မော်လမြိုင်က ကိုကိုညီညီဆိုင် ဓားပြတိုက်မှုနဲ့ပတ်သက်လို့ ကျူးလွန်သူအားလုံးဖမ်းမိ

မော်လမြိုင်မြို့ ၊ မရမ်းကုန်းရပ်ကွက် ၊ ကမ်းနားလမ်းက ကိုကို နှင့် ညီညီလျှပ်စစ်ပစ္စည်းဆိုင် ဓားပြတိုက်မှုနဲ့ပတ်သက်ပြီး ကျူးလွန်သူ ခြောက်ယောက်ကို ရွှေထည်ပစ္စည်းတွေ နဲ့အတူ ဖမ်းဆီးရမိထားတယ်ရဲတပ်ဖွဲ့နဲ့ နီးစပ်သူဆီက သိရပါတယ်။
ကျူးလွန်သူခြောက်ယောက်မှာ ဒေါ်စန်းစန်းအေး နဲ့ အထွန်းချေ၊ စောတင်ရဲအောင်၊ စောဖိုးကျော်၊
မင်းထက်သာ နဲ့ မင်းကို တို့ဖြစ်ပြီး အဲဒီထဲက ဒေါ်စန်းစန်းအေးဟာ ဓားပြတိုက်ဖို့အတွက် ခိုင်းစေညွှန်ကြားခဲ့သူ ဖြစ်တယ်လို့ သိရပါတယ်။
ဒေါ်စန်းစန်းအေးဟာ ကိုကို နှင့် ညီညီလျှပ်စစ်ပစ္စည်းဆိုင်ပိုင်ရှင် ဇနီးရဲ့ မိတ်ဆွေရင်းတယောက်ဖြစ်ပြီး ငွေလိုအပ်တဲ့အတွက် ပိုင်ရှင်လင်မယား ခရီးသွားချိန်မှာ လူငှားရမ်းပြီး ဓားပြတိုက်ခိုင်းခဲ့တာ ဖြစ်ပါတယ်။
" ဒေါ်စန်းစန်းအေးကို ဓားပြတိုက်မှုဖြစ်တဲ့နေ့မှာပဲ ဖမ်းဆီးခဲ့တာ။ သူ့ရဲ့ထွက်ဆိုချက်အရ ကျန်တဲ့သူတွေကို ကျိုက်မရောဘက်မှာ ဖမ်းမိခဲ့တယ်။သူက ဓားပြတိုက်ခံရတဲ့ဆိုင်ပိုင်ရှင်နဲ့က အတွင်းသိအဆင်းသိ မိတ်ဆွေတွေ ပါ။မီးခံသေတ္တာထဲမှာ ရွှေတုံးတွေရှိတာလည်းသိတယ်။ သူ့ အိမ်က အကြွေးနဲ့ပေါင်ထားရသလို ချေးငွေတွေကလည်းရှိနေတော့ ဆိုင်ပိုင်ရှင်တွေ ရန်ကုန်ကိုသွားချိန် လူငှားပြီး ဓားပြတိုက်ခိုင်းတာ။ ဓားပြတိုက်တဲ့အချိန် ဒေါ်စန်းစန်းအေးက ကားပေါ်ကျန်ခဲ့တာ ။ မီးခံသေတ္တာရတော့ ကျိုက်မရောဘက်ကို တခါတည်းပြေးကြတာ။ပြီးတော့သူတို့ချင်း အဆင်မပြေဖြစ်ပြီး ဒေါ်စန်းအေးက သူ့အိမ်သူပြန်လာတာ ။ အဲဒီမှာပဲ ရဲတပ်ဖွဲ့က သူ့ကိုဖမ်းမိတာ။ " လို့ ရဲတပ်ဖွဲ့ နဲ့နီးစပ်သူက ပြောပါတယ်။
ဓားပြတိုက်မှုက ဩဂုတ် ၂၈ ရက်နေ့မနက် ၄ နာရီလောက်မှာဖြစ်ပွားခဲ့တာ ဖြစ်ပြီး ဖြစ်စဥ်က မျက်နှာဖုံးအုပ်ထားတဲ့ အမျိုးသားသုံးယောက်ဟာ ကားနှစ်စီးနဲ့ရောက်လာပြီး ကိုကိုညီညီဆိုင်ဘေးက ဆောက်လက်စတိုက်ကတဆင့် ဝင်ရောက်ပြီး သေနတ်အတိုသုံးလက်နဲ့ ခြိမ်းခြောက်ကာ ဓားပြတိုက်ခဲ့တာ ဖြစ်ပါတယ်။
ဓားပြတိုက်မှုမှာ စာရွက်စာတမ်းတွေအပြင် ရွှေ ၁၀ ကျပ်သားအပိုင်း ၄၀ ၊ ရွှေဆွဲကြိုး MC ပုံစံ ၁၀ ကျပ်သားတကုံး၊ရွှေဆွဲကြိုးပုံစံမျိုးစံမျိုးစုံ ငါး ကျပ်သားငါး ကုံး၊ စိန်လက်စွပ် နှစ်ကွင်း၊ စိန်ဆွဲကြိုးတကုံး၊ စိန်လက်ကောက် နှစ် ကွင်း၊ စိန်လက်စွပ်ငါး ကွင်း၊ ပလက်တီနမ်ဆွဲကြိုးနှစ်ကုံး၊ ရွှေလော့ကပ်သီး နှစ်ခု၊ ရွှေဆွဲကြိုး တကျပ်သားနှစ် ကုံး၊ ရွှေလက်ကောက် ၁၀ ကျပ်သားတကွင်းနဲ့အတူ အပေါင်ခံထားတဲ့ ရွှေဆွဲကြိုးနှစ် ကုံး၊ရွှေလက် ကောက်နှစ်ကွင်း ၊စိန်လက်စွပ်ကွင်း ၊ ငွေသား သိန်း ၅၀ အပါအဝင် စုစုပေါင်း ကာလတန်ဖိုး ငွေကျပ်သိန်းပေါင်း ၅၀၈၅၀ ပါသွားတယ်လို့သိရပါတယ်။
လက်ရှိမှာ ဓားပြတိုက်မှုကျူးလွန်သူတွေကို စစ်ကဲကုန်းနယ်မြေရဲစခန်းမှာ ရာဇသတ်ကြီး ဥပဒေ ပုဒ်မ ၃၉၂ နဲ့ အမှုဖွင့် အရေးယူထား ပါတယ် ။

စင်းခန်း အနီးထိ တိုက်ပွဲ ပြင်းထန်လာနေ

ကချင်ပြည်နယ်၊ ဗန်းမော်ခရိုင်၊ ရွှေကူနဲ့ ဗန်းမော်ကြား စင်းခန်းအနီးထိ တိုက်ပွဲ ပြင်းထန်လာကြောင်း ဒေသခံတွေဆီက သိရပါတယ်။
"စင်းခန်း နားထိ တိုက်ပွဲ ဖြစ်လာတယ်လို့ ပြောတယ်။ စင်းခန်းတံတားနား ချောဆွဲခံရတဲ့ ရွှေဖောင်ရာချီလည်း ဖမ်းခံရတယ်လို့ပြောတယ်" လို့ ဒေသခံ အမျိုးသမီး တယောက်က ပြောပါတယ်။
ရွှေတူးတဲ့ သ‌​င်္ဘောတွေကိုချောဆွဲပြီး ဗန်း‌​မော်ဘက် တက်လာတာလို့ သူက ပြောပါတယ်။
"ဇင်းဘုံ တဲ့ အနီး တဝိုက်မှာ ဒီမနက် ၆ နာရီ လောက်ကတည်းက တိုက်ပွဲ ပြင်းထန်နေတယ်" လို့ နောက်ထပ် ဒေသခံ အမျိုးသား တယောက်က ပြောပါတယ်။
ထိခိုက်မှု မရှိတဲ့ သ‌​င်္ဘောတွေက ဗန်းမော်ဘက် ဦးတည်ပြီး ဆက်လက် ဆန်တက်လာတယ်လို့ သူက ပြောပါတယ်။
ပစ်ခတ်ခံရတဲ့ စစ်ကူ သ‌​င်္ဘောတွေလည်း ရှိနေပြီး ‌ကြည်း‌ေကြာင်း၊ ရေကြောင်း လေကြောင်းတွေ နဲ့ တိုက်ပွဲ ပြင်းပြင်းထန်ထန် ဖြစ်နေကာ အခု နေ့လယ်ပိုင်းကစ လေယာဉ် ဆယ်ချီနဲ့ ဗုံးကြဲ တိုက်ခိုက်နေတာလို့ ဆိုပါတယ်။
မန္တလေး ကနေ ‌ဗန်းမော်ဘက် စစ်ကူ အင်အားဖြည့် တက်လာတဲ့ စစ်ကူ သ‌​င်္ဘောတွေဟာ ဩဂုတ်လ ၂၇ ရက်နေ့ကတည်းက ရွှေ‌ကူမြို့ကို ‌ဆိုက်ရောက်လာပြီးနောက် ရွှေကူနဲ့ ဇင်းဘုံ အနီးတဝိုက် နေ့စဉ်နီးပါး တိုက်ပွဲ ဖြစ်​နေပါတယ်။

မလေးရှားလုပ်သား စေလွှတ်တဲ့ အေဂျင်စီ ၁၀ ခုကို MOEAA က အသင်းဝင်အဖြစ်မှ ယာယီ ထုတ်ပယ်

မလေးရှားနိုင်ငံကို မြန်မာလုပ်သား သီးသန့် စေလွှတ်နေတဲ့ လိုင်စင်ရ အေဂျင်စီ ၁၀ ခုကို အသင်းဝင်အဖြစ်ကနေ ယာယီ ထုတ်ပယ်လိုက်တယ်လို့ မြန်မာနိုင်ငံ ပြည်ပအလုပ်အကိုင် ဝန်ဆောင်မှုလုပ်ငန်းရှင်များအသင်း (MOEAA) မှ မနေ့ စက်တင်ဘာ ၁ ရက်နေ့က ထုတ်ပြန်ထားပါတယ်။
အဲဒီ အေဂျင်စီ ၁၀ ခုဟာ မလေးရှားနိုင်ငံဆီ မြန်မာအလုပ်သမားတွေ စေလွှတ်ရေး လုပ်ငန်းစဉ်ကို သီးခြား လုပ်ပိုင်ခွင့်ရယူပြီး လက်ဝါးကြီးအုပ် ဆောင်ရွက်နေတဲ့အတွက် အသင်းဝင်အဖြစ်မှ အခုလို ယာယီ ရပ်စဲလိုက်တာလို့ အသိပေးထားပါတယ်။
“ပြည်ပအလုပ်အကိုင် ဝန်ဆောင်မှုလိုင်စင် ရရှိထားတဲ့ အေဂျင်စီများစွာ ရှိတဲ့အနက် မြန်မာလုပ်သား စေလွှတ်ရေး လုပ်ငန်းစဉ်မှာ အသင်းဝင် အေဂျင်စီတချို့သာ သီးခြားလုပ်ပိုင်ခွင့် ရယူ ဆောင်ရွက်နေခြင်းဟာ တခြားအသင်းဝင် အေဂျင်စီတွေရဲ့ တန်းတူအခွင့်ရေးနဲ့ မျှတတဲ့ လုပ်ငန်းယှဉ်ပြိုင်ခွင့်ကို ထိခိုက်စေတယ်” လို့ ထုတ်ပြန်ချက်မှာ ဖော်ပြထားပါတယ်။
ဒါအပြင် အသင်းရဲ့ စည်းလုံးညီညွတ်မှု စုပေါင်းဆောင်ရွက်မှုကို ထိခိုက်စေတာကို စိစစ် တွေ့ရှိရသလို MOEAA ရဲ့ အသင်းဖွဲ့စည်းပုံ အခြေခံစည်းမျဉ်းပါ အခန်း (၂)၊ အခန်း (၅) တို့နဲ့ ကိုက်ညီမှုမရှိဘဲ ကျင့်ဝတ်နဲ့ လုပ်ထုံးလုပ်နည်းတွေကို ချိုးဖောက်တာလို့ ဆိုပါတယ်။
လက်ရှိ မလေးရှားလုပ်သား စေလွှတ်မှုနဲ့ ပတ်သက်လို့ အဲဒီနိုင်ငံရဲ့ FWCMS (Foreign Workers Centralized Management System) စနစ်မှာ မှတ်ပုံတင်ထားတဲ့ အလုပ်သမားခေါ်ယူရေး အေဂျင်စီစာရင်းမှာ တခြားသော အေဂျင်စီတွေရဲ့ မျှတစွာ ယှဉ်ပြိုင်ခွင့်ကို မျက်ကွယ်ပြုထားကာ တဖက်သတ် လက်ဝါးကြီးအုပ်ပြီး နိုင်ငံအလိုက် အေဂျင်စီအရေအတွက် ကန့်သတ်၊ လုပ်ဆောင်နေတာကို တွေ့ရတယ်လို့ ပြည်ပအလုပ်အကိုင် အကျိုးဆောင်လုပ်ငန်း လုပ်ကိုင်သူတယောက်က ပြောပါတယ်။
“ဒါကို တရားမျှတမှု မရှိဘူးဆိုပြီး ကျွန်တော်တို့ မြန်မာနိုင်ငံနဲ့အတူ နီပေါ၊ ဘင်္ဂလားဒေ့ရှ်၊ ပါကစ္စတန် နိုင်ငံလေးနိုင်ငံ အဖွဲ့ချုပ်တွေက ပူးတွဲ ကြေငြာချက်တွေထုတ်ပြီး ကန့်ကွက်ထားတာရှိတယ်။ ဒါပေမယ့် ဒီအေဂျင်စီ ၁၀ ခုက အသင်းက ချမှတ်ထားတဲ့ စည်းမျဉ်းစည်းကမ်းတွေကို မလိုက်နာဘဲနဲ့ သီးသန့် လုပ်ပိုင်ခွင့်ရယူဖို့ လုပ်တဲ့အတွက် အသင်းဝင်အဖြစ်ကနေ ယာယီ ရပ်စဲလိုက်တာ” လို့ သူက ပြောပါတယ်။
ဒီလုပ်ရပ်တွေဟာ အသင်းကြီးရဲ့ လက်ရှိ ကျင့်သုံးနေတဲ့ တရားမျှတတဲ့ အလုပ်သမားခေါ်ယူရေးမူဝါဒ (Fair Recruitment) နဲ့ ဆန့်ကျင်နေတာကြောင့် အခုလို အရေးယူ ဆောင်ရွက်တာလို့ သူက ပြောပါတယ်။
သီးခြားလုပ်ပိုင်ခွင့် ရယူထားတဲ့ အေဂျင်စီတွေရဲ့ လက်အောက်မှာ တခြား လိုင်စင်ရ အေဂျင်စီတွေက အဖွဲ့ဝင်အဖြစ် ပူးပေါင်း လုပ်ကိုင်ရမယ်ဆိုပါကလည်း တရားဝင်လိုင်စင် ကိုင်ဆောင်ထားသူတွေ အချင်းချင်း တဆင့်နိမ့် အကူအညီ တောင်းခံသလိုမျိုး ဖြစ်နိုင်သလို ဒီအခြေအနေရဲ့ နောက်ဆက်တွဲအဖြစ် အလုပ်သမားတွေအပေါ် မလိုလားအပ်တဲ့ ဝန်ဆောင်ခ ဝန်ထုပ်ဝန်ပိုးတွေ ကျရောက်လာနိုင်တယ်လို့ MOEAA က အသိပေးထားပါတယ်။

ကလေးမြို့နဲ့ ခိုင်ကမ်းမြို့ ရေကြီးမှု ‌လူတယောက် ပျောက်ဆုံး၊ ဘုရားကျောင်းနဲ့ နေအိမ်ချို့ ရေစီးနဲ့ မျောပါ

စစ်ကိုင်းတိုင်း ကလေးမြို့နယ်နဲ့ ချင်းပြည်နယ်၊ တီးတိန်မြို့နယ်၊ ခိုင်ကမ်းမြို့အတွင်း ရေကြီးမှုကြောင့် အမျိုးသမီးတယောက် ရေစီးနဲ့မျောပါ ပျောက်ဆုံးနေသလို ဘုရားကျောင်းနဲ့ နေအိမ်ချို့လည်း ရေစီးနဲ့ မျောပါ ပျက်စီးခဲ့တယ်လို့ ဒေသခံတွေက ပြောပါတယ်။
ကလေးမြို့မှာ မိုးသည်းထန်စွာ အဆက်မပြတ် ရွာသွန်းမှုကြောင့် ဒီကနေ့ စက်တင်ဘာ ၂ ရက်၊ မနက်ပိုင်းမှစတင်ကာ မြို့ပေါ်ရပ်ကွက်တချို့နဲ့ မြေနိမ့်ပိုင်း နေရာတွေမှာ မိုးရေနဲ့အတူ တောင်ကျချောင်းရေတွေ အရှိန်အဟုန်နဲ့ စီးဝင်လာပြီး ရေကြီးနေတယ်လို့ သိရပါတယ်။
“မိုးက ဆက်တိုက်ရွာနေတာ။ ပင်လုံရပ်ကွက်ထဲက ဥပုသ်ချောင်းရေလည်း ရေတိုးမြန်နေတယ်။ ဒီမနက် ၈ နာရီခွဲလောက်က ဇင်းကလင်းတံတား ခြေရင်းလည်း ရေတိုက်စားပြီး ပေါက်သွားလို့ ကလေးတောင်ပိုင်းလမ်းကြော ပြတ်တောက်သွားပြီ။ ချောင်းရေတက်တာကို သွားကြည့်တဲ့ အမျိုးသမီးတယောက်လည်း တံတားကျိုးပြီး ရေထဲကျ၊ မျောပါသွားတာ အခုထိ ရှာမတွေ့သေးဘူး” လို့ ဒေသခံတယောက်က ပြောပါတယ်။
ဇင်းကလင်းတံတား ရေတိုက်စား ပြိုကျနေမှုကြောင့် ကလေးမြို့ကနေ တောင်ပိုင်းဒေသတွေဘက် သွားလာကြတဲ့ ယာဉ်လမ်းကြောင်းတွေကို ယာယီ ပိတ်ထားလိုက်ရပြီဖြစ်ကာ ညောင်ပင်သာရပ်ကွက်နဲ့ မင်္ဂလာဥယျာဉ်ရပ်ကွက်ကိုကူးတဲ့ အမှတ် (၅) မူလတန်းလွန်ကျောင်းအနီး တံတားလည်း ရေကျော်နေတယ်လို့ သိရပါတယ်။
ဒါအပြင် တောင်ဇလပ်ရပ်ကွက်၊ နယ်မြေ (၉) ဘက်မှာလည်း ရေလျှံနေကာ ရေဘေးအတွင်း ပိတ်မိနေသူတွေလည်း ရှိနေတယ်လို့ သိရပြီး လက်ရှိမှာ U9 Operator ရဲ့ Main Site Down ဖြစ်သွားလို့ U9 ဖုန်းလိုင်းတွေနဲ့ အင်တာနက်လိုင်းတွေ အပါအဝင် WiFi နဲ့ 9Plus WiFi လိုင်းတွေပါ ပြတ်တောက်သွားခဲ့တာကြောင့် MPT ဖုန်းလိုင်း တခုတည်းကိုသာ အသုံးပြုနေရတယ်လို့ သိရပါတယ်။
ဒါအပြင် ကလေးမြို့နဲ့ ထိစပ်နေတဲ့ တီးတိန်မြို့နယ်၊ ခိုင်ကမ်းမြို့မှာလည်း မိုးသည်းထန်ပြီးနောက် ဒီကနေ့ မနက်ပိုင်းကစလို့ ကွဲချောင်းရေ မြင့်တက်လာတာကြောင့် ချောင်းကမ်းပါူမှာရှိတဲ့ Maranatha AG ခရစ်ယာန် ဘုရားရှိခိုးကျောင်း အပါအဝင် နေအိမ်တချို့ ရေတိုက်စား ပြိုကျကာ ရေစီးနဲ့အတူ မျောပါသွားတယ်လို့ သိရပါတယ်။
“ရေစီးအရမ်းသန်တယ်။ မိုးကလည်း သည်းနေတာ။ ချင်းတောင်ဘက်ကနေ တောင်ကျရေတွေ ဒလဟောကျလာတာ ကွဲချောင်းရေ ချက်ချင်း လျှံတက်လာတယ်။ ရေစီးက ကမ်းပါး‌နေရာတွေ အကုန်တိုက်စားသွားတာ။ အုတ်တိုက်တွေတောင် ကျွတ်ပြီးပါသွားတယ်။ Maranatha AG ဘုရားကျောင်းဆို အဆောက်အအုံ တခုလုံး ပါသွားတာ” လို့ ဒေသခံတယောက်က ပြောပါတယ်။
လက်ရှိအချိန်အထိ ရေမျက်နှာပြင် ဆက်လက် မြင့်တက်နေဆဲဖြစ်တာကြောင့် ချောင်းကမ်းဘေး နေထိုင်သူတွေအနေနဲ့ အရေးပေါ်ရွှေ့ပြောင်းခြင်း၊ နေအိမ်တွေကို ကြိုတင် ဖျက်သိမ်းခြင်းတွေ ပြုလုပ်နေကြရတယ်လို့ သိရပါတယ်။
ဒါအပြင် မနေ့ စက်တင်ဘာ ၁ ရက်နေ့၊ မနက်အစောပိုင်းကလည်း တီးတိန်မြို့နယ်၊ ကိမ်လိုင်ကျေးရွာအနီးရှိ နတ်တံခါးချောင်းအတွင်း တောင်ကျရေ အရှိန်အဟုန်နဲ့ စီးဆင်းလာမှုကြောင့် ဒေသခံတွေ ကိုယ်ထူကိုယ်ထ တည်ဆောက်ထားတဲ့ ကြိုးတံတား ပျက်စီးသွားခဲ့ပြီး လမ်းပန်းဆက်သွယ်ရေးတွေ ပြတ်တောက်နေတယ်လို့ သိရပါတယ်။

အမြန်လမ်းမှာ ခရီးသည်တင် Express ကားတိမ်းမှောက်လို့ တယောက်သေ၊ ၂၁ ယောက်ဒဏ်ရာရ

ရန်ကုန် - မန္တလေး အမြန်လမ်းမကြီး၊ မိုင်တိုင်အမှတ်(၁၅)အနီးမှာ စက်တင်ဘာ ၂ ရက်နေ့ ၊ နေ့လယ် ၂ နာရီကျော်လောက်က ခရီးသည်တင် Express ကားတိမ်းမှောက်ပြီး တယောက်သေဆုံးကာ ၂၁ ယောက်ထိခိုက်ဒဏ်ရာရရှိခဲ့တယ်လို့ သိရပါတယ်။
အဆိုပါ ယာဥ်တိမ်းမှောက်မှုမှာ အမျိုးသား ၁၄ ယောက် ၊ အမျိုးသမီး ရှစ်ယောက်ဒဏ်ရာရရှိခဲ့ပြီး အဲဒီထဲကမှ အမျိုးသားတယောက် သေဆုံးခဲ့တာ ဖြစ်ပါတယ်။
ထိခိုက်ဒဏ်ရာရရှိသူတွေထဲမှာ ဒဏ်ရာပြင်းထန်တဲ့ လူနာခြောက်ယောက်က မြောက်ဥက္ကာဆေးရုံမှာ လွှဲပြောင်းကုသမှုခံယူနေပြီး ကျန်သူတွေကတော့ လှည်းကူးမြို့နယ်ဆေးရုံကို ပို့ဆောင်ထားတယ်လို့ သိရပါတယ်။
" ဒဏ်ရာရတဲ့အထဲက ပြင်းထန်တာ ခုနှစ်ယောက်ရှိတယ်။မြောက်ဥက္ကလာကိုပို့တော့ အဲဒီထဲက အောက်ပိုင်းပိတဲ့ အမျိုးသားတယောက်ကတော့ မြောက်ဥက္ကလာဆေးရုံကိုပို့လိုက်ပေမယ့် ဆေးရုံမှာပဲ ကာလာပြောင်းသွားတယ်။ ဆုံးသွားတယ်ပေါ့။ ဒဏ်ရာအပြင်းဆုံးသူပေါ့။ ကားတွေကို စက်တွေနဲ့မြှောက်ပြီးမှ ဆွဲထုတ်လို့ရတာ။ " လို့ မြေပြင် ကူညီကယ်ဆယ်ရေးဆောင်ရွက် ပေးခဲ့သူ တယောက်က ပြောပါတယ်။
အဆိုပါကားဟာ ရန်ကုန် - ဘားအံကိုပြေးဆွဲတဲ့ မိဘဂုဏ် ခရီးသည်တင် Express ကားဖြစ်ပြီး ယာဥ်တိမ်းမှောက်မှု ဖြစ်စဥ်နဲ့ပတ်သက်လို့တော့ မသိရသေးပါဘူး။
စက်တင်ဘာ ၁ ရက်နေ့ ၊ ည ၉ နာရီကျော်လောက်ကလည်း ရှမ်းပြည်နယ်၊ မိုင်းပျဉ်းမြို့နယ်၊ ကျိုင်းတုံ-တောင်ကြီးကားလမ်း ၊ မိုင်တိုင်အမှတ် ၅၅၅.၅ km နဲ့ ၅၅၆.၀ km ကြားမှာ ဧကရာဇ်ခရီးသည်တင် Express ကား ဘရိတ်ပေါက်ပြီး ပေ ၅၀ အနက်ရှိ ချောက်ထဲပြုတ်ကျလို့ တယောက်သေပြီး ၁၉ ယောက်ထိခိုက်ဒဏ်ရာ ရရှိခဲ့ပါတယ်။
အမြန်လမ်းမှာ ယာဥ်မတော်တဆမှုအနေနဲ့ အရင်လ ဩဂုတ် ၂ ရက်ကနေ ၂၆ ရက်အထိ ယာဉ်မတော်တဆမှုပေါင်း ၁၈ မှုထက်အနည်း ဖြစ်ပွားခဲ့ပြီး ငါးယောက်သေဆုံးကာ ၂၈ ယောက် ဒဏ်ရာရရှိခဲ့တယ်လို့ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်‌ရေးအဖွဲ့က ရရှိတဲ့ အချက်အလက်တွေအရ သိရပါတယ်။
ရန်ကုန် - မန္တလေး အမြန်လမ်းမကြီး၊ မိုင်တိုင်အမှတ် ၁၁၇/၇ ဖာလုံမှာ ဒီကနေ့ ဇွန် ၂၂ ရက်နေ့ မနက်ပိုင်းက ခရီးသည်တင် Express ကားနှစ်စီးတိုက်မိပြီး သုံးယောက်သေဆုံးကာ လေးယောက်ထိခိုက်ဒဏ်ရာရရှိခဲ့တယ်လို့ သိရပါတယ်။
အလားတူ ဇွန် ၇ ရက်ကလည်း ရန်ကုန်-မန္တလေးအမြန်လမ်းမကြီး မိုင်တိုင်အမှတ်(၂၂၁/၇)အနီးမှာ ခရီးသည်တင် Express ကားသုံးစီးအပါအဝင် ယာဥ်ခြောက်စီးဆင့်တိုက်မှုဖြစ်ပွားပြီး လူကိုးယောက်ထိခိုက် ဒဏ်ရာရရှိခဲ့ပါတယ်။
၂၀၂၆ ခုနှစ် ဇန်နဝါရီကနေ ဩဂုတ်လကုန်အထိ အမြန်လမ်းမမှာ ယာဥ်မတော်တဆ ဖြစ်ပွားမှုအနေနဲ့ ယာဉ်မတော်တဆမှု ၁၀၀ နီးပါးအထိရှိခဲ့ပြီး သေဆုံးသူ ၅၀ ထက်မနည်းရှိကာ ထိခိုက်ဒဏ်ရာ ရရှိသူ ၁၀၀ ကျော်အထိရှိခဲ့တယ်လို့ သိရပါတယ်။

၂၇ ကြိမ်မြောက် မြန်မာ့ရိုးရာယဥ်ကျေးမှု အဆို၊ အက၊ အရေး၊ အတီးပြိုင်ပွဲ မန္တလေးမှာကျင်းပ

မန္တလေးမြို့၊ ချမ်းအေးသာစံမြို့နယ်၊ ၂၆ လမ်း၊ ၇၀၇၁ လမ်း ကြားက မြို့တော်ခန်းမမှာ ဒီကနေ့ စက်တင်ဘာ ၃ ရက်နေ့မနက် ၈ နာရီကစတင်ပြီး ၂၇ ကြိမ်မြောက် မြန်မာ့ရိုးရာယဥ်ကျေးမှု အဆို၊ အက၊ အရေး၊ အတီးပြိုင်ပွဲ ကျင်းပဖို့အတွက် ဖွင့်ပွဲ ကျင်းပပြုလုပ်ခဲ့ပါတယ်။
ဖွင့်ပွဲအခန်းအနားကို မန္တလေးတိုင်းဒေသကြီးလွှတ်တော် ဥက္ကဋ္ဌ ဦးအောင်ကျော်မိုး၊ မန္တလေးတိုင်းဒေသကြီးအစိုးရအဖွဲ့ ဝန်ကြီး ချုပ် ဦးမျိုးအောင်၊ လုံခြုံရေးနဲ့ နယ်စပ်ရေးရာဝန်ကြီး ဗိုလ်မှူးကြီးနေလင်းစိုး၊ မြို့တော်ဝန် ဦးခင်မောင်အေး၊ ရှမ်းတိုင်းရင်းသားလူမျိုးရေးရာဝန်ကြီး ဦးစိုင်းအောင်ကြည် တို့က ဖဲကြိုးဖြတ် ဖွင့်လှစ်ပေးခဲ့ပြီး အစိုးရအဖွဲ့ဝန်ကြီးတွေအပြင် ဌာနဆိုင်ရာကတာဝန်ရှိသူတွေနဲ့ ဖိတ်ကြားထားတဲ့ဧည့်သည်တွေ တက်ရောက်ခဲ့ပါတယ်။
ဒီကနေ့ပြိုင်ပွဲမှာတော့ ကျေးလက်ရိုးရာအက ယှဥ်ပြိုင်ခြင်း မဲကျရာအဖွဲ့ ၁၊ မဲကျရာအဖွဲ့ ၂၊ မဲကျရာအဖွဲ့ ၃ နဲ့ မဲကျရာ အဖွဲ့ ၄ တို့က ယှဥ်ပြိုင်ကြမှာဖြစ်ပြီး နောက်ထက် မဲကျရာအဖွဲ့ ၁ ကနေ ၄ အထိက ကဗျာလွတ်အက ခေါင်းစဥ်နဲ့ ယှဥ်ပြိုင်သွားမှာဖြစ်ပါတယ်။
ဒီပြိုင်ပွဲအခန်းအနားကို ဒီကနေ့ စက်တင်ဘာ ၃ ရက်နေ့ကစတင်ပြီး စက်တင်ဘာ ၆ ရက်နေ့အထိ ကျင်းပသွားမှာဖြစ်ပြီးနောက်ဆုံးနေ့မှာတော့ ၂၇ ကြိမ်မြောက် မြန်မာ့ရိုးရာယဥ်ကျေးမှု အဆို၊ အက၊ အရေး၊ အတီးပြိုင်ပွဲ အတွက် ဆုချီးမြှင့်ပွဲနဲ့ အောင်နိုင်ရေးအလံအပ်နှင်းပွဲ ကျင်းပပြုလုပ်သွားမယ်လို့ သိရပါတယ်။

အားကစားကလပ်တစ်ခုကို ပေါင် ၃ ဘီလီယံဖြင့် ဝယ်ယူလာတဲ့ အာဆင်နယ်ပိုင်ရှင်များ

အာဆင်နယ်အသင်းပိုင်ရှင် Kroenke Sports Entertainment ဟာ မေဂျာလိဂ်ဘော့စ်ဘောကလပ် Los Angeles Angels ကို ဝယ်ယူလာပါတယ်။
စတန်ခရွန်ယက်ကီဦးဆောင်နေတဲ့ ယင်းကုမ္ပဏီဟာ အမေရိကန်အနောက်လိဂ်တွင် ရုန်းကန်နေရတဲ့ အားကစားကလပ်အား ပေါင် ၃ ဘီလီယံဖြင့် ဝယ်ယူလာတာလည်း ဖြစ်ပါတယ်။
အာဆင်နယ်ပရိသတ်များဟာ အပြောင်းအရွှေ့ဈေးကွက်နောက်ဆုံးနေ့တွင် အသင်းရဲ့ လိုအပ်နေတဲ့ ကမ္ဘာ့အဆင့် တိုက်စစ်မှူး ခေါ်ယူခြင်း မပြုလုပ်ဘဲ အားကစားကလပ်တစ်ခုကိုသာ ဝယ်ယူလာတဲ့ အသင်းပိုင်ရှင်အပေါ် အကြီးအကျယ်ဒေါသထွက်နေကြပါတယ်။
Kroenke Sports Entertainment ဟာ အာဆင်နယ်၊ Angels အပြင် NFL ကလပ် Angeles Rams ၊ NHL ကလပ် Colorado Avalanche နှင့် မေဂျာလိဂ်ကလပ် Colorado Rapid တို့တွင်လည်း ရင်းနှီးမြှပ်နှံမှုများ ပြုလုပ်ထားပါသေးတယ်။

မာရာဒိုနာနှင့် မက်ဆီတို့ ဝတ်ဆင်ခဲ့တဲ့ ဂန္ထဝင်ကျောနံပါတ် ၁၀ အား ပါရမီရှင်လူငယ်ထံ လွဲပြောင်းပေးရန် အာဂျင်တီးနားဆုံးဖြတ်လိုက်ပြီ

အာဂျင်တီးနားဟာ လီယွန်နယ်မက်ဆီဝတ်ဆင်ခဲ့တဲ့ ဂန္ထဝင်ကျောနံပါတ် ၁၀ အား လွဲပြောင်းမယ့် ကစားသမားအား ရွေးချယ်ထားပြီး ဖြစ်ပါတယ်။
လီယွန်နယ်မက်ဆီဟာ အသက် ၃၉ နှစ်အရွယ်တွင် အာဂျင်တီးနားလက်ရွေးစင်ကစားသမားဘဝမှ အနားယူခဲ့ပါတယ်။
မက်ဆီဟာ ၂၀၁၆ ခုနှစ်တုန်းကလည်း အာဂျင်တီးနားကစားသမားဘဝမှ အနားယူဖူးခဲ့ပါတယ်။
ဂန္ဌဝင်ကစားသမားဟာ ကိုပါအမေရိကဖလားဗိုလ်လုပွဲ ၂ ကြိမ်နှင့် ၂၀၁၄ ကမ္ဘာ့ဖလားဗိုလ်လုပွဲတို့တွင် ရှုံးနိမ့်ပြီးနောက် လက်ရွေးစင်ကစားသမားဘဝမှ အနားယူခဲ့သူပါ။
ဒါပေမယ့် သူဟာ အာဂျင်တီးနားကစားသမားဘဝမှ အနားယူချိန်တွင် ကမ္ဘာ့ဖလား ၁ ကြိမ်၊ ကိုပါအမေရိက ၂ ကြိမ် ရယူနိုင်ခဲ့ပါတယ်။
သူဟာ အာဂျင်တီးနားအတွက် ၂၀၇ ပွဲကစားကာ ၁၂၅ ဂိုးသွင်းကာ ပွဲအများဆုံကစားထားသူ၊ ဂိုးအများဆုံးသွင်းထားသူအဖြစ်လည်း မှတ်တမ်းရေးထိုးထားပါတယ်။
ယနေ့တွင် ESPN ရဲ့ ဖော်ပြလာမှုအရ အာဂျင်တီးနားနည်းပြလီယွန်နယ်စကာလိုနီဟာ မာရာဒိုနာနှင့် မက်ဆီတို့ ဝတ်ဆင်ခဲ့တဲ့‌ ကျောနံပါတ် ၁၀ အား ဆက်ခံမယ့် ကစားသမားအား ဆုံးဖြတ်ထားပြီ ဖြစ်ကြောင်း သိရပါတယ်။
အာဂျင်တီးနားရဲ့ကျောနံပါတ် ၁၀ ကို ဆက်ခံမယ့် ကစားသမားက ကိုမိုအလယ်တန်းတိုက်စစ်သမားနီကိုပက်ဇ် ဖြစ်ပါတယ်။
အသက် ၂၁ နှစ်သာ ရှိသေးတဲ့ နီကိုပက်ဇ်ဟာ အာဂျင်တီးနားအသင်းအတွက် ၁၁ ပွဲကစားထားပြီးသူ ဖြစ်ပြီး ဥရောပရဲ့အလားအလာအကောင်းဆုံးလူငယ်တိုက်စစ်သမားများထဲမှ တစ်ဦးအဖြစ် သတ်မှတ်ခံထားရသူ ဖြစ်ပါတယ်။
သူဟာ လက်ရှိအချိန်မှာ စီးရီးအေကလပ် ကိုမိုမှာ ဖာဘရီဂက်စ်လက်အောက်မှာ ကစားနေသူလည်း ဖြစ်ပါတယ်။
သူဟာ စပိန်တွင် မွေးဖွားသူ ဖြစ်ပြီး ရီးရဲလ်မက်ဒရစ်အကယ်ဒမီထွက်တစ်ဦး ဖြစ်ပါတယ်။
ဖခင်ဖြစ်သူ ပါဘလိုပက်ဇ်က အာဂျင်တီးနားနှင့်အတူ ၁၉၉၈ ကမ္ဘာ့ဖလား ယှဉ်ပြိုင်ခဲ့သူ ဖြစ်ပါတယ်။
သူ့မိခင်က စပိန်ဖြစ်ပေမယ့်လည်း ဖခင်ဖြစ်သူရဲ့ နိုင်ငံ အာဂျင်တီးနားအတွက် ကစားနေတာပါ။
ရီးရဲလ်မက်ဒရစ်ဟာ နီကိုပက်ဇ်ကို ယခုနွေတွင် ပြန်လည် ခေါ်ယူနိုင်မယ့် အချက်ကို ထည့်သွင်းထားခဲ့ပေမယ့်လည်း ကိုမိုနှင့် ပြန်လည်ဆွေးနွေးမှု ပြုလုပ်ကာ စာချုပ်ကို ပြုပြင်ချုပ်ဆိုခဲ့ပါတယ်။
ပြန်လည်ချုပ်ဆိုလာတဲ့ စာချုပ်အရ ရီးရဲလ်မက်ဒရစ်အေနဖြင့် ၂၀၂၇ ခုနှစ်တွင် နီကိုပက်ဇ်ကို ပေါင် ၆၈.၆ သန်းဖြင့် ပြန်လည် ခေါ်ယူနိုင်ပါမယ်။

ယူအီးအက်ဖ်အေရဲ့စည်းမျဉ်းသစ်အရ ချန်ပီယံလိဂ်ပထမဆုံးကစားသူများမှာ ကစားဖော်များနှင့် ကွဲပြားတဲ့ အင်္ကျီ ဝတ်ဆင်ကစားလာရမည်

ချန်ပီယံလိဂ်ပထမဆုံးကစားလာတဲ့ ကစားသမားများမှာ ယခုရာသီတွင် ကစားဖော်များနှင့် ကွဲပြားတဲ့ အင်္ကျီအား ဝတ်ဆင်ကစားလာရပါမယ်။
ဥရောပရဲ့အကြီးကျယ်ဆုံးပြိုင်ပွဲအား ပထမဆုံးကစားလာတဲ့ ကစားသမားများဟာ ယခုရာသီတွင် အင်္ကျီလက်မောင်းတွင် ကွဲပြားတဲ့ အထူးစပါယ်ရှယ်အပြားအား ထည့်သွင်းဝတ်ဆင်လာရပါမယ်။
ယူအီးအက်ဖ်အေဟာ အားကစားအမှတ်တရပစ္စည်းကုမ္ပဏီ Fanatics နှင့် ပူးပေါင်းလိုက်ပြီးနောက် စည်းမျဉ်းသစ်ချမှတ်လာတာလည်း ဖြစ်ပါတယ်။
ပွဲအပြီးတွင် ယင်းအပြားများကို Fanatics ကို ပေးရမှာ ဖြစ်ပြီး ယင်းအား ကတ်ကုန်သွယ်ရေးကုမ္ပဏီ Topps ထံ ဖြန့်ဝေပေးပါမယ်။
ချန်ပီယံလိဂ်ပထမဆုံးကစားတဲ့ ကတ်တစ်ခုစီက လက်မှတ်ထိုးထားတဲ့ ကုန်သွယ်မှုကတ်တစ်ခုစီအဖြစ် ပြောင်းလဲသွားမှာလည်း ဖြစ်ပါတယ်။
ယင်းကတ်မျိုးကို နိုနီမာဒူကီ၊ အန်တိုနီဂေါ်ဒွန်တို့ကဲ့သို့ ကမ္ဘာ့ဖလားပထမဆုံးကစားစဉ်တုန်းကလည်း သုံးခဲ့ဖူးပါတယ်။
ယခု ယင်းစနစ်မှာ ချန်ပီယံလိဂ်လိဂ်အဆင့်တွင်လည်း အသုံးပြုလာပါမယ်။
ယူနိုက်တက်ရဲ့ ဘရိုင်ယန်အမ်ဘူမိုနှင့် ကားလို့စ်ဘာလီဘာတို့မှာ ချန်ပီယံလိဂ်ပထမဆုံးကစားလာမှုနှင့်အတူ ယင်းကတ်အား ဝတ်ဆင်အသုံးပြုရပါမယ်။
ယင်းစနစ်ကို ၂၀၂၇-၂၈ အမျိုးသမီးချန်ပီယံလိဂ်ပြိုင်ပွဲတွင်လည်း အသုံးပြုလာဦးမှာ ဖြစ်ပါတယ်။
ယင်းစနစ်မှာ NBA တွင် အသုံးပြုနေတာ ကြာမြင့်ပြီလည်း ဖြစ်ပါတယ်။

ဇက်ဇီးအတွက် အဲဗာတန်အသင်းရဲ့ ကမ်းလှမ်းမှုကို မန်ယူအသင်း ငြင်းပယ်ခဲ့

မန်ယူအသင်းဟာ နယ်သာလန်တိုက်စစ်မှူး ဇက်ဇီးအတွက် အဲဗာတန်အသင်းရဲ့ ကမ်းလှမ်းမှုကို ငြင်းပယ်ခဲ့ကြောင်း သိရပါတယ်။
အဲဗာတန်အသင်းက အပြောင်းအရွှေ့ဈေးကွက်ပိတ်ခါနီးမှာ ဇက်ဇီးကို အငှားနဲ့ ခေါ်ယူဖို့ ကမ်းလှမ်းခဲ့ခြင်းဖြစ်ပြီး နည်းပြ ကာရစ်ရဲ့ ဆုံးဖြတ်ချက်နဲ့ မန်ယူအသင်းက ငြင်းပယ်ခဲ့ခြင်းဖြစ်ကြောင်း သိရပါတယ်။
မန်ယူအသင်းက အစောပိုင်းမှာ ဇက်ဇီးကို အငှားချဖို့ စီစဉ်ခဲ့ပြီး ဂျူဗင်တပ်စ်၊ ဖီအိုရင်တီးနားအသင်းတွေနဲ့ ဆွေးနွေးခဲ့ပေမဲ့ ဈေးကွက်ပိတ်ခါနီးမှာတော့ ကစားသမားသစ် ပြန်လည်အစားထိုးခေါ်ယူဖို့ မဖြစ်နိုင်တော့တာကြောင့် အဲဗာတန်အသင်းရဲ့ ကမ်းလှမ်းမှုကို ငြင်းပယ်ခဲ့ခြင်းဖြစ်ကြောင်း သိရပါတယ်။
အဲဗာတန်အသင်းက ဇက်ဇီးကို တစ်ရာသီအငှားနဲ့ ခေါ်ယူခြင်းအတွက် လစာအပြည့်အ၀ ပေးချေမယ့်အပြင် ငှားရမ်းခ ပေါင်(၁၀)သန်းပေးချေမယ်လို့ ကမ်းလှမ်းခဲ့ခြင်းဖြစ်ကြောင်း သိရပါတယ်။
ဇက်ဇီး(၂၅ နှစ်)ဟာ ၂၀၂၄ နွေရာသီမှာ ဘိုလော့ဂ်နာကနေ မန်ယူအသင်းကို ပေါင်(၃၆.၅)သန်းနဲ့ ပြောင်းရွှေ့ခဲ့သူဖြစ်ပြီး မန်ယူအသင်းအတွက် ပြိုင်ပွဲစုံ(၇၅)ပွဲမှာ (၉)ဂိုး သွင်းယူထားပါတယ်။