ဆီဆိုင်မြို့နယ်၌ မိုးကြိုးစက်ကွင်းမိ၍ နွားများ‌ေ-သဆုံးခဲ့ခြင်းအတွက် နွားပိုင်ရှင်များကို KBZ ဖောင်ဒေးရှင်းက ကူညီထောက်ပံ့ပေးရန်ပြင်ဆင်

ရှမ်းပြည်နယ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်၊ လွယ်ပွတ်ကျေးရွာအုပ်စု၊ ကောင်ဝါးတောင်ကျေးရွာတွင် မေ ၂၁ ရက်က မိုးကြိုးစက်ကွင်း (၂)ကြိမ်မိ၍ နွားအကောင်ရေ(၇၀)ခန့် ‌ေ-သဆုံးခဲ့သည်။
ထို့ကြောင့် KBZ ဖောင်ဒေးရှင်းနှင့် ရှမ်းတောင်ပရဟိတညီနောင်များကွန်ရက် နာယကဦးအောင်ကိုဝင်းက နွားပိုင်ရှင်များအားကူညီထောက်ပံ့ပေးမည်ဖြစ်၍ ရှမ်းတောင်ပရဟိတညီနောင်များကွန်ရက် တာဝန်ရှိသူများက ယင်း ကျေးရွာသို့သွားရောက်ကာစာရင်းကောက်ယူခဲ့ကြသည်။
စာရင်းအရ ကျေးရွာနေ အိမ်ထောင်စုများပိုင်ဆိုင်သည့် နွားကောင်ရေ(၆၈)ကောင်‌ေ-သဆုံးသွားခဲ့သဖြင့် ထောက်ပံ့မှုများပြုလုပ်ရန် စီစဥ်လျက်ရှိသည်။

မြစိမ်းရောင်သာသနာ့နယ်မြေ၌ သီဟရာဇာအလိုတော်ပြည့်ဘုရား ရွှေထီးတော်တင်လှူ၊ သာသနာပြုလုပ်ငန်းမှတ်တမ်းကျောက်စာတိုင် ဖွင့်လှစ်

ဧရာဝတီတိုင်းဒေသကြီး၊ မြောင်းမြမြို့ရှိ မြစိမ်းရောင်သာသနာ့နယ်မြေအတွင်း တည်ထားကိုးကွယ်သည့် သီဟရာဇာအလိုတော်ပြည့်ဘုရား၏ ရွှေထီးတော်တင်လှူပွဲ အခမ်းအနားကို ယနေ့ ကျင်းပခဲ့ကြောင်း သိရသည်။
အခမ်းအနားသို့ ဧရာဝတီတိုင်းဒေသကြီးလွှတ်တော်ဥက္ကဋ္ဌ၊ တိုင်းဒေသကြီးအစိုးရအဖွဲ့ ဝန်ကြီးများနှင့် အလှူရှင်များ တက်ရောက်ခဲ့ကြသည်။
အခမ်းအနားတွင် တိုင်းဒေသကြီးဝန်ကြီးများက ရွှေထီးတော်ကို ပင့်ဆောင်တင်လှူခဲ့ပြီး တိုင်းဒေသကြီးလွှတ်တော်ဥက္ကဋ္ဌက ငှက်မြတ်နားတော်ကို တင်လှူပူဇော်ခဲ့သည်။ ထို့ပြင် တိုင်းဒေသကြီးဝန်ကြီးချုပ်က ရတနာစိန်ဖူးတော်ကို တင်လှူပူဇော်ခဲ့ကြောင်း သိရသည်။
ဆက်လက်၍ မြစိမ်းရောင်သာသနာ့နယ်မြေအတွင်း ငါးနှစ်တာကာလအတွင်း ဆောင်ရွက်ခဲ့သည့် ဘက်စုံသာသနာပြုလုပ်ငန်းများအား မှတ်တမ်းတင်ထားသော ကဗ္ဗည်းမော်ကွန်းကျောက်စာတိုင်ကို စက်ခလုတ်နှိပ် ဖွင့်လှစ်ပေးခဲ့သည်။
ထို့နောက် နှစ်ထပ်ဆွမ်းစားဆောင် ဆောက်လုပ်ရေးအတွက် အလှူရှင်များက ကျပ်သိန်း ၅,၀၀၀ လှူဒါန်းခဲ့ကြပြီး ပေ ၁၀၀ × ၂၀၀ အရွယ် သာသနာ့ဗိမ္မာန်တော်၏ အမိုးနှင့် မျက်နှာကျက်လှူဒါန်းခြင်းများ ပြုလုပ်ခဲ့ကြသည်။ ထို့အပြင် သုဓမ္မာဇရပ် ရေစက်ချအခမ်းအနားသို့ တက်ရောက်ကာ လှူဖွယ်ပစ္စည်းများ ဆက်ကပ်လှူဒါန်းခဲ့ကြကြောင်း သိရသည်။

အာဟာရပြည့်မီစွာနှင့် ဈေးနှုန်းသက်သာစွာစားသုံးနိုင်ရန် နို့နှင့် ကြက်ဥတို့ကို အပြည့်အဝရရှိအောင်ဆောင်ရွက်ပေးရမည်ဟု နိုင်ငံတော်သမ္မတမှာကြား

အာဟာရပြည့်မီစွာနှင့် ဈေးနှုန်းသက်သာစွာစားသုံးနိုင်ရန် နို့နှင့် ကြက်ဥတို့ကို အပြည့်အဝရရှိအောင်ဆောင် ရွက်ပေးရမည်ဟု နိုင်ငံတော်သမ္မတ ဦးမင်းအောင်လှိုင်က ယနေ့ မေ ၂၄ ရက်တွင် နေပြည်တော်ရှိ မွေးမြူရေးလုပ်ငန်းများအကောင်အထည်ဖော်ဆောင်ရွက်နေမှုကို ကြည့်ရှုစစ်ဆေးစဥ် မှာကြားခဲ့ခြင်းဖြစ်သည်။
မြန်မာနိုင်ငံအနေဖြင့် နို့နှင့်နို့ထွက်ပစ္စည်းများကို နှစ်စဉ်ပြည်ပမှပမာဏများစွာတင်သွင်းနေရ၍ နိုင်ငံခြားငွေများစွာကုန်ကျနေရာ မိမိတို့နိုင်ငံအတွင်းလုံလောက်မှုရှိအောင်ထုတ်လုပ်ပါက တင်သွင်းမှုကိုလျှော့ချနိုင်မည်ဟု ပြောသည်။
" မြန်မာနိုင်ငံမှာက ဒိန်ချဉ်ကိုသာထုတ်လုပ်နေကြတာကိုတွေ့မြင်ရပါတယ်။ အများစုသုံးစွဲကြတဲ့ နို့ဆီ၊ နို့စိမ်း၊ နို့မှုန့်တွေက်ု အလုံအလောက်ထုတ်လုပ်နိုင်ဖို့လိုပါတယ်။ အာဟာရပြည့်မီစွာနဲ့ ဈေးနှုန်းသက်သာစွာစားသုံးနိုင်ဖို့အတွက် နို့နဲ့ ကြက်ဥတွေကို အပြည့်အဝရရှိအောင်ဆောင်ရွက်ပေးရပါမယ်"ဟု နိုင်ငံတော်သမ္မတက ပြောသည်။
ထို့ပြင် နေပြည်တော်နှင့် နိုင်ငံတော်အတွက်အထောက်အကူဖြစ်စေသည့်လုပ်ငန်းရပ်များဖြစ်၍ အောင်မြင်အောင်ဆောင်ရွက်ရန်၊ စိုက်ပျိုးရေးလုပ်ငန်းဆောင်ရွက်သည်ဖြစ်စေ၊ မွေးမြူရေးလုပ်ငန်းဆောင်ရွက်သည်ဖြစ်စေ မျိုး၊ မြေ၊ ရေ၊ နည်းဟူသည့် မျိုးကောင်းမျိုးသန့်များစိုက်ပျိုးခြင်း၊ မွေးမြူခြင်း၊ မြေကို စနစ်တကျပြုပြင စိုက်ပျိုးသကဲ့သို့ စနစ်ကျသည့်မွေးမြူရေးစနစ်ဖြစ်အောင်ဆောင်ရွက်ရန် မှာကြားသည်။
ထို့အတူ ရေအပြည့်အဝရရှိအောင်ဆောင်ရွက်ပေး ခြင်း၊ စိုက်နည်းစနစ်၊ မွေးနည်းစနစ်များကောင်းမွန်စေခြင်းတို့ဖြင့် လုပ်ငန်းများအောင်မြင်စေမည်ဖြစ်၍ မွေးမြူရေးဇုန်များအတွင်း ကုန်ထုတ်လမ်းများကောင်း မွန်မှုရှိစေရေး စီစဉ်ဆောင်ရွက်ရန်၊ မွေးမြူရေးဇုန်များအ လိုက်/လုပ်ငန်းရပ်များအလိုက် ခြံစည်းရိုးစနစ်တကျကာရံခြင်း၊ ခြုံနွယ်များရှင်းလင်းခြင်း၊ သစ်ပင်စိုက်ပျိုးခြင်းတို့ကိုလည်း စနစ်တကျဆောင်ရွက်ရန်လည်း နိုင်ငံ တော်သမ္မတက မှာကြားခဲ့သည်။

ဟင်္သာတပြည်သူ့ဆေးရုံကြီးမှ အထူးကုဆရာဝန်များ ကွင်းဆင်းကုသမှုဆောင်ရွက်၊ ကျေးရွာပြည်သူ ၅၀၀ ကျော် အခမဲ့ဆေးကုသမှုခံယူ

ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့ ပြည်သူ့ဆေးရုံကြီးမှ ဆေးရုံအုပ်ကြီး ဒေါက်တာဖြိုးဝေဝင်း ဦးဆောင်သော အထူးကုဆရာဝန်ကြီးများ၊ အထူးကုဆရာဝန်များ၊ ကျန်းမာရေးဝန်ထမ်းများနှင့် ပြည်သူ့ကျန်းမာရေးဦးစီးဌာနမှ ဝန်ထမ်းများပါဝင်သည့်အဖွဲ့သည် ဟင်္သာတမြို့နယ်၊ လိပ်ချောင်းကျေးရွာနှင့် အနီးပတ်ဝန်းကျင်ရှိ ကျေးရွာများမှ ပြည်သူများအား စလင်းကျောင်းကြီးကျောင်းတိုက်၌ ယနေ့ နံနက် ၉ နာရီမှစတင်ကာ ကွင်းဆင်းကျန်းမာရေးစောင့်ရှောက်မှုများ ဆောင်ရွက်ပေးခဲ့ကြောင်း သိရသည်။
အဆိုပါ ပြည်သူ့အကျိုးပြု နယ်လှည့်ကွင်းဆင်းကျန်းမာရေးစောင့်ရှောက်မှု အစီအစဉ်အတွင်း ဒေသခံပြည်သူများ လာရောက်ဆေးကုသမှုခံယူခဲ့ကြရာ အထွေထွေရောဂါလူနာ ၁၇၁ ဦး၊ ခွဲစိတ်လူနာ ၃၃ ဦး၊ ကလေးလူနာ ၃၃ ဦး၊ အရိုးရောဂါလူနာ ၇၇ ဦး၊ သွားနှင့်ခံတွင်းလူနာ ၁၇ ဦး၊ မျက်စိလူနာ ၅၇ ဦး၊ စိတ်ကျန်းမာရေးနှင့် မူးယစ်ဆေးဖြတ်လူနာ ၃ ဦး၊ နား၊ နှာခေါင်း၊ လည်ချောင်းရောဂါလူနာ ၃၉ ဦးနှင့် ကိုယ်အင်္ဂါပြန်လည်သန်စွမ်းရေးလူနာ ၇၅ ဦးတို့ကို စစ်ဆေးကုသပေးခဲ့ကြသည်။
ထို့ပြင် မျက်စိအတွင်းတိမ်ခွဲစိတ်ကုသရန် လူနာ ၅ ဦး၊ အထွေထွေခွဲစိတ်ရောဂါလူနာ ၅ ဦးနှင့် အကြောအဆစ်နှင့် ကိုယ်အင်္ဂါပြန်လည်သန်စွမ်းရေးလူနာ ၁၅ ဦး စုစုပေါင်း ၂၅ ဦးအား လိုအပ်သော ခွဲစိတ်ကုသမှုများ ဆက်လက်ဆောင်ရွက်နိုင်ရန် ဟင်္သာတပြည်သူ့ဆေးရုံကြီးသို့ လွှဲပြောင်းပို့ဆောင်ပေးခဲ့ကြောင်း သိရသည်။
ကွင်းဆင်းကျန်းမာရေးစောင့်ရှောက်မှုပေးသည့် နေရာသို့ ဟင်္သာတခရိုင် စီမံအုပ်ချုပ်ရေးအဖွဲ့ ဥက္ကဋ္ဌ ဦးလှိုင်ထွန်းနှင့် ဇနီး ဒေါ်သက်သက်ဦး၊ ဟင်္သာတမြို့နယ် စီမံအုပ်ချုပ်ရေးအဖွဲ့ ဥက္ကဋ္ဌ ဦးအောင်ဇော်မင်းနှင့် ဇနီး ဒေါ်ခိုင်ခိုင်လွင်တို့အပါအဝင် တာဝန်ရှိသူများက လာရောက်ကြည့်ရှုအားပေးခဲ့ကြပြီး ဆေးကုသမှုခံယူနေသည့် ပြည်သူများနှင့် ရင်းရင်းနှီးနှီးတွေ့ဆုံကာ အားပေးစကားများ ပြောကြားခဲ့ကြသည်။
အဆိုပါ လုပ်ငန်းများကို နိုင်ငံတော်မှ ဆေးဝါးများ အခမဲ့ထောက်ပံ့ပေးအပ်ထားပြီး ကျန်းမာရေးဝန်ကြီးဌာန၏ လမ်းညွှန်ချက်များ၊ ဧရာဝတီတိုင်းဒေသကြီးအစိုးရအဖွဲ့၏ ကြီးကြပ်လမ်းညွှန်မှုများနှင့် ဧရာဝတီတိုင်းဒေသကြီး ကုသရေးဦးစီးဌာန၏ ကြီးကြပ်မှုတို့ဖြင့် အကောင်အထည်ဖော် ဆောင်ရွက်ခဲ့ခြင်းဖြစ်ကြောင်း သိရသည်။

မွေးမြူရေးလုပ်ငန်းများ တိုးချဲ့ဆောင်ရွက်ရေးနှင့် ဇီဝဓာတ်ငွေ့လျှပ်စစ်ထုတ်လုပ်ရေး နိုင်ငံတော်သမ္မတ တိုက်တွန်း

နိုင်ငံတော်သမ္မတ ဦးမင်းအောင်လှိုင် သည် မေ ၂၄ ရက် နံနက်ပိုင်းက နေပြည်တော်ရှိ မွေးမြူရေးလုပ်ငန်းများ အကောင်အထည်ဖော်ဆောင်ရွက်နေမှုများကို ကွင်းဆင်းကြည့်ရှုစစ်ဆေးခဲ့ပြီး တိရစ္ဆာန်အညစ်အကြေးများမှ ဇီဝဓာတ်ငွေ့ထုတ်လုပ်ကာ လျှပ်စစ်မီးအဖြစ် ပြန်လည်အသုံးပြုနိုင်ရေး စီမံဆောင်ရွက်ရန် မှာကြားခဲ့ကြောင်း သိရသည်။
နိုင်ငံတော်သမ္မတသည် ရွှေမြို့မွေးမြူရေးဇုန်ရှိ Sunlight Venture Co., Ltd. ၏ ဆိတ်မွေးမြူရေးခြံ၊ ယင်းဇုန်အတွင်းရှိ နယ်မြေခံတပ်ရင်း၏ ဝက်မွေးမြူရေးခြံ၊ တပ်ကုန်းမြို့နယ် အမှတ်(၁)ကံကြီးမွေးမြူရေးဇုန်ရှိ ဦးတွမ်ခင်ဝင်း၏ ဖန်ဟွနို့စားနွားမွေးမြူရေးခြံ၊ ဦးမြတ်စံ၏ ကြက်မွေးမြူရေးခြံနှင့် ဦးတင်မြိုင်၏ အသားတိုးဝက်မွေးမြူရေးခြံများကို လှည့်လည်ကြည့်ရှုစစ်ဆေးခဲ့သည်။
မွေးမြူရေးလုပ်ငန်းများ ဆောင်ရွက်ရာတွင် ခေတ်မီမွေးမြူရေးစနစ်များ ကျင့်သုံးရန်၊ ဇီဝလုံခြုံရေးစနစ်များ အလေးထားဆောင်ရွက်ရန်နှင့် ဆိတ်မွေးမြူရေးလုပ်ငန်းများတွင် အသားထုတ်လုပ်မှုအပြင် ဆိတ်သားရေများကိုပါ ဈေးကွက်သို့ ဖြန့်ဖြူးနိုင်ရေး ဆောင်ရွက်ရန် မှာကြားခဲ့သည်။ ထို့ပြင် ဆိတ်အစာအတွက် နေဗီယာမြက်များ စိုက်ပျိုးခြင်းနှင့်အတူ ဇီးပင်များ စိုက်ပျိုး၍ ဇီးသီးခြောက်ဖတ်များကို အစာအဖြစ် အသုံးပြုနိုင်ရေး လေ့လာဆောင်ရွက်ရန်လည်း တိုက်တွန်းခဲ့သည်။
ဝက်မွေးမြူရေးလုပ်ငန်းများနှင့် ပတ်သက်၍ ပြည်ပမှ မျိုးကောင်းမျိုးသန့်များ တင်သွင်းမွေးမြူခြင်းထက် ပြည်တွင်း၌ မျိုးထုတ်လုပ်ကာ တိုးချဲ့မွေးမြူနိုင်ရေး ဆောင်ရွက်ရန်၊ အောင်မြင်သော မွေးမြူရေးလုပ်ငန်းများ၏ နည်းပညာနှင့် စီမံခန့်ခွဲမှုပုံစံများကို လေ့လာသုတေသနပြု၍ လုပ်ငန်းများ ပိုမိုတိုးချဲ့နိုင်ရေး ကြိုးပမ်းဆောင်ရွက်ရန် မှာကြားခဲ့သည်။
အမှတ်(၁)ကံကြီးမွေးမြူရေးဇုန်ရှိ နို့စားနွားမွေးမြူရေးခြံအား စစ်ဆေးစဉ် နို့စားနွားမွေးမြူရေးလုပ်ငန်းများတွင် ပြည်ပနိုင်ငံများ၏ အောင်မြင်သော မွေးမြူရေးပုံစံများကို လေ့လာအသုံးချရန်နှင့် မွေးမြူရေးလုပ်ငန်းများမှ ထွက်ရှိသော အညစ်အကြေးများကို ပြန်လည်သိုလှောင်ကာ ဇီဝဓာတ်ငွေ့ထုတ်လုပ်၍ လျှပ်စစ်ဓာတ်အားအဖြစ် အသုံးပြုခြင်းဖြင့် စွမ်းအင်ကုန်ကျစရိတ် လျှော့ချနိုင်ရေး ဆောင်ရွက်ရန် မှာကြားခဲ့သည်။
ကြက်မွေးမြူရေးခြံအား ကြည့်ရှုစစ်ဆေးစဉ်တွင်လည်း ဥစားကြက်မွေးမြူရေးလုပ်ငန်းသည် ပြည်သူများအတွက် အာဟာရပြည့်ဝသော စားသောက်ကုန်များ ပိုမိုရရှိစေရေးနှင့် ဈေးနှုန်းသက်သာစွာ စားသုံးနိုင်ရေးအတွက် အရေးပါကြောင်း ပြောကြားခဲ့ပြီး လုပ်ငန်းများ အောင်မြင်စွာ လည်ပတ်နိုင်ရေးနှင့် တိုးချဲ့ဆောင်ရွက်နိုင်ရေး အလေးထားဆောင်ရွက်ရန် တိုက်တွန်းခဲ့သည်။
လက်ရှိတွင် နေပြည်တော်၌ ကံကြီးမွေးမြူရေးဇုန်၊ ရွှေမြို့မွေးမြူရေးဇုန်နှင့် ပြောင်ခေါင်းကြီးမွေးမြူရေးဇုန်တို့ကို အကောင်အထည်ဖော် ဆောင်ရွက်လျက်ရှိကြောင်း သိရသည်။

USDP ပါတီ ဒုဥက္ကဋ္ဌ ဦးလှထွန်းနှင့်အဖွဲ့ ဒုတိယအကြိမ်နိုင်ငံတကာညီလာခံတက်ရောက်ရန် ဘယ်လာရုစ်နိုင်ငံထွက်ခွာ

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP) ဒုဥက္ကဋ္ဌဦးလှထွန်း၊ ပါတီဗဟိုအလုပ်အမှုဆောင်ဦးလှသိန်း၊ နိုင်ငံတကာရေးရာဌာန ဌာနမှူးဦးနိုင်ဝင်းတို့သည် ယနေ့ မေ ၂၄ ရက်ည ၆ နာရီက ရန်ကုန်လေဆိပ်မှတစ်ဆင့် ဘယ်လာရုစ်နိုင်ငံသို့ထွက်ခွာသွားခဲ့ကြောင်း သိရသည်။
ဘယ်လာရုစ်နိုင်ငံ Belaya Rus ပါတီ၏ဖိတ်ကြားချက်အရ ဒုတိယအကြိမ်နိုင်ငံတကာညီလာခံတက်ရောက်ရန် ထွက်ခွာသွားခဲ့ခြင်းဖြစ်သည်။

အွန်လိုင်းလိမ်လည်မှုတွင်ပါဝင်သည့် တရုတ်နိုင်ငံသား (၂၇)ဦးကို ပြည်နှင်နိုင်ရေးစစ်ဆေး
လဝက ဥပဒေ၊ မူးယစ်ဥပဒေတို့ဖြင့်အရေးယူထားသည့် ပြည်ပနိုင်ငံသား(၆၆၂)ဦးရှိ

ကရင်ပြည်နယ်၊ မြဝတီမြို့ဝန်းကျင်ရှိ ဆိုဒ်များအတွင်းသို့ တရားမဝင်ဝင်ရောက်လာပြီး အွန်လိုင်းလိမ်လည်မှုကျူးလွန်ခဲ့သည့် တရုတ်နိုင်ငံသား(၂၇)ဦီးကိုထိန်းသိမ်းနိုင်ခဲ့ပြီးနောက် ပြည်နှင်နိုင်ရေးအတွက်စစ်ဆေးခဲ့ကြောင်း သိရသည်။
၂၀၂၅ ခုနှစ်၊ ဇန်နဝါရီ ၃၀ ရက်မှ ၂၀၂၆ ခုနှစ်၊ မေ ၂၄ ရက်အထိ မြဝတီမြို့နယ်အတွင်းသို့ တရားမဝင်ဝင်ရောက်လာသည့် ပြည်ပနိုင်ငံသား(၁၄,၆၈၅)ဦးကိုထိန်းသိမ်းနိုင်ခဲ့ပြီး ၎င်းတို့အနက် (၁၃,၅၂၁)ဦးအား ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေ လုပ်ထုံးလုပ်နည်းများနှင့်အညီပြည်နှင်လွှဲပြောင်းပေးခဲ့ပြီးဖြစ်ကြောင်း သိရသည်။
လွှဲပြောင်းပေးအပ်ရန်ကျန်ရှိသည့် ပြည်ပနိုင်ငံသား (၁,၁၆၄)ဦးတွင် လူဝင်မှုကြီးကြပ်ရေး (လတ်တလော) ပြဌာန်းချက်များအက်ဥပဒေပုဒ်မ ၃(၁)/၁၃(၁)နှင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အပြစ်ပေးအရေးယူခဲ့သည့် ပြည်ပနိုင်ငံသား(၆၆၂)ဦးရှိကြောင်း သိရသည်။
ထို့ကြောင့် ကျန်ရှိသည့် ပြည်ပနိုင်ငံသား(၅၀၂)ဦးတို့အား သက်ဆိုင်ရာနိုင်ငံများသို့ လွှဲပြောင်းပေးရန် အ သင့်ဖြစ်နေပြီဖြစ်၍ ကောင်းမွန်စွာထိန်းသိမ်းစောင့် ရှောက်ထားကြောင်း သိရသည်။

ဖလမ်း၊ တီးတိန်နှင့် တွန်းဇံသို့ ပြန်လည်ထူထောင်ရေးပစ္စည်းများ လေကြောင်းဖြင့်ပို့ဆောင်၊ ဘိလပ်မြေ ၁၀ တန်ပါဝင်

ချင်းပြည်နယ်ရှိ ဖလမ်း၊ တီးတိန်နှင့် တွန်းဇံမြို့များတွင် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရန်အတွက် ဘိလပ်မြေ၊ အမိုးသွပ်နှင့် ကယ်ဆယ်ရေးထောက်ပံ့ပစ္စည်းများကို မေ ၂၄ ရက် နံနက်ပိုင်းက တပ်မတော်လေယာဉ်များဖြင့် ပို့ဆောင်ပေးခဲ့ကြောင်း သိရသည်။
ထုတ်ပြန်ချက်အရ တပ်မတော်က အဆိုပါမြို့များကို ပြန်လည်ထိန်းချုပ်ထားပြီးနောက် ပြန်လည်ထူထောင်ရေးလုပ်ငန်းများကို အရှိန်အဟုန်ဖြင့် ဆောင်ရွက်လျက်ရှိကြောင်း ဖော်ပြထားသည်။
ယင်းသို့ ဆောင်ရွက်ရာတွင် တည်ဆောက်ရေးလုပ်ငန်းများအတွက် လိုအပ်သည့် ဘိလပ်မြေ၊ အမိုးသွပ်နှင့် သွပ်ရိုက်သံများကို မန္တလေးမြို့မှတစ်ဆင့် ပို့ဆောင်ခဲ့ပြီး၊ နေရပ်ပြန်ပြည်သူများအတွက် ရည်ရွယ်သည့် လူသုံးကုန်ပစ္စည်းများ၊ မီးဖိုချောင်သုံးပစ္စည်းများနှင့် တစ်ကိုယ်ရေသန့်ရှင်းရေးသုံးပစ္စည်းများ ပါဝင်သော ကယ်ဆယ်ရေးထောက်ပံ့ပစ္စည်းများကို နေပြည်တော်မှတစ်ဆင့် ပေးပို့ခဲ့ကြောင်း သိရသည်။
ပို့ဆောင်သည့်ပစ္စည်းများတွင် ဘိလပ်မြေ ၁၀ တန်၊ အမိုးသွပ် ၁၀ တန်၊ သွပ်ရိုက်သံ ၁၂၃ ပိဿာကျော်နှင့် ကယ်ဆယ်ရေးထောက်ပံ့ပစ္စည်း ၃ တန်ကျော် ပါဝင်ကြောင်း သိရသည်။
အဆိုပါပစ္စည်းများကို သက်ဆိုင်ရာမြို့နယ်များသို့ ဆက်လက်ဖြန့်ဝေ ထောက်ပံ့သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

မဲခေါင်ဒေသခွဲ မီးခိုးမြူငွေ့အန္တရာယ် လျော့ကျ၊ သတိပေးချက်အဆင့် (၀) သို့ လျှော့ချ

အာဆီယံဒေသတွင်း နိုင်ငံများကြား နှစ်စဉ်ကြုံတွေ့နေရသည့် နယ်စပ်ဖြတ်ကျော် မီးခိုးမြူငွေ့နှင့် လေထုညစ်ညမ်းမှုပြဿနာမှာ လက်ရှိတွင် စိုးရိမ်ရသည့်အခြေအနေမှ လျော့နည်းသွားပြီဖြစ်ပြီး မဲခေါင်ဒေသခွဲ၏ ခြောက်သွေ့ရာသီကာလလည်း ကုန်ဆုံးသွားပြီဖြစ်ကြောင်း စင်ကာပူနိုင်ငံအခြေစိုက် အာဆီယံမိုးလေဝသစောင့်ကြည့်လေ့လာရေးဗဟိုဌာန (ASMC) က ထုတ်ပြန်ထားသည်။
ယင်းထုတ်ပြန်ချက်ကို မြန်မာ-ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီက ပြန်လည်အသိပေးထားခြင်းဖြစ်သည်။
ASMC ၏ ထုတ်ပြန်ချက်အရ မဲခေါင်ဒေသခွဲတွင် လွန်ခဲ့သည့် ရက်သတ္တပတ်များအတွင်း စိုစွတ်သည့် ရာသီဥတုအခြေအနေများ ဖြစ်ပေါ်ခဲ့ခြင်းကြောင့် တောမီးလောင်ကျွမ်းမှုများနှင့် Fire Hotspot များ သိသိသာသာ လျော့နည်းသွားခဲ့ကာ မီးခိုးမြူငွေ့ဖြစ်ပေါ်မှုလည်း ကျဆင်းခဲ့ကြောင်း သိရသည်။
ထိုသို့ အခြေအနေကောင်းမွန်လာမှုကြောင့် ASMC သည် မဲခေါင်ဒေသခွဲအတွက် မီးခိုးမြူငွေ့သတိပေးချက်အဆင့်ကို မေ ၇ ရက်တွင် အဆင့် (၂) မှ အဆင့် (၁) သို့ လျှော့ချခဲ့ပြီး၊ မေ ၁၄ ရက်တွင် ခြောက်သွေ့ရာသီ ကုန်ဆုံးပြီဖြစ်သဖြင့် အဆင့် (၁) မှ အဆင့် (၀) သို့ ထပ်မံလျှော့ချ သတ်မှတ်ခဲ့သည်။
ထို့ပြင် လာမည့်လများတွင် မုတ်သုံကြားကာလမှ အနောက်တောင်မုတ်သုံရာသီသို့ ကူးပြောင်းမည်ဖြစ်သဖြင့် မဲခေါင်ဒေသခွဲတစ်ဝန်း မိုးရွာသွန်းမှုများ ဆက်လက်ဖြစ်ပေါ်နိုင်ကြောင်း ခန့်မှန်းထားသည်။
မြန်မာ-ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီ၏ ဆန်းစစ်ချက်များအရ မြန်မာနိုင်ငံတွင် ၂၀၂၆ ခုနှစ် ဇန်နဝါရီလမှ မေ ၁၆ ရက်အထိ Fire Hotspot ဖြစ်ပေါ်မှုအရေအတွက်မှာ ၂၀၂၅ ခုနှစ် ကာလတူထက် ၁ ရာခိုင်နှုန်း မြင့်တက်ခဲ့သော်လည်း အဆိုးရွားဆုံးဖြစ်ခဲ့သည့် ၂၀၂၄ ခုနှစ် ကာလတူနှင့် နှိုင်းယှဉ်ပါက ၁၁ ရာခိုင်နှုန်း လျော့နည်းခဲ့ကြောင်း သိရသည်။

သုတေသနပညာရှင်များနှင့် MSME လုပ်ငန်းရှင်များ ချိတ်ဆက်ဆောင်ရွက်ရန် လိုအပ်ဟု ပြည်ထောင်စုဝန်ကြီး ပြောကြား

ကုန်ထုတ်လုပ်မှုလုပ်ငန်းများ ဖွံ့ဖြိုးတိုးတက်စေရန်အတွက် သုတေသနပြုလုပ်ငန်းများ ဆောင်ရွက်နေသည့် ပညာရှင်များနှင့် အသေးစား၊ အငယ်စားနှင့် အလတ်စား စီးပွားရေးလုပ်ငန်း (MSME) လုပ်ငန်းရှင်များအကြား ချိတ်ဆက်ဆောင်ရွက်မှုများ အားကောင်းစွာပြုလုပ်ရန် လိုအပ်ကြောင်း စက်မှုနှင့် MSME ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်း က ပြောကြားသည်။
ယမန်နေ့က ရွှေဦး ဝဥစားသောက်ကုန်လုပ်ငန်းနှင့် MSME လုပ်ငန်းများအတွက် အောင်မြင်ရေးအလေ့အကျင့်ကောင်းများကို လက်တွေ့အသုံးချနိုင်ရေး သင်တန်းတွင် ပြည်ထောင်စုဝန်ကြီးက အထက်ပါအတိုင်း ပြောကြားခဲ့ခြင်းဖြစ်သည်။
ပြည်ထောင်စုဝန်ကြီးက စားသောက်ကုန်ထုတ်လုပ်သည့် လုပ်ငန်းများအနေဖြင့် ကောင်းမွန်သော ထုတ်လုပ်မှုကျင့်စဉ် (GMP) လမ်းညွှန်ချက်များနှင့်အညီ တိကျစွာ လိုက်နာဆောင်ရွက်ရန် အရေးကြီးကြောင်းလည်း တိုက်တွန်းပြောကြားခဲ့သည်။
ထို့နောက် ဝန်ကြီးနှင့်အဖွဲ့သည် ဝဥမှ ထုတ်လုပ်သည့် အချိုရည်၊ ဝဥဂျယ်လီနှင့် ဝဥခေါက်ဆွဲခြောက်များ၏ ထုတ်လုပ်မှုလုပ်ငန်းစဉ်အဆင့်ဆင့်ကို ကြည့်ရှုစစ်ဆေးခဲ့သည်။
ထို့ပြင် MSME လုပ်ငန်းများအတွက် အောင်မြင်ရေးအလေ့အကျင့်ကောင်းများ လက်တွေ့အသုံးချနိုင်ရေး သင်တန်းဖွင့်လှစ်နေမှုအခြေအနေများနှင့် ဥတ္တရသီရိမြို့နယ်ရှိ Mr. Bamboo အဆင့်မြင့် တစ်ခါသုံး ဝါးတူစက်ရုံ၌ ဝါးတူများ ထုတ်လုပ်နေမှုကိုလည်း သွားရောက်ကြည့်ရှုခဲ့ကြောင်း သိရသည်။