မြန်မာသမ္မတ ဦးမင်းအောင်လှိုင်၏ တရုတ်နိုင်ငံခရီးစဉ် အကျဉ်းချုပ်
မြန်မာသမ္မတ ဦးမင်းအောင်လှိုင်သည် ဇွန်လ ၁၅ ရက်မှစတင်၍ တရုတ်နိုင်ငံသို့ ၅ ရက်တာခရီးစဉ် သွားရောက်ခဲ့ပြီး၊ ဘေဂျင်းတွင် တရုတ်ခေါင်းဆောင်များနှင့် တွေ့ဆုံခဲ့သလို ရှန်ဟိုင်းနှင့် ဟန်ကျိုးမြို့များသို့လည်း ဆက်လက်သွားရောက်လည်ပတ်ခဲ့သည်။ ၎င်းသည် သမ္မတအဖြစ် ရွေးကောက်ခံရပြီးနောက် ပထမဆုံးအကြိမ် တရုတ်နိုင်ငံသို့ သွားရောက်ခဲ့ခြင်းဖြစ်သည်။
ဤခရီးစဉ်အတွင်း နှစ်နိုင်ငံသည် အရေးကြီးသော သဘောတူညီချက်များစွာ ရရှိခဲ့ပြီး မြန်မာ-တရုတ် နှစ်နိုင်ငံလူထုကြား "ပေါက်ဖော်" ချစ်ကြည်ရင်းနှီးမှုကို ပိုမိုခိုင်မာစေခဲ့သည်။ အဓိကရရှိခဲ့သော အကျိုးရလဒ်များမှာ -
၁။ နိုင်ငံရေး ယုံကြည်မှု ပိုမိုခိုင်မာလာခြင်း - နှစ်နိုင်ငံခေါင်းဆောင်များက တရုတ်-မြန်မာ ကံကြမ္မာတူ လူ့အဖွဲ့အစည်းကို အရှိန်အဟုန်မြှင့် တည်ဆောက်ရန် သဘောတူခဲ့ကြသည်။ မြန်မာဘက်က တရုတ်တစ်နိုင်ငံတည်းမူဝါဒကို ထပ်မံအတည်ပြုခဲ့ပြီး၊ တရုတ်ဘက်ကလည်း မြန်မာနိုင်ငံ၏ အချုပ်အခြာအာဏာနှင့် ပြည်တွင်းငြိမ်းချမ်းရေးကို ထောက်ခံအားပေးခဲ့သည်။
၂။ စီးပွားရေးနှင့် ကုန်သွယ်မှု တိုးတက်လာခြင်း - နှစ်ဘက်စလုံးက ကျောက်ဖြူအထူးစီးပွားရေးဇုန်နှင့် မြန်မာ-တရုတ် မီးရထားလမ်းကဲ့သို့သော အဓိကစီမံကိန်းများကို ဆက်လက်အကောင်အထည်ဖော်ရန် သဘောတူခဲ့ကြသည်။ ထို့အပြင် နှစ်နိုင်ငံကြား ကုန်သွယ်မှုအတွက် ယွမ်ငွေ-ကျပ်ငွေ တိုက်ရိုက်ငွေလွှဲစနစ်ကို စတင်ဆွေးနွေးခဲ့သလို၊ မြန်မာနိုင်ငံမှ စိုက်ကုန်နှင့် ရေထွက်ကုန်များ တရုတ်ဈေးကွက်သို့ ပိုမိုလွယ်ကူစွာ ဝင်ရောက်နိုင်ရန်လည်း လုပ်ဆောင်ပေးခဲ့သည်။
၃။ ပြည်သူ့ဘဝ မြှင့်တင်ရေး - တရုတ်နိုင်ငံက မြန်မာနိုင်ငံတွင် ဖြစ်ပွားခဲ့သော ငလျင်ဘေးအတွက် ကူညီထောက်ပံ့မှုများ ပြုလုပ်ရန် သဘောတူခဲ့သလို၊ ပြည်သူများ၏ လိုအပ်ချက်ကို ဖြည့်ဆည်းပေးမည့် ကျန်းမာရေး၊ ပညာရေးနှင့် နေအိမ်စွမ်းအင်ကဲ့သို့သော အသေးစားဖွံ့ဖြိုးရေးစီမံကိန်း (Small but Beautiful Projects) များကိုလည်း ဆက်လက်လုပ်ဆောင်သွားမည်ဖြစ်သည်။
၄။ နယ်စပ်လုံခြုံရေး ပူးပေါင်းဆောင်ရွက်ခြင်း - နှစ်နိုင်ငံလုံး၏ လူထုအကျိုးစီးပွားကို ထိခိုက်စေသော နယ်စပ်ဖြတ်ကျော် ရာဇဝတ်မှုများ၊ အထူးသဖြင့် အွန်လိုင်းလိမ်လည်မှု (Cyber Fraud) များကို နှိမ်နင်းရာတွင် ပူးပေါင်းဆောင်ရွက်မှု ပိုမိုအားကောင်းလာစေရန် သဘောတူခဲ့ကြသည်။
စုစုပေါင်းအားဖြင့် ဤခရီးစဉ်သည် မြန်မာ-တရုတ် နှစ်နိုင်ငံဆက်ဆံရေးကို ပိုမိုနက်ရှိုင်းစေခဲ့ပြီး၊ နှစ်နိုင်ငံပြည်သူများ၏ အကျိုးစီးပွားကို အဓိကထား ဆောင်ရွက်သွားမည့် ခရီးစဉ်တစ်ခု ဖြစ်ခဲ့ပါသည်။

ငါ ပြန်လာပြီ" ဝေဖန်မှုများအပေါ် အဖြေပေးလာတဲ့ စံချိန်သစ်ရှင် ခရစ္စတီယာနိုရော်နယ်ဒို
=====================

"ငါ ပြန်လာပြီ။ ငါ ပြန်လာပြီ"
ဥဇဘက်ကစ္စတန်ကို ၅-၀ ဂိုးဖြင့် အနိုင်ရတဲ့ပွဲမှာ ၂ ဂိုးသွင်းပြီးတဲ့နောက် ခရစ္စတီယာနိုရော်နယ်ဒိုဟာ ရုပ်သံကင်မရာရှေ့မှာ ကြွေးကြော်ကာ ၂၀၂၆ ကမ္ဘာ့ဖလားပြိုင်ပွဲအတွင်း သူက ပေါ်တူဂီရဲ့ ပြဿနာကောင်လို့ ဝေဖန်ပြောဆိုနေကြသူများကို တုံ့ပြန်လာပါတယ်။
အသက် ၄၁ နှစ်ရှိ ပေါ်တူဂီအသင်းခေါင်းဆောင်ဟာ ကမ္ဘာ့ဖလားခြောက်ကြိမ် ဂိုးသွင်းနိုင်တဲ့ ပထမဆုံးကစားသမားအဖြစ် သမိုင်းမှတ်တိုင်ကြီး စိုက်ထူနိုင်ခဲ့မှုကြောင့် ရရှိလာတဲ့ ပျော်ရွှင်မှုကို မထိန်းထားနိုင်ဘဲ အကြီးအကျယ် ပျော်ရွှင်ခဲ့ပါတယ်။
ခရစ္စတီယာနိုရော်နယ်ဒိုဟာ သူ့ကို အသုံးမဝင်တော့တဲ့ ကစားသမားတစ်ဦးအဖြစ် ဝေဖန်ခဲ့ကြသူများအား အပြီးပြည့်စုံဆုံး တုံ့ပြန်လာတာလည်း ဖြစ်ပါတယ်။
ရော်နယ်ဒိုဟာ ဒီမိုကရက်တစ်ကွန်ဂိုနဲ့ ကမ္ဘာ့ဖလားအုပ်စုအဖွင့်ပွဲမှာတုန်းက ခြေစွမ်းပြနိုင်ခဲ့ခြင်း မရှိမှုနှင့်အတူ အားလုံးရဲ့ ဝေဖန်ခြင်းခံခဲ့ရပါတယ်။ အထူးသဖြင့် အခြားစူပါစတားတွေဖြစ်ကြတဲ့ အာဂျင်တီးနားရဲ့လီယွန်နယ်မက်ဆီ၊ အင်္ဂလန်ရဲ့ ဟယ်ီရကိန်း၊ ဘရာဇီးရဲ့ ဗီနီရှပ်စ်ဂျူနီယာ၊ နော်ဝေရဲ့ အာလင်းဟာလန်း၊ ပြင်သစ်ရဲ့ ကိုင်လီယန်ဘက်ပေးတို့ ခြေစွမ်းပြနေချိန်မှာ ပေါ်တူဂီအတွက် ဘာမှ လုပ်မပြနိုင်ခဲ့မှုနဲ့အတူ ခရစ္စတီယာနိုရော်နယ်ဒိုဟာ ဝေဖန်ရေးသမားတွေရဲ့ သားကောင်ဖြစ်ခဲ့ရပါတယ်။
ဒါပေမဲ့ ခရစ္စတီယာနိုရော်နယ်ဒိုဟာ ဥဇဘက်ကစ္စတန်နဲ့ပွဲမှာ ၂ ဂိုးသွင်းပြီး ကမ္ဘာ့ဖလားပါတီထဲမှာ ပါဝင်လာပါတယ်။
သူဟာ ပွဲအစ ၆ မိနစ်မှာပင် ဂျာအိုကန်စီလိုရဲ့ ဖြတ်တင်ဘောကနေ လှပစွာ ပိတ်သွင်းပြီး ကမ္ဘာ့ဖလားစံချိန်ဂိုးကို သွင်းခဲ့ပါတယ်။ ယင်းနောက် သူဟာ ဘရူနိုဖာနန်ဒက်စ်ရဲ့ ပြီးပြည့်စုံတဲ့ ဖန်တီးမှုကနေ ပြီးပြည့်စုံတဲ့ အဆုံးသတ်မှုဖြင့် ဒုတိယဂိုးသွင်းခဲ့ပါတယ်။
ဒီပွဲမှာ ခရစ္စတီယာနိုရော်နယ်ဒိုဟာ ခူဆာနော့ဗ်ရဲ့ ဂိုးလိုင်းရှင်းထုတ်မှုကြောင့် ဟက်ထရစ် မရခဲ့တာပါ။
ပွဲအပြီး 'ငါ ပြန်လာပြီ' ကြွေးကြော်မှုနှင့်ပတ်သက်ပြီး မေးမြန်းခံလာရချိန်မှာတော့ Ballon d'Or ၅ ကြိမ်ပိုင်ရှင်က "၂၃ နှစ်တိုင်တိုင် ဒါမျိုး လုပ်ပြတာကို သူတို့(ဝေဖန်သူတွေ) မမေ့စေဖို့ပါ။ ကျွန်တော် အရမ်းပျော်တယ်။ ဒါပေမဲ့ အရေးအကြီးဆုံးက အသင်းလိုက်အလုပ်လုပ်မှုပါ။ ပြီးတော့ ကျွန်တော်တို့ ယုံကြည်မှု ရရှိစေတာပါ။ ပုဂ္ဂိုလ်ရေးစံချိန်က ရခဲ့တာ ကောင်းပါတယ်။ ဒါပေမဲ့ ကျွန်တော့်ရည်မှန်းချက်က အသင်းကို ရည်မှန်းချက်တွေ ဖြစ်လာဖို့ ကူညီနိုင်ရေးပါ။ ဒီအပတ်အတွင်း ကျွန်တော်တို့ အခက်အခဲတွေ ဖြတ်သန်းခဲ့ရတယ်။ ဒါပေမဲ့ အသင်းဟာ ကောင်းကောင်းအလုပ်လုပ်ခဲ့တယ်။ အများကြီး တိုးတက်လာတယ်။ ခက်ခဲတဲ့ ရက်သတ္တပတ်ပါ။ ဘောလုံးတစ်လုံးမျှ မကန်ရဘဲ မှောင်မိုက်တဲ့ ရက်သတ္တပတ်ဖြစ်ခဲ့တယ်။ ဒါပေမဲ့ အရင်တုန်းကလိုပဲ ကိုယ့်အလုပ်အပေါ် ယုံကြည်မှုနဲ့ ဒါကို ရင်ဆိုင်နိုင်ခဲ့တယ်။ အရမ်းခက်ခဲခဲ့တယ်။ ဒါပေမဲ့ ကျွန်တော်တို့ ပြန်လာပါပြီ"လို့ ပြောကြားသွားပါတယ်။
ပေါ်တူဂီဟာ တနင်္ဂနွေနေ့မှာ အုပ်စုဗိုလ်အဆုံးအဖြတ်ပွဲအဖြစ် ကိုလံဘီယာနှင့် ရင်ဆိုင်ကစားရပါမယ်။
ခရစ္စတီယာနိုရော်နယ်ဒိုဟာ ဥဇဘက်ကစ္စတန်နှင့်ပွဲတွင် ၂ ဂိုးသွင်းနိုင်ပြီးနောက် ကမ္ဘာ့ဖလား ၆ ကြိမ် ဂိုးသွင်းနိုင်တဲ့ ပထမဆုံးကစားသမားအဖြစ် သမိုင်းမှတ်တိုင်စိုက်ထူလာသလို ကမ္ဘာ့ဖလားသွင်းဂိုး ၁၀ ဂိုးအထိ ရှိလာပါတယ်။
ဒါ့အပြင် ခရစ္စတီယာနိုရော်နယ်ဒိုဟာ ကမ္ဘာ့ဖလားရဲ့ ဒုတိယအသက်အကြီးဆုံးဂိုးသွင်းရှင်အဖြစ်လည်း သမိုင်မှတ်တိုင်စိုက်ထူလာပါသေးတယ်။ ကမ္ဘာ့ဖလားတွင် အသက်အကြီးဆုံးဂိုးသွင်းသူအဖြစ် ကင်မရွန်းရဲ့ရိုဂျာမေလာက ၁၉၉၄ ကမ္ဘာ့ဖလားတုန်းက အသက် ၄၂ နှစ်ဖြင့် မှတ်တိုင်စိုက်ထူထားပါတယ်။

အစ္စဝှစ်ချ်နည်းပြသစ်အဖြစ် ဂယ်ရီအိုနေးလ် ခန့်အပ်ခြင်းခံရ
====================

အစ္စဝှစ်ချ်တောင်းဟာ ဝုဗ်နှင့်ဘုန်းမောက်နည်းပြဟောင်းဂယ်ရီအိုနေးလ်ကို နည်းပြသစ်အဖြစ် ခန့်အပ်လာပါတယ်။
အသက် ၄၃ နှစ်ရှိ နည်းပြဟာ ယခုလအစောပိုင်းတုန်းက နည်းပြရာထူးမှ နုတ်ထွက်လာခဲ့တဲ့ ကီရန်မက်ကန်နာနေရာမှာ အစားထိုးခန့်အပ်ခြင်းခံလာရတာလည်း ဖြစ်ပါတယ်။
အိုနေးလ်ဟာ ပြီးခဲ့တဲ့ ဇန်နဝါရီလတုန်းက ပြင်သစ်လီဂူး ၁ ကလပ် စထရာဘော့အား ကိုင်တွယ်လာခဲ့ပေမဲ့လည်း ထွက်ခွာကာ အစ္စဝှစ်ချ်နှင့် သုံးနှစ်စာချုပ်ချုပ်ဆိုလာခဲ့ပါတယ်။
သူဟာ ပြီးခဲ့ရာသီတုန်းက စထရာဘော့ကို လီဂူး ၁ တွင် အဆင့် ၈ နှင့် ကွန်ဖရင့်လိဂ်တွင် ဆီမီးဖိုင်နယ်သို့အထိ ပို့ဆောင်ပေးနိုင်ခဲ့သူလည်း ဖြစ်ပါတယ်။
အစောပိုင်းတုန်းက အစ္စဝှစ်ချ်နည်းပြရာထူးအတွက် ယူနိုက်တက်နည်းပြဟောင်းအိုလီဂန်းနားဆိုးလ်ရှားလည်း ရေပန်းစားခဲ့ပါသေးတယ်။
အိုနေးလ်ဟာ လက်ရှိ အစ္စဝှစ်ချ်အမှုဆောင်ချုပ်မတ်အက်ရှ်တွန်နှင့် ဘရစ္စတိုးစီးတီးတွင် ကစားသမားဘဝတုန်းက အတူကစားခဲ့သူ ဖြစ်ပါတယ်။
အစ္စဝှစ်ချ်ဟာ နည်းပြအိုနေးလ်အား လာမဲ့ရာသီ ပရီးမီးယားလိဂ်တွင် ရှင်သန်ရေး နွေရာသီ အပြောင်းအရွှေ့ဈေးကွက်တွင် ကစားသမားဝယ်ယူအားဖြည့်ရေး ထောက်ပံ့ပေးသွားပါမယ်။

ပရိသတ် ၁၀၀၀၀၀ ဆန့် ကွင်းသစ်အတွက် လိုအပ်တဲ့ မြေနေရာ ဝယ်ယူလာနိုင်ပြီဖြစ်တဲ့ ယူနိုက်တက်
===========================

ယူနိုက်တက်ဟာ လက်ရှိ အသုံးပြုနေတဲ့ အိုးထရက်ဖို့ဒ်ကွင်းအနီး ပရိသတ် ၁၀၀၀၀၀ ဆန့် ကွင်းသစ် တည်ဆောက်ရေးအတွက် လိုအပ်တဲ့ မြေနေရာအား ဝယ်ယူလာနိုင်ပြီ ဖြစ်ပါတယ်။
ယူနိုက်တက်ပူးတွဲပိုင်ရှင်ဆာဂျမ်ရက်ကလစ်ဖ်ဟာ ၂၀၂၅ ခုနှစ် မတ်လတုန်းက ကွင်းသစ်စီမံကိန်းကို ကြေညာခဲ့တာ ဖြစ်ပြီး ယခုအခါ လိုအပ်တဲ့ မြေနေရာအား ဝယ်ယူလာနိုင်မှုနှင့်အတူ ကွင်းသစ်တည်ဆောက်ရေး ကြီးမားတဲ့ ခြေလှမ်းသစ်လှမ်းလာနိုင်ပြီလည်း ဖြစ်ပါတယ်။
ယူနိုက်တက်ဟာ အိုးထရက်ဖို့ဒ်ကွင်းနှင့် မီတာ ၃၅၀ ခန့် အကွာအဝေးရှိ စထရက်ဖို့ဒ်အနောက် ကားပါကင်အနီး ဝတ်ဖ်ဆိုက်ဝေး၊ ယူရိုပါဝေး၊ ဂျွန်ဂေးလ်ဘတ်ဝေးတို့အကြား တြိဂံပုံစံရှိ မြေ ၂၅ ဧကအား ဝယ်ယူလာနိုင်တာလည်း ဖြစ်ပါတယ်။
တဖက်တွင် ယူနိုက်တက်ဟာ ကွင်းသစ်စီမံကိန်းအတွက် လိုအပ်တဲ့ အခြားမြေနေရာများကိုလည်း ဝယ်ယူရေး ဆက်လက် ဆွေးနွေးမှုများ ပြုလုပ်နေပါတယ်။
ယင်းဧရိယာအတွင်းတွင် အိုးထရက်ဖို့ဒ်ကွင်းသစ်စီမံကိန်းအပြင် စီးပွားရေးဇုံ၊ လမ်းပန်းဆက်သွယ်ရေးဇုံတို့လည်း ပါဝင်ပါသေးတယ်။
ယူနိုက်တက်ဟာ အိုးထရက်ဖို့ဒ်ကွင်းသစ်ကို ပေါင် ၂ ဘီလီယံဝန်းကျင်အကုန်အကျခံတည်ဆောက်လာမှာ ဖြစ်ပြီး ၂၀၃၀ ခုနှစ်အမီ အပြီးသတ်ရေး ရည်မှန်းထားပါတယ်။
ဒါပေမဲ့ ယင်းစီမံကိန်းမှာ ယင်းကာလတွင် ဖြစ်မြောက်လာရေး အတည်မပြုနိုင်သေးပေမဲ့ ယူနိုက်တက်ဟာ ၂၀၃၅ အမျိုးသမီး ကမ္ဘာ့ဖလားပြိုင်ပွဲအမီ ကွင်းသစ်အဆင်သင့် ဖြစ်နေမယ်လို့ အပြည့်အဝ ယုံကြည်နေပါတယ်။
ယူနိုက်တက်ဟာ အိုးထရက်ဖို့ဒ်ကွင်းကို ၁၁၆ နှစ်ကြာ အသုံးပြုလာခဲ့တာ ဖြစ်ပြီး ကွင်းမှာ ပြီးခဲ့တဲ့နှစ်များအတွင်းတွင် ခေါင်မိုးမိုးယိုခြင်းအပါအဝင် ပြဿနာများစွာ ရှိလာသလို အခြားခေတ်မီကွင်းများနှင့် နှိုင်းယှဉ်ပါက ခေတ်ဟောင်းကွင်းတစ်ကွင်းသို့ ဖြစ်နေပါတယ်။

ကမ္ဘာ့ဖလားပြိုင်ပွဲတွင် ပရိသတ်များ မျက်စိကျအောင် ဝတ်ဆင်လာတဲ့ အပြာမင်းသမီး
==================

ကမ္ဘာ့ဖလားပရိသတ်များဟာ ရင်ဘတ်တွင် လည်စည်းသာ စည်းပြီး ပွဲလာကြည့်တဲ့ အပြာမင်းသမီးတစ်ဦးကြောင့် ကမ္ဘာ့ဖလားပြိုင်ပွဲအပေါ် အာရံမစိုက်နိုင်အောင် ဖြစ်ခဲ့ကြရပါတယ်။
ရိုက်စ်ဆာဘယ်လ်လီနီဟာ မိုင်ယာမီသို့ လာရောက်ကာ ဥရုဂွေးနှင့် ကိတ်ဗာဒီတို့ ၂ ဂိုးစီသရေကျတဲ့ပွဲစဉ်အား လာရောက်ကြည့်ရှုခဲ့ပါတယ်။
အသက် ၃၇ နှစ်ရှိ အီတလီသူဟာ ကွင်းသို့ လာချိန်တွင် ဝတ်ဆင်ထားတဲ့ ဖက်ရှင်ကြောင့် အားလုံးရဲ့ မျက်စိကျခြင်းခံခဲ့ရပါတယ်။
သူမဟာ အပေါ်ပိုင်းတွင် ရင်သားကို လည်စည်းဖြင့် စည်းထားပြီး ဂျင်းဘောင်းဘီတို ဝတ်ဆင်ထားပါတယ်။
သူမဟာ ကွင်းအတွင်းတွင် ပရိသတ်များနှင့် ဓာတ်ပုံနှင့် ဗီဒီယိုများ ရိုက်ကူးမှုလည်း ခံယူခဲ့ပါတယ်။
ယင်းဓာတ်ပုံများမှာ အွန်လိုင်းတွင် ပျံ့နှံ့နေပြီး ပရိသတ်အချို့တို့က ကွင်းအတွင်း ယင်းသို့ မလုံတလုံ ဝတ်စားခွင့်ပြုသင့်ခြင်း မရှိကြောင်း ဝေဖန်ပြောဆိုနေကြပါတယ်။
ပရိသတ်တစ်ဦးက "ဗြိတိန်မှာဆိုရင် ဒါမျိုးဝတ်လာရင်တော့ အဖမ်းခံရပြီပဲ"လို့ ဆိုသွားပါတယ်။
အခြားတစ်ဦးကလည်း "ဘာကြောင့်များ ဒီလိုဝတ်ဆင်ခွင့်ပေးရတာလဲ"လို့ ဆိုသွားပါတယ်။
နောက်တစ်ဦးကလည်း "မိဘတွေက ကလေးတွေကိုပါ ပွဲသို့ ခေါ်လာတယ်လေ။ ဒီတော့ ကွင်းအတွင်း ကွင်းပြင် အဖော်အချွတ်ဝတ်တာမျိုး ပိတ်သင့်တယ်"လို့ ဆိုသွားပါတယ်။
ရိုက်စ်ဆာဟာ အပျော်စီးရွက်လှေတို့တွင် စားပွဲထိုးအဖြစ် ဆောင်ရွက်ခဲ့စဉ် စီးပွားရေးလုပ်ငန်းရှင်များ၊ ဘီလျံနာများ၊ နာမည်ကျော်အနုပညာရှင်များ၊ အာဏာကြီးမားတဲ့ လုပ်ငန်းရှင်များနှင့် တွေ့ဆုံခဲ့ရသူ ဖြစ်ပါတယ်။
နောက်ပိုင်းတွင် သူမဟာ အပြာရုပ်ရှင်လောကသို့ ဝင်ရောက်ခဲ့ပါတယ်။

မာရက်စ်ကာအား နည်းပြသစ်အဖြစ် ခန့်အပ်ရန် အနီးစပ်ဆုံးအနေအထားသို့ ရောက်လာပြီဖြစ်တဲ့ မန်စီးတီး
=======================

မန်စီးတီးဟာ ချဲလ်ဆီးနှင့် နစ်နာကြေးနှင့်ပတ်သက်ပြီး သဘောတူညီမှု ရရှိလာပြီးနောက် အန်ဇိုမာရက်စ်ကာအား နည်းပြသစ်အဖြစ် သုံးနှစ်စာချုပ်ဖြင့် ခန့်အပ်ရေး အနီးစပ်ဆုံးအနေအထားသို့ ရောက်လာပြီ ဖြစ်ပါတယ်။
မန်စီးတီးဟာ ပြီးခဲ့တဲ့ ရာသီအကုန်တွင် အသင်းကို ၁၀ နှစ်ကြာ ကိုင်တွယ်ပြီးနောက် ထွက်ခွာသွားတဲ့ ပက်ဂွါဒီယိုလာရဲ့ နေရာတွင် အစားထိုးရေးလက်ထောက်နည်းပြမာရက်စ်အား ခန့်အပ်ရန် ကြိုးပမ်းလာခဲ့တာ ဖြစ်ပါတယ်။
မန်စီးတီးနှင့် ချဲလ်ဆီးတို့ဟာ အန်ဇိုမာရက်စ်ကာအတွက် နစ်နာကြေးနှင့်ပတ်သက်ပြီး ရက်သတ္တပတ်အတန်ကြာ ဆွေးနွေးမှုများ ပြုလုပ်လာပြီးနောက် ယခုအခါ ပေါင် ၁၀ သန်းဝန်းကျင်ဖြင့် သဘောတူညီမှု ရရှိလာပြီလို့ ယုံကြည်ရပါတယ်။
မာရက်စ်ကာဟာ ယခုနှစ် နှစ်သစ်ကူးနေ့တွင် ချဲလ်ဆီးမှ ထွက်ခွာခဲ့ပေမဲ့လည်း ၂၀၂၉ ခုနှစ်အထိ စာချုပ်ရှိနေပါတယ်။
မန်စီးတီးဟာ ဂွါဒီယိုလာရဲ့နေရာတွင် အစားထိုး ခန့်အပ်ရေး အန်ဇိုမာရက်စ်ကာတစ်ဦးတည်းကိုသာ ပစ်မှတ်ထား ကြိုးပမ်းလာခဲ့တာပါ။
မာရက်စ်ကာဟာ လက်စတာနှင့် ချဲလ်ဆီးတို့အား မကိုင်တွယ်မီ မန်စီးတီးတွင် ဂွါဒီယိုလာလက်အောက်မှာ လက်ထောက်နည်းပြအဖြစ် ဆောင်ရွက်ခဲ့ဖူးသူလည်း ဖြစ်ပါတအယ်။

အက်သလက်တီကိုထံ အသင်းပြောင်းခွင့် တောင်းဆိုလာတဲ့ အယ်လ်ဗာရက်ဇ်
====================

အာဂျင်တီးနားတိုက်စစ်မှူးဂျူလီယန်အယ်လ်ဗာရက်ဇ်ဟာ အိပ်မက်များ ဖြစ်မြောက်လာစေရေး အက်သလက်တီကိုမက်ဒရစ်ထံသို့ အသင်းပြောင်းခွင့် တောင်းဆိုလာပါတယ်။
ဘာစီလိုနာ၊ ပီအက်စ်ဂျီတို့ရဲ့ စိတ်ဝင်စားခြင်းခံနေရတဲ့ အသက် ၂၆ နှစ်ရှိ အယ်လ်ဗာရက်ဇ်ဟာ ဇွန်လ အစောပိုင်းတုန်းက မြို့ခံပြိုင်ဘက် ရီးရဲလ်မက်ဒရစ်ရဲ့ ယူရိုသန်း ၁၅၀ ဖြင့် ကမ်းလှမ်းခြင်းခံခဲ့ရပေမဲ့လည်း အက်သလက်တီကိုက ပယ်ချခဲ့ပါတယ်။
လက်ရှိအချိန်တွင် အာဂျင်တီးနားနှင့်အတူ ကမ္ဘာ့ဖလားပြိုင်ပွဲ ယှဉ်ပြိုင်နေတဲ့ အယ်လ်ဗာရက်ဇ်ဟာ ခြေကျင်းဝတ်ဒဏ်ရာမှ ပြန်လည်ကောင်းမွန်လာပြီးနောက် အဖွင့်ပွဲ ၂ ပွဲတွင် အရန်အဖြစ် ဝင်ရောက်ကစားခဲ့ပါတယ်။
ဩစတြီးယားအား အနိင်ရတဲ့ပွဲအပြီးမှာတော့ အယ်လ်ဗာရက်ဇ်က "လူတွေနဲ့ (အက်သလက်တီကို) စကားပြောထားပါတယ်။ ပြောဖို့ လိုအပ်နေခဲ့တယ်။ အားလုံးအတွက် အကောင်းဆုံးက အပြောင်းအရွှေ့ ဖြစ်လာဖို့ပါ။ ကျွန်တော့်အိပ်မက်တွေ ဖြစ်လာစေချင်တယ်။ အခုက ဒီအကြောင်းပြောရမယ့် အချိန်မဟုတ်ပါဘူး။ ဒါပေမဲ့ ဖုံးကွယ်မထားနိုင်ပါဘူး။ ရိုးသားတဲ့လူတစ်ယောက်ပဲ ဖြစ်ချင်တယ်"လို့ ပြောကြားသွားပါတယ်။
အယ်လ်ဗာရက်ဇ်ဟာ ၂၀၂၄ ခုနှစ် နွေရာသီတွင် မန်စီးတီးမှ ပေါင် ၈၁.၅ သန်းဖြင့် ပြောင်းလာခဲ့သူဖြစ်ပြီး အက်သလက်တီကိုအတွက် ၁၀၆ ပွဲကစားထားရာမှာ ၄၉ ဂိုးသွင်းကာ ၁၇ ကြိမ် ဖန်တီးထားပါတယ်။
သူဟာ လာလီဂါပထမဆုံးရာသီတုန်းက ၁၇ ဂိုးသွင်းနိုင်ခဲ့ပေမဲ့ ပြီးခဲ့တဲ့ရာသီမှာတော့ ၈ ဂိုးတည်းသာ သွင်းနိုင်ခဲ့ပါတယ်။
ဒါပေမဲ့ သူဟာ ချန်ပီယံလိဂ်တွင် ၁၀ ဂိုးအထိ သွင်းကာ အက်သလက်တီကိုအား ဆီမီးဖိုင်နယ်သို့အထိ တက်ရောက်နိုင်အောင် ကူညီနိုင်ခဲ့ပါတယ်။

ရာသီဥတုကြောင့် ၂ နာရီကြာ ရွှေ့ဆိုင်းခဲ့ရပေမဲ့ အီရတ်နှင့်ပွဲတွင် ၂ ဂိုးသွင်းကာ မက်ဆီပြီးလျှင် ကမ္ဘာ့ဖလားသမိုင်းတွင် ဒုတိယဂိုးအများဆုံးသွင်းယူထားသူအဖြစ် ရပ်တည်လာတဲ့ ဘက်ပေး
======================

ကိုင်လီယန်ဘက်ပေးဟာ ရာသီဥတုဆိုးရွားမှုကြောင့် ပွဲကို ၂ နာရီကြာ ရွှေ့ဆိုင်းခဲ့ရပေမဲ့လည်း အီရတ်နှင့်ပွဲစဉ်မှာ ၂ ဂိုးသွင်းယူကာ ကမ္ဘာ့ဖလားသမိုင်းတွင် ဒုတိယဂိုးအများဆုံးသွင်းယူသူအဖြစ် ရပ်တည်လာပါတယ်။
ဘက်ပေးဟာ ပြင်သစ်အတွက် ကမ္ဘာ့ဖလားပွဲ ၁၆ ပွဲတွင် ၁၆ ဂိုးအထိ သွင်းယူထားလာနိုင်တာ ဖြစ်ပြီး မက်ဆီပြီးလျှင် ကမ္ဘာ့ဖလားသမိုင်းတွင် ဒုတိယဂိုးအများဆုံးသွင်းယူသူအဖြစ် ရပ်တည်လာပါတယ်။
မက်ဆီဟာ အစောပိုင်းတုန်းက ဩစတြီးယားအား အာဂျင်တီးနားက ၂-၀ ဂိုးဖြင့် အနိုင်ရတဲ့ပွဲမှာ ၂ ဂိုးသွင်းပြီးတဲ့နောက် ၁၈ ဂိုးဖြင့် ကလိုဆေးအား ကျော်ဖြတ်ကာ ကမ္ဘာ့ဖလားသမိုင်းတွင် ဂိုးအများဆုံးသွင်းယူသူဖြစ်လာခဲ့ပါတယ်။
ယခု ပြင်သစ်နှင့် အီရတ်ပွဲစဉ်က ရာသီဥတုဆိုးရွားမှုကြောင့် ပွဲကို ရပ်ဆိုင်းမှု ရွှေ့ဆိုင်းမှု ပြုလုပ်ခဲ့ရတဲ့ ပထမဆုံး ကမ္ဘာ့ဖလားပွဲဆိုရင်လည်း မမှားပါဘူး။
ယခုပွဲ ပထမပိုင်းတွင် ကွင်းဧရိယာအနီး မိုးကြိုးပစ်ခတ်မှုကြောင့် ပွဲကို ရပ်ဆိုင်းခဲ့ရသလို ဒုတိယပိုင်းတွင်လည်း ပွဲကို နှစ်နာရီကျော်ကြာ ရွှေ့ဆိုင်းပြီးမှ ကစားခဲ့ရပါတယ်။
ယခုပွဲတွင် မိုးသည်းထန်စွာ ရွာသွန်းမှုကြောင့် ပရိသတ်များ ကွင်းအတွင်း ဝင်ရောက်ရေးကို ရွှေ့ဆိုင်းခဲ့ရပေမဲ့ ပွဲကို သတ်မှတ်အချိန်အတိုင်း စတင်ခဲ့ပါတယ်။
ပြင်သစ်ကို ပွဲကို လွှမ်းမိုးကစားထားနိုင်ခဲ့ပြီး ပွဲချိန် ၁၄ မိနစ်မှာ ဘက်ပေးက ဧရိယာအစပ်ကနေ ဘယ်ခြေဖြင့် အဝေးထောင့်သို့ ကန်ကာ ဦးဆောင်ဂိုးသွင်းခဲ့ပါတယ်။
ဒါပေမဲ့ ၂၀၁၈ ကမ္ဘာ့ဖလားချန်ပီယံဟာ ရေသောက်နားချိန်အပြီးနောက်ပိုင်းတွင် အခွင့်အရေးဖန်တီးနိုင်ခြင်း မရှိဘဲ အီရတ်သို့ ဘောလုံးပိုင်ဆိုင်မှု ရရှိခဲ့ပါတယ်။
ဒုတိယပိုင်း ၅၄ မိနစ်မှာတော့ နောက်ခံလူဇိတ်တာဆင်းရဲ့ ဘောလုံးပေးပို့မှုကို အီရတ်ဂိုးသမား မထိန်းနိုင်မှုကနေ ဒမ်ဘီလီ ရရှိသွားပြီး ခင်းပေးမှုမှ တဆင့် ဘက်ပေးက ရိုးရှင်းစွာ ပိတ်သွင်းကာ ပြင်သစ်အတွက် ဒုတိယဂိုးသွင်းခဲ့ပါတယ်။
ပြင်သစ်ဟာ အက်ဒရီယန်ရာဘီယော့ရဲ့ အပိုင်ခေါင်းတိုက်ချက် လွဲချော်သွားမှု၊ အိုလီဆီရဲ့ ကန်ချက် တိုင်ထိသွားမှုကြောင့် နစ်နာခဲ့ရပေမဲ့လည်း ဒမ်ဘီလီက ၆၆ မိနစ်မှာ တတိယဂိုးသွင်းခဲ့လို့ ၃-၀ ဖြင့် အနိုင်ရရှိခဲ့ပါတယ်။
ဒီဂိုးက Ballon d'Or ဆုရှင် ဒမ်ဘီလီရဲ့ ပထမဆုံးကမ္ဘာ့ဖလားဂိုးလည်း ဖြစ်ပါတယ်။
ပွဲနှောင်းပိုင်းမှာ ဘက်ပေးဟာ ဟက်ထရစ်သွင်းနိုင်မဲ့ အခွင့်အရေးရခဲ့ပေမဲ့လည်း လွဲချော်သွားခဲ့ပါတယ်။
ပြင်သစ်ဟာ ဒီနိုင်ပွဲကြောင့် ၃၂ သင်းရှုံးထွက်အဆင့်သို့ တက်ရောက်နိုင်ခဲ့ပြီ ဖြစ်ပါတယ်။

ကမ္ဘာ့ဖလားသမိုင်းတွင် ဂိုးအများဆုံးသွင်းယူသူအဖြစ် သမိုင်းမှတ်တိုင်သစ် စိုက်ထူလာတဲ့ လီယွန်နယ်မက်ဆီ
=====================

လီယွန်နယ်မက်ဆီဟာ အာဂျင်တီးနားက ဩစတြီးယားကို အနိုင်ရတဲ့ပွဲမှာ ပင်နယ်တီ လွဲခဲ့ပေမဲ့လည်း အနိုင်ဂိုး ၂ ဂိုးလုံးကို သွင်းယူပြီးနောက် ကမ္ဘာ့ဖလားသမိုင်းတွင် ဂိုးအများဆုံးသွင်းယူထားသူအဖြစ် သမိုင်းမှတ်တိုင်သစ် စိုက်ထူလာပါတယ်။
ဗုဒ္ဓဟူးနေ့တုန်းက အသက် ၃၉ နှစ်ပြည့်ခဲ့တဲ့ မက်ဆီဟာ ဩစတြီးယားနှင့်ပွဲတွင် ကမ္ဘာ့ဖလားသွင်းဂိုး ၁၇ ဂိုးမြောက်ဂိုးနှင့် ၁၈ ဂိုးမြေက်ဂိုးတို့အား သွင်းယူခဲ့တာ ဖြစ်ပြီး ဂျာမနီတိုက်စစ်မှူးမီရိုဆလပ်ဗ်ကလိုဆေးအား ၂ ဂိုးအသာဖြင့် ကျော်ဖြတ်လာပါတယ်။
မက်ဆီဟာ ယင်းပွဲတွင် ပထမဂိုးအား ပွဲချိန် ၃၈ မိနစ်တွင် မီဒီနာရဲ့ ခင်းပေးမှုကနေ သွင်းခဲ့တာ ဖြစ်ပြီး ဒုတိယဂိုးအား ပြန်အံထွက်လာတဲ့ ဘောလုံးကနေ ပိတ်သွင်းခဲ့တာလည်း ဖြစ်ပါတယ်။
တကယ်တော့ မက်ဆီဟာ ယခုပွဲ အစောပိုင်းမှာ လူသာရိုမာတီနက်ဇ်ကြောင့် ရရှိတဲ့ ပင်နယ်တီကနေ ဂိုးသွင်းနိုင်မဲ့ အခွင့်အရေး ရခဲ့သူပါ။
ဒါပေမဲ့ မက်ဆီရဲ့ ကန်ချက်က လွဲချော်သွားခဲ့လို့ ဂိုးမရခဲ့တာ ဖြစ်ပါတယ်။
မက်ဆီဟာ ဩစတြီးယားနှင့်ပွဲမှာလည်း အနိုင်ဂိုး ၂ ဂိုးလုံးအား သွင်းလာမှုနှင့်အတူ အုပ်စု ပွဲ ၂ ပွဲပြီးဆုံးချိန်မှာ သွင်းဂိုး ၅ ဂိုးဖြင့် ဂိုးသွင်းဘုရင်အဖြစ် ရပ်တည်နေပါတယ်။
အာဂျင်တီးနားဟာ ကမ္ဘာ့ဖလားအဖွင့်ပွဲ ၂ ပွဲ အနိုင်ရရှိပြီး ရမှတ် ၆ မှတ်ဖြင့် ၃၂ သင်းအဆင့်သို့ တက်ရောက်နိုင်ခဲ့ပြီ ဖြစ်ပါတယ်။ ယနေ့ညပွဲမှ ဂျော်ဒန်က အယ်ဂျီးရီးယားကို အနိုင်မရလာပါက အာဂျင်တီးနားတို့ အုပ်စုဗိုလ်ဖြစ်ပါမယ်။
အဖွင့်ပွဲမှာ ဂျော်ဒန်ကို အနိုင်ရခဲ့တဲ့ ဩစတြီးယားက အာဂျင်တီးနားကို ရှုံးနိမ့်ခဲ့ပေမဲ့လည်း နောက်တစ်ဆင့်သို့ တက်နိုင်မဲ့ အခွင့်အရေး ပိုင်ဆိုင်ထားတုန်း ဖြစ်ပါတယ်။