အာဆီယံ-ဩစတြေးလျဖိုရမ်နှင့်အာဆီယံ-နယူးဇီလန် ဆွေးနွေးပွဲတွင် မြန်မာတက်ရောက်
ပူးပေါင်းဆောင်ရွက်မည့်အစီအစဉ်များဆွေးနွေးခဲ့ဟုဆို

(၃၈) ကြိမ်မြောက် အာဆီယံ-ဩစတြေးလျ ဖိုရမ်နှင့် (၃၃) ကြိမ်မြောက် အာဆီယံ-နယူးဇီလန် ဆွေးနွေးပွဲတို့သို့ မြန်မာသံရုံး၊ ကင်ဘာရာမြို့မှ သံရုံးယာယီတာဝန်ခံ ပါဝင်တက်ရောက်ခဲ့ကြောင်း သိရသည်။
ပြီးခဲ့သည့် မေလ ၁၂ ရက်ကနေ ၁၃ ရက်နေ့အထိ ဩစတြေးလျနိုင်ငံက အိမ်ရှင်အဖြစ် ဆစ်ဒနီမြို့၌ ကျင်းပခဲ့သည့် (၃၈) ကြိမ်မြောက် အာဆီယံ-ဩစတြေးလျဖိုရမ်နှင့် နယူးဇီလန်နိုင်ငံက အိမ်ရှင်အဖြစ် ခရိုက်စ်ချာ့ချ်မြို့၌ မေလ ၁၄ ရက်နေ့မှ ၁၅ ရက်နေ့အထိ ကျင်းပခဲ့သည့် (၃၃) ကြိမ်မြောက် အာဆီယံ-နယူးဇီလန်ဆွေးနွေးပွဲကို အာဆီယံဆိုင်ရာ မြန်မာအဆင့်မြင့် အရာရှိကြီးကိုယ်စား ကင်ဘာရာမြို၊ မြန်မာသံရုံးမှ သံရုံးယာယီတာဝန်ခံ ဒေါ်မြတ်သူဇာသန်းက ပါဝင်တက်ရောက်ခဲ့ခြင်း ဖြစ်ကြောင်း သိရသည်။
အဆိုပါအစည်းအဝေးများသို့ အာဆီယံအဖွဲ့ဝင် နိုင်ငံ (၁၁) နိုင်ငံ၊ ဩစတြေးလျနိုင်ငံနှင့် နယူးဇီလန်နိုင်ငံတို့မှ အာဆီယံဆိုင်ရာ အဆင့်မြင့် အရာရှိကြီးများ ပါဝင်တက်ရောက်ခဲ့ခြင်းလည်း ဖြစ်သည်။
အာဆီယံ-ဩစတြေးလျဖိုရမ်၌ အာဆီယံအဖွဲ့အစည်းနှင့် ဩစတြေးလျ နိုင်ငံတို့အကြား ပူးပေါင်းဆောင်ရွက်နေမှုအခြေအနေများအပေါ် ဆွေးနွေးခြင်း၊ ပြန်လည် သုံးသပ်ခြင်း၊ အနာဂတ်လုပ်ငန်းစဉ်များအပေါ် ညှိနှိုင်းခြင်း၊ နိုင်ငံတကာနှင့်ဒေသတွင်းဆိုင်ရာ ကိစ္စရပ်များအပေါ် အမြင်ချင်းဖလှယ်ခြင်း၊ လာမည့်အနာဂတ်ကာလများတွင် ကျင်းပရန်ရှိသည့် အစည်းအဝေးများနှင့်စပ်လျဉ်း၍ ညှိနှိုင်းခြင်းတို့ကို ဆောင်ရွက်ခဲ့ခြင်းဖြစ်ကြောင်း သိရသည်။
မြန်မာနိုင်ငံအနေဖြင့် အာဆီယံ-ဩစတြေးလျ ဘက်စုံမဟာဗျူဟာမိတ်ဖက်ပူးပေါင်းဆောင်ရွက်မှု အကောင်အထည်ဖော်ဆောင်ရွက်ရာ၌ လူမှု-ယဉ်ကျေးမှုဆိုင်ရာပူးပေါင်းဆောင်ရွက်မှုကဏ္ဍ အောက်ရှိ ပညာရေး၊ ကျန်းမာရေးပူးပေါင်း ဆောင်ရွက်မှုနှင့် သဘာဝဘေးအန္တရာယ် စီမံခန့်ခွဲမှုဆိုင်ရာကဏ္ဍ ပူးပေါင်းဆောင်ရွက်မှုဆိုင်ရာ ဖြစ်ပေါ်တိုးတက်မှုများကို ဦးဆောင် ဆွေးနွေးခဲ့ခြင်းဖြစ်သည်။
ထိုနောက် အာဆီယံ-နယူးဇီလန်ဆွေးနွေးပွဲ၌ ၂၀၂၆ ခုနှစ်အတွင်း ဒေသတွင်းနှင့် နိုင်ငံတကာ၌ ဖြစ်ပေါ်နေသည့် ပထဝီဝင်မဟာဗျူဟာအခြေအနေများအပေါ် ဆွေးနွေး အမြင်ချင်းဖလှယ်ခြင်း၊ ဒေသတွင်းဦးစားပေးလုပ်ငန်းစဉ်များအပေါ် ဆွေးနွေးခြင်း၊ အာဆီယံ-နယူးဇီလန်နိုင်ငံအကြား ဘက်စုံမဟာဗျူဟာမြောက်မိတ်ဖက်ဆက်ဆံရေး အကောင်အထည်ဖော်မှု အခြေအနေများနှင့် စပ်လျဉ်း၍ ကဏ္ဍအလိုက်ဆွေးနွေးခြင်းအပါအဝင် ၂၀၂၆-၂၀၂၇ ခုနှစ်အတွင်း ပူးပေါင်းဆောင်ရွက်သွားမည့် အနာဂတ်လုပ်ငန်းစဉ်များအပေါ် ဆွေးနွေးခဲ့ကြောင်း သိရသည်။
မြန်မာနိုင်ငံအနေဖြင့် အာဆီယံ-နယူးဇီလန် ဘက်စုံမဟာဗျူဟာမြောက်မိတ်ဖက်ဆက်ဆံရေး အကောင် အထည်ဖော်ဆောင်ရွက်မည့်အစီအစဉ် (၂၀၂၆-၂၀၃၀) မူဘောင်အောက်မှ မဏ္ဍိုင်အချင်းချင်း ပူးပေါင်းဆောင်ရွက်မှုကဏ္ဍအောက်ရှိ အာဆီယံပေါင်းစည်းရေးဦးဆောင်ဦးရွက်ပြုမှုလုပ်ငန်း အစီအစဉ်(၅)၊ အာဆီယံဆက်သွယ်ချိတ်ဆက်မှုမဟာဗျူဟာအစီအစဉ်နှင့် ဒေသခွဲပူးပေါင်း ဆောင်ရွက်မှုများဖြစ်သည့် ရေအရင်းအမြစ်များ၊ စိုက်ပျိုးရေးနှင့် အခြေခံအဆောက်အဦးဆိုင်ရာ ကဏ္ဍတွင် ပါဝင်ဆွေးနွေးခဲ့ကြောင်း သိရသည်။

တရုတ်ကယူအက်စ် စိုက်ပျိုးရေးထွက်ကုန်များကို နှစ်စဉ်ဒေါ်လာ ၁၇ ဘီလျံဖိုးဝယ်မည်--အိမ်ဖြူတော်

တရုတ်နိုင်ငံသည် အမေရိကန်နိုင်ငံထုတ် စိုက်ပျိုးရေးထွက်ကုန်များကို ၂၀၂၈ ခုနှစ်အထိ တစ်နှစ်လျှင် အနည်းဆုံး အမေရိကန်ဒေါ်လာ ၁၇ ဘီလျံဖိုး ဝယ်ယူရန် သဘောတူညီခဲ့ကြောင်း အိမ်ဖြူတော်က တနင်္ဂနွေနေ့တွင် ပြောကြားခဲ့သည်။
ယခုကတိကဝတ်သည် ပြီးခဲ့သည့် ရက်သတ္တပတ်က ကျင်းပခဲ့သည့် အမေရိကန်သမ္မတ ဒေါ်နယ်ထရမ့်ပ်နှင့် တရုတ်သမ္မတ ရှီကျင့်ဖျင်တို့၏ ထိပ်သီးအစည်းအဝေးမှ ထွက်ပေါ်လာသည့် ရလဒ်တစ်ခုဖြစ်ပြီး ၂၀၂၅ ခုနှစ် အောက်တိုဘာလက ပြုလုပ်ခဲ့သည့် ပဲတီစိမ်း/ပဲပုပ်ဝယ်ယူရေး ကတိကဝတ်များအပြင် ထပ်ဆောင်းဝယ်ယူမည့်အစီအစဉ်ဖြစ်ကြောင်း အိမ်ဖြူတော်က ထုတ်ပြန်သည့် အချက်အလက်အကျဉ်းချုပ်အရ သိရသည်။
သမ္မတ ထရမ့်ပ်သည် လူအများ စောင့်မျှော်ခဲ့ကြသည့် တရုတ်နိုင်ငံတော်အဆင့် ခရီးစဉ်ကို သောကြာနေ့တွင် အဆုံးသတ်ခဲ့ပြီး ခရီးစဉ်အတွင်း သမ္မတ ရှီနှင့်အတူ ကုန်သွယ်ရေး၊ တိုင်ဝမ်နှင့် အီရန်နိုင်ငံကိစ္စရပ်များ အပါအဝင် အကြောင်းအရာပေါင်းစုံကို ဆွေးနွေးခဲ့ကြသည်။
ထိပ်သီးအစည်းအဝေးအတွင်း တရုတ်အစိုးရနှင့် အမေရိကန်အစိုးရတို့အကြား ရရှိခဲ့သည့် ကုန်သွယ်ရေးဆိုင်ရာ ရလဒ်အချို့ကို တရုတ်စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက သတင်းထုတ်ပြန်ကြေညာခဲ့ပြီးနောက် တစ်ရက်အကြာတွင် အိမ်ဖြူတော်၏ ထုတ်ပြန်ချက် ထွက်ပေါ်လာခြင်းဖြစ်သည်။
စနေနေ့က ထုတ်ပြန်သည့် တရုတ်ဝန်ကြီးဌာန၏ ကြေညာချက်တွင် အမေရိကနှင့် တရုတ်နိုင်ငံတို့သည် အသစ်ဖွဲ့စည်းလိုက်သည့် ကုန်သွယ်ရေးဘုတ်အဖွဲ့မှတစ်ဆင့် အခွန်နှုန်းထားများ လျှော့ချရေးကို ဆွေးနွေးသွားမည်ဖြစ်ကြောင်းနှင့် “နှစ်ဦးနှစ်ဖက် အလေးထားဆောင်ရွက်လျက်ရှိသည့် ကုန်ပစ္စည်းများအပေါ် သင့်လျော်မည့် အတိုင်းအတာတစ်ခုအထိ အခွန်နှုန်းထားများ လျှော့ချရန် မူအားဖြင့် သဘောတူညီခဲ့ကြကြောင်း” ဖော်ပြထားသည်။ အဆိုပါ ကုန်ပစ္စည်းများထဲတွင် စိုက်ပျိုးရေးထွက်ကုန်များလည်း ပါဝင်မည်ဖြစ်ကြောင်း ဝန်ကြီးဌာနက ဆိုသည်။

အထောက်အထားပြည့်စုံစွာတင်ပြသည့်မွေးရာပါနိုင်ငံသားများ မှတ်ပုံတင်လျှောက်ထားပါက နေ့ချင်းပြီးထုတ်ပေး

အထောက်အထားပြည့်စုံစွာတင်ပြသည့်မွေးရာပါနိုင်ငံသားများ မှတ်ပုံတင်လျှောက်ထားပါက နေ့ချင်းပြီးထုတ်ပေးလျက်ရှိကြောင်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနထံမှ သိရသည်။
အထောက်အထားပြည့်စုံစွာတင်ပြသည့် မြန်မာနိုင်ငံသားဥပဒေပုဒ်မ ၃ နှင့် ပုဒ်မ ၅ တို့အရအကျုံးဝင်သော မွေးရာပါနိုင်ငံသားများဖြစ်သည့် တိုင်းရင်းသားများ၏ မှတ်ပုံတင်များကို စတင်လျှောက်ထားသည့်နေ့မှစ၍ ဦးစီးအရာရှိအဆင့် မြို့နယ်ဦးစီးမှူးများက နေ့ချင်းပြီး ထုတ်ပေးလျက်ရှိကာ လိုင်စင်ဓာတ်ပုံ၊ သွေးအုပ်စုစစ်ဆေးချက်မပြည့်စုံသူများကိုမူ (၁၄)ရက်အတွင်း လက်မှတ်ထိုးထုတ်ပေးလျက်ရှိကြောင်း သိရသည်။
ထို့အပြင် မြန်မာနိုင်ငံသားဥပဒေပုဒ်မ ၆နှင့် ပုဒ်မ ၇ တို့အရ အကျုံးဝင်ညီညွတ်သည့် ဥပဒေအရ နိုင်ငံသားများအား မြို့နယ်ဦးစီးမှူးရုံးတွင် စတင်လျှောက်ထားသည့်နေ့မှစ၍ (၇)ရက်အတွင်း ဆောင်ရွက်မှုမှတ်တမ်း(အမှုတွဲ)ပြုလုပ်ပြီး မြို့နယ်ဦးစီးမှူး၏ သဘောထားမှတ်ချက်ဖြင့် ခရိုင်ဦးစီးမှူးထံတင်ပြကာ နိုင်ငံသားအရည်အချင်းပြည့်မီကြောင်း စိစစ်တွေ့ရှိရပါက ဒုတိယ ညွှန်ကြားရေးမှူးအဆင့်ရှိ ခရိုင်ဦးစီးမှူးက နေ့ချင်းပြီး(သို့)အများဆုံး ရက်(၃၀)အတွင်း လက်မှတ်ထိုးထုတ်ပေးလျက်ရှိကြောင်း သိရသည်။
ထို့အတူ အထောက်အထားပြည့်စုံစွာတင်ပြနိုင်ခြင်းမရှိသူများအား အမှုတွဲလက်ခံရရှိသည့်နေ့မှစ၍ အများဆုံး(၇)ရက်အတွင်း ခရိုင်ဦးစီးမှူးမှ သဘောထားမှတ်ချက်ဖြင့် သက်ဆိုင်ရာ တိုင်း/ ပြည်နယ်/ပြည်ထောင်စုနယ်မြေဦးစီးမှူးများထံတင်ပြ၍ နိုင်ငံသားအရည်အချင်းပြည့်မီသဖြင့် မှတ်ပုံတင်ထုတ်ပေးခွင့်ပြုပါက ခွင့်ပြုကြောင်းအကြောင်းကြားစာရရှိသည့်နေ့မှစ၍ (၇) ရက်အတွင်း ခရိုင်ဦးစီးမှူးမှလက်မှတ်ထိုးပြီး မြို့နယ်ဦးစီးမှူးကိုယ်တိုင် ကာယကံရှင်သို့ထုတ်ပေးလျက်ရှိကြောင်း သိရသည်။
ထို့ပြင် နိုင်ငံသား ဟုတ်/မဟုတ် ဗဟိုအဖွဲ့၏ အဆုံးအဖြတ်ခံယူရမည့်သူများကို ခရိုင်/တိုင်း/ပြည်နယ်/ပြည် ထောင်စုနယ်မြေဦးစီးမှူးရုံးများမှ တစ်ဆင့် ဦးစီး(ရုံးချုပ်)သို့တင်ပြပြီး မြန်မာနိုင်ငံသားဥပဒေဆိုင်ရာဗဟိုအဖွဲ့မှ နိုင်ငံသားအဖြစ်ဆုံးဖြတ်ပါက မှတ်ပုံတင်အား ခရိုင်ဦးစီးမှူးမှ အမြန်ဆုံးလက်မှတ်ထိုး၍ မြို့နယ်ဦးစီးမှူးကိုယ်တိုင် ကာယကံရှင်ထံထုတ်ပေးလျက်ရှိကြောင်း သိရသည်။

လဝက ဝန်ထမ်းများ လုပ်ငန်းဆောင်ရွက်ရာ၌ ကျေနပ်မှုမရှိပါကတိုင်ကြားနိုင်

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ဝန်ထမ်းများအနေဖြင့် နိုင်ငံသားဆိုင်ရာလုပ်ငန်းများဆောင်ရွက်ရာ၌ အချိန်ဆွဲခြင်း၊ သတ်မှတ်ရက်ထက်ကြန့်ကြာခြင်း၊ မကြာခဏရက်ချိန်းပေးခြင်း၊ ဆက်ဆံရေးမပြေပြစ်ခြင်း၊ ငွေကြေးတောင်းခံခြင်းများရှိပါက သက်ဆိုင်ရာသို့တိုင်ကြားနိုင်ကြောင်း ဝန်ကြီးဌာနကအသိပေးထားသည်။
တိုင်ကြားရန်ဖုန်းနံပတ်များကို မြို့နယ်ဦးစီးမှူးရုံးများတွင် မြင်သာထင်ရှားစွာချိတ်ဆွဲကြေညာထားပြီး လဝက၏ အမျိုးသားမှတ်ပုံတင်နှင့် နိုင်ငံသားဦးစီးဌာ န ဖုန်း ဝ၆၇၃၄၃၁၀၄၅ ၊ ဝန်ကြီးဌာန အဂတိလိုက်စားမှု တားဆီးကာကွယ်ရေးအဖွဲ့ (CPU) Short Code "1111" သို့ SMS ပေးပို့ခြင်း၊ လဝက မြို့နယ်ဦးစီးမှူးရုံးများရှိ အကြံပြုစာတိုက်ပုံးများ၊ တိုင်း/ ပြည်နယ်/ပြည်ထောင် စုနယ်မြေဦးစီးမှူးရုံးများ၌ကြေညာထားသည့် ဖုန်းနံပတ်များသို့ ဆက်သွယ်တိုင်ကြားနိုင်သည်ဟု အသိပေးထားသည်။
ထိုသို့ တိုင်ကြားရာ၌ တာဝန်ရှိသူအဆင့်ဆင့်ထံသို့ စာဖြင့်/ဖုန်းဖြင့် တိုင်ကြားသူ အမည်၊ မှတ်ပုံတင်အမှတ်၊ နေရပ်လိပ်စာအပြည့်အစုံ၊ ဆက်သွယ်ရန် ဖုန်းနံပတ်၊ ဖြစ်စဉ်တို့ကိုဖော်ပြတိုင်ကြားနိုင်ကာ တိုင်ကြားမှုများကို လက်ခံဖြေရှင်းဆောင်ရွက်ပေးလျက်ရှိသည်ဟု အသိပေးထားသည်။
လဝက မှ အိမ်ထောင်စုလူဦးရေစာရင်းဆိုင်ရာ၊ နိုင်ငံသားဆိုင်ရာလုပ်ငန်းများဆောင်ရွက်ရန်တင်ပြရမည့်အထောက်အထားများ၊ သတ်မှတ်အခငွေ၊ ထုတ်ပေးရမည့်သတ်မှတ်ရက်တို့ကို လဝက မြို့နယ်ဦးစီးမှူးရုံးများရှိမြင်သာသောနေရာများတွင် ဗီနိုင်းများဖြင့်ချိတ်ဆွဲ၍ ပွင့်လင်းမြင်သာစွာအသိပေးကြေညာထားပြီး လက်ကမ်းစာစောင်များဖြင့်လည်းဖြန့်ဝေအသိပေးလျက်ရှိသည်။

ရက်(၁၀၀)စီမံချက်ဖြင့် ကျေးရွာမြေဌားဂရမ်ထုတ်ပေးနိုင်ရေး ရွှေဘိုမြို့နယ်၌ကွင်းဆင်းဆောင်ရွက်

ရက်(၁၀၀)စီမံချက်ဖြင့် စစ်ကိုင်းတိုင်း၊ ရွှေဘိုမြို့နယ်၊ မင်းကျောင်းကျေးရွာအုပ်စု၊ မြောင်းကြီးကျေးရွာ၌ ကျေးရွာမြေငှားဂရမ်ထုတ်ပေးနိုင်ရေးအတွက် မြေငှားဂရမ်ဆောင်ရွက်မည့်မြေနေရာများကို ယနေ့ မေ ၁၈ ရက်ကကွင်းဆင်းဆောင်ရွက်ခဲ့ကြသည်။
ရွှေဘိုခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌနှင့် အဖွဲ့ဝင်များ၊ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌနှင့်အဖွဲ့ဝင်များ၊ ခရိုင်/မြို့နယ်မြေစာရင်းဦးစီးဌာနမှ တာဝန်ရှိသူများက ကွင်းဆင်းစစ်ဆေးဆောင်ရွက်ခဲ့ကြခြင်းဖြစ်သည်။

အင်းလေးဖောင်တော်ဦးဘုရားကို တပ်မတော်ကာကွယ်ရေးဦးစီးချုပ် ဗိုလ်ချုပ်ကြီးရဲဝင်းဦးဖူးမြှော်ကြည်ညို
သာသနိကအဆောက်အဦများကို မူလလက်ရာမပျက်ပြင်ဆင်ထားမှုကိုကြည့်ရှုစစ်ဆေး

တပ်မတော်ကာကွယ်ရေးဦးစီးချုပ် ဗိုလ်ချုပ်ကြီးရဲဝင်းဦးနှင့် ဇနီးတို့သည် ညောင်ရွှေမြို့နယ်၊ အင်းလေးဒေသ၊ ရတနာစံကျောင်းတော်ကြီးရှိ အင်းလေးဖောင်တော်ဦးဘုရားရုပ်ပွားတော်မြတ်(၅)ဆူကို ယနေ့ မေ ၁၈ ရက်ကဖူးမြော်ကြည်ညိုခဲ့သည်။
ထိုသို့ ဖူးမြှော်ကြည်ညိုပြီးနောက် ဘက်စုံပြုပြင်မွမ်းမံရန် အလှူငွေများပေးအပ်လှူဒါန်းပြီး အင်းလေးဖောင်တော်ဦးရင်ပြင်တော်ရှိ စိန်နှင့်မြကျောင်းတိုက်၏ ကျောင်းထိုင်ဆရာတော်အားဖူးမြော်ကြည်ညိုပြီး လှူဖွယ်ပစ္စည်းများဆက်ကပ်လှူဒါန်းခဲ့သည်။
ထို့နောက် မန္တလေးငလျင်ကြီးဒဏ်ကြောင့် ဘုရားရင်ပြင်တော်ရှိ နေပူခံကျောက်ပြားများကွဲအက်ပျက်စီးမှု၊ မုခ်ဦးများ၊ လှေကားများ၊ ကရဝိတ်ဖောင်တော်ထားရှိရာအဆောင်နှင့် အခြားသာသနိကအဆောက်အအုံများ ပြိုကျပျ-က်စီးမှုတို့ကို မူလလက်ရာမပျက်ပြန်လည်ပြု ပြင်ထားရှိမှုများအားကြည့်ရှုခဲ့သည်။
အင်းလေးဖောင်တော်ဦးမြတ်စွာဘုရားကိန်းဝပ်သတင်းသုံးတော်မူရာ ရင်ပြင်တော်ရှိ သာသနိကအဆောက်အအုံအချို့သည် မန္တလေးငလျင်ကြီးဒ-ဏ်ကြောင့်ပျ-က်စီးမှုများဖြစ်ပေါ်ခဲ့၍ နယ်မြေခံပြည်နယ်အင်ဂျင်နီယာများနှင့် အဖွဲ့များ၊ မြန်မာနိုင်ငံအင်ဂျင်နီယာအသင်းမှ ပညာရှင်များဖြင့် ဆွေးနွေးတိုင်ပင်ပြီး မူလလက်ယာမပျ-က်ပြန်လည်ပြုပြင်ခြင်းလုပ်ငန်းများကိုဆောင်ရွက်ခဲ့ကြသည်။
ထို့ကြောင့် ရင်ပြင်တော်ရှိ နေပူခံကျောက်ပြားများခင်းခြင်း(၁၀၀)ရာခိုင်နှုန်း၊ ဖောင်တော်ဦးဘုရားမူလကျောင်းဆောင်အောက်ခြေသံကူကွန်ကရစ်ထပ်ပိုးခြင်း (၁၀၀)ရာခိုင်နှုန်း၊ မူလစံကျောင်းတော်အရှေ့ဘက်၊ အနောက်ဘက် မုခ်ဦးစောင်းတန်းလှေကားများ(၁၀၀)ရာ ခိုင်နှုန်း၊ မူလစံကျောင်းတောင်ဘက်မုခ်လှေကားနှင့် မြောက်ဘက်အာရုံခံတန်းစောင်း(၁၀၀)ရာခိုင်နှုန်း၊ ကရဝိတ်အဆောင်(၁၀၀)ရာခိုင်နှုန်းပြီးစီးပြီဖြစ်သည်။
လက်ရှိအချိန်၌ မြောက်ဘက်မုခ်ရှိလှေကားမှာ အင်းလေးဖောင်တော်ဦးရုပ်ရှင်တော်မြတ်များ ဒေသစာရီကြွ ချီအပူဇော်ခံရန် ပင်မစံကျောင်းတော်မှပင့်ဆောင်ရာ တွင် အနည်းငယ်မတ်စောက်သဖြင့် လှေကားအသစ်ပြန်လည်တည်ဆောက်မှုမှာ (၈၀)ရာခိုင်နှုန်းပြီးစီးပြီဖြစ်၍ ဆက်လက်ဆောင်ရွက်လျက်ရှိသည်။

ရုရှားနှင့် တရုတ်နိုင်ငံတို့သည် နိုင်ငံအချင်းချင်း ဆက်ဆံရေးနှင့် အိမ်နီးချင်းနိုင်ငံများအကြား ပူးပေါင်းဆောင်ရွက်မှုအတွက် စံပြပုံစံတစ်ခုကို ဖော်ဆောင်ပေးထားကြောင်း ရုရှားဆို

ရုရှားနိုင်ငံနှင့် တရုတ်နိုင်ငံတို့သည် နိုင်ငံအချင်းချင်း ဆက်ဆံရေးနှင့် အိမ်နီးချင်းနိုင်ငံများအကြား ပူးပေါင်းဆောင်ရွက်မှုတို့အတွက် ကောင်းမွန်သော စံပြပုံစံတစ်ခုကို ဖော်ဆောင်ပေးထားကြောင်း ခရင်မ်လင်၏ အကြံပေးပုဂ္ဂိုလ် ယူရီ အူရှာကော့ဗ်က တနင်္လာနေ့တွင် မီဒီယာများသို့ ပြောကြားခဲ့သည်။
"ရုရှား-တရုတ် ဆက်ဆံရေးဟာ အရှိန်အဟုန်မပျက် ရှေ့သို့ တစိုက်မတ်မတ် တိုးတက်ဖြစ်ထွန်းနေပြီး မကြုံစဖူး မြင့်မားတဲ့ စံနှုန်းတစ်ခုကို ရောက်ရှိနေပြီ ဖြစ်ပါတယ်" ဟု သူက ဆိုသည်။
"ကျွန်တော်တို့ဟာ အပြန်အလှန် ကူညီဖေးမမှု၊ အပြန်အလှန် ပံ့ပိုးကူညီမှုနဲ့ ချစ်ကြည်ရင်းနှီးမှု အခြေခံမူတွေနဲ့အညီ အမြဲတစေ ဆောင်ရွက်နေတာ ဖြစ်ပါတယ်" ဟုလည်း အူရှာကော့ဗ်က ပြောကြားသည်။
ရုရှားနှင့် တရုတ်နိုင်ငံတို့၏ ပူးပေါင်းဆောင်ရွက်မှုသည် မည်သည့် တတိယအဖွဲ့အစည်း (သို့မဟုတ်) တတိယနိုင်ငံကိုမျှ ရည်ရွယ်တိုက်ခိုက်ခြင်း မဟုတ်ကြောင်း အူရှာကော့ဗ်က အလေးအနက် ပြောကြားခဲ့ပြီး၊ နှစ်နိုင်ငံစလုံးသည် လွတ်လပ်၍ ကိုယ်ပိုင်ပြဌာန်းခွင့်ရှိသော နိုင်ငံခြားရေးမူဝါဒများကို လက်ကိုင်စွဲထားကြကြောင်းကိုလည်း ဖြည့်စွက်ပြောကြားခဲ့သည်။

ထပ်မံထိန်းသိမ်းနိုင်ခဲ့သည့် မြဝတီမြို့ဝန်းကျင်အတွင်း တရားမဝင်ဝင်ရောက်လာသော တရုတ်နိုင်ငံသား(၁)ဦးကို ပြည်နှင်နိုင်ရေးစစ်ဆေး

လဝက ဥပဒေ၊ မူးယစ်ဥပဒေတို့ဖြင့် အပြစ်ပေးအရေးယူခဲ့သည့် ပြည်ပနိုင်ငံသား(၇၆၆)ဦးရှိ
ကရင်ပြည်နယ်၊ မြဝတီမြို့ဝန်းကျင်ရှိ ဆိုဒ်အတွင်းသို့ တရားမဝင်ဝင်ရောက်လာပြီး အွန်လိုင်းလိမ်လည်လောင်းကစားမှုလုပ်ငန်းများလုပ်ကိုင်ရာတွင်ပါဝင်သော တရုတ်နိုင်ငံသား(၁)ဦီးကိုထိန်းသိမ်းနိုင်ခဲ့၍ ပြည်နှင်နိုင်ရေးစစ်ဆေးခဲ့ကြောင်း သိရသည်။
၂၀၂၅ ခုနှစ်၊ ဇန်နဝါရီ ၃၀ ရက်မှ ၂၀၂၆ ခုနှစ်၊ မေ ၁၈ ရက်အထိ မြဝတီမြို့နယ်အတွင်း တရားမဝင်ဝင်ရောက် လာသည့် ပြည်ပနိုင်ငံသား(၁၄,၆၅၈)ဦးကိုထိန်းသိမ်းနိုင်ခဲ့ပြီး ၎င်းတို့အနက်(၁၃,၄၂၂)ဦးကို ထိုင်းနိုင်ငံမှတစ် ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျပြည်နှင်လွှဲပြောင်းပေးခဲ့ပြီးဖြစ်ကြောင်း သိရသည်။
ထို့ပြင် လွှဲပြောင်းပေးအပ်ရန်ကျန်ရှိသည့် ပြည်ပနိုင်ငံ သား(၁,၂၃၆)ဦးအနက် မြန်မာနိုင်ငံ လူဝင်မှုကြီးကြပ်ရေး(လတ်တလော)ပြဌာန်းချက်များ အက်ဥပဒေပုဒ်မ ၃(၁)/၁၃(၁)နှင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အပြစ်ပေးအ ရေးယူခဲ့သည့် ပြည်ပနိုင်ငံသား(၇၆၆)ဦးရှိကြောင်း သိရသည်။
ထို့ကြောင့် ကျန်ရှိသည့် ပြည်ပနိုင်ငံသား(၄၇၀)ဦးကို သက်ဆိုင်ရာနိုင်ငံများသို့ လွှဲပြောင်းပေးရန်အသင့်ဖြစ်နေပြီဖြစ်၍ ကောင်းမွန်စွာထိန်းသိမ်းစောင့်ရှောက်ထားကြောင်း သိရသည်။

(၁၇) ကြိမ်မြောက် အပြည်ပြည်ဆိုင်ရာစီးပွားရေးဖိုရမ်နှင့် ဆက်စပ်အစည်းအဝေးများကို မြန်မာကိုယ်စားလှယ်အဖွဲ့ တက်ရောက်

စိုက်ပျိုးမွေးမြူရေးအခြေခံစက်မှုလုပ်ငန်းများ ဖွံ့ဖြိုးတိုးတက်ရေးကဏ္ဍများနှင့် MSME ကဏ္ဍများ ပူးပေါင်းဆောင်ရွက်ရေးဆွေးနွေး
ဘဏ္ဍာရေးနှင့်အခွန်ဝန်ကြီးဌာန ပြည်ထောင်စုဝန်ကြီး ဒေါက်တာကံဇော်နှင့် စက်မှုနှင့် အသေးစား၊ အငယ်စား၊ အလတ်စားနှင့် စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းတို့ ဦးဆောင်သည့် မြန်မာကိုယ်စားလှယ်အဖွဲ့သည် ရုရှားဖက်ဒရေးရှင်းနိုင်ငံ တာတာစတန်ပြည်နယ် ကာဇန်မြို့၌ မေ ၁၃ ရက်မှ ၁၇ ရက်အထိကျင်းပသည့် (၁၇) ကြိမ်မြောက် အပြည်ပြည်ဆိုင်ရာ စီးပွားရေးဖိုရမ်နှင့် ဆက်စပ်အစည်းအဝေးများသို့ တက်ရောက်ခဲ့ကြောင်း သိရသည်။
မေ ၁၃ ရက် မနက်ပိုင်းတွင် ပြည်ထောင်စုဝန်ကြီးများသည် ရုရှားဖက်ဒရေးရှင်းနိုင်ငံ စက်မှုနှင့်ကုန်သွယ်ရေးဝန်ကြီးဌာန ဒုတိယဝန်ကြီး Mr. Roman Chekushov နှင့် တွေ့ဆုံ၍ အမှတ် (၁) သံမဏိစက်ရုံ (ပင်းပက်) ဆိုင်ရာကိစ္စရပ်များ၊ စိုက်ပျိုးမွေးမြူရေးအခြေခံစက်မှုလုပ်ငန်းများ ဖွံ့ဖြိုးတိုးတက်ရေးကဏ္ဍများတွင် ပူးပေါင်းဆောင်ရွက်နိုင်ရေးနှင့် MSME ကဏ္ဍများ ပူးပေါင်းဆောင်ရွက်နိုင်ရေးကိစ္စရပ်များကို ဆွေးနွေးခဲ့ခြင်းလည်း ဖြစ်သည်။
ထိုပြင် ပြည်ထောင်စုဝန်ကြီး ဒေါက်တာကံဇော်သည် ကမ္ဘာလုံးဆိုင်ရာ ဖွံ့ဖြိုးတိုးတက်မှုခေတ် ကုန်ဆုံးချိန်တွင် စီးပွားရေးလုပ်ငန်း လွတ်လပ်မှုနှင့် နည်းပညာဆိုင်ရာ အချုပ်အခြာအာဏာကို သေချာစေခြင်း (Ensuring Freedom of Economic Activity and Technology Sovereigity in the Context of the end of the era of Globalization) ဆွေးနွေးပွဲသို့လည်းကောင်း၊ ပြည်ထောင်စုဝန်ကြီး ဒေါက်တာချာလီသန်းသည် အစ္စလာမ်မစ်နိုင်ငံများတွင် ရုရှားထုတ်ကုန်များကို မြှင့်တင်ခြင်း (Promotion of Russian Product in the Countries of the Islamic World) ဆွေးနွေးပွဲသို့လည်းကောင်း တက်ရောက်ခဲ့ကြောင်းလည်း သိရသည်။
ထိုနောက် ပြည်ထောင်စုဝန်ကြီးများသည် တာတာစတန်ပြည်နယ် အကြီးအကဲ Mr. Rustam Minnikhanov နှင့်တွေ့ဆုံ၍ တာတာစတန်ပြည်နယ်သည် ရေနံဓာတုလုပ်ငန်း၊ Mechanical Engineering IT ၊ စိုက်ပျိုးရေးကဏ္ဍများတွင် ဖွံ့ဖြိုးတိုးတက်လျက်ရှိမှု၊ ရုရှားနှင့် မြန်မာကြားရှိ ဆက်ဆံရေးကိုအခြေခံ၍ နှစ်ဖက်ပူးပေါင်းဆောင်ရွက်မှုများ တိုးမြှင့်ဆောင် ရွက်ရေး၊ Dr. Kz Rais ၏ ၂၀၂၂ ခုနှစ်၌ မြန်မာနိုင်ငံသို့ လာရောက်ခဲ့သည့် ခရီးစဉ်အတွင်း စိုက်ပျိုးရေး ထွက်ကုန်များ၊ ကုန်သွယ်ရေးနှင့် Alabuga Sez သို့ လုပ်သားစေလွှတ်ရေး၊ LoI နှစ်စောင် လက်မှတ်ရေးထိုးခဲ့ပြီး အကောင်အထည်ဖော်ဆောင်ရွက်လျက်ရှိမှု၊ လုပ်သားများ အချိန်မီစေလွှတ်နိုင်ရေးအတွက် ကူညီပံ့ပိုးပေးရေး၊ စီးပွားရေးနှင့် ကုန်သွယ်မှုမြှင့်တင်နိုင်ရန် စီးပွားရေးဆွေးနွေးပွဲများ အပြန်အလှန် ကျင်းပရေး ကိစ္စရပ်များကိုလည်း ဆွေးနွေးခဲ့ကြောင်း သိရသည်။
မေ ၁၅ ရက်တွင် အိုမန်နိုင်ငံကိုယ်စားလှယ်အဖွဲ့နှင့်တွေ့ဆုံပြီး ရေနံထွက်ကုန်များ၊ LNG တင်သွင်းနိုင်ရန် ပူးပေါင်းဆောင်ရွက်နိုင်ရေး၊ မြန်မာလယ်ယာထွက်ကုန် ဆန်၊ သရက်သီး၊ ကော်ဖီ၊ ပဲမျိုးစုံတင်ပို့နိုင်ရေး၊ စီးပွားရေးနှင့် ကုန်သွယ်မှုမြှင့်တင်နိုင်ရန် စီးပွားရေးဆွေးနွေးပွဲများ အပြန်အလှန်ကျင်းပရေးကိစ္စရပ်များကို ဆွေးနွေးခဲ့ကြသည်။
ထို့နောက် Sber Bank ကုမ္ပဏီမှ တာဝန်ရှိသူများနှင့်တွေ့ဆုံပြီး ငွေကြေးလွှဲပြောင်းခြင်းဆိုင်ရာ ကိစ္စရပ်များ၊ Gigachal AI တည်ဆောက်ထားသော AI CyberSecurity ကဏ္ဍများ ပူးပေါင်းဆောင်ရွက်နိုင်ရေး ဆွေးနွေးခဲ့ကြသည်။

၂၀၂၆ ခုနှစ် အပြည်ပြည်ဆိုင်ရာပြတိုက်များနေ့အခမ်းအနား နေပြည်တော်တွင် ကျင်းပ

ပြတိုက်များသည် လူသားအားလုံးကို ချိတ်ဆက်ပေးနိုင်သည့် တံတားတစ်စင်းအဖြစ် တည်ရှိနေမည်ဖြစ်
၂၀၂၆ ခုနှစ် အပြည်ပြည်ဆိုင်ရာပြတိုက်များနေ့အခမ်းအနားကို ယမန်နေ့က အမျိုးသားပြတိုက် (နေပြည်တော်) Mini Theatre ၌ ကျင်းပသည်။
ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်၊ ဒုတိယဝန်ကြီးများ၊ အမြဲတမ်းအတွင်းဝန်၊ ညွှန်ကြားရေးမှူးချုပ်များနှင့် ပညာရှင်များ တက်ရောက်ကြပြီး မြန်မာနိုင်ငံပြတိုက်များ ကော်မတီအဖွဲ့ဝင်များ၊ ပြည်နယ်နှင့် တိုင်းဒေသကြီးများရှိ ရှေးဟောင်းသုတေသနနှင့် အမျိုးသားပြတိုက်ဦးစီးဌာနလက်အောက်မှ ပြတိုက်တာဝန်ခံများ၊ ဝန်ကြီးဌာနများမှ ပြတိုက်များနှင့် ပုဂ္ဂလိကပြတိုက် ဖွင့်လှစ်မည့်အဖွဲ့အစည်းများမှ ကိုယ်စားလှယ်များက အွန်လိုင်းဖြင့် တက်ရောက်ကြကြောင်း သိရသည်။
၂၀၂၆ ခုနှစ် အပြည်ပြည်ဆိုင်ရာပြတိုက်များနေ့ဆောင်ပုဒ်ကို Museums Uniting a Divided World “ကွဲပြားခြားနားသော ကမ္ဘာကြီးအား ပေါင်းစည်းပေးသောပြတိုက်များ” ဟူသည့် ဆောင်ပုဒ်ကို သတ်မှတ်ပေးခဲ့ကြောင်း၊ ယနေ့ကမ္ဘာတွင် ပြတိုက်များသည် လူသားအားလုံးကို ချိတ်ဆက်ပေးနိုင်သည့် တံတားတစ်စင်းအဖြစ် တည်ရှိနေမည်ဖြစ်ကြောင်းလည်း ပြည်ထောင်စုဝန်ကြီး ဦးမောင်မြင့် ကပြောသည်။
ထို့နောက် ရှေးဟောင်းသုတေသနနှင့်အမျိုးသားပြတိုက်ဦးစီးဌာန ညွှန်ကြားရေးမှူးချုပ်က ဆက်လက်ဆောင်ရွက်မည့် လုပ်ငန်းစဉ်များကို ရှင်းလင်းပြောကြားပြီး ပြတိုက်ပညာရှင် ဒေါ်နုမြဇံ ဦးဆောင်၍ စကားဝိုင်းဆွေးနွေးပွဲကို ဆက်လက်ကျင်းပရာ တပ်မတော်စစ်သမိုင်းပြတိုက်နှင့် အမျိုးသားပြတိုက် (နေပြည်တော်) တို့မှ တာဝန်ရှိသူများ ပါဝင်ဆွေးနွေးခဲ့ကြောင်း သိရသည်။