၂၀၂၆ - ၂၀၂၇ ပညာသင်နှစ် ကျောင်းပြင်ပမူလတန်းနှင့် အလယ်တန်းပညာရေး အတန်းနေရာချထားမှု (Placement Test) စစ်ဆေး

ပညာရေးဝန်ကြီးဌာနအနေဖြင့် တိုင်းဒေသကြီးနှင့် ပြည်နယ်အသီးသီးတွင် ကျောင်းပြင်ပရောက်ကလေးများအတွက် အထူးအစီအစဉ်တစ်ရပ်အနေဖြင့် ၂၀၂၆-၂၀၂၇ ပညာသင်နှစ် ကျောင်းပြင်ပ မူလတန်းပညာရေးနှင့် ကျောင်းပြင်ပအလယ်တန်းပညာရေး အတန်းနေရာ ချထားမှု စစ်ဆေးခြင်း၊ (Placement Test) စာမေးပွဲကို ကျင်းပဆောင်ရွက်ခဲ့ကြောင်း သိရသည်။
ကျောင်းပြင်ပရောက် မူလတန်းကျောင်းသား၊ ကျောင်းသူ ၆၉၃ ဦးနှင့် အလယ်တန်း ကျောင်းသား၊ ၁၆၆၂ ဦးတို့ လာရောက်ဖြေဆိုခဲ့ကြောင်း သိရသည်။
အဆိုပါ Placement Test စာမေးပွဲကို ဩဂုတ် ၉ ရက်၊ မနက် ၉ နာရီတွင် တိုင်းဒေသကြီးနှင့်ပြည်နယ်များရှိ သတ်မှတ်ထားသော စာဖြေဌာနများ၌ ကျင်းပခဲ့ခြင်း ဖြစ်သည်။
တောင်ငူမြို့၊ အမှတ်(၁) အခြေခံပညာအထက်တန်းကျောင်း၌ ကျောင်းသား၊ ကျောင်းသူများ စိတ်အေးချမ်းသာစွာ ဖြေဆိုနေမှုများကို ပညာရေးဝန်ကြီးဌာန ကျောင်းပြင်ပနှင့် တစ်သက်တာ ပညာရေးဦးစီးဌာန ညွှန်ကြားရေးမှူးချုပ်နှင့် ပဲခူးတိုင်းဒေသကြီးပညာရေးမှူးတို့က လှည့်လည်ကြည့်ရှုခဲ့ကြောင်း သိရသည်။

ရန်ကုန်-မန္တလေး အမြန်လမ်းဟောင်း မိုင်တိုင် (၃၂၉) အနီး ရေကျော်နေသဖြင့် မီးသတ်တပ်ဖွဲ့ဝင်များမှ ယာဉ်အန္တရာယ်ကင်းရှင်းရေး ဆောင်ရွက်ပေးလျက်ရှိ

မန္တလေးတိုင်းဒေသကြီး၊ ရန်ကုန်-မန္တလေး အမြန်လမ်းဟောင်းပေါ်တွင် မိုးရွာသွန်းမှုကြောင့် ရေကျော်လွန်မှု ဖြစ်ပွားလျက်ရှိသဖြင့် ကားလမ်းပိတ်ဆို့မှုမရှိစေရေးနှင့် သွားလာရေး အဆင်ပြေစေရန်အတွက် မီးသတ်တပ်ဖွဲ့ဝင်များမှ ယာဉ်အန္တရာယ်ကင်းရှင်းရေး လုပ်ငန်းများ ဆောင်ရွက်ပေးလျက်ရှိကြောင်း သိရသည်။
ဖြစ်စဉ်မှာ ဩဂုတ် ၁၀ ရက် နံနက် ၉ နာရီခန့်တွင် ရန်ကုန်-မန္တလေး အမြန်လမ်းဟောင်း၊ မိုင်တိုင်အမှတ် (၃၂၉/၂) နှင့် (၃၂၉/၃) ဖာလုံကြား ကားလမ်းပေါ်သို့ ရေကျော်တက်နေကြောင်း သတင်းရရှိသဖြင့် ဝမ်းတွင်းမြို့နယ် မီးသတ်စခန်းမှ တပ်ဖွဲ့ဝင်များက သွားရောက်၍ လမ်းကြောင်းရှင်းလင်းခြင်း၊ ယာဉ်များ ဘေးအန္တရာယ်ကင်းရှင်းစွာ သွားလာနိုင်ရေးအတွက် ကူညီဆောင်ရွက်ပေးခြင်းများကို စနစ်တကျ လုပ်ဆောင်ပေးလျက်ရှိသည်။
မီးလောင်မှု၊ သဘာဝဘေးအန္တရာယ်များနှင့် ရုတ်တရက် ဖြစ်ပွားသော အရေးပေါ် အခြေအနေများ ကြုံတွေ့ပါက မီးသတ်ဦးစီးဌာန၏ အရေးပေါ် Hotline ဖုန်း 191 သို့လည်းကောင်း၊ မြန်မာနိုင်ငံမီးသတ်တပ်ဖွဲ့ဌာနချုပ် (ကွပ်ကဲ) ဖုန်း ၀၁၈ ၆၆၆၉၁၂၊ ၀၁၈ ၆၆၆၉၁၃ နှင့် မန္တလေးတိုင်းဒေသကြီး မီးသတ်ဦးစီးမှူးရုံး (ကွပ်ကဲ) ဖုန်း ၀၂ ၄၀၂၁၀၈၄၊ ၀၉ ၃၄၀၃၂၀၂၀၂ တို့သို့ တိုက်ရိုက် ဆက်သွယ် အကူအညီတောင်းခံနိုင်ကြောင်း အသိပေးထားသည်။

အင်္ဂလန်အား အနိုင်ရတဲ့နေ့အား စပါယ်ရှယ်နေ့အဖြစ် အာဂျင်တီးနား ဖန်တီး သတ်မှတ်လာ
===================

အာဂျင်တီးနားဘောလုံးအဖွဲ့ချုပ်ဟာ ၂၀၂၆ ကမ္ဘာ့ဖလားဆီမီးဖိုင်နယ်တွင် အင်္ဂလန်အား အနိုင်ရခဲ့တဲ့ ဇူလိုင်လ ၁၅ ရက်နေ့အား နိုင်ငံလက်ရွေးစင်ဘောလုံးအသင်းနေ့အဖြစ် သတ်မှတ် ကြေညာလာပါတယ်။
၁၉၆၆ နောက်ပိုင်း ပထမဆုံးကမ္ဘာ့ဖလားဆွတ်ခူးဖို့ ကြိုးစားနေတဲ့ အင်္ဂလန်ဟာ ယင်းပွဲတွင် ပွဲချိန် ၅၅ မိနစ်မှာ အန်တိုနီဂေါ်ဒွန်ရဲ့ ဂိုးဖြင့် ပွဲကို ဦးဆောင်နိုင်ခဲ့ပါတယ်။
ဒါပေမဲ့ သောမတ်စ်တူချယ်ဟာ လက်ကျန်ပွဲချိန်များတွင် ခံစစ်ကစားရန် ဆုံးဖြတ်ပြီး ခံစစ်ပိတ်ဆို့ကစားခဲ့ရာ ၈၅ မိနစ်တွင် ဖာနန်ဒက်ဇ်ရဲ့ ချေပဂိုးကို ပေးခဲ့ရကာ ၉၁ မိနစ်တွင် မာတီနက်ဇ်ရဲ့အနိုင်ဂိုးအားပေးခဲ့ပါတယ်။
အာဂျင်တီးနားဟာ ၁၉၈၆ ကမ္ဘာ့ဖလားကွာတားဖိုင်နယ်တွင် အင်္ဂလန်အား အငြင်းပွားဖွယ် အနိုင်ရပြီးနောက် နှစ်ပေါင်း ၄၀ အကြာမှာ အနိုင်ရခဲ့တာလည်း ဖြစ်ပါတယ်။
ယင်းပွဲစဉ်အပြီးတွင် အာဂျင်တီးနားကစားသမားများဟာ ဖော့ကလန်က အာဂျင်တီးနားအပိုင်ဆိုတဲ့ စာသားပါ နဖူးစည်းကို ကိုင်ဆောင်ပြီး အငြင်းပွားရာ လုပ်ရပ်လုပ်ခဲ့ပါတယ်။
ဖော့ကလန်ကျွန်းမှာ အတ္တလန္တိတ်သမုဒ္ဒရာအနောက်တောင်ပိုင်းရှိ ဗြိတိန်ပိုင် ကျွန်းတစ်ကျွန်းဖြစ်ပြီး အာဂျင်တီးနားနှင့် ဗြိတိန်တို့အကြား ပိုင်ဆိုင်မှု အငြင်းပွားလာတဲ့ ကျွန်းလည်း ဖြစ်ပါတယ်။
အာဂျင်တီးနားဗိုလ်ချုပ်ကြီးလီယိုပယ်ဒိုဂယ်တီရီက အာဂျင်တီးနားကို အာဏာသိမ်း အုပ်ချုပ်စဉ် ၁၉၈၂ ခုနှစ်တုန်းက အာဂျင်တီးနားနှင့် မိုင် ၃၀၀ ခန့်အကွာတွင် ရှိတဲ့ ဖော့ကလန်ကျွန်းကို သိမ်းပိုက်ခဲ့ဖူးပါတယ်။
အင်္ဂလန်က ၁၉၈၂ ခုနှစ် ဧပြီလမှ ဇွန်လအထိ ၇၄ ရက်တိုင်တိုင် စစ်ဆင်ရေး ဆင်နွဲကာ ဖော့ကလန်ကျွန်းအား ပြန်လည်သိမ်းပိုက်ခဲ့ကာ အာဂျင်တီးနားစစ်သား ၆၅၅ ဦး၊ ဗြိတိန်စစ်သား ၂၅၅ ဦးနှင့် အရပ်သား ၃ ဦးလည်း သေဆုံးခဲ့ပါတယ်။
၂၀၁၃ ခုနှစ်တုန်းက ဖော့ကလန်ကျွန်းအတွင်း ဆန္ဒမဲခံယူပွဲ ပြုလုပ်ခဲ့ရာ ၉၉.၈ ရာခိုင်နှုန်းက ဗြိတိန်လက်အောက်တွင်သာ ဆက်လက် နေထိုင်ရန် မဲပေးဆုံးဖြတ်ခဲ့ကြပါတယ်။
အာဂျင်တီးနားဟာ အင်္ဂလန်ကို အနိုင်ယူကာ ဗိုလ်လုပွဲသို့ တက်သွားခဲ့ပေမဲ့ ဗိုလ်လုပွဲတွင် စပိန်အား ၁-၀ ဖြင့် ရှုံ့းနိမ့်ခဲ့ပါတယ်။

လမ်းဘေးဂိုဏ်းဝင်များရဲ့ တိုက်ခိုက်မှုကြောင့် ယူဂန်ဒါစတားတစ်ဦး သေဆုံး
====================

ယူဂန်ဒါနိုင်ငံမှ လူသိများတဲ့ ကစားသမားများထဲမှ တစ်ဦးဖြစ်တဲ့ ကစားသမားတစ်ဦးဟာ မြို့တော် ကမ်ပါလာရှိ နေအိမ်အနီးတွင် လုယက်သူများလို့ ယူဆရသူများရဲ့ တိုက်ခိုက်ခြင်းခံရကာ သေဆုံးသွားခဲ့ပါတယ်။
အသက် ၂၇ နှစ်ရှိ ဒေးဗစ်အိုဝိုရီဟာ မိုဘိုင်းဖုန်းနှင့် သူ့တွင် ပါဝင်လာတဲ့ ပစ္စည်းများ မဆုံးရှုံးရေး ကာကွယ်စဉ် တိုက်ခိုက်ခြင်းခံရကာ သေဆုံးသွားခဲ့ခြင်းဖြစ်ကြောင်း ရဲတပ်ဖွဲ့က ဆိုထားပါတယ်။
အိုဝိုရီဟာ ယူဂန်ဒါပရီးမီးယားလိဂ်ဖလားအား စံချိန်တင်ဆွတ်ခူးထားတဲ့ Sports Club (SC) Villa ရဲ့အသင်းခေါင်းဆောင်တစ်ဦးဖြစ်ပြီး ညာနောက်ခံလူအဖြစ်လည်းကောင်း၊ အလယ်တန်းကစားသမားအဖြစ်လည်းကောင်း ကစားနေသူ ဖြစ်ပါတယ်။
သူဟာ ယူဂန်ဒါလက်ရွေးစင်အသင်းအတွက်လည်း ကိုယ်စားပြုကစားနေသူ ဖြစ်ပါတယ်။
မျက်မြင်သက်သေများရဲအဆိုအရ အင်္ဂါနေ့ညတုန်း လုယက်သူများဟာ အိုဝိုရီအား ကျောက်ခဲဖြင့် ထုရိုက်တိုက်ရိုက်ပြီးနောက် ကိုယ်တွင် ပါတဲ့ ပစ္စည်းများကို ရယူသွားခဲ့ခြင်းဖြစ်ကြောင်း ဆိုသွားပါတယ်။
အိုဝိုရီဟာ ခေါင်းမူးဝေ ဒဏ်ရာရရှိကာ အနီးရှိ ဆေးခန်းတစ်ခုသို့ သွားပြခဲ့ပြီးနောက် ပုဂ္ဂလိက ဆေးရုံတစ်ခုသို့ တက်ရောက်ခဲ့ပါတယ်။ ဒါပေမဲ့ သူဟာ ဗုဒ္ဓဟူးနေ့မှာတော့ ဒဏ်ရာများဖြင့် သေဆုံးသွားခဲ့ပါတယ်။
လက်ရှိအချိန်တွင် ဒေသတွင်းရဲတပ်ဖွဲ့ဝင်များဟာ အိုဝိုရီအား တိုက်ခိုက်လုယက်ခဲ့သူများအား ဖမ်းဆီးထိန်းသိမ်းနိုင်ရေး ရှာဖွေနေပါတယ်။
အိုဝိုရီ သေဆုံးသွားမှုက ယူဂန်ဒါဘောလုံးလောကနှင့်ပရိသတ်များအတွက် ကြီးမားတဲ့ တုန်လှုပ်စရာ အဖြစ်အပျက် ဖြစ်နေပြီး နိုင်ငံရေးသမားများက တရားမျှတမှု ပြန်လည် ရရှိရေး တောင်းဆိုမှုများ ပြုလုပ်နေကြပါတယ်။
ယူဂန်ဒါပါလီမန်တွင် ဗုဒ္ဓဟူးနေ့တုန်းက အိုဝိုရီအတွက် တစ်မိနစ်ငြိမ်သက်မှု ပြုလုပ်ကာ ဝမ်းနည်းကြောင်း ပြသခဲ့ပြီး အလျှင်အမြန် စစ်ဆေးမှုများ ပြုလုပ်ရန် တိုက်တွန်းနေကြပါတယ်။
နေရာစုံတွင် ကစားနိုင်တဲ့ အိုဝိုရီဟာ စည်းကမ်းကောင်းတဲ့ ကစားသမားတစ်ဦးအဖြစ် နာမည်ကြီးသူ ဖြစ်ပြီး ဥရောပတွင် ကျင်လည်ပြီးနောက် ၂၀၂၃ ခုနှစ်တွင် SC Villa သို့ ပြန်လာခဲ့ပါတယ်။
သူဟာ ၂၀၂၄ ခုနှစ်တုန်းက နှစ်ပေါင်း ၂၀ အတွင်း ပထမဆုံးအမှတ်ပေးဖလားအဖြစ် ၁၇ ကြိမ်မြောက် အမှတ်ပေးဖလားရရှိအောင် ဦးဆောင်ပေးခဲ့သူလည်း ဖြစ်ပါတယ်။

အာဂျင်တီးနားနှင့် ကမ္ဘာ့ဖလားပြိုင်ပွဲ ယှဉ်ပြိုင်ပြီးနောက် အင်တာမိုင်ယာမီအတွက် ပထမဆုံးဂိုးတွေသွင်းလာတဲ့ လီယွန်နယ်မက်ဆီ
===================

လီယွန်နယ်မက်ဆီဟာ အာဂျင်တီးနားနှင့် ကမ္ဘာ့ဖလားပြိုင်ပွဲ ကစားပြီးနောက် အင်တာမိုင်ယာမီအတွက် ပြန်ကစားလာနိုင်ချိန်တွင် ဂိုးတွေသွင်းကာ အကောင်းဆုံးပုံစံ ဆက်လက် ပြသနေဆဲ ဖြစ်ပါတယ်။
လီယွန်နယ်မက်ဆီဟာ Atletico San Luis နှင့် ရင်ဆိုင်ကစားတဲ့ Leagues Cup ပွဲစဉ်တွင် ပါဝင်ကစားခဲ့တာပါ။
ယင်းပွဲစဉ်တွင် Atletico San Luis ဟာ ဒေးဗစ်ရိုဒရီဂွက်ဇ်ရဲ့ ဂိုးဖြင့် ပွဲကို ဦးဆောင်နိုင်ခဲ့ပေမဲ့ လီယွန်နယ်မက်ဆီရဲ့ သွင်းဂိုး ၂ ဂိုး၊ ဆီဂိုဗစ်၊ မာစီရယ်တို့ရဲ့ သွင်းဂိုးတွေနဲ့ ပထမပိုင်းမှာတင် ၄ ဂိုးပြန်သွင်းနိုင်ခဲ့ပါတယ်။
ဒုတိယပိုင်းမှာ ရာဖာလိုရန်တီက Atletico San Luis အတွက် ချေပဂိုးသွင်းယူလာခဲ့လို့ အင်တာမိုင်ယာမီတို့ ၄-၂ ဖြင့် အနိုင်ရရှိခဲ့ပါတယ်။
မက်ဆီဟာ ယခုပွဲမှာ ကိုယ်တိုင် ၂ ဂိုးသွင်းခဲ့သလို စတုတ္ထဂိုးသွင်းနိုင်အောင်လည်း ဖန်တီးပေးခဲ့ပါသေးတယ်။
သူဟာ မေဂျာလိဂ်မှာ ၁၂ ဂိုးသွင်းပြီး ၈ ကြိမ် ဖန်တီးထားပါသေးတယ်။

အာဆင်နယ်မှ ဒိန်းမတ်ကွင်းလယ်လူနော်ဂတ်ကို အဲဗာတန် ခေါ်ယူလာ
===================

အဲဗာတန်ဟာ အာဆင်နယ်ကွင်းလယ်ကစားသမားခရစ္စတီယန်နော်ဂတ်ကို ၂ နှစ်စာချုပ်ဖြင့် ခေါ်ယူလာပါတယ်။
အဲဗာတန်ဟာ ဒိန်းမတ်ကွင်းလယ်ကစားသမားအတွက် ပြောင်းရွှေ့ကြေးအား ကြေညာလာခြင်း မရှိပေမဲ့လည်း ပေါင် ၇ သန်းပေးခဲ့ရကြောင်း သိရပါတယ်။
နော်ဂတ်ဟာ ပြီးခဲ့တဲ့နှစ် နွေရာသီတုန်းက ဘရန့်ဖို့ဒ်မှ အာဆင်နယ်သို့ ပေါင် ၁၅ သန်းဖြင့် ပြောင်းခဲ့သူ ဖြစ်ပြီး ပြိုင်ပွဲအရပ်ရပ်တွင် ပွဲ ၂၀ တည်းသာ ကစားခွင့်ရခဲ့ပေမဲ့ ပရီးမီးယားလိဂ်ဖလား ရယူနိုင်ခဲ့ပါတယ်။
အဲဗာတန်ဟာ ယခုနွေရာသီတွင် မစ်ဒယ်ဘရော့မှ အလယ်တန်းကစားသမားအေဒန်ဟက်နေးကို ပေါင် ၁၆.၅ သန်းဖြင့်လည်းကောင်း၊ ချဲလ်ဆီးမှ တောင်ပံကစားသမားတိုင်ရီကေးဂျော့ကို ပေါင် ၁၈ သန်းဖြင့် ခေါ်ယူအားဖြည့်ထားပြီးလည်း ဖြစ်ပါတယ်။
နော်ဂတ်ဟာ ဘရန့်ဖို့ဒ်တွင် ၆ ရာသီကြာ ကစားခဲ့စဉ်အတွင်း အရေးပါတဲ့ ကစားသမားအဖြစ် ၁၉၆ ပွဲကစားခဲ့သူ ဖြစ်ပါတယ်။
အဲဗာတန်နည်းပြဒေးဗစ်မိုယက်စ်ဟာ အသင်းခေါင်းဆောင်ဆီးမပ်စ်ကိုးလ်မန်းနှင့် အသက် ၃၆ နှစ်ရှိ ဆီနီဂေါအလယ်တန်းကစားသမားအိုင်ဒရက်စ်ဆာဂူယီအား လက်လွှတ်ရပြီ့းနောက် အတွေ့အကြုံရင့် ကစားသမားခေါ်ယူလိုနေမှုနှင့်အတူ နော်ဂတ်အား ခေါ်ယူလာတာပါ။
အဲဗာတန်ဟာ ဩဂုတ်လ ၂၂ ရက်နေ့ စနေနေ့တွင် အိမ်ကွင်းမှာ ခရစ္စတယ်ပဲလေ့စ်နှင့် ပရီးမီးယားလိဂ်အဖွင့်ပွဲ ကစားရပါမယ်။

ဂျာမန်လူမျိုးနည်းပြဂျိုင်ဆယ်လ်ကို နည်းပြသစ်အဖြစ် နယူးကာဆယ် ခန့်အပ်လာ
=====================

နယူးကာဆယ်ဟာ မားသီးယပ်စ်ဂျိုင်ဆယ်လ်ကို နည်းပြသစ်အဖြစ် ခန့်အပ်လာပြီ ဖြစ်ပါတယ်။
နယူးကာဆယ်ဟာ ယခုနွေရာသီတွင် အရေးပါတဲ့ ကစားသမားများကို လက်လွှတ်ဆုံးရှုံးရပြီးနောက် လူငယ်ပါရမီရှင်များအား အဓိကထား ခေါ်ယူအားဖြည့်မှုများ ပြုလုပ်ထားသလို ပရီးမီးယားလိဂ်တွင် မကျင်လည်ဖူးတဲ့ လူငယ်နည်းပြတစ်ဦးကိုပါ အရဲစွန့် ခန့်အပ်လာတာလည်း ဖြစ်ပါတယ်။
ဂျာမန်လူမျိုးဂျိုင်ဆယ်လ်ဟာ ဆော်ဒီနှင့် ဩစတြီးယားတို့တွင် Al-Ahli ၊ ရက်ဘူးလ်ဆဲလ်ဘတ်တို့နှင့်အတူ အောင်မြင်မှုများ ရယူဖူးသူ ဖြစ်ပါတယ်။
အက်ဒီဟောင်းနေရာတွင် ၄ နှစ်စာချုပ်ဖြင့် အစားထိုးခန့်အပ်ခြင်းခံရတဲ့ ဂျိုင်ဆယ်လ်ဟာ ဥရောပထိပ်သီးလိဂ်ကြီး ၅ ခုတွင် ပထမဆုံးကိုင်တွယ်တဲ့အသင်းအဖြစ် နယူးကာဆယ်ကို ကိုင်တွယ်လာတာပါ။
အသက် ၃၈ နှစ်ရှိ ဂျိုင်ဆယ်လ်ဟာ ပရီးမီးယားလိဂ်ရဲ့ ဒုတိယအသက်အငယ်ဆုံးနည်းပြလည်း ဖြစ်လာမှာ ဖြစ်ပြီး ပထမဆုံးပွဲအဖြစ် ဩဂုတ်လ ၂၃ ရက်နေ့ လီဗာပူးနှင့်ပွဲအား ကြီးကြပ်ရပါမယ်။
နယူးကာဆယ်နည်းပြအဖြစ် ခန့်အပ်ခြင်းခံရပြီးနောက် ဂျိုင်ဆယ်လ်က "ကျွန်တော့်အသင်းတွေကို စည်းလုံးမှု၊ ကြိုးစားအားထုတ်မှု၊ ပြင်းထန်မှုနဲ့ နေ့စဉ် ရက်ဆက် တိုးတက်လိုစိတ်ရှိမှုနဲ့ တည်ဆောက်ပါတယ်။ ဒီအသင်းမှာရော ကလပ်မှာပါ ကြီးမားတဲ့အလားအလာကောင်းရှိတယ်လို့ ယုံကြည်ပါတယ်။ နယူးကာဆယ်အတွက် အနာဂတ်အောင်မြင်မှုတွေအတွက် ကိုယ်စွမ်းကိုယ်စ ရှိသမျှ အစွမ်းကုန် ကြိုးစားသွားပါမယ်"လို့ ပြောကြားသွားပါတယ်။
ဂျိုင်ဆယ်လ်ဟာ တနင်္လာနေ့ကတည်းက နယူးကာဆယ်ရဲ့ စပိန်ရာသီကြိုလေ့ကျင့်ခန်းအစီအစဉ်နှင့် ပူးပေါင်းလုပ်ဆောင်နေတာ ဖြစ်ပါတယ်။
နယူးကာဆယ်ဟာ ဂျိုင်ဆယ်လ်အား ခန့်အပ်နိုင်ရေးအတွက် Al-Ahli ကို နစ်နာကြေး ပေါင် ၉.၈ သန်းပေးခဲ့ရကြောင်း သိရပါတယ်။ ဂျိုင်ဆယ်လ်ဟာ Al-Ahli ကို အာရှချန်ပီယံလိဂ်ဖလား ၂ ကြိမ် ဆွတ်ခူးအောင် ဦးဆောင်ခဲ့သူလည်း ဖြစ်ပါတယ်။
ကစားသမားဘဝတုန်းက ခံစစ်သမားတစ်ဦးဖြစ်ခဲ့တဲ့ ဂျိုင်ဆယ်လ်ဟာ ဒဏ်ရာကြောင့် ကစားသမားဘဝမှ စောစောစီးစီး နားခဲ့ရပြီးနောက် ဟန်နိုဗာတွင် လက်တွဲခဲ့ဖူးတဲ့ ဆရာဖြစ်သူ ယူနိုက်တက်နည်းပြဟောင်းရေးဖ်ရန်နစ်ခ်လက်အောက်တွင် နည်းပြပညာ သင်ကြားခဲ့သူ ဖြစ်ပါတယ်။
သူဟာ ရက်ဘူးလ်ဆဲလ်ဘတ်နှင့်အတူ ဩစတြီးယားဘွန်ဒက်စ်လီဂါဖလား ၂ ကြိမ် ရရှိခဲ့သူလည်း ဖြစ်ပါတယ်။

ဘက်တစ်ရှုံးပွဲကြောင့် အာဆင်နယ်ကစားသမားများ အကြီးအကျယ်ဒေါသထွက်
=======================

မီခေးလ်အာတီတာက အာဆင်နယ်ကစားသမားများမှာ ဒဗ္ဗလင်တွင် ဘက်တစ်အား ရာသီကြိုခြေစမ်းပွဲတွင် ရှုံးနိမ့်ပြီးနောက် အကြီးအကျယ်ဒေါသထွက်ခဲ့ကြကြောင်း ဆိုသွားပါတယ်။
အာဆင်နယ်ဟာ ခံစစ်ပိုင်းအားနည်းမှုနှင့်အတူ ပထမပိုင်းတွင် ၃ ဂိုးပေးခဲ့ရပြီး ၃-၁ ဖြင့် အရေးနိမ့်ခဲ့ပါတယ်။
ယင်းပွဲတွင် အာဆင်နယ်တို့ ဘောလုံးပိုင်ဆိုင်မှု အသာစီးရရှိခဲ့ပေမဲ့လည်း ဘက်တစ်က ခြိမ်းခြောက်မှုပိုင်း ပိုမို ပြုလုပ်နိုင်ကာ အာဆင်နယ်ထက် ဂိုးပေါက်တည့်ကန်ချက် ပိုမို ပြုလုပ်နိုင်ခဲ့ပါတယ်။
ပထမပိုင်းခြေစမ်းအတွက် အဝတ်အစားလဲခန်းအခြေအနေအား မေးမြန်းရာတွင် အာတီတာက "အရမ်းတုန်လှုပ်နေကြတယ်။ တကယ့် အဆိုးရွားဆုံးအချိန်ပဲ။ သူတို့ ဒေါသထွက်နေကြတယ်။ ဒါပေမဲ့ ဒါက ကောင်းပါတယ်။ ကျွန်တော်တို့ လိုအပ်နေတာ ဒါပဲလေ"လို့ ပြောကြားသွားပါတယ်။
အာဆင်နယ်အသင်းတွင် အင်္ဂလန်စတားများဖြစ်ကြတဲ့ ဒီကလန်ရိုက်စ်၊ အီဘီရီချီအီးဇီး၊ နိုနီမာဒူကီနှင့် ဘူကာရိုဆာကာတို့ ပါဝင်ခြင်း မရှိသေးပါဘူး။ အသင်းခေါင်းဆောင်မာတင်အိုဒီဂတ်မှာလည်း တကိုယ်တော်လေ့ကျင့်ခန်းဆင်းနေပေမဲ့လည်း အသင်းအတွက် မကစားသေးပါဘူး။
ဒါ့အပြင် စပိန်နှင့်အတူ ကမ္ဘာ့ဖလားချန်ပီယံဖြစ်ခဲ့တဲ့ မီခေးလ်မီရီနို၊ ဒေးဗစ်ရာယာနှင့် မာတင်ဇူဘီမန်ဒီတို့မှာလည်း အာဆင်နယ်နှင့် ပူးပေါင်းခြင်း မရှိသေးပါဘူး။
အာဆင်နယ်ရဲ့ ခြေစွမ်းအပေါ် ကျေနပ်အားရခြင်း မရှိပေမဲ့လည်း အာတီတာက ဘက်တစ်ရှုံးပွဲကြောင့် အသင်းရဲ့ ခြေစွမ်းပိုမိုကောင်းမွန်လာနိုင်တယ်လို့ အပြုသဘောဆောင် ပြောကြားသွားပါတယ်။

ကမ္ဘာ့ဖလားကို ရောင်းစားရန် ကြိုးပမ်းမှုအတွက် တောင်းပန်လာပေမဲ့ ဖီဖာဥက္ကဌရာထူးမှ နုတ်ထွက်လာခြင်း မရှိတဲ့ အင်ဖန်တီနို
====================

ဂျီယန်နီအင်ဖန်တီနိုဟာ ကမ္ဘာ့ဖလားအပါအဝင် ဖီဖာကြီးမှူးကျင်းပတဲ့ ပြိုင်ပွဲများရဲ့ ရှယ်ယာများကို ပုဂ္ဂလိက ရင်းနှီးမြှပ်နှံသူများထံ ရောင်းစားရေး အငြင်းပွားဖွယ် အစီအစဉ်အတွက် တောင်းပန်လာခဲ့ပေမဲ့လည်း ဖီဖာဥက္ကဌရာထူးမှ နုတ်ထွက်လာခြင်း မရှိပါဘူး။
အင်ဖန်တီနိုဟာ ကမ္ဘာ့ဖလားအား ရောင်းစားမယ့် အစီအစဉ်ကြောင့် အပြင်းအထန် ဝေဖန်မှုများ ကြုံရပြီးနောက် ဗုဒ္ဓဟူးနေ့တုန်းက မော်ရိုကိုနိုင်ငံ၊ ရာဘက်တွင် အရေးပေါ် စီနီယာအမှုဆောင်ချုပ်အစည်းအဝေးပြုလုပ်ခဲ့ရာ ယင်းအစည်းအဝေးတွင် ရာထူးအတွက် ဆက်လက်ထောက်ခံမှု ရရှိခဲ့တာလည်း ဖြစ်ပါတယ်။
ဥရောပဘောလုံးအဖွဲ့ချုပ်က ပြီးခဲ့တဲ့အပတ်တုန်းက အင်ဖန်တီနိုရဲ့ ဖီဖာခေါင်းဆောင်မှုအပိုင်းကို အယုံအကြည်မရှိတော့ကြောင်း ကြေညာခဲ့သလို အာရှဘောလုံးအဖွဲ့ချုပ်၊ ကွန်ကာကပ်ဖ်ဘောလုံးအဖွဲ့ချုပ်တို့ကလည်း ယင်းအစီအစဉ်အား အပြင်းအထန် ဝေဖန်ခဲ့ကြပါတယ်။
ဗုဒ္ဓဟူးနေ့မှာတော့ အင်ဖန်တီနိုဟာ အရေးပေါ် အစည်းအဝေးဆင့်ခေါ်ခဲ့ပြီး ယင်းအစည်းအဝေးသို့ အထွေထွေအတွင်းရေးမှူးမားသီးယပ်စ်ဂရက်ဖ်စထရောင်းအပါအဝင် အမှုဆောင်အစည်းအဝေး ပြုလုပ်ခဲ့ပါတယ်။
ဒါပေမဲ့ ယင်းအစည်းအဝေးတွင် အင်ဖန်တီနိုဟာ ကမ္ဘာ့ဖလားအား ရောင်းစားရန် အစီအစဉ်ခဲ့မှုအတွက် တောင်းပန်ခဲ့ပါတယ်။ တဆက်တည်းတွင် ယင်းအစည်းအဝေးတွင် အထွေထွေအတွင်းရေးမှူးအပါအဝင် အမှုဆောင်များက အင်ဖန်တီနိုအား ဥက္ကဌအဖြစ် ဆက်လက် ဆောင်ရွက်ရန် ထောက်ခံချက်ပေးခဲ့ကြပါတယ်။
အင်ဖန်တီနိုဟာ ယင်းအစည်းအဝေးအပြီးတွင် ဖီဖာကောင်စီ၊ ဖီဖာအဖွဲ့ဝင် နိုင်ငံပေါင်း ၂၁၁ နိုင်ငံတို့ထံသို့ ကမ္ဘာ့ဖလားအား ရောင်းစားမယ့် အစီအစဉ်အတွက် တောင်းပန်တဲ့အပြင် နောင်တွင် ယင်းသို့ အဖြစ်အပျက်မျိုး ဖြစ်လာမှာ မဟုတ်ကြောင်း ရေးသားထားတဲ့ စာအား ပေးပို့ခဲ့ပါတယ်။
အင်ဖန်တီနိုနှင့် ဂရက်ဖ်စထရောင်းတို့ဟာ ရာဘက်ရှိ အရေးပေါ် အစည်းအဝေးအပြီးတွင် အမျိုးသမီးအာဖရိကနေးရှင်းဖလားပွဲတစ်ပွဲအား အတူတကွ သွားရောက်ကြည့်ရှုခဲ့ကြပါသေးတယ်။
အင်ဖန်တီနိုဟာ ကမ္ဘာ့ဖလားအား ရောင်းစားမယ့် အစီအစဉ်အား ထောက်ခံလာပါက အဖွဲ့ဝင် တစ်နိုင်ငံစီအား ဒေါ်လာ သန်း ၄၀ ပေးမယ်လို့ ဆွဲဆောင်ခဲ့သူလည်း ဖြစ်ပါတယ်။
အင်ဖန်တီနိုဟာ ကမ္ဘာဖ့လားအား ရောင်းစားမယ့် အစီအစဉ်ကြောင့် အပြင်းအထန်ဝေဖန်မှုများ ကြုံခဲ့ရပေမဲ့လည်း ရာထူးအတွက် ဖီဖာအမှုဆောင်ချုပ်တို့ရဲ့ ထောက်ခံမှု အပြည့်အဝ ရရှိနေဆဲ ဖြစ်ကြောင်း တွေ့ရပါတယ်။
အသက် ၅၆ နှစ်ရှိ ဆွစ်ဇာလန်နိုင်ငံသားဟာ ၂၀၂၇ ခုနှစ်မတ်လတွင် ကျင်းပလာမယ့် ဖီဖာဥက္ကဌ ရွေးကောက်ပွဲတွင် စတုတ္ထသက်တမ်းအတွက် ဆက်လက် ယှဉ်ပြိုင်လာဦးမှာ ဖြစ်ပါတယ်။
ဖီဖာဥက္ကဌရာထူးအတွက် ယှဉ်ပြိုင်မယ့်သူအနေဖြင့် နိုဝင်ဘာလ ၁၈ ရက်နေ့အထိ အဆိုပြုလွှာတင်ခွင့် ရှိနေပါတယ်။
အင်ဖန်တီနိုနှင့် ဖီဖာဥက္ကဌရာထူးအတွက် ယှဉ်ပြိုင်လာမယ့်သူအနေဖြင့် ဖီဖာအဖွဲ့ဝင် ၂၁၁ နိုင်ငံတို့မှ ၁၀၆ မဲအား ရရှိရန် လိုအပ်နေပါတယ်။
လတ်တလောအချိန်တွင် အင်္ဂလန်၊ ဝေးလ်၊ စကော့တလန်၊ ဂျော်ဒန်အပါအဝင် ဘောလုံးအဖွဲ့ချုပ်အမြောက်အမြားတို့က လာမယ့် ရွေးကောက်ပွဲတွင် အင်ဖန်တီနိုအား ထောက်ခံသွားမှာ မဟုတ်ကြောင်း ကြေညာထားကြပါတယ်။
ဒါပေမဲ့ အီဂျစ်၊ မော်ရိုကို၊ နိုင်ဂျာ၊ မူရီတာနီယာ၊ ဒီမိုကရက်တစ်ကွန်ဂို၊ ဖိလစ်ပိုင်တို့က အင်ဖန်တီနိုအား ဆက်လက် ထောက်ခံသွားမယ်လို့ ကြေညာထားကြပါတယ်။

ဗယ်လီကာနိုနောက်ခံလူချာဗာရီယာကို ပေါင် ၁၆.၃ သန်းဖြင့် ခေါ်ယူရေး ချဲလ်ဆီး နီးစပ်နေပြီ
===================

ချဲလ်ဆီးဟာ ရာယိုဗယ်လီကာနိုနောက်ခံလူပက်ချာဗာရီယာကို ခေါ်ယူရေး သဘောတူညီမှု ရလုနီးပါး ဖြစ်နေပြီ ဖြစ်ပါတယ်။
ချဲလ်ဆီးဟာ အသက် ၂၈ နှစ်ရှိ နောက်ခံလူနှင့် ပုဂ္ဂိုလ်ရေးဆိုင်ရာ သဘောတူညီမှု ရရှိထားပြီးဖြစ်ကာ ပေါင် ၁၆.၃သန်းအပြင် အပိုဆုကြေးထပ်မံပေးမယ့်အချက်ဖြင့် အပြောင်းအရွှေ့အပြီးသတ်နိုင်ရေး လုပ်ဆောင်နေပါတယ်။
ဘယ်နောက်ခံလူချာဗီရီယာဟာ ပြီးခဲ့တဲ့ရာသီတုန်းက ရီးရဲလ်မက်ဒရစ်ကို ကိုင်တွယ်ခဲ့တဲ့ ချဲလ်ဆီးနည်းပြသစ်ဇာဘီအလွန်ဆိုရဲ့ အဓိကပစ်မှတ်ထဲမှ တစ်ဦး ဖြစ်ပါတယ်။
ချဲလ်ဆီးဟာ ဇွန်လနှောင်းပိုင်းမှ စတင်ကာ ချီဗာရီယာအား ခေါ်ယူရေး‌ ဆွေးနွေးခဲ့တာ ဖြစ်ပြီး ပေါင် ၁၅ သန်းဖြင့် ကနဦးကမ်းလှမ်းမှု ပယ်ချခြင်းခံခဲ့ရပါတယ်။
နောက်ပိုင်းတွင် အပြောင်းအရွှေကိစ္စဆွေးနွေးမှု ဆက်လက် ပြုလုပ်လာခဲ့ပြီး ဗယ်လီကာနိုဘက်က စာချုပ်ဖျက်သိမ်းကြေး ပေါင် ၄၂.၈ သန်းအထိ အပြည့်ပေးရေး တောင်းဆိုခဲ့ပါသေးတယ်။
ဗယ်လီကာနိုဟာ မေလတုန်းက ကွန်ဖရင့်လိဂ်ဗိုလ်လုပွဲတွင် ပဲလေ့စ်အား ရှုံးနိမ့်ပြီးကတည်းက ချဲလ်ဆီးသို့ ပြောင်းလိုကြောင်း ပြတ်သားစွာ ပြောခဲ့သူလည်း ဖြစ်ပါတယ်။
ချဲလ်ဆီးဟာ ဇွန်လတုန်းက မာ့ခ်ကူကူရယ်လာကို ရီးရဲလ်မက်ဒရစ်သို့ ပေါင် ၅၁.၈ သန်းဖြင့် ရောင်းချလိုက်ပြီးနောက် ဘယ်နောက်ခံလူနေရာအား အားဖြည့်ရန် လိုအပ်နေပါတယ်။
ချဲလ်ဆီးဟာ ယခုနွေရာသီတွင် မာကိုပါလီစထရာ၊ မော်ဂန်ရော်ဂျာ၊ မာဆင့်လာခရွိုက်စ်၊ ဗလင်တင်ဘာကို၊ ဒန်နီဝဲလ်ဘက်၊ ဂျော်ဒန်ဟင်ဒါဆင်တို့ကိုလည်း ခေါ်ယူအားဖြည့်ထားပြီး ဖြစ်ပါတယ်။