ဗန်းမော်မှ ရန်ကုန်သို့ နေရပ်စွန့်ခွာလာသူများ ထောက်ပံ့ငွေ လျှောက်ထားနိုင်

ဗန်းမော်အသင်း (ရန်ကုန်) ၏ ထောက်ပံ့ငွေ တစ်ကြိမ်မျှ မရရှိသေးသည့် ဗန်းမော်ခရိုင်မှ ယာယီနေရပ်စွန့်ခွာ ပြည်သူများအား စတုတ္ထအသုတ်အဖြစ် ထောက်ပံ့ပေးနိုင်ရေးအတွက် လျှောက်ထားနိုင်ကြောင်း ဩဂုတ် ၂၆ ရက်တွင် အသိပေး ထုတ်ပြန်လိုက်သည်။
ထို့ကြောင့် အကြောင်းအမျိုးမျိုးကြောင့် ထောက်ပံ့ကြေး တစ်ကြိမ်မျှ မရရှိသေးသူများအနေဖြင့် သတ်မှတ်ထားသည့် အချက်အလက်များနှင့်အတူ လာရောက်လျှောက်ထားနိုင်ကြောင်း အသိပေးထားသည်။
တတိယအကြိမ် ထောက်ပံ့မှုတွင် အမည်စာရင်းပါဝင်ခဲ့သော်လည်း ထောက်ပံ့ကြေး ရယူရန် ကျန်ရှိခဲ့သူများလည်း ပြန်လည်လျှောက်ထားနိုင်ပြီး အသေးစိတ် အချက်အလက်များကို ဗန်းမော်အသင်း (ရန်ကုန်) ၏ လူမှုကွန်ရက် စာမျက်နှာတွင် ဖော်ပြထားသည်။
လျှောက်လွှာများကို ဩဂုတ် ၂၈ ရက်မှ စက်တင်ဘာ ၂ ရက်အထိ ဒဂုံမြို့နယ်၊ ရွှေတိဂုံဘုရား တောင်ဘက်မုခ် မီးပွိုင့်အနီး (Happy World ဝင်ပေါက်အနီးမှဝင်ရန်) ရှိ ကျောက်စိမ်းတွင်းဓမ္မာရုံ၌ လက်ခံဆောင်ရွက်ပေးသွားမည်ဖြစ်ကြောင်း သိရသည်။

ကျား-မ အခြေပြုအကြမ်းဖက်မှု ကာကွယ်စောင့်ရှောက်ရေးလုပ်ငန်းများအတွက် အမျိုးသမီးရေးရာဝန်ကြီးဌာနနှင့် UNOPS လက်မှတ်ရေးထိုး ပူးပေါင်းဆောင်ရွက်မည်

အမျိုးသမီးများအတွက် အသက်မွေးဝမ်းကျောင်း ထောက်ပံ့ရေးလုပ်ငန်းများနှင့် ကျား-မ အခြေပြုအကြမ်းဖက်မှု ကာကွယ်စောင့်ရှောက်ရေးလုပ်ငန်းများ အပါအဝင် ဖွံ့ဖြိုးတိုးတက်ရေးကဏ္ဍများတွင် အမျိုးသမီးရေးရာဝန်ကြီးဌာနနှင့် ကုလသမဂ္ဂ စီမံကိန်းဝန်ဆောင်မှုရုံး (UNOPS) တို့ လက်မှတ်ရေးထိုး ပူးပေါင်းဆောင်ရွက်သွားမည်ဖြစ်ကြောင်း သိရသည်။
အမျိုးသမီးရေးရာဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ဇင် နှင့် ကုလသမဂ္ဂ စီမံကိန်းဝန်ဆောင်မှုရုံး (United Nations Office for Project Services-UNOPS) ၏ မြန်မာနိုင်ငံဆိုင်ရာ ယာယီညွှန်ကြားရေးမှူး Mr. Peter John Cross ဦးဆောင်သည့် ကိုယ်စားလှယ်အဖွဲ့တို့ ယမန်နေ့က တွေ့ဆုံဆွေးနွေးစဉ် Mr. Peter John Cross က ထိုသို့ ထည့်သွင်းပြောကြားခဲ့ခြင်းဖြစ်သည်။
တွေ့ဆုံပွဲတွင် ပြည်ထောင်စုဝန်ကြီးက အမျိုးသမီးများ စွမ်းပကားမြှင့်တင်ရေး၊ အမျိုးသမီးများ ဖွံ့ဖြိုးတိုးတက်ရေး နိုင်ငံတော်အဆင့် မဟာဗျူဟာစီမံကိန်း (NSPAW) အကောင်အထည်ဖော်ရေးနှင့် အကြမ်းဖက်မှု တားဆီးကာကွယ်ရေး ဆောင်ရွက်နေမှုများကို ရှင်းလင်းဆွေးနွေးခဲ့သည်။
ထို့အပြင် ကျေးလက်နေ အမျိုးသမီးများနှင့် အမျိုးသမီးငယ်များ ဖွံ့ဖြိုးတိုးတက်ရေးကို ဦးစားပေး ဆောင်ရွက်နေမှုများအပြင် အာဆီယံအမျိုးသမီးရေးရာ ဝန်ကြီးများအဆင့် အစည်းအဝေး အလှည့်ကျဥက္ကဋ္ဌ၊ အာဆီယံအမျိုးသမီး ကော်မတီ၊ အာဆီယံအမျိုးသမီးနှင့် ကလေးသူငယ်များ အခွင့်အရေးမြှင့်တင်ရေးနှင့် ကာကွယ်စောင့်ရှောက်ရေး ကော်မရှင်တို့တွင် Focal Point အဖြစ် ဆောင်ရွက်နေမှုများကိုပါ အကျယ်တဝင့် ဆွေးနွေးခဲ့ကြောင်း သိရသည်။
ဆွေးနွေးပွဲအပြီးတွင် နှစ်ဘက်ကိုယ်စားလှယ်များသည် အမျိုးသမီးများ ဖွံ့ဖြိုးတိုးတက်ရေးနှင့် ကာကွယ်စောင့်ရှောက်ရေး ကဏ္ဍများ၌ ဆက်လက်ပူးပေါင်းဆောင်ရွက်သွားမည့် ကိစ္စရပ်များကို သဘောတူညီခဲ့ကြသည်။

အာဆီယံ၊ ကုလသမဂ္ဂနှင့် အပြည်ပြည်ဆိုင်ရာမူဘောင်များတွင် မြန်မာနိုင်ငံ အပြည့်အဝနှင့် တန်းတူအခွင့်အရေးရရှိရေးအတွက် ဗီယက်နမ်နိုင်ငံက ဆက်လက်ထောက်ခံအားပေးသွားမည်

အာဆီယံ၊ ကုလသမဂ္ဂနှင့် အခြား အပြည်ပြည်ဆိုင်ရာမူဘောင်များတွင် မြန်မာနိုင်ငံ အပြည့်အဝနှင့် တန်းတူအခွင့်အရေးရရှိရေးအတွက် ဗီယက်နမ်နိုင်ငံကဆက် လက်ထောက်ခံအားပေးသွားမည်ဟု ဗီယက်နမ်နိုင်ငံ နိုင်ငံခြားရေးဝန်ကြီး H.E. Mr. Le Hoai Trung က ပြောသည်။
နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးတင်မောင်ဆွေနှင့် ဗီယက်နမ်နိုင်ငံ နိုင်ငံခြားရေးဝန်ကြီး H.E. Mr. Le Hoai Trung တို့ဦးဆောင်၍ သြဂုတ် ၂၆ ရက်က နေပြည်တော်တွင်ပြုလုပ်သည့် မြန်မာ-ဗီယက် နမ်နှစ်နိုင်ငံပူးပေါင်းဆောင်ရွက်မှုပူးတွဲကော်မရှင်၏ (၁၀)ကြိမ်မြောက်အစည်းအဝေး၌ ပြောကြားခဲ့ခြင်းဖြစ်သည်။
မြန်မာနိုင်ငံ၌ ရွေးကောက်ပွဲအောင်မြင်စွာကျင်းပနိုင်ခဲ့မှုကိုဂုဏ်ပြုကာ ဗီယက်နမ်တွင်လည်း ဗီယက်နမ်ကွန်မြူနစ်ပါတီ၏ (၁၄)ကြိမ်မြောက် အမျိုးသားပါတီကွန်ဂ ရက်ကိုအောင်မြင်စွာကျင်းပနိုင်ခဲ့ပြီး နိုင်ငံရေး၊ စီးပွားရေးမဟာဗျူဟာများကို ချမှတ်ဆောင်ရွက်လျက်ရှိသည်ဟု ပြောသည်။
ထို့ကြောင့် ယခုအချိန်သည် နှစ်နိုင်ငံလုံးအတွက် ဆက်ဆံရေးနှင့် ပူးပေါင်းဆောင်ရွက်မှုမြှင့်တင်ရန် အချိန်အခါကောင်းဖြစ်၍ နှစ်နိုင်ငံကြား နှစ်နိုင်ငံဆက်ဆံရေး၊ ကုန်သွယ်ရေးနှင့် ရင်းနှီးမြှုပ်နှံမှု၊ ပြည်သူအချင်းချင်း ထိတွေ့ဆက်ဆံမှုနှင့် ဒေသတွင်းနှင့် နိုင်ငံတကာပူးပေါင်းဆောင်ရွက်မှုနယ်ပယ်များတွင် ပူးပေါင်းဆောင်ရွက်မှုများမြှင့်တင်သွားလိုသည်ဟု ပြောသည်။
ထို့ပြင် ဗီယက်နမ်နိုင်ငံက မြန်မာနိုင်ငံ၏ ငြိမ်းချမ်းရေး၊ တည်ငြိမ်ရေး၊ အမျိုးသားပြန်လည်သင့်မြတ်ရေးနှင့် လူမှု-ယဉ်ကျေးမှုဖွံ့ဖြိုးတိုးတက်မှုတို့အတွက် ကြိုးပမ်းမှုများကိုထောက်ခံပြီး နှစ်နိုင်ငံကြား အာဆီယံ၊ အက်ခ်မက်နှင့် စီအယ်လ်အမ်ဗွီတို့အပါအဝင် ဒေသတွင်းနှင့် နိုင်ငံတကာမျက်နှာစာတွင် နီးကပ်စွာပူးပေါင်းဆောင်ရွက်သွားမည်ဟုလည်း ပြောကြားခဲ့သည်။

မန်စီးတီးရဲ့မာမွတ်ရှ်ကို အငှားဖြင့် ခေါ်ယူရန် စပါးစ် သဘောတူညီမှုရရှိ
===================

စပါးစ်ဟာ မန်စီးတီးတိုက်စစ်ကစားသမားအိုမာမာမွတ်ရှ်ကို လာမယ့်နှစ် နွေရာသီတွင် ပေါင်သန်း ၆၀ ဖြင့် အပြီးသတ်ခေါ်ယူမယ့် အချက်ပါ အငှားစာချုပ်ဖြင့် ခေါ်ယူလာပါတယ်။
အသက် ၂၇ နှစ်ရှိ အီဂျစ်လက်ရွေးစင်ဟာ အင်္ဂါနေ့တုန်းက စပါးစ်သို့ မန်စီးတီးကစားဖော်ဆာဗင်ဟို ပေါင် ၇၅ သန်းဖြင့် ပြောင်းလာပြီးနောက် မြောက်လန်ဒန်သို့ လိုက်ပါ ကစားလာမှာလည်း ဖြစ်ပါတယ်။
မာမွတ်ရှ်ဟာ ပြီးခဲ့တဲ့နှစ်ဇန်နဝါရီလတုန်းက ဖရန့်ဖတ်မှ ပေါင် ၅၉ သန်းဖြင့် ပြောင်းလာခဲ့ပေမယ့်လည်း အီတီဟတ်တွင် အာလင်းဟာလန်းရဲ့ ဒုတိယဦးစားပေးတိုက်စစ်သမားအဖြစ်သာ ကစားခွင့်ရလာသူ ဖြစ်ပါတယ်။
သူဟာ အာဆင်နယ်ကို ၃-၀ ဖြင့် ရှုံ့းနိမ့်တဲ့ ကွန်မြူနတီဒိုင်းပွဲစဉ်တွင် ဒုတိယပိုင်းမှာ လူစားဝင်ရောက် ကစားခွင့်ရခဲ့ပေမယ့် ဘုန်းမောက်အား ၂-၁ ဖြင့် အနိုင်ရတဲ့ ပရီးမီးယားလိဂ်အဖွင့်ပွဲမှာ ပါဝင်ကစားခွင့်မရခဲ့ပါဘူး။
စပါးစ်ဟာ ယခုနွေရာသီတွင် အပြောင်းအရွှေ့အသုံးစရိတ် ပေါင် ၃၁၂ သန်းအထိ အသုံးပြုထားတဲ့ ကလပ် ဖြစ်ပါတယ်။
မာမွတ်ရှ်ဟာ မန်စီးတီးတွင် ကစားတဲ့ တစ်ရာသီခွဲကာလအတွင်းတွင် ပြိုင်ပွဲအရပ်ရပ် ၆၂ ပွဲကစားထားရာမှာ ၁၆ ဂိုးသွင်းထားနိုင်ပါတယ်။ ယင်းမှာ ၃၆ ပွဲမှာ ပြီးခဲ့တဲ့ရာသီတုန်းက ကစားခဲ့တာပါ။
ဒါပေမယ့် သူဟာ ပရီးမီးယားလိဂ်တွင် ၈ ပွဲတည်းသာ ပွဲထွက်ကစားခွင့်ရခဲ့ပြီး မိနစ် ၇၀၀ ဝန်းကျင်တည်းသာ ကစားခွင့်ရခဲ့ပါတယ်။

ဖီနာဘာချီရဲ့ နိုင်ပွဲအပြီးတွင် ကွင်းအတွင်း ခိုက်ရန် ဖြစ်ပွားခဲ့တဲ့ ဂွန်ဒူဇီ
ဖီနာဘာချီရဲ့ နိုင်ပွဲအပြီးတွင် ကွင်းအတွင်း ခိုက်ရန် ဖြစ်ပွားခဲ့တဲ့ ဂွန်ဒူဇီ
=================

မာတီယိုဂွန်ဒူဇီဟာ ချန်ပီယံလိဂ်ခြေစစ်ပွဲ ပလေးအော့ဖ်ဒုတိယအကျော့တွင် လိုင်ယွန်အား ၂-၁ ဖြင့် အနိုင်ရတဲ့ပွဲအပြီး ခိုက်ရန်ဖြစ်ပွားမှုတွင် အဓိကနေရာမှ ပါဝင်ခဲ့ပါတယ်။
တူရကီကလပ်ဟာ နှစ်ကျော့ပေါင်းရလဒ် ၃-၂ ဖြင့် အနိုင်ရရှိကာ ၂၀၀၈-၀၉ ရာသီနောက်ပိုင်း ပထမဆုံးအကြိမ်အဖြစ် ချန်ပီယံလိဂ်ဝင်ရောက်ခွင့် ရရှိခဲ့ပါတယ်။
ပထမအကျော့တုန်းက ၁ ဂိုးစီသရေကျပြီးနောက် ဖီနာဘာချီဟာ ဗီဒက်မူရီကီ၊ အာချီဘရောင်းတို့ရဲ့ သွင်းဂိုးတွေနဲ့ လိုင်ယွန်ကို ၂-၁ ဖြင့် အနိုင်ရခဲ့တာပါ။
ပွဲအပြီးမှာတော့ ကွင်းအတွင်း ခိုက်ရန် ဖြစ်ပွားမှု ဖြစ်ခဲ့သလို ဥမင်လှိုဏ်ခေါင်းအတွင်းတွင်လည်း နှစ်ဖက်အသင်းမှ ကစားသမားများ၊ နည်းပြအဖွဲ့ဝင်များ ခိုက်ရန် ဖြစ်ပွားခဲ့ပါတယ်။
ယင်းပွဲအတွင်းတွင် အာဆင်နယ်ကစားသမားဟောင်းဂွန်ဒူဇီဟာ လိုင်ယွန်ပရိသတ်များရဲ့ လှောင်ပြောင်မှုများနှင့် ကြုံခဲ့ရပြီး ကစားဖော်များရဲ့ ထိန်းသိမ်းခြင်းခံခဲ့ရပါတယ်။
ဒါပေမယ့် ပွဲအပြီးမှာတော့ ဂွန်ဒူဇီဟာ ကွင်းဘေးရှိ ကင်မရာရှိရာသို့ သွားကာ လိုင်ယွန်ရဲ့ ခါးသီးတဲ့ပြိုင်ဘက်ဖြစ်တဲ့ မာဆေးကို ရည်ရွယ်ပြီး "Allez l'OM" သို့ အော်ဟစ်ခဲ့ပါတယ်။
ဆိုရှယ်မီဒီယာတွင် တက်လာတဲ့ ဗီဒီယိုများအရ လိုင်ယွန်အင်္ကျီဝတ်ဆင်ထားတဲ့ လူတစ်ဦးက ပြင်သစ်အလယ်တန်းကစားသမားကို ရန်မူရန် ကြိုးပမ်းခဲ့ကြောင်း တွေ့ရပါတယ်။ ယင်းနောက် ဂွန်ဒူဇီကို ဥမင်လှိုဏ်ခေါင်းအတွင်း ခေါ်ဆောင်သွားချိန်တွင်လည်း နှစ်ဖက်အသင်းသားတို့ ပြဿနာတက်ခဲ့ကြကြောင်း သိရပါတယ်။
ဥမင်လှိုဏ်ခေါင်းအတွင်း နှစ်ဖက်အသင်းသားတို့ရဲ့ ရန်ပွဲတွင် ဂွန်ဒူဇီ ပါဝင်သလားဆိုတာ မသိရသေးပါဘူး။
ပွဲအပြီးမှာတော့ မာဆေးကစားသမားဟောင်းဂွန်ဒူဇီက လိုင်ယွန်ပရိသတ်များ သူ့မိသားစုနှင့် သူ့ကို ဆဲဆိုမှုများပြုလုပ်ကာ မလေးမစားပြုမူခဲ့ကြောင်း ဝေဖန်သွားပါတယ်။

မန်စီးတီးကွင်းလယ်ကစားသမား နီကိုဂွန်ဇာလက်ဇ် နယူးကာဆယ်အသင်းကို ပေါင်(၅၂)သန်းနဲ့ ပြောင်းရွှေ့မယ်

မန်စီးတီးအသင်းရဲ့ ကွင်းလယ်ကစားသမား နီကိုဂွန်ဇာလက်ဇ်ဟာ နယူးကာဆယ်အသင်းကို ပေါင်(၅၂)သန်းနဲ့ ပြောင်းရွှေ့ဖို့ သဘောတူညီမှုရရှိခဲ့ပြီဖြစ်ကြောင်း သိရပါတယ်။
ဒီသတင်းကို နာမည်ကျော် ဗြိတိန်ဂျာနယ်လစ် ဒေးဗစ်အွန်စတိန်းကလည်း အတည်ပြုခဲ့ပြီး နယူူးကာဆယ်အသင်းက နီကိုဂွန်ဇာလက်ဇ်အတွက် ကနဦးပြောင်းရွှေ့ကြေး ပေါင်(၄၈)သန်းနဲ့ Add-ons ကြေးပေါင်(၄)သန်း ပေးချေရမှာဖြစ်ကြောင်း ဖော်ပြခဲ့ပါတယ်။
နယူးကာဆယ်အသင်းက အဓိကကွင်းလယ်ကစားသမားတွေဖြစ်တဲ့ တိုနာလီနဲ့ ဂီမာရေ့စ်တို့ကို ရောင်းထုတ်ခဲ့ရတာကြောင့် နီကိုဂွန်ဇာလက်ဇ်ကို ခေါ်ယူအစားထိုးဖို့ ရည်ရွယ်ခြင်းဖြစ်ကြောင်းလည်း သိရပါတယ်။
စပိန်ကွင်းလယ်ကစားသမား နီကိုဂွန်ဇာလက်ဇ်(၂၄ နှစ်)က ၂၀၂၅ ဆောင်းရာသီအပြောင်းအရွှေ့မှာ ပေါ်တိုကနေ မန်စီးတီးကို ပေါင်သန်း(၅၀)နဲ့ ပြောင်းရွှေ့ခဲ့သူဖြစ်ပြီး မန်စီးတီးအသင်းအတွက် (၅၉)ပွဲကစားအပြီးမှာ လမ်းခွဲခဲ့ရတာပါ။
ရိုဒရီ၊ ဘာနာဒိုဆေးလ်ဗားနဲ့ ရိုင်ဒါစ်တို့ရဲ့နောက် ဒီနွေမှာ မန်စီးတီးအသင်းနဲ့ လမ်းခွဲခဲ့ရတဲ့ စတုတ္ထမြောက် စီနီယာကွင်းလယ်ကစားသမား ဖြစ်ခဲ့ကြောင်းလည်း သိရပါတယ်။
နယူးကာဆယ်အသင်းကတော့ တိုက်စစ်ပိုင်းကို ပံ့ပိုးပေးနိုင်မယ့် ကွင်းလယ်ကစားသမားတစ်ဦး ထပ်မံခေါ်ယူနိုင်ဖို့ ဆက်လက်ကြိုးပမ်းနေကြောင်း သိရပါတယ်။

M League-2 ပြိုင်ပွဲအတွက် အသင်း ၆ သင်းသာ သေချာသေးပြီး ကျန်နှစ်သင်းအတွက် ဆွေးနွေးနေ

ယခု ၂၀၂၆- ၂၀၂၇ ရာသီ M League-2 ပြိုင်ပွဲအတွက် အသင်း ၆ သင်းသာ သေချာသေးပြီး ကျန်နှစ်သင်းအတွက် ဆွေးနွေးနေလျက်ရှိကြောင်း M League CEO ဦးကိုကိုသိန်းက အတည်ပြုပြောကြားပါတယ်။
ဦးကိုကိုသိန်းက "ပြီးခဲ့တဲ့နှစ်ပြိုင်ပွဲတုန်းကတော့ ကျွန်တော်တို့ အသင်း ၈ သင်းနဲ့ ကျင်ပခဲ့ပါတယ်။ ဒီရာသီ M League-2 ပြိုင်ပွဲအတွက်က လက်ရှိမှာ Confirm ဖြစ်တာ ၆ သင်းပဲ ရှိပါသေးတယ်။ နောက်ထပ် အသင်းနှစ်သင်းကလည်း Confirm ဖြစ်နေပါပြီ။ ကျွန်တော်တို့ အနည်းဆုံး ၈ သင်း လောက်နဲ့တော့ ကျင်းပသွားဖို့ လျာထားပါတယ်" ဆိုပြီး ပြောကြားခဲ့ခြင်း​ ဖြစ်ပါတယ်။
ပြီးခဲ့တဲ့ရာသီ MNL ပြိုင်ပွဲအပြီးတွင် အဆင့် (၁၁၊ ၁၂) ရ ရခိုင်ယူနိုက်တက်နဲ့ ရာမညယူနိုက်တက်အသင်းနှစ်သင်းမှာ MNL-2 သို့ တန်းဆင်းခဲ့ပါတယ်။
MNL-2 မှ ပထမ၊ ဒုတိယရ ချင်းလန့်နဲ့ မြဝတီအသင်းတို့မှာ MNL သို့ တန်းတက်ခဲ့ပါတယ်။
သို့သော် MNL အဆင့်(၁၀) ရ ဒဂုံပေါ့သ်အသင်းမှာ ဖျက်သိမ်းသွားသောကြောင့် MNL တန်းဆင်း နှစ်သင်းနဲ့ MNL-2 အဆင့် (၃၊ ၄) ရ အသင်းနှစ်သင်း၊ ပေါင်းလေးသင်းကို Play-off ကစားစေသော်လည်း ရန်ကုန်စီးတီးမှလွဲပြီး ကျန်အသင်းသုံးသင်းက ကစားရန်ဆန္ဒမရှိသောကြောင့် ရန်ကုန်စီးတီးအသင်း MNL သို့ တန်းတက်ခွင့်ရခဲ့ခြင်းဖြစ်ကြောင်း သိရပါတယ်။

အစ်ဝစ်ချ်နဲ့ပွဲမှာ အန်ဒရေဆန်းတို့စ်နဲ့ လုခ်ရှောကို ပွဲထွက်ကစားသမားအဖြစ် အသုံးမပြုဖို့ ကာရစ်ကို ရွန်နီ တိုက်တွန်း

မန်ယူအသင်းရဲ့ တိုက်စစ်မှူးဟောင်း ဝိန်းရွန်နီက အစ်ဝစ်ချ်အသင်းနဲ့ ယှဉ်ပြိုင်ရမယ့် လာမယ့် ပရီးမီးယားလိဂ်ပွဲစဉ်မှာ မန်ယူနည်းပြ ကာရစ်အနေနဲ့ ကွင်းလယ်ကစားသမား အန်ဒရေဆန်းတို့စ်နဲ့ နောက်ခံလူ လုခ်ရှောတို့ကို ပွဲထွက်ကစားသမားအဖြစ် အသုံးမပြုဖို့ တိုက်တွန်းပြောကြားခဲ့ပါတယ်။
အန်ဒရေဆန်းတို့စ်နဲ့ လုခ်ရှောတို့က ဟားလ်စီးတီးကို ရှုံးနိမ့်ခဲ့တဲ့ ပရီးမီးယားလိဂ်ရာသီအဖွင့်ပွဲမှာ ပွဲထွက်ခွင့်ရခဲ့ကြသူတွေဖြစ်ပြီး ရွန်နီက သူတို့ကို အစ်ဝစ်ချ်နဲ့ပွဲမှာ ပွဲထွက်စာရင်းက ဖယ်ရှားသင့်တယ်လို့ အကြံပြုခဲ့တာပါ။
''လုခ်ရှောကို ဖယ်ရှားပြီး ဒေါ်ဂူကို ဘယ်နောက်ခံနေရာမှာ အသုံးပြုခဲ့ရင် တိုက်စစ်အတွက် ပိုအားကောင်းသွားမှာပါ။ လုခ်ရှောအပေါ် ပွဲတိုင်းမှာ မှီခိုဖို့ မဖြစ်နိုင်တာကြောင့် တန်းတက်အသင်းနဲ့ အိမ်ကွင်းပွဲ ကစားရမယ့်အချိန်မှာ ဒေါ်ဂူကို အသုံးပြုသင့်ပါတယ်။ အန်ဒရေဆန်းတို့စ်နေရာကိုတော့ မိန်နူးကို သုံးချင်ပါတယ်'' လို့ ရွန်နီက ပြောကြားခဲ့တာပါ။
မန်ယူအသင်းက ပရီးမီးယားလိဂ်ရာသီအဖွင့်မှာ တန်းတက်နှစ်သင်းနဲ့ ဆက်တိုက်ရင်ဆိုင်ရတာကြောင့် ပွဲချောင်တယ်လို့ သတ်မှတ်ခဲ့ကြပေမဲ့ အဖွင့်ပွဲမှာ ဟားလ်စီးတီးကို (ဝ-၂)ဂိုးနဲ့ အရှုံးပေးခဲ့ရတာကြောင့် ဝေဖန်ပြစ်တင်သံတွေ ဆူညံသွားခဲ့ပါတယ်။
ဘရာဇီးလ်ကွင်းလယ်ကစားသမား အန်ဒရေဆန်းတို့စ်က ဒီနွေမှာမှ ချယ်လ်ဆီးကနေ မန်ယူကို ပေါင်(၄၈)သန်းနဲ့ ပြောင်းရွှေ့ပြီး (၅)နှစ်စာချုပ် ချုပ်ဆိုခဲ့သူပါ။

ချယ်လ်ဆီးတိုက်စစ်မှူး နီကိုလက်စ်ဂျက်ဆင်ကို အက်စတွန်ဗီလာအသင်း ပေါင်သန်း(၆၀)နဲ့ ကမ်းလှမ်းထား

အက်စတွန်ဗီလာအသင်းဟာ ချယ်လ်ဆီးအသင်းရဲ့ ဆီနီဂေါတိုက်စစ်မှူး နီကိုလက်စ်ဂျက်ဆင်ကို ပေါင်သန်း(၆၀)နဲ့ ကမ်းလှမ်းထားကြောင်း သိရပါတယ်။
ချယ်လ်ဆီးအသင်းက နီကိုလက်စ်ဂျက်ဆင်အတွက် ပြောင်းရွှေ့ကြေးကို ပေါင်(၆၅)သန်းလို့ သတ်မှတ်ထားပေမဲ့ အက်စတွန်ဗီလာအသင်းရဲ့ ကမ်းလှမ်းမှုကို လက်ခံဖွယ်ရှိကြောင်း သိရပါတယ်။
ချယ်လ်ဆီးအသင်းက နီကိုလက်စ်ဂျက်ဆင်(၂၅ နှစ်)ကို ၂၀၂၃ နွေရာသီမှာ ဗီလာရီးယဲလ်ကနေ ပေါင်(၃၂)သန်းနဲ့ ခေါ်ယူခဲ့တာဖြစ်ပြီး စာချုပ်သက်တမ်းက ၂၀၃၃ ခုနှစ်အထိ ရှိနေပါတယ်။
နီကိုလက်စ်ဂျက်ဆင်က ချယ်လ်ဆီးအသင်းမှာ (၈၁)ပွဲကစားကာ ဂိုး(၃၀) သွင်းယူထားသူဖြစ်ပြီး ပြီးခဲ့တဲ့ရာသီမှာတော့ ဘိုင်ယန်မြူးနစ်အသင်းဆီ အငှားချခံခဲ့ရပါတယ်။
ဘိုင်ယန်မြူးနစ်အသင်းက နီကိုလက်စ်ဂျက်ဆင်ကို ပေါင်(၇၀.၅)သန်းနဲ့ အပြီးသတ်ခေါ်ယူဖို့လည်း သဘောတူညီမှုရယူခဲ့ပေမဲ့ ခေါ်ယူခြင်းမပြုခဲ့တာကြောင့် ချယ်လ်ဆီးအသင်းဆီ ပြန်ရောက်လာခဲ့တာပါ။
အက်စတွန်ဗီလာနည်းပြ အူနိုင်းအမ်မရီက ဗီလာရီးယဲလ်အသင်းမှာ လက်တွဲခဲ့ဖူးတဲ့ နီကိုလက်စ်ဂျက်ဆင်နဲ့ ပြန်လည်လက်တွဲဖို့ ရည်ရွယ်နေခြင်းဖြစ်ကြောင်း သိရပါတယ်။
နီကိုလက်စ်ဂျက်ဆင်ကို အငှားခေါ်ယူဖို့ အက်သလက်တီကိုအသင်းရဲ့ ကမ်းလှမ်းမှုကို ချယ်လ်ဆီးအသင်းက ငြင်းပယ်ခဲ့ပြီး အပြီးသတ်ရောင်းချဖို့သာ ဆုံးဖြတ်ထားကြောင်းလည်း သိရပါတယ်။

၂၀၂၆-၂၇ ရာသီ ချန်ပီယံလိဂ်ပြိုင်ပွဲရဲ့ League Phase အဆင့်အတွက် မဲခွဲပွဲကို မနက်ဖြန် ကျင်းပပြုလုပ်မယ်

၂၀၂၆-၂၇ ရာသီ ချန်ပီယံလိဂ်ပြိုင်ပွဲရဲ့ League Phase အဆင့်အတွက် မဲခွဲပွဲကို မနက်ဖြန် ကျင်းပပြုလုပ်မယ်လို့ သိရပါတယ်။
League Phase အဆင့်မှာ ပြီးခဲ့တဲ့ရာသီကလို ပြိုင်ပွဲဝင်အသင်း (၃၆)သင်း ပါဝင်မှာဖြစ်ပြီး လက်ရှိအချိန်မှာ ယှဉ်ပြိုင်ခွင့်ရထားတဲ့ အသင်း(၃၂)သင်း အဖြေထွက်နေပါပြီ။
ကျန်တဲ့ (၄)သင်းကတော့ ဒီည Play-offs ဒုတိယအကျော့ပွဲစဉ်တွေအပြီးမှာ ထပ်မံထွက်ပေါ်လာမှာပါ။
လောလောဆယ် အဖြေထွက်ထားတဲ့ (၃၂)သင်းထဲမှာ စီးရီးအေကလပ် ကိုမို၊ သြစတြီးယားကလပ် LASK နဲ့ အဇာဘိုင်ဂျန်ကလပ် ဆာဘာအသင်းတို့က ချန်ပီယံလိဂ် League Phase အဆင့်(ယခင် အုပ်စုအဆင့်)ကို ပထမဆုံးအကြိမ် ယှဉ်ပြိုင်ခွင့်ရရှိခဲ့ခြင်းဖြစ်ကြောင်း သိရပါတယ်။
League Phase အဆင့်မှာ ပြိုင်ပွဲဝင်အသင်းတွေအနေနဲ့ တစ်သင်းကို (၈)ပွဲစီ ယှဉ်ပြိုင်ကစားရမှာဖြစ်ပြီး ပွဲစဉ်(၁)ကို စက်တင်ဘာ(၈)မှာ စတင်ယှဉ်ပြိုင်ရမှာဖြစ်ကြောင်း သိရပါတယ်။
ဥရောပဘောလုံးအဖွဲ့ချုပ်(UEFA)က ၂၀၂၆-၂၇ ချန်ပီယံလိဂ်ပြိုင်ပွဲရဲ့ League Phase အဆင့်မှာ အသုံးပြုမယ့် Adidas ဘောလုံးအသစ်ကိုလည်း ဒီနေ့ မိတ်ဆက်ပြသခဲ့ပါတယ်။
မဲခွဲပွဲကို မြန်မာစံတော်ချိန် မနက်ဖြန်ည (၁၁း၃၀)နာရီမှာ စတင်မှာဖြစ်ကြောင်း သိရပါတယ်။