ဆန်းဒါးလန်းနှင့်ပွဲတွင် ဂိုးသွင်းယူပြီးနောက် ကောင်းကင်ကို လက်ညိုးထိုးကာ ကွယ်လွန်သွားရှာပြီဖြစ်တဲ့ မိခင်ကို ရည်စူးခဲ့တဲ့ အင်ဒါဆင်
===================

အီးလီးယော့အင်ဒါဆင်ဟာ ဆန်းဒါးလန်းနှင့်ပွဲတွင် ဂိုးသွင်းယူပြီးနောက် ကွယ်လွန်သွားရှာပြီဖြစ်တဲ့ မိခင်ဖြစ်သူကို ရည်စူးခဲ့ပါတယ်။
အင်္ဂလန်စတားဟာ ဆန်းဒါးလန်းကို ၅-၀ ဂိုးဖြင့် အနိုင်ရတဲ့ပွဲရဲ့ အချိန်ပိုတွင် ပဥ္စမမြောက်ဂိုးကို သွင်းယူခဲ့ပါတယ်။ ယင်းဂိုးက အင်ဒါဆင်အတွက် မိခင်ကွယ်လွန်ပြီးနောက် ပထမဆုံးသွင်းယူတဲ့ဂိုးလည်း ဖြစ်ပါတယ်။
အင်ဒါဆင်ဟာ မိခင် ကွယ်လွန်သွားမှုကြောင့် ပေါ်တိုကို ၁-၀ ဂိုးဖြင့် အနိုင်ရရှိကာ ယူရိုပါလိဂ်ဆီမီးဖိုင်နယ်သို့ တက်ရောက်နိုင်တဲ့ပွဲစဉ်အား လွဲချော်ခဲ့သူလည်း ဖြစ်ပါတယ်။
သူဟာ ပြီးခဲ့တဲ့အပတ်အကုန်တုန်းက ဘန်လေအား အနိုင်ရတဲ့ပွဲစဉ်မှာ နော်တင်ဟမ်ဖောရက်စ်အတွက် ပြန်လည် ကစားလာနိုင်ခဲ့ပါတယ်။
အဆိုပါပွဲစဉ်တွင် နော်တင်ဟမ်ဖောရက်စ်ဟာ အင်ဒါဆင်ရဲ့ မိခင်ဟီလန်အင်ဒါဆင်အတွက် တစ်မိနစ် ငြိမ်သက်ကာ ဝမ်းနည်းခြင်းအထိမ်းအမှတ် ပြုလုပ်ခဲ့ပါတယ်။

ချဲလ်ဆီးနည်းပြရာထူးအတွက် ရေပန်းစားနေမှုအပေါ် ဖာဘဂရီက်စ် တုံ့ပြန်လာ
=====================

ကိုမိုအသင်းပိုင်ရှင်က ပရီးမီးယားလိဂ်ထိပ်သီးကလပ်ချဲလ်ဆီးအား ကိုင်တွယ်လိုပါက တားဆီးသွားမှာ မဟုတ်ကြောင်း ပြောကြားလာခဲ့ပေမယ့်လည်း ချဲလ်ဆီးစတားဟောင်းဆက်စ်ဖာဘရီဂက်စ်က ကိုမိုနည်းပြရာထူးအတွက်ပေါ်တွင်သာ အပြည့်အဝ အာရုံစိုက်နေကြောင်း ပြောကြားလာပါတယ်။
ချဲလ်ဆီးဟာ ဗုဒ္ဓဟူးနေ့တုန်းက လီယမ်ရိုဆင်နီယာကို ထုတ်ပယ်လိုက်ပြီးနောက် နည်းပြသစ် စတင်ရှာဖွေနေပါတယ်။
ရိုဆင်နီယာဟာ ပရီးမီးယားလိဂ် ၅ ပွဲဆက် ဂိုးမသွင်းနိုင်ဘဲ ရှုံးနိမ့်ပြီးနောက် ၁၀၆ ရက်တည်းသာ ကိုင်တွယ်ရပြီးနောက် ချဲလ်ဆီးနည်းပြရာထူးမှ ထုတ်ပယ်ခြင်းခံခဲ့ရပါတယ်။
ချဲလ်ဆီးဟာ ရာသီအကုန်အထိ ကိုင်တွယ်ရန် ယာယီနည်းပြအဖြစ် ကာလမ်မက်ဖာလိန်းအား ခန့်အပ်ထားပါတယ်။ မက်ဖာလိန်းဟာ တနင်္ဂနွေနေ့တွင် ဝင်ဘာလေကွင်းတွင် လိဒ်နှင့် ရင်ဆိုင်ရမယ့် အက်ဖ်အေဖလားဆီမီးဖိုင်နယ်ပွဲစဉ်အား စတင် ကိုင်တွယ်လာပါမယ်။
ဖာဘရီဂက်စ်ဟာ နည်းပြဘဝ ပထမဆုံးကိုင်တွယ်တဲ့ စီးရီးအေကလပ် ကိုမိုတွင် အထင်ကြီးစရာကောင်းအောင် လုပ်ပြထားပြီး အသင်းဟောင်းချဲလ်ဆီးနှင့် အာဆင်နယ်နည်းပြရာထူးအတွက် ရေပန်းစားနေပါတယ်။
အသက် ၃၈ နှစ်ရှိ ဖာဘရီဂက်စ်ဟာ ၂၀၁၄ ခုနှစ်မှ ၂၀၁၈ ခုနှစ်အတွင်း ချဲလ်ဆီးတွင် ကစားစဉ်အတွင်း ပရီးမီးယားလိဂ်ဖလား ၂ ကြိမ်၊ အက်ဖ်အေဖလား ၁ ကြိမ်၊ ယူရိုပါလိဂ်ဖလား ၁ ကြိမ်၊ လိဂ်ဖလား ၁ ကြိမ် ဆွတ်ခူးထားနိုင်ပါတယ်။
ဒါပေမယ့် ဖာဘရီဂက်စ်ဟာ ကိုမိုရဲ့ လက်ကျန် စီးရီးအေ ၅ ပွဲအပေါ်တွင်သာ အာရုံစိုက်နေပါတယ်။ ကိုမိုဟာ ဥရောပဝင်ခွင့် တိုက်ပွဲဝင်နေပြီး တနင်္ဂနွေနေ့တွင် ဂျီနိုအာနှင့် ရင်ဆိုင်ကစားရပါမယ်။
ကိုမိုဥက္ကဌမာဝန်ဆူဝါဆိုက လွတ်လပ်စွာ ဆုံးဖြတ်နိုင်ကြောင်း ပြောဆိုခဲ့မှုအပေါ် ဖာဘရီဂက်စ်က "ဒါနဲ့ပတ်သက်ပြီး ဘာမှ ပြောစရာ မရှိပါဘူး။ အခုအချိန်မှာ ဒါကို‌ တွေးနေရင် မိုက်မဲရာ ကျပါမယ်။ ကျွန်တော်ကတော့ လာမယ့် ဂျီနိုအာပွဲကိုပဲ အာရုံစိုက်နေတယ်။ ကိုမိုမှာ နည်းပြချုပ်အဖြစ် ကျွန်တော့်စာမျက်နှာဆက်ရေးမယ်လို့ ယုံကြည်တယ်။ လာမယ့်ပွဲတွေအပေါ်မှာပဲ အာရုံစိုက်တယ်။ လာမယ့် ၅ ပွဲနဲ့ ကလပ်သမိုင်းမှာ ပထမဆုံးဥရောပဝင်ခွင့်ရရေးကို ကျော်ပြီး အခြားအရာတွေကို စဉ်းစားနေရင် မိုက်မဲရာ ကျပါလိမ့်မယ်။ ကျွန်တော့်ဥက္ကဌက ကျွန်တော့်ကို အရမ်းတန်ဖိုးထားတဲ့အကြောင်းလွဲရင် ကျန်တဲ့ပြောစကားကို မကြားမိသလို မြင်လည်း မမြင်ပါဘူး"လို့ ပြောကြားသွားပါတယ်။
မကြာသေးမီတုန်းက အင်တာဗျူးတစ်ခုတွင် ကိုမိုဥက္ကဌက ဖာဘရီဂက်စ်အနေဖြင့် ပျော်ရွှင်မယ်ဆိုပါက လွတ်လပ်စွာ ထွက်ခွာသွားနိုင်ကြောင်း ပြောဆိုခဲ့ဖူးပါတယ်။

ပင်နယ်တီသုံးလုံးကာကွယ်ကာ တူရကီတွင် ဆုဖလားဖြင့် အဆုံးသတ်နိုင်မယ့် အခွင့်အရေး ရရှိနေတဲ့ ယူနိုက်တက်ဂိုးသမားအိုနာနာ
====================

အင်ဒရေအိုနာနာဟာ ပင်နယ်တီအဆုံးအဖြတ်တွင် ပင်နယ်တီ ၃ ကြိမ်ကာကွယ်ပြီး ထရက်ဇွန်စပေါ်ကို တူရကီဖလားဆီမီးဖိုင်နယ်သို့ ပို့ဆောင်လာပြီး ယူနိုက်တက်သို့ ပြန်ချိန်တွင် ဆုဖလားတစ်လုံးဖြင့် ပြန်နိုင်မယ့် အခွင့်အရေး ပိုင်ဆိုင်လာပါတယ်။
အင်တာမီလန်မှာတုန်းက ပင်နယ်တီသူရဲကောင်းဖြစ်ခဲ့တဲ့ အိုနာနာဟာ ယူနိုက်တက်မှာ ကစားစဉ်တုန်းကလည်း ကိုပင်ဟေဂင်နှင့် ချန်ပီယံလိဂ်တွင် အရေးပါတဲ့ ပင်နယ်တီ ၂ ကြိမ် ကာကွယ်ဖူးသလို ဆောက်သမ်တန်နှင့် ပရီးမီးယားလိဂ်ပွဲမှာလည်း ပင်နယ်တီ ကာကွယ်ဖူးပါတယ်။
ကင်မရွန်းလက်ရွေးစင်ဟာ ထရက်ဇွန်စပေါ်သို့ အငှားဖြင့် မပြောင်းမီ ယူနိုက်တက်အတွက် နောက်ဆုံးကစားတဲ့ ဩဂုတ်လတုန်းက ဂရမ်စဘီအား ရှုံးနိမ့်တဲ့ ခါရာဘောင်ဖလားပွဲမှာလည်း ပင်နယ်တီ တစ်ကြိမ် ကာကွယ်ခဲ့ပါသေးတယ်။
အိုနာနာဟာ ကြာသပတေးနေ့ညတုန်းက ဆမ်ဆန်းစပေါ်နှင့် ပွဲမှာတော့ ပွဲချိန် မိနစ် ၁၂၀ အတွင်း ဂိုးမရှိသရေကျပြီးနောက် ပင်နယ်တီ အဆုံးအဖြတ်ကန်ချိန်မှာတော့ ပင်နယ်တီ ၃ ကြိမ်အထိ ကာကွယ်ကာ ထရက်ဇွန်စပေါ်ကို တူရကီဖလားဆီမီးဖိုင်နယ်သို့အထိ ပို့ဆောင်လာပါတယ်။
ထရက်ဇွန်စပေါ်ဟာ မေလ ၁၃ ရက်နေ့မှာ တူရကီဖလားဆီမီးဖိုင်နယ်အဖြစ် ဂျန်ဂလာဘာလီဂီနှင့် ကစားရမှာ ဖြစ်ပြီး ဗိုလ်လုပွဲသို့ တက်ရောက်နိုင်မယ်ဆိုရင် ဘီဆစ်တပ် (သို့မဟုတ်) ကွန်ယာစပေါ်နှင့် ရင်ဆိုင်ကစားရပါမယ်။
ထရက်ဇွန်စပေါ်ဟာ ယူနိုက်တက်မှ အငှားဖြင့် လာကစားနေတဲ့ အိုနာနာကို အသင်းတွင် ဆက်ထိန်းထားလိုနေပေမယ့် ပြောင်းရွှေ့ကြေး ပေါင်သန်း ၃၀ တောင်းဆိုမှုကြောင့် အခက်တွေ့နေပါတယ်။
တဖက်တွင် အိုနာနာကို ဘီဆစ်တပ်၊ မိုနာကိုအပြင် ဆော်ဒီကလပ်တွေကလည်း ခေါ်ယူရန် စိတ်ဝင်စားနေပါတယ်။
အိုနာနာဘက်က အိုးထရက်ဖို့ဒ်တွင် ဆက်ကစားလိုနေသေးပေမယ့်လည်း ယူနိုက်တက်ကတော့ နွေရာသီမှာ ရောင်းချရန် ကြိုးပမ်းလာပါမယ်။
သူဟာ ယူနိုက်တက်နှင့် ၂ နှစ်စာချုပ်ကျန်နေသေးပြီး တစ်ပတ်လုပ်ခ ပေါင် ၁၂၀၀၀၀ ရရှိနေပါတယ်။
အသက် ၃၀ နှစ်ရှိ ဂိုးသမားဟာ ယူနိုက်တက်သို့ ပြန်လာပါက နံပါတ်တစ်ဂိုးသမားနေရာအတွက် ဆန်နီလမ်မန်နှင့် ယှဉ်ပြိုင်ရပါမယ်။
ဒါပေမယ့် ယူနိုက်တက်ဘက်က အိုနာနာကို အသင်းတွင် ဆက်ထားရန် ဆန္ဒမရှိဘဲ ရောင်းချလိုနေပါတယ်။

YouTube ဗီဒီယိုဟောင်းများကို ပြသကာ စပါးစ်စတားများရဲ့တန်းမဆင်းရရေး တိုက်ပွဲအတွက် စိတ်ဓာတ်မြှင့်တင်ပေးမှု ပြုလုပ်လာတဲ့ ရောဘတ်တိုဒီဇာဘီ
=====================

ရောဘတ်တိုဒီဇာဘီဟာ စပါးစ်စတားများရဲ့ YouTube ဗီဒီယိုဟောင်းများကို ပြသကာ တန်းမဆင်းရရေး တိုက်ပွဲအတွက် စိတ်ဓာတ်မြှင့်တင်ပေးမှု ပြုလုပ်လာပါတယ်။
အီတလီလူမျိုးနည်းပြဟာ ဒီဇင်ဘာလနှောင်းပိုင်းကတည်းက ပရီးမီးယားလိဂ်တွင် နိုင်ပွဲပျောက်ဆုံးကာ စိတ်ဓာတ်ပိုင်း အဆုံးစွန်အထိ ရောက်နေကာ တန်းဆင်းရမယ့် အခြေအနေကြုံနေရတဲ့ စပါးစ်ကစားသမားများကို စိတ်ဓာတ်မြှင့်တင်ရေး ကြိုးပမ်းလာတာလည်း ဖြစ်ပါတယ်။
ရောဘတ်တိုဒီဇာဘီဟာ ယနေ့ညတွင် တန်းဆင်းထားရပြီးဖြစ်တဲ့ ဝုဗ်နှင့်ပွဲမတိုင်မီ စပါးစ်စတားများရဲ့ ယခင်တုန်းက အကောင်းဆုံးခြေစွမ်းဖြင့် ကစားခဲ့တဲ့ YouTube ဗီဒီယိုဟောင်းများကို ပြသကာ စိတ်ဓာတ်မြှင့်တင်လာတာပါ။
ဘရိုက်တန်နှင့် မာဆေးနည်းပြဟောင်းက "အပြုသဘောဆောင်နေဖို့ လိုတယ်။ အရင်ကောင်းခဲ့တာတွေကို အမှတ်ရပြီး အပြုသဘောဆောင်နေဖို့ လိုတယ်။ ကျွန်တော့်စကားလုံးတွေက မလုံလောက်ပါဘူး။ ကစားသမားတွေရဲ့ အကောင်းဆုံးပုံစံ ထွက်ပေါ်လာဖို့ အကောင်းဆုံးအဖြေရှာရမယ်။ တခါတလေ ဗီဒီယိုတစ်ပုဒ်နဲ့ ဖြစ်သွားတယ်။ တခါတလေ စကားလုံးတွေနဲ့ အဖြေတွေ့သွားတယ်။ တခါတလေ ဝိုင် သို့မဟုတ် ဘီယာတစ်ခွက်နဲ့ အဖြေရသွားတယ်။ တခါတလေ ဗီဒီယိုတွေကို ဆန်းစစ်ပြီး တွေ့တယ်။ တခါတလေ အခြားကလပ်တွေမှာ သူတို့ လုပ်ပြခဲ့တာတွေနဲ့ အဖြေရှာတွေ့တယ်။ ရန်ဒယ်ကိုလိုမူအာနီကို ညာတောင်ပံမှာ သုံးတယ်ဆိုရင် သူက အရင်တုန်းက ဒီနေရာမှာ ကစားခဲ့ဖူးလို့ပါ။ YouTube ကို သွားပြီး 'ကိုလိုမူအာနီ ဖရန့်ဖတ်'လို့ ရိုက်ရှာကြည့်လိုက်ပါ။ ဒီနေရာမှာ သူ ကောင်းကောင်းကစားတာ တွေ့ရပါလိမ့်မယ်။ ဒီနေရာကနေ ဂိုးတွေလည်း အများကြီး သွင်းခဲ့တယ်။ ကျွန်တော်က ရုံးခန်းထဲမှာ အလုပ်လုပ်မနေဘူးဆိုရင်တောင် ကစားသမားတွေရဲ့ အချက်အလက် တခုခုကို ရှာဖွေနေဖို့က အရေးကြီးတယ်။ ဘာကြောင့်လဲဆိုတော့ ကျွန်တော်တို့မှာ အချိန်မရှိဘူး၊ စဉ်းစားလို့ ရသမျှ အားလုံးကို လုပ်ရမယ်"လို့ ပြောကြားသွားပါတယ်။
အမှတ်ပေးဇယားအဆင့် ၁၈ နေရာမှာ ရပ်တည်နေတဲ့ စပါးစ်ဟာ ရာသီသိမ်းရန် ၅ ပွဲတည်းသာလိုတော့တဲ့အချိန်တွင် တန်းဆင်းဇုန်ပြင်ပမှ ဝက်စ်ဟမ်းနှင့် ၂ မှတ်တည်းသာ ကွာဟနေပါတယ်။
တဖက်တွင် ဘယ်နောက်ခံလူဒိုင်နက်စ်တီအူဒိုဂီနှင့် ဂိုးသမားဗီကာရီယိုတို့မှာ ဒဏ်ရာပြဿနာကြောင့် ယနေ့ည Molineux ပွဲစဉ်ကို လွဲချော်လာကြပါမယ်။
ဒါ့အပြင် ဒူးဒဏ်ရာကြောင့် ၈ လကြာ အနားယူခဲ့ရပြီးနောက် ဘရိုက်တန်နှင့် သရေကျတဲ့ပွဲတွင် လူစာရင်းတွင် ပါဝင်ခဲ့တဲ့ ဂျိမ်းစ်မက်ဒီဆင်မှာလည်း ဝုဗ်နှင့်ပွဲစဉ်တွင်လည်း ပါဝင်ကစားလာနိုင်ဦးမှာ မဟုတ်သေးပါဘူး။

ဖောရက်စ်အား ဂိုးပြတ်ရှုံးနိမ့်တဲ့ပွဲတွင် ပထမပိုင်းအပြီးမှပင် ကွင်းထဲမှ ထပြန်လာကြတဲ့ ဆန်းဒါးလန်းပရိသတ်များ
=====================

ဆန်းဒါးလန်းပရိသတ်များဟာ သောကြာနေ့ညတုန်းက အလင်းရောင်ကွင်းတွင် နော်တင်ဟမ်ဖောရက်စ်အား ၅-၀ ဂိုးဖြင့် ရှုံးနိမ့်တဲ့ပွဲတွင် ပထမပိုင်းအပြီးမှာပင် ကွင်းမှ ထပြန်သွားခဲ့ကြပါတယ်။
နော်တင်ဟမ်ဖောရက်စ်ဟာ အဝေးကွင်းတွင် အိမ်ရှင်ဆန်းဒါးလန်းကို ပထမပိုင်းမှာပင် ၄-၀ ဂိုးဖြင့် ဦးဆောင်ထားနိုင်ခဲ့တာ ဖြစ်ပြီး ဆန်းဒါးလန်းပရိသတ်များဟာ မျှော်လင့်ချက် မရှိတော့တာကြောင့် ပထမပိုင်းအပြီးမှာပင် အလင်းရောင်ကွင်းမှ ထပြန်သွားခဲ့ကြတာလည်း ဖြစ်ပါတယ်။
ဖောရက်စ်ဟာ ပထမပိုင်းတွင် ဟူမီရဲ့ OG ဂိုး၊ ခရစ်ဝုဒ်၊ မော်ဂန်ဂစ်ဘ်ဝှိုက်၊ အိုင်ဂေါ်ဂျေဆူးတို့ရဲ့ ဂိုးတွေဖြင့် ၄-၀ ဂိုးဖြင့် ဦးဆောင်ထားနိုင်ခဲ့တာပါ။
ဖောရက်စ်ဟာ အချိန်ပိုတွင် အီးလီးယော့အင်ဒါဆင်ရဲ့ ဂိုးကြောင့် ၅-၀ ဖြင့် အနိုင်ရသွားခဲ့ပါတယ်။
ဖောရက်စ်ဟာ ဆန်းဒါးလန်းနိုင်ပွဲကြောင့် တန်းဆင်းဇုန်ထိပ်ဆုံးမှ စပါးစ်ကို ရမှတ် ၈ မှတ်အထိ ဖြတ်ထားနိုင်ခဲ့ပြီး တန်းမဆင်းရရေး အခြေအနေကောင်းသွားခဲပြီလည်း ဖြစ်ပါတယ်။
ဖောရက်စ်ဟာ ဆန်းဒါးလန်းနိုင်ပွဲကြောင့် ပြိုင်ပွဲအရပ်ရပ် နောက်ဆုံး ၈ ပွဲဆက် ရှုံးပွဲမရှိထားသလို ပရီးမီးယားလိဂ်မှာ ရမှတ် ၃၉ မှတ်အထိ ရလာသလို ယူရိုပါလိဂ်တွင်လည်း ဆီမီးဖိုင်နယ်သို့အထိ တက်ရောက်ထားနိုင်ပါတယ်။

ဆန်းဒါးလန်းကို ငါးဂိုးပြတ်အနိုင်ယူကာ တန်းဆင်းဇုန်နှင့် ၈ မှတ်အကွာသို့ ရောက်လာကာ တန်းမဆင်းရရေး အခြေအနေကောင်းလာတဲ့ ဖောရက်စ်
======================

ဗစ်တာပီရီရာရဲ့ နော်တင်ဟမ်ဖောရက်စ်ဟာ သောကြာနေ့ညတုန်းက အလင်းရောင်ကွင်းမှာ အိမ်ရှင်ဆန်းဒါးလန်းကို ၅ ဂိုးပြတ်အနိုင်ယူပြီးနောက် တန်းဆင်းဇုန်နှင့် ရမှတ် ၈ မှတ်အကွာသို့ ရောက်လာခဲ့ပြီ ဖြစ်ပါတယ်။
နော်တင်ဟမ်ဖောရက်စ်ရဲ့ တန်းဆင်းဇုန်နှင့် ရမှတ် ၈ မှတ်အကွာသို့ ရောက်လာမှုနှင့်အတူ တန်းဆင်းဇုန် ထိပ်ဆုံးမှ စပါးစ်တို့ တန်းမဆင်းရရေးအတွက် အပြင်းအထန် တိုက်ပွဲဝင်လာရတော့မှာလည်း ဖြစ်ပါတယ်။
နော်တင်ဟမ်ဖောရက်စ်ဟာ ကောင်းမွန်လှတဲ့ အဆုံးသတ်ပိုင်းတွေကြောင့် ဆန်းဒါးလန်းကို ပထမပိုင်းမှာတင် ၄-၀ ဖြင့် အနိုင်ယူထားခဲ့တာ ဖြစ်ပြီး ယခုနိုင်ပွဲကြောင့် ရောဘတ်တိုဒီဇာဘီအနေဖြင့် စပါးစ်ကို ပရီးမီးယားလိဂ်တွင် တင်ကျန်ရေး အစွမ်းကုန် တိုက်ပွဲဝင်ရမယ့်အနေအထားသို့ ရောက်လာပါတယ်။
ဒီဇင်ဘာလကတည်းက နိုင်ပွဲပျောက်ဆုံးလာခဲ့တဲ့ စပါးစ်ဟာ တန်းမဆင်းရရေးအတွက် လန်ဒန်မြို့ခံပြိုင်ဘက် ဝက်စ်ဟမ်းနှင့် အပြိုင်ကြဲလာရတော့မှာလည်း ဖြစ်ပါတယ်။
အဆင့် ၁၈ နေရာက စပါးစ်ဟာ ယနေ့ညမှာ ပရီးမီးယားလိဂ်မှ တန်းဆင်းထားရပြီး ဖြစ်တဲ့ ဝုဗ်ကို Molineux သို့ သွားရောက် ရင်ဆိုင်ရပါမယ်။
တဖက်တွင် နော်တင်ဟမ်ဖောရက်စ်ကတော့ ယခု ဆန်းဒါးလန်းနိုင်ပွဲကြောင့် ပြိုင်ပွဲအရပ်ရပ် နောက်ဆုံး ၈ ပွဲဆက် ရှုံးပွဲမရှိ မှတ်တမ်း ပိုင်ဆိုင်လာပြီး ပရီးမီးယားလိဂ်မှာ ရမှတ် ၃၉ မှတ်အထိ ရရှိလာပါတယ်။
ပုံမှန်အားဖြင့် ပရီးမီးယားလိဂ်တွင် ရမှတ် ၄၀ ရရှိလျှင် တန်းမဆင်းရဖို့ သေချာနေလေ့ ရှိတာကြောင့် ဖောရက်စ်တို့ ပရီးမီးယားလိဂ်မှာ တင်ကျန်လာတော့မယ်လို့ ယုံကြည်ရပါတယ်။
ပွဲအပြီးတွင် ဖောရက်စ်နည်းပြပီရီရာက "အရမ်းကောင်းတဲ့ ခြေစွမ်းပါ။ ကျွန်တော့်အသင်းကို ချန်ပီယံလိဂ်အဆင့်မျိုးနဲ့ ကစားဖို့ ပြောခဲ့တယ်။ ဒီနိုင်ပွဲနဲ့ ထိုက်တန်ပါတယ်။ ကျွန်တော်တို့ နည်းဗျူဟာပိုင်းရော စိတ်ဓာတ်ပိုင်းရော အမြင့်ဆုံးအနေအထားသို့ ရောက်နေတယ်။ ဒါပေမယ့် ကျွန်တော်တို့ အမှတ်တွေ ပိုရဖို့ လိုသေးတယ်။ ကျွန်တော်တို့ရဲ့ ဒီစိတ်ဓာတ်ကို ဆက်ထိန်းထားရမယ်"လို့ ပြောကြားသွားပါတယ်။
ဒါ့အပြင် ပီရီရာက စနေနေ့ညတွင် ကစားရမယ့် စပါးစ်၊ ဝက်စ်ဟမ်းပွဲများကို ကြည့်နေမှာ မဟုတ်ကြောင်းလည်း ဆိုသွားပါတယ်။
၎င်းက "ကိုယ့်အသင်းပွဲတွေကို ကြည့်နေတာနဲ့ကို အချိန်မလောက်ဘူး။ ဘီယာတစ်ခွက်လောက် သောက်ချင် သောက်နေလိမ့်မယ်။ အခြားပွဲတွေကိုတော့ ကြည့်နေမှာ မဟုတ်ဘူး"လို့ ပြောကြားသွားပါတယ်။
လက်ရှိအချိန်တွင် အမှတ်ပေးဇယားအောက်ဆုံးမှ ဘန်လေနှင့် ဝုဗ်တို့မှာ ပရီးမီးယားလိဂ်မှ တန်းဆင်းသွားရပြီဖြစ်ပြီး ကျန် တစ်နေရာအတွက် ဝက်စ်ဟမ်းနှင့် စပါးစ်တို့ တိုက်ပွဲဝင်လာရတော့မှာလည်း ဖြစ်ပါတယ်။
ယခုပွဲတွင် ဖောရက်စ်အတွက် အနိုင်ဂိုးတွေကို ဟူမီ(OG)၊ ခရစ်ဝုဒ်၊ မော်ဂန်ဂစ်ဘ်ဝှိုက်၊ အိုင်ဂေါ်ဂျေဆူး၊ အင်ဒါဆင်တို့က သွင်းယူခဲ့ကြပါတယ်။
မော်ဂန်ဂစ်ဘ်ဝှိုက်ဟာ ပြီးခဲ့တဲ့အပတ် ဘန်လေနှင့်ပွဲတွင် ဟက်ထရစ်သွင်းယူခဲ့ပြီးနောက် ယခုပွဲတွင်လည်း ထိပ်တန်းခြေစွမ်းဖြင့် ဆက်လက် ကစားသွားခဲ့ပါတယ်။

ရီးရဲလ်မက်ဒရစ်ရဲ့ လာလီဂါဖလားမျှော်လင့်ချက်ကို အဆုံးသတ်လာတဲ့ အမေ့ခံ အာဆင်နယ်စတားဟောင်း
=====================

ရီးရဲလ်မက်ဒရစ်ဟာ သောကြာနေ့ညတုန်းက ဘက်တစ်နှင့်ပွဲတွင် နာကျင်အချိန်ပိုမှာ ချေပဂိုးပေးခဲ့ရပြီး ၁ ဂိုးစီသရေကျပြီးနောက် လာလီဂါဖလားမျှော်လင့်ချက် အဆုံးသတ်သွားခဲ့ပြီ ဖြစ်ပါတယ်။
ရီးရဲလ်မက်ဒရစ်ဟာ ဘက်တစ်နှင့် သရေကျမှုကြောင့် ထိပ်ဆုံးမှ ဘာစီလိုနာနှင့် ရမှတ် ၈ မှတ်သာ ကွာဟလာပါတယ်။ ဒါပေမယ့် ဘာစီလိုနာဟာ တစ်ပွဲလျှော့ကစားထားမှုနှင့်အတူ ယနေ့ည ဂီတာဖေးနှင့်ပွဲစဉ်တွင် အနိုင်ရရှိလာပါက ၅ ပွဲတည်းသာ ကစားရန် ကျန်တော့တဲ့အချိန်တွင် ရီးရဲလ်မက်ဒရစ်ကို ရမှတ် ၁၁ မှတ်အထိ ဖြတ်ထားလာနိုင်မှာလည်း ဖြစ်ပါတယ်။
ယခုပွဲစဉ်မှာ ရီးရဲလ်မက်ဒရစ်ဟာ ဗီနီရှပ်စ်ဂျူနီယာရဲ့ ဗယ်ဗာဒီရဲ့ ကန်ချက်ကို ဂိုးသမားပုတ်ထုတ်လိုက်မှုကနေ အံကျလာတဲ့ ဘောလုံးကို ပိတ်သွင်းပြီး ဦးဆောင်ဂိုးရခဲ့ပါတယ်။
အခုပွဲမှာ ဘက်တစ်တို့ အခွင့်အရေး ပိုမို ရရှိခဲ့ပြီး သီဘောက်ကော့တွိုက်စ် ဒဏ်ရာရရှိနေလို့ ပွဲထွက်ကစားသမားအဖြစ် ကစားလာတဲ့ လူနန်ရဲ့ ကမ္ဘာ့အဆင့်လက်စွမ်းပြကာကွယ်မှု ၂ ကြိမ်ကြောင့် ချေပဂိုးစောစောစီးစီး မပေးခဲ့ရတာပါ။
အခုပွဲမှာ လီဗာပူးစတားဟောင်းထရန်းအလက်ဇန္ဒားအာနိုးရဲ့ လှပတဲ့ ဖန်တီးမှုကနေ ကိုင်လီယန်ဘက်ပေး ဂိုးသွင်းခဲ့ပေမယ့်လည်း အနည်းငယ် လူကျွံနေလို့ ဂိုးမရရှိခဲ့ပါဘူး။
ဒါပေမယ့် ပွဲပြီးခါနီးမှာတော့ မန်နူရယ်ပယ်လီဂရီနီဦးဆောင်တဲ့ ဘက်တစ်ဟာ ချေပဂိုးရရှိရေး တိုက်စစ်ဖွင့်ကစားခဲ့ပြီး အချိန်ပို ၉၃ မိနစ်မှာတော့ အာဆင်နယ်စတားဟောင်းဟတ်တာဘယ်လီရန်က ပြန်အံထွက်လာတဲ့ ဘောလုံးကို သွေးအေးအေးဖြင့် ပိတ်သွင်းကာ အဖိုးတန်တစ်မှတ်ရရှိစေမယ့် ဂိုးအား သွင်းယူခဲ့ပါတယ်။
ယခုရလဒ်ကြောင့် ရီးရဲလ်မက်ဒရစ်ဟာ ပြိုင်ပွဲအရပ်ရပ် နောက်ဆုံး ၆ ပွဲမှာ ၅ ပွဲမြောက် နိုင်ပွဲ ပျောက်ခဲ့ရပါတယ်။
ဘက်တစ်ကတော့ ယခုရလဒ်ကြောင့် အဆင့် ၅ နေရာမှာပဲ ဆက်လက်ရပ်တည်နေရဆဲ ဖြစ်ပြီး အဆင့် ၄ နေရာမှ အက်သလက်တီကိုနှင့် ရမှတ် ၇ မှတ်အထိ ကွာဟနေတုန်း ဖြစ်ပါတယ်။

ဆီးကျိတ်ကင်ဆာရောဂါ ခံစားခဲ့ရကြောင်း ဘရိုက်တန်နှင့် နယူးကာဆယ်နည်းပြဟောင်းခရစ်ဟွတ်တန် ဖွင့်ဟလာ
================

ဘရိုက်တန်နှင့် နယူးကာဆယ်နည်းပြဟောင်းခရစ်ဟွတ်တန်က ပြီးခဲ့တဲ့နှစ် ဧပြီလတုန်းက ဆီးကျိတ်ကင်ဆာဖြစ်ပွားကာ ဆေးကုသမှုခံယူခဲ့ရကြောင်း ဖွင့်ဟလာပါတယ်။
ဟွတ်တန်ဟာ ကင်ဆာရောဂါအစောပိုင်းအဆင့်တွင် စစ်ဆေးတွေ့ရှိခဲ့တာ ဖြစ်ပြီး မေလတုန်းက အောင်မြင်စွာ ခွဲစိတ်ကုသမှု ပြုလုပ်နိုင်ခဲ့ပါတယ်။
အသက် ၆၇ နှစ်ရှိ နည်းပြက "ဒီသတင်းကြောင့် လုံးဝကို မတုန်လှုပ်ခဲ့ဘူး။ လူတိုင်းက ကွဲပြားတယ်ဆိုတာ သိပါတယ်။ ဒါပေမယ့် ကျုပ်က လုံးဝ ကျန်းမာနေတာ။ ဒါက ကျုပ်ကို သတ်လာမှာ မဟုတ်ဘူးဆိုတာ တွေးလိုက်မိတယ်။ လုပ်စရာ ရှိတာ လုပ်ဖို့ပဲ တွေးတယ်"လို့ ပြောကြားသွားပါတယ်။
ကစားသမားဘဝတုန်းက နောက်တန်းအစွန်လူအဖြစ် ကစားခဲ့တဲ့ ဟွတ်တန်ဟာ စပါးစ်အတွက် ၃၉၈ ပွဲကစားခဲ့ကာ ၁၉၈၀ ခုနှစ်များတုန်းက ယူအီးအက်ဖ်အေဖလား ၁ လုံး၊ အက်ဖ်အေဖလား ၂ လုံး ဆွတ်ခူးနိုင်ခဲ့ပါတယ်။
အိုင်ယာလန်အတွက် ၅၃ ပွဲကစားခဲ့တဲ့ ဟွတ်တန်ဟာ ဝက်စ်ဘရွန်း၊ ဘရိုက်တန်တို့တွင် ကစားကာ ကစားသမားဘဝမှ အနားယူခဲ့ပါတယ်။
သူဟာ နည်းပြလောကသို့ ဝင်ရောက်ပြီးနောက် နယူးကာဆယ်နှင့် ဘရိုက်တန်တို့ကို ပရီးမီးယားလိဂ်သို့ တန်းတက်နိုင်အောင် စွမ်းဆောင်နိုင်ခဲ့သလို ဘာမင်ဂမ်၊ နော့ဝှစ်ချ်၊ နော်တင်ဟမ်ဖောရက်စ်တို့ကိုလည်း ကိုင်တွယ်ခဲ့ကာ နောက်ဆုံးအသင်းအဖြစ် ဂါနာအသင်းကို ကိုင်တွယ်ခဲ့ပါတယ်။
ဆက်လက်ပြီး ၎င်းက "အကြံကောင်းဉာဏ်ကောင်းတွေ ရခဲ့တယ်။ ဆေးကုသလို့ ရတဲ့ နည်းလမ်းအားလုံးကို ပြောပြကြတယ်။ ဆီးကျိတ်ကို ဖယ်ရှားဖို့ ဆုံးဖြတ်ခဲ့တယ်။ ကောင်းကောင်းမွန်မွန်လည်း ပြန်ကောင်းလာတယ်။ အခု ခွဲစိတ်ကုသလာတာ တစ်နှစ်ရှိပြီ။ ကျန်းမာရေးကောင်းတယ်။ အားလုံးအဆင်ပြေတယ်။ စွမ်းအင်တွေအများကြီးရှိပါတယ်"လို့ ပြောကြားသွားပါတယ်။
ဆီးကျိတ်ကင်ဆာမှာ အသက် ၅၀ နှစ်အထက် အမျိုးသားများတွင် အဖြစ်များလေ့ရှိတဲ့ ကင်ဆာရောဂါဖြစ်ပြီး အစောပိုင်းတွင် လက္ခဏာမပြဘဲ တဖြည်းဖြည်း ကြီးထွားလာတဲ့ ကင်ဆာဖြစ်ပါတယ်။
ဆီးကျိတ်ကင်ဆာဖြစ်နေကြောင်းကို ပြသတဲ့ လက္ခဏာများမှာ ဆီးသွားရခက်ခြင်း၊ ဆီးနှင့် သုတ်တွင် သွေးပါခြင်း၊ ကျောအောက်ပိုင်း/တင်ပုဆုံနာကျင်ခြင်း၊ လိင်ထောင်မတ်ရန် ခက်ခဲခြင်းတို့ ပြတတ်ပါတယ်။
ယင်းကင်ဆာမှာ အသက် ၅၀ နှစ်နောက်ပိုင်းတွင် စတင်ဖြစ်ပွားပြီး ပုံမှန်အားဖြင့် အသက် ၆၇ နှစ်အရွယ်တွင်မှ လက္ခဏာပြတတ်ပါတယ်။ ဒါ့အပြင် မိသားစုအတွင်း ယင်းရောဂါဖြစ်ပွားဖူးသူ ရှိပါက ဖြစ်ပွားနိုင်ခြေများတတ်ပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - ဧပြီ ၂၈ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၆၇၂ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၇,၁၀၀,၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၆၀၀,၀၀၀ ကျပ်
ဝယ်ဈေး ၁၀,၅၆၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၁၀,၂၀၀,၀၀၀ ကျပ်
ဝယ်ဈေး ၁၀,၁၆၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၄၈၀,၀၀၀ ကျပ်
ဝယ်ဈေး ၁၀,၄၄၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၁၀,၀၈၀,၀၀၀ ကျပ်
ဝယ်ဈေး ၁၀,၀၄၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၃၂၀ ကျပ်
ဝယ်ဈေး - ၄၂၁၀ ကျပ်
-စင်္ကာပူဒေါ်လာ
ရောင်းဈေး - ၃၃၅၀ ကျပ်
ဝယ်ဈေး - ၃၂၅၀ ကျပ်
-ယူရို
ရောင်းဈေး - ၅၈၅၀ ကျပ်
ဝယ်ဈေး - ၅၇၀၀ ကျပ်
-ထိုင်းဘတ်
ရောင်းဈေး - ၁၃၄.၂၃ ကျပ်
ဝယ်ဈေး - ၁၃၀.၇၂ ကျပ်
-မလေးရှားရင်းဂစ်
ရောင်းဈေး - ၁၁၀၀ ကျပ်
ဝယ်ဈေး - ၁၀၇၀ ကျပ်
-တရုတ်ယွမ်
ရောင်းဈေး - ၆၃၇ ကျပ်
ဝယ်ဈေး - ၆၂၀ ကျပ်
-ဂျပန်ယန်း
ရောင်းဈေး - ၂၇.၂၉ ကျပ်
ဝယ်ဈေး - ၂၆.၅၈ ကျပ်
-အိန္ဒိယရူပီး
ရောင်းဈေး - ၄၆.၂ ကျပ်
ဝယ်ဈေး - ၄၄.၉၉ ကျပ်
-ကိုရီးယားဝမ်
ရောင်းဈေး - ၂.၉၅ ကျပ်
ဝယ်ဈေး - ၂.၈၇ ကျပ်
-စတာလင်ပေါင်
ရောင်းဈေး - ၅၈၅၀ ကျပ်
ဝယ်ဈေး - ၅၇၀၀ ကျပ်
-ဩစတြေးလျဒေါ်လာ
ရောင်းဈေး - ၃၀၈၅ ကျပ်
ဝယ်ဈေး - ၃၀၀၅ ကျပ်
-ကနေဒါဒေါ်လာ
ရောင်းဈေး - ၃၁၈၅ ကျပ်
ဝယ်ဈေး - ၃၁၀၀ ကျပ်
-ဟောင်ကောင်ဒေါ်လာ
ရောင်းဈေး - ၅၅၄ ကျပ်
ဝယ်ဈေး - ၅၃၉ ကျပ်
-ယူအေအီး
ရောင်းဈေး - ၁၁၈၄ ကျပ်
ဝယ်ဈေး - ၁၁၅၃ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ