ကုန်ကျစရိတ်တွေ မြင့်တက်နေပေမယ့် Grab ကားခ တိုးမလာတာကြောင့် ယာဉ်မောင်းတွေ အခက်ကြုံ
လက်ရှိမှာ စက်သုံးဆီဈေးနှုန်းတွေ၊ ကားပြုပြင် ထိန်းသိမ်းစရိတ်တွေ မြင့်တက်နေပေမယ့် Grab ကုမ္ပဏီရဲ့ ယာဉ်စီးခ သတ်မှတ်နှုန်းထား တိုးမလာတာကြောင့် ယာဉ်မောင်းတွေအနေနဲ့ ရေရှည်ရပ်တည်နိုင်ဖို့ အခက်ကြုံနေရတယ်လို့ သိရပါတယ်။
“မနက်အိပ်ရာထကတည်းက ဆီဖိုး တွက်ရတယ်။ တနေ့တာ ကားပြေးဆွဲဖို့ ဆီဖိုးအရင်ရှာရတယ်။ ကားပျက်မှာ၊ တာယာစားမှာ စိုးရိမ်ရတယ်။ အင်ဂျင်ဝိုင်၊ ပြုပြင်ထိန်းသိမ်းစရိတ်၊ ကားတန်ဖိုး ကျဆင်းမှုတွေကိုလည်း ကိုယ့်အိတ်ထဲကပဲ စိုက်ထုတ်ရတယ်။ အဲဒီအပေါ်မှာ Platform က ဖြတ်တောက်တဲ့ ကော်မရှင်က ရှိသေးတယ်။ ဆီဈေးတွေ တက်လာတဲ့အချိန်မှာ ယာဉ်မောင်းတွေရဲ့ ဝင်ငွေကို ဘာကြောင့် ခေတ်ကာလနဲ့အညီ ပြန်လည်တွက်ချက်ပေးဖို့ ဘာလို့ မစဉ်းစားကြတာလဲ” လို့ Grab ယာဉ်မောင်းတယောက်က ပြောပါတယ်။
ဒါအပြင် Grab ကုမ္ပဏီအနေနဲ့ ကော်မရှင်ခကိုလည်း ၂၀ ရာခိုင်နှုန်းကနေ ၂၅ ရာခိုင်နှုန်းအထိ ဖြတ်တောက်နေပြီး ခရီးစဉ် အကွာအဝေးအလိုက် ကော်မရှင်ခ သတ်မှတ်ချက်ကို ပွင့်လင်းမြင်သာစွာ ချပြနိုင်ခြင်း မရှိဘူးလို့ သိရပါတယ်။
“ကော်မရှင်ခက ဘယ်ခရီးစဉ်ကို ဘယ်လောက်ရလို့ ဘယ်လောက် ဖြတ်ပါတယ်ဆိုတာ မသိရဘူး။ ဖြတ်ချင်သလို ဖြတ်နေတာ။ ကားသမားအတွက်က ၁ ကီလိုကို ငွေ ၁၀၀၀ တောင် အပြည့်မရဘူး။ ဒါကို မကျေနပ်လို့ complain တက်ရင် system က မှားယွင်းစွာ ဆုံးဖြတ်သွားတဲ့အတွက် တောင်းပန်ပါတယ်၊ အထက်ကို သေချာလေး တင်ပြပေးပါ့မယ်လို့ပဲ အကြောင်းပြန်တယ်။ complain တက်တာကလည်း ဖုန်းဆက်ပြီး ပြောလို့မရဘူး။ official ဖုန်းနံပါတ် မထားထားဘူး။ အက်ပလီကေးရှင်းကနေပဲ ပြောလို့ရတယ်။ complain တက်တိုင်း system ကိုပဲ လွှဲချတာ။ အဲဒီတော့ မေးချင်တာက system က လူကလုပ်တာလား၊ သူ့ဘာသာသူ ဖြစ်တည်နေတာလားပေါ့။ အလကားနေ system ကိုပဲ လွှဲချနေတာ အဓိပ္ပာယ်မရှိဘူး” လို့ နောက်ထပ် Grab ယာဉ်မောင်းတယောက်က ပြောပါတယ်။
ခရီးသည်ဆီက ကောက်ခံတဲ့ ယာဉ်စီးခဈေးနှုန်းနဲ့ ယာဉ်မောင်းလက်ထဲ အမှန်တကယ် ရောက်ရှိလာတဲ့ ငွေကြေးကြားမှာ ပမာဏ မည်မျှ ကွာဟနေပြီး ကော်မရှင်ကို ဘယ်လိုစံနှုန်းနဲ့ သတ်မှတ်ကာ ယာဉ်မောင်းတွေအပေါ် ဘယ်လောက်မျှတမှု ရှိသလဲ ဆိုတာကို ပွင့်လင်းမြင်သာမှု ရှိစေချင်တယ်လို့ ဆိုပါတယ်။
“တက္ကစီသမားတယောက်ဟာ ကားမောင်းပြီး ငွေရှာနေတာမှန်ပေမယ့် အဲဒီငွေဟာ အမြတ်သက်သက် မဟုတ်ပါဘူး။ ဆီဖိုး၊ ကားစရိတ်၊ ကော်မရှင်နဲ့ မိသားစု စားဝတ်နေရေးကြားမှာ ခွဲဝေသုံးစွဲနေရတဲ့ ငွေဖြစ်ပါတယ်။ မကိုက်ရင် မဆွဲနဲ့ပေါ့လို့ ပြောလို့တော့ ရပါတယ်။ ဒါပေမယ့် ကျွန်တော်တို့အတွက်က ခေတ်ကာလ အခြေအနေအရ ရွေးချယ်ခွင့် မရှိဘူး။ အခုခေတ်မှာ လက်တားတွေကလည်း ယုံရတာမဟုတ်ဘူးလေ။ အဲဒီတော့ ဒီ အက်ပလီကေးရှင်းကိုပဲ မှီခိုနေရသလို ဖြစ်နေတဲ့အပေါ်မှာ အခွင့်အရေးယူခံနေရတာ” လို့ သူက ပြောပါတယ်။
