အရပ်ဘက်လူမှုအဖွဲ့အစည်းများကို ငြိမ်းချမ်းရေးလုပ်ငန်းစဉ်တွင် ပိုမိုပါဝင်လာရန် NSPNC တိုက်တွန်း
နိုဝင်ဘာ ၁၀
ရေရှည်တည်တံ့ခိုင်မြဲသော ငြိမ်းချမ်းရေးရရှိရေးနှင့် ဒီမိုကရေစီ၊ ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေးလုပ်ငန်းစဉ်များတွင် အရပ်ဘက်လူမှုအဖွဲ့အစည်းများ ပိုမိုပါဝင်ဆောင်ရွက်ကြရန် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) က တိုက်တွန်းခဲ့သည်။
အရပ်ဘက်လူမှုအဖွဲ့အစည်းများ၏ ငြိမ်းချမ်းရေးလုပ်ငန်းစဉ်တွင် ပါဝင်နိုင်မှု၊ ပူးပေါင်းဆောင်ရွက်နိုင်မှုနှင့် လက်ရှိနိုင်ငံရေး၊ လူမှုရေးအခြေအနေများအပေါ် အမြင်သဘောထားများ ဖလှယ်နိုင်ရန် ရည်ရွယ်သည့် တွေ့ဆုံပွဲကို နိုဝင်ဘာ ၉ ရက် နံနက်ပိုင်းက နေပြည်တော်ရှိ ရုံးအမှတ် (၂၀) အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန၌ ပြုလုပ်ခဲ့သည်။
တွေ့ဆုံပွဲတွင် NSPNC ဥက္ကဋ္ဌ ကာကွယ်ရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်က ၂၀၂၁ ခုနှစ်နောက်ပိုင်း အကြမ်းဖက်လက်နက်ကိုင်အဖွဲ့အစည်းများ ထပ်မံပေါ်ပေါက်လာမှုကြောင့် ပဋိပက္ခဒေသများရှိ ပြည်သူများ၏ ကျန်းမာရေး၊ ပညာရေးနှင့် စီးပွားရေးကဏ္ဍများ ထိခိုက်ဆုတ်ယုတ်လာခဲ့ကြောင်း ပြောကြားသည်။
အချို့တိုင်းရင်းသားလက်နက်ကိုင်အဖွဲ့များသည် မူးယစ်ဆေးဝါးထုတ်လုပ်ရောင်းချခြင်း၊ သဘာဝသယံဇာတများ တူးဖော်ခြင်း၊ နယ်စပ်ဖြတ်ကျော်မှုခင်းများနှင့် အခြားတရားမဝင်လုပ်ငန်းများမှတစ်ဆင့် အဖွဲ့အစည်းများ၏ ရပ်တည်ရေးအတွက် ဆောင်ရွက်နေကြောင်းလည်း ၎င်းက ပြောသည်။
NSPNC အနေဖြင့် လာရောက်ဆွေးနွေးသည့် တိုင်းရင်းသားလက်နက်ကိုင်အဖွဲ့အစည်း (EAO) များ၏ နိုင်ငံရေးလိုလားချက်နှင့် တောင်းဆိုချက်များကို တည်ဆဲဥပဒေများနှင့်အညီ အဖြေရှာညှိနှိုင်းပေးလျက်ရှိပြီး အရပ်ဘက်လူမှုအဖွဲ့အစည်းများအနေဖြင့်လည်း မိမိတို့၏ လုပ်ငန်းအတွေ့အကြုံနှင့် ကျွမ်းကျင်မှုများကို အခြေခံကာ ငြိမ်းချမ်းရေးလုပ်ငန်းစဉ်တွင် ပါဝင်ကူညီကြရန် တိုက်တွန်းခဲ့သည်။
ထို့ပြင် ပြည်သူလူထု ပူးပေါင်းပါဝင်မှုကို မြှင့်တင်ပေးနိုင်ပါက တည်ငြိမ်အေးချမ်းမှု ပိုမိုမြန်ဆန်စွာ ရရှိနိုင်မည်ဖြစ်ကြောင်းနှင့် ငြိမ်းချမ်းရေးလုပ်ငန်းစဉ်အပေါ် အရပ်ဘက်အဖွဲ့အစည်းများ၏ အကြံပြုချက်များကို ပွင့်လင်းစွာ ဆွေးနွေးပေးကြရန်လည်း ၎င်းက ဖိတ်ခေါ်ခဲ့သည်။
ဆက်လက်၍ NSPNC အတွင်းရေးမှူး ဒုတိယဗိုလ်ချုပ်ကြီး မင်းနိုင်က ယခင်နိုင်ငံတော်စီမံအုပ်ချုပ်ရေးကောင်စီအစိုးရလက်ထက်နှင့် ဒီမိုကရေစီအစိုးရသစ်လက်ထက် ငြိမ်းချမ်းရေးဆိုင်ရာ ဆောင်ရွက်ချက်များ၊ လူသားချင်းစာနာထောက်ထားမှုအကူအညီများ ပေးအပ်နိုင်ရေး၊ ငြိမ်းချမ်းရေးလုပ်ငန်းစဉ်ဆိုင်ရာ မူဝါဒနှင့် မဟာဗျူဟာများအပြင် ရှေ့ဆက်ဆောင်ရွက်မည့် လုပ်ငန်းစဉ်များကို ရှင်းလင်းဆွေးနွေးခဲ့သည်။
NSPNC ကော်မတီဝင် ဒုတိယဗိုလ်ချုပ်ကြီး ခင်ဇော်ဦး (အငြိမ်းစား) ကလည်း တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) ၏ အနှစ်သာရနှင့် အောင်မြင်မှုများအပေါ် အခြေခံသည့် ပိုမိုပါဝင်နိုင်သော ငြိမ်းချမ်းရေးလုပ်ငန်းစဉ်ဆိုင်ရာ မူဘောင်ကို ရှင်းလင်းတင်ပြခဲ့သည်။
တွေ့ဆုံပွဲတက်ရောက်လာသည့် အရပ်ဘက်လူမှုအဖွဲ့အစည်း ကိုယ်စားလှယ်များက ငြိမ်းချမ်းရေးလုပ်ငန်းစဉ်တွင် အရပ်ဘက်အဖွဲ့အစည်းများ၏ ပါဝင်ခွင့်ကို ပိုမိုတိုးမြှင့်ပေးရန်၊ လက်ရှိငြိမ်းချမ်းရေးဖော်ဆောင်မှုအခြေအနေများကို ပြည်သူများ ကျယ်ကျယ်ပြန့်ပြန့် သိရှိနိုင်ရေး အသိပညာပေးလုပ်ငန်းများ တိုးမြှင့်ဆောင်ရွက်ရန်နှင့် တိုင်းဒေသကြီး၊ ပြည်နယ်များအလိုက် ငြိမ်းချမ်းရေးဆွေးနွေးပွဲများ၊ ဖိုရမ်များ ပြုလုပ်ပေးရန် အကြံပြုခဲ့ကြသည်။
ထို့အပြင် ပဋိပက္ခများကြောင့် လူမျိုးဘာသာမရွေး ပြည်သူများ ထိခိုက်နစ်နာနေကြသဖြင့် စီးပွားရေးဖွံ့ဖြိုးတိုးတက်မှုနှင့်အတူ ပညာရေး၊ ကျန်းမာရေး၊ လူမှုရေးကဏ္ဍများကိုပါ ချိတ်ဆက်ဆောင်ရွက်ရန်၊ လူငယ်များ၏ စွမ်းဆောင်ရည်မြှင့်တင်ရေးသင်တန်းများ ပို့ချရန်နှင့် ဘာသာရေးအဖွဲ့အစည်းများကလည်း ပဋိပက္ခများရပ်စဲရေး၊ ငြိမ်းချမ်းရေးဖော်ဆောင်ရေးတွင် တတ်နိုင်သည့်ဘက်မှ ပါဝင်ကူညီရန် အကြံပြုဆွေးနွေးခဲ့ကြသည်။
အဆိုပါဆွေးနွေးပွဲတွင် NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့်က နိဂုံးချုပ်အမှာစကားပြောကြားခဲ့ပြီး အစည်းအဝေးကို ရုပ်သိမ်းခဲ့ကြောင်း သိရသည်။
