လူကူးမျဉ်းကြား၊ ခုံးကျော်တံတားနှင့် မြေအောက်လမ်းမှ ကူးသန်းသွားလာရန် အသိပညာပေးမှုကာလ တစ်ပတ်ထပ်မံတိုးမြှင့်

လူကူးမျဉ်းကြား၊ ခုံးကျော်တံတားနှင့် မြေအောက်လမ်းမှ ကူးသန်းသွားလာရန် အသိပညာပေးမှုကာလ တစ်ပတ်တိုးမြှင့်ပေးထားကြောင်း သိရသည်။
အသိပညာ‌ပေးမှုကို မေ ၇ ရက်က စတင်၍ တစ်ပတ်ပြုလုပ်ခဲ့ပြီးနောက် ယနေ့ မေ၁၄ တွင် တစ်ပတ် ထပ်မံတိုးမြှင့်ပေးခဲ့ခြင်း ဖြစ်သည်။
ယင်းရက်သတ္တပတ်ကျော်လွန်ပြီးပါက စတင်အရေးယူမှုများ ရှိလာမည်ဟုလည်း သိရသည်။
လက်တလော၌ အသိပညာပေးမှုများကို ရန်ကုန်မြို့ရှိ လမ်းဆုံ၊ လမ်းခွနှင့် လူကူးကုန်းကျော်တံတားများရှိသည့်နေရာများနှင့် အခြားမြို့နယ်များရှိ လူစည်ကားရာ မီးပွိုင့်များတွင် ယာဉ်ထိန်းရဲတပ်ဖွဲ့ဝင်များ၊ YRTC နှင့် အခြားဌာနဆိုင်ရာတို့မှ ပူးပေါင်းလုပ်ဆောင်လျက်ရှိသည်။

ဌက်အော်စမ်းလူငယ်သင်တန်း‌ကျောင်းတွင် လူငယ် ၄၀၉ ဦးကို စောင့်ရှောက်ထား

ကလေးများသည် အနာဂတ်ကို ပုံဖော်ကြမည့်သူများဖြစ်သောကြောင့် စနစ်တကျနှင့် ကောင်းမွန်စွာပြုစုစောင့်ရှောက်ပေးရန် ဒုဝန်​ကြီးပြော
ရန်ကုန်တိုင်းဒေသကြီး ဌက်အော်စမ်း လူငယ်သင်တန်းကျောင်းတွင်း လူငယ် (၄၀၉) ဦးကို ထိန်းသိမ်းစောင့်ရှောက်ထားကြောင်းသိရသည်။
ကော့မှူးမြို့နယ် ဌက်အော်စမ်းသင်တန်းကျောင်းတွင် ကလေးသူငယ်တရားရုံးများမှ ပေးပို့သော အသက် (၁၂) နှစ်မှ (၁၈) နှစ်အထိ ယောင်္ကျားလေး ၃၇၆ ဦးနှင့် ကာကွယ်စောင့်ရှောက်ရန်လိုအပ်သော ကလေး ၃၃ ဦးတို့ကို လက်ခံစောင့်ရှောက်ထားခြင်းဖြစ်ကြောင်း သိရသည်။
“ကလေးများသည် အနာဂတ်ကိုပုံဖော်ကြမည့်သူများဖြစ်သောကြောင့် စနစ်တကျနှင့် ကောင်းမွန်စွာပြုစုစောင့်ရှောက်ပေးရန်လိုကြောင်း၊ ကလေးတစ်ဦးချင်းစီ ဆောင်ရွက်ရမည့် လုပ်ငန်းများ၊ အုပ်စုလိုက်ဆောင်ရွက်ရမည့်လုပ်ငန်းများ၊ အနားယူအပန်းဖြေခြင်းနှင့် ပျော်ပွဲရွှင်ပွဲအစီအစဉ်များကိုလည်း ပိုမိုဆောင်ရွက်ပေးစေလိုကြောင်းလည်း လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာ သန့်ဇော်လွင် ကပြောသည်။
ယမန်နေ့က ရန်ကုန်တိုင်းဒေသကြီးကော့မှူးမြို့နယ် ငှက်အော်စမ်း လူငယ်သင်တန်းကျောင်းကို ကြည့်ရှုစစ်ဆေးစဉ် ဒုတိယဝန်ကြီးက အထက်ပါအတိုင်း ပြောကြားခဲ့ခြင်း ဖြစ်သည်။
ထိုပြင် တစ်ဦးချင်း၏ နောက်ခံအခြေအနေအပေါ် အခြေခံပြီး လူမှုဝန်ထမ်းနည်းလမ်းများဖြင့် စနစ်တကျလေ့ကျင့် သင်ကြားပေးရန်နှင့် မိသားစု၊ ရပ်ရွာအတွင်း ပြန်လည်ဝင်ဆံ့ ပေါင်းစည်းရေးကို ဆောင်ရွက်ပေးရမည်ဖြစ်ကြောင်းလည်း သိရသည်။

လွိုင်လင်မြို့နယ်အတွင်းမှ ကျေးရွာများအတွက် အိမ်သုံးဆိုလာ အစုံ ၂၅၀ ထောက်ပံ့

ရှမ်းပြည်နယ်တောင်ပိုင်း လွိုင်လင်ခရိုင် လွိုင်လင်မြို့နယ်အတွင်းရှိ ကျေးရွာများအတွက် အိမ်သုံးဆိုလာအစုံ ၂၅၀ ကို ဒေသခံတိုင်းရင်းသားပြည်သူများထံ လက်ဝယ်အရောက်ပေးအပ်ခဲ့ကြောင်း သိရသည်။
လွိုင်လင်မြို့နယ် ဆနင်းကျေးရွာအုပ်စု နားဟီးကျေးရွာအတွက် အိမ်သုံးဆိုလာ ၁၂၅ စုံ၊ နားမွမ်းကျေးရွာအတွက် အိမ်သုံးဆိုလာ ၇၆ စုံ၊ဝမ်ကျောင်းကျေးရွာအတွက် အိမ်သုံးဆိုလာ ၄၉ စုံ၊ စုစုပေါင်း ဆိုလာအစုံ ၂၅၀ စုံကို ထောက်ပံ့ခဲ့ပြီး အသုံးပြုပုံများကိုလည်း ရှင်းလင်းခဲ့ကြောင်း နယ်စပ်ရေးရာဝန်ကြီးဌာနမှ သိရသည်။
နယ်စပ်ဒေသဖွံ့ဖြိုးရေးလုပ်ငန်းများကို တစ်နိုင်ငံလုံး အကြားအလပ်မရှိ စဉ်ဆက်မပြတ်ဆောင်ရွက်ပေးနေပြီး အစိုးရ၏ လမ်းညွှန်ချက်ဖြင့် ပြည်သူအတွက် ပထမရက် ၁၀၀ စီမံချက်များကို အလေးထားဆောင်ရွက်ပေးနေကြောင်း သိရသည်။

Build-Smart & Biggest Myanmar Production Expo 2026” ပြပွဲ ရန်ကုန်မြို့၌ ၃ ရက်ကြာ ကျင်းပမည်

မြန်မာနိုင်ငံ ဆောက်လုပ်ရေးလုပ်ငန်းရှင်များ အသင်းချုပ် (MCEF) ၏ နှစ်(၃၀) ပြည့် ပုလဲရတုအထိမ်းအမှတ်အဖြစ် “Build-Smart & Biggest Myanmar Production Expo 2026” ပြပွဲကို ရန်ကုန်မြို့ရှိ Yangon Convention Centre (YCC) တွင် မေလ ၁၅ ရက်မှ ၁၇ ရက်အထိ ၃ ရက်ကြာ ကျင်းပသွားမည်ဖြစ်ကြောင်း သိရသည်။
အဆိုပါ ပြပွဲတွင် ပြည်တွင်း၊ ပြည်ပကုမ္ပဏီများစွာ ပါဝင်ပြသမည်ဖြစ်ပြီး ဆောက်လုပ်ရေးနည်းပညာများ၊ စက်မှုလုပ်ငန်းသုံးပစ္စည်းများ၊ စွမ်းအင်နှင့် သယ်ယူပို့ဆောင်ရေးဆိုင်ရာ နည်းပညာများကို အဓိကထား ပြသသွားမည်ဖြစ်ကြောင်း သိရသည်။
ထို့ပြင် ပြပွဲအတွင်း စီးပွားရေးလုပ်ငန်းရှင်များအချင်းချင်း ချိတ်ဆက်ဆောင်ရွက်နိုင်မည့် အခွင့်အလမ်းများ ဖန်တီးပေးသွားမည်ဖြစ်ပြီး ရင်းနှီးမြှုပ်နှံမှုနှင့် နည်းပညာပူးပေါင်းဆောင်ရွက်မှုများ ပိုမိုတိုးတက်လာစေရန် ရည်ရွယ်ကျင်းပခြင်းဖြစ်ကြောင်း MCEF တာဝန်ရှိသူတစ်ဦးက ပြောသည်။
“ဒီပြပွဲက မြန်မာနိုင်ငံရဲ့ ထုတ်လုပ်မှုနဲ့ စက်မှုကဏ္ဍ ဖွံ့ဖြိုးတိုးတက်ရေးကို အထောက်အကူပြုနိုင်ဖို့ ရည်ရွယ်တာဖြစ်ပါတယ်” ဟု ၎င်းက ဆိုသည်။
ပြပွဲတွင် လျှပ်စစ်ကား (EV) နှင့် သယ်ယူပို့ဆောင်ရေးနည်းပညာများ၊ စက်မှုသုံးယာဉ်များနှင့် နည်းပညာဆိုင်ရာ ထုတ်ကုန်အသစ်များကိုလည်း ပြသသွားမည်ဖြစ်ကြောင်း သိရသည်။

ဒေါ်နယ်ထရမ့် နဲ့ ရှီကျင်ပင်း ထိပ်သီးဆွေးနွေးပွဲ အတွက် ထရမ့် တရုတ်နိုင်ငံကို ဆိုက်ရောက်ပြီ

အမေရိကန်သမ္မတ ဒေါ်နယ်ထရမ့်ဟာ တရုတ်သမ္မတ ရှီကျင်ပင်းနဲ့ နှစ်ရက်ကြာ အရေးပါတဲ့ တွေ့ဆုံ ဆွေးနွေးမှုတွေ ပြုလုပ်ဖို့ ပေကျင်းမြို့ကို ဆိုက်ရောက်လာပြီဖြစ်ပါတယ်။
မဟာအင်အားကြီး နှစ်နိုင်ငံကြား ဆွေးနွေးမယ့် အစီအစဉ်တွေထဲမှာ အခွန်စည်းကြပ်မှုတွေ၊ နည်းပညာ ဆိုင်ရာ ပြိုင်ဆိုင်မှုတွေ၊ အီရန်စစ်ပွဲနဲ့ ထိုင်ဝမ်အရေး ကိစ္စတွေ ပါဝင်နေပါတယ်။
အခုတခေါက် ထရမ့်ရဲ့ ခရီးစဉ်ဟာ ၂၀၁၇ ခုနှစ်က နောက်ဆုံး အကြိမ် လာရောက်ခဲ့ပြီး နောက်ပိုင်း ပထမဆုံး အကြိမ် ပြန်လည်လာရောက်တာပါ။
ဒါပေမဲ့ အခုပြန်လာချိန်မှာတော့ တရုတ်နိုင်ငံဟာ အရင်ကထက် ပိုမိုအင်အားတောင့်တင်းလာသလို၊ မိမိကိုယ်ကိုယ် တည်ငြိမ်တဲ့ ကမ္ဘာ့အင်အားကြီး နိုင်ငံတခု အဖြစ် ပုံဖော်ဖို့ ပိုမိုအားသန်နေတဲ့ အနေ အထားမှာ ရှိနေပါတယ်။
တကယ်တော့ ဒီခရီးစဉ်ကို ပြီးခဲ့တဲ့ မတ်လ ကတည်းက လာရောက်ဖို့ မူလက စီစဉ် ထားတာ ဖြစ်ပေမဲ့ အီရန်စစ်ပွဲကြောင့် အချိန်ကြန့်ကြာ သွားခဲ့ရတာ ဖြစ်ပါတယ်။

ပရိသတ်များ ကွင်းအတွင်း ဝင်ရောက်မှုကြောင့် ပရက်ဒါဘီပွဲအား ၃-၀ ဖြင့် အရှုံးပေးခဲ့ရကာ ပေါင် ၃၅၇၀၀၀ ဒဏ်ရိုက်ခံလာရတဲ့ ဆလားဗီးယားပရက်
====================

ဆလားဗီးယားပရက်ဟာ စပါတာပရက်နှင့် ဒါဘီပွဲအား ရပ်ဆိုင်းလိုက်ရမှုအတွက် ၃-၀ ဂိုးဖြင့် အရှုံးပေးလာရပြီး ပေါင် ၃၅၇၀၀၀ ဒဏ်ရိုက်ခြင်းခံလာရသလို အိမ်ကွင်း ၄ ပွဲ ပရိသတ် မပါဘဲ ကစားရန် ပြစ်ဒဏ်ချမှတ်ခြင်းခံလာရပါတယ်။
ဆလားဗီးယားပရက်တို့ စနေနေ့တုန်းက ချက်လိဂ်ဖလားအတွက် အရေးပါတဲ့ပွဲစဉ်ရဲ့ အချိန်ပို ၇ မိနစ်တွင် ၃-၂ ဂိုးဖြင့် အနိုင်ရနေချိန်မှာ ရာပေါင်းများစွာသော အိမ်ရှင်ပရိသတ်တို့ဟာ မီးရှူးမီးပန်းများ ကိုင်ဆောင်ကာ ကွင်းအတွင်း ဆင်းလာခဲ့ကြပါတယ်။
ပရိသတ်များ ကွင်းအတွင်း ဆင်းလာမှုနှင့်အတူ ဒိုင်လူကြီးက လုံခြုံရေးအတွက် ကစားသမားများကို အဝတ်အစားလဲခန်းအတွင်းသို့ ဝင်ရောက်စေခဲ့ပြီး ပွဲကိုလည်း ရပ်ဆိုင်းလိုက်ပါတယ်။
ဆလားဗီးယားပရက်က ကွင်းအတွင်း ဝင်ရောက်တဲ့ ပရိသတ်များကို ရာသက်ပန်ပွဲကြည့်ခွင့်ပိတ်ပင်မယ်လို့ ကြေညာထားပါတယ်။
ဒါအပြင် ၃-၀ ဖြင့် အနိုင်ပေးခြင်းခံခဲ့ရတဲ့ စပါတာဟာလည်း ကွင်းအတွင်း ပရိသတ်များ မီးရှူးများဖြင့် ပစ်ပေါက်မှု၊ ကွင်းအား ဖျက်ဆီးမှုတို့အတွက် ပေါင် ၂၁၄၀၀ ဒဏ်ရိုက်ခြင်းခံခဲ့ရပါတယ်။
ဆလားဗီးယားပရက်ဟ ယင်းပွဲကို ၃-၀ ဖြင့် အရှုံးပေးလိုက်ရမှုနှင့်အတူ ဒုတိယနေရာမှ စပါတာကို ၅ မှတ်တည်းသာ ဖြတ်ထားနိုင်ပါတော့တယ်။
၎င်းတို့ဟာ ဗုဒ္ဓဟူးနေ့တွင် အိမ်ကွင်းမှာ ဂျက်လိုနစ်အား ဧည့်ခံကစားရပါမယ်။

ဘန်လေရဲ့ ဆက်သွယ်ခြင်းခံနေရပေမဲ့ ဘယ်လာမီကို ဝေးလ်ဘောလုံးအဖွဲ့ချုပ် ယုံကြည်နေ
=====================

ဝေးလ်ဘောလုံးအဖွဲ့ချုပ်မှ တာဝန်ရှိသူများဟာ ဘန်လေရဲ့ စိတ်ဝင်စားခြင်းခံနေရပေမဲ့ ခရစ်ဘယ်လာမီမှာ ဝေးလ်အသင်းကို ဆက်လက်ကိုင်တွယ်လာမယ်လို့ ယုံကြည်နေပါတယ်။
ဘယ်လာမီဟာ ပရီးမီးယားလိဂ်မှ တန်းဆင်းသွားပြီးနောက် စကော့ပါကားနှင့် နှစ်ဦးသဘောတူလမ်းခွဲလိုက်ပြီးနောက် လစ်လပ်နေတဲ့ ဘန်လေနည်းပြရာထူးအတွက် ရေပန်းစားနေသူများထဲတွင် ပါဝင်ပါတယ်။
အသက် ၄၆ နှစ်ရှိ ဘယ်လာမီဟာ ဘန်လေအသင်းတွင် လက်ရှိ ဘိုင်ယန်မြူးနစ်နည်းပြဗင်းဆင့်ကွန်ပနီလက်အောက်တွင် လက်ထောက်နည်းပြအဖြစ် ဆောင်ရွက်ခဲ့ဖူးပါတယ်။
လက်ရှိအချိန်တွင် ဘန်လေဘက်က ဘယ်လာမီကို ခန့်အပ်ရေး ဝေးလ်ဘောလုံးအဖွဲ့ချုပ်ကို တရားဝင်ဆက်သွယ်လာခြင်းတော့ မရှိသေးပါဘူး။
ဒါပေမဲ့ ဝေးလ်ဘောလုံးအဖွဲ့ချုပ်မှ တာဝန်ရှိသူများဟာ ဘယ်လာမီနှင့် တွေ့ဆုံချိန်တွင် ဆွေးနွေးမှုများအရ အသင်းတွင် ဆက်ရှိနေမယ်လို့ ယုံကြည်နေကြပါတယ်။
အထူးသဖြင့် ဘယ်လာမီဟာ ဝေးလ်က အင်္ဂလန်၊ စကော့တလန်၊ အိုင်ယာလန်တို့နှင့် ပူးတွဲအိမ်ရှင်အဖြစ် ကျင်းပလာမဲ့ ယူရို ၂၀၂၈ ပြိုင်ပွဲတွင် အသင်းကို ဦးဆောင်နေတယ်လို့ ယုံကြည်နေကြပါတယ်။
ဘယ်လာမီဟာ ၂၀၂၄ ခုနှစ် ဇူလိုင်လတုန်းက ပထမဆုံး စီနီယာအသင်းနည်းပြအဖြစ် ဝေးလ်နည်းပြအဖြစ် ၄ နှစ်စာချုပ်ဖြင့် ခန့်အပ်ခြင်းခံခဲ့ရပါတယ်။
သူဟာ ဝေးလ်အသင်းနည်းပြအဖြစ် ၉ ပွဲဆက် ရှုံးပွဲမရှိမှတ်တမ်းဖြင့် စတင်ခဲ့ကာ တိုက်စစ်အသားပေးကစားဟန်ကြောင့် ချီးကျူးခြင်းခံခဲ့ရပါတယ်။
ဘယ်လာမီဟာ ကမ္ဘာ့ဖလားခြေစစ်ပွဲတွင် ဘယ်လ်ဂျီယံကို နှစ်ပွဲ ရှုံးနိမ့်မှုကြောင့် ခြေစစ်ပွဲကျခဲ့ပြီး ပးလေအော့ဖ်ဗိုလ်လုပွဲတွင် ဘော့စနီးယားကို အိမ်ကွင်းမှာ ရှုံးနိမ့်ကာ ကမ္ဘာ့ဖလားခြေစစ်ပွဲကျခဲ့ပါတယ်။
ဘန်လေနည်းပြရာထူးအတွက် ဘယ်လာမီအပြင် လီဗာပူးကစားဖော်ဟောင်းစတီဗင်ဂျရတ်၊ ကာဒစ်ဖ်နည်းပြဘရိုင်ယန်ဘာရီမာဖီးလ်တို့လည်း ရေပန်းစားနေပါသေးတယ်။

ဟန်ဆီဖလစ်ကို စာချုပ်သစ်ချုပ်ဆိုရန် သဘောတူညီမှု ရရှိလာတဲ့ ဘာစီလိုနာ
======================

ဘာစီလိုနာဟာ ဟန်ဆီဖလစ်ကို အသင်းတွင် ၂၀၂၈ ခုနှစ်အထိ ရှိနေစေမဲ့ စာချုပ်သစ်အား ချုပ်ဆိုရန် သဘောတူညီမှု ရရှိလာပါတယ်။
ဘာစီလိုနာဟာ တနင်္ဂနွေနေ့တုန်းက နူးကမ့်တွင် ရီးရဲလ်မက်ဒရစ်အား ၂-၀ ဖြင့် အနိုင်ရရှိပြီးနောက် ဂျာမန်လူမျိုးနည်းပြလက်အောက် ၂ ရာသီတွင် လာလီဂါဖလား ၂ ကြိမ်ဆက် ဆွတ်ခူးနိုင်ခဲ့ပါတယ်။
အသက် ၆၁ နှစ်ရှိ နည်းပြရဲ့ ယခင်စာချုပ်မှာ လာမဲ့ ၂၀၂၇ ခုနှစ်တွင် ကုန်ဆုံးမှာ ဖြစ်ပြီး ယခုအခါ တစ်နှစ်စာချုပ်သက်တမ်းတိုးချုပ်ဆိုရန် သဘောတူညီမှု ရရှိလာတာလည်း ဖြစ်ပါတယ်။
ဟန်ဆီဖလစ်က "ဒီအတွက် အရမ်းပျော်ပါတယ်။ သူတို့ ကျွန်တော်နဲ့ ကျွန်တော့်အသင်းက တစ်နှစ် သို့မဟုတ် နှစ်နှစ် အလုပ်လုပ်ဖို့ ယုံကြည်နေသေးတယ်"လို့ ပြောကြားသွားပါတယ်။
ဘာစီလိုနာဟာ ရာသီသိမ်းရန် ၃ ပွဲအလိုတွင် လာလီဂါဖလားဆွတ်ခူးလာတာ ဖြစ်ပြီး ရမှတ်တစ်ရာအထိ ရယူနိုင်မဲ့ အခွင့်အရေး ပိုင်ဆိုင်ထားပါတယ်။
ဆက်လက်ပြီး ဂျာမနီနှင့် ဘိုင်ယန်မြူးနစ်နည်းပြဟောင်းက "နည်းပြအမြောက်အမြားကတော့ သုံးနှစ် လေးနှစ် သို့မဟုတ် ငါးနှစ်စာချုပ်ချုပ်ဆိုခံရရင် ပျော်ကြတယ်။ ဒါပေမဲ့ ဘာစီလိုနာမှာက အကန့်အသတ်ရှိတာ ကောင်းတယ်။ ဒီအတွက် အရမ်းဂုဏ်ယူတယ်။ ကျွန်တော်တို့ ၂၀၂၈ ခုနှစ်အထိ သွားမယ်။ အားလုံး အဆင်ပြေလား ကြည့်မယ်။ အဆင်ပြေရင် ဆက်သွားမယ်။ ကျွန်တော်တို့ တစ်နှစ်စောပြီး ဆုံးဖြတ်ခွင့် ရှိတယ်။ ကလပ်လုပ်တာ မှန်ပါတယ်။ ကျွန်တော်လည်း မှန်တယ်။ ဒါက ကောင်းတဲ့ စာချုပ်ပါ"လို့ ပြောကြားသွားပါတယ်။
ဟန်ဆီဖလစ်ဟာ ၂၀၂၄ ခုနှစ်တွင် ဇာဗီးနေရာမှာ အစားထိုးခန့်အပ်ခြင်းခံရပြီးနောက် ပထမဆုံးရာသီတွင် ကိုပါဒယ်ရေးဖလားရရှိအောင်လည်း စွမ်းဆောင်ပေးနိုင်ခဲ့ပါတယ်။
သူဟာ ဘိုင်ယန်မြူးနစ်အသင်းကို ၂၀၁၉ ခုနှစ်မှ ၂၀၂၁ ခုနှစ်အထိ ကိုင်တွယ်ပြီးနောက် ဂျာမနီနည်းပြအဖြစ်လည်း ၂ နှစ်ကြာ ထမ်းဆောင်ခဲ့ပါတယ်။
သူဟာ ဘိုင်ယန်မြူးနစ်နှင့်အတူ ၂၀၂၀ ခုနှစ်တုန်းက ချန်ပီယံလိဂ်ဖလား၊ ကလပ်ကမ္ဘာ့ဖလားအပါအဝင် အဓိကဆုဖလားအားလုံး ရယူပေးနိုင်ခဲ့ပါတယ်။

မော်ရင်ဟိုကို နည်းပြသစ်အဖြစ် ခန့်အပ်ရေး ဆွေးနွေးမှု နောက်ဆုံးအဆင့်သို့ ရောက်နေပြီဖြစ်တဲ့ ရီးရဲလ်မက်ဒရစ်
=====================

ရီးရဲလ်မက်ဒရစ်ဟာ နည်းပြရာထူးအတွက် ဟိုဆေးမော်ရင်ဟိုအား ပြန်လည်ခန့်အပ်ရေး ဆွေးနွေးမှု နောက်ဆုံးအဆင့်သို့ ရောက်နေပြီ ဖြစ်ပါတယ်။
အသက် ၆၃ နှစ်ရှိ မော်ရင်ဟိုဟာ ရီးရဲလ်မက်ဒရစ်နည်းပြရာထူးအတွက် တစ်ဦးတည်းသောနည်းပြအဖြစ် ထိပ်ဆုံးမှ ရေပန်းစားနေသူလည်း ဖြစ်ပါတယ်။
သူဟာ ဇန်နဝါရီလတုန်းက ဇာဘီးအလွန်ဆို ထွက်ခွာသွားပြီးနောက် တာဝန်ထမ်းဆောင်လာခဲ့တဲ့ အယ်ဗာရိုအာဘီလိုအာရဲ့ နေရာတွင် အစားထိုးတာဝန်ယူလာမှာလည်း ဖြစ်ပါတယ်။
ရီးရဲလ်မက်ဒရစ်ဥက္ကဌဖလော်ရင်တီနိုပီရက်ဇ်ဟာ ဇာဘီးအလွန်ဆို ထွက်ခွာသွားပြီးနောက် မော်ရင်ဟိုကို ခန့်အပ်ရေး ဆွေးနွေးခဲ့ဖူးပါသေးတယ်။
မော်ရင်ဟိုဟာ ပြီးခဲ့တဲ့နှစ် စက်တင်ဘာလတုန်းက မွေးရပ်မြေပေါ်တူဂီသို့ ပြန်ရောက်လာကာ ဘင်ဖီကာအား ၂ နှစ်စာချုပ်ဖြင့် ကိုင်တွယ်နေတာ ဖြစ်ပါတယ်။
မကြာသေးမီတုန်းက သတင်းစာရှင်းလင်းပွဲတွင် အနာဂတ်နှင့်ပတ်သက်ပြီး တစုံတရာ မပြောကြားလိုကြောင်း မော်ရင်ဟိုက ပြောဆိုခဲ့ပါတယ်။
မော်ရင်ဟိုဦးဆောင်တဲ့ ဘင်ဖီကာဟာ လာမဲ့ စနေနေ့တွင် ရာသီသိမ်းပွဲအဖြစ် အက်စတိုရဲလ်ပရီယာနှင့် ရင်ဆိုင်ကစားရပါမယ်။
မော်ရင်ဟိုဟာ ၂၀၁၀ ခုနှစ်မှ ၂၀၁၃ ခုနှစ်အထိ ရီးရဲလ်မက်ဒရစ်ကို ကိုင်တွယ်ဖူးပြီး လာလီဂါဖလား၊ ကိုပါဒယ်ရေးနှင့် စပိန်စူပါဖလားတို့ ဆွတ်ခူးနိုင်ခဲ့ပါတယ်။

ပလေးအော့ဖ်ပြိုင်ဘက်မစ်ဒယ်ဘရော့အား စပိုင်လုပ်မှုအတွက် စွဲချက်တင်ခြင်းခံရပြီးနောက် အချိန်ပိုပေးရန် တောင်းဆိုလာတဲ့ ဆောက်သမ်တန်
==================

ဆောက်သမ်တန်ဟာ ချန်ပီယံရှစ်ပလေးအော့ဖ်ပြိင်ဘက် မစ်ဒယ်ဘရော့အား စပိုင်လုပ်မှုအတွက် စွဲချက်တင်ခြင်းခံရပြီးနောက် အသင်းအတွင်း ပြန်လည်သုံးသပ်မှု ပြုလုပ်ရန်အတွက် အချိန်ပိုပေးရန် တောင်းဆိုလာပါတယ်။
အင်္ဂလိပ်ဘောလုံးလိဂ်က ဆောက်သမ်တန်မှာ ပွဲကစားရန် ၇၂ နာရီအတွင်းတွင် အခြားကလပ်တစ်ခုရဲ့‌လေ့ကျင့်ခန်းအစီအစဉ်ကို စုံစမ်းထောက်လှမ်းခြင်း မပြုလုပ်ရတဲ့ စည်းမျဉ်းကို ချိုးဖောက်ထားကြောင်း စွပ်စွဲထားပါတယ်။
မစ်ဒယ်ဘရော့က ရေးဗားဆိုက်ကွင်းတွင် ဂိုးမရှိသရေကျခဲ့တဲ့ ပလေးအော့ဖ်ဆီမီးဖိုင်နယ်ပထမအကျော့ပွဲစဉ်မတိုင်မီ နှစ်ရက်အလို ကြာသပတေးနေ့တုန်းက လေ့ကျင့်ခန်းအစီအစဉ်အား ဆောက်သမ်တန်အသင်းနည်းပြအဖွဲ့ဝင်တစ်ဦး ခြုံပုတ်အတွင်းမှ ချောင်းမြောင်းကာ ဗီဒီယိုမှတ်တမ်းရိုက်ကူးခဲ့တယ်လို့ စွပ်စွဲထားပါတယ်။
အထက်ပါ စွပ်စွဲမှုကို ဆောက်သမ်တန်ဘက်က ငြင်းဆိုထားခြင်း မရှိပါဘူး။
ဆောက်သမ်တန်နည်းပြတွန်ဒါအက်ကတ်ဟာ စနေနေ့တုန်းက ပလေးအော့ဖ်ပွဲမတိုင်မီ သတင်းစာရှင်းလင်းပွဲတွင် ပြိုင်ဘက်ဆောက်သမ်တန်အသင်းအား စပိုင်လုပ်မှုနှင့်ပတ်သက်ပြီး မေးခွန်းများစွာ မေးမြန်းခြင်းခံရပြီးနောက် ချက်ချင်း ထပြန်သွားခဲ့ပါတယ်။
ပုံမှန်အားဖြင့် ဆောက်သမ်တန်အနေဖြင့် အင်္ဂလိပ်ဘောလုံးလိဂ်ရဲ့ စွဲချက်တင်မှုကို ၁၄ ရက်အတွင်း တုံ့ပြန်ရမှာ ဖြစ်ပါတယ်။
ဒါပေမဲ့ ဆောက်သမ်တန်ဟာ ယင်းနှင့်ပတ်သက်ပြီး အသင်းအတွင်း ပြန်လည်သုံးသပ်မှုများ ပြုလုပ်ရန် အချိန်ပိုပေးရေး လွတ်လပ်တဲ့ စည်းကမ်းထိန်းသိမ်းရေးကော်မတီထံ လျှောက်ထားလာပါတယ်။
ဆောက်သမ်တန်နှင့် မစ်ဒယ်ဘရော့တို့ဟာ ယနေ့ညတွင် ပလေးအော့ဖ်ဆီမီးဖိုင်နယ်ဒုတိယအကျော့ပွဲစဉ်အဖြစ် ရင်ဆိုင်ကစားရပါမယ်။
ယခင်တုန်းက အင်္ဂလိပ်ဘောလုံးလိဂ်ဟာ ပလေးအော့ဖ်ပြိုင်ဘက် ဒါဘီအသင်းရဲ့ လေ့ကျင့်ခန်းဆင်းမှုအား စပိုင်စေလွှတ်ကာ ကင်းထောက်စေခဲ့မှုအတွက် လိဒ်ယူနိုက်တက်အား ပေါင် ၂၀၀၀၀၀ ဒဏ်ရိုက်ခဲ့ဖူးပါတယ်။
တဖက်တွင် ဖီဖာဟာ အမျိုးသမီးကမ္ဘာ့ဖလားပြိုင်ပွဲတုန်းက နယူးဇီလန်အသင်းကို ဒရုန်းဖြင့် ကင်းထောက်မှုအတွက် ကနေဒါအမျိုးသမီးအသင်းကို ရမှတ် ၆ မှတ်လျှော့ချကာ စပိုင်လုပ်မှုတွင် ပါဝင်တဲ့ နည်းပြအဖွဲ့ဝင်များကိုလည်း တစ်နှစ်ပွဲပယ်ပြစ်ဒဏ်ချမှတ်ဖူးပါတယ်။