ရန်ကုန်အနောက်ပိုင်းနည်းပညာတက္ကသိုလ်၌ပြုလုပ်သည့် မိုးရာသီသစ်ပင်စိုက်ပျိုးပွဲ သစ်ပင်ပေါင်း(၁,၃၇၄) ပင်စိုက်ပျိုး

မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအ သင်းချုပ်နှင့် ရန်ကုန်အနောက်ပိုင်းနည်းပညာတက္က သိုလ်တို့ပူးပေါင်း၍ "မိုးရာသီသစ်ပင်စိုက်ပျိုးပွဲတော်" ကို ယနေ့ ဇွန် ၂၁ ရက်နံနက် ၈ နာရီခွဲက ရန်ကုန်အ နောက်ပိုင်းနည်းပညာတက္ကသိုလ်၌ပြုလုပ်ခဲ့ကြသည်။
အဆိုပါ မိုးရာသီသစ်ပင်စိုက်ပျိုးပွဲတွင် မန်ဂျန်ရှား (၁၀၀)ပင်၊ ပျဉ်းမ(၁၅၀)ပင်၊ မယ်ဇယ်(၁၀၀)ပင်၊ မ ဟော်ဂနီ(၂၀၀)ပင်၊ ကျွန်း(၂၀၀)ပင်၊ ကံ့ကော်(၂၀၀) ပင်၊ ထိုင်ဝမ်ဗေဒါ(၁၇၄)ပင်၊ ခရေ(၁၀၀)ပင်နှင့် စိန်ပန်း (၁၅၀)ပင်(စုစုပေါင်း (၁,၃၇၄)ပင်)ကိုစိုက်ပျိုးခဲ့ကြသည်။
ရန်ကုန်တိုင်းဝန်ကြီးချုပ်ဦးအောင်နိုင်သူ၊ ရန်ကုန်တိုင်း​ဒေသကြီးလွှတ်​တော်ဥက္ကဋ္ဌဦး​ဌေး​အောင်နှင့် တာဝန်ရှိသူများတက်ရောက်၍ မြန်မာနိုင်ငံဆောက်လုပ်ရေးဆိုင် ရာလုပ်ငန်းရှင်များအသင်းဥက္ကဋ္ဌနှင့် အဖွဲ့ဝင်များ၊ ရန်ကုန်အနောက်ပိုင်းနည်းပညာတက္ကသိုလ် ပါမောက္ခချုပ်၊ ကျောင်းသား/သူများနှင့်အတူ သစ်ပင်များကိုစိုက်ပျိုးပေးခဲ့ကြသည်။

တစ်နှစ်ထက်အထက် အသုံးပြုမှုမရှိသည့် ဘဏ်စာရင်းများကို စာရင်းသေအဖြစ် သတ်မှတ်ပြီး ဝန်ဆောင်ခကောက်ခံမည်ဟု ဧရာဝတီဘဏ် ထုတ်ပြန်

ဧရာဝတီဘဏ်ခွဲများတွင် ဖွင့်လှစ်ထားသော စာရင်းရှင်စာရင်း၊ ငွေစုဘဏ်စာရင်းနှင့် ခေါ်ယူအပ်ငွေစာရင်းများ၌ နောက်ဆုံး ငွေသွင်း/ငွေထုတ် ပြုလုပ်ခဲ့သည့် နေ့ရက်မှစ၍ ရက်ပေါင်း (၃၆၅) ရက် (တစ်နှစ်) ပြည့်မြောက်သည်အထိ တစ်စုံတစ်ရာ အသုံးပြုခြင်း မရှိပါက အဆိုပါဘဏ်စာရင်းများကို "စာရင်းသေစာရင်း" အဖြစ် သတ်မှတ်သွားမည်ဖြစ်ကြောင်း ဘဏ်မှ အသိပေးထုတ်ပြန်ထားသည်။
ဘဏ်စာရင်းများ ပြန်လည်အသုံးပြုခြင်းနှင့် ဝန်ဆောင်ခ သတ်မှတ်ချက်များ
အသုံးပြုခွင့် ယာယီပိတ်သိမ်းခြင်း
စာရင်းသေအဖြစ် သတ်မှတ်ခံရသည့် ဘဏ်စာရင်းများကို ဘဏ်ခွဲများတွင် သာမန်အတိုင်း အသုံးပြုခွင့်အပြင် အီလက်ထရွန်နစ်ဘဏ်စနစ်၊ မိုဘိုင်းဘဏ်စနစ်၊ ငွေပေးချေမှုစနစ်၊ အလိုအလျောက်ငွေထုတ်စက်များနှင့် ကတ်စနစ်များအပါအဝင် မည်သည့်နည်းလမ်းဖြင့်မဆို ပြန်လည်အသုံးပြုခြင်းကို ယာယီပိတ်သိမ်းထားမည်ဖြစ်သည်။ ၎င်းစာရင်းများကို ပြန်လည်အသက်သွင်းလိုပါက နီးစပ်ရာ ဘဏ်ခွဲများသို့ ကာယကံရှင်ကိုယ်တိုင် လူကိုယ်တိုင်သွားရောက် ဆက်သွယ်ဆောင်ရွက်ရမည်ဖြစ်သည်။
စာရင်းထိန်းသိမ်းခ ကောက်ခံခြင်း
ကာလရှည် အသုံးပြုခြင်းမရှိသည့် အသက်မဝင်သော ဘဏ်စာရင်းများအတွက် တစ်လလျှင် စာရင်းထိန်းသိမ်းခ (၃,၀၀၀) ကျပ်နှင့် စာရင်းသေစာရင်းများအတွက် တစ်လလျှင် (၅,၀၀၀) ကျပ်နှုန်းဖြင့် (၃) လလျှင် တစ်ကြိမ် ဘဏ်စာရင်းထဲမှ ဖြတ်တောက်ကောက်ခံသွားမည်ဖြစ်သည်။
ဘဏ်စာရင်း အလိုအလျောက် ပိတ်သိမ်းခြင်း
အဆိုပါ စာရင်းထိန်းသိမ်းခကို ပထမအကြိမ် ကောက်ခံပြီးနောက် ရက်ပေါင်း (၉၀) အတွင်း ကာယကံရှင်မှ ဘဏ်သို့ လာရောက်ဆက်သွယ်ခြင်း မရှိပါက ဒုတိယအကြိမ် ထပ်မံဖြတ်တောက်မည် ဖြစ်သည်။ ဘဏ်စာရင်းအတွင်းရှိ ငွေလက်ကျန် ကုန်ဆုံးသွားသည်အထိ (၃) လလျှင် တစ်ကြိမ် နှုန်းဖြင့် ဆက်လက်ဖြတ်တောက်သွားမည်ဖြစ်ပြီး၊ ငွေကြေးလုံးဝမရှိတော့ပါက ဘဏ်မှ အလိုအလျောက် အပြီးပိုင် ပိတ်သိမ်းသွားမည်ဖြစ်သည်။
ထို့ပြင် (၇) နှစ်နှင့်အထက် ကာလရှည်ကြာသည်အထိ စာရင်းသေအဖြစ် တည်ရှိနေသည့် ဘဏ်စာရင်းများကိုမူ ငွေရေးကြေးရေးအဖွဲ့အစည်းများ ဥပဒေအရ မြန်မာနိုင်ငံတော်ဗဟိုဘဏ်မှ ထုတ်ပြန်ထားသည့် မူဝါဒလမ်းညွှန်ချက်များနှင့်အညီ ဆက်လက်အရေးယူ ဆောင်ရွက်သွားမည်ဖြစ်ကြောင်း ဧရာဝတီဘဏ်၏ ထုတ်ပြန်ချက်အရ သိရသည်။

ပြည်မြို့ ခုတင်(၅၀၀)ဆံ့ပြည်သူ့ဆေးရုံတွင် မွေးရာပါနှုတ်ခမ်းကွဲ၊ အာခေါင်ကွဲ လူနာ(၂၆)ဦးအား အခမဲ့ခွဲစိတ်ကုသပေး

ပဲခူးတိုင်းဒေသကြီး၊ ပြည်မြို့ရှိ ခုတင်(၅၀၀)ဆံ့ အထွေထွေရောဂါကု ပြည်သူ့ဆေးရုံကြီးတွင် မွေးရာပါနှုတ်ခမ်းကွဲနှင့် အာခေါင်ကွဲ လူနာ(၂၆)ဦးအား ဇွန် ၂၀ ရက်နှင့် ၂၁ ရက်တို့အတွင်း အခမဲ့ခွဲစိတ်ကုသပေးခဲ့ကြောင်း သိရသည်။
အဆိုပါ ခွဲစိတ်ကုသမှုအစီအစဉ်ကို ပဲခူးတိုင်းဒေသကြီးအစိုးရအဖွဲ့၏ ဦးဆောင်လမ်းညွှန်မှုဖြင့် ဆောင်ရွက်ခဲ့ခြင်းဖြစ်ပြီး ရန်ကုန်ပြည်သူ့ဆေးရုံကြီး မျက်နှာ၊ မေးရိုး၊ ခံတွင်းနှင့် ပြုပြင်မှုဆိုင်ရာ ခွဲစိတ်ကုသဌာနမှ ပါမောက္ခ/ဌာနမှူး ဒေါက်တာလှမျိုးနိုင် ဦးဆောင်ကာ မျက်နှာ၊ မေးရိုး၊ ခံတွင်းခွဲစိတ်ဌာနမှ ဆေးလက်တွေ့ပါရဂူဘွဲ့လွန် သင်တန်းသားများက အခမဲ့ကုသပေးခဲ့ကြခြင်း ဖြစ်သည်။
ခွဲစိတ်ကုသမှုတွင် မွေးရာပါနှုတ်ခမ်းကွဲ လူနာ(၁၅)ဦးနှင့် အာခေါင်ကွဲ လူနာ(၁၁)ဦး စုစုပေါင်း (၂၆)ဦးအား အောင်မြင်စွာ ခွဲစိတ်ကုသပေးနိုင်ခဲ့ကြောင်း သိရသည်။
ထို့အပြင် ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်းနှင့် တာဝန်ရှိသူများသည် ဇွန် ၂၁ ရက်တွင် ဆေးရုံသို့ သွားရောက်ကြည့်ရှုအားပေးခဲ့ပြီး ကုသမှုခံယူနေသည့် လူနာများအား အာဟာရမုန့်များ၊ ကြက်ဥများနှင့် ချီးမြှင့်ငွေများ ပေးအပ်ခဲ့ကြောင်း သိရသည်။

GPS စနစ်ဖြင့် စောင့်ကြည့်စစ်ဆေးရာ သတ်မှတ်လမ်းကြောင်းမှ လွဲချော်သည့် ဆီသယ်ယာဉ်(၂)စီး ဖမ်းဆီးရမိ

ရန်ကုန်မြို့ သီလဝါဆိပ်ကမ်းမှ ကရင်ပြည်နယ်နှင့် တနင်္သာရီတိုင်းဒေသကြီးတို့သို့ စက်သုံးဆီတင်ဆောင် ထွက်ခွာခဲ့သော်လည်း သတ်မှတ်လမ်းကြောင်းအတိုင်း သွားလာခြင်းမရှိသည့် ဆီသယ်ယာဉ်(၂)စီးကို GPS စနစ်ဖြင့် စောင့်ကြည့်စစ်ဆေးရာမှ ဖမ်းဆီးရမိခဲ့ကြောင်း လျှပ်စစ်နှင့် စွမ်းအင်ဝန်ကြီးဌာနထံမှ သိရသည်။
လျှပ်စစ်နှင့် စွမ်းအင်ဝန်ကြီးဌာန၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာနသည် ဆီသယ်ယာဉ်များတွင် GPS စနစ်တပ်ဆင်ကာ Online Monitoring Center မှတစ်ဆင့် သတ်မှတ်လမ်းကြောင်းအတိုင်း သွားလာမှု ရှိ၊ မရှိနှင့် စက်သုံးဆီများအား သက်ဆိုင်ရာနေရာများသို့သာ ပို့ဆောင်ခြင်း ရှိ၊ မရှိကို တိုက်ရိုက်စောင့်ကြည့်စစ်ဆေးလျက်ရှိကြောင်း သိရသည်။
ဖမ်းဆီးရမိသည့် ယာဉ်များအနက် ဆီသယ်ယာဉ်အမှတ် 5P/8614 နှင့် နောက်တွဲယာဉ်အမှတ် 1TLR-9177 သည် သီလဝါမှ ကရင်ပြည်နယ် ဘားအံမြို့သို့ စက်သုံးဆီပို့ဆောင်ရန် ထွက်ခွာခဲ့သော်လည်း ကျိုက်ထိုမြို့အနီးတွင် ရပ်တန့်နေကြောင်း GPS မှတစ်ဆင့် တွေ့ရှိရသဖြင့် စုံစမ်းစစ်ဆေးခဲ့ရာ စက်သုံးဆီများကို သတ်မှတ်ထားသည့် နေရာသို့ မပို့ဆောင်ဘဲ တရားမဝင် လွှဲပြောင်းရောင်းချခဲ့ကြောင်း စစ်ဆေးတွေ့ရှိခဲ့သည်။
ယင်းဖြစ်စဉ်နှင့်ပတ်သက်၍ ကျိုက်ထိုမြို့မရဲစခန်းတွင် (ပ)၁၇၃/၂၀၂၆ ဖြင့် အရေးကြီးကုန်စည်များဆိုင်ရာ ဥပဒေပုဒ်မ ၅ အရ အမှုဖွင့်အရေးယူထားကြောင်း သိရသည်။
ထို့ပြင် ဆီသယ်ယာဉ်အမှတ် 9D-8840 နှင့် နောက်တွဲယာဉ်အမှတ် TLR-9550 သည် သီလဝါမှ တနင်္သာရီတိုင်းဒေသကြီး မြိတ်မြို့သို့ စက်သုံးဆီပို့ဆောင်ရန် ထွက်ခွာခဲ့သော်လည်း ကျိုက်ထိုနှင့် ဘီးလင်းမြို့ကြား အလိုတော်ပြည့်ဘုရားအနီးတွင် ရပ်တန့်နေကြောင်း တွေ့ရှိရသဖြင့် စုံစမ်းရှာဖွေခဲ့ရာ မုဒုံမြို့နယ် ဒိုးမားကျေးရွာအနီး မော်လမြိုင်-သံဖြူဇရပ် ကားလမ်းဘေး၌ ယာဉ်မောင်းမရှိဘဲ ရပ်တန့်ထားသည့် ယာဉ်ကို တွေ့ရှိခဲ့ကြောင်း သိရသည်။
လက်ရှိတွင် အဆိုပါယာဉ်အား မုဒုံမြို့မရဲစခန်း၌ ထိန်းသိမ်းထားပြီး ဆက်လက်စစ်ဆေးမှုများ ဆောင်ရွက်လျက်ရှိကြောင်း သိရသည်။
လျှပ်စစ်နှင့် စွမ်းအင်ဝန်ကြီးဌာန၏ အချက်အလက်များအရ ရေနံနှင့် ရေနံထွက်ပစ္စည်း သယ်ယူပို့ဆောင်ရေးလုပ်ငန်းများတွင် GPS စနစ်တပ်ဆင်ကာ ကြီးကြပ်စစ်ဆေးသည့် စနစ်အတွင်း ဝင်ရောက်ပြီးမှသာ သယ်ယူပို့ဆောင်ခွင့် လက်မှတ်များ ထုတ်ပေးလျက်ရှိပြီး ယနေ့အထိ ဆီသယ်ယာဉ် စုစုပေါင်း (၅,၁၀၆)စီးတွင် GPS စနစ်များ တပ်ဆင်ကာ စောင့်ကြည့်စစ်ဆေးရေးစနစ်အတွင်း ဝင်ရောက်ပြီးဖြစ်ကြောင်း သိရသည်။

MFF ၏ Service Award ဆုချီးမြှင့်ခြင်းခံထားရသော ရွှေခတ်အကြို မြန်မာ့လက်ရွေးစင်ကစားသမားဦးဘရီ ယနေ့ ဇွန် ၂၂ ရက်ကကွယ်လွန်

ရွှေခတ်အကြို မြန်မာ့လက်ရွေးစင်ကစားသမားဦးဘရီ (၈၈)နှစ်သည် ယနေ့ ဇွန် ၂၂ ရက်နံနက်ပိုင်းက ကွယ်လွန်သွားခဲ့ကြောင်း မြန်မာနိုင်ငံဘောလုံးအဖွဲ့ချုပ်ထံမှ သိရသည်။
ဦးဘရီသည် မြန်မာ့လက်ရွေးစင်ကစားသမားအဖြစ် နိုင်ငံတကာပြိုင်ပွဲများတွင် နိုင်ငံအတွက်ဆုတံဆိပ်များ ရယူပေးခဲ့သည့်အပြင် အပြည်ပြည်ဆိုင်ရာဒိုင်လူကြီး၊ မြန်မာနိုင်ငံဘောလုံးအဖွဲ့ချုပ် ပြိုင်ပွဲကျင်းပရေးအရာရှိ၊ စည်းကမ်းထိန်းသိမ်းရေးကော်မတီတာဝန်များအား နှစ်ပေါင်းများစွာတာဝန်ထမ်းဆောင်ခဲ့သူဖြစ်ကြောင်း သိရသည်။
ထို့ကြောင့် MFF ကတာဝန်ကျေပွန်စွာထမ်းဆောင်ခဲ့သည့် ဦးဘရီအား ၂၀၂၄ ခုနှစ်တွင် Service Award ဆုကို ချီးမြှင့်ဂုဏ်ပြုခဲ့ရာ ယခု ဦးဘရီကွယ်လွန်ခြင်းသည် မြန်မာ့ဘောလုံးလောကအတွက် ဆုံးရှုံးနစ်နာစရာတစ်ခုဖြစ်၍ ဦးဘရီ၏သမိုင်းမှတ်တမ်းကောင်းများအတွက် ဂုဏ်ပြုလေးစားနေမည်ဟု MFF က ဝမ်းနည်းစကားဆိုခဲ့သည်။

ရန်ကုန်-မန္တလေး အမြန်လမ်းတွင် Express ယာဉ် နှစ်စီးတိုက်မှုဖြစ်ပွား
‌ေ-သဆုံးသူ(၃)ဦးရှိ

ရန်ကုန်-မန္တလေးလမ်းမကြီး၊ မိုင်တိုင်အမှတ် ၁၁၇/၇ ဖာလုံတွင် ယနေ့ မနက်(၃)နာရီဝန်းကျင်တွင် ရတနာဖြိုး Express ယာဉ်အား နောက်မှ ရွှေမန္တလာ Express ယာဉ် ဝင်တိုက်မှုဖြစ်ပွားခဲ့ကြောင်း သိရသည်။
အဆိုပါဖြစ်စဉ်ကြောင့် ကျား(၆)ဉီး၊ ကိုရင်(၁)ပါး စုစုပေါင်း (၇)ဦးအနက် ကျား(၃)ဦးနှင့် ကိုရင်(၁)ပါး ထိခိုက်ဒဏ်ရာရရှိခဲ့ပြီး ကျား(၃)ဦး ‌ေ-သဆုံးခဲ့ကြောင်း MFSD မြန်မာနိုင်ငံမီးသတ်တပ်ဖွဲ့ဌာနချုပ် က ထုတ်ပြန်ချက်အရသိရသည်။
၁၁၅ မိုင် အမြန်လမ်းမီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက် ဆောင်ရွက်ခဲ့ခြင်းလည်း ဖြစ်သည်။
ထိခိုက်ဒဏ်ရရရှိသူများကို မြို့မလူမှုကူညီရေးအသင်းတို့မှ သူနာတင်ယာဉ်များဖြင့် ဖြူမြို့နယ်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။

ယနေ့တွင် မန္တလေးမြို့၌ ပါချုပ်ဆရာတော်ကြီး အထူးဓမ္မသဘင် တရားပွဲ ဟောပြောရန် ရှိ

ယနေ့ (ဇွန် ၂၂) ၌ မန္တလေးမြို့တွင် ပါမောက္ခချုပ်ဆရာတော်ကြီးမှ အထူးဓမ္မသဘင် တရားပွဲ အစီအစဉ် ဟောပြောရန် ရှိသည်ဟု မြို့ခံများထံမှ သိရသည်။
ဓမ္မသဘင်ဆင်ယင်ကျင်းပမည့်နေရာသည် မန္တလေးမြို့၊ ပြည်ကြီးတံခွန်မြို့နယ်၊ ၅၂ လမ်း၊ ၁၂၃*၁၂၄ လမ်း ဖြစ်သည်။
ကျင်းပမည့် အချိန်သည် ညနေ လေးနာရီမှ စတင်ကာ ကျင်းပမည် ဖြစ်ကြောင်းလည်း သိရသည်။

ဗြိတိန်ဝန်ကြီးချုပ် တာဝန်တွေလွှဲပြောင်းပေးဖို့ သူ့အဖွဲ့ စတင်ပြင်ဆင်နေပြီ

ဗြိတိန်ဝန်ကြီးချုပ် ကီယာ စတားမားရဲ့ နိုင်ငံရေးအဖွဲ့ဟာ အောက်လွှတ်တော်အမတ် အန်ဒီ ဘန်ဟမ် ရဲ့ လူယုံတွေဆီကို တာဝန်တွေ စတင်လွှဲပြောင်းပေးနေပြီလို့ သတင်းရင်းမြစ်တွေကို ကိုးကားပြီး The Guardian သတင်းစာက ဖော်ပြထားပါတယ်။ ဒီလှုပ်ရှားမှုဟာ ဗြိတိန်နိုင်ငံမှာ အာဏာလွှဲပြောင်းမှုတစ်ခု မကြာခင် ဖြစ်လာတော့မယ်ဆိုတာကို ပြသနေတာပါ။
သတင်းစာရဲ့ အဆိုအရ လန်ကတ်စတာ နယ်စားမြေဆိုင်ရာ အဓိပတိ(Chancellor of the Duchy of Lancaster)ဖြစ်တဲ့ ဒါရင် ဂျုံးစ်ဟာ ဘန်ဟမ်အဖွဲ့ရဲ့ အဓိကလူတစ်ယောက်ဖြစ်တဲ့ ဗြိတိန်သယ်ယူပို့ဆောင်ရေးဝန်ကြီးဟောင်း လူဝစ် ဟိတ်ဂ် နဲ့ တွေ့ဆုံခဲ့ပြီးပြီလို့ သိရပါတယ်။ ဒါ့အပြင် ပြီးခဲ့တဲ့ ဇွန်လ ၂၀ ရက်နေ့က ဝန်ကြီးချုပ် စတားမားနဲ့ သူ့ရဲ့ အနီးကပ်အဖွဲ့ဝင်တွေဟာ ရာထူးက နုတ်ထွက်မယ့်အကြောင်း ကြေညာမယ့် မိန့်ခွန်းကို စတင်ရေးဆွဲနေကြပြီလို့လည်း သတင်းမှာ ဖော်ပြထားပါတယ်။ ဒါပေမဲ့ စတားမားအနေနဲ့ ဘန်ဟမ်နဲ့ စကားပြောချင်တယ်လို့ လူသိရှင်ကြား ပြောထားခဲ့ပေမယ့်လည်း၊ ဘန်ဟမ် အောက်လွှတ်တော် ကြားဖြတ်ရွေးကောက်ပွဲမှာ နိုင်ပြီးကတည်းက အခုထိ နှစ်ယောက်ကြား စကားမပြောရသေးဘူးလို့ သတင်းစာက ဆိုပါတယ်။
ဂရိတ်တား မန်ချက်စတာမြို့တော်ဝန်ဟောင်းလည်းဖြစ်၊ လေဘာပါတီဝင် နိုင်ငံရေးသမားတစ်ဦးလည်းဖြစ်တဲ့ ဘန်ဟမ်ဟာ ဇွန်လ ၁၈ ရက်နေ့က ကျင်းပခဲ့တဲ့ အောက်လွှတ်တော် ကြားဖြတ်ရွေးကောက်ပွဲမှာ အနိုင်ရရှိခဲ့ပြီးနောက်ပိုင်း၊ စတားမား ရာထူးက နုတ်ထွက်နိုင်ခြေရှိတယ်ဆိုတဲ့ သတင်းတွေ ပိုပြီးအရှိန်မြင့်လာခဲ့တာပါ။ ဒီနိုင်ပွဲကြောင့် ဘန်ဟမ်အတွက် လက်ရှိအာဏာရ လေဘာပါတီရဲ့ ခေါင်းဆောင်အဖြစ် စတားမားကို စိန်ခေါ်ဖို့ အခွင့်အရေး ရသွားခဲ့ပါတယ်။ ဝန်ကြီးချုပ် စတားမားဟာ လက်ရှိမှာ ပါတီတွင်းက လက်ဝဲအုပ်စုရဲ့ ထောက်ခံမှုတွေကို ဆုံးရှုံးနေရတာလည်း ဖြစ်ပါတယ်။
လေဘာပါတီရဲ့ စည်းမျဉ်းအရ အောက်လွှတ်တော်အမတ်အဖြစ် လက်ရှိတာဝန်ထမ်းဆောင်နေသူပဲ ပါတီခေါင်းဆောင် ဖြစ်ခွင့်ရှိတာပါ။ ဒါကြောင့်လည်း ဘန်ဟမ်ဟာ ပါတီခေါင်းဆောင်နေရာကို စိန်ခေါ်ဖို့နဲ့ ဝန်ကြီးချုပ်နေရာကို အစားထိုးဝင်ရောက်ဖို့အတွက် အောက်လွှတ်တော်မှာ အမတ်နေရာ အရင်ဆုံး ရအောင်ယူခဲ့ရတာ ဖြစ်ပါတယ်။ The Times သတင်းစာရဲ့ အဆိုအရ ဘန်ဟမ်ဟာ လေဘာပါတီ အောက်လွှတ်တော်အမတ်တွေရဲ့ ထောက်ခံမှုကို အနည်းဆုံး ထက်ဝက်ကျော် (အမတ် ၂၀၀ ကျော်) ရရှိထားတယ်လို့ သိရပါတယ်။
ရာထူးက နုတ်ထွက်နိုင်ခြေ
သတင်းရင်းမြစ်တွေကို ကိုးကားပြီး The Observer အပတ်စဉ်သတင်းစာက တနင်္ဂနွေနေ့မှာ ဖော်ပြခဲ့တာကတော့ စတားမားဟာ အစောဆုံဆိုရင် ဇွန်လ ၂၂ ရက်နေ့မှာပဲ ရာထူးက နုတ်ထွက်ကြောင်း ကြေညာနိုင်တယ်လို့ ဆိုပါတယ်။ တကယ်လို့ အဲဒီလိုမကြေညာရင် ဇွန်လ ၂၃ ရက်နေ့မှာ ကျင်းပမယ့် အစိုးရအဖွဲ့ အစည်းအဝေးမှာ ရာထူးက ဆင်းပေးဖို့ လူသိရှင်ကြား တောင်းဆိုတာတွေကို ရင်ဆိုင်ရနိုင်တယ်လို့ သတင်းစာက ဖော်ပြပါတယ်။
စတားမားဟာ အာဏာလွှဲပြောင်းမှုကို စနစ်တကျ ဖြစ်စေချင်တဲ့အတွက် သူ ဘယ်တော့ ရာထူးက ထွက်မလဲဆိုတဲ့ အချိန်ဇယားကို ချမှတ်ပေးဖို့ ရည်ရွယ်ထားတယ်လို့ The Observer က ပြောပါတယ်။ သူဟာ စက်တင်ဘာလ လေဘာပါတီ ညီလာခံ မတိုင်ခင်မှာ ရာထူးကနေ တရားဝင် နှုတ်ထွက်သွားဖို့ ရှိနေပါတယ်။ ဒီလို အချိန်ဇယားမျိုးက ဘန်ဟမ်အတွက် သူ့ရဲ့ နိုင်ငံရေးအဖွဲ့ကို အသေအချာ ဖွဲ့စည်းဖို့နဲ့ အမှတ် ၁၀ ဒေါင်းနင်းလမ်း(ဝန်ကြီးချုပ်အိမ်တော်) ကို ပြောင်းရွှေ့ဖို့ ပြင်ဆင်ဖို့ အချိန်ရစေတာကြောင့် သူ့အတွက် ပိုအဆင်ပြေစေတယ်လို့ The Guardian က ထောက်ပြထားပါတယ်။

ဖားကန့်-ကာမိုင်းသွားကားလမ်းတွင် တောင်ကမ်းပါးပြိုကျလမ်းပိတ်နေ

ကချင်ပြည်နယ်၊ ဖားကန့်မြို့နယ်ရှိ ဖားကန့်-ကာမိုင်းသွားကားလမ်းတွင် မိုးသည်းထန်စွာရွာသွန်းပြီး တောင်ကျရေစီးဆင်းမှုကြောင့် တောင်ကမ်းပါးပြိုကျမှု ယနေ့ ဇွန် ၂၂ ရက်ကဖြစ်ပေါ်ခဲ့ကြောင်း သိရသည်။
ထိုသို့ တောင်ကမ်းပါးရံပြိုကျမှုကြောင့် လက်ရှိအချိန်၌ လမ်းပိတ်ဆို့မှုဖြစ်ပေါ်လျက်ရှိပြီး ဖယ်ရှားရှင်းလင်းမှုများပြုလုပ်နိုင်ရန်ဆောင်ရွက်လျက်ရှိပြီး အတက်/အ ဆင်းကားများကို ဖြတ်သန်းခွင့်ယာယီပိတ်ထားကြောင်း သိရသည်။
ထို့ပြင် ဇွန် ၂၁ ရက်နံနက်ပိုင်းမှစတင်ကာ မိုးသည်းထန်စွာရွာသွန်းမှုကြောင့် ရေဝင်ရောက်မှုများဖြစ်ပေါ်ခဲ့သော ဖားကန့်မြို့၊ ကျောက်ဝိုင်းရပ်ကွက်ရှိ နေအိမ်များနှင့် လမ်းများပေါ်တွင် ယနေ့ ဇွန် ၂၂ ရက်တွင်ရေများပြန်လည်ကျဆင်းလာခဲ့ကြောင်း သိရသည်။

ဂျပန်နိုင်ငံ၌ ကျင်းပမည့် BRIDGE Summer Camp 2026 သို့ မြန်မာကျောင်းသားလူငယ်ကိုယ်စားလှယ်အဖွဲ့ တက်ရောက်မည်

ဂျပန်နိုင်ငံ၊ ဖူကူအိုကာမြို့၌ ကျင်းပမည့် “အပြည်ပြည်ဆိုင်ရာ ကျောင်းသားလူငယ်များ တွေ့ဆုံပွဲ (BRIDGE Summer Camp 2026)” သို့ မြန်မာနိုင်ငံမှ Junior Ambassador ကျောင်းသားလူငယ် ကိုယ်စားလှယ်အဖွဲ့ သွားရောက်တက်ရောက်မည်ဖြစ်ကြောင်း သိရသည်။
အဆိုပါ အစီအစဉ်အတွက် မြန်မာ-ဂျပန်ချစ်ကြည်ရေးအသင်း (MJA) နှင့် အာရှ-ပစိဖိတ် ကလေးများညီလာခံ (APCC) တို့ ပူးပေါင်း၍ အခြေခံပညာကျောင်းများမှ အသက် ၁၁ နှစ်နှင့် ၁၂ နှစ်အရွယ် ကျောင်းသား၊ ကျောင်းသူ (၆) ဦးကို စနစ်တကျ ရွေးချယ်ခဲ့ပြီး မတ်လမှစတင်ကာ စခန်းသွင်းလေ့ကျင့်မှုများ ဆောင်ရွက်ပေးခဲ့ကြောင်း သိရသည်။
တွေ့ဆုံပွဲကို လာမည့် ဇူလိုင်လ ဒုတိယပတ်မှ စတင်၍ (၁၀) ရက်ကြာ ကျင်းပမည်ဖြစ်ပြီး အာရှ-ပစိဖိတ်ဒေသရှိ နိုင်ငံပေါင်း (၄၂) နိုင်ငံမှ လူငယ်ကိုယ်စားလှယ် (၂၀၀) ကျော် ပါဝင်တက်ရောက်မည်ဖြစ်သည်။
အစီအစဉ်အတွင်း ဂျပန်နိုင်ငံမှ Host ကျောင်းသားများနှင့်အတူ နေထိုင်ရမည့် Home Stay အစီအစဉ်၊ ဂျပန်စာသင်ကျောင်းများသို့ သွားရောက်လေ့လာမည့် အစီအစဉ်များ ပါဝင်မည်ဖြစ်ပြီး ပါဝင်သူများအနေဖြင့် ဂျပန်ယဉ်ကျေးမှုနှင့် ပညာရေးစနစ်များကို လက်တွေ့လေ့လာခွင့်ရရှိမည်ဖြစ်ကြောင်း သိရသည်။
ထို့ပြင် ဇူလိုင် ၁၈ ရက်တွင် ကျင်းပမည့် BRIDGE Festival 2026 ၌ မြန်မာကိုယ်စားလှယ်အဖွဲ့က မြန်မာ့ရိုးရာယဉ်ကျေးမှုနှင့် အနုပညာဖျော်ဖြေတင်ဆက်မှုများကို နိုင်ငံတကာ လူငယ်များရှေ့မှောက်တွင် ပြသသွားမည်ဖြစ်ကြောင်း သိရသည်။
ယနေ့ ဇွန် ၂၂ ရက်တွင် အဆိုပါ ခရီးစဉ်သို့ သွားရောက်မည့် မြန်မာကျောင်းသားလူငယ် (၆) ဦးနှင့် အုပ်ချုပ်သူများအား ဂုဏ်ပြုမှတ်တမ်းလွှာများနှင့် ခရီးစဉ်အထောက်အကူပြုပစ္စည်းများ ပေးအပ်သည့် အခမ်းအနားကို နေပြည်တော်၌ ကျင်းပခဲ့ပြီး ခရီးစဉ်အတွင်း မြန်မာ့ယဉ်ကျေးမှုကို ဂုဏ်ယူစွာ ဖော်ဆောင်ကာ နိုင်ငံတကာ ချစ်ကြည်ရင်းနှီးမှု တိုးမြှင့်နိုင်ရေးအတွက် ကြိုတင်ပြင်ဆင်လျက်ရှိကြောင်း သိရသည်။