ထိုင်းက PV ကိုင်ထားတဲ့ မြန်မာတွေရဲ့ ပတ်စပို့စ်ကိစ္စ နေပြည်တော်က ခွင့်ပြုမှသာ သံရုံးကပြုလုပ်ပေးတော့မယ်

ထိုင်းမှာ အလည်ပတ်စ်ပို့ Passport of Visit - PV အမျိုးအစားကိုင်ထားတဲ့ မြန်မာတွေကို စာအုပ် သက်တမ်းတိုးခြင်း ၊ စာအုပ်အသစ်လဲလှယ်တာ ၊ PV အမျိုးအစားကနေ တခြား Passport အမျိုးအစားကိုပြောင်းတာတွေအတွက် နေပြည်တော်က ခွင့်ပြုမိန့်ကျမှသာ သံရုံးက ပြုလုပ်ပေးတော့မှာဖြစ်တယ်လို့ သိရပါတယ်။
ဒါကြောင့် PV စာအုပ်ကိုင်ထားသူတွေအနေနဲ့ သက်တမ်းတိုးခြင်း ၊ စာအုပ်လဲလှယ်တာ ၊ PV အမျိုးအစားကနေ တခြား Passport အမျိုးအစားကိုပြောင်းမယ်ဆိုပါက ဒီနေ့ကစပြီး သံရုံးမှာ လိုအပ်တဲ့အချက်အလက်နဲ့တကွ ဖောင်ဖြည့်ပြီး တင်ပြနေရပြီ ဖြစ်တယ်လို့ သိရပါတယ် ။
သံရုံးကမှတဆင့် နေပြည်တော်ကို တင်ပြပြီး နေပြည်တော်က ​ခွင့်ပြုမိန့်ကျလာမှသာ ပြုလုပ်ပေးမှာဖြစ်ကြောင်း ၊ ဒီကနေ့ သံရုံးမှာ PV သက်တမ်းလာတိုးသူတွေကိုတော့ အချိန်နှစ်လအကြာမှာ ပြန်စုံစမ်းရန် လက်ခံမှတ်တမ်းစာရွက်ပေးပြီး ပြန်လွှတ်လိုက်ပါတယ်။
"အရင်ဆုံး Visa အချက်အလက်အထောက်အထားအစုံနဲ့ သံရုံးဘက်ကို formဖြည့်ပေးစာတင်ပေးရပါတယ်။ Passport အထောက်အထား နဲ့ဖုန်းနံပါတ်ကို လူကိုယ်တိုင်ဖြစ်စေ ၊ Agentနဲ့ဖြစ်စေ သံရုံးမှာသွားတင်ရပါတယ်။ လူကိုယ်တိုင်ဆိုရင် လျှောက်ထားသူကိုတိုက်ရိုက်ဆက်သွယ်ပြီး Agentနဲ့ဆိုရင် Agentကို ပြန်လာရမယ့်ရက် ဖုန်းဆက်အကြောင်းကြားပေးပါမယ်ပြောတယ်။ နှစ်လအကြာမှာပြန်စုံစမ်းဖို့လည်းပြောတယ်။ " လို့ ဝန်ဆောင်မှုပေးနေသူတယောက်က ပြောပါတယ်။
PV အမျိုးအစားနဲ့ပတ်သက်ပြီး သက်တမ်းတိုးခြင်းကို သံရုံးဘက်က လုံးဝပြုလုပ်မပေးတော့တာမျိုးမဟုတ်ပေမယ့်လည်း အဆင့်ဆင့် တင်ပြရတာတွေ ၊ ခွင့်ပြုမယ့်အချိန်အတိအကျ မသိရတဲ့အခြေအနေတွေကြောင့် PV ကိုင်ထားသူတွေ အခက်အခဲ ဖြစ်နေပါတယ်။
" လုပ်မပေးတော့တာ မဟုတ်ပေမယ့်လည်း အခုက ဘာမှန်းလဲ မသိရဘူးလေ။ နှစ်လအကြာပြန်စုံစမ်းဆိုတော့ ရမလား မရဘူးလား မသိရဘူး ။ အရင်ပတ်စ်ပို့ အပျောက်တွေလျှောက်​တုန်းကလည်း သုံးလကြာမယ်ဆိုပြီး တနှစ်ကျော် လောက်ကြာမှပြန်ဆက်သွယ်တာရှိတယ်။ ဒီတော့ သက်တမ်းမကုန်ခင် ကြိုပြီး ဖောင်တင်ကြပါ။ ဘယ်လိုတွေ လာမယ် မသိသေးဘူး ။ " လို့ ထိုင်းရောက် အကျိုးဆောင်တယောက်က ပြောပါတယ် ။
PV အမျိုးအစားကနေ PJ ၊ PE တခြားတခုခုကို ပြောင်းမယ်ဆိုရင် ရက်ချိန်းကြိုယူရပြီး စာအုပ်လဲလှယ်ခြင်းကို တရက်တည်းနဲ့ နေ့ချင်းပြီး ဆောင်ရွက်ပေးနေရာကနေ သံရုံးက ဒီနေ့ကစပြီး စည်းကမ်းတင်းကြပ်လိုက်တာ ဖြစ်ပါတယ်။
ခုလို စည်းကမ်းတင်းကြပ်လိုက်တဲ့အတွက် ထိုင်းနိုင်ငံမှာ PV စာအုပ် ကိုင်ဆောင်ပြီး အလုပ်လုပ်ကိုင်သူတွေ ၊ ကျောင်းတက်သူတွေ အပြင် မှီခိုဗီဇာနဲ့ နေထိုင်သူတွေပါ အခက်အခဲ ကြုံတွေ့ရနိုင်တယ်လို့ သိရပါတယ် ။
ခုလို PV စာအုပ်သက်တမ်းတိုးခြင်း ၊ PV ကနေ တခြား ပတ်စ်ပို့အမျိုးအစားကို ပြောင်းလဲတဲ့ကိစ္စတွေအပေါ် နေပြည်တော်က ခွင့်ပြုမှသာ ဆောင်ရွက်ပေးမယ်ဆိုတဲ့အပေါ် မြန်မာသံရုံးဘက်ကတော့ တရားဝင်ထုတ်ပြန်တာမျိုး မတွေ့ရှိရသေးပါဘူး ။

ဧရာဝတီတိုင်းရေကြီးမှုမှာ ရေနစ်သေဆုံးသူ လေးယောက်ထပ်တိုးလာ

ဧရာဝတီတိုင်း လေးမျက်နှာမြို့နယ်နဲ့ ငါးသိုင်းချောင်းမြို့နယ်မှာ ရေဘေးကြောင့် ကလေးတယောက်အပါအဝင် လေးယောက် ထပ်မံသေဆုံးမှု ဖြစ်ပွားခဲ့တယ်လို့ ကူညီကယ်ဆယ်ရေး လုပ်ကိုင်သူတွေဆီက သိရပါတယ်။
ငါးသိုင်းချောင်းမြို့နယ်မှာ ဒီကနေ့ ဩဂုတ် ၁၉ ရက်နေ့ ညနေပိုင်းက ရေနစ်သေဆုံးတဲ့ အမျိုးသားအလောင်းတွေ့ရှိခဲ့ရပြီး မနေ့က ဩဂုတ် ၁၈ ရက်နေ့ညနေပိုင်းမှာ အသက် ၃၀ အရွယ် အမျိုးသားတယောက် သေဆုံးမှုရှိခဲ့ပါတယ်။
လေးမျက်နှာမြို့နယ် ၊ ခမောက်စုကျေးရွာ အုပ်စုအပိုင်ထဲ မရမ်းအိုင်ဘက်မှာလည်း ဒီကနေ့ ဩဂုတ် ၁၉ရက်မှာ အသက်ကြီးပိုင်း အမျိုးသားတယောက် ရေနစ်သေဆုံးခဲ့တဲ့ ရုပ်အလောင်းတွေ့ရှိခဲ့ရသလို အသက် ၁၀ နှစ်အရွယ်ကလေး တယောက်အလောင်းလည်း တွေ့ခဲ့ရတယ်လို့ သိရပါတယ်။
" မရမ်းအိုင်မှာ လူကြီးတယောက် ရေနစ်သေဆုံးတယ်။ ကလေးလေးကတော့ ၃ တန်းလို့သိရတယ်။ အသက် ၁၀ နှစ်အရွယ်ပါ။ မနေ့ကတည်းက အိုင်သပြုအပိုင်ထဲမှာ ပျောက်သွားတာ ။ ဒီနေ့ရှာဖွေရေးလုပ်တော့မှ ရုပ်အလောင်းပြန်တွေ့တာ ။ ငါးသိုင်းချောင်းဘက်မှာက မနေ့က တလောင်းနဲ့ ဒီနေ့တလောင်းတွေ့တယ်။ အကုန်လုံးအမျိုးသားတွေချည်းပဲ ။ " လို့ လူမှုကူညီရေး အဖွဲ့ဝင်တယောက်က ပြောပါတယ်။
ဩဂုတ် ၁၇ ရက်နေ့ကလည်း ဟင်္သာတခရိုင် ၊ တလုတ်ထော်မြို့နယ်ထဲက လဟာပရွာမှာ အမျိုးသမီးတယောက် ရေနစ်သေဆုံးခဲ့ပါတယ်။
လက်ရှိမှာ ရေကြီးမှု ဧရိယာကျယ်ပြန့်လာတဲ့အတွက် ငါးသိုင်းချောင်း တမြို့လုံးနီးပါး ရေကြီးပြီး ရေကြည်မြို့နယ်မှာလည်း ရေတိုးလာနေကြောင်း သိရပါတယ်။
" ငါးသိုင်းချောင်းလည်း ရေတိုးတာ ရေပြင်တွေချည်းဖြစ်ကုန်ပြီ။ ရွှေ့ပြောင်းပေးရတာတွေ ပိုများလာတယ်။ ငါးသိုင်းချောင်းအထွက် မုံရွာ - ပုသိမ်လမ်းပေါ်က ဆီဆိုင်တွေပါ ရေကြီးလို့ ဆိုင်တွေပိတ်ထားတော့ ရေကြည်အထိ ဆီသွားဖြည့်နေရတယ်။ ရေကြည်ဘက်လည်း.ရေကတိုးတယ်။ မြို့အဝင်က ပိတောက်ချောင်မှာလည်းရေတက်တယ်။ နောက်ရက်ရေထပ်တက်ရင် ကားတွေသွားဖို့တောင် ခက်နိုင်တယ်။ " လို့ ကူညီကယ်ဆယ် ရေးလုပ်နေသူ တယောက်က ပြောပါတယ် ။
လေးမျက်နှာမြို့နယ်က ရေကာတာကျိုးပေါက်မှုကြောင့် လေးမျက်နှာ အပါအဝင် ငါးသိုင်းချောင်း ၊ ရေကြည် ၊ ကျုံပျော် ၊ ကျောင်းကုန်း ၊ ဟင်္သါတ အပါအဝင် မြို့နယ်တချို့က ကျေးရွာတွေမှာ ရေကြီးနေပါတယ်။
လေးမျက်နှာမြို့နယ်မှာ အရင်ရက်တွေကလည်း ရေကြီးမှုကြောင့် ရေနစ်သေဆုံးသူ နှစ်ယောက်ရှိခဲ့ပြီး ပျောက်ဆုံးသူတချို့လည်းရှိတယ်လို့ သိရပါတယ်။
ခုဆိုရင် ဧရာဝတီတိုင်းမှာ ရေကြီးမှုဖြစ်ပွားနေတာ ရက်ပေါင်း ၂၀ နီးပါးအထိရှိလာပြီဖြစ်တဲ့အတွက် ကယ်ဆယ်ရေးစခန်းတွေမှာမနေထိုင်ဘဲ နေအိမ်တွေမှာပဲ ဆက်နေကြတဲ့ ရေဘေးသင့်သူတွေအတွက် အစားအစာနဲ့ သောက်ရေသန့်တွေလည်း လိုအပ်မှုရှိတယ်လို့ သိရပါတယ်။

အာကာသနည်းပညာ ပူးပေါင်းဆောင်ရွက်ရေး အပါအဝင် နားလည်မှုစာချွန်လွှာ ၁၂ ခုကို မြန်မာ - ရုရှား လက်မှတ်ရေးထိုး

နိုင်ငံတော်သမ္မတ ဦးမင်းအောင်လှိုင်ရဲ့ ရုရှားခရီးစဉ်အတွင်း အာကာသနည်းပညာ ပူးပေါင်းဆောင်ရွက်ရေး အပါအဝင် နားလည်မှုစာချွန်လွှာ (MoU) ၁၂ ခုကို မနေ့ ဩဂုတ် ၁၈ ရက်က လက်မှတ်ရေးထိုးနိုင်ခဲ့တယ်လို့ နိုင်ငံခြားရေးဝန်ကြီးဌာနက သတင်း ထုတ်ပြန်ထားပါတယ်။
နားလည်မှုစာချွန်လွှာတွေကို နှစ်နိုင်ငံ ကဏ္ဍအလိုက် တာဝန်ရှိသူတွေက ရုရှားနိုင်ငံ၊ မော်စကိုမြို့ရှိ ကရင်မလင်နန်းတော်အတွင်း နိုင်ငံတော်သမ္မတ ဦးမင်းအောင်လှိုင်နဲ့ ရုရှားဖက်ဒရေးရှင်းနိုင်ငံသမ္မတ မစ္စတာ ဗလာဒီမာပူတင်တို့ရဲ့ ရှေ့မှောက်မှာ လက်မှတ်ရေးထိုး လဲလှယ်ခဲ့ကြတာလို့ သိရပါတယ်။
MoU ရေးထိုးခဲ့တဲ့ ၁၂ ခုထဲမှာ လျှပ်စစ်စွမ်းအားကဏ္ဍနဲ့ ရေနံနဲ့ သဘာဝဓာတ်ငွေ့ ကဏ္ဍတွေအတွက် နားလည်မှုစာချွန်လွှာ၊ ရေဒီယို၊ အီလက်ထရောနစ်လုပ်ငန်းနဲ့ ဒီဂျစ်တယ်နည်းပညာနယ်ပယ် ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ၊ ယှဉ်ပြိုင်မှုအဖွဲ့အစည်းတို့အကြား ပူးပေါင်းဆောင်ရွက်ရေးစာချွန်လွှာ၊ ယဉ်ကျေးမှုနဲ့ အနုပညာနယ်ပယ်ဆိုင်ရာ ပူးပေါင်းဆောင်ရွက်ရေး နာလည်မှုစာချွန်လွှာ၊ သတင်းအချက်အလက်နဲ့ ဆက်သွယ်ရေး နည်းပညာဆိုင်ရာ ပူးပေါင်းဆောင်ရွက်ရေး နားလည်မှုစာချွန်လွှာတို့ ပါဝင်တယ်လို့ သိရပါတယ်။
ဒါအပြင် ဂြိုဟ်တုလမ်းညွှန်မှုစနစ်၊ လူလိုက်ပါမယ့် အာကာသ ခရီးစဉ်တွေအတွက် ဂြိုဟ်တုအခြေပြု ရှာဖွေကယ်ဆယ်ရေးစနစ် (COSPAS-SARSAT)၊ ကမ္ဘာအနီး အာကာသအတွင်း အန္တရာယ်ရှိတဲ့ အခြေအနေတွေအတွက် အလိုအလျောက် သတိပေးစနစ် (ASPOS) နယ်ပယ်တွေမှာ ပူးပေါင်းဆောင်ရွက်ရေး နားလည်မှုစာချွန်လွှာ၊ မြန်မာအာကာသအေဂျင်စီနဲ့ Plekhanov Russian University of Economics တို့အကြား နားလည်မှု စာချွန်လွှာနဲ့ မြန်မာအာကာသအေဂျင်စီနဲ့ Bauman Moscow State Technical University တို့အကြား နားလည်မှုစာချွန်လွှာတွေလည်း ပါဝင်တယ်လို့ သိရပါတယ်။
ဒါအပြင် နှစ်နိုင်ငံအကြား တဖက်သတ် အကျပ်ကိုင်ဆောင်ရွက်မှုတွေရဲ့ ဆိုးရွားတဲ့သက်ရောက်မှုတွေကို တုံ့ပြန်ဖြေရှင်းဖို့ နည်းလမ်းတွေနဲ့ပတ်သက်တဲ့ ကြေညာချက်တွေလည်း ပါဝင်ပြီး အခု လက်မှတ်ထိုးလိုက်တဲ့ ၁၂ ခုအပြင် နောက်ထပ် ကဏ္ဍစုံ ပူးပေါင်းဆောင်ရွက်ရေး စာချုပ်တွေကိုလည်း ထပ်မံချုပ်ဆိုနိုင်အောင် ညှိနှိုင်းနေတယ်လို့ သိရပါတယ်။
“အခုချုပ်ဆိုလိုက်တဲ့ စာချုပ်တွေအရပြောရရင် ကုန်သွယ်မှုတိုးတက်ဖို့ အလားအလာတွေ တွေ့ရတယ်။ စီးပွားရေးမရတင်မကဘဲ သံတမန်ရေးရာ ပူးပေါင်းဆောင်ရွက်မှုတွေကို ပိုမိုခိုင်မာစေတယ် ပြောရမယ်။ အစိုးရအတွက် နိုင်ငံတကာ အထီးကျန်ဆန်မှုကိုလည်း လျော့ကျစေတာပေါ့။ လက်ရှိ ဖြစ်နေတဲ့ အနောက်နိုင်ငံကြီးတွေရဲ့ ဒဏ်ခတ် ပိတ်ဆို့မှုတွေကြားမှာ ရုရှားနိုင်ငံလိုမျိုး အဓိက ကမ္ဘာ့အင်အားကြီး နိုင်ငံတနိုင်ငံနဲ့ ပိုပြီး နီးကပ်လာတာက အစိုးရအတွက် သံတမန်ရေးရာမှာ အထောက်အပံ့ကောင်းတရပ်ပါပဲ” လို့ စီးပွားရေး၊ နိုင်ငံရေး လေ့လာသုံးသပ်သူတယောက်က ပြောပါတယ်။
အခုလို မြန်မာနိုင်ငံအနေနဲ့ ရုရှားနိုင်ငံနဲ့ နည်းပညာအရရော၊ စစ်ရေးအရပါ ပိုမိုပူးပေါင်း ဆောင်ရွက်နိုင်ခြင်းဟာ တခြားသော အနောက်နိုင်ငံတွေရဲ့ အာရုံစိုက်ခံရမှု ရှိလာနိုင်ပြီး သက်ဆိုင်ရာ ကုမ္ပဏီတွေ၊ လူပုဂ္ဂိုလ်တွေကို ပစ်မှတ်ထားတဲ့ ဒဏ်ခတ်မှုအသစ်တွေ ရှိကောင်းရှိလာနိုင်ပေမယ့် ကုလသမဂ္ဂ လုံခြုံရေးကောင်စီမှာ ရုရှားနဲ့ တရုတ်က ဗီတိုအာဏာ သုံးနိုင်တဲ့အတွက် ကမ္ဘာ့ကုလသမဂ္ဂအဆင့် ပိတ်ဆို့မှုအသစ်ကြီးတွေ ဖြစ်လာဖို့တော့ ခဲယဉ်းတယ်လို့ သူက ပြောပါတယ်။

မော်ရိုကိုကွင်းလယ်လူ ဘူအက်ဒီကို မန်စီးတီး ခေါ်ယူဖို့ နီးစပ်နေ

မန်စီးတီးအသင်းဟာ လိုင်လီအသင်းက မော်ရိုကိုလက်ရွေးစင်ကွင်းလယ်လူ ဘူအက်ဒီကို ခေါ်ယူဖို့ နီးစပ်နေပြီလို့ သိရပါတယ်။
၁၈ နှစ်သာရှိသေးတဲ့ ဘူအက်ဒီရဲ့ မန်စီးတီးအသင်းထံ အပြောင်းအရွှေ့က အခုတစ်ပတ်အတွင်းမှာပဲ အပြီးသတ်ပါလိမ့်မယ်။
မန်စီးတီးအသင်းဟာ ဘူအက်ဒီနဲ့ ငါးနှစ်စာချုပ်ချုပ်ဆိုဖို့ ပုဂ္ဂိုလ်ရေးသဘောတူညီမှု ရရှိထားပြီးသားပါ။
မန်စီးတီးအနေနဲ့ ပြောင်းရွှေ့ကြေးအတွက် ယူရို သန်း ၁၀၀ ဝန်းကျင်အထိ ကုန်ကျနိုင်ပါတယ်။
မန်စီးတီးအသင်းဟာ ရိုဒရီကို ဘာစီလိုနာအသင်းထံ ရောင်းချဖို့ သဘောတူခဲ့ပြီးနောက် ဘူအက်ဒီနဲ့ ပြန်လည်အစားထိုးသွားမှာဖြစ်တယ်။
ဘူအက်ဒီဟာ ပြီးခဲ့တဲ့ကမ္ဘာ့ဖလားမှာ မော်ရိုကိုအသင်းနဲ့အတူ ခြေစွမ်းပြခဲ့ပြီး အသင်းပွဲစဉ် ခြောက်ပွဲအနက် ငါးပွဲ ပွဲထွက်ကစားခဲ့ပါတယ်။
၎င်းဟာ ၂၀၂၃ ခုနှစ် အောက်တိုဘာလမှာ လိုင်လီအသင်းနဲ့ စတင်ပွဲထွက်ပြီးကတည်းက ပြိုင်ပွဲစုံ ၉၈ ပွဲ ကစားခဲ့ပါတယ်။
မန်စီးတီးအသင်းဟာ ချယ်လ်ဆီးအသင်းခေါင်းဆောင် အန်ဇိုဖာနန်ဒက်ဇ်ကိုလည်း ထပ်မံခေါ်ယူဖို့ ပစ်မှတ်ထားနေပါတယ်။
ချယ်လ်ဆီးအသင်းက ဖာနန်ဒက်ဇ်အတွက် သတ်မှတ်ပေးထားတဲ့ အပြောင်းအရွှေ့နောက်ဆုံးရက်က ကျော်လွန်သွားပြီဖြစ်တယ်။
ချယ်လ်ဆီးကတော့ အာဂျင်တီးနားလက်ရွေးစင်ကွင်းလယ်လူကို အသင်းမှာ ဆက်ထိန်းနိုင်ဖို့ မျှော်လင့်နေပါတယ်။
မန်စီးတီးအသင်းဟာ နော်တင်ဟမ်ဖောရက်စ်အသင်းက အင်္ဂလန်လက်ရွေးစင်ကွင်းလယ်လူ အန်ဒါဆန်ကိုလည်း ခေါ်ယူထားပြီးဖြစ်ပါတယ်။

ချယ်လ်ဆီးအသင်းရဲ့ ရှယ်ယာတွေကို တော့ဒ်ဘိုလေနဲ့ မာ့ခ်ဝေါ်လ်တာတို့ ရောင်းထုတ်ဖွယ်ရှိနေ

ချယ်လ်ဆီးအသင်းဥက္ကဋ္ဌ တော့ဒ်ဘိုလေနဲ့ ဒါရိုက်တာအဖွဲ့ဝင် မာ့ခ်ဝေါ်လ်တာတို့ဟာ သူတို့ရဲ့ ချယ်လ်ဆီးရှယ်ယာတွေကို ရောင်းထုတ်ဖွယ်ရှိနေကြောင်း သိရပါတယ်။
တော့ဒ်ဘိုလေနဲ့ မာ့ခ်ဝေါ်လ်တာတို့က ချယ်လ်ဆီးအသင်းမှာ ရှယ်ယာ(၁၂.၈၃)ရာခိုင်နှုန်းစီ ပိုင်ဆိုင်ထားကြတဲ့ ပူးတွဲပိုင်ရှင်တွေ ဖြစ်ပါတယ်။
ချယ်လ်ဆီးအသင်းမှာ ရှယ်ယာအများဆုံးပိုင်ဆိုင်ထားတာကတော့ Clearlake Capital ကုမ္ပဏီဖြစ်ပြီး ရှယ်ယာ(၆၁.၅)ရာခိုင်နှုန်း ပိုင်ဆိုင်ထားပါတယ်။
တော့ဒ်ဘိုလေ၊ မာ့ခ်ဝေါ်လ်တာ၊ ဟန်ယော့စ်ဝီးစ်နဲ့ Clearlake Capital တို့က BlueCo အဖွဲ့ကို ဖွဲ့စည်းပြီး ချယ်လ်ဆီးအသင်းကို ၂၀၂၂ ခုနှစ်မှာ ဝယ်ယူခဲ့တာပါ။
ဒီဝယ်ယူမှုမှာ ဦးဆောင်ခဲ့တဲ့ တော့ဒ်ဘိုလေက ချယ်လ်ဆီးအသင်းရဲ့ ဥက္ကဋ္ဌအဖြစ် စတင်ဆောင်ရွက်ခဲ့ပေမဲ့ ကြိုတင်သဘောတူညီထားမှုအရ လာမယ့် ၂၀၂၆-၂၇ ရာသီကုန်မှာ ဥက္ကဋ္ဌရာထူးကနေ ဖယ်ပေးရမှာဖြစ်ပြီး Clearlake Capital ကတစ်ဦး ဥက္ကဋ္ဌသစ်အဖြစ် တာဝန်ယူမယ်လို့ သိရပါတယ်။
၂၀၂၄ ခုနှစ်အတွင်းမှာပဲ ရှယ်ယာရှင်တွေအကြား သဘောထားကွဲလွဲမှုတွေရှိခဲ့တာကြောင့် ရှယ်ယာတွေ အပြန်အလှန်ဝယ်ယူဖို့ ကြိုးပမ်းခဲ့ကြပြီး လက်ရှိအချိန်မှာတော့ တော့ဒ်ဘိုလေနဲ့ မာ့ခ်ဝေါ်လ်တာတို့က သူတို့ရဲ့ ရှယ်ယာတွေကို Clearlake Capital ဆီ ရောင်းထုတ်ဖို့ စီစဉ်နေကြောင်း သတင်းထွက်လာတာပါ။
ချယ်လ်ဆီးအသင်းရဲ့တန်ဖိုးက ဝယ်ယူစဉ်ကထက် နှစ်ဆမြင့်တက်လာပြီလို့ တော့ဒ်ဘိုလေက ယူဆနေကြောင်းလည်း သိရပါတယ်။

ရီးယဲလ်အသင်းကို ပြန်လည်ကိုင်တွယ်ရတာက ပထမအကြိမ် ကိုင်တွယ်ရတာထက် ပိုထူးခြားကြောင်း မော်ရင်ဟို ပြောကြား

ရီးယဲလ်မက်ဒရစ်အသင်းရဲ့နည်းပြသစ် မော်ရင်ဟိုက ရီးယဲလ်အသင်းကို ပြန်လည်ကိုင်တွယ်ရတာက ပထမအကြိမ် ကိုင်တွယ်ရတာထက် ပိုထူးခြားကြောင်း ပြောကြားခဲ့ပါတယ်။
ရီးယဲလ်အသင်းက မော်ရင်ဟိုကို နည်းပြသစ်အဖြစ် ခန့်အပ်ကြောင်း ဇွန်(၁၁)ရက်ကတည်းက ကြေညာခဲ့ပေမဲ့ တရားဝင်မိတ်ဆက်ပွဲကိုတော့ အင်္ဂါနေ့(မနေ့)ကမှ ပြုလုပ်ခဲ့တာပါ။
အဲဒီမိတ်ဆက်ပွဲကို အကျဉ်းချုံးပြုလုပ်ခဲ့ခြင်းဖြစ်ပြီး ပရိသတ်တွေနဲ့ မီဒီယာတွေကို ဖိတ်ကြားခြင်းမပြုဘဲ ရီးယဲလ်အသင်းရဲ့ မီဒီယာအဖွဲ့ကသာ မှတ်တမ်းရယူခဲ့ခြင်းဖြစ်ကြောင်း သိရပါတယ်။
မိတ်ဆက်ပွဲမှာ မော်ရင်ဟိုက အသင်းဥက္ကဋ္ဌ ဖလော်ရင်တီနိုပီရက်ဇ်နဲ့အတူ (၃)နှစ်သက်တမ်းရှိတဲ့ စာချုပ်ချုပ်ဆိုခဲ့ပြီး မှတ်တမ်းတင်ဓာတ်ပုံ ရိုက်ကူးခဲ့ပါတယ်။
''ဒါက အိမ်ပြန်လာရသလိုပါပဲ။ စိတ်ခံစားမှုအရဆိုရင် ပထမအကြိမ်ထက် ပိုထူးခြားပါတယ်။ ဘာကြောင့်လဲဆိုတော့ ပထမအကြိမ်တုန်းက ကမ္ဘာ့ဘောလုံးလောကရဲ့ ထိပ်ဆုံးကို ရောက်ရှိသလိုမျိုး ခံစားခဲ့ရပြီး အခုက ပိုပြီးစိတ်လှုပ်ရှားရတဲ့ခံစားမှု၊ ချစ်မြတ်နိုးမှုပါတဲ့ ခံစားမှု ရှိနေတာကြောင့်ပါ။ ကျွန်တော်က ခင်ဗျားတို့ထဲက တစ်ယောက်ပါ။ ကျွန်တော် အမြဲ အဲဒီလိုရှိနေခဲ့တာပါ။ စကားလုံးတွေက မလုံလောက်ပါဘူး။ ကျွန်တော် အားလုံးကို ပိုကောင်းအောင် ကူညီပေးဖို့ ဒီနေရာကို ပြန်ရောက်လာတာပါ'' လို့ မော်ရင်ဟိုက ပြောကြားခဲ့ပါတယ်။
မော်ရင်ဟိုက ရီးယဲလ်အသင်းကို ပထမအကြိမ်အဖြစ် ၂၀၁၀ မေလကနေ ၂၀၁၃ ဇွန်လအထိ ကိုင်တွယ်ခဲ့ဖူးသူဖြစ်ပြီး လာလီဂါချန်ပီယံဆုတစ်ကြိမ်၊ စပိန်ဘုရင့်ဖလား တစ်ကြိမ်၊ စပိန်စူပါဖလားတစ်ကြိမ် ရယူပေးနိုင်ခဲ့ပါတယ်။

မြန်မာ ယူ- ၁၂ လူငယ်အသင်း ဂျပန်ဘောလုံးပွဲတော် သွားရောက်ယှဥ်ပြိုင်မယ်

ဂျပန်နိုင်ငံက အိမ်ရှင်အဖြစ် လက်ခံကျင်းပပြုလုပ်မယ့် U-12 Junior Soccer World Challenge ပြိုင်ပွဲကို မြန်မာ ယူ- ၁၂ လူငယ်အသင်း ဝင်ရောက်ယှဥ်ပြိုင်သွားမှာ ဖြစ်ပါတယ်။
မြန်မာ ယူ- ၁၂ လူငယ်အသင်းဟာ ဂျပန် U-12 Junior Soccer World Challenge ပြိုင်ပွဲဝင်ရန် ပြီးခဲ့တဲ့ဇူလိုင် (၂၅) ရက်ကစပြီး ကစားသမား (၂၃) ဦးနဲ့ လေ့ကျင့်မှုတွေ ပြုလုပ်နေကြောင်း သိရပါတယ်။
မြန်မာ ယူ- ၁၂ လူငယ်အသင်းဖွဲ့စည်းရန် လူရွေးချယ်ပွဲများကို ဆင့်ကဲဆင့်ကဲပြုလုပ်ခဲ့ပြီး ယခုအခါ အပြီးသတ် (၂၃) ဦး ရွေးချယ်ထားခြင်းဖြစ်ကြောင်း သိရပါတယ်။
မြန်မာ ယူ-၁၂ လူငယ်အသင်းဟာ U-12 Junior Soccer World Challenge ပြိုင်ပွဲ အုပ်စု (I) မှာ ဂျပန်လူငယ်အကယ်ဒမီအသင်းများနဲ့အတူ ကျရောက်နေပါတယ်။
ပြိုင်ပွဲကို ဂျပန်နိုင်ငံ၊ ဖူကူဒါမြို့မှာ လာမယ့်သြဂုတ် (၂၁) ရက်ကနေ (၂၄) ရက်အထိ ကျင်းပမှာဖြစ်ပြီး U-12 လူငယ်အသင်းပေါင်း (၄၀) သင်း ပါဝင်ယှဥ်ပြိုင်ကြမှာဖြစ်ပါတယ်။
ပြိုင်ပွဲဝင်အသင်း (၄၀) ကို ပထမအဆင့်အနေနဲ့ (၄) သင်း (၁၀)အုပ်စုခွဲ ကျင်းပမှာဖြစ်ပါတယ်။
မြန်မာ ယူ- ၁၂ လူငယ်အသင်းဟာ အုပ်စု (I) မှာ ဂျပန်လူငယ်အကယ်ဒမီအသင်းများဖြစ်တဲ့ အူရာဝါရက်ဒိုင်းမွန်း၊ လီဘာတာဖူကူအိုကာ၊ ရှိုနန်ဘယ်မားရီအကယ်ဒမီအသင်းတွေနဲ့အတူ ကျရောက်နေတာဖြစ်ပါတယ်။
မြန်မာ ယူ- ၁၂ လူငယ်အသင်းဟာ သြဂုတ် (၂၁) ရက်မှာ လီဘာတာဖူကူအိုကာအသင်း၊ သြဂုတ် (၂၂) ရက်မှာ အူရာဝါရက်ဒိုင်းမွန်း၊ ရှိုနန်ဘယ်မားရီအကယ်ဒမီအသင်းတွေနဲ့ ယှဥ်ပြိုင်ကစားရမှာဖြစ်ပါတယ်။
ဂျပန်ဘောလုံးအဖွဲ့ချုပ် (JFA) ဟာ ဒီပြိုင်ပွဲကို နှစ်စဥ်ကျင်းပလေ့ရှိပြီး မြန်မာ ယူ- ၁၂ လူငယ်အသင်းဟာ ၂၀၂၃ ခုနှစ်ကတည်းက နှစ်စဥ်ဝင်ရောက်ယှဥ်ပြိုင်နေလျက်ရှိပါတယ်။
ပြိုင်ပွဲကို ဂျပန်နိုင်ငံတစ်ဝှမ်း ဘောလုံးအကယ်ဒမီများမှ ယူ- ၁၂ လူငယ်အသင်းအများစု ပါဝင်ယှဥ်ပြိုင်ကြမှာဖြစ်သလို စပိန်နိုင်ငံရဲ့ နာမည်ကြီးကလပ် ဘာစီလိုနာ ယူ- ၁၂ အသင်း၊ ဂျပန်နိုင်ငံမှာ ဖွင့်လှစ်ထားတဲ့ စပိန်ဘာစီလိုနာအကယ်ဒမီ ယူ- ၁၂ အသင်း၊ ထိုင်ဝမ် ယူ- ၁၂ အသင်းတို့လည်း ပါဝင်ယှဥ်ပြိုင်ကြမှာ ဖြစ်ကြောင်း သိရပါတယ်။

အာဆင်နယ်အသင်း အားဖြည့်ဖို့ လိုအပ်နေသေးကြောင်းနဲ့ ချယ်လ်ဆီးအသင်းက ခြိမ်းခြောက်လာနိုင်ကြောင်း အီယန်ရိုက် ပြောကြား

အာဆင်နယ်အသင်းရဲ့ တိုက်စစ်မှူးဟောင်းဖြစ်တဲ့ အီယန်ရိုက်က အာဆင်နယ်အသင်းအနေနဲ့ ထိပ်တန်းကစားသမားတွေ ထပ်မံအားဖြည့်ဖို့ လိုအပ်နေသေးကြောင်း ပြောကြားခဲ့ပါတယ်။
အာဆင်နယ်အသင်းက ပရီးမီးယားလိဂ်ပြိုင်ပွဲရဲ့ လက်ရှိချန်ပီယံအသင်းဖြစ်ပြီး လာမယ့်ရာသီမှာ ချန်ပီယံဆု ထပ်မံရရှိဖို့လည်း ရေပန်းအစားဆုံးဖြစ်နေပါတယ်။
ဒါပေမဲ့ နွေရာသီမှာ ဂီမာရေ့စ်နဲ့ ဇောလစ်တို့ကိုသာ ခေါ်ယူနိုင်ခဲ့ပြီး အဓိကပစ်မှတ်ကစားသမားတွေကို မခေါ်ယူနိုင်သေးတာကြောင့် အီယန်ရိုက်က သတိပေးခဲ့တာပါ။
''အာဆင်နယ်အသင်း အပြောင်းအရွှေ့ဈေးကွက်မှာ အလုပ်အများကြီးလုပ်ဖို့ လိုနေပါသေးတယ်။ ကမ္ဘာ့ဖလားပြိုင်ပွဲရဲ့ ရိုက်ခတ်မှုရှိတာ ကျွန်တော် သိပါတယ်။ ဒါပေမဲ့ ဒီလိဂ်မှာ တောင့်တင်းသန်မာစွာ စတင်နိုင်ဖို့ ဘယ်လောက်အရေးကြီးတယ်ဆိုတာကိုလည်း ကျွန်တော်တို့ သိထားပါတယ်။ ကစားသမားသစ်တွေ ရောက်လာနိုင်ရင် ပိုကောင်းမှာပါ'' လို့ အီယန်ရိုက်က ပြောကြားခဲ့ပါတယ်။
အီယန်ရိုက်က ဂွါဒီယိုလာ၊ ရိုဒရီနဲ့ ဘာနာဒိုဆေးလ်ဗားတို့ မရှိတော့တဲ့ မန်စီးတီးအသင်းထက် အလွန်ဆိုရဲ့ ချယ်လ်ဆီးအသင်းက ပရီးမီးယားလိဂ်ချန်ပီယံဆုကို ပိုမိုခြိမ်းခြောက်လာနိုင်ကြောင်းလည်း သုံးသပ်ခဲ့ပါတယ်။
''အလွန်ဆိုအနေနဲ့ တာထွက်ကောင်းပြီး ခံစစ်ကို ပိုကျစ်လျစ်အောင် လုပ်နိုင်ခဲ့ရင် ချယ်လ်ဆီးက စိန်ခေါ်လာနိုင်ပါတယ်။ ဥရောပပွဲ မရှိတာကလည်း သူတို့အတွက် အားသာချက်ဖြစ်လာနိုင်ပါတယ်'' လို့ အီယန်ရိုက်က သုံးသပ်ခဲ့တာပါ။

ဂိုးသမား ဆူဇူကီးကို အက်စတွန်ဗီလာအသင်း ခေါ်ယူခဲ့ပြီး ပရီးမီးယားလိဂ်ရောက် ပထမဆုံးဂျပန်ဂိုးသမားအဖြစ် မှတ်တမ်းဝင်

အက်စတွန်ဗီလာအသင်းက ပါးမားအသင်းရဲ့ ဂျပန်ဂိုးသမား ဆူဇူကီးကို ယူရို(၃၅)သန်းနဲ့ ခေါ်ယူလိုက်ပြီဖြစ်ပြီး အတည်ပြုကြေညာခဲ့ပါတယ်။
အက်စတွန်ဗီလာအသင်းက ဆူဇူကီးအတွက် ကနဦးပြောင်းရွှေ့ကြေး ယူရိုသန်း(၃၀)နဲ့ Add-ons ကြေး ယူရို(၅)သန်း ပေးချေရမှာဖြစ်ပြီး ၂၀၃၁ ခုနှစ်အထိ (၅)နှစ်စာချုပ် ချုပ်ဆိုလိုက်ကြောင်း သိရပါတယ်။
ပရီးမီးယားလိဂ်မှာ ဂျပန်ကစားသမားတွေ လာရောက်ကစားဖူးပေမဲ့ ဂိုးသမားအနေနဲ့ ကစားဖူးခြင်းမရှိသေးတာကြောင့် ဆူဇူကီးက ပရီးမီးယားလိဂ်ရောက် ပထမဆုံးဂျပန်ဂိုးသမားအဖြစ် မှတ်တမ်းဝင်ခဲ့သလို အက်စတွန်ဗီလာအသင်းရဲ့ ပထမဆုံးဂျပန်ကစားသမားအဖြစ်လည်း မှတ်တမ်းဝင်ခဲ့ကြောင်း သိရပါတယ်။
အက်စတွန်ဗီလာအသင်းက အာဂျင်တီးနားဂိုးသမား မာတီနက်ဇ် အသင်းက ထွက်ခွာဖွယ်ရှိနေတာကြောင့် ဆူဇူကီးကို ခေါ်ယူခဲ့ခြင်းဖြစ်ပေမဲ့ လက်ရှိအချိန်မှာ မာတီနက်ဇ်ကို ဂျူဗင်တပ်စ်အသင်းက မခေါ်ယူတော့တာကြောင့် မာတီနက်ဇ်ကို ခေါ်ယူမယ့်အသင်း ထပ်ပြီးရှာဖွေရဖွယ်ရှိနေကြောင်း သိရပါတယ်။
နည်းပြ အူနိုင်းအမ်မရီကတော့ ဆူဇူကီး(၂၃ နှစ်)ကို ပထမဦးစားပေးဂိုးသမားအဖြစ် ရေရှည်နေရာပေးသွားဖို့ ရည်ရွယ်ခေါ်ယူခဲ့ခြင်းဖြစ်ကြောင်း သိရပါတယ်။
အက်စတွန်ဗီလာအသင်းဟာ ဆူဇူကီးကို ခေါ်ယူတဲ့နေ့မှာပဲ အက်သလက်တီကိုအသင်းက အီတလီနောက်ခံလူ ရူဂါရီ(၂၄ နှစ်)ကိုလည်း ယူရိုသန်း(၂၀)နဲ့ ခေါ်ယူပြီး (၅)နှစ်စာချုပ် ချုပ်ဆိုခဲ့ကြောင်း သိရပါတယ်။

ဘရိုက်တန်ကွင်းလယ်ကစားသမား ဘာလေဘာကို မန်ယူအသင်း ခေါ်ယူနိုင်ရန် နီးစပ်နေ

မန်ယူအသင်းဟာ ဘရိုက်တန်အသင်းက ကင်မရွန်းကွင်းလယ်ခံစစ်ကစားသမား ဘာလေဘာကို ခေါ်ယူနိုင်ဖို့ နီးစပ်နေပြီဖြစ်ကြောင်း ဗြိတိန်မီဒီယာတွေက ဖော်ပြခဲ့ကြပါတယ်။
မန်ယူနိုက်တက်အသင်းက ဘာလေဘာအတွက် ကနဦးပြောင်းရွှေ့ကြေး ပေါင်သန်း(၆၀)၊ Add-ons ကြေး ပေါင်(၅)သန်းနဲ့ ကမ်းလှမ်းမှုပြုလုပ်ထားပြီး ဘရိုက်တန်အသင်း လိုချင်နေတဲ့ တန်ဖိုးပမာဏထက် လျော့နည်းနေပေမဲ့ သဘောတူညီမှုရဖွယ်ရှိကြောင်း သိရပါတယ်။
ဘရိုက်တန်အသင်းက ဘာလေဘာ(၂၂ နှစ်)အတွက် ပြောင်းရွှေ့ကြေးပေါင်(၇၅)သန်းဝန်းကျင် အလိုရှိနေပေမဲ့ မန်ယူအသင်းနဲ့ ညှိနှိုင်းမှုအဆင်ပြေနိုင်တဲ့ ကွာဟမှုသာဖြစ်ကြောင်း ဗြိတိန်မီဒီယာတွေက သုံးသပ်ထားပါတယ်။
မန်ယူအသင်းက ဘာလေဘာကို ၂၀၃၁ ခုနှစ်အထိ (၅)နှစ်စာချုပ်ချုပ်ဆိုဖို့ ပုဂ္ဂိုလ်ရေးသဘောတူညီမှု ရရှိထားပြီဖြစ်တာကြောင့် ပြောင်းရွှေ့ကြေးအတွက်သာ ဘရိုက်တန်အသင်းနဲ့ ညှိနှိုင်းရတော့မှာပါ။
ဘရိုက်တန်အသင်းက ဘာလေဘာကို ၂၀၂၃ နွေရာသီမှာ လိုင်လီကနေ ပေါင်(၂၅)သန်းဝန်းကျင်နဲ့ ခေါ်ယူထားခြင်းဖြစ်ပေမဲ့ ပြီးခဲ့တဲ့နှစ် နွေရာသီတုန်းက မန်ယူအသင်း ချဉ်းကပ်ခဲ့ချိန်မှာ ပေါင်သန်း(၁၀၀)လို့ ဈေးနှုန်းသတ်မှတ်ခဲ့ကြောင်း သိရပါတယ်။
ဘာလေဘာက လက်ရှိရာသီကြိုကာလမှာ ခြေချင်းဝတ်ဒဏ်ရာ ရရှိခဲ့ပေမဲ့ ပြင်းထန်ခြင်းမရှိကြောင်း သိရပါတယ်။