ရှေးဟောင်းဝတ္ထုပစ္စည်း အပ်နှံသူများအတွက် ထပ်ဆောင်းတန်ဖိုးနှင့် ရှားပါးအနုပညာလက်ရာတန်ဖိုးများကိုပါ ထည့်သွင်းချီးမြှင့်နိုင်ရေး ဆွေးနွေး
ရှေးဟောင်းဝတ္ထုပစ္စည်းများကို နိုင်ငံတော်သို့ အပ်နှံသူများအတွက် ဆုကြေးငွေနှုန်းထားများကို ခေတ်နှင့်လျော်ညီစွာ တိုးမြှင့်သတ်မှတ်နိုင်ရေး ညှိနှိုင်းအစည်းအဝေးကို ယနေ့ နံနက် ၉ နာရီတွင် ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ရန်ကုန်ဌာနခွဲ) ၌ ကျင်းပခဲ့သည်။
အစည်းအဝေးသို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ် ဒေါက်တာကျော်ဦးလွင်၊ ရှေးဟောင်းသုတေသန အကြံပေးပညာရှင်များနှင့် ဌာနဆိုင်ရာ တာဝန်ရှိသူများ တက်ရောက်ဆွေးနွေးခဲ့ကြသည်။
ဦးစီးဌာနအနေဖြင့် လက်ရှိတွင် ရှေးဟောင်းဝတ္ထုပစ္စည်းများကို မူလတန်ဖိုး၊ ခေတ်ကာလတန်ဖိုးနှင့် ခေတ်လက်ရာတန်ဖိုးများအလိုက် ဆုကြေးငွေ ချီးမြှင့်လျက်ရှိသော်လည်း ယခင်နှုန်းထားများမှာ လက်ရှိခေတ်ကာလနှင့် မလျော်ညီတော့သဖြင့် ပြန်လည်ပြင်ဆင်တိုးမြှင့်ရန် ဆွေးနွေးခဲ့ကြောင်း သိရသည်။
ထို့ပြင် ကျောက်ခေတ်မှ ကိုလိုနီခေတ်အထိ ရှေးဟောင်းဝတ္ထုပစ္စည်းများကို ပစ္စည်းအမျိုးအစားနှင့် ခေတ်ကာလအလိုက် ခွဲခြားသတ်မှတ်ကာ ယခင်တန်ဖိုးများအပြင် ထပ်ဆောင်းတန်ဖိုး နှင့် ရှားပါးအနုပညာလက်ရာတန်ဖိုး များကိုပါ ထည့်သွင်းချီးမြှင့်နိုင်ရေး ဆွေးနွေးခဲ့သည်။
ဦးစီးဌာနက ရှေးဟောင်းယဉ်ကျေးမှုအမွေအနှစ်များ ရေရှည်တည်တံ့စေရန်၊ တရားမဝင် ရောင်းဝယ်ဖောက်ကားမှုများမှ ကာကွယ်နိုင်ရန်နှင့် ပြည်ပသို့ ယဉ်ကျေးမှုအမွေအနှစ်များ မရောက်ရှိစေရန် ရည်ရွယ်၍ ဆုကြေးငွေနှုန်းထား တိုးမြှင့်ရေးကို စီစဉ်ဆောင်ရွက်လျက်ရှိကြောင်း ထုတ်ပြန်ထားသည်။
အဆိုပါဌာနက တိုင်းဒေသကြီးနှင့် ပြည်နယ်အသီးသီးရှိ ပြည်သူများအနေဖြင့် မိမိတို့၏ ပတ်ဝန်းကျင်၊ လယ်ယာမြေများတွင် ရှာဖွေတွေ့ရှိသည့် သို့မဟုတ် ဝါသနာအလျောက် စုဆောင်းထိန်းသိမ်းထားသည့် ရှေးဟောင်းဝတ္ထုပစ္စည်းများရှိပါက သက်ဆိုင်ရာ အုပ်ချုပ်ရေးအဖွဲ့အစည်းများနှင့် ရှေးဟောင်းသုတေသနနှင့် အမျိုးသားပြတိုက်ဦးစီးဌာနသို့ အချိန်မီ ဆက်သွယ်အပ်နှံကြရန် တိုက်တွန်းထားသည်။
