖြိုချဖျက်ဆီးခဲ့ပြီး ယခင် (၁၃)ထပ်အဆောက်အအုံ(၁) လုံးသည်လည်း ဖြိုချဖျက်ဆီးပြီးဖြစ်ရာ အဆောက်အအုံ(၃)လုံးကိုဖြိုချဖျက်ဆီးပြီးဖြစ်သည်။
ထို့ပြင် ဖြိုချဖျက်ဆီးရန်ကျန်ရှိသည့် အဆောက်အအုံ (၇၄)လုံးကိုလည်း စနစ်တကျဖြိုချဖျက်ဆီးသွားမည်ဖြစ်သည်။

ဥပဒေအရာရှိများအနေဖြင့် ပြည်သူများ ယုံကြည်အားထားမှု ပိုမိုရရှိလာစေရေး အလေးထားဆောင်ရွက်ကြရန် ပြည်ထောင်စုရှေ့နေချုပ်လမ်းညွှန်

ဥပဒေအရာရှိများအနေဖြင့် ဥပဒေအရာရှိကျင့်ဝတ်များကို ကောင်းစွာသိရှိနားလည်ပြီး လုပ်ငန်းလမ်းညွှန်သဖွယ် လိုက်နာကျင့်သုံးခြင်းဖြင့် ပြည်သူများ ယုံကြည်အားထားမှု ပိုမိုရရှိလာစေရေး အလေးထားဆောင်ရွက်ကြရန် လိုအပ်ကြောင်းဥပဒေရေးရာ ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦး ကပြောသည်။
တရားဥပဒေစိုးမိုးရေးကို ဖော်ဆောင်ရန်တာဝန်ရှိသည့် ဥပ‌ဒေအရာရှိများအား ကျင့်ဝတ်ဆိုင်ရာ တွေ့ဆုံမေးမြန်းခြင်း (Interview) ဆောင်ရွက်နေမှု ကို သွားရောက်ကြည့်ရှုစဉ် ပြည်ထောင်စုရှေ့နေချုပ် က အထက်ပါအတိုင်း ပြောကြားခဲ့ခြင်းလည်း ဖြစ်သည်။
ဥပဒေအရာရှိ ကျင့်ဝတ်ဆိုင်ရာ တွေ့ဆုံမေးမြန်းခြင်း (Interview) အစီအစဉ်သည် ကျင့်ဝတ်ကြီးကြပ်ရေးအဖွဲ့များက ဥပဒေအရာရှိတစ်ဦးချင်းစီအား ဥပဒေအရာရှိကျင့်ဝတ်များနှင့်စပ်လျဉ်း၍ တွေ့ဆုံမေးမြန်းခြင်း လည်း ဖြစ်သည်။
ဥပဒေရေးရာဝန်ကြီးဌာန လက်အောက်ရှိ တိုင်းဒေသကြီး/ပြည်နယ်ဥပဒေချုပ်ရုံးများ၊ ခရိုင်ဥပဒေရုံးများနှင့် မြို့နယ်ဥပဒေရုံးများမှ ဥပဒေအရာရှိများအား သက်ဆိုင်ရာဥပဒေ အရာရှိကျင့်ဝတ်ကြီးကြပ်ရေးအဖွဲ့များက သတ်မှတ်ထားသော ဥပဒေအရာရှိကျင့်ဝတ်ဆိုင်ရာ တွေ့ဆုံမေးမြန်းခြင်း အစီအစဉ်နှင့်အညီ ဆက်လက်ဆောင်ရွက်ကြမည်ဖြစ်ကြောင်း သိရသည်။

အပျော်တမ်းကလပ်မိုကမ်ဘီအား ဝယ်ယူရန် လက်ဝှေ့ချန်ပီယံတိုင်ဆန်ဖူရီနှင့် အီဘရာဟီမိုဗစ်တို့ ဆွေးနွေးနေ
======================

လက်ဝှေ့ချန်ပီယံတိုင်ဆန်ဖူရီဟာ ယူနိုက်တက်စတားဟောင်းဇလာတန်အီဘရာဟီမိုဗစ်နှင့်အတူ သူ့ဒေသတွင်း အပျော်တမ်းကလပ် မိုကမ်ဘီအက်ဖ်စီအား ဝယ်ယူရေး စီစဉ်နေပါတယ်။
အားကစားဂန္ထဝင်နှစ်ဦးတို့ဟာ ယခုအပတ်တုန်းက ဝါဆောတွင် ကမ္ဘာ့ဖလားပြိုင်ပွဲအတွက် ကြော်ငြာရိုက်ကူးစဉ် တွေ့ဆုံခဲ့ကြပါတယ်။
အတွင်းလူတစ်ဦးက "သူတို့ ကမ္ဘာ့ဖလားအတွက် ကြော်ငြာရိုက်ကူးဖို့ ဝါဆောမှာ ရှိနေခဲ့ကြတယ်။ တိုင်ဆန်က သူ့မွေးရပ်မြေကလပ် မိုကမ်ဘီအက်ဖ်စီကို ဝယ်ယူရေးနဲ့ပတ်သက်ပြီး သူ့ကို ပြောပြတယ်။ သူတို့ ဒီကလပ်ကို ဝယ်ယူလိုနေကြတယ်။ ပြီးရင် Rise of Morecambe together ဆိုပြီး Netflix မှတ်တမ်းရုပ်ရှင်လည်း ရိုက်ကူးလိုနေကြတယ်။ ရိုင်ယန်ရေးနိုး ဝရက်စ်ဟမ်းမှာ လုပ်သလိုပေါ့။ သူတို့နှစ်ဦးလုံးက ထိပ်ဆုံးသို့ ရောက်အောင် ဘယ်လို လုပ်ရမလဲဆိုတာ ကောင်းကောင်း သိကြတယ်။ သူတို့ ကြော်ငြာရိုက်ကူးရင်း ပျော်နေကြတယ်။ ကမ္ဘာဖ့လားအတွက်ပါ။ တိုင်ဆန်ရဲ့ အစေားသောက်အမတ်တံဆိပ် Furocity လည်း ပါတယ်။ ပြီးတော့ သူတို့ ညစာအတူစားခဲ့ကြတယ်။ တိုင်ဆန်နဲ့ ဇလာတန်တို့ ခင်မင်ရင်းနှီးလာတာ နှစ်အတန်ကြာပါပြီ။ ဇလာတန်ဟာ ယူနိုက်တက်မှာ ကစားတုန်းက တိုင်ဆန်ရဲ့ အားကစားခန်းမကို သုံးလေ့ရှိတယ်"လို့ ပြောကြားသွားပါတယ်။
တိုင်ဆန်ဖူရီဟာ မိုကမ်ဘီ အမာခံပရိသတ်တစ်ဦးကို အသင်းကို ထောက်ပံ့ကူညီမှုများ ပြုလုပ်လာခဲ့သူလည်း ဖြစ်ပါတယ်။

ရီးရဲလ်မက်ဒရစ်ရဲ့ စိတ်ဝင်စားမှုခံရမှုအပေါ် စပို့တင်းအသင်းခေါင်းဆောင်တုံ့ပြန်လာ
===================

စပို့တင်းလစ္စဘွန်းအသင်းခေါင်းဆောင်မော်တန်ဟူလ်မန်းက ရီးရဲလ်မက်ဒရစ်ရဲ့ စိတ်ဝင်စားခြင်းခံရမှုအပေါ် ကြီးမားတဲ့ ဂုဏ်ယူမှု ဖြစ်မိကြောင်း ဖွင့်ဟ ပြောကြားလာပါတယ်။
ဒိန်းမတ်လက်ရွေးစင်ကွင်းလယ်ခံစစ်ကစားသမားဟာ လာမဲ့ နွေရာသီတွင် အသင်းကို ကြီးမားတဲ့ အပြောင်းအလဲ ပြုလုပ်လာမဲ့ ရီးရဲလ်မက်ဒရစ်ရဲ့ အဓိကပစ်မှတ်စာရင်းတွင် ပါဝင်နေသူလည်း ဖြစ်ပါတယ်။
ဟူလ်မန်းဟာ လက်ချီမှ ပြောင်းလာပြီးနောက် စပို့တင်းလစ္စဘွန်းတွင် တောက်လျှောက် ခြေစွမ်းပြကစားလာမှုနှင့်အတူ ရီးရဲလ်မက်ဒရစ်အပြင် ယူနိုက်တက်၊ အာဆင်နယ်တို့ရဲ့ စိတ်ဝင်စားခြင်းလည်း ခံနေရသူ ဖြစ်ပါတယ်။
ယူနိုက်တက်ဟာ ကက်စ်မီရိုနေရာတွင် ဟူလ်မန်းနှင့် အစားထိုးရန် စီစဉ်ထားခဲ့ပေမဲ့လည်း ရီးရဲလ်မက်ဒရစ်ကြားဝင်လာမှုကြောင့် လက်လွှတ်ရရေး စိုးရိမ်နေရပြီ ဖြစ်ပါတယ်။
တဖက်တွင် ကစားသမားကိုယ်တိုင်ကလည်း ရီးရဲလ်မက်ဒရစ်ရဲ့ စိတ်ဝင်စားခြင်းခံနေရမှုအပေါ် "ရီးရဲလ်မက်ဒရစ်လို ကလပ်မျိုးရဲ့ စိတ်ဝင်စားခြင်းခံရလို့ တကယ့်ကို ဂုဏ်ယူမိပါတယ်။ ဒါပေမဲ့ ကျွန်တော်က စပို့တင်းကစားသမားအဖြစ် ရှိနေတုန်းပါ။ ဒီကလပ်ကိုလည်း အများကြီး ချစ်တယ်။ ဒီကလပ်အပေါ်မှာပဲ အာရုံစိုက်ထားတယ်။ ပြီးတော့ မနက်ဖြန်ပွဲ(ယနေ့ည Torreense နှင့် ဗိုလ်လုပွဲ)အပေါ်မှာ အာရုံစိုက်ထားတယ်။ ဒီပွဲပြီးမှ အနာဂတ်အကြောင်း ပြောပါမယ်။ ဒါကတော့ လုံးဝ သေချာတယ်"လို့ ပြောကြားသွားပါတယ်။
ရီးရဲလ်မက်ဒရစ်နည်းပြသစ်ဖြစ်လာမဲ့ ဂျိုဆေးမော်ရင်ဟိုဟာ လာမဲ့ရာသီတွင် ကွင်းလယ်အား ပြန်လည်တည်ဆောက်ရေးအတွက် စပို့တင်းအသင်းခေါင်းဆောင်ဟူလ်မန်းအား ခေါ်ဆောင်ပေးရန် ရီးရဲလ်မက်ဒရစ်အား တင်ပြထားကြောင်း သိရပါတယ်။
ရီးရဲလ်မက်ဒရစ်ဟာ ဟူလ်မန်းအား ခေါ်ယူရန် ယူရိုသန်း ၅၀ ဝန်းကျင် အသုံးပြုလာရဖို့ ရှိပါတယ်။

ယခုရာသီတွင် ၃ ပွဲတည်းသာ ပွဲထွက်ခွင့်ရထားပေမဲ့ အင်္ဂလန်ရဲ့ ကမ္ဘာ့ဖလားအသင်းတွင် နောက်ကျ ရွေးချယ်ခံလာရတဲ့ အာဆင်နယ်စတား
====================

သောမတ်စ်တူချယ်ဟာ အာဆင်နယ်ပါရမီရှင်အီသန်နဝမ်နရီအား အင်္ဂလန်ရဲ့ ကမ္ဘာ့ဖလားအသင်းနှင့် ပူးပေါင်းရန် ဖိတ်ကြားလာပါတယ်။
အသက် ၁၉ နှစ်ရှိ နဝမ်နရီဟာ အင်္ဂလန်အသင်းနှင့်အတူ အမေရိကန်သို့ လိုက်ပါခွင့် ရရှိလာမှာ ဖြစ်ပြီး ဖလိုရီဒါအခြေစိုက်စခန်းတွင် ကမ္ဘာ့ဖလားပြိုင်ပွဲဝင်အသင်းနှင့် အတူ လေ့ကျင့်ခွင့် ရရှိလာပါမယ်။
နဝမ်နာရီဟာ မာဆေးလ်သို့ အငှားဖြင့် သွားရောက်ကစားစဉ်အတွင်း ၃ ပွဲတည်းသာ ကစားခွင့် ရရှိခဲ့ပေမဲ့လည်း အနာဂတ်တွင် ထွန်းတောက်လာမဲ့ ကြယ်ပွင့်အဖြစ် သတ်မှတ်ခံထားရတုန်း ဖြစ်ပါတယ်။
တူချယ်ဟာ အလယ်တန်းတိုက်စစ်သမားအား အင်္ဂလန်အသင်းနှင့်အတူ လေ့ကျင့်ခန်းဆင်းရန် ဖိတ်ကြားကာ သူ့အတွက် လှပတဲ့ အနာဂတ်ရှိနေတယ်လို့ ယုံကြည်ကြောင်း ပြသလာတာပါ။
တူချယ်ဟာ ကမ္ဘာ့ဖလားပြိုင်ပွဲအတွင်းတွင် အင်္ဂလန်အသင်းနှင့်အတူ လေ့ကျင့်ခန်းဆင်းရန် နဝမ်နရီအပြင် ဘုန်းမောက်အလယ်တန်းကစားသမားအဲလက်စ်စကော့၊ ဖူလ်ဟမ်ရဲ့ ဂျိုစ်ကိန်း၊ လီဗာပူးပါရမီရှင်ရီယိုအန်ဂူမိုဟာတို့ကိုလည်း ဖိတ်ကြားထားပါသေးတယ်။
ယင်းကစားသမား ၄ ဦးတို့ဟာ ကမ္ဘာ့ဖလားပြိုင်ပွဲအတွင်းတွင် အင်္ဂလန်အသင်းနှင့်အတူ လေ့ကျင့်ခန်းဆင်းခွင့် ရရှိလာကြပါမယ်။
နဝမ်နရီဟာ ၁၅ နှစ်နှင့် ၁၈၁ ရက်ဖြင့် ပရီးမီးယားလိဂ်တွင် အသက်အငယ်ဆုံးပွဲကစားခွင့် ရရှိသူအဖြစ် သမိုင်းမှတ်တိုင် စိုက်ထူခဲ့သူ ဖြစ်ပါတယ်။
သူဟာ ၂၀၂၄-၂၅ ရာသီအတွင်းတွင် ပြိုင်ပွဲအရပ်ရပ် ၃၇ ပွဲကစားခွင့် ရရှိခဲ့ကာ ၉ ဂိုးသွင်းယူနိုင်ခဲ့ပါတယ်။
အာတီတာဟာ ယခုရာသီတွင် နဝမ်နရီအား ပုံမှန်ပွဲထွက်ခွင့် ကစားခွင့် ရနိုင်တဲ့ မာဆေးသို့ အငှားချခဲ့တာပါ။
အင်္ဂလန်အသင်းဟာ ဇွန်လအစောပိုင်းတွင် အမေရိကန်သို့ ထွက်ခွာပြီး နယူးဇီလန်၊ ကော့တစာရီကာတို့နှင့် ခြေစမ်းပွဲ ကစားသွားပါဦးမယ်။
အင်္ဂလန်ဟာ ကမ္ဘာ့ဖလားပြိုင်ပွဲအတွင်းတွင် ကန်ဆက်စ်တင် အခြေစိုက်လာမှာ ဖြစ်ပြီး ဇွန်လ ၁၇ ရက်နေ့တွင် ခရိုအေးရှားနှင့် အုပ်စုအဖွင့်ပွဲ ကစားရပါမယ်။

စစ်ပွဲပဋိပက္ခကြောင့် ကမ္ဘာ့ဖလားပြိုင်ပွဲအတွင်းတွင် အမေရိကန်မှ မက္ကဆီသို့ ပြောင်းရွှေ့ အခြေစိုက်လာမဲ့ အီရန်အသင်း
===================

အီရန်အသင်းဟာ ၂၀၂၆ ကမ္ဘာ့ဖလားပြိုင်ပွဲအတွင်းတွင် အမေရိကန်မှ မက္ကဆီကိုသို့ ပြောင်းရွှေ့အခြေစိုက်ရေး ဖီဖာအား နားသွင်းဖျောင်းဖျမှု အောင်မြင်လာခဲ့ပြီ ဖြစ်ပါတယ်။
အီရန်အသင်းဟာ အစောပိုင်းတုန်းက အရီဇိုးနားတွင် အခြေစိုက်ရန် စီစဉ်ထားခဲ့ပေမဲ့ ဒေသတွင်း ပဋိပက္ခနှင့် လုံခြုံရေးအခြေအနေကြောင့် အမေရိကန်အခြေစိုက်ရေး စိုးရိမ်နေရပါတယ်။
ယခုအခါ အီရန်ဘောလုံးအဖွဲ့ချုပ်က ဖီဖာက အမေရိကန်မှ မက္ကဆီကိုသို့ ပြောင်းရွှေ့အခြေစိုက်ရေး ခွင့်ပြုချက်ပေးလာပြီ ဖြစ်ကြောင်း အတည်ပြုလာပါတယ်။
အစောပိုင်းတုန်းက အရီဇိုးနားတွင် အခြေစိုက်ရန် စီစဉ်ထားတဲ့ အီရန်အသင်းဟာ ယခုအခါ မက္ကဆီကိုနိုင်ငံ၊ တီဂျူအာနာတွင် အခြေစိုက်လာတော့မှာ ဖြစ်ပါတယ်။
မက္ကဆီကိုဟာ တူဆန်ရှိ Kino Sports Complex တွင် အခြေစိုက်ရန် စီစဉ်ထားခဲ့ပေမဲ့လည်း အီရန်နှင့် အမေရိကန်တို့အကြား စစ်ရေးအရ တင်းမာမှုများ ဆက်လက် ဖြစ်ပေါ်နေမှုနှင့်အတူ လုံခြုံရေးအရ စိုးရိမ်စရာ ရှိနေခဲ့ပါတယ်။
ယခုအခါမှာ အီရန်အသင်းသားတို့ဟာ မက္ကဆီကိုတွင် အခြေစိုက်လာမှုနှင့်အတူ ထိန်းချုပ်ထားနိုင်တဲ့ ပတ်ဝန်းကျင်တွင် နေထိုင်လေ့ကျင့်လာရတော့မှာ ဖြစ်ပါတယ်။
အီရန်ဟာ မက္ကဆီကိုသို့ ပြောင်းရွှေ့အခြေစိုက်လာမှုနှင့်အတူ ကမ္ဘာ့ဖလားအုပ်စုပွဲများအတွက် ခရီးစဉ်များအား ခက်ခဲစွာ ပြင်ဆင်လာရတော့မှာ ဖြစ်ပါတယ်။
အီရန်ဟာ ကမ္ဘာ့ဖလားအုပ်စုပွဲများဖြစ်ကြတဲ့ နယူးဇီလန်၊ ဘယ်လ်ဂျီယံနှင့် အီဂျစ်တို့နှင့်ပွဲအားလုံးကို အမေရိကန်တွင်ပင် ကစားလာရမှာ ဖြစ်ပြီး ပွဲများအတွက် ခရီးကြန့်ကြာမှုများ ရှိလာပါမယ်။
အီရန်ဟာ အစောပိုင်းတုန်းက အမေရိကန်တွင် ကစားရမဲ့ပွဲများကို မက္ကဆီကိုတွင် ပြောင်းကစားရေး တောင်းဆိုခဲ့ပေမဲ့ ပွဲများကို စီစဉ်ထားပြီးဖြစ်တာနဲ့အညီ ဖီဖာရဲ့ ငြင်းပယ်ခြင်းခံခဲ့ရပါတယ်။