အခြေခံပညာကျောင်းများ ကျောင်းအပ်နှံသည့်အချိန် မည်သည့်အခကြေးငွေမျှ လုံးဝမကောက်ခံဘဲ အခမဲ့ထောက်ပံ့မည်

၂၀၂၆-၂၀၂၇ ပညာသင်နှစ်အတွက် အခြေခံပညာကျောင်းများတွင် ကျောင်းအပ်နှံရေးအစီအစဉ်ဆိုင်ရာ သိရှိရန်အချက်များကို ယနေ့ မေလ ၂၁ ရက်နေ့တွင် အသိပေးထုတ်ပြန်ထားသည်။
ကျောင်းလခ၊မိဘဆရာအသင်းကြေး၊အားကစားကြေး၊စာရေးကိရိယာကြေးနှင့် စာကြေးတိုက်ကြေးအပါအဝင် မည်သည့် အခကြေးငွေကိုမျှ လုံးဝမကောက်ခံကြောင်းနှင့် သင်ရိုးစာအုပ်များ၊ ဗလာစာအုပ်များ၊ ခဲတံများ ၊ဘောပင်များ အခမဲ့ထောက်ပံ့မည်ဖြစ်ကြောင်း အသိပေးချက်တွင် ဖော်ပြထားသည်။
ထိုပြင် သူငယ်တန်း(KG) က နေ GRADE 12 ထိ အခမဲ့ထောက်ပံ့မည် ပစ္စည်းများကိုလည်း ထုတ်ပြန်ချက်တွင် အသေးစိတ်ဖော်ပြထားသည်။
မိဘအုပ်ထိန်းသူပြည်သူများ အနေဖြင့် ငွေကြေးသို့မဟုတ် လက်ဆောင်ပစ္စည်းများကို ကျောင်းအုပ်၊ဆရာ၊ဆရာမများ ဝန်ထမ်းများကို ပေးအပ်ခြင်းမပြုရန်လည်း ပညာရေးဝန်ကြီးဌာနက မေတ္တာရပ်ခံထားသည်။

ပညာရေးနှင့် ကျန်းမာရေးကဏ္ဍပိုမိုတိုးမြှင့်ပူးပေါင်းဆောင်ရွက်နိုင်ရေး ဒု-သမ္မတဒေါ်နန်းနီနီအေးနှင့် တရုတ်သံအမတ်တို့တွေ့ဆုံဆွေးနွေး

နိုင်ငံတော် ဒု-သမ္မတဒေါ်နန်းနီနီအေးနှင့် မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး H. E. Ms. Ma Jia တို့ မေ ၂၀ ရက်ကတွေ့ဆုံခဲ့ကြသည်။
တွေ့ဆုံစဥ် ပညာရေးနှင့် ကျန်းမာရေးကဏ္ဍပိုမိုတိုးမြှင့်ပူးပေါင်းဆောင်ရွက်နိုင်ရေး၊ မြန်မာ-တရုတ်နှစ်နိုင်ငံကြား သံတမန်ဆက်ဆံရေးနှင့် အေးအတူပူအမျှ အသိုက်အဝန်းပိုမိုခိုင်မြဲစေရေး၊ နိုင်ငံ့ဝန်ထမ်းများနှင့် လူငယ်များအတွက် စွမ်းဆောင်ရည်မြှင့်တင်ရေးသင်တန်းများကို ပိုမိုပူးပေါင်းဆောင်ရွက်နိုင်ရေး၊ အမျိုးသမီးကဏ္ဍပိုမိုမြှင့်တင်ဆောင်ရွက်နိုင်ရေးတို့ကို ဆွေးနွေးခဲ့ကြသည်။

တရုတ်သမ္မတ ရှီကျင့်ဖျင် မြောက်ကိုရီးယား သွားရောက်ဖွယ်ရှိဟု သတင်းထွက်ပေါ်

တရုတ်သမ္မတ ရှီကျင့်ဖျင်သည် အစောဆုံးအနေဖြင့် လာမည့်သီတင်းပတ်အတွင်း မြောက်ကိုရီးယားနိုင်ငံသို့ သွားရောက်နိုင်ဖွယ်ရှိကြောင်း တောင်ကိုရီးယားနိုင်ငံ၏ Yonhap News Agency က မေ ၂၀ ရက်နှောင်းပိုင်းတွင် အစိုးရအကြီးတန်းအရာရှိတစ်ဦးကို ကိုးကား၍ ဖော်ပြခဲ့သည်။
တရုတ်လုံခြုံရေးနှင့် သံတမန်ရေးရာအရာရှိများ ပါဝင်သည့် အဖွဲ့တစ်ဖွဲ့သည် မကြာသေးမီက ပြုံယမ်းမြို့သို့ သွားရောက်ခဲ့ပြီး သမ္မတရှီ၏ ခရီးစဉ်မှာ မေကုန်ပိုင်း သို့မဟုတ် ဇွန်လအစောပိုင်းတွင် ဖြစ်လာနိုင်ကြောင်း အခြားအစိုးရသတင်းရင်းမြစ်တစ်ခုကိုလည်း ကိုးကားဖော်ပြထားသည်။
ပြီးခဲ့သည့်သီတင်းပတ်အတွင်း အမေရိကန်သမ္မတ ဒေါ်နယ်ထရမ့်နှင့် တွေ့ဆုံခဲ့သည့် သမ္မတရှီသည် ဒေါ်နယ်ထရမ့်နှင့် မြောက်ကိုရီးယားခေါင်းဆောင်ကင်မ်ဂျုံအန်တို့အကြား ကြားဝင်ညှိနှိုင်းပေးသူအဖြစ် ဆောင်ရွက်နိုင်ဖွယ်ရှိကြောင်း အဆိုပါအရာရှိက ပြောကြားခဲ့သည်ဟု သတင်းတွင် ဖော်ပြထားသည်။
အဆိုပါသတင်းနှင့်ပတ်သက်၍ မှတ်ချက်ပေးရန် တောင်းဆိုမှုကို တောင်ကိုရီးယားနိုင်ငံခြားရေးဝန်ကြီးဌာနက လတ်တလောတွင် တုံ့ပြန်ဖြေကြားခြင်းမရှိသေးကြောင်း သိရသည်။
တရုတ်နိုင်ငံသည် မြောက်ကိုရီးယား၏ အဓိက စီးပွားရေးနှင့် နိုင်ငံရေးမဟာမိတ်နိုင်ငံဖြစ်ပြီး ကိုဗစ်-၁၉ ကပ်ရောဂါကာလအတွင်း အေးစက်သွားခဲ့သည့် နှစ်နိုင်ငံဆက်ဆံရေးကို ပြန်လည်ခိုင်မာစေရန် ကြိုးပမ်းလျက်ရှိသည်။
ထို့ပြင် မြောက်ကိုရီးယားခေါင်းဆောင် ကင်မ်ဂျုံအန်သည် ၂၀၂၅ ခုနှစ်အတွင်း ပေကျင်းသို့ သွားရောက်ခဲ့ပြီး စစ်ရေးပြအခမ်းအနားတစ်ခုတွင် သမ္မတရှီနှင့် ရုရှားသမ္မတ ဗလာဒီမာပူတင်တို့နှင့်အတူ တက်ရောက်ခဲ့ကြောင်းလည်း ဖော်ပြထားသည်။

(၇၈)ကြိမ်မြောက် တိပိဋကဓရ တိပိဋကကောဝိဒ စာအောင်သံဃာတော်များအား ချီးကျူးပူဇော်ပွဲ အတွက် လှူဒါန်းနိုင်

သာသနာရေးဝန်ကြီးဌာန သာသနာရေးဦးစီးဌာနက ကြီးမှူးကျင်းပသည့် (၇၈)ကြိမ်မြောက် တိပိဋကဓရ တိပိဋကကောဝိဒ ရွေးချယ်ရေးစာမေးပွဲတွင် အောင်မြင်တော်မူကြသော သာသနာ့အာဇာနည် အရှင်မြတ်များအား အောင်လက်မှတ်၊ ဘွဲ့တံဆိပ်တော်များ ဆက်ကပ်လှူဒါန်းခြင်းနှင့် ချီးကျူးပူဇော်ပွဲအခမ်းအနားကို ၂၀၂၆ ခုနှစ် မေလ ၂၉ ရက် နံနက် ၈ နာရီတွင် ကျင်းပသွားမည်ဖြစ်ကြောင်း သိရသည်။
အခမ်းအနားကို ရန်ကုန်တိုင်းဒေသကြီး မရမ်းကုန်းမြို့နယ် သီရိမင်္ဂလာကမ္ဘာအေးကုန်းမြေရှိ မဟာပါသာဏလိုဏ်ဂူသိမ်တော်ကြီး၌ စည်ကားသိုက်မြိုက်စွာ ကျင်းပသွားမည်ဖြစ်ပြီး နိုင်ငံတော်သံဃမဟာနာယကအဖွဲ့ ဆရာတော်ကြီးများ၊ တိပိဋကဓရ တိပိဋကကောဝိဒ ဩဝါဒါစရိယဆရာတော်ကြီးများ၊ တိပိဋကဓရ ဓမ္မဘဏ္ဍာဂါရိက ဆရာတော်ကြီးများနှင့် တိပိဋကဓရ တိပိဋကကောဝိဒ ဆရာတော်များ အပါအဝင် ပင့်သံဃာ ၃၃ ပါး ကြွရောက်တော်မူမည်ဖြစ်ကြောင်း သိရသည်။
ထို့ပြင် ယခုနှစ် စာမေးပွဲတွင် အောင်မြင်တော်မူကြသော တိပိဋကဓရ တိပိဋကကောဝိဒ တစ်ပါး၊ မူလအာဘိဓမ္မိက သုံးပါး၊ ဒီဃဘာဏက တစ်ပါး၊ ဝိနယကောဝိဒ ခုနစ်ပါး၊ ဝိနယဓရ ၂၈ ပါး၊ ဥဘတောဝိဘင်္ဂကောဝိဒ ၁၁ ပါးနှင့် ဥဘတောဝိဘင်္ဂဓရ ၄၆ ပါး စုစုပေါင်း သံဃာတော် ၁၃၃ ပါးအား လှူဖွယ်ပစ္စည်းများဖြင့် ချီးကျူးပူဇော်သွားမည်ဖြစ်ကြောင်း သိရသည်။
အလှူရှင်များအနေဖြင့် လှူဖွယ်ပစ္စည်းများကို သာသနာရေးဦးစီးဌာန စာမေးပွဲဌာနခွဲသို့ ကြိုတင်လှူဒါန်းနိုင်ပြီး ဆက်သွယ်လှူဒါန်းလိုပါက ညွှန်ကြားရေးမှူး ဖုန်း ၀၉-၄၄၂၂၂၂၄၈၄ နှင့် ဒုတိယညွှန်ကြားရေးမှူး ဖုန်း ၀၉-၄၃၀၆၇၁၆၈ သို့ ဆက်သွယ်နိုင်ကြောင်း သာသနာရေးဦးစီးဌာနမှ ထုတ်ပြန်ထားသည်။

မုံရွာမြို့သမိုင်းဝင် ဘေးမဲ့ချမ်းသာ မဟာရာမ်ဆီးစေတီရွှေသင်္ကန်းကပ်လှူရန် ပြင်ဆင်

စစ်ကိုင်းတိုင်းဒေသကြီး၊ မုံရွာမြို့၊ အလယ်ရပ်၊ "ဘေးမဲ့ချမ်းသာ မဟာရာမ်ဆီး စေတီ" ကို လုံးတော်ပြည့်ရွှေဆေးသင်္ကန်းကပ်လှုရန်နှင့် ထီးတော်ကြီးရွှေသင်္ကန်းကပ်လှုရန် အတွက် ငြမ်းဆင်သည့်လုပ်ငန်း စတင်နေပြီဖြစ်ကြောင်း သိရသည်။
"ဘေးမဲ့ချမ်းသာ မဟာရာမ်ဆီး စေတီ" သည် မုံရွာမြို့သမို င်းထဲတွင် ပါဝင်သည့် ဘုရားလေးဆူထဲတွင် အပါအဝင်ဖြစ်ပြီး လက်ရှိတွင် အများကဘုရားလှဟု ပြောဆိုသမုတ်ကြခြင်းဖြစ်သည်။
"မဟာရံဆီးစေတီတော်ကြီးဟာ ပြီးခဲ့တဲ့ ၂၀၂၅ ခုနှစ်မတ် လ (၂၈)ရက်လှုပ်ခတ်ခဲ့တဲ့ ငလျင်ကြီးကြောင့် ငှက်ပျောဖူးအောက်ကွာကျတာ။ ကွဲအက်တာတွေရှိတဲ့အတွက် မဖြစ်မနေပြုပြင်ကြရတာပါ။ လွန်ခဲ့တဲ့နှစ် (၅၀) ကျော်က စေတီတော်ကြီးရဲ့ သံထီးတော်ကို ရွှေသင်္ကန်းကပ်လှုခဲ့ပြီး လွန်ခဲ့တဲ့ နှစ်(၃၀) ကျော်က စေတီတော်ကို လုံးတော်ပြည့် ရွှေဆေးသင်္ကန်းကပ်လှုခဲ့ပါတယ်"ဟု ဘုရားလှကျောင်းတိုက်ဆ ရာတော် ဥူးဥာဏိဿရက မိန့်ကြားသည်။
လုံးတော်ပြည့်ရွှေဆေးသင်္ကန်းကပ်လှုရန်နှင့် ထီးတော်ကြီးရွှေသင်္ကန်းကပ်လှုရန် အတွက် ဘုရားလှကျောင်းတိုက်ဆ ရာတော် ဥူးဥာဏိဿရ ဦးဆောင်ပြီး ဘုရားလှဘုရားဂေါ ပကအဖွဲ့နှင့် အလှုရှင်များက အကြီးစားပြုပြင်မွမ်းမံနေကြခြင်းဖြစ်ပြီး လက်ရှိအချိန်တွင် ထီးတော်ကြီးသည်သံချေးအလိမ်းလိမ်းတက် မဲနေပြီဖြစ်သည့် အပြင် စေတီ လုံးပတ်တော်သည် ရွှေသင်္ကန်းရောင်တော်မှိန်နေပြီဖြစ်သည်။
လုံးတော်ပြည့်ရွှေဆေးသင်္ကန်းကပ်လှုခြင်းနှင့် ထီးတော်ကြီးရွှေသင်္ကန်းကပ်လှုခြင်းများ ဆောင်ရွက်ရာတွင် အလှုခံစခ န်း ဖွင့်လှစ်ခြင်းမပြုတော့ဘဲ အနယ်နယ်အရပ်ရပ်မှ ကြား သိ၍ လာရောက်လှုဒါန်းခြင်း၊ နီးစပ်ရာ KBZ Pay ဖြင့် လှူကြခြင်းများကို လက်ခံပြီး ပြီးစီးအောင်မြင်အောင် ဆောင် ရွက်သွားမည်ဟု ဘုရားလှဆရာတော်က မိန့်တော်မူသည်။

အိမ်ရှင်မလေးရှားနှင့် မြန်မာအသင်းအုပ် စုဗိုလ်လုပွဲ ယနေ့ ယှဉ်ပြိုင်မည်

အမျိုးသား (၃) ယောက်တွဲ ပိုက်ကျော်ခြင်း (Regu Event) ပြိုင်ပွဲတွင် မြန်မာ့လက်ရွေးစင်အသင်းသည် ယနေ့ မေ (၂၁) ညနေ (၆) နာရီခွဲအချိန်၌ အိမ်ရှင်မလေးရှားအသင်းနှင့် အုပ်စု ဗိုလ်လုပွဲ ယှဉ်ပြိုင်ကစားရမည်ဖြစ်ကြောင်း သိရသည်။
မြန်မာအသင်းသည် ယနေ့ နံနက်ပိုင်းက ယှဉ်ပြိုင်ခဲ့သည့် အုပ်စုတွင်းပွဲစဉ်တွင် အိန္ဒိယအသင်းကို (၂) ပွဲ၊ (၁) ပွဲ ရလဒ်ဖြင့် အနိုင်ရရှိထားခြင်းဖြစ်ပြီး မလေးရှားအသင်းမှာလည်း အိန္ဒိယအသင်းကို ယမန်နေ့က ပွဲစဉ်တွင် (၃)ပွဲပြတ်ဖြင့် အနိုင်ယူထားသည်။
ယနေ့ပွဲစဉ်သည် နှစ်သင်းလုံးအတွက် အုပ်စုဗိုလ်နေရာအတွ က် အရေးပါသည့် ပွဲစဉ်တစ်ပွဲလည်းဖြစ်သည်။
ကမ္ဘာ့ဖလား ပိုက်ကျော်ခြင်းပြိုင်ပွဲကို အိမ်ရှင်မလေးရှားနိုင် ငံတွင် ကျင်းပပြုလုပ်နေခြင်းဖြစ်ပြီး လက်ရှိတွင် မြန်မာ့လက်ရွေးစင်ပိုက်ကျော်ခြင်းအသင်းသည် ထိပ်သီးအသင်းများကို ရင်ဆိုင်ကျော်ဖြတ်ပြီး ဒုတိယငွေတံဆိပ်ဆုကို ဆွတ်ခူးပေးထားနိုင်သည်။

၂၀၂၆-၂၀၂၇ ပညာသင်နှစ်အတွက် နည်းပညာအထက်တန်းကျောင်းများ ဝင်ခွင့်လျှောက်လွှာ ခေါ်ယူ

၂၀၂၆-၂၀၂၇ ပညာသင်နှစ်အတွက် အခြေခံပညာနှင့် စက်မှု၊ စိုက်ပျိုး၊ မွေးမြူရေး အထက်တန်းကျောင်းများနှင့် အစိုးရနည်းပညာအထက်တန်းကျောင်းများတွင် Grade-9 အောင်မြင်ပြီးသူများအား ဝင်ခွင့်လျှောက်လွှာများ ခေါ်ယူနေကြောင်း သိရသည်။
အဆိုပါကျောင်းများတွင် Building Technology၊ Electrical Technology၊ Electronics Technology၊ Automotive Technology၊ Information Technology နှင့် Machining Technology အပါအဝင် နည်းပညာသင်တန်းများကို အထက်တန်းပညာရေးနှင့် တွဲဖက်သင်ကြားပေးမည်ဖြစ်ပြီး သင်တန်းကာလမှာ (၃) နှစ်ကြာမြင့်မည်ဖြစ်သည်။
သင်တန်းပြီးဆုံးအောင်မြင်သူများအနေဖြင့် အခြေခံပညာအထက်တန်းအောင်လက်မှတ် ရရှိမည့်အပြင် သက်ဆိုင်ရာ နည်းပညာကောလိပ်များနှင့် တက္ကသိုလ်များသို့ ဆက်လက်တက်ရောက်နိုင်မည့် အခွင့်အလမ်းများလည်း ရရှိမည်ဖြစ်ကြောင်း သိရသည်။
လျှောက်ထားသူများသည် ၂၀၂၄-၂၀၂၅ သို့မဟုတ် ၂၀၂၅-၂၀၂၆ ပညာသင်နှစ်တွင် Grade-9 အောင်မြင်ထားသူများ ဖြစ်ရမည်ဖြစ်ပြီး Grade-10 အောင်မြင်သူ၊ ကျရှုံးသူ သို့မဟုတ် ရပ်နားထားသူများလည်း လျှောက်ထားနိုင်ကြောင်း ထုတ်ပြန်ချက်တွင် ဖော်ပြထားသည်။
ကျောင်းဝင်ခွင့်လျှောက်လွှာများကို မေလ (၂၁) ရက်နေ့မှ စတင်ထုတ်ယူနိုင်ပြီး မေလ (၃၀) ရက်နေ့ နောက်ဆုံးထား၍ မိမိတက်ရောက်လိုသည့် ကျောင်းများသို့ တင်သွင်းရမည်ဖြစ်သည်။
လျှောက်လွှာတင်ရာတွင် ကျန်းမာရေးထောက်ခံစာ၊ Grade-9 အောင်မြင်ကြောင်း ထောက်ခံစာ၊ အိမ်ထောင်စုဇယား၊ ပြစ်မှုကင်းရှင်းကြောင်း ထောက်ခံစာနှင့် ပတ်စပို့ဓာတ်ပုံများ ပူးတွဲတင်ပြရမည်ဖြစ်ကြောင်း သိရသည်။
သင်တန်းသားများကို စုစုပေါင်းရမှတ်အလိုက် ဦးစားပေးရွေးချယ်မည်ဖြစ်ပြီး တက်ရောက်ခွင့်ရရှိသူများအား ပညာသင်ထောက်ပံ့ကြေး၊ စာအုပ်နှင့် စာရေးကိရိယာများ ထောက်ပံ့ပေးသွားမည်ဖြစ်သည်။
ထို့ပြင် သင်တန်းတွင် အထူးအောင်မြင်သူများအနေဖြင့် နည်းပညာတက္ကသိုလ်များနှင့် အစိုးရနည်းပညာကောလိပ်များသို့ ဆက်လက်တက်ရောက်နိုင်မည်ဖြစ်ကြောင်း သိရသည်။

၂၀၂၆ နှစ်ကုန်ပိုင်းတွင် အားကောင်းသော အယ်လ်နီညိုဖြစ်ပေါ်နိုင်ဟု မိုးဇလထုတ်ပြန်

အီကွေတာအနီးရှိ အပူပိုင်းပစိဖိတ်သမုဒ္ဒရာ၏ ပင်လယ်ရေမျက်နှာပြင်အပူချိန်နှင့် လေထုဖြစ်စဉ်များအရ အယ်လ်နီညိုဖြစ်ပေါ်နိုင်သည့် အခြေအနေများကို တွေ့ရှိရကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ၂၀၂၆ ခုနှစ် မေလ ၂၁ ရက်တွင် ထုတ်ပြန်သည်။
နိုင်ငံတကာ မိုးလေဝသဌာနများ၏ သင်္ချာပုံစံပြုမော်ဒယ် ခန့်မှန်းချက်များအရ လာမည့် ဇွန်လမှစတင်၍ အားအနည်းငယ်ရှိသော အယ်လ်နီညိုအခြေအနေသို့ ရောက်ရှိနိုင်ပြီး ၂၀၂၆ ခုနှစ် နှစ်ကုန်ပိုင်းတွင် အားကောင်းသော အယ်လ်နီညိုအခြေအနေသို့ ရောက်ရှိနိုင်ကြောင်း ခန့်မှန်းထားသည်။
အယ်လ်နီညိုဖြစ်စဉ်သည် ပစိဖိတ်သမုဒ္ဒရာတွင် ဖြစ်ပေါ်သည့် ဖြစ်စဉ်ဖြစ်သော်လည်း ယင်းဖြစ်စဉ်ကြောင့် ယေဘုယျအားဖြင့် မိုးရွာသွန်းမှု မူမမှန်ခြင်း၊ နေ့အပူချိန် မြင့်မားလာခြင်း၊ မုန်တိုင်းဖြစ်ပေါ်မှု မူမမှန်ခြင်းနှင့် မိုးခေါင်ရေရှားမှုများ အပါအဝင် အစွန်းရောက် မိုးလေဝသဖြစ်စဉ်များ ဖြစ်ပေါ်နိုင်ကြောင်း သိရသည်။
သို့ဖြစ်၍ သက်ဆိုင်ရာကဏ္ဍများအလိုက် ကြိုတင်ပြင်ဆင်ဆောင်ရွက်နိုင်ကြရန် အသိပေးထားပြီး အယ်လ်နီညိုဖြစ်ပေါ်မှုနှင့် ပတ်သက်သည့် အခြေအနေများကို အချိန်နှင့်တစ်ပြေးညီ ဆက်လက်ထုတ်ပြန်ပေးသွားမည်ဖြစ်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

နှစ်စဉ်လျှပ်စစ်ဓာတ်အား (၃၄ ဒသမ ၆၈)သန်းကီလိုဝပ်နာရီပျဉ်းမျှထုတ်လုပ်နိုင်မည့် ဟုမ္မလင်းမြို့နယ်မှ "နမ့်ပင"အသေးစားရေအားလျှပ်စစ်စီမံကိန်း

နှစ်စဉ်လျှပ်စစ်ဓာတ်အား (၃၄ ဒသမ ၆၈)သန်းကီလို ဝပ်နာရီပျဉ်းမျှထုတ်လုပ်နိုင်မည့် "နမ့်ပင"အသေးစားရေအားလျှပ်စစ်စီမံကိန်းကို စစ်ကိုင်းတိုင်း၊ ဟုမ္မလင်းမြို့နယ်၊ နားသကျိုက်ကျေးရွာအနီးရှိ နမ့်ပငချောင်းပေါ်တွင်တည်ဆောက်လျက်ရှိသည်။
အဆိုပါ စီမံကိန်း၏ တမံအမျိုးအစားမှာ Concrete Gravity Dam ဖြစ်ပြီး တပ်ဆင်စက်အင်အား(၆)မဂ္ဂါဝပ်ဖြစ်၍ နှစ်စဉ်လျှပ်စစ်ဓာတ်အား(၃၄ ဒသမ ၆၈) သန်းကီလိုဝပ်နာရီပျဉ်းမျှထုတ်လုပ်နိုင်မည်ဖြစ်သည်။
ယင်း စီမံကိန်းဖော်ဆောင်နေသည့် လုပ်ငန်းခွင်အတွင်း ဖိအားမြင့်သံမဏိပိုက်လိုင်း၊ ဓာတ်အားပေးစက်ရုံ တည်ဆောက်နေမှုနှင့် ရေယူအဆောက်အဦးတည်ဆောက်နေမှုတို့ကို စစ်ကိုင်းတိုင်းဝန်ကြီးချုပ်ဦးကိုလေးနှင့် တာဝန်ရှိသူများက မေ ၂၀ ရက်တွင်ကြည့်ရှုစစ်ဆေးခဲ့သည်။
ထို့နောက် ဒေသခံများလိုအပ်သည့် လျှပ်စစ်မီးအမြန်ရရှိရန် ယခု စီမံကိန်းအား အမြန်ပြီးစီးအောင်ကြိုပမ်းဆောင်ရွက်ရန်၊ ရရှိထားသည့်ဘဏ္ဍာငွေများ အလေအလွင့်မရှိအောင်သုံးစွဲရန်တို့ကို တိုင်းဝန်ကြီးချုပ်ကမှာ ကြားခဲ့သည်။

ပရီးမီးယားလိဂ်ဖလားဆွတ်ခူးပြီးနောက် မနက် ၅ နာရီအထိ အောင်ပွဲခံခဲ့ကြတဲ့ အာဆင်နယ်ကစားသမားများ
====================

အာဆင်နယ်ကစားသမားများဟာ ၂၂ နှစ်အတွင်း ပထမဆုံးပရီးမီးယားလိဂ်ဖလား ဆွတ်ခူးပြီးနောက် မနက် ၅ နာရီအချိန်အထိ အမ်းမရိတ်ကွင်းအပြင်ဘက်တွင် အောင်ပွဲခံခဲ့ကြပါတယ်။
အီဘီရီချီအီးဇီးဟာ ဗုဒ္ဓဟူးနေ့ နံနက်ပိုင်းတုန်းက အမ်းမရိတ်ကွင်းအပြင်ဘက်တွင် မြောက်လန်ဒန်ကလပ်ကစားဖော်များဖြစ်ကြတဲ့ ဒီကလန်ရိုက်၊ ဘူကာယိုဆာကာ၊ ဂျူရီယန်တမ်ဘားတို့နှင့်အတူ ရိုက်ကူးထားတဲ့ ဓာတ်ပုံအား အင်စတာဂရမ်မှာ တင်သွားပါတယ်။
ဒတ်ချ်နောက်ခံလူကလည်း ကလပ်လေ့ကျင့်ရေးကွင်းတွင် ဆာကာနှင့် ရိုက်ကူးထားတဲ့ ဗီဒီယိုဖိုင်အား ဆိုရှယ်မီဒီယာတွင် တင်သွားပါတယ်။ ယင်းဗီဒီယိုတွင် ပရီးမီးယားလိဂ်ဖလား ဆွတ်ခူးချိန်တွင် အလင်းပေးထားတဲ့ အနက်ရောင်ပရီးမီးယားလိဂ်ဖလားလည်း ပါဝင်ပါတယ်။
ဆာကာက "အလင်းပေးလိုက်။ ငါ တခုခု ပြောပါရစေ။ နှစ်ဆယ့်နှစ်နှစ်၊ ၂၂ နှစ်၊ ရယ်မောတာတွေ၊ လောင်ပြောင်တာတွေများကြီးပဲ။ အခု သူတို့ မရယ်နိုင်ကြတော့ဘူး။ ကြည့်လိုက်စမ်း။ အလင်းရောင်ထွက်လာတော့မယ်။ အလင်းရောင်ထွက်လာတော့မယ်"လို့ ပြောကြားထားပါတယ်။
ဒါ့အပြင် ဆာကာဟာ အသက် ၁၉ နှစ် အရွယ်ရှိ မိုင်လက်စ်လီဝစ်စကယ်လီက ရှန်ပိန်ပုလင်းကိုင်ထားတဲ့ ဗီဒီယိုကိုလည်း တင်သွားပါသေးတယ်။
အီဇီးဟာ အာဆင်နယ်ရဲ့ ပရီးမီးယားလိဂ်သုံးရာသီဆက် အဆင့် ၂ နေရာတွင် ရပ်တည်မှုအား ဝေဖန်ထားမှုအပေါ် ညွှန်းဆိုထားတဲ့ စာသားပါ အာဆင်နယ်တံဆိပ်ကပ်ပုလင်းကိုလည်း တင်သွားပါတယ်။
ဒါ့အပြင် အသင်းခေါင်းဆောင်မာတင်အိုဒီဂတ်က ပုလင်းတစ်လုံးအား ပါးစပ်တွင် တော့နေတဲ့ ပို့စ်တစ်ခုကိုလည်း တင်ထားပါတယ်။
အင်္ဂါနေ့ညတုန်းက အာဆင်နယ်ပရိသတ်များဟာ အမ်းမရိတ်ကွင်းအပြင်ဘက်တွင် စုရုံးခဲ့ကြသလို အနီးရှိ ဘားများတွင် မန်စီးတီးနှင့် ဘုန်းမောက်ပွဲအား ကြည့်ရှုခဲ့ကြပါတယ်။
ဂွါဒီယိုလာရဲ့ မန်စီးတီးက ဘုန်းမောက်နှင့် သရေကျမှုနှင့်အတူ အာဆင်နယ်တို့ ပရီးမီးယားလိဂ်ချန်ပီယံဖြစ်လာပါတယ်။
ပွဲအပြီးတွင် အာဆင်နယ်ပရိသတ်များဟာ မြောက်လန်ဒန်တလွှား ဘီယာဆိုင်များ၊ စားသောက်ဆိုင်များတွင် အကြီးအကျယ်အောင်ပွဲခံခဲ့ကြပါတယ်။
အမ်းမရိတ်ကွင်းအပြင်ဘက်တွင် အာဆင်နယ်ဂန္ထဝင်တိုက်စစ်မှူးအီရန်ရိုက်မှာလည်း ပရိသတ်များနှင့်အတူ အောင်ပွဲခံကြသလို အာဆင်နယ်လေ့ကျင့်ရေးကွင်းတွင်လည်း အောင်ပွဲခံပါတီပွဲ ရှိခဲ့ပါတယ်။