ရန်ကုန်တိုင်းရှိ လုပ်သက်နှစ်(၃၀)အထက် နိုင်ငံ့ဝန်ထမ်းများအား မြေကွက်ချထားပေးရေး အစီအစဉ်ရှိ/မရှိ ရန်ကုန်တိုင်းလွှတ်တော်၌ မေးမြန်းမည်

မနက်ဖြန် ဇွန် ၂၉ ရက်တွင် ကျင်းပမည့် တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး (နဝမနေ့)၌ ရန်ကုန်တိုင်းဒေသကြီးရှိ လုပ်သက်နှစ်(၃၀)အထက် နိုင်ငံ့ဝန်ထမ်းများနှင့် ၂၀၂၁ ခုနှစ်နောက်ပိုင်း အငြိမ်းစားယူခဲ့သော နိုင်ငံ့ဝန်ထမ်းများအား မြေကွက်များ ချထားပေးရန် အစီအစဉ်ရှိ/မရှိနှင့်ပတ်သက်၍ ကြယ်ပွင့်ပြမေးခွန်းကို မေးမြန်းဆွေးနွေးသွားမည်ဖြစ်ကြောင်း သိရသည်။
အဆိုပါ ကြယ်ပွင့်ပြမေးခွန်းကို ဒဂုံမြို့သစ်(အရှေ့ပိုင်း)မြို့နယ် မဲဆန္ဒနယ်အမှတ်(၂) တိုင်းဒေသကြီးလွှတ်တော်ကိုယ်စားလှယ် ဦးသော်တာက မေးမြန်းသွားမည်ဖြစ်ပြီး၊ ရန်ကုန်တိုင်းဒေသကြီးရှိ လုပ်သက်နှစ်(၃၀)အထက် နိုင်ငံ့ဝန်ထမ်းများနှင့် ၂၀၂၁ ခုနှစ်နောက်ပိုင်း အငြိမ်းစားယူခဲ့သော ဝန်ထမ်းများအတွက် မြေကွက်ချထားပေးရေး အစီအစဉ်များရှိ/မရှိကို တိုင်းဒေသကြီးအစိုးရထံ မေးမြန်းသွားမည်ဖြစ်သည်။
ထို့ပြင် တွံတေးမြို့နယ် မဲဆန္ဒနယ်အမှတ်(၂)မှ ဒေါ်စုစုမင်း၊ လှည်းကူးမြို့နယ် မဲဆန္ဒနယ်အမှတ်(၁)မှ ဦးအောင်မျိုးနိုင်၊ ဒဂုံဆိပ်ကမ်းမြို့နယ် မဲဆန္ဒနယ်အမှတ်(၂)မှ ဒေါ်စန်းစန်းဝင်း၊ ရွှေပြည်သာမြို့နယ် မဲဆန္ဒနယ်အမှတ်(၂)မှ ဦးအောင်ဝင်းထူး၊ ဗဟန်းမြို့နယ် မဲဆန္ဒနယ်အမှတ်(၂)မှ ဒေါ်ခိုင်ဆုရည်ဇော်၊ အလုံမြို့နယ် မဲဆန္ဒနယ်အမှတ်(၂)မှ ဦးအောင်ခိုင်ဦးနှင့် တိုက်ကြီးမြို့နယ် မဲဆန္ဒနယ်အမှတ်(၂)မှ ဦးစိုးဝင်းအောင်တို့ကလည်း သက်ဆိုင်ရာကဏ္ဍများနှင့်ပတ်သက်သည့် ကြယ်ပွင့်ပြမေးခွန်းများကို မေးမြန်းဆွေးနွေးသွားမည်ဖြစ်ကြောင်း သိရသည်။
အဆိုပါ ကြယ်ပွင့်ပြမေးခွန်းများနှင့် စပ်လျဉ်း၍ သက်ဆိုင်ရာ တိုင်းဒေသကြီးအဆင့် တာဝန်ရှိသူများက လွှတ်တော်အတွင်း ပြန်လည်ရှင်းလင်းဖြေကြားသွားမည်ဖြစ်ကြောင်း သိရသည်။

တီးတိန်မြို့ရှိ ဌာနဆိုင်ရာရုံးများ ပြန်လည်ဖွင့်လှစ်ဆောင်ရွက်နေမှု ဒုဝန်ကြီး ဦးမျိုးမြင့် ကွင်းဆင်းစစ်ဆေး

ပြည်သူနှင့် ထိတွေ့ဆက်ဆံရာတွင် နိုင်ငံတော်၏ပုံရိပ်ကို ထိခိုက်စေမည့် လုပ်ရပ်များ ရှောင်ကြဉ်ရန် မှာကြား
ချင်းပြည်နယ်၊ တီးတိန်မြို့ရှိ ဌာနဆိုင်ရာရုံးများတွင် ဝန်ထမ်းများ ပြန်လည်ရောက်ရှိ၍ လုပ်ငန်းတာဝန်များ ဆောင်ရွက်နေမှုကို ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်နှင့် တာဝန်ရှိသူများက ဇွန် ၂၇ ရက်တွင် ကွင်းဆင်းကြည့်ရှုစစ်ဆေးခဲ့ကြောင်း သိရသည်။
ဒုတိယဝန်ကြီးနှင့်အဖွဲ့သည် မြို့နယ်စည်ပင်သာယာရေးအဖွဲ့ရုံး၊ မြို့နယ်မြေစာရင်းဦးစီးဌာန၊ မြန်မာ့လယ်ယာဖွံ့ဖြိုးရေးဘဏ်၊ မြို့နယ်စိုက်ပျိုးရေးဦးစီးဌာန၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း (တီးတိန်)၊ နယ်စပ်ဒေသတိုင်းရင်းသားလူငယ်များဖွံ့ဖြိုးရေးသင်တန်းကျောင်း (တီးတိန်)၊ ခရိုင်ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ မြို့နယ်လျှပ်စစ်အင်ဂျင်နီယာရုံး၊ မြို့နယ်သမဝါယမဦးစီးဌာန၊ ခရိုင်နှင့် မြို့နယ်အထွေထွေအုပ်ချုပ်ရေးဦးစီးဌာနများတွင် လုပ်ငန်းများ ဆောင်ရွက်နေမှုကို လှည့်လည်စစ်ဆေးခဲ့သည်။
ရုံးအသီးသီးတွင် တာဝန်ထမ်းဆောင်နေသည့် ဝန်ထမ်းများနှင့် တွေ့ဆုံရာ၌ ဒုတိယဝန်ကြီး ဦးမျိုးမြင့်က လုပ်ငန်းများ အောင်မြင်တိုးတက်ရေးအတွက် စေတနာထား၍ တာဝန်ကျေပွန်စွာ ဆောင်ရွက်ကြရန်၊ ဝန်ထမ်းစည်းမျဉ်းစည်းကမ်းများကို တိကျစွာ လိုက်နာကြရန်နှင့် လုပ်ငန်းဆောင်ရွက်ရာတွင် ကြုံတွေ့ရသည့် အခက်အခဲများရှိပါက ပွင့်ပွင့်လင်းလင်း တင်ပြကြရန် မှာကြားခဲ့သည်။
ထို့ပြင် လုပ်ငန်းလိုအပ်ချက်များ အကောင်အထည်ဖော်ဆောင်ရွက်ရာတွင် သက်ဆိုင်ရာဌာနများနှင့် ပေါင်းစပ်ညှိနှိုင်းကာ လုပ်ထုံးလုပ်နည်းအဆင့်ဆင့်ကို တိကျစွာ လိုက်နာဆောင်ရွက်ရန် လိုအပ်ကြောင်း၊ ပြည်သူလူထုနှင့် ထိတွေ့ဆက်ဆံရာတွင် ဝန်ကြီးဌာနနှင့် နိုင်ငံတော်၏ပုံရိပ်ကို ထိခိုက်စေနိုင်သည့် လုပ်ကိုင်ဆောင်ရွက်မှုများကို အထူးအလေးထား၍ ရှောင်ကြဉ်ကြရန်လည်း မှာကြားခဲ့သည်။
ယင်းနောက် ဒုတိယဝန်ကြီးသည် တီးတိန်မြို့မှ မြို့မိမြို့ဖများနှင့် တွေ့ဆုံကာ တင်ပြချက်များအပေါ် သက်ဆိုင်ရာကော်မတီဝင်များနှင့် ဌာနဆိုင်ရာတာဝန်ရှိသူများကို ပေါင်းစပ်ညှိနှိုင်းဆောင်ရွက်ပေးခဲ့ပြီး ချင်းပြည်နယ်အတွင်း ပြန်လည်ထူထောင်ရေးနှင့် ပြန်လည်တည်ဆောက်ရေးလုပ်ငန်းများကို အရှိန်အဟုန်ဖြင့် ပူးပေါင်းအကောင်အထည်ဖော်သွားရေး၊ ဒေသတည်ငြိမ်ရေးနှင့် ဖွံ့ဖြိုးတိုးတက်ရေးလုပ်ငန်းများကို ဟန်ချက်ညီညီ ပူးပေါင်းဆောင်ရွက်သွားကြရန် မှာကြားခဲ့ကြောင်း သိရသည်။

တက္ကသိုလ်ဝင်တန်းအောင်မြင်သည့် အခက်အခဲရှိ သဘင်မိသားစုဝင် ကျောင်းသား/သူများကို မြန်မာနိုင်ငံသဘင်အစည်းအရုံး ပညာသင်ဆုချီးမြှင့်မည်

မြန်မာနိုင်ငံသဘင်အစည်းအရုံးသည် ၂၀၂၆ ခုနှစ် တက္ကသိုလ်ဝင်တန်းစာမေးပွဲ အောင်မြင်ခဲ့သည့် အခက်အခဲရှိသော သဘင်မိသားစုဝင် ကျောင်းသား/သူများအား တက္ကသိုလ်ပညာ ဆက်လက်သင်ယူနိုင်ရေးအတွက် ပညာသင်ဆုများ ချီးမြှင့်ပေးသွားမည်ဖြစ်ကြောင်း ဇွန် ၂၈ ရက်တွင် ထုတ်ပြန်ကြေညာခဲ့သည်။
အဆိုပါ အစီအစဉ်သည် သဘင်မိသားစုဝင် သားသမီးများ၏ ပညာရေးအောင်မြင်မှုကို ဂုဏ်ပြုအားပေးရန်နှင့် ပညာရေးဆက်လက်သင်ယူရန် အခက်အခဲကြုံတွေ့နေရသူများအား ထောက်ပံ့ကူညီပေးနိုင်ရေး ရည်ရွယ်ဆောင်ရွက်ခြင်းဖြစ်ကြောင်း သိရသည်။
ပညာသင်ဆု လျှောက်ထားလိုသူများအနေဖြင့် ကိုယ်ရေးအကျဉ်း၊ သဘင်မျိုးဆက်စစ်မှန်ကြောင်း အထောက်အထား၊ တက္ကသိုလ်ပညာ ဆက်လက်သင်ယူရာတွင် ကြုံတွေ့နေရသည့် အခက်အခဲများကို ဖော်ပြထားသော တင်ပြချက်တို့နှင့်အတူ သက်ဆိုင်ရာ မြို့နယ်၊ တိုင်းဒေသကြီးနှင့် ပြည်နယ် သဘင်အစည်းအရုံးများမှတစ်ဆင့် သို့မဟုတ် ဗဟိုသဘင်ရုံးသို့ တိုက်ရိုက်ပေးပို့လျှောက်ထားနိုင်ကြောင်း သိရသည်။
လျှောက်လွှာများကို ဇူလိုင် ၁၅ ရက် နောက်ဆုံးထား၍ လက်ခံသွားမည်ဖြစ်ပြီး ပညာသင်ဆုအစီအစဉ်နှင့်ပတ်သက်၍ အသေးစိတ်သိရှိလိုပါက ဖုန်းနံပါတ် ၀၁-၃၆၄၀၉၈၂ သို့ ဆက်သွယ်စုံစမ်းနိုင်ကြောင်း မြန်မာနိုင်ငံသဘင်အစည်းအရုံးက အသိပေးထားသည်။

ကော့ကရိတ်မြို့နယ်၌ ၂၀၂၆ ခုနှစ် တက္ကသိုလ်ဝင်တန်းစာမေးပွဲဖြေဆိုသူ(၁၃၇)ဦးအနက် (၅၁)ဦးအောင်မြင်

စစ်ရေးအခြေအနေကြောင့် တက္ကသိုလ်ဝင်စာမေးပွဲဖြေဆိုရန် အခက်အခဲများကြားမှ ၂၀၂၆ ခုနှစ် တက္ကသိုလ်ဝင်စာမေးပွဲအား ကရင်ပြည်နယ်၊ ကော့ကရိတ်မြို့နယ်မှ ကျောင်းသား/သူ(၁၃၇)ဦးဝင်ရောက်ဖြေဆိုခဲ့ကြကြောင်း သိရသည်။
ထိုသို့ ဖြေဆိုခဲ့ကြရာ ယနေ့ ဇွန် ၂၈ ရက်တွင်ထွက်ရှိသည့် ၂၀၂၆ ခုနှစ် တက္ကသိုလ်ဝင်တန်းစာမေးပွဲအောင်စာ ရင်းတွင် ကော့ကရိတ်မြို့နယ်မှ ကျောင်းသား/သူ(၅၁) ဦးအောင်မြင်ခဲ့ကြောင်း သိရသည်။
အဆိုပါ စာမေးပွဲအောင်မြင်သည့် ကျောင်းသား/သူများအနက် (၃)ဘာသာဂုဏ်ထူးရှင်(၂)ဦး၊ (၂)ဘာသာဂုဏ် ထူးရှင်(၅)ဦး၊ (၁)ဘာသာဂုဏ်ထူးရှင်(၆)ဦးရှိခဲ့ကြောင်း သိရသည်။

မိုးကုတ်မြို့နယ်၌ နိုင်ငံတော်ဓာတ်အားစနစ်မှ လျှပ်စစ် မီးပြန်ရ

မိုးကုတ်မြို့နယ်၌ ဇွန် ၂၈ ရက်တွင် နိုင်ငံတော်ဓာတ် အားစနစ်မှ လျှပ်စစ်မီးပြန်လည်ရရှိပြီဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနထံမှ သိရသည်။
မိုးကုတ်မြို့နယ်၌လျှပ်စစ်ဓာတ်အားပြန်လည်ရရှိရန် 66/33/11kV (30+1MVA မိုးကုတ်ဓာတ်အားခွဲရုံ(နန်းနွဲ့)နှင့် 33/11kV (5)MVA မင်းတံတားဓာတ်အားခွဲရုံ (၂) တို့ရှိ ပျက်စီး/ပျောက်ဆုံးခဲ့သည့် ဓာတ်အားဖြန့်ဖြူးရေးဆိုင်ရာပစ္စည်းကိရိယာများကို လျှပ်စစ်ကျွမ်းကျင်ဝန်ထမ်းများက ပြန်လည်အစားထိုးပြင်ဆင်ပြုပြင်ခဲ့ကြကြောင်း သိရသည်။
ထို့ကြောင့် ဇွန် ၂၅ ရက်တွင် ပြန်လည်အစားထိုးပြင် ဆင်ပြုပြင်မှုများ အလုံးစုံပြီးစီး၍ Main ထရန်စဖော်မာ (3MVA နှင့် sub ထရန်စဖော်မာ(1MVA အား Float Charge လုပ်ငန်းကိုလည်းအောင်မြင်စွာပြုလုပ်ပြီး ဓာတ်အားရယူဆောင်ရွက်ခဲ့ကြကြောင်း သိရသည်။
ထိုသို့ ဆောင်ရွက်ခဲ့မှုများကြောင့် လျှပ်စစ်ဓာတ်အားပြတ်တောက်မှုကြာမြင့်နေပြီဖြစ်သော မိုးကုတ်မြို့နယ် ၌ လျှပ်စစ်ဓာတ်အားပြန်လည်ရရှိပြီဖြစ်ကြောင်း သိရသည်။

ဆရာ၊ ဆရာမများနှင့် ကျောင်းသားမိဘများကို လေး စားအသိအမှတ်ပြုကျေးဇူးတင်ခဲ့သည့် ဧရာဝတီတိုင်းအစိုးရအဖွဲ့

ယမန်နေ့ ဇွန် ၂၈ ရက်က ၂၀၂၆ ခုနှစ် တက္ကသိုလ်ဝင်စာမေးပွဲအောင်စာရင်းကြေညာခဲ့ပြီးနောက် ဆရာ၊ ဆ ရာမများနှင့် ကျောင်းသားမိဘများကို လေးစားအသိ အမှတ်ပြုကျေးဇူးတင်သည်ဟု ဧရာဝတီတိုင်းအစိုးရ အဖွဲ့က ယနေ့ ဇွန် ၂၉ ရက်တွင် ဂုဏ်ပြုမှတ်တမ်းတင်ဖော်ပြခဲ့သည်။
ထူးချွန်ထက်မြက်သည့် မျိုးဆက်သစ်များပေါ်ထွက်လာစေရန် ဆရာ၊ ဆရာမများက မိမိတို့၏ကိုယ်ပိုင်အ ချိန်နှင့် လုပ်အားများကို စနစ်တကျရင်းနှီးပေးဆပ်ကာ စေတနာ၊ ဝါသနာ၊ အနစ်နာဟူသော နာသုံးနာကို လက် ကိုင်ပိုက်၍ မမောမပန်းသင်ကြားပြသလမ်းညွှန်ပေးခဲ့ကြ၍ ဧရာဝတီတိုင်းအစိုးရအဖွဲ့က ဆရာ၊ ဆရာမများ ၏ မေတ္တာ၊ ကရုဏာနှင့် စွမ်းစွမ်းတမံကြိုးပမ်းအား ထုတ်မှုများကို အထူးပင်လေးစားအသိအမှတ်ပြု၍ လှိုက်လှိုက်လှဲလှဲကျေးဇူးတင်သည်ဟု ရေးသားဖော်ပြခဲ့သည်။
ထို့ပြင် မိဘအုပ်ထိန်းသူများအနေဖြင့်လည်း သား၊သ မီးများ၏နောက်ကွယ်မှနေ၍ ရုပ်ပိုင်းဆိုင်ရာ၊ စိတ်ပိုင်းဆိုင်ရာ အဖက်ဖက်မှပံ့ပိုးကူညီပေးခဲ့ကြပြီး သားကောင်း၊သမီးမွန်များဖြစ်လာစေရန် အောင်မြင်စွာပြုစုပျိုးထောင်ပေးခဲ့ကြသည့်အတွက်လည်း ဧရာဝတီတိုင်းအစိုးရအဖွဲ့က မိဘအုပ်ထိန်းသူများအားလုံး၏ မေတ္တာ၊ ကရုဏာနှင့် စွမ်းစွမ်းတမံကြိုးပမ်းအားထုတ်မှုများကို အထူးပင်လေးစားအသိအမှတ်ပြု၍ လှိုက်လှိုက်လှဲလှဲ ကျေးဇူးတင်သည်ဟု ဖော်ပြခဲ့သည်။
ဆရာတို့၏သွန်သင်မှုနှင့် မိဘတို့၏လမ်းပြမှုများသည် ကလေးငယ်များ၏ အောင်မြင်မှုလမ်းကြောင်းအတွက် အဓိကမောင်းနှင်အားဖြစ်ခဲ့ရာ နောင်အနာဂတ်တွင် မိမိတို့ ဝါသနာပါသည့် အဆင့်မြင့်ပညာရပ်များကို ဆက် လက်ဆည်းပူးကာ နိုင်ငံတော်ကအားထားရမည့် ပညာ တတ် သားကောင်း၊သမီးမွန်များဖြစ်လာကြလိမ့်မည်ဟု နိုင်ငံတော်မှ အပြည့်အဝယုံကြည်မျှော်လင့်သည်ဟုလည်း ရေးသားဖော်ပြခဲ့သည်။

မန္တလေးဗဟိုအကျဉ်းထောင်စာစစ်ဌာန၌ ဝင်ရောက်ဖြေဆိုခဲ့သူများ ရာနှုန်းပြည့်အောင်မြင်

သုံးဘာသာဂုဏ်ထူးရှင်လေးဦး၊ နှစ်ဘာသာဂုဏ်ထူးရှင် ငါးဦးနှင့် တစ်ဘာသာဂုဏ်ထူးရှင် တစ်ဦးရှိ
ယခုနှစ် တက္ကသိုလ်ဝင်စာမေးပွဲတွင် မန္တလေးဗဟိုအကျဉ်းထောင်စာစစ်ဌာန၌ ၁၀ ဦးဝင်ရောက်ဖြေဆိုခဲ့ရာ ရာနှုန်းပြည့်အောင်မြင်ခဲ့ကြောင်း သိရသည်။
ထိုပြင် သုံးဘာသာဂုဏ်ထူးရှင်လေးဦး၊ နှစ်ဘာသာဂုဏ်ထူးရှင် ငါးဦးနှင့် တစ်ဘာသာဂုဏ်ထူးရှင် တစ်ဦးရှိခဲ့ပြီး ရာခိုင်နှုန်းပြည့်အောင်မြင်ခဲ့ခြင်းလည်း ဖြစ်သည်။
၂၀၂၆ ခုနှစ် တက္ကသိုလ်ဝင်စာမေးပွဲ အောင်စာရင်းများ ထုတ်ပြန်ကြေညာ မန္တလေးတိုင်းဒေသကြီးတွင် ဖြေဆိုအောင်မြင်သူ ၂၈၃၉၃ ဦးရှိခဲ့ကြောင်းလည်း သိရသည်။
မန္တလေးတိုင်းဒေသကြီးအတွင်း ဖြေဆိုသူ ၄၅၆၃၅ ဦးရှိသည့်အနက် အောင်မြင်သူ ၂၈၃၉၃ ဦးရှိပြီး အောင်မြင်မှုရာခိုင်နှုန်း ၆၂ ဒသမ၂၂ ရာခိုင်နှုန်းရှိခဲ့ခြင်းလည်း ဖြစ်သည်။

ဝိပ္ပံဘာသာရပ်မှ တစ်နိုင်ငံလုံး ပထမရသည့် ကျောင်းသူအား ဂုဏ်ပြုချီးမြှင့်

တက္ကသိုလ်ဝင်စာမေးပွဲ၌ ရမှတ်ပေါင်း (၅၃၀) မှတ်ဖြင့် ဝိပ္ပံဘာသာတွဲမှ မြန်မာတစ်နိုင်ငံလုံး ပထမဆုရရှိခဲ့သည့် မနီနီကျော်အား ပြည်သူ့လွှတ်တော်ကိုယ်စားလှယ် ဦးအေးချမ်းက သွားရောက်ဂုဏ်ပြုတွေ့ဆုံခဲ့သည်။
မနီနီကျော်သည် လှိုင်သာယာအရှေ့ပိုင်းမြို့နယ်၌ နေထိုင်သူ ဖြစ်သည်။
သူမသည် ဖခင်ဖြစ်သူ ကွယ်လွန်သွားပြီးနောက် မိခင်ဖြစ်သူ ဒေါ်သန်းသန်းအေးနှင့်အတူ နေထိုင်ပြီး စက်ရုံအလုပ်သမားဖြစ်သူ အစ်မ၏ ထောက်ပံ့မှုဖြင့် (G-12) တက္ကသိုလ်ဝင်တန်းစာမေးပွဲတွင် ဝင်ရောက်ဖြေဆိုခဲ့ကာ မြန်မာတစ်နိုင်ငံလုံး ပထမဆုကို ဆွတ်ခူးရရှိခဲ့သူဖြစ်သည်။
၂၀၂၆ တက္ကသိုလ်ဝင်စာမေးပွဲတွင် တစ်နိုင်ငံလုံးအ တိုင်းအတာဖြင့် အောင်မြင်သူ(၁)သိန်း(၃)သောင်းကျော်ရှိခဲ့ကြောင်းလည်း မြန်မာနိုင်ငံစာစစ်ဦးစီးဌာန၏ စာရင်းများအရ သိရသည်။

Perkasa Flight School တွင် Commercial Pilot License သင်တန်းတက်ရောက်မည့် မြန်မာကျောင်းသား (၅) ဦး အင်ဒိုနီးရှားနိုင်ငံသို့ ထွက်ခွာ

မြန်မာနိုင်ငံမှ ကျောင်းသား (၅) ဦးသည် အင်ဒိုနီးရှားနိုင်ငံရှိ Perkasa Flight School တွင် Commercial Pilot License (CPL) သင်တန်း တက်ရောက်ရန် ဇွန် ၂၈ ရက်က ရန်ကုန်အပြည်ပြည်ဆိုင်ရာလေဆိပ်မှတစ်ဆင့် အင်ဒိုနီးရှားနိုင်ငံသို့ ထွက်ခွာသွားခဲ့ကြောင်း မြန်မာနိုင်ငံဆိုင်ရာ အင်ဒိုနီးရှားနိုင်ငံသံရုံးထံမှ သိရသည်။
အဆိုပါ ကျောင်းသား (၅) ဦးသည် Myanmar Airways International (MAI) နှင့် Perkasa Flight School တို့အကြား ဖေဖော်ဝါရီ ၂၄ ရက်တွင် လက်မှတ်ရေးထိုးခဲ့သည့် Pilot Training Agreement အရ လေယာဉ်မောင်းသင်တန်းကို တက်ရောက်ကြမည်ဖြစ်သည်။
ကျောင်းသားများသည် ဇွန် ၂၉ ရက်မှစတင်၍ စာရင်းသွင်းခြင်းနှင့် Orientation (မိတ်ဆက်) အစီအစဉ်များကို တက်ရောက်ကြမည်ဖြစ်ပြီး၊ သင်တန်းဖွင့်ပွဲကို ဇူလိုင် ၆ ရက်တွင် အင်ဒိုနီးရှားနိုင်ငံ ဂျာဗားအလယ်ပိုင်းရှိ Cilacap မြို့၌ ကျင်းပသွားမည်ဖြစ်ကြောင်း သိရသည်။
သင်တန်းကာလမှာ (၁၄) လကြာမြင့်မည်ဖြစ်ပြီး Commercial Pilot License (CPL) ရရှိနိုင်ရေးအတွက် ကျောင်းသားများသည် Cilacap နှင့် Pangandaran မြို့များရှိ Perkasa Flight School ၏ လေ့ကျင့်ရေးစင်တာများတွင် လေယာဉ်မောင်းပညာရပ်များကို စနစ်တကျ သင်ယူလေ့ကျင့်သွားမည်ဖြစ်သည်။
MAI နှင့် Perkasa Flight School တို့အကြား ပူးပေါင်းဆောင်ရွက်မှုသည် အသက်မွေးဝမ်းကျောင်းပညာရေးနှင့် လေကြောင်းကဏ္ဍဆိုင်ရာ လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် အရေးပါသည့် ခြေလှမ်းတစ်ရပ်ဖြစ်ကြောင်း သိရသည်။
ထို့ပြင် ယင်းပူးပေါင်းဆောင်ရွက်မှုမှတစ်ဆင့် မြန်မာလူငယ်များ အင်ဒိုနီးရှားနိုင်ငံတွင် လေကြောင်းပညာရပ်များ ဆက်လက်သင်ယူနိုင်မည့် အခွင့်အလမ်းများ ပိုမိုတိုးပွားလာစေရန် အထောက်အကူပြုနိုင်မည်ဖြစ်သကဲ့သို့ မြန်မာ-အင်ဒိုနီးရှား နှစ်နိုင်ငံအကြား ပညာရေး၊ လေကြောင်းနှင့် လူ့စွမ်းအားအရင်းအမြစ် ဖွံ့ဖြိုးရေးဆိုင်ရာ ပူးပေါင်းဆောင်ရွက်မှုများကို ပိုမိုခိုင်မာစေမည်ဖြစ်ကြောင်း သိရသည်။

လားရှိုးမြို့ရှိ မဟာမြတ်မုနိရုပ်ရှင်တော်မြတ်ကြီးအား ပထမဝါဆိုလပြည့်နေ့တွင် မျက်နှာတော်သစ်ပူဇော်၊ အ နေကဇာတင်

တည်ငြိမ်အေးချမ်းလာသည့် ရှမ်းပြည်နယ်(မြောက်ပိုင်း)၊ လားရှိုးမြို့ရှိ မြို့ကျက်သရေဆောင် မဟာမြတ်မုနိရုပ်ရှင်တော်မြတ်ကြီးအား ယနေ့ ဇွန် ၂၉ ရက်(ပထ မဝါဆိုလပြည့်နေ့)တွင် မျက်နှာတော်သစ်ပူဇော်ပြီး အ နေကဇာတင်လှူခဲ့ကြကြောင်း သိရသည်။
ကြွရောက်တော်မူလာကြသည့် ဆရာတော်၊ သံဃာ တော်များနှင့် တာဝန်ရှိသူများက မဟာမြတ်မုနိရုပ်ရှင်တော်မြတ်ကြီးအား မျက်နှာတော်သစ်ပူဇော်ကာ ဆီမီး၊ ပန်း၊ ရေချမ်း၊ ဆွမ်းနှင့် သစ်သီးများဆက်ကပ်လှူဒါန်းပြီး ဆရာတော်၊ သံဃာတော်များကအနေကဇာတင်လှူပူဇော်ခဲ့ကြကြောင်း သိရသည်။
ထို့နောက် တက်ရောက်လာကြသူများက ဆရာတော်ကြီးများထံမှ ကိုးပါးသီလခံယူဆောက်တည်ပြီး ပရိတ်တရားတော်များကိုနာယူကာ လှူဖွယ်ဝတ္ထုပစ္စည်းများဆက်ကပ်လှူဒါန်း၍ လှူဒါန်းမှုအစုစုအတွက် ရေစက် သွန်းချအမျှပေးဝေခဲ့ကြကြောင်း သိရသည်။