နိုင်ငံတော်သမ္မတ ဦးမင်းအောင်လှိုင်က အာဇာနည်ခေါင်းဆောင်ကြီးများ၏ မိသားစုဝင်များကို နွေးထွေးဖော်ရွေစွာ တွေ့ဆုံနှုတ်ဆက်

နိုင်ငံတော်သမ္မတ ဦးမင်းအောင်လှိုင်သည် ယနေ့ ဇူလိုင် ၁၉ ရက်တွင်ကျရောက်သည့် (၇၉)နှစ်မြောက် အာဇာနည်နေ့အခမ်းအနားသို့တက်ရောက်လာကြသည့် ဗိုလ်ချုပ်အောင်ဆန်း၏ မိသားစုဝင်များ၊ သခင်မြ၊ ဒီးဒုတ်ဦးဘချို၊ ဦးဘဝင်း၊ မန်းဘခိုင်တို့၏ မိသားစုဝင်များကို တွေ့ဆုံနှုတ်ဆက်ခဲ့သည်။

၇၉ နှစ်မြောက် အာဇာနည်နေ့အတွက် ဝမ်းနည်းကြောင်း ဂျာမနီ၊ ဩစတြေးလျ၊နော်ဝေး နိုင်ငံသံရုံးတို့ ထုတ်ပြန်

ယနေ့ဇူလိုင်(၁၉)ရက်တွင် ကျရောက်သည့် ၂၀၂၆ ခုနှစ် (၇၉)နှစ်မြောက် အာဇာနည်နေ့အတွက် ဝမ်းနည်းကြောင်း မြန်မာအခြေစိုက် ဂျာမနီ၊ ဩစတြေးလျ၊နော်ဝေး နိုင်ငံသံရုံးတို့မှ ယနေ့တွင် အသီးသီး ထုတ်ပြန်ထားသည်။
မြန်မာနိုင်ငံ၏ အနာဂတ်အတွက် ခေတ်အဆက်ဆက် ကြိုးပမ်းခဲ့ကြသူများအားလုံးကိုလည်း ဂုဏ်ပြုကြောင်းလည်း Royal Norwegian Embassy in Yangon က ထုတ်ပြန်ချက်တွင် ဖော်ပြထားသည်။
ထို့အတူ မြန်မာပြည်သူများနှင့်အတူ ကျဆုံးလေပြီးသော ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်များကို ကျွန်ုပ်တို အောက်မေ့ဂုဏ်ပြုအပ်ပါကြောင်း၊ အာဇာနည်ခေါင်းဆောင်များသည် မြန်မာနိုင်ငံ၏ လွတ်လပ်ရေးနှင့် ပိုမိုကောင်းမွန်သော အနာဂတ်အတွက် ကြိုးပမ်းရင်း အသက်ပေးလှူခဲ့ကြကြောင်းလည်း ဂျာမနီသံရုံးက ထုတ်ပြန်ထားသည်။
ယနေ့ကျရောက်သည့် ၇၉ နှစ်မြောက် အာဇာနည်နေ့တွင် ပိုမိုတောက်ပသည့် အနာဂတ်အတွက် အားထုတ်ကြိုးပမ်းရင်းကျဆုံးခဲ့သည့် ဗိုလ်ချုပ်အောင်းဆန်း နှင့် တကွ အာဇာနည် ပုဂ္ဂိုလ်များကို မြန်မာပြည်သူများနှင့် အတူ ဂါရဝပြုကြောင်းလည်း ဩစတြေးလျ သံရုံးက အသိပေးထုတ်ပြန်ထားသည်။

အာဆီယံ အမြဲတမ်းကိုယ်စားလှယ်များကော်မတီ (CPR) အစည်းအဝေး ကျင်းပ

အာဆီယံ အမြဲတမ်းကိုယ်စားလှယ်များကော်မတီ (CPR) ဟာ ဒီနှစ်အတွက် သူတို့ရဲ့ ၇ ကြိမ်မြောက် အစည်းအဝေးကို မနီလာမြို့မှာ ဇူလိုင် ၁၈ ရက်နေ့က ကျင်းပခဲ့ပါတယ်။ ဒါဟာ ၅၉ ကြိမ်မြောက် အာဆီယံ နိုင်ငံခြားရေးဝန်ကြီးများ အစည်းအဝေး (AMM) နဲ့ ဆက်စပ်အစည်းအဝေးတွေကို စတင်လိုက်တာပဲ ဖြစ်ပါတယ်။
​ဒီအစည်းအဝေးမှာ CPR အနေနဲ့ အာဆီယံအသိုက်အဝန်း တည်ဆောက်ရေး၊ အာဆီယံရဲ့ ပြင်ပဆက်ဆံရေးတွေနဲ့ ဝန်ကြီးအဆင့် အစည်းအဝေးတွေအတွက် ကြိုတင်ပြင်ဆင်မှုတွေ စတဲ့ အဓိကကိစ္စရပ်တွေနဲ့ ပတ်သက်ပြီး အမြင်ချင်းဖလှယ် ဆွေးနွေးခဲ့ကြပါတယ်။

စုစည်းညီညွတ်သည့်တိုင်းပြည်တစ်ခုဖြစ်ရန် အားလုံးညီညွတ်ဖို့လိုဟု နိုင်ငံတော်သမ္မတ ဦးမင်းအောင်လှိုင် ပြော

စုစည်းညီညွတ်မှုရှိသည့်တိုင်းပြည်တစ်ခုဖြစ်စေရေးနှင့်ပတ်သက်၍ နိုင်ငံတော်သမ္မတ ဦးမင်းအောင်လှိုင်က ယနေ့ ဇူလိုင် ၁၉ ရက်တွင်ကျရောက်သည့် (၇၉)နှစ်မြောက် အာဇာနည်နေ့အခမ်းအနားသို့တက်ရောက်ဂါရဝပြုပြီးနောက် မီဒီယာများအား အထက်ပါအတိုင်းပြောကြားခဲ့ခြင်းဖြစ်သည်။
ဗိုလ်ချုပ်အောင်ဆန်းဦးဆောင်သည့် အာဇာနည်ခေါင်းဆောင်ကြီးများအပါအဝင် နိုင်ငံ့ခေါင်းဆောင်ကြီးများသည် နိုင်ငံကိုမည်သို့မျှော်မှန်းပြီး နိုင်ငံတော်တည် ဆောက်ခဲ့ကြသလဲ၊ စည်းလုံးညီညွတ်သည့်တိုင်းပြည်တစ်ခုဖြစ်အောင် ဘယ်လိုတည်ဆောက်ခဲ့ကြသလဲဆိုသည်ကို မိမိတို့အနေဖြင့် အမြဲတမ်းလေ့လာပြီးတန်ဖိုးထားရန်လိုသည်ဟု ပြောကြားသည်။
"စုစည်းညီညွတ်တဲ့တိုင်းပြည်တစ်ခုဖြစ်ဖို့အတွက် အားလုံးကညီညွတ်ဖို့လိုတယ်။ ညီညွတ်ရုံနဲ့မရသေးဘူး။ တိုင်းပြည်အတွက်အလုပ်လုပ်ဖို့လိုတယ်။ စည်းကမ်းရှိဖို့လည်းလိုတယ်။ တိုင်းပြည်မှာစည်းကမ်းအရတော့ လိုအပ်ချက်ရှိနေတာအမှန်ပါဘဲ"ဟု နိုင်ငံတော်သမ္မတက ပြောသည်။
ထို့ကြောင့် မိမိတို့အနေဖြင့် စည်းကမ်းတကျ၊ ညီညီညွတ်ညွတ်နှင့်အလုပ်လုပ်ပါက စွမ်းအားရှိသမျှအလုပ်လုပ်ပါက တိုင်းပြည်မတိုးတက်စရာအကြောင်းမရှိဘဲ ကမ္ဘာနှင့်ရင်ပေါင်တန်းနိုင်သည့်နိုင်ငံ ဘယ်လိုနည်းနှင့်မျှမဖြစ်စရာမကြောင်းမရှိဘဲ မြန်မာနိုင်ငံသားအားလုံးခွန်အားရှိကြကာ ကိုယ့်ခွန်အားကိုအသုံးချနိုင်ရန်သာလိုသည်ဟု နိုင်ငံတော်သမ္မတက ပြောကြားခဲ့သည်။

ဆယ်ကျော်သက်လူငယ်များ အတွက် ဆေးလိပ်၊ ဆေးရွက်ကြီးသုံးစွဲမှု အန္တရာယ်အကြောင်းစကားဝိုင်းပြုလုပ်မည်

ကမ္ဘာ့ကျန်းမာရေးအဖွဲ့ (WHO) အနေဖြင့် ဆယ်ကျော်သက်လူငယ်များ အတွက် ဆေးလိပ်၊ ဆေးရွက်ကြီးသုံးစွဲမှု အန္တရာယ်အကြောင်းနှင့် ပတ်သက်ပြီး ဇူလိုင် (၂၄) ရက်နေ့တွင် စကားဝိုင်းဆွေးနွေးပွဲပြုလုပ်မည်ဖြစ်ကြောင်း WHO က ယနေ့တွင် အသိပေးထုတ်ပြန်ထားသည်။
ဆယ်ကျော်သက်လူငယ်များ၊ ၎င်းတို့၏ မိဘ၊ အုပ်ထိန်းသူများ၊ ဆရာ/ဆရာမများ၊ ဆယ်ကျော်သက် ကျန်းမာရေးစီမံကိန်းမန်နေဂျာများ၊ ဆေးလိပ်၊ ဆေးရွက်ကြီးသုံးစွဲမှု အန္တရာယ်အကြောင်း ပညာပေးသူများအပါအဝင် ကျန်းမာရေးစောင့်ရှောက်မှုပေးသူအားလုံးအတွက် ကျင်းပပေးခြင်းဖြစ်ကြောင်းလည်း အသိပေးထားသည်။
ကမ္ဘာ့ကျန်းမာရေးအဖွဲ့ (WHO) ၏ “ဆေးလိပ်နှင့် ဆေးရွက်ကြီးထုတ်ကုန်များ၊ နီကိုတင်းထုတ်ကုန်အသစ်များနှင့် ကွမ်းသီးသုံးစွဲမှုဆိုင်ရာ အယူအဆမှားများနှင့် သိကောင်းစရာများအကြောင်း စကားဝိုင်း” ကို မြန်မာဘာသာဖြင့် ကျင်းပမည်ဖြစ်ကြောင်း သိရသည်။
လာမည့် ဇူလိုင်(၂၄) ရက်နေ့ နေ့လည် ၂ နာရီမှ ၃နာရီခွဲ အချိန်ထိ မြန်မာဘာသာဖြင့် ကျင်းပသွားမည်ဖြစ်ပြီး WHO ၏ facebook လူမှုကွန်ယက်စာမျက်နှာတွင် စာရင်းပေးသွင်းရန် အသေးစိတ်အချက်အလက်များကို တင်ပေးထားကြောင်း သိရသည်။

နယ်စပ်အငြင်းပွားမှုဖြေရှင်းရန်ထိုင်းနှင့်ကမ္ဘောဒီးယားကို ရှီ တို-က်တွန်း

တရုတ်သမ္မတ ရှီကျင့်ဖျင်သည် ထိုင်းနှင့် ကမ္ဘောဒီးယားခေါင်းဆောင်များကို တစ်ရက်တည်းတွင် တွေ့ဆုံခဲ့ပြီးနောက် ၎င်းတို့၏ နယ်စပ်အငြင်းပွားမှုကို ဖြေရှင်းရန် နှစ်နိုင်ငံစလုံးကို တို-က်တွန်းခဲ့သည်။
ယမန်နှစ်က အငြင်းပွားမှုသည် ဆယ်စုနှစ်တစ်ခုကျော်အတွင်း အိမ်နီးချင်းနှစ်နိုင်ငံအကြား အ‌ေ-သအပျေ-ာက်အများဆုံး တို-က်ပွဲအဖြစ်သို့ အရှိန်မြင့်သွားခဲ့ရာ၌ စစ်သားနှင့် အရပ်သား ၁၀၀ ကျော် သေဆုံးကာ ရာနှင့်ချီ၍ ဒ-ဏ်ရာရရှိခဲ့သည်။
၂၀၂၅ ခုနှစ် ဒီဇင်ဘာလတွင် ရရှိခဲ့သော အပ-စ်အခတ်ရပ်စဲရေးသည် အများအားဖြင့် တည်တံ့နေသော်လည်း သဘောတူညီချက်ကို ချိုးဖေ-ာက်သည်ဟု နှစ်ဖက် အပြန်အလှန်စွပ်စွဲနေကြဆဲဖြစ်သည်။
သောကြာနေ့က ရှန်ဟိုင်းတွင် ကျင်းပသော ကမ္ဘာ့ AI ညီလာခံ၏ ပြင်ပတွင် ထိုင်းဝန်ကြီးချုပ် အနူတင် ချန်ဗီရာကူလ်နှင့် တွေ့ဆုံရာ၌ မစ္စတာရှီက နှစ်နိုင်ငံစလုံး၏ ရေရှည် ဘုံအကျိုးစီးပွားအလို့ငှာ ပဋိပက္ခကို ဖြေရှင်းရမည်ဖြစ်ကြောင်း ပြောကြားခဲ့သည်။
နှစ်ဖက်ဆွေးနွေးမှုများလုပ်ရန် ၎င်းက တောင်းဆိုခဲ့ပြီး တရုတ်နိုင်ငံသည် အပြုသဘောဆောင်သော အခန်းကဏ္ဍမှ ပါဝင်မည်ဟု ကတိပြုခဲ့ကြောင်း နိုင်ငံပိုင် ဆင်ဟွာသတင်းဌာနက သတင်းဖော်ပြခဲ့သည်။
ထို့အတူ ကမ္ဘောဒီးယားဝန်ကြီးချုပ် ဟွန်မာနက်နှင့် သီးခြားတွေ့ဆုံခဲ့မှုတွင်လည်း ၎င်းက အလားတူ သတင်းစကားကို ပြောကြားခဲ့ပြီး တရုတ်နိုင်ငံသည် ညှိနှိုင်းဖြေရှင်းချက်ကို ထောက်ခံကြောင်း ထပ်လေ-ာင်းပြောကြားခဲ့သည်။
မစ္စတာရှီ၏ တောင်းဆိုချက်ကို မစ္စတာ အနူတင်က တုန့်ပြန်ခဲ့ရာ၌ ထိုင်းနိုင်ငံသည် ပဋိပက္ခကို ငြိမ်းချမ်းစွာဖြေရှင်းရန် ကတိကဝတ်ပြုထားဆဲဖြစ်ကြောင်းနှင့် တရုတ်နိုင်ငံ၏ မျှတပြီး ဘက်မလိုက်သော ရပ်တည်ချက်ကို ကျေးဇူးတင်ကြောင်း ပြောကြားခဲ့သည်ဟု ဆင်ဟွာက ဖော်ပြခဲ့သည်။
တစ်ချိန်တည်းမှာပင် ဆွေးနွေးညှိနှိုင်းမှုကို အားပေးအားမြှောက်ပြုခြင်းနှင့် ငြိမ်းချမ်းစွာဖြေရှင်းရန် ကူညီပေးသည့်အတွက် တရုတ်နိုင်ငံကို ကျေးဇူးတင်ကြောင်း မစ္စတာ ဟွန်မာနက်က ပြောကြားခဲ့သည်။ ကမ္ဘောဒီးယားနိုင်ငံသည် ဆွေးနွေးမှုနှင့် တင်းမာမှုလျှော့ချရေးတွင် ဆက်လက်ကတိကဝတ်ပြုထားမည်ဖြစ်ကြောင်းကိုလည်း ၎င်းက ပြောကြားခဲ့သည်။

အာဆီယံ နိုင်ငံခြားရေးဝန်ကြီးများ အစည်းအဝေး တက်ရောက်ဖို့ ရူဘီယို မနီလာကို သွားရောက်မယ်

​အမေရိကန် နိုင်ငံခြားရေးဝန်ကြီး မာကို ရူဘီယိုဟာ အရှေ့တောင်အာရှနိုင်ငံများအသင်း(အာဆီယံ) ရဲ့ နိုင်ငံခြားရေးဝန်ကြီးတွေနဲ့ အစည်းအဝေးတွေ လုပ်ဖို့၊ ပြီးတော့ အင်ဒို-ပစိဖိတ်ဒေသတွင်းက အဆင့်မြင့်အရာရှိတွေနဲ့ ဆွေးနွေးဖို့အတွက် ဒီအပတ်ထဲမှာ မနီလာကို ရောက်ရှိမှာ ဖြစ်တယ်လို့ အမေရိကန် နိုင်ငံခြားရေးဝန်ကြီးဌာနက သောကြာနေ့မှာ ပြောကြားခဲ့ပါတယ်။
​နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တွမ်မီ ပီဂေါ့တ် ရဲ့ ထုတ်ပြန်ချက်အရ ရူဘီယိုဟာ ဇူလိုင် ၁၉ ရက်ကနေ ၂၃ ရက်အထိ ကြာမြင့်မယ့် ခရီးစဉ်အတွင်း အာဆီယံရဲ့ ဝန်ကြီးအဆင့် ဆွေးနွေးပွဲအပြီး ညီလာခံ (Asean Post-Ministerial Conference)၊ အရှေ့အာရှထိပ်သီး နိုင်ငံခြားရေးဝန်ကြီးများ အစည်းအဝေးနဲ့ အာဆီယံဒေသတွင်း ဖိုရမ် နိုင်ငံခြားရေးဝန်ကြီးများ အစည်းအဝေးတွေကို တက်ရောက်မှာ ဖြစ်ပါတယ်။
မာကို ရူဘီယိုဟာ ပြီးခဲ့တဲ့နှစ် ကွာလာလမ်ပူမှာ လုပ်ခဲ့တဲ့ အစည်းအဝေးကိုလည်း တက်ရောက်ခဲ့ဖူးပါတယ်။
​ရူဘီယို တွေ့ဆုံဆွေးနွေးဖို့ စီစဉ်ထားတဲ့ အင်ဒို-ပစိဖိတ် အရာရှိတွေဟာ ဘယ်သူတွေလဲဆိုတာကိုတော့ နိုင်ငံခြားရေးဝန်ကြီးဌာနက ထုတ်ဖော်ပြောကြားခြင်း မရှိသလို၊ နှစ်ဦးနှစ်ဖက် တွေ့ဆုံမှုတွေရဲ့ အသေးစိတ်အချက်အလက်တွေကိုလည်း မပြောပြခဲ့ပါဘူး။
​ဒါပေမဲ့ ဒီခရီးစဉ်ဟာ အမေရိကန်-အာဆီယံ ပူးပေါင်းဆောင်ရွက်မှုရဲ့ ရလဒ်တွေကို ပေါ်လွင်စေမှာ ဖြစ်ပြီး ဖိလစ်ပိုင်နိုင်ငံနဲ့ ဝါရှင်တန်တို့ကြားက ဘက်စုံမိတ်ဖက်ဆက်ဆံရေးကို ပိုပြီး ခိုင်မာအောင် လုပ်ဆောင်သွားမှာ ဖြစ်တယ်လို့ ဆိုပါတယ်။
​ဒါ့အပြင် ဒီခရီးစဉ်ဟာ “လွတ်လပ်ပြီး ပွင့်လင်းတဲ့ အင်ဒို-ပစိဖိတ်ဒေသ” ဖြစ်စေရမယ်ဆိုတဲ့ အမေရိကန်ရဲ့ ကတိကဝတ်ကို ထင်ဟပ်စေတယ်လို့လည်း နိုင်ငံခြားရေးဝန်ကြီးဌာနက ဆိုပါတယ်။

ယူရီးယားနှင့် ကွန်ပေါင်းဓာတ်မြေဩဇာများ ဒေသအလိုက် လွတ်လပ်စွာ ဝယ်ယူနိုင်ရန် စီစဉ်ထား

မြန်မာနိုင်ငံ မြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်း (MFSPEA)က တောင်သူများအနေဖြင့် မိုးစပါး၊ ဝါနှင့် မိုးသီးနှံများ စိုက်ပျိုးရာတွင် အဓိကအသုံးပြုလျက်ရှိသော ယူရီးယားနှင့် ကွန်ပေါင်းဓာတ်မြေဩဇာများကို ဒေသအလိုက် လုံလောက်စွာ၊ လွတ်လပ်စွာ ဝယ်ယူနိုင်ရေးအတွက် စီစဉ်ပေးထားကြောင်း အသိပေးထားသည်။
MFSPEA ၏ ထုတ်ပြန်ချက်အရ တောင်သူများအတွက် လိုအပ်သည့် ဓာတ်မြေဩဇာများကို ဒေသအသီးသီးတွင် လုံလောက်စွာ ရရှိနိုင်စေရန် စီစဉ်ထားပြီး ဝယ်ယူလိုသူများအနေဖြင့် သက်ဆိုင်ရာဒေသများ၌ အဆင်ပြေစွာ ဝယ်ယူနိုင်မည်ဖြစ်ကြောင်း သိရသည်။
ထို့ပြင် ယူရီးယားနှင့် ကွန်ပေါင်းဓာတ်မြေဩဇာ ဝယ်ယူရေးနှင့် ပတ်သက်၍ အသေးစိတ် သိရှိလိုသော တောင်သူများအနေဖြင့် ဖုန်းနံပါတ် ၀၉-၆၆၅၄၀၇၈၉၀ သို့ ဆက်သွယ်၍ စုံစမ်းမေးမြန်းနိုင်ကြောင်း MFSPEA က အသိပေးထားသည်။

အာဇာနည်ခေါင်းဆောင်ကြီးများအားရည်စူး၍ ရန်ကုန်မြို့တော်ခန်းမ၌ ဆွမ်းဆက်ကပ်ပြီး အလှူဒါနပြုအမျှ ပေးဝေ

ယနေ့ ဇူလိုင် ၁၉ ရက်တွင်ကျရောက်သည့် (၇၉)နှစ်မြောက် အာဇာနည်နေ့တွင် အာဇာနည်ခေါင်းဆောင်ကြီးများအားရည်စူး၍ ရန်ကုန်မြို့တော်ခန်းမ၌ ဆွမ်းဆက်ကပ်ပြီး အလှူဒါနပြုအမျှပေးဝေခဲ့ကြောင်း သိရသည်။
နိုင်ငံတော်သံဃမဟာနာယကအဖွဲ့ ဒု-ဥက္ကဋ္ဌဆရာတော်အမှူးပြုသည့် ဆရာတော်၊ သံဃာတော်များကြွရောက်တော်မူကာ (၇၉)နှစ်မြောက် အာဇာနည်နေ့အခမ်းအနားကျင်းပရေးဗဟိုကော်မတီဥက္ကဋ္ဌ ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးဦးမောင်မြင့်၊ ဗဟိုကော်မတီ ဒု-ဥက္ကဋ္ဌ ရန်ကုန်တိုင်းဝန်ကြီးချုပ်ဦးအောင်နိုင်သူ၊ ရန်ကုန်တိုင်းလွှတ်တော်ဥက္ကဋ္ဌဦးဌေးအောင်တို့တက်ရောက်ကြည်ညိုပူဇော်ကာ နိုင်ငံတော်သံဃမဟာနာယကအဖွဲ့ ဒု-ဥက္ကဋ္ဌဆရာတော်ထံမှ ငါးပါးသီလခံယူဆောက်တည်ခဲ့ကြကြောင်း သိရသည်။
ထို့နောက် ဆရာတော်၊ သံဃာတော်များက မေတ္တာသုတ်ပရိတ်တရားတော်များကို ရွတ်ပွားသရဇ္ဈာယ်တော်မူခဲ့ကြပြီးလှူဖွယ်ဝတ္ထုပစ္စည်းများကိုဆက်ကပ်လှူဒါန်း၍ အနုမောဒနာတရားနာယူပြီး ကျဆုံးလေပြီးသော ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများအားရည်စူး၍ လှူဒါန်းမှုအစုစုအတွက်ရေစက်သွန်းချအမျှပေးဝေခဲ့ကြောင်း သိရသည်။

ပွင့်ဖြူမြို့နယ်တွင် စားအုန်းဆီကို သတ်မှတ်ရည်ညွှန်းဈေးထက်မြှင့်တင်ရောင်းချမှုမရှိစေရေးကွင်းဆင်းစစ်ဆေး

မကွေးတိုင်း၊ ပွင့်ဖြူမြို့နယ်ရှိ စားအုန်းဆီအရောင်းဆိုင်များ၌ စားအုန်းဆီများကို သတ်မှတ်ရည်ညွှန်းစျေးအတိုင်းရောင်းချမှုရှိ/မရှိ၊ စျေးနှုန်းမြှင့်တင်ရောင်းချမှုရှိ/မရှိတို့ကို တာဝန်ရှိသူများက ယနေ့ ဇူလိုင် ၁၉ ရက်တွင် ကွင်းဆင်းစစ်ဆေးခဲ့ကြကြောင်း သိရသည်။
မြို့နယ်အတွင်းရှိ စည်ပင်သာယာဈေးများနှင့် မြို့ပေါ်ရပ်ကွက်များရှိ စားအုန်းဆီအရောင်းဆိုင်များအားစစ်ဘဆေးခဲ့ကြပြီးနောက် လုပ်ငန်းရှင်များကိုတွေ့ဆုံ၍ စားအုန်းဆီများကိုရောင်းချရာ၌ သတ်မှတ်ရည်ညွှန်း ဈေးနှုန်းများအတိုင်း စနစ်တကျရောင်းချရန်၊ ဈေးနှုန်းမြှင့်တင်ရောင်းချခြင်းမပြုရန်အသိပညာပေး ရှင်းလင်းပြောကြားခဲ့ကြကြောင်း သိရသည်။