နွေရာသီတွင် လီဗာပူးနည်းပြရာထူးအား လက်ခံရန် အသင့် ရှိနေတဲ့ အလွန်ဆို
==================
ဇာဘီးအလွန်ဆိုဟာ နွေရာသီတွင် ဖိအားများအောက် ကျရောက်နေတဲ့ အန်းဆလော့ နေရာတွင် လီဗာပူးနည်းပြအဖြစ် အစားထိုးတာဝန်ယူရန် အသင့်ဖြစ်နေကြောင်း သိရပါတယ်။

အသက် ၄၇ နှစ်ရှိ ဆလော့ဟာ စနေနေ့တုန်းက ဘရိုက်တန်ကို ၂-၁ ဖြင့် ရှုံးနိမ့်ပြီးနောက် ယခုရာသီ ၁၀ ပွဲမြောက် ပရီးမီးယားလိဂ်ရှုံးပွဲကြုံတွေ့ရကာ ထိပ်ဆုံး ၄ သင်းနှင့် ရမှတ် ၅ မှတ်အထိ ကွာဟလာပါတယ်။

ဒတ်ချ်လူမျိုးနည်းပြဟာ ပရီးမီးယားလိဂ်ချန်ပီယံဘွဲ့အား မကာကွယ်နိုင်တော့တဲ့ အခြေအနေသို့ ရောက်လာမှုနှင့်အတူ အနာဂတ်အတွက်ပါ မရေမရာ ဖြစ်လာပါတယ်။

ယနေ့တွင် ဂျာမန်သတင်းစာ Bild က လီဗာပူးတာဝန်ရှိသူများက အန်းဆလော့နေရာကို ဆက်ခံမယ့်သူအဖြစ် အသက် ၄၄ နှစ်ရှိ အလွန်ဆိုကို မျက်စိကျနေကြောင်း ဖော်ပြလာပါတယ်။

တဖက်တွင် အလွန်ဆိုကိုယ်တိုင်ကလည်း ကစားသမားဘဝတုန်းက ၅ နှစ်တိုင်တိုင် ကျင်လည်ခဲ့ဖူးတဲ့ အန်ဖီးလ်သို့ ပြန်လာရန် စိတ်အားထက်သန်နေပါတယ်။

ဒါပေမယ့် ဇာဘီးအလွန်ဆိုဟာ အသင်းတည်ဆောက်ရေးအတွက် အပြည့်အဝ ထိန်းချုပ်ခွင့်ပေးမှသာလျှင် လီဗာပူးသို့ ပြန်လာမှာလည်း ဖြစ်ပါတယ်။

ကလေးဝတ် အင်္ဂလန်ကမ္ဘာ့ဖလားအင်္ကျီအတွက် ပေါင် ၁၀၀ အထိ သုံးရမှုက ဒေါသထွက်သင့်ကြောင်း ဝန်ကြီးချုပ်စတားမာပြောကြားလာ
===================
အင်္ဂလန်ဝန်ကြီးချုပ်ကီယာစတားမာက မိဘများအနေဖြင့် ကလေးဝတ် အင်္ဂလန်ကမ္ဘာ့လားအင်္ကျီအတွက် ပေါင် ၁၀၀ အထိ အသုံးပြုလာရမှုက ဒေါသထွက်သင့်ကြောင်း ပြောကြားလာပါတယ်။

အင်္ဂလန်အတွက် ဝတ်စုံထုတ်လုပ်ပေးနေတဲ့ Nike ဟာ မကြာသေးမီတုန်းက ၂၀၂၆ ကမ္ဘာ့ဖလားပြိုင်ပွဲတွင် အင်္ဂလန်အသင်း ဝတ်ဆင်လာမယ့် ဝတ်စုံများကို ကြေညာခဲ့ပါတယ်။

Nike ဟာ အရွယ်ရောက်ပြီးသူများအတွက် အင်္ကျီအား ယူရို ၂၀၂၄ တုန်းက ပေါင် ၁၂၄.၉၉ ဖြင့် ရောင်းချခဲ့ရာမှ ၈ ရာခိုင်နှုန်း တိုးမြှင့်ပြီး ပေါင် ၁၃၄.၉၉ အထိ သတ်မှတ်လာပါတယ်။

ပရိသတ်အင်္ကျီကိုလည်း ပေါင် ၈၉.၉၉ သတ်မှတ်လာပြီး ကျောဘက်တွင် အမည်ထည့်သွင်းလိုပါက နောက်ထပ် ပေါင် ၆၀ ထပ်မံကုန်ကျပါမယ်။

ဒါ့အပြင် ကလေးများအတွက် အင်္ကျီနှင့် ဘောင်းဘီဈေးနှုန်းကိုလည်း ပေါင် ၉၇.၉၈ သတ်မှတ်လာပါတယ်။

တဖက်တွင် အင်္ဂလန်ဝတ်စုံအား အတုဈေးကွက်တွင် ပေါင် ၈.၅၀ ဝန်းကျင်ဖြင့် ရောင်းချနေပါတယ်။

အာဆင်နယ်အမာခံပရိသတ် စတားမာက "ပရိသတ်တွေကို မျှမျှတတဆက်ဆံဖို့က ကလပ်နဲ့ အာဏာပိုင်အဖွဲ့အစည်းတွေရဲ့ တာဝန် ဖြစ်တယ်။ သူတို့ရဲ့ ခံစားချက် ခိုင်မာမှုကို နားလည်ပါတယ်။ ပရိသတ်တွေရဲ့ စိုးရိမ်ပူပန်မှုအသံကြားရတာ မှန်ပါတယ်"လို့ ပြောကြားသွားပါတယ်။

အိုးထရက်ဖို့ဒ်ရှိ ၇၇ နှစ်တိုင်တိုင် မိသားစုဝင်များ အသုံးပြုလာတဲ့ ထိုင်ခုံမှ ကန်ထုတ်ခံလာရတဲ့ အသက် ၇၆ နှစ်ရှိ ယူနိုက်တက်ပရိသတ်
==================
အသက်ကြီး ယူနိုက်တက်ပရိသတ်တစ်ဦးဟာ မိသားစုဝင်များ ၇၇ နှစ်တိုင်တိုင် အသုံးပြုလာခဲ့တဲ့ အိုးထရက်ဖို့ဒ်ရှိ မိသားစုခုံမှ ကန်ထုတ်ခြင်းခံလာရပါတယ်။

အလယ်ပိုင်းတွင် နေထိုင်တဲ့ အသက် ၇၆ နှစ်ရှိ တိုနီရီလေးဟာ ၁၉၄၆ ခုနှစ်ကတည်းက ယူနိုက်တက်ပွဲစဉ်တိုင်းကို မိသားစုထိုင်ခုံအသုံးပြုပြီး ကြည့်ရှုလာခဲ့တာ ဖြစ်ပါတယ်။

ဒါပေမယ့် ယူနိုက်တက်ပူးတွဲပိုင်ရှင်ဆာဂျမ်ရက်ကလစ်ဖ်ဟာ လာမယ့်ရာသီမှ စတင်ကာ ဆာဘော်ဘီချာလ်တန်ပွဲကြည့်စင်တွင် ပေါင် ၃၁၅ မှ ပေါင် ၄၂၅ အတွင်း ကျသင့်မယ့် အထူးတန်းဖန်တီးလာမှုနှင့်အတူ ထိုင်ခုံ ၅၀၀ ဝန်းကျင်အား ဖယ်ရှားလာတာ ဖြစ်ပါတယ်။

ယင်းလုပ်ဆောင်မှုကြောင့် အသက်ကြီး ယူနိုက်တက်ပရိသတ်ဟာ အခြားပရိသတ် ၅၀၀ ဝန်းကျင်တို့နှင့်အတူ နှစ်ပေါင်းများစွာ အသုံးပြုလာတဲ့ ထိုင်ခုံအား ဖယ်ရှားခံလာရတာလည်း ဖြစ်ပါတယ်။

ယူနိုက်တက်ဟာ ယခုရာသီတွင်လည်း ပရိသတ် ၆၀၀ လောက်အား အောက်တန်းတွင် ထိုင်ခုံနေရာပေးကာ အပြောင်းအလဲများ ပြုလုပ်ထားပြီး ဖြစ်ပါတယ်။

ရီလေဟာ ယင်းထိုင်ခုံတွင် အမည်ရေးထိုးထားသူလည်း ဖြစ်ပါတယ်။ သူ့ယောက်ကထီး လူရီကာဆီဒီက ယူနိုက်တက်တွင် ၁၉၄၀ ခုနှစ်များမှ ၁၉၅၀ ခုနှစ်များအတွင်း ကစားခဲ့သလို နည်းပြအဖြစ်လည်း တာဝန်ယူခဲ့ကာ ဒေးဗစ်ဘက်ဟမ်းအပါအဝင် ကစားသမားများကို ပြုစုပျိုးထောင်ခဲ့သူ ဖြစ်ပါတယ်။

ရီလေးက "မမျှမတလုပ်တာခံရတယ်လို့ ခံစားရတယ်။ ကျုပ်တို့တင်မက အခြားသူတွေလည်း ခံရတာပါ။ စိတ်မကောင်းဖြစ်မိတယ်။ အကူအညီမဲ့၊ မျှော်လင့်ချက်မဲ့သလို ခံစားရတယ်"လို့ ပြောကြားသွားပါတယ်။

ယူနိုက်တက်ဟာ အထူးတန်းလက်မှတ်ဖန်တီးရန်အတွက် ပရိသတ် ၁၁၀၀ ဝန်းကျင်တို့အား ဖယ်ရှားလာခဲ့တပါ။

ပေါင် ၃၁၅ ထိုင်ခုံဝယ်ယူထားသူများမှာ Gordon Ramsay’s Lucky Cat စားသောက်ဆိုင်တွင် အစားအသောက်သုံးမျိုး ရွေးချယ်စားသောက်ခွင့်လည်း ပါဝင်ပါတယ်။

ပေါင် ၄၂၅ လက်မှတ်ဝယ်ယူထားသူကတော့ ရှန်ပိန်သောက်သုံးခွင့်အပြင် တခမ်းတနားကြည့်ခွင့် ရရှိပါတယ်။

တဖက်တွင် ယူနိုက်တက်ဟာ နေရာအပြောင်းအလဲ လုပ်တဲ့ ပရိသတ်မျာအား တစ်ရာသီစာလက်မှတ်ကိုင်ဆောင်ထားသူအဖြစ်မှ ဖယ်ရှားလာတာ မဟုတ်ပါဘူး။ ဒါပေမယ့် ပရိသတ်များဟာ ၎င်းတို့ ထိုင်နေကြ နေရာမှာ ထိုင်ခွင့် ရရှိရေးအာမခံချက် မရှိပါဘူး။

တဖက်တွင် ရီလေးဟာ လာမယ့်ရာသီတွင် နေရာပြောင်းလဲ သတ်မှတ်လာမှုနှင့်အတူ သားဖြစ်သူနှင့်အတူ ထိုင်ကြည့်ခွင့် မရတော့ပါဘူး။

ယူနိုက်တက်ဟာ လာမယ့်ရာသီအတွက် လက်မှတ်ဈေးနှုန်းကိုလည်း ၅ ရာခိုင်နှုန်းတိုးမြှင့်သတ်မှတ်ထားပြီး အနိမ့်ဆုံးလက်မှတ်ဈေးနှုန်းကို ၆၆ ပေါင် သတ်မှတ်ထားပြန်ပါတယ်။

ဒါ့အပြင် ရီလေးရဲ့သမီးဖြစ်သူက ကလပ်အနေဖြင့် သစ္စာရှိ ယူနိုက်တက်ပရိသတ်များအပေါ်တွင် တန်ဖိုးထားသင့်ကြောင်း ဆိုထားပါတယ်။

ချဲလ်ဆီးသို့ မပြောင်းမီ ရက်အနည်းငယ်အလိုတွင် ယာဉ်အမြန်မောင်းမှုကြောင့် ဒဏ်ရိုက်ခြင်းခံလာရတဲ့ ဂါနာချို
=====================
အလီဂျန်ဒရိုဂါနာချိုဟာ ချဲလ်ဆီးသို့ ပေါင်သန်း ၄၀ ဖြင့် မပြောင်းရွှေ့မီ ရက်အနည်းငယ်အလိုတွင် ယူနိုက်တက်လေ့ကျင့်ရေးကွင်းမှ အပြန်တွင် ယာဉ်အမြန်မောင်းမှုကြောင့် အရေးယူခြင်းခံလာရပါတယ်။

ဂါနာချိုဟာ ပြီးခဲ့တဲ့နှစ် ဩဂုတ်လ ၃၀ ရက်နေ့တုန်းက ချဲလ်ဆီးသို့‌ ပေါင်သန်း ၄၀ ဖြင့် ပြောင်းခဲ့သူ ဖြစ်ပါတယ်။

သူဟာ စပါးစ်အား ရှုံးနိမ့်တဲ့ ယူရိုပါလိဂ်ဗိုလ်လုပွဲတွင် အရန်ခုံတွင် ထိုင်နေခဲ့ရမှုအပေါ် ဝေဖန်မှု ပြုလုပ်ပြီးနောက် ရူဘင်အမိုရမ်ရဲ့ အသင်းသစ် ရှာဖွေရန် ပြောဆိုခြင်းခံရကာ ပထမအသင်းနှင့် အတူ လေ့ကျင့်ခန်းဆင်းခွင့် မရခဲ့ပါဘူး။

ဂါနာချိုဟာ ချဲလ်ဆီးသို့ မပြောင်းမီ ၄ ရက်အလိုတွင် သူ့ရဲ့ Audi RS3 ကားဖြင့် ယူနိုက်တက်ရဲ့ကာရန်တန်လေ့ကျင့်ရေးကွင်းအနီးတွင် တစ်နာရီမိုင် ၄၀ သာ‌ မောင်းနှင်ရမယ့်ဧရိယာတွင် တစ်နာရီ မိုင် ၅၀ အထိ မောင်းနှင်ခဲ့ပါတယ်။

သူဟာ ဩဂုတ်လ ၂၆ ရက်နေ့တွင် ညနေ ၅ နာရီ ၅၁ မိနစ်အချိန်တွင် ယူနိုက်တက်လေ့ကျင့်ရေးကွင်းဝင်ပေါက်အနီးတွင် သတ်မှတ်မိုင်နှုန်းထက် ပိုမောင်းကြောင်း စစ်ဆေးတွေ့ရှိခဲ့တာပါ။

ဂါနာချိုဟာ တရားရုံးစစ်ဆေးမှုသို့ ကိုယ်တိုင်မတက်ရောက်ခဲ့ပေမယ့် ရှေ့နေမှ တဆင့် တောင်းပန်မှု ပြုလုပ်သွားပါတယ်။

ဂါနာချိုဟာ အောက်တိုဘာလတုန်းက ယင်းကားအား မည်သူမောင်းနှင်သလဲဆိုတာ မေးမြန်းအကြောင်းကြားစာအား ပြန်လည်တုံ့ပြန်ရန်လည်း ပျက်ကွက်ခဲ့ပါတယ်။

ဂါနာချိုဟာ ယင်းအမှုများအတွက် ပေါင် ၆၆၀ ဒဏ်ရိုက်ခြင်းခံခဲ့ရတဲ့အပြင် တရားရုံးစရိတ် ပေါင် ၁၂၀ ၊ ထပ်ဆောင်းဒဏ်ငွေ ပေါင် ၂၆၄ ချမှတ်ခြင်းခံခဲ့ရသလို လိုင်စင်မှ ၃ ပွိုင့်လျှော့ချခြင်းခံခဲ့ရပါတယ်။

ဂါနာချိုဟာ ယူနိုက်တက်အကယ်ဒမီမှ ထွက်ပေါ်လာပြီးနောက် ၁၄၄ ပွဲကစားခဲ့ရာမှာ ၂၆ ဂိုးသွင်းကာ ၂၂ ကြိမ် ဖန်တီးခဲ့ပါတယ်။

သူဟာ ယခုရာသီတွင် ချဲလ်ဆီးအတွက် ၇ ဂိုးသွင်းကာ ၄ ကြိမ်ဖန်တီးထားပါတယ်။

မက်ဂွိုင်းယားအား စာချုပ်သက်တမ်းတိုးရန် နီးစပ်နေပြီဖြစ်တဲ့ ယူနိုက်တက်
====================
ဟယ်ရီမက်ဂွိုင်းယားဟာ လာမယ့်ရာသီတွင် ယူနိုက်တက်တွင် ဆက်ကစားရေး စာချုပ်သက်တမ်းတိုးချုပ်ဆိုရန် နီးစပ်နေပြီ ဖြစ်ပါတယ်။ ဒါပေမယ့် မက်ဂွိုင်းယားဟာ သူ့အပေါ် ကလပ်ဘက်က တန်ဖိုးထားသေးလားဆိုတာ သိလိုနေပါတယ်။

အသက် ၃၃ နှစ်ရှိ အင်္ဂလန်နောက်ခံလူဟာ ယခုနွေရာသီတွင် စာချုပ်သက်တမ်းကုန်ဆုံးမှာ ဖြစ်ပြီး စာချုပ်သက်တမ်းတိုးရေး ဆွေးနွေးမှုများ ပြုလုပ်လာတာ ရက်သတ္တပတ်အတန်ကြာခဲ့ပြီ ဖြစ်ပါတယ်။

မက်ဂွိုင်းယားနှင့် ယူနိုက်တက်တို့ဟာ ၁၂ လ သက်တမ်းတိုးနိုင်မယ့်အချက်ပါ ၁ နှစ်စာချုပ်ချုပ်ဆိုရေး ဆွေးနွေးနေတာလည်း ဖြစ်ပါတယ်။

အင်္ဂလန်အသင်းတွင် ပြန်လည်ရွေးချယ်ခံထားရတဲ့ မက်ဂွိုင်းယားက "ကလပ်အတွက်ရော ကျွန်တော့်အတွက်ရော အကောင်းဆုံးဖြစ်မယ့်နေရာမှာ သဘောတူညီမှု ရလာမယ်လို့ ထင်တယ်။ အနှေးအမြန်ဆိုသလို ကျွန်တော် ထွက်မလား၊ ဆက်နေမလားဆိုတာ သိလာရမယ်လို့ ထင်တယ်။ ဒါပေမယ့် မကြာခင် သိလာရပါမယ်"လို့ ပြောကြားသွားပါတယ်။

တဖက်တွင် မက်ဂွိုင်းယားက အိုးထရက်ဖို့ဒ်တွင် ဆက်ကစားလိုသေးကြောင်း ပြောကြားလာပါတယ်။

မက်ဂွိုင်းယားက "ဒီကလပ်ကို ချစ်ပါတယ်။ ဒါပေမယ့် ကျွန်တော့်အတွက်ရော ကလပ်အတွက်ပါ သင့်တော်တဲ့အရာဖြစ်သင့်ပါတယ်။ တန်ဖိုးထားမခံရရင် ထွက်ပါမယ်။ ဒါပေမယ့် ဒီကလပ်မှာ ဆက်နေချင်ပါတယ်။ ကလပ်ကလည်း ကျွန်တော့်ကို ဆက်ရှိစေချင်ပါတယ်။ သူတို့က အရေးပါတဲ့အခန်းကဏ္ဍက ကျွန်တော် ကစားနိုင်သေးတယ်လို့ ခံစားနေကြတုန်းပါ"လို့ ပြောကြားသွားပါတယ်။

ဆော်ဒီတွင် ရာသီဝက် ခြေစမ်းပွဲကစားရေး ဖျက်သိမ်းကာ အိုင်ယာလန်သို့ သွားရောက်ကာ လေ့ကျင့်ခန်းဆင်းလာမယ့် ယူနိုက်တက်
===================
မိုက်ကယ်ကာရစ်ဟာ လိဒ်နှင့်ပွဲစဉ်မတိုင်မီ ယူနိုက်တက်စတားများအား အိုင်ယာလန်သို့ ခေါ်ဆောင်သွားကာ ပြင်းထန်တဲ့ စခန်းသွင်းလေ့ကျင့်မှု ပြုလုပ်လာပါမယ်။

ယူနိုက်တက်ဟာ အက်ဖ်အေဖလားပြိုင်ပွဲမှ ထွက်ခွာခဲ့ရမှုနှင့်အတူ နိုင်ငံတကာပွဲစဉ်များကြောင့် လိဂ်နားနေရစဉ်အတွင်း သုံးပတ်အထိ အနားရထားပါတယ်။

၎င်းတို့ဟာ လာမယ့် ပရီးမီးယားလိဂ်ပွဲအဖြစ် ဧပြီလ ၁၃ ရက်နေ့တွင်မှ လိဒ်နှင့် ရင်ဆိုင်ကစားရပါမယ်။

ယူနိုက်တက်ဟာ ယင်းကာလအတွင်းတွင် အိုင်ယာလန်သို့ သုံးရက်တာ ပြင်းထန်တဲ့ စခန်းသွင်းလေ့ကျင့်ခန်းဆင်းမှုပြုလုပ်လာမှာ ဖြစ်ပြီး ခြေစမ်းပွဲများလည်း ကစားလာမှာ မဟုတ်ပါဘူး။

ယူနိုက်တက်ဟာ ဧပြီလ ၆ ရက်နေ့မှ ဧပြီလ ၉ ရက်နေ့အထိ ဒဗ္ဗလင်မြို့အပြင်ဘက် မိနစ် ၃၀ ခရီးအကွာအဝေးတွင် စခန်းသွင်းလေ့ကျင့်မှု ပြုလုပ်လာမှာလည်း ဖြစ်ပါတယ်။

အစောပိုင်းတုန်းက ယူနိုက်တက်ဟာ ပွဲမရှိတဲ့ကာလအတွင်းတွင် အရှေ့အလယ်ပိုင်းသို့ သွားရောက်ကာ ခြေစမ်းပွဲကစားပြီး ငွေရှာရန် စီစဉ်ထားခဲ့ပေမယ့် အီရန်-အမေရိကန်စစ်ပွဲကြောင့် သွားရောက်ရန် မဖြစ်တော့မှုနှင့်အတူ အိုင်ယာလန်သို့ သွားရောက်ကာ ရာသီဝက် လေ့ကျင့်ခန်းဆင်းရန် စီစဉ်လာခဲ့ရတာပါ။

ယူနိုက်တက်ဟာ နိုင်ငံတကာပွဲကစားရခြင်း မရှိတဲ့ ကစားသမားများကိုလည်း ယခုအပတ်နှောင်းပိုင်းရက်များတွင် အနားပေးလာပါမယ်။

ရီးရဲလ်မက်ဒရစ်သို့ ပြောင်းရွှေ့ကစားရေး တံခါးဖွင့်ပေးလာတဲ့ ရိုဒရီ
=======================
မန်စီးတီးကွင်းလယ်ကစားသမားရိုဒရီဟာ အနာဂတ်တွင် ရီးရဲလ်မက်ဒရစ်သို့ ပြောင်းရွှေ့ကစားရေး တံခါးဖွင့်ပေးလာပါတယ်။

ရီးရဲလ်မက်ဒရစ်ဟာ တိုနီခရူးစ်နှင့် လူကာမိုဒရစ်ခေတ်အလွန်တွင် အားနည်းနေတဲ့ ကွင်းလယ်အား လာမယ့်‌နွေရာသီတွင် အားဖြည့်ရန် စီစဉ်နေပြီး ၎င်းတို့ရဲ့ ပစ်မှတ်ထဲတွင် ရိုဒရီလည်း ပါဝင်ပါတယ်။

စပိန်ကွင်းလယ်ကစားသမားရိုဒရီဟာ မန်စီးတီးနှင့် တစ်နှစ်စာချုပ်သက်တမ်းသာ ကျန်တော့ပြီ ဖြစ်ပြီး အသင်းတာဝန်ရှိသူများနှင့် စာချုပ်သစ်ချုပ်ဆိုရေး ဆွေးနွေးရခြင်း မရှိသေးပါဘူး။

ယခုအခါ နိုင်ငံတကာပွဲစဉ်များကာလအတွင်း Onda Cero ရေဒီယိုဌာနနှင့် ပြုလုပ်တဲ့ အင်တာဗျူးမှာတော့ ရိုဒရီက လာလီဂါတွင် ပြန်ကစားရေး တံခါးဖွင့်ပေးလာပါတယ်။

အက်သလက်တီကိုကွင်းလယ်ကစားသမားဟောင်းက "စပိန်သို့ ပြန်ချင်ပါတယ်။ ကျွန်တော့်အတွက် လာလီဂါက စတင်တဲ့နေရာပါ။ အခုထိလည်း စောင့်ကြည့်တုန်းပါ။ အရင်ကလောက် လိုက်မကြည့်တာတော့ အမှန်ပါ။ ဒါပေမယ့် စောင့်ကြည့်တုန်းပါ။ ပရီးမီးယားလိဂ်က ကျွန်တော့်အားနည်းချက်ဆိုတာ ဝန်ခံရပါမယ်။ စိတ်လှုပ်ရှားဖို့ကောင်းတဲ့လိဂ်ဖြစ်ပေမယ့် တောင်းဆိုမှု အရမ်းများတယ်။ ကိုယ့်အကန့်အသတ်အဆုံးအထိ တွန်းအားပေးတယ်။ အခုဆို ဒီမှာ ကစားလာတာ ၇ နှစ်ရှိပြီ။ အချိန်တွေ ကုန်လွန်လာတာ သတိပြုမိပါတယ်။ အခုအချိန်မှာတော့ ဒီမှာ ပျော်နေတုန်းပါ"လို့ ပြောကြားသွားပါတယ်။

၂၀၁၉ ခုနှစ်တုန်းက အက်သလက်တီကိုမှ မန်စီးတီးသို့ ပြောင်းလာခဲ့တဲ့ ရိုဒရီက သူ့အား ရီးရဲလ်မက်ဒရစ်က စိတ်ဝင်စားနေတယ်ဆိုတဲ့ သတင်းအပေါ် တံခါးဖွင့်ပေးထားကြောင်း ဆိုလာပါတယ်။ ဒါ့အပြင် ရိုဒရီက ၂၀၂၄ ခုနှစ် Ballon d'Or ဆုနှင့်ပတ်သက်ပြီး ဗီနီရှပ်စ်နှင့် ပြဿနာရှိနေတယ်ဆိုတဲ့သတင်းကိုလည်း ငြင်းဆိုသွားပါတယ်။

ဘရာဇီးစူပါစတားဟာ Ballon d'Or မရရှိကြောင်း သိရပြီးနောက် ယင်းနှစ်ဆုပေးပွဲသို့ တက်ရောက်ခဲ့ခြင်း မရှိပါဘူး။

ယင်းနောက်ပိုင်းတွင် မန်စီးတီးပရိသတ်များက ချန်ပီယံလိဂ်ပွဲစဉ်မတိုင်မီ ရိုဒရီ ဆုတံဆိပ်အား ကိုင်မြှောက်နေတဲ့ပုံဖြင့် 'Stop Crying Your Heart Out' ဆိုတဲ့စာသားဖြင့် လှောင်ပြောင်ခဲ့ကြပါတယ်။

ယင်းအပေါ် ရိုဒရီက "သူတို့ ကျွန်တော်တို့ကို တစ်ယောက်အပေါ် တစ်ယောက် တင်းမာတာမျိုး ဖြစ်စေချင်တယ်။ ဒါပေမယ့် ကျွန်တော်က ဗီနီရှပ်စ်အပေါ် လေးစားအားကျတဲ့သူပါ။ ကျွန်တော့်အတွက်တော့ ကမ္ဘာ့အကောင်းဆုံးအသင်းတွေကို မငြင်းနိုင်ပါတယ်။ သူတို့က ပရိသတ်အင်အားအပြည့်အဝရှိတယ်။ ဘာနေဗျူးကွင်းကလည်း တကယ့်ကို ကောင်းတဲ့ကွင်းကြီးအဖြစ် အမြဲရှိနေတာပါ။ ကျွန်တော့်စာချုပ်တစ်နှစ်ကျန်သေးတယ်။ အချိန်ရောက်လာရင်တော့ ဆွေးနွေးပါမယ်။ အခု ဒဏ်ရာကနေ ပြန်ကောင်းလာနေပါပြီ။ အခု ကျွန်တော် စိုးရိမ်တာက အရင်တုန်းက အကောင်းဆုံးအဆင့် ပြန်ရဖို့ပါ။ စာချုပ်ကိစ္စပြဿနာ မရှိပါဘူး။ အချိန်ရောက်လာမှာပါ။ အထူးသဖြင့် ကမ္ဘာ့ဖလားရောက်လာတော့မယ့်အခါမျိုးမှာ ကျွန်တော့်ရဲ့အကောင်းဆုံးပုံစံ ပြန်ရဖို့က အရေးအကြီးပါ"လို့ ပြောကြားသွားပါတယ်။

ကမ္ဘာ့ဖလားအိပ်မက် အဆုံးသတ်ရပြီးနောက် အိုင်ယာလန်ကစားသမားတို့ ပင်နယ်တီ ကန်ချိန်တွင် ချက်ပရိသတ်များ ဥဩသံဖြင့် နှောင့်ယှက်မှုအား စုံစမ်းစစ်ဆေးရန် တောင်းဆိုလာ
======================
အိုင်ယာလန်ပရိသတ်များဟာ ကမ္ဘာ့ဖလားပလေးအော့ဖ်ပင်နယ်တီအဆုံးအဖြတ်တွင် ရှုံးနိမ့်မှု ကြုံရကာ ကမ္ဘာ့ဖလားအိပ်မက် အဆုံးသတ်ခဲ့ရပြီးနောက် ချက်ပရိသတ်များရဲ့ အပြုအမူအပေါ် စုံစမ်းစစ်ဆေးမှု ပြုလုပ်ရန် တောင်းဆိုလာပါတယ်။

အိုင်ယာလန်ဟာ ပရက်တွင် ကမ္ဘာ့ဖလားကစားခွင့် ရရှိရေး မျှော်လင့်ချက်ဖြင့် ချက်နှင့် ပလေးအော့ဖ်ကစားခဲ့ရပါတယ်။

ဟိုင်မာဟေးလ်ဂရမ်ဆင်ရဲ့အသင်းဟာ ၂၃ မိနစ်အတွင်းတွင်ပင် ၂-၀ ဖြင့် ဦးဆောင်နိုင်ခဲ့ပေမယ့် အိမ်ရှင်က ပက်ထရစ်ချက်ခ်၊ အသင်းခေါင်းဆောင်လာဒီဆလပ်ဗ်ခရက်ခီတို့ရဲ့ ဂိုးဖြင့် ပြန်လည်ချေပခဲ့ပါတယ်။

ယင်းနောက် အနိုင်ဂိုး ရှာမတွေ့တာကြောင့် ပင်နယ်တီအဆုံးအဖြတ်ကန်ခဲ့ရပါတယ်။

ချက်ဟာ ပင်နယ်တီအဆုံးအဖြတ်ကန်ချိန်မှာတော့ ပရိသတ်များက အိုင်ယာလန်ကစားသမားများအား အနှောင့်အယှက်ပေးမှုနှင့်အတူ အိမ်ရှင်အခွင့်အရေးကို အပြည့်အဝ အသုံးချသွားခဲ့ပါတယ်။

အိုင်ယာလန်ကစားသမားတို့ ပင်နယ်တီကန်တဲ့အခါတိုင်း ချက်ပရိသတ်များက ဆူညံတဲ့ ဥဩသံဖြင့် အနှောင့်အယှက်ပေးခဲ့ကြတာပါ။

အလန်ဘရောင်နီနှင့် ဖန်အဇက်ဇ်တို့ရဲ့ ပင်နယ်တီကို ချက်ဂိုးသမားမာတီကိုဗာက ကာကွယ်သွားခဲ့ပြီး ချက်တို့ ၄-၃ ဖြင့် အနိုင်ရရှိသွားခဲ့ပါတယ်။

ဒါပေမယ့် အိုင်ယာလန်ပရိသတ်များဟာ ပင်နယ်တီအဆုံးအဖြတ်ကန်ချိန်တွင် အိုင်ယာလန်ကစားသမားများအား ချက်ပရိသတ်များက ဥဩသင့်ဖြင့် အနှောင့်အယှက်ပေးမှုအား စုံစမ်းစစ်ဆေးမှု ပြုလုပ်ရန် ယူအီးအက်ဖ်အေကို တောင်းဆိုလာပါတယ်။

ချက်ဟာ ကမ္ဘာ့ဖလားခြေစစ်ပွဲအောင်မြင်ရေး ပလေးအော့ဖ်ဗိုလ်လုပွဲအဖြစ် ဒိန်းမတ်နှင့် ရင်ဆိုင်ကစားရပါမယ်။

အိုင်ယာလန်ကတော့ ၂၀၀၂ နောက်ပိုင်း ပထမဆုံး ကမ္ဘာ့ဖလားကစားခွင့် ရရှိရေး အိပ်မက် ဆက်လက် စောင့်ဆိုင်းရဦးတော့မှာ ဖြစ်ပါတယ်။

ဆာလက်မှာ သမိုင်းတစ်လျှောက် အကောင်းဆုံးအကောင်းဆုံးကစားသမားများထဲမှ တစ်ဦးဖြစ်ကြောင်း ကလော့ပ်ချီးကျူးလာ
========================
လီဗာပူးနည်းပြဟောင်းဂျာဂင်ကလော့ပ်က မိုဟာမက်ဆာလက်မှာ သမိုင်းတစ်လျှောက် အကောင်းဆုံးကစားသမားများထဲမှ တစ်ဦးဖြစ်ကြောင်းနှင့် သူ့ရဲ့ လီဗာပူးစံချိန်ကို ရိုက်ချိုးရန် ခက်ခဲကြောင်း ပြောကြားလာပါတယ်။

အီဂျစ်စူပါစတားဟာ ယခုအပတ်အစောပိုင်းတုန်းက ရာသီအကုန်တွင် ကိုးနှစ်ကြာ ကစားလာခဲ့တဲ့ အန်ဖီးလ်မှ ထွက်ခွာတော့မှာ ဖြစ်ကြောင်း ကြေညာထားပါတယ်။

ကလော့ပ်ဟာ ၂၀၁၇ ခုနှစ်တုန်းက ဆာလက်ကို ရိုးမားမှ ပေါင် ၃၄ သန်းဖြင့် အန်ဖီးလ်သို့ ခေါ်ဆောင်လာခဲ့တာ ဖြစ်ပြီး ၇ ရာသီတိုင်တိုင် လက်တွဲခဲ့ပါတယ်။

အသက် ၃၄ နှစ်ရှိ ဆာလက်ဟာ လီဗာပူးအတွက် ၂၅၅ ဂိုးသွင်းယူပေးထားကာ ကလပ်သမိုင်းတွင် တတိယဂိုးအများဆုံးသွင်းယူသူအဖြစ် ရပ်တည်နေပါတယ်။

ကလော့ပ်က "သူနဲ့ အလုပ်လုပ်ရတာ အခြားသူတွေနဲ့ အလုပ်လုပ်ရသလိုပါပဲ။ ဘောလုံးဆုံးရှုံးနိုင်တယ်၊ ကာကွယ်ရမယ်။ ဒါပေမယ့် ကြီးမားတဲ့အမြင်နဲ့ ပြောရရင် ကိန်းဂဏန်းတွေက လိုက်မီဖို့ ခက်ခဲပါတယ်။ လိုက်မီဖို့ ဆယ်နှစ်လောက် ကြိုးစားရမယ်။ အီကီတီကီပဲ ဖြစ်ဖြစ် အခြားဘယ်သူပဲ ဖြစ်ဖြစ်ပါ။ ကျော်ဖြတ်ဖို့ (ဆာလက်ရဲ့စံချိန်) အရမ်းခက်ခဲတယ်။ သူက သမိုင်းတစ်လျှောက်အကောင်းဆုံးကစားသမားတွေထဲက တစ်ဦးပါ" လို့ The Anfield Wrap သို့ ပြောကြားသွားပါတယ်။

ကလော့ပ်ရဲ့လက်အောက်တွင် ဆာလက်ဟာ ချန်ပီယံလိဂ်ဖလား၊ ပရီးမီးယားလိဂ်ဖလား၊ ပြည်တွင်းရှုံးထွက်ဖလား ၃ လုံး၊ စူပါဖလားနှင့် ကလပ်ကမ္ဘာ့ဖလားတို့ ဆွတ်ခူးနိုင်ခဲ့ပါတယ်။

ဆာလက်ဟာ လီဗာပူးတိုက်စစ်တွင် ရောဘတ်တိုဖာမီနို၊ ဆာဒေယိုမာနေးတို့နှင့် အတွဲညီညီ ကစားကာ ယင်းဆုဖလားများအား ဆွတ်ခူးခဲ့တာလည်း ဖြစ်ပါတယ်။

၎င်းတို့သုံးဦးဟာ ငါးရာသီ အတူတကွကစားစဉ်အတွင်း ၃၃၈ ဂိုးအထိ သွင်းယူနိုင်ခဲ့ကြပါတယ်။

ဆာလက်က ၁၅၆ ဂိုးအထိ သွင်းခဲ့ကာ မာနေးထက် ၄၉ ဂိုးနှင့် ဖာမီနိုထက် ၈၁ ဂိုး ပိုသွင်းခဲ့ပါတယ်။

ဆက်လက်ပြီး ဂျာမန်လူမျိုးက "ဆာလက်က ကမ္ဘာ့အကောင်းဆုံးတိုက်စစ်သမား ၃ ဦးထဲက တစ်ဦးအဖြစ် ကာလရှည်ကြာ ရပ်တည်ခဲ့တာပါ။ ကိန်းဂဏန်းတွေက ဒါကို ပြသနေပါတယ်။ အခြားနှစ်ဦးထက် သာတယ်လို့ ပြောဖို့ ခက်တယ်။ သူတို့အားလုံးမှာ ကိုယ်စီ ကျွမ်းကျင်ပိုင်နိုင်မှုတွေ ရှိကြတယ်။ ဒါပေမယ့် မိုကတော့ အဆုံးသတ်အခိုက်အတန့်တွေအတွက် တစ်ခုပါ။ သူက အားလုံးသူထက် ပိုလုပ်ပြချင်တယ်။ဆာဒေယိုမှာ နှစ်ခုလုံး ရှိတယ်။ ဂိုးလည်း သွင်းချင်တယ်။ ဒါပေမယ့် အလယ်တန်းမှာလည်း ကစားနိုင်တယ်။ ဘော်ဘီ(ဖာမီနို)ကတော့ ဘာကိုမှ ဂရုမစိုက်တဲ့ ဉာဏ်ကြီးရှင်ပါ။ မိုကတော့ ဂိုးသွင်းဖို့ အမြဲတမ်း စဉ်းစားနေတဲ့ သူပါ။ ဒါတွေက လေ့ကျင့်လို့လည်း မရဘူး၊ သင်ယူလို့လည်း မရဘူး။ သူ့အတွင်းထဲမှာကို ရှိနေတာ။ သူက အဲဒီလိုလူ။ ဘဝရဲ့နောက်ဆုံးအချိန်အထိ ဒီလိုပဲ ရှိနေလိမ့်မယ်"လို့ ပြောကြားသွားပါတယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
*********************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ