ဂျာမနီတွင် ခရစ္စမတ်ဈေးတစ်ခုကို တိုက်ခိုက်ရန်ကြံစည်သူငါးဦးကို ဖမ်းဆီး

ဂျာမနီနိုင်ငံရှိ ခရစ္စမတ်ဈေးတစ်ခုတွင် လူအုပ်ထဲကားဖြင့် ဝင်တိုက်ရန် ကြံစည်ခဲ့ကြောင်း သံသယရှိ သူ ငါးဦးကို ဖမ်းဆီးထိန်းသိမ်းလိုက်ကြောင်း တာဝန်ရှိသူများက ဒီဇင်ဘာ၁၄ ရက်တွင်ပြောသည်။
နိုင်ငံတောင်ပိုင်း ဘာဗေးရီးယားပြည်နယ်ရှိ ဈေးတစ်ခုကို ပစ်မှတ်ထားတိုက်ခိုက်မည့် အကြံအစည် အတွက် မော်ရိုကိုနိုင်ငံသား သုံးဦး၊အီဂျစ်နိုင်ငံသား တစ်ဦးနှင့် ဆီးရီးယားနိုင်ငံသားတစ်ဦးတို့အား ဖမ်းဆီးခဲ့ပြီးဘာသာရေး အစွန်းရောက်ဝါဒကိုအရင်းခံသည့် အကြံအစည်ဖြစ်နိုင်ကြောင်း တာဝန်ရှိသူများက ပြောသည်။
အသက် (၅၆) နှစ် အရွယ်အီဂျစ်အမျိုးသားသည် လူများကိုတတ်နိုင်သမျှ သတ်ဖြတ်ရန်၊ သို့မဟုတ် ထိခိုက်စေရန် ရည်ရွယ်ချက်နှင့်အတူ ကားဖြင့် ဝင်တိုက်ဖို့ကြံစည်သည်ဟု စွပ်စွဲခံထားရပြီး မော်ရိုကို နိုင်ငံသားများကမူ တိုက်ခိုက်မှုကိုကူညီလုပ်ဆောင်ရန် သဘောတူခဲ့ကြကြောင်း အစိုးရရှေ့နေများက ပြောသည်။
ယမန်နှစ် ဒီဇင်ဘာလက မက်ဒီဘာ့ဂ်တွင် လူခြောက်ဦး သေဆုံးခဲ့သည့်ခရစ္စမတ်ဈေး တိုက်ခိုက်မှုအပါအဝင်ခရစ္စမတ်ဈေးများ တိုက်ခိုက်ခံရမှုများကြောင့် ဂျာမနီတာဝန်ရှိသူများက အထူးသတိထားနေကြချိန်တွင်မြူးနစ်မြို့ အရှေ့မြောက်ဘက်ရှိဒင်ဂိုဖင်း- လန်ဒေါ ဒေသရှိ ဈေးတစ်ခုကို ပစ်မှတ်ထားရန် ကြံစည်ခဲ့သည်ဟုယုံကြည်ရကြောင်း ပြောသည်။
ကြံစည်ခဲ့သည့် အီဂျစ်အမျိုးသားသည် အဆိုပါဒေသရှိ ဗလီတစ်ခုတွင် နေထိုင်သူဖြစ်သည်။အသက် (၃၀)၊ (၂၈) နှင့် (၂၂)နှစ် အရွယ် မော်ရိုကိုအမျိုးသားများကိုလူသတ်မှုကျူးလွန်ရာတွင် ကူညီရန် သဘောတူခဲ့သည်ဟု စွပ်စွဲကာဖမ်းဆီးခဲ့ပြီး အသက် (၃၇) နှစ်အရွယ်ဆီးရီးယားအမျိုးသားကိုမူ ရာဇဝတ်မှုကျူးလွန်ရန် ဆုံးဖြတ်ချက်ချရာတွင်အားပေးအားမြှောက်ပြုသည်ဟု စွပ်စွဲထားသည်။
ခရစ္စမတ်ဈေးများသည်ဂျာမနီတစ်ဝန်းရှိ လူကြိုက်များသည့်ဆွဲဆောင်မှုနေရာများ ဖြစ်သည်။၂၀၁၆ ခုနှစ်က ဘာလင်တွင်အမျိုးသားတစ်ဦးက ဈေးရှိ လူအုပ်ထဲသို့ ထရပ်ကားတစ်စီး မောင်းနှင်ဝင် ရောက်ခဲ့မှုကြောင့် လူ ၁၂ ဦး သေဆုံးခဲ့ပြီးနောက်ပိုင်း မကြာသေးမီနှစ်များအတွင်း ပွဲလမ်းသဘင်များတွင်အာဏာပိုင်များက လုံခြုံရေးတိုးမြှင့်ခဲ့သည်။

ထိုင်းရွေးကောက်ပွဲ ဖေဖော်ဝါရီ ၈ ရက်မှာ ကျင်းပမယ်လို့ ရွေးကောက်ပွဲ ကော်မရှင်ထုတ်ပြန်

ထိုင်းနိုင်ငံ လွှတ်တော်ရွေးကောက်ပွဲတွေကို ဖေဖော်ဝါရီ ၈ ရက်မှာ ကျင်းပဖို့ စီစဉ်ထားကြောင်း ရွေးကောက်ပွဲကော်မရှင်က ဒီကနေ့ ဒီဇင်ဘာ ၁၅ ရက်မှာ ကြေညာချက်တစောင်ထုတ်ပြန်လိုက်ပါတယ်။
ဝန်ကြီးချုပ် အနုတင် ချန်ဗီရာကူးလ်က ပြီးခဲ့အပတ်က လွှတ်တော်ကို ဖျက်သိမ်းပြီးနောက် ရွေးကောက်ပွဲတွေကို မူလမျှော်မှန်းထားတာထက်စောပြီး ကျင်းပဖို့ စီစဉ်လာတာဖြစ်ပါတယ်။
ဝန်ကြီးချုပ်ဟာ လွှတ်တော်မှာ အများစုနေရာရယူထားတဲ့ အတိုက်အခံ ပြည်သူ့ပါတီနဲ့ သဘောထားကွဲလွဲမှု၊ အိမ်နီးချင်း ကမ္ဘောဒီးယားနဲ့ ပြင်းထန်တဲ့ နယ်စပ်ပဋိပက္ခကြောင့် နိုင်ငံရေးမငြိမ်မသက်မှု အခြေအနေတွေဖြစ်ပွားပြီးနောက် လွှတ်တော်ဖျက်သိမ်းပြီး ရွေးကောက်ပွဲလုပ်ဖို့ ဖြစ်ပေါ်လာတာပါ။
ထိုင်းနိုင်ငံသားတွေဟာ လွှတ်တော်အမတ် ၅၀၀ ကို ရွေးကောက်တင်မြှောက်ဖို့ မဲပေးရမှာဖြစ်ပြီး ပါတီတခုစီဟာ ဝန်ကြီးချုပ်လောင်း သုံးဦးအထိ တင်သွင်းနိုင်ပါတယ်။ ကြိုတင်မဲပေးမှုတွေကိုတော့ ဖေဖော်ဝါရီ ၁ ရက်မှာ ထည့်ရမှာဖြစ်ပါတယ်။
တရားဝင်ရွေးကောက်ပွဲရလဒ်တွေကို ဧပြီ ၉ ရက်မှာ ကြေညာမယ်လို့ ရွေးကောက်ပွဲကော်မရှင်က ထုတ်ပြန်ထားပြီး လွှတ်တော်အသစ်အတွက် ၁၅ ရက်အတွင်း လွှတ်တော်ဥက္ကဋ္ဌတွေကို ရွေးကောက်တင်မြှောက်ပြီး ဝန်ကြီးချုပ်တယောက်ကို မဲပေးခန့်အပ်ရမှာဖြစ်ပါတယ်။
၂၀၂၃ ခုနှစ် ဩဂုတ်လနောက်ပိုင်း ထိုင်းနိုင်ငံရဲ့ တတိယမြောက် ဝန်ကြီးချုပ်ဖြစ်လာတဲ့ အနုတင်ဟာ စက်တင်ဘာလမှာ ဝန်ကြီးချုပ်ရာထူးအတွက် ပြည်သူ့ပါတီရဲ့ ထောက်ခံမှုကို ရရှိခဲ့ပြီး ဖွဲ့စည်းပုံအခြေခံဥပဒေကို ပြင်ဆင်ဖို့ လုပ်ငန်းစဉ်ကို စတင်ဖို့နဲ့ ဇန်နဝါရီလကုန်မှာ လွှတ်တော်ကို ဖျက်သိမ်းရမယ်ဆိုတဲ့ သဘောတူညီချက်တွေနဲ့ ဖြစ်ပါတယ်။
လူထုစစ်တမ်းတွေအရ ပြည်သူ့ပါတီဟာ ထိုင်းနိုင်ငံရဲ့ အထင်ရှားဆုံးပါတီဖြစ်ပြီး လူထုထောက်ခံမှုလည်း ရရှိထားပါတယ်။

အာဆီယံမိသားစုနေ့ပွဲတော်ကို မြန်မာပါဝင်တက်ရောက်

ရီရတ်ဒ်မြို့ အခြေစိုက်အာဆီယံသံရုံးများဖြင့် ဖွဲ့စည်းထားသည့် အာဆီယံ-ရီရတ်ဒ် ကော်မတီ (ARC) ၏ အာဆီယံမိသားစုနေ့ပွဲတော် (ASEAN Family Day 2025) ကို မြန်မာသံရုံး (ရီရတ်ဒ်မြို့) ကလည်း ပါဝင်ဆင်နွှဲခဲ့ကြောင်း သိရသည်။
ပြီးခဲ့သည့် ဒီဇင်ဘာ ၁၃ ရက်နေ့၌ ကျင်းပခဲ့ခြင်းဖြစ်ပြီး ရီရတ်ဒ်မြို့ သံတမန်ရပ်ကွက်ရှိ ဖိလစ်ပိုင်နိုင်ငံသံရုံး၌ ကျင်းပခဲ့ခြင်းလည်းဖြစ်သည်။
အာဆီယံသံရုံးများမှ သံအမတ်ကြီးများ၊ သံရုံးအကြီးအကဲများနှင့် သံတမန်မိသားစုများ ပါဝင်ဆင်နွှဲခဲ့ပြီး ယခုနှစ်အတွက် အာဆီယံမိသားစုပွဲတော်ကို ဘရူနိုင်းနိုင်ငံသံရုံးက ကြီးမှုကျင်းပခြင်းဖြစ်ကြောင်း သိရသည်။
မြန်မာသံရုံးအနေဖြင့် အာဆီယံမိသားစုနေ့တွင်ကျင်းပသည့် ပြိုင်ပွဲများ၊ လှုပ်ရှားမှုများတွင် တက်ကြွစွာပါဝင်ခဲ့ကြပြီး ကြက်ဆီထမင်း၊ သာကူကျိုတို့ဖြင့် တည်ခင်းဧည့်ခံခဲ့ပြီး မြန်မာသံရုံးမိသားစုမှ ရိုးရာယဉ်ကျေးမှု အဆို၊ အကများဖြင့် ပါဝင်ဖျော်ဖြေခဲ့ကြောင်းလည်း သိရသည်။

အမျိုးသား ဖူဆယ်အသင်းအနေဖြင့် တစ်ပွဲချင်းစီကို အကောင်းဆုံးကြိုးစား ယှဉ်ပြိုင်သွားမည်ဟု အသင်းနည်းပြ ပြော

ဆီးဂိမ်းပြိုင်ပွဲဝင်ရောက်ယှဉ်ပြိုင်မည့် မြန်မာ့လက်ရွေးစင် အမျိုးသားဖူဆယ်အသင်းအနေဖြင့် တစ်ပွဲချင်းစီကိုအ ကောင်းဆုံးကြိုးစား ယှဉ်ပြိုင်သွားမည်ဟု အသင်းနည်းပြဖြစ်သူ Mr. Pattaya Piamkum က ပြောသည်။
(၃၃) ကြိမ်မြောက် အရှေ့တောင်အာရှ အားကစားပြိုင်ပွဲ ဖူဆယ်အမျိုးသား ပွဲစဉ်များအတွက် ပွဲကြိုညှိနှိုင်းအစည်း အဝေးနှင့် သတင်းစာရှင်းလင်းပွဲကို ဒီဇင်ဘာ (၁၄) ရက်က ကျင်းပစဉ် ထိုသို့ထည့်သွင်းပြောကြားခဲ့ခြင်းဖြစ်သည်။
"ကျွန်တော်တို့လည်း အခြားအသင်းတွေလိုပဲ ပြင်ဆင်ချိန်အများကြီး မရခဲ့ပါဘူး။ ကျွန်တော်တို့အနေနဲ့ ကိုယ့်မှာရှိတဲ့ အင်အားနဲ့ အကောင်းဆုံးကြိုးစား ယှဉ်ပြိုင်သွားမှာပါ။ ပြိုင်ပွဲဝင်အသင်းတွေမှာ နည်းပြကောင်းတွေရှိနေကြလို့ ပြိုင်ဆိုင်မှုပြင်းထန်တဲ့ ဆီးဂိမ်းစ်ပြိုင်ပွဲ ဖြစ်လာမှာပါ။ ကျွန်တော်တို့ အသင်းအနေနဲ့ တစ်ပွဲချင်းစီကို အကောင်းဆုံးကြိုးစား ယှဉ်ပြိုင်သွားမှာပါ။ ပြီးတော့ ကျွန်တော်တို့ အသင်းအတွက်လည်း သိပ်ကိုအကျိုးရှိတဲ့ ပြိုင်ပွဲဖြစ်ပါတယ်။ ဘာကြောင့်လဲဆိုတော့ အသင်းကောင်းတွေနဲ့ ရင်ဆိုင်ရမှာဖြစ်လို့ တန်ဖိုးရှိတဲ့ အတွေ့အကြုံတွေရရှိမှာကြောင့် ဖြစ်ပါတယ်" ဟု ပြောကြားခဲ့သည်။
မြန်မာအသင်းအနေဖြင့် ဆီးဂိမ်းစ်ပြိုင်ပွဲ အုပ်စုပွဲစဉ်များကို ဒီဇင်ဘာ (၁၅) ရက် မွန်းလွဲ (၃) နာရီခွဲအချိန်တွင် အင်ဒိုနီးရှား၊ ဒီဇင်ဘာ (၁၆) ရက် ည‌ (၆) နာရီခွဲတွင် ထိုင်းအသင်း၊ ဒီဇင်ဘာ (၁၇) ရက် ည (၆) နာရီခွဲတွင် မလေးရှားအသင်း၊ ဒီဇင်ဘာ (၁၉) ရက် မွန်းလွဲ (၃) နာရီခွဲတွင် ဗီယက်နမ်အသင်းတို့နှင့် ယှဉ်ပြိုင်ကစားသွားရမည်ဖြစ်သည်။
ပွဲစဉ်များကို ထိုင်းနိုင်ငံ Nonthaburi ရှိ Nonthaburi Stadium တွင် ကစားရမည်ဖြစ်ပြီး Channel 7, Reader Channel နှင့် HTV Sport Channel တို့မှ တိုက်ရိုက်ထုတ်လွှင့်ပြသမည်ဖြစ်ကြောင်း အသိပေးထားသည်။
လက်ရှိဆီးဂိမ်းပြိုင်ပွဲ၌ မြန်မာလက်ရွေးစင် အမျိုးသမီးအသင်း၊ မြန်မာ့လက်ရွေးစင် ဖူဆယ်အမျိုးသမီးအသင်းတို့မှာ အုပ်စုအဆင့်နှင့်ပင် ကျေနပ်ခဲ့ရသည်။

အိမ်အရောက်ပို့ (Door to Door) စနစ်ဖြင့် ဆန်အိတ်ရေ ၃၀၀ ကျော် ရောင်းချပေးခဲ့

(၂၄) ပြည်ဆန်အိတ်များကို အိမ်အရောက်ပို့ (Door to Door) စနစ်ဖြင့် အိမ်ထောင်စု အရေအတွက်၂၆၇ ခုကို ဆန်အိတ်ရေ ၃၀၀ ကျော်ကို နှစ်ပတ်အတွင်း ရောင်းချပေးခဲ့ကြောင်း မြန်မာနိုင်ငံဆန်စပါးအသင်းချုပ်က ထုတ်ပြန်ထားသည်။
ရန်ကုန်မြို့တော် စည်ပင်သာယာ နယ်နိမိတ်အတွင်းရှိ အိမ်ထောင်စု အရေအတွက် စုစုပေါင်း (၂၆၇) ခုကို ရက် (၉၀) ဆန် ၅၉ အိတ်၊ ရွှေဘိုပေါ်ဆန်း ၁၉၀ အိတ်၊ ဧည့်မထဆန်၂၄ အိတ်၊ ဧရာဝတီပေါ်ဆန်း ကြားပျံ (ဆန်သစ်) ၂၉ အိတ်၊ (ဆန်အဟောင်း) ၂၃ အိတ်၊ ဧရာဝတီပေါ်ဆန်းနယ်စုံ (ဆန်သစ်) ၆ အိတ်၊ ဧရာဝတီပေါ်ဆန်းနယ်စုံ (ဆန်ဟောင်း) ၉ အိတ်၊ စုစုပေါင်း ၃၄၀ ကိုရောင်းချပေးခဲ့ကြောင်း သိရသည်။
ယင်းသည် သင့်တင့်မျှတသော ဈေးနှုန်းများဖြင့် စားသုံးသူများထံ အရောက်ပို့စနစ်ဖြင့် ဖြန့်ဖြူးရောင်းချမှုအခြေအနေဖြစ်ကြောင်း သိရသည်။
ထို့ပြင် ဌာနဆိုင်ရာအဖွဲ့အစည်းများ၊ စက်မှုဇုံများနှင့် လူမှုရေးအသင်းအဖွဲ့များထံသို့ ၂၀၂၅ ခုနှစ်၊ နိုဝင်ဘာလတွင် ပေါ်ဆန်း (1 Kg အိတ်ရေ (၅၂၀၄) အိတ်၊ ဧည့်မထ (1 Kg အိတ်ရေ (၅၁၅၀) အိတ်ကိုပေးပို့ ရောင်းချပေးခဲ့ကြောင်း သိရသည်။

ဆီးဂိမ်းပြိုင်ပွဲဝင် ရိုးရာဖိုက်တာ နော်ဥမ္မာစိုးနှင့် စူပါရေချမ်း ဆီမီးဖိုင်နယ်သို့ တက်ရောက်

ဆီးဂိမ်းပြိုင်ပွဲဝင်တွင် ရောက်ယှဉ်ပြိုင်နေသည့် ရိုးရာဖိုက်တာ နော်ဥမ္မာစိုးနှင့် စူပါရေချမ်းတို့ ပြိုင်ဘက်ဖိုက်တာများကို အနိုင်ယူကာ ဆီမီးဖိုင်နယ်သို့ တက်ရောက်သွားပြီဖြစ်သည်။
ရိုးရာဖိုက်တာ နော်ဥမ္မာစိုးက ဖိလစ်ပိုင် ဖိုက်တာကို အနိုင်ယူခဲ့သလို ရိုးရာဖိုက်တာ စူပါရေချမ်းကလည်း ပြိုင်ဘက် လာအိုဖိုက်တာကို အနိုင်ရယူခဲ့ခြင်းဖြစ်သည်။
ဆီးဂိမ်းဝင်ရောက်ယှဉ်ပြိုင်မည့် အမျိုးသားလက်ဝှေ့အား ကစားသမားများတွင် ရိုးရာလက်ဝှေ့ကျော် ရာမာန်၊ သွေးလင်းထက်၊ ထွန်းမင်းအောင်၊ ထွန်းမင်းနိုင်၊ ဆလိုင်းထန်ခွီးရှိန်တို့ပါဝင်ကြသလို အမျိုးသမီးများအနေဖြင့် နော်ဥမ္မာစိုးနှင့် မေသဇင်ထူးတို့ ပါဝင်ယှဉ်ပြိုင်ကြမည်ဖြစ်သည်။
ဆီးဂိမ်းလက်ဝှေ့ပွဲစဉ်များကို ယခု ဒီဇင်ဘာ (၁၃) ရက်၌ စတင်ကျင်းပခဲ့ခြင်းဖြစ်ပြီး ONE ပွဲစဉ်များ ပုံမှန်ကျင်းပသည့် Lumpinee Boxing Stadium ကွင်းတွင် ကျင်းပပြုလုပ်‌နေခြင်းဖြစ်ကြောင်း သိရသည်။

အပ-စ်မရပ်လျှင်ထိုင်းနှင့်ကမ္ဘောဒီးယားကို အခွန်တိုးကောက်မည်--ထရမ့်ပ်

ထိုင်းနှင့် ကမ္ဘောဒီးယားနိုင်ငံတို့အနေဖြင့် စစ်ပွဲကိုမရပ်ပါက ၎င်းတို့နှစ်နိုင်ငံကို အခွန်အသစ်များ ချမှတ်သွားမည်ဟု အမေရိကန်သမ္မတ ဒေါ်နယ်ထရမ့်ပ်က ခြိမ်းခြောက်ခဲ့သည်။
သောကြာနေ့က ဝေါစထရိဂျာနယ်နှင့် ထရမ့်ပ်၏ အင်တာဗျူးကို အခြေခံ၍ ယခုသတင်းကို ဖော်ပြခဲ့ခြင်းဖြစ်သည်။
“ကမ္ဘောဒီးယားနဲ့ ထိုင်းအကြား တကျော့ပြန်ဖြစ်လာတဲ့ ပဋိပက္ခကိုဖြေရှင်းဖို့အတွက် အခွန်တိုးကောက်သွားမယ်လို့ ပြီးခဲ့တဲ့ ၁၀ မိနစ်လောက်ကပဲ ငါခြိမ်းခြောက်ခဲ့တယ်” ဟု ထရမ့်ပ်က ပြောကြားခဲ့သည်။
“မင်းတို့ စစ်ပွဲကို မရပ်ဘူးဆိုရင် ရထားတဲ့ကုန်သွယ်ရေးသဘောတူညီချက်ကို ရပ်ပစ်ရုံမကဘဲ မင်းတို့နိုင်ငံကို ငါက အခွန်လည်းတိုးကောက်မယ်။ ငါလုပ်သလို ဘယ်သူမှ ဒါမျိုးမလုပ်နိုင်ဘူး” ဟု နှစ်နိုင်ငံခေါင်းဆောင်များကို သူ ကပြောခဲ့ကြောင်း ထရမ့်ပ်က ဆက်လက်ပြောကြားခဲ့သည်။
အပ-စ်အခတ်ရပ်စဲရေး ကတိကဝတ်များအပေါ် နှစ်ဖက်စလုံးကလိုက်နာမည်ဟု သမ္မတ ဒေါ်နယ်ထရမ့်ပ်က မျှော်လင့်ထားကြောင်းနှင့် သ-တ်ဖြ-တ်မှုများရပ်တန့်ရန်နှင့် ရေရှည်တည်တံ့သော ငြိမ်းချမ်းရေးကို သေချာစေရန် လိုအပ်ပါက တာဝန်ရှိသူများကို တာဝန်ခံစေမည်ဟု သတိပေးခဲ့ကြောင်း အိမ်ဖြူတော်ပြောရေးဆိုခွင့်ရှိသူက စနေနေ့တွင် ပြောကြားခဲ့သည်။
ကမ္ဘောဒီးယားဝန်ကြီးချုပ် ဟွန်မာနက်၊ ထိုင်းဝန်ကြီးချုပ် အနူတင်တို့နှင့် သူဖုန်းပြောခဲ့ကြောင်းနှင့် တို-က်ခိုက်မှုများကိုရပ်တန့်ရန် ခေါင်းဆောင်နှစ်ဦးစလုံးက သဘောတူခဲ့ကြောင်း သောကြာနေ့တွင် ထရမ့်ပ်က ကြေညာခဲ့သည်။
မလေးရှားဝန်ကြီးချုပ် အန်ဝါ အီဘရာဟင်မ်ကလည်း ကမ္ဘောဒီးယားနှင့် ထိုင်းနိုင်ငံတို့အနေဖြင့် စနေနေ့ည ၁၀ နာရီမှစ၍ အပ-စ်အခတ်ရပ်စဲရေးကို လက်ခံရန် တိုက်တွန်းခဲ့သည်။
အန်ဝါ၏ ပန်ကြားချက်ကို ဝန်ကြီးချုပ် ဟွန်မာနက်က ကြိုဆိုခဲ့သော်လည်း ဝန်ကြီးချုပ် အနူတင်သည် အပ-စ်အခတ်ရပ်စဲရေးကို ပြန်သွားရန်နှင့် ကမ္ဘောဒီးယားနှင့် ပဋိပက္ခကိုအဆုံးသတ်ရန် တောင်းဆိုမှုများကို လျစ်လျူရှုကာ ကမ္ဘောဒီးယားကို ဆက်လက်ကျူးကျော်တို-က်ခိုက်နေခဲ့သည်။

ကမ္ဘောဒီးယားသို့‌ရေနံနှင့် စစ်လက်နက်မပို့နိုင်ရန် ထိုင်းပင်လယ်ကွေ့ကို ပိတ်ဆို့မည်ဟုဆို

လက်ရှိဖြစ်ပွားနေသော ရန်လိုတို-က်ခိုက်မှုများအတွင်း ထိုင်းပင်လယ်ကွေ့မှတဆင့် ကမ္ဘောဒီးယားသို့ ရေနံနှင့် စစ်ဘက်ဆိုင်ရာပစ္စည်းများ ထောက်ပံ့ဖြည့်တင်းမှုကို ပိတ်ဆို့ရန် ထိုင်းဘုရင့်တပ်မတော်က နိုင်ငံတော်လုံခြုံရေးကောင်စီ (အင်န်အက်စ်စီ) သို့ အဆိုပြုခဲ့သည်။
တနင်္ဂနွေနေ့က အွန်လိုင်းတွင် ပျံ့နှံ့လာခဲ့သော လက်နက်ကိုင်တပ်ဖွဲ့အကြီးအကဲများထံမှ အရေးပေါ်တင်ပြစာတွင် ကမ္ဘောဒီးယားသို့ ပို့မည့်ရေနံနှင့် စစ်ပွဲဆိုင်ရာထောက်ပံ့ရေးပစ္စည်းများကို ပင်လယ်ကွေ့တွင် ပိတ်ဆို့ဟန့်တားရန်အတွက် ကာကွယ်ရေးဝန်ကြီးဌာနက အင်န်အက်စ်စီသို့ ချက်ချင်းအဆိုပြုချက်တင်ရန် တောင်းဆိုထားခဲ့သည်။
အဆိုပြုချက်အရ ထိုင်းရေပိုင်နက်မှ ကမ္ဘောဒီးယားသို့ ထွက်ခွာလာသော ကူးသန်းရောင်းဝယ်ရေးသင်္ဘောများနှင့် ငါးဖမ်းသင်္ဘောများအပါအဝင် သင်္ဘောအမျိုးမျိုးဖြင့် သယ်ဆောင်လာသော ရေနံနှင့် စစ်ပွဲဆိုင်ရာထောက်ပံ့ရေးပစ္စည်းများကို ကြားဖြတ်ပိတ်ဆို့ရန် အင်န်အက်စ်စီက ထိုင်းရေကြောင်း ဥပဒေစိုးမိုးရေးဌာန (Thai-MECC) ကို အမိန့်ပေးမည်ဖြစ်သည်။
ထောက်ပံ့ရေးကိုပိတ်ဆို့မှုကို ပြဌာန်းရန် အမိန့်တစ်ရပ်ကို ဌာနက မူကြမ်းရေးဆွဲပြီးဖြစ်ကြောင်း Thai-MECC ညှိနှိုင်းရေးမှူး ဗိုလ်မှူးကြီး ပန်နူပန် ရက်ကောက ပြောကြားခဲ့သည်။ ရေကြောင်းဆိုင်ရာ နိုင်ငံတော်အကျိုးစီးပွားကာကွယ်ရေးဥပဒေအရ အင်န်အက်စ်စီသည် ထိုကဲ့သို့သော အမိန့်ကိုထုတ်ပြန်နိုင်ကြောင်း ၎င်းက ဆက်လက်ပြောကြားခဲ့သည်။
အင်န်အက်စ်စီသည် တနင်္လာနေ့တွင် အစည်းအဝေးတစ်ခုခေါ်ယူပြီး ယင်းကိစ္စကိုဆွေးနွေးလိမ့်မည်ဟု ထိုင်းဘုရင့် ရေတပ်မတော် လက်ထောက်ပြောရေးဆိုခွင့်ရှိသူ ဗိုလ်မှူးကြီး နာရာ ခွန်ထွမ်က ပြောကြားခဲ့သည်။

တတိယအကြိမ်မြောက် တက္ကသိုလ်များအဆင့် မြန်မာဘာသာစကား ဗီဒီယိုတိုပြိုင်ပွဲ ဆုချီးမြှင့်ပွဲကျင်းပ

တရုတ်အမျိုးသားရေနံကော်ပိုရေးရှင်း (CNPC) ၏ နိုင်ငံတကာပိုက်လိုင်းကုမ္ပဏီနှင့် ယူနန်တက္ကသိုလ်၊ မြန်မာနိုင်ငံဆိုင်ရာ သုတေသနဌာန (Institute of Myanmar Studies) တို့ ပူးပေါင်းစီစဉ်ကျင်းပသည့် “တတိယအကြိမ်မြောက် တက္ကသိုလ်များအဆင့် မြန်မာဘာသာစကား ဗီဒီယိုတိုပြိုင်ပွဲ” ဆုချီးမြှင့်ပွဲ အခမ်းအနားကို ဒီဇင်ဘာလ ၁၄ ရက်နေ့က ကူမင်းမြို့၌ ကျင်းပခဲ့သည်။ ယင်းအခမ်းအနားသို့ ကူမင်းမြို့ဆိုင်ရာ မြန်မာကောင်စစ်ဝန်ချုပ် ဦးသွင်ထက်လင်းနှင့် CNPC နိုင်ငံတကာပိုက်လိုင်းကုမ္ပဏီမှ ကိုယ်စားလှယ်တို့တက်ရောက်၍ မိန့်ခွန်းများပြောကြားခဲ့ကြသည်။
"ပြိုင်ပွဲကိုစီစဉ်ကျင်းပသူများအပြင် ပါဝင်ယှဉ်ပြိုင်ကြသည့် ကျောင်းသား၊ ကျောင်းသူများကိုလည်း ကျေးဇူးတင်ရှိကြောင်း၊ မြန်မာ့ယဉ်ကျေးမှုသည် ထူးခြားသောအနှစ်သာရနှင့် အမျိုးသားရေးလက္ခဏာများ ပေါင်းစပ်ပါဝင်နေကြောင်း၊ ဤပြိုင်ပွဲသည် မြန်မာစာပေကို လေ့လာနေကြသည့် ကျောင်းသား၊ ကျောင်းသူများကို မြန်မာ့ယဉ်ကျေးမှုကို ပိုမိုနက်ရှိုင်းစွာနားလည်နိုင်ရန် အထောက်အကူပြုလိမ့်မည်ဟု ယုံကြည်ကြောင်း၊ ၎င်းပြင် ယဉ်ကျေးမှုချင်း အပြန်အလှန် လေ့လာဖလှယ်ခြင်းသည် ပြည်သူလူထုချင်းဆက်သွယ်မှုကို တိုးမြှင့်ရာတွင် အရေးပါကြောင်းနှင့် ဤပြိုင်ပွဲသည် ကျောင်းသား၊ ကျောင်းသူများအတွက် မြန်မာ့ယဉ်ကျေးမှု၊ အနုပညာနှင့် စာပေတို့ကို ထိတွေ့ခွင့်ရရှိစေမည့် ရောင်စုံပလက်ဖောင်းတစ်ခုကို ဖန်တီးပေးလိမ့်မည်ဟု ခိုင်မာစွာယုံကြည်ကြောင်း" ဦးသွင်ထက်လင်းကပြောကြားခဲ့သည်။
CNPC နိုင်ငံတကာပိုက်လိုင်းကုမ္ပဏီမှ ကိုယ်စားလှယ်က "ဤပြိုင်ပွဲသည် မြန်မာနိုင်ငံနှင့်ပတ်သက်သည့် အထင်အမြင်လွဲမှားမှုများကို ဖယ်ရှားကာ ရိုးသားပြီး ဘက်လိုက်မှုကင်းသောအမြင်များကို ရှုမြင်နိုင်ရန် အရေးပါသည့် တန်ဖိုးကို ပေးစွမ်းကြောင်း၊ ဆုရရှိသူ ကျောင်းသား၊ ကျောင်းသူများ၏ လက်ရာများသည် ကုမ္ပဏီ၏ ပိုက်လိုင်းစီမံကိန်းကဲ့သို့ပင် တရုတ် - မြန်မာ ဆက်သွယ်မှု၏ အရေးပါသော အစိတ်အပိုင်းဖြစ်ကြောင်း၊ ဘာသာစကား နှစ်မျိုးစလုံးကို ကျွမ်းကျင်ပိုင်နိုင်သည့် လူငယ်များသည် နှစ်နိုင်ငံအပြန်အလှန်နားလည်မှုအတွက် မျှော်လင့်ချက်ဖြစ်သည်ဟု မှတ်ယူကြောင်း၊ ဤပြိုင်ပွဲကို ဆက်လက်ကျင်းပသွားမည်ဖြစ်ကြောင်းနှင့် လူငယ်များအနေဖြင့် ရိုးသားမှန်ကန်သော ဖော်ပြချက်များဖြင့် တရုတ်နှင့် မြန်မာလူငယ်များအား တစ်ဦးနှင့်တစ်ဦးစစ်မှန်ပြီး စိတ်ဝင်စားစရာကောင်းသည့် ပုံရိပ်များမြင်တွေ့ရန် မျှော်လင့်ပါကြောင်း" ပြောကြားခဲ့သည်။
တတိယအကြိမ်မြောက် တက္ကသိုလ်များအဆင့် မြန်မာဘာသာစကား ဗီဒီယိုတိုပြိုင်ပွဲကို "၇၅ နှစ်မြောက် မေတ္တာ၊ မဟာမိတ်နှင့် ဆွေမျိုးပေါက်ဖော်ဆက်ဆံရေး၊ လူငယ်ချင်းပေါင်းစပ်ကာ ခေတ်သစ်ကိုဖန်တီးကြ" ဟူသော ခေါင်းစဉ်ဖြင့် ၂၀၂၅ ခုနှစ်၊ အောက်တိုဘာလလယ်တွင် စတင်ခဲ့ခြင်းဖြစ်သည်။ ယူနန်တိုင်းရင်းသားတက္ကသိုလ် (Yunnan Minzu University)၊ ယူနန်တက္ကသိုလ်၊ ကွမ်တုန်းနိုင်ငံခြားရေးနှင့် ကုန်သွယ်ရေးတက္ကသိုလ် (Guangdong University of Foreign Studies)၊ အမျိုးသားကာကွယ်ရေး နည်းပညာတက္ကသိုလ် (National University of Defense Technology)၊ ကွမ်ရှီတိုင်းရင်းသားတက္ကသိုလ် (Guangxi Minzu University) အပါအဝင် တက္ကသိုလ် ၂၃ ခုမှ ကျောင်းသား၊ ကျောင်းသူများသည် စိတ်အားထက်သန်စွာ ပါဝင်ယှဉ်ပြိုင်ခဲ့ကြသည်။
နောက်ဆုံးတွင် စုစုပေါင်း လက်ရာ ၁၂၅ ခုသည် ကျွမ်းကျင်သူ အကဲဖြတ်အဆင့်သို့ ရောက်ရှိခဲ့ပြီး၊ ယင်းတို့၏ အကြောင်းအရာများတွင် ပြည်ပပညာသင်ဘဝ Vlogs များ၊ သီချင်းနှင့် အကများ၊ ရိုးရာယဉ်ကျေးမှု မိတ်ဆက်ပေးမှုများ အစရှိသည့် နယ်ပယ်များစွာပါဝင်ခဲ့သည်။ ပြည်တွင်းရှိ ကွဲပြားသော တက္ကသိုလ် ၁၉ ခုမှ မြန်မာဘာသာစကား ကျွမ်းကျင်ဆရာ၊ ဆရာမများနှင့် စီစဉ်သူဘက်မှ ကျွမ်းကျင်သူ ၇ ဦး၊ မြန်မာဘက်မှ ကျွမ်းကျင်သူ ၇ ဦးတို့ ပါဝင်သော စုစုပေါင်း ၂၆ ဦးဖြင့် ဖွဲ့စည်းထားသည့် ပညာရှင်အကဲဖြတ်အဖွဲ့က လက်ရာအားလုံးကို အမှတ်ပေးခဲ့ကာ ပြိုင်ပွဲစည်းကမ်းများအတိုင်း ပထမဆု (၄) ဆု၊ ဒုတိယဆု (၁၀) ဆု၊ တတိယဆု (၁၅) ဆုနှင့် ထူးချွန်ဆု (၃၀) ဆုတို့ကို ရွေးချယ်ချီးမြှင့်ခဲ့သည်။

ဆီးဂိမ်းဖိတ်ကြားခံ ပြည်ထောင်စုဝန်ကြီး Jeng Phang နော်တောင်နှင့် အဖွဲ့ဝင်များ ပြန်လည်ရောက်ရှိ

(၃၃) ကြိမ်မြောက် အရှေ့တောင်အာရှအားကစားပြိုင်ပွဲတွင် ဖိတ်ကြားခံပုဂ္ဂိုလ်အဖြစ်တက်ရောက်ခဲ့သည့် မြန်မာနိုင်ငံအိုလံပစ်ကော်မတီဥက္ကဋ္ဌ အားကစားနှင့် လူငယ်ရေးရာဝန်ကြီးဌာန၊ ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်နှင့် အဖွဲ့ဝင်များ ယမန်နေ့ ဒီဇင်ဘာ (၁၄) ရက် ညပိုင်းက မြန်မာနိုင်ငံသို့ပြန်လည်ရောက်ရှိခဲ့ကြောင်း သိရသည်။
မြန်မာနိုင်ငံအိုလံပစ်ကော်မတီဥက္ကဋ္ဌ အားကစားနှင့် လူငယ်ရေးရာဝန်ကြီးဌာနနှင့် ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်သည် ပြန်ကြားရေးဝန်ကြီးဌာန ဒုတိယဝန်ကြီး ဦးရဲတင့်၊ ရန်ကုန်တိုင်းဒေသကြီး အစိုးရအဖွဲ့ လူမှုရေးရာဝန်ကြီး ဦးဌေးအောင်နှင့်အတူ ထိုင်းနိုင်ငံ၊ ဘန်ကောက်မြို့မှ လေကြောင်းခရီးဖြင့် ရန်ကုန်အပြည်ပြည်ဆိုင်ရာ လေဆိပ်သို့ပြန်လည်ရောက်ရှိလာခဲ့ခြင်းလည်းဖြစ်သည်။
ပြည်ထောင်စုဝန်ကြီးနှင့် အဖွဲ့အား အားကစားနှင့် လူငယ်ရေးရာဝန်ကြီးဌာန ဒုတိယဝန်ကြီး ဦးထိန်လင်း၊ ရန်ကုန် တိုင်းဒေသကြီးအစိုးရအဖွဲ့ဝင် ဝန်ကြီးများနှင့် အားကစားနှင့်ကာယပညာဦးစီးဌာနမှ တာဝန်ရှိပုဂ္ဂိုလ်များ လာရောက်ကြိုဆိုကြကြောင်း သိရသည်။