အာဆီယံ ဘုံသဘောတူညီချက် (၅) ချက်ကို ပြန်လည်သုံးသပ်ရန် တိုက်တွန်းသည့်အဆို ပြည်ထောင်စုလွှတ်တော် အတည်ပြု
Five-Point Consensus သည် မြန်မာနိုင်ငံ၏ ပကတိအခြေအနေနှင့် မကိုက်ညီဟု အဆိုတွင် ဖော်ပြ

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ပြည်သူ့လွှတ်တော်ကိုယ်စားလှယ် ဒေါက်တာနန္ဒာလှမြင့် တင်သွင်းထားသည့် "အာဆီယံ ဘုံသဘောတူညီချက် (၅) ချက် (Five-Point Consensus) ကို ပြန်လည်သုံးသပ်ရန် ပြည်ထောင်စုအစိုးရအား တိုက်တွန်းသည့်အဆို" ကို ယနေ့ကျင်းပသည့် ပြည်ထောင်စုလွှတ်တော်တွင် သဘောတူအတည်ပြုခဲ့ကြောင်း သိရသည်။
ပြည်ထောင်စုလွှတ်တော်နာယကက အာဆီယံ၏ ဘုံသဘောတူညီချက် (၅) ချက်သည် အာဆီယံအဖွဲ့အတွင်း မြန်မာနိုင်ငံ၏ တန်းတူရည်တူ ရပ်တည်မှုကို ထိခိုက်စေပြီး နိုင်ငံတစ်နိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်းမပြုရေးဆိုသည့် အာဆီယံ၏ အခြေခံမူများနှင့် ကွဲလွဲနေသည့်အပြင် မြန်မာနိုင်ငံ၏ လက်ရှိပကတိအခြေအနေနှင့်လည်း ကိုက်ညီမှုမရှိသဖြင့် လိုအပ်သလို ပြန်လည်သုံးသပ်ဆောင်ရွက်ရန် ပြည်ထောင်စုအစိုးရကို တိုက်တွန်းသည့်အဆိုအား အတည်ပြုကြောင်း ကြေညာခဲ့ပြီး၊ ပြည်ထောင်စုလွှတ်တော် နည်းဥပဒေ (၈၁) နှင့်အညီ ဆက်လက်ဆောင်ရွက်သွားမည်ဖြစ်ကြောင်း ပြောကြားခဲ့သည်။
အဆိုကို ဇွန်လ ၂၆ ရက်တွင် စတင်တင်သွင်းခဲ့ခြင်းဖြစ်ပြီး၊ အာဆီယံ၏ လုပ်ဆောင်ချက်များသည် မြန်မာနိုင်ငံ၏ အချုပ်အခြာအာဏာနှင့် ပြည်တွင်းရေးအပေါ် သက်ရောက်မှုရှိနေကြောင်း၊ ရွေးကောက်ပွဲအပြီး ပေါ်ပေါက်လာသည့် နိုင်ငံရေးအခြေအနေများနှင့်လည်း ကိုက်ညီမှုမရှိတော့သဖြင့် Five-Point Consensus ကို ပြန်လည်သုံးသပ်ရန် လိုအပ်ကြောင်း အဆိုတွင် ထည့်သွင်းဖော်ပြထားသည်။
အဆိုနှင့်ပတ်သက်၍ လွှတ်တော်ကိုယ်စားလှယ် (၃၀) ဦးက ထောက်ခံဆွေးနွေးခဲ့ကြပြီး၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးတင်မောင်ဆွေကလည်း ပြန်လည်ဆွေးနွေးခဲ့ကြောင်း သိရသည်။

(၁၂)ရက်ကြာပြုလုပ်ခဲ့သည့် (၁၆၆)ကြိမ်မြောက် မြန် မာ-တရုတ်-လာအို-ထိုင်း မဲခေါင်မြစ်ပူးတွဲကင်းလှည့်မှုပြီးဆုံး

(၁၂)ရက်ကြာ တရားဥပဒေစိုးမိုးရေးလှုပ်ရှားမှုအဖြစ်ပြုလုပ်သည့် (၁၆၆)ကြိမ်မြောက် မြန်မာ-တရုတ်-လာအို-ထိုင်း မဲခေါင်မြစ်ပူးတွဲကင်းလှည့်မှုပြီးဆုံးပြီဖြစ် ကြောင်း မြန်မာနိုင်ငံဆိုင်ရာ တရုတ်သံရုံးထံမှ သိရသည်။
အဆိုပါ လေးနိုင်ငံပူးတွဲကင်းလှည့်ခြင်းအား "မူးယစ်ဆေးဝါးတိုက်ဖျက်ရေးတွင် နယ်နိမိတ်မရှိ၊ လက်တွဲ၍ မူးယစ်အန္တရာယ်ပပျောက်အောင်ဆောင်ရွက်စို့"ခေါင်း စဉ်ဖြင့် တရားဥပဒေစိုးမိုးရေးရေယာဉ်(၆)စီး၊ တရားဥပဒေစိုးမိုးရေးတပ်ဖွဲ့ဝင်(၁၀၆)ဦးတို့က ပူးပေါင်းဆောင်ရွက်ခဲ့ကြကြောင်း သိရသည်။
(၁၂)ရက်တာကာလအတွင်း မူးယစ်ဆေးဝါးရာဇဝတ်မှုများကိုတိုက်ဖျက်ရန် အဓိကထားပြီး အွန်လိုင်းလိမ် လည်လောင်းကစားမှုများ၊ နယ်စပ်ဖြတ်ကျော်လောင်း ကစားမှုများ၊ အတုအပပြုလုပ်မှုနှင့် မှောင်ခိုကူးမှုစသည့် နယ်စပ်ဖြတ်ကျော်ရာဇဝတ်မှုများကိုအရေးယူနှိမ် နင်းခဲ့ကြောင်း သိရသည်။
ထို့ပြင် လာအိုနိုင်ငံ၊ Houayxay မြို့၌ ဘက်စုံသတင်းအချက်အလက်ဖလှယ်ပွဲအစည်းအဝေးကျင်းပ၍ ပူး ပေါင်းဆောင်ရွက်ရေးအတွက် သဘောတူညီခဲ့ကြပြီး တရုတ်-လာအို-မြန်မာ သုံးပွင့်ဆိုင်လက်တွေ့စစ်ဆင် ရေးပူးတွဲစခန်းချလေ့ကျင့်မှုများကိုလည်းပြုလုပ်ခဲ့ကြကြောင်း သိရသည်။

(၅)နှစ်အတွင်း အိန္ဒိယ-မြန်မာ-ထိုင်းသုံးနိုင်ငံအဝေးပြေးလမ်းမကြီးစီမံကိန်းနှင့် ကုလားတန်မြစ်ကြောင်းဘက်စုံသုံးဖြတ်သန်း
သယ်ယူပို့ဆောင်ရေးစီမံကိန်းများကိုပြီးစီးအောင်ဆောင်ရွက်မည်ဟု နိုင်ငံတော်သမ္မတ ဦးမင်းအောင်လှိုင် ပြော

(၅)နှစ်အတွင်း အိန္ဒိယ-မြန်မာ-ထိုင်းသုံးနိုင်ငံအဝေးပြေးလမ်းမကြီးစီမံကိန်းနှင့် ကုလားတန်မြစ်ကြောင်းဘက်စုံသုံးဖြတ်သန်းသယ်ယူပို့ဆောင်ရေးစီမံကိန်းများကို အရှိန်အဟန့်မြှင့်၍ ပြီးစီးအောင်ဆောင်ရွက်မည်ဟု နိုင်ငံတော်သမ္မတ ဦးမင်းအောင်လှိုင် စီမံကိန်းများနှင့်ပတ်သက်၍ ညှိနှိုင်းအစည်းအဝေးပြုလုပ်စဥ် တာဝန်ရှိသူများအား ပြောကြားခဲ့ခြင်းဖြစ်သည်။
" အိမ်နီးချင်းနိုင်ငံတွေနဲ့ ဆက်သွယ်ရေးလမ်းကြောင်းတွေကောင်းမွန်စေရေးဟာ နိုင်ငံ ရေရှည်ဖွံ့ဖြိုးတိုးတက်ရေးအတွက်အရေးကြီးပါတယ်။ ဒါ့ကြောင့် စီမံကိန်းတွေကို မြန်ဆန်စွာအကောင်အထည်ဖော်နိုင်မယ့်နည်းလမ်းတွေရှာဖွေပြီး အမြန်ဆုံးဆောင်ရွက်သင့်ပါတယ်" ဟု နိုင်ငံတော်သမ္မတက ပြောကြားခဲ့ပါသည်။
ယင်း လမ်းကြောင်းများဖွင့်လှစ်နိုင်ခြင်းဖြင့် နိုင်ငံ၏ စီးပွားရေးဖွံ့ဖြိုးတိုးတက်မှု၊ နယ်စပ်ဒေသများဖွံ့ဖြိုးတိုးတက်မှုနှင့် အိန္ဒိယနိုင်ငံနှင့် ကုန်သွယ်မှုပမာဏတိုးမြှင့်ရေးတို့ကိုများစွာအထောက်အကူပြုမည်ဟု ပြောကြားခဲ့သည်။
ထို့ပြင် နိုင်ငံတော်သမ္မတက စီမံကိန်းများအကောင်အ ထည်ဖော်ရာတွင် လုံခြုံရေးကိုအထူးဂရုပြုဆောင်ရွက်ရန်၊ လမ်းများကို နိုင်ငံတကာစံချိန်စံနှုန်းများနှင့်အညီတည်ဆောက်ရန်၊ ယခင် အာရှအဝေးပြေးလမ်းမကြီးတွင် တရားမဝင်ဆက်ကြေးကောက်ခံမှုများဖြစ်ပေါ်ခဲ့သဖြင့် ယခုအကောင်အထည်ဖော်မည့် စီမံကိန်းလမ်း ကြောင်းတွင် အလားတူဖြစ်စဉ်များမဖြစ်ပေါ်စေရေးဆောင်ရွက်ရန်လည်း မှာကြားခဲ့သည်။
ထို့နောက် အစည်းအဝေးတက်ရောက်လာကြသူများက အိန္ဒိယ-မြန်မာ-ထိုင်း အဝေးပြေးလမ်းမကြီးစီမံကိန်းနှင့် ကုလားတန်မြစ်ကြောင်းဘက်စုံသုံးဖြတ်သန်းသယ် ယူပို့ဆောင်ရေးစီမံကိန်းတို့၏ လက်ရှိဆောင်ရွက်ပြီးစီးမှု၊ ကျန်ရှိသည့်လုပ်ငန်းများနှင့် ဆက်လက်အကောင်အ ထည်ဖော်မည့် အစီအစဉ်များကို ရှင်းလင်းတင်ပြခဲ့ကြသည်။

(၃၉)ကြိမ်မြောက် ထိုင်းဘုရင့်ဖလားပိုက်ကျော်ခြင်းပြိုင်ပွဲ မြန်မာ့လက်ရွေးစင်ပိုက်ကျော်ခြင်းကစားသ မား(၂၁)ဦးဝင်ရောက်ယှဥ်ပြိုင်မည်

သြဂုတ် ၃ ရက်မှ သြဂုတ် ၁၁ ရက်အထိ ထိုင်းနိုင်ငံ၊ ဘန်ကောက်မြို့၌ကျင်းပမည့် (၃၉)ကြိမ်မြောက် ထိုင်းဘုရင့်ဖလားပိုက်ကျော်ခြင်းပြိုင်ပွဲကို မြန်မာ့လက်ရွေး စင်ပိုက်ကျော်ခြင်းကစားသမား(၂၁)ဦးဝင်ရောက်ယှဥ်ပြိုင်မည်ဖြစ်ကြောင်း မြန်မာနိုင်ငံပိုက်ကျော်ခြင်းအဖွဲ့ချုပ်ထံမှ သိရသည်။
မြန်မာ့လက်ရွေးစင်ကစားသမားများဖြစ်သည့် ထူးအောင်ကျော်၊ ဟန်ဝင်းထွဋ်၊ ထွန်းဝဏ္ဏအောင်၊ အောင်ဇော်ဟိန်း၊ ရဲထက်၊ ချစ်လွန်းပို၊ အောင်မျိုးကျော်၊ ကျော်မင်းသူ၊ ဇော်မင်းခန့်၊ အောင်အောင်၊ ရန်ပိုင်စိုး၊ သက်ပိုင်စိုး၊ ဇင်လင်းထူး၊ ချယ်ရီလင်းသစ်၊ ယဉ်ယဉ်ဌေး၊ စန်းသီတာမိုး၊ ဖူးဖူး၊ ဆုမွန်ကျော်၊ နှင်းနှင်းဝေ၊ နန့်မေသူထွေးနှင့် ရွှန်းလဲ့ဇင် တို့ဝင်ရောက်ယှဥ်ပြိုင်မည်ဖြစ်ကြောင်း သိရသည်။
အမျိုးသားအသင်းက Men Team Regu Event (သုံးယောက်တွဲအသင်းလိုက်ပြိုင်ပွဲ)၊ Men Regu Event (သုံးယောက်တွဲပြိုင်ပွဲ)၊ Men Quadrant Event (လေးယောက်တွဲပြိုင်ပွဲ)၊ Men Hoop Event (ကွင်းသွင်းခြင်းခတ်ပြိုင်ပွဲ)တို့တွင်ယှဥ်ပြိုင်မည်ဖြစ်ကြောင်း သိရသည်။
ထို့ပြင် အမျိုးသမီးအသင်းမှလည်း Women Double Event (နှစ်ယောက်တွဲပြိုင်ပွဲ)၊ Women Quadrant Event (လေးယောက်တွဲပြိုင်ပွဲ)၊ Women Hoop Event (ကွင်းသွင်းခြင်းခတ်ပြိုင်ပွဲ)တို့၌ယှဥ်ပြိုင်သွားမည်ဖြစ် ကြောင်း သိရသည်။
မြန်မာ့လက်ရွေးစင်ပိုက်ကျော်ခြင်းအသင်းအား ဦးသန်းလွင်(အဖွဲ့ခေါင်းဆောင်)၊ ဦးကျော်မင်းစိုး(အမျိုး သားအသင်းနည်းပြ)၊ ဦးထက်ဇော်(အမျိုးသားအသင်းနည်းပြ)၊ ဦးအောင်ချိုမြင့်(အမျိုးသမီးအသင်းနည်းပြ)၊ ဒေါ်နမ့်ယဉ်ယဉ်မြင့်(အမျိုးသမီးအသင်းနည်းပြ)တို့ကတာဝန်ယူသွားကြမည်ဖြစ်ကြောင်း သိရသည်။

မြန်မာ့ပင်လယ်ပြင်အတွင်း နစ်မြုပ်နေသည့် ကုန်တင်ရေယာဉ်မှ အမှုထမ်း ၁၂ ဦးအား လုံခြုံရေးတပ်ဖွဲ့ဝင်များ ကယ်ဆယ်

တနင်္သာရီတိုင်းဒေသကြီး၊ ဟိန်းဇဲဘုတ်ကျွန်းအနီး မြန်မာ့ပင်လယ်ပြင်အတွင်း လုံခြုံရေးတာဝန်များ ဆောင်ရွက်နေသည့် တပ်မတော်(ရေ)မှ တပ်ဖွဲ့ဝင်များသည် ရေဝင်နစ်မြုပ်နေသော ကုန်တင်ရေယာဉ်တစ်စီးမှ အမှုထမ်း ၁၂ ဦးအား ရှာဖွေကယ်ဆယ်နိုင်ခဲ့ကြောင်း သိရသည်။
ဖြစ်စဉ်မှာ ဇူလိုင် ၈ ရက် ညနေ ၆ နာရီ ၃၀ မိနစ်ခန့်တွင် ကုလားကုတ်ကျွန်း၏ အနောက်ဘက် ရေမိုင် ၂၇ ဒသမ ၅ မိုင်အကွာ မြန်မာ့ပင်လယ်ပြင်အတွင်း MV ATK Nyein အမည်ရှိ ကုန်တင်ရေယာဉ်တစ်စီး ရေဝင်နစ်မြုပ်နေကြောင်း MV Oceanstar ကုန်တင်ရေယာဉ်၏ သတင်းပေးပို့ချက်အရ သိရှိခဲ့ရခြင်းဖြစ်သည်။
သတင်းရရှိပြီးနောက် တပ်မတော်(ရေ)မှ တပ်ဖွဲ့ဝင်များက အဆိုပါနေရာသို့ သွားရောက်၍ ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ရာ နစ်မြုပ်နေသည့် MV ATK Nyein ရေယာဉ်အား တွေ့ရှိခဲ့ပြီး ရေယာဉ်ပေါ်တွင် လိုက်ပါလာသည့် အမှုထမ်း ၁၂ ဦးအား ဘေးကင်းလုံခြုံစွာ ကယ်ဆယ်နိုင်ခဲ့သည်။
ကယ်ဆယ်ထားသည့် အမှုထမ်းများအား စစ်ရေယာဉ်ပေါ်တွင် လိုအပ်သည့် ကျန်းမာရေးစစ်ဆေးမှုများ ဆောင်ရွက်ပေးကာ အဝတ်အထည်များနှင့် စားသောက်ဖွယ်ရာများ ထောက်ပံ့ပေးခဲ့သည်။
ထို့နောက် ကယ်ဆယ်ခံရသူများအား ဇူလိုင် ၉ ရက် နံနက် ၁၀ နာရီတွင် မော်လမြိုင်မြို့၊ ရာဇာမင်းတံတား၌ သက်ဆိုင်ရာတာဝန်ရှိသူများထံ စနစ်တကျ လွှဲပြောင်းပေးအပ်ခဲ့ကြောင်း သိရသည်။

ရတနာပုံဆိုက်ဘာစီးတီး စီမံကိန်းအတွက် ရင်းနှီးမြှုပ်နှံရန် ပြည်တွင်း၊ ပြည်ပရင်းနှီးမြှုပ်နှံသူများ ဖိတ်ခေါ်

ရတနာပုံဆိုက်ဘာစီးတီး စီမံကိန်းကို အကောင်အထည်ဖော်ဆောင်ရွက်ရန်အတွက် စိတ်ဝင်စားသည့် ပြည်တွင်း၊ ပြည်ပ ကုမ္ပဏီများထံမှ ရင်းနှီးမြှုပ်နှံဆောင်ရွက်လိုမှုဆိုင်ရာ စိတ်ဝင်စားမှုအဆိုပြုလွှာ (Expression of Interest - EOI) များ တင်သွင်းနိုင်ရန် ရတနာပုံဆိုက်ဘာစီးတီး စီမံကိန်းကြီးကြပ်မှုကော်မတီက ဖိတ်ခေါ်ထားသည်။
အဆိုပါစီမံကိန်းကို မန္တလေးတိုင်းဒေသကြီး၊ ပြင်ဦးလွင်ခရိုင်၊ မန္တလေး-လားရှိုးလမ်းမကြီး ၂၁ မိုင်အနီးရှိ မြေဧရိယာ စုစုပေါင်း ၂,၂၀၀ ဧကအနက် ၁,၄၀၀ ဧကကို အသုံးပြု၍ Soft-based Industry အခြေခံသည့် ရတနာပုံဆိုက်ဘာစီးတီး စီမံကိန်းအဖြစ် ပုဂ္ဂလိကရင်းနှီးမြှုပ်နှံမှုဖြင့် အကောင်အထည်ဖော်ဆောင်ရွက်သွားမည်ဖြစ်သည်။
စိတ်ဝင်စားမှုအဆိုပြုလွှာပုံစံများကို ၂၀၂၆ ခုနှစ် ဇူလိုင် ၁၀ ရက် (သောကြာနေ့) မှ ဩဂုတ် ၁၀ ရက် (တနင်္လာနေ့) အထိ ရုံးချိန်အတွင်း ရောင်းချပေးသွားမည်ဖြစ်ပြီး အဆိုပြုလွှာများကို ၂၀၂၆ ခုနှစ် ဩဂုတ် ၂၅ ရက် (အင်္ဂါနေ့) ညနေ ၄ နာရီ နောက်ဆုံးထား၍ တင်သွင်းရမည်ဖြစ်သည်။
အဆိုပြုလွှာပုံစံများကို ရုံးအမှတ် (၄၀)၊ နေပြည်တော်ရှိ မြို့ပြနှင့်အိမ်ရာဖွံ့ဖြိုးရေးဦးစီးဌာနတွင် ရယူနိုင်ပြီး အသေးစိတ်သိရှိလိုပါက ရုံးချိန်အတွင်း တယ်လီဖုန်းအမှတ် (၀၆၇-၃၄၀၇၃၁၁) သို့ ဆက်သွယ်မေးမြန်းနိုင်ကြောင်း သိရသည်။
ရတနာပုံဆိုက်ဘာစီးတီး စီမံကိန်းသည် နည်းပညာအခြေပြု စီးပွားရေးလုပ်ငန်းများနှင့် Soft-based Industry များ ဖွံ့ဖြိုးတိုးတက်လာစေရန် ရည်ရွယ်သည့် စီမံကိန်းတစ်ရပ်ဖြစ်ပြီး ပြည်တွင်း၊ ပြည်ပ ရင်းနှီးမြှုပ်နှံမှုများကို ဖိတ်ခေါ်လျက်ရှိကြောင်း ရတနာပုံဆိုက်ဘာစီးတီး စီမံကိန်းကြီးကြပ်မှုကော်မတီ၊ ဆောက်လုပ်ရေးဝန်ကြီးဌာနမှ ထုတ်ပြန်ထားသည်။

ချင်းဖိုက်တာ ဂျိုရှုအာဗန်နှင့် ဘရန်ဒန်ရွိုင်ဗယ်တို့ တစ်နှစ်တာအကောင်းဆုံးတွဲဆိုင်းဆု ဆွတ်ခူး

17th Annual Fighters Only World MMA Awards ဆုပေးပွဲတွင် ချင်းလူမျိုး MMA ဖိုက်တာ ဂျိုရှုအာဗန် (Joshua Van) နှင့် အမေရိကန်ဖိုက်တာ ဘရန်ဒန်ရွိုင်ဗယ် (Brandon Royval) တို့က ၂၀၂၅ ခုနှစ်အတွက် Fight of the Year (တစ်နှစ်တာအကောင်းဆုံးတွဲဆိုင်းဆု) ကို ဆွတ်ခူးရရှိခဲ့ကြောင်း သိရသည်။
ဂျိုရှုအာဗန်နှင့် ဘရန်ဒန်ရွိုင်ဗယ်တို့၏ တွဲဆိုင်းသည် Belal Muhammad ပါဝင်သည့်ပွဲ၊ Esteban Ribovics နှင့် Daniel Zellhuber တို့၏ပွဲ၊ Usman Nurmagomedov နှင့် Paul Hughes တို့၏ပွဲ၊ Nazim Sadykhov နှင့် Nikolas Motta တို့၏ ပွဲများကို ကျော်ဖြတ်ကာ ယခုဆုကို ရရှိခဲ့ခြင်းဖြစ်သည်။
ထို့ပြင် ဂျိုရှုအာဗန်သည် ယခုနှစ် Fighters Only World MMA Awards တွင် Breakthrough Fighter of the Year ဆုကိုလည်း ရရှိထားပြီး တစ်နှစ်တည်းအတွင်း ဆုနှစ်ဆု ဆွတ်ခူးနိုင်ခဲ့ကြောင်း သိရသည်။

မုံရွာ(ညောင်ပင်ကြီး) - ပုလဲ - ဂန့်ဂေါ - ဟားခါးလမ်းပိုင်း လမ်းတိုးချဲ့ခြင်းလုပ်ငန်းများကို ဒုတိယဝန်ကြီး ဦးမျိုးမြင့် ကွင်းဆင်းစစ်ဆေး

ဆောက်လုပ်ရေးဝန်ကြီးဌာန၊ဒုတိယဝန်ကြီးဦးမျိုးမြင့်နှင့်အဖွဲ့သည် မုံရွာ(ညောင်ပင်ကြီး) - ပုလဲ - ဂန့်ဂေါ - ဟားခါးလမ်း (၃၁၃.၄၆၀ ကီလိုမီတာ မှ ၃၁၃.၅၈၀ ကီလိုမီတာ)ကြား အလျား ၁၂၀ မီတာ၊ ပျမ်းမျှအကျယ် ၆.၂ မီတာရရန် လမ်းတာချဲ့ခြင်းလုပ်ငန်းဆောင်ရွက်နေသည့် လုပ်ငန်းခွင်သို့ သွားရောက်စစ်ဆေးခဲ့ကြောင်း သိရသည်။
လုပ်ငန်းခွင်၌ အဆိုပါလမ်းပိုင်း တာဝန်ခံအင်ဂျင်နီယာမှ လက်ရှိလမ်းတိုးချဲ့တည်ဆောက်ခြင်းလုပ်ငန်း ဆောင်ရွက်နေမှု အခြေအနေများနှင့် ဆက်လက်အကောင်အထည်ဖော် ဆောင်ရွက်မည့်လုပ်ငန်းအခြေအနေများကို ရှင်းလင်းတင်ပြခဲ့သည်။
ယင်းအပေါ် ဒုတိယဝန်ကြီးက လုပ်ငန်းခွင်အန္တရာယ် ကင်းရှင်းရေး ဦးစားပေးဆောင်ရွက်ရန်၊ မိုးရာသီတွင် ရေမတင်စေရေးနှင့် ရေစီးရေလာကောင်းမွန်စေရေး စနစ်တကျဆောင်ရွက်ရန်၊ မိုးတွင်းတွင် တောင်ပြို၍ လမ်းပြတ်တောက်မှုမရှိစေရေး တာဝန်ရှိသူ အဆင့်ဆင့်မှ ကြိုတင်စုဖွဲ့၍ အလေးထားကြပ်မတ်ဆောင်ရွက်ရန်၊ ဆောင်ရွက်မည့် လျာထားချက်များ အချိန်မီပြီးစီးအောင် ဆောင်ရွက်သွားရန်တို့ကို မှာကြားခဲ့သည်။
ထို့နောက် ဒုတိယဝန်ကြီးနှင့်အဖွဲ့သည် ချင်းပြည်နယ်၊ ဟားခါးမြို့ရှိ လမ်းဦးစီးဌာန၊ ညွှန်ကြား ရေးမှူး(မြို့ပြ)ရုံး၊ မြို့ပြနှင့်အိမ်ရာဖွံ့ဖြိုးရေးဦးစီးဌာန၊ ပြည်နယ်ညွှန်ကြားရေးမှူးရုံးနှင့် ဝန်ထမ်းအိမ်ရာများအား လှည့်လည်ကြည့်ရှုစစ်ဆေးခဲ့ကြောင်း သိရသည်။

ရန်ကုန်မြို့အတွင်း ရှုပ်ထွေးနေသည့် ဆက်သွယ်ရေးကြိုးများကို မြေအောက်ကေဘယ်စနစ်သို့ ပြောင်းလဲရန် စီစဉ်

ရန်ကုန်မြို့အတွင်း မြို့ပြအင်္ဂါရပ် ပျက်ယွင်းစေသည့် အဓိကပြဿနာတစ်ခုဖြစ်သော ဆက်သွယ်ရေးကြိုး ရှုပ်ထွေးမှုများကို ရှင်းလင်းပြီး မြေအောက်သို့ ရွှေ့ပြောင်းတပ်ဆင်မည့် လုပ်ငန်းစဉ်များအတွက် လုပ်ငန်းညှိနှိုင်းအစည်းအဝေးတစ်ခုကို ဇူလိုင်လ ၉ ရက် (ယနေ့)မွန်းလွဲပိုင်းက ရန်ကုန်တိုင်းဒေသကြီး အစိုးရအဖွဲ့ရုံးတွင် ပြုလုပ်ခဲ့သည်။
အဆိုပါ လုပ်ငန်းစဉ်များကို ဆက်လက်အကောင်အထည်ဖော်နိုင်ရန် ရန်ကုန်တိုင်းအစိုးရအဖွဲ့ လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီး ဒေါက်တာမျိုးသော် ဦးဆောင်၍ ဆက်သွယ်ရေးကွန်ရက် တိုးချဲ့တည်ဆောက်ရေး ပေါင်းစပ်ညှိနှိုင်းကော်မတီမှ တာဝန်ရှိသူများနှင့် သက်ဆိုင်ရာ ဆက်သွယ်ရေးကုမ္ပဏီ ကိုယ်စားလှယ်များ တွေ့ဆုံဆွေးနွေးခဲ့ကြခြင်းဖြစ်သည်။
အစည်းအဝေးတွင် မြေအောက်ကေဘယ်စနစ် (Underground Cable System) သို့ ပြောင်းလဲရေးနှင့် ပတ်သက်၍ လက်ရှိ မြေပြင်တွင် ဆောင်ရွက်ပြီးစီးမှုများနှင့် ရှေ့ဆက်လုပ်ဆောင်မည့် လုပ်ငန်းစီမံချက်များကို ရန်ကုန်မြို့တော်စည်ပင်သာယာရေးကော်မတီ၊ လမ်းနှင့်တံတားဌာနမှ ဌာနမှူး ဦးလင်းနိုင် က ရှင်းလင်းတင်ပြခဲ့သည်။
ထို့ပြင် တက်ရောက်လာသည့် ကုမ္ပဏီကိုယ်စားလှယ်များနှင့် ဌာနဆိုင်ရာများက ကဏ္ဍအလိုက် ပူးပေါင်းဆောင်ရွက်မည့် အစီအစဉ်များကို အပြန်အလှန် ဆွေးနွေးခဲ့ကြပြီး လိုအပ်သည်များကို တိုင်းဒေသကြီးဝန်ကြီးက ပေါင်းစပ်ညှိနှိုင်းပေးခဲ့ကြောင်း သိရသည်။

ချင်းပြည်နယ်လွှတ်တော်ဥက္ကဋ္ဌ ဦးဆောင်သော လွှတ်တော်ကိုယ်စားလှယ်အဖွဲ့ ဗိုလ်ချုပ်အောင်ဆန်းဈေးသို့ သွားရောက်လေ့လာ

ချင်းပြည်နယ်လွှတ်တော်ဥက္ကဋ္ဌ ဦးကောလ်လျန်ထွန်း ဦးဆောင်သော လွှတ်တော်ကိုယ်စားလှယ်အဖွဲ့သည် ဇူလိုင် (၉)ရက် နေ့လည်ပိုင်းတွင် ရန်ကုန်မြို့ ပန်းဘဲတန်းမြို့နယ်ရှိ ဗိုလ်ချုပ်အောင်ဆန်းဈေးသို့ သွားရောက်လေ့လာခဲ့သည်။
လေ့လာရေးခရီးစဉ်အတွင်း ချင်းပြည်နယ်လွှတ်တော် ဒုတိယဥက္ကဋ္ဌ ဦးသန့်စင်ဦးနှင့် ကိုယ်စားလှယ်အဖွဲ့ဝင်များ၊ ရန်ကုန်တိုင်းဒေသကြီးလွှတ်တော် ကော်မတီအသီးသီးမှ ဥက္ကဋ္ဌများနှင့် အတွင်းရေးမှူးများ လိုက်ပါခဲ့ကြပြီး ဗိုလ်ချုပ်အောင်ဆန်းဈေးအတွင်း လှည့်လည်ကြည့်ရှုကာ ဈေးဆိုင်များနှင့် ရိုးရာလက်မှုပစ္စည်းများ၊ ဒေသထွက်ကုန်ပစ္စည်းများကို စိတ်ဝင်တစား လေ့လာခဲ့ကြသည်။