မြန်မာ့လူငယ်ဘောလုံးဖွံ့ဖြိုးရေးအတွက် ဘာစီလိုနာအကယ်ဒမီ နည်းပြငှါးရမ်းမည်

မြန်မာ့လူငယ်ဘောလုံးကဏ္ဍ (Youth Development) ဖွံ့ဖြိုးတိုးတက်ရေးအတွက် စပိန်ကလပ် ဘာစီလိုနာအကယ်ဒမီမှ နည်းပြတစ်ဦးကို ငှားရမ်းရန် စီစဉ်နေကြောင်း မြန်မာနိုင်ငံဘောလုံးအဖွဲ့ချုပ် (MFF) ဥက္ကဋ္ဌ
ဦးဇော်ဇော်က ပြောကြားလိုက်သည်။
နိုဗိုတယ်ရန်ကုန်မက်စ်ဟိုတယ်၌ (ဩဂုတ်လ ၂၄ ရက်) ကကျင်းပသည့် MYANMAR League (M League) ပြိုင်ပွဲအတွက် Logo Launching၊ Official Partnership Signing Ceremony & Press Conference အခမ်းအနားတွင် MFF ဥက္ကဋ္ဌ ဦးဇော်ဇော်က အဖွင့်အမှာစကားနှင့် စပွန်ဆာကုမ္ပဏီများကို ကျေးဇူးတင်စကား ပြောကြားစဉ် ထိုသို့ ထည့်သွင်းပြောဆိုခဲ့ခြင်း ဖြစ်သည်။
လက်ရှိ၌ မြန်မာ့လက်ရွေးစင်အမျိုးသားအသင်းကို နော်ဝေးနိုင်ငံသား ယန်အန်ဒါဆန်၊ အမျိုးသမီးအသင်းကို အင်္ဂလန်နိုင်ငံသား နည်းပြချုပ် ကောလင်းဘဲလ်က ကိုင်တွယ်နေသည်။
ယခုနှစ် ရာသီ MYANMAR League (M League) ပြိုင်ပွဲတွင် ပြိုင်ပွဲဝင်အသင်း ၁၂ သင်း ပါဝင်ယှဉ်ပြိုင်သွားမည် ဖြစ်ကာ အဆိုပါ အခမ်းအနားတွင် M League ၏ စပွန်ဆာကုမ္ပဏီများနှင့် သဘောတူညီမှု လက်မှတ်ရေးထိုးပွဲကိုပါ တစ်ပါတည်း ပြုလုပ်ခဲ့သည်။

မိုးသည်းထန်စွာရွာပြီး ထောက်ကြန့်တွင် သစ်ပင်ပြိုလဲမှုကြောင့် ဂျိုးဖြူရေပိုက်လိုင်း ပျ-က်စီး

မင်္ဂလာဒုံမြို့နယ်၊ ထောက်ကြန့်မြို့၊ ဒုစံပြရပ်ကွက်ရှိ ပြည်/မှော်ဘီ ဘတ်စ်ကားမှတ်တိုင်အနီး၌ ဩဂုတ် ၂၄ ရက် ညပိုင်းက မိုးသည်းထန်စွာ ရွာသွန်းမှုကြောင့် သစ်ပင်ကြီးများ ပြိုလဲကျကာ ဂျိုးဖြူရေပိုက်လိုင်းနှင့် ခြံစည်းရိုးတစ်စိတ်တစ်ပိုင်း ပျ-က်စီးခဲ့ကြောင်း သိရသည်။
ဖြစ်စဉ်မှာ ယင်းည ၉ နာရီ ၃၈ မိနစ်ခန့်တွင် လုံးပတ် ၂၀ ပေ၊ အမြင့် ၁၀၀ ပေခန့်ရှိ ညောင်ပင်နှင့် လုံးပတ် ၂ ပေ၊ အမြင့် ၂၀ ပေခန့်ရှိ ကျွန်းပင်တို့သည် မိုးသည်းထန်စွာရွာသွန်းမှုကြောင့် ပြိုလဲပြီး ဂျိုးဖြူရေပိုက်လိုင်းပေါ်သို့ ပိမိကျရောက်ခဲ့ခြင်းဖြစ်သည်။
သစ်ပင်များပြိုလဲမှုကြောင့် ဂျိုးဖြူရေပိုက်လိုင်း ပေါက်ပြဲခဲ့သည့်အပြင် ခြံစည်းရိုး ၁၅ ပေခန့်လည်း ထိခိုက်ပျ-က်စီးခဲ့သည်။
ယနေ့ (ဩဂုတ် ၂၅ ရက်) နံနက်ပိုင်းမှစ၍ သက်ဆိုင်ရာ တာဝန်ရှိသူများပါဝင်သော ပူးပေါင်းအဖွဲ့က ပျ-က်စီးသွားသည့် ရေပိုက်လိုင်းကို အမြန်ဆုံးပြန်လည်ပြုပြင်ခြင်းနှင့် လဲကျနေသည့် သစ်ပင်များကို ခုတ်ထွင်ရှင်းလင်းခြင်းလုပ်ငန်းများကို ဆောင်ရွက်လျက်ရှိကြောင်း သိရသည်။ S

ခရင်မ္မလင်၌ မြန်မာ-ရုရှား သမ္မတနှစ်ဦးတွေ့ဆုံမှု လူမှုကွန်ရက်ပေါ်တွင် စိတ်ဝင်စားမှုမြင့်တက်

နိုင်ငံတော်သမ္မတ ဦးမင်းအောင်လှိုင်၏ ရုရှားဖက်ဒရေးရှင်းနိုင်ငံ တရားဝင်ခရီးစဉ်အတွင်း ရုရှားသမ္မတ မစ္စတာ ဗလာဒီမာပူတင်နှင့် မော်စကိုမြို့ ခရင်မ္မလင်နန်းတော်၌ တွေ့ဆုံဆွေးနွေးခဲ့မှုသည် ရုရှားနိုင်ငံခြားရေးဝန်ကြီးဌာန၏ Facebook စာမျက်နှာနှင့် X လူမှုကွန်ရက်တို့တွင် စိတ်ဝင်စားမှုမြင့်တက်ခဲ့သည့် အကြောင်းအရာများအနက် ပါဝင်ခဲ့သည်။
ရုရှားနိုင်ငံခြားရေးဝန်ကြီးဌာန၏ Facebook စာမျက်နှာတွင် ဖော်ပြထားသည့် သမ္မတနှစ်ဦး တွေ့ဆုံမှု ရုပ်သံမှတ်တမ်းအတို (Reel) သည် ကြည့်ရှုမှု ၂.၆ သန်းကျော် ရရှိခဲ့ပြီး အဆိုပါစာမျက်နှာ၌ ယင်းကာလအတွင်း ဖော်ပြထားသည့် ရုပ်သံမှတ်တမ်းများအနက် ကြည့်ရှုမှုမြင့်မားသည့် အကြောင်းအရာတစ်ခု ဖြစ်လာခဲ့သည်။
အလားတူ ဩဂုတ် ၁၈ ရက်က ခရင်မ္မလင်နန်းတော်၌ ပြုလုပ်ခဲ့သည့် သမ္မတနှစ်ဦး တွေ့ဆုံဆွေးနွေးမှုနှင့်ပတ်သက်၍ “Putin Hosts Myanmar Leader at Kremlin for Partnership Talks” ဟူသည့် အကြောင်းအရာသည် နောက်တစ်နေ့ ဩဂုတ် ၁၉ ရက်တွင် X လူမှုကွန်ရက်၌ သတင်းအဖြစ် ကျယ်ကျယ်ပြန့်ပြန့် ပျံ့နှံ့ခဲ့ပြီး ထိုအချိန်က စိတ်ဝင်စားမှုမြင့်တက်နေသည့် သတင်းအကြောင်းအရာများအနက် ပါဝင်ခဲ့သည်။
ယင်းတွေ့ဆုံမှုတွင် မြန်မာ-ရုရှား နှစ်နိုင်ငံဆက်ဆံရေးနှင့် ပူးပေါင်းဆောင်ရွက်မှုများ တိုးမြှင့်ရေးဆိုင်ရာ အကြောင်းအရာများကို ဆွေးနွေးခဲ့ကြပြီး နိုင်ငံတကာသတင်းမီဒီယာများကလည်း သမ္မတနှစ်ဦးတွေ့ဆုံမှုနှင့် ခရီးစဉ်ဆိုင်ရာ သတင်းများကို ဆက်လက်ဖော်ပြခဲ့ကြသည်။
နိုင်ငံတော်သမ္မတ၏ ရုရှားခရီးစဉ်နှင့်ပတ်သက်သည့် သတင်းများအနက် သမ္မတနှစ်ဦး ခရင်မ္မလင်နန်းတော်၌ တွေ့ဆုံမှုသည် လူမှုကွန်ရက်အသုံးပြုသူများအကြား ထင်ရှားသည့် စိတ်ဝင်စားမှုရရှိခဲ့သည့် အကြောင်းအရာတစ်ခုဖြစ်ကြောင်း တွေ့ရသည်။

မောင်းသူမဲ့ယာဉ်များအတွက် ယာဉ်စည်းကမ်းဥပဒေ ပြင်ဆင်ရန် တရုတ် အဆိုပြု

တရုတ်နိုင်ငံတွင် အလိုအလျောက်မောင်းနှင်စနစ် အသုံးပြုသည့် မောင်းသူမဲ့ယာဉ်များနှင့် သက်ဆိုင်သော စည်းမျဉ်းစည်းကမ်းများကို ထည့်သွင်းနိုင်ရန် လက်ရှိ ယာဉ်စည်းကမ်းဥပဒေကို ပြင်ဆင်ရန် တရုတ်အစိုးရက အဆိုပြုထားကြောင်း နိုင်ငံပိုင် ဆင်ဟွာသတင်းဌာနက ဖော်ပြသည်။
အဆိုပါ ယာဉ်စည်းကမ်းဥပဒေ ပြင်ဆင်ချက်မူကြမ်းကို ဩဂုတ် ၂၅ ရက်က ကနဦးသုံးသပ်ရန် တရုတ်အမျိုးသားပြည်သူ့ကွန်ဂရက်သို့ တင်သွင်းခဲ့ခြင်းဖြစ်ပြီး အလိုအလျောက်မောင်းနှင်ခြင်းနှင့် ယာဉ်မောင်းအကူအညီပေးစနစ်ဖြင့် မောင်းနှင်ခြင်းတို့ကို ခွဲခြားသတ်မှတ်ထားသည့်အပြင် ယင်းစနစ်များနှင့် ဆက်စပ်သည့် ဥပဒေအရ တာဝန်ရှိမှုများကိုလည်း ရှင်းလင်းစွာ သတ်မှတ်ထားသည်။
ပြင်ဆင်ချက်မူကြမ်းအရ မော်တော်ယာဉ်တစ်စီးသည် အလိုအလျောက်မောင်းနှင်သည့်စနစ်ဖြင့် မောင်းနှင်နေစဉ် ယာဉ်စည်းကမ်းချိုးဖေ-ာက်မှု ဖြစ်ပွားပါက သက်ဆိုင်ရာ မော်တော်ယာဉ်ထုတ်လုပ်သူ သို့မဟုတ် တင်သွင်းသူတွင် တာဝန်ရှိမည်ဖြစ်သည်။
သို့သော် လူကိုယ်တိုင် မောင်းနှင်သည့်ယာဉ်များနှင့် ယာဉ်မောင်းအကူအညီပေးစနစ်ကိုသာ အသုံးပြုသည့် ယာဉ်များအတွက်မူ လက်ရှိ ယာဉ်စည်းကမ်းဥပဒေနှင့် စည်းမျဉ်းများအတိုင်း ဆက်လက်ကျင့်သုံးသွားမည်ဖြစ်ကြောင်း ဆင်ဟွာသတင်းဌာန၏ ဖော်ပြချက်အရ သိရသည်။

ICRC က ၂၀၂၆ ပထမနှစ်ဝက်အတွင်း ပဋိပက္ခဒ-ဏ်သင့်သူ ၁၂၀,၀၀၀ ကျော်ကို လူသားချင်းစာနာမှုအကူအညီ ပေးအပ်

၂၀၂၆ ခုနှစ် ပထမနှစ်ဝက်အတွင်း မြန်မာနိုင်ငံတစ်ဝှမ်း လက်နက်ကိုင်ပဋိပက္ခများနှင့် အရေးပေါ်အခြေအနေများကြောင့် ထိခိုက်ခံစားရသူ ၁၂၀,၀၀၀ ကျော်ထံ ရောက်ရှိကာ အရေးပေါ်နှင့် ရေရှည်လူသားချင်းစာနာထောက်ထားမှုဆိုင်ရာ အကူအညီများ ပေးအပ်နိုင်ခဲ့ကြောင်း အပြည်ပြည်ဆိုင်ရာကြက်ခြေနီကော်မတီ (ICRC) က ထုတ်ပြန်သည်။
ICRC သည် ဒေသခံမိတ်ဖက်အဖွဲ့အစည်းများနှင့် ပူးပေါင်း၍ နေရပ်စွန့်ခွာသူများအား အခြေခံလိုအပ်ချက်များ ထောက်ပံ့ပေးခြင်းနှင့် ကျန်းမာရေးစောင့်ရှောက်မှု ဝန်ဆောင်မှုများ ပေးအပ်ခြင်းတို့ကို ဆောင်ရွက်ခဲ့ကြောင်း သိရသည်။
ထို့ပြင် ရေနှင့် မိလ္လာစနစ်၊ အမိုးအကာရရှိရေး၊ ကိုယ်ကာယပြန်လည်သန်စွမ်းရေးနှင့် စိတ်ပိုင်းဆိုင်ရာကျန်းမာရေး အထောက်အပံ့များအပြင် မိသားစုဝင်များအကြား အဆက်အသွယ်ပြန်လည်ရရှိရေးနှင့် ပေါက်ကွဲစေတတ်သောပစ္စည်းများ၏ အန္တရာယ်ဆိုင်ရာ အသိပညာပေးလုပ်ငန်းများကိုလည်း ဆောင်ရွက်ခဲ့သည်။
အထူးသဖြင့် ပဋိပက္ခကြောင့် ထိခိုက်ခဲ့သည့် မိသားစုများ စိုက်ပျိုးရေးနှင့် အစားအစာထုတ်လုပ်မှုလုပ်ငန်းများ ပြန်လည်လုပ်ကိုင်နိုင်ရေးအတွက် လူပေါင်း ၅၃,၀၀၀ ဝန်းကျင်အား မျိုးစေ့များ၊ စိုက်ပျိုးရေးသုံးကိရိယာများနှင့် သဘာဝမြေဩဇာများ ပံ့ပိုးပေးခဲ့ကြောင်း ICRC ၏ ထုတ်ပြန်ချက်တွင် ဖော်ပြထားသည်။

နိုင်ငံတော်သမ္မတ ဦးမင်းအောင်လှိုင် ရုရှားနိုင်ငံနှင့် ဘယ်လာရုစ်နိုင်ငံများသို့ နိုင်ငံတော်အဆင့်ချစ်ကြည် ရေးခရီးစဉ်သွားရောက်ခဲ့မှုအပေါ်ဝမ်းမြောက်ကြောင်းအဆိုကို ရန်ကုန်တိုင်းလွှတ်တော်၌ မှတ်တမ်းတင်မည်

နိုင်ငံတော်သမ္မတ ဦးမင်းအောင်လှိုင် ရုရှားနိုင်ငံနှင့် ဘယ်လာရုစ်နိုင်ငံများသို့ နိုင်ငံတော်အဆင့်ချစ်ကြည် ရေးခရီးစဉ်သွားရောက်ခဲ့မှုအပေါ်ဝမ်းမြောက်ကြောင်းအဆိုကို ရန်ကုန်တိုင်းလွှတ်တော်၌ မှတ်တမ်းတင်မည်ဖြစ်ကြောင်း သိရသည်။
ယင်း အဆိုကို လသာမြို့နယ်ကိုယ်စားလှယ်အမှတ်(၁) ဦးနေဝင်းက မနက်ဖြန် သြဂုတ် ၂၆ ရက်နံနက် ၁၀ နာရီတွင်ကျင်းပမည့် တတိယအကြိမ် ရန်ကုန်တိုင်းဒေသကြီးလွှတ်တော် တတိယပုံမှန်အစည်းအဝေး(နဝမနေ့)၌ တင်သွင်းမည်ဖြစ်ကြောင်း အစည်းအဝေးလျာထားချက်အရ သိရသည်။
ထို့ပြင် အစည်းအဝေး၌ မရမ်းကုန်းမြို့နယ်ကိုယ်စားလှယ်အမှတ်(၁)ဦးမင်းသိန်းထွန်း၊ ဆိပ်ကြီးခနောင်တိုမြို့နယ်ကိုယ်စားလှယ်အမှတ်(၂)ဦးဝင်းကျော်ဦး၊ တောင်ဥက္ကလာပမြို့နယ်ကိုယ်စားလှယ်အမှတ်(၁)ဦးအောင်ကျော်မိုး၊ မရမ်းကုန်းမြို့နယ်ကိုယ်စားလှယ်အ မှတ်(၂)ဦးအောင်ပြည့်ဖြိုး၊ မင်္ဂလာတောင်ညွန့်မြို့နယ်ကိုယ်စားလှယ်အမှတ်(၁)ဦးတင်ရှိန်တို့က ကြယ်ပွင့်ပြမေးခွန်းများကို မေးမြန်းဆွေးနွေးသွားကြမည်ဖြစ် ကြောင်း သိရသည်။
ထို့အတူ ကမာရွတ်မြို့နယ်ကိုယ်စားလှယ်အမှတ်(၂)ဦးကျော်လင်း၊ လှည်းကူးမြို့နယ်ကိုယ်စားလှယ်အမှတ် (၁)ဦးအောင်မျိုးနိုင်၊ ဒဂုံမြို့သစ်(တောင်ပိုင်း)မြို့နယ်ကိုယ်စားလှယ်အမှတ်(၁)ဦးစိုးယု၊ ဒဂုံမြို့သစ်(မြောက်ပိုင်း)မြို့နယ်ကိုယ်စားလှယ်အမှတ်(၁)ဒေါ်ဇာခြည်လင်း ၊ ဒဂုံမြို့သစ်(အရှေ့ပိုင်း)မြို့နယ်ကိုယ်စားလှယ်အမှတ် (၂)ဦးသော်တာ၊ သုံးခွမြို့နယ်ကိုယ်စားလှယ်အမှတ် (၁)ဒေါ်ခင်မြတ်စု၊ မင်္ဂလာတောင်ညွန့်မြို့နယ်ကိုယ်စား လှယ်အမှတ်(၂)ဦးဝေယံပိုင်တို့ကလည်း ကြယ်ပွင့်ပြမေးခွန်းများကို မေးမြန်းဆွေးနွေးသွားကြမည်ဖြစ် ကြောင်း သိရသည်။

ညောင်တုန်းကျွန်းတာ ဧရာဝတီမြစ်ရေတိုက်စားမှုကြောင့် ပေ ၃၀၀ ခန့် အိပဲ့ကျ၊ အရေးပေါ်ပြုပြင်မှုများ ဆောင်ရွက်နေ

ဧရာဝတီတိုင်းဒေသကြီး၊ ညောင်တုန်းမြို့နယ်ရှိ ညောင်တုန်းကျွန်းတာ(ဧရာဝတီမြစ်ခွဲ)တွင် မြစ်ရေတိုက်စားမှုကြောင့် အလျားပေ ၃၀၀၊ အနံပေ ၆၀ ခန့် တာအိပဲ့ကျမှု ယနေ့ (ဩဂုတ် ၂၅ ရက်) နံနက်ပိုင်းက ဖြစ်ပွားခဲ့ပြီး သက်ဆိုင်ရာအဖွဲ့အစည်းများက အရေးပေါ်ပြုပြင်ရေးနှင့် တာကာကွယ်ရေးလုပ်ငန်းများ ဆောင်ရွက်လျက်ရှိကြောင်း သိရသည်။
တာအိပဲ့ကျမှုမှာ ညောင်တုန်းမြို့နယ်၊ ချောင်းကြီးကျေးရွာအုပ်စု၊ ချောင်းဖျားကျေးရွာရှိ ညောင်တုန်းကျွန်းတာ၏ တာမိုင် (၁၀/၆) နှင့် (၁၀/၇) ကြားတွင် နံနက် ၆ နာရီခန့်က ဖြစ်ပွားခဲ့ခြင်းဖြစ်ပြီး ဧရာဝတီမြစ်ရေတိုက်စားမှုနှင့် ရေဝဲတိုးမှုကြောင့် ဖြစ်ပေါ်ခဲ့ခြင်းဖြစ်ကြောင်း သိရသည်။
ယင်းနောက် နံနက် ၇ နာရီခွဲခန့်မှစ၍ သက်ဆိုင်ရာဌာနများ၊ နယ်မြေခံတပ်ရင်းတပ်ဖွဲ့များ၊ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များနှင့် ဒေသခံများ ပူးပေါင်းကာ စက်ယန္တရားနှင့် လူအင်အားအသုံးပြု၍ တာအိပဲ့ကျမှု ထပ်မံမဖြစ်ပွားစေရေးအတွက် တာပန်းကာကွယ်ခြင်းနှင့် ပြုပြင်ရေးလုပ်ငန်းများ ဆောင်ရွက်လျက်ရှိသည်။
လက်ရှိတွင် ပြုပြင်ကာကွယ်ရေးလုပ်ငန်းများ ဆောင်ရွက်နေပြီး စိုးရိမ်ဖွယ်အခြေအနေမရှိကြောင်း သိရသည်။
ဧရာဝတီတိုင်းဒေသကြီးအတွင်း ဇူလိုင်လနောက်ဆုံးပတ်မှစတင်၍ မြစ်ရေမြင့်တက်မှုနှင့် ဆက်စပ်သည့် ရေဘေးအခြေအနေများ ဖြစ်ပေါ်ခဲ့ပြီး ယခု ညောင်တုန်းကျွန်းတာ အိပဲ့ကျမှုမှာလည်း မြစ်ရေတိုက်စားမှုနှင့် ဆက်စပ်ဖြစ်ပွားခဲ့ခြင်းဖြစ်သည်။

တောင်ငူတွင် ဘုရားဆင်းတုတော် လက်တော်များ ဖြတ်တေ-ာက်ခိုးယူမှုနှင့် ဆက်နွှယ်၍ အသက် ၁၃ နှစ်အရွယ် ကလေးတစ်ဦးကို ဖမ်းဆီး

ပဲခူးတိုင်းဒေသကြီး၊ တောင်ငူမြို့ရှိ ဘိုဘွားရိပ်သာစေတီတော်မှ ကြေးဆင်းတု ဗုဒ္ဓရုပ်ပွားတော်များ၏ လက်တော်များ ဖြတ်တေ-ာက်ခိုးယူခံရမှုနှင့် ဆက်နွှယ်၍ အသက် ၁၃ နှစ်အရွယ် ကလေးတစ်ဦးကို ပျေ-ာက်ဆုံးနေသည့် ကြေးလက်တော်များနှင့်အတူ ဩဂုတ် ၂၃ ရက်တွင် ဖမ်းဆီးရမိခဲ့ကြောင်း သိရသည်။
ပြီးခဲ့သည့် ဇူလိုင်လလယ်ခန့်က တောင်ငူမြို့ အမှတ် (၁) ရဲစခန်းအနီးရှိ ဘိုဘွားရိပ်သာစေတီတော်မှ ကြေးဆင်းတုတော်များ၏ ဝဲဘက်လက်ကောက်ဝတ်အရင်းများ လွှဖြင့် ဖြတ်တေ-ာက်ခိုးယူခံခဲ့ရခြင်းဖြစ်သည်။
ယင်းနောက် ဩဂုတ် ၂၃ ရက် နံနက်ပိုင်းတွင် တောင်ငူမြို့မရဲစခန်းမှ နယ်ထိန်းအဖွဲ့က ဆေးရုံနောက်ကျောဘက် ကျုံးပတ်လမ်း၌ မသင်္ကာဖွယ် လှည့်လည်နေသည့် အသက် ၁၃ နှစ်အရွယ် ကလေးတစ်ဦးအား စစ်ဆေးခဲ့ရာ ၎င်းယူဆောင်လာသည့် အနက်ရောင်ကြွပ်ကြွပ်အိတ်အတွင်းမှ ပျေ-ာက်ဆုံးနေသော ကြေးဆင်းတုတော် လက်တော်များကို ရှာဖွေတွေ့ရှိခဲ့ကြောင်း သိရသည်။
အဆိုပါကလေးအား တောင်ငူမြို့မရဲစခန်း၌ ရာဇသတ်ကြီးပုဒ်မ ၃၇၉/ကျင့် ၅၄ ဖြင့် အမှုဖွင့်၍ ဆက်လက်အရေးယူဆောင်ရွက်လျက်ရှိကြောင်း သိရသည်။

ရွာသာကြီးစက်မှုဇုန်တွင် ရန်ပုံငွေပေးသွင်းရန် ပျ-က်ကွက်သည့် မြေကွက်နှင့် စက်ရုံ၊ အလုပ်ရုံ ၁၀ ခုရှိပြီး ကြွေးကျန် ကျပ် ၄၄၇ သိန်းကျော်ရှိ

ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်ရှိ ရွာသာကြီး(အကြီးစား)စက်မှုဇုန်အတွင်း ၂၀၁၇-၂၀၁၈ ဘဏ္ဍာနှစ်မှ ၂၀၂၅-၂၀၂၆ ဘဏ္ဍာနှစ်အထိ ရန်ပုံငွေပေးသွင်းရန် ပျ-က်ကွက်လျက်ရှိသည့် မြေကွက်နှင့် စက်ရုံ၊ အလုပ်ရုံ ၁၀ ခုရှိပြီး စုစုပေါင်းပေးသွင်းရန်ကျန်ငွေ ကျပ် ၄၄၇ သိန်းကျော်ရှိကြောင်း စက်မှုဇုန်စီမံခန့်ခွဲရေးကော်မတီ၏ စာရင်းအရ သိရသည်။
ရန်ပုံငွေကြွေးကျန်စာရင်းတွင် ခြံကွက်လပ်များ၊ စက်ရုံ၊ အလုပ်ရုံနှင့် ဂိုထောင်တို့ပါဝင်ပြီး ဦးကျော်ကျော်အောင်၊ Three Friends Construction Co.,Ltd၊ ဒေါ်ဝါဝါချစ်၊ ဦးလင်းအဖီး၊ ဦးစိုးမြင့်နှင့် ဒေါ်ဖြူဖြူအောင်တို့၏ အမည်များလည်း ပါဝင်ကြောင်း သိရသည်။
ထို့ပြင် အမှတ်(၃၉) ညောင်ဦးလမ်းရှိ ခြံကွက်လပ်၊ အမှတ်(၆)နှင့် အမှတ်(၇) ရိုးမရိပ်သာလမ်းရှိ မြေကွက်များ၊ အမှတ်(၁၉)နှင့် အမှတ်(၂၀) ပုဂံဝန်ထောက်ဦးတင်လမ်းရှိ မြေကွက်များအပါအဝင် စက်မှုဇုန်အတွင်းရှိ မြေကွက်နှင့် အဆောက်အအုံများတွင် ရန်ပုံငွေပေးသွင်းရန် ပျ-က်ကွက်မှုများရှိနေကြောင်း စာရင်းတွင် ဖော်ပြထားသည်။
ကြွေးကျန်ကာလမှာ ၂၀၁၇-၂၀၁၈ ဘဏ္ဍာနှစ်မှ ၂၀၂၅-၂၀၂၆ ဘဏ္ဍာနှစ်အထိဖြစ်ပြီး ပေးသွင်းရန်ကျန်ငွေပမာဏမှာ ပိုင်ရှင်တစ်ဦးချင်းအလိုက် ကွဲပြားလျက်ရှိကာ စုစုပေါင်း ကျပ် ၄၄,၇၈၃,၀၆၄ (ကျပ် ၄၄၇ သိန်းကျော်) ရှိကြောင်း ရွာသာကြီး(အကြီးစား)စက်မှုဇုန် စီမံခန့်ခွဲရေးကော်မတီ၏ စာရင်းအရ သိရသည်။

အမြန်လမ်းမကြီး၏ မိုင်တိုင်အမှတ် ၃၃၉/၂ နှင့် ၃၃၉/၃ ကြားတွင် ကွန်ကရစ်လမ်းသားနိမ့်ကျ၍ အစားထိုးပြုပြင်နေ

ရန်ကုန်-မန္တလေးအမြန်လမ်းမကြီး၏ မိုင်တိုင်အမှတ် ၃၃၉/၂ နှင့် ၃၃၉/၃ ကြားတွင် ကွန်ကရစ်လမ်းသားနိမ့်ကျ၍ အစားထိုးပြုပြင်လျက်ရှိကြောင်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ထံမှ သိရသည်။
ယင်းနေရာ၌ လမ်းအောက်ခံမြေသားနိမ့်ကျကာ ကွန်ကရစ်လမ်းသားနိမ့်ကျမှုဖြစ်ပေါ်၍ အစားထိုးပြုပြင်ခြင်းကို စက်ယန္တရားများသုံးအသုံးပြုဆောင်ရွက်လျက်ရှိရာ အမြန်လမ်းအသုံးပြုသွားလာနေကြသူများအနေဖြင့် လုပ်ငန်းခွင်အနီးရောက်ရှိချိန်၌ အရှိန်လျှော့ ၍ ဂရုပြုမောင်းနှင်ကြပါရန်၊ မိုးရွာချိန်/ညအချိန်များတွင် အရှိန်လျှော့ချမောင်းနှင်ရန်၊ သတ်မှတ်နှုန်းအောက်သာမောင်းနှင်ကြရန် အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့က အသိပေးခဲ့ကြောင်း သိရသည်။