အရှေ့ပိုင်းတိုင်းစစ်ဌာနချုပ်သို့ လက်နက်ခဲယမ်းများနှင့်အတူ အလင်းဝင်လာခဲ့ကြသည့် PDF အဖွဲ့ဝင်(၆၁)ဦး

ရှမ်းပြည်နယ်၊ တောင်ကြီးမြို့ရှိ အရှေ့ပိုင်းတိုင်းစစ် ဌာနချုပ်သို့ တိုင်းရင်းသားလက်နက်ကိုင်အဖွဲ့ဝင်များအပါအဝင် PDF အဖွဲ့ဝင်(၆၁)ဦးသည် လက်နက်ခဲယမ်းများနှင့်အတူ အလင်းဝင်လာခဲ့ကြောင်း သိရသည်။
အဆိုပါ အလင်းဝင်လာသူများအား ယနေ့ ဧပြီ ၂၆ ရက်နံနက်ပိုင်းတွင် မိဘအုပ်ထိန်းသူများထံပြန်လည်အပ်နှံခြင်းကို အရှေ့ပိုင်းတိုင်းစစ်ဌာနချုပ်ရှိ ခန်းမ၌ ကျင်းပရာ တိုင်းမှူးက အလင်းဝင်လာသူများအပ်နှံသည့် လက်နက်ခဲယမ်းများကိုလက်ခံရယူ၍ ဆုကြေးငွေ၊ ဂုဏ်ပြုဆုငွေနှင့် ထောက်ပံ့ပစ္စည်းများကိုပေးအပ်ခဲ့ကြောင်း သိရသည်။
ထို့နောက် အလင်းဝင်လာသူများအား ဝန်ခံကတိလက်မှတ်ရေးထိုးစေပြီးနောက် ၎င်းတို့၏ မိဘအုပ်ထိန်းသူများထံ ပြန်လည်အပ်နှံပေးခဲ့ကြောင်း သိရသည်။

ပဲခူးတိုင်း၊ နေပြည်တော်၊ မန္တလေးတိုင်းနှင့် ကချင်ပြည်နယ်တို့တွင် မိုးရွာသွန်းပြီးလေပြင်းတိုက်ခတ်၍ သစ်ပင်လဲကျမှုများဖြစ်ပေါ်

ပဲခူးတိုင်း၊ နေပြည်တော်၊ မန္တလေးတိုင်းနှင့် ကချင်ပြည်နယ်တို့တွင် ယနေ့ ဧပြီ ၂၆ ရက်က မိုးရွာသွန်းပြီးလေပြင်းတိုက်ခတ်၍ သစ်ပင်လဲကျမှုများဖြစ်ပေါ်ခဲ့ကြောင်း မီးသတ်တပ်ဖွဲ့ထံမှ သိရသည်။
ပဲခူးတိုင်း၊ တောင်ငူမြို့တွင် နေ့လည် ၃ နာရီခွဲကျော်ခန့်က မိုးရွာသွန်းပြီးလေပြင်းတိုက်ခတ်မှုကြောင့် အမှတ် (၁)ရပ်ကွက်၊ သိမ်တော်ဦးဘုရားလမ်းရှိ နေအိမ်ပေါ်သို့ သစ်ပင်လဲကျခဲ့သဖြင့် တောင်ငူမြို့နယ်မီးသတ်စခန်းမှတပ်ဖွဲ့ဝင်များက ဖယ်ရှားရှင်းလင်းပေးခဲ့ကြကြောင်း သိရသည်။
နေပြည်တော်၊ တပ်ကုန်းမြို့နယ်တွင်လည်း နေ့လည် ၃ နာရီခွဲကျော်ခန့်က မိုးရွာသွန်းပြီးလေပြင်းတိုက်ခတ်၍ ရန်ကုန်-မန္တလေးကားလမ်းဟောင်း၏ မိုင်တိုင်အမှတ် ၂၅၉/၃ အနီးရှိ ကုန်စုံဆိုင်ပေါ်သို့သစ်ပင်လဲကျခဲ့ရာ မီးသတ်တပ်ဖွဲ့ဝင်များမှ ဖယ်ရှားရှင်းလင်းပေးခဲ့ကြကြောင်း သိရသည်။
ထို့ပြင် မွန်းတည့် ၁၂ နာရီ ၅၅ မိနစ်ခန့်ကလည်း မန္တ လေးတိုင်း၊ ပျော်ဘွယ်မြို့တွင် မိုးရွာသွန်းပြီးလေပြင်းတိုက်ခတ်မှုကြောင့် မြင်းဘက်ရပ်ကွက်၊ ရန်ကုန်-မန္တ လေးကားလမ်းဟောင်းဘေးတွင်သစ်ပင်လဲကျကာလမ်းပိတ်နေသဖြင့် မီးသတ်တပ်ဖွဲ့ဝင်များ၊ အရန်မီး သတ်တပ်ဖွဲ့ဝင်များမှ ဖယ်ရှားရှင်းလင်းပေးခဲ့ကြကြောင်း သိရသည်။
ထို့အတူ နံနက် ၅ နာရီခန့်ကလည်း ကချင်ပြည်နယ်၊ မိုးညှင်းမြို့နယ်၊ ဟိုပင်မြို့တွင်လေပြင်းတိုက်ခတ်မှုကြောင့် မြို့မမြောက်ရပ်ကွက်၊ ရွှေဘို-မြစ်ကြီးနားသွားကားလမ်း ပြည်ထောင်စုလမ်းမကြီးပေါ်တွင် သစ်ကိုင်းများကျိုးကျနေသဖြင့် မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များမှ ဖယ်ရှားရှင်းလင်းပေးခဲ့ကြကြောင်း သိရသည်။
ယမန်နေ့ ဧပြီ ၂၅ ရက်ည ၁၀ နာရီခန့်ကလည်း ကချင် ပြည်နယ်၊ မိုးကောင်းမြို့နယ်တွင် မိုးသည်းထန်စွာရွာ သွန်းပြီးလေပြင်းတိုက်ခတ်မှုကြောင့် နောင်ကိုင်တော်ရပ်ကွက်ရှိ နေအိမ်များအမိုးလန်ပျက်စီးခြင်း၊ နတ်ကြီးကုန်းရပ်ကွက်၊ မြန်မာ့စီးပွားရေးဘဏ်ဝန်းအတွင်း အ ဆောက်အဦ၊ အရှေ့ရပ်ကွက်ရှိ ပြန်ကြားရေးနှင့်ပြည်သူ့ဆက်ဆံရေးရုံးအရှေ့နှင့် မိုးကောင်းတံတားအဆင်းရှိ ဓာတ်အားလိုင်းကြိုးများပေါ်သို့ သစ်ပင်လဲကျမှုများဖြစ်ပွားခဲ့ကြောင်း သိရသည်။
ထို့ကြောင့် ယနေ့ ဧပြီ ၂၆ ရက်နံနက် ၇ နာရီ ၄၅ မိနစ်ခန့်မှစတင်၍ မိုးကောင်းမြို့နယ်မီးသတ်စခန်းမှတပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များက လဲကျနေသည့်သစ်ပင်များကို ဖယ်ရှားရှင်းလင်းပေးခဲ့ကြကြောင်း သိရသည်။

တရုတ်နိုင်ငံခြားရေးဝန်ကြီး မစ္စတာ ဝမ်ယိ နေပြည်တော်မှပြန်လည်ထွက်ခွာ

မြန်မာနိုင်ငံသို့ တရားဝင်ခရီးစဥ်လာရောက်ခဲ့သည့် တရုတ်ကွန်မြူနစ်ပါတီဗဟိုကော်မတီ၊ နိုင်ငံရေးဗျူရိုအဖွဲ့ဝင်နှင့် နိုင်ငံခြားရေးဝန်ကြီး မစ္စတာ ဝမ်ယိ သည် ယနေ့ ဧပြီ ၂၆ ရက်နံနက်ပိုင်းက နေပြည်တော်လေဆိပ်မှတစ်ဆင့် အထူးလေယာဥ်ဖြင့် တရုတ်နိုင်ငံသို့ပြန်လည်ထွက်ခွာသွားခဲ့ကြောင်း သိရသည်။
တရုတ်နိုင်ငံခြားရေးဝန်ကြီး မစ္စတာ ဝမ်ယိအား နိုင်ငံခြားရေးဝန်ကြီးဌာန ဒု-ဝန်ကြီးဦးနိုင်မင်းကျော်၊ မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး မစ္စ မာကျား၊ ဌာနဆိုင်ရာတာဝန်ရှိသူများ၊ မြန်မာ-တရုတ်ရင်းနှီးမြှုပ် နှံမှုနှင့် ကုန်သွယ်မှုမြှင့်တင်ရေးအသင်းမှ အဖွဲ့ဝင်များက နေပြည်တော်လေဆိပ်တွင်ပို့ဆောင်နှုတ်ဆက်ခဲ့ကြကြောင်း သိရသည်။
မြန်မာနိုင်ငံခရီးစဥ်အတွင်း၌ တရုတ်နိုင်ငံခြားရေးဝန် ကြီး မစ္စတာ ဝမ်ယိ သည် နိုင်ငံတော်သမ္မတ ဦးမင်းအောင်လှိုင်၊ မြန်မာနိုင်ငံခြားရေးဝန်ကြီးဌာန ပြည်ထောင်စုဝန်ကြီးတို့နှင့်တွေ့ဆုံ၍ နှစ်နိုင်ငံပူးပေါင်းဆောင်ရွက်မှုများမြှင့်တင်ရန်အပါအဝင် ဆွေးနွေးမှုများစွာပြုလုပ်ခဲ့ကြောင်း သိရသည်။

တံတားဦးအပြည်ပြည်ဆိုင်ရာ လေဆိပ်မှ မန္တလေးမြို့သို့ တိုက်ရိုက်သွားလာနိုင်ရန်အတွက် ဒုဋ္ဌဝတီ တံတားတည်ဆောက်ပြီးစီးရန်လို

၂၀၂၆ ခုနှစ် ကုန်မတိုင်မီ ပြီးစီးအောင် တွန်းအားပေးဆောင်ရွက်
ရန်ကုန်-မန္တလေးအမြန်လမ်း၏ မိုင်တိုင်အမှတ် (၃၅၈/၁)ရှိ ဒုဋ္ဌဝတီတံတား (ပေ ၁၀၀၀) အသစ်ပြန်လည်တည်ဆောက်နေခြင်းဖြစ်ပြီး တံတားဦးအပြည်ပြည်ဆိုင်ရာ လေဆိပ်မှ မန္တလေးမြို့သို့ တိုက်ရိုက်သွားလာနိုင်ရန်အတွက် ဒုဋ္ဌဝတီ တံတားတည်ဆောက်ပြီးစီးရန်လိုအပ်ကြောင်း ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးမျိုးသန့်က ပြောကြားခဲ့သည်။
ငလျင်ဒ_ဏ်ကြောင့် တံတားပြိုကျပျ_က်စီး၍ လမ်းပန်းဆက်သွယ်မှု ပြတ်တောက်နေသဖြင့် ခရီးသွားပြည်သူများ တံတားဦး - ပလိပ်လမ်းမှ တစ်ဆင့်ပတ်၍ မန္တလေးမြို့သို့ သွားလာနေရသောကြောင့် လေးလမ်းသွား တံတားဆောင်ရွက်နေခြင်းတွင် အပြန်လမ်းဘက်မှ နှစ်လမ်းသွားတံတားကို ၂၀၂၆ ခုနှစ် ကုန်မတိုင်မီ ပြီးစီးအောင်တွန်းအားပေးဆောင်ရွက်၍ လမ်းပန်းဆက်သွယ်မှုရရှိအောင် အလေးထားဆောင်ရွက်ရမည်ဖြစ်ကြောင်းလည်း ပြည်ထောင်စုဝန်ကြီးက ပြောသည်။
ယမန်နေ့ က ပြည်ထောင်စုဝန်ကြီး ဦးမျိုးသန့် နှင့် မန္တ‌လေးတိုင်းဝန်ကြီးချုပ်ဦးမျိုးအောင် နှင့် တာဝန်ရှိသူများသည့် ရန်ကုန် - မန္တလေး အမြန်လမ်းရှိ ဒုဋ္ဌဝတီတံတား အသစ်ပြန်လည်တည်ဆောက်ခြင်းနှင့် လမ်း၊ တံတားများ ပြုပြင်ဆောင်ရွက်နေသည့်အခြေအနေ ကြည့်ရှုစစ်ဆေးခဲ့စဉ် အထက်ပါအတိုင်း ပြောကြားခဲ့ခြင်းလည်း ဖြစ်သည်။
တံတားတည်ရှိသည့် နေရာသည် ပြင်းထန်သည့် လှုပ်ခါမှုကြောင့် အစိုင်အခဲမှ ရွှံ့ညွန်ကဲ့သို့ ဂုဏ်သတ္တိပြောင်းလဲခြင်းဖြစ်စဉ် (lique- faction) ဖြစ်နိုင်ခြေများသော မြေအမျိုးအစားဖြစ်သောကြောင့် လိုအပ်သည့် တွက်ချက်မှုများ လိုက်နာဆောင်ရွက်ရန် လိုအပ်ကြောင်း သိရသည်။
အဆိုပါ တံတားပြီးစီးသည်နှင့် တစ်ပြိုင်တည်း ရန်ကုန်မှ မန္တလေးသို့ အမြန်လမ်းအတိုင်း လွယ်ကူချောမွေ့စွာသွားလာနိုင်ရန်အတွက် လမ်းတစ်လျှောက်ရှိ ပြုပြင်ထိန်းသိမ်းခြင်း လုပ်ငန်းများကိုလည်း ဟန်ချက်ညီစွာပြီးစီးစေရေး လမ်းပိုင်းအလိုက် တာဝန်ခံများနှင့် ညွှန်ကြားရေးမှူးချုပ်တို့က စဉ်ဆက်မပြတ် ကြပ်မတ်ဆောင်ရွက်သွားရန်လိုအပ်ကြောင်းလည်း ပြည်ထောင်စုဝန်ကြီး ကပြောကြားခဲ့ကြောင်း သိရသည်။

ရုရှားကာကွယ်ရေးဝန်ကြီး မြောက်ကိုရီးယားသွား

ရုရှားကာကွယ်ရေးဝန်ကြီး အန်ဒရိုင်း ဘယ်လူဆော့ဗ်သည် မြောက်ကိုရီးယားနိုင်ငံကို ရောက်ရှိခဲ့ကြောင်း ရုရှားကာကွယ်ရေးဝန်ကြီးဌာနက ဧပြီလ ၂၆ ရက် နေ့တွင် ပြောကြားခဲ့ပြီး မကြာခင်ရက်များအတွင်း ပြုံယမ်းသို့ သွားရောက်သည့် ဒုတိယမြောက် ရုရှားအကြီးတန်းအရာရှိတစ်ဦးဖြစ်လာသည်။
ရုရှား၏ နိုင်ငံတော်ဒူးမားလွှတ်တော်ဥက္ကဌ ယက်ချီဆလက်ဗ် ဗိုလိုဒင်သည်လည်း ပြုံယမ်းသို့ သွားရောက်ခဲ့ပြီး ယူကရိန်းစစ်ပွဲတွင် တိုက်ပွဲဝင်ရင်း ကျဆုံးခဲ့သော မြောက်ကိုရီးယားတပ်ဖွဲ့ဝင်များအတွက် မကြာသေးမီက တည်ဆောက်ခဲ့သော အောက်မေ့ဖွယ်အဆောက်အအုံဖွင့်ပွဲသို့ တက်ရောက်ခဲ့ကြောင်း မြောက်ကိုရီးယားနိုင်ငံပိုင် ကေစီအင်န်အေသတင်းဌာနက အစောပိုင်းတွင် သတင်းဖော်ပြခဲ့သည်။
မစ္စတာ ဘယ်လူဆော့ဗ်သည် မြောက်ကိုရီးယား ထိပ်တန်းခေါင်းဆောင်များ၊ အကြီးတန်းစစ်ဘက်အရာရှိများနှင့် ဆွေးနွေးရန်ရှိပြီး အခမ်းအနားများနှင့် အောက်မေ့ဖွယ်အထိမ်းအမှတ်ပွဲများကို တက်ရောက်မည်ဖြစ်ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။
သီးခြားအနေဖြင့် ရုရှားသမ္မတ ဗလာဒီမာပူတင်သည် အောက်မေ့ဖွယ်အဆောက်အအုံဖွင့်ပွဲ အထိမ်းအမှတ်အဖြစ် မြောက်ကိုရီးယားခေါင်းဆောင် ကင်မ်ဂျုံအန်ထံ ကြေးနန်းတစ်စောင် ပေးပို့ခဲ့ကြောင်း ခရမ္မလင်က ပြောကြားခဲ့သည်။
ရုရှားနိုင်ငံ ကာ့စ်ခ်ဒေသအနောက်ပိုင်းသို့ ယူကရိန်းတပ်များကျူးကျော်ခဲ့မှုကို တွန်းလှန်ရာတွင် ကူညီပေးခဲ့မှုအတွက် မစ္စတာ ကင်မ်နှင့် မြောက်ကိုရီးယားစစ်သားများကို ကျေးဇူးတင်ကြောင်း မစ္စတာ ပူတင်က ပြောကြားခဲ့ပြီး နှစ်နိုင်ငံသည် ၎င်းတို့၏ မဟာဗျူဟာမြောက် မိတ်ဖက်ဆက်ဆံရေးကို ဆက်လက်ခိုင်မာစေမည်ဟု ယုံကြည်ကြောင်း ပြောကြားခဲ့သည်။

ကိုရင်ကို ​ရိုက်နှက်ခဲ့တဲ့ ဘုန်းကြီး ထောင် ၂ နှစ်ချမှတ်ခံရ

ကိုရင်ကို ပြင်းထန်စွာ ရိုက်နှက်ခဲ့တဲ့ တနင်္သာရီတိုင်း ၊ မြိတ်မြို့နယ်၊ ကျောက်ဖြူတောင် ၊ ပဋိပတ္တိတောရကျောင်းက ကျောင်းထိုင်ဆရာတော် ဦးတေဇကို ထောင်ဒဏ် ၂ နှစ်ချမှတ်လိုက်ပြီ ဖြစ်တယ်လို့ သိရပါတယ်။
ဒီနေ့ ဧပြီ ၂၄ ရက်နေ့၊ မနက်ပိုင်းမှာ မြိတ်မြို့နယ် တရားရုံးက ရာဇသတ်ကြီး ပုဒ်မ ၂၉၅ (က) နဲ့ ထောင်ဒဏ်ချမှတ်လိုက်တာဖြစ်တယ်လို့ အမှုကိုလိုက်ပါ ဆောင်ရွက်ပေးနေတဲ့ ဆရာတော် အရှင်သုန္ဒက မိန့် ပါတယ် ။
" ဒီနေ့ စီရင်ချက်ချတာပါ။သူတို့ စပြီးဖမ်းတယ် ။ညှိနှိုင်းတယ်။ အားလုံး အကုန်လုံး သံဃနာယကနဲ့ လုပ်ကြတယ်။ လူဝတ်လဲတယ် ။အမှုရင်ဆိုင်တယ်။ တရားရုံးက ဒီနေ့ ဆုံးဖြတ်ချက်ချတယ်။ အဓိက ကျူးလွန်သူကလည်းဝန်ခံတယ်။ပြစ်မှုကလည်း ထင်ရှားတယ်။ အများသူငါနဲ့ သက်ဆိုင်တဲ့ကိစ္စလည်း ဖြစ်တယ်။ ဦးစားပေးရမယ့်ကိစ္စဖြစ်တယ်။ ဥပမာ လွန်ခဲ့တဲ့လက မှော်ဘီမှာ အမျိုးသမီးကို ခေါင်းဖြတ်ပြီး လမ်းပေါ်ခေါင်းကြီးယူလာတဲ့ အမှုဆိုလည်း ချက်ခြင်းစီရင်ချက်ချတယ်။ ပြောချင်တာက တရားလိုနဲ့ တရားခံ နှစ်ဦးနှစ်ဘက် ပဲသိနေတဲ့ အမှုတွေက ရက်ချိန်းတွေနဲ့ရမန်တွေနဲ့ စစ်ဆေးတာ အကြာကြီးဖြစ်တာက သူကအစဥ်လိုက်သွားတဲ့ ရုံးလုပ်ငန်းဆိုတော့ ကြန့်ကြာတာပေါ့။ ဒီလို တိုင်းသိပြည်သိ ကမ္ဘာသိဖြစ်သွားပြီး အများပြည်သူငါနဲ့ သက်ဆိုင်သွားတဲ့ အမှုကြတော့ မြန်မြန်ဆန်ဆဆန်ဦးစားပေးဆုံးဖြတ်ပေးရတယ်။မလုပ်ပေးလို့ မရဘူး ။ မလုပ်ပေးရင် လူထုရဲ့အုံကြွမှု လူထုရဲ့မကျေနပ်မှုတွေ ရှိတဲ့အတွက် ဒီလိုကိစ္စမျိုးက အမြန်ဆုံး ချပေးရတယ်။ " လို့ ဆရာတော် အရှင်သုန္ဒက မိန့်ပါတယ်။
ဦးတေဇကို ဧပြီ ၂၂ ရက်နေ့မှာ ဖမ်းဆီးစစ်ဆေးပြီး ဧပြီ ၂၃ ရက်မှာ လူဝတ်လဲကာ ပုဒ်မ ၂၉၅ (က) နဲ့ အမှုဖွင့်အရေးယူခဲ့ပြီး ဒီကနေ့ ဧပြီ ၂၄ မှာတော့ တရားရုံးက ထောင်ဒဏ် အမိန့်ချမှတ် လိုက်တာဖြစ်တယ်လို့ သိရပါတယ်။
ကိုရင်လေးကို ပြင်းထန်စွာ ရိုက်နှက်နေတဲ့ ရုပ်သံဖိုင်ကတော့ ဧပြီ ၂၁ ရက်နေ့က လူမှုကွန်ယက်မှာ ပျံ့နှံခဲ့လာတာဖြစ်ပြီး အဲဒီနောက်မှာ ရဟန်း သံဃာနဲ့ ပြည်သူလူထုအကြား ဝေဖန်မှုတွေထွက်ပေါ်ခဲ့ကာ ရိုက်နှက်ခဲ့တဲ့ ဆရာတော်ကို ထိရောက်တဲ့အရေးယူမှုပြုလုပ်ပေးဖို့ တောင်းဆိုခဲ့ကြတာ ဖြစ်ပါတယ် ။
လက်ရှိမှာ ကိုရင်လေးရိုက်နှက်ခံရတဲ့ ရုပ်သံဖိုင်ကို ရိုက်ကူးခဲ့တဲ့ အမျိုးသမီးကို ရိုက်ကူးခဲ့တဲ့အတွက်ဆိုပြီး ခြိမ်းခြောက်မှုရှိနေသလို
ရုပ်သံဖိုင်ကို လူမှုကွန်ယက်ပေါ် ဖြန့်ဝေခဲ့တဲ့ ဦးဇင်းမှာလည်း ခြိမ်းခြောက်ခံရတဲ့အတွက် လူဝတ်လဲပြီး တိမ်းရှောင်နေရတယ်လို့ သိရပါတယ်။

ဖလမ်းမြို့ကို တနှစ်အကြာမှာမှ တပ်ကပြန်ထိန်းချုပ်နိုင်

ချင်းညီနောင်ပူးပေါင်း တပ်ဖွဲ့တွေ ထိန်းချုပ်ထားတဲ့ ချင်းပြည်နယ် ၊ဖလမ်းမြို့ကို အစိုးရတပ်တွေက ဒီကနေ့မှာ ပြန်လည်ထိန်းချုပ်လိုက်ပြီ ဖြစ်တယ်လို့ စုံစမ်းသိရှိ ရပါတယ် ။
ဖလမ်းမြို့နယ်မှာ ချင်းညီနောင် တပ်ဖွဲ့တွေနဲ့ အစိုးရတပ်အကြား တိုက်ပွဲ ပြင်းထန်ဖြစ်ပွားခဲ့ပြီး အစိုးရက လေကြောင်း ပစ်ကူ ၊ မြေပြင် စစ်ကြောင်း ၊ လက်နက်ကြီး ပစ်ခတ်မှု အပါအဝင် အင်အားအများအပြားနဲ့ ထိုးစစ်ဆင်တိုက်ခိုက် ခဲ့တဲ့အတွက် ဧပြီ ၂၅ ရက်နေ့မှာ အစိုးရတပ်က ဖလမ်းမြို့ကို အလုံးစုံ ထိန်းချုပ်နိုင်ခဲ့တာဖြစ်တယ်လို့ သိရပါတယ်။
" ဖလမ်းမြို့ကို တပ်မတော်​က အလုံးစုံထိန်းချုပ်လိုက်ပါပြီ ။ မနေ့က နယ်မြေယူ ၊ ဒီနေ့ အလုံးစုံရှင်းလင်းပါတယ်။ အလံတွေလည်း စိုက်ထူပြီးပြီ။ ဖလမ်းမြို့က စစ်ရေးအရ အရမ်းအရေးပါတဲ့မြို့ပါ။ချင်းတပ်တွေကတော့ မနေ့ကတည်းက မရှိတော့ဘူး ။ " လို့ လုံခြုံရေး တပ်ဖွဲ့နဲ့ နီးစပ်သူ စစ်ရေးသတင်းရင်းမြစ်က ပြောပါတယ်။
ဖလမ်းမြို့က ချင်းပြည်နယ်မှာ လေယာဥ်ကွင်းရှိတဲ့ တခုတည်းသောမြို့ဖြစ်သလို ပြည်နယ်ရဲ့ ဒုတိယမြို့တော်လည်းဖြစ်ပြီး စစ်ရေးအရ အဖွဲ့အစည်း နှစ်ခုလုံး အတွက် အရေးပါတဲ့ မြို့ ဖြစ်တယ်လို့ သိရပါတယ်။
ဖလမ်းမြို့နယ်ကို ပြီးခဲ့တဲ့ ၂၀၂၅ ခုနှစ် ဧပြီလမှာ ချင်းညီနောင်ပူးပေါင်းတပ်တွေက သိမ်းပိုက်ခဲ့တာဖြစ်ပြီး အဲဒီ​နောက် စက်တင်ဘာလမှာ အစိုးရတပ်က ကလေး-နတ်ချောင်း-ဝေဘူလ-ဖလမ်းကားလမ်းကနေ စစ်အင်အားဖြည်ပြီး စစ်ကြောင်းထိုးတိုက်ခိုက်ခဲ့တာ ဖြစ်တယ်လို့ သိရပါတယ်။
အဲဒီနောက်မှာ ချင်းညီနောင် ပူးပေါင်းတပ်တွေနဲ့ အစိုးရတပ်အကြား တိုက်ပွဲတွေဖြစ်ပွားခဲ့ပြီး ၂၀၂၆ ဧပြီလမှာတော့ တိုက်ပွဲက ပိုပြင်းထန်လာကာ ချင်းတပ်ဖွဲ့တွေလည်း နောက်ဆုတ်ပေးလိုက်ရပြီး ဖလမ်းကို တပ်ကပြန်လည်ထိန်းချုပ်နိုင်သွားတာ ဖြစ်တယ်လို့ သိရပါတယ် ။
ဖလမ်းမြို့ကိုတော့ ချင်းညီနောင်ပူးပေါင်းတပ်တွေက သိမ်းပိုက်ပြီး တနှစ်အကြာမှာ ပြန်လည် လက်လွှတ်လိုက်ရတာ ဖြစ်ပါတယ်။

ဓနုဖြူမြို့မစျေးကြီး မီးလောင်လို့ ဆိုင်ခန်း ၂၇၀ ကျော် မီးထဲပါသွား

ဧရာဝတီတိုင်း ၊ ဓနုဖြူမြို့နယ်ရှိ ဓနုဖြူ မြို့မစျေးကြီးမှာ မီးလောင်မှုဖြစ်ပွားပြီး စျေးဆိုင်ခန်း ၂၇၀ ကျော် မီးလောင်ပျက်စီးခဲ့တယ်လို့ မြို့နယ်မီးသတ်ဦးစီးဌာနမှ သိရပါတယ်။
ဒီကနေ့ ဧပြီ ၂၆ ရက်နေ့ ၊ မနက်အစော ၆ နာရီ ၂၅ မိနစ်လောက်မှာ ဓနုဖြူမြို့မစျေးကြီးရှိ ဆိုင်ခန်းတွေ မီးစတင်လောင်ကျွမ်းခဲ့တာဖြစ်ပြီး မနက် ၇ နာရီ ၅၀ မှသာ မီးငြိမ်းတာကြောင့် မီးလောင်မှုဟာ အချိန် တနာရီကျော်ကြာခဲ့တယ်လို့ သိရပါတယ်။
"မီးက ငြိမ်းပါပြီ။ ဆိုင်ခန်း ၂၇၁ ခန်းပါသွားပါတယ်။ လုပ်ငန်းစဥ်တွေကလုပ်နေတုန်း မပြီးသေးပါဘူး ။ " လို့ ဓနုဖြူမြို့နယ်မီးသတ်ဦးစီးအရာရှိက ပြောပါတယ်။
မီးစတင်လောင်ကျွမ်းရတဲ့ အခြေအနေနဲ့ ပျက်စီးဆုံးရှုံးမှု တန်ဖိုးကိုတော့ မသိရသေးပါဘူး ။
ဓနုဖြူမြို့မစျေးကြီး မီးလောင်မှုမှာ အဝတ်အထည်တန်းကလွဲပြီး ကျန်တဲ့ စျေးဆိုင်ခန်းအားလုံးနီးပါး မီးလောင်ကျွမ်းခဲ့တာ ဖြစ်ပြီး လူထိခိုက်ဒဏ်ရာရတာမျိုးတော့မရှိဘူးလို့ ဒေသခံဆီက သိရပါတယ်။
" စျေးဆိုင်ခန်းတော်တော်များတယ်။ရာကျော်တယ်။.စျေးအလယ်ရုံအကုန်လောင်သွားတာ။ အဲဒီထဲမှာ ဆိုင်ခန်လေးတွေက အများကြီးပဲ။ ဒီနေ့က စျေးပိတ်ရက်ဆိုတော့ မီးဘယ်လိုစလောင်သလဲ ငေချာမသိရသေး ဘူး ။ " လို့ မျက်မြင်ဒေသခံက ပြောပါတယ်။
မီးလောင်မှုကိုတော့ ဧရာဝတီတိုင်း အတွင်းရှိ မြို့နယ်မီးသတ်စခန်းတွေက မီးငြှိမ်းသတ်ယာဉ် ၁၄ စီး နဲ့အတူ ဒေသခံတွေ၊ လူမှုကူညီရေးအသင်းတွေနဲ့ ပူးပေါင်းပြီး မီးငြိမ်းသတ်ခဲ့ကြတာ ဖြစ်တယ်လို့ သိရပါတယ် ။

မြစ်ကြီးနား ၊ မိုးကောင်း ၊ နမ္မတီး မြို့နယ်တွေမှာ လေပြင်းတိုက်လို့ ပြည်နယ်ရဲတပ်ဖွဲ့မှူးရုံးနဲ့ နေအိမ် ၊ စစ်ရှောင်စခန်း အပါအဝင် ရာနဲ့ချီ ပျက်စီးမှုရှိ

ကချင်ပြည်နယ် ၊ မြစ်ကြီးနား ၊ မိုးကောင်း ၊ နမ္မတီး မြို့နယ်တွေမှာ လေပြင်းတိုက် မိုးရွာသွန်းမှုကြောင့် ပြည်နယ် ရဲတပ်ဖွဲ့မှူးရုံးအပါ နေအိမ် နဲ့ စစ်ရှောင် စခန်းအပါအဝင် အဆောက်အဦ ရာနဲ့ချီပြီး ပျက်စီးမှု ရှိခဲ့သလို လူထိခိုက်ဒဏ်ရာရသူတွေလည်းရှိခဲ့ တယ်လို့ ဒေသခံတွေဆီက သိရပါတယ် ။
မနေ့က ဧပြီ ၂၅ ရက်နေ့ ည ၁၀ နာရီလောက်မှာ လေပြင်းတိုက်ခတ်တာ ၊ မိုးရွာသွန်းတာ ၊ မိုးသီးကြွေတာတွေ ဖြစ်ပွားခဲ့တာဖြစ်ပြီး အဆိုပါ.သဘာဝဘေးအန္တရာယ်ဖြစ်စဥ်ကြောင့် လူနေအိမ် သွပ်အမိုးလန်ခြင်း ၊ နေအိမ်ပြိုကျပျက်စီးခြင်း ၊ အကာအရံတွေပျက်စီးခြင်း ၊ သစ်ပင်လဲကျ ပျက်စီးတာတွေ ဖြစ်ပွားခဲ့တာ ဖြစ်ပါတယ်။
မြစ်ကြီးနားမြို့မှာဆိုရင် ရဲတပ်ဖွဲ့မှူးရုံးက သစ်ပစ်တွေလဲကျခဲ့သလို အဆောက်အဦ တချို့လည်း ပျက်စီးမှု ရှိခဲ့ကြောင်း ၊ ကျန်တဲ့ ရပ်ကွက်နဲ့ လမ်းတလျှောက်မှာလည်း သစ်ပင်တွေပြိုကျခဲ့သလို နေအိမ်တချို့ အမိုးလန်ပျက်စီးမှုရှိခဲ့ တယ်လို့ သိရပါတယ်။
" သစ်ပင်လဲတာတွေကိုတော့ ရှင်းလင်ရေးလုပ်နေတယ်။ အိမ်တွေ ပျက်စီးမှုက သေချာမသိသေးဘူး ။ " လို့ မြို့နယ်မီးသတ်ဦးစီးအရာရှိက ပြောပါတယ်။
မိုးကောင်းမြို့မှာဆိုရင်လည်း မြို့ပေါ်ရပ်ကွက်တွေအပြင် ကျေးရွာဘက်မှာပါ လေပြင်းတိုက်ခတ်မှုကြောင့် သစ်ပင်တွေ ပြိုလဲကျခဲ့သလို အိမ်အမိုးလန်ခြင်း ၊ ခြံစည်းရိုးပြိုကျခြင်း စတဲ့ ပျက်စီးမှုတွေ ဖြစ်ပေါ်ခဲ့တယ်လို့ သိရပါတယ်။
မိုးကောင်းမြို့နယ်ထဲက လွဲလောကျေးရွာအုပ်စုက ကျေးရွာတွေမှာဆိုရင် နေအိမ်ပြိုကျပျက်စီးတာ ၊ အိမ် အများအပြား အမိုးလန်တာ စေတီတော် ထီးတော်တွေ ယိမ်းယိုင်တာ ၊ လူထိခိုက်ဒဏ်ရာရတာတွေ ဖြစ်ပွားမှုရှိခဲ့တယ်လို့ သိရပါတယ်။
" ပြိုတဲ့အိမ်အများစုကတော့ အိမ်ကြီးအိမ်ကောင်းတော့သိပ်မပါပေမယ့် သွပ်မိုး ထရံကာအိမ်တွေပါပဲ ။ လုံးလုံးပြိုကျတာတွေများတယ်။အမိုးလန်တာလည်းရှိတယ်။ လူထိခိုက်တာ အနည်းငယ်တော့ရှိတယ်တယ်။ရွာတွေဘက်ကတော့ ကိုယ်ထူကိုယ်ထလုပ်ရမှာများပါတယ်။မနေ့က လေတအားကြမ်းတာ ကြောက်စရာတောင်ကောင်းပါတယ်။ " လို့ မိုးကောင်း ဒေသခံကပြောပါတယ်။
အလားတူ နမ္မတီးမှာလည်း လေပြင်းမုန်တိုင်းတိုက်ခတ်လို့ စစ်ရှောင်စခန်းအပါအဝင် ဌာနဆိုင်ရာ နဲ့ နေအိမ်တွေ ၊ သစ်ပင်တွေလဲကျ ထိခိုက်ပျက်စီးမှုရှိခဲ့တယ်လို့သိရပါတယ်။
နမ္မတီးမြို့နယ် ၊ ဝါအောင် စစ်ရှောင် စခန်းမှာ ယာယီ ခိုလှုံ နေထိုင်နေတဲ့ လဝါးကျေးရွာ ၊ ခွန်စိုင်ယာန် ၊ နာဇရက် ၊ ဂျာထု ၊ စတဲ့ ကျေးရွာတွေက စစ်ရှောင်တွေ ရဲ့ ယာယီတဲတွေ ပျက်စီး ဆုံးရှုံးခဲ့ရတယ်လို့ သိရပါတယ်။
နောက်ပြီး နမ္မတီး သကြားစက်ဝင်းအတွင်း လဝါးဘုန်းတော်ကြီးတပိုင်နယ်မှ တိုက်ပွဲရှောင်ပြည်သူတချို့ ယာယီတိမ်းရှောင်ခိုလှုံနေကြတဲ့ စိန်ထရေဇား စစ်ရှောင်စခန်းမှာလည်း.ဝတ်ပြုဆောင်အပါအဝင် လူနေအဆောင်တွေ ပျက်စီးမှုရှိခဲ့တာကြောင့် စစ်ရှောင်စခန်းတွေအတွက် အကူအညီတွေ လိုအက်နေတယ်လို့ သိရပါတယ်။
" အိမ်တွေ အမိုးလန် ပျက်စီးမှုရှိတာ ဟုတ်ပါတယ်။ ဒီတခေါက် သစ်ပင်လဲကျတာလည်း ပိုများတယ်။စစ်ရှောင်တဲတွေလည်း ပျက်စီးတယ်။ သူတို့က မိုးကာတွေမိုးထားတယ်။ ဝါးနဲ့ဆောက်ထားတာပေါ့။ အမိုးလန်တာတွေ ယိုင်သွားတာတွေ ပျက်စီးမှုရှိတယ်။" လို့ နမ္မတီး ဒေသခံက ပြောပါတယ်။
လေပြင်းတိုက် မှုကြောင့် နမ္မတီးမြို့၊ မြို့ ရှေ့ကျောင်းတိုက်ဝန်းအတွင်းရှိ ရှေးဟောင်းဇာတ်စင်လည်း ပြိုကျပျက်စီးသွားခဲ့တယ်လို့ သိရပါတယ်။
အဆိုပါ မြစ်ကြီးနား ၊မိုးကောင်း ၊နမ္မတီး မြို့နယ်တွေမှာ ဖြစ်ပွားခဲ့တဲ့ လေပြင်းတိုက်ခတ်မှုကြောင့် လူသွားလမ်းတွေနံ ကားလမ်းမပေါ် သစ်ပင်လဲကျပြီး လမ်းပိတ်မှုတွေကို အရင်ဆုံး သက်ဆိုင်ရာမီးသတ်တပ်ဖွဲ့ဝင်တွေနဲ့ လူမှုကူညီရေး အသင်းအဖွဲ့တွေပူးပေါင်း ရှင်းလင်းနေကြတယ်လို့ သိရပါတယ်။
မတ်လ ၁၄ ရက်နေ့ညပိုင်းကလည်း ကချင်ပြည်နယ် ၊ နမ္မတီးမြို့နဲ့ အနီးတဝိုက်ရှိ ကျေးရွာတွေမှာ အချိန်အခါမဟုတ် မိုးရွာသွန်းပြီး အရွယ်အစားကြီးမားတဲ့ ကြက်ဥအရွယ်ခန့် မိုးသီးတွေ ကြွေကျခဲ့တာကြောင့် နေအိမ်ရာနဲ့ချီပြီး အိမ်အမိုးသွပ်တွေ ပျက်စီးခဲ့တယ်လို့ ဒေသခံတွေဆီက စုံစမ်းသိရှိ ရပါတယ်။

ရှစ်လကျော်ကြာ ပိတ်ထားတဲ့ ထိုင်း - မြန်မာ အမှတ် ၂ ချစ်ကြည်ရေးတံတား ဧပြီ ၂၈ ပြန်ဖွင့်ရင် အခွင့်အလမ်း​​​တွေ ပိုလာမယ်

​ထိုင်း - မြန်မာ နယ်စပ်ကုန်သွယ်ရေးအတွက် အဓိကဂိတ်ဖြစ်တဲ့ မြဝတီနယ်စပ် ချစ်ကြည်ရေးတံတား အမှတ် ၂ ကို ဒီလ ဧပြီ ၂၈ ရက်နေ့မှာ ထိုင်းအာဏာပိုင်တွေက ပြန်လည်ဖွင့်လှစ်သွားဖို့ ပြင်ဆင်နေတယ်လို့ သိရပါတယ်။
အမှတ် ၂ ချစ်ကြည်ရေးတံတားပြန်လည်ဖွင့်လှစ်ဖို့အတွက် ထိုင်းအာဏာပိုင်တွေက လက်ရှိမှယ.လိုအပ်တဲ့ ပြင်ဆင်မှုတွေ ပြုလုပ်နေပြီး တံတားဖွင့်ပြန် တာနဲ့ ကုန်သွယ်ရေး လုပ်နိုင်ဖို့အတွက်လည်း မဲဆောက်ဘက်ခြမ်းမှာ ကုန်ကားတွေ အသင့်ပြင်ထားတဲ့ အခြေအနေရှိ တယ်လို့ သိရပါတယ်။
" တံတားပြန်ဖွင့်မယ့်အကြောင်း ထိုင်းဘက်ကရေးထားတာပါ။ ထိုင်းနိုင်ငံရဲ့ ThaiPBS North ကနေ ကြေညာထားပါတယ်။မြန်မာဘက် ဘာသတင်းထုတ်ပြန်မှုမှမရှိသေးပါဘူး။မြန်မာဘက်က သတင်းထွက်တဲ့ရက်အတိုင်း ဘယ်တော့မှမဖွင့်ဘူး။ရက်လွှဲပြီးပဲ ဖွင့်တတ်ပါတယ်။ " လို့ မြဝတီဒေသခံက ပြောပါတယ် ။
ကုန်သည်တွေကတော့ အမှတ် ၂ ချစ်ကြည်ရေးတံတား ပြန်လည်ဖွင့်လှစ်တာနဲ့ နယ်စပ်ကုန်သွယ်မှု စတင်နိုင်ဖို့အတွက် ပို့ကုန်လုပ်ငန်းရှင်တွေက နယ်စပ်ပို့ကုန်လိုင်စင်တွေ လျှောက်ထားနေကြပြီး ကုန်ပစ္စည်းတွေပါ ပြင်ဆင်ထားတယ်လို့ သိရပါတယ် ။
ဒါ့အပြင် နယ်စပ်ကုန်သွယ်ရေးဖွင့်ပါက ပို့ကုန်ပစ္စည်းတွေနဲ့ သွင်းကုန်ပစ္စည်းတွေကို ထားရှိသိုလှောင်ဖို့အတွက် မဲဆောက်ဘက်ခြမ်းမှာ မြန်မာကုန်သည်တွေက ဂိုဒေါင်ငှားရမ်းမှုတွေ ပြုလုပ်နေကြတယ်လို့ သိရပါတယ်။
ပို့ကုန်လုပ်ငန်းရှင်တယောက်က " ၂၈ ရက်နေ့ဖွင့်မယ်လို့ ကျွန်တော်တို့လည်း ကြားပါတယ်။ ဒါကြောင့် ပို့ကုန်တွေတင်ပို့နိင်ဖို့ ပြင်ဆင်နေတာရှိပါတယ်။.ပို့ကုန်လိုင်စင်တွေလည်း ချပေးနေပြီ။ တချို့ဆို မဲဆောက်မှာ ဂိုဒေါင်တွေငှားနေပြီ ။ နယ်စပ်ကနေ ကုန်သွယ်ဖို့ အဆင်သင့်ပြင်ထားသူတွေလည်းရှိတယ်။ မြဝတီနယ်စပ်ကုန်သွယ်ရေး အတွက်က တံတား၂ ဖွင့်မှရမှာ ။ အဲဒီတံတားက အဓိက ကုန်သွယ်ရေးလမ်းကြောင်းပဲ။ အာရှလမ်းကလည်း.ဖွင့်နေပြီးသားဆိုတော့ အခု တံတား၂လည်းဖွင့်မယ်ဆိုရင် နယ်စပ်ကုန်သွယ်ရေးက တော်တော်ကို ကောင်းတဲ့အခြေအနေဖြစ်လာမှာပါ။.ကုန်စည်စီးဆင်းမှုမြန်တဲ့အပြင် ပို့ကုန်လည်း အရင်ကထက် ပိုပြီး တင်ပို့နိုင်တော့မှာဖြစ်တယ်။ " လို့ ပြောပါတယ်။
မြဝတီနယ်စပ်ကုန်သွယ်ရေးကဏ္ဍသာ ပြန်လည်စတင်နိုင်ပါက ပြည်တွင်းထွက် လယ်ယာထွက်ကုန် တွေ ပြည်ပတင်ပို့မှုပမာဏမြင့်တက်လာပြီး စျေးကွက်ကောင်းလာ နိုင်သလို သွင်းကုန်ပစ္စည်းတွေလည်း ပိုပြီးတင်သွင်းနိုင်ကာ.စျေးနူန်းအထိုက်အလျောက်ကျလာနိုင်တယ်လို့ သိရပါတယ်။
မြဝတီ နယ်စပ်ကုန်သွယ်ရေးဟာ ထိုင်း - မြန်မာနှစ်နိုင်ငံ နယ်စပ်ကုန်သွယ်ရေးအတွက် ကုန်သွယ်မှုပမာဏအများဆုံး နယ်စပ်ဂိတ်ဖြစ်လို့ နယ်စပ်ကုန်သွယ်ရေးရဲ့ အဓိကကျတဲ့ ကဏ္ဍမှာပါဝင်တယ်လို့ သိရပါတယ်။
ချစ်ကြည်ရေးတံတား အမှတ် ၂ ကိုတော့ ၂၀၂၅ ခုနှစ် ဩဂုတ်လ ၁၈ ရက်နေ့မှာ မြန်မာဘက်ခြမ်း အာဏာပိုင်တွေက ပိတ်လိုက်တာဖြစ်ပြီး အဲဒီကတည်းက ခုထိဆိုရင် တံတား ၂ ပိတ်ထားတာဟာ ရှစ်လကျော်ကြာ ရှိပြီဖြစ်ပါတယ်။
ဒါကြောင့် အမှတ် ၂ တံတားပိတ်လိုက်ကတည်းက စတင်ပြီး ခုချိန်ထိ မြဝတီနယ်စပ်ကနေ နှစ်နိုင်ငံ ကုန်သွယ်ရေးရပ်တန့်နေတာဟာလည်း ရှစ်လကျော်ကြာရှိပြီ ဖြစ်ပါတယ်။