ဂါဘရီရယ် ရက်သတ္တပတ်အတန်ကြာ နားရမည်ဟု အာတီတာ အတည်ပြုလာ
===================

အာဆင်နယ်ဗဟိုနောက်ခံလူဂါဘရီရယ်မှာ ဘရာဇီးအသင်းအတွက် ကစားစဉ် ရရှိခဲ့တဲ့ ပေါင်ကြွက်သားဒဏ်ရာကြောင့် ရက်သတ္တပတ်အတန်ကြာ အနားယူရမည်ဖြစ်ကြောင်း အာဆင်နယ်နည်းပြအာတီတာက အတည်ပြုလာပါတယ်။
ဗဟိုနောက်ခံလူဟာ ပြီးခဲ့တဲ့အပတ်တုန်းက အမ်းမရိတ်ကွင်းတွင် ဆီနီဂေါအား အနိုင်ရတဲ့ပွဲတွင် ထော့နင်းထော့နင်းဖြင့် ကွင်းအတွင်းမှ ထွက်ခွာခဲ့ရပြီး သုံးရက်အကြာတွင် ကစားတဲ့ တူနီးရှားနှင့်ပွဲကို လွဲချော်ခဲ့ပါတယ်။
အသက် ၂၇ နှစ်ရှိ ဂါဘရီရယ်ဟာ ယခုရာသီတွင် ပရီးမီးယားလိဂ်တွင် ၅ ဂိုးတည်းသာ ပေးထားရတဲ့ အာဆင်နယ်ခံစစ်တွင် အရေးပါတဲ့ အခန်းကဏ္ဍက ပါဝင်သလို ၂ ဂိုးသွင်းထားပြီး အလွတ်တည်ကန်ဘောမှ တဆင့် ခြိမ်းခြောက်ထားနိုင်သူလည်း ဖြစ်ပါတယ်။
အာတီတာက "ဂါဘီက ရက်သတ္တပတ်တွေ နားရမယ်"လို့ ဆိုသွားပါတယ်။ ဂါဘရီရယ်ဟာ လာမယ့် ဗုဒ္ဓဟူးနေ့တွင် နောက်ထပ် ဆေးစစ်ဆေးမှု ထပ်မံ ပြုလုပ်ရမှာ ဖြစ်ပြီး ယင်းအချိန်တွင်မှ မည်မျှ နားရမယ်ဆိုတာ သိရပါမယ်။
အာတီတာဟာ တနင်္ဂနွေနေ့တွင် မြောက်လန်ဒန်ပြိုင်ဘက် စပါးစ်နှင့် ရင်ဆိုင်ကစားရမယ့်ပွဲတွင် ပီရိုဟင်ကာပီနှင့် ခရစ္စတီယန်မော့စ်ကွီရာတို့ကို အားကိုးလာရပါမယ်။
ဆက်လက်ပြီး အာတီတာက "သူက ကျွန်တော်တို့ နောက်တန်းမှာ ခေါင်းဆောင်ဆိုတော့ ကြီးမားတဲ့ ထိုးနှက်ချက်ပါ။ ဒါက ဘာမှ မပြုသဘောမဆောင်ပါဘူး။ ကောင်းတာက ကျွန်တော်တို့မှာ အခြားရွေးချယ်စရာကောင်းတွေလည်း ရှိနေတာပါ။ အခု လူတွေ မတ်တပ်ရပ်ရမယ်။ ပြီးရင် ဒီအလုပ်ကို လုပ်ရမယ်"လို့ ပြောကြားသွားပါတယ်။
ဂါဘရီရယ်ဟာ ၂၀၂၀ ခုနှစ်တွင် လိုင်လီမှ ပေါင် ၂၃.၁ သန်းဖြင့် ပြောင်းလာသူ ဖြစ်ပြီး ယခုရာသီ အာဆင်နယ်ရဲ့ ပရီးမီးယားလိဂ်ပွဲ ၁၁ ပွဲလုံး ပွဲထွက်ကစားထားပါတယ်။
ဒါ့အပြင် အီတလီနောက်ခံလူကာလာဖီအိုရီမှာလည်း တင်ပုံဆုံဒဏ်ရာကြောင့် အီတလီအသင်းမှ နုတ်ထွက်လိုက်ရပြီးနောက် လေ့ကျင့်ခန်းဆင်းနိုင်ခြင်း မရှိမှုနှင့်အတူ စပါးစ်နှင့်ပွဲတွင် ပါဝင်ရန် မရေမရာ ဖြစ်နေပါတယ်။
ဆွီဒင်တိုက်စစ်မှူးဗစ်တာယိုကီရေးစ်မှာလည်း ဒဏ်ရာကြောင့် အနားယူနေရဆဲ ဖြစ်တာကြောင့် စပါးစ်နှင့်ပွဲကို လွဲလာပါမယ်။

ရာဖင်ညာနှင့် ဂါစီယာတို့မှာ ဘာစီလိုနာအတွက် ပွဲထွက်ကစားရန် အသင့် ဖြစ်နေပြီလို့ ဟန်ဆီဖလစ် အတည်ပြုလာ
====================

ဘာစီလိုနာနည်းပြဟန်ဆီဖလစ်က ရာဖင်ညာနှင့် ဂိုးသမားဂျိုအန်ဂါစီယာတို့မှာ အသင်းအတွက် ပွဲထွက်ကစားရန် အသင့် ဖြစ်နေပြီ ဖြစ်ကြောင်း အတည်ပြုလာပါတယ်။
ဘာစီလိုနာဟာ မားကပ်စ်ရက်ဖို့ဒ်မှာ နေမကောင်းဖြစ်နေတဲ့အပြင် ဖရန်ကီဒီယွန်ပွဲပယ်ခံထားရမှုကြောင့် အခက်တွေ့နေချိန်တွင် ရာဖင်ညာနှင့် ဂါစီယာတို့ ပြန်လည် ကစားရန် အသင့် ဖြစ်နေတာလည်း ဖြစ်ပါတယ်။ တဖက်တွင် ကွင်းလယ်ကစားသမားပီဒရီမှာလည်း ကြံ့ခိုင်မှုအခြေအနေကို အနီးကပ် စောင့်ကြည့်ခြင်းခံနေရပါတယ်။
စနေနေ့ညတွင် ဘာစီလိုနာဟာ နူးကမ့်ကွင်းသစ်ကြီးတွင် ပထမဆုံးကစားတဲ့ပွဲအဖြစ် ဘီလ်ဘာအိုနှင့်ပွဲအား လက်ခံကစားလာမှာလည်း ဖြစ်ပါတယ်။
ဟန်ဆီဖလစ်က "မားကပ်စ်က ဖျားနေတယ်။ မနေ့ကရော ဒီနေ့ရော လေ့ကျင့်ခန်းမဆင်းနိုင်ဘူး။ ဒီပွဲ ပါဝင်ဖို့ မဖြစ်နိုင်လောက်ဘူးထင်တယ်။ ဒါပေမယ့် သတင်းကောင်းက ရာဖင်ညာ ပြန်လာတာပါ။ သူ့ အသင်းအတွက် ယူဆောင်လာမယ့်အရာအတွက် တကယ်ဝမ်းသာတယ်။ အရန်ခုံမှာ ထိုင်လာပါမယ်။ အရေးအကြီးဆုံးက သူ ပြန်လာတာပါ"လို့ ပြောကြားသွားပါတယ်။
အဓိကဂိုးသမားဂါစီယာမှာလည်း ဒူးအရွတ်ဒဏ်ရာကြောင့် စက်တင်ဘာလကတည်းက အနားယူလာရသူ ဖြစ်ပြီး ယခုအခါ ပွဲထွက်ကစားရန် အသင့် ဖြစ်နေပြီ ဖြစ်ပါတယ်။
ဟန်ဆီဖလစ်ဟာ ကြံ့ခိုင်မှုအခြေအနေကို စောင့်ကြည့်နေရတဲ့ ပီဒရိုကိုမူ အနားပေးကာ လာမယ့်အပတ်ကြားရက် ချဲလ်ဆီးနှင့်ပွဲတွင်မှ အသုံးပြုလာဖို့ ရှိနေပါတယ်။

အာဖရိကဖလားပြိုင်ပွဲအတွက် ကစားသမား ၃ ဦးအား နောက်ကျစေလွှတ်ရေးယူနိုက်တက် ကြိုးပမ်းမည်
==================

ယူနိုက်တက်ဟာ ဘရိုင်ယန်အမ်ဘူမို၊ အာမက်ဒီရယ်လို၊ နူဆာမာ့ဇ်ရာဝီတို့အား အာဖရိကဖလားပြိုင်ပွဲအတွက် နောက်ကျပြီးမှ စေလွှတ်နိုင်ရေး ကြိုးပမ်းလာပါမယ်။
နိုင်ငံတကာပြိုင်ပွဲစည်းမျဉ်းအရ ယူနိုက်တက်ဟာ ကင်မရွန်း၊ အိုင်ဗရီကို့စ်နှင့် မော်ရိုကိုတို့ရဲ့ ပထမဆုံးအာဖရိကဖလားပြိုင်ပွဲမတိုင်မီ နှစ်ပတ်အလိုတွင် ကစားသမား ၃ ဦးတို့အား စေလွှတ်ရပါမယ်။
ဒါကြောင့်လည်း ယူနိုက်တက်ဟာ ဒီဇင်ဘာလ ၈ ရက်နေ့ Molineux တွင် ဝုဗ်နှင့် ရင်ဆိုင်ကစားရမယ့် ပရီးမီးယားလိဂ်ပွဲဝန်းကျင်အတွင်း ယင်းကစားသမား ၃ ဦးကို သက်ဆိုင်နိုင်ငံအသင်းများသို့ စေလွှတ်ရပါမယ်။
အိုင်ဗရီကို့စ်တောင်ပံကစားသမားအာမက်ဒီရယ်လိုနှင့် ကင်မရွန်းတိုက်စစ်သမားဘရိုင်ယန်အမ်ဘူမိုတို့ဟာ ဒီဇင်ဘာလ ၂၄ ရက်နေ့တွင် ပထမဆုံးပွဲ ကစားရပါမယ်။
အာဖရိကဖလားဗိုလ်လုပွဲကို ဇန်နဝါရီလ ၁၈ ရက်နေ့တွင် ကစားမည်ဖြစ်ရာ ၎င်းတို့ဟာ ပရီးမီးယားလိဂ်ပွဲ ၈ ပွဲအပြင် အက်ဖ်အေဖလားတတိယအဆင့်ပွဲစဉ်ကိုပါ လွဲချော်နိုင်တဲ့အနေအထားမှာ ရှိပါတယ်။
ဒါပေမယ့် ယူနိုက်တက်ဟာ အသင်းရဲ့ ဦးစားပေးကစားသမားများဖြစ်ကြတဲ့ အာမက်ဒီရယ်လို၊ ဘရိုင်ယန်အမ်ဘူမိုအပြင် ယခုအခါ ကြံ့ခိုင်မှုပြန်လည်ပြည့်ဝကာ ခံစစ်နေရာအများစုတွင် ကစားနိုင်တဲ့ မာ့ဇ်ရာဝီတို့အား ဒီဇင်ဘာလ ၁၅ ရက်နေ့ ဘုန်းမောက်နှင့်ပွဲစဉ်အပြီးတွင်မှ စေလွှတ်နိုင်ရေး သက်ဆိုင်ရာ ဘောလုံးအဖွဲ့ချုပ်နှင့် ဆွေးနွေးညှိနှိုင်းမှုများပြုလုပ်သွားပါမယ်။
တကယ်လို့ ယင်းပွဲအပြီးတွင်မှ စေလွှတ်နိုင်မည်ဆိုပါက ကစားသမား ၃ ဦးတို့မှာ ဒီဇင်ဘာလ ၂၁ ရက်နေ့ ဗီလာနှင့်ပွဲစဉ်မှ စတင် လွဲချော်ပါမယ်။
ယူနိုက်တက်ဟာ လွန်ခဲ့တဲ့ နှစ်နှစ်တုန်းက အာဖရိကဖလားပြိုင်ပွဲတွင် အင်ဒရေအိုနာနာအား ပထမဆုံးပွဲကစားမယ့် ရက်တွင်မှ အချိန်မီ စေလွှတ်ရေး ညှိနှိုင်းမှု ပြုလုပ်ရာ အောင်မြင်မှု ရရှိခဲ့ဖူးပါတယ်။ ဒါကြောင့်လည်း အိုနာနာဟာ နယူးပေါ့နှင့် ကစားရတဲ့ အက်ဖ်အေဖလားပွဲတစ်ပွဲတည်းကိုသာ လွဲခဲ့ပါတယ်။
ယခုအခါ ရူဘင်အမိုရမ်က "ကစားသမားတွေကို စေလွှတ်ရမယ့် အချိန်က ပြဌာန်းထားပြီးသားပါ။ ဒါပေမယ့် ကျွန်တော်တို့ ကစားသမားတွေကို နောက်ကျပြီးမှ စေလွှတ်နိုင်ဖို့ ကြိုးစားသွားမယ်။ ဒါက ကျွန်တော်တို့ ဆုံးဖြတ်ချက်အပေါ် မမူတည်ပါဘူး။ ဘာဖြစ်လာမလဲ ကြည့်ရမယ်။ ဘောလုံးအဖွဲ့ချုပ်တွေနဲ့ တခုခု စီစဉ်နိုင်ဖို့ ကြိုးစားသွားမယ်"လို့ ပြောကြားသွားပါတယ်။
ဒါ့အပြင် ပေါ်တူဂီလူမျိုးနည်းပြက နိုဝင်ဘာလ ၈ ရက်နေ့ စပါးစ်နှင့်ပွဲတွင် ဒူးဒဏ်ရာရရှိခဲ့တဲ့ တိုက်စစ်မှူးဘင်ဂျာမင်ဆက်စ်ကိုမှာ ယင်းကာလဝန်းကျင်တွင်ပင် အသင်းအတွက် ပြန်ကစားလာနိုင်ဖို့ ရှိကြောင်း ဆိုသွားပါတယ်။
တကယ်လို့များ ဆက်စ်ကိုသာ မကစားနိုင်ပါက ဘရိုင်ယန်အမ်ဘူမို၊ အာမက်တို့ကိုလည်း ဆုံးရှုံးထားရတဲ့ ယူနိုက်တက်ဟာ ဂျိုရှာဇတ်ဇီး၊ ကိုဘီမိုင်နူးတို့ကို အားကိုး အသုံးပြုလာရပါမယ်။

ဟာကီမီအား ကြမ်းတမ်းစွာ ဖျက်ထုတ်မှုအတွက် ၃ ပွဲပယ်ခံလာရတဲ့ ဘိုင်ယန်စတားဒီယာ့ဇ်
===================

ဘိုင်ယန်မြူးနစ်တိုက်စစ်သမားလူးဝစ်ဒီယာ့ဇ်ဟာ ပီအက်စ်ဂျီနှင့်ပွဲစဉ်မှ အနီကတ်ကြောင့် ၃ ပွဲပယ်ခံလာရပြီးနောက် လာမယ့်အပတ် အာဆင်နယ်နှင့် ချန်ပီယံလိဂ်ပွဲစဉ်မှ စတင် ပွဲပယ်ပြစ်ဒဏ်ကျခံလာရပါမယ်။
ဒီယာ့ဇ်ဟာ နိုဝင်ဘာလ ၄ ရက်နေ့တုန်းက ပီအက်စ်ဂျီအား ၂-၁ ဖြင့် အနိုင်ရတဲ့ ချန်ပီယံလိဂ်ပွဲစဉ်တွင် ၂ ဂိုးလုံးကို သွင်းခဲ့ပေမယ့် ပထမပိုင်းပြီးခါနီးတွင် အာခရစ်ဖ်ဟာကီမီအား အလွန်အန္တရာယ်များတဲ့ ဖျက်ထုတ်မှု ပြုလုပ်မှုကြောင့် တိုက်ရိုက်အနီကတ်ပြ ထုတ်ပယ်ခြင်းခံခဲ့ရပါတယ်။
မော်ရိုကိုလက်ရွေးစင်ဟာကီမီဟာ ယင်းဆိုးရွားတဲ့ ဖျက်ထုတ်မှုကြောင့် ခြေကျင်းဝတ်ဒဏ်ရာပြင်းထန်စွာ ရရှိခဲ့ပြီး ယင်းကတည်းက ကစားနိုင်ခဲ့ခြင်း မရှိပါဘူး။
ယခုအခါ ယူအီးအက်ဖ်အေက ယင်းဖျက်ထုတ်မှုအား ဆိုးရွားတဲ့ ဖျက်ထုတ်မှုလို့ ယုံကြည်ကာ ဒီယာ့ဇ်အား ၃ ပွဲပယ်ပြစ်ဒဏ်ချမှတ်လာပြီ ဖြစ်ပါတယ်။
သူဟာ နိုဝင်ဘာလ ၂၆ ရက်နေ့ အာဆင်နယ်နှင့်ကစားရမယ့်ပွဲစဉ်အား စတင်လွဲချော်လာမှာ ဖြစ်ပြီး ဒီဇင်ဘာလ ၉ ရက်၊ ဇန်နဝါရီလ ၂၁ ရက်နေ့တို့တွင် စပို့တင်းလစ္စဘွန်း၊ ယူနီယံစိန့်ဂယ်လွိုက်စ်တို့အား ဧည့်ခံကစားရမယ့်ပွဲများကိုလည်း လွဲချော်လာပါမယ်။
ဘိုင်ယန်မြူးနစ်ဟာ ချန်ပီယံလိဂ် ၄ ပွဲ ကစားထားရာတွင် ၄ ပွဲလုံး အနိုင်ရထားပြီး ဂိုးကွာခြားချက်ဖြင့် အာဆင်နယ်၊ အင်တာမီလန်တို့အား ကျော်ဖြတ်ကာ အမှတ်ပေးဇယားကို ဦးဆောင်ထားနိုင်ပါတယ်။
ဒီယာ့ဇ်ဟာ နွေရာသီတွင် လီဗာပူးမှ ပြောင်းလာပြီးနောက် ဘိုင်ယန်မြူးနစ်ရဲ့ ချန်ပီယံလိဂ် ၄ ပွဲတွင် ၃ ဂိုးသွင်းထားသလို ဘွန်ဒက်စ်လီဂါ ၁၀ ပွဲတွင်လည်း ၆ ဂိုးသွင်းထားပါတယ်။

ပွဲမတိုင်မီ လက်ဆွဲနှုတ်ဆက်မှုတွင် မြောက်ကိုရီးယားကစားသမားအချို့ လက်သီးဖြင့် ထိုးလာမှုအပေါ် ဂျပန်ဘောလုံးအဖွဲ့ချုပ်တိုင်ကြားလာ
======================

မြောက်ကိုရီးယားကစားသမားများဟာ ပွဲမတိုင်မီ ပြိုင်ဘက်ကစားသမားများနှင့် လက်ဆွဲနှုတ်ဆက်တဲ့ အစီအစဉ်တွင် လက်သီးဖြင့် အားရပါးရထိုးမှု ပြုလုပ်ခဲ့ကြပါတယ်။
ယခုအခါ ဂျပန်ဘောလုံးအဖွဲ့ချုပ်ဟာ ယူ-၁၇ ကမ္ဘာ့ဖလားပွဲ မတိုင်မီ ဖြစ်ပျက်ခဲ့တဲ့ ယင်းအဖြစ်အပျက်နှင့်ပတ်သက်ပြီး ဖီဖာအား အရေးယူပေးရန် တိုင်ကြားမှု ပြုလုပ်လာပြီလည်း ဖြစ်ပါတယ်။
ဂျပန်နှင့် မြောက်ကိုရီးယားတို့ဟာ အင်္ဂါနေ့တုန်းက ကာတာတွင် ကျင်းပနေတဲ့ ယူ-၁၇ ကမ္ဘာ့ဖလားပြိုင်ပွဲရဲ့ ၁၆ သင်း ရှုံးထွက်အဆင့်တွင် ထိပ်တိုက်တွေ့ခဲ့တာလည်း ဖြစ်ပါတယ်။
ပွဲမတိုင်မီ အစဉ်အလာမပျက် နှစ်ဖက်ကစားသမားများ လက်ဆွဲနှုတ်ဆက်တဲ့ အစီအစဉ်တွင် တချို့ မြောက်ကိုရီးယားကစားသမားများဟာ ပြိုင်ဘက် ဂျပန်ကစားသမားများရဲ့ လက်ကို လက်သီးဖြင့် ထိုးလာကြတာပါ။
ဂျပန်လူငယ်ကစားသမားတို့က အစဉ်အလာမပျက် လက်သီးခြင်းထိ (သို့မဟုတ်) လက်ဆွဲနှုတ်ဆက်လာချိန်တွင် ဖြစ်ပျက်ခဲ့တာပါ။
အစပိုင်းတွင် ခင်ခင်မင်မင်ဖြင့် လက်သီးဖြင့် ထိခဲ့ကြပေမယ့်လည်း နောက်ပိုင်းတွင် မြောက်ကိုရီးယားကစားသမားအချို့ဟာ ဒေါသဖြင့် အားရပါးရ လက်သီးဖြင့် ထိုးလာကြတာ တွေ့ရပါတယ်။
ယင်းအဖြစ်အပျက်အား ကွင်းတွင်း ဒိုင်လူကြီးက တစုံတရာ အရေးယူခဲ့ခြင်း မရှိပါဘူး။
ဒါပေမယ့် ယခုအခါမှာတော့ ဂျပန်ဘောလုံးအဖွဲ့ချုပ်က ယင်းအဖြစ်အပျက်အား စုံစမ်းစစ်ဆေးပြီး အရေးယူပေးရန် ဖီဖာထံ တောင်းဆိုလာပြီ ဖြစ်ပါတယ်။
အဆိုပါပွဲစဉ်တွင် ဂျပန်တို့ အနိုင်ရရှိပြီး ယူ-၁၇ ကမ္ဘာ့ဖလားကွာတားဖိုင်နယ်သို့ တက်ရောက်သွားပြီ ဖြစ်ပါတယ်။
ယင်းပွဲတွင် ပွဲအစ ၄ မိနစ်မှာ ဂျီလာနီမက်ဂီးက ဂျပန်အတွက် ဦးဆောင်ဂိုး သွင်းခဲ့ပြီး ဒုတိယပိုင်းတွင် ရီဟိုက်ဂွမ်က မြောက်ကိုရီးယားအတွက် ချေပဂိုးသွင်းခဲ့ပါတယ်။
ပွဲချိန်အတွင်း သရေကျပြီးနောက် ပင်နယ်တီ အဆုံးအဖြတ်ကန်ရာတွင် ဂျပန်က ၅-၄ ဖြင့် အနိုင်ရရှိသွားပါတယ်။

ဖရိုင်းဘတ်၊ အာဆင်နယ်ပွဲမတိုင်မီ နူအာနှင့် ဂနာဘရီတို့ရဲ့ အခြေအနေကို ဘိုင်ယန်နည်းပြကွန်ပနီ ဖွင့်ဟလာ
=====================

ဘိုင်ယန်မြူးနစ်နည်းပြဗင်းဆင့်ကွန်ပနီက မန်နူရယ်နူအာမှာ နေမကောင်းဖြစ်ပြီး ဆာဂျီဂနာဘရီမှာ ကြံ့ခိုင်မှုပြဿနာကြုံနေရကြောင်း ဖွင့်ဟလာပါတယ်။
ဘိုင်ယန်မြူးနစ်ဟာ ယနေ့ညတွင် ဖရိုင်းဘတ်နှင့် ရင်ဆိုင်ရပြီးပါက လာမယ့်အပတ်ကြားရက်တွင် အာဆင်နယ်နှင့် ချန်ပီယံလိဂ်ပွဲကစားရန် ရှိနေပါတယ်။
ယင်းကစားသမား ၂ ဦးလုံးတို့ဟာ ဖရိုင်းဘတ်၊ အာဆင်နယ်တို့နှင့်ပွဲများတွင် ပါဝင်ရန် မရေမရာ ဖြစ်နေတာလည်း ဖြစ်ပါတယ်။
ဂနာဘရီမှာ ဂျာမနီအသင်းအတွက် ကစားစဉ် ဒဏ်ရာရရှိလာတာ ဖြစ်ပြီး အခြေအနေ တိုးတက်ခြင်း မရှိမှုနှင့်အတူ ဖရိုင်းဘတ်နှင့်ပွဲအား လွဲချော်ရန် သေချာသလောက် ရှိနေပါတယ်။ ဒါပေမယ့် သူဟာ အာဆင်နယ်နှင့်ပွဲတွင် ပါဝင်လာနိုင်တဲ့ အခြေအနေမျိုးမှာတော့ ရှိပါတယ်။
ကွန်ပနီက "မန်နူရယ် အခြေအနေ ကြည့်ရဦးမယ်။ နည်းနည်း အအေးမိသွားခဲ့တာ။ ဆာဂျီဂနာဘရီ အခြေအနေကတော့ မကောင်းဘူး။ လက်ရွေးစင်အသင်းက ပြန်လည်ကတည်းက ပြဿနာအချို့ ရှိနေတယ်။ ဆေးဌာနကတော့ အသေးစိတ် သိရဖို့ လုပ်နေတယ်"လို့ ပြောကြားသွားပါတယ်။
ယင်းကဲ့သို့ အဓိကကစားသမား ၂ ဦး ပြဿနာကြုံနေချိန်တွင် ဘိုင်ယန်မြူးနစ်ဟာ ပီအက်စ်ဂျီနှင့်ပွဲမှာ အနီကတ်ကြောင့် လူးဝစ်ဒီယာ့ဇ်ကိုလည်း ၃ ပွဲ လက်လွှတ်ရတော့မှာ ဖြစ်ပါတယ်။
ဒီယာ့ဇ်ဟာ နိုဝင်ဘာလ အစောပိုင်းတုန်းက ပီအက်စ်ဂျီအား အနိုင်ရတဲ့ပွဲတွင် ဟာကီမီအား ဆိုးရွားတဲ့ ဖျက်ထုတ်မှု ပြုလုပ်မှုကြောင့် တိုက်ရိုက်အနီကတ်ပြသခြင်းခံခဲ့ရပြီး ၃ ပွဲပယ်ပြစ်ဒဏ်ချမှတ်ခံထားရပါတယ်။
သူဟာ လာမယ့် ကြားရက် အာဆင်နယ်အား အဝေးကွင်းသို့ သွားရောက် ကစားရမယ့်ပွဲအပြင် စပို့တင်းလစ္စဘွန်း၊ ယူနီယံဂယ်လွိုက်စ်တို့အား ဧည့်ခံကစားရမယ့် ချန်ပီယံလိဂ်ပွဲစဉ်များကိုလည်း လွဲချော်လာပါမယ်။

အာဂျင်တီးနားထိပ်တန်းကလပ် ၂ ခုကို ကိုင်တွယ်ပြီး နည်းပြလောကသို့ ဝင်ရောက်လိုကြောင်း ဒီမာရီယာ ဖွင့်ဟလာ
=====================

အိန်ဂျယ်ဒီမာရီယာက အာဂျင်တီးနားထိပ်တန်းကလပ် ၂ ခုကို ကိုင်တွယ်ကာ နည်းပြလောကသို့ ဝင်ရောက်လိုကြောင်း ဖွင့်ဟပြောကြားလာပါတယ်။
အသက် ၃၇ နှစ်ရှိ ဒီမာရီယာဟာ ရီးရဲလ်မက်ဒရစ်၊ ယူနိုက်တက်၊ ပီအက်စ်ဂျီနှင့် ဘင်ဖီကာတို့တွင် ကစားခဲ့သူ ဖြစ်ပြီး လက်ရှိအချိန်တွင် ကစားသမားဘဝ စတင်ရာ ရိုဆာရီယိုစင်ထရယ်တွင် ကစားနေပါတယ်။
သူဟာ ကစားသမားဘဝမှ အနားယူပြီးပါက နည်းပြလောကသို့ ဝင်ရောက်ရန် စိတ်အားထက်သန်နေသူလည်း ဖြစ်ပါတယ်။
ဒီမာရီယာက "လီယန်ဒရိုပါရီဒက်စ်နဲ့အတူ နည်းပြသင်ခန်းစာယူနေတယ်။ လိုင်စင်ရဖို့ ကြိုးစားနေတယ်"လို့ ပြောကြားနေပါတယ်။
ပါရီဒက်စ်မှာ ဘိုကာဂျူနီယာတွင် ကစားနေတဲ့ ကွင်းလယ်ခံစစ်သမားတစ်ဦးဖြစ်ပြီး ပီအက်စ်ဂျီတွင် ဒီမာရီယာနှင့် ၄ နှစ်တိုင်တိုင် တွဲကစားခဲ့သူလည်း ဖြစ်ပါတယ်။
၎င်းတို့နှစ်ဦးဟာ အာဂျင်တီးနားအသင်း ၂၀၂၂ ကမ္ဘာ့ဖလားချန်ပီယံအသင်းတွင် အဓိကနေရာမှ ပါဝင်ခဲ့ကြသူများ ဖြစ်ပါတယ်။
ဆက်လက်ပြီး ဒီမာရီယာက "ကျွန်တော်တို့အသင်းတွေက သေတဲ့အထိ ၄-၃-၃ နဲ့ ကစားလာမယ်။ ဒါနဲ့ပတ်သက်ပြီး လီယန်ဒရိုနဲ့ ကျွန်တော် စကားပြောပြီးပြီ။ အနားယူပြီးတဲ့အခါ ရိုဆာရီယို၊ ဘိုကာဂျူနီယာတို့ကို ကိုင်တွယ်ချင်တယ်"လို ပြောကြားသွားပါတယ်။
တကယ်လို့များ ဒီမာရီယာသာ နည်းပြလောကသို့ ဝင်ရောက်လာပါက ယူနိုက်တက်ကစားဖော်များဖြစ်ကြတဲ့ ဝိန်းရွန်းနီ၊ မိုက်ကယ်ကာရစ်၊ တွမ်ကလီဗာလေး၊ ရော်ဘင်ဗန်ပါစီတို့ရဲ့ ခြေရာကို နင်းလာနိုင်ပါမယ်။
ဒီမာရီယာဟာ ကစားသမားဘဝအတွင်းတွင် ထိပ်တန်းနည်းပြများဖြစ်ကြတဲ့ ကာလိုအန်ဆယ်လော့တီ၊ ဟိုဆေးမော်ရင်ဟို၊ သောမတ်စ်တူချယ်တို့ရဲ့ လက်အောက်တွင် ကစားခဲ့သူလည်း ဖြစ်ပါတယ်။

အာဖရိကအမျိုးသမီးချန်ပီယံလိဂ်ဖလားအား ၂ ကြိမ်မြောက် ဆွတ်ခူးလာတဲ့ AS FAR
==================

AS FAR ဟာ ASEC Mimosas ကို အာဖရိကအမျိုးသမီးချန်ပီယံလိဂ်ဗိုလ်လုပွဲမှာ ၂-၁ ဖြင့် အနိုင်ယူပြီး ဒုတိယမြောက် အာဖရိကအမျိုးသီးချန်ပီယံလိဂ်ဖလားအား ဆွတ်ခူးလာပါတယ်။
ဟာနာနီအိတ်အယ်ဟာက မော်ရိုကိုကလပ်အတွက် ၁၃ မိနစ်မှာ ပင်နယ်တီကနေ တဆင့် ဦးဆောင်ဂိုး သွင်းခဲ့ပါတယ်။
ဒါပေမယ့် ဒုတိယပိုင်းဆယ်မိနစ်တွင် အေမီပရက်စ်စယ်ဒီရယ်လိုရဲ့ ခေါင်းတိုက်ဂိုးကနေ အိုင်ဗရီကို့စ်ကလပ် ASEC Mimosas အတွက် ချေပဂိုးသွင်းလာပါတယ်။
ဒါပေမယ့် ပွဲပြီးခါနီး ၈၅ မိနစ်မှာ AS FAR တို့ ပင်နယ်တီ ထပ်မံ ရရှိခဲ့ပြီး ဇီနက်ဘ်ရီဒူအာနီက အပိုင်ကန်သွင်းကာ အနိုင်ဂိုးသွင်းယူခဲ့ပါတယ်။
AS FAR ဟာ ၂၀၂၂ ခုနှစ်တုန်းက အာဖရိကအမျိုးသမီးချန်ပီယံလိဂ်ဖလားအား ပထမဆုံးအကြိမ် ဆွတ်ခူးပြီးနောက် ဒုတိယအကြိမ် ဆွတ်ခူးလာတာ ဖြစ်ပြီး တောင်အာဖရိကကလပ် Mamelodi Sundowns နှင့်အတူ အာဖရိကအမျိုးသမီးချန်ပီယံလိဂ်ဖလား အအောင်မြင်ဆုံးအသင်းအဖြစ် ပူးတွဲ ရပ်တည်လာပါတယ်။
ရက်ဘက်အခြေစိုက်ကလပ်ဟာ ဒီဇင်ဘာလ ၁၄ ရက်နေ့မှာ လာမယ့်နှစ် ဖီဖာအမျိုးသမီးချန်ပီယံများဖလားဝင်ခွင့်အတွက် တရုတ်ကလပ် Wuhan Jiangd နှင့် ကစားရပါမယ်။၊
ယင်းပွဲမှ အနိုင်ရတဲ့အသင်းက လာမယ့်နှစ် လန်ဒန်တွင် ကျင်းပမယ့် ဖီဖာအမျိုးသမီးချန်ပီယံများဖလား ဆီမီးဖိုင်နယ်အဖြစ် ဥရောပချန်ပီယံ အာဆင်နယ်နှင့် ရင်ဆိုင်ကစားရပါမယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
(နိုဝင်ဘာ - ၂၂ ရက်၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၀၆၆ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၅၉၇၀၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၆၆၀၀၀၀ ကျပ်
ဝယ်ဈေး ၈၆၂၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၂၆၀၀၀၀ ကျပ်
ဝယ်ဈေး ၈၂၂၀၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၅၄၀၀၀၀ ကျပ်
ဝယ်ဈေး ၈၅၀၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၁၄၀၀၀၀ ကျပ်
ဝယ်ဈေး ၈၁၀၀၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၄၅ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၀၄၅ ကျပ်
ဝယ်ဈေး - ၃၉၄၅ ကျပ်
-စင်္ကာပူဒေါ်လာ
ရောင်းဈေး - ၃၀၉၅ ကျပ်
ဝယ်ဈေး - ၃၀၂၀ ကျပ်
-ယူရို
ရောင်းဈေး - ၄၆၅၅ ကျပ်
ဝယ်ဈေး - ၄၅၄၀ ကျပ်
-ထိုင်းဘတ်
ရောင်းဈေး - ၁၂၅ ကျပ်
ဝယ်ဈေး - ၁၂၁.၉၅ ကျပ်
-မလေးရှားရင်းဂစ်
ရောင်းဈေး - ၉၇၄ ကျပ်
ဝယ်ဈေး - ၉၅၀ ကျပ်
-တရုတ်ယွမ်
ရောင်းဈေး - ၅၆၉ ကျပ်
ဝယ်ဈေး - ၅၅၅ ကျပ်
-ဂျပန်ယန်း
ရောင်းဈေး - ၂၅.၈၅ ကျပ်
ဝယ်ဈေး - ၂၅.၂၂ ကျပ်
-အိန္ဒိယရူပီး
ရောင်းဈေး - ၄၅.၁၃ ကျပ်
ဝယ်ဈေး - ၄၄.၀၂ ကျပ်
-ကိုရီးယားဝမ်
ရောင်းဈေး - ၂.၇၅ ကျပ်
ဝယ်ဈေး - ၂.၆၈ ကျပ်
-စတာလင်ပေါင်
ရောင်းဈေး - ၅၂၉၅ ကျပ်
ဝယ်ဈေး - ၅၁၆၅ ကျပ်
-ဩစတြေးလျဒေါ်လာ
ရောင်းဈေး - ၂၆၁၀ ကျပ်
ဝယ်ဈေး - ၂၅၄၅ ကျပ်
-ကနေဒါဒေါ်လာ
ရောင်းဈေး - ၂၈၆၇ ကျပ်
ဝယ်ဈေး - ၂၇၉၇ ကျပ်
-ဟောင်ကောင်ဒေါ်လာ
ရောင်းဈေး - ၅၁၉ ကျပ်
ဝယ်ဈေး - ၅၀၇ ကျပ်
-ယူအေအီး
ရောင်းဈေး - ၁၁၀၁ ကျပ်
ဝယ်ဈေး - ၁၀၇၄ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
****************************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ