အသစ်ထွက်ပေါ်လာတဲ့ ဗီဒီယိုဖိုင်အရ အင်္ဂလန်ရဲ့ နော်ဝေပွဲစဉ်မှ ချေပဂိုးအား ခွင့်မပြုသင့်ကြောင်း သက်သေပြလာ
=====================

နော်ဝေပရိသတ်များက ဘောလုံးအား မမြင်ရတဲ့ အခိုက်အတန့် ကြုံရပြီးနောက် အင်္ဂလန်ရဲ့ ချေပဂိုးအား ခွင့်မပြုသင့်ဘူးလို့ အခိုင်အမာပြောဆိုနေကြကာ အကြီးအကျယ် ဒေါသထွက်လျက်ရှိကြပါတယ်။
အင်္ဂလန်ဟာ ဂျူ့ဘယ်လင်ဂမ်ရဲ့ ပထမပိုင်းပြီးခါနီးဂိုးဖြင့် နော်ဝေနှင့် ကမ္ဘ့ဖလားကွာတားဖိုင်နယ်ပွဲစဉ်မှာ အဖိုးတန်ချေပဂိုး ရရှိခဲ့ပါတယ်။
ဒါပေမဲ့ အနှေးပြကွက်များအရ အော်ဂျန်နိုင်လန်က ဘောလုံးအား ကန်တင်လိုက်ချိန်တွင် ကွင်းအပေါ်ဘက်ရှိ ကောင်းကင်ကင်မရာနှင့် ထိမိခဲ့ကြောင်း တွေ့ရပါတယ်။
ယင်းသို့ ထိမိပြီးနောက် အီးလီးယော့အင်ဒါဆင်က ဘောလုံး ရရှိခဲ့ပြီး အန်တိုနီဂေါ်ဒွန်ကို ဘောလုံးပေးပို့ခဲ့ပါတယ်။ ဂေါ်ဒွန်ရဲ့ ခင်းပေးမှုကနေ ဘယ်လင်ဂမ်က အနိုင်ဂိုးသွင်းယူခဲ့တာလည်း ဖြစ်ပါတယ်။
ဖီဖာရဲ့ စည်းမျဉ်းအရ ကွင်းအပေါ်ဘက်ရှိ ကင်မရာနှင့် ထိမိခဲ့တဲ့ ဘောလုံးအား DROP BALL အဖြစ် သတ်မှတ်ပါတယ်။
ဒါကြောင့်လည်း အင်္ဂလန်ရဲ့ ချေပဂိုးအား ခင့်မပြုခဲ့သင့်ပါဘူး။ ဒါ့အပြင် VAR ကလည်း ကြားဝင် စစ်ဆေးမှုပြုလုပ်လာသင့်ပါတယ်။
နော်ဝေနည်းပြစတဲလ်ဆိုလ်ဘက်ကင်ဟာ ဒိုင်လူကြီးကလီးမန့်တော်ပင်အား ဒေါသတကြီး စောဒကတက်ခဲ့တာ တွေ့ရပါတယ်။ သူဟာ ဘောလုံးနှင့် ကင်မရာထိမိခဲ့ကြောင်းလည်း လက်ညှိုးညွန်ပြခဲ့ပါသေးတယ်။ ဒါ့အပြင် ကစားသမားများကလည်း ကောင်းကင်ကို ညွန်ပြကာ ဘောလုံးနှင့် ကင်မရာိခဲ့ကြောင်း စောဒကတက်ခဲ့ပါတယ်။
ဒါပေမဲ့ ဒုတိယပိုင်းအတွင်းတွင် ဖီဖာက ဘောလုံးနှင့် ကင်မရာတို့ ထိခိုက်မိခြင်း ရှိ/မရှိ စစ်ဆေးမှု ပြုလုပ်ခဲ့ရာတွင် ထိမိခဲ့ခြင်း မရှိကြောင်း ကြေညာသွားပါတယ်။
တဖက်တွင် အင်္ဂလန်ကလည်း နော်ဝေတို့ ဦးဆောင်ဂိုး မသွင်းမီ ဟယ်ရီကိန်း ပြစ်ဒဏ်ကျူးလွန်ခြင်းခံခဲ့ရကြောင်း စောဒကတက်ခဲ့ပါတယ်။
အင်္ဂလန်ဟာ ပွဲပြီးခါနီးတွင် ဘယ်လင်ဂမ်ရဲ့ အနိုင်ဂိုးဖြင့် နော်ဝေအား ၂-၁ ဖြင့် အနိုင်ရရှိကာ ကမ္ဘာ့ဖလားဆီမီးဖိုင်နယ်သို့ တက်ရောက်သွားနိုင်ခဲ့ပါတယ်။
အင်္ဂလန်အသင်းဟာ ကမ္ဘာ့ဖလားဆီမီးဖိုင်နယ်တွင် ဆွစ်ဇာလန်ကို ၃-၁ ဖြင့် အနိုင်ယူလာခဲ့တဲ့ အာဂျင်တီးနားနှင့် ရင်ဆိုင်ကစားရပါမယ်။

ITV အင်တာဗျူးတွင် ဒေါသတကြီး ဝေဖန်သွားတဲ့ တူချယ်အား တုံ့ပြန်လာခဲ့တဲ့ ဘယ်လင်ဂမ်
==================

ဂျူ့ဘယ်လင်ဂမ်ဟာ နော်ဝေအား အနိုင်ရတဲ့ ကမ္ဘာ့ဖလားကွာတားဖိုင်နယ်ပွဲစဉ်မှ ခြေစွမ်းအပေါ် အားမလို အားမရဖြစ်ကာ ဝေဖန်မှုများ ပြုလုပ်သွားတဲ့ အင်္ဂလန်နည်းပြသောမတ်စ်တူချယ်အား တုံ့ပြန်ပြောဆိုလာပါတယ်။
အသက် ၂၃ နှစ်ရှိ ရီးရဲလ်မက်ဒရစ်စူပါစတားဟာ နော်ဝေအား ၂-၁ ဖြင့် အနိုင်ရတဲ့ပွဲစဉ်တွင် အင်္ဂလန်အတွက် အဖိုးတန် ၂ ဂိုးအား သွင်းယူကာ သူရဲကောင်းထပ်မံ ဖြစ်လာခဲ့သူ ဖြစ်ပါတယ်။
အင်္ဂလန်နည်းပြသောမတ်စ်တူချယ်ဟာ နော်ဝေအား အနိုင်ရတဲ့ပွဲအပြီးတွင် အင်္ဂလန်ကစားသမားများ အကြီးအကျယ် အောင်ပွဲခံနေချိန်မှာ ပြုလုပ်တဲ့ အင်တာဗျူးအတွင်းတွင် ကစားသမားများရဲ့ ခြေစွမ်းကို ဝေဖန်မှု ပြုလုပ်သွားခဲ့တာလည်း ဖြစ်ပါတယ်။
ဂျာမန်လူမျိုးနည်းပြက "ဒီခြေစွမ်းအပေါ် မပျော်ပါဘူး။ ဒီကနေ့ ကျွန်တော့်ကို ကိုယ့်ဘဝကို ခက်ခဲသထက် ခက်ခဲအောင် လုပ်နေခဲ့ကြတယ်။ ရလဒ်က အရမ်းကောင်းတယ်။ ကျွန်တော်တို့ နောက်ဆုံး ၄ သင်းကို တက်နိုင်ခဲ့ပြီ။ အရမ်းအံ့ဩစရာကောင်းတယ်။ ဒါပေမဲ့ ခြေစွမ်းအပေါ် မပျော်ပါဘူး။ အစွမ်းကုန်ကြိုးပမ်းကြတယ်။ ဒါပေမဲ့ ကစားပုံက ကိုယ့်ကိုယ်ကို ခက်ခဲအောင် လုပ်နေခဲ့ကြတယ်။ ခြေစွမ်းအပေါ် မပျော်ပါဘူး"လို့ ပြောကြားသွားပါတယ်။
ဒါပေမဲ့ သောမတ်စ်တူချယ်က အင်တာဗျူး ပြုလုပ်မှုအပြီးတွင် ပွဲစဉ်အလိုက် အကောင်းဆုံးကစားသမားဆုကို ရရှိခဲ့တဲ့ ဘယ်လင်ဂမ်က အင်တာဗျူး ပြုလုပ်ခဲ့ပါတယ်။
ယင်းအင်တာဗျူးမှာတော့ ဘယ်လင်ဂမ်က "ကျွန်တော်တို့ ဘယ်လို အခြေအနေမျိုးမှာ ကစားရတယ်ဆိုတာ သူ သိပုံမရပါဘူး"လို့ ပြောကြားသွားပါတယ်။
ယင်းနောက် ဘယ်လင်ဂမ်ဟာ "ဘယ်လိုပဲ ဖြစ်ဖြစ်လေ"လို့ ပြောဆိုကာ မျက်လုံးဝေ့ရမ်းပြီး စဉ်းစားနေခဲ့ပါတယ်။
ပြီးနောက် ၎င်းက "အရမ်းခက်ခဲတယ်။ တော်တော်ကြမ်းတယ်။ သူ့အနေနဲ့ အာလင်းဟာလန်း၊ နူဆာ၊ ဆော်လော့တို့လို ကစားသမားတွေနဲ့ ရင်ဆိုင်ရတာ ဘယ်လိုလဲဆိုတာ သိပုံမရပါဘူး။ ကစားရ လွယ်ကူတဲ့အသင်း မဟုတ်ပါဘူး။ ကျွန်တော်တို့ အပြုသဘောဆောင်တဲ့ ပတ်ဝန်းကျင်ဖန်တီးနိုင်ခဲ့လို့ နောက်ဆုံး ၄ သင်းစာရင်းသို့ ဆက်တက်နိုင်ခဲ့လို့ ထင်တယ်။ ဘောလုံးပေးပို့မှု အကြိမ်တစ်ထောင်လောက် လုပ်ပြီး ပွဲတိုင်း အနိင်ရနေဖို့ မလိုပါဘူး။ တခါတလေ ညစ်ပတ်ပြီး အနိုင်ယူဖို့လည်း လိုတယ်"လို့ ပြောကြားသွားပါတယ်။
တူချယ်နှင့် ဘယ်လင်ဂမ်တို့ဟာ ယခင်တုန်းကလည်း ရန်ကြွေးရန်စ ရှိခဲ့ကြဖူးသူများ ဖြစ်ပါတယ်။
တူချယ်က ယခင်တုန်းက ဘယ်လင်ဂမ်ရဲ့ အပြုအမူမှာ စက်ဆုပ်ရွံ့ရှာဖွယ်ကောင်းကြောင်း ဝေဖန်ခဲ့ဖူးပြီး ယင်းပြောဆိုမှုအတွက် တောင်းပန်ခဲ့ရဖူးပါတယ်။
သူဟာ အောက်တိုဘာလတုန်းက နိုင်ငံတကာပွဲစဉ်များတွင် ဘယ်လင်ဂမ်ကို ချန်လှပ်ခဲ့ဖူးပါတယ်။ ယင်းချန်လှပ်မှုကြောင့် ဘယ်လင်ဂမ်ရဲ့ အင်္ဂလန်အသင်းအနာဂတ်မှာ မရေမရာ ဖြစ်ခဲ့ရဖူးပါတယ်။
ဒါပေမဲ့ ဘယ်လင်ဂမ်ဟာ ကမ္ဘာ့ဖလားပြိုင်ပွဲတွင် ၆ ဂိုးအထိ သွင်းယူကာ အင်္ဂလန်အား ကမ္ဘာ့ဖလားဆီမီးဖိုင်နယ်သို့ ပို့ဆောင်ထားနိုင်ပြီ ဖြစ်ပါတယ်။

ချဲလ်ဆီးရဲ့ ရာသီကြိုလေ့ကျင့်ခန်းအစီအစဉ်နှင့် ပူးပေါင်းရန် ဂါနာချို ပျက်ကွက်လာ
=======================

အလီဂျန်ဒရိုဂါနာချိုဟာ ချဲလ်ဆီးရဲ့ ရာသီကြိုလေ့ကျင့်ခန်းအစီအစဉ်နှင့် ပူးပေါင်းလာခြင်း မရှိကြောင်း သိရပါတယ်။ ချဲလ်ဆီးဘက်က အာဂျင်တီးနားတောင်ပံကစားသမားကို ရောင်းချရန် ကြိုးပမ်းနေမှုနှင့်အတူ ကလပ်ရဲ့ ရာသီကြိုလေ့ကျင့်ခန်းအစီအစဉ်နှင့် ပူးပေါင်းလာခြင်း မရှိတာလည်း ဖြစ်ပါတယ်။
ချဲလ်ဆီးဟာ ကြာသပတေးနေ့တုန်းက ရာသီကြိုလေ့ကျင့်ခန်းအစီအစဉ် တင်ခဲ့တာ ဖြစ်ပြီး ကမ္ဘာ့ဖလားပြိုင်ပွဲတွင် ပါဝင်ခွင့်မရတဲ့ အသင်းများ ပါဝင်ခဲ့ပေမဲ့ ဂါနာချိုကတော့ ပါဝင်လာခြင်း မရှိပါဘူး။
အသက် ၂၀ နှစ်ရှိ ဂါနာချိုဟာ နွေရာသီတုန်းက ယူနိုက်တက်မှ ပေါင်သန်း ၄၀ ဖြင့် ၇ နှစ်စာချုပ်ဖြင့် ပြောင်းလာခဲ့ပေမဲ့လည်း အနာဂတ် မရေမရာ ဖြစ်နေမှုနှင့်အတူ ကလပ်ရဲ့ ရာသီကြိုလေ့ကျင့်ခန်းအစီအစဉ်နှင့် မပူးပေါင်းလာတာလည်း ဖြစ်ပါတယ်။
ချဲလ်ဆီးဟာ ဂါနာချိုအား အငှားဖြင့် ခေါ်ယူရန် စီးရီးအေကလပ်များရဲ့ စိတ်ဝင်စားခြင်းခံနေရပေမဲ့လည်း ပေါင် ၄၃ သန်းဖြင့် အပြီးသတ်ရောင်းချရန်သာ စိတ်ဝင်စားနေပါတယ်။
ပရီးမီးယားလိဂ်ကလပ်များနှင့် ဆော်ဒီကလပ်တို့ကလည်း ဂါနာချိုအား ခေါ်ယူရေး စိတ်ဝင်စားနေကာ အပြောင်းအရွှေ့ ဖြစ်မြောက်လာပါက ပြောင်းရွှေ့ကြေးရဲ့ ၁၀ ရာခိုင်နှုန်းကို ကလပ်ဟောင်းယူနိုက်တက်တို့ ခံစားခွင့် ရရှိလာပါမယ်။
ဂါနာချိုဟာ ပြီးခဲ့တဲ့ရာသီတုန်းက ချဲလ်ဆီးအတွက် ပရီးမီးယားလိဂ်ပွဲ ၂၄ ပွဲကစားခဲ့ရာမှာ ၁ ဂိုးတည်းသာ သွင်းနိုင်ခဲ့တာဖြစ်ပြီး မာရက်စ်ကာ၊ ရိုဆင်နီယာတို့ လက်အောက်တွင် ပုံမှန်ပွဲထွက်ကစားခွင့် ရရှိရေး ရုန်းကန်ခဲ့ရသူလည်း ဖြစ်ပါတယ်။
ချဲလ်ဆီးဟာ နည်းပြသစ်ဇာဘီးအလွန်ဆို လက်အောက်တွင်ကို ပြန်လည်တည်ဆောက်လာမှာ ဖြစ်ပြီး ဂါနာချိုမှာ အရောင်းစာရင်းတင်ခြင်းခံထားရသူများထဲတွင် ပါဝင်နေပါတယ်။
ချဲလ်ဆီးဟာ ယခုနွေရာသီတွင် အတ္တလန္တာမှ နောက်တန်းအစွန်လူမာကိုပယ်လက်စထရာကို ပေါင် ၄၇ သန်းဖြင့်လည်းကောင်း၊ စပို့တင်းမှ တောင်ပံကစားသမားဂျီယိုဗန်နီကွန်တာကို ပေါင်သန်း ၄၀ ဖြင့်လည်းကောင်း ခေါ်ယူထားပါတယ်။
၎င်းတို့ဟာ မာ့ခ်ကူကူရယ်လာကို ရီးရဲလ်မက်ဒရစ်သို့ ‌ပေါင် ၅၂ သန်း၊ တိုင်ရီကေးဂျော့ကို‌ ‌ပေါင် ၂၄ သန်းဖြင့် အဲဗာတန်ထံသို့ ရောင်းချထားပါတယ်။

တောင်အာဖရိကရဲ့ ကမ္ဘာ့ဖလားစတားအဒမ်ကို နေအိမ်တွင် အသက်သေဆုံးလျက် ရှိတွေ့ရ
==================

တောင်အာဖရိကနှင့် Mamelodi Sundowns ရဲ့ အလယ်တန်းကစားသမားဂျေဒန်အဒမ်ဟာ ကမ္ဘာ့ဖလားပြိုင်ပွဲတွင် နိုင်ငံအသင်းအတွက် ပါဝင်ကစားပြီး ရက်သတ္တပတ်အနည်းငယ်အကြာတွင်ပင် အသက် ၂၅ နှစ်မှာ သေဆုံးလာပါတယ်။
အဒမ်ဟာ ၂၀၂၆ ကမ္ဘာ့ဖလားပြိုင်ပွဲတွင် အုပ်စုအဆင့်မှ ထွက်ခွာခဲ့ရတဲ တောင်အာဖရိကရဲ့ ကမ္ဘာ့ဖလားအုပ်စုပွဲစဉ်တိုင်းတွင် ပါဝင်ကစားခဲ့သူ ဖြစ်ပြီး ၃၂ သင်း ရှုံးထွက်အဆင့်တွင် ပူးတွဲအိမ်ရှင်ကနေဒါကို ရှုံးနိမ့်ကာ ထွက်ခွာခဲ့ရတာပါ။
တောင်အာဖရိကရဲတပ်ဖွဲ့ဝင်များရဲ့အဆိုအရ စနေနေ့ နံနက်ပိုင်းတုန်းက ကိတ်တောင်းမြို့လယ်ရှိ နေအိမ်တစ်လုံးအတွင် အသက် ၂၅ နှစ်ရှိ အရွယ် လူတစ်ဦးရဲ့ သေဆုံးအလောင်းကို တွေ့ရှိခဲ့ရပြီး စုံစမ်းစစ်ဆေးမှုများ ပြုလုပ်နေကြောင်း ကြေညာသွားပါတယ်။
အဒမ်ဟာ အုပ်စု(က)အဖွင့်ပွဲတွင် ချက်နှင့် ၁ ဂိုးစီသရေကျတဲ့ပွဲစဉ်မတိုင်မီ နာရီအနည်းငယ်ခန့်အလိုတွင် အဘွားဖြစ်သူ သေဆုံးကြောင်း သိခဲ့ရပေမဲ့လည်း ယင်းပွဲတွင် ပွဲထွက်ကစားခဲ့သူ ဖြစ်ပါတယ်။
အဒမ်ဟာ တောင်အာဖရိကအသင်းအတွက် ၂၀၂၆ ကမ္ဘာ့ဖလားပြိုင်ပွဲတွင်မှ စတင်ကစားခွင့်ရလာခဲ့သူလည်း ဖြစ်ပါတယ်။
သူဟာ Stellenbosch FC တွင် ကစားသမားဘဝစတင်ပြီးနောက် ၂၀၂၅ ခုနှစ် ဇန်နဝါရီလတွင် Mamelodi Sundowns သို့ ပြောင်းခဲ့ကာ ယင်းတွင် အမှတ်ပေးဖလားနှင့် အာဖရိကချန်ပီယံလိဂ်ဖလား ဆွတ်ခူးနိုင်ခဲ့ပါတယ်။
သူဟာ ၂၀၂၃ ခုနှစ် အာဖရိကဖလားပြိုင်ပွဲ ဆီမီးဖိုင်နယ်ရောက် တောင်အာဖရိကအသင်းလူစာရင်းတွင်လည်း ပါဝင်ခဲ့သူဖြစ်ပါတယ်။

ဂျာမနီနည်းပြရာထူးအား လက်ခံရယူရန် သဘောတူညီမှု ရရှိလာတဲ့ ဂျာဂင်ကလော့ပ်
=====================

ဂျာဂင်ကလော့ပ်ဟာ ဂျာမနီအသင်းနည်းပြသစ်အဖြစ် တာဝန်ထမ်းဆောင်ရန် သဘောတူညီမှု ရရှိလာခဲ့ပြီ ဖြစ်ပါတယ်။
လီဗာပူးနည်းပြဟောင်းဟာ သောကြာနေ့တုန်းက နယူးယောက်ခ်တွင် ဂျာမနီဘောလုံးအဖွဲ့ချုပ်မှ စီနီယာအရာရှိတစ်ဦးနှင့် တွေ့ဆုံမှု ပြုလုပ်ခဲ့ပါတယ်။
ကလော့ပ်နှင့် ဂျာမန်ဘောလုံးအဖွဲချုပ်တို့ဟာ လာမဲ့အပတ်တွင် ဆက်လက် ဆွေးနွေးမှုများ ပြုလုပ်လာပါမယ်။ ဒါ့အပြင် ဂျာမနီဘောလုံးအဖွဲ့ချုပ်ဟာ ကလော့ပ် လက်ရှိ ဘောလုံးအကြီးအကဲအဖြစ် တာဝန်ထမ်းဆောင်နေတဲ့ ရက်ဘူးလ်နှင့်လည်း သဘောတူညီမှု ရရှိရေး ကြိုးပမ်းရပါဦးမယ်။
ဒါပေမဲ့ ကလော့ပ်နှင့် ဂျာမနီဘောလုံးအဖွဲ့ချုပ်အကြား သဘောတူညီမှု ရရှိလာမှုနှင့်အတူ ရက်ဘူးလ်နှင့် သဘောတူညီမှုရရှိရေးမှာ အချိန်အတိုင်းအတာတစ်ခုမျှသာ အချိန်ယူရန် လိုအပ်ပါတော့တယ်။
လီဗာပူးနှင့်ဒေါ့မွန်နည်းပြဟောင်းကလော့ပ်ဟာ ဂျာမနီအသင်းကို ၄ နှစ်စာချုပ်ဖြင့် ကိုင်တွယ်လာဖို့ ရှိနေပါတယ်။
ကလော့ပ်ဟာ လီဗာပူးကို ၉ နှစ်ကြာ ကိုင်တွယ်ပြီးနောက် ၂၀၂၄ ခုနှစ်တွင် ထွက်ခွာကာ ရက်ဘူးလ်တွင် ဘောလုံးအကြီးအကဲအဖြစ် တာဝန်ထမ်းဆောင်လာခဲ့တာလည်း ဖြစ်ပါတယ်။

ကမ္ဘာ့ဖလားပြိုင်ပွဲတွင် ချန်လှပ်ခံရတဲ့ အသည်းကွဲမှုကို ချစ်သူနှင့် လက်ထပ်ကာ ဖာထေးလာတဲ့ အင်္ဂလန်စတား
=======================

မန်စီးတီးနောက်ခံလူရီကိုလီဝစ်ဟာ ချစ်သူနှင့် လက်ထပ်ပွဲ ကျင်းပလာခဲ့ပြီ ဖြစ်ပါတယ်။
အသက် ၂၁ နှစ်ရှိ နောက်ခံလူဟာ သောမတ်စ်တူချယ်ရဲ့ အင်္ဂလန်ရဲ့ ကမ္ဘာ့ဖလားလူစာရင်းတွင် ချန်လှပ်ခြင်းခံခဲ့ရသူလည်း ဖြစ်ပါတယ်။
ဒါပေမဲ့ အင်္ဂလန်ရဲ့ ကမ္ဘာ့ဖလားလူစာရင်းတွင် ချန်လှပ်ခြင်းခံခဲ့ရမှုနှင့်အတူ လူငယ်နောက်တန်းအစွန်လူဟာ လူမှုဘဝကို ပိုမို အာရုံစိုက် လုပ်ဆောင်လာနိုင်ခဲ့ပါတယ်။
လီဝစ်ဟာ ဇူလိုင်လ ၇ ရက်နေ့တုန်းက ချစ်သူအမီလီယာနှင့် လက်ထပ်ခဲ့တဲ့ ဓာတ်ပုံများကို ဆိုရှယ်မီဒီယာတွင် တင်ကာ ပရိသတ်များကို အသိပေးလာပါတယ်။
၎င်းတို့နှစ်ဦး ဘယ်လောက်အထိ လက်တွဲလာကြသလဲဆိုတာ မသိရပေမဲ့ ၎င်းတို့ဟာ ပရိသတ်များရဲ့ ချစ်ခြင်းကို ရရှိခဲ့ကြပါတယ်။
သူဟာ ကမ္ဘာ့ဖလားပြိုင်ပွဲဝင် အင်္ဂလန်စတားများဖြစ်ကြတဲ့ နီကိုအိုရိုင်လီနှင့် မော်ဂန်ရိုဂျာတို့ရဲ့ ဂုဏ်ပြုစကားပြောဆိုခြင်းခံခဲ့ရသလို မန်စီးတီးစတားများရဲ့ ဂုဏ်ပြုစကားပြောဆိုခြင်းခံခဲ့ရပါတယ်။
လီဝစ်ဟာ အင်္ဂလန်အတွက် နောက်ဆုံးကစားခွင့်ရခဲ့တာ ၂၀၂၃ ခုနှစ်က ဖြစ်ပါတယ်။
သူဟာ ၂၀၂၃ နှင့် ၂၀၂၄ ခုနှစ်တုန်းက မန်စီးတီးအသင်း ပရီးမီးယားလိဂ်ဖလား ရရှိစဉ်တုန်းက အရေးပါတဲ့သူအဖြစ် ကစားခဲ့သူလည်း ဖြစ်ပါတယ်။
ဒါပေမဲ့ သူဟာ ပြီးခဲ့တဲ့ရာသီမှာတော့ ပရီးမီးယားလိဂ်ပွဲ ၁၁ ပွဲတည်းသာ ကစားခွင့်ရရှိခဲ့ပြီးနောက် အင်္ဂလန်အသင်းမှာ ချန်လှပ်ခံလာခဲ့ရပါတယ်။

ကမ္ဘာ့ဖလားပြိုင်ပွဲတွင် လက်စွမ်းပြခဲ့တဲ့ ကိတ်ဗာဒီသူရဲကောင်းဂိုးသမားဗိုဇင်ညာအား အသစ်တွေ့ရှိတဲ့ မျိုးစိတ်သစ်အမည်ပေး ဂုဏ်ပြုခံလာရ
======================

ကမ္ဘာ့ဖလားပြိုင်ပွဲတွင် လက်စွမ်းပြကစားနိုင်မှုကြောင့် တစ်ကမ္ဘာ့လုံးရဲ့ လက်ခုပ်သံ ပိုင်ဆိုင်ခဲ့တဲ့ ကိတ်ဗာဒီသူရဲကောင်းဗိုဇင်ညာဟာ အသစ်တွေ့ရှိတဲ့ ပင်လယ်ခရုမျိုးစိတ်သစ် အမည်ပေးကာ ဂုဏ်ပြုခံလာရပါတယ်။
ဇီဝပညာရှင် ဂျီးဆပ်စ်အော်တီယာဟာ ကာရေဘီယံတွင် အနီရောင်ခရုငယ်လေး မျိုးစိတ်သစ် တွေ့ရှိခဲ့တာ ဖြစ်ပြီး ယင်းမျိုးစိတ်သစ်အမည်အား အသက် ၄၀ နှစ်ရှိ ကိတ်ဗာဒီသူရဲကောင်းအမည်ပေးကာ ဂုဏ်ပြုလာတာပါ။
ယခုအခါ ယင်းခရုမျိုးစိတ်အမည်ကို Aldisa vozinha လို့ ခေါ်ဝေါ်လာပါတယ်။
ကိတ်ဗာဒီဟာ ကမ္ဘာ့ဖလားသမိုင်းတွင် ဒုတိယလူဦးရေအနည်းဆုံးနိုင်ငံအဖြစ် ယှဉ်ပြိုင်ခွင့် ရှရိခဲ့ပေမဲ့ အုပ်စုအဆင့်ကို ကျော်ဖြတ်နိုင်ခဲ့ကာ ၃၂ သင်းအဆင့်တွင် အာဂျင်တီးနားကို ၃-၂ ဖြင့် ရှုံးနိမ့်ပြီး ထွက်ခွာခဲ့ရပါတယ်။
ဗိုဇင်ညာဟာ ကမ္ဘာ့ဖလားအဖွင့်ပွဲတွင် ယူရိုချန်ပီယံ စပိန်နှင့်ပွဲစဉ်တွင် ဂိုးမရှိသရေကျအောင် လက်စွမ်းပြကစားပြီးနောက် နာမည်ကျော်ကြားလာခဲ့တာပါ။
ဗိုဇင်ညာဟာ ယခင်တုန်းက အင်စတာဂရမ်တွင် ဖော်လိုဝါ ၅၀၀၀၀ ဝန်းကျင်သာ ပိုင်ဆိုင်ခဲ့ပေမဲ့ စပိန်နှင့်ပွဲတွင် လက်စွမ်းပြနိုင်ပြီးနောက် ဖော်လိုဝါ ၁၇.၄ သန်းအထိ ပိုင်ဆိုင်လာကာ နေ့ချင်းညချင်းကျော်ကြားလာခဲ့ပါတယ်။
ပရော်ဖက်ဆာအော်တီယာဟာ အိုဒီဒိုတက္ကသိုလ်ရဲ့ ဂုဏ်ထူးဆောင်ပါမောက္ခတစ်ဦးဖြစ်ပြီး ကိတ်ဗာဒီအနီးရှိ ပင်လယ်ပြင်တွင် လုပ်ဆောင်မှုများအတွက် ၂၀၂၃ ခုနှစ်တုန်းက ကိတ်ဗာဒီအစိုးရရဲ့ Medal of Merit ဆု ချီးမြှင့်ခံခဲ့ရပါတယ်။
အသက် ၇၅ နှစ်ရှိ ဘောလုံးပရိသတ်ဟာ ယခင်တုန်းက ကော့စတာရီကာတွင် ရှာဖွေတွေ့ရှိမှုအသစ်တစ်ခုအား ရီးရဲလ်မက်ဒရစ်နှင့် ပီအက်စ်ဂျီဂိုးသမားဟောင်းကေလာနာဗက်စ်အမည်ပေးခဲ့ဖူးသလို စပိန်ကလပ် ဂီဂျွန်အမည်ကိုလည်း သတ္တဝါမျိုးစိတ်သစ်တစ်ခုအမည်ပေးခဲ့ဖူးပါတယ်။

လုပ်ခတောင်းဆိုမှုမြင့်မားမှုကြောင့် ဆာလက်ရဲ့ ဆော်ဒီအပြောင်းအရွှေ့ မရေမရာ ဖြစ်လာ
====================

မိုဟာမက်ဆာလက်ဟာ ဆော်ဒီသို့ ပြောင်းရွှေ့ရေး ဆက်လက် ဆွေးနွေးမှုများ ပြုလုပ်နေပြီး လုပ်ခတောင်းဆိုမှုမှာ အလွန်မြင့်မားနေမှုနှင့်အတူ အပြောင်းအရွှေ့မှာ ပျက်ပြယ်လာနိုင်တဲ့ အခြေအနေမှာ ရှိနေပါတယ်။
အသက် ၃၄ နှစ်ရှိ အီဂျစ်အသင်းခေါင်းဆောင်ဟာ ဇွန်လတုန်းက လီဗာပူးမှ ထွက်ခွာလာပြီးနောက် ကလပ်လက်မဲ့ ဖြစ်နေသူ ဖြစ်ပါတယ်။
သူဟာ လီဗာပူးတွင် ၉ နှစ်ကြာ ကစားစဉ်အတွင်း ပရီးမီးယားလိဂ်ဖလား ၂ ကြိမ်၊ ချန်ပီယံလိဂ်ဖလား ၁ ကြိမ်၊ အက်ဖ်အေဖလားတို့ ရယူနိုင်ခဲ့ပါတယ်။
တောင်ပံစတားကို ခေါ်ယူရန် ဆော်ဒီကလပ်များဖြစ်ကြတဲ့ Al-Hilal ၊ Al-Qadsiah တို့က စိတ်ဝင်စားနေကြပါတယ်။
ဒါပေမဲ့ အီဂျစ်စူပါစတားဘက်က လုပ်ခတောင်းဆိုမှု အလွန်မြင့်မားနေမှုနှင့်အတူ ဆော်ဒီလိဂ်သို့ ပြောင်းရေး မရေမရာ ဖြစ်နေပါတယ်။
ဆာလက်ဟာ လီဗာပူးနှင့် ၂၀၂၅ ခုနှစ်တုန်းက ချုပ်ဆိုခဲ့တဲ့ စာချုပ်ကြောင့် အန်ဖီးလ်တွင် တစ်ပတ်လုပ်ခ ပေါင် ၄၀၀၀၀၀ အထိ ရရှိခဲ့သူလည်း ဖြစ်ပါတယ်။
ဆာလက်ဟာ Al-Hilal သို့ ပြောင်းရွှေ့လာပါက ၂၀၁၇ ခုနှစ်တုန်းက လီဗာပူးသို့ သူ့ကို ခေါ်ဆောင်ခဲ့တဲ့ လီဗာပူးအကြီးအကဲဟောင်းမိုက်ကယ်အက်ဝတ်နှင့် ပြန်လည်ဆုံစည်းလာဖို့ ရှိနေပါတယ်။
လီဗာပူးပိုင်ရှင် FSG မှ နုတ်ထွက်လာတဲ့ အက်ဝတ်ကို Al-Hilal က အမှုဆောင်ချုပ်အဖြစ် ခန့်အပ်ရန် ကြိုးပမ်းနေပါတယ်။
လက်ရှိအချိန်တွင် Al-Hilal နှင့် Al-Qadsah တို့က ဆာလက်ကို ခေါ်ယူရန် ငွေကြေး အတောင့်တင်းဆံးဆော်ဒီကလပ်များဖြစ်ကြပါတယ်။
Al-Hilal မှာ ဆော်ဒီရဲ့အချမ်းသာဆုံးထဲမှ တစ်ဦးဖြစ်တဲ့ မင်းသားအယ်ဝါလက်ဘင်တာတဲလ်အယ်ဆက်ဒ်ရဲ့ ထောက်ပံ့မှု ရရှိထားတဲ့အသင်းလည်း ဖြစ်ပါတယ်။

စပိန်ရှုံးပွဲတွင် လူစားလဲမခံရမီ ပွဲကို ဆက်ကစားလိုခဲ့ကြောင်း ကော့တွိုက်စ် ဖွင့်ဟလာ
====================

သီဘောက်ကော့တွိုက်စ်က ကမ္ဘာ့ဖလားကွာတားဖိုင်နယ်တွင် စပိန်ကို ရှုံးနိမ့်ပြီးနောက် လူစားလဲလှယ်ခြင်းမခံရမီ ပွဲကို ဆက်ကစားရန် ကြံ့ခိုင်မှုရှိနေခဲ့ကြောင်း ပြောကြားလာပါတယ်။
ရီးရဲလ်မက်ဒရစ်ဂိုးသမားဟာ ကြွက်တက်ခြင်း (သို့မဟုတ်) ပေါင်ကြွက်သားဒဏ်ရာရရှိကာ ပွဲချိန် ၇၁ မိနစ်မှာ လူစားလဲလှယ်ခဲ့ရပါတယ်။
သူဟာ လူစားလဲလှယ်ပြီး ကွင်းထဲမှာ ထွက်ခွာလာချိန်တွင် မျက်ရည်ကျနေခဲ့ပါတယ်။
လူစားလဲလှယ်ပြီး ၂ မိနစ်အကြာတွင် လူစားဝင်ရောက်လာတဲ့ ဆန်နီလမ်မန်က ဘောလုံးအား ကာကွယ်ရာတွင် မီခေးလ်မီရီနိုကို ခင်းပေးသလို ဖြစ်သွားပြီး အနိုင်ဂိုးပေးလိုက်ရပါတယ်။
ယူနိုက်တက်ဂိုးသမားဟာ ဘယ်ဂျီယံအတွက် ၃ ပွဲမြောက်ကစားခဲ့တာပါ။
ပွဲအပြီးတွင် ကောတွိုက်စ်က ၎င်းမှာ ဘောလုံးကန်တင်ဘော မပြုလုပ်နိုင်ခြင်းမျှသာ ဖြစ်ပြီး ကစားဖော်များသာ ကူညီပါက ပွဲကို ဆက်ကစားနိုင်ကြောင်း ဖွင့်ဟပြောကြားလာပါတယ်။
ကော့တွိုက်စ်က "စိတ်မကောင်းဖြစ်မိတယ်။ ကျွန်တော် ကောင်းနေခဲ့တယ်။ စပိန်ကို တားဆီးနိုင်တယ်လို့ ခံစားနေခဲ့ရတယ်။ နည်းပြအဖွဲ့ကို ဘောလုံး ကန်တင်ချိန်မှာ နာကျင်မှု ခံစားရတယ်လို့ ပြောခဲ့တယ်။ ဂိုးပေါက်မှာ နေပြီး ကစားဖို့ ဘာပြဿနာမျှ မရှိဘူးလို့ ပြောခဲ့တယ်။ အဆုံးမှာ မန်နေဂျာက ကျွန်တော့်ကို လူစားလဲဖို့ ဆုံးဖြတ်ခဲ့တယ်။ ဘာပြဿနာမှ မရှိပါဘူး။ ဆန်နီလမ်မန်ကလည်း လှပတဲ့ အနာဂတ်ပိုင်ဆိုင်ထားတဲ့ အရမ်းကောင်းတဲ့ဂိုးသမားပါ။ ဒီအခိုက်အတန့်ကြောင့် သူ ပိုပြီး သန်မာလာပါလိမ့်မယ်"လို့ ပြောကြားသွားပါတယ်။
ဒါပေမဲ့ ကော့တွိုက်စ်ဟာ လူစားလဲလှယ်မှု၊ ဂိုးပေးလိုက်ရမှုတို့အတွက် လမ်မန်နှင့် နည်းပြရူဒီဂါစီယာတို့ကို အပြစ်တင်ရန် ငြင်းဆိုသွားပါတယ်။

အင်္ဂလန်နှင့် နော်ဝေပွဲ ပထမပိုင်းအပြီးတွင် ဗြိတိန်ပေါ့ပ်စတား ဖျော်ဖြေလာမည်
==================

ပေါ့ပ်စတားအယ်လီဂိုးလ်ဒင်းဟာ အင်္ဂလန်ရဲ့ နော်ဝေနှင့် ကမ္ဘာ့ဖလားကွာတားဖိုင်နယ်ပွဲစဉ်တွင် ဖျော်ဖြေလာပါမယ်။
အင်္ဂလန်ဟာ စနေနေနေ့တွင် မိုင်ယာမီရှိ Hard Rock Stadium တွင် အာလင်းဟာဟန်းရဲ့ နော်ဝေနှင့် ရင်ဆိုင်ကစားရပါမယ်။
အသက် ၃၉ နှစ်ရှိ ဂိုးလ်ဒင်းဟာ ပထမပိုင်းအပြီးတွင် ပရိသတ် ၆၅၃၂၆ ရှေ့မှောက်မှာ သီချင်းသီဆိုဖျော်ဖြေသွားပါမယ်။
ပေါပ်စတားက အထက်ပါ သတင်းအား ၂၀၁၂ ခုနှစ်တုန်းက သူမရဲ့ နာမည်ကျော်ခဲ့တဲ့ သီချင်း “Anything Could Happen” ကို ရည်ရွယ်ပြီး "အင်္ဂလန်-နော်ဝေပွဲ ပထမပိုင်းမှာ ဖျော်ဖြေခွင့်ရလာတဲ့အတွက် ဘာမဆို ဖြစ်လာနိုင်တယ်လို့ ခံစားမိတယ်။ ကောင်လေးတွေ အင်္ဂလန်ကို ဂုဏ်ယူရအောင် လုပ်လာမှာပါ။ it’s coming home"လို့ ပို့စ်တင်သွားပါတယ်။
ဂိုးလ်ဒင်းဟာ အဒဲလ်နှင့်အတူ ရောင်းအားကောင်းဆုံးနံပါတ်တစ်အယ်ဘတ်အများဆုံး ပိုင်ဆိုင်သူအဖြစ် ပူးတွဲ စံချိန်တင်ထားသူလည်း ဖြစ်ပါတယ်။
သူမရဲ့ သီချင်း ၁၄ ပုဒ်က Billboard Hot 100 စာရင်းတွင် ဝင်ရောက်ကာ စံချိန်တင်ထားပါသေးတယ်။
ယခုနှစ် ကမ္ဘာ့ဖလားပြိုင်ပွဲတွင် Super Bowl ကဲ့သို့ ပထမပိုင်းအပြီး ဖျော်ဖြေပွဲများ ထည့်သင်းထားပါတယ်။
ဇူလိုင်လ ၁၉ ရက်နေ့ ကမ္ဘာ့ဖလားဗိုလ်လုပွဲပထမပိုင်းအပြီးတွင်လည်း ဂျပ်စတင်ဘီဘာ၊ ရှာကီရာ၊ ဘီတီအက်စ်၊ ဘန်နာဘွိုင်းတို့ ဖျော်ဖြေလာကြပါမယ်။